Iragarkia

107. ALDIZKARIA - 2010eko irailaren 3a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

852/2010 EBAZPENA, uztailaren 1ekoa, Arriskuen Prebentziorako eta Lanaren zuzendari nagusiak emana, Iruñeko "Asociación Navarra sin Fronteras" enpresaren lan hitzarmen kolektiboa erregistratu eta Nafarroako Aldizkari Ofizialean argitaratzea erabakitzen duena (espediente zenbakia: 45/2010).

Departamentu honetan 2010eko ekainaren 21ean sartu zen ''Asociación Navarra sin Fronteras'' enpresaren lan hitzarmen kolektiboaren testua, 35 artikuluz eta eranskin batez (ordainsarien taula) osatua, enpresaren ordezkaritzak eta langileen ordezkariek (UGT) 2010eko ekainaren 14an izenpetu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren arabera, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan harturik lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22,1. artikuluak ematen dizkidan eskudantziak erabiliz,

EBATZI DUT:

1. Iruñeko "Asociación Navarra sin Fronteras" enpresaren lan hitzarmen kolektiboa (kodea: 3108542) erregistratzea Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau negoziazio batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Berrikuntza, Enpresa eta Enplegu Departamentuko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko uztailaren 1ean.-Arriskuen Prebentziorako eta Lanaren zuzendari nagusia, Imelda Lorea Echavarren.

II LAN HITZARMENA

Asociación Navarra Sin Fronteras

I. TITULUA

Xedapen orokorrak

1. artikulua. Ezaugarriak eta irizpideak.

Asociación Navarra Sin Fronteras irabazi-asmorik gabeko erakunde bat da eta Nafarroako Foru Komunitatean egoera ahulean dauden pertsonak birgaitu eta gizarteratzea du xede.

Hona hemen elkarteko zerbitzuak behar bezala funtzionatzeko irizpideak:

-Egoera ahulean dauden pertsonei laguntzea da gure jardunaren xedea.

-Langile guztiek ezagutu eta bere egin beharko dituzte Zentroko Proiektuaren lerro eta printzipio oinarrizkoak, erabiltzaileen arauak eta ezarritako kalitate sistema.

-Ezinbesteko baldintza da taldean lan egitea, irizpideak bateratuz eta zereginak koordinatuz, komunikazio arin eta errazaren bidez.

-Erabilitako programak eta materialak zentroarenak dira eta hitzartutako epeetan itzuliko dira. Hortik kanpo erabiltzeko, zentroko zuzendaritzaren baimena beharko da.

-Langileak arduratuko dira esku-hartzeak barnean hartzen dituen hezkuntza zeregin guztiez.

2. artikulua. Langile eremua.

Araudi hau Asociación Navarra Sin Fronteras enpresan honako zerbitzu hauetan aritzen diren langile finko edo aldi baterakoei aplikatuko zaie:

-Gizarte gatazken eraginpeko adingabeei arreta osoa emateko Zerbitzua.

-Gizarte bazterketa egoeran dauden pertsonei arreta osoa emateko Zerbitzua.

-Gizartearekiko moldagaiztasuna duten helduei ingurune irekian lagun egiteko Zerbitzua.

-Gizarteratzeko lan Zerbitzua.

Langileen Estatutuan ezarritako kontratazio motetatik edozein erabiliko da. Ez zaie hura aplikatuko gizarte lanetan boluntario ari diren pertsonei eta Asociación Navarra Sin Fronteras elkartearekin zerbitzu-errentamenduko kontratuak dituzten enpresetako langileei. Prestakuntzarako praktiketan edo erlijio zerbitzuetan ari diren pertsonak ere haren aplikazio eremutik kanpo geldituko dira.

Halaber, eta lanean gainerako langileekin ari baldin badira ere, araudi honen aplikazio eremutik kanpo daude, espresuki, Asociación Navarra Sin Fronteras elkartearen arlo edo departamentuetako zuzendariak.

3. artikulua. Iraunaldia.

Araudi honek sinatzen den unetik 2013ko abenduaren 31ra arte izanen du indarra. Dena dela, soldataren kontuek 2010eko urtarrilaren 1etik aurrera izanen dute indarra.

Hitzarmen honen indarraldia bukatzean, beste hitzarmenik ezean, bere arauek segituko dute indarrean.

Langileen Estatutuko 85.3 d) artikuluan aurreikusitako ondorioetarako, hilabeteko aurreabisu epea egonen da lan hitzarmenaren amaiera iragartzeko.

II. TITULUA

Lanbide sailkapena

4. artikulua. Lanaren antolaketa.

Diziplina eta lanaren antolaketa enpresari dagozkio soilik, eta Langileen Estatutuan eta lan arloko gainerako xedapenetan ezarritakoari lotuko zaizkio.

5. artikulua. Langileen sailkapena.

