Iragarkia
59. ALDIZKARIA - 2009ko maiatzaren 15a
I. NAFARROAKO FORU KOMUNITATEA
1.3. BESTELAKO XEDAPENAK
1.3.5. Estatutuak eta lan hitzarmen kolektiboak
467/2009 EBAZPENA, martxoaren 25ekoa, Arriskuen Prebentziorako eta Lanaren zuzendari nagusiak emana, Tafallako "Mairagako Mankomunitatea" enpresaren lan hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 24/2009).
Departamentu honetan 2009ko martxoaren 23an sartu ZEN "Mairagako Mankomunitatea" enpresaren lan hitzarmen kolektiboaren testua, 30 artikuluz, xedapen gehigarri batez eta azken xedapen batez osatua, enpresaren ordezkariek eta langileen ordezkariak (ELA) 2008ko abenduaren 11n izenpetu eta onetsia.
Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,
EBATZI DUT:
1. Tafallako "Mairagako Mankomunitatea" enpresaren lan hitzarmen kolektiboa (kodea: 3107962) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.
2. Ebazpen honen berri ematea Negoziazio Batzordeari eta adieraztea ebazpenak ez diola administrazio bideari bukaera ematen eta honen aurka gora jotzeko errekurtsoa jartzen ahal duela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.
3. Ebazpen hau Nafarroako Aldizkari Ofizialean argitaratzea, orok jakin dezan".
Iruñean, 2009ko martxoaren 25ean.-Arriskuen Prebentziorako eta Lanaren zuzendari nagusia, Imelda Lorea Echavarren.
HITZARMENAREN TESTUA
I. KAPITULUA
Xedapen orokorrak
1. artikulua. Aplikazio eremua.
Hitzarmen kolektibo honek Mairagako Mankomunitatearen (Erdialdea) eta hiri hondakin solidoak biltzeko zerbitzuan, bulegoetan eta ur zerbitzuan dituen lan araubideko langileen arteko lan harremanak arautuko ditu.
2. artikulua. Hitzarmenaren indarraldia.
Hitzarmen honek 2008ko urtarrilaren 1etik 2010eko abenduaren 31ra arteko indarraldia izanen du.
Hitzarmen honek sinatzen den egunean hartuko du indarra. Edonola ere, 2008. urterako itundutako ondorio ekonomikoek urte horretako urtarrilaren 1etik hasita izanen dute indarra, hitzarmena Nafarroako Aldizkari Ofizialean noiz argitaratzen den kontuan hartu gabe.
Besterik gabe amaitutzat joko da 2010eko urriaren 1etik aitzina, eta egun horretatik has daiteke 2011. urterako hitzarmena negoziatzen.
3. artikulua. Interpretaziorako eta laguntza juridikorako batzorde paritarioa.
1. Hitzarmenaren batzorde paritarioa hitzarmenaren aplikazioan interpretazio, adiskidetze eta zaintzarako organoa izanen da.
2. Mairagako Mankomunitateko (Erdialdea) buruak eta langileen legezko ordezkariak osatuko dute. Biek hitzarmen kolektibo honen negoziazio batzordeko kide eta sinatzaile izan beharko dute. Aldeek beren partaidetza handitu ahal izanen dute paritarioki.
3. Aldeek erabaki dute batzorde horrek aztertuko dituela hitzarmen kolektibo hau interpretatu edo aplikatzean sor daitezkeen zalantzak edo desadostasunak, administrazioarekiko auzietako salan edo administrazioan erreklamazioa aurkeztu aurretik eta gatazka kolektibora edo grebara jo baino lehen.
4. Batzordeak eginkizun hauek ditu:
-Hitzarmen kolektiboaren klausula guztien aplikazioa interpretatzea.
-Itundutakoa betetzen den zaintzea.
-Hitzarmen honek indarra hartu ondoren ematen diren legezko xedapen berriak aztertu eta baloratzea, hitzarmenaren edukian eraginik izan badezakete.
-Hitzarmen kolektiboaren eraginkortasun praktikoa hobetzen duten beste jarduera guztiak, testuan horrela ezarria badago.
-Batzorde paritarioa alderdietako edozeinek eskatuta bilduko da, ados jarrita non, zein egunetan eta zer ordutan eginen den, edonola ere eskaera egin eta hamar eguneko epean.
5. Langileek batzorde paritarioari aurkezten dizkioten eskaerak batzorde horrek 15 eguneko epean aztertu beharko ditu, erregistro orokorrean aurkezten direnetik zenbatuta.
6. Mairagako Mankomunitateak (Erdialdea) laguntza juridikoa emanen die langile guztiei, Mankomunitateak esleituriko zerbitzuak egitearen ondorioz auzitara emanak direnean.
4. artikulua. Berme pertsonalak.
Kobrantzaren ikuspegitik eta osotasunean hartuta, urteko konputuan hitzarmen kolektibo honetan finkatutakoak baino hobeak diren egoerak "ad personam" berme gisa errespetatuko dira.
5. artikulua. Langileriaren subrogazioa.
Laneko egonkortasun printzipioari lagundu eta hori bermatzeko asmoz, jarraitutako kontratu mugagabeko langileen artean zerbitzu publikoetako kudeaketako edozein kontratazio motaren, zerbitzuak alokatzeko kontratuen edo beste mota baten bidez langileak hitzarmen honen artikuluaren funtzio eremuan araututako jarduera zehatz batean xurgatzea artikulu honetan adierazi bezala burutuko da nahitaez.
Hemendik aurrera, "kontrata" hitzak edozein motatako kontratazioa, bai publikoa bai pribatua, barnean hartuko du eta enpresa, sozietate edo erakunde publiko zehatz batek burutuko duen jarduera identifikatuko. Kasu horretan hitzarmen honetako lansari eta lan baldintza hobeei eutsiko zaie, eta, horregatik, hitzarmen kolektiboa luzatutzat joko da inguruabar hori gertatzen bada.
Kapitulu honen aplikazioa nahitaezkoa izanen da lotetsitako alde guztientzat: alde egiten duen enpresa edo entitate publiko nahiz pribatuarentzat, esleipen-hartzaile berriarentzat eta langileentzat.
