Iragarkia

141. ALDIZKARIA - 2010eko azaroaren 19a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

CASCANTE

Cascanteko Udal Planeko egiturazko aldaketa, AR-9 banaketa eremuko 1. poligonoko 41. lurzatiari buruzkoa,
Cascanteko Udalak sustatua. Behin betiko onespena

Lurraldearen Antolamenduko eta Etxebizitzako kontseilariaren irailaren 16ko 166/2010 Foru Aginduaren bitartez, Cascanteko Udal Planeko egiturazko aldaketa, AR-9 banaketa eremuko 1. poligonoko 41. lurzatiari buruzkoa, onetsi da. Sustatzailea Cascanteko Udala bera da. Argitara ematen da haren edukia, Lurraldearen Antolamenduari eta Hirigintzari buruzko 35/2002 Foru Aginduaren 81. artikuluan ezarritakoa betetzeko.

Cascanten, 2010eko urriaren 8an.-Alkate udalburua, Antonio Irujo Redrado.

Cascanteko Udal Planeko egiturazko
aldaketa, AR-9 banaketa eremuko 1. poligonoko
41. lurzatiari buruzkoa

1.-Xedea.

Dokumentu honen xedea Cascanteko Udal Plana aldatzea da, Cascanteko katastroko 1. poligonoko 41. lurzatiaren zati baten lurzoruaren sailkapenari dagokionez, industriarako lurzoru finkatua berehala eduki ahal izateko.

2.-Sustatzailea.

Aldaketa Cascanteko Udalak sustatu du, lurzatiaren jabea baita.

3.-Proposamenaren deskribapena.

Proposamenak lurzatiaren zati baten sailkapena aldatu nahi du, indarra duen hirigintza planeamenduak AR-9 industria eremuaren barnean mugaturiko lurzoru urbanizagarri gisa sailkatu baitu.

Aldatu beharreko lurzatiaren azalera 4.610,78 m² da. Industriarako lurzorua izaten jarraituko du eta hiri lurzoru finkatu gisa sailkatuko da, "V. titulua. Industria lurzorua" hirigintza araudi partikularraren erregulazioaren pean.

Halaber, horren barnean dagoen lurzati txiki bat ere baztertu da: 845. lurzatia da, katastroaren arabera haren xedea "transformadorea" da, eta 25,59 m²-ko azalera du. Lurzati hori AR-9 banaketa eremuari buruzko araudi fitxako zerrendan berariaz agertzen ez bada ere, 41. lurzatiaren zati gisa agertzen da, haren azalera zehazten dela.

Horrez gain, azalera horiek AR-9 banaketa eremutik (industria eremua) baztertzearen ondorioz, bidezkoa da eremuan doikuntza batzuk egitea, bereziki horiek barnean hartzen dituen sektorean, haren etorkizuneko exekuzioa ahalbidetzeko eta sektorearen eta banaketa eremuaren gainerako jabeak ez ukitzeko.

3.1. Kokapenaren deskribapena.

Lurrak El Parral industrialdean daude. Industrialde hori Cascanteko herrigunearen hegoaldean dago, Tuteratik Tarazonara doan N-121C errepidearen ondoan, hiri lurzoru finkatuaren eta industria lurzoru urbanizagarriaren (egungo industrialdea eta AR-9 banaketa eremua -industria eremua-) arteko mugan.

Lurzatiaren konfigurazioa irregularra da, eta findustrialdeko bide ezberdinetara jotzen du. Iparraldean eta mendebaldean industriarako lurzoru urbanizagarria -AR-9 banaketa eremua- dago eta hegoaldean eta ekialdean, aldiz, industriarako hiri lurzoru finkatua.

Lurren mugak honako hauek dira: mendebaldean ureztaketa ubidea; hegoaldean eta ekialdean, El Parral industrialdeko bideak; eta, iparraldean, gasolindegia eta hainbat industria biltegi barnean hartuko dituen lurzatia.

Katastroko informazioaren arabera, lurra 1. poligonoko 41. lurzati gisa identifikatu da eta "lurzorua" erabilera baino ez zaio esleitu. Azalera 7.836,31 m² da, nahiz eta planeamenduaren aldaketak lurzati osoa ukitzen ez duen.

Deskribaturiko informazioa ortoargazkian ikus daiteke.

