71. ALDIZKARIA - 2009ko ekainaren 10a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

1064/2009 EBAZPENA, maiatzaren 6koa, Enpresako zuzendari nagusiak emana, Pirinioetako Lan Komunitatearen lankidetza esparruan ikerketa eta garapen teknologikorako diru-laguntzak emateko 2009. urteko deialdia onesten duena.

Pirinioetako Lan Komunitatean -PLK- erkidego hauek sartzen dira: Frantziako Estatuan Akitania, Languedoc-Roussillon eta Midi-Pyrénées eskualdeak; Espainiako Estatuan Aragoi, Katalunia, Nafarroa eta Euskadi autonomia erkidegoak, eta Andorrako Estatua.

Guztira hamazazpi milioi pertsonatik goiti bizi da PLKn eta, bertan dauden estatuen eta Europar Batasunaren laguntzarekin, erkidego horien garapen ekonomikoa bultzatu nahi du.

Ikerketa antolatuak produkzio sistemaren eta bizi kalitatearen hobekuntzarako duen garrantziaren jakitun izanik, PLKren borondatea da ikerkuntza eta garapen teknologikoaren ekintza komunen garapena ahalbidetuko duten jarduketei lehentasuna ematea, erkidego horietako enpresa eta zentroen arteko lankidetza proiektuak bultzatu eta gaur egun I+Gn eskura dagoen baliabide kopuru zabala elkarri eskain diezaiotela sustatzearren.

Testuinguru horretan, Zientzia-Teknologia-Enpresa sistema bultzatu nahi da Pirinioetako erkidego horien esparruan I+Gko polo garrantzitsua bultzatzeko eta, zehazkiago, enpresa txiki eta ertainei (ETE) ezagutza transferitzeko eta Europako funtsak finantzatzen ahal dituzten jarduerak abiarazteko.

Horretarako, beste ekintza lerro batzuen artean, PLKko erkidegoetako kideek, nork bere lurralde eremuan, lankidetza programa komunak aldi berean eta era koordinatuan bultzatzeko adostasuna lortu dute.

Gobernuak 2009ko apirilaren 27an hartutako Erabakiaren bidez baimendu du deialdi honi dagokion urte anitzeko gastua.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskudantziak erabiliz,

EBATZI DUT:

1. Pirinioetako Lan Komunitatearen lankidetza esparruan ikerketa eta garapen teknologikorako diru-laguntzak emateko 2009. urteko deialdia onestea.

2. Diru-laguntzak emateko oinarri arautzaileak onestea. Oinarri horiek ebazpen honen eranskinetan ageri dira.

3. Honako gastu hau baimentzea: 2010. urtean 100.000 euro, 2011. urtean 100.000 euro eta 2012. urtean 100.000 euro, 2009ko gastuen aurrekontuetako 840001 81210 7709 467304 kontu-sailaren pareko kontu-sailen kargura, ebazpen honen konpromisoei erantzuteko, deusetan ukatu gabe, ekitaldi bakoitzeko aurrekontuetan dirurik izanez gero, diru zenbateko horiek handitzeko aukera.

4. Ebazpen hau eta eranskinak Nafarroako Aldizkari Ofizialean argitaratzea.

Iruñean, 2009ko maiatzaren 6an.-Enpresako zuzendari nagusia, Begoña Urien Angulo.

1. ERANSKINA

Pirinioetako Lan Komunitatearen (PLK) lankidetza esparruan
ikerketa eta garapen teknologikorako diru-laguntzak emateko 2009ko deialdiaren oinarri arautzaileak

1. oinarria. Xedea.

Ikerketarako lankidetza handitzea Europar Batasunaren lehentasunetako bat da, horrela Europako ikerketa esparru bat sortzen laguntzeko.

Pirinioetako Lan Komunitatea, hemendik aurrera PLK, ohartzen da garrantzizkoak direla lankidetza horiek hobetzen lagunduko duten jarduketak, eta bere helburuen artean dago garapen teknologikoko ekintza komunak sustatzea eta Pirinioen bi aldeetan enpresen eta eragile sozioekonomikoen arteko lankidetza bultzatzea.

Zientzia-Teknologia-Enpresa sistema sustatu nahi da, Pirinioetako erkidego horien esparruan I+Gko bikaintasuneko poloa bultzatzeko, horrela enpresa ttiki eta ertainei sortutako ezagutza transferitzeko eta garapeneko esparru komun bat sortzen laguntzeko, zeinetan Europako funtsak finantzatzen ahal dituzten jarduerak abiaraziko baitira. Horrek guztiak handitu egiten du lankidetzaren balioa.

