50. ALDIZKARIA - 2009ko apirilaren 27a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

351/2009 EBAZPENA, martxoaren 4koa, Arriskuen Prebentziorako eta Lanaren zuzendari nagusiak emana, "Fagor Ederlan Tafalla, S.Coop." enpresaren lan hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 21/2009).

Departamentu honetan 2009ko otsailaren 26an sartu da "Fagor Ederlan Tafalla, S. Coop." enpresaren lan hitzarmen kolektiboaren testua, 72 artikuluz, xedapen gehigarri batez, xedapen indargabetzaile batez, azken xedapen batez eta 8 eranskinez osatua, enpresaren ordezkariek eta enpresa batzordeak (LAB, UGT, CC.OO., ELA-STV eta NA) 2009ko otsailaren 19an izenpetu eta onetsi dutena.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluaren bidez eman dizkidaten eskudantziak erabiliz,

EBATZI DUT:

1. "Fagor Ederlan Tafalla, S. Coop." enpresaren lan hitzarmen kolektiboa (kodea: 3108052) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau negoziazio batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Berrikuntza, Enpresa eta Enplegu Departamentuko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2009ko martxoaren 4an.-Arriskuen Prebentziorako eta Lanaren zuzendari nagusia, Imelda Lorea Echavarren.

FAGOR EDERLAN TAFALLA, S. Coop. ENPRESAREN HITZARMEN KOLEKTIBOA 2009-2011 URTEETARAKO

I. KAPITULUA

Xedapen orokorrak

1. artikulua: lurralde eremua eta langileak.

Hitzarmen honek "Fagor Ederlan Tafalla, S. Coop." enpresako langileei eragiten die.

2. artikulua: indarraldia eta iraupena.

Hitzarmen honek hiru urteko indarraldia izanen du. 2009ko urtarrilaren 1ean hartuko du indarra, ondorio guztietarako, eta 2011ko abenduaren 31n bukatuko da, 3. eta 14. artikuluak salbu, hauek urtebeteko indarraldia izanen baitute.

Besterik gabe amaitutzat joko da 2011ko urriaren 1etik aitzina, eta egun horretatik has daiteke beste hitzarmen kolektibo bat negoziatzen.

II. KAPITULUA

Lan araubidea

3. artikulua: lanaldia.

Urtean egin beharreko lan orduak ondoren aipatzen dira, txandakako edo lanaldi etengabeko lanetarako 15 minutuko atsedenaldiak barne direla. Atsedenaldi horiek lanalditzat joko dira eta beraz pagatu eginen dira.

2009an: 1.688 ordu.

Komeni zaielako edo onuragarriago egiten zaielako, eskuarki, aldi baterako edo betiko, legez etengabetzat jo behar diren lanaldi mota bereziak egitea eskatu eta baimentzen zaien langileek ezin izanen dute eskatu atsedenaldia pagatu dakiela eta ez zaie kontatuko lanaldia izanen balitz bezala. Baimen hori batzuetan emanik ere, ez da behin ere eskubidetzat hartuko, kontrakoa espresuki itundu ezik.

4. artikulua: lan egutegia eta ordutegia.

Enpresako zuzendaritzak finkatuko ditu lan ordutegiak eta egutegiak, legeak ematen dizkion eskudantziak erabiliz, langileen legezko ordezkarien eta ordezkari sindikalen esku-hartzearen ondoren.

Bai zuzendaritzak bai langileen ordezkariek irizpide nagusitzat onartuko dute, lan egutegiak zehazteko orduan, bezeroen beharrak ahalik ongien ase ahal izatea.

Enpresako zuzendaritzak, jaien egutegi ofiziala Nafarroako Aldizkari Ofizialean argitaratu eta hilabeteko epean, eta Enpresa Batzordeari kontsulta egin ondoren, lantegia irekitzeko egunen urteko egutegia eta langile guztien lan egutegiak finkatuko ditu. Gutxienez ere, lan orduen taula eta opor kolektiboak hartzeko egunak ageriko dira egutegian.

Aurreko lerroaldeetan adierazitako epeak iraganik, lan ordutegia eta egutegia goian azaldu den bezala ezarri gabe badaude enpresako zuzendaritzaren ekimen faltagatik, Enpresa Batzordeak hurrengo hilabetean zilegi izanen du nahi duen egutegia finkatzea, betiere urteko ordu kopurua errespetatuz.

Enpresako zuzendaritzak lan egutegi eta ordutegiak finkatu eta gero urteko lanaldian aldaketak gertatzen badira, hilabeteko epean enpresako zuzendaritzak egutegi eta ordutegi horietan beharrezko doikuntzak eginen ditu, Enpresa Batzordeari kontsulta egin ondoren.

Egutegian "lantegia irekitzeko egunak" ezarriko dira, urteak dituen egunei larunbatak, jaiegunak, igandeak eta oporretako 20 lanegun kenduta, bai eta abenduaren 24a eta 31 ere, larunbat edo igande ez badira.

Langileek urtean zenbat egunetan lan egin behar duten zehazteko, zatiketa hau eginen da: urteko lan orduak zati eguneko lanaldiak dituen 8 orduak.

"Egun soberakinak" (lantegia irekitzeko egunen eta lanegunen arteko kendura) eta norberak aukeratu beharreko bi opor egunak egutegian sartuko ditu zuzendaritzak eta kasu bakoitzean jakinaraziko dizkie langileei 30 egun lehenago, gutxienez; eta banaka edo taldean aplikatu ahal izanen dira, produkzio beharren arabera.

Abenduaren 24a eta 31 ez dira lanegun izanen.

5. artikulua: produkzio lanak lanegun ez diren egunetan eta asteburuetan.

1. Beharrak.

Lanegun ez diren egunetan gerta daiteke produkzio lanak egin behar izatea, itoguneek edo puntako produkzio aldiek sortzen dituzten behar objektiboei erantzuteko.

Lan horiek ahalik gehien murriztuko dira eta, arau orokor gisa, instalazioak astelehenetik ostiralera lanez gainezka egon ondoren baizik ez dira eginen.

Egoera bereziak gertatzen direnean, Enpresa Batzordeari jakinaraziko zaizkio lehenbailehen.

2. Borondatezkotasuna. Aurreabisua.

Lanegun ez diren egunetan lan egitekotan, norberaren borondatez eginen da. Funtzionatzen ari diren instalazioak zaindu behar dituzten Mantentze Lanetako langileei ere arau bera aplikatuko zaie.

Lanegun ez diren egunetan lan egiteko boluntarioen falta saihesteko, "itogune" den instalazio bateko ohiko plantillaren barnean behar adina langile prestatuko dira haien ordez aritu ahal daitezen.

Halaber, bost egun lehenago emanen da lanegun ez diren egunetan lan egiteko aurreabisua.

Bestalde, azpikontraten bitartez egiten diren lanen berri emanen da.

3. Asteko konpentsazio-atsedenaldiaren aplikazioa.

Asteko konpentsazio-atsedenaldiaren sistemako atseden eguna, egutegian sartuta ez badago, lanegun ez den egun batean lan egin eta hurrengo astean hartu beharko da, arau orokor gisa.

Aurrekoa gorabehera, eta produkzio lanak alde batera utzita, antolaketa egokiaren barnean eta segurtasuna, kalitatea, produktibitatea eta bezeroentzako zerbitzua behar bezala bermatuta, asteko konpentsazio-atsedenaldiko egunak metatzea hautatu ahal izanen da, ondoko irizpideei eutsiz:

3.1. Gehienez bost atseden egun metatu ahal izanen dira, eta beti beteko dira hurrengo baldintzak.

3.1.1. Metaturiko egunak batera edo partzialki hartu ahalko dira (betiere lanaldi osotan).

3.1.2. Behin bost egunak metaturik, guztiak edo batzuk hartu beharko dira bost aste iragan baino lehen.

3.1.3. Asteko konpentsazio-atsedenaldiko egun horiek ezin zaizkie oporrei batu. Hala ere, salbuespen gisa, banaka aurkeztutako kasuren bat aztertu ahalko da.

3.1.4. Produkzio atal guztiak instalazio, fabrikazio-lerro, zelula, lantalde eta abarretan antolatuta daude, eta horiek espezializazio desberdinak dituzte eta balioaniztasun maila jakinak. Horregatik atsedenaldiak ezin izanen dira taldean hartu, baizik eta jarraian ezartzen diren muga generikoen barnean:

3.1.4.1. Moldekatzailetza: langile batek zelula eta egun bakoitzeko, 3 erreleboen artean banatuak.

3.1.4.2. Galdatzea: langile batek errelebo bakoitzeko.

3.1.4.3. Moldegintza: langile batek instalazio eta errelebo bakoitzeko.

3.1.4.4. Akaberak: langile batek lantalde homogeneo eta egun bakoitzeko, 3 erreleboen artean banatuak.

3.1.5. Instalazio, lerro, zelula, talde... berean asteko konpentsazio-atsedenaldirako eskaerak eta bestelako atsedenaldietarako eskaerak batera gertatzen badira, langileak ados jartzen saiatuko dira, eta, adostasunik ezean, lehentasun hauek izanen dituzte:

1. Oporrak eskatu dituena.

2. Asteko konpentsazio-atsedenaldia eskatu duena.

3. Enpresan antzinatasun handiena duena.

3.2. Egunak metatzen diren kasuetan, atsedenaldia noiz hartu nahi den, eskaera aurreko astean egin beharko da, osteguna baino lehen.

3.3. Asteko konpentsazio-atsedenaldiko egunak, arau orokor gisa, lanak egin diren urte natural berean hartuko dira.

3.4. Produkzio arrazoi objektiboak direla eta, kargudunaren nahiz langilearen ekimenez, bien arteko adostasuna dela medio, egunak aurretiaz hartu ahalko dira, aldi bakoitzean 3 egun, gehienez ere, aldez aurretik itundutako lanak egiteagatik lanegun ez diren egunetan.

3.5. Nolanahi ere, kasuan kasuko kargudunaren adostasuna behar da asteko konpentsazio-atsedenaldia hartu ahal izateko.

3.6. Atseden egun horiek egutegian sartuak (oporrak, laugarren erreleboa, egun soberakinak etab.) dituzten langileek lehentasuna izanen dute egutegian sartuta ez dauden asteko konpentsazio-atsedenaldien aldean eta, beraz, ez zaie araudi hau aplikatuko.

6. artikulua: txandakako lanaren baldintzen funtsezko aldaketa.

1. Beharrak.

Txandakako lanaren baldintzen funtsezko aldaketa egitea (Langileen Estatutuaren 41.1.c artikulua), hau da, laugarren erreleboa duten sistemak edo gisako beste sistema egituratu batzuk ezartzea, bidezkoa izanen da zenbait instalazio edo zerbitzuk lanegun ez diren egunetan eta asteburuetan lan egin beharra dutenean sistema antolatu eta egituratu baten pean, astelehenetik ostiralera bitarteko 3 txandako sistema arruntetik kanpo.

Sistema egituratutzat har dadin, langile bakoitzak bere lan eta atseden egunak zehazturik izan behar ditu eta hitzarmen kolektiboan itundutako ordu kopurua egin behar du.

Hona hemen behar horiek justifikatzen dituzten inguruabar ohikoenak:

1. Instalazioetako lana gehitzea

2. Itoguneak

3. Instalazioetako mantentze lanak

4. Guardiak instalazioetan edo beste lanpostu batzuetan

2. Ezarpena. Aurreabisua.

Txandakako lanaren baldintzen aldaketa dakarren edozein ezarpenetarako, aurreabisua eman beharko zaie, 15 egun lehenago, interesdunei eta Enpresa Batzordeari.

Instalazio batean txandakako lanaren baldintzak urtean lehenbiziko aldiz aldatzen direnean, zuzendaritzak aldaketa jakinarazi eta horren beharra justifikatuko du.

Urte berean eta instalazio berean aldaketak egiteko hurrengo proposamenetarako, beharrezkoa izanen da zuzendaritzaren eta Enpresa Batzordearen arteko adostasuna.

3. Egutegiak eta iraupena.

3.1. Egutegiak.

Lanegunen eta lanik gabeko egunen egutegiak egiterakoan kontuan hartuko dira langileen kontu pertsonaletarako mesedegarriak izan daitezkeen inguruabarrak, eta horiek antolamenduaren ahalbideekin uztartu beharko dira, lana behar adinako bermeekin egin dadin.

Horretarako, egutegien gaineko kontsultak eginen dira eta konponbiderik onenak bilatuko dira.

Azken finean atalburuak erabakiko du konponbidea.

3.2. Iraupena:

Aldatzen ahal diren txanden gutxieneko iraupena hilabetekoa izanen da.

7. artikulua: testurik gabe.

8. artikulua: mantentze lanak eta guardiak lanegun ez diren egunetan eta asteburuetan (akordioa erantsi da).

1. Mantentze lanak lanegun ez diren egunetan eta asteburuetan.

1.1. Beharrak:

1.1.1. Bi aldeen iritziz, asteburu eta jaiegunetan instalazioetako mantentze lanak eta konponketak egitea bidezkoa da teknikaren eta antolaketaren aldetik, hurrengo arrazoiak direla eta:

-Instalazio batzuetan konponketak ezin dira produkzio prozesuan egin eta instalazioak gelditu arte itxaron behar da.

-Zerbitzu Orokorretako prebentziozko mantentze lana (mekanikoa, elektrikoa, ura etab.) ezin da astegunetako lanaldi arruntean egin, produkzioaren sektore garrantzitsuetan geldialdiak egin behar liratekeelako.

-Zenbait instalaziok, lanean ari direla, konpontzaileentzako lan baldintza txarrak eta istripu arriskuak sortzen dituzte.

1.1.2. Arrazoi horiek kontuan izanik, asteburuetan behar diren mantentze zerbitzuak egitea bermatuko da eta asteko konpentsazio-atsedenaldiaren sistema aplikatuko da.

