143. ALDIZKARIA - 2010eko azaroaren 24a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

1176/2010 EBAZPENA, urriaren 14koa, Arriskuen Prebentziorako eta Lanaren zuzendari nagusiak emana, "Osasun garraioa" sektoreko lan hitzarmen kolektiboaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 56/2010).

2010eko abuztuaren 20an sartu zen departamentu honetan "Osasun garraioa" sektoreko lan hitzarmen kolektiboaren testua, 39 artikuluz eta 3 eranskinez (ordainsarien taula barne) osatua, sektoreko enpresaburuen elkarteko (E.N.A.) ordezkaritzak eta sindikatu batzuek (UGT eta CC.OO.) 2009ko abuztuaren 20an sinatu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren arabera, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan harturik hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1. artikuluak ematen dizkidan eskudantziak erabiliz,

EBATZI DUT:

1. Nafarroako "Osasun garraioa" sektorearen lan hitzarmen kolektiboa (kodea: 3107385) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau negoziazio batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Berrikuntza, Enpresa eta Enplegu Departamentuko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko urriaren 14an.-Arriskuen Prebentziorako eta Lanaren zuzendari nagusia, Imelda Lorea Echavarren.

ERIEN ETA ISTRIPUA IZAN DUTENEN ANBULANTZIA BIDEZKO GARRAIOAREN SEKTOREKO ENPRESEN ETA LANGILEEN LAN HITZARMEN KOLEKTIBOA

ARRAZOIEN AZALPENA

Honako hitzarmen kolektibo hau negoziazio luze baten emaitza da, sektoreko enpresen eta sindikatuen artean izandakoa, eta horren ondorioz eratu da testu artikuludun hau, zeinetan biltzen baitira bi alderdien iritziz beharrezkoak diren asmoetako batzuk enpresa hobetzeko eta hitzarmenaren indarraldiko urteetan bake soziala bermatzeko.

1. artikulua. Eremu funtzionala.

Hitzarmen hau osasun garraioaren, eta erien, istripua izan dutenen, elbarrien edo ezinduen garraioaren sektorean diharduten enpresa eta langile guztiei aplikatuko zaie, hain zuzen ere, Nafarroako Foru Komunitateko mota desberdinetako anbulantzietan, erien garraio arruntean, kolektiboan, presazko eta laguntzazkoan (JEZeko 1721.4 epigrafea) dihardutenei eta, orobat, Nafarroatik kanpokoak izan arren, euren lana lurralde honetan egiten dutenei.

2. artikulua. Lurralde eremua.

Hitzarmen honen lurralde eremua Nafarroako Foru Komunitatea da.

3. artikulua. Langile eremua.

Hitzarmen hau eremu funtzionalean eta lurraldekoan mugatutako enpresetan euren zerbitzua ematen duten langile guztiei aplikatuko zaie, edozein dela ere horien lanbide kategoria, martxoaren 24ko 1/1995 Legegintzako Errege Dekretuaren 2. artikuluak aipatu goi karguak salbuetsita.

4. artikulua. Iraunaldia.

Hitzarmen kolektibo honek 2009ko urtarrilaren 1ean hartuko du indarra eta 2012ko abenduaren 31 arte iraunen du.

5. artikulua. Hitzarmenaren amaiera iragartzea.

Hitzarmenaren amaiera iragarri da sinatzen den egun beretik.

6. artikulua. Luzapena.

Hitzarmen honen arauen edukia bere horretantxe luzatuko da urtez urte eta indarra izanen du harik eta beste hitzarmen bat sinatu arte.

7. artikulua. Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira. Horregatik, akordioak ez du eraginik izanen, baldin itundutako puntuetako baten deuseztasuna erabakitzen badu agintari administratiboak edo judizialak.

8. artikulua. Berme pertsonala.

Hitzarmen honek biltzen dituen baldintza guztiak, ekonomikoak eta bestelakoak, gutxienekotzat joko dira.

Beraz, gaur egun zernahi kontratu nahiz hitzarmenetan finkatutako itun, klausula edo egoerak, langilearentzat edo langile talde batentzat hobeak badira, bere horretan segituko dute berme pertsonal gisa, baldintza horiek orain arte eduki dituztenentzat.

9. artikulua. Irenspena eta konpentsazioa.

Konpentsazioa eta irenspena izanen dira ordaintzen diren soldatak, orokorrean eta urteko konputuan, erreferentziako arauzko ordenean edo itundutakoan finkatutakoak baino hobeak badira langileentzat.

10. artikulua. Batzorde paritarioa.

Batzorde paritarioa eratu da hitzarmenaren interpretazio, arbitraje eta adiskidetze arloetarako.

Hamar kide izanen ditu: bost, langileen ordezkari, eta beste bost, enpresaburuen ordezkari. Haietako bat, bilera bakoitzean izendatuko dena, idazkari lanetan ariko da.

Bileretan ordezkaritza bakoitzaren aholkulariak ager daitezke, hizpidea bai baina botorik gabeak.

Alderdiek hitzartu dute, espresuki, hitzarmen honen interpretazioaren edo aplikazioaren inguruan zalantzarik edo desadostasunik izanez gero, batzordeari txostena egiteko eskatuko zaiola, auzietako salan edo administrazioan erreklamazioa aurkeztu aurretik.

Batzorde paritarioa osatzen duten kideen zerrenda hitzarmen honen eranskinean heldu da.

Batzorde paritarioaren bilerarako deia alderdietako edozeinek egiten ahal du, bilera baino berrogeita zortzi ordu lehenago.

11. artikulua. Bestelako arauetara jotzea.

Hitzarmen honetan aurreikusten ez den orotan jarduera sektore berean Estatuko hitzarmen kolektiboan bildutako arauak aplikatuko dira, baita une bakoitzean indarra duen legezko araudia ere, 7. artikuluan ezarritakoa galarazi gabe.

12. artikulua. Aplikaziotik kanpo gelditzeko klausula.

Bi alderdiek erabaki dute, hitzarmen honek indarra dueino, hitzarmenak ukituriko enpresa bat ere ezin dela kanpo gelditu.

13. artikulua. Ordainsariak.

2009. urteko lansariak hitzarmen honen I. eranskineko soldata tauletan ageri dira.

2010. urterako 2009ko soldaten taulak izanen dira, Estatuko 2009ko KPI erreala gehituta (Estatuko KPI negatiboa balitz, KPIren erreferentzia 0 izanen litzateke), eta %0,6 gehiago.

2011. urterako 2010eko soldaten taulak izanen dira, Estatuko 2010eko KPI erreala gehituta (Estatuko KPI negatiboa balitz, KPIren erreferentzia 0 izanen litzateke), eta %0,6 gehiago.

2012. urterako 2011ko soldaten taulak izanen dira, Estatuko 2011ko KPI erreala gehituta (Estatuko KPI negatiboa balitz, KPIren erreferentzia 0 izanen litzateke), eta %0,6 gehiago.

Sektoreko langileek euren soldatak sorrarazi eta hurrengo hileko 5a baino lehen kobratuko dituzte.

14. artikulua. Antzinatasuna.

Hitzarmen honek biltzen dituen langileek, antzinatasunaren osagarri pertsonal gisa, aldian aldiko igoera izanen dute enpresa berean emandako zerbitzualdiagatik; hauek hain zuzen ere:

Enpresan hiru urte eman ondoren, %3koa.

4. urtetik aurrera, enpresan ematen den urtebete bakoitzeko %1 gehiago.

Enpresan 25 urte edo gehiago emanez gero, %25ekoa.

Hori guztia oinarrizko soldataren gainean kalkulatuta.

Antzinatasuna langilea enpresan sartzen denetik hasiko da kontatzen, enpresarekin lotzen duen lan kontratua edozein motatakoa dela ere.

Antzinatasuna kontatzerakoan, enpresa berean lan kontratua hautsi gabe emandako denbora hartuko da kontuan, eta benetan lan egindakotzat joko dira soldata edo lansaria kobratu izandako hilabete edo egun guztiak, hala zerbitzu emateagatik nahiz oporretan, lizentzia ordainduengatik eta lan istripuaren edo eritasunaren ondoriozko aldi baterako prestazio ekonomikoengatik.

Lan kontratua ez dela hautsi ulertuko da, kontratuen arteko tartea hogei egunetik gorakoa ez denean.

Zerbitzu emandako urte gehikuntzak hirurtekoa bete eta hurrengo hileko lehen egunetik sorraraziko dira.

15. artikulua. Plusak.

Igandeak.-Igandeetako plusa igandean lan egiten duten langile guztiei ordainduko zaie, larrialdietako zerbitzuko 24 orduko txandetan dihardutenei izan ezik.

Igandeetako plusa honakoa izanen da egun bakoitzeko: 3 euro 2006. urtean, 6 euro 2007an, 9 euro 2008an, 12 euro 2009an, 15 euro 2010ean eta 18 euro 2011n. Hurrengo urteetan oinarrizko soldatarako itundutako igoera aplikatuko da.

Jaiegunak.-Jaiegunetako plusa egun hauetan lan egiten duten langileei ordainduko zaie: urtarrilaren 1ean, urtarrilaren 6an, Ostegun Santuan, Ostiral Santuan, maiatzaren 1ean, urriaren 12an, abenduaren 8an eta abenduaren 25ean; 8 jaiegun urtean, guztira.

