Iragarkia

88. ALDIZKARIA - 2009ko uztailaren 17a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

866/2009 EBAZPENA, ekainaren 5ekoa, Arriskuen Prebentziorako eta Lanaren zuzendari nagusiak emana, Arazuriko "SAS Autosystemtechnic, S.A." enpresaren itun kolektiboa erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 3/2009-L).

2009ko maiatzaren 22an departamentu honetan sartu zen Arazuriko "SAS Autosystemtechnic, S.A." enpresaren itun kolektiboa, negoziazio batzordeko kideetako batzuek izenpetu eta onetsia (espediente zenbakia: 3/2009-L).

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren arabera, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan harturik Lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan eta azaroaren 26ko 30/1992 Legearen 59.4 artikuluan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Arazuriko "SAS Autosystemtechnic, S.A." enpresaren lan hitzarmen kolektiboa (kodea: 3108032) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri Negoziazio Batzordeari ematea, eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal duela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2009ko ekainaren 5ean.-Arriskuen Prebentziorako eta Lanaren zuzendari nagusia, Imelda Lorea Echavarren.

SAS AUTOSYSTEMTECHNIK, S.A. ENPRESAREN LAN HITZARMEN KOLEKTIBOA 2009. ETA 2010. URTEETARAKO

I. KAPITULUA

Xedapen orokorrak

1. artikulua. Langileak eta lurralde eremua.

Hitzarmen hau Arazuri-Orkoiengo industrialdean dagoen SAS Autosystemtechnik, S.A. enpresaren lantokiko besteren konturako langile guztiei aplikatuko zaie -bertako zuzendariei izan ezik-, baita antolaketa arrazoiak direla-eta aipatutako lantokiari lotuta badaude ere lantokitik kanpo lan egiten duten lan-taldeko langileei ere.

2. artikulua. Iraunaldia

Hitzarmen honek Aldizkari Ofizialean argitaratu eta biharamunean hartuko du indarra, baina ondorioak 2009ko urtarrilaren 1etik aurrera sortuko ditu. Indarraldia 2010eko abenduaren 31n amaituko zaio.

3. artikulua. Hitzarmenaren amaiera iragartzea eta hitzarmena luzatzea.

Indarraldia amaituta, hitzarmena urtez urte luzatuko da, behar den denboran eta moduan haren bukaera iragarri ezean. Halaber, behartze-baldintzek indarra galduko dute eta arautze-baldintzek beren indarrari eutsiko diote.

Hitzarmen hau mugaeguneratzen denean haren amaiera iragarri dela ulertuko da, bestelako betekizunik gabe.

4. artikulua. Osotasuna.

Hitzarmen honetan itundutako baldintzek multzo zatiezina osatzen dute eta beren osotasunean hartuko dira, oro har edo legezko edo hitzarmenezko edozein erreferentziarekin konparatzeko orduan baloratuta.

5. artikulua. Konpentsazioa eta irenspena&

Arlo horretan legez ezarritakoari jarraituko zaio, nahiz eta, nolanahi ere, homogeneotasun baldintzetan aurreko urtean sorrarazitako lansari maila bermatuko den.

II. KAPITULUA

Langileen antolaketa

6. artikulua. Lan poltsa.

Enpresak eta bertako Enpresa Batzordeak lan poltsa antolatzeko azterlana eginen dute, beharrezkoa denean langileak ordeztu ahal izateko eta langileentzako prestakuntzaldia ezarri ahal izateko.

7. artikulua. Plantilla.

Enpresak hurrengo urte naturalerako aurreikusten ahal den plantillaren xehetasunak emanen ditu urtero, plantillaren egitura eta sail eta atalkako banaketa adierazita.

Plantillan langile finkoak %90 izanen dira, gutxienez.

Amatasunaren edo haurdunaldiko arriskuaren ondorioz sortutako lanerako ezintasun iragankorrengatiko bajak bitarteko kontratuen bidez estaliko dira.

Eszedentziak edo lanaldi murrizketak hitzarmen honen aurretik estali diren moduan (ordeztea, salbuespenak salbuespen) estaliko dira.

ABLEen bidez langileak kontratatzeari dagokionez, enpresak eta Batzordeak hurrengo kasuetan bide hori ez erabiltzea itundu dute:

-Urtebeteko edo hortik gorako eszedentziak eta soldatarik gabeko lizentziak.

-Udako txanda.

-Amatasunagatiko bajak ordeztea.

-Bi hilabetetik gorako ezintasun iragankorrengatiko bajetan, kasuz kasu aztertu eta zehaztuko da.

8. artikulua. Lanbide sailkapena.

Enpresan aplikatu beharreko lanbide sailkapeneko egitura gisa ezarri da lanbide taldeen ondoko zehaztapen hau:

-2. taldea: Produkzioko langileak, oro har, eta jasomakina motordunik erabiltzen ez duten Logistikako langileak.

-3. taldea: jasomakina motordunak erabiltzen dituzten langileak, EAC/ACTko buruak, ukitu-emaileak, mantentze lanetako langileak eta administrari laguntzaileak.

-4. taldea: Mantentze-lanetako ofizialak, administrariak eta hainbat lanbidetakoak, eta Kalitateko auditoreak.

-5. taldea: arduradunak, tituludun teknikariak eta Logistikako koordinatzaileak.

-6. taldea: arloburuak.

Kategoria altuagoko eginkizunak burutzeak ez dakar aipatutako kategoria eskuratzea, eginkizunak 12 hilean 6 hilez jarraian edo 24 hilean 8 hilez jarraian etengabe burutu ezean.& Nolanahi ere, bidezkoa izanen da kategoria handiagoari dagokion soldata ordaintzea, kategoria horren eginkizunak burutzen diren bitartean.

9. artikulua. Barne igoera.

Hautapen prozesua hasi baino lehen, enpresak barne igoeraren oinarriak jakinaraziko dizkio Batzordeari. Ondoren, enpresako plantillari lanpostua lortzeko bete behar diren baldintzen berri emanen zaio, eta interesdunek lanpostua lortzeko interesa dutela adierazi beharko dute dokumentu fede-emailearen bidez. Horrekin batera, aurretik aipatutako baldintzak betetzen dituztela frogatzen duten agiriak aurkeztu beharko dituzte. Nolanahi ere, hasiera batean, 4. taldera arteko lanpostuak betetzeko deialdia SASeko langileei baino ez zaie eginen.

