130. ALDIZKARIA - 2010eko urriaren 27a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

MARTZILLA

Aldaketa, Martzillako Arau Subsidiarioetan, 4. poligonoko
124. lurzatiaren eremuari dagokionez. Behin betiko onespena

Lurraldearen Antolamenduko eta Etxebizitzako kontseilariak ekainaren 25ean eman 126/2010 Foru Aginduaren bidez, behin betiko onetsi zen Martzillako Arau Subsidiarioak 4. poligonoko 124. lurzatiari dagokionez aldatzeko espedientea, Irakaskuntzako Misiolari Kontzepzionistek sustatua. Hona hemen haren testu arau-emailea:

2.-Aldaketa.

2.1-UC.124.A unitatea (hiri lurzoru finkatua).

Unitateko aldaketaren xedea da egungo eraikinak finkatzea eta etorkizunean handituko dena arautzea. Antolamenduko unitatea definitzea da irizpidea, arau eta ordenantza singularrak ezarriz.

Unitatearen azalera: 8.455,53 m² (%100,00).

2.1.A-Hirigintzako araubidea. Egiturazko determinazioak.

a.-Lurzoruaren sailkapena.

Hiri lurzoru finkatua.

b.-Lurzoruaren kalifikazioa.

Ekipamendurako erabilera, erlijiosoa eta hezkuntzakoa, da erabilera nagusia eta bereizgarria. Erabilera osagarri toleratuak bizitegitarakoa eta jarduera nagusiaren osagarrikoak dira, baldintza hauetan:

a) Bizitegitarakoa: bizitegitarako erabilera baimenduko zaio erlijio eta hezkuntzako komunitateari atxikitako taldeari.

b) Osagarriak: kirol erabilera, bulegoak eta antzekoak baimenduko dira, dela eraikin nagusian dela eraikin bereizi batean kokatuak.

c.-Lurzatiketa.

Lurzatia ezin da zatitu.

d.-Jarduketa sistema.-Aprobetxamendua.

Unitatea jarduketa zuzenekoa da.

Aprobetxamenduaren %100 bilaka daiteke ondare.

2.1.B.-Eraikuntzari buruzko ordenantzak. Determinazio xehakatuak.

a.-Okupazioa. Lerrokadurak.

Okupazioa %80koa izanen da gehienez ere. Lerrokadurak libreak izanen dira, salbu eta García Lorca kalearen jarraipenari dagozkionak, 5 metroko atzeraemangunea izanen baitu bide berriarekin, 3.3 planoan zehazten den bezala.

b.-Eraikuntzaren baldintza orokorrak. Oro har, osaera eta materialak libreak dira, baina kalitateari eutsi beharko zaio, txikiena bada ere, estaldurako akaberan, materialetan eta diseinuan. Eraikuntzaren garaiera ez da 10,50 metro baino altuagoa izanen, beheko solairua + 2 solairu, gehienez.

2.2.-UE.124.B unitatea (lurzoru urbanizagarria).

Lurzoru urbanizagarriko unitateko aldaketaren xedea da eremua antolatzea egungo bilbeari jarraikiz, hiri lurzoruaren muga berri bat ezarrita. 35/2002 Legeak lurzoru urbanizagarrirako eman agindu guztiak hartu dira kontuan; lurzorua xehetasunez antolatu da, garapenik ez baitu behar, eta haren kudeaketa sinpleagoa izanen da, jabetza bakarrekoa izanik.

2,2.A-Hirigintzako araubidea. Egiturazko determinazioak.

a.-Lurzoruaren sailkapena.

Lurzoru urbanizagarria.

b.-Lurzoruaren kalifikazioa.

Lurzatien erabilera grafikoki zehazten da: bizitegitarako edo ekipamendurako.

a) Bizitegitarakoa: zehaztutako lurzatietan erabilera nagusia eta bereizgarria izanen da, etxebizitza kolektiboko tipologiarekin bakarrik goiko solairuetan. Garajeak, ekipamenduak, zerbitzuak, merkataritza eta artisau lantegiak dira erabilera toleratuak, eta etxebizitzetako eraikinetako beheko solairuetan jarri beharko dira. Jarduera sailkatuetako gaietarako aplikatzen den araudia bete beharko da. Ez da baimenduko hura izatea eraikinaren erabilera bakarra.

b) Ekipamenduak: zehaztutako lurzatietan erabilera nagusia eta bereizgarria izanen da.