1.1.3. Mantentze lanen plangintzaren arduradunek antolatuko dituzte asteburuetan egin beharreko lanak, atalburuak gainbegiraturik. Arau orokor gisa, instalazioetako mantentze lanak larunbat goizetan eginen dira, betiere asteko egun horietan produkzio lanik egiten ez bada.

1.1.4. Mantentze lanak behar bezala egin ahal izateko beharrezkoa bada lehenago beste lan batzuk egitea, ez da aurreko arau hori aplikatuko.

1.1.5. Asteburuetako mantentze lanak plantillako mantentze zerbitzuko langileek berek eginen dituzte, arau hauetan atal eta lan-araubide bakoitzerako adierazten den moduan.

1.2. Parte-hartzaileak, borondatezkotasun irizpideak:

1.2.1. Beti bermaturik egonen da egin beharreko lanak langile egokiek eginen dituztela. Horretaz gain, arau orokorraren salbuespen gisa, borondatezkotasun irizpide hauek ezarri dira aldeen arteko adostasunez:

1.2.2. Mantentze Lanen Atala:

-Behar diren kontsultak eginen zaizkie langileei, asteburuetako lanak egiteko prest dauden langileek izena eman dezaten.

-Borondatezko langile horiek, zein lanetarako eman duten izena, huraxe egin beharko dute.

-Lehentasun hauek ezarri dira:

a) Lehendabizi arratsaldeko erreleboko borondatezko langileekin beteko dira beharrak. Asteburu bakoitzean egin beharreko lanetarako lanbide espezialitate egokia dutenak hartuko dira.

b) Langile gehiago behar izanez gero, asteburuetako lanak egiteko izena eman duten goizeko erreleboko langileengana joko da, lanbide espezialitate egokia dutenengana, hain zuzen ere.

c) Hala ere langile gehiagoren beharra badago, arratsaldeko erreleboko langile egokiek egin beharko dituzte lanak nahitaez.

d) Aurreikusitako lanak egiteko prest dauden langileak behar direnak baino gehiago izanez gero, langile horien arteko txandaketa egokia ezarriko da.

e) Mantentze Lanen Atalean, besteetan ez bezala, arau orokorra da jaiegunetan lanik ez egitea. Hala ere, egun horietan premia larriak sortzen direnean borondatezko langileak hartuko dira plantilla betetzeko.

1.2.3. Produkzio ataletako langileek egin beharreko mantentze lan osagarri eta lagungarriak.

-Hitzartu da, arau orokor gisa, atal bakoitzeko langileek egin beharko dituztela asteburuetan egin beharreko lanak (garbiketak, automantentze lanak...)

-Atal bakoitzean boluntarioak eskatuko dira, mantentze lanetarako goian ezarritako prozedura berari jarraituz.

-Era berean, izena emandako langileak aski ez badira, arratsaldeko erreleboko langileek beteko dute plantilla nahitaez.

1.3. Asteko konpentsazio-atsedenaldiaren aplikazioa:

1.3.1. Mantentze lanetako langileek atseden egunak metatu ahal izanen dituzte, bost egun gehienez ere, eta lehentasunez hurrengo bost asteen barnean hartuko dituzte.

1.3.2. "Antolatzeko malgutasun" nahikoarekin erabiliko da irizpide hori, eta gainera bateragarria izanen da mantentze zerbitzu arruntak bete beharrarekin.

1.3.3. Atal honetan aipatzen den "antolatzeko malgutasuna" terminoaren eduki arauemailea hitzartu da, ongi interpretatu eta aplikatu dadin. Hona hemen:

a) Behar diren lanak egitea bermatuta baldin badago, langileek, banaka, etorri behar luketen egun jakin batean ez etortzeko eskatu ahalko dute. Ahal dela, ordezko pertsona egoki bat proposatuko dute egun horretan lan egitea ez dagokien langileen artetik.

b) Kargudunek eskuarki baimena emanen diete, aurreko premisak kontuan izanik.

c) Familia edo gizarte arazoengatiko proposamenak izan beharko dute, eta baztertu eginen dira behin eta berriz azaltzen diren kasuak.

d) Langileak bere ordezko boluntariorik proposatu ezean, kargudunek absentzia betetzeko egokia den hurrengo boluntarioa izendatuko dute. Halakorik ezean, arratsaldeko erreleboko hurrengo langile behartua izendatuko dute (lana larunbat goizean egitekoa bada).

e) Atsedenaldia zein astetarako eskatzen den, aurreabisua aurreko asteko ostegunean egin beharko da beranduenez.

2. Aste Santuko lanak.

Aste Santuan ohiko asteburuetan baino lan gehiago egin beharra badago, borondatezko langileek eginen dute lan soberakina.

Soberakin horretarako boluntarioak aski ez badira, azpikontratetara joko da.

3. Mantentze lanetako langileen guardiak lanegun ez diren egunetan eta asteburuetan.

3.1. Beharrak

3.1.1. Elektrizitate eta iturgintzako mantentze lanetako guardiak egin behar dira, arrazoi hauek direla eta:

-Lanegunetatik kanpo lantegian gerta daitezkeen larrialdiei azkar aurre egiteko zerbitzu baten beharra dago.

-Urte osoan etenik gabe funtzionatu behar duten instalazioetan lanegunetatik kanpo gerta daitezkeen arazoak konpontzeko talde tekniko baten beharra dago. (Mantentze labeak, tratamendu labeak, hozteko instalazioak, instalazio elektrikoak...).

3.1.2. Arrazoi horiek kontuan izanik, guardiako zerbitzuak bermatu eginen dira Mantentze Lanen Ataleko ofizialen borondatezko konpromisoarekin.

3.1.3. Guardiako zerbitzu hori ezartzeko beharrezkoa den gutxieneko konpromiso hau ezarri da:

-3 iturgin-ofizial.

-4 argiketari-ofizial.

3.2. Parte-hartzaileak, borondatezkotasun irizpidea.

a) Ataleko boluntarioek osatuko dute mantentze lanetako guardiako taldea. Lantegitik hurbileko herrietan bizi diren langileak izanen dira.

b) Guardiako zerbitzuetan aritu ahal izateko, langileak aipatu instalazioetako alderdi teknikoak eta segurtasunekoak ezagutzen dituela egiaztatu behar da.

c) Urtero, aurkezten diren boluntarioekin, guardiako egutegia eginen da astegun ez diren egunetarako eta asteburuetarako, txandaka.

d) Boluntariorik ez bada, guardiak nahitaez egin beharko dituzten langileak izendatuko dira.

3.3. Mantentze lanetako guardia sistemak lanegun ez diren egunetan eta asteburuetan.

3.3.1. Guardiako zerbitzuek larrialdiei erantzunen diete lanik gabeko aldietan, mantentze zerbitzuko gainerako langileak ez daudenean.

3.3.2. Guardiako zerbitzuan dauden langileek enpresaren telefono mugikor bana izanen dute, berehala aurkitu ahal ditzaten.

3.3.3. Guardiako taldearen telefono mugikorrak mantentze lanen plangintza bulegoan egonen dira eskura, eta ofizial bakoitzak haietako bat hartu beharko du guardiako zerbitzuari ekin aurretik.

3.3.4. Atezaintzaren abisua jaso eta gero, guardiako zerbitzua egiten ari den ofizialak lantegian agertu beharko du lehenbailehen, 30 minuturen buruan gutxi gorabehera.

4. Mantentze lanak oporraldi kolektiboetan.

4.1. Langile beharrak:

4.1.1. Urtero, enpresaren beharren arabera, oporraldi kolektiboetan lan egin beharko duten mantentze lanetako ofizialen kopurua ezarriko da, aurreikusten diren lan guztiak eginen direla bermatzeko.

4.1.2. Langile beharrak errelebo guztietako boluntarioekin beteko dira.

4.1.3. Behar guztiak asetzeko nahikoa boluntario ez badago, plantillako beste langile egoki batzuk izendatuko dira nahitaez lan egiteko.

4.2. Abuztuko herriko jaiak.

4.2.1. Oporretako edo asteko konpentsazio-atsedenaldiko 2 egun hartu ahal izanen dira, eta bi egun gehiago, inolako konpentsaziorik gabe berreskuratu beharko direnak abuztuko larunbatetan.

5. Lanaldia luzatzea.

5.1. Lanaldiaren luzapenak 10 ordutik gorako lanaldien kasuak biltzen ditu.

5.2. Bazkaltzeko 45 minutu hartuko dira gehienez, eta denbora hori lanalditzat hartuko da.

5.3. Lan denboraz gainera, dieten artikuluan bazkarirako ezarritako diru kopurua ordainduko da.

5.4. Enpresatik kanpo bazkaltzen dutenek fitxatu egin beharko dute sartu-irtenetan.

5.5. Instalazioak konpondu ezean geldialdiaren arriskua badago, langileek konponketak amaituta utzi beharko dituzte, eta inguruabar hori hondamendi arriskua saihestu beharrarekin parekatuko da, lanaldia luzatzeari dagokionez.

5.6. Zuzendaritzak konpromisoa hartzen du, bere kargudunen bitartez, instalazioen geldialdia saihesteko konponketak amaitu beharra dagoenean bakarrik luzatu beharko dela lanaldia.

9. artikulua: gainjartzea.

Langile guztiek beren lanpostuetan egon behar dute beren lanaldiaren hasiera ordutik amaiera ordura arte. Arau zorrotz horren salbuespen gisa, produkzio makinetan txandaka ari diren langileek lanaldiaren amaiera aurreratu ahalko dute, gehienez ere 10 minutu lehenago bukatuz, baldin eta hurrengo txandako langileak tarte horretan lanaren ardura hartzen badu. Horrek ez du inoiz ekarriko lehenbizikoari soldatan deskontua egin eta bigarrenari aparteko orduak ordaintzea.

Produkzioaren ardura duen kargudunak zehaztuko du, kasuan kasuko inguruabarren eta makinen arabera, aurreko paragrafoan azaldutakoa noiz egin ahalko duten produkzio makinetako langileek.

Ordezkoa garaiz agertzen ez bada, lanean ari den langileak ezin izanen du lanpostua utzi kargudun hurrenari jakinarazi gabe. Kargudunak, ordu erdiko epean, konponbidea bilatu eta ukitutako langileari irteteko baimena eman beharko dio. Lanaldiaren luzapen hori ordaindu eginen da lanaldi soberakinetarako indarra duen araudiari jarraituz, ezertan eragotzi gabe berandu iritsi den edo agertu ez den langileari legokiokeen zehapena.

10. artikulua: oporrak.

Hitzarmen honen indarraldian erregelamenduzko opor ordainduak 30 egun naturalekoak izanen dira, horietatik 22 lanegun eta 4 larunbat, nahitaez.

Oporretako lanegun horietako bi, langileek nahi dutenean hartuko dituzte.

Urteko egutegian opor kolektiboetarako eta, ondorioz, lantokia ixteko ezarritako egunak enpresaren beharrengatik aldatzen badira, ukitutako langileek opor egun bat gehiago hartzeko eskubidea izanen dute.

Lanaren Nazioarteko Erakundearen 132. Hitzarmenean ezarritakoaren arabera, istripuek, gaixotasunek edo amatasunak eragindako absentziak lanalditzat hartu behar dira opor egunak kontatzeari eta hartzeari dagokionez.

Oporrak hartzeko adierazitako egunean enpresaren plantillan urtebete egin gabe dauden langileek zerbitzualdiaren araberako egun kopurua hartuko dute, eta lan egin behar duten egunetan beren lanbide maila gutxiesten ez duten lanak esleitu ahal izanen zaizkie. Lanik esleitzen ez bazaie ere, dagozkien ordainsari guztiak kobratuko dituzte.

Oporraldian langileari aldi baterako ezintasun egoera suertatzen bazaio, oporraldia eten eginen da, egoera horrek irauten duen artean. Etenaldi horretako opor egunak medikuak alta eman bezain laster hartuko dira.

Eskulangileen lanbide talde eta kategorietarako eta enplegatuen mailetarako itundutako ordainsariak kobratuko dira oporretan, erantsita dauden ordainsari tauletan ageri direnak, hain zuzen ere, H zutabekoak eskulangileentzat eta D zutabekoak enplegatuentzat.

Prima kobratu ohi duten langileek aurreko hiru hilabeteetako lanegunetako batez besteko jardueraren araberako kopurua kobratuko dute oporretan.

Oporretako ordainsariak enpresan ohikoak diren moduan eta egunetan kobratuko dira.

Betiere, enpresako zuzendaritzak oporraldietan enpresaren zenbait behar betetzeko langileak izendatu ahal izanen ditu, eta oporrak hartzeko egun egokienak interesdunekin itunduko ditu, banaka edo taldean. Aldaketa horrek ez du inolako atsedenaldi edo ordainsari osagarririk ekarriko.

11. artikulua: lizentzia ordainduak.

Lizentzia ordainduak artikulu honetan zehaztu bezala hartu eta pagatuko dira.

Interesdunaren lan egutegiko egiazko lanegunak diren egun lizentziadunak pagatuko dira.

Enpresak kasu hauetan eta Langileen Estatutuan aipatzen diren kasuetan onartuko ditu lizentzia pagatuak, aldez aurretik jakinarazirik eta arrazoiak emanik. Lanegunei dagokien egiazko lansaria eta, bidezko denean, antzinatasuna pagatuko dira; ez ordea ekoizpen primak, oporrak eta eskersariak.

Lizentzia horiek horietarako bide eman duen gertaera gertatzean hartu beharko dira.

a) Ezkontzeagatik, 18 egun naturaleko lizentzia ordaindua, luza daitekeena, gehienez ere, beste 10 egun naturaleko ordaindu gabeko lizentziarekin.

