Iragarkia

73. ALDIZKARIA - 2009ko ekainaren 15a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

1926/2009 EBAZPENA, maiatzaren 27koa, Nafarroako Enplegu zerbitzuko zuzendari kudeatzaileak emana, Nafarroako Gobernuak krisiaren kontra erabakitako neurrien barnean, toki entitateei langabeak kontratatzeko diru-laguntzak emateko deialdia onesten duena, interes orokorreko eta sozialeko obra eta zerbitzuak egiteko, Estatuko Administrazio Orokorraren eta bere erakunde autonomoen organoekiko, unibertsitate publikoekiko eta irabazteko asmorik gabeko erakundeekiko lankidetzaren eremuan.

Maiatzaren 14ko 811/1999 Errege Dekretuaren bidez Nafarroako Foru Komunitateari eskualdatu zitzaizkion Estatuko Administrazioaren zerbitzu eta eginkizunak, Enplegu Institutu Nazionalak (INEM) lan, enplegu eta prestakuntzari dagokionez kudeatzearen arlokoak. Zerbitzu eta eginkizun horiek Industria, Merkataritza, Turismo eta Lan Departamentuari esleitu zitzaizkion, eta horren barruan Nafarroako Enplegu Zerbitzua izeneko erakunde autonomoari, urriaren 4ko 501/1999 Foru Dekretuaren bidez.

1998ko urriaren 26ko Aginduaren bigarren xedapen gehigarriaren eta Lan eta Gizarte Gaietarako Ministerioaren martxoaren 21eko 816/2005 aginduaren bidez zera ezarri zen: Estatuko Enplegurako Zerbitzu Publikoak lan, enplegu eta prestakuntzaren arloan egindako kudeaketaren eskualdaketa beren gain hartu duten autonomia erkidegoek agindu horietan ezarrita dagoena egokituko dute beren antolaketaren eta beren lurralde eremuan aplika daitekeen araudiaren ondoriozko berezitasunetara.

Industria eta Teknologia, Merkataritza eta Laneko kontseilariaren otsailaren 10eko 15/2005 Foru Aginduaren bidez, interes orokorreko eta sozialeko obra eta zerbitzuetarako langabeak kontratatzeko toki entitateentzako diru-laguntzak arautu ziren.

Halaber, Nafarroako Enplegu Zerbitzuko zuzendari kudeatzailearen abenduaren 11ko 3600/2006 Ebazpenaren bidez, Lan eta Gizarte Gaietarako Ministerioaren 1997ko abenduaren 19ko Aginduan eta Lan eta Gizarte Gaietarako Ministerioaren uztailaren 20ko 2435/2004 Aginduan ezarritako diru-laguntzak emateko deialdia onetsi zen, Estatuko Administrazio Orokorreko organoekiko eta irabazi asmorik gabeko erakundeekiko lankidetzaren esparruan. Agindu horietan, Enplegu Zerbitzu Publikoek diru-laguntza publikoak emateko oinarri arau-emaileak finkatu ziren, interes orokorreko eta sozialeko obra eta zerbitzuetarako langileak kontratatzen dituzten Estatuko Administrazio Orokorraren eta haren erakunde autonomoen organoekiko, unibertsitate publikoekiko eta irabazteko asmorik gabeko erakundeekiko lankidetzaren eremuan.

Krisi ekonomikoko egoera berezi hau dela-eta, Nafarroako Gobernuak krisiaren kontrako neurri sorta zabala abian jarri du, Foru Komunitateko ekonomia eta enplegua berpizteko asmoz. Deialdi honen helburua langabezian dauden eta Nafarroako Enplegu Zerbitzuko enplegu agentzietan lan-eskatzaile gisa inskribaturik dauden pertsonen kontratazioa sustatzea da, zehazki kotizaziopeko langabezia-prestaziorik jasotzen ez dutenena eta oinarrizko errentaren prestazioa jasotzen duten pertsonena.

Helburu hori betetzeko bi milioi euro erabiliko dira 2009ko ekitaldian langabezian dauden eta enplegu agentzietan inskribaturik dauden pertsona horien -eta soilik horien- kontrataziorako, interes orokorreko eta sozialeko obra eta zerbitzuak egiteko.