2010ean, hitzarmenean itundutako egunez gain, honako egun egunetan ere jaieguneko plusa ordainduko da: abuztuaren 15ean eta abenduaren 6an; 10 jaiegun urtean, guztira.

2011n, hitzarmenean itundutako egunez gain, honako egun hauetan ere jaieguneko plusa ordainduko da: uztailaren 25ean eta martxoaren 19an; 12 jaiegun urtean, guztira.

2012an, hitzarmenean itundutako egunez gain, honako egun hauetan ere jaieguneko plusa ordainduko da: azaroaren 1ean eta abenduaren 3an; 14 jaiegun urtean, guztira.

Jaieguneko plusa honako hau izanen da egun bakoitzeko: 3 euro 2006. urtean, 6 euro 2007an, 9 euro 2008an, 12 euro 2009an, 15 euro 2010ean eta 18 euro 2011n. Hurrengo urteetan oinarrizko soldatarako itundutako igoera aplikatuko da.

24 ordukoentzako egiten diren egutegietan, txandako langileei jaiegunez sartzen badira bakarrik ordainduko zaie jaieguneko plusa.

Artikulu honetan aipatu jaiegunetako batzuk beste batzuekin ordezten badira Nafarroako Foru Komunitatearen esparruko jaiegun ordaindu eta errekuperaezinen egutegi ofiziala ezartzen duen Nafarroako Gobernuaren ebazpenean, azken horiek jaieguntzat joko dira, urtean 14 jaiegun egiten dutela, guztira.

Gaueko lana.-Gaueko lanaren plusa langile guztiei ordainduko zaie, larrialdietako zerbitzuko 24 orduko txandetan dihardutenei izan ezik.

22:00etatik biharamuneko 6:00ak arteko orduak gaueko ordutzat joko dira.

Gaueko plusa 2 eurokoa izanen da gau bakoitzeko (0,25 zentimo/ordua) 2009. urterako, 4 eurokoa gau bakoitzeko (0,5 zentimo/ordua) 2010erako, 6 eurokoa gaueko (0,75 zentimo/ordua) 2011rako, 8 eurokoa (euro bat/ordua) 2012rako, eta eguneko oinarrizko soldataren %25ekoa 2013rako eta hurrengo urteetarako.

Plus horiek ordaindu, ordainduko dira, baldin eta lan egutegian markatutako lanorduei badagozkie.

16. artikulua. Lan egutegia.

Anbulantzien enpresa guztiak beharturik daude urteko lan egutegia egitera, zeinean ondokoak gutxienez agerraraziko baitira:

-Lan ordutegia.

-Lan egunak nola banatzen diren astean, hilean eta urtean.

-Jaiegunak.

-Asteko atsedenaldiak.

-Oporrak.

Lan egutegia lantokiko iragarki oholean paratuko da, agerian eta denek erraz ikusteko moduan.

17. artikulua. Lanaldia.

Lanaldia 40 ordukoa izanen da astean.

2009. urteko benetako lanaldia 1.752 ordukoa izanen da, urtean.

2010. urteko benetako lanaldia 1.752 ordukoa izanen da, urtean.

2011. urteko benetako lanaldia 1.744 ordukoa izanen da, urtean.

2012. urteko benetako lanaldia 1.744 ordukoa izanen da, urtean.

Enpresek ahalmena dute euren lana zerbitzuaren beharren arabera antolatzeko; horrela, langileentzako lan txandak ezarriko dituzte, horien lana aurretiaz eta benetan esleitua izan dadin urteko 365 egunetan, 0:00etatik 24:00etara. Txanda horiek errotatiboak nahiz finkoak izaten ahal dira.

Atseden egunak lan egutegia aplikatzearen ondoriozkoak izanen dira, gai horretaz lan arloko legeek agindutakoa betez. Nolanahi ere, langileak lau astetik behin bi atsedenaldi (bi egun jarraian bakoitza) hartzeko eskubidea izanen du, horietako bat asteburuarekin batera hartzekoa, eta, gainera, beste bi atsedenaldi (egun bat eta erdi jarraian bakoitza).

Hala eta guztiz ere, enpresaren ordezkariek eta hauteskunde sindikaletan hautatutako langileen ordezkariek beste formula bat aukera dezakete lanaldia zatitzeko; akordio hori hitzarmenari erantsitako aktaren ereduan azalduko da, eta dagokion batzorde paritarioan erregistratuko. Halako akordioek hitzarmenaren indarraldi bera izan dezakete gehienez. Langileen eta enpresen artean akordio berririk eginez gero, indarrik gabe utziko lituzkete aurreko akordioak.

Lanaldi jarraituan arauzko atsedenaldian ematen den denbora (otarteko denbora ere deitua) lan egindako denboratzat joko da.

Lanaldiaren poltsa.

Lanaldiaren luzapena, programatutako zerbitzuan ustekabeko inguruabarrengatik gerta daitekeena, 30 minututik beherakoa bada, ordu arrunten poltsa batean pilatuko da, eta langileak eskatzen duen egunean, astelehenetik ostiralera bitarte, hartuko ditu ordu horiek, jaiegunetan izan ezik, eta langilearen eta enpresaren artean akordioa eginda gainontzeko egunetan. Lanaldiaren poltsa urte batean sortu eta hurrengo urteko urtarrilaren 31 izanen da ordu horiek hartzeko azken eguna. Ez bada akordiorik enpresaren eta langilearen artean ordu horiek hartzeko egunerako, ordu bereziaren prezioan ordainduko dira, lanaldiaren poltsa sortu eta hurrengo urteko urtarrileko nominan.

Txanda aldaketak.

Enpresek baimena emanen dute langileek eskatutako txanda aldaketak egiteko, hiru egun lehenago behintzat eskatzen bada eta aldatu beharra justifikatuz gero.

-Familiako arrazoiak.

-Ospakizun justifikatuak.

-Kontsulta medikoak.

-Langileak oporrak hartu ahal izan ditzan, enpresak eman ez badizkio eskatutako aldirako.

Txanda aldaketarik ez da onartuko, inola ere, beste jardueretan aritzeko, osasun garraioarekin zerikusia izan edo ez.

Enpresek eta langileen ordezkariek negoziatzen ahal dute arrazoi justifikatuak gehitzea edo gutxitzea. Arau orokor gisa, aldaketak zerbitzu bereko langileen artean eginen dira (larrialdiak eta programatua), eta elkarrekin aldaketa egiten duten bi langileek sinatuko dute eskaera. Aldaketa egiteko baimena emanik, eskaera egin duenak bakarrik bere txandaren erantzukizuna izanen du.

18. artikulua. Aparteko orduak.

Aparteko ordutzat joko dira lan egutegian finkatutako eguneko lanaldiaren gainetik lan egiten direnak.

Ahal delarik ez dira aparteko ordurik eginen, egiturazkoak ez badira. Egiturazkoak izanen dira zerbitzu beharrak direla-eta, hala nola matxurak, presazko lanak, ustekabeko bajak, eta abar, egin beharrekoak.

Aparteko orduak, arau orokor gisa, atseden denborarekin konpentsatuko dira, zeina enpresaren eta langileen artean adostuko baita. Atseden denbora ez da inola ere lanaldi arruntean lan egindako denboraren %175etik beherakoa izanen.

Salbuespen gisa, diruz ere konpentsatzen ahal da eta aparteko orduaren balioa ez da inola ere ordu arruntaren %175etik beherakoa izanen.

Urtean ezin izanen da aparteko 80 ordu baino gehiago egin, ezta 15 baino gehiago hilean ere, atsedenarekin konpentsatzen direnak eta diruz ordaintzen direnak barne.

Gehieneko ordu kopuru horiek jaitsi eginen dira aldi baterako kontratuetan, horien iraupenaren proportzioan.

Aparteko orduak egunez egun erregistratuko dira eta astero horien batura eginen da. Asteko orduen kopia bat emanen zaio langileari eta beste bat langileen legezko ordezkariei.

19. artikulua. Aparteko eskersariak.

Urtean aparteko hiru eskersari ordainduko dira: bat uztailean, beste bat eguberrietan eta azkenik hirugarrena, mozkinen paga izanen dena. Horien zenbatekoa hilabeteko oinarrizko soldata + antzinatasuna izanen da.

Aurreneko biak sei hilabeteka kontatuko dira, lehenengoa uztailaren 15ean ordainduko dena eta bigarrena abenduaren 15ean. Mozkinen paga urtez urte kontatuko da eta hileko hamabi nominetan hainbanatuko.

Lanean urtebete egin ez duten langileek lan egindako denboraren arabera hainbanatutakoa kobratuko dute.

20. artikulua. Dietak.

Zerbitzua bete beharrez, bazkaria edo afaria edo gaua ohiko bizilekutik kanpora eman beharra izanez gero, enpresak horien gastuak ordainduko dizkio langileari, gastuok justifikatuta, ondorengo ordutegien barnean gertatzen badira, betiere:

-Bazkarirako dieta: zerbitzua 12:00ak baino lehen hasi eta 15:30a baino geroago bukatzen denean.

-Afarirako dieta: zerbitzua 21:00ak baino lehen hasi eta 24:00ak baino geroago bukatzen denean.

Lanaldi jarraituko arauzko atsedenaldian emandako denboran, artikulu honetan zehaztu bezala, bazkaltzen edo afaltzen emandako tartea lan denboratzat joko da.

