Iragarkia

107. ALDIZKARIA - 2010eko irailaren 3a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

808/2010 EBAZPENA, ekainaren 25ekoa, Arriskuen Prebentziorako eta Lanaren zuzendari nagusiak emana, Orikaingo "Polyone España, S.L." enpresaren lan hitzarmen kolektiboaren testua erregistratu eta Nafarroako Aldizkari Ofizialean argitaratzea erabakitzen duena (espediente zenbakia: 44/2010).

2010eko ekainaren 18an departamentu honetan sartu da ''Polyone España, S.L.'' enpresaren lan hitzarmen kolektiboaren testua, 18 artikuluz eta 4 eranskinez (2010eko ordainsarien taula) osatua, enpresaren ordezkariek eta enpresa batzordeak (ELA-STV eta CC.OO.) 2010eko ekainaren 8an izenpetua eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren arabera, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan harturik lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1. artikuluak ematen dizkidan eskudantziak erabiliz,

EBATZI DUT:

1. Orikaingo "Polyone España, S.L." enpresaren lan hitzarmen kolektiboa erregistratzea (kodea: 3107352) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau negoziazio batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Berrikuntza, Enpresa eta Enplegu Departamentuko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2010eko ekainaren 25ean.-Arriskuen Prebentziorako eta Lanaren zuzendari nagusia, Imelda Lorea Echavarren.

POLYONE ESPAÑA, S.L. ENPRESAK ORIKAINEN DUEN LANTOKIKO HITZARMEN KOLEKTIBOA

1. artikulua. Aplikazio eremua: Hitzarmen kolektibo honek "Polyone España, S.L." enpresak Orikainen duen lantokian izanen du eragina.

2. artikulua. Langile eremua: Hitzarmen hau ''Polyone España, S.L.'' enpresak Orikainen duen lantokian lan egiten duten langile guztiei aplikatuko zaie. Enpresako bulegoetako langileei (enplegatuei) eta Txandako buruaren kategoriakoak edo goragoko maila batekoak diren langileei ez zaizkie aplikatuko enpresak berak hautatzekoak diren lanpostuetako lansariei, lanaldiari eta lanpostuen betetzeari buruzko artikuluak.

3. artikulua. Iraunaldia: Hitzarmen honek hiru urteko iraupena izanen du; 2010eko urtarrilaren 1etik aurrera izanen ditu ondorioak eta 2012ko abenduaren 31n bukatuko da, baina luzatutzat joko da alderdietako batek haren amaiera idatziz iragartzen ez badu, bukatu baino hogeita hamar egun lehenago gutxienez, eta, betiere, enpresaren beste hitzarmen kolektibo bat onetsi arte.

Hitzarmenaren atzerako eraginetik kanpo dago 12. artikuluan araututakoa (Aseguru kolektiboa), manu horretan ezarritako ondorioak izanen baititu.

4. artikulua. Ordainsariak:

''Polyone España, S.L '' enpresak Orikainen duen lantokiko hitzarmen kolektiboaren hiru urteetako bakoitzeko ordainsariak hauek izanen dira:

a) 2010. urterako.

2010erako, hitzarmena indarrean den lehen urterako, %1,15-eko soldata igoera adostu da. 2010 urtea bukaturik, eta urte horretako egiazko KPI erreala ezaguturik, lansariak arautuko dira, 2010eko KPI erreala gehi %0,15-eko zenbatekoa lortu arte.

I. eranskinean 2010. urteko lansarien taulak ageri dira. Bertaratu guztiek sinatu dituzte taulak adostasuna adierazteko. Horrek ez du alde batera uzten lansari berrikuspena egin ahal izatea, aurreko lerroaldean ezarritako moduan.

Lansarien tauletan gaueko lanari dagokion ordainsaria ageri da, urtean ordaintzen ahal diren 455 egunetan ordainduko dena, tauletan ageri den zenbatekoaren arabera.

"Koloreen prima" deitzen denaren zenbatekoa lansarien tauletan ageri da, eta benetan lan egindako egun bakoitzeko ordainduko da. Biltegiko langileek Produkzioan lan egiteko prest egotearen ordainetan jasoko dute koloreen prima hori, bai eta plantan benetan egiten duten lanaren ordainetan ere, nahiz eta lantoki barrenean produkzioan aritu ohi diren langileek baino zenbateko txikiagoa jasoko duten.

Lansarien lehengo "Laneratze" eta "Pizgarri" osagarrien bateratzea "Hitzarmen plusa" izenekoan mantenduko da.

b) 2011. urterako.

