Iragarkia

153. ALDIZKARIA - 2010eko abenduaren 17a

1. NAFARROAKO FORU KOMUNITATEA

1.1. XEDAPEN OROKORRAK

1.1.1. Foru legeak eta legegintzako foru dekretuak

20/2010 FORU LEGEA, abenduaren 13koa, Nafarroako Foru Komunitateko Odol eta Ehun Bankua izeneko entitate publikoa sortzen duena eta Nafarroan Giza Ehunen eta Zelulen Transfusio Sarearen antolamendua ezartzen duena.

NAFARROAKO GOBERNUKO LEHENDAKARIA NAIZEN HONEK.

Aditzera ematen dut Nafarroako Parlamentuak onetsi duela honako:

FORU LEGEA, NAFARROAKO FORU KOMUNITATEKO ODOL ETA EHUN BANKUA IZENEKO ENTITATE PUBLIKOA SORTZEN DUENA ETA NAFARROAN GIZA EHUNEN ETA ZELULEN TRANSFUSIO SAREAREN ANTOLAMENDUA EZARTZEN DUENA.

ZIOEN AZALPENA

Honako foru lege hau prestatu da odol-ematearen alorreko eta zelulen nahiz ehunen lorpen, manipulazio, egiaztapen, preserbazio, biltegiratze, banatze eta inplantatzearen alorreko legedi indarduna egokitze aldera, horretarako oinarriturik Foru Eraentza Berrezarri eta Hobetzeari buruzko Lege Organikoa onetsi zenetik Nafarroari osasun-alorrean dagozkion eskumenetan, Osasunari buruzko azaroaren 23ko 10/1990 Foru Legean, zeinak VI. tituluan garatzen baitu Osasunbideko zuzendaritza-, kudeaketa- eta partaidetza-organo zentralen arauketa, eta Nafarroako Gobernuari eta bere Lehendakariari buruzko abenduaren 3ko 14/2004 Foru Legean nahiz Nafarroako Foru Komunitatearen Administrazioari buruzko abenduaren 3ko 15/2004 Foru Legean, zeinek aldaketak ezartzen baitituzte Foru Komunitateko Administrazioaren eta bere erakunde autonomoen administrazio-antolamenduaren arauketan.

Foru lege honen xedea da odoletik eta giza ehunetatik eratorritako baliabideei dagozkien administrazio- eta kudeaketa-egiturak modernizatu, eguneratu eta indarreko legediari egokitzea, eta azken bateko jomugatzat du Nafarroako herritarrentzako osasun-prestazioen kalitatea hobetzea, produktu horien hornidura osasun-kalitatearen eta -segurtasunaren aldetik aproposak diren baldintzetan eskuratzen dela ziurtatuz eta haien eskuragarritasunaren kudeaketa optimizatuz, unean uneko emateen arabera.

Ezinbesteko premia da organismo publiko bat sortzea zeinak Foru Komunitaterako zentralizatuko eta esleituta edukiko baititu odol-, zelula- eta ehun-bankuaren eginkizunak, eta bermatuko baitu indarreko legedi konplexu eta zorrotza betetzea, produktuen kalitatea ziurtatuz haien lorpenetik erabilera klinikora arte, bai eta produktu horien segurtasuna ere, betiere babes gorena emanez artaturiko pertsonei.

Transfusio-sarea ehunen alorrera hedatzeak ahalbidetu egiten du haiei aplikatzea segurtasunari eta kalitateari dagokienez eskatzen den exijentzia-maila, odolaren kasuan jadanik ezarrita dagoenaren antzekoa, eta halaber ahalbidetzen du zelulen eta ehunen alorreko baliabideen kudeaketaren eta eskuragarritasunaren optimizazioa bermatzea.

Azken batean, osasun-laguntzaren zerbitzuan zelulen eta giza ehunen erabilerak duen garrantziak, haiek osasun publikoan duten garrantziak eta haien administrazio-kudeaketak eta prozesatzeak (azken horiek guztiz konparagarriak dira odoletik eratorriak diren produktuekin) arrazoizkotzat joarazten dute bi zerbitzu horiek elkartzea, bukaerako produktuak estandarizatzeko eta dauden baliabideak optimizatzeko.

Baliabide eskasak direnez, soilik giza jatorrikoak eta emate altruistatik datozenak, ez da ezohikoa izaten desdoikuntzak egotea odolaren, zelulen eta giza ehunen eskaera handiaren eta horien eskuragarritasunaren artean; horrela gertatzen da ezen haien kudeaketarik onena bateragarria dela, bakar-bakarrik, administrazio publikoari eta haren menpeko organismoei osasunaren gainean dagokien zaintza orokorraren bermearekin.

Europar Batasuneko herrialde garatu guztietan produktu horien kudeaketa integralaren ardura utzi da monografikoki horretan diharduten osasun-zentroen eskuetan. Zentro horiek erantzuten diete lurralde jakin bateko osasun-zentro publiko eta pribatu guztiek odol, zelula eta giza ehunei dagokienez dauzkaten beharrizanei, emate altruisten sustapenera bideraturiko baliabideen efizientzia areagotze aldera, eta autohornikuntza, odol-, zelula- eta ehun-erreserba eskuragarrien erabileraren optimizazioa nahiz prozesu guztian zeharreko segurtasun-berme gorenak lortze aldera.

Europar Batasuneko herrialdeak jarduten direneko lege-esparrua definituta dago, transfusioaren eta ehunen kasuan, nazioz gaindiko arauen bitartez, ardatz gisa dutenak erantzun bat ematea, alde batetik, biztanleei, osasun-hobetzeari eta eritasuna tratatzeari buruz espero dituzten zerbitzuak direla-eta, eta bestetik, legediaren eta gizartearen exijentzia bati; hots, emate-ekintza taxutzea ekintza boluntario eta altruista gisa, sustatu eta babestu beharrekoa.

Horregatik, foru lege honen bidez eratzen da "Nafarroako Foru Komunitateko Odol eta Ehun Bankua" deituriko entitate publikoa.

Nafarroako Odol eta Giza Ehunen Banku berriak, bere eraketan, bereganatzen du Osasunbidea erakunde autonomoari atxikitako Nafarroako Odol Transfusioen Zentroa zenaren egitura.

Odolaren eta giza ehunen banku bateratu eta zentralizatua sortuz lortu nahi da transfusio, zelula eta giza ehunei dagokienez dauden beharrizanen asetzea optimizatzea, emate altruista sustatzeko kanpainak koordinatzea, eskueran dauden giza baliabideak eta baliabide materialak kontzentratzea eta prozesu osoaren gaineko kontrola eskuratzea. Horren guztiaren azken helburuak dira autohornikuntza erdiestea eta kalitatea ziurtatzea, odola, zelulak eta ehunak lortzen direnetik, bai eta prozesatzen, egiaztatzen, preserbatzen eta banatzen diren bitartean ere, harik eta azkenean txertatzen edo haien transfusioa egiten den arte. Jarduera-zentralizazio horrek posible eginen luke prestakuntza- eta ikerketa-jarduera berriei ekitea, bete beharreko oinarrizko arauek ezartzen duten bezala.