Diru-laguntzei buruzko azaroaren 9ko 11/2005 Foru Legeak diru-laguntzak emateko prozedura arrunta ezartzen du. Haren arabera, besteak beste, deialdia eta deialdiaren oinarri arau-emaileak ezarri behar dira, eta arrazoi horregatik, bidezkoa da onestea toki entitateei diru-laguntzak emateko deialdia, Estatuko Administrazio Orokorraren eta bere Erakunde Autonomoen organoekiko, Unibertsitate publikoekiko eta irabazteko asmorik gabeko erakundeekiko lankidetzaren eremuan interes orokorreko eta sozialeko obra eta zerbitzuak egiteko langabeak kontrata ditzaten, Nafarroako Gobernuak krisiaren kontra erabakitako neurrien barnean.

Azaldutakoarekin bat, maiatzaren 21eko 47/2007 Foru Dekretuak onetsi zituen Nafarroako Enplegu Zerbitzuaren estatutuen 13. artikuluak ematen dizkidan eskudantziak erabiliz,

EBATZI DUT:

1.-Ebazpen honen eranskinean dauden oinarri arau-emaileak onestea, baita 2009. urterako deialdia ere, toki entitateei diru-laguntzak emateko, Estatuko Administrazio Orokorraren eta bere erakunde autonomoen organoekiko, unibertsitate publikoekiko eta irabazteko asmorik gabeko erakundeekiko organoekiko lankidetzaren eremuan, interes orokorreko eta sozialeko obra eta zerbitzuak egiteko langabeak kontrata ditzaten, Nafarroako Gobernuak krisiaren kontra erabakitako neurrien barnean.

2.-Diru-laguntzak 2009ko gastuen aurrekontuko "Krisiaren kontrako neurriak: langabetuak interes sozialeko obretarako kontratatzeko diru-laguntzak" izeneko 881001 84100 4609 241102 kontu-sailaren kargura ordainduko dira, gehieneko muga 2000.000 euro direla.

3.-1.000.000 euroko gastua onartzea -honi dagokio: Krisiaren kontrako neurriak. Interes orokorreko eta sozialeko obra eta zerbitzuetarako langabeak kontratatzeko toki entitateentzako diru-laguntzak (RCSA: 1928)- eta 1.000.000 euroko gastua -honi dagokiona: Krisiaren kontrako neurriak. Interes orokorreko eta sozialeko obra eta zerbitzuetarako langabeak kontratatzeko irabazteko asmorik gabeko erakundeentzako diru-laguntzak (RCSA: 1930)-, aurreko zenbakian adierazi den aurrekontuko kontu-sailaren kargura. Aipatu bi laguntzetako batek zehaztu den gastua agortzen ez badu, soberan dagoen kopurua beste deialdia finantzatzeko erabiltzen ahalko da, beharrezkoa bada.

4.-Ebazpen honek ez dio administrazio bideari bukaera ematen eta haren kontra gora jotzeko errekurtsoa jar daiteke, Nafarroako Gobernuko Berrikuntza, Enpresa eta Enpleguko kontseilariari zuzendua, argitaratu eta biharamunetik hilabeteko epean.

Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, argitaratu eta biharamunetik hasita. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

5.-Ebazpen hau eta eranskina Nafarroako Aldizkari Ofizialean argitaratzea.

Iruñean, 2009ko maiatzaren 27an.-Nafarroako Enplegu Zerbitzuko zuzendari kudeatzailea, José Luis Ruiz Ciruelos.

ERANSKINA

Oinarri arau-emaileak

1. oinarria.-Xedea.

Oinarri hauen xedea Nafarroako Foru komunitatean toki entitateei diru-laguntzak emateko baldintza eta betebeharrak arautzea da, Estatuko Administrazio Orokorraren eta bere erakunde autonomoen organoekiko, unibertsitate publikoekiko eta irabazteko asmorik gabeko erakundeekiko lankidetzaren eremuan, interes orokorreko eta sozialeko obra eta zerbitzuak egiteko langabeak kontratatzeko, aurrekontuko gehieneko muga 2000.000 euro direla.

I. kapitulua

Toki entitateentzako laguntzen programa

2. oinarria.-Onuradunak.

Kapitulu honetan aurreikusita dauden diru-laguntzen onuradun izan daitezke Nafarroako toki entitateak edo toki administrazio bati loturik edo haien mende dauden entitateak, baldin eta oinarrizko errenta jasotzen duten langabeak kontratatzen badituzte interes orokorreko eta sozialeko obra edo zerbitzuak egiteko, gutxienez sei hilabeterako, eta dagokien proiektua egiteko gaitasun teknikoa eta kudeaketa gaitasuna badituzte.

3. oinarria.-Diru-laguntzen helburua eta zenbatekoa.

1. Eman beharreko diru-laguntzak, deialdi honetan ezarritako betebeharrak beterik, interes orokorreko eta sozialeko obra eta zerbitzuak egiteko kontratatzen diren langileen soldata kostuak finantzatzeko erabiliko dira.

