Iragarkia

128. ALDIZKARIA - 2010eko urriaren 22a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

131/2010 FORU AGINDUA, irailaren 17koa, Ekonomia eta Ogasuneko kontseilariak emana, etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboaren H70 eredua onesten duena.

Abenduaren 9ko 358/2003 Foru Aginduak 170 eredua onetsi zuen, hau da, etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboa; orobat, ordenagailuz zuzenean irakurtzeko euskarriaren bidez aurkezteko diseinu fisiko eta logikoak onetsi zituen. Gerora, foru agindu batzuek aitorpen eredu hori aurkezteko moduei zegokien edukia ukitu zuten, Internet bidezko aurkezpen telematikoa sartzearen ondorioz.

Gaur egun, zerga ondorioak dituen informazioa tratatzeko orduan Foru Komunitateko Administrazioaren eta Estatuko Administrazioaren artean beharrezkoa den koordinazioaren ondorioz, eta kobrantzak kreditu edo zordunketa txartelen bidez kudeatzeko sistemari atxikitako enpresaburu edo profesionalek egindako eragiketen aitorpenerako 170 eredua berriki onetsi duenez azken administrazio horrek, komenigarria da etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboa egiteko indarra duen 170 ereduaren izena aldatzea. Abenduaren 9ko 358/2003 Foru Aginduak indarra hartu zuenetik aplikatu da eredu hori Nafarroan, eta hemendik aurrera H70 eredua izanen da. Dena dela, 2010eko ekitaldia baino lehenagoko aitorpenen kasuan, 170 izeneko eredua erabiltzen jarraituko da aitorpen horretarako.

Beraz, foru agindu honen bidez H70 eredua onesten da, hau da, etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboari buruzkoa. Horren edukia bat dator 170 ereduan agertzen zenarekin.

H70 eredua aurkezteko moduei dagokienez, paperean, ordenagailuz zuzenean irakurtzeko euskarrian edo bide telematikoz aurkezten ahalko da, aitorpenak nahitaez bide telematikoz aurkeztearen esparrua antolatzen duen uztailaren 3ko 132/2009 Foru Aginduan ezarritako irizpideekin bat.

Bestalde, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuari jarraikiz, horren bidez Nafarroako Zerga Ogasunaren esparruan zergen aplikaziorako teknika elektroniko, informatiko eta telematikoak ugaritu eta hobetu nahi baitira, foru agindu honetan H70 eredua ordenagailuz zuzenean irakurtzeko euskarrian aurkezteko diseinu fisiko eta logikoak jasotzen dira. Horien edukia bat dator 170 ereduan agertzen zenarekin.

Maiatzaren 24ko 177/1999 Foru Dekretuaren bidez onetsitako Pertsona Fisikoen Errentaren gaineko Zergaren Erregelamenduko IV. tituluko II. kapituluaren barruan (betebehar formalak, kontabilitatekoak eta erregistrokoak arautzen ditu), 62.13 artikuluak ezartzen du etxebizitzak sustatzen dituzten pertsonek edo entitateek, hurrengo urteko urtarrilean, aitorpen informatibo bat aurkeztu beharko dutela, etxebizitza horien erosketa prezioaren kontura jaso dituzten kopuruak adierazita. Aitorpenean jaso beharrekoak dira kopuruak kontura eman dituzten subjektu pasiboen identitatea (izen-deiturak eta identifikazio fiskaleko zenbakia) eta zenbatekoa. Konturako emateak kanbio-efektuen bidez egiten badira, efektu horien ordainketaren datari buruzkoa izanen da informazioa.

62. artikulu horretako 22. atalak dio aurreko ataletan aipatu diren aitorpen informatiboak Ekonomia eta Ogasuneko kontseilariak ezartzen duen moduan eta berak dioen lekuan aurkeztu behar direla; gainera, aitorpena ordenagailuz zuzenean irakur daitekeen euskarrian edo bide telematikoen bidez aurkezteko prozedura eta baldintzak ezarri ahal izanen ditu.

Horrenbestez,

AGINDU DUT:

1. artikulua. H70 eredua onestea.

1. H70 eredua onesten da, hau da, "Etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboa". Foru agindu honen I. eranskinean ageri da.