Testuinguru horretan, PLKren ustez onura publikoa du I+Gko ekintzak elkarren artean finantzatzeak, esparruko eragileen arteko lankidetzaz baliaturik.

Diru-laguntzak hurrengo mota hauetako jarduketa baterako izanen dira:

A) "Ikerketako sare tematikoak garatu eta sendotzea''.

B) ''Ikertzaileen eskualdearteko mugigarritasuna''.

C) "Ikerketa eta Garapen Teknologikorako Lankidetza Proiektuak -I+G-".

Ondorengo arlo hauek lehentasunezkoak izanen dira, agertzen diren hurrenkeran:

1. Berariazko ikerketak, Pirinioen ingurunean oinarrituak.

2. PLKrendako interes komunekoak diren beste gai batzuen gaineko ikerketak.

3. EBren 7. esparru programaren lehentasunezko arloak.

Programak edo jarduerak oinarri hauetan ezarritakoari eta 2., 3. eta 4. eranskinetan bildutako berariazko baldintzei atxikiko zaizkie, hurrenez hurren.

2. oinarria. Diru-laguntzaren zenbatekoa eta diruz lagun daitezkeen gastuak.

1. Jarduera motaren araberako zenbatekoa ondoko hau izanen da:

-A) motako jarduerak, ''Sare tematikoak garatu eta sendotzea'':

Diru-laguntza gastuen %100era iristen ahal da eta, gehienez ere, 6.000 euro emanen dira jarduerak 2 urtean finantzatzeko.

-B) motako jarduerak, ''Ikertzaileen eskualdearteko mugigarritasuna'':

Diru-laguntza gastuen %100era iristen ahal da eta, gehienez ere, 6.000 euro emanen dira jarduerak, gehienez ere, 6 hilabetean finantzatzeko.

Salbuespen gisa, zenbatekoa handiagoa izaten ahal da, Pirinioetako Lan Komunitatearen Prestakuntza eta Garapen Teknologikorako Batzordeak proposaturik.

-C) motako jarduerak, "Ikerketa eta Garapen Teknologikorako Lankidetza Proiektuak -I+G-":

Gastuen %70era iristen ahal da diru-laguntza.

2. Bakar-bakarrik lagunduko dira jarduera gauzatzeari hertsiki lotutako gastuak, eta bidaien kasuan, PLK-ko lurraldeetara mugatuko dira.

3. oinarria. Onuradunek bete beharreko baldintzak.

1. PLK-k dituen erkidegoen arabera, diru-laguntzen onuradun honako hauek izan daitezke:

a) Frantziako eskualdeetan: PLKren lurraldeetan dauden erakunde unibertsitarioak, eragile sozioekonomikoak eta ikerketarako erakunde publikoak. Enpresa frantsesek parte hartzen ahal dute proiektu batean, baina deialdi honetan ez dira diru-laguntza ekonomikoen onuradun izaten ahal.

b) Espainiako autonomia erkidegoetan: PLKren lurraldeetan dauden erakunde unibertsitarioak, ikerketa eta teknologia zentroak eta enpresak.

Nafarroaren kasuan, bertako erakunde unibertsitarioak, ikerkuntza eta teknologia zentroak eta enpresak izan daitezke diru-laguntzen onuradun. Onuradunak eskaera sinatzen duten erakunde eta enpresak bakarrik izanen dira.

c) Andorrako Estatuan onuradun izan daitezke erakunde unibertsitarioak, ikerketa eta teknologia zentroak eta enpresak.

2. Halaber, eskatzaileek Diru-laguntzei buruzko azaroaren 9ko 11/2005 Foru Legearen 13. artikuluan aipatzen diren betebehar orokorrak bete beharko dituzte. Hori diru-laguntza eskatzen duenak eginiko "erantzukizuneko aitorpenaren" bidez frogatzen ahalko da. Aitorpena http://www.navarra.es helbidean eskuratzen ahal da (bilatu "Pirinioetako Lan Komunitatearen lankidetza esparruan ikerketa eta garapen teknologikorako laguntzak" atalean).

Entitate publikoak betebehar orokor horietatik salbuetsiak daude.

4. oinarria. Eskabideak eta eskatutako agiriak aurkeztea.

1. Eskaerak aurkezteko epea 35 egun naturalekoa izanen da, deialdia Nafarroako Aldizkari Ofizialean argitaratu eta biharamunetik hasita.

Eskaerak Berrikuntza, Enpresa eta Enplegu Departamentuko erregistroan aurkeztuko dira edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan ezarritako lekuetako edozeinetan edo Nafarroako Foru Komunitateko Erregistro Orokor Elektronikoan.