Langileak, betetzen duten lanaren arabera, lanbide talde, kategoria edo maila hauetakoren batean sailkatuko dira:

1. taldea.-Teknikariak.

-Psikologoa.

-Gizarte langilea.

-Hezitzailea.

-Hezkuntza laguntzailea.

2. taldea.-Administrazioko langileak.

-Administrari-ofiziala.

-Administrari laguntzailea.

3. taldea.-Zerbitzuetako langileak.

-Etxeko arduraduna.

-Etxeko laguntzailea.

-Garbitzaileak eta sukaldeko langileak.

-Segurtasun zaintzailea.

-Zerbitzuetako bestelako langileak: laguntzaileak.

Artikulu honek biltzen dituen talde, kategoria eta mailak zerrenda hutsa dira eta ez dira lanpostu guztiak zertan beterik egon. Orobat, eginkizunen atxikimendu zehatza egin eta talde, kategoria eta maila berriak sartzen ahal dira.

Kategoria bakoitzean aritzeko eskatuko den titulazioa sinatutako lan hitzarmenetan ezarritakoaren araberakoa izanen da. Lan hitzarmen horietan lanbide kategoria batean aritzeko beharrezko gutxieneko eskakizun akademikoak aldatzen direnean, elkarteak aldez aurretik kontratatutako langileen gaikuntzarako epeak eta balizko baliabideak zaindu eta negoziatuko ditu.

Epe hori amaitutakoan ukitutako langileak eskakizun akademiko berrietara egokitzerik izan ez badu, negoziazio prozesua abiaraziko da, lanpostu hutsak daudenean eta lanpostuaren profila betetzen denean langileak beste lanpostu batzuetan kokatzeko, elkartean egon den lan harremanaren jarraipena bermatu gabe.

6. artikulua. Kategorietako eginkizunen definizioa.

1. taldea.-Teknikariak

Psikologoa.

Behar den titulazioa izanik, bere lanbide profilarekin zerekusia duten gaien aplikazioaz eta esku-hartzeaz arduratuko da.

-Erabiltzaileari abegi egitea zentrora iristen denean.

-Hasierako txostena eginen du, non diagnostikoa adieraziko baitu; horren arabera bideratuko da egin beharreko lana.

-Esku hartzeko plana egitea, norbanakoen eta taldearen beharrei erantzunez.

-Banakako eta taldeko terapia psikologikoa.

-Erabiltzailearen inguruan esku hartzen duten profesionalekin koordinatzea.

-Profesionalen prestakuntza.

-Erabiltzailea zentrotik alde egiteko prestatzea.

-Enpresari aholku ematea erabiltzaileen gainean.

-Enpresako kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak betetzea.

Gizarte langilea.

Behar den lanbide kualifikazioa edo titulua izanik, lan hauek egiten ditu:

-Erabiltzaileari abegi egitea zentrora iristen denean.

-Haren familia-historiaren diagnostikoa.

-Esku-hartzeko plana egitea.

-Eskatzen zaizkion txostenak egitea.

-Buruz buruko elkarrizketak erabiltzaileekin eta haien senideekin.

-Erabiltzailearen inguruan esku-hartzen duten profesionalekin koordinatzea.

-Aisia eta lan programak proposatzea.

-Plan ekonomiko pertsonala egitea.

-Kudeaketak egiten laguntzea.

-Zentrotik alde egiteko prestatzea.

-Enpresako kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak betetzea.

Hezitzailea.

Behar bezalako titulua edo baldintzak izanik, zentroan bizi edo kanpotik etortzen diren erabiltzaileen hezkuntza integralaz arduratzen da, haien beharrak asetzen ditu, prestakuntza edo lan jardueretan laguntzen du eta ordena zaintzen du, eta eginkizun hauek betetzen ditu:

-Banakako proiektuak biltzen dituen jarduerak planifikatu, programatu eta ebaluatzea, egoitzako koordinatzailearekin eta talde teknikoarekin bat.

-Eguna egituratzea.

-Eguneroko bizitza antolatzea: tokien zainketa, bakarkako eta taldeko jarduerak, aisia, familiarekiko harremanak.

-Zentroko proiektua eta erabiltzaileen araudia betetzea.

-Portaera arazoak eta ikasketen gainekoak konpontzea.

-Indartze programak egitea.

-Erabiltzaileak programetan parte hartzera bultzatu eta motibatzea.

-Prestakuntza eta lan programak prestatu eta gauzatzea.

-Prestakuntzan, lanean eta aisian erabiltzen diren materialak inbentariatu eta zaintzeko ardura du.

-Mezu hezitzaile koherentea ematea.

-Gainerako profesionalekin koordinatzea.

-Egoitzako koordinatzailearen jarraibideak betetzea.

-Erabiltzaileei lagun egitea, behar den guztietan.