Ekipamendurako erabilera eta erabilera osagarri hauek baimenduko dira: haurtzaindegia, ostatuak, hezkuntzakoak, osasunekoak, kirolekoak eta administrazioaren bulegoak. Haien kudeaketa pribatua izan daiteke.

c.-Lurzatiketa.

Unitatearen antolamendura egokituko da; lurzatiak banantzen ahalko dira atari edo eraikuntzako unitate bakoitzaren eraikuntza proiektuen arabera. Lurzatiketa orientagarria ezarri da.

d.-Eredu aprobetxamendua. Homogeneizazio koefizienteak.

Aprobetxamenduaren %90 bilaka daiteke ondare, eta gainerako %10 dagokion administrazioari lagako zaio lurzoru urbanizatuan; ondoriozko zatia dirutan konpentsatzen ahal da.

Eredu aprobetxamendua honela lortzen da: aldez aurretik homogeneizatutako irabazteko aprobetxamendua, erabilera eta tipologia konparatzen dituzten merkatu-baloreen arabera ezarritako homogeneizazio koefizienteekin zatituz.

Eraikinen erabilera eta tipologiei buruz proposatutako homogeneizazio koefizienteak honako hauek dira:

-m² eraikia beheko solairuan: 0,6 AU/m².

-m² eraikia babes ofizialeko etxebizitzan: 0,9 AU/m².

-m² eraikia etxebizitza librean: 1,0 AU/m².

UE 124-B unitatearen aprobetxamendua: 6.734,52 AU/9.276,08 m² (0,73 AU/m²).

e.-Lurzoru erreserbaren justifikazioa.

Unitatean sortzen diren azalera orokorrak zerrendatu dira ondoko koadroan. Lurraldearen Antolamenduari eta Hirigintzari buruzko abenduaren 20ko 35/2002 Foru Legean ezarritako erreserba moduluak betetzen direlako justifikazioa ondoko koadroan sartu da:

UNITATEAREN AZALERA

9.276,91 m²

%100,00

-Bizitegitarako azalera garbia:

(udalez gaindiko erreserba sartuta. 197,31)

2.387,00 m²

%23,18

-Ekipamendurako azalera:

617,34 m²

%6,65

-Espazio libreak eta berdeguneak:

2.402,41 m²

%25,90

-Bideak eta aparkaleku publikoak:

4.106,85 m²

%44,27

-Aparkaleku publikoen kopurua:

88

Etxebizitza kopurua, gehienez:

36 etxeb.

%100,00

Etxebizitza babestuen kopurua:

18 etxeb.

%50,00

f.-Etxebizitza babestuaren ehunekoak ezartzea.

35/2002 Foru Legearen. 52. artikulua bete beharrez, unitatearen etxebizitza-ahalmenaren emendioaren gainean aplikatuko da babestutako etxebizitzen kopurua, ondoko zerrendari jarraikiz:

Gutxienez, etxebizitza guztien %25 izanen da babes ofizialekoa, araubide orokorrean (9 etxebizitza). Babes ofizialekoak ez diren gainerakoak prezio tasatukoa izan daitezke, etxebizitza babestuaren %50 iritsi arte (9 etxebizitza); etxebizitza babestuaren eta librearen arteko alternatiba desberdinak arrazoitu ahalko dira, etxebizitza arloko araudiarekin bat.

2.2.B.-Eraikuntzari buruzko ordenantzak. Determinazio xehakatua.

a.-Jarduketa sistema:

35/2002 Foru Legean jasotako prozeduren bidez eginen da garapena: borondatezko birzatiketa, konpentsazioa edo kooperazioa.

b.-Ordenantza orokorrak (Arau Subsidiarioen 29. artikulua).

1.-Eremu eraikigarriak: dagokion antolamendu-planoan adierazi dira. Haien barrenean lurzati osoaren eraikina eginen da.

2.-Lorategi pribatuak: debeku da haietan eraikitzea, finkako itxiturak izan ezik.

