Iragarkia

66. ALDIZKARIA - 2009ko maiatzaren 29a

I. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

60/2009 FORU AGINDUA, maiatzaren 8koa, Hezkuntzako kontseilariak emana. Onesten du zer arauren bidez kudeatu behar diren Hezkuntza Departamentuaren zerbitzuan aldi baterako kontratuarekin irakasle lanpostuetan aritzeko izangai zerrendak.

Hezkuntza Departamentuak aldi baterako irakasleak kontratatzea berariaz araututa dago Hezkuntza Departamentuaren zerbitzuan aldi baterako kontratazioaren bidez irakasle lanpostuetan aritzeko izangaien zerrendak kudeatzeko arauak eman zituen Hezkuntza kontseilariaren irailaren 23ko 156/2005 Foru Aginduan.

Arau honek aldaketa batzuk izan ditu. Horien artean nabarmentzekoa da Hezkuntza kontseilariaren abenduaren 27ko 228/2007 Foru Aginduaren bitartez onetsi zena. Aldaketa horrek ekarri zuen aldaketarik garrantzitsuena hau izan zen: aldi baterako langileak kontratatzeko sisteman oposizio-fasea gainditurik ere kasuan kasuko kidegoan, espezialitatean eta hizkuntzan sartzeko hautapen prozesua gainditu ez dutenen zerrenda sartzea, sartzeko hautapen prozesuan lorturiko emaitzaren arabera ordenatuta.

Iazko ikasturtean sistema hori erabilita izandako esperientzia positiboa izan zen; bestalde, aldi baterako kontratazioaren bidez irakasle lanpostuetan aritzeko izangaien zerrendak kudeatzean eragingarritasuna are gehiago hobetzea beharrezkoa da. Hori guztia kontuan hartuta komenigarria da beste arau bat onestea, kontratazio beharrizanak artatzeko prozedura arinagoa izan dadin.

Ildo horretan, Hezkuntza Departamentuak eta Hezkuntzaren Mahai Sektorialean ordezkaritza duten sindikatuek 2007ko martxoaren 22an izenpetutako Nafarroako irakaskuntza publikoaren kalitatea hobetzeko 2007-2011 aldirako itunak kontratazio zerrenden kudeaketa aldatzea aurreikusi zuen, irakasleak ordezteko eta aldi baterako lanpostuak betetzeko prozedurak bizkortzeko.

Helburu horrekin, foru agindu honek kidego, espezialitate eta hizkuntza bakoitzerako aldi baterako kontrataziorako izangaien zerrendak egotea aurreikusi du. Zerrenda horiek orokorrean sartzeko hautapen prozeduretan oinarrituta eratuko dira, honako hurrenkera honekin: lehenengoz, oposizio-fasea gainditurik ere kasuan kasuko kidegoan, espezialitatean eta hizkuntzan karrerako funtzionario gisa sartzeko hautapen prozesua gainditu ez dutenen zerrenda; bigarrenez, aldi baterako kontrataziorako izangaien zerrenda orokorra, honako hauek osatua: kidegoan, espezialitatean eta hizkuntzan sartzeko hautapen prozesuan aurkeztu arren lehenengo zerrendan ez dauden izangaiek; espezialitate eta hizkuntza horretako zerrendan lehenago egon diren izangaiek, baldin eta beste espezialitate eta hizkuntza bateko hautapen prozesuan aurkeztu badira; eta sartzeko hautapen prozedura deitu deneko ikasturtean kidego, espezialitate eta hizkuntza horretan gutxienez kontratu baten bidez zerbitzuak eman dituztenek, baldin eta kasu guztietan eskakizun jakin batzuk betetzen badituzte; hirugarrenez, berariazko deialdi bidez eratutako aldi baterako kontrataziorako izangaien zerrenda; jarraian, enplegu zerbitzu publikoen bidez hautatutako aldi baterako kontrataziorako izangaien zerrenda. Halaber, salbuespen gisa eta premiazko arrazoiengatik, aipatu zerrenda horietako batean ere izangairik ez dagoenean berariazko kontratazioak egiteko aukera sartu da.

Beste alde batetik, irakasle lanpostuak aldi baterako betetzeko prozedura eta aldi baterako kontrataziorako izangaien zerrenden kudeaketa eraendu behar dituzten gainerako arauak ere arautu dira, ahal den neurrian Hezkuntza Departamentuaren zerbitzuan irakasle lanpostuak aldi baterako modu azkar eta eragingarrian beteko direla bermatzeko.

Foru agindu honen edukia behar bezala negoziatu da irakasleen Mahai Sektorialean. Bertan, proiektuan sindikatuek egindako proposamen batzuk txertatu diren arren, ezin izan zen adostasunik lortu.

Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluko 1. idatz-zatiko g) letran ematen zaizkidan ahalmenak erabiliz,

AGINDU DUT:

1. artikulua. Helburua eta aplikazio denbora.

1. Foru agindu honen xedea irakasle lanpostuak aldi baterako kontratazioaren bitartez betetzeko prozedura arautzea eta Nafarroako Gobernuko Hezkuntza Departamentuaren zerbitzuko irakasle lanpostuetan aldi baterako kontratazioaren bidez aritzeko izangaien zerrendak kudeatu eta arautzea da.

2. Foru agindu honen arauen bitartez eratutako aldi baterako kontrataziorako izangaien zerrendak nahiz aginduan bildutako kudeaketa arauak 2009-2010 ikasturterako egiten diren deialdi eta kontratazioetan hasiko dira aplikatzen, eta indarrean egonen dira Hezkuntzari buruzko maiatzaren 3ko 2/2006 Lege Organikoaren hamazazpigarren xedapen iragankorrean aipatzen den irakasleen kidegoetako sarrera-araubide iragankorra aplikatzekoa den bitartean.

Dena dela, foru agindu honen indarraldia luzatu dela ulertuko da aurreko paragrafoan aipatu sarrera-araubide iragankorra amaitu ondoren, aldi baterako kontrataziorako izangaien zerrendak kudeatzeko sistema berria onetsi arte.

2. artikulua. Kontratazio motak.

Hezkuntza Departamentuak irakasleak kontratatu ahal izanen ditu hezkuntza arloan sortzen diren beharrizanak aldi baterako betetzeko, baita lanpostuen titularrak ordeztu ahal izateko, hori bidezkoa denean.

Administrazio kontratua erabiliko da, Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88. artikuluan eta hurrengoetan zein Nafarroako Foru Komunitateko Administrazioan eta haren erakunde autonomoetan langileak administrazio araubidean kontratatzeko arauak ematen dituen urtarrilaren 7ko 1/2002 Foru Dekretuan xedatuta dagoenaren arabera.

Irakasle lanpostu bat aldi baterako betetzen amaituko da dagokion ikasturtea amaitzean, kasu guztietan.

3. artikulua. Aldi baterako kontratuetarako izangaien zerrenda.

1. Hezkuntza Departamentuak aldi baterako kontrataziorako izangaien zerrendak osatu ahal izanen ditu irakasle kidego, espezialitate eta hizkuntza bakoitzean. Horietan lehentasun hurrenkera hau izanen da:

1. Oposizio-fasea gainditurik ere, sartzeko hautapen prozedura gainditu ez duten izangaien zerrenda. Zerrenda hori, foru agindu honen ondorioetarako, gainditu arren lanposturik lortu ez duten izangaien zerrenda deituko da.

2. Aldi baterako kontrataziorako izangaien zerrenda orokorra.

3. Berariazko deialdi bidez eratutako izangaien zerrendak.

4. Enplegu zerbitzu publikoen bitartez hautatutako izangaien zerrendak.

2. Adi baterako kontrataziorako izangai bakoitza kidego, espezialitate eta hizkuntza bereko lanpostuak aldi baterako betetzeko aplikatu ahal diren kontratazio zerrendetako bakar batean agertu ahal izanen da.