Lurzatiaren errealitate fisikoak islatzen ditu ia zelaiak diren lurrak, gaur egun erabilerarik ez dutenak.

Lehendik dauden hirigintza zerbitzu gisa, adierazi behar da lurrek ibilgailuetarako sarbidea, ur hornidur+a, uren hustuketa eta energia elektrikoaren hornidura dituztela industrialdeko bideetatik: horrez gain, bideek galtzada zolatuta eta espaloiak zintarriztatuta dituzte, egiazta daitekeenez.

Lurzatiaren barnean ubidearen ondoan zutoin elektrikoa dagoela ikusi da: lurzatiaren ekialdeko mugarekiko ia paralelo doan aireko linea elektrikoari dagokion euskarria da. AR-9 banaketa eremuaren urbanizazio obren exekuzioan linea elektriko hori kentzea aukeratu ezean, zutoinari zein lineari lotutako ukipenak kontuan hartu beharko dira etorkizuneko eraikinetan.

Amaitzeko, lurzatia mendebaldean mugatzen duen ubideari dagokionez, beste dokumentazio kartografiko batean elementu horri "Torrecilla erreka" esaten zaiola ikusi da. Hala eta guztiz ere, Nafarroako Gobernuak egindako Nafarroako Toponimia Ofizialaren bidez egiaztatu da ubidea dela eta ez erreka. Hori dela eta, arloko estatu legediak ibilgu publikoei ezartzen dizkien zortasunek ez dute ukituko.

3.2. Aldatzeko proposamena.

Proposaturiko aldaketak lurren sailkapen eta kategorizazio berriak planteatzen ditu lurzoru urbanizagarri sektorizatuaren ordez, hiri lurzoru finkatuaren kategoria hartuko lukete eta, horren ondorioz, haien araudi erregulazioa Cascanteko Udal Planak industriarako hiri lurzorurako adierazitakoa izanen litzateke.

Horrez gain, lurzoru horiek AR-9 banaketa eremutik baztertzearen ondorioz, eremu horretako araudia zuzendu behar da, azalera berrira doitzeko. Horrela, ez da eragotziko haren aurreikuspenen exekuzioa egitea eta ez dira ukituko banaketa eremu horretako lurren jabeen hirigintza eskubideak.

AR-9 banaketa eremuari dagokionez, Cascanteko Udal Planak lurzoru urbanizagarriko sektore mugatuei buruzko antolamendua aurreikusi du. Kasu honetan sektorearen antolamendu xehakatuko determinazioak plan partziala prestatuz garatu behar badira ere, antolamendu aurrerapen horren zenbait elementuri eusten saiatu da, proiektaturiko eremu berriekiko loturan herrigunearen funtsezko egitura ez aldatzeko asmoz.

Hori dela eta, hasieran aldatu nahi zen azalera, ia lurzati osoa hartzen zuena, murriztu da. Horrela, aldaketatik kanpo geratu dira industrialdea garatzeko eta konektatzeko behar diren lurrak eta lurzatiaren hego-mendebaldean dagoen berdegunearen zati bat, bere kalifikazioari eta sailkapenari eutsiko diena. Aldaketatik kanpo geratu diren lurzatiaren beste azalera batzuk dira, lehendik dagoen poligonoko bideetatik zuzeneko sarbiderik ez izateagatik, hiri lurzoru finkatutzat jo ezin direnak.

Beste aldetik, antzeman da industriarako lurzoru urbanizagarriari dagokion lurzati bat dagoela, Udal Planean agertzen den katastro dokumentaziotik ondorioztatzen denez, 41. lurzatitik banandu dena eta, katastroaren arabera, transformadorea hartuko duena. 845. lurzatia da, 25,59 m²-ko azalera duena eta hiri lurzoru finkatu gisa sailkatzeko proposamena ere jaso duena; izan ere, 41. lurzatiak bezala, lurzoru mota horri eskatzen zaizkion hirigintza zerbitzu guztiak ditu eta ez du inolako jarraitutasunik AR-9 banaketa eremuarekin.

Hurrengo irudiak hiri lurzoru finkatuari (aldatu beharreko azalera) gehitutako azalerak grafikoki justifikatzen ditu kolore grisez, baita lurzoru urbanizagarri gisa sailkatuta egoten jarraituko dutenak ere.