Eskaera posta bulego batean aurkezten bada, gutun-azal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) agertu ahal izateko. Datu horiek guztiak gordekinean ere azaldu beharko dira.

2. Eskabideak horretarako ezarri diren ereduen araberakoak izanen dira eta interneten eskuratzen ahal dira, http://www.navarra.es helbidean (bilatu "Pirinioetako Lan Komunitatearen lankidetza esparruan ikerketa eta garapen teknologikorako laguntzak" atalean).

Parte-hartzaileek koordinatzaile orokor bat izendatu beharko dute, bai eta PLKren inplikatu den lurralde bakoitzeko eskaeraren arduradun bana ere. Kordinatzaile nagusiak lankidetzako programaren edo jardueraren ardura izanen du PLKren Prestakuntza eta Garapen Teknologikorako Batzordearen aurrean, eta lurraldeko arduradunak bere administrazioaren aurrean.

Koordinatzaile nagusiaren ardurapean, bazkideek proposamen bateratu bat prestatuko dute, lankidetzako proiektuaren edo jardueraren gaineko informazio guztia bilduko duena.

Lurraldeko arduradun bakoitzak proposamen bateratu edo eskaera hori kasuan kasuko erakunde eskudunean aurkeztuko du, bere kolektibitatean garatutako araudiari jarraikiz. Ekintza berean bi bazkide nafarrek edo gehiagok parte hartzen badute, Nafarroako arduradunak bazkide guztien izenean eskaera bakarra aurkeztuko du.

5. oinarria. Eskaerak ebaluatzeko irizpideak.

Diru-laguntza PLK-k paratutako balorazio irizpide hauei jarraikiz emanen da:

a) Gaien lehentasuna.

b) Kalitatea eta interes zientifiko-teknikoa.

c) Emaitzak jakinarazteko potentziala eta interes sozioekonomikoa.

d) Enpresa edo eragile sozioekonomikoen parte-hartzea.

e) Parte-hartzea sarean (lurralde parte-hartzaileen kopurua).

f) Proiektuak (nazionalak eta europarrak) aurkeztera bideratutako proposamenak.

g) PLKrendako garrantzitsuak diren pertsonak eta zentroak inplikatzea, PLKz kanpoko eskualdetakoak eta zentroetakoak izaki.

Gainera, sareak edo proiektuak (edo sare zein proiektuko taldeek) lehenago diru-laguntzarik jaso badu PLKren aurreko deialdi baten bidez, lortutako emaitzen kalitatea hartuko da kontuan.

6. oinarria. Hautapen prozedura eta diru-laguntza ematea.

1. Eskaerak jasotakoan, Berrikuntzaren eta Informazioaren Gizartearen Zerbitzuak, bai zuzenean bai egoki jotzen dituen tresnen bitartez, ebaluazio zientifiko-teknikoa eginen du eta, ondotik, behin-behineko proposamena aurkeztuko. Proposamenean kalitateko eta interes zientifiko-teknikoko gutxieneko maila gainditu duten eskaerak bilduko dira.

2. Hori egin eta gero, lurraldeetako administrazioek emandako behin-behineko proposamenak PLKren Prestakuntza eta Garapen Teknologikorako Batzordeak aztertuko ditu. Honek eskaerak kontsentsu bidez aztertu eta puntuatuko ditu, 5. oinarrian ezarritako irizpideei eta batzordeak finkatutako puntuazio baremoei jarraikiz.

Hala behar izanez gero, beharrezko jotzen diren agiri osagarriak eskatzen ahalko dira.

PLKren Prestakuntza eta Garapen Teknologikorako Batzordeak behin betiko hautaturiko eskaeren zerrenda ikusirik, Berrikuntzaren eta Informazioaren Gizartearen Zerbitzuak ebazpen proposamena igorriko dio organo eskudunari eta adieraziko du onuradunek diru-laguntza jasotzeko baldintza guztiak betetzen dituztela.

Deialdi honetako konpromiso ekonomikoak aurrera ateratzeko hasiera batean paratu diren diru-zenbatekoak handitzen ahalko dira, baldin eta unean uneko ekitaldiko aurrekontuetan diru erabilgarririk badago.

3. Diru-laguntzak emateari buruz ebazteko eskumena Enpresako zuzendari nagusiari dagokio. Ebazpena sei hilabeteko epean eman eta jakinaraziko da, eskaerak aurkezteko epea bukatzen denetik hasita.

Epe horretan berariazko ebazpenik jakinarazten ez bada, eskaera ezetsitzat joko da.

Aurkeztutako eskaeraren berariazko edo ustezko ezespenaren aurka zilegi izanen da gora jotzeko errekurtsoa jartzea, Industria eta Teknologia, Merkataritza eta Laneko kontseilariari zuzendua, administrazio prozedura erkideari buruzko legeriak xedatutakoari jarraikiz.