21. artikulua. Oporrak.

Hitzarmen honen eraginpeko enpresetako langileek hogeita hamaika eguneko oporrak izanen dituzte urtean, honela ordainduak: oinarrizko soldata + antzinatasuna + plusak, gaueko, jaieguneko eta igandeko plusak salbuetsirik.

Oporrak hartzeari begira, enpresak behar diren txandak ezarriko ditu; hori dela-eta, bi denbora tarte edo gehiago jar ditzake, langile gehienek udako hamabostaldia hartzeko aukera izan dezaten. Opor txanda horiek urteko egutegia kontuan hartuta eta zerbitzuaren beharrak ikusita ezarriko dira. Opor txandak errotatorioak izanen dira adosten den irizpidearen arabera.

Horrela erabaki delako, oporren hamabostaldia udatik kanpora hartzen dutenek opor egun bat gehiago izanen dute, salbu eta langileak berak eskaturik urteko edozein sasoitan hilabete osoa eta jarraitua hartzen badu.

22. artikulua. Baimenak eta lizentziak.

Langileak, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbesteko tartean (baimen eta lizentzia horien ondorioetarako, eguneko lanaldia 8 ordukoa dela ulertuko da). Lizentzia ordainduaren gertaera eragilea lanaldia bete ondoren gertatzen bada, lizentziako lehenbiziko eguna hurrengo egun naturala izanen da.

Ezkontza: 16 egun natural.

Anai-arreben ezkontza: egun bat.

Gurasoen, seme-alaben eta ezkontidearen nahiz izatezko bikotekidearen heriotza: 5 egun natural.

Aiton-amonen, biloben edo anai-arreben eta aita-amaginarreben heriotza: 2 egun natural.

Andrearen edo neska-lagunaren erditzea: 3 egun natural.

2. gradurainoko odol bereko edo/eta ezkontzako ahaidearen ospitalizazioa edo eritasun larria: 2 eguneko baimen ordaindua. Egun horiek gertaera eragileak dirauen denboran har daitezke.

Lehen graduko ahaideen (ezkontidea, gurasoak eta seme-alabak) kirurgia anbulatorioa: egun bateko baimena.

Ohiko bizilekua aldatzeagatik, egun bat.

Publikoa edo pribatua den eginbehar saihestezina betetzeko edo azterketak egitera joateko: behar-beharrezkoa den denbora.

Norberaren aferetarako: bi egun. Baimen horretarako gutxienez bost egun lehenago eskatu beharko du langileak eta ez dira onartuko egun berean langile batek baino gehiagok egindako eskaerak.

2. gradutik aurreko odol bereko edo/eta ezkontzako ahaidearen ospitalizazioa edo eritasun larria: gehienez ere 5 eguneko baimen soldatarik gabea, langileak beharrezkoak baditu.

23. artikulua. Gidabaimena kentzea.

1. Gidabaimena kenduz gero, mozkortzeagatik edo drogatzeagatik ez bada, baldintza hauek hartuko dira kontuan:

a) Baimena kendu bada enpresarako zerbitzuko ordu eta jardueretan gidatzean, 6 hilabetera arte, enpresaburuak gidaria beste lanpostu batean jarriko du.

Beste lanpostu batean egokitu ezin bada, gidariari nahitaezko eszedentzia emanen zaio, berehala itzultzeko eskubidearekin behin zehapena beteta.

b) Baimena kendu badiote lanordutik kanpora gidatzean eta lanetik kanpoko jardueretan, langileari nahitaezko eszedentzia emanen zaio, gehienez ere 6 hilabetekoa.

c) Nolanahi ere, ahaleginak eginen dira gidariari gidabaimena kentzekotan enpresan lan gutxien dagoen hiletan kentzeko.

2. Enpresek aseguru-etxe batekin poliza bat sinatuko dute, hala nahi duten gidarientzat. Poliza horren bidez, eszedentzian dagoen gidariari, aurreko zenbakiko a) letrako bigarren lerroaldean ageri dena gertatzen bada -gidabaimena kenduz gero, gehienez ere urtebeterako- 747,37 euroko diru kopurua emanen diote egoera horretan egon beharreko hilabeteko, edo proportzioan dagokiona. Primaren zenbatekoa erdi bana ordainduko dute enpresak eta gidariak, eta enpresek baimena izanen dute diru hori nominatik kentzeko.

Poliza horren zenbatekoari Estatuko aurreko urteko KPIa gehituko zaio hitzarmenaren indarraldiko urte bakoitzean.

Arestian aipatutako aplikazio onuragarri horretatik kanpo geldituko dira zehapenak gidariaren arduragabekeria nabarmenaren, zuhurtziarik gabeko ausarkeriaren, mozkorraldiaren edo drogatzearen ondoriozkoak direnean.

24. artikulua. Bajak eritasun edo istripuagatik.

Aldi baterako ezintasun kasuan, behar diren zerbitzu medikoek egiaztatuta, arau hauek hartuko dira kontuan:

Lanik ezin egin izana dakarren laneko istripua edo/eta lanbide eritasuna. Kasu horretan, enpresek hileko ordainsariaren %100era arte osatuko dituzte aseguru-etxe publikoak ematen dituen prestazioak.

Eritasun arrunta eta lanetik kanpoko istripua: langileek hileko ordainsariaren %100 kobratuko dute aldi baterako ezintasuneko 1. egunetik hasita, enpresek behar diren osagarriak ordainduta.

25. artikulua. Aseguru kolektiboa.

Enpresek istripu aseguru kolektiborako poliza bat kontratatuko dute euren langileentzako, baldintza hauei jarraituz:

Edozein lan ordaindutarako erabateko ezintasun iraunkorra eta baliaezintasun handia, laneko istripuaren ondoriozkoa: 48.692.66 euroko kapitala langile bakoitzeko.

Lan istripuaren ondoriozko heriotza: 32.498,27 euroko kapital aseguratua langile bakoitzeko.

Bizi edo baliaezintasunerako edozein aseguru kolektibo euren borondatez ezarria daukaten enpresetan, langileek aukera izanen dute hitzarmen honetan aipatzen dena edo enpresak ezarria daukana hautatzeko.

2010, 2011 eta 2012rako, zenbateko horiek aurreko urteetako Estatuko KPI erreala igotzen den heinean igoko dira.

26. artikulua. Konpentsazioa, kontratua amaitzeagatik.

Lan kontratua amaitzeagatik, enpresan gutxienez ere 10 urteko antzinatasuna duten langileek ondoren aipatzen den konpentsazioa hartzeko eskubidea izanen dute, kontratua amaitzen den unean, ondoren aipatzen diren urteak bete badituzte:

2009. urtean:

60 urte: 4.895,84 euro.

61 urte: 3.909,44 euro.

62 urte: 2.931,04 euro.

63 urte: 1.956,63 euro.

64 urte: 974,85 euro.

2010, 2011 eta 2012rako, zenbateko horiek aurreko urteetako Estatuko KPI erreala igotzen den heinean igoko dira.

27. artikulua. Uniformeak.

Enpresa esleipen hartzaileek euren langileei bina uniforme oso emanen dizkiete jardueraren hasieran, enpresak eginiko diseinuaren araberakoak eta negurako eta udarako egokiak. Jantzi horiek beharren arabera berritu eta osatuko dira, hondatutakoak itzuli ondoren, eta enpresen ardura izanen da langileek erabiltzen dituzten uniformeak egoera onean egotea.

Gutxien-gutxienez bi alkandora eta bi galtza pare izanen dira uniforme bakoitzeko, eta hotzerako eta euritarako arropa, lana zein baldintzatan eta inguruabarretan egiten den kontuan hartuz. Uniforme osoa aise ikusteko modukoa izanen da errepideetan lan egiteko.

Laneko arropa enpresan baino ez da erabiliko, eta itzuli egin beharko da arropa berria hartzean edo kontratua bukatzean.

Jantzien kalitatea langileen ordezkariekin batera adostuko da.

28. artikulua. Laneko segurtasuna eta osasuna.

Osasuna zaintzea: enpresak behartuta daude langileei laguntza ematera beren osasuna zain dezaten, baita zerbitzua betetzeko behar dituzten txertoak ematera ere, Prebentzio Zerbitzuaren irizpideari jarraituz.

Osasuna berariaz aztertuko da. Lanpostu bakoitzerako dauden protokoloak aplikatuko dira.

Urtero zainduko da osasuna, eta beharrezkotzat jotzen diren osasun azterketa guztiak eginen dira, lanpostu bakoitzak zer arrisku dituen, haien arabera, Prebentzio Zerbitzuaren irizpideari jarraituz.

Osasun azterketa lanorduetan eginen zaie, zerbitzu beharretara egokituz, edo enpresa eta langilea ados jarrita.

Enpresak behartuta daude behar den prestakuntza ematera langile guztiei laneko segurtasun eta osasun arloan, Laneko Arriskuen Prebentzioari buruzko 31/1995 Legearen arabera.

29. artikulua. Lanbide kategoriak.

Sektore honek lanbide kategoria hauek ditu, besteak beste:

-Gidaria.

-Laguntzailea.

-Taldeko burua.

-Trafikoko burua.

-Administrari-ofiziala.

-Administrari laguntzailea.

-Mekanikaria.

-Mekanikari laguntzailea.

-Telefonozaina.

-Medikua.

-O.L.T.