2. Toki entitate eskatzaileek jasoko duten diru-laguntzaren zenbatekoa soldata kostu osoen %80 gehienez ordaintzeko adinakoa izanen da, enpresak indarreko hitzarmen kolektiboaren arabera kontratatutako langabetu bakoitzeko Gizarte Segurantzari ordaindu beharreko kotizazioa barne dela.

Diruz lagun daitezkeen kostuetatik bazter geratuko da obra amaieragatiko kalte-ordaina.

4. oinarria.-Obra eta zerbitzuak hautatzeko betebehar eta irizpideak.

1. Entitate eskatzaileek egin beharreko obra eta zerbitzuek betebehar hauek bete beharko dituzte:

a) Interes orokorreko eta sozialeko obra eta zerbitzuak izan behar dira, eta toki korporazioen eskumenaren mendekoak.

b) Entitate eskatzaileek administrazio zuzeneko araubidean edo exekuzioa adjudikatuta duten enpresen bitartez egin behar dituzte obra eta zerbitzuok.

c) Obra eta zerbitzuak egin edo ematean oinarrizko errenta jasotzen duten langabeen prestakuntza eta lanbide jarduera bultzatu behar dira.

d) Obra edo zerbitzua egiteko, oinarrizko errenta jasotzen duten langabeen gutxieneko portzentajea %75 izan behar da.

e) Obra eta zerbitzuek gutxienez sei hilabete iraun behar dute.

f) Diru-laguntza eskatzen duen entitateak aurrekontuko diru kopuru nahikoa izan behar du dena delako obra edo zerbitzua egiteko diruz lagunduta ez dauden kostuak bere gain hartzeko. Hori, entitateak egindako ziurtagiri egokiaren bitartez egiaztatu beharko da.

2. Oinarri honen 1. idatz-zatiko betebeharrak betetzen dituzten obra eta zerbitzuen artean hauek izanen dute lehentasuna:

a) Interes orokor eta sozial handienekoak izanik batik bat ondoko jarduera hauetako batean egiten direnek: onura kolektiboko zerbitzuak, besteak beste etxebizitza hobetzea, zaintza eta segurtasuna, hiri espazio publikoei balio handiagoa ematea, garraio kolektiboak, hurbileko saltokiak, baita hondakinen kudeaketari, uren kudeaketari eta gune naturalen babes eta mantentzeari dagozkionak ere, eta energiaren kontrolean eragin zuzena edo zeharkakoa dutenak ere bai.

Aisialdi eta kultur zerbitzuek, besteak beste turismoaren sustapena, tokiko kultur garapena, kirolaren sustapena eta ikus-entzunezkoen sektorea.

Eguneroko bizimodurako zerbitzu pertsonalizatuek, besteak beste haurrak zaintzea, pertsona ezgaituei edo adinekoei etxean zerbitzuak ematea, eta arazoak dituzten eta deserrotze soziala jasaten duten gazteei laguntzea.

b) Ahalik eta lanpostu gehienak modu iraunkorrean sortzeko aukera ematen duten proiektuek.

c) Laneratze-maila handiena egiaztatzen duten proiektuek, dela proiektua amaitzean langileak zuzenean entitate eskatzailean edo enpresa adjudikaziodunean sartzen direlako, dela Nafarroako Enplegu Zerbitzuak nahikotzat jotzen duen beste edozein laneratze formula erabiltzen delako.

d) Kasuan kasu programa honen eragingarritasuna hobetzen duten ekintza osagarriak egiteko entitate eskatzaileen finantzaketa duen proiektuek. Horretarako, kasu bakoitzerako inbertsio-ahalegina kontuan hartuko da.

5. oinarria.-Langileak hautatzeko betebehar eta irizpideak.

1. Obra eta zerbitzuak egiteko kontratatzen diren eta diru-laguntzaren xede diren langileak, langabezian egon behar dira eta Nafarroako Enplegu Zerbitzuko enplegu agentzietan lan-eskatzaile gisa inskribaturik egon behar dira; halaber, Nafarroako Gobernuko Familia, Gazteria, Kirol eta Gizarte Gaietako Departamentuaren bitartez oinarrizko errentaren prestazioa jasotzen egon behar dira.

Famili unitate bakoitzeko kontratazio bati soilik emanen zaio diru-laguntza. Deialdi honen ondorioetarako, famili unitatea da ezkontideek edo bikote egonkorreko kideek eta odol bidezko bigarren mailara bitarteko ahaideek eta ezkontza bidezko lehenengo mailara bitarteko ahaideek osatzen dutena, baldin eta bizileku berean bizi badira.

