10. ALDIZKARIA - 2010eko urtarrilaren 22a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

985/2009 FORU AGINDUA, abenduaren 28koa, Lehendakaritza, Justizia eta Barneko kontseilariarena, Nafarroako Justizia Administrazioaren zerbitzuko lanpostuak aldi baterako betetzeko langileak kudeatzeko arauak ezartzen dituena.

Botere Judizialaren uztailaren 1eko 6/1985 Lege Organikoaren 471. artikuluan, abenduaren 23ko 19/2003 Lege Organikoak emandako idazketaren arabera, xedatzen da Justizia Administrazioaren zerbitzuko eta aurreko artikuluan sarturiko langile guztien gaineko eskumenak Justizia Ministerioari dagozkiola edo, kasua bada, autonomia erkidegoei, horien estatutuari eta araubide juridikoari dagozkion gai guztietan, barne hartuta hautespena, hasierako eta etengabeko prestakuntza, destinoa ematea, igoerak, egoera administratiboak, lanaldiak, lanorduak eta diziplinaren gaineko araubidea.

Maiatzaren 14ko 812/1999 Errege Dekretuaren bidez, Nafarroako Foru Komunitateari eskualdatu zitzaizkion Justizia Administrazioaren zerbitzuko baliabide pertsonalen arloko funtzioak eta zerbitzuak. Hortaz, Nafarroako Foru Komunitateari dagokio Nafarroako Justizia Administrazioaren organo judizial eta fiskalen zerbitzuko lanpostuak aldi baterako betetzeko langileak arautu eta izendatzea.

Foru agindu honen xedea da langileen arloko beharrak asetzea bitarteko funtzionarioak behar bezalako arintasunarekin eta azkartasunarekin izendatuz, funtzio publikorako sarbidea agintzen duten berdintasun, merezimendu eta gaitasun irizpideak murriztu gabe.

Hori horrela, Nafarroako Foru Komunitateko Administrazioaren eta haren erakunde autonomoen organoetako langileen arloko eskudantziak zehazten dituen otsailaren 21eko 30/2005 Foru Dekretuan eta Botere Judizialaren uztailaren 1eko 6/1985 Lege Organikoaren 489. artikuluan xedatutakoarekin bat (abenduaren 23ko 19/2003 Lege Organikoak emandako idazketaren arabera), aldez aurretik sindikatuekin negoziatuta eta Botere Judizialaren Kontseilu Nagusiari entzunda (aipatutako arauaren 108. artikuluari jarraikiz),

AGINDU DUT:

1. artikulua. Eskumena eta kasuak.

Nafarroako Justizia Administrazioko bulego eta zerbitzuen beharrak ezin badira ase Prozesu eta Administrazio Kudeaketako Kidegoko, Prozesu eta Administrazio Izapidetzako Kidegoko edota Laguntza Judizialeko Kidegoko funtzionarioekin, Nafarroako Gobernuko Justiziako zuzendari nagusiak honako kasuetan bitarteko funtzionario izendatu ahal izanen ditu aldez aurretik horretarako hautatutako pertsonak:

a) Arauzko absentzia hilabetea baino gehiago luzatzen bada.

b) Plantillan lanpostu hutsak badaude, horiek arauzko sistemaren bidez bete arte.

c) Lanpostuak betetzea presazkoa eta beharrezkoa dela behar bezala arrazoitzen bada eta Justizia Zuzendaritza Nagusiak hala balioesten badu.

2. artikulua. Xedapen orokorrak.

Aldi baterako langileak deialdi publikoaren bidez hautatuko dira, betiere, berdintasun, merezimendu, gaitasun eta publizitate printzipioak bermatuz.

Aldi baterako langileak hautatzeko prozedurak ahalik eta arintasun handienarekin eginen dira lanpostuak betetzeko.