Foru lege honek, halaber, xede du organo-erauzketa eta -transplanteei buruzko urriaren 27ko 30/1979 Legea aplikatzea, bai eta abenduaren 30eko 2070/1999 Errege Dekretua ere, zeinaren bidez arautzen baitira giza organoen eskuratze eta erabilera klinikoko jarduerak eta organo eta ehunen emate eta transplantearen alorreko lurralde-koordinazioa. Horietara egokitzeko, eta aurki argitaratuko diren Europako gidalerro berrien zain, osasun-agintariak behartuta daude araudi horri jarraituz jardutera, eta, horretarako, foru lege honek arautzen duen Nafarroako Odol eta Ehun Bankuaren egitura erabiliko dute, transplante-koordinazioaren bidez, zeinak "Emate eta Transplanteen Koordinazioa" izena hartuko baitu.

Odol-emateari buruzko gaur egungo legedia.

Odolaren eta bere osagaien kalitate-maila altua, Estatu kide guztietan baliokidea, bermatzen laguntzeko, bai eta herritarrek odol-transfusioan duten konfiantza indartzen laguntzeko ere, Europako Parlamentuak 2002/98/EE Zuzentaraua onetsi zuen, zeinaren bidez kalitate- eta segurtasun-arauak ezartzen baitira odolaren eta haren osagaien erauzketa, egiaztapen, tratamendu, biltegiratze eta banaketarako.

Batzordearen 2004/33/EE Zuzentarauak, 2004ko martxoaren 22koak, 2002/98/EE Zuzentaraua aplikatzen du, odolaren eta odol-osagaien zenbait baldintza teknikori dagokienez.

2005eko irailaren 16ko 1088/2005 Errege Dekretuak testu bateratuan biltzen eta ordenatzen du aurretik zegoen araudi nazional guztia, eta horrez gain, bertako antolamendu juridikoan txertatzen ditu 2002/98/EE eta 2004/33/EE europar zuzentarauetako xedapenak.

Urriaren 11ko 1343/2007 Errege Dekretuaren bidez ezartzen dira transfusio-zentro eta -zerbitzuetako kalitate-sistemari dagozkion arauak eta zehaztapenak. Errege dekretu horren xedea eta edukia da Batzordearen 2005eko irailaren 20ko 2005/63/EE Zuzentarauaren edukiak betetzea, kalitate-sistemen alorrean.

Bestalde, maiatzaren 28ko 16/2003 Legeak, Osasun Sistema Nazionalaren Koherentzia eta Kalitateari buruzkoak, 59. artikuluan zerrendatzen du, kalitatea hobetzeko egin beharrekoak diren ekintzen artean, besteak beste, ezbeharren erregistroa, gaixoarentzat segurtasun-problema potentziala gertatzen diren praktikei buruzkoa.

Otsailaren 9ko SCO/322/2007 Agindua, odolaren eta odol-osagaien trazabilitate eta efektu negatibo larrien jakinarazpen betebeharrak ezartzen dituena, eman zen, hain zuzen, 1088/2005 Errege Dekretua betetzeko, zeinaren VII. kapituluak arautzen baitu odol-zainketa, eta exijitzen baitu, alde batetik, sistema bat ezartzea, trazabilitatea bermatzea ahalbidetuko duena, odol-emateak, odol-emaileak eta gaixoak banan-banan eta doitasun osoz identifikatzeko zainketa-prozedura antolatuen bidez, eta bestetik, erregistro-sistemak ezarri eta mantentzea, informazioa ebaluatu ahal izateko.

Zelula eta ehunei buruzko gaur egungo legedia.

Europar Batasunaren esparruan, autohornikuntza, segurtasuna, altruismoa eta zelulen eta ehunen ematea arautu dira Europar Parlamentu eta Kontseiluak 2004ko martxoaren 31n emandako 2004/23/EE Zuzentarauan (giza zelula eta ehunen emate, lorpen, ebaluazio, prozesatze, preserbazio, biltegiratze eta banaketarako kalitate- eta segurtasun-arauak ezartzeari buruzkoa) eta Batzordearen 2006/17/EE Zuzentarauan, otsailaren 8koan, zeinaren bidez aplikatzen baita Europar Parlamentu eta Kontseiluaren 2004/23/EE Zuzentaraua, giza zelula eta ehunen emate, lorpen eta ebaluaziorako zenbait betekizun teknikori dagokienez.

Azaroaren 10eko 1301/2006 Errege Dekretuak Europako zuzentarauen edukiak Estatuko antolamendu juridikoan txertatzen ditu.

Lege honek testu beren bildu eta ordenatzen du aurretik aipaturiko araudi nazional eta europar guztia, eta Nafarroako Foru Komunitateko antolamendu juridikoan txertatzen du.

Nafarroako Odol eta Ehun Bankua da erreferentziako organismoa, transfusio-baliabideei eta giza zelula eta ehunei dagokienez, Foru Komunitateko zerbitzu-zentro guztietarako, hala publikoak nahiz pribatuak eta itunduak, baina entitate publiko batek eduki behar duen orokortasun-, konfidentzialtasun- eta irabazien menpe ez egotearen bermearekin.

Nafarroako Transfusioen eta Giza Zelula eta Ehunen Sarea eratzen da hemoterapiaren eta zelula eta ehunen transplanteen erakunde funtzional gisa, honako maila hauetan arituko dena:

-Nafarroako Odol eta Ehun Bankua (NOEB).

-Ospitaleetako transfusio-zerbitzuak.

-Zelulen eta ehunen lorpen eta inplanterako ospitale-unitateak.

-Transplanteen koordinazio autonomikoa, gaur egun Emateen eta Transplanteen Koordinazio Autonomikoa.

Foru legeak bi kapitulu ditu.

I. kapituluan, Odol eta Ehun Bankuaren eraketa eta izaera definitzen da. Osasunbideari atxikia dago, "Nafarroako Foru Komunitateko Transfusio-zentro Komunitario eta Giza Zelula eta Ehunen Banku" izaerarekin, eta zuzenbide publikoko entitatea gisa. Halaber, kapitulu horretan ezartzen dira erakunde horren jarduera moldatu behar duten helburuak eta funtzioak, baldin eta autohornikuntza eta produktuen segurtasun gorena erdietsiko bada.

Nafarroako Foru Komunitateko Transfusio, Zelula eta Ehunen Sarea arautzen da. Honakoek osatua da: Nafarroako Odol eta Ehun Bankuak, transfusioko ospitale-zerbitzuek, zelulak eta ehunak lortzeko eta inplantatzeko unitateek, eta Emate eta Transplanteen Koordinazio Autonomikoak.

Giza odolarekin eta giza jatorriko organo eta ehunekin loturik ardurapean ipini zaion jardueraren nolakotasunarengatik, Nafarroako Odol eta Ehun bankuak honako arauetan xedaturikoa bete beharko du: odol-emateari buruzko 1088/2005 Errege Dekretua, giza zelula eta ehunei buruzko 1301/2006 Errege Dekretua, eta giza organo eta ehunei buruzko 2070/1999 Errege Dekretua.

II. kapituluan zehazten dira Nafarroako Odol eta Ehun Bankuko zuzendaritza-organoak, bai eta kontsulta- eta aholku-organoak ere, honakoek osatuak: Emate eta Transplanteei buruzko Batzorde Aholku-emailea, Hemoterapia Batzordea, Ehunen Batzorde Teknikoa eta Transfusioko Ospitale-batzordeak.