Horren ondoren, hautagaiek lanpostua lortzen ez badute, kanpoko hautapen prozesuari ekinen zaio, Enpresa Batzordeari jakinarazi ondoren.

Era berean, Enpresa Batzordeari 4. taldetik gorako taldeetako lanpostuak lortzeko dauden beste hautapen prozesuen berri emanen zaio.

Lehiaketa egin ondoren, Enpresa Batzordeari emaitzak jakinaraziko zaizkio.

III. KAPITULUA

Lanaldia

10. artikulua. Iraupena.

Urteko lanaldia VW Navarra gure bezeroak une bakoitzean ezartzen duen urteko lanaldia bera (ez banakako lanaldia) izanen da. Hala, 2009. urterako 212ko eguneko lanaldia ezarri da.

Eguneko lanaldiaren barruan, gaur egun ogitarteko denbora gisa ezarritakoa izaten jarraituko da, benetako lan denboratzat jotzen dena.

V.W.k beroagatik egiten dituen geldialdiak SASen ere eginen dira, betiere materialaren "birikak" bezeroarentzako hornidura bermatzen badu. Enpresako zuzendaritzak eta Batzordeak "birika" horren segurtasun maila zehaztuko dute.

11. artikulua. Urteko egutegia.

Urteko lan egutegia eta oporrak VW Navarra bezero nagusiak dituenei lotuta egonen dira. Hala ere, enpresak eta Batzordeak oporrei buruzko beste alderdi batzuen arauketa itunduko dute.

Urteko oporrak banatzeko taula, gure bezeroak oporrak zehaztu eta hurrengo 15 egunen barnean erakutsi beharko da, eta bertan langile bakoitzari dagozkion oporraldiak agertuko dira.

Urteko oporrak urte bakoitzeko abenduaren 31n erregularizatuko dira.

Oporraldian ordaindu beharreko lansaria aurreko hiru hilabeteetan lanaldi arruntean lortutako lansari-kontzeptu guztien batez bestekoa izanen da.

Lan istripu edo lanbide gaixotasunengatiko lanerako ezintasun iragankorrak programaturiko oporraldietan suertatzen direnean, ez da opor egunik zenbatuko lanerako ezintasun iragankorrak irauten duen bitartean. Zenbatu gabeko egunak ezarritako oporraldiaren segidan hartuko dira.

12. artikulua. Ordutegiak eta txandak.

Ezarritako lan ordutegiak eta txandak ondoko taula honetan jaso dira, etorkizunean izan dezaketen eboluzioa gorabehera.

Goiko taulako txandaren bat produkziorako beharrezkoa ez izateagatik erabili gabe egoteak ez du esan nahi hura ezin denik berehala aplikatu, hala behar denean. Hortaz, txanda hauetan lan egin ahal izanen da: goizez; goizez/arratsaldez; edo goizez/arratsaldez/gauez.

13. artikulua. Malgutasuna.

1) Larunbat goizetako malgutasuna:

Urte osoko larunbat goizak lanegun bihurtu ahal izanen dira langile guztientzat, bezeroaren produkzio arrazoiak direla eta; beraz, asteko atsedenaldia ez litzateke astero larunbat goizean hartuko. Hori nahitaezkoa izanen da aste horretan goizeko txanda dagokien langile ukitu guztientzat, eta hitzarmen honetako baldintza ekonomikoetan larunbat goizetako prestasunaren plus gisa agertzen den osagarria jasoko da. Gainera, langileak aukeratuko du nola nahi duen ordaintzea lan egindako larunbatak: lan egindako larunbat bakoitzeko atseden egun bat emanez, gehi hitzarmenaren 1. eranskinean ezarritako diru-kopurua, edo hitzarmenaren 1. eranskinean ezarritako ordainsariaz. Dena den, "ordu poltsaren" saldoa langilearentzat negatiboa bada, aipatutako orduekin bere saldo negatiboa berdindu beharko du nahitaez (larunbat goizeko 2 ordu, saldoko ordu bakoitzeko).

Hiru egunetik gorako saldo negatiboa duten langileek ezin izanen dute larunbaten kontura egun gehiago hartu harik eta beste larunbat batean, gutxienez, lan egin arte. Bertaratze-indizea %95ekoa duten langileek saldo hori handitu ahal izanen dute 5 egun metatu arte.

Larunbatetan goizeko txandan egindako orduen ordainezko atsedenaldiak "ordu poltsa" batean metatuko dira, eta enpresako zuzendaritzak eta Batzordeak ezartzen dituzten arauei jarraituz hartuko dira. Arau horiek zehazten ez diren artean, artikulu honen 2. idatz-zatian xedatutakoari jarraituko zaio, aurreko hitzarmenaren testuaren arabera. Salbuespenezko egoeretan, enpresak poltsa horretako atseden egunak esleitzen ahalko ditu astebete aurretik abisua emanda. Hiruhileko naturala amaituta hiruhileko horretarako lan egutegian ezarritako lanorduak baino gehiago egin badira eta lanaldi soberakinaren ordainez atsedenaldirik hartu ez bada, hartu gabeko atseden orduak hitzarmen honen 1. eranskinean adierazitako balioen arabera ordainduko dira, betiere langilearen borondatearekin zerikusirik ez duten arrazoiak badaude.

Aurreko paragrafoan xedatutakoa gorabehera, hiruhileko natural bakoitzaren hasieran langileak aukeratzen ahalko du gehien komeni zaiona. Behin aukera eginda, hiruhilekoa amaitu arte iraunen du indarrean. Ondoren langileak berriro adierazi beharko du orduak kobratzen jarraitu nahi duen, ordainezko atsedena hartu ordez, eta aukera aldatzen badu, aldaketak hurrengo hiruhileko naturaleko lehen egunetik sortuko ditu ondorioak.

Enpresako zuzendaritzak eta Batzordeak itunduko dute zein egunetatik aurrera gehitu daitekeen laugarren lan txanda, produkzio eta hornidura beharrizanek hala eskatzen dutenean; txanda horrek lansarien politikari buruzko kapituluan azaltzen diren lansarien ordainak izanen ditu.