Urteroko azken hiruhilekoan hautapen prozeduretarako deialdia eginen da, aldi baterako langileak kudeatzeko zerrendetan izangai berriak sartu eta zerrenda horietako izangaiek azken urtean lortutako merezimenduak eguneratze aldera. Hautaprobak urteroko urtarrilean eginen dira. Onartu eta baztertuen behin betiko zerrenda onesten duen ebazpenean bertan zehaztuko da ariketak non, noiz eta zer ordutan hasiko diren.

Halaber, aldi berean, zerrendetako izangaiek eskatu ahal izanen dute hautatutako lurralde esparruak aldatzeko.

3. artikulua. Izangaien zerrendak.

1. Justizia Zuzendaritza Nagusiak izangaien zerrendak eratu ahal izanen ditu honako kidegoetarako, ondoko atal honetan xedatutakoarekin bat:

a) Prozesu eta Administrazio Kudeaketako Kidegoa.

b) Prozesu eta Administrazio Izapidetzako Kidegoa.

c) Laguntza Judizialeko Kidegoa.

Izangaiak kidego ezberdinetako izangaien zerrenda batean baino gehiagotan egon ahal izanen dira aldi berean.

2. Lehentasun hurrenkera honen araberako izangai-zerrendak eratu ahal izanen dira:

1. Azken deialdi publikora aurkeztu eta hautaproba guztiak gainditu ez dituzten izangaien zerrendak.

Izangai horien lehentasun hurrenkera honakoek zehaztuko dute:

a) Oposizioan gainditutako probetan lortutako erabateko puntuazioa bider 85 eta biderketa horren emaitza zati 100.

b) Justizia Administrazioan eskainitako zerbitzuen balorazioa, deialdi honetako I. eranskinaren A) letran jasotako baremazioarekin bat.

Berdinketarik badago, lehentasuna izanen du a) letran puntuaziorik handiena lortu duen izangaiak eta, berdinketak irauten badu, b) letran puntuaziorik handiena lortu duenaren alde ebatziko da, horretan lortzen ahal den gehieneko puntuazioak mugarik ez badu. Azkenik, zozketa bidez ebatziko da.

2. Hautapen prozeduren deialdi publikoaren bidez eratutako izangaien zerrendak, lanpostu hauek aldi baterako betetzeko.

Atal honen arabera eratutako zerrendak indarrean izanen dira horrelako beste deialdi berri bat ebatzi arte.

Lehenik, hautaproba bat eginen da eta haren balorazioa ezin izanen da gehieneko puntuazioaren %70 baino handiago izan. Bazterturik geldituko dira deialdian eskatutako gutxieneko puntuazioa lortzen ez duten izangaiak.

Bigarrenik, merezimenduen baremazioa eginen da. Horren balorazioa ezin izanen da gehieneko puntuazioaren %30 baino handiago izan eta eranskinean jasotako irizpideen menpe egonen da.

Berdinketak ebazteko lehentasuna emanen zaio hautapen prozeduran lortutako puntuazioari. Berdinketak irauten badu, baremoko lehen ataletik hasita atal bakoitzean puntuaziorik handiena lortu duenaren alde ebatziko da eta, berriro ere berdinketarik badago, lehentasuna emanen zaio puntuaziorik handiena lortu duenari, atal bakoitzean lortu beharreko gehieneko puntuaziorik ez badago. Azkenik, zozketa bidez ebatziko da.

Atal honetan araututako izangai-zerrendetako partaideek hautaproban lortutako kalifikazioa mantendu ahal izanen dute, gehienez ere hiru urtez, hala adierazten badute hurrengo hautapen prozeduran parte hartzeko eskabidean. Kasu horretan, aurkezten dituzten merezimenduen baremazioa bakarrik eginen da.

3. Nafarroako Enplegu Zerbitzuaren bidez eratutako izangaien zerrendak. Oro har, atal honetan aurreikusitako hautapen sistema erabiliko da aurreko ataletan aipatutako zerrendetan hartzeko izangairik ez badago eta, salbuespen gisa, lanpostuak betetzeko presako premia dagoela frogatzen bada edo lanpostuen berariazko ezaugarriak direla-eta horiek betetzea zaila dela frogatzen bada. Kasu horretan izangaiei berariazko ezaugarri horien ziurtagiria eskatuko zaie.