2. Kontratatzen diren langileak hautatzeko irizpide hauek hartuko dira kontuan:

a) Eskainitako lanpostuari egokitzea.

b) Famili ardurak izatea, hots, kontratatzen den langabeak bere kargura ezkontidea, hogeita sei urtetik beherako seme edo alabak, ezgaitasunak dituzten adinekoak edo harrerako adingabeak izatea.

c) Adina, eta emakumea izatea ala ez.

II. kapitulua

Estatuko Administrazio Orokorraren eta bere erakunde autonomoen organoekiko, unibertsitate publikoekiko eta irabazteko asmorik gabeko erakundeekiko lankidetzaren eremuko laguntzen programa

6. oinarria.-Onuradunak.

Kapitulu honetan aurreikusita dauden diru-laguntzen onuradun izan daitezke Estatuko Administrazio Orokorraren eta bere erakunde autonomoen organoak, unibertsitate publikoak eta irabazteko asmorik gabeko erakundeak, baldin eta Nafarroako Enplegu Zerbitzuarekiko lankidetzaren eremuan kotizaziopeko langabezia-prestaziorik jasotzen ez duten langabeak kontratatzen badituzte gutxienez sei hilabetez eta gehienez bederatzi hilabetez, interes orokorreko eta sozialeko obra eta zerbitzuak egiteko, eta proiektua gauzatzeko gaitasun teknikoa eta kudeaketa gaitasuna badituzte.

Diru-laguntzaren xede diren proiektuak Nafarroako lurraldean egin beharko dira.

7. oinarria.-Diru-laguntza publikoen helburua eta zenbatekoa.

1. Eman beharreko diru-laguntzak, kotizaziopeko langabezia-prestaziorik jasotzen ez duten eta interes orokorreko eta sozialeko obra eta zerbitzuak egiteko kontratatzen diren langileen soldata kostuak finantzatzeko erabiliko dira.

2. Entitate onuradunek jaso dezaketen gehieneko diru-laguntza honelaxe zehaztuko da: kontrataturiko langabeen kopurua kontratuak dirauen hilabeteen kopuruarekin eta kontrataturiko langileen Gizarte Segurantzako kotizazio taldearen arabera dagokien moduluaren zenbatekoarekin biderkatuz, oinarri honetako 3. idatz-zatian xedaturikoarekin bat.

Gehieneko diru-laguntza hori proportzioz gutxituko da, eginiko lanaldiaren arabera, lanaldi partzialeko kontratuak izanez gero.

3. Kontrataturiko langileen kotizazio talde bakoitzari dagokion modulua hauxe izanen da:

A modulua: Diruz lagundutako soldata kostuak, guztira, ondorio askotarako errenta-adierazle publikoa (IPREM) halako bat eta erdi izanen dira, hauek barne direla: aparteko bi pagari dagokien zati proportzionala (bi horietako bakoitzaren zenbatekoa IPREM horren hileko ordainketa baten baliokidea dela), edo gutxiago izanez gero, aplikatu beharreko hitzarmen kolektiboan aurreikusten den zenbatekoa, eta Gizarte Segurantzako 10. eta 11. kotizazio taldeetan kontrataturiko langile bakoitzari dagozkion kontzeptu guztiengatik Gizarte Segurantzari dagokion kotizazioa ere bai.

B modulua: Diruz lagundutako soldata kostuak, guztira, ondorio askotarako errenta-adierazle publikoa (IPREM) halako bi izanen dira, hauek barne direla: aparteko bi pagari dagokien zati proportzionala (bi horietako bakoitzaren zenbatekoa IPREM horren hileko ordainketa baten baliokidea dela), edo gutxiago izanez gero, aplikatu beharreko hitzarmen kolektiboan aurreikusten den zenbatekoa, eta Gizarte Segurantzako 9tik 5era bitarteko kotizazio taldeetan, biak barne, kontrataturiko langile bakoitzari dagozkion kontzeptu guztiengatik Gizarte Segurantzari dagokion kotizazioa ere bai.

C modulua: Diruz lagundutako soldata kostuak, guztira, ondorio askotarako errenta-adierazle publikoa (IPREM) halako hiru izanen dira, hauek barne direla: aparteko bi pagari dagokien zati proportzionala (bi horietako bakoitzaren zenbatekoa IPREM horren hileko ordainketa baten baliokidea dela), edo gutxiago izanez gero, aplikatu beharreko hitzarmen kolektiboan aurreikusten den zenbatekoa, eta Gizarte Segurantzako 4tik 1era bitarteko kotizazio taldeetan, biak barne, kontrataturiko langile bakoitzari dagozkion kontzeptu guztiengatik Gizarte Segurantzari dagokion kotizazioa ere bai.