I. KAPITULUA

Eraketa, izaera eta xedea

1. artikulua. Eraketa.

Nafarroako Odol eta Ehun Bankua entitate publikoa eratzen da, Osasunbideari beste edozein zentro bezala atxikia, Osasunbideko Laguntza Espezializatuko Zuzendaritzaren menpean, eta osasun-zerbitzuen alorreko erakunde bati dagozkion kontsiderazioarekin eta zuzendaritza-egiturarekin.

2. artikulua. Izaera eta araubide juridikoa.

1. Nafarroako Odol eta Ehun Bankuak (NOEB) izanen du Osasunbideko Laguntza Espezializatuko Zuzendaritzaren menpeko gainerako zentro publikoen izaera eta araubide juridiko bera. Zentro horien zerrenda agertzen da Osasunbidearen Estatutuetako 33.1.b) artikuluan. Estatutu hauek uztailaren 3ko 45/2006 Foru Dekretuz onetsi eta apirilaren 12ko 19/2010 Foru Dekretuz aldatu ziren.

2. Osasunbideko zuzendari kudeatzaileak NOEBen titularrarengan deskontzentratzen du, haren jarduera-esparruaren barrenean, edonolako administrazio-kontratuak sinatzeko eskumena, baldin eta haien izapidetzerako aginduzkoa den dokumentu bakarra kasuko faktura bada, zenbatekoak ez duelako gainditzen administrazio-kontratazioari buruzko foru-araudian ezarritako kopurua.

3. artikulua. Helburua.

NOEBen helburua izanen da giza odoletik eta giza zelula, ehun eta organoetatik eratorritako produktuen osasun-premiei erantzutea, bai osasun-sare publikoaren bai osasun pribatuaren eta itunduaren esparruan, eta bermatuko du produktu horien lorpena, biltegiratzea, kudeaketa eta hornidura, uneko eskuragarritasunaren arabera, bai eta Transplanteen Erakunde Nazionalarekiko koordinazioa ere.

NOEBek koordinatuko du Nafarroako Foru Komunitateko Transfusio, Zelula eta Ehunen Sarea, honakoek osatua:

1. Nafarroako Odol eta Ehun Bankua (NOEB).

2. Odolaren eta hemoderibatuen ospitale-gordailuak: transfusio-zerbitzuak.

3. Zelulen eta ehunen lorpen eta/edo inplanterako ospitale-unitateak.

4. Nafarroako Emateen eta Transplanteen Koordinazio Autonomikoa.

4. artikulua. Doakotasuna eta irabazi-asmorik eza.

Odola, zelulak, ehunak eta organoak emateari buruzko Europako gidalerroetako oinarrizko printzipioak aplikatuz, ematea ekintza boluntariotzat eta altruistatzat jotzen da, eta emaileak ezin du ordain ekonomikorik jaso; halaber, hartzaileari ere ez zaio inolako ordainik exijituko erabilitako odol, zelula, ehun eta organoengatik. Odol-, zelula-, ehun- eta organo-establezimenduen jarduerek ez dute irabazi-asmorik izanen, eta soil-soilik ordainarazi ahalko dira baimendutako jarduerak egiteagatik emandako zerbitzuen egiazko kostuak.

5. artikulua. Helburuak.

NOEB entitate publikoak honako helburu orokor hauek ditu:

a) 1088/2005 Errege Dekretua bete dadin zaintzea eta Nafarroako Gobernuaren gidalerro estrategikoak gauzatzea hemoterapiari eta osasun-erabilerarako giza zelulen eta ehunen lorpenari dagokienez, bai eta arlo horretan Osasun Departamentuak zehazten duen politikari dagokionez ere.

b) Nafarroan emate doakoa eta altruista sustatu eta bultzatzea, eta beharrezkotzat jotzen diren azpiegituren eraikuntzan eta zerbitzuen ematean laguntzea.

c) Nafarroako Administrazioaren aurrean jardutea premien asetze orokorra lortzeko eta odola, zelulak eta ehunak bana dakizkien haien beharrean dauden osasun-zentro guztiei.

d) Nafarroaren beregaintasuna lortzea odolari eta hemoderibatuei dagokienez.

e) Nafarroako Administrazioaren jarduna koordinatzea beste administrazio publiko eta entitate publiko edo pribatu batzuenarekin, emateari dagokionez, nork bere eginkizunen esparruan.

f) Odol homologoarekiko eta hemoderibatuekiko esposizioaren murrizketa sustatzea, erabilera-gomendioak eta indikazioak eguneratuz eta jakinaraziz eta transfusioaren beste alternatiba batzuk indartuz, autotransfusio-modalitate guztiak barne.

g) Odol-, zelula-, ehun- eta organo-emaileek osaturiko talde osoarentzako erregistro bateratua sortzea, bai eta aldi baterako edo behin betiko bazterturiko emaileen erregistro bat ere, bazterketaren arrazoiak adieraziko dituena.

h) Emailearengandik hartzailearenganako trazabilitatea eta alderantzizkoa ere bermatzea, Nafarroan banaturiko odol, odol-osagai, zelula eta ehunetarako.

i) Hemozainketa eta Biozainketa sareak koordinatzea Nafarroako Foru Komunitatearen barrenean, eta horiek Estatu-mailan koordinatzeko jardutea (1301/2006 Errege Dekretua eta y SCO/322/2007 Agindua).

j) Organo-emateen eta transplanteen koordinazioaz arduratzea eta indarreko araudia betetzen dela zaintzea (gaur egun, 2070/1999 Errege Dekretua).

6. artikulua. Eginkizunak.

NOEBek, dituen helburuak garatu eta betetzeko, ondoko ataletan zehazten diren berariazko eginkizunak dauzka esleituta:

1. Transfusio-zentro komunitario gisa, honako eginkizun hauek beteko ditu:

a) Zentro eta zerbitzuen jarduerak Nafarroako Transfusioen eta Giza Zelula eta Ehunen Sarean koordinatzea.

b) Nafarroako Foru Komunitatearen esparruan odolaren eta odolosagaien ematea planifikatu eta sustatzea.

c) Nafarroako Foru Komunitatearen lurralde-esparruan odolaren eta odol-osagaien erauzketa egitea, geroago terapiarako hemoderibatu gisa erabiliak izan daitezen.

d) Terapiakoak ez diren plasmaferesi- eta zitaferesi-programak garatzea, emate altruistan oinarrituak, autohornikuntza erdieste aldera.

e) Kasu bakoitzean behar diren odol-osagaiak prozesatu eta lortzea, hala odol orokorretik datozenean nola emaile bakarrarengandik datozenean.

f) Nafarroako Foru Komunitatearen barrenean industria frakzionatzailearekin eginiko plasma-trukearen ardura hartzea.

g) Inbentario eguneratu bat edukitzea, emaileei, baliabide material eta giza baliabideei eta transfusio-zentro eta -zerbitzu ezberdinen -publiko nahiz pribatuen- jarduerari buruz, bai eta esleituriko lurralde-esparruan odolaren eta odol-osagaien beharrizan eta kontsumoei buruz ere, eskueran dauden odol-osagaiak zein diren jakitearren.