-Zuzendaria.

30. artikulua. Enpresaburuaren subrogazioa.

Irizpide orokorrak: Gobernuak edo beste era bateko entitate publiko zein pribatu batek anbulantzien zerbitzuko kontrata baten esleipen-hartzailearen titulartasuna aldatzen badu ere, ez da horregatik lan harremana amaituko eta esleipen-hartzaile berriari subrogatuko zaizkio aurreko esleipen-hartzaileak langilearekiko zituen lan eskubide eta betebeharrak, kontuan hartu gabe sinatuta duen kontratuaren modalitatea eta izaera.

Enpresaburuen subrogazioa, hasiera batean behinik behin, kontrata utzi duen enpresako langile guztiei aplikatuko zaie, kategoria guztietan edozein langilek izan ditzakeen itun indibidualak eta baldintza onuragarrienak errespetatuz, hala enpresa itunaren bidez eginikoak nola itun indibidualaren bidezkoak.

Enpresa esleipen-hartzaile berrian nahitaez subrogaturik gelditzen diren langileen kopurua aski izanen da esleipen kontratua gauzatzeko. Zenbat langile behar diren kalkulatzeko, parametro hauek erabiliko dira:

A) Indarra duen hitzarmenaren arabera, beharrezkoak diren lanorduak, zerbitzuen modalitatea eta modalitate horretarako itundutako ibilgailuak kontuan hartuta.

B) Langileek beraiek erabakiko dute, kontrata utzi duen enpresan zuten antzinatasunaren hurrenkeran, enpresa esleipen-hartzaile berrian euren borondatez sartu ala ez sartu, eta horrela, horietako norbait eskubide horretaz baliatuko ez balitz, antzinatasunaren hurrenkeran hurrengo datorrenak izanen luke eskubide hori eta horrela hurrengoekin ere, harik eta A) atalean adierazitako beharrezkoa den langile kopurura iritsi arte.

C) Enpresa esleipen-hartzaile berrian subrogatzen diren langileak ez zaizkio subrogazioa sorrarazi zuen kontratua betetzeari soilik lotuko, izan ere esleipen-hartzaile berriak, barne antolaketarako duen eskubideaz baliaturik, kontratatuak dituen osasun garraioko beste zerbitzuetan jartzen ahal ditu eta, orobat, enpresako lan egutegiaren barrenean zerbitzu guzti-guztiak bete ahal izateko komeni diren txandak ezarri, Nafarroako osasun garraioaren sektoreko hitzarmen kolektiboaren 16. eta 17. artikuluei jarraikiz.

Langileek arlo hauetan dituzten eskubideak errespetatuko dira beti: lantokia, antzinatasuna, lanbide kategoria, soldata, kontratuaren iraupena eta lanaldia, azken honen gehieneko ordu kopurua lan kontratuetan edo, bestela, sektoreko lan hitzarmenean ezarritakoa izanen da.

D) Esleipen berria egin denean aldi baterako ezintasun edo baliaezintasun egoeran, eszedentzian, oporretan edo lanpostua gordetzeko eskubidea ematen duen beste edozein egoeratan dauden langileak kontuan hartuko dira B) puntuan adierazitako eskubidea erabiltzeko orduan. Langile horiek ordezten dituzten bitarteko kontratudunak esleipen-hartzaile berrira pasako dira, bitarteko gisa, ordeztua itzuli arte.

E) Kontrata utzi duen enpresaren subrogazioa errazteko, enpresa esleipen-hartzaile berriari, hilabete lehenago gutxienez, dokumentazio hau emanen dio:

-Subrogatu beharreko langileen zerrenda, B) puntuari jarraikiz.

-Azkeneko sei nominak, TC.1 eta TC.2, kontratua, antzinatasuna, D) puntua kontuan hartuta kontratua duten langileak.

-Kontrata utzi duen enpresak eta langileak sinatutako dokumentua, zeinetan jarriko baita zenbat opor egun hartu dituen eta zenbat gelditzen zaizkion, eta horrekin batera, likidatzeko dauden aparteko pagak. Subrogazioa egin denean arauzko oporrak hartu ez dituzten langileek zerbitzuaren esleipen-hartzaile berriarekin hartuko dituzte, zeinak berarentzat lan eginiko denboraren zati proportzionala baizik ez baitu ordainduko; izan ere, beste zatia kontrata utzi duen enpresak ordainduko du egin behar duen likidazioan. Kontrata utzi duen enpresak azkeneko hileko soldatarekin batera langileak sorrarazitako aparteko pagen zati proportzionala likidatuko dio.

Ordezkari sindikalak bertan egonen dira enpresaburuaren subrogazio prozedura osoan.

-Lan poltsa.

Anbulantzia zerbitzuko kontrata baten esleipenean, titulartasunaren aldaketa prozesu batean subrogatu ez diren langileekin lan poltsa bat eratuko da, Nafarroako osasun garraioaren sektoreko hitzarmen kolektiboko 30. artikuluak agintzen duen moduan. Lan poltsa hori 6 hilabeterako izanen da, subrogazio prozesutik hasita.

Enpresa esleipen-hartzailea behartua dago kontratazio berriak lan poltsan dauden langileekin egitera, eskatzen den kategoriakoak badira, betiere.

Lan poltsan dagoen langile bati kontratua eskaintzen bazaio eta uko egiten badio, lan poltsatik kanporatuko dute. Enpresak eskainitako kontratua 6 hilabetetik beherakoa bada (lan poltsaren iraupena), kontratua amaitzean berriro sartuko da lan poltsan.

Langileari lanpostua ez zaiola interesatzen ulertuko da, enpresak eskaintzaren jakinarazpena eginik edo burofax bidez alferrik saiatu arren, langileak erantzuten ez badu edo uko egiten badio ondorengo zazpi egun naturaleko epean.

31. artikulua. Mugigarritasun funtzionala.

Enpresako mugigarritasun funtzionalak ez du beste mugarik izanen lan egiteko behar diren titulazio akademikoetan edo lanbide-titulazioetan eskatutakoak eta langile bakoitzaren lanbide taldeari dagozkionak baizik.

Lanbide taldean oinarritutako sailkapen sistemarik izan ezik, mugigarritasun funtzionala lanbide kategoria baliokideen artean egiten ahal da.

Langilea bere lanbide taldeko edo kategoria baliokideko lanak ez diren eginkizunak egin beharrean izanen da horretarako justifikatutako arrazoi teknikoak edo antolaketakoak daudenean eta orduan bakarrik, eta behar-beharrezkoa den denboran, ez gehiago.

Langile batek bere lanbide kategoriari dagokiona baino goragoko kategoriako eginkizunetan ari denean, bi lanpostuen artean dagoen diferentzia kobratzeko eskubidea du.

Beheragoko kategoriako lanak enpresaren produkzio jardueran behar larriak edo ustekabekoak gertatzen direnean baino ez dira eginen, aldez aurretik langileen legezko ordezkariei egoera eta jarduketa horien berri emanda, betiere.

32. artikulua. Eskubide sindikalak.

Langileen delegatuek nahiz enpresa batzordeko kideek legeak aitortutako eskubideak izanen dituzte informazio arloan eta ordezkaritza lanerako ordu sindikaletan, Langileen Estatutuak eta Askatasun Sindikaleko Lege Organikoak arautu bezala.

Urteko lanorduen poltsa bat eratzen ahal da, eta ordu horiek sindikatu beraren delegatu nahiz afiliatuetako edozeinek erabil ditzake.

Ordu kreditu hori berrogeita zortzi ordu lehenago eskatu beharko da, benetan ezinezkoa denean izan ezik.

33. artikulua. Kontratazioa.

Enpresek euren kontratazio beharrei erantzuteko, une bakoitzean indarra duen edozein lan kontratu mota erabil dezakete.

Enpresek ez dezakete aldi baterako laneko enpresen zerbitzurik erabili.

Langileen Estatutuaren 15. artikuluko 1. puntuko b) letran ezarritakoarekin bat, merkatuaren unean uneko beharrei, lan metaketari edo gehiegizko eskaerari aurre egin ahal izateko, enpresek zilegi izanen dute iraupen mugatuko lan kontratuak egitea. Kontratu horiek gehienez hamahiru hilabete eta erdi iraunen dute hemezortzi hilabeteko epearen barnean.

Erabaki da enpresetako plantillen %90ek bederen mugagabeko kontratuak izanen dituztela.

34. artikulua. Kontratuen kopiak entregatzea.

Lan kontratuen, aldaketen edo luzapenen oinarrizko kopia bana emanen zaie langileen legezko ordezkariei.

Enpresako zuzendaritzak hamabost eguneko epean dokumentu horren kopia bana emanen die langileen delegatuei edo enpresa batzordeari.

35. artikulua. Prestakuntza.

-Etengabeko prestakuntza.

Hitzarmen honen ondorioetarako, etengabeko prestakuntza esaten zaio hartan aurreikusitako modalitateen bidez garatzen diren prestakuntza ekintzen multzoari, baita enplegurako lanbide heziketaren azpisistema arautzen duen martxoaren 23ko 395/2007 EDan, errege dekretu hori garatzen duen martxoaren 7ko TAS/718/2008 Aginduan eta Kualifikazioei eta Lanbide Prestakuntzari buruzko ekainaren 19ko 5/2002 Lege Organikoan aurreikusitako ekintzei ere.