II. KAPITULUA
Lanaren antolaketa
6. artikulua. Nafarroako Lan Auzitegiaren mende jartzea.
Aldeek erabaki dute hitzarmen honen interpretazioan eta aplikazioan sortzen diren desadostasun eta gatazka guztiak, bai taldekoak bai banakakoak, Nafarroako Lan Gatazkak Konpontzeko Auzitegiaren esku jarriko direla, bitartekotza eta adiskidetze faseetan, eta aldeak beren borondatez aipatu auzitegiaren arbitraje prozeduraren esanetara jartzeko ahaleginak eginen direlako konpromisoa agertu dute.
Klausula hau, beraz, aldeak Lan Gatazkak Konpontzeko Auzitegiari atxikitzearen adierazpena da, Langileen Estatutuaren 83. artikuluak arautzen duen eraginkortasun orokorreko izaera du eta, horren ondorioz, itunak enpresaburuak, sindikatuak eta langileak behartzen ditu beren desadostasunak epaiketara jo aitzin aipatu auzitegiaren bitartekotza eta adiskidetze prozeduretan azaltzera. Hori horrela, ez da nahitaezkoa atxikimendu espresa eta banakakoa egitea, borondatezko atxikipena behar den prozeduran izan ezik, zein bultzatzeko eta sustatzeko konpromisoa hartu baitute hitzarmen honen sinatzaileek.
7. artikulua. Lan baldintzak.
Aurrekoa deusetan galarazi gabe, langileen ordezkariek eskubidea dute lan baldintzak ezartzeko erabiltzen diren prozeduretan parte hartzeko, indarra duten xedapenen arabera.
8. artikulua. Lanaldia eta lan egutegia.
1. Urteko lanaldi benetakoa 1.592 ordukoa izanen da.
2. Enpresak eta langileen ordezkariak ados jarrita eginen dute lan egutegia eta abenduaren 31 baino lehen langileei aurkeztuko diete.
3. Bilketako langileen lanaldia astelehenetik larunbatera artekoa izanen da eta bulegoetako eta ur zerbitzuko langileena astelehenetik ostiralera artekoa. Lan ordutegia ere aldeak ados jarrita ezarriko da.
4. Ordutegiaren barnean 20 minutuko atsedena har daiteke ogitartekoa, kafea, etab. hartzeko. Atsedenaldi hori benetako lan denboratzat hartuko da.
5. Honako txandetan lan egiten dutenek lanaldi mota hauek izanen dituzte:
A. Gaueko txanda finkoa: 1.535 ordu urtean, eta gaueko lanaren ordain ekonomikoa (ordu arruntaren balioaren %75).
B. Goiz, arratsalde eta gaueko txanda: 1.457 ordu urtean, gaueko lanaren ordain ekonomikoa eta igande-jaiegunetako lanarena (osagarri horietako bakoitzeko, ordu arruntaren balioaren %75).
C. Goiz eta arratsaldeko txanda, igande eta jaiegunetan lan eginez: 1.554 ordu urtean, eta igande edo jaiegun bakoitzean egindako lanaren ordain ekonomikoa (ordu arruntaren balioaren %75).
9. artikulua. Oporrak.
1. Hitzarmen honen eraginpeko langileek opor ordainduak izateko eskubidea dute, 27 lanegunekoak, jarduneko zerbitzuko urte osoan, edo proportzioan dagozkiekeen egunak, zerbitzuko denbora motzagoa izanez gero.
2. Langileek arauzko oporretan jasoko duten ordainsaria beren ohiko lanarengatik jasotzen duten bera izanen da.
3. Oporraldietan, kalkulu proportzionala eginen da gidari aritzen direnean, peoi gisa ordaindu beharrean, baldin eta gidari egindako denbora nahikoa bada langileari kalkulu proportzional horretarako eskubidea onartzeko. (Gutxienez 6 hilabete).
4. Zerbitzuaren beharrak direla eta, inoiz ez dira bi langile baino gehiago batuko oporraldi berean. Ahal den guztietan pertsona bakar bat egonen da oporretan (beti hartuko dugu kontuan langileak zenbat diren eta zerbitzuan bikoterik baden).
5. Mankomunitateko langileen ordezkariak urtarrilaren 31 baino lehen aurkeztu beharko du oporren egutegia, negoziatu eta onesteko.
6. Arau orokor gisa, langile guztiek eskubidea izanen dute opor egunen erdiak udan hartzeko, ekainaren 1etik irailaren 30era bitarte, alegia. Gainerako opor egunak urtean zehar hartuko dituzte.
7. Geroztikako aldaketak onartuko dira, 15 egun lehenago abisatuta eta egoerak bide ematen badu, betiere.
8. Langile bat oporretan dela eri jartzen bada, ez dira oporrak etenen, salbu eta lau egun baino gehiagoko ospitaleratzea ekartzen duten istripu edo eritasunen kasuan, edo txosten mediko batez eritasuna larri edo oso larritzat (ospitaleratu beharrarekin nahiz gabe) jotzen denean; azken hori, betiere, ziurtagiri medikoaren bidez egiaztatu beharko da.
Halakoetan, oporraldia eteteak indarra izanen du ospitalizazioa edo eritasuna hasten den lehenbiziko egunetik.
10. artikulua. Baimenak eta lizentziak.
Hauetan xedatutakoari lotuko zaio: Nafarroako Foru Komunitateko Administrazio Publikoetako funtzionarioen opor, lizentzia eta baimenetarako Erregelamendua onesten duen urriaren 30eko 348/2000 Foru Dekretua eta ondoren hura aldatu eta egokitu duten arauak, etorkizunean egin daitezkeen horrelako arauak eta otsailaren 14ko 72/2000 Foru Dekretua.
-Oporren egutegia abenduaren 31 baino lehen adostu eta onetsi behar da. Geroztikako aldaketak onartuko dira 15 egun lehenago abisatuta eta egoerak bide ematen badu, betiere.
