Iragarkia
59. ALDIZKARIA - 2009ko maiatzaren 15a
I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
212/2009 FORU AGINDUA, apirilaren 24koa, Landa Garapeneko eta Ingurumeneko kontseilariak emana, mahastia berregituratu eta moldatzeko planetarako laguntzak emateko deialdia eta oinarri arautzaileak onesten dituena, 2009-2010 kanpainarako.
Mahastizaintza eta ardogintzaren merkatu antolakunde bateratua ezarri, 1493/1999 (EE), 1782/2003 (EE), 1290/2005 (EE) eta 3/2008 (EE) Erregelamenduak aldatu eta 2392/86 (EEE) eta 1493/1999 (EE) Erregelamenduak indargabetzen dituen Kontseiluaren 2008ko apirilaren 29ko 479/2008 Erregelamenduak eta Kontseiluaren 479/2008 (EE) Erregelamendua, mahastizaintza eta ardogintza sektorean laguntza programei, hirugarren lurraldeekiko merkatuari, ekoizpen ahalmenari eta kontrolari dagokienez, garatzeko arauak ezartzen dituen Batzordearen 2008ko ekainaren 27ko 555/2008 (EE) Erregelamenduak aldaketa handiak ekarri dituzte mahastizaintza eta ardogintzaren merkatua arautzeko orduan, mahastizaintza eta ardogintzaren merkatu antolakunde bateratua ezarri zuen martxoaren 17ko 1493/1999 (EE) Erregelamenduaren bitartez ezarritako arauekin alderatuta.
Espainiako mahastizaintza eta ardogintzaren sektoreari laguntzeko programaren neurriak aplikatzeko otsailaren 27ko 244/2009 Errege Dekretuak, neurri hauen artean, mahastia berregituratu eta moldatzekoak aurreikusten ditu. Errege Dekretu horrek arau esparru berria aplikatzeko xedapen zenbait biltzen ditu, lehiakortasuna hobetzen laguntzea helburu, bertako aurreikuspenak zehazteak autonomia erkidegoen arau osagarria eskatzen badu ere.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz,
AGINDU DUT:
1. Deialdiaren oinarri arautzaileak onestea. Oinarri horiek foru agindu honen eranskinean daude.
2. Mahastia berregituratu eta moldatzeko planetarako laguntzak emateko deialdia onestea, 2009-2010 kanpainarako.
3. Nekazaritza Bermatzeko Europako Funtsetik (NBEUF) Nafarroarako, 2010eko ekitaldirako, bideratzen den aurrekontuak aukera ematen duen heinean erantzunen zaie foru agindu honen ondoriozko gastu-konpromisoei.
4. Foru agindu hau eta eranskina Nafarroako Aldizkari Ofizialean argitaratzea.
Iruñean, 2009ko apirilaren 24an.-Landa Garapeneko eta Ingurumeneko kontseilaria, Begoña Sanzberro Iturriria.
I. ERANSKINA
Mahastia berregituratu eta moldatzeko planetarako laguntzak emateko deialdiaren oinarri arautzaileak, 2009-2010 kanpainarako.
Lehenbizikoa.-Xedea.
1. Foru agindu honen xedea da Nafarroan mahastia berregituratu eta moldatzeko plan berrien aurkezpena eta onespena arautzea, mahastizaintza eta ardogintzaren merkatuaren Europar Batasuneko antolamenduaren barrenean, hala nola plan horietan aurreikusitako jarduketetarako laguntzak eskuratzea, Nekazaritza Bermatzeko Europako Funtsetik (NBEUF) 2009-2010eko kanpainarako.
2. Ardoa egiteko mahatsa ekoizten duten mahastiak berregituratu eta moldatzeko aurkezten diren plan berrietan aplikatzeko izanen dira oinarri hauek, betiere haien lurzatiak Nafarroako Foru Komunitatearen lurraldean badaude eta "Nafarroa" jatorrizko deituraren edo "Errioxa" jatorrizko deitura kalifikatuaren barruan babestuak badaude.