Lizentzia hau ezin izanen da osorik ez hein batean irentsi, oporraldiarekin bat egiteagatik.

b) Erditu baino lehenagoko osasun azterketengatik eta erditzea prestatzeko teknikengatik. Horiek egiteko behar-beharrezkoa den denbora, lanaldian egitekoak badira.

c) Haur baten jaiotza: 3 egun (horietarik 2 lanegun, gutxienez) eta 2 egun gehiago, horiek ere pagatuak, zesarea bidezko erditze kasuan.

d) Bigarren gradura arteko odol edo ezkontza ahaidetasuneko ahaideen istripuagatik, eritasun larriagatik edo ospitaleratzeagatik: elkarren segidako 2 lanegun edo 4 lanaldi erdi.

Eritasun larriak iraunez gero:

-Beste lizentzia ordaindu bat hartzeko eskubidea izanen da, denbora berekoa, ezkontideari edo langilearekin bizi diren seme-alaba, guraso edo anai-arrebei badagokie, lehen lizentzia hartzen denetik elkarren segidako hogeita hamar egun pasa ondoren. Kasu horretan ez da luzatuko joan-etorriagatik.

-Eskubidea izanen dute elkarren ondoko lizentzia ordaindugabeak hartzeko, kasu beretan eta denbora berean, aurrekoa bukatzen denetik elkarren segidako hogeita hamar egun pasa badira. Kasu horretan ere ez da luzatuko joan-etorriagatik.

Atal honen ondorioetarako, eritasun larritzat joko da dagokion medikuak horrela kalifikatutakoa, bai hasierako ziurtagirian edo aldeetariko batek geroztik eskatuta ere. Zalantzarik izanez gero, Interpretazio Batzorde Mistoak irizpena emanen du, honako irizpide orientatzaileak oinarri hartuta: ospitaleratu beharra, ospitaleratzearen iraupena, nolabaiteko garrantzia duen ebakuntza, laguntzailea izateko premia, eta abar.

e) Arestian aipatu ahaideen heriotzagatik: 3 egun natural.

Lizentzia hori ez da irentsiko oporrekin edo langilearen ezkon-lizentziarekin batera hartzen bada.

f) Gurasoen, seme-alaben edo anai-arreben ezkontzagatik: egun natural bat.

g) Ohiko bizilekua aldatzeagatik: egun natural bat.

h) Langilea Gizarte Segurantzako mediku espezialisten kontsultara joateagatik: behar den denbora, kontsultako ordutegia lanaldiarekin bat badator eta orotariko medikuntzako sendagileak agintzen badu. Horretarako langileak aldez aurretik agindu medikoaren ziurtagiria aurkeztu beharko dio enpresaburuari. Gainerako kasuetan, adibidez, Gizarte Segurantzako familiako medikuaren (orotariko medikuntzako sendagilearen) laguntza medikorako, edo mediku partikularrak emandako laguntza, urtean 16 ordura bitarte, pagatuak, horiek ere behar bezala arrazoituak.

i) Bederatzi hilabetetik beherako haurrari bularra ematen dioten emakumezko langileek eskubidea izanen dute lanetik ordubetez lekutzeko. Denbora hori bi zatitan bana dezakete. Emakumezko langileak eskubide hori ohiko lanaldiaren ordu erdiko murrizketarekin trukatu dezake, hala nahi badu, helburu berbererako. Baimen hori amak nahiz aitak hartzen ahal dute, beren nahierara, biak lanean ari badira.

j) Publikoa edo pertsonala den eginbehar saihestezina betetzeko: behar-beharrezkoa den denbora, boto ematekoa barne. Aldi bat lege bidez edo hitzarmenen bidez ezarritako arau batean jasota dagoenean, absentziaren iraupenari eta diru-ordainari dagokienez arau hartan xedatutakoari jarraituko zaio.

Goian aipatu den eginbehar hori betetzeagatik hiru hilabeteko tartean lanorduen %20 baino gehiagotan ezin izan bada egin beharreko lana bete, enpresak eszedentziara pasa dezake langilea, lanari buruz indarra duen arauan ezarri bezala.

Langile batek, eginbeharra betetzeagatik edo karguan jardun beharragatik, kalte-ordaina kobratzen badu, diru kopuru horixe deskontatuko zaio enpresak pagatu ohi dion soldatatik.

c), d) eta e) kasuetan, joan-etorria 150 kilometro baino gehiagokoa baldin bada, hiru egun natural gehituko dira.

d), e) eta f) ataletako lizentziak hartzeko, gradu bereko ezkon-ahaideek ere eskubide bera sortzen dute.

Langilea lan ordutegian ari dela eta hartzeko eskubidea sortzen duen egoeraren bat jakinarazten zaionean, irizpide honi atxikiko zaio:

-Jakinarazpena eta horretarako gertaera lanaldiaren erdia pasa baino lehen gertatuz gero, eskubidea izanen du egiazki eginiko orduak kobratzeko eta gainera ondorio guztietarako egun hori baimen ordainduko egun osotzat hartuko da.

-Jakinarazpena eta horretarako gertaera lanaldiaren erdia pasa ondoren gertatuz gero, eskubidea izanen du egiazki eginiko orduak kobratzeko eta lanaldiko beste orduak baimen ordaindukoak izanen balira bezala pagatuko dira. Ordu horiek ez dira lizentziatzat joko.

-Gertaera hori lanegunetan gertatu ezik, 12:00ak baino lehen gertatuz gero egun hori osorik kontatuko da eta ez da kontatuko ordu horren ondoren gertatuz gero.

Artikulu honetan aipatzen ez diren lizentzia ordaindu guztiak indarra duten arauetan xedaturikoarekin bat osatuko dira.

Lizentziei dagokienez, ezkondu gabeko bikoteak osatzen dituztenek eskubide berberak izanen dituzte, kasuan kasuko erregistroko ziurtagiriaren bidez egoera hori frogatuz gero.

12. artikulua: ordaindu gabeko baimenak.

Langile guztiek eskubidea izanen dute ordaindu gabeko 3 egun hartzeko urtean beren aferetarako, zuzeneko kargudunari behar beste denbora lehenago aurreabisua emanda, ordezkoa bilatu eta produkzioa antolatzeko arazorik izan ez dadin. Behar bezala justifikatu eta onartutako kasuetan salbu, baimen horiek ez dira oporraldien aurre-aurreko edo ondo-ondoko egunetan hartuko, ez eta atal bereko taldeetan edo modu kolektiboan ere.

Baimena hartzeko eskabidean adierazten bada artikulu honetan ezarritako baimena hartu nahi dela eta hemen eskatzen diren gainerako baldintzak betetzen badira, ez da inolako deskonturik eginen aparteko eskersarietan eta oporretan.

13. artikulua: eszedentziak.

Amatasunagatiko eszedentziak Langileen Estatutuaren 46.3 artikuluan ezarritakoaren bidez arautuko dira enpresan.

Aitak eta amak enpresan lan egiten badute, haietako batek bakarrik eskatu ahalko du eszedentzia hau.

Eszedentzia emanen zaie enpresan gutxienez urtebeteko antzinatasuna duten langileei, eta lehengo lanpostua edo antzekoa gordeko zaie edo hara besterik gabe itzultzeko eskubidea izanen dute, ondoko baldintza hauek betetzen badira, betiere:

a) Eszedentzia eskatzeko arrazoiek familiarekin, ikasketekin edo antzekoekin zerikusirik izatea.

b) Eszedentzia ez dadila sei hilabetekoa baino luzeagoa izan.

c) Era horretako eszedentzia eskatu dutenak ez daitezela, aldi berean, plantillaren %2 baino gehiago izan.

Eszedentzia emanen die enpresak, halaber, enpresan gutxienez urtebeteko antzinatasuna duten langileei, eta lehengo lanpostua edo antzekoa gordeko zaie edo hara besterik gabe itzultzeko eskubidea izanen dute, ondoko baldintza hauek betetzen badira, betiere:

a) Eszedentzia eskatzeko arrazoia izan dadila lanbide heziketako ikasketak edo birziklatzea egitea, ondoren enpresan bertan aritu ahal izateko.

b) Eszedentzia ez dadila urtebetekoa baino luzeagoa izan, non eta alderdiek besterik adosten ez duten.

c) Era horretako eszedentzia eskatu dutenak ez daitezela, aldi berean, plantillaren %2 baino gehiago izan.

d) Eszedentzia mota hori ez dagokie, besterik adosten ez den bitartean, enpresako zuzendaritzako kideei eta kargudunei.

Gainerako eszedentziei dagokienez, indarra duen legeria izanen da aplikatzekoa.

Zuzendaritzak hitz ematen du kasuz kasu ebatziko dituela lanarengatiko eszedentziak, inguruabarren arabera aurkezten direnean.

III. KAPITULUA

Araubide ekonomikoa

14. artikulua: ordainsariak.

Ordainsariak honelaxe gehituko dira:

2009an: %0.

Atezainen sariak 72 Bedaux primaren ordez 78 Bedaux primari dagokion zenbatekoa kontuan hartuz gaurkotuko dira.

Argileen sariak 82 Bedaux prima bitarteko zenbatekoa kontuan hartuz gaurkotuko dira.

Eskulangileen kategoria eta talde bakoitzerako 2009. urteko lansari eta ordainsari gordinak "J" zutabean edo geroan haren baliokidea izanen den zutabean adierazitakoak izanen dira, lansari taula erantsietan. Oinarrizko lansaria, taldearen osagarria, oporrak eta aparteko bi eskersariak bilduko dituzte.

Enplegatuen kategoria eta maila bakoitzerako 2009. urteko lansari eta ordainsari gordinak "F" zutabean edo geroan haren baliokidea izanen den zutabean adierazitakoak izanen dira, lansari taula erantsietan. Oinarrizko lansaria, norberaren osagarria, oporrak eta aparteko bi eskersariak bilduko dituzte.

Ordainsari horiek hitzarmen honetako urteko lanaldiari dagozkio.

Enpresako hitzarmenaren indarraldiko urte bakoitzerako hitzarturiko orduak urteko egutegi ofizialean ezarririko lanegunekin zatituz ateratzen dena da ohiko lanaldia. 2001ean 273 lanegun izan ziren.

Enplegatuen hileroko soldata osoa eta eskulangileen ordutegiko lansari osoa ordainsarien taula erantsietan adieraziko dira eta bertan soldata edo lansariaren zati proportzionala, legez edo nahita ezarririko atsedenaldiei (igandeei eta edozein jaieguni) dagokiena, sartua dago. Izan ere, horrelaxe hartu da kontuan kasuan kasuko kalkuluak egiterakoan, erraztasun administratibo handiagoa lortzearren.

15. artikulua: konpentsazioa eta irenspena.

Hitzarmen honetan finkatutako baldintza ekonomikoak eta lanaldiari buruzkoak irentsi eta konpentsatu egiten dituzte lehendik dauden mota guztietako hobekuntzak, hitzarmen honetan espresuki zehazten diren salbuespenak izan ezik.

16. artikulua: asteko konpentsazio-atsedenaldiaren ordainketa sistema.

1. Asteko konpentsazio-atsedenaldiaren %100arekin ordainduko dira baldintza hauetan ondoko kasuetan egiten diren orduak:

-Produkzioa.

-Mantentze lanak.

-Galdatzaileen guardiak.

-Gaueko orduak (gainera, enpresan ezarrita dagoen gaueko lanaren plusa kobratuko da).

2. Asteko konpentsazio-atsedenaldiaren %90arekin ordainduko dira baldintza hauetan ondoko kasuetan egiten diren orduak:

Gainerako orduak, aurreko atalean sartu ez direnak.

3. Ateratzen diren kopuruak honela banaturik kobratuko dira:

3.1 Jaiegunetan egindako orduengatik ordainsari bikoitza kobratuko da, lan egiten den egunekoa eta atseden egunekoa.

3.2. Lan egiten den eguneko orduengatik prezio arrunta kobratuko da, gehi prima eta plusak, halakorik bada.

3.3 Atseden eguna, berriz, asteko konpentsazio-atsedenaldiaren plusarekin ordainduko da. Horren balioa kalkulatzeko kenketa hau eginen da: jaiegunetako aparteko orduaren balioaren %100 ken jada prezio arruntean ordaindutakoa.

3.4. Astegunetan asteko konpentsazio-atsedenaldiaren araubidean egindako orduei aplikatu beharreko lansari sistema asteburuetako lanetarako adierazitakoa bera izanen da, kalkulua izan ezik, hau lanegunetako aparteko orduen balioan oinarrituta eginen baita.

17. artikulua: oinarrizko lansaria.

Eskulangileen kategoria bakoitzerako ordainsarien taula erantsietan ("A" eta "D" zutabeak) ageri dena izanen da.

Enplegatu eta teknikarien kategoria bakoitzerako ordainsarien taula erantsietan ("A" zutabea) ageri dena izanen da.

18. artikulua: sailkapen taldearen eguneko eta orduko osagarria.

Eskulangileen kategoria bakoitzerako ordainsarien taula erantsietan ("B" eta "E" zutabeak) ageri dena izanen da.

19. artikulua: norberaren hileko osagarria.

Enplegatuentzako osagarri hau kategoria eta maila bakoitzerako ordainsarien taula erantsietan ("B") ageri dena izanen da.

20. artikulua: Antzinatasuna.

Hitzarmen honetako langileek aldian behin ordainsari igoerak izanen dituzte zerbitzu urteengatik. Hain zuzen ere bosturtekoak ordainduko zaizkie, kasuan kasuko kategoriako oinarrizko lansariaren %5 bosturteko bakoitzeko.