-Herri bakoitzeko zaindariaren jaietan herri horretan bizi diren langileei oporrak ematen saiatuko da.
Hala ere, Langileen Estatutuak hobekuntzarik egiten badu hemen azaldutako gaietan, Langileen Estatutuan xedatutakoa beteko da.
III. KAPITULUA
Araubide ekonomikoa eta lanbide sailkapena
11. artikulua. Ordainsariak eta osagarriak.
Mairagako Mankomunitateko (Erdialdea) lan-kontratudunen ordainsariei dagokienez, indarraldiko urte bakoitzean Nafarroako Aurrekontuei buruzko Legean ezartzen denak eta Mairagako Mankomunitateko (Erdialdea) funtzionarioekin 2008-2010 urteetarako egindako akordioak izanen dute indarra.
2009. eta 2010. urteetan, lanpostuko osagarria maila bakoitzari dagokion oinarrizko lansariaren %3,5 handituko da.
Lan-kontratudunek 2008. urtean ordainsari hauek izanen dituzte, kontzeptuz kontzeptu:
KATEGORIA | OINARRIZKO SOLDATA | MAILAKO OSAGARRIA | LANPOSTUKO OSAGARRIA | BATERAEZINTASUNEKO OSAGARRIA | TOXIKOTASUNEKO OSAGARRIA |
INGENIARI TEKNIKOA | 1.560,82 | 273,61 | 546,29 | ||
ADMINISTRARI-OFIZIALA | 1.277,03 | 153,24 | 505,83 | ||
UR ZERBITZUKO 1. MAILAKO OFIZIALA | 1.277,03 | 153,24 | 537,98 | ||
ADMINISTRARI LAGUNTZAILEA | 1.087,84 | 130,54 | 348,98 | ||
ITURGINA | 1.087,84 | 130,54 | 217,57 | ||
GIDARIA | 1.087,84 | 130,54 | 499,75 | 54,39 | |
PEOIA | 945,95 | 141,89 | 462,47 | 47,30 |
1. Toxikotasun, nekagarritasun edo arrisku egoerak izaten diren lanpostuetan aritzen direnei toxikotasuneko osagarria ordainduko zaie.
Osagarri horren zenbatekoa lanpostu bakoitzerako zehaztuko da, arrisku bereziko ezaugarriak kontuan hartuta, eta ez da inolaz ere izanen lanpostu horren talde edo kategoriako abiapuntuko soldataren %10 baino handiagoa.
2. Lanaldi luzapenaren osagarria esleitu ahal izanen da, ezarritako lanaldi orokorra baino luzeagoa egitea ohikoa den lanpostuetarako.
Osagarri horren zenbatekoa lanaldia zenbat luzatzen den kontuan hartuta zehaztuko da, eta ez da inolaz ere izanen lanpostuaren taldeko abiapuntuko soldataren %10 baino handiagoa.
Ezein langilek ez du osagarri hori eta dedikazio esklusibokoa batera jasotzerik izanen.
3. Soldataz kanpoko ordainsariak honako hauek izanen dira:
a) Zerbitzuagatik egiten diren gastuen ordainak.
b) Bidaiak egitearen ondoriozko gastuen ordainak.
c) Beste lantoki batera nahitaez joan beharrak bizileku-aldaketa baldin dakar, aldaketa horren gastuen ordaina.
4. Horien zenbatekoak urtero erregelamenduz finkatuko ditu Nafarroako Gobernuak bere funtzionarioentzat.
5. Lansarien berrikuspena: hitzarmen honen 2. artikuluan ezarritakoa alde batera utzi gabe, aplikazio eremuan lansariak urtero berrikusiko dira Nafarroako Gobernuak xedatzen duen zenbateko berean.
12. artikulua. Antzinatasuna.
Mairagako Mankomunitateko (Erdialdea) langile finkoek antzinatasuneko osagarri pertsonala jasoko dute Mankomunitatearen edo beste administrazio baten zerbitzuan egindako hirurteko bakoitzeko. Zehazki, portzentaje hauek ordainduko dira, langilearen mailako/taldeko oinarrizkosoldatari aplikatuta:
Taldea | Portzentajea |
A | %5,53 |
B | %5,63 |
C | %5,76 |
D | %6,17 |
E | %6,35 |
Langile finko gisa egindako denboraz gainera, antzinatasunerako kontatuko da behin-behineko langile gisa egindakoa ere.
Hirurtekoa bete eta hurrengo hiletik aurrera sorraraziko da antzinatasuneko osagarria.
13. artikulua. Aparteko orduak.
Hitzarmenaren sinatzaileek aparteko orduak gutxitzen ahalegintzeko konpromisoa hartu dute.
1. Aparteko lanorduak honela ordainduko dira:
a) Asteguneko aparteko ordu arrunta ohiko ordu baten balioari %75 gehituz ordainduko da.
b) Gaueko aparteko ordua ohiko ordu baten balioari %100 gehituz ordainduko da.
c) Jaieguneko aparteko ordua ohiko ordu baten balioari %125 gehituz ordainduko da. Jaieguneko lanaldiaren iraupena lanaldi erditik beherakoa bada, langileak 60 euroko osagarria kobratuko du egun bakoitzeko.
2. Aparteko orduak egiteko administrazio organo eskudunak ebazpen bidez eman behar du baimena, presako kasuetan izan ezik.
3. Lanaldi luzapenaren osagarria jasotzen dutenek ez dute inolako ordainik jasoko kontzeptu hau dela eta.
4. Zerbitzuaren beharrak hala ahalbidetzen duenean, diru-konpentsazioaren ordez langileak zilegi izanen du atsedenalditan kobratzea, lanegunetan lan egindako aparteko ordu bakoitzeko ordubete eta berrogeita bost minutu hartuz, eta bi ordu eta hamabost minutu, jaiegunetan lan egindako ordu bakoitzeko.
14. artikulua. Gaixotasunak edo istripuak.