4. artikulua. Gainditu arren lanposturik lortu ez duten izangaien zerrenda.

Hezkuntza Departamentuak kasuan kasuko kidegoan, espezialitatean eta hizkuntzan funtzionario gisa sartzeko eginiko azken deialdiko oposizio-fasea gainditurik ere, lanposturik lortu ez duten izangaiek osatuko dute zerrenda hau.

Izangai horiek oposizio-fasearen eta lehiaketa-fasearen batura ponderatuaren bidez lorturiko puntuazioaren arabera antolatuko dira, kidego, espezialitate eta hizkuntza bakoitzari dagokion zerrendaren barruan.

Hala ere, %33ko edo gehiagoko ezgaitasun frogatua duten izangaiek lehentasuna izanen dute zerrenda honetako aldi baterako kontrataziorako gainerako izangaien aurretik, baldin eta ezgaitasun hori dagokien lanpostua betetzearekin bateragarria dela egiaztatzen badute, abuztuaren 30eko 251/1993 Legegintzako Foru Dekretuaren bidez onetsitako Nafarroako Administrazio Publikoen Zerbitzuko Langileriaren Estatutuaren Testu Bateginaren zazpigarren xedapen gehigarriaren arabera.

Oposizio-fasea gainditurik ere hautapen prozesua gainditzen ez duten aldi baterako kontrataziorako izangaien beste zerrenda bat onetsi arte egonen dira indarrean artikulu honen babesean osatzen diren zerrendak, kasuan kasuko kidegoan, espezialitatean eta hizkuntzan.

5. artikulua. Aldi baterako kontrataziorako izangaien zerrenda orokorra.

1. Aldi baterako kontrataziorako izangaien zerrenda orokorra kidego, espezialitate eta hizkuntza bakoitzean ondoko izangaiek osatuko dute:

A) Hezkuntza Departamentuak dagokion kidego, espezialitate eta hizkuntzarako deitutako sartzeko hautapen prozesura aurkeztu diren izangaiak, baldin eta ondoko baldintzak betetzen badituzte:

a) Oposizioaren lehenengo ariketara aurkeztu izana.

b) Oposizio-fasean puntuazio positiboa jaso izana.

c) Foru agindu honen I. eranskinean espezialitate eta hizkuntza bakoitzerako zehazten diren titulazio eskakizunak betetzea.

Izangaia lehendik kidego, espezialitate eta hizkuntza horretan aldi baterako kontrataziorako izangaien indarreko zerrendetako batean agertzen bada, eskakizun hori egiaztatzea ez da beharrezkoa izanen.

d) Foru agindu honen 11.1 artikuluko f) eta g) letretan agertzen diren eskakizunak betetzea.

e) Oposizio-fasean ariketa praktiko bat dagoen kasuetan, sartzeko hautapen prozeduretarako deialdian bertan zehaztuko da hautapen prozesuko ariketa praktikoa zein espezialitatetan eta zein hizkuntzatan gainditu behar den zerrenda orokorrean sartzeko.

Idatz-zati honetan dagoen arauketaren arabera zerrenda orokorraren barruan dauden izangaiak hautapen prozesuan lortu duten azken puntuazioaren arabera ordenatuko dira. Berdinketarik egonez gero, izangaien ordena lehenengo abizenaren ordena alfabetikoaren arabera zehaztuko da eta, bidezkoa bada, bigarren abizenaren arabera, sartzeko hautapen prozeduran egin zozketan ateratzen diren letretatik aurrera zenbatuta.

B) Kasuan kasuko kidegoan, espezialitatean eta hizkuntzan sartzeko hautapen prozesuaren ondorioz sortutako aldi baterako kontrataziorako izangaien indarreko zerrendetan -gainditu arren lanposturik lortu ez dutenen zerrenda zein aldi baterako kontratuetarako izangaien zerrenda orokorra- dauden izangaiak, baldin eta ondoko baldintza hauek betetzen badituzte:

a) Hezkuntza Departamentuak onetsitako deialdi beraren arabera beste kidego, espezialitate edo hizkuntza batean sartzeko hautapen prozedurako oposizio-faseko lehenengo ariketan aurkeztu izana.

b) Oposizio-fasean puntuazio positiboa jaso izana.

Idatz-zati honetan dagoen arauketaren arabera zerrenda orokorraren barruan dauden izangaiak sartzeko hautapen prozesuko baremoaren irakasle esperientziari buruzko atalari dagokion puntuazioaren arabera -eta horren arabera soilik- ordenatuko dira. Berdinketarik egonez gero, izangaien ordena lehenengo abizenaren ordena alfabetikoaren arabera zehaztuko da eta, bidezkoa bada, bigarren abizenaren arabera, sartzeko hautapen prozeduran egin zozketan ateratzen diren letretatik aurrera zenbatuta.

C) Hezkuntza Departamentuak dagokion kidego, espezialitate eta hizkuntzan sartzeko hautapen prozedura deitzen duen ikasturtean zerbitzuak gutxienez kontratu baten bidez eman dituzten irakasleak, baldin eta kontratu hori amaitzean izangaiak gainditu arren lanposturik lortu ez dutenen zerrendan edo kidego, espezialitate eta hizkuntza horretarako aldi baterako kontrataziorako izangaien zerrenda orokorrean jarraitzen badu.

Idatz-zati honetako arauketaren arabera zerrenda orokorrean dauden izangaiak puntuaziorik gabe sartuko dira zerrendan, aurreko bi idatz-zatietan zerrendatu direnen atzetik, eta beren artean ordenatuko dira jatorrizko zerrendetan zuten ordena berberarekin.

2. Aldi baterako kontrataziorako izangaiak zerrenda orokorrean sartuko dira kasu bakoitzean artikulu honetan ezarrita dagoenaren arabera dagokien puntuazioarekin, eta dagokion kidego, espezialitate eta hizkuntzan gainditu arren lanposturik lortu ez dutenen zerrendari aplikatutako ponderazio berbera aplikatuko zaio zerrenda horri.

3. Kidego, espezialitate eta hizkuntza bakoitzeko aldi baterako kontrataziorako izangaien zerrenda orokorra indarrean egonen da izangaien zerrenda orokor berria onetsi arte, dagokion kidego, espezialitate eta hizkuntzan sartzeko hurrengo deialdia ebatzi ondoren.

6. artikulua. Berariazko deialdiek osatutako aldi baterako kontrataziorako izangaien zerrendak.

Hezkuntza Departamentuak prentsan edo web orri batean argitaratu ahal izanen ditu kidego, espezialitate eta hizkuntza jakin batzuetan aldi baterako kontrataziorako izangai berriak erakartzeko berariazko deialdiak.

Deialdi horietan hautatutako izangaiak zerrenda horien barruan foru agindu honen II. eranskinean onetsitako merezimenduen baremoa aplikatuz lortutako puntuazioaren arabera ordenatuko dira. Berdinketarik egonez gero, zerrenda bakoitzaren barruan dauden izangaien ordena lehenengo abizenaren ordena alfabetikoaren arabera zehaztuko da eta, bidezkoa bada, bigarren abizenaren arabera, Giza Baliabideen Zerbitzuan horretarako egin zozketan ateratzen diren letretatik aurrera zenbatuta.

Kidego, espezialitate eta hizkuntza bererako hainbat deialdi egiten denean deialdi bat indarrean dagoen bitartean, geroko deialdi batean hautatutako izangaiak deialdian lehenago zeudenen atzetik sartuko dira zerrendan.

Berariazko deialdien bidez egindako aldi baterako kontrataziorako izangaien zerrendak indarrean egonen dira dagokion kidego, espezialitate eta hizkuntzan sartzeko beste deialdi bat ebatzi arte.