Langileen antzinatasuna kalkulatzeko ondoko arauak erabiliko dira:

a) Langilea enpresan hasi zen eguna hartuko da hasierako datatzat, izangai, ikastun edo mandatugile aldia ere kontuan hartuta.

b) Aldiroko soldata igoerei begira antzinatasuna kalkulatzeko, kontuan hartuko da enpresa berean langileak jarraian egindako denbora. Benetan lan egindako denboratzat hartuko dira langileak lansari edo ordainsaria jaso duen hilabete eta egun guztiak, berdin dio egindako zerbitzuengatik jaso duen nahiz komisioetan, lizentzietan edo lan istripu zein gaixotasunaren ondoriozko baja iragankorretan.

Halaber, kontuan hartuko da kargu publiko edo sindikaletarako izendatutako langileek nahitaezko eszedentzian egindako denbora, bai eta soldadutzan egindakoa ere. Borondatezko eszedentzian egindako denbora, aldiz, ez da kontuan hartuko.

c) Langileak enpresan zenbat urte egin dituen hartuko da kontuan antzinatasuna kalkulatzeko, lanbide taldeari edo lanbide kategoriari erreparatu gabe.

Gainera, kontuan hartuko dira langileek probaldietan enpresarentzat egindako zerbitzuak eta behin-behineko langileek egindakoak, langile horiek enpresako plantillan sartzen direnean.

d) Nolanahi ere, kategoriaz igo edo taldez aldatzen direnek, kategoria edo talde berriari dagokion lansarian oinarrituta, enpresan sartu zirenetik metatu dituzten bosturtekoak kobratuko dituzte. Antzinatasuna aurreko arauetan adierazitako moduan kalkulatuko da, baina bosturtekoak oinarrizko lansari berriaren arabera kalkulatuko dira.

e) Zerbitzu urteengatiko aldian behingo gehikuntzak bosturteko bakoitza bete eta hurrengo hilaren lehen egunetik sorraraziko dira.

f) Zehapen gisa edo nahita langile batek enpresa uzten badu, borondatezko eszedentziarik eskatu gabe, eta gero enpresa berera itzultzen bada, azken sarrera horretatik kontatuko zaio antzinatasuna eta lehenago lortu zituen eskubideak eta antzinatasuna galduko ditu.

21. artikulua: aparteko eskersariak.

Aparteko bi paga ezarri dira, udakoa eta Gabonetakoa, biak ere 30 egunekoak lanbide kategoria guztietarako. Horien zenbatekoa lansari taula erantsietan ageri da: "I" zutabean eskulangileentzat eta (E) zutabean enplegatuentzat. Gainera antzinatasun plusa ordainduko da, bidezko denean.

Seihileko bakoitzean enpresan sartu edo enpresatik alde egiten duten langileek lan egindako denboraren proportzioan kobratuko dituzte eskersari horiek.

Eskersari horiek enpresan egindako alta egunen arabera ordainduko dira. Ondorio hauetarako, istripu edo gaixotasunagatiko bajak, lizentziak eta erregelamenduzko baimen ordainduak alta eguntzat joko dira.

22. artikulua: Lan toxikoak eta bereziki nekagarri edo arriskutsuak.

Lanen nekagarritasun, toxikotasun edo arrisku berezia kontuan hartuko da, arau gisa, lanpostuen balorazioan eta pizgarrien balioak finkatzerakoan.

Halako lanak egin behar dituzten langileei %20, %25 edo %30eko hobaria ordainduko zaie aurreko kontzeptuetako batengatik, birengatik edo hirurengatik, hurrenez hurren, beste lansari-kontzeptu batzuen barnean ordaintzen ez bazaie. Hobari horren oinarria kalkulatzeko, "A" zutabeko lansariari antzinatasun plusa gehituko zaio.

Enpresa eta langileak ez badira ados jartzen lanaren nekagarritasun, toxikotasun edo arriskuaren kalifikazioaren inguruan, Probintziako Lan Ordezkaritzak ebatziko du, erakunde tekniko egokiak, Lan Ikuskatzailetzak edo eskumena duen beste erakunde batek aholkatuta.

Probintziako Lan Ordezkaritzaren eta gainerako erakunde eskudunen ebazpenen kontra errekurtsoa jarri ahal izanen da hamabost eguneko epean, Lan Zuzendaritza Nagusiari edo beste erakunde eskudun bati zuzenduta.

Berariaz hitzartu da, beste hobekuntza batzuen ordain gisa, lan bereziki nekagarri, toxiko edo arriskutsuetan benetan egindako ordu bakoitzeko edo zatikiko kobratuko direla artikulu honetan aipatutako osagarriak.

Hori guztia, ezertan galarazi gabe bereiz aztertu eta itundu ahal izatea plus hauei zenbait batez besteko aplikatzeko aukera, lanaldi osotan edo lanaldi erditan, enpresa honetako zenbait lanpostu edo zerbitzutarako, horietan oso zaila baita plus horiek konpentsatzen dituzten arriskuen eraginpean langileek benetan zenbat denbora egiten duten zehaztea.

Baldin eta, instalazio edo prozeduren hobekuntzak direla medio, lanaren nekagarritasuna, toxikotasuna edota arriskua desagertzen bada, behin Probintziako Lan Ordezkaritzak edo bestelako erakunde eskudunak kausa horiek desagertu direla egiaztatu ondoren, aurrean adierazitako aholkularitza berberekin, hobari hori ordaintzeari utziko zaio. Erabakiaren kontrako errekurtsoa jarri ahal izanen da, aurreko paragrafoan azaldutako modu berean.

23. artikulua: osagarriak, enpleguaren erregulazio kasuetan.

Enplegu erregulazioko espedienteen kasuetan Enplegu Zerbitzuaren prestazioak osatu eginen dira, Gizarte Segurantzaren zenbatekoak eta PFEZa deskontatu ondoren ateratzen den zenbateko garbiaren %90eraino, espedientea Enpresa Batzordearen adostasunaz tramitatzen bada, edo zenbateko garbi horren %80raino, akordiorik gabe tramitatzen denean.

Koherentziagatik, hartzeko dauden atsedenaldiek enpleguaren aldi baterako erregulazioko balizko espedienteak konpentsatuko dituzte; betiere langilearen adostasuna beharko da.

Aurreko paragrafoetan azaldutakoa galarazi gabe, zuzendaritzak eta Enpresa Batzordeak elkar hartuta erabaki dute enplegu erregulazioko espediente bat aurkeztuko dela kontratuak eteteko, 2009ko otsailean, inoren konturako 119 langileri gehienez ere, zenbat dauden soberan (guztiak ere 1949., 1950. eta 1951. urteetan jaioak), 2009ko martxoaren 9tik 2011ko abenduaren 31ra bitarteko aldirako, gehienez ere 730 egun natural ukitutako pertsona bakoitzeko, astelehenetik igandera, biak barne, oporrak eta jaiegunak ere barne direla. Halaber, ukitutako pertsona guztiei antzinatasuna kontatuko zaie bitarte horretan, ondorio guztietarako.

Aurreko paragrafoan ezarritakoa baldintza hauen pean egonen da nahitaez:

-2009ko otsailean aurkeztu beharreko enplegu erregulazioko espedientea lan administrazioko agintaritzak onestea.

-Eta enplegu zerbitzu eskudunak langabeziagatiko prestazioa ordaintzea lan kontratuen atsedenaldiko egun natural guztietan.

Kasu horretan, enplegu zerbitzu eskudunaren prestazioak osatu eginen dira Gizarte Segurantzaren eta PFEZaren zenbatekoak deskontatu ondoren ateratzen den zenbateko garbiaren %80raino.

24. artikulua: gaueko lana.

22:00etatik 6:00ak bitarte egiten dena da gaueko lana.

Gaueko lana arau hauei jarraituz pagatuko da:

a) Gauez ordu batetik lau ordura bitarte lan eginez gero, saria lan eginiko orduengatik kobratuko da bakarrik.

b) Gauez lau ordu baino gehiago lan eginez gero, eginiko lanaldi osoko saria kobratuko da, den-dena gauekoa ez izanagatik ere.

Gaueko zaindariak (atezainak eta gauzainak) gaueko laneko saritik aparte gelditzen dira, espresuki gauez aritzeko kontratatuak izan badira.

Artikulu honetan aipatzen diren lanak egiten dituzten langileek osagarri bat kobratuko dute gaueko lanagatik. Osagarri hori ohiko lanaldian hartzen den sari osoaren %27,50ekoa izanen da, toxikotasun, penagarritasun edo arriskuagatik diren legezko osagarriez, ekoizpen primez, pizgarririk ez edukitzeagatik den primaz eta jaiegun, igande, aparteko eskersari eta oporren zati proportzionalez gain. Bidezko denean antzinatasuna gehituko da.

Argiago geldi dadin, eskulangileendako lansari taula erantsietan berezko zutabe hau sartu da: ''gaueko orduaren kostua''.

25. artikulua: behin-behineko plusa.

Ordainsari kontzeptu iragankorren bat, aurreko artikuluan aurreikusi gabekoa, ordaindu behar denean, enpresak behin-behineko plusa deritzona aplikatuko du, bera eragiten duen kausak adina iraunen duena.

Ordezkapenak egiten direnean, lehenbiziko egunetik ordainduko da, ordezkapen mailaren arabera, enpresako usadio edo arauari jarraituz.

26. artikulua: Guardien plusa.

Kasu hauetan ordaintzen diren plusei guardien plusak deitzen zaie:

a) Guardia egitea laneratu gabe. Deitua izanez gero berehala lanera joateko prest egoteagatik, guardien plusa ordainduko da: egoera horretan emandako 8 orduko, hiru orduren prezioa ordainduko da, aparteko orduak bezala kalkulaturik.

b) Ezustean laneratu beharra. Guardian egon zein ez, ustekabean laneratu behar izanez gero (3 ordutik beherako denborarako), lehenbiziko adian, guardien plus gisa, aparteko 3 orduren preziora iristeko behar adina diru ordainduko da.

Hurrengo laneratzeetan, benetan egindako lanari dagozkion aparteko orduak ordainduko dira.

27. artikulua: dietak.

Enpresaren beharrengatik eta enpresaren aginduz, ohiko lantokitik beste herri batera bidaiak edo joan-etorriak egin beharrean diren langileek, euren etxera otorduak egitera edo lotara joatea ezinezkoa badute, diru kopuru hauek kobratuko dituzte bidaiaren, egonaldiaren eta, halakorik bada, otorduen gastuengatik:

a) Dieten taula:

2009-2011 urteak

Gosaria: 3,20 euro.

Bazkaria: 19,40 euro.

Afaria: 17,85 euro.

Bestelakoak: 6,80 euro.

b) Zuzendaritza orokorrak egokitzat jotzen dituen salbuespenak ezarri ahalko ditu, langileak banaka harturik, unean uneko tarifa indardunaren aldean.

c) Tarifak egiaztagiririk gabeko prestazio ekonomikoa bermatuko du. Alabaina, edozein inguruabarrengatik hura gainditzen bada, egiaztagiria aurkeztu beharko da eta kasuan kasuko zuzendariak onartu beharko du.

d) Ostatu hartu eta gosariaren prezioa hoteleko kontuan sartzen bada, dieten inprimakiko gosariaren kontzeptuan ez da ezer jarriko.

e) Atzerrira bidaiak egiteko, bai eta egonaldi edo joan-etorri luzeetarako ere, kasuz kasu arautuko dira baldintzak, inguruabarrak kontuan hartuz eta behar bezala frogatutako gastuak ordaintzeko irizpideari jarraituz.

f) Zenbait langile elkarrekin joaten direnean toki berera, ibilgailu berean elkartu beharko dira.

g) Hau izanen da kilometroaren prezioa:

-Ibilgailuak: 0,28 euro.

Prezio horren barnean dago ibilgailuaren gastuen ordaina, arrisku orotarako asegurua eta balizko isunak ere barne.

Ondorengo berrikuspenetarako, Fagor Taldean indarra duen kilometroaren prezioa edo horren ordez ezar litekeen baliokidea hartuko da erreferentzia.

Fagor Taldeak, kilometroaren prezioa aldatzean, kontuan hartzen baditu fiskaltasun baldintzak, Fagor Ederlan Tafalla, S. Coop. enpresarentzat Nafarroako Foru Komunitateko baldintza fiskalak beteko dira.

h) Istripuetarako arau berariazkoak.

h.1. Istripua gertatu ondoren beharrezkoa bada berehala lekualdatzea, taxiaren edo anbulantziaren gastuak ordainduko dira. Istripua izan duenaren edo lankideren baten autoan egiten bada lekualdaketa, kilometroak ordainduko dira h.4 atalean zehaztutakoaren arabera.

h.2. Lan istripuen ondorioz medikuaren kontsultak edo bestelako arrazoiak direla-eta (ospitaleratzea, errehabilitazioa, infiltrazioak, hartxintxarrak ateratzea, osasun azterketak etab.) ohiko bizilekua duten tokitik kanpora joan-etorriak egin behar dituztenei, arau orokor gisa, autobusaren gastuak ordainduko zaizkie, frogatuz gero.

h.3. Ukitutako langilea ezin bada bere kabuz joan, bizi den tokitik kanpora irten behar duen edo ez kontuan hartu gabe, Laneko Segurtasun eta Osasun arloko arduradunak zehaztuko du erabili beharreko garraiobidea (taxia edo, behar izanez gero, anbulantzia).

h.4. Autobusez joaterik ez badago, Laneko Segurtasun eta Osasun arloko arduradunak zehaztuko du nola egin bidaia (taxiz edo auto partikularrez). Lehenbiziko kasuan enpresak edo mutuak ordainduko ditu gastuak, eta bigarrenean enpresak ordainduko du ezarritako kilometrajearen eta mutuak ordaindu beharrekoaren arteko aldea.

i) Langileen ordezkariek kilometrajea eta dietak kobratzeko eskubidea izanen dute, modu honetan:

i.1. Zuzendaritzak deituta bileretara joaten direnean:

Enpresa Batzordeko kideei, ohiko bizilekua Tafalla/Erriberritik kanpo badute, urtean urteko tarifan ezarritako kilometrajea ordainduko zaie.