4. artikulua. Hautapen prozedurak argitara ematea.

Xedetzat aurreko artikuluan aurreikusitako izangai-zerrendak eratzea duten hautapen prozedurak aurrera eramateko, Justizia Zuzendaritza Nagusiak Nafarroako Gobernuaren web orrian, Nafarroako Justizia Administrazioaren atalean, argitaratuko ditu sarrerarako programak eta edukiak. Eduki horietan oinarrituko dira kidego bakoitzerako hautapen prozedurak.

Webgune berean, interesdun guztiek aplikazio informatiko bat izanen dute eskuragarri hautaproba prestatzeko beharrezkoak diren eduki guztiekin.

Helbide elektroniko hori izanen da foru agindu hau betetzeko egiten diren hautapen prozedura guztiak argitaratzeko bitarteko ofiziala.

5. artikulua. Sartzeko baldintzak.

1. Zerrendetan sartu ahal izateko, izangaiek ondoko atal hauetan ezartzen diren baldintzak bete beharko dituzte eskabideak aurkezteko epea amaitzen den egunean.

Baldintza horiek administrazioak zerbitzu ematen hasteko deitzen duen unera arte bete beharko dira, baita kontratatua zerbitzu ematen aritzen den denboran ere.

2. Kidego guztietara sartzeko baldintza orokorrak dira:

a) Espainiarra izatea, adinez nagusia eta erretiroko adina ez izatea, ezta hautapen prozedurak iraun bitartean betetzea ere, lanpostuaren jabetza hartu arte.

b) Dolozko delitu bat dela kausa kondenatua ez izatea, ezta akusatua ere, ez bada birgaitzea lortu duela edo kausa largetsi dela.

c) Eginkizun publikoak betetzeko ezgaitua edo gabetua ez izatea.

d) Diziplina prozedura baten bidez edozein administrazio publikotatik bereizia ez izatea, ezta eginkizun publikoetan aritzeko gabetua ere, diziplina edo epaile bidez, non ez den birgaitua izan.

e) Karguan aritzea galarazten dion akats fisikorik nahiz psikikorik edo eritasunik ez izatea.

3. Kidego bakoitzerako berariazko betebehar gisa eskatuko da kidego bakoitzean sartzeko beharrezkoa den titulazioa edukitzea edo eskabideak aurkezteko epea amaitu baino lehen titulua eskuratzeko moduan egotea, eta hala:

a) Prozesu eta Administrazio Kudeaketako Kidegorako: unibertsitateko diplomadun, ingeniari tekniko edo arkitekto teknikoen titulua edo horien titulu baliokidea.

b) Prozesu eta Administrazio Izapidetzako Kidegorako: batxiler-titulua edo haren baliokidea.

c) Laguntza Judizialeko Kidegorako: DBH-ko graduatuaren titulua edo haren baliokidea.

4. Gainera, berariazko betebehar gisa eskatuko dira:

a) Prozesu eta Administrazio Kudeaketako Kidegorako zerrendetarako: mekanografia jakitea. Hori ondoko bide hauetako edozeinen bidez frogatuko da:

1. Ofizialki aitortutako prestakuntza zentro batek azken bost urteotan emandako diploma edo ziurtagiria, interesdunak minutuko 220 pultsazio egiten dituela ziurtatuz.

2. Administrazio Kudeaketa erdi mailako heziketa zikloaren titulua, Administrazioa eta Finantzak goi mailako heziketa zikloaren titulua eta Idazkaritza goi mailako heziketa zikloaren titulua izatea edo eskabideak aurkezteko epea amaitu baino lehen titulua eskuratzeko moduan egotea.

Halaber, Teknikari laguntzailearen (administrazio arloa, LH1) edo Teknikari espezialistaren (administrazio arloa, LH2) tituluak izatea.