3. Mahastizaintza eta ardogintza sektorerako, 2009-2010 kanpainarako, Nekazaritza Bermatzeko Europako Funtsetik (NBEUF) bideratutako laguntzen araubideak honako helburu hauek izanen ditu:
a) Mahastiak berregituratu eta moldatzeko kostuetan parte hartzea. Horretarako hiru laguntza mota ezarriko dira:
-Mahats barietatea aldatzeko laguntzak.
-Mahastiak berregituratzeko laguntzak.
-Ontzi itxurako mahastitik besorako mahastira aldatzeko laguntzak.
b) Ekoizleei plana aplikatzearen ondorioz gal ditzaketen diru-sarrengatik kalte-ordain bat ematea.
4. Aurreko atalean aipatutako laguntzak emateko honako definizioak ezarriko dira:
a) "Neurria": lurzati jakin bat berregituratzeko, moldatzeko edo eraldatzeko egiten diren eragiketen multzoa.
b) "Mahats barietatea aldatzea": mahasti lurzati bateko barietatea aldatzea, oraingo barietatearen gainetik txertatuz (ardorakoetan) edo zegoena berriro txertatuz (Ameriketakoetan), lurzatiko mahatsondo kopurua handitu gabe. Barietatearen aldaketa 2005-2006 kanpainaren aurretik landatutako lurzatietan baizik ez da egiten ahalko.
c) "Mahastiak berregituratzea": lurzati bateko edo batzuetako mahastiak beste landaketa baten edo batzuen bidez ordezkatzea, betiere azalera bera badute eta barietatean edo landaketa sisteman (gidamodua) hobekuntza ekartzen badute.
d) "Ontzi itxurako mahastitik besorako mahastira aldatzeko jarduera": gidamodu baxua duen mahastia besorako gidamodura jasotzeko ekintzak eta horretarako beharrezkoak diren materialak, mahastia modu egokian mekanizatu ahal izateko, bereziki inausketa eta mahats-bilketari dagokienez. Aldatze jarduera landare eta osasun egoera onean dauden mahastietan baizik ez da egiten ahalko, betiere 2005-2006 kanpainaren aurretik landatuak baldin badira.
e) Laguntza planetan landatzeko barietatetzat jotzen dira:
e.1) "Nafarroa" Jatorrizko Deituran:
-Beltzak: Garnatxa, Graciano, Tempranillo, Merlot eta Syrah.
-Zuriak: Sauvignon zuria, ale xeheko moskatela, Garnatxa zuria eta Chardonnay.
e.2) "Errioxa" Jatorrizko Deitura Kalifikatuan:
-Beltzak: Tempranillo, Garnatxa, Graciano.
-Zuriak: Chardonnay, Verdejo eta Sauvignon zuria.
Bi deituretan, ontzi itxurako mahastitik besorako mahastira aldatzeko jardueran baimendurik dagoen barietate oro hartuko da kontuan.
5. Planean aipatzen den neurri bakoitzari ematen zaion laguntzari osagarri bat erantsiko zaio, plana egitearen ondorioz galtzen dituzten diru-sarrerengatik ekoizleei ordain bat emateko.
Bigarrena.-Diru-laguntzaren zenbatekoa.
1. Laguntzak kalkulatzeko foru agindu honen II. eranskinean aipatzen diren eragiketa eta kostuak hartuko dira kontuan, honelaxe:
a) Mahasti barietatea moldatzeko laguntzarako, oraingo barietatearen gainetik edo zegoena berriro txertatzeagatik izaniko kostuak hartuko dira kontuan. Kostuak finkoak izanen dira moldaturiko hektarea bakoitzeko eta txertaketa unitate bakoitzeko. Txertaketa unitatea izanen da mahatsondo batean egiten dena, zenbat ziri sartzen diren kontuan hartu gabe.
b) Mahastia berregituratzeko laguntzarako ekintza hauen kostuak hartuko dira kontuan: erauzketa, lurra prestatzea, landaketa, landaketaren kostuak (bi urtez), besorako euskarria, harriak kentzea, desinfekzioa, lurra berdintzea eta untxien kontrako babesa. Ekintza guztiak hektarea bakoitzaren kostu finko baten arabera zenbatuko dira, landaketa izan ezik, hori haren dentsitatearen arabera kontatuko baita.
c) Ontzi itxurako mahastitik besorako mahastira bihurtzeko laguntzarako ontzitik besorako mahastira pasatzeko ekintza hartuko da kontuan. Ekintza hori hektarea bakoitzaren kostu finkoaren arabera zenbatuko da.