-Egoiliarrak Foru Komunitateko edo kanpoko tokietara eramatea.

-Eraikinen egoera ona zaintzea.

-Instalazioetako ordena zaintzea.

-Enpresako kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak betetzea.

Hezkuntza laguntzailea.

Erabiltzaileei laguntza eta arreta emateko askotariko eginkizunak betetzen dituen langilea da. Egoitzako koordinatzaileak ezarritako hezkuntza jarraibideak betetzen ditu, agintzen zaizkion hezkuntza lanak egiten ditu, ordena zaintzen du, Zentroko Proiektua eta erabiltzaileen araudia betetzen ditu, erabiltzaileei lagun egiten die kanpora joaten direnean, eta enpresako kalitate sisteman ezarritako eginkizun eta erantzukizunak eta bere karguagatik eta erantzukizunagatik dagozkion besteak edo hezitzaileak eta goragokoek ezartzen dizkiotenak betetzen ditu.

2. taldea.-Administrazioko langileak

Administrari-ofiziala.

Behar den prestakuntza izanik, beste batzuek gainbegiraturik baina ekimen zabalaz baliatuz, zentroko langile eta baliabide materialen tramitazio administratiboa antolatu eta burutzen du, zentroan berean eta hortik kanpo. Harrera kudeatu, kobrantza eta ordainketak eraman, posta lanak egin, kontabilitateko oharrak, likidazioak, txostenak eta estatistikak egin eta kalitate sisteman ezarritako beste eginkizun eta erantzukizun batzuk eta bere karguagatik bere erantzukizunagatik dagozkionak egiten ditu.

Administrari laguntzailea.

Beste batzuek gainbegiraturik, ekimen eta erantzukizun mugatuez baliatuz, zentroko langile eta baliabide materialen tramitazio administratiboa burutzen du, zentroan berean eta hortik kanpo. Harrera kudeatu, kobrantza eta ordainketak eraman, posta lanak egin, kontabilitateko oharrak, likidazioak, txostenak eta estatistikak egin eta kalitate sisteman ezarritako beste eginkizun eta erantzukizun batzuk eta bere karguagatik bere erantzukizunagatik dagozkionak egiten ditu.

3. taldea.-Zerbitzuetako langileak

Etxeko arduraduna - Etxeko laguntzailea.

Egoitzetan erabiltzaileen elikadura, higienea, garbitasuna eta arropak antolatu, kontrolatu eta burutzeko ardura du, erabiltzaileen adinerako eta osasun egoerarako menu egokiak prestatzen ditu, janari eskabideak proposatu eta egiten ditu, sukaldeko materiala eta arropak berritzeko erosketak proposatu, inbentarioa zaindu, eta kalitate sisteman ezarritako beste eginkizun eta erantzukizun batzuk eta bere karguagatik bere erantzukizunagatik dagozkionak egiten ditu.

Garbitzaileak eta sukaldeko langileak.

Zentroko gelak garbitzen ditu. Horretaz gainera, jostura, garbiketa, plantxatze, sukaldaritza eta jantoki zerbitzuez ere arduratuko da. Gainera, enpresako kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak beteko ditu.

Segurtasun zaintzailea.

Ezarritako segurtasun arauak betetzen eta betearazten ditu, langile eta erabiltzaileen osotasun pertsonala mantentzeko, eta instalazioak zaintzen ditu.

Kategoria guztietarako xedapena.

Artikulu honetan lanbide kategoria bakoitzarentzat adierazi diren eginkizun eta lanak adibide moduan jarri dira. Hortaz, langile guztiak gainean dituzten agintariek agintzen dizkieten bestelako lan eta eginkizunak egitera behartuta daude, hemen adierazi ez badira ere, betiere beren eskumen eta kategoriaren barrenekoak baldin badira.

7. artikulua. Eginkizunen araberako kategoriak.

Lan funtzionalak dira langile batek denbora mugatuan egiten dituenak, (urtero berritzen da) zuzendaritzak berariaz izendatuta. Ezarritako eginkizunak amaituta, ez da inolako eskubiderik finkatuko eta langileak bere kontratuari eta lanbide kategoriari dagozkien lanak egiten segituko du.

-Zerbitzuko koordinatzailea. Zuzendariak zerbitzu baten buru izendatzen duen pertsona.

-Arlo psikologikoko koordinatzailea. Zuzendariak arlo horren buru izendatzen duen pertsona, arlo horretako langileak koordinatzen dituena.

-Prestakuntza eta lan koordinatzailea. Zuzendariak izendatzen duen pertsona, eremu akademikoetan, lan eremuetan edo lan-aurrekoetan, egoitzetako erabiltzaileak koordinatuko dituena eta bakoitzaren prestakuntza edo lan profila eginen duena.