h) Nafarroako Foru Komunitateko transfusio-zentro eta -zerbitzu publiko eta pribatu guztien beharrizanen asetzea planifikatzea eta odolaren nahiz odol-osagaien banaketa kudeatzea; orobat, beharrean dauden eta eskaera egiten duten beste erkidego batzuek dituzten odol eta odol-osagaien premiei erantzutea.

j) Nafarroako Foru Komunitatekoak ez diren transfusio-zentroetatik iritsitako odol-osagaiak jasotzea, gero batean haien egokitasuna egiaztatu eta haiek banatzeko.

j) Larrialdi baten ondoriozko premiak dituzten gaixo sentsibilizatuen kasuetan odolaren eta odol-osagaien hornikuntzaz arduratzea.

k) Jokabide egokiko irizpideetan oinarrituriko kalitate-sistema bat ezartzea, ikuskatzea eta eguneratuta edukitzea, zeina Foru Komunitatean gai honetan ardura duten zentro eta zerbitzu guztientzat komuna izanen baita.

l) Erkidegoko hemozainketa-sarea koordinatzea.

m) Emaileari bere osasun-egoerarekin zerikusia duen edozein emaitza anomalo jakinaraztea.

n) Autotransfusioko, odol-aurrezpeneko eta gutxieneko transfusio-eskemetako programak sustatzea erkidegoko ospitale guztietan.

ñ) Bere eskumen teknikoei buruzko txostenak ematea agintari eskudunek hala eskatuta, Foru Komunitateko transfusio-zentro eta -zerbitzuak irekitzeari eta/edo eraldatzeari ere dagokionez.

o) Erreferentziako zentroa izatea populazioarengan eragin txikia duten halako kasuetarako non diagnostikoak edo tratamenduak odolaren, odol-osagaien edo erabilera urriko erreaktiboen eskuragarritasuna izatera behartzen duen.

p) Hemoterapiarekin lotura duten langileen prestakuntzarako programak ezartzea.

q) Bere ardurapean utzi zaizkion eginkizun guztiekin zerikusia duten ikerketa-lanak egitea.

r) Aurretik aipaturikoen antzekoa den edo horiekin zerikusia duen beste edozein; batez ere, 1088/2005 Errege Dekretuan, 1343/2007 Errege Dekretuan eta CSO/322/2007 Aginduan jasotako Europako zuzentarauetan adierazitako eginkizunak.

2. Odol eta Giza Ehunen Banku gisa, honako eginkizun hauek beteko ditu:

a) Azaroaren 10eko 1301/2006 Errege Dekretua bete dadin zaintzea, eta bere jarduna egokitzea agintariek emandako arau eta gidalerroen arabera.

b) Zelulak eta ehunak lortzeaz arduratzen diren lan-taldeak koordinatzea.

c) Giza zelulak eta ehunak prozesatu, gorde, biltegiratu, kontserbatu, kontrolatu, banatu eta garraiatzea.

d) Lankidetzan aritzea helduengan eta haurrengan ordezko terapia edo transplante hematopoietiko ezberdinak egiteko kreditatuak diren osasun-zentroekin.

e) Lankidetzan aritzea aurrerapen teknikoek eta ebidentzia zientifikoak emandako justifikazioa daukaten zelula- edo birsorkuntza-terapia mota ezberdinak egiteko kreditazioa daukaten osasun-zentroekin, Nafarroako Foru Komunitatearen esparruan aplikatuak eta gauzatuak izan daitezen.

f) Arau teknikoak ezartzea emaileak hautatzeko eta ehunak nahiz zelulak prozesatzeko, unean uneko jakintza zientifikoaren arabera; betiere, prozesuaren trazabilitatea bermatzeko da.

g) Ehun bakoitzerako kalitate-sistemak edukitzea, lortzen denetik inplanterako helarazten den arte.

h) Beste zentro batzuekiko jarduketen frogagiriak gordetzea.

i) Emaileen seroteka bat mantentzea.

j) Ehun- eta zelula-emaileen eta horien hartzaile direnen erregistro bateratu bat edukitzea.

k) Beste banku batzuekiko ehun-trukeaz arduratzea eta, kasua bada, ehunak Espainian sartzeko edo bertatik ateratzeko baimena eskatzea.

l) NOEBaren esparrukoak diren langile-prestakuntzarako programetan parte hartzea,

m) Txostenak ematea osasun-alorreko agintari eskudunek eskatuta.

n) Ardurapean utzi zaizkion eginkizunekin zerikusia duten ikerketa-lanak egitea.

ñ) Beste zentro batzuekiko harreman nazionalak nahiz nazioartekoak ezarri eta koordinatzea eta produktu-trukea arautzea, 1591/2009 Errege Dekretua betetzeko.

o) Antzekoa den edo aurrekoekin zerikusia duen beste edozein; batez ere, ehunentzako kalitate- eta segurtasun-arauak ezartzen dituen 1301/2006 Errege Dekretuan jasotakoak eta etorkizunean onets litezkeen arauetan bildutakoak.

3. Organo-emate eta -transplanterako zentro autonomiko gisa, honako eginkizun hauek beteko ditu:

a) Zaintzea bete egiten dela abenduaren 30eko 2070/1999 Errege Dekretua, zeinaren bidez arautzen baitira giza organoak lortzeko eta klinikoki erabiltzeko jarduerak eta organo-emate eta -transplantearen alorreko lurralde-koordinazioa.

b) Ziurtatzea ezen organo-emaileei eta -hartzaileei buruzko informazioa konfidentzialtasunik zorrotzenarekin bildu, tratatu eta zainduko dela.

c) Populazioaren informazioa eta hezkuntza sustatzea emate eta transplanteei dagokienez, horien premian dauden pertsonei ekartzen dizkieten onurei dagokienez, bai eta prozedura honen inguruko baldintza, betekizun eta bermeei dagokienez ere.

d) Jarduera horiekin zerikusia duten osasun-alorreko profesionalen etengabeko prestakuntza sustatzea.

e) Bizirik dauden organo-emaileei eta hildakoen organo-erauzketari buruz indarreko araudiak ezartzen dituen baldintzak eta betekizunak betetzen direla ziurtatzea.

f) Bizirik dauden emaileen eta hilik daudenen organo-erauzketarako zentroei buruzko araudi indardunean exijituriko betekizunak bete egiten direla ziurtatzea.

g) Erregistro bat antolatu eta mantentzea, non beharrezkoak diren datuak bilduko baitira eginiko erauzketak, lorturiko organoak eta haien norakoa identifikatzeko, anonimotasuna eta konfidentzialtasuna ziurtatzen duten gako alfanumeriko egokiekin, indarreko legediak ezarritakoaren arabera.

h) Serum-artxibo bat mantentzea.

i) Esparru publikoan inplante alogenikoak egin ahal izateko, behar bezala kreditatu eta baimendutako histokonpatibilitate-unitate bat eduki beharko da, berariazko betekizuna baita bere eginkizunak bete ahal izateko, indarreko araudiari jarraituz.

j) Osasun eta Kontsumo Ministerioari jakinaraztea hildako emaileen organoen erauzketarako zentroetarako baimenei dagozkien erabakiak.

k) Ziurtatzea ezen giza organoen garraioak bete egiten dituela horretarako ezarrita dauden betekizunak.

l) Osasun Sistema Nazionaleko Lurralde arteko Kontseiluko Transplante Batzorde Iraunkorrean parte hartu eta harekin lankidetzan aritzea.

m) Organo-erauzketa eta/edo -inplanterako kreditaturiko ospitale bakoitzean ezartzen diren transplante-koordinazioko unitate ezberdinak koordinatzea.

n) Erauzketa- eta/edo transplante-jarduerako prozeduretan parte hartzen duten zentroen eta transplanteen koordinazio-unitateen ikuskapenari dagokionez lankidetzan aritzea autonomia-erkidegoan gai horretan eskudun den agintariarekin.