2) V.W.ren egutegiko eta V.W.ren poltsako egunen malgutasuna (astelehenetik ostiralera bitarteko lanegunak).

M.O.D. eta M.O.I.-1 langileen (eskorga-gidariak, kalitateko auditoreak eta mantentze lanetako teknikariak) urteko lanaldiaren iraupena aldatu egin daiteke, V.W.ren produkzio arrazoiak direla eta. Arrazoi horiengatik, hitzarmen honen indarraldiko urte bakoitzean eta hitzarmenaren ondoko urteetan lan egin beharreko egunen kopurua txikitu edo handitu egin daiteke. Gainerako produkzio arrazoiei buruzko gorabeherak hitzarmen honen 20. artikuluan araututa daude.

Ukitutako langileek nahitaez onartu beharko dituzte aldaketa horiek.

Lan egin gabeko egunek ez dute berehalako murrizketarik ekarriko langilearen ordainsarian. Lan egin gabeko egunak "ordu poltsan" sartuko dira, eta berreskuratzen baldin badira, berreskuratutako egun bakoitzeko poltsatik 1,5 egun kenduko dira, ez bada aukeratzen horiek enpresak kudeatuko lukeen enplegu-erregulazioko espedientean sartzea.

''Ordu poltsa'' urte bakoitzeko abenduaren 31n likidatuko da, edo langileak enpresatik alde egiten duenean. Horrela, saldoa negatiboa bada, langilearen hurrengo urteko lehen seihilekoko nominetatik kenduko da hitzarmen honen 10. artikuluan ezarritako lanaldia osatzeko falta diren lanegunetako lansariaren %60. Langileak beste ordainketa modu bat aukeratu ahal izanen du, arestian adierazitako epea gaindituko ez duena.

Hala ere, lanegunen murrizketak ukitutako langileek lan kontratuak eteteko EEE batean sartzeko aukera izanen dute aipatutako murrizketak irauten duen aldirako eta, hala denean, enpresaren konturako osagarria jasoko dute, langabezia-prestazioarekin batera beren lansariaren %100 kobratu arte (gaueko lana aurreko hiruhilekoan sorrarazitako batez bestekoaren arabera kontatuko da). Etete horrek ez du murriztuko urte naturaleko opor egunen kopurua.

Lanaldia astelehenetik ostiralera bitarteko banakako lanaldiaren gainetik luzatzen denean, langileak ordain hauen artean aukeratu ahal izanen du: jaiegun bati dagokion atsedenaldia gehi aparteko 4 orduren balioa, edo aparteko 12 orduren balioa.

IV. KAPITULUA

Baldintza ekonomikoak

14. artikulua. Lansariak.

2008ko abenduaren 31ra arte indarrean egon den aurreko hitzarmenean oro har ezarritako soldata kontzeptuek -hitzarmen horretatik kanpo daudenak eta banaka ezarritakoak alde batera utzita, beraz- honako hitzarmen honen indarraldiko urte bakoitzean igoera hau izanen dute: Gobernuak Estatuko Aurrekontu Orokorrak egiteko aurreikusitako KPIa gehi %1. Igoeraren ondorioak urte natural bakoitzeko urtarrilaren 1etik aurrera sortuko dira.

Hala ere, urte natural bateko KPI erreala aurreikusitako KPIa baino handiagoa gertatzen bada, goranzko lansarien erregularizazioa eginen da, aurreikusitako KPIaren eta KPI errealaren arteko diferentzia adinakoa. Soldaten diferentziak ordainaldi bakarrean ordainduko dira, hurrengo urteko martxoko nominarekin batera.

Nolanahi ere, aipatu gehikuntzak egiteko kalkulu oinarritik kanpo geratuko dira hitzarmen honetan orokor gisa ezarri ez diren soldata kontzeptuak.

15. artikulua. Lansarien egitura.

Enpresan indarrean dagoen lansarien egitura honako hau da:

-Oinarrizko lansaria: lanbide kategoria bakoitzari dagokion lansaria da, denbora unitateko finkatua. Hitzarmen honen 1. eranskinean ezarritako zenbatekoa du.

-Hitzarmeneko plusa: oinarrizko lansariaz gain lanbide kategoria bakoitzari dagokion osagarria da, denbora unitateko finkatua. Hitzarmen honen 1. eranskinean ezarritako zenbatekoa du.

-Balioaniztasun eta produktibitate plusa: denbora unitateko finkatutako osagarria da, produkzioari lotutako M.O.D. eta M.O.I.-1 langileei bakarrik aplikatzen zaiena. Plus hori duten langileek esleitzen zaien edozein lanpostu eta beren kategoriako edozein eginkizun bete behar dituzte, eta ziurtatu behar dute enpresak zehazten duen ikaskuntza eta egokitzapen prozesua gaindituko dutela eta bezeroak kateari eskatutako etekina lortuko dutela. Plus horren zenbatekoa hitzarmen honen 1. eranskineko tauletan ageri da. M.O.D. langileak plantako Produkzioko langileak dira, eta M.O.I.-1 langileak, berriz, plantako Logistikako, Kalitateko eta Mantentze Lanetako langileak.

-Gaueko lanaren plusa: denbora unitateko finkatutako osagarria da, lanaldiaren zati bat gaueko hamarretatik goizeko seietara bitartean egiten duten enpresako langile guztiei aplikatzen zaiena. Zenbatekoa hitzarmen honen 1. eranskineko tauletan ageri da.

-Larunbat goizetako prestasun plusa: denbora unitateko ezarritako osagarria da, hitzarmen honen 13. artikuluan ezarritakoaren arabera enpresak eskatuta larunbat goizetan lan egiteko prest egoteagatik M.O.D. eta M.O.I.-1 langileei aplikatzen zaiena. Zenbatekoa hitzarmen honen 1. eranskineko tauletan ageri da.

