Iragarkia

71. ALDIZKARIA - 2009ko ekainaren 10a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

550/2009 EBAZPENA, apirilaren 7koa, Arriskuen Prebentziorako eta Lanaren zuzendari nagusiak emana, "Nafarroako zerbitzu laguntzaileak" sektorearen lan hitzarmen kolektiboko soldaten berrikuspenari buruzko akordioa erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 29/2009).

Departamentu honetan 2009ko apirilaren 1ean sartu zen "Nafarroako zerbitzu laguntzaileak" sektorearen lan hitzarmeneko 2009ko soldaten berrikuspenari buruzko akordioa, negoziazio batzordeak hitzarmen hartan xedatutakoa betez izenpetu eta onetsia (hasierako espedientearen zenbakia: 80/2008).

Berrikuntza, Enpresa eta Enplegu Departamentua da lan hitzarmen kolektiboen testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. "Nafarroako zerbitzu laguntzaileak" sektorearen lan hitzarmen kolektiboko soldaten berrikuspenari buruzko akordioa erregistratzea (hitzarmenaren kodea: 3108825), Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestatuta dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri negoziazio batzordeari ematea, eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal duela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2009ko apirilaren 7an.-Arriskuen Prebentziorako eta Lanaren zuzendari nagusia, Imelda Lorea Echavarren.

Soldaten berrikuspenari buruzko akordioa

AKTA:

Iruñean, 2009ko otsailaren 13ko 9:30ean.

Nafarroako Foru Komunitateko zerbitzu laguntzaileen sektoreko hitzarmen kolektiboaren interpretaziorako batzorde paritarioa bildu zen, honako entitate eta ordezkari hauez osaturik:

Langileen ordezkariak: Luis Hernández Inac eta Sera Alonso Hernández (UGT) eta Juan Antonio Vidal Canabal (CCOO).

Enpresaren ordezkariak: Carlos Esquisábel de Esteban eta José Manuel Ayesa Villar (Asociación de Empresas de Servicios Auxiliares de Navarra -AESA-).

Adierazi dute:

1.-Nafarroako Foru Komunitateko zerbitzu laguntzaileen sektoreko lan hitzarmen kolektiboaren 25. artikuluan ezarritakoarekin bat (2008ko 119. Nafarroako Aldizkari Ofiziala, irailaren 29koa), eta 2008. urteko Nafarroako KPI ofiziala argitaraturik, bidezkoa da 2009. urterako soldata gehikuntza aplikatzea, artikulu horretan ezarri diren irizpideei jarraikiz. Aplikatu beharreko gehikuntza portzentajea honela kalkulatuko da: 2008ko behin betiko soldata taulei aurreko urteko Nafarroako KPIaren gehikuntza portzentajea (0,25 puntu) aplikatuta ateratzen dena.

2.-Hori horrela, Nafarroako egiazko KPIa 1,20koa izanik 2008. urtean eta itundutako diferentziala 0,25ekoa, aplikatuko den gehikuntza portzentajea %1,45ekoa izanen da.

Horrenbestez, aldeek honako hau erabaki dute:

1.-2009ko lansarien taulak onetsi eta sinatzea (I. eranskina). 2009ko urtarrilaren 1etik 2009ko abenduaren 31ra arteko indarra izanen dute.

2.-Lansarien taularen bi ale Berrikuntza, Enpresa eta Enplegu Departamentuko Lan Zuzendaritza Nagusira igortzea, erregistratu, gorde eta Nafarroako Aldizkari Ofizialean argitaratu ahal izateko, Langileen Estatutuaren Testu Bategineko 90. artikuluko 2. eta 3. ataletan ezarritakoari jarraikiz.

Eta aztertzeko beste gairik ez izanik, bilerari bukaera eman zaio eta akta hau egin da, bertaratuek sinatu dutena, idazpuruan aipatu toki eta egunean.

UGT; CCOO; Asociación de Empresas de Servicios Auxiliares de Navarra (AESA).

Iragarkiaren kodea: F0914191