143. ALDIZKARIA - 2010eko azaroaren 24a

1. NAFARROAKO FORU KOMUNITATEA

1.3. LURRALDEAREN ANTOLAMENDUA ETA HIRIGINTZA

ERABAKIA, Nafarroako Gobernuak 2010eko urriaren 13an hartua, "Erroko Tunela N-135 (Iruña-Frantzia Luzaidetik) errepidean" izeneko proiektuaren gaineko Informazio Azterlanaren Udalez gaindiko Proiektu Sektoriala onesten duena, Iparraldea-Hegoaldea alternatibaren arabera. Proiektua Herri Lan, Garraio eta Komunikazio Departamentuak sustatu du.

I.-Aurrekariak eta xedea.

Nafarroako Gobernuak 2010eko maiatzaren 10ean hartutako erabakiaren bidez, "2012rako Nafarroa Plana. Lehentasunezko jarduketa. Erroko eta Mezkirizko tunelak" izenekoaren barnean, "Erroko Tunela N-135 (Iruña-Frantzia Luzaidetik) errepidean" izeneko proiektuaren gaineko Informazio Azterlana Udalez gaindiko Proiektu Sektorial deklaratu zen, jendaurrean jarri zen eta jarduketaren eraginpeko eremuetako udalei entzunaldia eman zitzaien, Lurraldearen Antolamenduari eta Hirigintzari buruzko abenduaren 20ko 35/2002 Foru Legea eta Ingurumenaren gaineko eraginaren ebaluazioaren prozeduraren ondorioak bete zitezen. Proiektuaren sustatzailea Herri Lan, Garraio eta Komunikazio Departamentua da.

Erabakia 2010eko 64. Nafarroako Aldizkari Ofizialean argitaratu zen, maiatzaren 26an.

Proiektuak Erroibarko eta Esteribarko udal mugapeak ukitzen ditu eta Nafarroako Foru Komunitatearen eta Frantziako Pirinio Atlantiarreko Departamentuaren arteko komunikazioen hobekuntzaren barnean integratzen da.

Jarduketa horren bidez Pirinioetako ibarretara iristeko modua hobetu nahi da, eta gainera Frantziarako irteera propioa izatea, gaur egungo N-135 errepidearena baino trazadura hobea duen errepidean zehar. Aztertzen den tarteak, Zubiri eta Erro artean, Erro mendatea igarota, oinplanoan trazadura bihurgunetsua du eta arrapala handi samarrak ere bai.

Trazadurarako bost alternatiba planteatzen dira -guztiak Magnaren harrobiaren parean hasten dira, Zubiriko herrigunearen hego-mendebaldean, eta Erroko hirigunearen hego-ekialdean amaitzen dira-. Trazadura horien izena, alternatiba bakoitzaren hasiera-tartean hartutako mazela-latitudearekin (Ibesiko errekaren iparraldeko edo hegoaldeko mazela) lotzen da, baita tunelaren kokalekuarekin (iparraldean, hegoaldean edo erdialdean), azpiegituraren azken tarteak zehazten duen kokalekuarekin, alegia.

II.-Aurkeztutako alegazioak.

Jendaurreko aldian zortzi alegazio idazki aurkeztu dira. Hona hemen horien balorazioa eta erantzunak:

-1. alegazioa. José Irigaray Gil jauna, Aurizko Udaleko alkatea.

Edukia:

Adierazten du Aurizko Udalak alegazioak aurkeztu zituela "Errepideen 2009-2016 bitarteko III. Plan Zuzentzailea"ri buruz eta Nafarroako Gobernuak 2010eko apirilaren 19ko Erabakian hauxe erantzun zuela: "Erroko eta Mezkirizko tunelen gaineko informazio azterlanean alternatiben alderdi asko aztertu dira, tartean zirkulazioa", eta "herri horiek N-135 errepidearekin duten lotura hobetu nahi da tunelen bitartez. Mezkiritz eta Frantziako mugaren arteko komunikazio bideen ezaugarriengatik, muga alde hori ez da nazioarteko trafikorako aukera".