3. Administrazio publiko baten ziurtagiria, aurre-aurreko bost urteetan egindako hautapen prozesuetan mekanografia proba bat edo baliabide ofimatikoena gainditu duela ziurtatuz.

4. Administrazio publiko baten ziurtagiria, aurre-aurreko bost urteetan Justizia Administrazioko laguntzaile gisa edo Prozesu eta Administrazio Kudeaketa Kidegoko lanpostu batean, edo administrari laguntzaile edo administrari ofizial gisa emandako zerbitzuak ziurtatuz.

Betebehar hori frogatzearen ondorioetarako, bost urteen zenbaketa eskabidea aurkezteko epea amaitzen den egunera arte eginen da.

b) Lanpostuari dagokion titulazioa, Lanpostuen zerrenden arabera titulazio jakin bat izatea beharrezkoa duten lanpostuen kasuan.

6. artikulua. Izangaiei dei egitea.

1. Araubide orokorra.

Foru agindu honen 1. artikuluan aipatutako kasuetarako, izangaiei banan-banan deituko zaie, izangaiak deialdi ezberdinetan parte hartzeko eskabidean hautatutako lurralde esparruen arabera. Horiek honako hauetako bat edo batzuk izan daitezke:

a) Iruña eta Agoizko barruti judizialak.

b) Iruña eta Lizarrako barruti judizialak.

c) Iruña eta Tafallako barruti judizialak.

d) Iruña eta Tuterako barruti judizialak.

e) Tutera eta Tafallako barruti judizialak.

f) Lizarra eta Tafallako barruti judizialak.

g) Barruti judizial guztiak.

Dei egitearen ondorioetarako, interesdunek parte hartzeko eskabidean harremanetarako bi telefono jarri beharko dituzte. Halaber, helbide elektronikoa ere adierazi ahalko da, izangaia aurkitu eta deitu ahal izateko. Emandako telefonoak eta helbide elektronikoak edozein unetan eguneratu ahal izanen dira, dagokion zerbitzuari eskabidea eginez.

Izangaiari bitarteko funtzionario izendatzeko eskaintza egiteko, hura aurkitzeko hiru saiakera eginen dira gutxienez, eta beharrezkoa balitz, 24 orduko epean. Hori telefonoaren, telefonora igorritako mezuaren edo helbide elektronikoaren bidez eginen da, betiere hori egitea posiblea bada. Izangaia aurkitzerik ez badago, zerrendan hurrengoa denarekin harremanetan jarriko da, hori idatzirik utzita horretarako egindako eginbidearen bidez.

2. Euskararen nahitaezko ezagutza eta balorazioa.

a) Bete beharreko lanposturako beharrezkoa bada euskaraz jakitea (Lanpostuen zerrenden arabera), "Zerrenda orokorra" izenekoa erabiliko da, hurrengo ataleko d) letran ezarritakoarekin bat.

b) Bete beharreko lanposturako euskaraz jakitea merezimendua bada, Lanpostuen zerrenden arabera, "Euskara-merezimendua zerrenda" izeneko zerrenda erabiliko da.

3. Salbuespenak.

a) Izangai bat bitarteko funtzionario izendatzen bada, ez zaio bestelako izendapenik eskainiko beste lanpostu bat betetzeko, ez bada deialdia maila edo kategoria handiagoko lanpostu bati dagokion beste zerrenda batetik egiten dela.

b) Bitarteko funtzionarioa bulego edo zerbitzu judizial bateko lanpostutik kentzen denetik sei hilabete baino gutxiago igarotzen badira bulego berean edo ordena jurisdikzional bereko beste batean aritzeko kidego bereko beste izangai bat deitzen den arte, pertsona bera izendatu ahal izanen da, behin bakarrik, betiere bulegoko edo zerbitzuko arduradunak hala eskatzen badu.

c) Bete beharreko lanposturako Lanpostuen zerrendak titulazio jakin bat eskatzen badu, deialdia kasuan kasuko titulazioa dutela frogatzen duten izangaien alde eginen da, zerrendan agertzen diren hurrenkeraren arabera.

d) Bete beharreko lanpostuetarako Lanpostuen zerrendaren arabera euskaraz jakitea beharrezkoa bada, deialdia EGA titulua edo beste titulu ofizial bat, Hizkuntzen Europako Erreferentzia Esparru Bateratuaren C1 mailaren baliokidea, dutela frogatzen duten izangaien alde eginen da.