Aparteko arrazoiengatik bilerak Iruñean edo lantegitik Erriberri/Tafalla baino urrutiagoko beste toki batean egiten badira, kilometrajearen tarifa ordainduko zaie Enpresa Batzordeko kide guztiei.

i.2. Enpresa Batzordearen bilerak.

Ohiko bizilekua Tafalla/Erriberritik kanpo duten Enpresa Batzordeko kideei 0,10 euro ordainduko zaie kilometroko.

Joan-etorriek ez dute inoiz ekarriko aparteko orduengatiko ordainketa edo konpentsaziorako eskubiderik.

Bilera egiteko garaian lantegian lan txanda egiten ari diren Enpresa Batzordeko kideei ez zaie inoiz kilometrajerik ordainduko.

Giza Baliabideen Departamentuak behar den zenbatekoa likidatuko die Enpresa Batzordeko kideei, eskubide hori sortzen zaien unean.

j) Konturako aurrerakinak eta gastuen likidazioak eskatu ahal izanen dira enpresak helburu horietarako ezarritako inprimakiak behar bezala betez.

k) Enpresari aldez aurretik baimena eskatu beharko zaio bidaiak nork bere ibilgailuan egin ahal izateko, bai eta hegazkinez edo bestelako garraiobide berezietan bidaiatzeko ere.

l) Nork bere ibilgailua erabiltzea ez da inoiz nahitaezkoa izanen, baina, hala egiten denean, enpresak, arau orokor gisa, egindako kilometroen eta ibilgailu motaren arabera ezarrita dauden diru kopuruak ordaindu beharko ditu, besterik ez.

m) Gastuen likidaziorako inprimakiarekin batera, nahitaez aurkeztu beharko dira bidaiaren txartel edo tiketak eta ostatuen fakturak, halakorik bada, bai eta langileak egin behar izan dituen gastu berezien egiaztagiriak ere. Aldez aurretik baimenduta norberaren ibilgailua erabili bada, kilometrajea ordainduko da ibilgailu motaren arabera.

n) Irteera eta helduera egunei dagozkien dietak banakaturik aurkeztu beharko dira, bizilekutik edo ohiko lantokitik zein ordutan irten den eta bertara zein ordutan itzuli den adierazita.

o) Hori dela eta, dietan ageri diren kontzeptuak kobratzeko eskubidea izanen da kasu hauetan:

Gosaria. Goizeko 8ak baino lehen irteten denean edo 9ak jota iristen denean, gosaria ostatuaren prezioan nahitaez sartuta ez baldin badago.

Bazkaria. 13:00ak baino lehen irten edo 14:00ak jota itzultzen denean.

Afaria. 22:00ak baino lehen irten edo 22:00ak jota itzultzen denean.

Bestelakoak. Bi otordu nagusiak etxetik kanpo egin beharra izan bada, dieta osorik kobratuko da, eta bietako bat bakarrik egin bada, %50.

28. artikulua: aparteko orduak.

Hitzarmen honen sinatzaileek adierazten dute ados daudela oraingo politikari eustearekin: aparteko ordurik ez egin eta horien ordez asteko konpentsazio-atsedenaldia deitutako sistema erabiltzearekin.

Hitzartu dute, halaber, hitzarmen honetan finkatutako lanaldi arruntaz gain egiten diren orduak aparteko ordutzat hartuko direla ondoko kasuetan soil-soilik:

-Lanaldiaren hasieran eta amaieran egiten direnak produkzio prozesuaren eskakizunengatik.

-Guardia aldietan edo ezusteko laneratzeetan, ez lanaldiaren segidan, egiten diren mantentze lanak.

-Hurrengo txandako langilea agertu ez eta lanaldia luzatzen denean, "gainjartzeetan" alegia.

Aparteko orduak %75eko edo %100eko errekarguarekin ordainduko dira, lanegunean edo igandean egiten diren. Zenbatekoak lansari tauletan ageri dira.

29. artikulua: laneko arropa.

Irizpide orokor gisa, enpresak legez eskatzen ahal zaion laneko arropa banatuko du, eta langileek enpresaren esparruan arropa horiek erabili beharko dituzte.

Horretarako:

a) Tailerreko eskulangileei urtean bi aldiz galtzak eta atorra emanen zaizkie.

b) Denbora gehiena tailerretan ematen duten tailerreko arduradun eta enplegatuei urtean bi aldiz galtzak eta jaka emanen zaizkie.

c) Bulegoko langileei, eskatuz gero, bi urtean behin jaka edo mantal bat emanen zaie.

d) Kanpoan lan egin ohi duten langileei aurrekoaz gain arropa bereziak emanen zaizkie.

e) Osasun zerbitzuko eta laborategiko langileei eta zaintzaileei jantzi egokiak emanen zaizkie.

f) Moldegintzako eskulangileei, beren lanaldiaren barnean ohiko eta araututako zeregina badute Moldegintzako makinak koipeztatzea, buzoa emanen zaie.

30. artikulua: egiazko lansaria.

Egiazko lansaria da langileak ohiko lanaldia eginda urtean kobratzen dituen ordainsari gordin guztien batura, ondokoak kontuan hartu gabe: antzinatasun plusa, nekagarritasun, toxikotasun eta arriskugarritasun plusa, gainerako plusak eta lansari-osagarriak.

Egiazko lansariak, beraz, barnean bilduko ditu eguneko soldatak, oporretako ordainsariak, aparteko eskersariak eta ekoizpen primak edo pizgarririk ezarenak.

31. artikulua: nominen ordainketa.

Nomina hilero ordainduko zaie enpresako langile guztiei.

Behar diren administrazio eragiketak egin ahal izateko, langile bakoitzari aurreko urtean batez beste hilean jasotzen zuen lansariaren %90 aldez aurretik ordainduko zaio, eta behin betiko likidazioa, berriz, hurrengo hilaren zazpigarren lanegunean ordainduko zaio beranduenez.

Bai nominaren aurrerakina bai likidazioa langile bakoitzak hautatu eta enpresari behar bezala jakinarazitako banku edo aurrezki entitatearen bitartez ordainduko dira.

IV. KAPITULUA

Lanaren antolaketa eta arrazionalizazioa

32. artikulua: antolaketaren eta arrazionalizazioaren funtsezko printzipioak.

Lanaren antolaketa praktikoa, une bakoitzean indarra duen legerian ezarritakoarekin bat, enpresako zuzendaritzari eta, delegazio bidez, haren kargudun edo legezko ordezkariei dagokie. Hori guztia, legezko xedapen berek Enpresa Batzordeari eta atal sindikalei egozten dizkieten informazio eginkizunak ezertan galarazi gabe.

Zuzendaritzaren eskubide horiek funtsean honela zehazten dira: enpresak zilegi du egokitzat jotzen dituen sistemak ezartzea lana arrazionalizatu eta errazteko, industria edo administrazio metodo eta prozesuak hobetzeko, errendimenduak aztertzeko eta plantilla egokiak eta horien okupazioaren saturazioa finkatzeko, nahiz eta horretarako beharrezkoa izan langileren bat bere lanbide eta espezializazioaren arabera bete izan dituen lanen antzekoak baina ez berdin-berdinak egiten jartzea, salbuespenez edo behin-behinean, eta betiere, enpresaren aldetik, hitzarmen honen 49. artikuluko mugigarritasun arauak errespetaturik.

Langileak zuzendaritzaren erabakiak onartzera beharturik daude. Betiere, ados ez badaude, erreklamazioa aurkezteko eskubidea dute, lehendabizi kargudunei eta Enpresa Batzordeari zuzenduta eta gero, beharrezkotzat jotzen badute, lan administrazioko agintaritza edo erakunde jurisdikzional eskudunari zuzenduta, baina, nolanahi ere, ezarritako sistema geldiarazi gabe edo hartu diren erabakiak betetzeari uko egin gabe.

33. artikulua: produktibitatea.

Eska daitekeen gutxieneko errendimendua, edo errendimendu normala, Bedaux sistemako 60 puntu edo beste sistema bateko puntuazio baliokidea da. Ohiko errendimendua da aurreko hiru hilabeteetan, lan baldintzak aldatu gabe, eskuarki eta gehienetan lortu izan den errendimendua, betiere hori ez bada eska daitekeen errendimendua edo errendimendu normala baino txikiagoa.

Langileek konpromisoa hartu dute erritmo normalean lan eginen dutela esleituta dituzten lanak kronometratzen direnean, are lan horiek jada behin betiko denborak ezarrita badituzte ere, ezertan ukatu gabe denbora neurtuko zaiela aldez aurretik jakiteko duten eskubidea eta, lan metodo berriren bat ezartzen denean (prozesuak, gamak, faseen edo eragiketen zatikatzea eta abar) horren berri jasotzekoa.

Zuzendaritzak, berriz, konpromisoa hartu du errendimendu sistemak edo jarduera neurtzekoak ezartzen dituenean errespetatu eginen dituela ezarritako arauak, halako moldez non lanpostu bakoitzean eskatzen den jarduera izanen baita gaitasun ertaina duen eta bere egitekoa ezagutzen duen langile batek bere lan bizitzan arrisku larririk hartu gabe betetzen ahal duena, eta ez gehiago.

Hitz ematen du, gainera, ez duela bere kabuz murriztuko lan bati behin betikoz esleitutako denbora, nahiz eta gehiegizko denbora esleitu zitzaiola ohartu, salbu eta argi eta garbi egiaztatzen denean egoera hori kalkulu eragiketetan egindako oker baten ondorio dela.

Mugapen hori ezin izanen da aplikatu, ordea, edozein lanetarako instalazioa, makineria, tresnak, lehengaiak edo eragiketa-metodoa aldatzeko orduan, eta kasu horietan, beraz, lehendik esleitutako denborak ere aldatu ahal izanen dira. Dena den, ezarritako betekizunak bete beharko dira aldez aurretik, denbora edo kronometraje berri bat ezarriko balitz bezala.

34. artikulua: kronometrajeen eraginkortasuna.

Denborak, besterik adostu ezean, ez dira atzera-eraginez aplikatuko. Hortaz, kronometrajearen hasieratik izanen dituzte indarra, ez bada berariaz ezartzen behin-behinekotasun aldi jakin bat.

Arau orokor gisa, bi hilabetean gutxienez behin-behinean aplikatu eta gero, denborak behin betikoak bihurtuko dira, baldin eta bitarte horretan lanak etenik gabe egin badira. Alabaina, makina edo instalazio berri bat abian edo lanerako prest jartzen denean, behin-behinekotasuna teknikoki beharrezkotzat jotzen den artean luzatuko da, epea aldez aurretik mugatu gabe, eta egokitzat jotzen diren denborak ezarriko dira makina edo instalazio horrek funtzionatzeko baldintza normalak betetzen dituenean. Salbuespenezko egoera hori behar bezala jakinaraziko zaie bai lanpostuaren titularrei bai Enpresa Batzordeari edo atal sindikalei.

35. artikulua: lanaren kalitatea.

Langileek usadioz edo arau idatziaren bidez ezarrita dagoen moduan egin beharko dute lana. Zalantzarik izanez gero, zuzeneko kargudunari eskatu beharko zaizkio behar diren datu edo argibideak, egin beharreko lanari ekin baino lehen.

Lana ordaintzeari dagokionez, inoiz ez da lan bat bukatutzat edo jarduera nahiz errendimendu bat lortutzat emanen, egindako lanek ez badituzte betetzen idatziz eskatutako edo usadioz argi eta garbi finkatutako kalitate baldintzak.

Kalitate kontrolean lan bat baztertuz gero, egin duen langileak edo langile taldeak berregin edo konpondu beharko du bere kontura, ezertan galarazi gabe egozten ahal zaizkion bestelako erantzukizunak.

36. artikulua: lan kantitatea eta balorazio sistemak.

Langileen produkzio jarduerak eta errendimenduak, hots, lortutako produkzio baliagarriak, egoki kontrolatze aldera, enpresak oraingoz Bedaux sistema erabiltzen jarraituko du hori erabilgarri eta beharrezkoa den lanpostu eta instalazioetan.

Sistema horretako 60 punturi dagokien jarduera, sistema bereko arauei jarraituz neurtua, beti izanen da eska daitekeen gutxienekoa, osasun arrazoiak edo ezinbestekoak salbu, eta langile guztiei eskatuko zaie, lanpostura moldatzeko edo ikasteko behar duten aldia bukatutakoan. Aldi hori aldez aurretik finkatuta egonen da eginkizun bakoitzerako.

37. artikulua: ekoizpenerako prima.

Lana kronometratzen zaien eskulangile guztiek lansariaren osagarri bat jasoko dute, prima edo pizgarri bat hain zuzen ere, eska daitekeen gutxienekoa baino lan gehiago egiten badute, baina horretarako beharrezkoa izanen da kantitatearekin batera behar adinako kalitatea lortzea, 35. artikuluak dioen moduan.

Hala, eska daitekeen gutxieneko jardueraren edo beste sistema bateko jarduera baliokidearen gainetik lortutako puntuak ordainduko dira, eta puntuaren balioa unean uneko lansari tauletan agertuko da lanbide kategoria guztietako talde bakoitzerako. (Primako puntuaren balioa).

Puntuaren balioa zehazteko, enpresan hitzartuta dagoenez, Bedaux sistemako 78 punturen edo beste sistema bateko puntuazio baliokidearen truke ordaindu beharreko prima urteko soldata gordinaren %18 izanen da. Urteko soldata gordina lansari taula erantsietako oraingo (J) zutabean ageri da, edo geroan horren ordez ezar daitekeen zutabe baliokidean, eta barnean hartzen ditu oinarrizko soldata, sailkapen taldeko osagarria, oporrak eta bi eskersariak.