ñ) Aurrekoen antzekoa edo haiekin zerikusia duen beste edozein, eta etorkizunean onets litezkeen arauetan jasotako beste edozein.

4. NOEBek odol-ematearen eta bestelako emateen sustapenarekin lotuta dituen eginkizunak betetzeko, entitate horrek lankidetzarako esparru-hitzarmen bat sinatuko du ADONA-Nafarroako Odol-emaileen Elkartearekin, odolaren eta hezur-muinaren ematearen planifikaziorako eta sustapenerako, bai eta bi alderdiek beharrezkotzat jotzen dituzten hitzarmen guztiak ere. Helburu berarekin eta baldintza beretan, lankidetza-hitzarmenak sinatu ahalko dira entitate publiko eta/edo pribatu batzuekin, zeinek giza zelula eta ehunen bankuaren jarduerekin eta, batez ere, zelula, ehun eta organoen emate altruistarekin zerikusia baitute.

5. NOEBek, bere eskumenen esparruan, aholkularitza zientifiko eta teknikoa emanen dio ADONA Nafarroako Odol-emaileen Elkarteari, bere eginkizunak bete ditzan, bai eta foru lege honen helburuak betetzearekin zerikusia duten jarduerak egiteko baimenduta dagoen edozein entitate edo elkarteri ere.

6. Emate altruisten sustapena bateratzea bultzatu eta sustatuko da, esparru horretan jarduten duten elkarteekin arituz, baliabideak eta ahaleginak bategite aldera.

7. artikulua. Nafarroako giza zelulen eta ehunen transfusio-sarea.

Giza zelulen eta ehunen transfusio-sarea honako hauek osatuko dute:

1. Nafarroako Odol eta Ehun Bankua (NOEB).

2. Odolaren eta hemoderibatuen ospitale-gordailuak.

3. Giza ehunen lorpen eta inplanterako ospitale-unitateak.

4. Organo-emateen eta -transplanteen koordinazio autonomikoa

8. artikulua. Odol-gordailuak eta ospitaleetako transfusio-zerbitzuak.

1. Hematologian eta hemoterapian espezialista den arduradun mediko batek zuzenduko ditu erkidegoko ospitale publikoetan eta pribatuetan kokaturiko odol-gordailuak eta transfusio-zerbitzuak, hematologia- eta hemoterapia-unitateetan edo -zerbitzuetan sartuak, eta zuzendaritza-zeregin horiek bateragarri izanen zaizkio zerbitzu edo unitate horietan betetako beste eginkizun batzuekin.

2. Ospitaleetako transfusio-zerbitzuek eta odol-gordailuek honako berariazko eginkizunak beteko dituzte transfusio eta giza zelula eta ehunen sarearen esparruan:

a) NOEBekin lankidetzan aritzea ospitale barneko odol-emate altruista eta boluntarioaren sustapenean.

b) Baimenduta dauzkaten hemoterapia-produktuak prestatzea.

c) Kokatuta daudeneko ospitaleko transfusio-zerbitzuaz arduratzea eta transfusio-prozesuaren kalitate-kontrola ziurtatzea, horretarako egoki diren azterlan eta behaketen bitartez eta 1343/2007 Errege Dekretuan ezarritakoa betez.

d) Transfusio-kalitatearen hemozaintza komunitarioaren sarean parte hartzea, Osasun eta Kontsumo Ministerioko SCO/322/2007 Aginduan ezarritakoari jarraituz.

e) NOEBarekin lankidetzan aritzea irakaskuntza- eta ikerketa-programetan.

9. artikulua. Giza zelula, ehun eta organoen lorpenerako eta/edo inplanterako unitateak.

1. Erkidegoko ospitale publiko eta pribatuetan kokaturiko zelula-, ehun- eta organo-lorpenerako eta/edo -inplanterako unitateek zuzendari izanen dute bere eginkizunak betetzeko beharrezkoa den titulazioa daukan arduradun bat.

2. Giza zelulen, ehunen eta organoen lorpenerako eta/edo inplanterako zentroek honako berariazko eginkizunak beteko dituzte transfusio eta giza zelula eta ehunen sarearen esparruan:

a) NOEBekin eta transplanteen koordinatzaile autonomikoarekin lankidetzan aritzea giza zelulen, ehunen eta organoen emate altruista ospitale barneko esparruan sustatzeko.

b) Behar diren neurriak hartzea, era horretan ziurtatzeko ezen haietan ingresatzen diren herritar guztiek eta beren ahaideek helburu terapeutikoetarako organo-emate eta -erauzketaren gaineko araubidea osoki ezagutzen dutela.

c) Giza ehunen lorpen, gordetze, garraio eta inplantearen kalitate-programan parte hartzea, prozesu osoaren kalitate-kontrola ziurtatuz, egoki diren azterlan eta behaketen bitartez, eta 1301/2006 Errege Dekretuan ezarritakoa betez.

d) NOEBarekin lankidetzan aritzea ezartzen diren irakaskuntza- eta ikerketa-programetan.

e) Zelulen, ehunen eta organoen erauzketen eta inplanteen erregistro eguneratu bat mantentzea, bai eta zentroaren jarduerarekin zerikusia duten administrazio-alderdi guztiena ere, datu-babesari buruzko legea betez.

f) Exijituriko informazio guztia ematea eskatua den moduan, baimenduta daudeneko jarduerari dagokionez.

10. artikulua. Organo-emateen eta -transplanteen koordinazioa.

2070/1999 Errege Dekretuko 20. artikulua aplikatuz, Foru Komunitateko transplanteen koordinazioari "Organo Emateen eta Transplanteen Koordinazioa" deituko zaio.

1. Haren zuzendaritzaz koordinatzaile autonomiko bat arduratuko da, agintari eskudunak Osasunbideari atxikitako langileen artetik izendatua, eta ematearen eta transplanteen esparruan esperientzia frogatua izan beharko du. Haren lanaldia esklusiboa izanen da koordinatzaile gisa esleiturik dauzkan eginkizunak betetzeko, eta organikoki NOEBeko zuzendariaren menpe egonen da.

2. Organo eta ehunen erauzketarako eta/edo transplanterako baimenduriko ospitale bakoitzean, bertako zuzendariak organo- eta ehun-transplanteen koordinatzaile bat izendatuko du.

3. Zentro bakoitzak beharrezkoak diren azpiegitura eta bitartekoak izanen ditu, organoen eta ehunen erauzketa eta/edo transplantea indarreko legedian ezarritako betekizunen arabera egiteko.