Izangaiak euskaraz dakiela frogatu ahal izanen du Nafarroako Administrazio Publikoaren Institutuak horretarako prestatutako berariazko probak gaindituz.

7. artikulua. Praktiketako bitarteko funtzionarioak.

1. Praktiketako bitarteko funtzionariotzat joko dira aurretik gutxienez egiazko sei hileko lanaldia izan gabe izendatzen diren zerrendetako izangaiak.

2. Praktikaldiak bi hileko iraupena izanen du izendapena egiten denetik hasita, eta epea modu jarraituan edo aldi metagarritan zenbatuko da. Praktikaldiak iraun bitartean, gainerako bitarteko funtzionarioen ordainsari eskubide berak izanen dituzte.

Praktikaldia amaituta, idazkari judizialak edo arduradun funtzionalak praktikaldiaren gaineko txostena eman beharko du, izangaia lan-poltsan sartzeko gai edo ez-gai den arrazoituz.

Txosten hori edozein unetan eman ahal izanen da praktikaldia amaitu baino lehen, idazkari judizialak edo arduradun funtzionalak uste badu praktiketako bitarteko funtzionarioaren errendimendua eskasa dela edo lanpostuan aritzeko beharrezkoa den gaitasunik ez duela.

3. Bitarteko funtzionarioaren izendapena praktikaldirako ezarritako epea baino epe laburrago baterako egiten bada, berdin-berdin eman beharko da aurreko atalean adierazitako txostena.

Kasu horretan, funtzionario horren izendapen berria formalizatzen denean, idazkari judizialari edo arduradun funtzionalari praktikaldi hori jakinaraziko zaio, horren iraupenarekin eta nondik norakoekin.

4. Izangaiak praktikaldia gainditzen badu, dagokion zerrendan sartuko da behin betiko eta, zerbitzuak ematen jarraitu beharko balu, automatikoki berrituko litzaioke bitarteko funtzionarioaren izendapena.

Hori horrela izanik ere, praktikaldia gainditzeak ez du galaraziko bitarteko funtzionarioari espedientea hastea errendimendu eskasa edo gaitasun eza direla kausa, 10.2 artikuluan aurreikusitako moduan.

5. Praktikaldia ez gainditzeak ekarriko du lanpostutik kendu behar izatea, bai eta dagokion zerrendatik kanpo betiko uztea ere.

Horretarako, Justizia Zuzendaritza Nagusiak dagokion alde biko espedientea hasiko du, non interesdunak, bost egun balioduneko epean, bere eskubidearen alde komeni zaizkion alegazioak aurkeztu eta probak proposatu ahalko baititu. Horren ostean, Justiziako zuzendari nagusiak ebazpen baten bidez erabakiko du bidezko den ala ez lanpostutik kentzea eta, hala bada, zerrendatik kanporatzea, eta erabaki horren berri emanen dio Justiziako Langileen Batzordeari.

8. artikulua. Uko egite justifikatua.

1. Eskainitako lanpostuari uko egitea justifikatua egonen da ondoko egoeratan (izangaien zerrendaren hurrenkeran behera egin gabe):

a) Aldi baterako ezintasuna.

b) Amatasun edo aitatasun baimena.

c) Hiru urte baino gutxiagoko semea edo alaba, berezkoa zein adoptatua, zaindu beharrean egotea edo edo hiru urteko adingabea adoptatu aurretik edo modu iraunkorrean familian hartu beharrean egotea.

d) Pertsona adintsu ezindu edo eri hilurren bat, odolbidez nahiz ezkontzaz bigarren gradurainoko ahaidea dena, zaindu beharrean egotea.

e) Aurretik zerrendatutakoekin zerikusia duen bestelako edozein egoeratan egotea, hori behar bezala frogatzen bada eta Justizia Zuzendaritza Nagusiak hala balioesten badu.