7. artikulua. Enplegu zerbitzu publikoen bitartez aldi baterako kontrataziorako hautatutako izangaien zerrenda.

Kasu larrietan Hezkuntza Departamentuak enplegu zerbitzu publikoei kidego, espezialitate eta hizkuntza jakin batean eskolak emateko eskatzen diren baldintzak betetzen dituzten enplegu-eskatzaileen zerrenda eskatu ahal izanen die.

Sistema horren bitartez aukeratutako izangaiak enplegu zerbitzu publikoek bidalitako zerrendan bertan ezarrita dagoen ordenan agertuko dira zerrendan.

Kidego, espezialitate eta hizkuntza bererako hainbat deialdi egiten denean enplegu zerbitzu publikoen bitartez, geroko deialdi batean hautatutako izangaiak deialdian lehenago zeudenen atzetik sartuko dira zerrendan.

Enplegu zerbitzu publikoetatik datozen aldi baterako kontrataziorako hautatutako izangaien zerrendek urtebeteko indarraldia izanen dute.

8. artikulua. Kontratazio bereziak.

Salbuespen gisa, premiazko arrazoiengatik beharrezkoa denean, eta betiere aurreko artikuluetan azaldu diren zerrendetan izangai erabilgarririk ez badago, berariazko kontratazioak egin ahal izanen dira pertsonarik egokienekin, bete nahi den lanpostuaren ezaugarrietara moldatzen diren kontuan hartuta.

9. artikulua. Aldi baterako kontrataziorako izangaien zerrenda orokorreko izangaiak dagokien kidego, espezialitate eta hizkuntzan sartzea.

Kidego, espezialitate eta hizkuntza bakoitzeko aldi baterako kontrataziorako izangaien zerrenda orokorrean sartuko dira berariazko deialdietako zerrendetan edo enplegu zerbitzu publikoen zerrendetan agertzen diren izangaiak, edo kontratazio berezietatik zein kontratazio eskaintzetatik datozenak, dagokien kidego, espezialitate eta hizkuntzako irakaskuntza kontratu bat Hezkuntza Departamentuarekin egitea onartzen dutenean, baita antzeko zerrenden bitartez kontratatutako pertsonak ere.

Izangai horiek zerrenda orokorrean puntuaziorik gabe sartuko dira, zerrenda horretan lehendik zeuden izangaien atzean, zerrendan sartu direneko egun, ordu, minutu eta segundoaren arabera ordenatuta, eta berdinketarik egonez gero, zein zerrendaren bitartez kontratatu zituzten, zerrenda hartako ordenaren arabera.

10. artikulua. Aldi baterako kontrataziorako lanpostuen eskaintza.

1. Irakasle lanpostuak aldi baterako betetzeko kontratazioa kidego hauetako espezialitate eta hizkuntza bakoitzaren arabera bereiziriko zerrenden arabera eginen da:

-Maisu-maistrak.

-Bigarren Hezkuntzako irakasleak.

-Lanbide Heziketako irakasle teknikoak.

-Hizkuntza Eskola Ofizialetako irakasleak.

-Musikako eta Arte Eszenikoetako irakasleak.

-Arte Plastikoetako eta Diseinuko irakasleak.

-Arte Plastikoetako eta Diseinuko tailer maisuak.

Katedradunei erreserbatutako lanpostuak kontratazio administratiboaren bidez aldi baterako betetzea eskainiko zaie irakasleak kontratatzeko zerrenda egokietan agertzen diren izangaiei. Dena dela, izangai horiei berariazko baldintzak egiazta ditzatela edo probak gaindi ditzatela eskatu ahal izanen zaie.

2. Aldi baterako kontratazioaren bitartez bete beharreko lanpostuak Hezkuntzako Ikuskatzailetza Zerbitzuak zehazten dituen kontratazio zerrendetan dauden izangaiei eskainiko zaizkie dagoen kidego, espezialitate eta hizkuntzarako, eta izangaiek nahitaez eskolak eman beharko dituzte eskainitako lanpostua osatzen duten irakasgai guztietan, jarraian adieraziko diren berezitasunekin.

Eskainitako lanpostuak ondoko mota hauetakoak izan daitezke:

A) Eskaintzen direneko espezialitate eta hizkuntzaren karga osoa duten lanpostuak.

B) Lanpostu mistoak; beste espezialitate batekin edo batzuekin osatzen dute eta ez da berariazko eskakizun edo titulaziorik egiaztatu behar.

Kasu horietan, izangaiek uko egin ahal izanen diete ordu-kopurua Musikarekin, Gorputz Hezkuntzarekin, Atzerriko Hizkuntzarekin, euskararekin -gaztelaniazko ikastetxeetan- edo trebetasun instrumental edo teknikoak barnean hartzen dituzten bestelako espezialitateekin osatzen dituzten lanpostuei, eskainitako lanpostuaren orduak osatzeko erabiltzen den espezialitate eta hizkuntzan aldi baterako kontrataziorako izangaien zerrendetan agertzen direnean izan ezik.

C) Zeinuen hizkuntzako berariazko eskakizuna duten lanpostuak eta, Musika espezialitateko Maisu-maistren Kidegoko aldi baterako kontrataziorako izangaien zerrendaren barruan, berariazko programetarako musika tresnena dutenak.

Lanpostu horiek betetzeko, aldi baterako kontrataziorako izangaien zerrendetan dagokien profilarekin identifikatuko dira eskatutako titulazioa egiaztatu duten izangaiak. Kontratazioa egiteko, dagokion zerrendaren ordenari jarraituko zaio.

D) Atzerriko hizkuntzaren profila duten lanpostuak: atzerriko hizkuntzaren orduak eman behar direneko atzerriko hizkuntzarenaz bestelako espezialitate bateko lanpostuak dira, eta dagokion atzerriko hizkuntzaren profila egiaztatzea eskatzen dute.

Lanpostu horiek betetzeko, atzerriko hizkuntzarenak ez diren espezialitateen zerrendetan profil horrekin identifikatuko dira zerrenda horren kidegoan atzerriko hizkuntza emateko eskatzen den titulazioa egiaztatu duten izangaiak. Halaber, foru agindu honen lehenengo xedapen gehigarrian ezarrita dagoenaren arabera, Hezkuntza Departamentuak hizkuntzen profilak egiaztatzeko berariazko probak deitu ahal izanen ditu. Kontratazioa egiteko, dagokion zerrendaren ordenari jarraituko zaio.

Hizkuntzen espezialitatekoak ez diren kontratazio zerrendetan dauden baina hizkuntza baten jakintzari buruzko profila duten izangaiek espezialitate horretan dagozkien atzerriko hizkuntzako orduak eman behar direneko lanpostuetan kontratatzeko eskaintzak onartu beharko dituzte nahitaez; kasu horietan, horrelako kontratazio eskaintza bati uko egitea justifikaziorik gabeko ukoa dela ulertuko da.

E) Atzerriko hizkuntzan eman beharreko programa eleanitzetako lanpostuak.

Lanpostu horiek betetzeko, aldi baterako kontrataziorako izangaien zerrendetan dagokien profilarekin identifikatuko dira dena delako atzerriko hizkuntzaren jakintza Bigarren Hezkuntzako irakasleen kidegoetan edo Hizkuntza Eskola Ofizialetako irakasleen kidegoetan dagozkien hizkuntza espezialitateak emateko eskatzen den titulazioa aurkeztuz edo Hezkuntza Departamentuak horretarako deitutako probak gaindituz egiaztatu duten izangaiak. Kontratazioa egiteko, dagokion zerrendaren ordenari jarraituko zaio.

Kontratazio zerrendetan egonik programa eleanitzetarako hizkuntza baten jakintzari buruzko profila duten izangaiek dagozkien atzerriko hizkuntzako lanpostuetan kontratatzeko eskaintzak onartu beharko dituzte nahitaez; kasu horietan, horrelako kontratazio eskaintza bati uko egitea justifikaziorik gabeko ukoa dela ulertuko da.