Eska daitekeen gutxieneko jarduera lortzen ez dutenei, horretarako bidezko arrazoirik ez badute, jarduera-puntu negatiboen baliokide den diru kopurua kenduko zaie lansaritik, eta gainera diziplinako zehapena ezarri ahal izanen zaie beren portaeragatik, une bakoitzean indarra duten lege eta itunetako baldintzak betez.

38. artikulua: prima bermatua edo pizgarririk ezarena.

1. Kronometratu gabeko lanak egiten dituzten eskulangileek, ekoizpenerako prima gisa, Bedaux eskalako 78 punturen edo beste sistema bateko puntu kopuru baliokidearen truke ordainduko litzaiekeen diru kopurua jasoko dute, salbu eta lan horietarako, berariaz, prima handiago bat ezarrita dagoenean edo mugigarritasunari buruzko arauak (hitzarmen honen 49. artikulua) aplikatzearen ondorioz prima jaso behar dutenean.

Diru kopuru bera bermatuko zaie ikasten edo lan berrietara moldatzen ari diren langileei, salbu eta laneko portaera ezegokiarengatik edo errendimendu urriarengatik berme hori osorik edo neurri batean kendu behar zaienean, haien gainetik dauden zuzeneko kargudunen iritziz; eta hori, ezertan eragotzi gabe langileak zehapenen kontra legez baliatzen ahal dituen bideak.

Lanpostuz aldatzearen ondorioz moldatze aldian dauden langileen kasuan, goian aipaturiko mugigarritasun arauetan berariaz ezarritakoari jarraituko zaio.

2. Xaflen Atalean eta Mantentze Lanen Atalean, gutxieneko prima bermatu hori Bedaux eskalako 79 puntukoa izanen da.

3. Jarduerarengatiko 78 puntu ordainduko zaizkie Moldegintza Ataleko plantillako langileei garbiketa lanak egiteagatik, hipotesi bikoitz hau betetzen bada:

a) Moldegintzako makina batean ari den plantillako langile batek, programazioa dela-eta bere atala utzi behar, eta beste batera bidaltzen dute bere lanaldia osatzeko.

b) Destinoko atalean lanik eman ez, berriz bidaltzen dute Moldegintza Atalera eta han garbiketa lanak esleitzen dizkiote bere lanaldia osatzeko.

39. artikulua: "gelditzeko" eta "itxaroteko" denborak.

Enpresari ezin egotzi zaizkion arrazoiak direla-eta (lana, argindarra, lehengaiak edo material egokiak falta izatea, ezusteko matxurak etab.) langileek lanik egin gabe ematen badute eguneko lanaldiaren zati bat -bitarte horiei "gelditzeko denbora" deituko zaie-, lanegunetako orduko lansariaren arabera dagokien kopurua bakarrik kobratuko dute denbora horren truke, inolako prima edo pizgarririk gabe.

Jarduerarik ezaren arrazoia enpresari bakarrik egozten ahal bazaio (ez hornitzaile, bezero edo kanpoko beste agente batzuei) eta langileen esku ez badago -bitarte horiei "itxaroteko denbora" deituko zaie-, langileek, dagokien lansariaz gain, aurreko hilabetean batez beste lortu duten prima kobratuko dute.

Hona hemen, adibide gisa, itxaroteko denboren arrazoi batzuk: garraiatzeko edo mugitzeko baliabiderik ez izatea, ezusteko matxuren ondorioz; lana etetea tresna edo erremintak obra tokian multzokatzeko; unean uneko maniobrak egitea; laneko material, erreminta, tresna edo elementuak falta izatea enpresari egozten ahal zaizkion arrazoiengatik; aurreko eragiketaren edo eragiketen moteltasuna, langileen erruagatik izan ez bada; lanean segitu behar den ala ez noiz erabakiko zain egotea, eragozpenen bat gertatu eta gero, edo zein motatako lana egin behar den erabakitzeko zain; eta abar.

"Gelditzeko denbora" ez baizik eta "itxaroteko denbora" egin dela erabakitzeko behin betiko irizpide gisa, lanik ezaren arrazoiari erreparatu behar zaio, ea enpresari bakarrik egozten ahal zaion (eta ez ekoizleei, hornitzaileei, bezeroei edo kanpoko beste eragile batzuei), eta gainera, ea zentzuz aurreikusten ahal den arrazoi hori desagertu eginen dela.

Eguneko lanaldi bat edo denbora luzeagoa lanik gabe emanen dela aurreikusten bada, enpresako zuzendaritzak instalazioak itxi ahal izanen ditu. Instalazioak itxita dauden egunak konpentsatu ahal izanen dira "Lantegia zabalik dagoen egun soberakinetatik" hartzeko daudenekin. Halakorik izan ezean, kasu bakoitzean erabakitzen diren konponbideak jarriko dira.

Aurreabisua eman beharko zaie interesdunei eta Enpresa Batzordeari, beharraren arrazoiak eta kalkulatzen den iraupena azalduz.

Kasu horietan behar diren nomina-erregulazioak eginen dira, hileko diru-sarrerei ezarritako egutegiko mailaren parean eusteko, eta zenbatekoak ondorengo hilabeteetan konpentsatuko dira.

40. artikulua: taldeburua.

Taldeburua zuzendaritzak izendatutako langile bat da. Lanaldiaren zati batean bere lanbide edo espezialitateko eskuzko lanak egiten ditu eta beste zatian aginte lanak egiten ditu normalean 8tik gorakoa ez den langile talde batean: horien lana prestatu, antolatu eta kontrolatu egiten du, lanesku eta abarrekoak gainbegiratzen ditu eta erantzukizuna du bere ardurapeko langileen segurtasunaz, egindako lanaren kalitateaz, ezarritako metodoak betetzeaz, lanpostuen ordenaz eta garbitasunaz, ordutegiaz eta diziplinaz.

Taldeburuak, eginkizun horretan diharduen bitartean, erantsitako lansari tauletako "A" zutabean bere kategoriarako ezarritako oinarrizko soldataren %20ko plusa kobratuko du.

Urtebetez jarraian edo hiru urtez tarteka taldeburu aritu eta gero eginkizun hori uzten duen langileak bere ordainsari berariazkoa kobratzen segituko du harik eta mailaz igo eta ordainsari hori gainditzen duen arte.

V. KAPITULUA

Langileen araubidea

41. artikulua: lanbide sailkapena.

Enpresako langileak, legezko ondorio guztietarako, Nafarroako Foru Komunitateko Industria Siderometalurgikorako Hitzarmenean ezarritako lanbide kategorietan sailkatuko dira, baina, ordainsariei eta Gizarte Segurantzarako kotizazioari dagokienez, peoi arruntaren kategoria kendu egin da, peoi espezialistarekin parekatuz, nahiz eta beheko kategoriako lanak egiteko betebeharrak iraun.

Halaber, ordainsariei dagokienez, lanbide kategoria bakoitzaren barnean sailkapen talde batzuk ezarri dira.

Kasu bakoitzean esleitzen ahal den sailkapen taldea zehaztea zuzendaritzari soilik dagokio. Aldez aurretik beharrezkotzat jotzen dituen aholku teknikoak eskatuko ditu eta Enpresa Batzordeari entzunen dio. Hala ere, eta oinarrizko printzipio gisa, peoi espezialistei dagozkien lanetan ulertu behar da "taldea" lanpostuari esleitzen zaiola eta ez titularrari. Enplegatu, mendeko eta profesional ofiziodunen kasuan, aldiz, lanpostu bakoitzaren ezaugarriak eta egiazko eskakizunak ez ezik, langile bakoitzak agertzen dituen gaitasunak, ezagutzak eta eraginkortasuna hartuko dira kontuan "taldea" zehazteko.

Beraz, oraingoan ere arau orokor gisa eta 49. artikuluan ("Mugigarritasun funtzionala") gai honen gainean berariaz ezarritakoa ukatu gabe, ulertu beharko da ezen, peoi espezialisten kasuan, lanpostu aldaketak sailkapen taldearen aldaketa ekarriko duela berekin, eta gainerako kasu guztietan, berriz, mailaz edo taldez aldatzeko, kontuan hartu beharko direla lanpostu bakoitzean eta pertsona bakoitzarengan aldi berean biltzen diren inguruabar guztiak.

Mantentze Lanen eta Tresneriaren ataletako ofizialentzat, Enpresa Batzordearekin elkarlanean prestatuko da zuzendaritzak kategoriak eta taldeak esleitzeko erabili beharreko baremoa.

Mantentze Lanen eta Tresneriaren ataletako ofizialek, esleipenekin ados ez badaude, azterketak egiteko eskatu ahal izanen dute.

42. artikulua: bereizkeriaren debekua.

Debekaturik dago soldatetan, sustapen eta igoeretan eta abarretan langileen sexuagatik edo adinagatik edozein bereizkeria egitea.

Antzeko lanpostuetan baina dedikazio edo eraginkortasun maila desberdinekin aritzen diren pertsonek lansari desberdinak kobratzea zilegi izanen da.

Emakumezkoek kategoria eta ardura guztiak izanen dituzte eskuragarri, gaitasuna izanez gero. Emakumezkoek enpresan duten lekuaren gaiari berariazko arreta emanen zaio.

43. artikulua: kontratazioa eta enpresa uztea.

Enpresak edozein kontratu mota egin ahalko du, unean uneko legezko xedapen indardunek onartzen badute eta horietan ezarritako baldintzak eta ezaugarriak biltzen baditu.

Merkatuaren gorabeherek, lan metaketek edo eskabide gehiegi izateak baldintzatutako iraupen jakineko kontratu motaren iraupena gehienez ere 13 hilabete eta erdikoa izanen da 18 hilabeteko tartean, aipatu diren arrazoiak sortzen direnetik hasita, horrela arautua baitago Langileen Estatutuaren Testu Bateginaren 15. artikuluaren 1. zenbakiko b) atalean.

Era horretako kontratuak, hitzarmen kolektibo hau sinatu aurretik itunduak eta indarra dutenak, luzatzen ahal dira kontratugileak ados jarrita, 18 hileko epean goian aipatutako 13 hilabete eta erdira iritsi arte.

Produkzioaren gorabeherengatiko kontratazioaren gehieneko epeak enpresan gerta daitezken inguruabarretako bakoitzerako izanen dira.

Zilegi izanen du egokitzat jotzen dituen sarrera probak nahitaez ezartzea, legezko probaldia idatziz ezartzea eta legezko beste edozein kontratu mota egitea, orobat idatziz, bereziki iraupen jakinekoak, behin-behinekoak eta bitarte baterakoak edo ordezkapenekoak.

Probaldiak eten eginen dira aldi baterako ezintasun egoera gertatzen den guztietan. Ez dira izanen jarraian langile talde bakoitzerako adierazten direnak baino luzeagoak. Probaldian kontratua suntsiarazten ahal da aurreabisurik eman gabe eta inolako kalte-ordainetarako eskubiderik gabe, enpresaren nahiz langilearen ekimenez.

-Peoiak eta espezialistak 15 egun.

-Gainerako eskulangileak eta administrariak hilabete.

-Titulurik gabeko teknikariak 2 hilabete.

-Teknikari tituludunak 6 hilabete.

Bestalde, langile batek enpresa uzten ahal du, hala nahi badu, probaldia bukatu ondoren, aldez aurretik abisatuta, ondoren adierazten den bezala:

-Eskulangileak 15 egun.

-Administrariak hilabete.

-Teknikariak eta buruak 2 hilabete.

Aurreabisurik ematen ez bada edo aipatu epean ematen ez bada, enpresak eskubidea izanen du langilearen likidaziotik eguneko lansaria deskontatzeko aurreabisua atzeratzen den egun bakoitzeko.

44. artikulua: errelebo kontratua.

Hitzarmen honek diraueino, kontratu mota hori Langileen Estatutuaren 12. artikuluko 6. idatz-zatian eta aplikatzekoak diren beste legezko xedapenetan ezarri bezala erabiliko da.

Errelebo kontratua erabili nahi duten langile guztiek Giza Baliabideen Zuzendaritzari jakinarazi beharko diote 60 urte betetzean. Orduan sartu ezik ezin izanen dira gero sartu, zuzendaritza ados dagoenean izan ezik.

Hitzarmenak diraueino 60 urte edo gehiago betetzen dituzten langileek %85eko erretiro partziala hartzen ahalko dute, %15eko lanaldi partzialeko kontratu bati eutsiz, baldin eta Gizarte Segurantzan 1967ko urtarrilaren 1a baino lehenagotik edo gutxienez ere 35 urtez kotizatu badute, indarra duten legeekin bat.

Erretiro partzialeko lehen urtean lanaren %15 eginen dute. Erretiro partziala hastean lanaldi osoetan metatuko dute denbora guztia. Hurrengo urteetan, 65 urte bete arte, %50eko baimen pagatua izanen dute.

Lehen aipatu den baimena, legeek debekatzeagatik, ematerik ez bada, urtero behar den denbora eginen da, lanaldi osoetan metaturik, bi aldeak ados daudela ezarriko den egutegiaren arabera.

Enpresaren eta langileen Gizarte Segurantzako kotizazioak berdinak izanen dira hilero, jardunean egonez gero lansari, antzinatasun, gaueko osagarri, lantokiko osagarri eta primagatik egokituko zitzaien ordainsariaren %15ari dagozkion zenbatekoetan.

65 urte betetzean, errelebatzen diren langileei erretiro osorako eskubidea sortzen duen kontratua iraungitzen zaie. Haren zenbatekoa ohiko erretiroko pentsio baten antzera kalkulatzen da. Horretarako, lanaldi partzialeko kotizazioaren oinarria %100ean kontatzen da, alegia, %100 lan egin izan balute bezala.