2. Aurreko atalean adierazitako egoeretako batean dauden izangaiek hilabeteko epea izanen dute, uko egiten dioten lanpostua eskaintzen zaien egunetik, agiri bidez eta behar bezala justifikatzeko. Hala bada, zerrendan zuten toki berean jarraituko dute.

3. c), d) eta e) letretan aurreikusitako arrazoiengatik uko egiten dutenei ez zaie berriro ere deituko uko egin denetik hiru hilabete igaro eta aurretik interesdunaren eskabidea jaso arte.

4. Artikulu honen a) eta b) letretan aurreikusitako kasuetan, egoera hori amaitu dela jakinarazi beharko zaio Justizia Zuzendaritza Nagusiari, amaitzen denetik hiru egun naturaleko epean.

5. Aurreko atalean adierazitako agiriak ezarritako epeetan aurkezten ez dituzten izangaiak deialdia egin duen kidegoari dagozkion zerrendetatik kanporatuko dira.

9. artikulua. Izendapenen aldi baterako eraginkortasuna.

1. Nafarroako Gobernuak bitarteko funtzionarioekin duen lotura juridiko eta ekonomikoa horiek lanpostuaz jabetzean du jatorria.

2. Lanpostu bat betetzeko deituak izan diren izangaiek lanpostuaz jabetu beharko dute izendapena egin eta lau egun balioduneko epean.

3. Proposatuak izan diren pertsonek ezin izanen dute lanpostuaz jabetu ezta lanpostuari dagozkion funtzioak bete ere Justizia Zuzendaritza Nagusiak haien izendapena jakinarazi arte.

4. Nafarroako Gobernuak bitarteko funtzionarioekin duen lotura juridiko eta ekonomikoa iraungiko da horiek lanpostutik kentzean.

10. artikulua. Lanpostutik kentzea.

1. Bitarteko funtzionarioak lapostutik kenduko dira ondoko kasu hauetan:

a) Betetzen ari den plaza haren funtzionario titularrak betetzea edo karrerako funtzionario batek betetzea legez ezarritako prozeduren bidez.

b) Izendatu zuten epealdia bukatzea.

c) Lanpostua bitarteko funtzionario baten bidez betetzeko zerbitzu beharrak amaitzea.

d) Betetako lanpostua desagertzea.

e) Betetzen ari den lanpostuari uko egitea.

f) Izangaien zerrendetan sartzeko eskatutako baldintzetakoren bat hasieratik edo gerora ez betetzea edo adierazitako merezimenduren bat faltsua izatea.

g) Hutsegite oso larria egiteagatik zehapen irmoa izatea, Justizia Administrazioaren zerbitzuko Langileen Diziplina Araubideari buruzko Erregelamendu Orokorraren arabera.

h) Errendimendu eskasa edo gaitasunik ez izatea.

i) Botere Judizialaren Lege Organikoaren 492.3 artikuluan ezarritako adina izatea.

2. Aurreko zenbakiko h) letran aurreikusitakoaren ondorioetarako, ondoko prozedura hau jarraituko da: bulego edo zerbitzu judizialeko arduradunak lanpostutik kentzeko proposatuko dio Justiziako zuzendari nagusiari behar bezala arrazoitua eta nahi adina froga aurkeztuz. Proposamen hori interesdunari igorriko zaio eta horrek hamar eguneko epea izanen du alegazioak egin edo beharrezkotzat jotzen duen dokumentazioa aurkezteko. Espediente osoa Justiziako Langileen Batzordeari igorriko zaio, epe berean txostena egin dezan. Izapide horiek eginda, ebazpena hamar eguneko epean emanen da.

