Iragarkia

128. ALDIZKARIA - 2010eko urriaren 22a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

129/2010 FORU AGINDUA, irailaren 17koa, Ekonomia eta Ogasuneko kontseilariak emana, kobrantzak kudeatzeko sistemari atxikitako enpresaburuek edo profesionalek kreditu- edo zordunketa-txartelen bidez egindako eragiketen aitorpena aurkezteko 170 eredua onesten duena.

Maiatzaren 31ko 34/2010 Foru Dekretuaren bidez Pertsona Fisikoen Errentaren gaineko Zergaren Erregelamendua aldatu zen, maiatzaren 24ko 174/1999 Foru Dekretuaren bidez onetsi zena. 34/2010 Foru Dekretu haren lehenengo artikuluak erregelamenduaren 62. artikuluaren zenbait atal aldatu zituen, informazioa emateko formazko betebeharrei dagokienez. Betebehar horiek Tributuei buruzko abenduaren 14ko 13/2000 Foru Legearen 103. eta 104. artikuluetan ezartzen dira oro har.

Zehazki, 34/2010 Foru Dekretuaren lehenengo artikulu horren 4. atalaren bidez 62. artikuluaren 21. atalaren testua aldatu zen. Geroztik, Espainian ezarritako enpresaburu eta profesionalei kobrantzak kudeatzeko zerbitzua kreditu- edo zordunketa-txartelen bidez ematen dieten banku edo kreditu entitateak eta gainerako entitateak behartuta daude sistema horri atxikitako enpresaburu edo profesionalek egindako eragiketen urteko aitorpen informatiboa aurkeztera, kobrantza horien urteko zenbateko garbia 3.000 eurotik gorakoa denean.

Foru agindu honen bidez aitorpen hori egiteko eredu berri bat ezartzen da, 170 eredua deituko dena, Estatuko Administrazioak berriki onetsi duen balio bereko eredua bezala, hori guztia zerga ondorioak duen informazioa tratatzeko orduan Administrazio horren eta Foru Komunitateko Administrazioaren artean beharrezkoa den koordinazioaren ondorioz.

Horrek ekarriko du gaur arte Nafarroan indarra zuen 170 ereduaren zenbakia aldatzea. Eredu hori etxebizitzen sustatzaileek horien erosketa prezioaren kontura jasotzen dituzten kopuruen aitorpen informatiboa egiteko da, eta hemendik aurrera H-70 eredua izanen da.

Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuari jarraikiz, horren bidez Nafarroako Zerga Ogasunaren esparruan zergen aplikaziorako teknika elektroniko, informatiko eta telematikoak ugaritu eta hobetu nahi baitira, foru agindu honetan 170 eredua ordenagailu bidez zuzenean irakurtzeko euskarrian aurkezteko diseinu fisiko eta logikoak jasotzen dira.

Horrez gain, aitorpen-likidazioak, autolikidazioak, urteko aitorpen-laburpenak, aitorpen informatiboak, jakinarazpenak eta zerga arloko araudiak eskatutako beste agiri batzuk telematika bidez eta ordenagailuak irakurtzeko euskarriaren bidez aurkeztera behartzen duten kasuak arautu dituen Ekonomia eta Ogasuneko kontseilariaren uztailaren 3ko 132/2009 Foru Aginduaren 4. artikuluaren arabera, foru agindu honek 170 ereduko aitorpenen aurkezpen telematikoa teleprozesuaren bidez egiteko aukera xedatzen du. Teleprozesuaren bidezko aurkezpen telematikoa borondatezkoa izanen da eta http://www.hacienda.navarra.es Interneteko helbidean adierazi diren baldintzak eta baztertzeko kasuak errespetatuta erabiltzen ahalko da.

Azkenik, Pertsona Fisikoen Errentaren gaineko Zergaren Erregelamenduaren 62. artikuluaren 22. atalaren bidez, Ekonomia eta Ogasuneko kontseilariari baimena ematen zaio aitorpen eredua, eta hura aurkezteko epea, tokia eta modua onesteko, bai eta finkatzeko ere betebehar hori noiz eta nola egin behar den ordenagailuan zuzenean irakurtzeko euskarrian edo telematika bidez.

Horrenbestez,

AGINDU DUT:

1. artikulua. 170 eredua onestea.