2011 urterako, hitzarmena indarrean den bigarren urterako, igoera hau adostu da: 2010-12-31 egunean erregistratu den inflazio errealaren adinako igoera (2010eko ekitaldiari dagokiona) gehi %0,20.

c) 2012. urterako.

2012 urterako, hitzarmena indarrean den hirugarren urterako, igoera hau adostu da: 2011-12-31 egunean erregistratu den inflazio errealaren adinako igoera (2011ko ekitaldiari dagokiona) gehi %0,35.

Antzinatasunaren osagarria.

Antzinatasunaren osagarria aldian aldiko igoera bat izanen da eta enpresaren zerbitzura emandako denborarengatik jasoko da; bi hirurteko eta bost bosturteko izanen dira gehienez.

Hirurteko bakoitzeko zenbatekoa oinarrizko soldataren %5 izanen da eta bosturteko bakoitzeko oinarrizko soldataren %10, eskala honen arabera:

-Hirurteko bat: oinarrizko soldataren %5.

-Bi hirurteko: oinarrizko soldataren %10.

-Bi hirurteko gehi bosturteko bat: oinarrizko soldataren %20.

-Bi hirurteko gehi bi bosturteko: oinarrizko soldataren %30.

-Bi hirurteko gehi hiru bosturteko: oinarrizko soldataren %40.

-Bi hirurteko gehi lau bosturteko: oinarrizko soldataren %50.

-Bi hirurteko gehi bost bosturteko: oinarrizko soldataren %60.

5. artikulua. Aparteko pagak: Soldata osoaren %100aren pareko hiru aparteko paga ordainduko dira, lansarien tauletan azaltzen den moduan, aurreko artikuluan ageri diren gaueko orduaren prezioa barne, eta "koloreen prima" kontzeptua kanpoan utzita.

6. artikulua. Urteko lanaldia, laneko egutegia eta oporrak.

-Lanaldia.

Hitzarmenaren indarraldiko hiru urteetarako (2010-2012, biak barne), urtean 1.768 orduko benetako lanaldi erreala finkatu da langile bakoitzeko.

Lanaldiaren banaketan, hitzarmenaren indarraldiko urte bakoitzean, norberak hartzeko libre duen egun bat hartuko du langileak, berak eskatzen duen egunean, enpresaren produkzio beharrek uzten badute betiere.

Ogitartekoa jateko atsedenaldia (egunean 15 minutu) enpresaren kargura izanen da.

Langileak bere lanpostuan egiten dituen orduak hartzen dira benetako lan ordutzat; laneko denbora konputatzeko, kontuan hartzen da langileak eguneko lanaldiaren hasieran eta bukaeran bere lanpostuan egon behar duela.

Kontuan izanik jarduerarik gabeko egun baten ondoren produkzioari berriz ekiteko beharrezkoa dela instalazioak bi ordu lehenago jartzea martxan, enpresako zuzendaritzak errotazio sistema bat ezarriko du goizeko txanda duten langileen artean (boluntariorik ez bada), lanean goizeko lauretan hasteko. Ordu horretan instalazioak martxan jarriko dituzte eta, gero, ohikoa duten lanaldi osoa beteko dute. Horren ordainetan, bi ordu horiek "lanaldiaren luzapeneko plus" (LLP) gisa ordainduko zaizkie, aparteko orduen prezio berean.

-Lan egutegia.

2010eko lan egutegia hitzarmen honen eranskinean ageri da.

-Oporrak.

Arau orokorra.-Urteko oporrak egun hauetan hartuko dira:

Uztailaren 6tik 14ra, biak barne.

Gainerakoak: abuztuan, errotazioko bi txanda ezarrita, horrela hilabete horretan gutxienez ere txanda batekin lan egin dadin.

Arau orokorreko salbuespenak. ''Non-stop'' lan erregimena duten makinek eta instalazioek (gaur egun "Beltza B1", "Zuria A2" eta "Zakuratzekoa") ez dute produkzio etenik izanen urte osoan, 7. artikuluan aipatzen diren urteko sei egunetan izan ezik.

7. artikulua. ''Non-stop'' lan erregimena. "Beltza B1", "Zuria A2" eta "Zakuratzekoa" atalei dagokien instalazio eta makinetan lan erregimena bost txandatakoa edo ''Non Stop'' izanen da.