Dagoen moduan mantenduko den 845. lurzatiari dagokiona izan ezik, aldaketatik industriarako 4 lurzati ondorioztatu dira hiri lurzoru finkatuan. Honako azalera hauek izanen dituzte:

1. lurzatia: 512,00 m².

2. lurzatia: 2.313,43 m².

3. lurzatia: 512,27 m².

4. lurzatia: 1.273,08 m².

Guztira: 4.610,78 m².

Azalera hori eta 845. lurzatiaren 25,59 m²-koa AR-9 banaketa eremuaren (industria eremua) azaleratik kenduko dira. AR-9 banaketa eremua honela geratuko da:

-Erabilera orokorra: industria.

-AR-9 banaketa eremuaren azalera, guztira (ez dira atxikitzen sistema orokorrak): 95.997 m².

-Jarduketa sistema: konpentsazioa.

-Erabilera bereizgarria: industriarako nabea.

-Homogeneizazio koefizienteak:

Homogeneizazio koefizienteak ezarri dira merkatu azterlan bat oinarri hartuta, nahiz eta AR-9 banaketa eremua garatuko duen planeamendu tresnak merkatuaren benetako egoerara doitzen ahalko dituen.

• Industriarako nabea: 1 AU.
• Lurzoru libre pribatua: 0,2 AU.

(Plan Partzialak proposatzen diren erabilera xehakatuen homogeneizazio koefizienteak zehaztuko ditu modu justifikatuan).

-Eredu aprobetxamenduaren kalkuluaren justifikazioa:

Dokumentazio grafikoan agertutako antolamendu proposamenetik aurrera, honako kalkulu hipotesi hau ezarri da:

8.410 m² (lurzoru libre pribatua) x 0,2 + 46.316,5 m² (industriarako nabea) x 1 = 0,50.

95.997 m² (AR-9 banaketa eremuaren azalera).

-Eredu aprobetxamendua: 0,50 AU/m² (hau da, 0,50 m² industriarako nabe / m² lurzoru gordin).

AR-9 banaketa eremuko (industria eremua) 1. sektoreak, aldatu beharreko lurzatiak barnean hartzen dituenak, Udal Planaren dokumentazio grafikoan agertzen den antolamendurako proposamena du, industriarako etxesailak eta Tuteratik Tarazonara doan N-121C errepidearekin lerrokatzen diren ekipamenduak biltzen dituena. Antolamendu horrek zerikusia du El Parral industrialdeko egungo bideekin eta AR-2 banaketa eremuko alboko 1. sektorerako proposaturiko antolamenduarekin. Halaber, egiturazko berdeguneak Cascanteko beste sektore eta eremu finkatu batzuekin batera proiektatu dira. Alde horretatik, AR-9 banaketa eremuari buruzko araudi fitxak Queiles ibaiko ibai parkea aipatzen du, diseinuari dagokionez ibilbide osoan nolabaiteko koordinazioa egoteko eskatuta.

Beraz, planeamendua aldatzeko proposamena ezin da horretatik kanpo egon eta, alde batetik, Planaren helburu orokorrak mantentzen direla eta, beste aldetik, lurzoruaren beste jabeak ukitzen ez direla bermatzen duten beharrezko determinazioak ezarri behar ditu.

Alde horretatik, lotesle gisa zehazten ez bada ere (gaur egun ez den moduan), 1. sektorea antolamenduaren oinarrizko ildoei, hirigintza aprobetxamenduari eta urbanizazio kostuei eutsita antolatzea proposatu da.

Proposamen honek dakarren antolamenduak antolamenduaren egiturazko elementuak mantentzen ditu (hala nola bide ardatz nagusiak, erabilera orokorrak, aprobetxamendua eta abar), eta doikuntza txikiak agertzen ditu antolamendu xehakatuan; doikuntza horiek dakarte bigarren mailako bide baten ordez, beste bat egitea eta ekipamendutarako lurzatiaren konfigurazioa aldatzea, proposamenaren arabera pixka bat erregularragoak diren proportzioak izanen dituztela.

Udal Planak dokumentazio grafikoko antolamendu proposamenaren ondoriozko azaleren datuak agertzen ez baditu ere, espediente hau justifikatzeko planoen neurketak egin dira eta proposaturiko antolamenduaren ondoriozkoekin erkatu dira, honako balio hauek lortuta:

Lortutako datuengatik ikusi dugu aldaketak, Planaren funtsezko egitura ez aldatzeaz gain, Planak jasotzen dituen xede ezberdinetarako lurzorua lortzea ahalbidetzen duela, gaur egungo portzentajeen antzekoetan.