Orobat, beste edozein akordio edo arau, enpresako prestakuntza ekintzen finantzazioari bide ematen diona lanbide gaitasunak eta kualifikazioak garatzeko eta lanean diren langileak birkalifikatzeko, era horretan bat etor daitezen enpresen lehiakortasuna eta langile bakoitzaren prestakuntza.

-Prestakuntza planen edukia.

Prestakuntza plan guztietan, zernahi motatakoak direla ere, gutxienez hauek zehaztuko dira:

  • Garatu beharreko ekintzen helburuak eta xedeak.
  • Zein lanbide kategoriatan edo taldetan burutuko den eta partaideen kopurua.
  • Prestakuntza planen egutegia eta tokiak.
  • Aurreikusitako ebaluazio tresnak.
  • Prestakuntza ekintzen gutxi gorabeherako kostua, ekintza eta talde motak bereiziz.
  • Enpresak edo enpresa multzo osoak lanbide prestakuntzarako ordaindu beharreko urteko kuotaren gutxi gorabeherako zenbatespena.

Plana gauzatu aurretik, hilabeteko epea izanen da langileen legezko ordezkariekin kontsultatzeko plan hori prestakuntza beharrei egokitzearren; enpresak informazioa emanen die langileen legezko ordezkariei, Langileen Estatutuan eta 395/2007 Errege Dekretuaren 15. artikuluan xedatutakoari jarraituz.

-Prestakuntza planen tramitazioa.

Etengabeko Prestakuntzarako Akordio Nazionalaren (E.P.A.N.) babesean sustatzen den prestakuntza plana finantzatze aldera, enpresaren eginbeharra izanen da:

  • Planaren iraupena ezartzea, oro har urtekoa izanen dena. Salbuespen gisa, plan horiek urtebetetik gorakoak izan daitezke inguruabar bereziak gertatuz gero, eta horretarako arrazoiek Sektoreko batzorde paritarioan justifikatuta egon behar dute.
  • Planaren berri ematea langileen legezko ordezkariei, dokumentu hauekin batera:
  • Aurreko ekitaldian eginiko prestakuntza ekintzen balantzea.
  • Orientazio orokorrak prestakuntza planaren edukiari buruz (helburuak, espezialitateak, ikastaroen izenak, etab.).
  • Ikastaroa egiteko egutegia.
  • Plana zeini zuzentzen zaion, lanbide kategoriak/taldeak zehaztuz.
  • Baliabide pedagogikoak eta ikastaroak emateko tokiak.
  • Aukeratzeko irizpideak.

Langileen legezko ordezkariek euren txostena eginen dute dokumentazio hori eskuratu eta hamabost eguneko epean.

Prestakuntza planaren edukiaz desadostasunik sortzen bada, hamabost eguneko epea emanen da enpresako zuzendaritzaren eta langileen ordezkarien artean afera konpontzeko.

Epe hori bukatu eta adostasunik ez izatera, bi alderdietako edozeinek eska dezake sektoreko batzorde paritarioak esku har dezala, baina desadostasun horietxen gainean soilik.

Prestakuntza plana sektoreko batzorde paritarioari aurkeztea, jakinaren gainean egon dadin, tramiteak egin ditzan eta Estatuko batzorde mistoari igor diezaion. Azken horrek onetsi behar du prestakuntza ekintzen finantzazioa.

Prestakuntza ekintzak hasi aurretik, horietan parte hartuko dutenen zerrenda, egutegia, baliabide pedagogikoak eta haiek emateko tokia adieraziko zaizkie enpresako langileen legezko ordezkariei.

Hiru hilean behin, enpresek prestakuntza planaren exekuzioari buruzko informazioa emanen die langileen legezko ordezkariei.

Era berean, enpresak urtero emanen dio informazioa Estatuko batzorde mistoari, erregelamenduz ezarritako moduan. Txosten hori sektoreko batzorde paritarioari igorriko zaio.

-Prestakuntza plan bateratuak.

Prestakuntza plan bateratuak, adostu den ereduan, sektoreko batzorde paritarioan aurkeztu beharko dira, eta horrek bere onespena emanen du.

Sektoreko batzorde paritarioak plan bateratuaren onespena etengabeko prestakuntzarako Estatuko batzorde mistoari igorriko dio, hark finantza dezan.

Prestakuntza ekintzen gainean, zeinetarako eskatu baita finantzazioa, emandako ebazpenaren berri emanen zaie langileen legezko ordezkariei.

Adierazitako prozedurari jarraikiz onetsitako ekintzak plan bateratuen titularrek garatuko dituzte, eurek zuzenean edo itunen bidez.

Enpresek lan egutegietan behar diren aldaketak egiten utziko dute, langileek programatzen diren ikastaroetan parte hartzerik izan dezaten, osasun garraioarekin loturiko lanbide kualifikazio eta gaitasunak garatzeko eta lanean diren langileak birkalifikatzeko.

-Prestakuntzarako banakako baimenak.

Banako baimenen arauak ezarri dira, honakoak hain zuzen ere:

Helburua:

Prestakuntza ekintzek, zeinetarako eskatzen baita baimena, honako baldintzak bete beharko dituzte:

  • Enpresen prestakuntza planen batean edo bateratutako planetan ez egotea.
  • Langilearen kualifikazio teknikoak eta profesionalak hobetzera edo egokitzera zuzenduak egotea.
  • Ikastaroak titulu ofizial baten bidez aitortuak izatea.

Subjektua:

Lanean diharduten langileak, baldintza hauek betetzen badituzte:

  • Sektorean gutxienez urtebeteko antzinatasuna izatea, horietatik sei hilabete, behintzat, gaur egun lan egiten duen enpresan.
  • Enpresako zuzendaritzari baimena idatziz eskatzea, prestakuntza ekintza hasi baino hilabete lehenago, gutxienez.

Eskabidean honakoak adieraziko dira: zein den prestakuntzaren helburua, egutegia (irakastorduak, etenaldiak, iraupena), eta ikastaroak non emanen diren.

Jaso diren eskabideen berri emanen zaie langileen legezko ordezkariei.

Eskabideei buruzko ebazpena:

Enpresak hamabost eguneko epean, eskabidea jasotzen denetik kontatuta, ebazpena eman behar du, artikulu honetan ezarritakoari jarraikiz.

Eskabide bakoitzaren balorazioa egiteko, enpresak kontuan hartzen ahal ditu bere produkzioko eta antolaketako beharrak eta horretarako langileen legezko ordezkaritzaren iritzia eskatuko du. Arduratuko da, halaber, baimenak ematearen ondorioz enpresa barneko lan arloan kalterik izan ez dadin.

Sektoreko batzorde paritarioak, etengabeko prestakuntzarako Estatuko batzorde mistoak ezarritako irizpideekin bat, prestakuntzarako baimen indibiduala izateko eskubideaz aldi berean balia daitezkeen langileen portzentajea zehaztuko du, enpresetako plantillak edo lanbide kategorien edo taldeen kopurua kontuan hartuta. Nolanahi ere den, prestakuntzarako baimen indibiduala aldi berean hartzen duten langileen kopurua ez da plantilla osoaren %5 baino gehiago izanen, baimena duena gutxienez bat izanik.

Enpresak eskaerari uko egiten dionean, arrazoiak idatzita adierazi beharko ditu.

Enpresak hari buruzko argibideak emanen dizkie langileari eta enpresako langileen legezko ordezkariei.

Enpresaburuak prestakuntzarako baimena eman ondotik, langileak etengabeko prestakuntzarako Estatuko batzorde mistoari edo prestakuntza ekintzen finantzazioaz erabakia hartu behar duen erakundeari eginen dio eskaera, baimenaren finantzazioa eman diezaioten. Eskabidearen berri emanen zaio sektoreko batzorde paritarioari.

Finantzazioa ukatzen badiote, langileak prestakuntzarako baimena izaten ahal du, baina ordainketarik gabe, delako baimenak dirauen denborarako lan kontratua etenik.

Prestakuntzarako baimena izan duen langileak, haren bukaeran behar den ziurtagiriaren bidez frogatu beharko du zenbaterainoko aprobetxamendua lortu duen.

-Prestakuntzarako baimen ordainduaren iraupena.

Prestakuntzarako baimen ordainduak egin beharreko prestakuntza ekintzarako eskatzen den denbora iraunen du, gehienez ere ehun eta berrogeita hamar ordukoa, egin gogo den prestakuntza ekintzaren ezaugarrien arabera.

-Ordainketa.

Prestakuntzarako baimen ordaindua duen langileak, aurrez aurreikusitakoarekin bat, ikastaroan zehar bere lanbide kategoriari edo taldeari dagokion hitzarmen kolektiboan ezarritako batez besteko soldataren adinako diru kopurua kobratuko du.

Diru kopuru hori eta, gainera, denbora horretan langileak ordaindu beharreko kotizazioak etengabeko prestakuntzarako Estatutuko batzorde mistoaren bidez finantzatuko dira.

Azterketetarako baimenen klausula.

Gai honetaz, une bakoitzean aplikatzekoa den legeria indardunean ezarritakoari lotuko zaio.

36. artikulua. Eszedentziak.

