Iragarkia

128. ALDIZKARIA - 2010eko urriaren 22a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.1. Kargu-uzteak, izendapenak eta bestelako egoerak

196/2010 Ebazpena, irailaren 30ekoa, Justiziako zuzendari nagusiak emana, martxoaren 31ko 78/2009 Ebazpenaren bidez iragarritako lekualdatze lehiaketa behin betiko ebazten duena. Lekualdatze lehiaketa hori Justizia Administrazioko Kudeaketa Prozesal eta Administratiboaren, Tramitazio Prozesal eta Administratiboaren eta Laguntza Judizialaren kidego eta eskaletako lanpostu hutsak eta sortu berriak bertako funtzionarioekin betetzeko da.

Ikusirik Justizia Administrazioko Kudeaketa Prozesal eta Administratiboaren, Tramitazio Prozesal eta Administratiboaren eta Laguntza Judizialaren kidego eta eskaletako lanpostu hutsak betetzeko, martxoaren 31ko 78/2010 Ebazpenaren bidez (2010eko Estatuko Aldizkari Ofiziala, apirilaren 21ekoa) iragarritako lekualdatze lehiaketaren ondoriozko espedientea.

Botere Judizialari buruzko uztailaren 1eko 6/1985 Lege Organikoa aldatzen duen abenduaren 23ko 19/2003 Lege Organikoaren VIII. tituluan ezarritakoarekin bat, eta Justizia Administrazioan sartzea, bertako lanpostuak betetzea eta bertako funtzionarioen lanbide-sustapena arautzeko abenduaren 7ko 1451/2005 Errege Dekretuaren bidez onetsitako Erregelamenduaren 43. artikuluan eta ondokoetan eta haren xedapen indargabetzaile bakarrean ezarritakoari jarraikiz, Justizia Zuzendaritza Nagusi honek xedatu du:

Lehena.-Argitara ematea martxoaren 31ko 78/2010 ebazpenaren bidez iragarritako lekualdatze lehiaketan parte hartu duten funtzionarioei behin betiko esleitu zaizkien destinoak (eranskinean ageri dira). Deialdia egiteko ebazpenaren I. eranskinean adierazi ziren lanpostuak eskaini dira, baita horiek aukeratzearen ondorioz hutsik gelditu direnak ere.

Bigarrena.-Justizia Ministerioaren web gunean (esede.mjusticia.es) adierazten diren funtzionarioak lekualdatze lehiaketa honetatik bazter uztea.

Hirugarrena.-Lehiaketa honetan parte hartu baina destinoa lortu ez duten parte-hartzaileen eskabideak iraungita daudela adieraztea; beraz, ez dira kontuan hartuko hurrengo lekualdatze lehiaketetan.

Laugarrena.-Lehiaketa honen bidez esleitu ez diren lanpostuak bete gabe uztea, salbu eta plantilla organikoa aldatuz edo lantoki bateko langileak beste modu batean antolatuz amortizatu nahi badira. Hortaz, lanpostu bete gabe horiek funtzionario berriek beteko dituzte.

Bosgarrena.-Jardunean, zerbitzu berezietan edo familiakoak zaintzeko borondatezko eszendentzian egon eta lehiaketa honetan aipatzen diren kidego edo eskaletara itzultzen ez diren funtzionarioek ondoren ematen diren egunetan utzi beharko dute oraingo lanpostua: Tramitazio Prozesal eta Administratiboa: 2010eko urriaren 25a; Kudeaketa Prozesal eta Administratiboa eta Laguntza Judiziala: 2010eko azaroaren 2a. Lehiaketa bidez lortutako lanpostu berriaz jabetzeko epea hiru egun naturalekoa izanen da, funtzionarioak bere herria aldatu beharrik ez badu; zortzi egun naturalekoa, autonomia erkidego bereko beste herri batera joan behar duenean; eta hogei egun naturalekoa beste autonomia erkidego batera joan behar duenean, salbu eta Kanarietako eta Balearretako autonomia erkidegoetara eta Ceutako eta Melillako hirietara joan beharra duenean, horietan epea hilabetekoa izanen baita, uharteetako edo hiri horietako lanpostua abiaburukoa denean. Jabetza hartzeko epea administrazio eskudunak ordainduko du lehiaketan lortutako lanpostuaren arabera.

Sektore publikoan zerbitzuak emateagatik, interes partikularragatik edo familia biltzeagatik borondatezko eszedentzian direla nahiz eginkizunen etenaldian direla, ebazpenak ekartzen badu Justizia Administrazioko jarduneko zerbitzura itzultzea Kudeaketa Prozesal eta Administratiboaren, Tramitazio Prozesal eta Administratiboaren eta Laguntza Judizialaren kidego edo eskaletan sartuta, jabetza hartzeko epea hogei egun naturalekoa izanen da, ebazpen hau Estatuko Aldizkari Ofizialean argitaratu eta biharamunetik hasita kontatuta, baina kasu honetan aipatu epea ez da ordainduko, kidego edo eskaletarako itzulera formalizatu baino lehen izaten baita eta, hortaz, ezin baita konputatu egiazko zerbitzu gisa.

Lehiaketa honen bidez itzultzen diren funtzionarioak Justizia Administrazioko beste kidego edo eskala batean jardunean badaude eta Administrazioarekiko zerbitzu harremana eten nahi ez badute, aski izanen dute hogei egun naturaleko epean kidego edo eskala berrian jabetza hartzea, ulertuko baita itzultzen direneko lanpostu berriaz jabetzen diren egunaren bezperan utzi dutela destino zaharra. Tramitazio Prozesal eta Administratiboaren kidegora itzulzen direnentzat, 2010eko urriaren 25etik aitzina hasiko da lanpostuaz jabetzeko epea, eta 2010eko azaroaren 2tik Kudeaketa Prozesal eta Administratiboaren kidegora edo Laguntza Judizialarenera itzultzen direnentzat. Horretarako, destinoaz jabetzeko tarte bat beharrezkoa denez, autonomia erkidego eskudunari edo oraingo destinoari dagokion Lurraldeko Justizia Kudeatzailetzari bi eguneko baimen ordaindua eskatzen ahalko diote herriz aldatu beharra badago, Kanarietara, Balear Uharteetara, Ceutara edo Melillara joan beharra daukaten horietan izan ezik, baimena kasu horretan hiru egun bitartekoa izanen baita.

Autonomia erkidego eskudunak edo dagokion Lurralde Kudeatzailetzak eszedentzia ofizioz emanen die jatorrizko kidego edo eskalan, baldin eta eszedentzia hori Justizia Administrazioaren zerbitzuko kidego edo eskala bateko lanpostu batean bada; eta destino hura utzitzat joko da Kudeaketa Prozesal eta Administratiboaren, Tramitazio Prozesal eta Administratiboaren edo Laguntza Judizialaren kidego edo eskaletan jabetza hartu aurreko egunean, beren lansarietan etenik izan ez dadin.

Esleituriko lanpostuetan diharduten bitarteko funtzionarioek titularra lanpostuaz jabetzearekin batera utziko dute beren lanpostua.

Seigarrena.-Ebazpen honen kontra gora jotzeko errekurtsoa jar daiteke, Lehendakaritza, Justizia eta Barneko kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik aurrera.

Iruñean, 2010eko irailaren 30ean.-Justiziako zuzendari nagusia, Roberto Rubio Torrano.

Iragarkiaren kodea: F1016659