Horrez gain, adierazi behar da ekipamendutarako eta zerbitzutarako espazioetarako lurzoru erreserbak indarra duen legediak industriarako lurzorurako eskatzen dituen gutxienekoak baino askoz gehiago direla (lurzoruaren %4 ekipamendurako eta lurzoruaren %10 espazio libre publikoetarako).

Azkenean, proposaturiko aldaketaren edukiari dagokionez, adierazi behar da aukera aprobetxatu dela indarra duen legediaren aipamenetan doikuntza batzuk egiteko, bai lurraldearen antolamenduaren eta hirigintzaren arloan, bai errepideen arloan, gaur egungoarekin bat etor dadin eguneratuta.

4.-Aldatzeko propomenaren justifikazioa.

4.1. Legezko justifikazioa.

Lurraldearen egitura orokorra eta organikoa kontuan hartuta irizpide berririk hartzea ez dakarten planeamenduko determinazioen aldaketa, aspaldiko lurralde ereduarekin zati handienean ezberdina den eredua hautatzeak, bat-batean gertatutako inguruabar demografikoak edo ekonomikoak agertzeak edo Planaren gaitasuna agortzeak eragin duena, planeamenduaren aldaketatzat jo da, nahiz eta horrek lurzoruaren sailkapenean edo kalifikazioan aldaketak ekarri, LAHLen 78.2 artikuluak arautu bezala. Determinazio xehakatuak izanen balira, Plan Partzialaren beraren bidez aldatuko lirateke. Baina egiturazko determinazioen aldaketa puntualak direnez, horiek aipatu foru legearen 79. artikuluak ezarri bezala tramitatuko dira; artikulu horrek plan orokorren tramitaziora (71. artikulua) jotzen du, baina salbuespen handiak eta adierazgarriak izanda.

Aldatzeko proposamenaren edukia ez da zehaztu foru legean, baina nahikoa izanen da aldaketak Plan Orokorrean ordeztu edo aldatuko dituen xedea eta determinazioak ezagutzeko.

4.2. Agerturiko proposamenaren justifikazioa.

Planeamendua aldatzea eragiten duen lehen arrazoia honako hau da: Cascanteko Udalak udalaren industriarako lurzorua behar du berehala, enpresak udal mugapean ezarri edo handitzea errazteko eta, horren bidez, udal ekonomia sustatzeko, hurrengo atalean ikusiko denez egoera larria baita.

Hainbat hirigintza arrazoi daude proposaturiko aldaketa eragiteko: lehenik eta behin, 41. eta 845. lurzatietarako lurzoruaren sailkapen berriarekin zerikusia dutenak daude eta, bigarrenez, AR-9 banaketa eremuko (industria eremua) 1. sektorerako proposaturiko antolamendua justifikatzen dutenak daude.

Hiri lurzoru finkatuaren sailkapenari dagokionez, aipatu behar da lurzatiak hiri lurzoru finkatuari eskatzen zaizkion hirigintza zerbitzu guztiak dituela, El Parral industrialdeko beste lurzati batzuek bezala. Are gehiago: esan daiteke orubearen izaera duela, ez duela inolako urbanizazio osagarririk behar.

Lurzati horren zati bati bakarrik kenduko zaio hiri lurzoruaren sailkapena, AR-9 banaketa eremuaren exekuzioa errazteko eta ez garestitzeko. Izan ere, industriarako lurzoruko sektoreari lehendik dagoen poligonotik irteera ematen ez dion edozein konponbidek bideen azalera handiagoa eta hirigintza aprobetxamendu txikiagoa ekarriko lituzke. Eta hori desegokitzat jo da, lehendik dagoen eta Planean aurreikusi den hiri egiturari eusteagatik.

AR-9 banaketa eremurako proposaturiko hirigintza araudiak ez du ukitzen hirigintza aprobetxamendua: 41. lurzatiaren zati bat eta 845. lurzatia baztertu ondoren geratzen diren ondoriozko azalerak doitu baino ez du egiten.