Enpresan gutxienez urtebeteko antzinatasuna duten langileek eskubidea dute borondatezko eszedentzia hartzeko, sei hilabetetik bost urtera artekoa, lehenengo urtean lanpostua gordetzeko eskubidearekin (ez dira ahaideak zaintzeko eszedentziak kontuan hartzen). Langileak itzuli nahi duenean hilabete lehenago jakinaraziko dio enpresari, enpresako zuzendaritzari igorritako idazki baten bidez.

Eszedentzian egon daitezkeen langileen kopurua mugatua izanen da, enpresako langile kopurua kontuan hartuta.

1-10 langile: 1.

11-30 langile: 2.

31-70 langile: 3.

71 langile baino gehiago, plantillako %5.

37. artikulua. Erretiro partziala eta errelebo kontratua.

Hitzarmen honek indarra dueino eta orotariko legeek eta Gizarte Segurantzak dirauteino, sektoreko enpresek bertako langileei baimena emanen diete erretiro partziala hartzeko, Gizarte Segurantzako erretiroaren kotizaziopeko pentsioa kobratzeko eskubidea izateko eskatzen diren orotariko baldintzak biltzen dituztenean. Hala ere, adinak gehienez ere eskatzen dena baino bost urte gutxiagokoa izan beharko du.

Horretarako, lanaldi ez osoko kontratu bat idatziko da, egiazko lanaldia eta lansaria murriztuko dituena. Erretiro partziala hartu duen langilearen ordez beste langile bat arituko da, langabezian dagoen bat, lanaldi osoan arituz enpresari lotuko zaiona, baldin eta erretiratuak %70etik gorako murrizketa aukeratzen badu, ordezte kontratu baten arabera. Kontratu horrek gehienez ere erretiratuak erretiro osoa hartu arte iraunen du.

Erretiro partzialean dagoen langileak erretiro osoa hartzen duenean, langile errelebista enpresako plantillan sartuko da, mugagabeko kontratupean.

38. artikulua. Lan arloko auzitegia.

Edozein erreklamazio edo auzi aurkeztu baino lehen Nafarroako Lan Auzitegira jotzea gomendatzen da, eta era berean, sektoreko langileak eta enpresaburuak arbitrajera lotzea, horretarako aipatu auzitegian eratutako arbitraje elkargora zuzenduz.

39. artikulua. Sexu jazarpenari eta jazarpen moralari aurrea hartu eta arreta emateko protokoloa enpresan.

1.-Sarrera.

Osasunari buruzko Lege Orokorrak, langileen osoko osasunaren babesari buruz ari dela, 21. artikuluan nabarmentzen duenez, pertsonen osasunaren zainketak patologia fisikoen zein psikikoen babesa ere barnean hartu behar du.

OMEk adierazita du laneko baldintzek osasunean duten garrantzia, eta Laneko Arriskuen Prebentzioari buruzko Legeak enpresaburua behartzen du langileen osasuna babestuko duten neurriak hartzera; bestetik, lana pertsonari egokitzeko printzipioa jasotzen du -lanpostuen nolakoari dagokionez- eta prebentzioa planifikatu beharra, teknikaren, lanaren antolaketaren, lanaren baldintzen eta gizarte harremanen arteko multzo koherente bat bilatuz (15.1 artikulua).

Halaber, Langileen Estatutuak 4.2 artikuluan ezartzen du langileen osotasun fisikoa zaintzeko, segurtasun eta higiene politika izateko eta bere intimitatea errespetatzeko eta bere duintasuna kontuan hartzeko eskubidea, barne izanik arraza edo etnia, erlijoa edo sinesmenak, desgaitasuna, adina edo sexu orientazioa direla-eta jazarpenaren aurreko babesa, baita sexu jazarpenaren eta sexuagatiko jazarpenaren aurreko babesa ere.

Laneko sexu jazarpena batez ere emakume langileen osasunean eta ongizatean eragiten duen arazoa da. Laneko arrisku bat da eta, horrenbestez, enpresaburuaren erantzukizuna da aurreneurriak hartzea (Laneko Arriskuen Prebentzioari buruzko 31/1995 Legea). Horretarako, kasuei arreta emateko prozedurak ezarri beharko ditu, aurreneurriak hartu beharko ditu jokabide baztertzailerik izan ez dadin, eta politika aktiboak ezarri, berdintasunaren printzipioa gauzatzeko (Gizon eta Emakumeen arteko Berdintasunari buruzko 3/2007 Lege Organikoa).

Lege horrek berak iradokitzen du praktika egokien kodeak negoziatuta prestatu behar direla, langileei horren gaineko informazioa eta prestakuntza eman behar zaizkiela, eta sindikatuei eskatzen die aurreneurriak, komunikazioa eta arreta susta ditzatela kasu horietan.

Gainera, Langileen Estatutuek (TRET 1/1995) intimitaterako, duintasunerako eta hitzezko zein sexu arloko irainen aurkako eskubidea jasotzen dute, Espainiako Estatuko Zigor Kodeak delitutzat jotzen du sexu jazarpena 184. eta 443. artikuluetan eta Lan arloko Arau-hauste eta Zehapenei buruzko Legeak (5/2000 EDL) arau-hauste oso larritzat du sexu jazarpena.

2.-Definizioak:

2.1.-Jazarpen morala: Europar Batasunak emandako definizioaren arabera, jazarpen morala da edozein jokaera diskriminatzaile, iraingarri, umiliagarri, beldur eragile edo bortxazko, baita bizitza pribatuan bidegabe sartzea ere, horrelako jokaerek pertsona baten duintasunari eraso egiten badiote lanean edo lanari lotuta, pertsona horri edo hark egindako lanari omena kenduz, halako moduan non erasandakoari kalte psikiko edo/eta fisikoa eragiten zaion.

Azaldutako ekintzetako edozein noizbehinka gertatu eta ondorio negatiboa badu hura jasaten duenarengan pertsonen kontrako eraso edo indarkeriatzat joko da.

2.2.-Indarkeria lanean: Prebentzioko 489. ohar teknikoaren arabera, laneko indarkeria kanpokoa izan liteke (lapurretak, bezeroen, erabiltzaileen, pazienteen indarkeria...) edo barnekoa (indarkeriaz jokatzen duenak laneko harremana duenean biktimarekin, bai lankideen artean, bai goragoko mailakoek beren menpeko langileei edo alderantziz).

Barneko indarkeriaren eremuan figura bat definitu da, goragoko mailakoek egindako tratu txarra. Hierarkian gorago daudenen jokabidea da, laneko talde osoa edo haren parte bat presio handiaren menpe jartzen duena, menpekoak indarkeriaz eta begirunerik gabe tratatuta. Jazarpen psikologikoan ez bezala, zuzendaritzakoen tratu txarra ikusi egiten den portaera da eta, eskuarki, talde jakin batek hartzen du tratu txarra.

2.3.-Sexu jazarpena: "Nahi gabeko edozein jokabide, sexuari lotua, hitzezkoa edo fisikoa, pertsona baten duintasunaren aurka egiten duena edo helburu hori duena; batez ere, larderia, doilortzea edo iraina eragiten duena" (Europako Parlamentuaren 73/2000 Zuzentaraua eta Gizon eta Emakumeen arteko Berdintasunari buruzko 3/2007 Lege Organikoa).

Sexu jazarpena borrokatzeko neurriei buruzko jardunbideen 1991ko kodeak, Europako Erkidegoen Batzordeak emanak, ikuspegi zabala du sexu jokabidearen gainean, sexu jokabideen artean hitzezko eta bestelako jokabideak, baita jokabide fisiko gogaikarriak ere, sartzen direla baitio. Bistakoa da ezin direla zehatz-mehatz jaso sexu jazarpena osatzen duten jarrera edo jokabide guztiak, baina lagin gisa, honako jokabide edo ekintzak zehazten dira sexu jazarpenaren barrenean:

-Erretratuak, mezu elektronikoak, marrazkiak, mezuak...

-Sexu edukia duten txisteak, piropoak, hitz lizunak, begiratu iradokitzaile, errepikakor edo limurtzaileak.

-Jokaera lizunak, txistu, hots eta keinu limurtzaileak.

-Behin eta berriro zitak eskatzea, sexu proposamenak egitea, bizitza sexualaz galdetzea, harreman sentimentala hautsi ondoren presionatzea, sexu harremanak zuzenean eskatzea, onartzen ez direla jakinda.

-Gorputza gehiegi hurbiltzea, ukitzea, ferekak, besarkadak, musuak ematea, zimikoak egitea... horrelakorik nahi ez denean, inguratzea, sexua eskuratzeko presionatzea hobekuntzen ordainetan edo mehatxuak erabilita, sexua jotzea kanporatzeko mehatxupean, sexuz oldartzea.

3. Anbulantzietako enpresen politika, sexu jazarpena eta jazarpen morala prebenitu eta kudeatzeko.

Protokolo honek legezko eskakizunak betetzen ditu eta jazarpen sexualari eta moralari aurrea hartzea du helburu, baita behar bezalako arreta ematea ere gertatzen diren kasuei.

3.1.-Printzipioen deklarazioa.

Enpresen lantoki guztietan aplikatuko da protokolo hau, eta aldeek sinatzen duten egun berean hartuko du indarra.

Langile guztiek dute eskubidea beren aurkako jokabide eta portaera erasotzaile edo larderiatsurik gabeko giroan lan egiteko, sexu jazarpenik gabe. Lan giro horrek haien duintasuna eta osotasun fisikoa zein morala bermatu behar die.