11. artikulua. Aldi baterako kontrataziorako izangaien zerrendetan sartzeko baldintzak.

Berariazko deialdi baten bidez edo enplegu zerbitzu publikoen bitartez eratutako aldi baterako kontrataziorako izangaien zerrendetako batean sartzeko, izangaiek jarraian adieraziko diren baldintzak bete beharko dituzte.

Artikulu honetan aipatzen diren baldintzak aldi baterako kontrataziorako izangaien zerrenda egokian sartzeko eskaerak aurkezteko epea bukatzen den egunean bete behar dira eta Administrazioak izangaiari zerbitzu ematen hasteko deitzen dion momentura arte iraun, baita kontratatua zerbitzu ematen aritzen den denboran ere.

Kontratazio zerrenda batean egonik zerrenda horretan egoteko eskatzen diren baldintzetako bat betetzeari uzten dioten izangaiek inguruabar horren berri eman beharko diote Administrazioari; nolanahi ere, izangaiak dagokien zerrendatik automatikoki baztertuta geratuko dira, eta bidezkoa bada, aldi baterako kontrataziorako izangaien beste zerrenda batzuetan badaude, horietatik ere bai, eskatzen diren baldintzak betetzen ez badituzte.

1. Baldintza orokorrak.

a) Espainiarra izatea edo Europar Batasuneko gainerako estatuetako batekoa, edo ondoko arauak aplikatuak dituen estaturen batekoa: langileen joan-etorri askeari buruz Europako Parlamentuak emandako 2004/38/EE Zuzentaraua eta Europar Batasuneko edo Europako Esparru Ekonomikoari buruzko Akordioari lotutako beste estatu batzuetako herritarrak Espainian sartu eta bizitzeari eta beren joan-etorri askeari buruzko otsailaren 16ko 240/2007 Errege Dekretua.

Ezkontideek ere parte har dezakete aldi baterako kontrataziorako izangaien zerrendetan, edozein dela ere beren nazionalitatea, zuzenbidez bananduta ez badaude, bai eta bere ondorengoek eta ezkontidearenek ere, zuzenbidez bananduta ez badaude eta, ondorengoei dagokienez, hogeita bat urtetik beherakoak badira edo, zaharragoak izanez gero, haien bizkar bizi badira edo ezgaiak badira. Halaber, aldi baterako kontrataziorako izangaiak izan ahal izanen dira izangaiaren aurreko ahaide zuzenak eta haren ezkontidearenak, zuzenbidez bananduta ez badaude eta haren kargura bizi badira.

Nazionalitate espainiarrik ez badute, izangaiek gaztelania maila zehazteko proba bat egin beharko dute, baldin eta ez badute Espainieraren Goi Mailako Diploma, Atzerritarrentzako Espainieraren Goi Mailako Diplomaren baliokidea dena, edo atzerritarrendako den Espainieraren Gaitasun Agiria, Hizkuntza Eskola Ofizialek emana, edo Filologia Hispanikoko edo Erromanikoko lizentziadun titulua. Era berean, ez dute gaztelania probarik egin beharko hizkuntza ofiziala gaztelania duen herrialde bateko nazionalitatea duten izangaiek, Espainian unibertsitateko titulazio bat erdietsi dutenek eta Bigarren Hezkuntzako Irakasleen Kidegoan Gaztelania eta Literaturako espezialitatean aldi baterako kontratazio bidez sartu nahi duten izangaiek.

b) 16 urte beteak izatea, eta orokorrean erretiroa hartzeko ezarritakoa baino adin handiagoa ez izatea.

c) Erabateko ezintasun iraunkorraren edo ebaliaezintasun handiaren egoera deklaratuan ez egotea, eta irakaslanarekin bateraezina den eritasunik edo eragozpen fisiko zein psikikorik ez izatea.

d) Diziplina espediente bidez Administrazio Publikoen zerbitzutik bereizia ez izana, eta eginkizun publikoak betetzeko desgaituta ez egotea.

Nazionalitate espainiarra ez duten izangaiek egiaztatu beharko dute, halaber, beren Estatuko funtzio publikoan sartzea eragozten dien diziplina zehapenik edo zigor penalik ez dutela, eta espezialitate bakoitzerako foru agindu honen I. eranskinean eskatzen den titulua homologatua edo balio berekoa dela.

e) Karrerako edo praktiketako funtzionarioa ez izatea, edo kidego bateko aldi baterako kontrataziorako izangaien zein zerrendatan sartu nahi den, kidego horren mailako edo goragoko karrerako funtzionario gisa noiz izendatuko duten zain ez egotea.

f) Hezkuntza Departamentuko irakasle lanpostuetan, aldi baterako kontrataziorako izangaien zerrenda batetik bazterturik ez egotea, arrazoia kontratua lanpostuan aritzeko gauza ez izateagatik edo ez egokitzeagatik deuseztatzea izan baldin bada.

g) Sartu nahi den kidego, espezialitate eta hizkuntzako kontratazio zerrendako probaldian kontratua deuseztatzeagatik aldi baterako kontrataziorako izangaien zerrenda batetik baztertuta ez egotea.

h) Zein kidego, espezialitate eta hizkuntzatan sartu nahi den, horri dagokion aldi baterako kontrataziorako izangaien indarreko zerrendan ez egotea.

2. Titulazio baldintzak.

2.1. Ikasketa tituluak.

a) Maisu-maistren kidegoko espezialitateei dagozkien aldi baterako kontrataziorako izangaien zerrendetan sartzeko, kontrataziorako izangaiek Maisu-maistra titulua, OHOko Diplomadun titulua edo Lehen Hezkuntzako Maisu titulua edo baliokidea den mailako titulua izan beharko dute.

b) Bigarren Hezkuntzako irakasle, hizkuntza eskola ofizialetako irakasle, Musikako eta Arte Eszenikoetako eta Arte Plastikoetako eta Diseinuko irakasle kidegoetako espezialitateei dagozkien adi baterako kontrataziorako izangaien zerrendetan sartzeko, kontrataziorako izangaiek doktore, ingeniari, arkitekto, lizentziadun edo baliokidea den mailako titulua nahiz irakasteari begira balio bereko titulu bat izan beharko dute.

c) Lanbide Heziketako irakasle teknikoen eta Arte Plastikoetako eta Diseinuko tailer maisuen kidegoetako espezialitateei dagozkien adi baterako kontrataziorako izangaien zerrendetan sartzeko, kontrataziorako izangaiek Diplomadun, Arkitekto Tekniko, Ingeniari Tekniko, Lizentziadun edo baliokidea den mailako titulua nahiz irakasteari begira balio bereko titulu bat izan beharko dute.

Aurreko ataletan aipatzen diren titulazio baldintza orokorrez gain, titulazio espezifikoak ere izan beharko dituzte izangaiek, foru aginduaren I. eranskinean espezialitate bakoitzerako zehazten diren haiek edo kasuan kasu unibertsitate ikasketa ofizialen antolamendu berritik ateratzen diren haiek.

2.2. Euskara titulua.

Euskarazko lanpostuetako aldi baterako kontrataziorako izangaien zerrendetan sartzeko, edozein dela ere eskatu d(ir)en espezialitate(eta)ko kidegoa, EGA edo balio bereko titulua izan beharko du izangaiak.

2.3. Zeinuen hizkuntzako berariazko eskakizuna duten lanpostuetarako eskatzen den titulazioa eta, Musika espezialitateko Maisu-maistren Kidegoko aldi baterako kontrataziorako izangaien zerrendaren barruan, berariazko programetarako musika tresnena.