2. H70 ereduaren aurkezpena, foru agindu honen 4. artikuluan xedatutakoarekin bat, bide hauetako bat erabiliz eginen da:

a) Paperean, foru agindu honen I. eranskineko ereduaren arabera. Agiri hauek biltzen ditu:

1. Laburpen-orria, bi ale dituena, bata Administrazioarentzat eta bestea interesdunarentzat.

2. Barneko orriak, konturako emateak egin dituzten subjektu pasiboen izenen zerrenda azalduko dutenak; horietako bakoitzak bi ale izanen ditu, bata Administrazioarentzat eta bestea interesdunarentzat.

b) Ordenagailuz zuzenean irakurtzeko euskarrian, foru agindu honen II. eranskinean ezarri diren erregistroen diseinuen arabera.

c) Telematika bidez, Internet erabiliz, foru agindu honen 6. eta 7. artikuluetan ezarritako baldintza orokorrei eta prozedurari jarraikiz.

2. artikulua. H70 eredua aurkeztera behartuta daudenak.

Nafarroako Zerga Ogasunean H70 eredua aurkeztu beharko dute Nafarroako lurraldean eraikitzen diren etxebizitzen sustatzaileek, baldin eta etxebizitzen erosketa prezioaren konturako diru-kopuruak jaso badituzte ekitaldiaren barrenean.

3. artikulua. H70 eredua aurkezteko epea.

H70 eredua urte bakoitzeko urtarrilean aurkeztuko da, aurreko urte naturaleko informazioari dagokionez.

4. artikulua. H70 eredua aurkezteko modua.

Etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboa bide hauetako bat erabiliz aurkezten ahalko da:

1. Telematika bidez, Internet erabiliz. Hala aurkeztu beharko da, nahitaez, Ekonomia eta Ogasuneko kontseilariaren uztailaren 3ko 132/2009 Foru Aginduan ezarritako kasuetan.

2. Ordenagailuz zuzenean irakurtzeko euskarrian, zerrendan 12.000 erregistro edo gehiago daudenean, 132/2009 Foru Aginduan xedatutakorekin bat. Kasu horietan nahitaezkoa izanen da aurkezpena modu honetan egitea.

3. Paper inprimatuan, telematika bidez edo ordenagailuz zuzenean irakurtzeko euskarrian aurkeztea nahitaezkoa ez den kasuetan, aurreko 1. eta 2. atalekin bat.

5. artikulua. Ordenagailuz zuzenean irakurtzeko euskarrien identifikazioa eta horiek aurkezteko modua.

1. Ordenagailuz zuzenean irakurtzeko euskarrian banakako aitorpena aurkezten bada, aitortzaileak honako dokumentu hauek aurkeztu beharko ditu:

a) H70 ereduaren laburpen-orriaren bi aleak, Administrazioarentzakoa eta interesdunarentzakoa. Ale horiek behar bezala sinaturik beharko dute, eta behar den lekuetan aditzera emanen dira sinatzailea nor den eta laburpen-orrian eskatzen diren gainerako datuak.

Jasotzen duen bulegoan zigilatu ondoren, aitortzaileak H70 ereduaren laburpen-orriaren "interesdunarentzako alea" gordeko du eta ale horrek han aurkeztu izanaren frogagiri balioa izanen du.

b) Ordenagailuz zuzenean irakurtzeko euskarriak etiketa bat izanen du erantsita kanpoko aldean, eta hartan honako datu hauek adierazi beharko dira, hurrenkera honetantxe:

1. Zergaldia.

2. Aurkezteko eredua: H70.

3. Aitortzailearen Identifikazio Fiskaleko Zenbakia (IFZ).

4. Aitortzailearen izen-deiturak edo sozietatearen izena.

5. Aitortzailearen helbidea, udalerria eta posta kodea.

6. Harremanetarako pertsonaren izen-deiturak.

7. Pertsona horren telefonoa eta luzapena.

8. Artxibo osoko erregistro kopurua, guztira.

Datu horiek adierazteko aski izanen da bakoitza aurreko zerrendaren arabera dagokion ordinalaren ondoren jartzea.

Artxiboak ordenagailuz zuzenean irakurtzeko euskarri bat baino gehiago baldin badu, denek etiketa bana izanen dute dagokien zenbaki-segida jarrita: 1/n, 2/n etab.; "n" izanik euskarrien kopuru osoa. Bigarren eta hurrengo bolumenetako etiketan, aurreko 1., 2., 3., eta 4. ordinaletan eskatutako datuak besterik ez da jaso beharko.