8. oinarria.-Obra eta zerbitzuak hautatzeko betebehar eta irizpideak.

1. Egin beharreko obra eta zerbitzuek betebehar hauek bete beharko dituzte:

a) Ahal dela, Estatuko Enplegurako Zerbitzu Publikoaren 2008ko irailaren 24ko Ebazpenean zehazten diren jarduera eta zereginen barruan dauden obra eta zerbitzuak izatea.

b) Administrazio zuzeneko araubidean exekutatzen edo ematen diren obra eta zerbitzuak izatea.

c) Obra eta zerbitzuok exekutatu edo ematean kotizaziopeko langabezia-prestaziorik jasotzen ez duten langabeen lanbide prestakuntza eta jarduna bultzatzea.

2. Aurreko idatz-zatiko betebeharrak betetzen dituzten obra eta zerbitzuen artean hauek izanen dute lehentasuna:

a) Interes orokor eta sozial handiena dutenek.

b) Laneratze-maila handiena egiaztatzen duten proiektuek, dela proiektua amaitzean edo entitatearen eta Nafarroako Enplegu Zerbitzuaren artean adostutako epean langileak zuzenean entitate eskatzailean sartzen direlako, dela erakunde horrek nahikotzat jotzen duen beste edozein laneratze formula erabiltzen delako.

c) Entitate eskatzaileek batera finantzatutako proiektuak.

3. Inola ere ez dira diruz lagunduko irabazteko asmorik gabeko erakundeek obrak exekutatzeko aurkezten dituzten eskariak.

9. oinarria.-Langileak hautatzeko betebehar eta irizpideak.

1. Obra eta zerbitzuak egiteko kontratatzen diren eta diru-laguntzaren xede diren langileak langabezian egon behar dira eta Nafarroako Enplegu Zerbitzuko enplegu agentzietan lan-eskatzaile gisa inskribaturik egon behar dira; halaber, ez dira egonen kotizaziopeko langabezia-prestaziorik jasotzen.

2. Kontratatzen diren langileak hautatzeko irizpide hauek hartuko dira kontuan:

a) Eskainitako lanpostuari egokitzea.

b) Famili ardura handiagoak edukitzea, hots, kontratatzen den langabeak bere kargura ezkontidea, hogeita sei urtetik beherako seme edo alabak, ezgaitasunak dituzten adinekoak edo harrerako adingabeak izatea.

c) Adina, eta emakumea izatea ala ez.

III. kapitulua

Prozedura

10. oinarria.-Eskaerak aurkeztea.

Entitateek Nafarroako Enplegu Zerbitzuari eskatuko diote diru-laguntza, 20 egun balioduneko epean, deialdi hau Nafarroako Aldizkari Ofizialean argitaratu eta hurrengo egunetik aurrera zenbatuta. Eskaerak erakunde horretan emanen dizkieten inprimaki ofizialetan eginen dira.

11. oinarria.-Prozeduraren hasiera.

1. I. kapituluan ezarritako diru-laguntzen onuradun izan nahi diren entitate eskatzaileek ondoko dokumentazioa aurkeztu beharko dute:

a) Obraren edo zerbitzuaren memoria, proiektuarekin eta planoekin batera, obra mota dela-eta horiek beharrezkoak direnean.

Memoriak alderdi hauek behintzat bildu beharko ditu:

-Dagokion obra edo zerbitzuaren izen zehatza.

-Obra edo zerbitzua exekutatzeko beharrezkoak diren langileen kopuru osoa.

-Oinarrizko errenta jasotzen duten langabeen kopurua eta zerrenda, eta obra edo zerbitzua exekutatzen lan eginen duten langileen kopuru osoarekin alderatuta egiten duten portzentajea.

-Obra edo zerbitzuaren aurrekontuan jarritako kostu osoa.

-Laneskuaren aurrekontuan jarritako kostu osoa.

-Oinarrizko errenta jasotzen duten langabeen laneskuaren aurrekontuan jarritako kostu osoa.

-Obra edo zerbitzua hasteko eta amaitzeko aurreikusten diren datak.

-Nafarroako Enplegu Zerbitzuari eskatu zaion diru-laguntza.

-Obra edo zerbitzua exekutatzeko sortuko diren lanpostu iraunkorren kopurua, eta horren justifikazioa.