Emate eta transplanteen koordinatzaile autonomikoak honako eginkizun hauek beteko ditu:

a) 2070/1999 Errege Dekretua bete dadin zaintzea, bai eta koordinatzailearen jarduerari buruz etorkizunean argitaratzen diren arau guztiak ere.

b) Osasun Sistema Nazionaleko Lurralde arteko Kontseiluko Transplante Batzorde Iraunkorrak ezartzen dituen helburu orokorretarako lankidetzan aritzea.

c) Ehunen Batzorde teknikoan parte hartzea.

d) Erkidegoko biozainketa-sarea koordinatzea.

e) Agintari eskudunek haren gain utzitako beste edozein eginkizun.

Ospitale bakoitzeko organo- eta ehun-transplanteen koordinatzaileak honako eginkizun hauek beteko ditu:

Zelulen eta ehunen lorpen eta/edo inplanterako jarduerak koordinatzea. Ehunen Batzorde Teknikoan parte hartzea.

Zentroko biozainketa-sistemaz arduratzea.

Agintari eskudunek esleitzen dioten beste edozein.

Bere zentroan organo- eta ehun-transplanteekin zerikusia duten jardueretan indarreko legedia bete dadin zaintzea.

II. KAPITULUA

Zuzendaritza-organoak: Kudeaketa eta Giza Baliabideen zuzendaria
eta zuzendariordea

11. artikulua. NOEBaren zuzendaria.

1. Zuzendari-postua oposizio-lehiaketa bidez beteko da, erakunde autonomoari atxikita dauden hematologia eta hemoterapiako langile mediko espezialisten artetik, betiere transfusio-alorrean bi urte baino gehiagoko esperientzia frogatzen badute.

2. Zuzendariaren erantzukizunak honakoak izanen dira:

a) Bere gain hartzea aipaturiko zentroaren ordezkaritza ofiziala eta zentroaren barruko agintaritza gorena egikaritzea.

b) Osasunbideko zuzendaritzak ezarritako gidalerroak eta arauak betetzea eta betearaztea.

c) Lan-ildoak proposatzea eta entitatearen jardueraren emaitzak ebaluatzea.

d) NOEBi atxikitako unitate ezberdinen jarduerak eta helburuak elkarlanean antolatu, zuzendu eta ebaluatzea.

e) Entitatearen urteroko jarduera-oroitidazkia eta urteroko aurrekontuen proposamena prestatzea eta horien betetzeari buruzko aldizkako txostenak aurkeztea.

f) Zentroaren eginkizunek beharrezkoa duten plangintza, koordinazioa, zuzendaritza eta ebaluazioa mantentzea Nafarroako transfusio eta zelula eta ehunen sarearen osotasunean.

g) Informazio-sistema bat sortu eta mantentzea, efizientziaren eta kalitatearen ebaluazioa eta kontrola ahalbidetuko dituena.

h) Berrikuntza, etengabeko hobekuntza eta bere zerbitzuen kalitatearen ebaluazioa sustatzea, eta bere eginkizunen jarraitasuna bermatzea.

i) Atxikitako unitate ezberdinen arteko baliabide-banaketa aldatzea.

j) Odol-bankuan baldintza eta betekizun guztiak aplikatzea eta 1088/2005 Errege Dekretuak araututako funtzionamendu-araubidea ezartzea.

k) Baimentze-prozeduretan eskudun diren osasun-agintariei informazioa ematea, 1088/2005 Errege Dekretuan aipaturiko gutxieneko informazioaren araberakoa.

l) Langileei, kalitateari, dokumentazioari, erregistratzeari, trazabilitateari eta kontrako eragin eta erreakzio larrien jakinarazpenari buruz 1088/2005 Errege Dekretuak, 1343/2007 Errege Dekretuak eta CSO/322/200 Aginduak ezarritako betekizunak betetzea.

m) Zaintzea Foru Komunitatearen esparruan gizakiengan inplantatzekoak diren ehunak eta zelulak prozesatu, biltegiratu eta banatuak direla 1301/2006 Errege Dekretuak ezarritakoari jarraituz.

n) Osasun-arloko agintari eskudunei informazioa ematea 1301/2006 Errege Dekretuak ehun-establezimenduei exijituriko baldintzei, betekizunei eta funtzionamendu-araubideari buruz.

ñ) Zelula- eta ehun-bankuan baldintza eta betekizun guztiak aplikatzea eta 1301/2006 Errege Dekretuak araututako funtzionamendu-araubidea ezartzea.

o) NOEBeko ikerketa- eta irakaskuntza-programa prestatzea.

p) Osasunbideko zuzendari-kudeatzaileari modu jarraian aholku ematea, egokitzat jotzen dituen hobekuntza guztiak proposatuz.

q) Osasunbidea-Nafarroako Osasun Zerbitzuko zuzendari kudeatzaileak espresuki esleitzen dizkion beste eginkizun guztiak.

12. artikulua. NOEBeko Kudeaketa eta Giza Baliabideen zuzendariordea.

1. Zuzendariorde-postua betetzeko, agintari eskudunak askatasunez izendatu ahalko du Nafarroako Gobernuaren plantillako langile bat, esleituriko zereginetan esperientzia frogatua duena.

2. Kudeaketa-alorrean, zuzendariordearen berariazko eginkizunak honako hauek izanen dira:

a) NOEBaren baliabide material finko eta mugikorren kontserbazio funtzionala ziurtatzea, eta atxikitako ondarea egokiro kudeatzea.

b) Urteko aurrekontuak prestatu eta kudeatzea, gastuetakoak zein diru-sarreretakoak.

c) Kontabilitateko eta aurrekontuetako egoera-orri aldizkakoak aurkeztea, erregelamendu-printzipioen arabera.

d) NOEBeko unitateentzat beharrezkoak diren baliabide materialen hornikuntza kudeatzea; halaber, hornigai horiek egokiro biltegiratzeko eta unitate eskatzaileei banatzeko kudeaketa-lana egitea.

e) NOEBerako ibilgetuaren eta erabiltzen ari den ekipamenduaren mantentze prebentiborako planak sustatu eta kontrolatzea, eta horiek guztiak behar bezala konpondu eta birjarriko direla segurtatzea.

f) Zerbitzuen funtzionamendurako beharrezkoak diren hornikuntza txikien kontratuak sinatzea, eta konponketa eta mantentze hutsekoak diren lanak egitea, betiere haien zenbatekoak hornidura txikietarako ezarritako mugak gainditzen ez baditu.

g) Konturako ziurtagirien, material inbentariagarriaren fakturen, bestelako hornigaien, konponketa eta mantentze hutsekoak diren lanen eta laguntza teknikoko kontratuen ordainketak baimentzea, organo eskudunak haien gastua onetsi badu.

h) NOEBeko arropa zuriaren, arropa-garbitegiaren, garbitze-lanen eta mantentze-lanen zerbitzuen eta agindupeko langileen gaineko zuzendaritza-, koordinazio- eta ikuskapen-lanak egitea.

i) Behar diren aplikazio informatikoen eta laguntza administratiboen ezarpen, funtzionamendu eta erabileraren gaineko zuzendaritza- eta koordinazio-lana egitea.

j) NOEBeko zuzendariak berariaz eskuordetutako beste eginkizunak.