Zeinuen hizkuntzako berariazko profila duten lanpostuetako kontratazioa lortzeko, aldi baterako kontrataziorako izangaiek Nafarroako Gorren Elkarteak (ASORNA) zeinuen hizkuntzako komunikazioari buruzko 3. mailako ikastaroa egin izana egiaztatzeko ematen duen egiaztagiria edo titulazio homologatua daukatela egiaztatu beharko dute.

Halaber, musika tresnen berariazko programetan eskola eman ahal izateko, Musika espezialitateko Maisu-maistren Kidegoko aldi baterako kontrataziorako izangaiek irailaren 10eko 2618/1966 Dekretuan ezarritako Erdi Mailako Musikako Titulua eduki beharko dute dagokien espezialitatean.

2.4. Atzerriko hizkuntzaren orduak eman behar direneko atzerriko hizkuntzarenaz bestelako espezialitate bateko lanpostuetarako eskatzen diren tituluak.

Izangaiek foru agindu honen I. eranskinean ezarritako tituluetako edozein edo baliokidetzat jotako titulu bat eduki beharko dute maila bereko edo goragoko kidego batean dagokien hizkuntz espezialitatean eskolak emateko.

2.5. Atzerriko hizkuntzan eman beharreko programa eleanitzetako lanpostuetarako eskatzen diren tituluak.

Izangaiek foru agindu honen I. eranskinean ezarritako tituluetako edozein edo baliokidetzat jotako titulu bat eduki beharko dute Bigarren Hezkuntzako irakasleen kidegoetan edo Hizkuntza Eskola Ofizialetako irakasleen kidegoetan dagokien hizkuntz espezialitatean eskolak emateko.

3. Probak gainditzea.

Izangaiak Musika eta Arte Eszenikoetako espezialitateei dagozkien zerrendetan sartzeko, proba praktiko bat gainditzea eskatuko da. Proba horiek egiteko epaimahaiak Lanbide Heziketaren eta Unibertsitateen Zuzendaritza Nagusiak proposatuta eratuko dira.

Giza Baliabideen Zerbitzuak, Lanbide Heziketaren eta Unibertsitateen Zuzendaritza Nagusiak aurretiaz txostena eginda, izangaiak Lanbide Heziketako eta Arte Plastiko eta Diseinuko lanbide ikasketen berariazko espezialitateei dagozkien zerrendetan sartzeko proba praktiko bat gainditzea zein espezialitatetan eskatuko den zehaztuko du. Proba horiek egiteko epaimahaiak Lanbide Heziketaren eta Unibertsitateen Zuzendaritza Nagusiak proposatuta eratuko dira.

12. artikulua. Aldi baterako kontrataziorako izangaientzako deia.

1. Ikasturtearen hasieran irakasleak kontratatzeko, izangaiak deitu baino lehen, horren iragarkia argitaratuko da Hezkuntza Departamentuaren web orrian eta Argibide Bulegoan, eta lanpostuak esleitzeko, jendaurreko egintza eginen da edo Giza Baliabideen Zerbitzuak ezartzen duen prozedura erabiliko, hala iruditzen bazaio. Nolanahi ere, deitutako izangaien kopurua eta eskainitako lanpostuak Hezkuntza Departamentuaren web orrian argitaratuko dira.

Ikasturte hasierarako lanpostuen esleipena egin ondoren bete behar diren kontratazio beharrizanak betetzeko banakako deialdia eginen da, edo bidezkoa bada, deialdi orokorra. Azken hori eginez gero, deitutako izangaien kopurua eta eskainitako plazak argitaratuko dira Hezkuntza Departamentuaren web orrian.

Nolanahi ere, banakako deialdiak azkar eginen dira, kontratazio beharrizana ahalik eta lasterren bete ahal izateko. Horregatik, izangai batekin harremanetan jartzerik ez bada, zerrendan hurrengoa denari deituko zaio, harik eta eskaintzen diren lanpostu guztiak bete arte.

Izangaiei dei egitean eta lanpostuak esleitzean erabili beharreko prozedura Giza Baliabideen Zerbitzuak zehaztuko du. Horren berri iragarki baten bidez emanen da Nafarroako Aldizkari Ofizialean eta Hezkuntza Departamentuaren web orrian.

2. Nolanahi ere, espezialitate eta hizkuntza bati dagokion destinoa ez da inola ere utzi ahal izanen eta ez da hurrengo deialdi batean aldatu ahal izanen.

Kontratu bat kidego, espezialitate eta hizkuntza jakin batean onartu ondoren, izangaia aldi baterako kontrataziorako izangaien beste zerrenda batzuetan badago, zerrenda horietan kontratatzeko moduan ez dagoela adieraziko da.

3. 3. artikuluak kidego, espezialitate eta hizkuntza bakoitzari dagozkion zerrenden artean ezartzen duen lehentasunaren arabera izangaiei dei eginen zaie dagokien zerrendan ageri diren ordenaren arabera.

Salbuespen gisa, espezialitate eta hizkuntza bati dagozkion zerrendak erabili ahal izanen dira beste espezialitate eta hizkuntza bati dagozkion irakasle lanpostuak aldi baterako kontratatzeko. Modu horretan lanpostu bat esleitu zaien izangaiak kontratatu dituzten espezialitate eta hizkuntzako aldi baterako kontrataziorako izangaien zerrenda orokorrean sartuko dira, foru agindu honen 9. artikuluan ezartzen den moduan.

3. Araubide orokorraren salbuespenak.

a) Izangai bat dagoeneko lanpostu batean ari bada ordezkapen kontratu batekin eta kontratua bukatzen denetik 20 egun iragan baino lehen sortzen bada irakasle hori bera ordezkatzeko premia, Giza Baliabideen Zerbitzuak zilegi izanen du lehendik ordezkapena egiten zuen izangaiari eskaintzea ordezkapena, beti ere denbora horretan ez badu beste kontratu bat sinatu.

b) Izangai batek lanaldi partzialeko kontratua daukanean, zerbitzuak ematen ari deneko ikastetxean espezialitate horretako edo beste bateko beharrizana sortzen bada eta lanpostu hori bete ahal badu, berari eskainiko zaio beharrizan hori, Hezkuntzako Ikuskatzailetza Zerbitzuak aurretiaz aldeko txostena emanda, betiere kontratazio berriaren ondorioz hartu behar dituen ordu guztiak ordura arte esleituta zituenekin bateragarriak badira.

c) Betetzen zailak diren lanpostuak: aldi baterako kontrataziorako izangaiak, betetzen zailak diren lanpostuetako batean ikasturte osorako lanpostu huts gisa eskainitako lanpostu baten esleipen-hartzaile badira, Hezkuntza Departamentuak ondoz ondoko hiru ikasturtetarako kontratatuko ditu, lanpostu hori benetan funtzionarioek bete arren edo ikastetxean beharrizan hori desagertu arren. Kasu horietan, kontratatutako langileari Nafarroako Foru Komunitateko beste lanpostu batzuk betetzeko agindu ahal izanen diote hiru urteko aldia amaitu arte, aldi baterako langileei kontratuak esleitu aurretik.

Kontratuaren indarraldiko hasierako hiru ikasturteak igarotakoan betetzen zaila den lanpostua funtzionario batek benetan bete ez badu, kontratatutako langileek lanpostu horretan geratu ahal izanen dute lanpostu hori funtzionario batek behin-behinean edo behin betiko bete arte.

Ikasturte bakoitzeko maiatzaren lehenengo hamabostaldian, betetzen zaila den lanpostu bat betetzeko kontratua sinatua duten eta hurrengo ikasturtean lanpostu hori betetzeari utzi nahi dioten izangaiek uko horren berri eman behar dute. Kasu horretan, kontrataziorako izangaien zerrendan hurrengo ikasturtearen hasieratik aurrera kontratatzeko moduan egonen direla agertuko da. Uko egitearen berri atal honetan ezarritako epetik kanpo emanez gero, indarrean dagoen kontratuari uko egin zaiola ulertuko da, eta izangaia dagoen zerrenda guztietatik baztertuko da.