11. artikulua. Izangaien zerrendetatik baztertzea.

1. Deialdia egin duen kidegoari dagozkion izangaien zerrendetatik baztertuko dira izangaiak honako kasuetan:

a) Izendapena arrazoirik eman gabe onartzen ez bada.

b) Lanpostuaz jabetzera arrazoirik eman gabe aurkezten ez bada.

c) 10.1 artikuluaren h) letran xedatutakoaren arabera bigarren aldiz lanpostutik kentzen bada. Horri dagokionez, 10. artikuluaren 2. idatz-zatian aurreikusitako prozedura aplikatu ahal izanen da.

d) Lanpostutik kentzea 10.1 artikuluaren e) eta f) letretan ezarritako kasuren batengatik gertatu bada.

2. Aurreko idatz-zatiko c) letran jasotako baztertzeak ekarriko du interesduna kategoria handiagoko kidegoei dagozkien izangai-zerrendetatik baztertzea ere.

3. Izangaiak izangaien zerrenda guztietatik baztertuko dira 10.1 artikuluaren g) eta i) letretan ezarritako kasuetan.

4. Artikulu honetan aurreikusitako baztertzeak Nafarroako Justiziako zuzendari nagusiak emandako ebazpenaren bidez formalizatuko dira eta interesdunari jakinaraziko zaio.

12. artikulua. Parte-hartzea eta informazioa.

Maiatzaren 14ko 812/1999 Errege Dekretuan ezarritako lekualdatzeek ukitzen dituzten funtzionarioen Langileen Batzordean ordezkaritza duten sindikatuek izangaien zerrendak hautatu eta eratzeko prozesuan parte hartuko dute kasuan kasuko hautapen batzordeetan parte hartuz, eta kargutik kentzeko kasuetan ere parte hartuko dute, foru agindu honen 10. artikuluan aurreikusitakoaren arabera.

Lehen xedapen gehigarria.-Ezgaitasunak dituzten pertsonak.

%33ko ezgaitasuna edo handiagoa duten pertsonek lehentasuna izanen dute izangaien zerrendetan daudenei deitzerakoan, betiere hautaprobak gainditu badituzte eta aipatutako ezgaitasun gradua bete beharreko lan eta eginkizunekin bateragarria dela frogatzen badute.

Bigarren xedapen gehigarria. Hautapen prozeduren lehen deialdia.

Foru agindu honek indarra hartzen duenetik eta hilabeteko epean, Justizia Zuzendaritza Nagusiak hautapen prozeduretarako deialdia eginen du 3. artikuluan jasotako zerrendak eratze aldera.

Hirugarren xedapen gehigarria.-Auzitegiko bitarteko medikuak.

Nafarroako Auzitegiko Medikuntzaren Institutuaren beharrak ezin badira Auzitegiko Medikuen Kidegoko funtzionarioekin ase, Nafarroako Gobernuko Justiziako zuzendari nagusiak bitarteko funtzionario izendatu ahal izanen ditu aldez aurretik Nafarroako Enplegu Zerbitzuaren bidez hautatutako pertsonak.

Xedapen iragankor bakarra.-Ekainaren 27ko 49/2004 Foru Agindutik eratorritako zerrenden eta izendapenen aldi baterako indarraldia.

Bigarren xedapen gehigarrian aipatutako izangaien zerrendak onetsi arte, indarrean egonen dira ekainaren 27ko 49/2004 Foru Aginduaren bidez eratutakoak. Foru agindu horren bidez Nafarroako Justizia Administrazioaren zerbitzuko lanpostuak aldi baterako betetzeko langileak kudeatzeko arauak ezarri ziren.

Foru agindu horren arabera izendatutako bitarteko funtzionarioak beren lanpostuetan egonen dira lanpostutik kendu arte. Une horretan, kasua bada, foru agindu honen arabera eratzen diren zerrenda berrietan sartuko dira.

Xedapen indargabetzaile bakarra.-Arauen indargabetzea.