-Egoitzako koordinatzailea. Zuzendariak egoitza edo zentro bateko buru izendatzen duen pertsona.

-Etxebizitzako koordinatzailea. Zuzendariak etxebizitza baten buru izendatzen duen pertsona.

-Barneko prestakuntza arloko arduraduna. Zuzendariak izendatzen duen pertsona, erabiltzaileen barne prestakuntza gidatzeko.

-Arriskuen prebentzioko arduraduna. Zuzendariak prebentzio arloko buru izendatzen duen pertsona.

8. artikulua. Lanpostuen mugigarritasuna.

Goragoko kategoriako lanak. Zentroaren beharrak direla-eta langile batek bere kontratua baino goragoko lanbide kategorian aritu beharra duenean. Kategoria horretako ordainsariak jasotzeko eskubidea izanen du egoera horretan dagoen bitartean.

Beheragoko kategoriaren lanak. Enpresaren beharrak direla-eta langile batek beheragoko kategoriako lanak egiten dituenean. Behar-beharrezkoa den denboran baino ez ditu halako lanak eginen, eta bere kategoria, ordainsariak eta gainerako eskubideak mantenduko zaizkio.

9. artikulua. Lanbide sustapena.

Enpresan hutsik dauden lanpostuak, enpresak berak erabikita, bete edo amortizatzen ahalko dira, hala baderitzo, lanaren, garapen teknologikoaren eta komenigarri egiten duten bestelako inguruabarren arabera.

Hiru modu izanen dira lanpostu hutsak betetzeko: enpresak egindako izendapen librea, merezimendu bidezko barne igoera eta kontratazio berriak.

Arlo teknikoetako eta administrazioko lanpostuak eta, eskuarki, agintaritza edo konfiantza eta erantzukizun berezia behar dutenak, enpresaren egituraren edozein mailatan, izendapen libreen edo kontratazio berrien bidez beteko dira.

Barne igoera. Lanpostu berriren bat sortu edo langileren batek bere lanpostua hutsik uzten duenean, hartarako gaitasuna duten plantillako langileei eskainiko zaie, baldin eta lanpostu horretarako eskatzen diren prestakuntza, gaitasun eta merezimendu baldintzak betetzen dituen langilerik badago. Enpresak lanposturako egokiena iruditzen zaion langilea izendatuko du hautagaien artetik. Enpresaren iritziz plantillako inork ez badu gaitasunik bete behar den lanpostuan aritzeko, kontratazio berri baten bidez beteko da.

III. TITULUA

Lanbide sailkapena

10. artikulua. Kontratuak.

Langilearen eta enpresaren arteko kontratazio librearen bidez sartuko dira langileak. Kontratua mota hauetakoa izan daiteke:

a) Langile finkoa: denbora mugarik gabeko kontratua.

b) Behin-behinekoa: denboraldi jakin baterako kontratua, lan behin-behinekoak, aldi baterakoak edo bereziak egiteko. Gehienez ere 6 hilabetekoa izanen da 12 hilabeteko tartean, aipatu diren arrazoiak sortzen direnetik hasita.

c) Bitarteko langilea: egoera hauetako batean dauden langileen ordez aritzeko kontratua: lanerako ezintasun iragankorra, oporrak, baimenak, lanpostuaren erreserba dakarren eszedentzia edo, langilea kanpoan egonda, enpresak lanpostua gorde behar dion beste egoera bat.

d) Praktikak: kontratu honen bidez edozein lanbide kategoriatan kontratatzen diren langileen ordainsaria kasuan kasuko kategoriarentzat finkatutako soldataren %80 izanen da lehenengo urtean eta %90 bigarren urtean.

11. artikulua. Probaldia.

Langile sartu berriek 3 hilabeteko probaldia eginen dute. Probaldian bi aldeetako edozeinek bertan behera uzten ahal du lan harremana, kalte-ordainerako eskubiderik gabe eta aurrez jakinarazi beharrik izan gabe.

Probaldian langileari lanerako ezintasun iragankorra suertatzen bazaio ere, aldi hori ez da etenen.

12. artikulua. Lan kontratuaren amaiera.

Lan kontratua amaituko da Langileen Estatutuaren 49. artikuluan ezarritako arrazoietako edozeinengatik.

Nafarroako Gobernuko departamentuek itundu edo diruz lagundutako programei lotuta egiten diren kontratu guztiak programa horien iraupenaren mende egonen dira beti.

Lanpostua utzi nahi duen langileak gutxienez ere hilabete lehenago jakinarazi behar du, teknikaria bada, edo hamabost egun lehenago, gainerako kategorietan.

Aurreabisu horren epea ez betetzeak azken likidazioan eta kitapenean kenketa bat ekarriko du, eta haren balioa aurreabisua egin behar zuenetik egin duenera bitarteko egunei dagokien lansaria adinakoa izanen da.