7. oinarria. Justifikazioa eta diru-laguntzen ordainketa.

1. Izandako gastuak eta ordainketak gauzatu, bukatu eta egiaztatzeko urteko txostenak "Jarraipen Tekniko Ekonomikoaren Informazioa" izeneko inprimakien ereduari lotuko zaizkio. Inprimakiak Interneten eskuratzen ahal dira http://www.navarra.es helbidean (bilatu "Pirinioetako Lan Komunitatearen lankidetza esparruan ikerketa eta garapen teknologikorako laguntzak" atalean).

Hasierako aurrekontuetan jarritakoa baino gastu gutxiago egin eta frogatzeak emandako diru-laguntzaren murrizketa proportzionala ekarriko du; aitzitik, gastu handiagoak egiteak ez du diru-laguntzaren areagotzea ekarriko.

Frogagiriak azterturik, Berrikuntzaren eta Informazioaren Gizartearen Zerbitzuak ordainketarako ebazpenaren proposamena igorriko dio Enpresako zuzendari nagusiari, onuradunek diru-laguntza kobratzeko eskubidea sortzen duten eginbeharrak betetzen dituztela egiaztatzen duen txostenarekin batera.

2. Onuraduna zein den begiraturik, diru-laguntza ondotik heldu den moduan ordainduko da:

2.1. Onuradunak erakunde unibertsitarioak edo ikerketa eta teknologia zentroak badira, eta 1. oinarrian ezarritako jarduketa motak kontuan harturik:

2.1.a) A) eta B) letretako jarduketetarako:

Diru-laguntza bi epetan ordainduko da: lehenbizikoa, zenbateko osoaren %50 gaindituko ez duena, diru-laguntza ematean, eta gainerakoa, jarduera bukatu eta gero, jarduketa osoan izandako gastuen frogagiriak eta egindako lanaren gaineko txostena aurkeztu ondotik.

2.1.b) C) letrako jarduketetarako:

Diru-laguntza zenbait epetan ordainduko da: lehenbizikoa, zenbateko osoaren %50 gaindituko ez duena, diru-laguntza ematean, eta gainerakoa urteka, programak dituen urteak bete arte, urte bakoitzean izandako gastuen frogagiriak eta egindako lanaren gaineko txostena aurkeztu ondotik.

2.2. Onuradunak enpresak baldin badira:

2.2.a) B) letrako jarduketetarako:

Diru-laguntza epe batean ordainduko da, jarduera bukatu eta gero, jarduketan izandako gastuen frogagiriak eta egindako lanaren gaineko txostena aurkeztu ondotik.

2.2.b) A) eta C) letretako jarduketetarako:

Diru-laguntza urteka ordainduko da, programak dituen urteak bete arte, urte bakoitzean izandako gastuen frogagiriak eta egindako lanaren gaineko txostena aurkeztu ondotik.

Behar bezala arrazoitu eta justifikatutako kasuetan, jarduketak bukatu gabe daudela ere, emandako diru-laguntza oso-osorik edo partzialki jaso daiteke, emandako diru-laguntzaren adinako banku-abala aldez aurretik aurkeztuz gero.

8. oinarria. Onuradunen betebeharrak.

1. Diru-laguntzaren onuradunek betebehar zehatz hauek izanen dituzte:

a) Onuradunak jarduera berberetarako eskatu edo jaso dituen diru-laguntza guztien berri eman beharko du eta, horretarako, 3. oinarrian aipatutako "erantzukizuneko aitorpena" erabiliko du.

b) Deialdi honen babespean finantzatutako proiektuetan oinarritzen den edozein argitalpen edo komunikaziok PLKren eremuko eskualde parte-hartzaileengandik jasotako finantziazioa aipatu beharko du, bai eta Europako Funtsen kofinantzaketa ere, halakorik izanez gero. Aipamen hori beste parte-hartzaileek egindakoa bezalakoa izanen da.

c) Onuradunek ondoko jarduketa hauek egiteko konpromisoa hartzen dute:

-Bakoitzari dagokion eskualdeko administrazioari lankidetzako programa edo jarduera gauzatu dela frogatzen duten txostenak eta haien bukaerako memoria aurkeztu beharko dizkiote.

-Administrazioaren beraren edo PLKren Prestakuntza eta Garapen Teknologikorako Batzordearen aurrean agertu eta/edo horiek eskatzen ahal dizkieten argibide guztiak emanen dituzte.