Eritasun edo laneko istripuaren ondorioz aldi baterako ezintasunean dauden langileei, Gizarte Segurantzak ordaintzen dizkien zenbatekoak edozein direla ere, Mankomunitateak ordainduko dizkie oinarrizko ordainsariaren %100 osatzeko behar diren osagarriak, Gizarte Segurantzako epaimahai kalifikatzailearen erabakiz behin betiko beste egoera batera igarotzen ez diren bitartean. Aldi baterako ezintasuna baja emateko eta luzatzeko agirien bitartez frogatu behar da.
15. artikulua. Aparteko pagak.
Hitzarmen honen aplikazio eremuan sartzen diren langileek aparteko bi paga izanen dituzte urtean; horietako bakoitza hileko soldata oso baten parekoa izanen da, kontzeptu guztiak barne.
Paga horiek uztaileko eta abenduko ordainsariekin batera jasoko dira.
Seihilekoaren barrenean ordainsari berberak jaso ez dituen langilea bada, seihileko horretako ordainsarien batez bestekoa jasoko du aparteko paga gisa.
Seihilekoaren barrenean lanean hasi edo lana uzten duten langileek, denbora horretan lanean aritutako egunen araberako aparteko paga jasoko dute.
16. artikulua. Kategorien definizioa.
1. Mairagako Mankomunitatearen (Erdialdea) zerbitzuko langileak, enpresan sartzeko eskatzen zaien titulazioaren eta euren eginkizunen arabera, talde hauetan sartuko dira:
I. A maila.-Talde honetako langileen eginkizunak zuzendaritzakoak edo profesionalak izanen dira eta horretarako doktore, lizentziadun, arkitekto edo ingeniari titulu unibertsitarioak beharko dituzte.
II. B maila.-Talde honetako langileak, unibertsitateko diplomadun, ingeniari tekniko, arkitekto tekniko edo Lanbide Heziketako hirugarren mailako tituluen jabe izanen direnak, A taldeko eginkizunetan laguntza eta sostengu lanetan arituko dira, bai eta euren titulazioari dagozkien lan profesionaletan ere.
III. C maila.-Talde honetako langileak exekuzio lanetan arituko dira eta titulu hauen jabe izanen dira: Batxilergoa, Bigarren Mailako Lanbide Heziketa edo baliokidea.
IV. D maila.-Talde honetako langileak laguntza lanetan edo antzekoetan arituko dira eta titulu hauen jabe izanen dira: Eskola Graduatua, Lehen Mailako Lanbide Heziketa edo baliokidea.
V. E maila.-Talde honetako langileak mendeko laguntza lanetan arituko dira eta titulu hauen jabe izanen dira: Eskola Ziurtagiria edo baliokidea.
2. Mairagako Mankomunitateak (Erdialdea) onetsi beharreko plantilla organikoan, abuztuaren 30eko 251/1993 Legegintzako Foru Dekretuaren 19. artikuluan ezarritakoari jarraikiz, Mairagako Mankomunitateko (Erdialdea) langileen lanpostuak zerrendatuko dira, behar bezala sailkatuak. Urtero, Mairagako Mankomunitateak (Erdialdea) onetsi baino lehen, langileen plantilla organikoa eta lan publikoaren eskaintza ordezkari sindikalekin hitzartuko dira.
Plantilla organikoari buruzko akordioa plantillako lanpostu guztietarako izanen da.
Mairagako Mankomunitateak (Erdialdea) urtero prestatuko du bere zerbitzuko lan-kontratudun finko guztien zerrenda, urteroko abenduaren 31n itxiko dena.
3. Kategoria handiagoko edo txikiagoko lanak. Lanpostuz aldatutako langileak eskubidea izanen du lanpostu berriari dagokion ordainsaria kobratzeko, handiagoa bada. Kategoria goragoko lan batean aritze hutsak ez du behin ere finkatuko ez soldata, ezta goragoko kategoria ere.
Premia larriak edo aurreikusi ezin direnak direla eta, Administrazioak langile bati bere kategoria baino beheragokoaren zereginak esleitu beharra izaten badu, zilegi izanen du hala egitea, eta mantendu eginen dira haren jatorrizko taldeari eta lanpostuari dagozkien ordainsaria eta hortik datozen bestelako eskubideak. Gainera langileen ordezkariei jakinarazi beharko zaie, Langileen Estatutuaren 41. artikuluan ezarritakoa galarazi gabe.
IV. KAPITULUA
Diziplina araubidea
17. artikulua. Diziplina neurriak.
Hartu beharreko diziplina neurrien berri emanen zaio langileen ordezkariari, edo haren ordezkoari, egoki iruditzen zaizkion alegazioak egin ditzan haiek jaso eta 8 eguneko epean.
Langileen hutsegiteak eta zehapenak
1.-Hutsegiteak:
a) Laneko betebeharrak ez betetzeagatik zehatuko dira langileak, ez beste ezergatik, laneko ez-betetze hori diziplina hutsegitea denean, hutsegiteen eta zehapenen mailakatzearekin eta abuztuaren 30eko 251/1993 Legegintzako Foru Dekretuaren II. tituluko IX. kapituluan ezartzen den prozedurarekin eta xedapen osagarriekin bat etorriz. Arau horiek osorik aplikatzen ahal zaizkie hitzarmen honen mendeko langileei, artikulu honen b) letran zehaztutakoa kontuan hartuz.
b) Berariaz aurreikusi gabeko gaietan Langileen Estatutuaren testu bateginaren 54. artikuluan ezarritakoari jarraituko zaio, hor jasotako tipifikazioaren barnean sartzen baitira aurreko atalean aipatu araudian zehaztutako hutsegiteak.
2.-Zehapenak:
Hutsegiteen kalifikazioaren arabera ezartzen ahal diren zehapenak hauek dira:
a) Hutsegite arinak:
-Idatzizko kargu-hartzea.
-Egun batetik lau egunera bitarteko enplegu-soldaten etenaldia.
b) Hutsegite larriak:
-Bost egunetik hogeita hamar egunera bitarteko enplegu-soldaten etenaldia.