''Non-stop'' lan erregimenean ari diren langileek 15,14 euro jasoko dituzte egunean kontzeptu horrengatik; lansarien tauletan ageri da zenbateko hori, eta urteko 6.888,70 euroren parekoa da. Diru hori gaueko lanaren plusarekin batuta 9.368,45 euro ateratzen dira urtean.

Jaiegun izanen dira eta, beraz, bost txandatako erregimenean lanik gabekoak, urteko sei egun hauek: urtarrilaren 1a, uztailaren 6 eta 7a, eta abenduaren 24a, 25a eta 31.

''Non-stop'' lan erregimenean ari diren langileek konpromisoa hartu dute aparteko laurogei ordu egiteko, gehienez, urtean, horrela erregimen bereko beste langile bat ordezteko justifikatutako arrazoi batengatik lanera joaten ez denean, betiere lanera joan gabe 2 aste baino gehiago egiten ez baditu. Aparteko ordu horiek halako ordu gisa ordainduko dira, eta jaieguneko aparteko ordu gisa, berriz, larunbatetan, igandeetan, jaiegun ofizialetan eta sanferminetako astean lan egin behar denean.

8. artikulua. Aparteko orduak. Atsedena edo diruz ordaintzea.

Aparteko orduen ordaina atseden alternatiboz edo diruz ematen ahal da, langileak hautatzen duenaren arabera.

Aparteko orduak egiteari baietza ematen dion unean berean hautatu behar du langileak ordain mota, eta hautu horri erabat lotuta geldituko da.

Langileak atseden alternatiboa hautatzen badu, benetan egindako aparteko ordu bakoitzak 1,5 orduko atsedena izateko eskubidea emanen dio. Ordu horiek langileak eskatutako egunean eginen dira, nagusiak baimena ematen badu, batez ere plantako produkzio beharrak ikusita.

Aparteko orduak egiteagatik diru bidezko ordaina hautatuz gero, zenbateko hauek izanen dira:

Langileak aparteko orduak egiteko berariazko joan-etorria egin behar badu fabrikara, eranskinean joan-etorrien plusari dagokion zati proportzionala jasotzeko eskubidea ere izanen du. Eta, era berean, koloreen prima jasotzeko eskubidea izanen du (zenbatekoa eranskinean ageri da), aparteko lanegunean egindako denbora proportzionala zein den ikusita eta aparteko lana produkzioan ala biltegian egin den kontuan hartuta.

9. artikulua. Lanerako aldi baterako ezintasunaren osagarria. Aldi baterako ezintasun prozesuetan, arrazoia edozein dela ere (eritasun arrunta edo lanbidekoa eta laneko istripua edo lanetik kanpokoa), enpresak soldata erregulatzailearen %100 ordainduko du aldi bateko ezintasunaren lehen egunetik hasita, medikuaren alta jaso edo aldi bateko ezintasuna bukatu arte, dagokion prima barne, baldin eta ordainsariari dagokion urtearen aurrekoaren seihileko berean izandako absentismo portzentajeak (eritasun arruntaren edo lanbidekoaren eta laneko istripuaren edo lanetik kanpokoaren ondoriozko aldi baterko ezintasun prozesuetan) plantilla osoaren %6a gainditzen ez badu.

Ondorio horietarako, aldi bateko ezintasun prozesuak hiru hilabetetik gorakoak direnean ez dira absentismo gisa kontatuko.

Enpresan izandako absentismoa alde batera utzita, %100 ordainduko da bajaren lehen egunetik hasita, baja laneko istripuen eta lanbideko eritasunen ondoriozkoa denean.

Akordio honek atzerako eragina izanen du, 2006ko urtarrilaren 1etik aurrera; horregatik, berrikusi eginen dira egun horretatik aurrera izan diren aldi bateko ezintasun prozesuak, aurreko hitzarmeneko arauek ukitzen dituztenak.

10. artikulua. Joan-etorrien plusa.

2010. urterako, joan-etorrien plusak zenbateko hauek izanen ditu:

-Lanaldi jarraituan: 86,41 euro, urtean lanean egindako hamaika hilabeteetako bakoitzeko.

-Lanaldi zatituan: 172,82 euro, lanean egindako hamaika hilabeteetako bakoitzeko.

Joan-etorrien plusa soldataz kanpokoa denez, urteko hamabi hilabeteetako hamaikatan sortuko da.