3. Langileria-alorrean, NOEBeko zuzendariordeak berariazko eskumen hauek izanen ditu:

a) NOEBeko langileen burutza.

b) NOEBeko langileen jardueren, eginkizunen eta funtzioen gaineko zuzendaritza- eta koordinazio-lana.

c) NOEBaren egitura organikoaren barrenean, langileei lanpostu zehatzak esleitzea.

d) Langileak lanerako ezintasun iraunkor osoko edo absolutuko egoeran daudela deklaratzeko edo haiei alta emateko proposamenak egitea.

e) Falta arinengatiko diziplina-espedienteak ireki eta ebaztea.

f) Langileria-alorreko beharrizanak zehaztea, kasuko enplegu-eskaintzak, plantilla organikoa eta langileen zerrenda izendunak prestatzeko.

g) Aldi baterako langileen kontratazioa baimendu eta formalizatzea, erregelamenduz ezarritako prozeduraren bitartez.

h) NOEBari atxikitako langileen baimenak, lizentziak, oporrak eta joan-etorriak baimentzea.

i) NOEBari atxikitako langileentzako produktibitate-osagarria, gastu-ordainketa eta epaimahaietan nahiz prestakuntza-ikastaroetan parte hartzeagatiko diru-saria baimentzea, organo eskudunak ezarritako zenbatze-irizpideei jarraituz.

j) Zerbitzua dela-eta egin beharreko joan-etorriak baimentzea.

k) Hartzekoei eta emandako zerbitzuei buruzko ziurtagiriak ematea.

l) Nominak, aseguru sozialak, osasun-laguntza eta langileen bestelako prestazio ekonomikoak egituratu eta kudeatzea. Langabeziako sorospena jasotzeko behar den dokumentazioa formalizatzea. Hori guztia, Osasunbidea-Nafarroako Osasun Zerbitzuko Giza Baliabideen Zuzendaritzak emaniko jarraibideak zorrotz betez.

m) Langileen erregistro integratua, espediente pertsonalak, plantilla organikoa eta zerrenda egin, mantendu eta gaurkotzea

n) NOEBeko zuzendariak berariaz eskuordetutako beste eginkizunak.

III. KAPITULUA

Kontsulta- eta aholkularitza-organoak

13. artikulua. Emateen eta Transplanteen Kontsulta Batzordea.

1. NOEBi aholku emateko organo gisa, kontsulta-batzorde bat izanen da, honako kide hauek osatua:

Batzordeburua: Osasun Departamentuko zuzendari nagusia.

Idazkaria: NOEBaren zuzendaria.

Batzordekideak:

-Osasun Departamentuko ordezkari bat, Osasun zuzendari nagusiak proposatua.

-Laguntza Espezializatuko zuzendaria edo hark eskuordetutako pertsona bat.

-Organo-emateen eta -transplanteen koordinatzaile autonomikoa.

-Odol Emaileen Elkartearen bi ordezkari.

-Giza odol-, zelula-, ehun- eta organo-emate altruistari dagokionez existitzen diren edo eratu litezkeen beste elkarteen ordezkari bana.

-Batzordeko kideek hala eskaturik, azterturiko gaietan aditu direnen lankidetza izan ahalko da.

2. Kontsulta-batzordeak honako eginkizun hauek izanen ditu:

a) Foru Komunitatearen barrenean odol-, hemoderibatu-, zelula-, ehun- eta organo-emate altruista sustatzea.

b) Odol eta hemoderibatuei -giza plasmatik eratorritako farmazia-produktuak barne-, zelulei eta ehunei dagokienez beharrizan-asetzearen eta beharra duten osasun-zentro guztiei banaketa egitearen nondik norakoak programatzea.

c) Odol- eta hemoderibatu-unitateen ebaluazio ekonomikoa, giza plasmatik, organoetatik, ehunetatik eta zeluletatik eratorritako produktu farmazeutikoak barne.

d) Organo eta ehunen emate eta transplantean jarduten diren beste elkarte, erakunde eta entitate batzuekin koordinatzea eta lankidetzan aritzea.

3. NOEBen zuzendariak Batzorde Aholku-emaileari informazio xehakatua eman beharko dio, sei hilabetean behin edo maizago, lorturiko odol, hemoderibatu, zelula, ehun eta organoei buruz, horien helmugari buruz eta jardueren zenbatespen ekonomikoari buruz.

4. Batzorde Aholku-emaileak bilkura arrunta eginen du sei hilabetean behin, eta ohiz kanpokoa eginen du batzordeburuak horretarako deialdia egiten duenean edo batzordekideen heren batek horretarako eskaera egiten duenean.

14. artikulua. Hemoterapia Batzordea.

Hemoterapia-alorrean eta Nafarroako hemozaintza-sistemaren funtzionamenduari dagokionez aholkularitza teknikoa emateko organo gisa eratzen da Hemoterapia Batzordea, honako hauei aholku emateko: osasun-arloko agintariei, NOEBi eta Nafarroako osasun-laguntzako zentro eta zerbitzu ezberdinei. Honako kide hauek osatuta egonen da Hemoterapia Batzordea:

Batzordeburua: Osasun Departamentuko zuzendari nagusia, edo hark eskuordetutako pertsona bat.

Idazkaria: Nafarroako hemozaintza-koordinatzailea.

Batzordekideak:

-Laguntza Espezializatuko zuzendaria edo hark eskuordetutako pertsona bat.

-NOEBaren zuzendaria.

-Emateen eta transplanteen koordinatzaile autonomikoa.

-Nafarroako hemozaintza-koordinatzailea.

-Nafarroan kokaturiko ospitale publiko eta pribatu bakoitzeko transfusio-zerbitzuko arduraduna.

Batzordekideek hala eskaturik, azterturiko gaietan aditu direnen lankidetza izan ahalko da.

Hemoterapia Batzordeak eginkizun hauek izanen ditu:

a) Sei hilabetean behin odol- eta hemoderibatu-ematearen bilakaera jakitea, horrela ebaluatzeko Odol Bankuko zerbitzuen estaldura-maila edo beharrizan teknikoekiko egokitzapena.

b) Nafarroako Hemozaintzako Koordinatzailearen urteroko txostena onestea.

c) Jakinarazi beharreko kontrako erreakzioak proposatzea, bai eta modua, mota eta nomenklatura, eta haiek ondoren izan beharreko ebaluazioa ere, Hemoterapia Batzorde Nazionalak erabakitakoaren ildotik.

d) Jarduketak proposatzea, dauden beharrizanen asetze-maila hobetzeko eta odola nahiz hemoderibatuak helarazteko horien beharrean dauden osasun-zentro guztiei.

e) Transfusioen kalitatearen adierazleak Foru Komunitatearen esparruan definitzea, bai eta ospitale bakoitzaren esparruan ere; transfusioen ospitale-batzordeen bitartez, kasua bada.

f) Osasun-arloko agintariei informazioa ematea haiek ezartzen duten moduan eta maiztasunarekin, eta, betiere, osasun publikoan eragina izan lezakeen edozein alarma- edo larrialdi-egoeratan.