-Behartutako lekualdatzea, inolako kalte-ordainik jasotzeko eskubiderik gabe.
c) Hutsegite oso larriak:
-Hilabetetik hiru hilabetera bitarteko enplegu-soldaten etenaldia.
-Kaleratzea.
3.-Hutsegiteen preskripzio epeak:
Hutsegite arinak hamar egunen buruan preskribatzen dira; larriak hogei egunen buruan; eta oso larriak hirurogeiren buruan, Administrazioa hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.
Preskripzioa eten eginen da prozedurari hasiera ematea erabakitzen den unetik, eta horretarako hartzen den erabakiak behar bezala erregistratua behar du izan. Espedientearen tramitazioa, langileari egoztekoa ez den kausagatik hilabete baino gehiagoz eteten bada, preskripzio epea ez-etentzat hartuko da.
18. artikulua. Bidegabeko kaleratzea.
Lan Magistraturak diziplinako kaleratze bat bidegabekotzat kalifikatzen badu, enpresak bere erabakia berrikusiko du eta langilea berriz hartzeko aukera aztertuko du. Aldeen arteko gatazkak segitzen badu, batzorde bat sortuko da, bi aldeek onartuko duten konponbidea bilatzeko. Batzordean hauekizanen dira: Mankomunitateko burua (kalitatezko botoarekin), langileen ordezkaria, eta Batzorde Iraunkorrak bere kideen artean izendatutako hiru. Batzordeak gehiengo soilez hartuko du erabakia.
Organo eskudunak ohiko lanpostuan aritzeko ezintasun osotzat kalifikatutako eritasun edo istripuaren ondorioz, langileak ezin badu lanpostu horretan segitu, enpresak kasuz kasu aztertuko du langilea berregokitzea.
V. KAPITULUA
Beste xedapen batzuk
19. artikulua. Lan osasuna.
1. Lan osasunaren gaia eta Mairagako Mankomunitateko (Erdialdea) langileen osasuna garrantzi handiko kontuak direnez, jarraipena egitea proposatzen dugu, Mutualitateek egindako arrisku-ebaluazioari dagokionez, istripuei aurrea hartzeko eta plantillako langile guztien osasuna zaintzeko.
2. Lanpostuz aldatzea osasunean jasandako kaltea dela-eta. Zentro ofizial bateko txostenaren bidez egiaztaturik, osasunean jasandako kaltea dela-eta lanpostuz aldatu beharra dagoenean, langileari bere egoera fisiko edo psikikorako egokia den lanpostua ematera behartua dago Mairagako Mankomunitatea (Erdialdea). Osasuna hondatu zaion langile orok lanpostuz aldatu izanagatik ez du galera ekonomikorik izanen, ez du lanbide kategoria galduko eta ez du horren ondorioz inolako kalterik izanen ere. Aurreko lanpostuaren plusak soilik galduko ditu eta beste lanpostuko plusak kobratuko ditu, hala badagokio.
3. Mankomunitateak laneko osasunaren jarraipena ahalik gehien erraztuko dio prebentzioko delegatuari, eta harekin ordu kreditua adostuko du, prestakuntza jardueretan eta bere eginkizunetan aritzeko.
4. Higiene neurriak: agente biologikoekin lan egitearen ondorioz langileen osasuna edo segurtasuna arriskuan egon daitekeen jarduera guztietan Mankomunitateak behar diren neurriak hartuko ditu.
-Komun eta garbigela egokiak izanen dira langileentzat, begiak garbitzeko produktuak eta larruazalerako antiseptikoak barne.
-Mankomunitatearen ardura izanen da laneko arropak eta babes ekipoak garbitu, deskontaminatu eta, behar izanez gero, suntsitzea; erabat debekaturik dago langileek etxera eramatea horretarako.
20. artikulua. Laneko arropa.
Laneko arropak nahitaez erabiltzekoak izanen dira, Mankomunitateak banatuko ditu eta segurtasun neurriak beteko dituzte. Ez da eragozpenik izanen egoera zehatzez arduratzeko.
Hondakin zerbitzuan arropa hauek erabiliko dira:
Panazko galtza pare bat.
Udako galtza pare bat.
Neguko alkandora bat.
Udako bi alkandora.
Jertse bat.
Buzo bat (ator eta galtzekin txandakatu ahal izanen da).
Beroki bat.
Txaleko bat.
Larruzko bota pare bat.
Zapata pare bat, udakoak.
Uretako jantzi bat.
Eskularruak, behar adina.
Arropa jasotzean fitxa bat sinatuko da, eta inola ere ezin izanen da aukeratu.
Arropa horiek hondatzen diren heinean berritu beharko dira.
21. artikulua. Osasun azterketa eta osasun laguntza.
1. Langile guztiek eskubidea daukate urtean osasun azterketa bat egiteko. Azterketa horrek legez ezarritako probak (oftalmologia, traumatologia, odontologia, audiometria, analitika osoa, arteria-presioa, pisua, erreflexuak...) barnean hartuko ditu, baita lanpostu zehatzerako beharrezkotzat jotzen direnak ere.
2. Mairagako Mankomunitateak (Erdialdea) une bakoitzean kontratatuta duen mutualitateak eginen ditu azterketa horiek.
3. Osasun azterketa horren ondoren langileren batek beste azterketa osoago bat behar izanez gero, horretarako baimen ordaindua izanen du inolako galerarik izan gabe bere ordainsarian. Gero frogagiri medikoa aurkeztu beharko du.
4. Lanorduetan edo "in itinere" gertatutako lan istripuei dagokienez, Mairagako Mankomunitateak (Erdialdea) istripua izan duen langileak medikuaren aginduz erabili behar dituen elementuen edo osagarrien (edozein motatako protesiak, betaurrekoak, lentillak eta abar) konponketa edo ordezpena ordainduko dio oso-osorik, baita norberaren hortzen konponketa ere, mutualitateak barnean hartzen ez badu eta Presidentetzak edo Batzorde Iraunkorrak aurretik txostena egiten badu.