Foru agindu honen ondorioetarako, betetzen zailak diren lanpostuak izanen dira Erronkari, Otsagabia, Garralda, Luzaide eta Zugarramurdi udalerrietan daudenak.

Betetzen zailak diren lanpostuen zehaztapena aldatu edo handitu ahal izanen da foru agindu honek indarra hartu ondoren, Hezkuntza Departamentuko Giza Baliabideen Zerbitzuak eman ebazpenaren bidez.

13. artikulua. Lanpostuari uko egitea.

1. Hezkuntza Departamentuarentzat zerbitzuak ikasturte oso batean eman nahi ez dituzten izangaiek aurretiaz uko egiteko idazkia aurkeztu beharko dute aurreko ikasturteko maiatzaren lehenengo hamabostaldian.

Aldi batetako kontrataziorako izangaiek aurretiazko ukoa aurkeztu ahal izanen dute baldin eta haiek dauden kidego, espezialitate eta hizkuntzen zerrendetan sartzeko hautapen prozesu baterako deialdirik tramitatzen ari ez bada uko hori aurkezteko epeak iraun bitartean.

Aurretiaz uko eginez gero, izangaiek ez dute arrazoirik eman beharko; ukoa atzeraezina izanen da, eta aurretiazko ukoa aurkeztean izangaia zerrendetan kontratatzeko moduan ez dagoela agertuko da. Zein ikasturtetan aurkeztu den, hurrengoan soilik izanen da baliozkoa uko hori.

2. Irakasle lanpostuak betetzeko aldi baterako kontrataziorako izangaiek eskainitako lanpostuari uko egin ahal izanen diote deialdiari dagokion zerrendatik baztertuta geratu gabe. Hala ere, kontratazio eskaintza bati uko eginez gero, arau hauek aplikatuko dira:

1.) Lanaldi partzialeko kontratu eskaintza bati uko egitea onartuko da lanaldi erdia baino gutxiagokoa bada, lanpostu ibiltaria bada edo antzeko espezialitate batekoa bada, eta izangaia zerrendako leku berean kontratatzeko moduan dagoela agertzen jarraituko du.

2.) Lanaldi osoko edo lanaldi erdiko edo gehiagoko kontratu bati arrazoirik eman gabe uko eginez gero, artikulu honetan xedatuta dagoenaren arabera izangaiari ez zaio berriro deituko kidego, espezialitate eta hizkuntza horretako zerrenda guztiak agortzen diren arte.

Arrazoirik gabe uko eginez gero, Hezkuntza Departamentuak ikasturte bakoitzean izangai bati bi kontratu besterik ez dizkio eskaini beharko.

3.) Aldi baterako kontrataziorako izangaiak kontratazio eskaintzari uko egiteko bidezko arrazoi bat ematen badu, bera agertzen den aldi baterako kontrataziorako izangaien zerrenda guztietan kontratatzeko moduan ez dagoela agertuko da, izangaiak berak alegatutako inguruabarra amaitu dela jakinarazten duen arte.

Lanaldi osoko kontratu baten edo lanaldi erdiko edo gehiagoko kontratu baten eskaintzari bidezko arrazoiengatik uko egiteko arrazoiak hauek dira:

a) Izangaiak bere kargu edukitzea 3 urte baino gutxiagoko seme edo alaba bat edo bigarren gradura arteko odol edo ezkontza bidezko ahaideren bat, baldin eta adinagatik edo istripu edo eritasun baten ondorioz bere kasa bizitzeko gauza ez bada.

Uko egiteko arrazoi hori behin bakarrik alegatu ahal izanen da ikasturte bakoitzean.

b) Erditze, adopzio edo harreragatik lizentzia egoeran egotea.

Aldi baterako kontrataziorako izangai bat erditze, adopzio edo harreragatik lizentzian baldin badago, soldata hartuz nahiz hartu gabe, eskubidea izanen du deitu zaionean tokatzen zitzaion lanpostua erreserba dakion, eta lizentzialdia bukatzen denean hartu beharko du lanpostu hori. Erreserbatu zaion lanpostua hartzen ez badu, ukoa justifikatutzat hartuko da.

c) Izangaia aitatasun baimenean egotea.

d) Izangaia aldi baterako ezintasun egoeran egotea.

Izangai batek eskaini dioten kontratuari uko egiten badio aipatu egoeretako batean egoteagatik, Giza Baliabideen Zerbitzuari kontratatzeko moduan berriro dagoela jakinarazterakoan agiri bidez eta fede emateko moduan egiaztatu beharko du kontratua eskaini zioten unean alegatutako egoera gertatu zela eta gerora amaitu egin zela. Hori egiaztatu ostean, izangaia kontratatzeko moduan dagoela agertuko da berriro, aldi baterako kontrataziorako izangaien zerrendako leku berean.

3. Ikasturte berrian deialdiak eginen dira izangaiak dagozkien zerrendetan dauden ordenaren arabera, eta baliorik gabe geratuko dira izangaia kontratatzeko moduan ez dagoeneko egoerak, baita aurreko ikasturtean aplikatutako penalizazioen egoerak ere, artikulu honetan bilduta dauden arauen arabera.

14. artikulua. Baztertuak

1. Jarraian zerrendatuko diren egoeretan dauden izangaiak kontrataziorako zerrenda guztietatik baztertuta geratuko dira, zein kidegori uko egin zaion kontuan hartuta, eta gainera dena delako ikasturtean kontratatzeko moduan ez daudela agertuko da haiek agertzen diren gainerako kidegoetako kontrataziorako izangaien zerrenda guztietan. Hona hemen egoerak:

a) Eskainitako eta izangaiak onartutako kontratua ez izenpetzea.

b) Hezkuntza Departamentuarekin izenpetutako kontratuari uko egitea edo lanpostua bertan behera uztea.

2. Idatz-zati honetan azaldu diren egoeretako batean dauden izangaiak aldi baterako kontrataziorako izangaien zerrenda guztietatik baztertuta geratuko dira. Hona hemen egoerak:

a) Gaitasun faltaren edo bete beharreko lanpostura ez moldatzearen ondoriozko arrazoiengatik edozein kidego, espezialitate eta hizkuntzatako lan-kontratua deuseztatzea.

b) Kontratua deuseztatzea probaldiaren barnean.

c) Hezkuntza administrazioek deitutako irakasle kidegoetan sartzeko hautapen prozedura batean praktiketako funtzionario edo karrerako funtzionario izendatuta egotea. Kasu horretan, izangaia praktiketako funtzionario edo karrerako funtzionario izendatu duteneko mailako edo beheragoko kidego bati dagozkion zerrenda guztietatik baztertuko da.

d) Erretiroa hartzeko adina betetzea. Egoera horretan egonik, erretiratzeko adina izanik zerbitzuak ematen segitu nahi dutenek urteko luzapen eskaera aurkeztu beharko dute Giza Baliabideen Zerbitzuan, betiere kontrataziorako izangaiak hirurogeita hamar urte bete ez baditu.

3. Aldian-aldian, Giza Baliabideen Zerbitzuak artikulu honetan ezarri kasuetako batean egoteagatik baztertu diren izangaien zerrenda onetsiko du ebazpen bidez. Ebazpen hori argitara emanen da Hezkuntza Departamentuko Argibide eta Agiri Bulegoan eta Departamentuaren web orrian.

15. artikulua. Lanpostuan aritzeko gauza ez izateagatik edo ez egokitzeagatik kontratua deuseztatzea.