-Aparteko pagak: hilero kobratzen ez diren osagarriak dira, seihileko naturaletan sorrarazten baitira. Aparteko paga bakoitzak 30 eguneko oinarrizko lansaria, hitzarmeneko plusa, balioaniztasun eta produktibitate plusa, malgutasun plusa eta, halakorik bada, antzinatasuna biltzen ditu, sorrarazpen aldian egindako benetako lan denboraren eta lanbide kategoriaren arabera. Ekaineko aparteko paga urtarrilaren 1etik ekainaren 30era bitartean sorraraziko da eta ekainaren 30ean ordainduko da, eta Gabonetako aparteko paga uztailaren 1etik abenduaren 31ra bitartean sorrarazi eta abenduaren 20an ordainduko da.

-Iraileko aparteko paga, malgutasunagatik: M.O.D. eta M.O.I.-1 langileek (eskorga-gidariak, kalitateko auditoreak eta mantentze lanetako teknikariak) jaso beharreko osagarria da. Zenbatekoa, kategoria eta urte bakoitzerako, beste aparteko pagena bera izanen da. Paga hau urriaren 1etik hurrengo urteko irailaren 30era bitartean sorraraziko da, eta iraileko nominarekin batera ordainduko da.

-Aparteko orduak: hitzarmen honetan ezarritako lanaldi arrunta baino luzeagoa egiteagatik M.O.D. eta M.O.I.-1 langileei aplikatzen zaien osagarria da. Zenbatekoak, lanbide kategoriaren arabera, 1. eranskinean ageri dira. Jaiegunetako aparteko ordutzat joko dira urteko egutegiko igande eta jaiegunetan eta larunbat arratsaldeetan edo larunbat gauetan egiten direnak, bai eta astelehenetik ostiralera 22:00etatik 06:00ak arte egiten direnak ere. Beste guztiak aparteko ordu arruntak izanen dira. Hitzarmen honen indarraldian hitzarmeneko igoera orokorra aplikatuko da. Larunbat arratsalde, igande eta jaiegunetan egindako lan orduak, laugarren txandari buruzko akordiorik ezean, jaiegunetako aparteko ordu borondatezkotzat joko dira.

-Aparteko orduen ordaina (AOH): larunbat arratsalde edo gauetan eta igande edo jaiegunetan aparteko orduak egin dituzten langileek ordain gisa atseden egunak hartzea aukeratzen dutenean jasotzen duten osagarria da. Zenbatekoa hauxe izanen da: langilearen lanbide kategoriaren arabera ordu arruntek duten balioaren eta jaiegunetako aparteko orduek duten balioaren arteko diferentzia.

-Larunbat, igande edo jaiegunetan lan egitearen ordaina (4. txanda): langileek osagarri hau jasotzen dute, bezeroaren hornidura-beharren ondorioz eta Enpresa Batzordearekin akordioa lortu ondoren, enpresak eskatuta 4. txandan lan egiten dutenean. Zenbatekoa 1,8 eurokoa izanen da aipatu egunetan lan egindako ordu bakoitzeko, langilearen taldea eta lanbide kategoria edozein izanik ere. Hitzarmen honen indarraldiko bigarren urterako, balio hori 14. artikuluan adierazitako portzentaje berean eguneratuko da.

-Prestasun osagarria: ordu arrunten kopurua handitu gabe, lan txanda bakoitza hasi baino 30 minutu lehenago agertzeko edo lan txanda bakoitza amaitu eta 30 minutu geroago irteteko berariaz izendatutako langileek osagarri hau kobratzen dute horretarako prest egoteagatik. Zenbatekoa hitzarmen honen 1. eranskinean adierazitakoa izanen da. Ordutegian aldaketa hori egiten den egun bakoitzeko aplikatuko da osagarria. Beraz, ez da finkagarria izanen.

-Mantentze lanetako teknikarien prestasun osagarria: mantentze lanetako teknikariek bakarrik jaso dezakete osagarri hau, beren lanaldi arruntetik kanpo laneratzeko prest egoteagatik, mantentze edo konpontze lanak egin beharra dagoenean lantokiko makina eta instalazioek ongi funtziona dezaten. Osagarri hau aparteko orduetatik bereiz kobratzen da. Zenbatekoa hitzarmen honen 1. eranskinean ageri da.

-Inplikazio plusa: 2009ko urtarrilaren 1etik aurrera plus hori kendu eginen da eta hura sorrarazten zuten lanbide taldeen lansarien barnean finkatuko da (urteko soldataren %0,6).

-Antzinatasun plusa: Industria Kimikoaren Hitzarmen Orokorrean araututakoari jarraituko zaio.

-Garraiorako plusa: garraio gastuak ordaintzeko soldataz kanpoko kontzeptua da. Zenbatekoa: hilean 10 euro.

V. KAPITULUA

Produkzioa eta metodoak

16. artikulua. Aurreikusitako produkzioak.

Txanda bakoitzaren hasieran langileei jakinaraziko zaie zein den lanaldi bakoitzerako aurreikusitako produkzioa, eta lanaldia amaitu ondoren, egindako produkzioaren berri emanen zaie.

17. artikulua. Lan metodoak.

Lan metodo zientifiko homologatua ezarri da; bertan lanpostu bakoitzari esleitutako eragiketen kopurua eta horiek egiteko behar den denbora jasoko dira.

Metodo hori langile bakoitzari azalduko zaio, egin beharreko eragiketak eta langile bakoitzak horiek burutzeko izanen duen denbora argi eta garbi zehaztuz.

Era berean, produkzio bolumenean metodoari eragiten dion aldaketarik egiten bada, Enpresa Batzordeari jakinaraziko zaizkio aldaketa guztiak, bai eragiketenak bai langileenak, eta behar adina denbora ezarriko da egokitzapenerako.

Enpresako zuzendaritzak eta Batzordeak osatutako elkarrizketa mahaia ezarri da, arlo hori aztertzeko eta bi aldeek beren jarrerak agertu eta ahalik eta adostasun handiena bilatzeko.

Enpresa Batzordeak prestakuntza espezifikoa jasoko du arlo horretan.

18. artikulua. Atsedenen mugigarritasuna.

Ogitartekoaren atsedenaldia modu antolatuan eta Produkzio Sailak zehaztutako orduetan eginen da, beti ordutegi bera errespetatzen saiatuta, bezeroarentzako sekuentziazio beharrek aldaketa puntuala eragin ezean.

Horretarako, erreferentziako ordutegi hauek ezarri dira:

-Goizeko txanda: 08:30 (ogitartekoa)-10:30-12:30.