Bestalde, alegazioak dio informazio azterlanean trafikoaren %4,59ko gehikuntza aurreikusten dela. Horren harira alegatzaileak uste du errepideak orain dagoen moduan segituko balu trafikoak izanen lukeen gehikuntza aurreikusi dela bakarrik, errepidean egin nahi den jarduketak trafikoan izanen lukeen eragina kontuan hartu gabe. Halaber, tunelak eraikitzen badira, xedea eskualdearen eta Iruña aldearen arteko komunikazioak hobetzea izan arren, salgaien trafikoa erakarriko da, Frantzia eta Espainia arteko nazioarteko igarobideak gainezka daudelako, eta, trafiko hori trenbidera aldatzeaz mintzatu bada ere, egiaz ez da halakorik eginen. Adibide gisa, Sunbilla eta Endarlatsa arteko N-121-A errepidean trafikoa %25 gehitu dela gogorarazten du, eta gehikuntzaren laurdena trafiko astunari zor zaiola.

Aurrekoa esanda, alegatzaileak eskatzen du Informazio Azterlaneko trafiko aurreikuspenak aztertu eta birmoldatu daitezela, jarduketak N-135eko zirkulazioan eraginen dituen aldaketak aintzat hartzeko. Nazioarteko salgai-garraioak errepidea ez itotzeko disuasio neurriak aurreikus daitezela ere eskatzen du.

Erantzuna:

Mezkiritz eta Frantziako mugaren arteko errepidea, dituen ezaugarriengatik, ez da nazioarteko trafikorako aukera. Beraz, trafikoaren hazkundeari buruz egindako kalkulua erabil daiteke.

N-135 errepidean trafikoa %2,20 haziko litzateke, baina, inguruko errepide guztietako trafikoaren gehikuntzarekin batez bestekoa eginez gero, gehikuntza %4,59ra igoko litzateke.

Trafikoaren bilakaera aztertzeko %4,59ko hazkundea aplikatuta (segurtasun tartearen barnean egonen gara), komunikazioak hobetzeko helburuak betetzen ahal dira eta ez da aurreikusten errepideak gainezka eginen duenik, errepide baten ustiapenerako normaltzat jotzen diren epeetan.

-2. alegazioa. Enrique Garralda Erro jauna, Erroibarko Udaleko alkatea.

Edukia:

  • Iparraldeko alternatibaren gaineko alegazioak:

Tunelaren eta Erroko herriaren arteko trazadura garatzeko aurreikusten den eremua itzaltsua eta hotza dela eta alde horretan izotzak ohikoak direla adierazten da. Animalientzako pasaguneak aurreikusi behar direla eta errepidean uholdeak eragiten dituzten errekak aztertu behar direla ohartarazten da.

Urrotz-Erro errepidearen, Esnozko errepidearen eta Orondrizko errepidearen elkarguneek duten garrantzia nabarmentzen da, eta errepidetik lurzatietara dauden sarbideak eta gaur egungo bide publikoak mantendu nahi direla adierazten da.

Azkenik, alegazioak dio Iparraldeko alternatiba herritik oso hurbil igarotzen dela eta proposatutako beste alternatiben aldean neurri handiagoan ukitzen dituela gaur egungo finkak, gehiago zatitzen dituela finkak, eta inguruneari gogorrago eragiten diola.

  • Hegoaldeko alternatibaren gaineko alegazioak:

Iparraldeko alternatiban bezala, ohartarazten da honetan ere animalientzako pasaguneak aurreikusi behar direla, sarbide egokia eman behar zaiela hainbat finkatari, eta loturak ezarri behar direla egungo bide guztiekin.

Errorako aurreikusitako pantaila akustikoak luza ote daitezkeen aztertzeko eskatzen da, eta errepidea hesitzeko aukera aurreikusteko, aziendak errepidea gurutzatzeko biderik izan ez dezan.

Errepideetako bidegurutzeen diseinuan eta zenbait errekaren emarien azterketan arreta berezia jartzeko eskatzen da.

Azkenik, alegazioak dio Hegoaldeko alternatibak zeharkatzen duen eremua beste proposamenetakoak baino eguzkitsuagoa dela eta ez hain ospela, eta alternatiba horrek eragin txikiagoa duela gaur egungo finketan eta ingurumenean.

Aurreko guztiagatik, Erroibarko Udalak eta Erroko tunelaren eragina jasan behar duten kontzejuek uste dute diseinatutako alternatiben artean Hegoaldekoa dela egokiena, eta horren garapenean kontuan hartu behar direla Udalaren alegazioak, teknikoki bideragarriak diren heinean.

Erantzuna:

Errepidearen diseinuaren xehetasunei buruz egindako zehaztapen guztiak (faunarentzako pasabideak, erreken hustubideak, etab.) eraikuntza proiektua garatzeko fasean aztertuko dira.