Odontologia gastuetarako, Nafarroako Gobernuan indarra duten tarifen bikoitza aurreratuko zaie Mairagako Mankomunitateko (Erdialdea) langileei, hala eskatuz gero. Gastuaren frogagiria emandako aurrerakinari dagokion hiruhilekoan aurkeztu beharko da, interesdunak hori egin ezin duela justifikatu ezean. Izan ere, kasu horretan hurrengo hiruhilekoan aurkeztu beharko du edo, bestela, automatikoki kenduko zaio.
5. Lanetik ondorioztatzen den eta hitzarmen honek indarra hartzen duen egunetik sortzen den arrazoia dela eta langileak kalte fisikoak dituenean -mutualitateak edo Gizarte Segurantzak egindako txosten medikoen bidez behar bezala egiaztatzen direnak-, kalte horietatik osasun publikoak sendatu ezin dituen ondorioak -osasun pribatuak sendatzen ahal dituenak- geratzen direnean, eta ondorioak konpontzeari buruzko berariazko txostenak aurkezten direnean, langileak arrastoak konpontzeko ebakuntzatik ondorioztatutako gastuen %75 eta %100 arteko zenbatekoa jasotzeko eskubidea izanen du, Mairagako Mankomunitateko (Erdialdea) Presidentetzak Batzorde Iraunkorraren eta Enpresa Batzordearen oniritziarekin erabakitzen duenaren arabera.
Hobekuntza sozialak
22. artikulua. Istripu asegurua.
Istripu aseguruko poliza izenpetuta, langile finkoen zein aldi baterako langileen heriotzako eta baliaezintasun iraunkorreko arriskuak babestuko dira.
Mairagako Mankomunitateak (Erdialdea) langileen erantzukizun zibileko poliza izenpetuko du, horiek eginkizunak egitean, txangoak gauzatzean eta bestelako egoeretan hirugarrenei sortzen ahal dizkieten kalteak estaltzeko.
BERMEAK | LANEKO ESTALDURA ETA "IN ITINERE" ESTALDURA | ESTALDURA 24 ORDU |
Istripuaren ondoriozko heriotza | 59.100 euro | 20.000 euro |
Istripuaren ondoriozko erabateko baliaezintasun iraunkorra | 103.425,03 euro | 20.000 euro |
Istripuaren ondoriozko baliaezintasun iraunkor partziala | Baliaezintasunerako kapitalari buruzko baremoaren araberakoa | * |
Gaixotasunaren ondoriozko heriotza | * | 20.000 euro |
Gaixotasunaren ondoriozko erabateko baliaezintasun iraunkorra | * | 20.000 euro |
* Oharra.-Lan istripuaren ondoriozko heriotza edo baliaezintasuna gertatuz gero, laneko estalduraren eta 24 orduko estalduraren kapitalak batuko dira.
23. artikulua. Zerbitzuaren kalte-ordainak
Lanpostua lortzeko baldintza gisa gidabaimena eskatu zaien edo euren eginkizunetan aritzeko beharrezkoa duten langileei gidabaimena berritzeko osasun azterketarako baimen ordaindua emanen zaie, justifikazioa aurkeztuz gero, eta erregelamenduzko berriztapenetarako ordaintzen dituzten diru-kopuruak itzuliko zaizkie, gastuen fakturak aurkeztu ondoren. Gidabaimena berritzeak dakartzan gastuak enpresak ordainduko ditu, berritzearen gestioak berekin dakartzan kostuak izan ezik.
-Puntukako gidabaimena:
-Langileak punturen bat galtzen badu bere lana egitean eta errua berea ez bada, birziklapen ikastaroa egitean enpresak langileak galdu dituen puntuen zati proportzionala ordainduko du denboraren eta diruaren aldetik.
-Langile batek gidabaimenaren puntu guztiak galtzen baditu eta, bere lana egitean, erdia baino gehiago galdu badu errurik izan gabe, birziklapen ikastaroa egitean enpresak langileak galdu dituen puntuen zati proportzionala ordainduko du denboraren eta diruaren aldetik, eta lanpostu berri bati atxikiko dio, haren kategoriari dagozkion ordainsariak galdu gabe.
-Langile batek gidabaimenaren puntu guztiak galtzen baditu eta, bere lana egitean, erdia baino gutxiago galdu badu errurik izan gabe, birziklapen ikastaroa egitean enpresak langileak galdu dituen puntuen zati proportzionala ordainduko du denboraren eta diruaren aldetik, eta lanpostu berri bati atxikiko dio, lanpostu berriaren ordainsariak gehi lana egitean galdu dituen puntuen zati proportzionala emanda.
Gidariaren erruz izan gabe, zerbitzuko ibilbidearen beharrengatik edo akats mekaniko batengatik, langileari gidabaimena kendu bazaio, enpresak lansaria eta lanpostua errespetatuko dizkio, bitarte horretan enpresak beste lanposturen baten egokitzea galarazi gabe.
Gidabaimena kentzen badiote ibilgailu partikularra eramanez, enpresak hitzematen du beste lanpostu batean egokituko duela, lanpostu berriaren ordainsari-baldintzetan.
24. artikulua. Eszedentziak.
Nafarroako Administrazio Publikoen zerbitzuko Langileen Estatutuaren testu bategina onesten duen abuztuaren 30eko 251/1993 Legegintzako Foru Dekretuaren VI. kapituluaren 22., 23., 24., 25., 26., 27., 28., 29. eta 30. artikuluetan xedatutakoari lotuko zaio.
Borondatezko eszedentzia jasotzen duen langilea automatikoki lanean hasten ahal da berriro bere lanpostuan, 18 hilabeteko epean, eszedentzia eman zaion egunetik zenbatuta.
25. artikulua. Errelebo kontratua.
Mairagako Mankomunitateko (Erdialdea) plantillako langileei, erretiro partziala hartzeko legez ezarritako baldintzak betetzen badituzte, errelebo kontratuarekin, eta hori agiri fede-emailean eskatzen badute, eskaera onartuko zaie, egiten duten unetik.
26. artikulua. Kontratazioa.