Horrez gain, 1. sektorerako antolamendu bat aurreikusi da, loteslea ez den arren, jatorrizko konponbidearen antzekoa proiektatzeko aukera egiaztatzen duena, horretan Planak aurreikusitako erabileren portzentajeei eutsiko zaiela. Nolanahi ere, antolamendu proposamen honetan ekipamendutarako eta zerbitzutarako lurzoru erreserbak legez ezartzen direnak baino askoz gehiago dira. Hori dela eta, garapen planeamenduak -Plan Partziala- unean egokitzat jotzen duen antolamendu xehakatuko determinazioak ezartzen ahalko ditu, beharrezkoa bada balio horiek murriztuta.

4.3. Cascanten industriarako lurzorua behar izateko justifikazioa.

Krisi ekonomikoaren egungo egoerak Cascanteko industria gaitasuna trabatu du azken urtean. Herrian sektore horretako lanpostuen kopurua gutxitzen joan da pixkanaka-pixkanaka eta etengabe. Izan ere, hainbat arrazoi direla-eta, lehendik zeuden enpresetatik langile gehien zituztenetako batzuk ukitu ditu krisiak. Gauzak horrela, udalerriko ehungintzaren gainbeherak kasu larrienetako bat ekarri du: herrian 30 urte baino gehiago eramateagatik sustrai sakonak zituzten enpresak desagertzea eragin du. Horien artean, Juan Burgos Pamplona enpresa dago, 2005etik plantilla murrizten joan behar izan zena. Hasieran 134 lanpostu zituen arren, aurten jarduera itxi behar izan du. Egoera berean daude Cunbur enpresako langileak: 2008. urtean murrizketak egin ondoren, behin betiko itxi da 2009an, denboraldi horretan 95 pertsona lanik gabe geratu direla.

Egoeraren araberako kontu horietaz gain, Espainian jasan den ekoizpen krisiak beste enpresa batzuetarako (batez ere, automobilgintza) osagaiak fabrikatzen dituzten beste enpresa batzuk ere ukitu ditu. Izan ere, haien eskaerak murriztu direnez, une honetan enplegua erregulatzeko espedienteen prozesuetan murgilduta daude; horietako bat Mecacontrol da, 9 langile ukitzen dituen enplegua erregulatzeko espedientea abiarazi duena, eta beste bat Trelleborg da, kasu larriena duena: 41 pertsona kaleratzeko aukera hausnartu zen arren, azkenean enplegua erregulatzeko 41 eguneko espedientea egitea erabaki zen 91 langilerentzat. Horri guztiari gehitu behar zaio beharbada Aceites Urzante enpresa Nekazaritzako Elikagaien Hirira lekualdatzea.

Beraz, Cascantek Queilesko azpieskualdeko herriburu gisa jarraitu ahal izateko eta erakargune ekonomiko eta sozial nagusiaren eginkizuna izateko, ezinbestekoa da, besteak beste, herrian industria eta zerbitzu erabilerarako behar beste azalera garatzea. Horrela, ekoizpen egitura berria ezartzen ahalko da, lanpostu gehiago sortuko dituena eta eta gero eta handiagoa den lan eskaera xurgatzeko gai izanen dena. Hori dela eta, Udal Planak industria izaera duten lurzoru gehienak horrela sailkatu ditu.

ONETSITAKO ARAUDIA

Lurzoru urbanizagarria. AR-9 banaketa eremua (industria eremua)

-Erabilera orokorra: industria.

-Azalera, guztira: AR-9 banaketa eremua (ez dira atxikitzen sistema orokorrak): 95.997 m².

-Jarduketa sistema: konpentsazioa.

-Homogeneizazio koefizienteak:

Homogeneizazio koefizienteak ezarri dira merkatuaren azterlan bat oinarri hartuta, nahiz eta AR-9 banaketa eremua garatuko duen planeamendu tresnak merkatuaren benetako egoerara doitzen ahalko dituen.

• Industriarako nabea: 1 AU.
• Lurzoru libre pribatua: 0,2 AU.

(Plan Partzialak proposatzen diren erabilera xehakatuen homogeneizazio koefizienteak zehaztuko ditu modu justifikatuan).

-Eredu aprobetxamenduaren kalkuluaren justifikazioa:

Dokumentazio grafikoan agertutako antolamendu proposamenetik aurrera, honako kalkulu hipotesi hau ezarri da:

8.410 m² (lurzoru libre pribatua) x 0,2 + 46.316,5 m² (industriarako nabea) x 1 = 0,50.

95.997 m² (AR-9 banaketa eremuaren azalera).