2. Mahastizainak jaso dezakeen laguntzaren zenbatekoa zehazteko berregituratu edo moldatutako azalerak neurtuko dira, mahastizaintza eta ardogintzaren merkatu antolakunde bateratua ezartzen duen Kontseiluaren 2008ko apirilaren 29ko 479/2008 (EE) Erregelamendua garatzeko arauak ezartzen dituen Batzordearen ekainaren 27ko 555/2008 (EE) Erregelamenduaren 75. artikuluan ezarritako metodoari jarraikiz.
3. Diru-sarreren galera orekatzeko laguntza, Nafarroako Foru Komunitatean 2009-2010 kanpainarako izanen da, onesten diren plan berrietarako. Honako hauetarako:
-493,00 euro hektareako, "Nafarroa" Jatorrizko Deiturarako.
-681,00 euro hektareako, "Errioxa" Jatorrizko Deitura Kalifikaturako.
4. Errenta galtzeagatik berregituratze neurrietarako laguntza bi kanpainatan emanen da, gorabehera hauek gertatzen direnean:
-Berregituratu beharreko lurzatiko mahastia 2008ko abuztuaren 1etik 2009ko azaroaren 15era bitarte erauzi denean.
Laguntza eskatu duen mahastizainak lurzatiaren jabetza eta titulartasuna frogatzen dituenean Nafarroako Mahastizaintza eta Enologia Zentroko mahastien erregistro ofizialean, eta mahastiak berak kendu dituenean, berriro landatzeko eskubideak bere izenean adierazita; edo, laguntza eskatu duen mahastizainak Nafarroako Mahastizaintza eta Enologia Zentroko mahastien erregistro ofizialean titulartasuna bakarrik frogatzen duenean, jabetza izan gabe, mahastiak berak kendu behar izanen ditu, jabea ados dagoela, berriro landatzeko eskubideak bere izenean adierazita.
5. Berriro landatzeko eskuraturiko eskubideek ez dute sortuko errenta galtzearen ondoriozko konpentsazio eskubiderik.
6. Barietateak aldatzeko eta ontzi itxurako mahastitik besoako mahastira bihurtzeko neurrietan, soilik kanpaina batean emanen da laguntza errenta galtzeagatik, eta laguntza eskatzen duen mahastizainak honako hauek frogatu beharko ditu:
-Mahastiaren jabetza eta titulartasuna Nafarroako Mahastizaintza eta Enologia Zentroko mahastien erregistro ofizialean.
-Nafarroako Mahastizaintza eta Enologia Zentroko mahastien erregistro ofizialean titulartasuna bakarrik frogatzen badu, jabetza izan gabe, mahastiak aldatzeko eskaera aurkeztu beharko du Nafarroako Mahastizaintza eta Enologia Zentroan, egin beharreko hobekuntza adieraziz, mahastiaren jabeak baimena emanda.
7. Laguntzak emanen dira harriak kentzeko, lurra desinfektatzeko, lurra berdintzeko eta untxien kontra babesteko, aldez aurretik mahastizainak deklaratu baldin baditu eta baldintza hauek betetzen badira:
a) Lurra desinfektatzeko laguntzak ematen ahalko dira, baldin eta mahastiak berriro landatzen badira 2005eko abuztuaren 1aren ondoren kendu direneko lurzatietan.
b) Harriak kentzeko eta lurra berdintzeko laguntzak emanen dira lan horiek egin egin direla frogatu ondoren.
c) Untxien kontrako babesari laguntza emateko, kalte horren arriskuari buruzko ziurtagiria aurkeztu beharko da, Landa Garapeneko eta Ingurumeneko Departamentuak emana.