Behin-behineko kontratazioa ahalik gehien murriztuko da, zerbitzuaren behar eta ezaugarrien eta Mankomunitatearen kudeaketaren arabera.
27. artikulua. Prestakuntza eta lanbide-prestakuntza.
Langile guztiak behartuta daude enpresaren iritziz interesgarriak diren prestakuntza, ikasketa edo birziklapen ikastaroetara joatera.
Ikastaroen sailkapena, lanerako duten garrantziaren arabera:
a) Enpresak sustaturiko ikastaro bereziak:
Enpresak matrikula gastuak eta, hala behar izatera, baita bidaia gastuak ere ordainduko ditu. Enpresak sustaturiko ikastaroetara edo prestakuntza jardunaldietara nahitaez joan beharko dute langileek. Enpresak eginahalak eginen ditu ikastarook lanorduetan eman daitezen. Aurrekoa ukatu gabe, antolakuntza beharrak direla eta, ikastarook lanordutik kanpora ere egiten ahal dira, ordezkari sindikalari jakinarazi ondotik. Horrelakoetan, langileek denbora osoaren %50 jarriko dute, gehienez, eta enpresak ordainduko die denbora gehiago eman badute. Konpentsazioa baimen ordaindua izanen da, ordu bat orduko.
Denbora kontatzerakoan, prestakuntzan emandako denbora baino ez da kontuan hartuko, ez ordea, joan-etorriak, distantzia gehigarriak eta abar.
b) Langileek sustaturiko ikastaroak (langilearen eginkizunekin berariazko lotura dutenak):
Enpresak erraztasunak emanen ditu ikastaro horietara joateko, zerbitzua galarazi gabe eta erabateko autonomiarekin, betiere enpresari garrantzitsua iruditzen bazaio ikastaro horietara joatea.
Matrikula gastuak enpresaren kontura izanen dira beti.
c) Enpresak erraztasunak emanen ditu Administrazio Publikoak hizkuntza normalizazioa sustatzeko antolatzen dituen prestakuntza ikastaroetan parte hartzeko, zerbitzuaren kaltetan ez bada.
d) Prestakuntza premia eta betebehar profesionala dela ulertzen duenez, bai eta funtsezko faktorea motibazioa handitzeko eta langileen maila igotzeko eta mugigarritasuna bultzatzeko ere, Mairagako Mankomunitateak (Erdialdea) hitzeman du prestakuntza eskaintza handituko duela, eta horretarako sindikatuen laguntza izanen du.
e) Langileei prestakuntzarako erraztasunak emateko, Mairagako Mankomunitateak (Erdialdea) konpromisoa hartzen du neurri hauek hartzeko, baldin eta zerbitzuaren kudeaketak eta lanaren antolaketak horretarako bide ematen badute:
a. Langileei erraztasunak ematea, lanorduetan Nafarroako Administrazio Publikoaren Institutuak antolaturiko prestakuntza ikastaroetara joateko.
b. Gehienez ere 80 orduko baimen ordainduak urtean, lanbidea prestatu eta hobetzeko ikastaroetara joateko, haien edukia zuzenean lanpostuari edo langileak Mairagako Mankomunitatean (Erdialdea) duen lanbide karrerari lotua bada eta lanorduetan joaten bada.
c. 25 urtetik goitiko langileak unibertsitatean sartzeko probetarako prestakuntza. Denboraren %50 langilearen kargura izanen da, eta beste %50a Mairagako Mankomunitatearen (Erdialdea) kargura. Kasu guztietan, gero langileari eskatuko zaio eginiko ikastaroa aprobetxatu duela froga dezala.
f) Lanbide prestakuntza, eraberritze eta gaikuntzako ikastaroetatik ondorioztatutako gastuak (hala nola matrikula, egonaldia eta kilometrajea) diruz lagunduko dira, ikastaroak Mairagako Mankomunitatearen (Erdialdea) irizpideen eta beharrizanen arabera gauzatu baldin badira.
g) Hizkuntza politika.
Administrazio elebiduna lortu eta zerbitzua euskaraz ematen ahal dela bermatzeko, Mankomunitateak erraztasunak emanen dizkie euskaldundu nahi duten langile guztiei. Mankomunitate honen xede denez biztanle guztiei bermatzea arreta eta zerbitzuen eskaintza Nafarroako hizkuntza berekietako edozeinetan, nahi duten langileek euren lanpostuekin bat datorren hizkuntza eskakizuna eskura dezaten bitartekoak emanen dira. Horretarako, indarra duen araudian ezarritakoari jarraituko zaio.
Euskara eskoletara joan nahi duen edozein langilek 50 euro ordainduko ditu matrikulagatik; gainerakoa Mairagako Mankomunitateak (Erdialdea) ordainduko du. Euskara ikastaroetara doazen langileek bertaratze-ziurtagiria aurkeztu beharko dute.
h) Hizkera.
Gizonen eta emakumeen arteko izatezko berdintasuna lortzeko asmoz, oso urrats garrantzitsua da emakumeak gizarteko subjektu aktiboak direla ulertzea. Horretarako, gizartearen partaide gisa aitortu behar dira, eta gure eguneroko hizkerak ez ditu alde batera utzi edo gutxietsiko. Gaur egun gure erakundeetako asko ahalegina egiten ari dira onarpen hori lortzeko, nahiz eta oraindik beharbada nahikoa ez den.
Hori oinarri harturik eta erabili beharreko idazkerari dagokionez, erabaki honek eta Mairagako Mankomunitatearen (Erdialdea) eta ordezkari sindikalen arteko lan harreman guztiek emakumeak badaudela, gizartearen gehiengoa osatzen dutela eta horren araberako tratua eman behar zaiela onetsi beharko dute, horrela adierazten duen hizkera ezarriz. Nekeza dela jakinda ere, asmo hori hizkeran ere islatzen saiatuko da.
28. artikulua. Bizitza pertsonala, familiakoa eta lanekoa bateragarri egiteko neurriak.
Mairagako Mankomunitateko (Erdialdea) langileek urtero, beren familien inguruabarren arabera, "Familia laguntza" kontzeptuan funtzionarioentzat ezarritako laguntzak jasoko dituzte, haiei aplikatu beharreko legerian jasorik dagoen moduan.