-Arratsaldeko txanda: 16:00-18:00 (ogitartekoa)-20:30.

-Gaueko txanda: 00:00-02: 00 (ogitartekoa)-04:30.

VI. KAPITULUA

Prestakuntza

19. artikulua. Prestakuntza plana

Enpresak bere eragiketa beharrak asetzea ahalbidetuko duen prestakuntza plana ezarriko du urtero, hura Enpresa Batzordearekin adostuta.

Ikastaroa lan ordutegiaren barnean ematen bada, nahitaez joan beharko da; lan ordutegitik kanpo ematen bada, aitzitik, borondatez joanen da, prestakuntza planak ezartzen duenaren arabera behar-beharrezkotzat jotzen diren haietara izan ezik.

Lan ordutegitik kanpo egindako nahitaezko prestakuntza orduak ordu arrunt gisa ordainduko dira, langileak bere banakako lanaldia baino laburragoa egiten badu, edo 13.2 artikuluan aurreikusitako lan egin gabeko egunen ondorioz enpresarekin dagoen zorra murrizteko balio izanen dute. Langilea bere banakako lanaldiaz gainetik badabil, prestakuntza orduak aparteko ordu arrunt gisa ordainduko zaizkio.

Borondatezko orduak ez dira inola ere ordainduko.

Bezeroaren enpresako zein SAS enpresako eredu-aldaketa baten ondorioz langile batzuk sobran daudenean, aldaketaren egunak prestakuntzarako erabiliko dira. Antolamendu beharrek eta soberako langileei prestakuntza emateko ahalmenak baldintzatuko dute egun horien erabilera.

VII. KAPITULUA

Ekoizpenean eragina duten kanpoko gorabeherak

20. artikulua. Enpresarekin zerikusirik ez duten lan-geldialdiak.

Enpresaren produkzioan eragina duen kanpoko gorabeheratzat joko da bere produkzio arazo edo lan harremanen edo bere hornitzaileen produkzio arazo edo lan harremanen ondorioz gure bezero nagusiari, V.W.ri, lan arloan sortzen zaion aldaketa oro, baita S.A.S.ren hornitzaileei sortutako mota bereko aldaketak ere, enpresa honen jarduerari edota lan erritmoari eragiten diotenak. Kasu horietan, aurreikusitako lan-geldialdiak eta aurreikusi gabekoak bereiziko dira.

Aurreikusitakoei dagokienez, gorabehera horrek eragindako lehenengo bi lanegunetan enpresak erabakiko du egokitzat jotzen dituen eginkizunak egin daitezela. Hirugarren lanegunetik seigarrenera arte, langileak ez du enpresara joan beharrik izanen. Langilearen soldataren %50 enpresaren kargura izanen da eta gainerako %50a langileak larunbat goizetan egin dituen edo eginen dituen orduekin berdinduko da, hitzarmen honen 13. artikuluan xedatutakoaren arabera. Zazpigarren lanegunetik aurrera, enplegu-erregulazioko espedientea egiteko aukera hausnartuko da.

Aurreikusi gabekoei dagokienez, lehenbiziko bi lanegunetan langileak ez du enpresara joan beharrik izanen. Langilearen soldataren %50 enpresaren kontura izanen da eta gainerako %50a langileak larunbat goizetan egin dituen edo eginen dituen orduekin berdinduko da, hitzarmen honen 13. artikuluan xedatutakoaren arabera. Hirugarren lanegunetik aurrera, aurreikusitako lan-geldialdietarako lehenengo egunetik araututakoari jarraituko zaio.

VIII. KAPITULUA

Laneko segurtasuna eta osasuna

21. artikulua. Lan arriskuen prebentzioa eta ingurumena.

Enpresa ohartzen da lan jardueraren arriskuez. Horregatik lan istripuak gutxitzera bideratutako neurriak zorroztuko ditu eta hertsiki beteko du Laneko Arriskuen Prebentzioari buruzko Legean eta hura garatzen duten erregelamenduetan ezarritakoa. Horretarako, urtero osasun azterketak eginen ditu, Segurtasun eta Osasun Batzordeak zehazten duen mailakoak.

Bestalde, langileen legezko ordezkariek enpresako zuzendaritzarekin batera lan eginen dute enpresak arriskuen prebentzioaren arloan agintzen dituen neurriak ezartzen, langileen artean arauok zorrotz bete beharra, batez ere lanpostuaren ordena eta garbitasunari dagokionez, eta NBEak erabiltzeko arauak bete beharra zabalduz.

Segurtasun eta Osasun Batzordeak istripu mutualitatearen jardueraren jarraipena eta kontrola eta ingurumenari buruzko gaiak sartuko ditu bere aldizkako jardueran.

Enpresak segurtasun betaurreko graduatuak emanen dizkio behar dituenari, baita barne-zola ortopedikoak ere, osasunaren zainketa zerbitzuak hala agintzen duenean.

Enpresak fabrikan gehiegizko tenperaturak jaisteko behar diren azterlanak eginen ditu 2005. urtean.

Osasunaren zainketa zerbitzuak gaueko lanak langileen osasunari modu berezian eragiten dizkion kasuak diagnostikatuko ditu, eta horren ondorioz, kasu horietan langileak ez du gauez lan eginen.

IX. KAPITULUA

Lizentziak

22. artikulua. Lizentziak eta eszedentziak.