-Eredu aprobetxamendua: 0,50 AU/m² (hau da, 0,50 m² industriarako nabe / m² lurzoru gordin).

Ukitutako lurzatien zerrenda

8. Determinazio partikularrak.

-Identifikazioa.

Industria erabilerako lurzoru urbanizagarri sektorizatua. Ez dira atxikitzen sistema orokorrak.

-Deskripzioa.

Banaketa eremu etena, hiru sektoretan banatzen dena eta lurzorua herriaren ekialdean duena.

1. sektoreak honako mugakide hauek ditu: iparraldean, AR-2 banaketa eremua; hegoaldean, industria erabilerako hiri lurzoru finkatua; ekialdean, N-121c errepide nazionala; eta, mendebaldean, Queiles ibaiaren ibilgua.

2. sektoreak honako mugakide hauek ditu: iparraldean, AR-4 banaketa eremua; hegoaldean, lurzoru urbanizaezina; ekialdean, Tarazonicaren Bide Berdea; eta, mendebaldean, lurzoru urbanizaezina.

3. sektoreak honako mugakide hauek ditu: iparraldean, lurzoru urbanizaezina; hegoaldean, industria erabilerako hiri lurzoru finkatua; ekialdean, Tarazonicaren Bide Berdea; eta, mendebaldean, N-121c errepide nazionala.

9.1.-Araubide orokorra.

Banaketa eremuaren araubide orokorra 35/2002 Foru Legearen artikulu egokietan, 1992ko Testu Bateginean eta horiek garatzen dituzten erregelamenduetan zehaztutakoa da.

9.2.-Jarduketa arauak.

Banaketa eremu horretako 2. eta 3. sektoreen garapenak Tarazonicaren Bide Berdearen esparrurako idatzitako plan sektoriala kontuan hartu beharko du, haren determinazioek AR-9 banaketa eremua ukitzen baitute.

Lurzatiaren gehieneko okupazioari, eraikinen gehieneko garaierari, tarteko solairuaren gehieneko azalerari eta abarri buruzko determinazioak Udal Plan honen ordenantzan zehaztutakoak izanen dira.

9.2.1.-Ekipamenduak, lagapenak, zerbitzuak:

LAHLek eskatutako estandarrak betetzeko, berdegune eta ekipamendutarako lurzatiak honako hauen ondoan multzokatuko dira:

-Queiles ibaiaren ibilgua, ibai parkearen zati izanda.

-Tarazonicaren Bide Berdea.

-Tuteratik Tarazonara doan N-121C errepidea.

Udalak ekipamendutarako lurzatiak behar ez dituen bitartean, horiek berdegunetarako lurzatiak izaten ahalko dira, industrialdea eta bide berdea banatzen dituen landare hesia eratzeko.

Ingurabidearen diseinua, AR-9 banaketa eremuko 3. sektorearen dokumentazio grafikoan zehaztu dena, loteslea da. Bide hori AR-9 banaketa eremuko tokiko bide sistemaren zati izanen da.

9.3.-Diseinu arauak.

AR-9 banaketa eremuko 1. sektorearen garapenak Udal Plan honen hirigintza araudi orokorraren 106. artikulutik 111.era artean zehaztutakoa hartuko du kontuan, ibai ibilguetako txukuntasun eremuari dagokionez, haren eremuak Queiles ibaiaren ibilguaren zati bat barne hartzen duelako.

AR-9 banaketa eremuko 1. sektoreak Queiles ibaiaren ibai parkearen zati baten diseinua barne hartzen du, eremuan sartzen diren tarteetarako. Diseinua udal irizpideak kontuan hartuta eginen da. Cascanteko Udalak materialen mota, landareak, zuhaitzak, hiri altzariak, eraikuntza xehetasunak eta abar zehaztu beharko ditu. Alderdi horiek guztiek jarraitutasuna izanen dute ibai parkearen ibilbide osoan.

Irizpide orokor gisa, 1. sektoreko berdeguneak Queiles ibaiaren ibilguaren inguruan taldekatuko dira, ibai parkea osatzeko. Ibai parkeak ez du hamabost metrotik beherako zabalerarik izanen inon.