Edozein alternatiba aukeratuta ere, lurzatietarako sarbideak eta egungo bide publikoen iraupena bermatuko dira eta, halaber, gainerako errepideekiko elkargune guztiak aztertuko dira.

-3. alegazioa. Joseba I. Oroz Martínez de Murguía jauna, Erroko Kontzejuko burua.

Erroko Kontzejua Iparraldea-Hegoaldea alternatibaren alde dagoela dio.

Eskatzen dute Urrozko errepidearen jarraitutasuna berma dadila, errepide azpiko pasabidea egin dadila Aldaburuko pista ez eteteko, herriaren eta herrilurretako zati baten arteko lotura egin dadila, eta Frantzia aldetik datozen ibilgailuentzat Errorako dagoen sarrera kontserbatu dadila. Azkenik, zuhaitz ilarak eskatzen dituzte, errepidea bistatik ezkutatzeko eta zarata moteltzeko.

Erantzuna:

Errepidearen diseinuaren xehetasunei buruz egindako zehaztapenak (azpiko pasabidea, Erroko zuzeneko sarrera, neurri zuzentzaileak, etab.) eraikuntza proiektua garatzeko fasean aztertuko dira.

Aukeratzen den alternatiba edozein dela ere, Urrozko errepidea mantenduko dela bermatuko da, nahiz eta errepide horretatik egiten diren mugimendu batzuk agian Esnozko eta Orondrizko errepideekiko bidegurutzetik egin beharko diren.

-4. alegazioa. Nicolás Gangutia Pepín jauna, Magnesitas de Navarra, S.A.ren ordezkaria.

Edukia:

a) Magnesitas de Navarra, S.A.k aitortzen du proiektua garrantzitsua dela eta Pirinioetako ibarretarako sarbideak hobetzeko premia dagoela, baina alegatzen du proposatu diren trazadura guztiak enpresaren egungo instalazioetatik igarotzen direla eta berak, ukitua izan arren, ez duela inolako jakinarazpenik jaso.

b) Informazio azterlanean proposatutako trazadurak berrikusteko eskatu du alegatzaileak, edo behinik behin, enpresarekin adostu daitezela, errepidearen trazaduraren ukipenak eta Zubirirekin eta Osterizko errepidearekin lotzeko bideenak ahalik eta txikienak izan daitezen. Ildo horretan, uste dute proiektua garrantzitsua izateak ez duela Magnesitas Navarras enpresaren egungo ekoizpen prozesuarekiko bateragarritasun arazorik ekarri behar.

Erantzuna:

a) Lurraldearen Antolamenduari eta Hirigintzari buruzko Foru Legeak ez du udalez gaindiko proiektu sektorialek ukitutakoei banakako jakinarazpena egiteko faserik ezartzen. Espedientea jendaurrean jartzeko tramiteak bakarrik eskatzen ditu lege horren 45. artikuluak; hau da, espedientea Nafarroako Aldizkari Ofizialean argitaratzeko eta ukitutako udalei entzunaldia emateko eskatzen du.

b) Udalez gaindiko proiektu sektorial honen xedea da egokientzat jotzen den trazadura aukeratzea Pirinioetako ibarretarako sarbideak hobetzeko, eta, zehazki, Frantziarako irteera propioa izateko, gaur egun Erro mendatetik doan N-135 errepideak baino trazadura hobea duen errepidean zehar. Eraikuntza proiektuan zehaztuko dira aukeratutako trazadura, egiturak eta errepidearen beste elementuak. Horrela, eraikuntza proiektuan jaso ahalko da Magnesitas Navarras enpresaren instalazioetan eragin txikiagoa izanen duen konponbide bat, instalazio horiek gaur egun duten sarbidea mantenduko duena eta, ondorioz, enpresaren jardueraren iraupena eta errepide berriak izan behar dituen ezaugarriak bateragarri eginen dituena. Hori helburu:

  • Trazaduraren hasiera Zubirirantz eramateko aukera aztertuko da.
  • Loturako bidea egiteko bi aukera aztertuko dira: Informazio Azterlanean azaltzen den moduan egitea loturako bidea, baina Zubiritik hurbilago; edo biribilgune bakarra egitea maila berean nahiz beste maila batean.
  • Loturako bide horretatik Magnesitas Navarras enpresara eta Osterizko errepidera doan adarra nola berrezarri aztertuko da: errepide berriaren ondo-ondoan egin, edo ibai alderago, Osteritzera doazen ibilgailuek Magnesitas Navarras enpresako kamioi eta makinekin topo ez egiteko.