13. artikulua. Erretiroa aldez aurretik hartzea.

Enpresak, unean uneko lege indardunei jarraikiz, erretiroa aldez aurretik hartzeko aukera emanen die egoera horretan dauden langileei.

Nafarroako Gobernuko departamentuek itundu edo diruz lagundutako programei lotuta egiten diren kontratu guztiak programa horien iraupenaren mende egonen dira beti.

IV. TITULUA

Lan osasuna

14. artikulua. Laneko segurtasuna eta osasuna.

Une bakoitzean indarra duen legeriak agintzen duenari jarraituko zaio, eta, bereziki, Laneko Arriskuei Aurrea Hartzeko Legeak eta hura garatzen duten arauek ezarritakoari.

Urtero, lehen hiruhilekoan, Osasun eta Segurtasun Batzordean txostena eginen da enpresak aurreko urtean egindako lanari buruz.

15. artikulua. Laneko arropa.

Zerbitzu Orokorretako langileei beren eginkizunetarako arropa eta oinetako egokiak emanen zaizkie urtean behin eta bidezko arrazoi justifikatuengatik behar dituzten guztietan.

V. TITULUA

Lanaldia, oporrak, lizentziak eta eszedentziak

16. artikulua. Lanaldia.

Benetako 1.695 orduko lanaldia ezarri da urteko, langile guztientzat.

17. artikulua. Lan egutegia.

Urtero, lehen hiruhilekoan, zentroaren beharren arabera, eta langileen ordezkariei entzun ondoren, enpresak lan egutegia prestatuko du. Bertan jasoko dira enpresaren zentro eta zerbitzu guztietako txandak, ordutegiak eta lan egunak.

18. artikulua. Oporrak. Langile guztiek urtean 30 egun naturaleko opor ordainduetarako eskubidea izanen dute. Horietatik 15, langileak nahi duenean hartuko ditu. Nolanahi ere, zerbitzuaren beharrak bermatu beharko dira.

Oporretako txanden egunak urtero finkatuko dira, lehen hiruhilekoan, betiere oporrak hasi baino bi hilabete lehenago gutxienez.

Urte naturalean kontratatutako langileek lan egiten duten denborari proportzioan dagozkion opor-egunak izanen dituzte.

Oporrak, horiek hartzean langileak kobratzen duen benetako soldataren arabera pagatuko dira.

19. artikulua. Aldi baterako ezintasuna oporretan.

Aldi baterako ezintasuneko prozesu baten ondorioz, langile batek oporrik hartu ezin baditu, haietarako eskubidea izanen du medikuaren senda agiria hartu eta lanera itzultzen denean. Ukitutakoak eta enpresak adostuta finkatuko da noiz hartu opor horiek.

Enpresaren opor-egunen egutegiaren arabera finkatutako oporraldiak bat egiten badu langile baten haurdunaldiaren edo erditzearen ondoriozko edo bularra emateko aldi baterako ezintasun egoera batekin edo Langileen Estatutuaren 48.4 artikuluan ezarritako lan kontratua eteteko aldiarekin, langileak eskubidea izanen du opor-egunak ABE edo dagokion baimena bukatutakoan edo kontratuaren etenaldia bukatutakoan hartzeko, urte naturala bukatu bada ere.

20. artikulua. Aparteko orduak.

Aparteko ordutzat joko dira ezarritako urteko lanalditik gora egiten direnak. Bi aldeak prest agertu dira aparteko orduak murrizteko. Ezinbesteko kasuetan bakarrik eginen dira, zentroaren ezaugarrien arabera, deuseztatu ezin diren programak zerbitzurik gabe gera ez daitezen.

Aparteko orduak egin behar badira, atseden denboraz edo diruz konpentsatuko dira -bi aldeak ados jarrita-, dagokion ordu arruntaren konpentsazio baliokidearen bidez.

Horiek hartzen ahalko dira elkarteari eta langileei komeni zaienean, adostuta.

21. artikulua. Baimen ordainduak.

Langileek, ahalik eta denbora gehienarekin aldez aurretik aurreabisurik eta ondoren justifikatu beharrarekin, zilegi dute lanpostuan ez egotea, indarreko benetako lansaria eskuratzeko eskubidea galdu gabe, honako arrazoi hauetakoren bat tartean denean, eta kasu bakoitzean adierazten den denboraz:

a) Ezkontza: 15 egun natural.

b) Haur baten jaiotza: 4 egun natural, gertaera eragilea sortu den unetik beretik.

c) Heriotza:

-Ezkontidea eta seme-alabak: 4 egun natural.

-Gurasoak: 3 egun natural.

-Anai-arrebak, aiton-amonak eta bilobak: 2 egun natural.

