Iragarkia

10. ALDIZKARIA - 2010eko urtarrilaren 22a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

CORTES

Arau Subsidiarioen aldaketa puntuala behin betiko onestea herrilurretako lurzatiei dagokienez, parke eolikoak
instalatzea baimendu ahal izateko

Cortesko Udalak, 2009ko abenduaren 21ean egindako ohiko bilkuran, aho batez erabaki zuen arau subsidiarioen aldaketa puntuala behin betiko onestea Cortesko 87, 89, 90, 91, 92, 93, 94, 95, 96, 97. 98, eta 102 herrilurretako lurzatiei dagokienez (La Atalaya, Valdenavarro, La Cadena eta Carratudela alderdiak), parke eolikoak instalatzea baimendu ahal izateko. Testua argitara ematen da oso-osorik, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 79.3 eta 81.1 artikuluetan ezarritakoari jarraikiz.

Cortesen, 2009ko abenduaren 22an.-Alkate-udalburua, Javier Blasco Mendívil.

Arau Subsidiarioen ALDAKETA PUNTUALAREN
BEHIN BETIKO ONESPENA

1.-Xedea.

Dokumentu honen xedea Cortesko udal plana aldatzea da, nekazaritza-produktibitate handiko lurzoru urbanizaezin gisa sailkatuta dauden ondoko poligono eta lurzatietan lurzoru urbanizaezina kategorizatzeari dagokionez, horietan parke eolikoak instalatzea baimendu ahal izateko:

Eremua mugatzen duten lurzatiak (ordenatuta)

2.-Sustatzailea.

Proposatutako planeamenduaren aldaketaren sustatzailea Gamesa Energía, S.A.U. enpresa da

3.-Proposamenaren deskribapena.

Proposatutako aldaketaren helburua hau da: definituta dagoen eta erantsitako dokumentazio grafikoan agertzen den esparru osoa gorde beharreko lurzoru urbanizaezin gisa sailkatzea, ustiapen naturalerako balioa duen lurzoruaren azpikategoriarekin, Lurraldearen Antolamenduari eta Hirigintzari buruzko abenduaren 20ko 35/2002 Foru Legean (aurrerantzean LAHFL) lurzoru urbanizaezinari buruz agertzen den kategorizazio berriaren arabera.

Lurzoru urbanizaezineko kategorien definizioa determinazio egituratzailea da eta lurzoru urbanizaezineko azpikategorien definizioa, berriz, determinazio xehakatua da.

4.-Aldaketaren esparruaren deskribapena.

Eremua Erribera eskualdean dago, Nafarroako probintziaren hego-ekialdean. Zaragozako probintziarekiko mugan. Zehazki, Ablitasko (Nafarroa) udal mugapearen iparraldean dago, Buñuel (Nafarroa) udalerriaren mendebaldean eta Mallén (Zaragoza) udalerriaren ekialdean.

Zehazki, kokalekua Cortes (Nafarroa) herriaren iparraldean dago. Perimetroaren hegoaldean Lodosako ubidea dago, eta iparraldean, Zaragoza-Castejon trenbidea.

Eraginpean dauden alderdiak La Atalaya, Valdenavarro, La Cadena eta Carratudela izenekoak dira.

Obrak iraun bitartean lurrak atontzeko lan hauek eginen dira: lurra mugitzea eta zelaitzea, bide berriak irekitzea eta daudenak atontzea, aerosorgailuen zimenduak irekitzea, lubetak hondeatzea eta aerosorgailuak muntatzeko plataformak eraikitzea.

Deskribatutako jarduera horien ondorioz ez da eremuaren morfologia berriro modelatuko. Dagoen morfologia aldatzen ez duten gainazal lauak, ezpondak eta, orokorrean, forma geometrikoak sortuko dira.

5.-Proposatutako aldaketaren justifikazioa.

Planeamenduaren aldaketak bi arrazoi ditu. Hasteko, sustatzaileak deskribatutako gunean parke eolikoa instalatzeko interesa duela; jarduera hori, bere dimentsioa eta ezaugarriak kontuan hartuta, lurzoru urbanizaezinean jarri behar da. Bigarrenez, Cortesko udal planak lurzatiei ematen dien babes-araubidea ez dela egokia, nekazaritza-produktibitate handiko lurzoru urbanizaezin gisa sailkatzen dituelako.