-Pertsona guztiek dute eskubidea tratu adeitsu, errespetuzko eta duina izateko.

-Enpresak uko egiten die jokabide erasokorrei eta sexu jazarpenari, zein den ere haien forma; horretarako, beharrezko aurreneurriak hartuko ditu, baita bidezko diren legezko neurriak ere.

-Sexu jazarpena edo jokabide erasokorren helburu izan direla uste duten guztiek badute eskubidea protokolo honen aplikazioa eskatzeko.

-Zuzendaritzak eta langileen ordezkariek eskubidea aitortzen diete langileei ordezkarien laguntza izateko protokolo hau tramitatu behar denean, hala espres eskatzen dutenean.

-Enpresan ez da inon sexu edukia duen edo sexu batarentzat zein bestearentzat iraingarria den kartel, egutegi, web orri edo beste gauzarik erakutsiko.

Akordio hau sinatzen duten aldeek hura aplikatzeko konpromisoa hartzen dute, konponbidea izan dadin jokabide erasokorren kasuetan eta jazarpen moral, sexual eta sexuagatikoetan, pertsonen duintasuna babes dadin eta lan giro errespetuzkoa sor eta manten dadin.

3.2.-Aurreneurriak.

Hedakuntza: protokolo hau enpresaren plantillako guztiei zabalduko zaie, baliabide informatikoen bidez ahal bada, baita paperean argitaratu eta banatuta ere.

Sinatzen duten aldeek protokolo hau zabaltzeko konpromisoa hartzen dute, langile guztiek eta haien lantokietako ordezkariek ezagut dezaten. Protokolo hau hedatu eginen da lantoki guztietako iragarki oholetan argitaratuta, eta haren kopia igorriko zaie Prebentzioko delegatu guztiei, enpresa batzorde guztiari, langileen ordezkariei eta hura sinatu ondoren enpresak kontratatzen dituen langile guztiei.

Prestakuntza: lan osasuneko oinarrizko prestakuntzaren barrenean, sexu jazarpenari aurrea hartzearen gaineko atal bat garatuko da enpresako plantillarentzat.

Berdintasun plana: gizon eta emakumeen arteko berdintasun plana erantsi zaio hitzarmenaren testuari. Horretarako, sei kidek -hitzarmena sinatzen duten enpresaburuen ordezkaritzako hiru eta sindikatuen ordezkaritzako hiru- osatutako batzordea eratuko da, "Gizon eta Ekamumeen Aukera Berdintasunerako Plana" negoziatuko duena. Batzorde horrek testu adostu bat aurkeztu beharko du 12 hilabeteko epean Hitzarmenaren Batzorde Paritarioan, hitzarmenaren testuari eranstea erabaki dadin.

Berdintasun plan horrek enpresetan diren genero desberdintasunei buruzko diagnostikoa erakutsiko du, baita haiek gutxitu edo ezabatzeko proposamenak ere.

Berdintasun plana hitzarmenari erantsita dela, sektoreko enpresetako zuzendaritzek eta haietako langileen ordezkaritzak ekarpenak egiten ahal dituzte Berdintasun Batzordean, horrek aztertu ondoren berdintasun planaren testuari gehitu diezazkion, hala iritziz gero.

Berdintasun Batzordeak urtero aztertuko du helburuak lortu ote diren eta zer jarduera onesten diren.

3.3.-Esku hartzeko prozedura jokabide erasokorrak edo sexu jazarpena gertatuz gero.

3.3.1. Kasuak atzematea:

Ustezko biktimak esku-hartzea eskatuta hasiko da prozedura; langileen ordezkariek edo enpresako zuzendaritzak ere eska dezakete, ustezko biktimak idatzita onartu eta gero.

Ondoren laburbiltzen dira esku-hartzeak izan ditzatzeen bi kudeaketa mailak. Hobe da lehenbizikotik hastea, baina ez da ezinbestekoa.

A. Konponbidea bitartekaritza baliatuz.

Kasu honetan, bi aldeek konponbiderako konpromisoa hartuko dute. Hainbat bitartekarik hartzen ahal dute parte (besteak beste, Prebentzio Zerbitzuak, biktimari informazioa eta aholku emateko bakarrik), eta ez da bestelako dokumentaziorik jasoko (Prebentzio Zerbitzuari kontsulta egiten bazaio, orduan bai, legeak hala aginduta).

1. Biktima bultzatu egiten da kontuan har dezala sexu jazarpenaren edo jokabide erasokor onartezinen helburu izan dela edo izaten ari dela lehen fasean, egoera lehen saioan zuzenean konpontzen saia dadila eta, modu estraofizialean, behar den pertsonarekin edo taldearekin. Horretarako, informazioa eta aholkuak bilatzeko, honako hauengana jo dezake:

-Enpresako edozein ataletako kargudun hierarkikoa.

-Prebentzio zerbitzua.

-Sindikatuen ordezkariak.

2. Beste aldearekin egon behar duenean, biktimak eskatzen duen edozein izaten ahal du laguntzaile, eta biktimak hala eskatuz gero, hura saiatuko da konponbidea errazten adiskidetze eta bitartekaritza baliatuz. Egoera maila honetan konpontzeko ahalegin guztiak lehenbailehen egin beharko dira, salaketa jakinarazi ondoren.

3. Aldeetako baten ustez, proposatzen den konponbidea bidezkoa ez bada, beharrik gabe luzatzen bada edo arrakastarik izan ez badu, kudeaketaren bigarren mailari heltzen ahal dio Ikerketa Batzordera joz, kasua azter dezan.

4. Kudeaketaren lehen maila honetan, 10 egun baliodunekoa da konponbidearen epea, salaketa aurkezten denetik.

5. Enpresak ez du inolako erregistro berariazkorik izanen kudeaketa maila honi buruz, Prebentzio Zerbitzuko kideren batek esku hartzen duenean izan ezik, orduan zerbitzu horren erregistroan artxibatuko baita dokumentazioa, indarra duen legeriaren arabera (konfidentzialtasuna).

B. Konponbidea, Ikerketa Batzordearen bitartez:

Ikerketa Batzordea da prozedura tramitatzeko ardura duen organoa. Enpresa Batzordeak edo langileen ordezkariek hura eratzeko eskatuko dute, lehen aipatu aldeetako baten kexa jaso ondoren. Ahal dela, lantokian eratuko da.

Komiteetan dauden sindikatu bakoitzeko ordezkari batek eta enpresako zuzendaritzak izendatzen dituen bi pertsonak osatuko dute; ahal dela, osaera hori paritarioa izanen da gizon eta emakumeen kopuruari dagokionez. Prozedurak modu batean edo bestean ukitutako pertsonek ez dute parte hartzerik izanen.

Bere kideen artean idazkari bat hautatuko da, espedientearen tramitazio administratiboaz arduratzeko; horrenbestez, bere ardura izanen dira biltzeko deiak eta aktak egitea, edukiaren edo akordioen fede ematea eta espedientea bere dokumentazioarekin zaintzea.

Batzordeak hogei egun baliodun izanen ditu, gehienez ere, eskatzen zaizkion esku-hartzeetan arrazoien gainean ebazteko.

Espediente informatiboa bukatuta, Batzordeak 'ondorioen txostena' prestatuko du eta, espedientearekin batean, enpresaren zuzendaritzari eta langileen ordezkariei bidaliko die, planteatutako auzia ebazteko. Gertaerak izan eta 2 hilabete iraganik ez bada ebazpenik, artxibatu eginen da.

Batzordearen jarduketa guztiak idatzita jasoko dira eta behar diren aktak eginen dira; lekukotza edo aitorpenik badute, instruktoreaz eta idazkariaz gain, haien egileek ere sinatuko dituzte, idatzitakoa eta egindako alegazio edo deklarazioak bat heldu direla adierazteko.

Batzordearen aurreko agerraldietan langileei laguntzeko, plantillako legezko ordezkaritza edo konfidantzako norbait, haiek aukeratua, ekartzen ahal dute.

Espediente informatiboa egiteko, objektibotasun, konfidentzialtasun, azkartasun, kontraesan eta berdintasunaren printzipioei jarraituko zaie; hartan parte hartzen duten guztiak behartuta daude konfidentzialtasun osoz jokatzera espedientean parte hartzeagatik, zer gisan den ere, ikasten dutenaren gainean.

Sexu jazarpenaren edo jokabide erasokorren helburu izan direla uste duten langileek, sexu jazarpenari edo jokabide erasokorrei loturiko salaketa egiten dutenek edo edozein informazio prozesutan laguntza ematen dutenek -informazioa emanez edo lekuko gisa parte hartuz- ez dute larderia, jazarpen edo errepresaliarik izanen; horrelako jarduketa guztiei diziplina-zehapena ezarriko zaie. Aipatutakoak ez ditu bidezko diren jarduketak ukatzen, baldin eta egindako ikerketaren ondorioz edozein langileren laneko hutsegite larri eta errudunik edo asmo gaiztoko jarduketarik izan dela agertzen bada.

-Espedientearen garapena:

Batzordeak, eratuta dela eta esku hartzeko egin zaion eskaera ikusita, lehen jarduketa gisa, beharrezkotzat jotzen duen informazioa bilduko du ustez jazarpena pairatu duen pertsonarengandik, pertsonalki eta zuzenean, hau da, gertaera, egintza edo gorabeheren kontakizuna eta ustez jokabide desegokia izan dutenen eta haren lekukoen edo jazarrita izen diren gehiagoren identifikazioa.