-PLK-k antolatuko dituen bileretan eta ebaluazioetan parte hartuko dute, egindako jarduerak aurkezteko.

d) Proiektuaren koordinatzaile nagusiak bukaerako memoria bateratua eginen du eta bertan agertuko ditu talde parte-hartzaile bakoitzak lortutako emaitza eta helburuak eta laburpen exekutibo bat. Programa edo jarduera bukatu eta sei hilabete iragan baino lehen, eskualdeko arduradun bakoitzak bukaerako memoria hori aurkeztuko du bere administrazioan. Administrazioek bukaerako memoria zein laburpena argitaratzen ahalko dituzte.

Erdietsitako emaitzak, osorik edo zatika, liburuetan, monografietan, artikuluetan, doktore tesietan, lizentzia tesinetan, kongresuetako komunikazioetan, patenteetan, kontratuetan, erabilera ereduetan eta abarretan bildu baldin badira, haien kopia bat ere ekarri beharko da.

2. Halaber, onuradunek Diru-laguntzei buruzko Foru Legearen 9. artikuluan ezarritako baldintza orokorrak bete beharko dituzte.

Zerga arloko eta Gizarte Segurantzarekiko betebeharren ordainketan egunean dagoela egiaztatzeko, eskabide-ereduan berean interesdunari informatzen zaio baimena ematen diola departamentuari behar diren datuak kontsulta ditzan, laguntza emateko ebazpenaren proposamena egiten den unean onuradunak betebehar horiek egunean dituela egiaztatzeko.

3. Diru-laguntza emateko ebazpenean, oinarri arautzaileotan edo Diru-laguntzei buruzko Foru Legean ezarritako betebeharrak osorik bete ezik, onartutako diru-laguntza kobratzeko eskubidea galduko da edo diru hori itzuli egin beharko da, foru lege horren 35. artikuluan xedatutakoarekin bat.

Halaber, aurreko betebeharren bat hein batean bete ezik, emandako diru-laguntzaren zenbatekoa berriro ere zehazten ahalko da, proportzionaltasun printzipioari jarraikiz edo, hala badagokio, dagokion zenbatekoa itzuli beharko da.

9. oinarria. Diru-laguntzen bateragarritasuna.

Deialdi honetako diru-laguntzak bateragarriak dira Nafarroako Foru Komunitateko Administrazioak, beste administrazio publiko batzuek, beste erakunde publiko nahiz pribatu batzuek edo partikularrek, Estatukoek edo atzerrikoek emandako beste laguntza batzuekin.

Aurrekoa deusetan galarazi gabe, jasotako laguntza guztiak batuta ez da onuradunak gauzatu nahi duen jardueraren kostua gaindituko.

Betiere, diru-laguntzak "Ikerketa eta garapenaren eta berrikuntzaren arloan estatuek ematen dituzten laguntzen Europar Batasunaren esparruan" (EBren Egunkari Ofiziala, 2006/C 323/01, 2006-12-30ekoa) ezarritakoa errespetatuko du.

10. oinarria. Errekurtsoa.

Oinarri arautzaile hauen kontra interesdunek, administrazio publikoek izan ezik, gora jotzeko errekurtsoa paratzen ahalko dute, Industria eta Teknologia, Merkataritza eta Laneko kontseilariari zuzendua, hilabeteko epean, argitaratu eta biharamunetik hasita.

11. oinarria. Emandako diru-laguntzen publizitatea.

Diru-laguntzei buruzko Foru Legearen 15. artikuluan xedatutakoarekin bat, Berrikuntzaren eta Informazioaren Gizartearen Zerbitzuak Berrikuntza, Enpresa eta Enplegu Departamentuaren web orrian jendaurrean jarriko ditu emandako diru-laguntzak, hauek zehaztuta: zein urtetako deialdia den, laguntza zein programari eta aurrekontu-kredituri egotziko zaion, onuradunak, emandako diru-kopurua eta diru-laguntzaren helburua.

2. ERANSKINA

Sare tematikoak garatu eta sendotzeko programa

1. Programaren xedea.

Programa honen berariazko helburua da eskualdeen arteko ikerketa sareak sustatzea, hau da, PLK-ko lurraldeetako ikertzaileen arteko eta/edo entitateen ikerketa taldeen arteko harreman eta lankidetza sistema egonkorra antolatzea.

Sarearen helburua da lankidetza zientifiko-teknikoa sendotzea, ikerketa programak elkarrekin garatu eta ikerketa proiektu europarrak prestatzeko. Horretarako, sarearen bitartez, helburu hauek lortu beharko dira: komunikazioa areagotzea, ezagutza trukeak, baliabide teknologikoak partekatzea edo ikerketa lan komuna erraztea.