-Langileen lanbide prestakuntza eta jarduera zein neurritaraino bideratzen duen.

-Kontratazio modalitateak, eta modalitate bakoitzaren eraginpean dauden langileen kopurua.

b) Diru-laguntza eskatzen duen entitatean diru-laguntzaren xede den obraren edo zerbitzuaren proiektua onesteko eskumena duen organoak egindako ziurtagiria.

c) Toki korporazioko idazkariaren ziurtagiria, diru-laguntzarik gabe gelditzen den zatia finantzatzeko kreditua badagoela adierazten duena.

d) Entitate eskatzaileak laneskurako beste diru-laguntzaren bat jasotzen badu, Nafarroako Enplegu Zerbitzuaren diru-laguntzarekin batera jasotzen duen guztirako diru-kopurua ezin izanen da kontratazioaren kostu osoa baino handiagoa izan, Gizarte Segurantzaren kotizazioak ere kontatuta.

e) Zerga betebeharrak eta Gizarte Segurantzarekikoak eguneratuak dituela dioen ziurtagiria.

2. II. kapituluan ezarritako diru-laguntzen onuradun izan nahi diren entitate eskatzaileek ondoko dokumentazioa aurkeztu beharko dute:

a) Entitatearen izenean eta hura ordezkatuz diru-laguntza eskatzen duen pertsonaren NANaren fotokopia konpultsatua, eta entitatearen izenean eta hura ordezkatuz jarduteko ordezkaritzako mandatu edo ahalordea.

b) Entitate eskatzailearen eraketaren eskritura publikoaren eta estatutuen fotokopia konpultsatua. Horietan egiaztatuta geratu beharko da entitateak irabazteko asmorik ez duela, eskatzailea mota horretako entitatea bada.

c) Egin beharreko obra eta zerbitzuen proiektu orokorra, ondoko alderdi hauek biltzen dituena:

-Planaren izena, kokalekua eta azalpena.

-Egin beharreko jarduerak.

-Jardueraren ezaugarriak, iraupena eta kontratu kopurua.

-Enplegua sortzeko aurreikuspena.

-Langileen profila eta kontratazio modalitateak.

-Planaren kostua, alde batetik eskatu den diru-laguntza eta, bestetik, bidezkoa bada, entitate onuradunaren ekarpena bereizita.

d) Egin beharreko obra edo zerbitzu bakoitzaren memoria, ondoko alderdi hauek biltzen dituena:

-Obra edo zerbitzuaren izena, kokalekua eta azalpena.

-Obra edo zerbitzuaren kostuak eta Nafarroako Enplegu Zerbitzuaren eta entitate onuradunaren ekarpena.

-Obra edo zerbitzuaren iraupena.

-Kontratatu beharreko langileen profila eta kontratazio modalitateak.

e) Zerga betebeharrak eta Gizarte Segurantzarekikoak eguneratuak dituela dioen ziurtagiria.

12. oinarria.-Prozedura antolatu eta tramitatzeko organo eskuduna.

Deialdi honetan araututako diru-laguntzak emateko prozedura antolatu eta tramitatzeko organo eskuduna Nafarroako Enplegu Zerbitzuko Enplegua eta Aukera Berdintasuna Sustatzeko Zerbitzuko Lan-mundura sartzeko Atala izanen da.

13. oinarria.-Balorazio batzordea.

Eskaerak ebaluatzeaz arduratuko den kide anitzeko organoa eratu da. Instrukzio organoak, ebaluazioa ikusirik, ebazpen proposamena eginen du.

Deialdi honetan aurkezten diren eskaeren balorazio batzordea ondoko kide hauek osatuko dute:

Batzordeburua: Enplegua eta Aukera Berdintasuna Sustatzeko Zerbitzuko zuzendaria.

Mahaikidea: Lan-mundura sartzeko Ataleko burua.

Idazkaria: Toki Entitateentzako Laguntzen Bulegoko burua.

14. oinarria.-Diru-laguntza emateko prozedura.

Diru-laguntzak emateko prozedura norgehiagokako araubidearen bitartez tramitatuko da.

Aurkeztutako proiektuek erreferentziazko arauetan zehazten diren betebeharrak betetzen dituztela egiaztatu ondoren, aurreko idatz-zatian aipatu den balorazio batzordeak aztertu eginen ditu.

15. oinarria.-Ebazpena eta ordainketa.