-5. alegazioa. Jesús Beaumont Erro jauna, Manuel Beaumont Erro jauna, Cesáreo Beaumont Oroz jauna eta Miguel Beaumont Oroz jauna.

Edukia:

Proiektuak alegatzaileen finka bat ukitzen du, eta finkaren zati ahalik eta txikiena ukitzeko eskatzen dute. Proiektatutako trazadura lurzati horren erditik igaro ez dadila ere eskatzen dute.

Erantzuna:

Udalez gaindiko proiektu sektorialak, espediente honetakoa bezalakoak, azpiegiturak lurraldean nola ezarriko diren arautzeko egiten dira. Kasu honetako azpiegitura bide-komunikazioa da. Aukeratutako alternatibaren eraikuntza-proiektua izanen da alternatiba horren trazadura zehatza eta, ondorioz, lurzatien gaineko ukipen zehatzak definituko dituen dokumentua, eta hura ere jendaurrean jarriko da.

-6. alegazioa. Pedro María Murillo Echamendi jauna eta Pedro María Murillo Palacios jauna.

Edukia:

Alegatzaileek errepidearen diseinuari buruzko zenbait eskaera egin dituzte: itxitura eta pasabide kanadarrak jartzea, errepidearen eta beste bide batzuen arteko bidegurutzea, azpiko pasabideak egitea, lurzatietarako eta bideetarako sarbideak, abelbideak lehengoratzea eta Urrozko errepidea mantentzea.

Erantzuna:

Errepidearen diseinuaren xehetasunei buruz egindako ohar guztiak aztertuko dira eraikuntza proiektua garatzen denean.

Aukeratzen den alternatiba edozein dela ere, lurzatietarako sarbideak eta Urrozko errepidea mantenduko direla bermatzen da, nahiz eta errepide horretatik egiten diren mugimendu batzuk agian Esnozko eta Orondrizko errepideekiko bidegurutzetik egin beharko diren.

-7. alegazioa. Sagrario Zabalza Larralde andrea.

Edukia:

Alegatzaileak, Hegoaldeko alternatibak ukitzen duen lurzati baten jabea den aldetik, alternatiba horren trazadura Iruña-Erro errepidearen ezkerreko aldera aldatzeko eskatzen du, edo, hori ezinezkoa bada, trazadura ahalik gehien hurbiltzeko gaur egungo Urrotz-Erro errepidera. Iparraldeko alternatiba hobea iruditzen zaiola gehitzen du.

Erantzuna:

Udalez gaindiko proiektu sektorialak, espediente honetakoa bezalakoak, azpiegiturak lurraldean nola ezarriko diren arautzeko egiten dira. Kasu honetan azpiegitura bide-komunikazio bat da. Aukeratutako alternatibaren eraikuntza proiektua izanen da alternatiba horren trazadura zehatza eta, ondorioz, lurzatien gaineko ukipen zehatzak definituko dituen dokumentua, eta hura ere jendaurrean jarriko da.

-8. alegazioa. Enrique Garralda Erro jauna.

Edukia:

Alegatzaileak, proiektuarekin ados badago ere, bere abeltzaintzako jarduera errespetatzeko eskatzen du.

Erantzuna:

Aukeratutako alternatibaren eraikuntza-proiektua egiten denean zehaztuko dira errepidearen eta gainerako bideen trazadurak, eta orduantxe baloratu ahal izanen dira lurzati eta instalazioen gaineko benetako ukipenak. Proiektu horretan, nolanahi ere, eskualdean dauden jardueren gaineko eraginak gutxitzeko aukera guztiak aztertuko dira.

III.-Nafarroako Gobernuak 2010eko maiatzaren 10eko Erabakian ezarritako determinazioak nola bete diren.

Erabaki horrek, xedapen zatiko 2. eta 3. puntuetan, ondokoa ezarri zuen:

A) Herri Lan, Garraio eta Komunikazio Departamentuari adieraztea aukeratutako alternatiba onetsi aurretik erabaki honen azalpen zatiko III. idatz-zatian azaltzen diren alderdiak kontuan hartu beharko dituela.

B) Ondare Historikoaren babesari dagokionez, Ondare Historikoaren Zerbitzuari eskatu zaion txostenak ezartzen duena bete beharko da.