1. Lizentzia ordainduak: langilea, aurretik abisatu eta justifikatuta, lanetik atera daiteke, ordainsaria jasotzeko eskubidearekin, arrazoi hauetako bat dela medio eta denbora tarte honetarako:

a) Langilearen ezkontzagatik, 16 egun natural; egun horiek urteko oporrei batu ahalko zaizkie. Baimen hori ezkontza baino hiru egun lehenago hasi ahalko da.

b) Semearen edo alabaren jaiotza edo adopzioagatik, 4 egun natural: jaiotza edo adopzio egunean hasita bi egun, eta baimena hasi ondoko hamabost egunen barnean beste bi egun, langileak nahi duenean hartzekoak. Haurraren eritasunagatik edo langileak egin beharreko joan-etorriengatik, beste bi egun hartu ahal izanen dira.

c) Langilearen ezkontidearen, seme-alaba, guraso edo anai-arreben heriotzagatik, 5 egun natural. Langilearen edo ezkontidearen aitona-amona eta biloben heriotzagatik eta ezkontidearen guraso eta anai-arreben heriotzagatik, 2 egun natural. Baimen horri beste 2 egun gehitu ahal izanen zaizkio joan-etorriak egin behar direnean. Gainerako kasuetan (lehengusuak, osaba-izebak eta ilobak) hiletara joateko behar-beharrezkoa den denbora hartuko da.

d) Langilearen edo ezkontidearen guraso, aitona-amona, seme-alaba, biloba, ezkontide edo anai-arreben istripu edo eritasun larriagatik edo ospitaleratzeagatik, 2 lanegun, eta joan-etorriak egin behar direnean, lau lanegun, hitzarmen osagarrian ezarritakoaren arabera. Ospitaleratze kasuetan, lizentzia egunak ez dira ahaideak ospitalean ematen dituen egunak baino gehiago izanen, eta ospitalean egiten duen egonaldira mugatuko dira. Auzitegi Gorenak 1998ko otsailaren 18ko Epaian emandako jurisprudentziako doktrina oinarri hartuta, langilearen anai-arreben ezkontideak ezkontza bidezko bigarren mailako ahaidetzat hartuko dira, indarra duen Langileen Estatutuaren 37.2.b) artikuluari jarraikiz.

Ospitaleratzea dakarren gaixotasun larria egotekotan -hiltzeko arriskua egonda, kirurgia handiko ebakuntza eginda edo anestesia orokorra aplikatuta-, lizentzia hori lau egunekoa izanen da.

Puntu honetan aipatutako ahaideen ebakuntza kirurgikoagatik, ospitaleratu beharra izan gabe medikuak etxean atseden hartzeko agintzen badu, langileak 2 egun natural hartu ahalko ditu.

e) Odol bereko edo ezkontza bidezko seme-alaba, guraso edo anai-arreben ezkontzagatik: egun natural bat, ezkontzaren eguna. Langileak gaueko txandan lan egiten badu, baimena ezkontzaren bezperan hartzen ahalko du.

f) Ohiko bizilekua aldatzeko, egun bat.

g) publikoa eta pertsonala den eginbehar saihestezina betetzeko, behar-beharrezkoa den denbora, boto ematekoa barne. Aldi jakin bat lege edo hitzarmen bidez ezarritako arau batean jasota dagoenean, absentziaren iraupenari eta ordain ekonomikoari dagokienez arau hartan xedatutakoari jarraituko zaio.

h) Hezkuntza eskubide orokorrak eta lanbide prestakuntza jasotzeko ezarritako denbora, indarreko legedian araututako kasuetan eta moduan.

i) Erditu aurreko azterketa medikoak egiteko eta erditzeko prestatzeko tekniketan trebatzeko, behar-beharrezkoa den denbora, lanorduetan egin behar badira.

j) Langilearen kargu dagoen lehen graduko ahaideari medikuaren kontsultara laguntzeko behar-beharrezkoa den denbora, kontsultategiko ordutegia eta lanaldia batera gertatzen baldin badira. Lizentzia honetarako eskubidea zehazte aldera, 2009ko abenduaren 31ra arteko indarra duen Industria Kimikoko Hitzarmenaren 48. artikuluan dauden argibideei jarraituko zaie.

k) Bederatzi hilabetetik beheitiko semeari edo alabari esnea ematen dioten emakumezko langileek eskubidea dute lanetik ordubetez lekutzeko. Denbora hori bi zatitan bana dezakete.& Emakumezko langileak eskubide hori ohiko lanaldiaren ordu erdiko murrizketarekin ordezka dezake, hala nahi badu, helburu berbererako.& Baimen hori amak nahiz aitak hartzen ahal dute, beren nahierara, biak lanean ari badira.

l) Eritasuna dela-eta langileak lan orduetan medikuaren kontsultara joan beharra duenean, behar adina denbora hartu ahalko du ordainsaririk galdu gabe. Sendagileak edo behar bezala baimendutako langileak -Gizarte Segurantzakoa izan edo ez- ikus-onetsitako agiria aurkeztu beharko da denbora hori justifikatzeko.

m) Bertaratze-indizea (%95) betetzen bada, langileak egun bat izanen du lehen mailako ahaide bati edozein motatako esku-hartze batera -publikoa edo pribatua- laguntzeko.

a), b), c) eta d) letretan adierazitakoei dagokienez, behar bezala egiaztatutako salbuespen kasuetan lizentziak behar adina luzatu ahal izanen dira, inguruabarren arabera. Horretarako, baldintzak hitzartuko dira, eta gehitutako egunetako soldata ez jasotzea adostu ahal izanen da.

Ezkondu gabeko bikote egonkorra, legeak arautzen duen bezala, osatzen duten langileek hitzarmen honen 22.1 c) artikuluko baimenak hartu ahalko dituzte, enpresari egoera hori frogatzen badiote horretarako sortutako erregistro publikoko inskripzioaren bidez.

2. Soldatarik gabeko lizentziak: probaldia gainditu eta enpresan sei hilabete baino gehiago daramaten langileek soldatarik gabeko lizentzia eskatu ahal izanen dute, hiru hilabetekoa gehienez. Enpresak baiezkoa emanen die horrelako eskaerei, salbu eta lizentzia emateak produkzio prozesuan traba larria egiten duen kasuetan edo eskubide hori baliatzen ari diren langileak lantokiko plantillako langileen %2 baino gehiago direnean. Lizentzia bat amaitzen denetik bi urte igaro arte ezin izanen da beste lizentzia bat hartu.