1. "Kobrantzak kudeatzeko sistemari atxikitako enpresaburuek edo profesionalek kreditu- edo zordunketa-txartelen bidez egindako eragiketen urteko aitorpen informatiboa", 170 eredua, onesten da, foru agindu honen I. eranskinean agertzen dena.

2. Tributudunak hautatzen ahalko du hurrengo bideetatik zein erabili 170 eredua aurkezteko:

a) Ordenagailuz zuzenean irakurtzeko euskarrian, foru agindu honen II. eranskinean ezarri diren erregistroen diseinuen arabera.

b) Telematika bidez, teleprozesua erabiliz, Ekonomia eta Ogasuneko kontseilariaren uztailaren 3ko 132/2009 Foru Aginduaren 4. artikuluan ezarritakoaren arabera.

2. artikulua. 170 eredua aurkeztera behartuta daudenak.

Estatuaren eta Nafarroako Foru Komunitatearen arteko Hitzarmen Ekonomikoaren 46.2 artikuluan xedatutakoarekin bat, 170 ereduaren araberako aitorpen informatiboa (Kobrantzak kudeatzeko sistemari atxikitako enpresaburuek edo profesionalek kreditu- edo zordunketa-txartelen bidez egindako eragiketei buruzkoa) aurkeztu beharko dute, indarreko araudiaren arabera, Espainian ezarritako enpresaburu eta profesionalei kobrantzak kudeatzeko zerbitzua kreditu- edo zordunketa-txartelen bidez ematen dieten banku edo kreditu entitateek eta gainerako entitateek.

3. artikulua. Informazioaren xedea eta edukia.

Aurreko artikuluan aipatutako entitateek egin dituzten eragiketei buruzko datu hauek sartu beharko dituzte kobrantzak kudeatzeko sistemari atxikitako enpresaburuek edo profesionalek kreditu- edo zordunketa-txartelen bidez egindako eragiketen urteko aitorpen informatiboan, kobrantza horien urteko zenbateko garbia 3.000 eurotik gorakoa denean:

1) Kobrantzak kreditu- edo zordunketa-txartelen bidez kudeatzeko sistemari atxikitako enpresaburuen edo profesionalen izen-deiturak edo sozietate-izena edo izen osoa eta identifikazio fiskaleko zenbakia.

2) Sisteman operatzeko enpresaburuek edo profesionalek erabiltzen duten saltoki zenbakia.

3) Kobrantzak egiteko erabiltzen den kontuaren zenbakia.

4) Urtean fakturatutako zenbatekoa, eurotan.

4. artikulua. 170 eredua aurkezteko epea.

Kobrantzak kreditu- edo zordunketa-txartelaren bidez kudeatzeko sistemari atxikitako enpresaburuek edo profesionalek egindako eragiketen aitorpen informatiboa, 170 eredua, urteko martxoaren 1etik martxoaren 31ra bitarte aurkeztuko da, aurre-aurreko urte naturaleko eragiketei dagokienez.

5. artikulua. Ordenagailuz zuzenean irakurtzeko euskarrien identifikazioa eta horiek aurkezteko modua.

1. Ordenagailuz zuzenean irakurtzeko euskarrian banakako aitorpena aurkezten bada, aitortzaileak honako dokumentu hauek aurkeztu behar ditu:

a) 170 ereduaren laburpen-orriaren bi aleak, bata Administrazioarentzat eta bestea interesdunarentzat. Ale horiek behar bezala sinaturik egon beharko dute eta, behar den lekuan, sinatzailearen identifikazio datuak eta laburpen-orrian eskatzen diren gainerako datuak agertuko dira.

Jasotzen duen bulegoan zigilatu ondoren, aitortzaileak 170 ereduaren laburpen-orriaren "interesdunarentzako alea" gordeko du eta ale horrek han aurkeztu izanaren frogagiri balioa izanen du.

b) Ordenagailuz zuzenean irakurtzeko euskarriak etiketa bat eduki beharko du kanpoaldean itsatsita; hartan, honako datuak emanen dira, hurrenkera honetantxe:

1. Zergaldia.

2. Aurkezteko eredua: 170.

3. Aitortzailearen identifikazio fiskaleko zenbakia (IFZ).

4. Aitortzailearen izen-deiturak, edo sozietatearen izena.

5. Harremanetarako pertsonaren izen-deiturak.

6. Pertsona horren telefonoa eta luzapena.

7. Erregistro kopurua, guztira.

Datu horiek adierazteko aski izanen da bakoitza aurreko zerrendaren arabera dagokion ordinalaren ondoren jartzea.