8. Foru agindu honen II. eranskinean bildutako kostuen %50 da taldekako berregituratze eta moldatze planek gehienez izanen duten laguntza, plan bakoitzeko.
Hirugarrena.-Berregituratze eta moldatze planen betebeharrak.
1. Berregituratze eta moldatze plan berriek, laguntzak jaso ahal izateko, taldekakoak izan beharko dute.
2. Planetan, gutxienez, hogeita bost hektarea lur sartuko dira eta bost bazkide mahastizainek hartuko dute parte.
3. Planak ekoizleen artean eginen den itun baten barruan burutuko dira. Itun horren arabera planean parte hartzen dutenek ordezkari bat izendatu beharko dute, administrazio publikoarekin izan beharreko harremanez arduratzeko.
4. Berregituratze eta moldatze planek ez dute behin ere handituko haiek ukituriko eremuak ekoizteko duen ahalmena. Horretarako, "Nafarroa" Jatorrizko Deituran sartuko da plana (etekina: 40 hektolitro hektarea bakoitzeko) edo "Errioxa" Jatorrizko Deituran (etekina: 44 hektolitro hektarea bakoitzeko). Beraz, plan batek ezin ditu bi deiturak hartu.
5. Lurzatiaren eremuak, berregituratu ondoren, gutxienez ere 0,5 hektarea hartuko ditu. Dena den, berregituratze eta moldatze plana egin ondoren gelditzen diren lurzatien kopurua hasierako kopuruaren %80 baino txikiagoa baldin bada, muga hori txikiagoa izaten ahalko da.
Horri begira, mahastizain batek lantzen duen mahasti azalera osoa hartuko da lurzatitzat; katastroko finka oso bakar bat izan daiteke, edo katastroko lurzati oso edo puska batzuen multzoa.
Hartzen den neurria barietatearen moldaketa bada (oraingo barietatearen gainetik txertatuz edo zegoena berriro txertatuz) eta ontzi itxurako mahatsondoa besorakoa bihurtzea, halakoetan gutxieneko eremua jatorrizkoa izanen da.
6. Mahastizain bakoitzak gehienez bost hektarea lur berregituratzen ahalko du urtean. Inguruabar tekniko edo ekonomikoek eskatzen dutenean, gehieneko muga hori aldatzen ahalko da, Nafarroako Mahastizaintza eta Enologia Zentroak proposaturik.
7. Planek ezin izanen dituzte landaketa berrien azalerak barnean hartu.
8. Planean mahastiak landatzeko biltzen diren eskubideek, transferentziaren bidez eskuratuek, gehienez ere planak ukitzen duen azaleraren %20 eginen dute. Ondorio horietarako, nekazari gazteek dakartzaten eskubideak ez dira kontuan hartuko.
9. Landaketa guztietan nahitaezkoa izanen da txertaka ziurtatuak erabiltzea. Erabiltzen diren landaregaien horniketa legez baimendurik eta mahatsondo mintegizainen erregistro ofizialean izena emanak dauden mintegizainek egin beharko dute.
10. Area batekoa izanen da berregituratu asmo den lurzatiaren gutxieneko azalera.
Laugarrena.-Aurkeztu beharreko agiriak.
1. Eskatzaileek, laguntza eskabidearekin batera, agiri hauek aurkeztu beharko dituzte:
A) Planaren proiektua, eduki honekin:
-Planaren memoria. Egin nahi den planaren laburpena izanen da.
-Eskaturiko planaren laburpen fitxa.
-Banakako fitxa, nekazaritza eta finantza arlokoa. Planean parte hartzen duen ekoizle bakoitzak gauzatuko dituen neurriak jasoko dira hartan: barietatea aldatzekoak, ontzi itxurako mahastitik besatarako mahastira aldatzekoak eta mahastiak berregituratzekoak.