Prozedura hasita dela, edo hura tramitatzen den bitartean, Batzordeak, bere ekimenez edo alde batek eskatuta, eta lanaren antolaketak aukera ematen badu, lanpostuz aldatzea edo bidezkotzat jotzen dituen beste neurri batzuk hartzea proposatuko dio enpresaren zuzendaritzari, eskaera egin duen langilearen eta ustezko jazarpen egilearen eskubideak babesteko; orobat, ikerketaren eta espedienteko informazio guztiaren konfidentzialtasuna bermatzeko.

Jazarpenaren arrastoak badaudela egiaztatutakoan, beharrezkoa iritziz gero, biktima eta ustezko jazarpen egilea elkarrengandik urruntzea proposatzen ahal zaio zuzendaritzari, badaezpadako neurri gisa, baita bidezkotzat jotzen diren badaezpadako beste neurri batzuk ere. Neurri horiek ez diete inoiz lan baldintzen galera edo murrizketa ekarriko ustezko biktimari eta ustezko egileari edo egileei, ezta baldintza horien funtsezko aldaketarik ere.

Batzordeak erabakiko du zein eginbide, proba eta jarduketa iruditzen zaizkion egokiak leporatzen diren gertaerak argitzeko eta espediente informatiboa osatzeko; horretarako, entzunaldia emanen die alde eta lekuko guztiei eta informazioa eman behar dutela iruditzen zaizkion beste batzuei ere; zein den kasua, baita lantokiko langileen legezko ordezkariei ere; guztiei ohartaraziko zaie konfidentzialtasuna eta isiltasuna gorde behar dutela Batzordean izan duten esku-hartzeari eta hartan agertzean ikasi duten informazioari buruz.

Ondorioen txostena prestatutakoan bukatuko da espediente informatiboa. Hura enpresaren zuzendaritzari eta komiteari igorriko zaie, Batzordeari salaketa aurkeztu eta 20 eguneko epean.

Aipatu ondorioen txostena eta espediente informatiboan egindako jarduketak ikusita, enpresaren zuzendaritzak, langileen legezko ordezkariak jakinaren gainean direla, eskumena du beharrezkotzat jotzen dituzten ekintzak burutzeko prebentzio, antolaketa edo diziplina aldetik, lan kontratuak, hitzarmen kolektiboak eta langileen estatutuek finkatutako lan harremanaren esparruan. Jokabide erasokorrak, jazarpen morala, sexu jazarpena edo sexuagatiko jazarpena dagoela egiaztatutakoan, enpresaren zuzendaritzak eta langileen legezko ordezkariek egokitzat jotzen dituzten neurri zuzentzaile guztiak hartuko dituzte, baita hitzarmen kolektiboan jasotako diziplina-araubidearen aplikazioa ere. Hutsegite oso larritzat joko da eta hitzarmenean adierazitako zehapena ezarriko.

Enpresaren zuzendaritzak baliatzen dituen prebentzio, antolaketa edo diziplina arloko ekintzen berri emanen zaio pertsona eskatzaileari, eskaeran errudun zenari eta Batzordeari, ahoz zein idatzita, 10 eguneko epean.

Sexu jazarpenik edo jokabide erasokorrik izan dela egiaztatzen ez denean, edo egiaztatzea ezinezkoa denean, espedientea artxibatu eginen da eta prozesua amaitutzat joko da. Artxibatu arren, espedientearen bidez egindako egiaztapenen arabera, eskatzailearen lanpostua behin-behinekoz aldatzea komeni den eta bideragarria den erabakiko da, lanaren antolamenduak horretarako aukera ematen badu; orobat, beste edozein neurri, bidezkoa bada Informazio Batzordeak eta Giza Baliabideen Zuzendaritzak egiaztatu eta ebaluatutako gertaeren arabera.

Enpresaren zuzendaritzak, sexu jazarpena edo jokabide erasokorrak badaudela behar adina frogatu dela uste badu, kasu guztietan hartu beharko ditu neurri egokiak jazarpen egilea eta biktima ez daitezen lanean elkarrekin egon. Neurri horietan, jazarria izan denak izanen du lehentasuna.

4.-Beste xedapen batzuk:

Sexu jazarpena edo jokabide erasokorrak izan direla egiaztatuz gero, kasu horiek guztiak lan istriputzat joko dira, eta enpresak eskura dituen bitarteko guztiak baliatuko ditu haien erregistroa egiteko.

Sexu jazarpenaren biktima mutualitatera edo osasun zerbitzu publikora igorriko da -zeinek kudeatzen dituen lanbideko kontigentziak, horren arabera- medikuen eta psikologoen laguntza izan dezan; betiere, gertaeraren berri idatzita eman beharko da.

Protokolo hau dokumentu bizia da, etorkizunean inguruabarrak nolakoak diren, horren arabera egokitu edo aldatuko dena; horretarako, bidezkotzat jotzen dituzten aldaketak eta egokitzapenak proposatzen ahalko dituzte helburuak aiseago lortzearren, hitzarmen kolektiboan aurreikusitakoaren arabera.

Enpresa behartua dagoenez langile guztiak babestera sexu jazarpenaren, jazarpen moralaren edo sexuagatiko jazarpenaren aurrean, bere langileek beste enpresa batzuetan zerbitzua ematen badute, enpresa kontratugileak erabaki honen edukiak bere gain hartzea bultzatuko du.

I. ERANSKINA

2009. urteko soldaten taula

KATEGORIA

OINARRIZKO SOLDATA

GIDARIA

1.313,83

LAGUNTZAILEA

1.183,58

TALDEBURUA

1.294,81

TRAFIKOKO BURUA

1.386,95

1. MAILAKO ADM. OFIZIALA

1.361,82

ADMIN. LAGUNTZ.

1.202,65

MEKANIKARIA

1.273,06

MEKANIKARI LAGUNTZ.

1.160,73

TELEFOZAINA

1.211,01

MEDIKUA

2.065,62

O.L.T.

1.629,93

ZUZENDARIA

2.082,38

II. ERANSKINA

Nafarroako osasun garraioaren sektoreko lan hitzarmen kolektiboaren batzorde paritarioaren osaera

-LA NORAren aldetik:

José Daniel Plano.

-BAZTAN-BIDASOAren aldetik:

José A. Cesar, Juan A. Pacheco.

-G.G.S.S.ren aldetik:

Gerardo Azpiazu, Gorka Herrero.

-U.G.T.ren aldetik:

Manuel G. Gómez, Gustabo Pérez, Jesús Marín.

-CC.OO.ren aldetik:

Javier Ibañez, Julio Ardaiz.

III. ERANSKINA

Lanaldia

Enpresa: .............................................................................................

Enpresaren ordezkariak: ....................................................................

.................................................................... gisa,................................

........................................................................................................... langileak ordezkatuz, ............................................................................... guztiak, enpresa komiteko kideak edo langileen ordezkariak, sektoreko hitzarmenaren 17. artikuluari buruz, urteko lanaldiaren banaketari buruz, honako hau erabakitzen dute:

Akordioaren iraupena: ........................................................................

Data: ...................................................................................................

Enpresaren ordezkariak: ....................................................................

Langileen ordezkariak: .......................................................................

NAFARROAKO OSASUN GARRAIOAREN HITZARMEN KOLEKTIBOAREN NEGOZIAZIOAREN AZKEN AKTA

Iruñean, 2009ko abuztuaren 20an.

Bertaratuak:

-Langileen aldetik:

Manuel G. Gómez (UGT), Gustabo Pérez (UGT), Oscar Pérez (UGT), Carlos Marco (UGT), Jesús Marín (UGT), Javier Ibañez (CCOO), Julio Ardaiz (CCOO).

-Enpresaren aldetik:

Juan A. Pacheco (ENA), Cesar Sola (ENA), Gerardo Azpiazu (ENA).

ADIERAZTEN DUTE:

Eztabaidak 2008ko irailean hasi zirela, hari buruzko akta egin zela eta honako honi erantsi zaiola; horretan aldeek elkarri aitortu zioten gaitasuna eta legitimazioa badutela, aktan ageri den moduan.

Langileen aldetik, UGTren eta CCOOren ordezkariek eta, enpresaren aldetik, ENAren ordezkariek aurreakordioa sinatu zuten 2009ko uztailaren 29an, eta hori izan da oinarria hitzarmen kolektiboaren azken testurako, zeinak 2009ko urtarrilaren 1ean hartuko baitu indarra 2012ko abenduaren 31 arte.

ERABAKIA:

1.-Onetsi egiten da Nafarroako osasun garraioaren sektoreko hitzarmen kolektiboaren testua, 39 artikuluz eta 4 eranskinez osatua.

2.-Hitzarmen kolektiboaren indarraldia 2012ko abenduaren 31 artekoa izanen da, eta gaurtik beretik hasita iragartzen da haren amaiera, ondorengo hitzarmenaren negoziazioaren ondorioetarako.

3.-Hitzarmen hau eraginkortasun orokorrekoa baita, hartzaile guztiek jakin eta egiazki bete dezaten, honako hau eskatzen zaio Nafarroako Gobernuko Lan Departamentuari:

-Nafarroako Aldizkari Ofizialean argitaratzea.

-Dagokion erregistroan artxibatzea.

Iragarkiaren kodea: F1017041