2. Ordenagailuz zuzenean irakurtzeko euskarrian aitortzaile askoren aitorpenak batera aurkezten badira, pertsona edo entitate aurkezleak dokumentu hauek eraman behar ditu:

a) Aurkezleari dagokion laburpen-orriaren bi aleak, bata Administrazioarentzat eta bestea interesdunarentzat, H70 ereduarenak, behar bezala sinatuak. Ale horietan ondoko datu hauek agertu beharko dira, dagokien lekuan: sinatzailearen identitatea eta aitortzaile guztiei buruzko gainerako datuak (etxebizitzen sustatzaileak), eta, zergaldiaren barrenean, sustatzaileei etxebizitzak erosteko konturako emateak egin dizkieten pertsonen edo entitateen kopurua, guztira.

Horiek jasotzen dituen bulegoak zigilua jarri ondoren, aurkezleak beretzat hartuko du laburpen-orriaren "interesdunarentzako alea", eta horrek han aurkeztu izanaren egiaztagiri balioa izanen du.

b) H70 ereduko laburpen-orriaren bi aleak (Administrazioarentzakoa eta interesdunarentzakoa), aitortzaile guztiei dagozkienak (etxebizitzen sustatzaileak), behar bezala sinatuak eta beteak.

Ale bakoitzak sustatzaile horiek identifikatzeko datuak behar bezala beterik izan behar ditu.

Horiek jasotzen dituen bulegoak zigilua jarri ondoren, aurkezleak hartuko ditu aitortzaileei dagozkien laburpen-orrien interesdunarentzako aleak. Hala ere, aurkezten diren laburpen-orrien kopuruaren ondorioz komeni baldin bada, eta agirien bilketa arintzearren, zigilatutako aleak aurkeztu ondoko egunen batean hartzen ahalko ditu aurkezleak, eta hori dagokion unean jakinaraziko zaio.

c) Ordenagailuz zuzenean irakurtzeko euskarriak etiketa bat izanen du erantsita kanpoko aldean, eta hartan aurkezlearen honako datu hauek adierazi beharko dira, hurrenkera honetantxe:

1. Zergaldia.

2. Aurkezteko eredua: H70.

3. Aurkezlearen Identifikazio Fiskaleko Zenbakia (IFZ).

4. Aurkezlearen izen-deiturak, edo sozietatearen izena.

5. Aurkezlearen helbidea, udalerria eta posta kodea.

6. Harremanetarako pertsonaren izen-deiturak.

7. Pertsona horren telefonoa eta luzapena.

8. Artxibo osoko erregistro kopurua, guztira.

9. Aurkeztutako aitortzaileen kopurua, guztira.

10. Etxebizitzen sustatzaileei konturako emateak egin dizkieten pertsonen edo entitateen kopurua, guztira.

Datu horiek adierazteko aski izanen da bakoitza aurreko zerrendaren arabera dagokion ordinalaren ondoren jartzea.

Artxiboak ordenagailuz zuzenean irakurtzeko euskarri bat baino gehiago baldin badu, denek etiketa bana izanen dute zenbaki-segida jarrita: 1/n, 2/n etab.; "n" izanik euskarrien kopuru osoa. Bigarren eta hurrengo bolumenetako etiketan, aurreko 1., 2., 3., eta 4. ordinaletan eskatutako datuak besterik ez da jaso beharko.

3. Ordenagailuz zuzenean irakurtzeko euskarri guztien jasoerak behin-behinekoak izanen dira, eta prozesatu eta egiaztatu zain geratuko dira. Foru agindu honetan ezarri diren diseinu eta zehaztapenen araberakoak ez direnean, edo haietako informazioa ikusterik ez badago, aitortzaileari eskatuko zaio hamar egun baliodunean zuzen dezala aurkeztutako euskarri informatikoak duen akatsa. Epe hori iragan eta oraindik ere zerbaitek eragozten badio Zerga Administrazioari eskatu dituen datuak ikustea, urteko aitorpena aurkeztu gabekotzat joko da, horrek dakartzan ondorio guztiekin, eta hala emanen zaio aditzera, arrazoien gainean, tributudunari.

4. Segurtasun arrazoiengatik, ordenagailuz zuzenean irakurtzeko euskarriak ez dira itzuliko, salbu eta espresuki eskatzen bada; halakoetan ezabaturik itzuliko dira edo antzeko batzuk emanen.

6. artikulua. H70 ereduari dagozkion aitorpenen Internet bidezko aurkezpen telematikoa egiteko baldintza orokorrak.

1. H70 ereduari dagozkion aitorpenen aurkezpen telematikoa baldintza hauei jarraikiz eginen da:

a) Aitortzaileak identifikazio fiskaleko zenbakia (IFZ) eduki behar du.

b) Aitortzaileak ziurtagiri elektronikoa eduki beharko du, Nafarroako Zerga Ogasunak onartua, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuan ezarrita dagoenari jarraikiz.