-Planean parte hartzen duen mahastizain batek nekazaritza eta abeltzaintzarendako ordainketa zuzenak aplikatzeari buruzko 1612/2008 Errege Dekretuan ezarritako laguntzetarako eskaera bakarra ez badu aurkeztu, bere ustiategiko parte diren nekazaritza lurzati guztien SIGPAC izeneko erreferentzia alfanumerikoen zerrenda erantsi beharko du. Kudeaketako legezko beharkizunak eta nekazaritzako zein ingurumenerako baldintza egokiak bete behar diren aldian, mahastiak berregituratu eta moldatzeko ordainketaren bat jaso izan duen titular baten ustiategiko lurzatietan aldaketarik suertatu bada, horrek bere ustiategiko lurzatien zerrenda apirilaren 30a baino lehen eguneratu beharko du.
B) Planean parte hartzen duten mahastizainen artean izenpeturiko akordioa.
C. Planean parte hartzen duten eskatzaileen NANa, IFZ edo IFK eta banku-datuak.
D) Nekazari gaztea izanez gero, Nafarroako Nekazaritzako Ustiategien Erregistroak luzatutako ziurtagiria, edo plana aurkeztu baino lehen nekazaritzan aritzeagatik langile autonomoen araubide berezian afiliaturik dagoela frogatzen duten agiriak. Beren gain hasiz gero, hori frogatzen duten agiriak.
E) Ogibide nagusia nekazaritza daukanaren kasuan, horren ziurtagiria, Nafarroako Nekazaritzako Ustiategien Erregistroak emana.
F. Elkarteak izanez gero:
-Elkartea osatu izanaren agiriaren kopia.
-Elkartearen organo kudeatzaileak eginiko ziurtagiria. Bertan agertuko dira haren izenean laguntzak eskatzeko baimenduriko pertsonaren identifikazioa, IFZ eta bazkideen izenen zerrenda.
G) Eskaturiko lurzatien egiaztagiria:
g.1) Lurzatiak eskatzailearenak baldin badira, Landalurren Katastroko orrialdea aurkeztuko da, gaurkotua, edo bestela, jabetzaren eskritura publikoa. Berriki lurzatien berrantolamendua egin duten udalak izanez gero, berrantolamenduan esleitutako lurren orrialdea aurkeztuko da eta, lurzatiak berrantolatzeko prozesuan lurzatien jabetzan aldaketak izaten badira gero, organo eskudunak emandako ziurtagiria aurkeztuko da, lurzatiaren titularra nor den jakiteko.
g.2) Lurzatiak eskatzailearenak ez badira, haiek erabiltzeko eskubidea honelaxe frogatu beharko da:
-Errentamenduko kontratua, plana aurkeztu baino lehenagokoa, eredu ofizialaren arabera betea, landa errentamenduen erregistroan inskribatua. Haren indarraldia hamaika urtekoa izanen da gutxienez, eta erauzteko unean landaketa eskubideen hartzailea nor den jasoko da.
-Lurzatiaren gaineko gozamen eskubidea badela agiriz frogatzea.
-Herrilurrak izanez gero, udalaren ziurtagiria, non esleipen-hartzailea, esleipenaren eguna eta iraupena jasoko baitira.
H) Harriak kentzeko, lurra desinfektatzeko, berdintzeko eta untxien kontra babesteko laguntzak eskatuz gero, erregelamenduaren araberako faktura edo proformakoa aurkeztu beharko da planarekin batera eta, betiere, gero erregelamenduaren araberako faktura, hartutako neurriaren amaieraren ziurtagiria egin baino lehen.
h.1) Untxien kontrako babeserako, nahitaez aurkeztu beharko da Landa Garapeneko eta Ingurumeneko Departamentuaren ziurtagiria.
h.2) Eragiketa bakoitzeko faktura bat aurkeztu behar da edo, bestela, fakturan eragiketa bakoitzari dagokion zenbatekoa zehaztu.
h.3) Laguntza eskatzen duen titularraren izena zehatz azalduko da faktura guztietan. Halaber, harriak kentzeko, lurra desinfektatzeko eta lurra berdintzeko fakturak direnean, eragiketa zein lurzatitan egiten den, haren katastroko erreferentziak zehaztea ezinbestekoa izanen da. Untxien kontrako babesari dagozkion fakturetan ez da beharrezkoa katastroko erreferentzia ematea.