1. Nafarroako Enplegu Zerbitzuko zuzendari kudeatzaileak, balorazio batzordeak aplikatutako irizpideak ikusita, eta eskuragarri dagoen aurrekontuko kreditua kontuan hartuta, bidezkoa den ebazpena emanen du eskaerak aurkezteko epea amaitu ondoko hiru hilabeteko epean, gehienez. Epe hori igarotakoan berariazko ebazpenik eman ez bada, diru-laguntzaren eskaera ukatu dela ulertuko da.

Ebazpenak ez dio administrazio bideari amaiera emanen. Horregatik, haren kontra gora jotzeko errekurtsoa aurkezten ahalko da Berrikuntza, Enpresa eta Enpleguko kontseilariari zuzendua, ebazpena jakinarazi eta biharamunetik hilabeteko epean.

Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, jakinarazi eta biharamunetik hasita. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

2. Emandako diru-laguntza entitate onuradunari ordainduko zaio Gizarte Segurantzako altak egiaztatzen eta lan-kontratuen kopiak eta obra edo zerbitzua hasi izanaren justifikazioa aurkezten dituenean.

Diru-laguntzak ordaintzeko, laguntzaren onuradun den entitateak Nafarroako Ogasunarekiko eta Gizarte Segurantzarekiko betebeharrak eguneratuta izan beharko ditu. Zenbatekoa ordaindu gabe dauden zorrak kitatzeko erabiltzen ahalko da, horiek antzinatasunaren arabera ordainduz. Antzinatasuna ordaindu beharko ziren dataren arabera zehaztuko da.

16. oinarria.-Langileen kontratazioa.

1. Entitate onuradunek edo, kasuan kasu, enpresa adjudikaziodunek, Nafarroako Enplegu Zerbitzuko kasuan kasuko enplegu agentziari beharrezkoak diren langile langabeak eskatuko dizkiote obra edo zerbitzua hasi baino hamabost egun lehenago, gutxienez.

Langileak hautaketa batzorde batek hautatuko ditu. Batzorde hori honela egonen da osatuta:

Entitate onuradunaren edo enpresa adjudikaziodunaren ordezkari bat eta Enplegu Agentziaren ordezkari bat. I. kapituluko laguntzen kasuan eskualdeko gizarte-langile bat ere egonen da.

2. Entitate onuradunek edo, bidezkoa bada, enpresa adjudikaziodunek, hautatutako langileak kontratatuko dituzte, ahal dela, kontratuen zein langileen ahalik eta kopuru handiena sortzen duten kontratazio modalitateak erabiliz, baldin eta formula horiek proiektua egiteko eragozpen edo trabarik ekartzen ez badute. Proiektuen gutxieneko iraupena 6 hilabetekoa izanen da.

3. Kontratatutako langileetako batek gaixo-agiria hartzen badu obra edo zerbitzua bukatu aurretik, edo 6 hilabeteko gutxieneko iraupenera heltzen ez bada, 15 egun balioduneko epean antzeko ezaugarriak dituen langile batek ordeztuko du, kasuan kasuko enplegu agentziari eskaera egin ondoren.

4. Betebeharrak hein batean bete ezik, organo eskudunak erabakiko du zenbat diru itzuli behar duen entitate onuradunak, justifikaturiko kostuen eta frogaturiko jarduketen arabera proportzionaltasun irizpideari jarraituz.

17. oinarria.-Obrak edo zerbitzuak hastea.

Obra edo zerbitzua 2009ko urriaren 1a baino lehen hasi beharko da, lan arloko agintari eskudunak egiaztatutako ezinbesteko kasuetan edo behar bezala justifikatutako arrazoiengatik izan ezik. Obra hasi izana egiaztatzeko, entitate eskatzaileak horretarako egindako ziurtagiria aurkeztu beharko du. Epeak igarotakoan obra edo zerbitzua hasi ez bada edo ezinbesteko arrazoiengatik edo behar bezala justifikatutako arrazoiengatik ezin izan bada hasi, Nafarroako Enplegu Zerbitzuko zuzendari kudeatzaileak ebazpena ematen ahalko du lehengo ebazpena indargabetzeko.

18. oinarria.-Jarraipena eta kontrola.

1. Entitate onuradunek onartu egin beharko dituzte Nafarroako Enplegu Zerbitzuak egiten dituen egiaztapen lanak.

2. Deialdi honetan ezarrita dagoena bete ezean, bete beharrekoa nola eta zergatik urratu den kontuan hartuta, jaso diren kopuruak osorik edo zati batean itzuli beharko dira, dagozkien interesekin, aplika daitekeen araudian aurreikusita dagoenaren arabera.