Baimenduta dauden ziurtagiri elektronikoak eta ziurtapen zerbitzuak ematen dituztenen zerrenda Interneteko http://www.hacienda.navarra.es helbidetik abiatuta kontsulta daiteke.

c) Aitorpenak, jakinarazpenak eta zerga arloko beste agiri batzuk hirugarren pertsonen izenean telematika bidez aurkezteko eta tributu zorren ordainketa telematika bidez tramitatzeko kanpo-lankidetzarako akordioa onesten duen ekainaren 29ko 130/2009 Foru Aginduan xedatutakoarekin bat, aurkezleak, aitorpenak hirugarrenen izenean egiteko baimendutako pertsona edo entitate bat baldin bada, Nafarroako Zerga Ogasunak onartutako ziurtagiri elektronikoa, aurreko b) letran aipatzen dena, eduki beharko du.

d) Aitortzaileak edo, bidezkoa bada, aurkezle baimendunak, igorri beharreko aitorpena jasotzen duen fitxategia lortzeko laguntza programa bat erabili beharko du aurretik, salbu eta aurkezpen telematikoa egiteko prestatu den inprimakia erabiltzen badu. Laguntza programa hori Nafarroako Zerga Ogasunak H70 ereduko aitorpenetarako prestatu duena edo formatu bereko fitxategi bat sortzen duen beste bat izan daiteke.

Fitxategi horien edukia foru agindu honen II. eranskinean ezartzen diren erregistroen diseinuen araberakoa izanen da.

e) Aitortzaileek aurkezpen telematikoa egiteko eskatzen diren arau teknikoak bete beharko dituzte. Arau horiek Nafarroako Zerga Ogasunaren web orrian daude ikusgai: http://www.hacienda.navarra.es.

2. Baliabide telematikoen bitartez igortzen diren aitorpenetan akats formalak agertzen direnean, sistemak berak emanen dio horren berri aitortzaileari akatsak azaltzeko mezuen bitartez, behar den zuzenketa egin dezan.

7. artikulua. H70 ereduari dagozkion aitorpenen Internet bidezko aurkezpen telematikoa egiteko prozedura.

Aitorpenen Internet bidezko aurkezpen telematikoa egiteko, bi prozedura hauetako bat erabiliko da:

1. Web-eko datu-orritik abiatuta prozesu hau erabiliko da:

a) Nafarroako Ataritik, Ogasunarekiko izapideen atalean sartu.

b) Egin nahi den aitorpenaren eredua hautatu, hau da, H70 eredua 2010eko zergaldiko edo hurrengoetako aitorpenen kasuan eta 170 eredua aurreko zergaldien kasuan, eta aitorpena aurkeztu ahal izateko datu guztiak bete.

c) Aitorpena bete ondoren, igortzeko aukera erabili. Aitorpena egokia bada, sistemak balioztatuko du. Akatsik atzemanez gero, datu-orriaren bidez jakinaraziko da, eta haiek zuzendu bitarte ezin izanen da aitorpena aurkeztu. Aitorpena zuzen bete ondoren, sistemak jakinaraziko du aurkeztutako aitorpen bakoitzari esleitutako zenbakia eta, orobat, inprimatzeko aukera eskainiko du, frogagiri gisa erabiltzeko.

2. Nafarroako Zerga Ogasunak prestatutako laguntza programatik abiatuta, prozesu hau segitu beharko da:

a) Aitorpena laguntza programan bete, hau da, H70 eredua 2010eko zergaldiko edo hurrengoetako aitorpenen kasuan, eta 170 eredua aurreko zergaldien kasuan.

b) Aitorpena bete ondoren, balioztatu egin behar da, aurkeztu aurretik.

c) Aitorpena balioztatu ondotik, Interneten bidez igortzen ahalko da. Igorpen berean aitorpen bat baino gehiago sar daitezke, betiere eredu eta urte berekoak baldin badira.

d) Aitorpena igorri ondoren, sistemak erantzunen du, errezibo-zenbakia eta aurkezpenaren eguna eta ordua emanez. Bidalketa balioztatu eta prozesatu ondoren, haren emaitza laguntza programan eskura dauden loteen kontsultatik aztertzen ahalko da.

Xedapen indargabetzaile bakarra.-Arauak indargabetzea.