Artxiboak ordenagailuz zuzenean irakurtzeko euskarri bat baino gehiago baldin badu, denek etiketa bana izanen dute dagokien zenbaki-segida jarrita: 1/n, 2/n etab., "n" euskarri guztien kopurua izanik. Bigarren eta hurrengo bolumenetako etiketan, aurreko 1., 2., 3., eta 4. ordinaletan eskatutako datuak besterik ez da jaso beharko.

2. Ordenagailuz zuzenean irakurtzeko euskarrian aitortzaile askoren aitorpenak batera aurkezten badira, pertsona edo entitate aurkezleak dokumentu hauek eraman behar ditu:

a) Aurkezleari dagokion laburpen-orriaren bi aleak, bat Administrazioarentzat eta bestea interesdunarentzat, 170 ereduarenak, behar bezala sinatuak. Ale horietan ondoko datu hauek agertu beharko dira, dagokien lekuan: aurkezten duen pertsonaren edo entitatearen identifikazio datuak, aitortzaileak guztira zenbat diren, aitortu gisa agertzen direnak guztira zenbat diren, bai eta zein zergaldi den eta zein aurkezpen mota den ere.

Horiek jasotzen dituen bulegoak zigilua jarri ondoren, aurkezleak beretzat hartuko du laburpen-orriaren "interesdunarentzako alea", eta horrek han aurkeztu izanaren egiaztagiri balioa izanen du.

b) 170 ereduko laburpen-orriaren bi aleak (Administrazioarentzakoa eta interesdunarentzakoa), aitortzaile tributudun guztiei dagozkienak, behar bezala sinatuak eta beteak.

Ale bakoitzak aitortzaile horiek identifikatzeko datuak behar bezala beterik izan behar ditu.

Horiek jasotzen dituen bulegoak zigilua jarri ondoren, aitortzaileei dagozkien laburpen-orrien interesdunarentzako aleak aurkezleak hartuko ditu. Hala ere, aurkezten diren laburpen-orrien kopuruaren ondorioz komeni baldin bada, eta agirien bilketa arintzearren, zigilatutako aleak aurkezpena egin ondorengo egun batean hartzen ahalko ditu aurkezleak, eta hori dagokion unean jakinaraziko zaio.

c) Ordenagailuz zuzenean irakurtzeko euskarriak etiketa bat izanen du erantsita kanpoko aldean, eta hartan aurkezlearen honako datu hauek adierazi beharko dira, hurrenkera honetantxe:

1. Zergaldia.

2. Aurkezteko eredua: 170.

3. Aurkezlearen identifikazio fiskaleko zenbakia (IFZ).

4. Aurkezlearen izen-deiturak, edo sozietatearen izena.

5. Harremanetarako pertsonaren izen-deiturak.

6. Pertsona horren telefonoa eta luzapena.

7. Artxibo osoko erregistro kopurua, guztira.

8. Aurkeztutako aitortzaileen kopuru osoa.

9. Zerrendatutako aitortuen kopuru osoa.

Datu horiek adierazteko aski izanen da bakoitza aurreko zerrendaren arabera dagokion ordinalaren ondoren jartzea.

Artxiboak ordenagailuz zuzenean irakurtzeko euskarri bat baino gehiago baldin badu, denek etiketa bana izanen dute zenbaki-segida jarrita: 1/n, 2/n etab.; "n" izanik euskarrien kopuru osoa. Bigarren eta hurrengo bolumenetako etiketan, aurreko 1., 2., 3., eta 4. letretan eskatutako datuak besterik ez da jaso beharko.

3. Ordenagailuz zuzenean irakurtzeko euskarri guztien jasoerak behin-behinekoak izanen dira, eta prozesatu eta egiaztatu zain geratuko dira. Foru agindu honetan ezarri diren diseinu eta zehaztapenen araberakoak ez direnean, edo haietako informazioa ikusterik ez badago, aitortzaileari eskatuko zaio hamar egun balioduneko epean zuzen dezala aurkeztutako euskarri informatikoak duen akatsa. Epe hori iragan eta oraindik ere zerbaitek eragozten badio zerga administrazioari eskatu dituen datuak ikustea, aitorpena balio gabekotzat hartuko da ondorio guztietarako eta tributudunari jakinaraziko zaio, arrazoiak emanez betiere.