2. Programaren ezaugarriak.

Orobat, sareetako jarduerak finantzatzen ahalko dira; gutxienez ere hiru ikertzaile taldek osatutako sareak, talde horietako bakoitza PLK-ko eskualde batekoa. Beharrezkoa izanen da proposamena mugaz gaindikoa izatea, hau da, gutxienez bi estatu desberdinetako ikerketa taldeen parte-hartzea izatea.

Sare tematikoak koordinatzaile nagusi bat eta parte hartzen duen eskualde bakoitzeko arduradun bana izanen ditu. Koordinatzaile nagusia bere eskualdeko arduraduna ere izanen da.

Sareko lan programaren barnean, taldeen arteko komunikazio eta lankidetzarako tresna egonkor bat ezarriko da, esate baterako "on line" gisako lankidetza sistema bat. Komunikaziorako tresna horren zeregina izanen da sarea sendotzen laguntzea, deialdi honen ondoren ere funtzionamenduan segitzeko aukera emanez.

Diru-laguntzaren gehieneko zenbatekoa 6.000 eurokoa izanen da parte-hartzaile bakoitzeko, jarduerak bi urtez finantzatzen laguntzeko.

Eskatzen diren diru-laguntzak, batez ere, jarduera hauek finantzatzeko erabiliko dira:

a) Izen handiko zientzialariek sarean parte hartzen duten ikerketa taldeei bisita laburrak egitea.

b) PLKren lurraldeetan sareko kideen arteko bilerak antolatzea.

c) Nazioarteko mintegiak edo PLK-ko enpresa sektoreari zuzendutako mintegiak antolatzea.

d) Sarean inplikaturik dauden ikerketa taldeen artean ezagutza transferitzea edo burututako ikerketaren emaitzak hedatu eta balorizatzea.

e) Sareko ikertzaileen egonaldiak PLK-ko beste eskualde bateko laborategietako batean.

f) Sareko jarduerak ezagutarazteko argitalpenak.

g) Datu baseak garatzen laguntzea.

Diru-laguntza hauek ezin izanen dira erabili, inolaz ere, ikerketa proiektuak, langileria gastuak zein laborategiko materialaren edo ekipamendu txikiko gauzen erosketa finantzatzeko.

3. Eskaerak.

Eskaerak lurralde bakoitzeko arduradunak aurkeztu beharko ditu, bere eskualdeko sareko kide guztien izenean, horretarako diseinatu den eredua erabiliz. Eskaeran honako hau agertu beharko dute, argi eta garbi:

a) Koordinatzaile nagusiaren eta lurraldeetako arduradunen curriculum vitae-a.

b) Memoria, honako hau bilduko duena: lortu nahi diren helburuak, sarea eratzearen garrantzia eta eratze honek, ikuspuntu zientifiko-tekniko eta akademikotik eman beharko lukeen balio erantsia, taldeek, bakoitzak bere aldetik, izanen lituzketen jarduera eta potentzialarekin alderatuta.

c) Sarearen helburuari buruz sareko ikertzaile taldeek azken 3 urteotan burutu dituzten lan garrantzitsuenen deskribapena eta horien ondorioz kaleratu diren argitalpenena.

d) Proposatu diren jarduera zehatzen deskribapena.

e) Programaren aurrekontu orokorra eta Nafarroako talde parte-hartzaile bakoitzaren aurrekontu xehakatua. Nafarroako taldeak batzuk baldin badira, horien guztien aurrekontu orokorra ere aurkeztu beharko da.

PLK laguntza bat jaso duten sareek ezin izanen dute beste bat eskatu aurreko laguntza bukatu eta justifikatu ez badute. Onartuko den salbuespen bakarra hauxe izanen da: sarearen helburua proiektu europar baterako eskaera bat prestatzea bada, edo hori dagoeneko onartua badago. Kasu horretan, eskatzaileak sarean lortutako emaitzen berri eman beharko du eta proiektu europarraren eskaera/kontzesioa frogatu. PLK-ko Prestakuntza eta Garapen Teknologikorako Batzordeak, laguntza emateko irizpideekin bat, sarean lortutako emaitzak ere baloratuko ditu.

4. Argibideak eman beharra.

Diru-laguntzen onuradunek, jarduketa bukatzen den egunetik, gehienez ere sei hilabetean, ondoko agiri hauek igorri beharko dituzte Enpresa Zuzendaritza Nagusira:

a) Bukaerako memoria, lortutako emaitzak eta izandako desbideraketak zehaztuta.

b) Gastuen justifikazioa.

c) Egonaldirik izan baldin bada: zentro hartzailearen ziurtagiria, non egiaztatuko baita egonaldia egin dela.