I) Baimenduta eta erregistro ofizialean inskribatuta dagoen mintegizain batek landareari buruz erregelamenduaren arabera egindako faktura, hartutako neurriaren amaieraren ziurtagiria egin baino lehen aurkeztu beharko dena.
J) Planari birlandatze eskubideak ekarriz gero, erauzteko justifikazioa azalduko da, eskubideak norberarenak badira, eta transferentziaren justifikazioaren fotokopia, eskubideak transferentzia bidez eskuratu badira.
K) Berregituratze neurri guztietan, lurzati bakoitzean landatzeko baimenaren eskabidea, behar bezala betea.
Berregituratze neurrietan mahastia mahatsa bildu ondoren kentzeko asmoa badago, landatzeko baimena eta erauzketaren deklarazio orria aurkeztu beharko dira, azken hori plana aurkezten denerako betea.
L) Barietatea aldatzeko eta ontzi itxuratik besorako mahastira pasatzeko neurrietan, aldatzeko eskabidea, behar bezala betea.
Bosgarrena.-Laguntzetatik baztertuak
Ekintza hauek ezin izanen dituzte laguntzak hartu:
1. Berezko bizitza bukatua duten mahastien aldaketa normala, hots, lurzati bera mahatsondo barietate berarekin eta landaketa sistema berarekin landatzea.
2. Azken hamar urte honetan Europar Batasunaren laguntzak, Espainiakoak edo Nafarroakoak hartu dituzten lurrak direnean.
3. Landaketa berrien kontzesioaren arabera landatu diren mahastien aldaketa, kontzesioa ematen denetik hamar urte pasatu arte.
4. Ustiategiko edozein mahasti azalerari dagokionez, mahastiak landatzeari buruzko indarra duen araudiari aurka egiten dioten mahastien titularrak edo jabeak.
5. Lurzatiak berrantolatzeko prozesuan dauden udalerrietako lurzatietarako eskaerak, Landa Garapeneko eta Ingurumeneko Departamentuko Nekazaritzako Azpiegituren Zerbitzuaren baimena dutenak izan ezik.
6. Ardandegi kooperatibo bateko lurzatiei dagozkienak, eskatzailea bada titularra eta kooperatibak adierazten badu bere beharrengatik erauzketaren kontra dagoela.
7. Kanpaina berberean, mahastizaintza eta ardogintzaren merkatu antolakunde bateratuaren esparruan, ustiategi guztia behin betiko uzteagatik prima jasotzen duten titularren mahastiei dagozkienak.
Seigarrena.-Eskaerak aurkezteko epea.
1. Eskaerak laguntzen diren jarduerak egin baino lehen aurkeztu beharko dira.
2. Interesdunek Nafarroako Mahastizaintza eta Enologia Zentroan zuzenean aurkeztu beharko dituzte berregituratze eta moldatze planak, hartu beharreko neurriak azaltzen dituztenak, onespena jaso dezaten; bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluan aipatzen diren baliabideen bidez.
3. 2009ko ekainaren 1a baino lehen aurkeztuko dira eskaerak, horretarako ezarritako ereduari jarraituz. Nafarroako Mahastizaintza eta Enologia Zentroan har daiteke eredua.
Zazpigarrena.-Diru-laguntza emateko modua, lehentasunak eta irizpide objektiboak.
1. NBEUFetik Nafarroako Foru Komunitatearen esku utzitako diru kopuruak, lehenik eta behin, aurreko ekitaldietan aurkeztu eta onetsita dauden berregituratze eta moldatze planetan erabiliko dira, zaharrenetik hasita, eta bigarrenik, foru agindu honen arabera aurkeztutako planetan, NBEUFk Nafarroaren esku utzitako aurrekontuaren zenbatekoa agortu arte.