Hemoterapia Batzordearen funtzionamendua bat etorriko da batzorde horrek onesten duen barne-araubideko erregelamenduarekin.

Arau orokor gisa, batzordeak bilkura arrunta eginen du sei hilabetean behin, eta ohiz kanpokoa eginen du batzordeburuak horretarako deialdia egiten duenean edo batzordekideen heren batek horretarako eskaera egiten duenean.

15. artikulua. Ehunen eta Organoen Batzorde Teknikoa.

1. Zelulen eta ehunen alorrean NOEBi aholku emateko organo gisa, ehunen batzorde tekniko bat arituko da, honako hauek osaturikoa:

Batzordeburua: Osasun zuzendari nagusia.

Idazkaria: NOEBaren zuzendaria.

Batzordekideak:

-Laguntza Espezializatuko zuzendaria edo hark eskuordetutako pertsona bat.

-Organo Emateen eta Transplanteen Koordinatzailea.

-Ospitale publiko eta pribatuetako ehun-lorpen eta/edo -inplanteko unitate bakoitzeko arduraduna, ospitaleko zuzendariak proposatuta.

Batzordekideek hala eskaturik, azterturiko gaietan aditu direnen lankidetza izan ahalko da.

Ehunen eta Organoen Batzorde Teknikoak honako eginkizun hauek izanen ditu:

a) Sei hilabetean behin zelulen, ehunen eta organoen ematearen eta inplanteen bilakaera jakitea, horrela ebaluatzeko kreditaturiko zerbitzu ezberdinen estaldura-maila edo beharrizan teknikoekiko egokitzapena.

b) Nafarroako Biozaintzako Koordinatzailearen urteroko txostena onestea.

c) Jakinarazi beharreko kontrako erreakzioak proposatzea, bai eta modua, mota eta nomenklatura, eta haiek ondoren izan beharreko ebaluazioa nahiz egoki diren zuzenketa-ekintzen ezarpena ere.

d) Jarduketak proposatzea, dauden beharrizanen asetze-maila hobetzeko eta zelulak eta ehunak banatzeko horien beharrean dauden osasun-zentro guztiei.

e) Ehun-inplanteen kalitatearen adierazleak Foru Komunitatearen esparruan definitzea, bai eta ospitale bakoitzaren esparruan ere; haien kontrolerako eraturiko ospitale-batzordeen bitartez, kasua bada.

Ehunen eta Organoen Batzorde Teknikoaren funtzionamendua bat etorriko da batzorde horrek onesten duen barne-araubideko erregelamenduarekin.

16. artikulua. Ospitaleetako transfusio-batzordeak.

1. Ospitale bakoitzean, hala publikoetan nola pribatuetan, NOEBek horniturikoak diren odolaren eta hemoderibatuen kudeaketa modurik onenean egiteaz arduratzen diren organoak dira.

2. Kide hauek izanen dituzte:

Batzordeburua: Ospitaleko zuzendari medikoa.

Idazkaria: Odolaren eta hemoderibatuen ospitale-gordailuaren arduraduna.

Batzordekideak:

-Komunitateko hemozaintza-koordinatzailea.

-Honako zerbitzu edo atal hauetako fakultatibo ordezkariak (zerbitzu edo atal horiek egonez gero) anestesia, kirurgia kardiakoa, kirurgia orokorra, kirurgia baskularra, kirurgia torazikoa, hematologia, barne-medikuntza, nefrologia, obstetrizia, onkologia eta traumatologia.

-Erizaintza-zuzendaritzako ordezkaria eta hemoterapia-unitateko erizain bat.

Batzordekideek hala eskaturik, azterturiko gaietan aditu direnen lankidetza izan ahalko da.

3. Ospitaleko transfusio-batzordea hiru hilabetean behin bilduko da, eta honako eginkizun hauek izanen ditu:

a) Ospitale bakoitzean gauzatzen diren jarduera klinikoei egokiturik transfusiogintzako zer estandar eta prozedura aplikatuko diren zehaztea.

b) Ospitaleko jarduera ebaluatzea, transfusio-estatistika aztertuz, eta zuzenketa-neurriak proposatzea, aurreikusitakoarekiko desbideraketarik egonez gero.

c) Ospitale-esparruan odolaren eta hemoderibatuen erabilerarik egokiena sustatzea.

d) Transfusioarekin zerikusia duten irakaskuntza-jarduerak sustatzea zeregin horrekin zerikusia duten osasun-alorreko langileen artean.

e) Transfusio-alorrarekin zerikusia duen dotazio teknikoa, materiala eta pertsonala ebaluatzea.

f) Transfusioaren metodologia arautzea (lagin-erauzketa, identifikazioa, osagai-motak eta bolumena, eskaerak eta erabilera-plana).

g) Erabateko odol-transfusio guztiak ebalulatzea.

h) Egiaztaturiko transfusioi-erreakzio guztiak ebaluatzea.

i) Autotransfusio-egiteak sustatzea, horrek dituen indikazio terapeutikoen barruan.

j) Ospitale-esparruan ematea sustatzea.

k) Beste ospitale batzuekiko eta NOEBekiko lankidetzari eustea.

l) Indarreko legedia bete dadin zaintzea, ospitale barruko odol-emateari, -transfusioei eta hemoderibatuei dagokienez.

Lehenengo xedapen gehigarria.-Osasunbidearen Estatutuak aldatzea.

Aldatu egiten da Osasunbidearen Estatutuetako 33. artikulua. Estatutu hauek uztailaren 3ko 45/2006 Foru Dekretuaren bidez onetsi eta apirilaren 12ko 19/2010 Foru Dekretuaren bidez aldatu ziren. Hain zuzen ere, Osasunbidearen Estatutuetako 33. artikuluko 1. idatz-zatiko b) letran (zentroak), beste hau gehitzen da: "b.5) Nafarroako Odol eta Ehun Bankua".

Halaber, kentzen da Osasunbidearen Estatutuetako 39. artikuluko 1. idatz-zatiko d) letra.

Bigarren xedapen gehigarria.-Lehengo zentroari buruz eginiko aipamenak.

Indarreko araudi guztian Nafarroako Odol Banku eta Odol-transfusioen Zentroari buruz eginiko aipamenak ulertu beharko dira Nafarroako Odol eta Ehun Bankuari buruz eginikotzat.

Hirugarren xedapen gehigarria.-Berehalako garapena.

Nafarroako Gobernuaren ardurapean ipintzen da foru lege honen berehalako garapena egitea, hiru hilabeteko epean.

Xedapen indargabetzaile bakarra.-Arauak indargabetzea.

Foru lege honetan ezarritakoaren aurka doazen maila bereko edo beheragoko xedapen guztiak indarrik gabe uzten dira.

Azken xedapenetan lehena.-Erregelamendu bidezko garapena.

Nafarroako Gobernuari ahalmena ematen zaio foru lege hau aplikatu eta garatzeak eskatzen dituen erregelamendu mailako xedapen guztiak eman ditzan.

Azken xedapenetan bigarrena.-Indarrean sartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2010eko abenduaren 13an.-Nafarroako Gobernuko lehendakaria, Miguel Sanz Sesma.

Iragarkiaren kodea: F1020360