Foru agindu honek indarra hartzen duen egunetik aurrera indarrik gabe geldituko da abenduaren 9ko 358/2003 Foru Agindua. Agindu horrek 170 eredua onetsi zuen, hau da, etxebizitzen sustatzaileek horien erosketa prezioaren kontura jasotzen diren kopuruen aitorpen informatiboari buruzkoa, bai eta ordenagailuz zuzenean irakurtzeko euskarriaren bidez aurkezteko diseinu fisiko eta logikoak ere. Hala ere, 2010. urteko zergaldia baino lehenagoko aitorpenetarako, 170 eredua erabiltzen jarraituko da (etxebizitzen sustatzaileek horien erosketa prezioaren kontura jasotzen diren kopuruen aitorpen informatiboa).

Azken xedapen bakarra.-Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2010eko irailaren 17an.-Ekonomia eta Ogasuneko kontseilaria, Álvaro Miranda Simavilla.

I. ERANSKINA

II. ERANSKINA

H70 eredua telematika bidez aurkezteko sortzen diren artxiboen
eta eredu hori ordenagailuz zuzenean irakurtzeko euskarrien
diseinu fisiko eta logikoak

A) Euskarri magnetikoen ezaugarriak.

Etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboak (H70 eredua) aurkezteko erabiltzen diren ordenagailu bidezko euskarriek ezaugarri hauek bete beharko dituzte:

-Mota: CD-R (Compact Disc Recordable), 12 cm-koa.

-Edukiera: 700 MB bitarte.

-ISO/IEC DIS 9660:1999 formatua, Joliet luzapenarekin edo hori gabe.

-Multisesiorik ez.

B) Diseinu logikoak.

Erregistroen azalpena.

Aitortzaile bakoitzarentzat bi erregistro mota izanen dira, lehen idazgunearen arabera bereizten direnak, irizpide hauen arabera:

1. mota: aitortzailearen erregistroa. identifikazio datuak eta aitorpenaren laburpen orria. 1. motako erregistroaren diseinua, atal hauetan beretan eta foru agindu honen eranskinean ageri direnetatik.

2. mota: aitortuaren erregistroa eta eraikitzen ari den etxebizitzaren kokalekua. 2. motako erregistroaren diseinua, atal hauetan beretan eta foru agindu honen eranskinean ageri direnetatik.

Aurkezteko ordena erregistro motarena izanen da. 1. motako erregistro bakar bat egonen da eta 2. motakoen kasuan, aitorpenean zenbat aitortu diren, horrenbeste erregistro izanen dira.

Eremu alfazenbakizko eta alfabetiko guztiak ezkerretara lerrokaturik eta eskuinean zuriuneak dituztela aurkeztuko dira, letra larriz, karaktere berezirik eta bokal azentudunik gabe.

Hizkuntzaren karaktere bereizgarrietarako ISO-8859-1 kodifikazioa erabiliko da. Horrela, Ñ letrak ASCII 209 (Hex. D1) balioa izanen du, eta "Ç" letrak (c larri hautsia), ASCII 199 (Hex. C7).

Zenbakizko eremu guztiak eskuinetara lerrokaturik eta ezkerretara zeroz beterik agertuko dira, zeinurik gabe eta paketatu gabe.

Eremu guztiek izanen dute edukia, eremuaren azalpenean kontrakoa zehazten ez bada. Ez badute, zenbakizko eremuak zeroz beteko dira eta alfazenbakizkoetan eta alfabetikoetan, berriz, zuriuneak utziko dira.

Aurkezpena multzoan egiten denean (aitortzaile bat baino gehiago artxibo berean), euskarriaren lehen erregistro gisa zero motako erregistro bat aurkeztuko da (aurkezlearen erregistroa), atal honetan jarraian azaltzen den zero motako erregistroaren diseinuari jarraikiz. Horretan sartuko dira aurkezpenaren erantzulea den pertsonaren edo entitatearen datuak, eta hala eginen da, nahiz eta pertsona edo entitate hori euskarrian aitortzaile moduan ere aurkeztu. Jarraian ipiniko dira lehen aitortzailearen datuak (1. motako erregistroa), eta, ondoren, aitortuak eta etxebizitzen kokalekua (2. mota); gero, hurrengo aitortzailearen datuak, eta, ondoren, aitortuak eta etxebizitzen kokalekua; eta horrela hurrenez hurren.

Fitxategiko lehen erregistroak (0 mota, aitorpena multzoan aurkezten denean, edo 1 mota, banaka aurkezten denean) 13 karaktereko eremua izanen du, 238. idazgunearen eta 250.aren artean, zigilu elektronikoa jartzeko. Nafarroako Zerga Ogasunak ematen dituen programa ofizialen bidez bakarrik jarriko da zigilu hori. Bestelako edozein kasutan zuriuneak utziko dira.

Iragarkiaren kodea: F1015597