Adierazi behar da energia eolikoa lurzoru urbanizaezinean aprobetxatzeko instalazioen ezarpena Parke eolikoen ezarpenari buruzko otsailaren 26ko 125/1996 Foru Dekretuan araututa dagoela. Hemen ezarpena egokitzat jotzeko hirigintza arloko baldintzak agertzen dira - 2.2 artikulua:

"2.-Parke eolikoak ezin izanen dira inola ere ezarri honako hauetan:

a) Naturgune gisa kategorizatuta dauden lurzoruetan, Parke Naturalak bazter utzita. Parke Naturaletan dagozkien Natur Baliabideen Antolamendu Planetan xedatuta dagoenari jarraituko zaio; nekazaritza-produktibitate handiko lurzoruetan, ur babestuetan, lehendik dauden edo aurreikusita dauden azpiegitura ez-eolikoetan, herriguneen inguruan, interes kulturaleko higiezinen inguruan, altxonbideetan eta Done Jakue Bideko nahiz beste ibilbide interesgarri batzuetako babes guneetan...".

Cortesko udal planak lurzatiak nekazaritza-produktibitate handiko lurzoru urbanizaezin gisa sailkatzen ditu. Cortesko planeamendua ez dago homologatuta; beraz, alde batetik Lurraldearen Antolamenduari eta Hirigintzari buruzko Lege berrian agertzen diren lurzoru-kategorietako bat esleitu behar diogu, eta beste alde batetik, instalatu nahi den erabilera kontuan hartuta, justifikatu beharko dugu lurzatiek ez dutela halako baliorik (naturalak, ingurumenekoak, paisaiakoak, nekazaritzakoak...) bestelako kategoria edo azpikategorietan sartzeko, zeinetan debekatua baitago mota horretako jarduerak ezartzea.

Beraz, adierazi diren gogoetak eta lurzoru urbanizaezinaren definizio berria kontuan hartuta, kategoriarik egokiena "gorde beharreko lurzoru urbanizaezina" da.

6.-Gaur egungo araudia.

Cortesko udal planak aldaketaren xede den eremua nekazaritza-produktibitate handiko lurzoru urbanizaezin gisa sailkatzen du, Lurraldearen Antolamenduari eta Hirigintzari buruzko aurreko Legeak (20/1994 Foru Legea) lurzoru urbanizaezinerako definitzen zituen kategorien arabera.

Udal planak lurzoru urbanizaezineko kategoria horretarako ezartzen duen erabilera-araubidea honako hau da:

" 4.16. artikulua. Nekazaritza-produktibitate handiko lurzorua.

Lurzoru urbanizaezineko kategoria honetako eremuen ezaugarri bereziak kontuan hartuta, debekatuta daude eremuen helburua edo izaera eraldatzea dakarten jarduera, eraikin edo erabilera-aldaketa guztiak, edo lurzoruaren balio agrologikoak kaltetzen dituztenak.

Gaur egun dauden etxaldeak finkatzen dira, eta beren jarduera jarraitzea onartuko da. Ez da onartuko etxaldeak handitzea.

1.-Udal lizentziarik behar izan gabe baimentzen diren erabilera eta jarduerak.

-Nekazaritzako jarduera estentsiboa eta intentsiboa, ortu eta berotegiena.

-Landa-lurzoruaren berezko abeltzaintza jarduera: belarren aprobetxamendua eta nekazaritzako azpiproduktuena, betiere kategoria horretako lurretakoak badira.

-Aisia edo josteta jarduerak, baldin eta horien ondorioz lurrik mugitzen ez bada eta azpiegitura edota eraikinik ezartzen ez bada.

2.-Onartutako erabilerak.

Ondoko eraikin eta instalazio hauek, kategoria honetako nekazaritza jarduerari loturik badaude:

-Lanabesak gordetzeko edo baratzezaintzari laguntza emateko etxolak.

-Berotegiak.