2. Laguntzak ematean lehentasuna izanen dute mahastia uzteko araubidearen aplikaziotik salbuetsita dauden mahasti azalerek, Mahastien produkzio ahalmena arautzen duen uztailaren 18ko 1244/2008 Errege Dekretuaren 20. artikuluak aipatzen dituen eremuetan egoteagatik.
3. Eskatzaileen kategoria ordena honi jarraituz emanen dira banakako laguntzak, zein den ere haien taldekako plana:
a) Nekazari gaztea, langile autonomoen araubide berezian nekazaritza jarduera dela eta, inskribatua dagoena.
b) Ogibide nagusia nekazaritza daukana.
c) Nafarroako Nekazaritzako Ustiategien Erregistroan lehentasunezkotzat hartutako ustiategiak.
d) Nafarroako Nekazaritzako Elikagai Industrien Erregistroan inskribatutako ardandegi elaboratzaileak.
f) Nafarroako Nekazaritzako Ustiategien Erregistroan inskribatuta dauden bestelako nekazaritzako ustiategiak.
e) Gainerako parte-hartzaileak.
3. Orobat, eskatzaile kategoria bakoitzaren barrenean, taldekako plan berrientzat ezartzen den lehentasun ordenari jarraituko zaio, puntuazio honen arabera:
a) 10 puntu, nekazari gazte bakoitzeko, langile autonomoen araubide berezian, nekazaritza jarduera dela eta, inskribatuta baldin badago.
b) 7 puntu, ogibide nagusia nekazaritza daukan nekazari bakoitzeko.
c) 7 puntu, Nafarroako Nekazaritzako Ustiategien Erregistroan lehentasunezkotzat hartutako ustiategi bakoitzeko.
d) 5 puntu, Nafarroako Nekazaritzako Elikagai Industrien Erregistroan inskribatutako ardandegi elaboratzaile bakoitzeko.
e) 2 puntu, Nafarroako Nekazaritzako Ustiategien Erregistroan inskribatuta dagoen bestelako nekazaritzako ustiategi bakoitzeko.
f) Gainerakoetan, puntu bat parte-hartzaile bakoitzeko.
4. Plan berrietako eskaeretan parte hartzen dutenen artean berdinketa badago, ordena hau hartuko da kontuan lehentasuna emateko:
-Amaierako lurzatien artean hasierako lurzatien indize handiena izatea.
-Lur gutxien berregituratu edo moldatzen duten parte-hartzaileak.
Zortzigarrena.-Deialdiaren antolamendua, instrukzioa eta ebazpena.
1. Eskaeren ebazpena, planen onespenarekin batera, Nekazaritza eta Abeltzaintzako zuzendari nagusiak emanen du, Nafarroako Foru Komunitatean NBEUF laguntzak ordaintzen dituen erakundeko zuzendaria den aldetik, Nafarroako Mahastizaintza eta Enologia Zentroak txostena luzatu eta tramitatu ondoren. Erakunde hori izanen da baimenetarako eta zerbitzu teknikorako unitatea. Onespenak ez du etorkizuneko gastu konpromisorik ekarriko administrazioaren aldetik.
2. Eskaera aurkezten denetik sei hilabeteko epea ebazpenik jakinarazi gabe iraganik, eskaera ezetsi dela ulertzen ahalko da.
Bederatzigarrena.-Onuradunaren betebeharrak.
1. Planetan sartzen diren eremuak gutxienez ere hamar urtez landaturik egon beharko dute, neurria hartu eta hurrengo kanpainatik hasita.
2. Gutxieneko hamar urteko epean laguntzen onuradunak planetan sarturiko eremuak landatuta eduki beharra betetzen ez badu, eman zaion laguntza itzuli beharko du.
Lurzatian nekazaritzako azpiegituretarako jarduerak egin behar izateagatik laguntza hauek jaso dituen onuradunak ezin badio eutsi hartutako konpromisoari, laguntza kudeatzen duen organoak behar duen informazioa eskatuko dio prozesuaren ardura duen erakundeari, eta, informazio horren arabera ezintasun hori ondorioztatzen bada, onuraduna salbuetsia egonen da eta konpromisoa bukatutzat joko da, jasotako laguntza itzultzea exijitu gabe.