11. artikulua. Lanbide kategoriak. Orain arte indarra izan duten lanbide kategoriak desagertu egin dira eta ondoko lanbide taldeetan sartu:

Kualifikaziorik gabeko langile guztiak "Bat" lanbide taldean (lehengo peoi kategorian) sartuko dira enpresan, eta lehenbiziko sei hilabeteak pasatu eta gero zuzenean sartuko dira "Bi" taldean, ondorio juridiko eta ekonomiko guztiekin, bai ordainsariei dagokienez bai talde horretako lanbide zerbitzuak emateari dagokionez.

Txandako buruek "Bost" taldeari atxikita segituko dute, hitzarmen honen 2. artikuluan adierazitakoa galarazi gabe.

"Bost" lanbide taldeko langileak (lehen txandako buruen lanbide kategoria) erantzukizun osoa izanen du makineriaren eta produkzioaren gainean eta, beraz, bere txandan lana antolatu eta banatzeaz arduratuko da.

"Lau" taldera igotzeko ezinbestekoa izanen da langileak horretarako gaitasuna izatea eta zenbait ekipamendu erabateko autonomia eta erantzukizunez erabiltzeko gai izatea, hain zuzen ere talde honetako 2, gutxienez: "B2-X-COMPOUND, APV-4094, APV-4116, Buss eta Zakuratze Automatikoa" eta talde honetako 1: "MARIS TM58-Pigmentuak eta A6/A7/A8 Grantzeadorak".

Hala, aurreko lerroaldean aipatutako balioaniztasuna eta autonomiaz eta erabateko erantzukizunez aritzeko gaitasuna badutela jadanik frogatu duten langileak "Lau" taldean sartuko dira, hitzarmena sinatzen den egunetik hasita.

"Lau" taldera igotzeko ezinbestekoa da lanpostu hutsen bat izatea, enpresan bost urteko antzinatasun etengabea izatea eta goian aipatutako baldintzak frogatzea. Baldintza horiek guztiak betez gero, langileak berariazko prestakuntza jasoko du 20 egunez gehienez. Prestakuntzaldiaren ondorengo 40 eguneko epean, langile eskatzaileak lana autonomiaz eta osoki behar bezala egiten duela frogatu beharko du, eta bere nagusiek adostasun txostena eman beharko dute, 4. taldean eskubide osoz sartu ahal izateko.

Gehienez ere langile bat egonen da prestakuntzaldian, enpresak bestelako irizpiderik ezartzen ez badu.

"Hiru" taldean sartzeko eskubidea izanen dute "Bi" taldean etenik gabe 18 hilabete gutxienez egon diren langileak, baldin eta langilezainaren eta produkzioko arduradunaren aldeko txostenik bada eta txosten horrek langilearen errendimendu, gaitasun eta balioaniztasunaren ondorioz onesten badu talde horretara igotzea.

12. artikulua. Aseguru kolektiboa: Enpresak aseguru kolektiboko poliza bat kontratatuko du bere kargura, enpresako langile guztien alde. Hamabost mila euroko (15.000) kapital aseguratua estaliko du eritasunaren ondoriozko heriotza izaten denerako, edo edozein lan motatan erabateko baliaezintasun iraunkorra izaten denerako eta ohiko lanbiderako ezintasun iraunkor osoa izaten denerako, eta hogeita hamar mila (30.000) istripuaren ondoriozko heriotzarako.

Enpresak ezin izanen du bermeen eta kapitalen igoera hori bermatu baldin eta, osasun egoeraren aitorpena dela-eta (eskatzen bada), aseguru konpainiak langile bat onartzeari uko egiten badio.

Hitzarmen hau sinatu eta hogeita hamar eguneko epean sinatu beharko da aseguru poliza, eta sinatzen den egunetik aurrera izanen du indarra.

13. artikulua. Erretiro berezia 64 urte betetzean: 64 urterekin erretiro berezia izan nahi duten langileek, 1194/1985 Errege Dekretuak ezartzen dituen baldintzetan, eskubidea izanen dute enpresak aipatu den arauan aurreikusitako kontratua sinatzeko, horrela 64 urterekin erretiro berezia lortzeko oinarri arautzailearen %100arekin.

Langileak idatziz egin beharko du horretarako eskaera, lortu nahi dituen ondorioen eguna baino hogeita hamar egun lehenago gutxienez.

14. artikulua. Erretiro partziala. Enpresak banan-banan aztertuko ditu 60 urtetik gorako langileek erretiro partziala lortzeko aurkezten dituzten eskaerak. Enpresaren (industria eta merkataritza) oinarri juridikoen eta interesen arabera erabakiko da kasu bakoitzari dagokiona.

Ez da Konpainiari kalte egiten ahal dion aplikazio orokorrik erabakiko. Erabakiak banan-banan hartuko dira.