Akordio honen indarraldian, behar diren jarduketak bultzatuko dira, aldaketei buruzkoak barne, enplegatu publikoen bizitza pertsonala, familiakoa eta lanekoa bateragarri egiteko neurri hauek aplikatu ahal izan daitezen:
a) Seme edo alaba baten jaiotza, etxean hartze edo adopzioagatik aitarentzako baimen ordaindua bost egunetik hamarrera luzatuko da.
b) Lanetik ateratzeko eskubidea izanen da ernalketa lagunduaren teknikak jasotzeko, beharrezkoa den denborarako eta lanorduetan egin beharra aldez aurretik frogatuta.
c) Aitatasun eta amatasun baimenetan prestakuntza ikastaroetan parte hartzen ahal da, bai eta familia arazoengatiko eszedentzietan ere.
d) Bi hilabeteko baimena hartzeko eskubidea izanen du, tarte horretan oinarrizko ordainsariak besterik kobratzeke, nazioarteko adopzioen kasuetan, gurasoek adoptatu nahi duten umearen jatorrizko herrialdera aurrez joan beharra baldin badute.
e) Sei urtetik beherako seme-alaben legepeko zaintza dela-eta, lanaldi murrizketa onartzeko gaur egun dauden baldintzak hamabi urteko seme-alabak zuzenean zaintzeko kasuetara hedatuko da, eta murrizketa goizaren lehenengo orduan eta azkenean hartuko da.
f) Ezgaitasun psikiko, fisiko edo sentsorialeko seme-alabak dituzten langileek baimena dute lanera ez agertzeko, beharrezkoa duten denborarako, seme-alabek tratamendua hartzen duten hezkuntza bereziko zentroan koordinazioko bileratan parte hartzeko edo haiei laguntzeko, osasun arloan laguntza gehigarria hartu behar baldin badute.
g) Genero-indarkeriaren aurkako babes osoa emateko neurriak sustatuko dira.
h) Indarrean dagoen araudiaren arabera, baimen egun ordainduak kalkulatzeko, ahaideen ospitaleratzerik bada, ospitalean sartzen den egunetik hasiko da kontatzen edo, egun hori laneguna ez bada, biharamunetik aurrera.
VI. KAPITULUA
Ekintza sindikala eta berme sindikalak
29. artikulua. Langileen ordezkariak.
a) Hitzarmen honen aplikazio eremuan sartzen diren langileek eskubidea dute beren lan baldintzen zehaztapenean parte hartzeko, legeak ezarritako moduan, artikulu honetan araututako organoen bitartez.
b) Ordezkari sindikalari dagokio langileak ordezkatzea.
c) Mairagako Mankomunitatearen (Erdialdea) mendeko organo, zerbitzu eta zentro guztiek lantoki bakar bat osatzen dute.
d) Aurreko artikuluan ezarritakoa alde batera utzi gabe, ordezkari sindikalek eskubide, betebehar eta berme arautuak izanen dituzte, Langileen Estatutuaren 64. artikuluan eta hurrengoetan eta Askatasun Sindikalari buruzko Lege Organikoaren IV. tituluan ezarritakoaren bidez, hurrenez hurren.
e) Hitzarmen honen aplikazio eremuko ordezkari sindikalek 25 orduko kreditua izanen dute hilean. Kreditu hori hiru hilean behin kontatuko zaie, salbu eta gaixotasun, opor, lizentzia edo baimenen ondoriozko bajak hartzen dituztenean. Ordezkari sindikalen eta Prebentzioko ordezkarien artean ordu sindikalak metatu ahal izanen dira, legez ezarritakoak gainditu gabe.
Ordu sindikaletarako eskubidea nagusituko da edozein ordu edo zerbitzuren gainean. Eta kontatu eginen dira ondorio guztietarako, ordezkariaren egutegian ageri den bezala.
f) Langileen ordezkariak lan-kontratuko langile finkoak edo aldi baterakoak hartzeko deialdiko epaimahaian egonen dira bereziki.
30. artikulua. Batzarra.
Langileek batzarrak egiteko eskubidea izanen dute honako baldintzak betez:
a) Batzarrak lanaldiaren hasieran edo bukaeran egin beharko dira. Salbuespenez, batzarrak lanaldiaren beste tarte batean egiten ahalko dira, horrela kalte gutxiago egiten bazaio zerbitzuen ohiko funtzionamenduari.
b) Baimena emanen da aipatu diren baldintzak betetzen badira. Salbuespenezko kasuetan izan ezik, batzarra egiteko baimena gutxienez ere berrogeita zortzi ordu lehenago eskatu beharko da. Kontrako ebazpenik ematen ez bada baimena emantzat joko da; batzarra egin baino hogeita lau ordu lehenago gutxienez jakinarazi beharko da ebazpena.
c) Batzarra Mairagako Mankomunitatearen (Erdialdea) edo haren erakunde autonomoen areto batean egin nahi izanez gero, eskaera aurkeztuko da, aurreko atalean adierazitako moduan.
Xedapen gehigarria.
Era berean, alderdi sinatzaileek bestelakoa erabaki arte, hitzarmen hau 2011rako luzatzen ahal da baldintza berdinetan.
Azken xedapena.
Hitzarmen honetan xedatuta ez dagoen guztian Nafarroako Foru Komunitateko Administrazioko eta haren erakunde autonomoetako lan hitzarmen kolektiboan ezarritakoari jarraituko zaio.
Hitzarmen honek, indarra hartzen duenetik, bertan jasotako gaiak beste modu batean arautu dituzten aurreko xedapenak ordezten ditu, bereziki hitzarmen honen eraginpeko langileei dagozkien araudi nazionalak eta lan ordenantzak.
Tafallan, 2008ko abenduaren 11n.-Mankomuniteko burua, M. Teresa Mañú Echaide.-Ordezkari sindikala, Ignacio Moros Bailón.
Iragarkiaren kodea: F0912793
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