Salbuespena tramitatzeko, onuradunak, erauzketa egiterakoan, organo kudeatzaileari eskatu beharko dio hartutako konpromisotik salbuesteko, justifikatzen duten zioak adierazita.
3. Berregituratu eta moldatzeko planetan sarturiko azalerak transmitituak izan badira, eskuratzailea aurreko paragrafoan aipatutako betebeharrari lotuta geldituko da, onuradunarentzat ezarritako baldintza berberetan, beti ere onuradunak azalera horrek laguntzak jasoak zituela informatu badio.
Hamargarrena.-Diru-laguntzaren helburua bete dela eta hartutako dirua erabili dela frogatzeko epea eta modua.
1. Neurriak bete direla idatziz jakinaraziko da 2010eko maiatzaren 20a baino lehen.
2. Ematen den laguntzaren ondoriozko eskubide eta eginbeharrak subrogatzeko baimena ematen ahalko da, betebehar hauek gertatzen direnean:
a) Ekintza guztiak lurzati berrian egiten direnean.
b) Subrogatu nahi den lurzatiak hasiera batean aintzat hartutakoaren ezaugarri berak edo antzekoak izatea.
3. Mahastizain berri bati subrogazioa baimentzen bazaio, horrek bere gain hartu beharko ditu subrogatutako lurzatietarako laguntza jaso zuen mahastizainak hartutako konpromisoak.
3. Planak aurkeztu eta neurriak ziurtatu bitarte titularraren, lurzatiaren edo laguntza eskaerako lurzatien ezaugarriren batean aldaketaren bat egin behar bada, aldez aurretik interesdunak eskatu beharko du eta Nafarroako Mahastizaintza eta Enologia Zentroaren baimena jaso.
Hamaikagarrena.-Laguntzen ordainketa.
1. Lurzatietan neurriak guztiz hartu direla eta onetsitako planei lotzen zaizkiela frogatutakoan ordainduko dira laguntzak. 2009-2010 kanpainarako, 2010eko maiatzaren 20a baino lehen frogatu beharko da neurriak bete direla.
2. Mahastizainak berregituraketa eta/edo moldaketa laguntzeko eskatu zuen azaleraren %80tan gutxienez ez badu gauzatu, ez du laguntzarako eskubiderik izanen. Era berean, egin ez diren ekintzengatik ez da ordainduko. Mahastizainak laguntzaren xede diren ekintzak ez baditu gauzatzen, arau-hauste arintzat jo eta zehatuko da, mahastizaintza eta ardogintza arautzeari buruzko abenduaren 5eko 16/2005 Foru Legearen 30. artikuluan ezarritakoari jarraikiz.
Hamabigarrena.-Deialdiaren aurkako errekurtso administratiboak.
Deialdiaren eta oinarri arautzaileen kontra gora jotzeko errekurtsoa jar daiteke, Nafarroako Gobernuari zuzendua, argitaratu eta biharamunetik hasita hilabeteko epean.
II. ERANSKINA
Mahastia berregituratu eta moldatzeko kostua
(eurotan, hektarea bakoitzeko)
Erauztea: 421.
Lurzorua prestatzea: 962.
-Landatzea:
Landarea eta landaketa (unitatea): 2,07.
Beste kostu batzuk: 240.
Lantzearen kostua (2 urte): 1.052.
Besora jartzea: 3.500.
Ontzitik besorako mahastira pasatzea (besatarakoa barne): 3.649.
Desinfekzioa: 2.104.
Harriak kentzea: 391.
Lurra berdintzea: 601.
Untxien kontrako babesa: 1.202.
-Oraingo barietatearen gainetik txertatzea:
Txertoa (unitatea): 0,60.
Beste kostu batzuk: 1.202.
Iragarkiaren kodea: F0914800
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