Kasu guztietan, erretiro partziala pasatzeko, ukituriko pertsonaren onarpena beharko da eta bermatuko da modu egokian ordezten dela.

45. artikulua: plantillari eustea.

Testurik gabe.

46. artikulua: gaitasun urrituko langileak.

Enpresak, ezinbestez behar den gutxieneko gaitasunaren mugen eta legez ezarritako portzentajeen barnean, ahaleginak eginen ditu lanerako gaitasuna urritu zaien langileak beren benetako ahalmenera egokitutako lanpostuetan jartzeko, beren lanpostuetan jarraitzerik ez badute eta langileari ezin egotzi zaion arrazoi batek eragina bada gaitasun galera; istripu edo gaixotasun batek edo enpresaren zerbitzuan luzaro egindako lanaren ondoriozko higadurak.

Egokitze hori ahalbidetzeko, lanerako gaitasuna urritua dutenentzako lanpostu egokietan ari diren gaitasun osoko langileek onartu egin beharko dute beren lanbide kategoriako beste lanpostu batera aldatzea, nahiz eta beste sailkapen talde batekoa izan. Lanpostu aldaketa horiek, ondorio legal eta ekonomikoetarako, zerbitzuaren beharrek eragindakoak balira bezala hartuko dira.

Gaitasun galera zehazteko, eta lan arloko edo jurisdikzioko erakunde eskudunek erabaki dezaketena eragotzi gabe, enpresako Osasun Zerbitzuaren irizpenari jarraituko zaio.

Langile bat, enpresako Osasun Zerbitzuen aldeko txostena bai, baina ohiko lanbidean aritzeko ezintasun partzial edo osoaren legezko onarpen ofizialik lortu ez eta lanerako gaitasuna urritua dutenentzako bereziki egokitzat jotzen den lanpostu batera aldatzen bada, enpresaren barnean halako lanpostuei esleitutako ordainsariak jasoko ditu. Hala ere, bakarka eta Gizarte Segurantza ofizialerako kotizatzeari dagokionez aintzat hartzekoa den heinean, eutsi eginen zaio, langileak, argibideak behar bezala jasorik, hala nahi badu, langile bakoitzak lanpostuz aldatzeko unean duen lanbide kategoriari, eta gainera osagarri pertsonal edo behin-behineko bat esleituko zaio, baina izozturik, geroko lansari igoera orokorretako bakoitzean %50 irensteko. Aldaketaren unean jatorrizko lanpostuak duen ordainsariaren eta destinoko lanpostuak duenaren arteko diferentzia izanen da osagarri horren zenbatekoa. Horri dagokionez lanpostu baten zein bestearen ordainsari konparagarria izanen da oinarrizko lansariari, sailkapen taldeari, batez besteko primari eta lanpostuz aldatzen denak esleituta izan lezakeen beste edozein osagarri bakarkako eta pertsonali dagokiona soilik. Ez dira kontuan hartuko, beraz, gainerako osagarri, plus edo primak, edozein motatakoak direla ere.

Langileak berak eskatzen badu aipatu lanpostuetako batera aldatzea eta enpresako Osasun Zerbitzuek irizten badiote eskatzaileak ez dituela behar adinako baldintzak betetzen lanerako gaitasun galerari dagokionez, baiezkoa emanez gero, lanpostu-aldaketa langilearen eskariz egiten den kasuetarako legez ezarritakoari jarraituko zaio, eta ez da aplikatuko, beraz, artikulu honetako goiko paragrafoetan hitzarturikoa.

Lanpostu aldaketarako oinarria, aldiz, betiere enpresako Osasun Zerbitzuek aldeko txostena emanda, legez eskumena duen erakundeak ohiko lanbiderako ezintasun partziala edo osoa ofizialki onartu izana bada, jarraian azaltzen den araudia aplikatuko da, betiere gaitasun-urrituak bete dezakeen lanpostu egokirik baldin bada, enpresak ezin baitu eskaini okupazioaren erabateko bermea kasu guztietan eta aipatu egoeran dauden langile guztientzat:

a) Lanpostuz aldatutako langileak bere ordainsarian izan dezakeen murrizketa ez da izanen urrituak bere jatorrizko lanpostuan jaso izan duenaren %8 baino gehiago. Ordainsari kontagarri eta konparagarria artikulu honetako bosgarren paragrafoan adierazitakoa izanen da.

b) Diru-sarrera handiago gisa kontatu, eta, aldaketaren unean, destinoko lanpostuko ordainsariarekin metatu ahal izanen da, urrituari bere ezintasunaren legezko onarpenaren ondorioz ofizialki esleitzen zaion pentsioa. Pentsioaren ordez hainbesteko finkoko kalte-ordaina esleitzen bazaio, horrek urtean sorrarazten duen errenta edo interesa Aurrezki Kutxa Konfederatuek urtebeteko epe finkorako ezarpenengatik ordaintzen dutenaren adinakotzat hartuko da.

Horrela kalkulaturiko errenta teorikoa, 12 hilabeteen artean zatitua, hileko pentsioa balitz bezala jokatuko da ondorio hauetarako.

c) Ordainsarien arteko diferentzia, aurrean adierazitako moduan kalkulatua, jatorrizko lanpostuari dagokion ordainsariaren %8 baino gutxiago bada, langileari ez zaio inolako konpentsaziorik esleituko. Bestela, hasieratik lanpostu berriaren baldintza ekonomikoek arautuko dituzte alderdi guztiak, baina plus pertsonal bat esleituko zaio, aipatu %8tik gorako galera zatiaren baliokidea.

d) Zuzendaritzak ahalmena izanen du aurrean aipatutako plusaren edozein onuradun noiznahi ordainsari handiagoko beste lanpostu batera aldatzeko, plus hori osorik edo hein batean irentsiz, ordainsari berriak ahalbidetzen duen neurrian, baldin eta, enpresako Osasun Zerbitzuaren iritziz, langileak lanpostu horretan aritzeko gaitasuna badu.

Langileak aldaketari uko egiten badio, besterik gabe galdu eginen du jaso izan duen plus diferentziala.

e) Aurrean esandakoa gorabehera eta ezaugarri berberekin, hots, aldez aurretik behar adina argibide emanda eta Gizarte Segurantzako kotizaziorako aintzat hartzekoa bada, errespetatu eginen da langileak lehenago izandako lanbide kategoria, hark berariaz hala eskatuz gero.

47. artikulua: lanerako ezintasun osoari buruzko arauak.

Kontratua deseginez gero kobratu beharreko ordaina ondoren zehaztu bezala kalkulatuko da:

-Ordain hori gutxienez ere 26.370 eurokoa izanen da eta gehienez ere 40.570 eurokoa. Horiek zenbateko horietan pagatuko dira, 37.190 euro egiten badute.

-Banakako zenbateko bat izanen da, honela kalkulatua: ezintasun iraunkor osoko prestazioa onartzen zaionez geroztik langileari egokituko zitzaion erabateko ezintasuneko pentsioaren edo, gutxiago izanez gero, balizko ordainsari garbien %95 egiteko adinakoa. Urtean %6ko errentagarritasuna kalkulatuko da.

-Erabateko ezintasun iraunkorra eta ordainsari garbiak kalkulatzeko, langileari ezintasun iraunkor osoa ematen zaion eguneko balioak hartuko dira.

-"Kasu berezietarako", kotizatzeko oinarriak modu nabarmenean hondaturik edukitzeagatik ezarririko gutxieneko ordaina lortzen ez duten langileendako alegia, salbuespenezko neurri hauek hartuko dira:

-Ordainaren formulan aipatzen den erabateko ezintasun iraunkorreko pentsioa kalkulatzeko, kotizatzeko balizko balioak kontuan hartzean ateratzen dena ere erabiliko da.

-Balizko balio horren %95 hartuko da. Egokituko zitzaion erabateko ezintasun iraunkorreko pentsioaren %100 izanen da gehienekoa.

Hitzarmen honen ondoren Gizarte Segurantzaren Institutu Nazionalak errekurtso bat paratzen badu onarturiko ezintasun iraunkor osoaren aurka eta hori indargabeturik gelditzen bada, langilea berehalaxe hasten ahalko da lanean enpresan, ohiko lanpostuan, kobraturiko ordaina zentzuzko erritmoan itzuli ondoren.

Inori erabateko ezintasun iraunkorra onartu eta berraztertzeagatik edo erabateko ezintasun iraunkorraren aurka errekurtso bat paratzeagatik, ezintasun maila aldatzen bazaio eta gero ezintasun iraunkor osoa aitortzen bazaio, enpresak ezintasun iraunkor osoarengatik egokitu zitzaion ordaina pagatuko dio. Eskubide hori aldaketa hori gertatzen den egun berean sortuko da.

48. artikulua: lanpostu hutsak betetzea eta sustapenak.

Enpresako lanpostu hutsak behin betiko betetzeko, artikulu honetan kasuz kasu berariaz ezarritakoari jarraituko zaio.

1. Oinarrizko printzipioak.

1.1. Oinarrizko printzipio orokor gisa, enpresaren plantillako langile finkoek lehentasuna izanen dute, betiere beharkizun, ezagutza edo gaitasun egokiak badituzte.

1.2. Sustapena dakarten lanpostuak lehiaketa-oposizioen bidez beteko dira, azterketa teorikoa eta praktikoa eginez.

2. Sustapena dakarten lanpostuak nola bete.

2.1. Halakotzat hartuko dira, ez bakarrik lanbide kategoriaz igotzea dakartenak, baita teknikari eta administrarien egoera aldaketa dakartenak ere, gaitasun urrituko langileentzat gordetzen direnak izan ezik.

2.2. Lanpostu horiek lehiaketa-oposizioen bidez beteko dira beti, berariaz salbuesten diren kasuetan izan ezik. Lehiaketaren xede diren lanpostuen kopurua eta mailaz igoko diren pertsonena berdinak izanen dira.

2.3. Lehiaketa-oposizioan azterketa teorikoa eta praktikoa eginen dira, behar bezala ponderatuak, eta izangai egokiena hautatuko da proben emaitzak eta merezimenduak, oro har, kontuan hartuta. Beste inguruabar batzuk berdinak direnean, antzinatasuna merezimendu berezitzat joko da.

2.4. Mailaz igotzeko lehiaketetara aurkeztu ahal izanen dira hori eskatzen duten langile guztiak, kategoriak eta antzinatasuna kontuan hartu gabe, betiere deialdi bakoitzean eskatutako baldintzak betetzen badituzte.

2.5. Bete beharreko lanpostu hutsak, egin beharreko ariketak eta eskatzen diren gainerako baldintzak, merezimenduak, bete beharreko lanpostuen kopurua eta beste edozein inguruabar jakingarri, zuzendaritzak aditzera emanen ditu ohiko iragarki oholetan, ahalik eta lasterren. Gainera, hori guztia Enpresa Batzordeari jakinaraziko zaio, eta hark, nahi badu, bere kideetako batzuk izendatu ahalko ditu zuzenketa, kalifikazio eta hautapen-irizpideen objektibotasuna egiaztatu ditzaten.

2.6. "Gai" kalifikazioa ematen zaien langileak bete beharreko lanpostuak baino gehiago badira, hautagai horiekin beteko dira hurrengo lanpostu hutsak beste deialdirik egin gabe, urtebete igaro arte. Epe hori igarota, beste deialdi bat argitaratuko da, behar denean, eta aurreko emaitzak baliogabetu eginen dira ondorio guztietarako.

3. Kargudunen lanpostuak, edo horiekin parekatuak, edo erreserba nahiz konfiantza bereziko lanpostuak betetzea.

Aurreko guztia gorabehera, eta goian azaldutako printzipioak oinarrizko irizpide gisa onartzen badira ere, enpresako zuzendaritzak eskubidea izanen du berariazko atal honetan aipatutako lanpostuen titularrak izendapen askearen bidez hautatzeko. Beraz, plantillako langileen artean hautagairik aurkezten ez bada edo aurkezten direnak behar bezain egokitzat jotzen ez badira, zuzendaritzak egokiena iruditzen zaion pertsona izendatu ahal izanen du lanpostu hutsa betetzeko.

49. artikulua: mugigarritasun funtzionala eta erreleboen artekoa.

Mugigarritasun funtzionala gauzatu ahal izanen da lanbide kategoria baliokideen barnean. Horretarako, lanpostu bakoitzean jarduteko behar diren ikasketa edo lanbide tituluak izanen dira muga bakarrak.

Mugigarritasun hori gauzatuko da langilearen duintasuna urritu gabe eta beraren lanbide prestakuntza eta sustapena galarazi gabe; langileak zein eginkizun hartu, hari dagokion ordainsaria jasotzeko eskubidea izanen du.

1. Xedapen orokorrak.

1.1 Garrantzi bereziko kasu eta egoeretan, zuzendaritzak langileen mugigarritasunari buruz behar den informazioa emanen dio Enpresa Batzordeari, behar beste denbora lehenago.

1.2 Zuzendaritzak, halaber, kargudunen bitartez, behar adinako maiztasunarekin, informazioa emanen du behin-behineko edo behin betiko programez, badiren eta ustez beharko diren plantillez eta horiek lan edo errelebo aldaketetan ustez izanen duten eraginaz.

1.3 Langile batek bere ohiko lana utzi eta atal beraren barnean beste bat hartzen badu lehengoaren antzeko ezaugarri eta baldintza ekonomikoak dituena, hori ez da lanpostu aldaketatzat joko araudi honen ondorioetarako.

1.4 Profesionalei edo langile ofiziodunei dagokienez, behin-behineko lanpostu aldaketek inoiz ez dute ekarriko beheragoko talde batera jaistea, haien sailkapeneko maila normala haien lanbide balorazio pertsonalaren bidez zehazten baita neurri handian. Bestalde, behin-behineko aldaketa goragoko lanpostu batera egiten bada, langilearen gainetik dagoen kargudunak maila hori esleitzen ahal dio langileari, lanpostu horretan ari den bitartean, eraginkortasun osoz diharduela irizten badio. Aldaketaren aldia amaitutakoan, eta merezimendua behar adina frogatzen deneko kasu berezietan izan ezik, lehenago izandako ohiko maila berriz esleituko zaio.