Lehenik, A) puntuari dagokionez, hona hemen erabakiaren III. idatz-zatian ("Lurraldeari eta hirigintzari buruz kontuan hartu beharrekoak") azaltzen diren oharrak eta sustatzaileak horiei emandako erantzunak:

-"Zubiriren ingurunean, alternatibek sarbide mota berbera planteatzen dute Zubirirako eta Osterizko NA-2335 errepiderako. Hala ere, Iparraldea-Iparraldea, Iparraldea-Hegoaldea eta Iparraldea-Erdialdea alternatiben hasierako tarteak, hiruretarako berbera denak, Zubiriko hiri lurzoruko gune bat (ADU-2 izenekoa, industria txikirako erabiltzekoa) ukitzen du. Ukipen hori, hasieran, gune horren hego-ekialdeko ertzean gertatzen da, eta une honetan ezin da zehaztu zein neurritaraino geratzen ahal den eraginpean aurreikusitako nabeetako baten bat, dela trazaduraren beraren ondorioz, dela -beste kasu batean-, eraikinaren eta aurreikusita dagoen errepide berriaren arteko distantziaren ondorioz."

Proposatu den alternatibak ez du ukitzen antolamenduan aurreikusitako nabeetako bat bera ere; industrialdeko berdeguneak bakarrik ukitzen ditu. Nolanahi ere, eraikuntza proiektua egiten denean zehaztuko da behin betiko ukipena.

-"Beste alde batetik adierazi behar da Erroko Udal Planak 43.450 m²-ko azalera duen erabilera industrialeko lurzoru urbanizagarriko sektore bat (AR-2), NA-2330 Urrotz-Erro errepidearen ondo-ondokoa, garatzea aurreikusten duela. Hegoaldea-Hegoaldea, Iparraldea-Hegoaldea eta Iparraldea-Erdialdea alternatiben trazadurek sektorea zeharkatzen dute eta bi zatitan banatzen. Horrela 10.000 m² inguruko azalera alferrik galtzen da, eraikinen eta errepide berriaren arteko distantziari buruz legean ezarrita dauden zortasunak aparte utzita. Kasu horretan kontuan hartu behar da tokian bertan oso eragin handia sortuko dela.

Azkenik, bidezkoa da gogora ekartzea aldez aurretiko kontsulten tramitea egitean egin zen iradokizunen txostenean Erroren inguruneari buruz zera esan zela: 'uste da komenigarria izanen litzatekeela gunearen ekialdean dagoen azken tartea (600 metro inguruko luzera duena), N-135 errepidera berriro sartu baino lehenago, apur bat hegoalderago ibiltzea, (...), horrela mugatutako hiri lurzoruarekiko distantzia handiagoa egonen baita'. Ohar hau kontuan hartuz gero, izan ere eraikuntza proiektuan egiaztatuko baita gauzatzen ahal dela, planteatzen diren alternatiba guztietan aplikatuko litzateke."

Proposatu den alternatibak AR-2 sektorearen gaineko ukipena gutxitzen du, gaur egungo errepidearen ertzean behar-beharrezkoa den tartea baizik ez baitu hartzen. Ukipen hori gutxitzeak, ordea, errepidea Erroko hirigunetik urruntzea baldintzatzen du; hala ere, onesteko proposatu den alternatiban, Iparraldea-Hegoaldea izenekoan, errepide berria ahalik gehien urrundu da Erroko hirigunetik.

-"Done Jakue bideari ematen zaion tratamenduari dagokionez diferentzia nabarmenak daude. Iparraldea-Iparraldea, Iparraldea-Hegoaldea eta Iparraldea-Erdialdea alternatibetan, Arga ibaiaren gaineko tamaina handiko zubia proiektatzen denez, Bidea zubi horren beraren azpian integratzen dute, ubidearen paraleloan, baina gehiago desbideratuta, Done Jakue bidearen jatorrizko trazadurarekin alderatuz gero. Gainerako alternatibek Bidearentzat soilik izanen den azpiko pasabidea proposatzen dute, lubeta handiak dituen eremu oihantsuan, jatorrizko trazadura modu nabarmenean aldatu gabe. Uste da hasieran aukerarik komenigarriena, eta batez ere seguruena, trazadura zubiaren azpian zehar desbideratzea dela, horrela ibaiaren bazterrarekin hobeto integratuko delakoan, paisaia aldetik."

Onesteko proposatu den Iparraldea-Hegoaldea alternatiban, Done Jakue bidea zubi azpitik doa.

Bestetik, B) puntuari dagokionez, sustatzaileak Ondare Historikoaren Zerbitzuko Arkeologia Atalaren beste txosten bat aurkeztu du, 2010eko abuztuaren 12koa. Txosten horrek dioenez, egindako azterketa arkeologikoak ez du emaitza positiborik izan, eta, beraz, alternatibetako batean ere ez da aurreikusten inolako ukipen espezifikorik.