-Koinatu-koinatak (koinatu-koinaten senar-emazteak edo anai-arreben koinatu-koinatak izan ezik), aitaginarreba-amaginarreba eta suhi-errainak: egun natural bat.

d) Eritasun larria, ospitaleratzea edo prozesu larri baten ondoriozko ebakuntza:

-Ezkontidea eta seme-alabak: 3 egun natural.

-Gurasoak: 2 egun natural.

-Anai-arrebak, aiton-amonak eta bilobak: egun natural bat.

-Koinatu-koinatak (koinatu-koinaten senar-emazteak edo anai-arreben koinatu-koinatak izan ezik), aitaginarreba-amaginarreba eta suhi-errainak: egun natural bat.

e) Ohiko bizilekuz aldatzea (ezkontzaren ondoriozkoarekin bat ez badator): egun bat.

f) Gurasoen, seme-alaben edo anai-arreben ezkontza: egun natural bat.

g) Beharrezkoa den denbora, langilea Gizarte Segurantzako familia medikuaren zein espezialisten kontsultara joateko, edo birgaikuntza tratamendu mediko-funtzionalak egiteko, kontsulta horietara lan orduetatik kanpo joaterik ez bada. Gehienez ere 8 ordu urtean.

h) Elkartean gauzatzen duten lanari zuzenean lotutako lanbide sustapeneko arloetako azterketak eta gainerako ebaluazio probak egiteko beharrezko denbora. Horretarako, urtean 5 egun emanen dira, gehienez.

i) Publikoa edo pertsonala den eginbehar saihestezina betetzeko: behar-beharrezkoa den denbora.

j) Eginkizun sindikaletan edo langileen ordezkaritza lanetan aritzeko denbora, legeetan ezarritakoari jarraikiz.

k) Bederatzi hilabetetik beheitiko semeari edo alabari esnea ematen dioten emakumezko langileek eskubidea dute lanetik ordubetez lekutzeko. Denbora hori bi zatitan bana dezakete. Emakumezko langileak eskubide hori ohiko lanaldiaren ordu erdiko murrizketarekin ordezka dezake, hala nahi badu, helburu berbererako. Eskubide hori amak nahiz aitak baliatzen ahal dute, beren nahierara, biak lanean ari badira.

Ospitalizazioaren kasuan, egoerak irauten duen bitarte guztian izanen da baimena hartzeko aukera. Langileak ezein kasutan ezin izanen ditu hartu, gozamen geroratuaren sistema berri honen bidez, gertaera eragilearen ondotik egokitu izanen litzaizkiokeenak baino lanegun gehiago.

c) eta c) bis ataletako kasuetan arrazoi horiek direla-eta langileak Foru Komunitatetik kanpora joan behar badu, lizentzia hori egun natural bat luzatuko da alboko probintzien kasuan, eta 2 egun natural gainerakoetan.

a) eta e) bitarteko ataletako lizentziak, biak barne, egun naturaletan kontatuko dira eta, c) ataleko ospitaleratzeetarako eta eritasun larrietarako egindako oharraren kasuan salbu, gertaera eragilea sortu den unetik beretik hartuko dira.

Ezkontidea aipatzen den guztietan, balio berekoa izanen da langilearekin bikotekide egonkor gisa bizi den pertsona, gutxienez urtebete lehenagotik elkarrekin bizi badira, eta betiere bizilekua duen udalaren ziurtagiriaren bidez frogatzen badute.

22. artikulua. Eszedentziak.

Zentroan gutxienez lau urteko antzinatasuna duten langileei urtebeteko borondatezko eszedentzia hartzeko aukera eman eta lanpostua gorde behar zaie.

Zuzendaritzak ez du eszedentzia onartu beharrik izanen, baldin eta hura eskatzen den momentuan eszedentzian dauden enpresako langileak ehuneko 5 baino gehiago badira.

Eszedentzia hasi baino hilabete lehenago eskatu behar da beranduenik, eta lanera itzultzeko eskaera ere eszedentzia amaitu baino hilabete lehenago egin behar da.

Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero.

23. artikulua. Prestakuntza.

Enpresako langile guztiek prestakuntzarako eskubidea dute. Enpresak agindutako prestakuntza bada, hark ordainduko ditu gastuak, eta prestakuntzan ematen den denbora lan denboratzat hartuko da ondorio guztietarako.

VI. TITULUA

Baldintza ekonomikoak

24. artikulua. Soldataren egitura eta ordainsariak emendatzea.

1. Soldaten egitura hauxe da: oinarrizko soldata, aparteko eskersariak, eta 7. artikuluan aipatutako aldi baterako eginkizunengatik jasotzen den lanpostuko osagarria.

2. Oinarrizko soldata. Denbora-unitateko ordainsari finkoa da. Hitzarmen honen eranskin bakarrean oinarrizko soldataren zenbatekoa ezarri da 2009rako. Benetan egindako lanaldia nahiz ezarritako atsedenaldiak ordainduko dira.