Nolanahi ere, jasotako diru-laguntza zein helburutarako eman den, beste helburu batzuetarako erabiltzen bada, Nafarroako Enplegu Zerbitzuak diru-laguntza osorik itzultzeko ebazpena emanen du.

19. oinarria.-Diru-funtsen justifikazioa.

Entitate onuradunak, obra edo zerbitzua bukatu eta hilabeteko epean, obra edo zerbitzua bukatu izanaren egiaztagiria aurkeztu beharko du Nafarroako Enplegu Zerbitzuan, eta bidezkoa bada, erabili ez dituen funtsak Erakunde horri itzuli beharko dizkio.

20. oinarria.-Programaren ebaluazioa.

Obra edo zerbitzuak bukatu ondoren, entitate onuradunak egindako obra edo zerbitzuei, egindako kontratuei eta langileek ikasitako lanbide jardunari buruzko txosten zehatza entregatuko dio hilabeteko epean Nafarroako Enplegu Zerbitzuari.

Halaber, entitate onuradunak egokia den ebaluazioa egiteko beharrezkoa den informazio guztia eman beharko du, Nafarroako Enplegu Zerbitzuak zehazten duen moduan.

21. oinarria.-Diru-laguntzen elkartzea.

Deialdi honetan araututa dauden laguntza edo diru-laguntzen zenbatekoa, berez edo beste administrazio publiko batzuen edo Estatuko zein nazioarteko beste erakunde publiko zein pribatu batzuen diru-laguntza edo laguntza batzuk batuta, inola ez da izanen onuradunak egin beharreko jardueraren kostua baino handiagoa.

22. oinarria.-Aurreko eskaerak.

Langileen kontratuak ezin izanen dira deialdi honen babespean finantzatu, baldin eta beren soldata kostuak Industria eta Teknologia, Merkataritza eta Laneko kontseilariaren otsailaren 10eko 15/2005 Foru Aginduaren eta Nafarroako Enplegu Zerbitzuko zuzendari kudeatzailearen abenduaren 11ko 3600/2006 Ebazpenaren bitartez guztiz edo zati batean diruz lagundu badira. Deialdi honen ondorioetarako, kasu batean ere ez da onartuko diruz lagundutako espedienteei uko egitea edo horietan atzera egitea.

23. oinarria.-Lan kontratuak.

Langileen kontratazioak Langileen Estatutuaren 12. eta 15. artikuluen eta hura garatzen duten arauen bidez araututako interes sozialeko iraupen mugatuko lan kontratuen ereduan eginen dira.

24. oinarria.-Publizitatea.

Onuradunek jarduketak sustatu eta zabaltzeko egiten dituzten adierazpen guztietan Nafarroako Gobernuko Nafarroako Enplegu Zerbitzuak diruz lagundu dituela agertu beharko da.

Era berean, Nafarroako Enplegu Zerbitzuak emandako diru-laguntzen zerrenda argitaratuko du Enpleguaren Atarian.

25. oinarria.-Aplikatu beharreko arauak.

Oinarri arau-emaile hauetan berariaz araututa ez dauden alderdi guztietan, osagarri gisa, hauetan xedatuta dagoena aplikatuko da: Interes orokorreko eta sozialeko obra eta zerbitzuetarako langabeak kontratatzeko toki entitateentzako diru-laguntzak arautzen dituen Industria eta Teknologia, Merkataritza eta Laneko kontseilariaren otsailaren 10eko 15/2005 Foru Agindua; Nafarroako Enplegu Zerbitzuko zuzendari kudeatzailearen abenduaren 11ko 3600/2006 Ebazpena, Lan eta Gizarte Gaietarako Ministerioaren 1997ko abenduaren 19ko Aginduan eta Lan eta Gizarte Gaietarako Ministerioaren uztailaren 20ko 2435/2004 Aginduan ezarritako diru-laguntzak emateko deialdia onetsi zuena, Estatuko Administrazio Orokorreko organoekiko eta irabazi asmorik gabeko erakundeekiko lankidetzaren eremuan (agindu horietan, Enplegu Zerbitzu Publikoek diru-laguntza publikoak emateko oinarri arau-emaileak finkatu ziren, interes orokorreko eta sozialeko obra eta zerbitzuetarako langileak kontratatzen dituzten Estatuko Administrazio Orokorraren eta haren erakunde autonomoen organoekiko, unibertsitate publikoekiko eta irabazteko asmorik gabeko erakundeekiko lankidetzaren eremuan); Diru-laguntzei buruzko azaroaren 9ko 11/2005 Foru Legea eta aplikatu beharreko gainerako araudia.

Iragarkiaren kodea: F0916663