3. Eszedentziak:

a) Borondatezko eszedentzia: urtebeteko zerbitzua eman duten langileek borondatezko eszedentzia eska dezakete, gutxienez lau hilabeterako eta gehienez bost urterako. Eszedentziako denbora ez da inolako ondoriotarako kontatuko eta ezin izanen da hartu iraupen mugatuko kontratuetan. Eszedentzia eskaerei buruzko ebazpena emateko, enpresak hilabeteko epea izanen du, lan premiak kontuan hartuta, eta, ahal delarik, ematearen alde egonen da, ikasketak bukatzeko, familiako arazoetarako eta antzeko kasuetarako eskatzen denean. Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero.& Eszedentzia bukatu baino lehen itzultzea eskatzen ez duen langileari behin betiko baja emanen zaio enpresan.& Langileak eskatzen duenean, lanera itzuliko da, baldin eta bere lanbide taldean lanpostu hutsik bada. Bere lanbide taldean lanpostu hutsik ez bada, baina bai, ordea, beheragokoan, eszedentziatik itzuli denak aukera du lanpostu hori betetzeko, lanpostu horri dagokion lansariarekin, harik eta bere lanbide taldean lanpostu hutsen bat sortu arte, edo lanera ez itzultzea erabaki dezake bere lanbide taldean lanpostu hutsa sortu arte.

b) Seme-alabak edo ahaide ezinduak zaintzeko eszedentzia: langileek eskubidea dute hiru urteko eszedentzia hartzeko, gehienez, seme-alaba bakoitza zaintzeko, norberak izandakoa edo adoptatua izan, edo etxean hartua, bai modu iraunkorrean bai adoptatu aurreko harrera-fasean. Hiru urte horiek haurra jaiotzen denetik edo, bestela, epaileen edo administrazioaren ebazpenaren egunetik aurrera kontatuko dira.& Urtebetera arteko eszedentziarako eskubidea izanen dute, halaber, adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen ahaideren bat -odol bereko edo ezkontza bidezko bigarren mailara artekoa- zaindu behar duten langileek. Atal honetan ezartzen den eszedentzia langile bakoitzaren eskubidea da, gizonezkoa izan edo emakumezkoa izan, eta zatika hartzen ahal da.& Hala ere, pertsona bera zaintzeko eskubidea enpresa bateko bi langilek edo gehiagok izaten badute, enpresak aukera izanen du aldi berean erabili nahi den eskubidea mugatzeko, funtzionamenduarekin lotutako bidezko arrazoirik baldin badago.& Beste subjektu eragile batek eszedentzialdi berri bat sortzen duenean, hori hastearekin bukatuko da ordura artekoa, halakorik izanez gero.& Langileak letra honetan ezarritakoaren arabera eszedentzian pasatzen duen denbora antzinatasunerako kontatuko da, eta eskubidea izanen du lanbide prestakuntzako ikastaroetara joateko, enpresaburuak deituta, batez ere lanera itzuli behar duenean. Lehenbiziko urtean lanpostua gordetzeko eskubidea izanen du.& Epe hori bukatuta, gordeko zaion lanpostua lanbide talde berekoa edo kategoria baliokidekoa izanen da.

Langilea familia ugari bateko kidea denean, eszedentzia 15 hilabetera luzatuko da, gehienez, familiaren kategoria orokorra bada, eta 18 hilabetera, gehienez, kategoria bereziko familia ugaria bada.

c) Nahitaezko eszedentzia: eszedentzia honek lanpostua gorde eta antzinatasuna kontatzeko eskubidea emanen du; lanera joatea galarazten duen kargu publiko edo sindikal baterako izendatu edo hautatua izateagatik ematen da (kargu sindikalak probintzia mailakoa edo eremu zabalagokoa izan behar du). Lanera itzultzea kargu publiko edo sindikala utzi eta hurrengo hilabetearen barnean eskatu beharko da.

d) Eszedentzia berezia.

Eritasuna: langile finkoek eszedentzia hori hartzen ahalko dute, aldi baterako ezintasuneko egoerak irauten duen bitartean.

23. artikulua. Ordu sindikalak.

Erreferentziako arauetan ezarritakoarekin bat, Enpresa Batzordeak legez ezarritako helburuetarako erabiliko dituen ordu sindikalen berri emanen du aldez aurretik, langile batzuek beren lanpostua utzi beharko dutela kontuan hartuta enpresak lana berrantolatzeko behar beste denbora izan dezan.

Ahal den guztietan enpresak beste langile batzuk jarriko ditu haien ordez, kasuan kasuko txandan hasiera batean aurreikusitako langile kopurua murriztu ez dadin.

Ordu sindikalak metatzeari dagokionez, Industria Kimikoaren Estatuko Hitzarmenean ezarritakoari jarraituko zaio.

X. KAPITULUA

Lan harreman kolektiboak

24. artikulua. Bitartekotza eta arbitrajea.

Aldeek itundu dutenez, hitzarmen honen interpretazioan eta aplikazioan sor daitezkeen gatazkak eta hitzarmenaren aplikazio eremuko langileei eta enpresaburuei eragiten ahal dieten beste guztiak Nafarroako Lan Gatazkak Konpontzeko Auzitegiaren esku jarriko dira, adiskidetze eta bitartekotza faseetan.

Konpromisoa agertu dute, halaber, ukituriko alderdiak auzitegi horren arbitraje prozedurara bultzatzeko.

Beraz, artikulu honek balio du bi aldeak gatazken arbitraje organoari berariaz atxikitzen zaizkiola adierazteko eraginkortasun osoz eta, horren ondorioz, ondoko garrantziaz: itunak enpresaburuak, ordezkari sindikalak eta langileak behartzen ditu beren desadostasunak aipatutako organoaren bitartekotza eta adiskidetze prozeduretara eramatera, auzibidera jo aurretik. Beraz, ez da beharrezkoa aldeen desadostasun edo gatazka bakoitzerako berariaz eta banaka atxikitzea, arbitrajearen mendean jarri ezean; hitzarmen hau sinatu dutenek arbitrajea ere sustatu eta bultzatzeko konpromisoa hartu dute.

Era berean, lan hitzarmen kolektibo honen sinatzaileek hitzeman dute ahaleginak eginen dituztela hitzarmenaren aplikazio eremuko langileen eta enpresaburuen artean sor daitezkeen banakako gatazkak Nafarroako Lan Gatazkak Konpontzeko Auzitegiaren aurrean adiskidetze, bitartekotza eta arbitraje prozeduren mendean borondatez eta espresuki jar daitezen, Nafarroako Foru Komunitateko lan-gatazkak auzibidetik kanpo ebazteko Lanbide arteko Akordioaren bigarren xedapen gehigarrian adierazten diren gaietan.

XI. KAPITULUA

Laguntza baldintzak

25. artikulua. Amatasun baja.