3. Aparteko eskersariak. Enpresako langile guztientzat aparteko bi eskersari ezarri dira, udakoa eta Eguberrietakoa. Bakoitza hileko oinarrizko soldata adinakoa izanen da.

Aparteko eskersari horiek uztailean eta abenduan ordainduko dira, egunean indarra duten zenbatekoei jarraikiz eta egindako lan denboraren proportzioan.

Eskersari horien sorrarazpena seihileko naturalekoa izanen da bi kasuetan, eta haiek ordaindu, kontatu eta likidazio, hasiera edo bukaeretarako hainbanatzeko, urtarrilaren 1etik ekainaren 30era hartuko da udako eskersariaren kasuan eta uztailaren 1etik abenduaren 31 bitarte Eguberrietako eskersariaren kasuan.

4. Lanpostuko osagarria. Eranskineko tauletan eginkizunen araberako kategorietarako ezarritakoa da, eta agindutako eginkizuna betetzen den bitartean jasoko da.

5. Langileen Estatutuaren 26.4 artikuluan xedatutakoari jarraikiz, hitzarmen honetan ezarrita dauden ordainsari guztiak gordinak dira.

Eranskineko soldata tauletan ageri diren zenbateko guztiak lanaldi osoei dagozkie.

25. artikulua. Bidaia gastuak eta kilometro-ordaina.

Langile guztiek, lanbide kategoria edozein dutela ere, dagozkien eginkizunen barreneko kudeaketaren bat zentrotik kanpora egin behar dutenean, enpresaren ibilgailua erabiliko dute lehentasunez, edo, halakorik ezean, beren ibilgailua.

Era berean, erabiltzaileei zuzeneko laguntza ematen dieten langileek, dagozkien eginkizunen barrenean, egoiliarrak nonbaitera eraman behar badituzte, joan-etorri horiek gidari eta/edo laguntzaile gisa eginen dituzte, lehentasunez enpresaren ibilgailua erabiliz, edo, halakorik ezean, beren ibilgailua.

Zentroko langileek beren lanaren ondorioz joan-etorriak egin behar dituztenean, bidaia gastuak (langileak etxetik lantokira eta alderantziz egiten dituen bidaiak izan ezik), ostatu eta otordu gastuak enpresak ordainduko ditu osorik, langileak egiaztagiriak aurkeztu eta gero.

Enpresaren beharrak direla-eta langileak bere ibilgailua erabiltzen badu arestian aipatutako joan-etorrietan, kilometro bakoitzeko 0,25 euroko kalte-ordaina jasoko du.

-Lansarien gehikuntzak:

Eranskinean ezarritako ordainsarien urteroko igoerak, etorkizunean, enpresaren zerbitzua jasotzen duten Nafarroako Gobernuko departamentuen aurrekontu-aplikazioen gehikuntzen mende egonen dira.

Erreferentzia gisa, urtez urte kontuan hartuko da Nafarroako kontsumorako prezioen indizearen bilakaera.

VII. TITULUA

Hobekuntza sozialak

26. artikulua. Ezintasun iragankorreko ordainsaria.

Enpresak langilearen ordainsariak osatuko ditu egiazko soldataren ehuneko 100 berdindu arte, baldin eta medikuaren baja-agiriak aurkezten badira.

27. artikulua. Erantzukizun zibileko asegurua.

Enpresak erantzukizun zibileko poliza itunduko du bere langileentzat, lanaren ondorioz gerta litezkeen erantzukizunak estaltzeko.

28. artikulua. Bizi eta istripu asegurua.

Enpresak istripu poliza itunduko du, istripuz langilea hil edo ezintasun iraunkor oso edo erabatekoa suertatuz gero 42.075 euroko estaldura ekonomikoa eskainiko duena.

29. artikulua. Mantenua.

Enpresarekin ados jarrita jantokiko zerbitzua erabiltzen duten langileek zerbitzu horretarako ezartzen den prezioa ordaindu beharko dute.

30. artikulua. Norberaren aferak.

Langile bakoitzak egun bat hartu ahal izanen du bere aferetarako, baina ez dute batek baino gehiagok aldi berean hartuko. Enpresari aurreabisua emanen diore ahalik lasterren, gutxienez ere bi lanegun lehenago.

VIII. TITULUA

Diziplina araubidea

Zentroko zuzendaritzak zehapenak jartzen ahal dizkie langileei, lanean hutsegiteak egiteagatik, artikulu hauetan ezarritako hutsegiteen eta zehapenen mailaketari jarraikiz.

31. artikulua. Hutsegiteak.

Hiru hutsegite mota ezarri dira langile guztientzat: hutsegite arinak, hutsegite larriak, hutsegite oso larriak.