3. ERANSKINA

Ikertzaileen eskualdearteko mugigarritasunerako programa

1. Programaren xedea.

Programa honen berariazko helburua da Pirinioetako Lan Komunitateko (PLK) kide diren erkidegoetako ikerketa eta teknologia zentroetan antzeko gaietan edo elkarren osagarri diren arloetan ari diren ikerlariei bide ematea eskualdeen arteko trukaketak egin ditzaten, komunitate zientifikoko kideen arteko trukeak bultzatu, eskualdeen arteko lankidetza sendotu, ikerketa programak elkarrekin garatu eta ezagutza produkzio sektoreen esku jartzeko.

2. Programaren ezaugarriak.

Pirinioetako Lan Komunitateko kide diren ikerlari nafarren bidaiak eta egonaldiak finantzatzen ahalko dira, jarduera PLK-ko beste eskualde bateko laborategietan egiten bada. Beharrezkoa izanen da proposamena mugaz gaindikoa izatea, hau da, jatorri eta destino tokiak bi estatu desberdinetakoak izatea.

Egonaldiak hilabete bat eta sei hilabete bitarteko iraupena izanen du, eta 2009ko abenduaren 31 baino lehen bukatuko da.

Diru-laguntzaren zenbatekoa destinoaren eta ikerlariak bere ohiko lantokian betetzen duen postuaren arabera zehaztuko da. Gehienez ere, 6.000 eurokoa izanen da. Salbuespen gisa, zenbatekoa handiagoa izaten ahal da, Pirinioetako Lan Komunitatearen Prestakuntza eta Garapen Teknologikorako Batzordeak proposaturik.

Diru-laguntza hauek ezin izanen dira erabili, inolaz ere, ikerketa proiektuak, langileria gastuak zein laborategiko materialaren edo ekipamendu txikiko gauzen erosketa finantzatzeko.

3. Eskaerak.

Eskaerak horretarako propio prestatu den eredua erabilita aurkeztu behar dira. Eskaeran honako hau agertu beharko dute, argi eta garbi:

a) Lortu nahi diren helburuak eta, ikuspuntu zientifiko, tekniko eta akademikotik begiratuta, mugigarritasunerako proposamenak ekarriko lukeen balio erantsia.

b) Egonaldian egin gogo diren jardueren plan zehatza eta aurrekontua.

c) Jarduera programaren onarpen agiria, mugigarritasunerako proposamenean parte hartzen duten zentroek edo erakundeek sinatutakoa.

d) Erakunde bakoitzean mugigarritasunaren ardura duten ikerlarien curricula vitarum-ak.

e) Mugigarritasunean zuzenean parte hartuko duten ikerlarien curricula vitarum-ak. Doktoregoa ez duten izangaien kasuan ziurtagiri akademiko ofiziala, honako hauek zehatz-mehatz adierazirik: ikasgaietan erdietsitako kalifikazioak eta ikasgai horiek lizentzia edo ingeniaritzaren programa osatzen duten guztiak direla.

f) Zentro parte-hartzaileek azken 3 urteotan burutu dituzten lan garrantzitsuenen deskribapena eta horien ondorioz kaleratu diren argitalpenena. Horiek egonaldiaren xedeari eta proposatutako gaiaren eta lankidetzaren egokitasunari buruzkoak izanen dira.

g) Mugigarritasuna eskatzen duten proiektuak.

h) Eskualde, erakunde edo talde hartzailearen konpromiso ekonomikoa. Bertan azalduko dira finantziazio konpromisoaren zenbatekoa eta kontzeptuak. Bestela, partaide den eskualdeko ikerlariak helburu horretarako finantziazioa eskatu duela frogatzen duen agiria.

i) Eskatzaileak erakunde publiko edo pribatuei eskatutako finantzabideak edo berezko bestelako finantzabideak izanez gero, adierazpen batean jaso beharko ditu.

PLK laguntza bat jaso duten sareek ezin izanen dute beste bat eskatu aurreko laguntza bukatu eta justifikatu ez badute.

4. Argibideak eman beharra.

Diru-laguntzen onuradunek, trukaketa bukatu eta, gehienez ere sei hilabeteko epean, ondoko agiri hauek igorri beharko dituzte Enpresa Zuzendaritza Nagusira:

a) Bukaerako memoria, lortutako emaitzak eta izandako desbideraketak zehaztuta.

b) Zentro hartzailearen ziurtagiria, non egiaztatuko baita egonaldia egin dela.

c) Gastuen justifikazioa.