Amatasun baja langilearen oporraldian gertatzen bada, oporraldi osoa edo zati bat geroratu daiteke, baja amaitu eta segituan hartzeko, opor egunik galdu gabe.

26. artikulua. Bizi eta istripu asegurua.

Enpresak heriotzaren eta erabateko baliaezintasun iraunkorraren arriskuak estaltzeko aseguru poliza kontratatuko du langileentzat edo haien legezko jaraunsleentzat, hurrengo kapital honekin:

-Heriotza naturala:& 8.000,00 euro.

-Laneko istripuaren ondoriozko heriotza:& 36.000,00 euro.

-Laneko istripuaren ondoriozko baliaezintasun osoa: 60.000,00 euro.

-Laneko istripuaren ondoriozko baliaezintasun erabatekoa: 60.000,00 euro.

-Lanbide eritasunaren ondoriozko baliaezintasun osoa: 60.000,00 euro.

-Lanbide eritasunaren ondoriozko baliaezintasun erabatekoa: 60.000,00 euro.

27. artikulua. Jaiotza-laguntzak.

Enpresak 300,00 euro emanen dizkio langileari jaiotza edo adopzio bakoitzeko, eta kontzeptu horrengatiko ordainketa bakarra izanen da.

28. artikulua. Eritasun arruntaren edo haurdunaldiko arriskuaren ondoriozko lanerako ezintasun iragankorrengatiko osagarriak.

1) Eritasun arrunta: urte bakoitzeko lehenbiziko bi bajetan, enpresak oinarri arautzailearen %65eko osagarria ordainduko du prozesuko lehen, bigarren eta hirugarren egunetan.

Prozesuko 4. egunetik 20.era bitartean enpresak lanerako ezintasun iragankorreko prestazioa osatuko du oinarri erregulatzailearen %80raino.

Prozesuko 21. egunetik langileak alta jaso arte, enpresak lanerako ezintasun iragankorreko prestazioa osatuko du oinarri arautzailearen %95eraino.

2) Haurdunaldiko arriskua: enpresak soldataren %100erainoko osagarria ordainduko du prozesu osoan.

XII. KAPITULUA

Bestelakoak

29. artikulua. Batzorde paritarioa.

Batzorde paritarioa ezarri da, Enpresa Batzordeko hiru kidek eta zuzendaritzak aukeratutako beste hiru kidek osatua, hitzarmena nola betetzen den zaintzeko eta haren edukia interpretatzeko.

30. artikulua. Zuzenbide osagarria.

Hitzarmen honetan ezarritakoa lehenetsiko da Industria Kimikoaren Hitzarmen Orokorrean xedatutakoaren aurrean. Hitzarmen orokor hori ordezko zuzenbidea izanen da enpresa-hitzarmen honetan aurreikusi gabeko gai guztietarako. Hala ere, une bakoitzean indarrean dagoen Industria Kimikoaren Hitzarmen Orokorrak hitzarmen honetako alderdiren bat hobetzen badu, hobekuntza hori aplikagarria izanen da enpresan.

31. artikulua. Nahitaezko erretiroa, erretiro aurreratua eta erretiro partziala.

Nahitaezko erretiroa 65 urterekin hartu behar da, baldin eta ukitutako langileak Gizarte Segurantzako erretiro pentsioa eskuratzeko gutxieneko gabealdia badu eta enplegu politikaren helburuak betetzen badira, hots, enpleguaren egonkortasunaren hobekuntza, aldi baterako kontratuak mugagabe bihurtzea, eta enpleguaren kalitatea sustatzen duen beste edozein.

Langileek erretiro aurreratua hartu ahal izanen dute, legean ezarri bezala.

Erretiro partziala ere hartu ahal izanen da, eta horrela erretiratzen diren langileak errelebo kontratuen bidez ordeztuko dira. Inoiz hori ezinezkoa gertatzen bada, behar bezala justifikatutako arrazoiak emanen dira.

32. artikulua. Laneko arropa.

Urtero langileek bi galtza sorta eta bi elastiko sorta jasoko dituzte, sei hilean behingo bi emanalditan. Urtean behin, neguan, jakatxo osagarri bat jasoko dute.

Segurtasun oinetakoei dagokienez, arriskuen ebaluazioak lanpostu bakoitzerako zehazten duenari jarraituko zaio.

Haurdun dauden langileei beren egoerarako laneko arropa egokia emanen zaie. Horretarako, lehenbailehen jakinarazi behar diote enpresari haurdun daudela.

33. artikulua. Aurrerakin bereziak.

Behar bezala justifikatutako beharra dagoenean, enpresak lansariaren aurrerakinak eman ahal izanen ditu, gehienez ere 3.000,00 euro. Aurrerakina 3 eta 12 hilabete bitarteko epean itzuliko da, langilearen nominatik kenduta.

Gehienez 15 eskaera onartuko dira.

Horrelako aurrerakina lortu ahal izateko ezinbesteko baldintza hauek bete behar dira: enpresan bi urteko antzinatasuna edukitzea, plantillako langile finkoa izatea, azken 12 hilabeteetan diziplina neurririk jaso ez izatea, eta bertaratze-indizea gutxienez %95ekoa izatea.

34. artikulua. Langile ezinduak.

Ezintasun iraunkor partziala onartua duten langileak, ahal dela, beren ahalmenetarako egokia den lanpostuan jarriko dira, eta arlo honetako legezko ondorioak sortuko dira.

35. artikulua. Bertaratze-indizea.

Banakako bertaratze-indizea sortu da hitzarmen honetako hainbat gorabeheratarako erreferentzia gisa. Hala, 100eko oinarria harturik, laneko hutsegite guztiak kenduko dira hilero, indize hori lortzeko. Horretarako ez dira kontuan hartuko laneko istripu edo eritasunen ondoriozko ezintasun iragankorreko bajak, amatasunaren edo haurdunaldiko arriskuaren ondoriozko ezintasun iragankorreko bajak eta kreditu sindikaleko orduak. Indize honen erreferentzia-balioa aurreko 12 hilabeteetako batez bestekoa izanen da.

* Egun naturaleko aplikatzekoak.

Larunbatetako lanaren ordaina:

Iragarkiaren kodea: F0917342