-Lurzatien itxiturak.

3.-Baimentzen ahal diren erabilerak.

-Lehendik dauden hiri hornidura eta saneamenduko sareak, eta Plan honek kategoria horren barruan ezar daitezela aurreikusten dituenak.

-Nekazaritza eta abeltzaintza jarduerako landa bideak birmoldatu eta handitzea, planak zehazten dituen baldintzekin.

-Gaur egungo ureztapen-sarea birmoldatu, mantendu eta hobetzea.

-Babes-kategoria horretako lurzoruetan kokatu beharreko lurraldeko, tokiko edo udalez gaindiko azpiegitura-sareen obrak egitea eta sare horiek instalatzea.

4.-Debekatutako erabilerak.

-Plan honek onartzen ez dituenak eta onartu ezin dituenak."

Beste alde batetik, udal planak nekazaritza eta abeltzaintzako produktibitate ertaineko lurzorutzat jotzen ditu honako hauek:

4.17. artikulua. Nekazaritza eta abeltzaintzako produktibitate ertaineko lurzorua.

Kategoria horretako lurzoruak funtsean nekazaritzakoak direnez, lurzoruaren erabilera orokorra lurzoruaren produkzio-ahalmenari eustea eta ahalmen hori hobetzea helburu duten jardueretara bideratuko da.

1.-Udal lizentziarik behar izan gabe baimentzen diren erabilera eta jarduerak:

-Mendi-ibiliak.

-Nekazaritzako jarduera estentsiboa eta intentsiboa, ortu eta berotegiena.

-Landa-lurzoruaren berezko abeltzaintza jarduera: belarren aprobetxamendua eta nekazaritzako azpiproduktuena, betiere kategoria horretako lurretakoak badira.

-Aisia edo josteta jarduerak, baldin eta horien ondorioz lurrik mugitzen ez bada eta azpiegitura edota eraikinik ezartzen ez bada.

2.-Onartutako erabilerak:

-Ondoko eraikin eta instalazio hauek, kategoria honetako nekazaritza jarduerari loturik badaude:

Lanabesak gordetzeko edo baratzezaintzari laguntza emateko etxolak.

Berotegiak.

Lurzatien itxiturak.

-Landa-lurzoruaren berezko abeltzaintza jarduerari lotutako honako eraikin eta instalazioak:

• Erlauntzak.
• Etxeko ukuiluak.

-Landa-lurzoruaren berezko abeltzaintza jarduerari lotutako eraikin eta instalazioen kontserbazio eta mantentze-obrak, ardi-aziendaren ukuilu eta artegien modalitatean, baldin eta horien ondorioz okupatutako azalera handitzen ez bada edo bolumena handitzen ez bada.

3.-Baimentzen ahal diren erabilerak:

-Nekazaritza jarduerari lotutako honako eraikin eta instalazio hauek eraiki eta handitzea, kategoriak berezko baditu:

• Nekazaritzako biltegiak.
• Familia bakarreko etxebizitza, nekazaritzako ustiategiaren zerbitzurako.
• Ardandegiak.
• Nafarroan industrialdeen eta industria jardueren ezarpena arautzen duen 84/1990 Foru Dekretuaren 6. artikuluak zehazten dituen Industria-jarduerak.

-Landa-lurzoruaren berezko abeltzaintza-jarduerari lotutako honako eraikin eta instalazioak eraiki eta handitzea:

• Ardi-aziendaren ukuilu eta artegiak eta beren instalazio osagarriak.
• Esnetarako edo haragitarako behi-aziendaren ukuiluak eta beren instalazio osagarriak.
• Hazkuntzarako eta haragitarako zaldi-aziendaren ukuiluak eta beren instalazio osagarriak.
• Familia bakarreko etxebizitza, abeltzaintzako ustiategiaren zerbitzurako.

-"Landa-lurzoruaren berezkoa ez den abeltzaintza jarduera" bati lotzen zaizkion honako eraikin eta instalazioak -hegazti-, untxi- edo txerri-aziendaren hazkuntza edo/eta gizentzerako direnak- birmoldatu, mantendu eta eraiki nahiz handitzea, baldin eta horrelakoak lurzoru urbanizaezinean ezartzen ahal badira, eta plan honek ezarritako prebentzio-distantziak betetzen badituzte.