IV.-Proposatu den alternatiba.

Proiektuaren alternatiba guztiak, alegazioak eta arlokako txostenak aztertu ondoren, Herri Lan, Garraio eta Komunikazio Departamentuak Iparraldea-Hegoaldea alternatiba proposatu du, onets dadin eta eraikuntza proiektuaren mailan gara dadin.

V.-Ingurumen eraginaren adierazpena.

Ingurumenaren eta Uraren zuzendari nagusiak irailaren 24an emandako 1466/2010 Ebazpenaren bidez, "N-135 errepidean (Iruña-Frantzia Luzaidetik) Erroko tunela egiteko lanen Informazio Azterlanari" buruzko Ingurumen eraginaren adierazpena egin zen: Herri Lan, Garraio eta Komunikazio Departamentuak sustaturiko proiektu hori ingurumenaren aldetik bideragarritzat jo zen, eta bete beharreko baldintza batzuk jarri ziren, Ingurumen eraginaren azterlanean eta proiektuan ezarritako neurri zuzentzaile guztiez gainera.

Horrenbestez, Lurraldearen Antolamenduko Batzordearen txostenarekin bat, eta Lurraldearen Antolamenduari eta Hirigintzari buruzko abenduaren 20ko 35/2002 Foru Legeari eta aplikatu beharreko gainerako arauei jarraikiz, Nafarroako Gobernuak, Lurraldearen Antolamenduko eta Etxebizitzako kontseilariak proposaturik,

ERABAKI DU:

1. Aurkeztu diren alegazioak ebaztea erabaki honetan azaldutako moduan.

2. "Erroko Tunela N-135 (Iruña-Frantzia Luzaidetik) errepidean" izeneko proiektuaren gaineko Informazio Azterlanaren Udalez gaindiko Proiektu Sektoriala onestea, Iparraldea-Hegoaldea alternatibaren arabera. Proiektua Herri Lan, Garraio eta Komunikazio Departamentuak sustatu du.

3. Eraikuntza proiektua eta obrak egiterakoan, Ingurumenaren eta Uraren zuzendari nagusiak irailaren 24an emandako 1466/2010 Ebazpenean ezarri ziren baldintzak beteko dira. Ebazpen horretan "NA135 errepidean (Iruña-Frantzia Luzaidetik), Erroko tunela egiteko lanen Informazio Azterlanari" buruzko Ingurumen eraginaren adierazpena egin zen. Herri Lan, Garraio eta Komunikazio Departamentuak sustatu du proiektua.

4. Nolanahi ere, obren exekuzioa baldintzatzen duten edo ukituta gelditzen diren azpiegiturei eta zortasunei dagokienez, sustatzaileak, obrak gauzatzen hasi baino lehen, behar diren baimen guztiak lortuko ditu kasuan kasuko gaian eskudun diren erakundeetatik.

5. Erabaki hau Nafarroako Aldizkari Ofizialean argitaratzea, eta jakinaraztea Herri Lan Zuzendaritza Nagusiari, Kultura Zuzendaritza Nagusiari, Lurraldearen Antolamendu eta Hirigintza Zerbitzuari, Ingurumen Kalitatearen Zerbitzuari eta Biodibertsitatea Zaintzeko Zerbitzuari, behar diren ondorioak izan ditzan.

6. Erabaki hau Iparraldeko Ur Konfederazioari, Erroibarko eta Esteribarko udalei, Zubiriko eta Erroko kontzejuei eta alegatzaileei jakinaraztea, behar diren ondorioak izan ditzan, eta adieraztea, halaber, erabaki honek bide administratiboa amaitu duela eta haren kontra administrazioarekiko auzi-errekurtsoa aurkezten ahal dela, Nafarroako Auzitegi Nagusiko Administrazioarekiko Auzien Salari zuzendua, erabakia argitaratu edo, kasua bada, jakinarazi eta biharamunetik bi hilabeteko epean.

Nolanahi ere, administrazio publikoek aurretiazko errekerimendua egin ahal izanen diote Nafarroako Gobernuari, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2010eko urriaren 13an.-Nafarroako Gobernuko ordezko kontseilari idazkaria (Nafarroako Gobernuko lehendakariak irailaren 20an emandako 9/2010 Foru Dekretua), Alberto Catalán Higueras.

Iragarkiaren kodea: F1016927