A.-Hauek dira hutsegite arinak:

1. Lankideenganako errespetu edo begiramendu falta.

2. Puntualitate falta, arrazoirik eman gabe, enpresak ezarritako ordutegiaren arabera, hiru aldiz hilabete batean gehienez. Langilea zentrora berandu ailegatu dela ulertuko da lanaldiaren hasieratik ordu bat pasa baino lehen joaten denean.

3. Eguneko lanaldia garaia baino lehen bukatutzat ematea bidezko arrazoirik gabe, hogeita hamar egunean behin.

4. Aldi baterako ezintasun kasuan, baja-agiriak edo baja berresteko agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familiarrari buruz zergen eta Gizarte Segurantzaren ondorioetarako garrantzitsuak izan daitezkeen datuak ere.

B.-Hauek dira hutsegite larriak:

1. Hilabete berean lanera hiru aldiz baino gehiagotan berandu joatea, bidezko arrazoirik gabe.

2. Bidezko arrazoirik izan gabe lanera ez joatea, hogeita hamar eguneko epean hiru aldiz baino gutxiagotan.

3. Eguneko lanaldia garaia baino lehen bukatutzat ematea bidezko arrazoirik gabe, hogeita hamar egunean bi aldiz.

4. Zabarkeriaz jokatzea zentroko funtzionamendu arauei edo norberaren eginkizunei dagokienez.

5. Lantokian lankideekin eztabaidan aritzea jendaurrean, erabiltzaileen aurrean beren hezitzailearen irudia gutxiesteko moduan.

6. Diziplinarik edo obedientziarik eza lanean.

7. Hutsegite arin bera errepikatzea hirurogei egunean.

C.-Hauek dira hutsegite oso larriak:

1. Hilabetean hamar aldiz baino gehiagotan edo hiru hilean hogei aldiz baino gehiagotan berandu iristea bidezko arrazoirik izan gabe.

2. Hogeita hamar egunean, bidezko arrazoirik izan gabe, hirutan edo gehiagotan lanera ez joatea.

3. Eritasuna edo istripua simulatzea.

4. Lana bertan behera uztea.

5. Errespetu falta larriak eta tratu txarrak, hitzezko zein egitezko, enpresako edozein kideri edo programen erabiltzaileei.

6. Diziplinarik eza, desobedientzia edo zabarkeria larria zentroko funtzionamendu arauei edo norberaren eginkizunei dagokienez.

7. Iruzurra, leialtasun eza eta konfiantza abusua agindu zaizkion eginkizunetan.

8. Enpresaren edo lankideen ondasunak lapurtu edo ebastea.

9. Sei hilabetean hutsegite larri bat baino gehiago egitea, nahiz eta mota ezberdinetakoak izan, baldin eta haien ondorioz zehapena egon bada.

10. Langileen Estatutuaren 54.2 artikuluaren arabera langilea kaleratzeko bidezko arrazoia den beste edozein jokabide.

32. artikulua. Zehapenak.

Hutsegiteen kalifikazioaren arabera enpresak ezartzen ahal dituen zehapenak hauek dira:

A.-Hutsegite arinengatik:

-Hitzezko kargu-hartzea edo kargu-hartze idatzia.

-Idatzizko kargu-hartzea.

-Gehienez bi eguneko enplegu-soldaten etenaldia.

B.-Hutsegite larriengatik:

-Hiru egunetik hogeira bitarteko enplegu-soldaten etenaldia.

C.-Hutsegite oso larriengatik:

-Hogeita bat egunetik hirurogeira bitarteko enplegu-soldaten etenaldia.

-Kaleratzea.

33. artikulua. Zehapenetarako prozedura.

Zehapen ororen berri, ahozko ohartarazpena salbu, idatziz emanen zaio langileari. Jakinarazpen horretan zehatz-mehatz esanen zaio zein izan zen eta noiz egin zuen hutsegitea, nolako kalifikazioa duen hutsegiteak eta zer zigor jartzen zaion. Halaber, enpresak hutsegite larri edo oso larriengatik jartzen diren zehapen guztien berri emanen die enpresako delegatuei.

34. artikulua. Hutsegiteen preskripzioa.

Hutsegite arinak hamar egunen buruan preskribatuko dira, larriak hogei egunen buruan eta oso larriak hirurogeiren buruan, enpresak hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.

35. artikulua. Batzorde mistoa.

Hitzarmen hau aplikatzean sor litezkeen zalantzak argitzeko, eta lan arloko agintariei dagokien eskumena deusetan galarazi gabe, batzorde bat eratuko da honako kide hauek osatua: lau kide, bi enpresako zuzendaritzak izendatuak, eta langileen bi ordezkari, hitzarmen honen negoziazioan parte hartu dutenen artetik hautatuak, ahal izanez gero.

ERANSKIN BAKARRA

EGINKIZUNEN ARABERAKO KATEGORIAK

Iragarkiaren kodea: F1012433