Indarrik gabe geratzen da ekainaren 27ko 49/2004 Foru Agindua, Nafarroako Justizia Administrazioaren zerbitzuko lanpostuak aldi baterako betetzeko langileak kudeatzeko arauak ezartzen dituena.

Azken xedapen bakarra.-Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2009ko abenduaren 28an.-Lehendakaritza, Justizia eta Barneko kontseilaria, Javier Caballero Martínez.

ERANSKINA

Merezimenduen baremoa

A) Lanbideko esperientzia: gehienez ere 15 puntu.

1. Justizia Administrazioan kidego berean bitarteko funtzionario gisa emandako zerbitzuengatik: 0,25 puntu lan egindako hilabete oso bakoitzeko.

2. Justizia Administrazioan bestelako kidego batean bitarteko funtzionario gisa emandako zerbitzuengatik: 0,15 puntu lan egindako hilabete oso bakoitzeko.

Frogagiriak: atal honetako merezimendu guztien frogagiriak aurkeztu beharko dira, salbu zerbitzuak Nafarroako Foru Komunitatean diren organo judizialetan eman badira. Frogagiri guztietan zerbitzuak hasi eta bukatu zireneko data zehatzak aipatuko dira.

B) Prozesu eta Administrazio Kudeaketa Kidegorako izangaien zerrendan sartzeko ezagutza juridikoak: gehienez 3 puntu.

1. Zuzenbideko lizentziatura: 3 puntu.

2. Zuzenbideko, Kriminologiako edo Lan Harremanetako diploma: 2 puntu titulazio bakoitzeko.

C) Informatika: gehienez 2 puntu.

1. Informatikako lizentziatura: 2 puntu.

2. II. edo III. Lanbide Heziketako tituluak, informatikako espezialitatea; Informatikako diploma: 1,5 puntu.

3. Administrazio publiko batek antolatutako edo homologatutako ikastaroak, eskabideak aurkezteko epea amaitu aurreko bost urteetan egin badira. Hona balorazioa:

a) 100 irakastordutik gorako ikastaroak: puntu bat.

b) 60tik 100 irakastordura bitarteko ikastaroak: 0,50 puntu.

c) 40tik 59 irakastordura bitarteko ikastaroak: 0,25 puntu.

d) 15etik 39 irakastordura bitarteko ikastaroak: 0,15 puntu.

e) 15 irakastordu baino gutxiagoko ikastaroak edo irakastorduak frogatzen ez dituzten ikastaroak: 0,10 puntu.

Unibertsitateko beste titulu batzuei dagozkien eduki informatikoko kredituak ikastaroen moduan baloratuko dira, aurreko paragrafoan adierazitako balorazioaren arabera. Kreditu bakoitzak 10 irakastorduren balioa izanen du.

Eduki bera edo antzekoa duten ikastaroak behin bakarrik zenbatuko dira.

Frogagiriak: parte-hartzearen ordu-kopurua jasotzen duten frogagiriak aurkeztu beharko dira.

D) Hizkuntzak jakitea:

1) Europar Batasuneko hizkuntza ofizialak (frantsesa, ingelesa edo alemana): gehienez ere 2 puntu hizkuntza bakoitzeko.

2) Euskaraz jakitea:

a) Eremu mistoan, euskaraz jakiteagatik gehienez 2,10 puntu emanen dira.

b) Eremu euskaldunean, euskaraz jakiteagatik gehienez 2,20 puntu emanen dira.

Frogagiriak: hizkuntza eskola ofizial batek emandako gaitasun agiria edo baliokidetzat jotzen den titulu bat aurkeztu beharko da.

Titulu hori eduki ezik, hizkuntza eskola ofizialean gaindituriko maila bakoitzagatik gehieneko puntuazioaren bosten bat emanen da. Euskararen kasuan, Nafarroako Gobernuak antolatutako ikastaroetan gainditutako urrats bakoitzeko 1/12 emanen da.

Iragarkiaren kodea: F0929276