4. ERANSKINA

Lankidetza proiektuen programa, ikerketa
eta garapen teknologikoaren arloan(I+G)

1. Programaren xedea.

Programa honek berariazko xede du PLK-ko erkidegoen intereseko I+G proiektuak bultzatzea eta Ikerketaren eta Garapenaren arloan egun diren baliabide ugariak trukatzeko bidea erraztea. Horretarako, PLKren eremuko ikerketa eta teknologia zentroek produkzio sektoreei lankidetza eskaini eta ezagutza transferitu behar diete.

2. Programaren ezaugarriak.

Eskaerak I+Gko proiektu baterako izanen dira. Bertan, gutxienez, hiru kidek hartuko dute parte, horietako bat bederen enpresen sektorekoa (ezagutzaren transferentzia bultzatzeko), PLK-ko eremu geografikoaren baitako bi eskualde ezberdinetakoak. Beharrezkoa izanen da proposamena mugaz gaindikoa izatea, hau da, gutxienez bi estatu desberdinetako kideek parte hartzea.

Proiektuaren gehieneko iraupena bi urtekoa izanen da.

Eskatzen diren diru-laguntzak honako jarduera hauek finantzatzeko erabiltzen ahalko dira:

a) Langileen gastuak.

b) Material inbentariagarriaren amortizazioa: instalazioak, ekipamenduak, makinak, etab. erosi eta aldatzea.

c) Proiektuan erabilitako material suntsigarria.

d) Instalazioen edo sostengu zerbitzuen erabilerak sortutako gastuak.

e) Bidaiak, PLKren lurralde barrenean.

f) Gastu txikiak: erreprografia, bulegoko materiala, etab.

Proiektuak koordinatzaile nagusi bat izanen du eta arduradun bat erkidego bakoitzeko (koordinatzaile nagusia, aldi berean, bere erkidegoko arduraduna izanen da). Koordinatzaile nagusiak aski frogaturiko curriculuma izan beharko du.

Diruz lagundu gabe gelditzen den proiektuaren zatiak ere finantzabidea beharko du izan.

PLK deialdiren batean, hau baino lehenagokoan, proiektu bat aurkeztu eta diru-laguntza bat jaso duten ikerketa taldeek ezin izanen dute beste diru-laguntza bat jaso 2009ko deialdian, salbu eta, hau ixterakoan, aurreko proiektua bukatua eta aski justifikatua bada.

3. Eskaerak.

Lurraldeko arduradun bakoitzak, bere eskualdeko parte-hartzaile guztien izenean, honako agiri hauek aurkeztu beharko ditu, horretarako prestatu den eredua erabiliz:

a) Proiektuaren koordinatzaile nagusiaren eta lurraldeetako arduradunen datu pertsonalak.

b) Koordinatzaile nagusiaren eta lurraldeetako arduradunen curriculum vitae-a.

c) Talde eskatzailearen argitalpen eta merezimenduen zerrenda, azken hiru urteetakoa. Proposatu den ikerketa proiektuaren gainekoak soilik agertuko dira.

d) Koordinatutako proiektuaren plan osoaren laburpena (2-4 orrialde).

e) Erdietsi beharreko xedeak, metodologia eta proposatu diren jarduerak eta talde bakoitzari dagokion zatiaren plangintza zehaztua.

f) Proiektuaren aurrekontu orokorra eta Nafarroako talde bakoitzaren aurrekontu xehakatua. Nafarroako taldeak batzuk baldin badira, horien guztien aurrekontu orokorra ere aurkeztu beharko da.

Eskaerak lehenbiziko aukeraketa pasatzen baldin badu, Enpresa Zuzendaritza Nagusiak egoki jotzen dituen agiri osagarriak eskatuko ditu.

4. Argibideak eman beharra.

Diru-laguntzen onuradunak beharturik daude ondoko dokumentazio hau Enpresa Zuzendaritza Nagusira igortzera:

a) Diruz lagundutako proiektuaren garapena azalduko duen memoria, bai eta gauzatzerakoan sartu diren aldaketak ere, berekin dakartzaten aurrekontu ondorioak azalduz. Lortutako emaitzak.

b) Diru-sarrera eta gastuen zerrenda eta, horrekin batera, behar diren frogagiriak.

7. oinarrian aipatutako "Jarraipen tekniko-ekonomikoaren informazioa" izeneko inprimakia erabili behar da. Informazio agiriak proiektua bukatzeko emandako epea agortu eta, gehienez ere, sei hilabetean igorri behar dira eta, gainera, laguntza ematen duen ebazpenean tarteko data bat zehazten baldin bada, data horren ondoko sei hilabeteetan aurkeztuko dira.

Proiektua bukatu eta ondoko dei hilabeteetan 8.1.d) oinarrian aipatutako bukaerako memoria bateratua ere aurkeztuko da.

Iragarkiaren kodea: F0915441