4. Segurtasun arrazoiengatik, ordenagailuz zuzenean irakurtzeko euskarriak ez dira itzuliko, salbu eta espresuki eskatzen bada; halakoetan ezabaturik itzuliko dira edo antzeko batzuk emanen.

Azken xedapen bakarra.-Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra eta, 2010eko informazioa jasoz, 2011. urtean aurkezten diren aitorpenei aplikatuko zaie lehenbizikoz.

Iruñean, 2010eko irailaren 17an.-Ekonomia eta Ogasuneko kontseilaria, Álvaro Miranda Simavilla.

I. ERANSKINA

II. ERANSKINA

170 eredua telematika bidez aurkezteko sortzen diren artxiboen
eta eredu hori ordenagailuaren bidez zuzenean irakurtzeko
euskarrien diseinu fisiko eta logikoak

A) Euskarri magnetikoen ezaugarriak.

Kobrantzak kreditu- edo zordunketa-txartelen bidez kudeatzeko sistemari atxikitako enpresaburu edo profesionalek egindako eragiketen urteko aitorpen informatiboa (170 eredua) aurkeztean, ordenagailuz zuzenean irakurtzeko euskarriek ezaugarri hauek bete beharko dituzte:

-Mota: DVD-R edo DVD+R.

-Edukiera: 4,7 GB bitarte.

-UDF artxibo sistema.

-Alde bakarrekoa eta geruza bakunekoa.

B) Diseinu logikoak:

-Erregistroen azalpena.

Aitortzaile bakoitzarentzat bi erregistro mota izanen dira, lehen idazgunearen arabera bereizten direnak, irizpide hauen arabera:

• 1. mota: aitortzailearen erregistroa: identifikazio datuak eta aitorpenaren laburpen-orria. 1. motako erregistroaren diseinua, atal hauetan beretan eta foru agindu honen eranskinean ageri direnetatik.
• 2. mota: aitortuaren erregistroa. 2. motako erregistroaren diseinua, atal hauetan beretan eta foru agindu honen eranskinean ageri direnetatik.

Aurkezteko ordena erregistro motarena izanen da. 1. motako erregistro bakar bat egonen da eta 2. motakoen kasuan, aitorpenean zenbat aitortu diren, horrenbeste erregistro izanen dira.

Eremu alfazenbakizko eta alfabetiko guztiak ezkerretara lerrokaturik eta eskuinetara zuriunez beterik aurkeztuko dira, letra larrietan, karaktere berezirik eta bokal azentudunik gabe.

Hizkuntzaren karaktere bereizgarrietarako ISO-8859-1 kodifikazioa erabiliko da. Horrela, Ñ letrak ASCII 209 (Hex. D1) balioa izanen du, eta "Ç" letrak (c larri hautsia), ASCII 199 (Hex. C7).

Zenbakizko eremu guztiak eskuinetara lerrokaturik eta ezkerretara zeroz beterik agertuko dira, zeinurik gabe eta paketatu gabe.

Eremu guztiek izanen dute edukia, eremuaren azalpenean kontrakoa zehazten ez bada. Ez badute, zenbakizko eremuak zeroz beteko dira eta alfazenbakizkoak eta alfabetikoak, berriz, zuriunez.

Aurkezpena multzoan egiten denean (aitortzaile bat baino gehiago artxibo berean), euskarriaren lehen erregistro gisa zero motako erregistro bat aurkeztuko da (aurkezlearen erregistroa), atal honetan jarraian, B letran, azaltzen den zero motako erregistroaren diseinuari jarraikiz. Horretan sartuko dira aurkezpenaren erantzulea den pertsonaren edo entitatearen datuak, eta hala eginen da, nahiz eta pertsona edo entitate hori euskarrian aitortzaile moduan ere aurkeztu. Jarraian ipiniko dira lehen aitortzailearen datuak (1. motakoa) eta, ondoren, bere eragiketen eta merkatuen datuak (2. mota); gero, hurrengo aitortzailearen datuak; eta horrela hurrenez hurren.

Iragarkiaren kodea: F1015488