-Ubide naturalak eraldatzea.

-Nekazaritza eta abeltzaintza jardueraren zerbitzurako landa bide berriak irekitzea.

-Kategoria honetan kokatu behar diren aireko goi tentsioko lineak.

-Plan honek baimentzen dituen azpiegituren zerbitzurako eraikinak.

-Ureztatzeko erreten edo/eta ubide berriak sortzea, eta lehendik daudenak birmoldatu edo/eta handitzea.

-Interes sozialerako onura publikoa duten eraikin eta instalazioak, baldin eta kategoria horretan kokatu behar badira.

-Legar-erauzketaren jarduerak hondatutako eremuak berreraikitzea, jatorrizko profil topografikoa eta landare-geruza landaketa eta basoberritze libreekin leheneratzeko jardueren bidez.

-Lurzoru urbanizaezinean kokatu beharreko kirol, aisialdi, laguntza, sanitate eta pedagogi ekipamenduak.

4.-Debekatutako erabilerak.

-Plan honek onartzen ez dituenak eta onartu ezin dituenak.

Halaber, LAHFLak, nekazaritza-produktibitate handiaren edo ertainaren arteko bereizketa inoiz ere aipatu gabe, 94.2 artikuluan hau dio:

Lurzoru urbanizaezinean honako bi kategoria hauek bereiziko dira:

a) Babestu beharreko lurzoru urbanizaezina.

b) Gorde beharreko lurzoru urbanizaezina.

7.-Proposatzen den araudia.

Esleitutako kategoria berrirako araubide iragankorra ezarri da. Horren babes-araubidea honako hau izanen da:

-Gorde beharreko lurzoru urbanizaezinaren araubidea, ustiapen naturalerako balio ertaina duelako.

Eraikuntzaz kanpoko erabilerak.

a) Onartutako erabilerak.

1.-Egur aprobetxamendua.

2.-Matarrasa.

3.-Eraikuntzaz kanpoko erabilerak kirol, aisialdi eta turismo jarduerei lotuak, azpikategoria bereko lurzoruetan.

b) Baimentzen ahal diren erabilerak.

1.-Zapaldak eta terrazak egitea.

2.-Pista edo bide berriak irekitzea.

3.-Lurrak mugitzea, oro har.

4.-Landaretza erretzea.

5.-Meategiak ustiatzea.

6.-Harrobiak, harriak, agregakinak, mineralak, gordinkiak eta hareak ateratzea.

Eraikuntzako erabilerak.

a) Baimentzen ahal diren erabilerak.

1.-Harri-lubetak.

2.-Interes publikoko azpiegitura, ekipamendu eta dotazioak, eta haien instalazio nahiz eraikin osagarriak.

3.-Interes partikularreko instalazio nahiz harguneak kokatzeko eraikinak, eta haien osagarriak.

4.-Abeltzaintza estentsiboko lanei laguntzeko erakin eta instalazioak.

5.-Abeltzaintzako ustiategiak, etxaldeak.

6.-Arrain-haztegiak.

7.-Nekazaritza eta baratzezaintza lanari laguntzeko eraikin eta instalazioak.

8.-Nekazaritzako biltegiak.

9.-Mintegi eta berotegiak.

10.-Dolareak, ardandegiak eta bestelakoak, inguruko lurretako produkzioari lotuak.

11.-Eguzki-energia, energia eolikoa eta energia hidroelektrikoa sortzeko eraikin eta instalazioak.

12.-Jarduera ekonomikoetarako nabeak.

13.-Jarduera ekonomikoei loturiko bestelako eraikinak.

14.-Publizitate estatikorako instalazioak.

15.-Jardueraren bati loturiko etxebizitza, lurzoru urbanizaezinean.

b) Behin-behinekoz baimentzen ahal diren erabilerak.

1.-Behin-behineko eraikin eta instalazioak herri lanak gauzatu, mantentze lanak egin eta lan horiei zerbitzu emateko.

Iragarkiaren kodea: L0928825