Arrazoi horiengatik kontratua suntsitu aurretik, ikastetxeko zuzendaritzak Giza Baliabideen Zerbitzuko zuzendariari zuzenduriko txosten arrazoitu baten bidez, lanpostua betetzeko gai ez diren edo moldakaitzak diren pertsonen kontratua ebazteko prozedura has dadila eskatuko du.

Prozedura Giza Baliabideen Zerbitzuko zuzendariaren ebazpenaren bidez hasiko da. Ondoren igorriko da, ikastetxeko zuzendaritzak Hezkuntzako Ikuskatzailetza Zerbitzura igorritako txostenarekin batera, zerbitzu horrek egin ditzan egoki irizten dituen azterketak, interesduna eta Irakasleen Batzordea entzun ondoren.

Bidezkoak diren jarduerak egin ondoren, Hezkuntzako Ikuskatzailetza Zerbitzuak kontratatutako langileen gaitasuna edo lanposturako egokitzapena baloratzeko txostena eginen du. Txosten hori Giza Baliabideen Zerbitzuari igorriko zaio.

Txosten hori negatiboa bada, Giza Baliabideen Zerbitzuaren ebazpenaren bitartez suntsitu eginen da interesdunarekin izenpetu zen kontratua, eta izangaia kasuko aldi baterako kontrataziorako izangaien zerrendetatik baztertuko da.

XEDAPEN GEHIGARRIAK

Lehenengo xedapen gehigarria.-Berariazko profilak egiaztatzea.

Berezia izateagatik lanpostu bat aldi baterako bete behar bada, Giza Baliabideen Zerbitzuak orokorrean eratutako izangaien zerrendetan berariazko baldintza edo profilak sartu ahal izanen ditu, edo bestela lanpostu horiek betetzeko aldi baterako kontrataziorako izangaien berariazko zerrendak egin.

Berariazko profil hauek ezarri dira: zeinuen hizkuntza, frantsesa, ingelesa, eta Musika espezialitateko Maisu-maistren Kidegoko aldi baterako kontrataziorako izangaien zerrendaren barruan, berariazko programetarako musika tresnena. Profil berriak zehaztu edo daudenak desagerrarazi ahal izanen dira Giza Baliabideen Zerbitzuaren ebazpenen bitartez.

Zerrendetan dauden aldi baterako kontrataziorako izangaiek profil horiek dauzkatela egiaztatu ahal izanen dute baldin eta aurretiaz egin ez badute, Hezkuntza Departamentuak dagozkien titulazioak aurkezteko edo profil horiek egiaztatzeko probak egiteko ezartzen duen epean, profil horiek beharrezkoak direneko lanpostuak betetzea lortzeko.

Bigarren xedapen gehigarria.-Irakaskuntza-espezialitateak.

Foru agindu honetan xedatuta dagoenaren ondorioetarako, irakaskuntza-espezialitateak izanen dira arauz hala definituta daudena eta, horiez gain, Giza Baliabideen Zerbitzuak hautatzen dituen irakasgaiak, betiere eskolak emateko aldi baterako kontrataziorako izangaien zerrenda bereziak eratzea erabakitzen badu.

Hirugarren Xedapen Gehigarria.-Aldi baterako kontrataziorako izangaien zerrendak Musikaren oinarrizko irakaskuntzetan eta irakaskuntza profesionaletan eta Goi Mailako Musikako irakaskuntzan.

Hezkuntza Departamentuak Musikako eta Arte Eszenikoetako Irakasleen aldi baterako kontrataziorako izangaien gaur egungo zerrendak bitan banatuko ditu eta aldi baterako kontrataziorako izangaien zerrenda bereiziak eginen ditu alde batetik Musikako oinarrizko irakaskuntzetan eta irakaskuntza profesionaletan eta bestetik Goi Mailako Musikako irakaskuntzan eskolak emateko.

Horretarako, aldi baterako kontrataziorako izangaien berariazko zerrenda bat eginen da Goi Mailako Musikako irakaskuntzaren espezialitateetako bakoitzean; zerrenda horretan, gaur egungo zerrendetan agertzen diren izangaiak agertuko dira, gaur egun dauden ordenarekin, baldin eta dagokien Goi Mailako Musikako irakaskuntzaren espezialitatean eskolak eman ahal dituztela behar bezala egiaztatu badute.

Halaber, aldi baterako kontrataziorako izangaien zerrendak eginen dira Musikako oinarrizko irakaskuntzen eta irakaskuntza profesionalen berezko espezialitateetan; horietan sartuko dira gaur egun agertzen diren izangaiak, foru agindu hau indarrean jartzean daukaten ordenarekin.

XEDAPEN IRAGANKORRA

Lehenengo xedapen iragankorra.-2008-2009 ikasturtean aplika daitezkeen aldi baterako kontrataziorako izangaien zerrendak.

Foru agindu honek indarra hartzean dauden aldi baterako kontrataziorako izangaien zerrendek indarrean jarraituko dute 2008-2009 ikasturtea amaitu arte, eta zerrenda horiek zein kudeaketa-arauren mendean sortu ziren, horien bidez eraenduko dira.

Bigarren xedapen iragankorra.-Foru agindu hau aplikatzea berorrek indarra hartu baino lehen deitutako sartzeko hautapen prozedurei.

Foru agindu honen 4. eta 5. artikuluetako arauen arabera, gainditu arren lanposturik lortu ez duten izangaien zerrendak eta aldi baterako kontrataziorako izangaien zerrendak egin ahal izanen dira kidego, espezialitate eta hizkuntza batean, baldin eta horretan sartzeko hautapen prozedurarako deialdia egin bada foru agindu indarra hartu aurretik, betiere egun horretan ebatzi gabe badago.

Halaber, xedapen iragankor honetan aurreikusita dagoenaren arabera eratzen diren aldi baterako kontrataziorako izangaien zerrendetan, sartzeko hautapen prozeduran titulazio egokia aurkeztu duten izangaiek hizkuntzen jakintza egiaztatu dutela agertuko da.

Sartzeko hautapen prozesua ebazteaz batera aipatu kidego, espezialitate eta hizkuntzetan dauden aldi baterako kontrataziorako izangaien zerrenda guztiak baliogabetuta geratuko dira.

Hirugarren xedapen iragankorra.-Aldi baterako kontrataziorako izangaien zerrendak sartzeko hautapen prozedurarik deituta ez daukaten kidego, espezialitate eta hizkuntzetan.

1. Nafarroako Foru Komunitateak dagokion kidego, espezialitate eta hizkuntzan sartzeko hautapen prozedura bat gutxienez deitzen ez duen bitartean, foru agindu honek indarra hartzean dauden aldi baterako kontrataziorako izangaien zerrendak -jarrian aipatuko direnak- erabiltzen jarraituko da, ondoko lehentasun ordenarekin:

A) Kidego, espezialitate eta hizkuntza batean, oposizio-fasea gainditu arren sartzeko hautapen prozedura gainditu ez duten izangaien lehentasunezko zerrenda bat badago, zerrenda hori foru agindu honen 4. artikuluan gainditu arren lanposturik lortu ez duten izangaien zerrendarako agertzen diren arauen arabera aplikatuko da.

B) Merezimenduen balorazio bidez eratutako aldi baterako kontrataziorako izangaien zerrendak, foru agindu honek indarra hartzean badaude, jarraian aplikatuko dira, baina izangaiak beren guztizko puntuazioarekin agertuko dira.

C) Prentsako deialdiaren bidez egindako aldi baterako kontrataziorako izangaien zerrendak, foru agindu honek indarra hartzean indarrean badaude, hala jarraituko dute dagokien kidego, espezialitate eta hizkuntzan aldi baterako kontrataziorako izangaien zerrenda bat berariazko deialdi baten bidez onetsi arte.

Foru agindu honen 6. artikuluan berariazko deialdi bidez eratutako zerrendetarako aurreikusita dauden funtzionamendu arauek eraenduko dituzte zerrenda horiek.