3.-Mehelinak: ez dira baimenduko mehelinak agerian uzten dituzten eraikinak, non ez den arrazoitzen bestela eraikitzea ezinezkoa dela. Ageriko mehelinek, aldi baterakoak badira ere, eraikinaren gainerakoak dauzkan fatxadako akabera eta material berak izanen dituzte.

4.-Sestra gaineko garaierak:

Baimendutako garaierak fatxadetarako:

BS

Gehieneko garaiera: 4m

Gutxieneko garaiera: 3m

BS +1

Gehieneko garaiera: 7m

Gutxieneko garaiera: 6m

BS +2

Gehieneko garaiera: 10m

Gutxieneko garaiera: 9m

5.-Hegalkinak:

Balkoiak, begiratokiak edo laneko gorputz irtenak ezin dira fatxadaren luzeraren %50 baino haindiagoak izan.

Hegalkinak ezin dira inolaz ere 60 cm baino handiagoak izan.

6.-Fatxadak:

Familia bakarreko etxebizitzetan nahiz kolektiboetan, beheko eta goiko solairuen tratamendua bateratua izanen da. Solairu bakoitzean, horma-atal itsuak izanen dira fatxadaren perimetroaren %30, gutxienez. Fatxadetan material hauek erabil daitezke: bistako adreilu gorrikara, okre, hori eta zuria; zarpiatua, kolore argietan; hormigoizko bloke beigea; kolore argiko harlauzak; edozein harri motatako harlangaitz edo harlanduak.

7.-Estalkiak:

Malda izanen dute, %40 baino txikiagoa, eta betiere hegalkinarekin kalera jotzen duenean; horma pikoak debekatzen dira fatxadan. Eraikinaren %25ean estalki laua baimentzen da. Hegalkinak, gehienez ere, 30 cm-koak izanen dira kalearen zabalera 4 m baino txikiagoa denean, eta 60 cm-koak gainerakoetan. Estalkiko materiala teila izanen da, arabiarra edo laua, koloretan eta zeramikazkoa edo hormigoizkoa.

8.-Lurzatien itxitura:

Eraikin nagusiaren fatxadan erabili den material berarekin eginen da, metro bateko garaierarekin gehienez ere; 2 metroko garaieraraino, bistako itxitura iragazkorra para daiteke, metalezko hesia edo heskaia.

c.-124-B unitatearen ordenantza partikularrak.

Gutxienez, aparkatzeko plaza bat eginen da etxebizitzako, eraikuntza proiektuan arrazoituko den bezala.

d.-Urbanizazioa.

Prestatuko den urbanizazio proiektu bakarrean, unitateak izanen dituen azpiegitura guztien irtenbidea hartuko da kontuan. Antolamendu planotik ondorioztatzen den irizpidea hartuko da kontuan urbanizaziorako, proposatutako elementuak eta plaza eginen baitira.

Urbanizazio proiektuaren determinazio loteslea izanen da aparkatzeko 88 toki sortzea, gutxienez.

Azpiegiturei dagokien planoan zehaztu dira zerbitzuen eskemak. Hornidura, saneamendu eta euri-uretako sareei dagokienez, Mankomunitateak edo Udalak ezarritakoari jarraituko zaio, eta argindar, argi, telefonia eta gas sareei dagokienez, konpainia hornitzaileek ezarritakoari.

e.-Irisgarritasuna.

Eremu libre eta berdeguneetan, saiatuko da oztoporik ez izaten, ahal dela; posible ez balitz, arrapalak paratuko lirateke. Espaloietako zintarriak gainditzeko, norabidea aldatzerakoan edo ibilgailuendako bideak gurutzatzerakoan, pasagune beheratuak eginen dira. Orobat, ekipamendurako eraikin publikoetako irisgarritasuna bermatuko da, beharrezko neurriak hartuz.

Argitara ematen da, Lurraldearen Antolamenduari eta Hirigintzari buruzko 35/2002 Foru Legearen 81 artikuluan xedatutakoari jarraikiz.

Martzillan, 2010eko irailaren 29an.-Alkate udalburua, José María Abárzuza Goñi.

Iragarkiaren kodea: L1016553