15. artikulua. Ordaindutako baimenak. Lizentzia ordaindu hauek onartuko dira:

A) Langilearen ezkontzagatik 18 egun natural ezkontza egunetik hasita, baina langileak eskatuz gero ezkontza eguna baino egun bat edo bi lehenago hasten ahalko da lizentzia.

B) Gurasoak, seme-alabak edo ezkontidea hilez gero, langileak hiru egun natural izanen ditu ordainduta, ahal den neurrian aurrez abisatuta. Langileak, arrazoi horrengatik, lantokitik 250 kilometrora baino urrunago dagoen toki batera joan behar badu, egun bat gehiago izanen du joan-etorria egiteko.

C) Aitona-amonak, bilobak edo anai-arrebak hilez gero, langileak bi egun natural izanen ditu ordainduta, ahal den neurrian aurrez abisatuta. Langileak, arrazoi horrengatik, lantokitik 250 kilometrora baino urrunago dagoen toki batera joan behar badu, egun bat gehiago izanen du joan-etorria egiteko.

D) Haur bat jaioz gero, langileak hiru egun natural izanen ditu ordainduta, ahal den neurrian aurrez abisatuta.

Aurreko kasuetan, lizentzia ordaindua izanen da bai ezkonduentzat bai erregistro publikoetan edo hartarako sor daitezkeenetan erregistratzen diren izatezko bikoteentzat, edozein eremu geografikotan, edo, erregistro publikorik izan ezean, batera emandako notario-eskritura publiko baten bidez frogatzen direnentzat. Enpresaren aurrean dokumentu fede-emaile baten bidez frogatu beharko da ohiko ezkontza izan dela edo izatezko bikotea legez eratu dela.

E) Artikulu honetan aurreikusi ez diren kasuetan, Estatuko hitzarmen kolektiboan ezarritakoa aplikatuko da.

16. artikulua. Laneko arropa. Enpresak hondatzen direnean berrituko ditu langileen arropak.

17. artikulua. Prestakuntza orduak.-Orain arte aplikatutako irizpideari eutsiko zaio, hau da, enpresari dagokio, fabrikazio beharrekin bat, prestakuntza orduak hartzeko egunak ezartzea, prestakuntza lanalditik kanpokoa denean. Betiere, egun egiten den bezala, saiakera eginen da, ahal dela, atsedenaldirako egunak langilearen nahiekin bat etor daitezen. Halaber, enpresari aukera ematen zaio langileari eskain diezaion atsedenaldiaren ordez ordain ekonomikoa har dezala, eta ordain hori hauxe izanen da: hartu beharreko orduak bider lan ordu arrunt baten prezioa. Halakorik gertatzen bada, langileak aukeratuko du ordain bat edo bestea hartzea.

Nolanahi ere, eta lana ongi antolatzeko eta planifikatzeko, sorrarazitako orduak egin eta urtebetera likidaturik egon beharko dute.

18. artikulua. ''Polyone España, S.L.'' enpresak Orikainen duen lantokiko hitzarmen kolektibo honetan aurreikusita ez dagoen orotan, Estatuko hitzarmen kolektiboan ezarritakoa aplikatuko da eta, subsidiarioki, lan arloko legeria orokorrak ezarritakoa.

Eta adostasunaren eta onarpenaren frogagarri, ''Polyone España, S.L.'' enpresak Orikainen duen lantokiko hitzarmen kolektibo hau sinatu dute, hiru aletan, "ut supra" tokian eta egunean.

Polyone España, S.L.

-Jose Maria Bareche Valle jauna. NANa: 17.995.271-W.

Enpresa batzordea.

-Vicente Gonzalez Esperilla jauna. NANa: 18.191.770-N.

-David Martinez Nieto jauna. NANa: 72.689.656-L.

-Jose Ortega Martinez jauna. NANa: 33.416.240-T.

-Iker Arroyo Arrosagaray jauna. NANa: 72.671.024-V.

-Agustin Reina Pascual jauna. NANa: 15.849.801-H.

1,15%

POLYONE ESPAÑA, S.L.-Pertsona bakarreko sozietatea

Lansarien taulak 2010-1-1etik 2010-12-31ra

Ekoizpen atala.

Koloragarriak erabiltzeagatiko primak, lanaldiko

Bambury eta barne nahasgailua: 8,23 euro lan egindako egun bakoitzeko.

Tindaketa: 6,18 euro lan egindako egun bakoitzeko.

Iragarkiaren kodea: F1012470