Zerrenda horiek dagokien kidego, espezialitate eta hizkuntzako aldi baterako kontrataziorako izangaien zerrenda orokor deituko dira, eta foru agindu honen 5. artikuluan zerrenda orokorrerako aurreikusita dauden funtzionamendu arauek eraenduko dituzte.

2. Hala ere, kidego, espezialitate eta hizkuntza batean sartzeko hautapen prozedura baten deialdirik aurreikusten ez bada, Hezkuntza Departamentuak kidego, espezialitate eta hizkuntza bati dagozkion lanpostuak aldi baterako betetzeko dauden zerrenda guztiak ezeztatzea eta zerrenda orokorrak irekitzea xedatu ahal izanen du.

Kasu horietan, zerrenda orokor berri horiek eratzeko deialdiak foru agindu honen II. eranskinean biltzen den baremoa aplikatuko du, eta horri aurretiazko irakaskuntzako esperientziari buruzko atal bat gehituko zaio, Hezkuntzari buruzko maiatzaren 3ko 2/2006 Lege Organikoan aipatzen diren irakasle kidegoetan sartzeko eta espezialitate berriak eskuratzeko erregelamendua onetsi eta lege organiko horren hamazazpigarren xedapen iragankorrean aipatzen den sarrera-araubide iragankorra arautzen duen otsailaren 23ko 276/2007 Errege Dekretuan ezarritako arauen arabera.

XEDAPEN INDARGABETZAILEA

Xedapen indargabetzaile bakarra.-Arauen indargabetzea.

Indargabetuta geratuko dira foru agindu honetan eta, zehazki, Hezkuntza Departamentuaren zerbitzuan aldi baterako kontratuarekin irakasle lanpostuetan aritzeko izangaien zerrendak kudeatzeko arauak eman zituen Hezkuntzako kontseilariaren irailaren 23ko 156/2005 Foru Aginduan xedatuta dagoenari aurka egiten dioten maila bereko edo beheragoko xedapen guztiak.

AZKEN XEDAPENAK

Azken xedapenetako lehenengoa.-Foru agindu hau garatu eta betearazteko ahalmena.

Ikuskapenaren eta Zerbitzuen Zuzendariari eta, hark eskuordetuta, Giza Baliabideen Zerbitzuko zuzendariari baimena eman zaie foru agindu hau garatzeko eta aplikatzeko behar diren xedapen guztiak eman ditzaten.

Azken xedapenetan bigarrena.-Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2009ko maiatzaren 8an.-Hezkuntzako kontseilaria, Carlos Pérez-Nievas López de Goicoechea.

II. ERANSKINA

Merezimenduen baremoa

I.-Unibertsitate tituluak:

1.-Lehen zikloko tituluak:

Diplomatura, Ingeniaritza Tekniko edo Arkitektura Teknikoko titulu bakoitzeko edo legez baliokide diren tituluak eta Lizentzia, Arkitektura edo Ingeniaritza bateko lehen zikloari dagozkion ikasketak edo baliokide den graduko tituluak: bakoitzeko puntu bat.

Lanbide Heziketako Irakasle Teknikoen eta Arte Plastikoetako eta Diseinuko Tailerretako Maisu-maistren Kidegoetako espezialitateetarako ez da baloratuko, inola ere, izangaiak aurkezten dituen arlo horretako lehenbiziko titulua edo ikasketak.

Bigarren Hezkuntzako Irakasleen kKdegoko, hizkuntza eskola ofizialetako Irakasleen Kidegoko, Musikako eta Arte Eszenikoetako irakasleen kidegoko eta Arte Plastikoetako eta Diseinuko Irakasleen Kidegoko espezialitateetarako ez dira atal honetan inola ere balioetsiko izangaiak aurkeztu duen lehen lizentziadun, ingeniari edo arkitekto titulua lortzeko gainditu behar izan dituen titulua edo ikasketak.

2.-Bigarren zikloko tituluak:

Lizentziatura, ingeniaritza edo arkitekturako bigarren zikloari dagozkion ikasketak edo legez balio berekotzat emandako tituluak edo baliokide den graduko tituluak izateagatik: bakoitzeko puntu bat.

Bigarren Hezkuntzako Irakasleen Kidegoko, hizkuntza eskola ofizialetako Irakasleen Kidegoko, Musikako eta Arte Eszenikoetako Irakasleen Kidegoko eta Arte Plastikoetako eta Diseinuko Irakasleen Kidegoko espezialitateetarako ez dira atal honetan inola ere balioetsiko izangaiak aurkeztu duen lehen lizentziadun, ingeniari edo arkitekto titulua lortzeko gainditu behar izan dituen titulua edo ikasketak (lehen zikloa, bigarren zikloa eta, hala behar denean, ikasketa osagarriak).

Egiaztagiriak: Baldintza gisa alegatutako tituluaren eta merezimendu gisa aurkezten dituen beste guztien fotokopia konpultsatua edo titulua luzatzeko eskubideak ordaindu izanaren egiaztagiria.

Lehen zikloko titulazioak puntuatuko badira, ezinbestekoa izanen da diplomadunaren tituluaren fotokopia aurkeztea edo, bestela, lizentziatura, ingeniaritza edo arkitektura bateko lehenbiziko hiru ikasmailetako irakasgai guztiak egin eta gainditu direla azalduko duen ikasketa-ziurtagiri pertsonala. Egokitzapen ikastaroa gainditzea ez da hartuko lehen zikloko titulaziotzat.

Lizentziadun, ingeniari edo arkitekto tituluaren fotokopia aurkezten bada, aintzat hartuko dena bigarren zikloko titulazioari dagokion puntuazioa izanen da soilik, salbu aurreko atalean aintzat hartzen diren ikasketa-egiaztagiriak eransten badira 1. atalaren arabera baloratzeko.

Ezinbesteko baldintza alegatu ez diren titulazioak soilik baloratuko dira zerrendetan sartzeko.

Izangaiek atzerrian lortutako titulazioak aurkeztuz gero, horien homologazioa edo gaitasuna egiaztatzen duen agiriaren jabe izan beharko dute. Horiek tituluaren fotokopia konpultsatuarekin batera aurkeztu beharko dira.

II.-Baldintza gisa alegatu den tituluaren ikasketa espedientea:

Atal honetan izangaiak baldintza gisa alegatu duen tituluaren ikasketa-egiaztagiriaren batez besteko nota baloratuko da soilik, honela

Egiaztagiriak: izangaiak ikasketen ikasketa-egiaztagiri pertsonala igorri beharko du, jatorrizkoa edo fotokopia konpultsatua, non titulazioan lortutako batez besteko nota ageri den.

Betiere, aurkeztutako ikasketen ziurtagirian ageri den batez besteko nota hartuko da kontuan.

Batez besteko nota zenbakien bidez agertzen ez bada, ondoko baliokidetzak aplikatuko dira:

Nahikoa: 5,5 puntu.

Ongi: 6,5 puntu.

Oso Ongi: 7,5 puntu.

Bikain: 9 puntu.

Ohorezko matrikula: 10 puntu.

Batez besteko nota berariaz agerrarazten ez duten ikasketa-espedienteak ez dira inola ere baloratuko.

Merezimenduen baremo osorako xedapenak

1.-Izangaien eskaerak aurkezteko epea bukatzen den egunerako gauzatu eta aurkeztu dituzten merezimenduak soilik barematuko dira.

2. Gaztelaniara itzuli beharko dira atzerriko hizkuntza batean idatzitako agiriak eta beste autonomia erkidego bateko hizkuntza ofizial propioan idatzitakoak, euskarazkoak izan ezik. Zinpeko itzultzaileek egin beharko dituzte itzulpen horiek eta agiriarekin fotokopia konpultsatuarekin batera aurkeztu beharko dira.

Iragarkiaren kodea: F0915570