AR-9 banaketa eremuak Ablitastik Fiterora doan NA-3020 toki errepidea eta N-121c errepide nazionala ditu mugakide. Horren ondorioz eta Nafarroako Errepideei buruzko martxoaren 23ko 5/2007 Foru Legearen arabera, eraikin berriak galtzadaren kanpoko ertzetik 18 metrora, gutxienez, kokatu behar dira toki errepideetan, eta ertzetik 25 metrora, gutxienez, prestazio handiko errepideetan, interes orokorreko errepideetan eta Nafarroako Foru Komunitateko intereseko errepideetan.

Galtzadaren eta eraikuntza lerroaren artean dauden eraikinetan aipatutako foru legearen 42. artikulua aplikatuko da:

"1. Errepidearen galtzada mugatzen duen kanpoko lerrotik eraikuntza lerroraino debekatuta egonen da edozein eraikin berri egitea, baita zerbitzuen aireko lineak, zutoinak edo telekomunikazioetako dorreak instalatzea ere, gurutzamenduak izan ezik.

2. Dena den, sarbideen eta errepidearen bide segurtasuna bermatzen bada eta eraikitako bolumenaren erabilera aldatzea edo gehitzea ez badakar, errepidearen galtzada mugatzen duen kanpoko lerrotik eraikuntza lerroraino dagoen eremuan lehendik dauden eraikinetan honako obra hauek egiten ahalko dira, errepideen arloan eskumena duen departamentuak horretarako baimena eman ondoren:

a) Jabari publikoko alboko eremuan dauden eraikinak: mantentze eta kontserbazio obrak baino ez.

b) Jabari publikoko alboko eremuaren kanpoko mugatik eraikuntza lerrora dauden eraikinak: a) letran aurreikusitako obrez gain, zaharberrikuntza lanak.

3. Foru lege honetan ezarritako araubideak ez du inola ere aldatuko hirigintza araudian antolamenduz kanpoko eraikinetarako ezarritakoa."

Lurzatietako itxiturak honako kasu hauetan baimentzen ahalko dira (5/2007 Foru Legearen 51. artikulua):

"1. Lehendik dauden itxiturak.

Errepidearen lur berdinketan izan ezik, honako jarduerak baimentzen ahalko dira:

a) Mantentzea.

b) Hondatuz gero, ordeztea. Horretarako, itxiturak zituen lerrokadura eta ezaugarri berdinak errespetatu beharko dira, bide segurtasuna edo errepidearena argi eta garbi kaltetzen ez bada.

2. Itxitura berriak.

Honako baldintza hauek betetzen direnean baimentzen ahalko dira:

a) Diafanoak, zimenturik gabeko hesolak dituztenak, jabari publikoko alboko eremuaren kanpoko mugatik aurrera.

b) Diafanoak, fabrika obrako zimentuak dituztenak, zortasun eremuaren kanpoko mugatik aurrera.

c) Diafanoak ez direnak edo fabrika obrako itxiturak, eraikuntza lerrotik aurrera."

Ezin izanen da baimendu zuhaitzak landatzea jabari publikoko alboko eremuan, ezta zortasun eremuan ere, 5/2007 Foru Legearen 40. eta 41. artikuluek ezarritakoaren arabera.

Lur azpiko luzetarako hodiak zortasun eremutik aurrera baimentzen ahalko dira. Hala eta guztiz ere, bakarrik onartuko dira sareei jarraitutasuna emateko ezinbestekoak diren gurutzamenduak lur berdinketan, funtzio eta zerbitzu eremuetan eta jabari publikoko eremuetan (5/2007 Foru Legearen 39., 40. eta 41. artikuluak).

9.4.-Garapen arauak.

Lurzoru horrek bere antolamendua ebatziko du behar diren plan partzialak prestatuz. Horretarako, lege estandarretara joko da, erreserbarako moduluei eta zehaztu beharreko gainerako kontuei dagokienez. Jarraian, AR-9 banaketa eremua osatzen duten hiru sektoreetako bakoitzaren parametro nagusiak zehaztu dira:

-AR-9 banaketa eremuko 1. sektorea.

Azalera antolatua: 54.273 m².

Eredu aprobetxamendua: 0,50 m²/m².

-AR-9 banaketa eremuko 2. sektorea.

Azalera antolatua: 17.405 m².

Eredu aprobetxamendua: 0,50 m²/m².

-AR-9 banaketa eremuko 3. sektorea.

Azalera antolatua: 23.063 m².

Eredu aprobetxamendua: 0,50 m²/m².

Iragarkiaren kodea: L1016723