Behin betiko lanpostu aldaketetan kasuz kasu zehaztuko da zer den bidezkoa, inguruabarren arabera: egin beharreko lanetarako prestakuntza, lanpostu horiek betetzen dituzten gainerako profesionalei eskatzen zaien maila, moldatzeko edo ikasteko aldia, etab.

Hortaz, araudi honetan sailkapeneko talde-aldaketak eta horiek dakartzaten ondorioak aipatzen dituzten klausulak beti izanen dira aplikagarriak peoi espezialistentzat, eta bidezkoak direnean soilik, profesional-ofizialentzat.

1.5 Aurreko atalean ondorio guztietarako ezarritako salbuespenak salbuespen, balorazio handiagoko lanpostu batera aldatzen den langileak eskubidea izanen du lanpostu berriko ordainsariak kobratzeko kontzeptu guztiengatik, behin primarako moldatze aldia gainditurik, hori bidezkoa baldin bada.

Bereziki eta kasu guztietan salbuetsiko dira kategoriaz igotzeko ikastaldiak.

1.6 Langileek lanpostu edo errelebo aldaketak onartu beharko dituzte, baldin eta enpresak ere araudi honetan eskatzen diren baldintzak betetzen baditu. Hori ez da oztopo izanen inolako baldintza formalik bete beharrik ez izateko, salbu eta zuzeneko interesdunei azalpenak eman edo arrazoiak jakinarazi beharra, baldin eta, eguneroko lanean gertatu ohi denez, edozein aldaketa egiteko borondatezko akordioa lortzen bada zuzeneko kargudunaren eta ukitutako langilearen edo langileen artean.

Baina kasu horietan ere, langileak araudi honen aplikazioaren ondorioz dagozkion onura ekonomikoak izanen ditu.

1.7 Langile bat, lanerako gaitasuna urritzearen ondorioz, beheragoko lanbide kategoriako lanpostu batera edo lanbide kategoriaz aldatu gabe beheragoko talde batera aldatzen denean, 46. artikuluan ("Gaitasun urrituko langileak") dauden arauak beteko dira.

2. Behin betiko lanpostu aldaketak.

2.1 Aldaketa bat "behin betikoa" izateak ez du esan nahi ukitutako langileak aurrerantzean mugitzerik izanen ez duenik, baizik eta ez dela beharturik egonen jatorrizko lanpostura itzultzera edo beste edozein aldaketa onartzera; behin betiko aldaketa horren ondorioz taldekide dituen langileei, oro har, lehentasunei buruzko arauak (artikulu honetako 6. idatz-zatia) aplikatzearen ondorioz egokitzen ahal zaion lanposturako aldaketa bakarrik onartu behar luke.

Horri dagokionez, aldaketa bat behin betikotzat hartuko da hurrenez hurreneko hiru hilabetetik gorako aldirako egiten denean.

Epe horri dagokionez ez dira kontuan hartuko gaixotasun, laneko istripu, baimen, eszedentzia eta antzeko kasuetarako ordezkapenak.

2.2. Langileak ez dira beharturik egonen behin betiko lanpostu aldaketa onartzera, berekin lanbide kategoriaren aldaketa badakar. Aldaketa hori egiteko baldintzak zuzendaritzaren eta kasu bakoitzean ukitutako langilearen edo langileen artean ados jarrita ezarriko dira.

Beti saiatu beharko dute adostasun hori lortzen, lanpostua amortizatzeko legezko espedientea tramitatu baino lehen.

2.3 Lanorduetatik kanpo, lanpostuz aldatzen denetik gehienez urtebeteko epean, enpresak eskaturik, lan berriaren beharretara egokitzeko lanbide-birmoldaketako ikastaroak eginez gero, langileak matrikulazio gastuak eta hileko kuota kobratuko ditu, betiere behar adinako aprobetxamendua frogatzen badu.

2.4 Lanpostuz aldatzean, lanbide kategoriaz aldatu gabe, beheragoko talde edo maila batera igarotzen diren langileei dagokienez, arau hauek beteko dira:

2.4.1. Hasieratik aplikatuko dira lanpostu berriari dagozkion prima eta plusak, baina ezertan eragotzi gabe langileak lehenago jasotzen zuen batez besteko prima mantentzea, egokitze aldian, behar izanez gero.

2.4.2. Jatorrizko lanpostuaren talde edo mailari dagokion lansari edo soldata mantenduko da.

2.4.3. Beste inguruabar batzuk berdinak direlarik, eta betiere langileak behar adinako gaitasun eta ezagutzak dituela frogatuz gero, beheragoko lanpostuetara aldatutakoek lehentasuna izanen dute hutsik geratzen diren lanpostuak betetzeko, jatorrizko mailara berriz iritsi arte.

Enpresak, berriz, langile horiei noiznahi eskaini ahalko die jatorrizko lanpostuaren maila berean edo hartatik gertuago dagoen beste lanpostu batera aldatzeko aukera. Langileak ez badu onartzen, eta ezintasun nabarmena frogatu ezik, araudi honetan aitortzen zaizkion onura ekonomiko guztiak galduko ditu eta lan egiten duen lanpostuari dagokion mailaren arabera ordaintzen hasiko zaio.

2.5. Araudi hau aplikatzearen ondorioz, ordainketari dagokionez, aldi baterako edo behin betiko gerta daitezkeen egoera ezegokiak (lanpostuari ez dagokion ordainsaria jasotzea) ez dira inoiz konparazioaren oinarritzat hartuko beste langile batek edo langile talde batek lansarien inguruko erreklamazioak egiteko.

3. Behin-behineko lanpostu aldaketak.

3.1. Lanpostu aldaketa behin-behinekoa izanen da hiru hilabete baino luzeagoa ez bada jarraian.

Hala ere, aldaketaren behin-behinekotasuna automatikoki luzatu ahal izanen da, hilabete gehienez, ukituei horren arrazoiak eta inguruabarrak jakinarazi eta gero.

Luzapenaren epea gehiago luzatu ahal izateko (egoera hori salbuespentzat hartuko da beti) ezinbesteko baldintza izanen da aldez aurretik Enpresa Batzordea jakitun jartzea eta berak onartzea.

Halaber, langile bat jatorrizko lanpostuan berriz jartzen dutenean, beste lanpostu batean behin-behinekotasun epe horiek amaituta, langile hori ez da beharturik egonen behin-behineko beste lanpostu aldaketa bat onartzera, jatorrizko lanpostura itzuli zenetik hilabete igaro arte. Epe horretan, lanpostu aldaketaren bat egin beharra badago, gaitasuna duten eta ukituaren talde edo espezialitate berekoak diren beste langile batzuk aldatuko dira. Ukituak eskubide horri uko egin ahal izanen dio, nahi badu. Salbuespenezko egoeretan, halakorik gertatzen bada, Enpresa Batzordearen adostasuna beharko da aldez aurretik.

3.2. Lanpostuz aldatzean, lanbide kategoriaz aldatu gabe, beheragoko talde edo maila batera igarotzen diren langileei dagokienez, arau hauek beteko dira:

3.2.1. Hasieratik aplikatuko dira lanpostu berriari dagozkion prima eta plusak, baina ezertan eragotzi gabe langileak lehenago jasotzen zuen batez besteko prima mantentzea, egokitze aldian, behar izanez gero.

3.2.2. Destinoko lanpostuan zuzeneko produkzioa egiten bada prima finkoarekin edo prima kolektiboarekin, langileak, ekoizpenerako prima gisa, aldekoena duen batez bestekoa jasoko du.

3.2.3. Jatorrizko lanpostuaren talde edo mailari dagokion lansari edo soldata mantenduko da.

3.2.4. Arau bera beteko da egokitze aldiari eta primari dagokienez, horretarako biderik badago, kasu hauetarako dagoen berariazko araudiarekin bat, jatorrizko lanpostura itzultzean.

3.2.5. Langileak lanpostu osagarri bat bete behar duen kasuetan, 78 jarduera-punturi dagokion prima jasoko du, bere batez besteko prima berdina edo handiagoa bada.

3.2.6. Egin beharreko lana garbiketa besterik ez bada edo lanpostuko erremintak konpondu eta antolatu beste zereginik ez badago, bi kasuetan esfortzu berezirik egin beharrik gabe, langileak 78 jarduera-punturi dagokion prima jasoko du.

3.2.7. Lan osagarriak edo garbiketa lanak egiteko lanpostu aldaketak (3.2.4 eta 3.2.5 atalak) inoiz ez dira "behin betikoak" bilakatuko berez, denboraren buruan; aitzitik, horretarako beharrezkoa izanen da kasuz kasu akordio zehatza egitea eta Enpresa Batzordeak esku hartzea.

3.3. Halaber, aurrean ezarritako arauak ez dira traba izanen kargudunek jarduera-puntuak gehitu edo gutxitu ahal izan ditzaten langilearen benetako produktibitatearen arabera. Betiere langileak eskubidea izanen du gero errekurtsoa jartzeko, ohiko bideetatik, erabaki horren kontra, eta ondorio ekonomikoak sortuko dira, azkenean hartzen den erabakiaren arabera.

4. Absentismoagatiko ordezkapenak.

4.1. Arau orokor gisa, absentismo egoeren ondorioz egiten diren lanpostu aldaketak, ahal dela, atal beraren barnean eginen dira, eta ukitutako langileei ordutegia edo lanaldia aldatu gabe.

4.2. Absentismo egoeretan ordezkapenak egiteko aldaketak nahitaezkoak izanen dira bai atalaren barnean bai kanpoan, ez baldin badute ordutegi edo lanaldi aldaketarik eragiten.

4.3. Lanpostuz aldatzean ordutegia ere (lanaldia) aldatu behar zaien langileei hasierako egoeran zuten lanordu kopurua errespetatuko zaie lehenbiziko astean; hortik gora egiten dituzten orduak apartekoak bezala kobratuko dituzte, edo, dagozkienak baino gutxiago egiten badituzte, denak ordainduko zaizkie.

4.4. Ordutegi aldaketa dakarten lanpostu aldaketetan, gutxienez 16 orduko atsedenaldia bermatuko da, bi txandari dagokiena. Hala ere, atsedenaldi hori murriztu ahal izanen da, zuzeneko karguduna eta ukitutako edozein langile berariaz ados jarriz gero. Arau bera beteko da lanaldia aldatzen den kasuetan, nahiz eta lanpostu aldaketarik ez izan.

5. Programa aldaketak.

5.1. Programen aldaketen ondorioz, lanpostua aldatu zein ez, lanaldi aldaketak egin ahal izateko, beharrezko baldintza izanen da aurreabisua ematea hiru lanegun lehenago, gutxienez. Horretarako, larunbata laneguntzat hartuko da, jaieguna edo zubi eguna denean izan ezik.

6. Lehentasunak.

6.1. Ez da inolako lehentasunik ezarri beharko (betiere alde batera utzita lanerako gaitasun urrituaren ondorioz ezarri beharreko mugak) aldaketak atal beraren barnean egiten direnean, ordutegia, lanaldia eta baldintza ekonomikoak aldatu gabe.

Gainerako kasu guztietan, aldaketa nahitaez onartu behar izan dadin, une bakoitzeko langile soberakinen artean, enpresan antzinatasun txikiena dutenak hautatuko dira lehenik.

Salbuespenez, lehentasun ordena horretan ez dira sartuko lanerako gaitasuna urritua izateagatik destinoko lanpostuak betetzeko gai ez direnak, ez eta langileek Enpresa Batzordean dituzten ordezkariak ere, eskubide hori erabiltzeari uko egiten ez badiote behintzat.

6.2. Behin-behineko aldaketetan, langileak jatorrizko atalera itzuli beharko du hala eskatzen badiote. Kasu horietan lehentasun ordena aurreko atalean ezarritakoaren alderantzizkoa izanen da.

6.3. Behin betiko aldaketen ondoren, urtebeteko epean, lanpostuz aldatutako langileak eskubidea izanen du, aukerarik edo lanpostu hutsik badago, lanpostu berrian segitzeko edo bere hasierako lanpostura nahiz atal bereko antzeko lanpostu batera itzultzeko.

6.4. Langile soberakinak, lanik eza edo aurreko araudi horretan egokitu ezin diren beste inguruabar aparteko batzuk direla-eta, lan aldaketa kolektiboak egiten direnean, kasuz kasu ezarriko dira arauak, inguruabar guztiak kontuan izanik eta Enpresa Batzordeak berariaz esku hartu ondoren.

7. Aldaketa berezia haurdunaldian.

Artikulu honetan aurrean adierazitako guztia gorabehera, haurdunaldian gerta daitekeen behin-behineko egoera bereziari erreparatuta, ondokoa ezarri da:

7.1. Emakume haurdunak, enpresako Osasun Zerbitzuen iritziz lan nekagarria edo haurdunaldirako arriskutsua egiten badute, behin-behinean beste lanpostu egokiago batera aldatuko dira, halakorik bada, langileak berak nahiz enpresako zuzendaritzak eskaturik.

7.2. Halakoetan, zuzendaritzak, Enpresa Batzordeari entzun ondoren, haurdunak utzitako lanpostua nahitaez beteko duen pertsona izendatuko du, baina ordezkoak jatorrizko lanpostura itzultzeko eskubidea izanen du aldaketa eragin zuen egoera bukatzen denean.

7.3. Bai langile haurdunak bai aldaketak ukitutako langileak behin-behineko lanpostu aldaketetarako ezarritako ordainsariak jasoko dituzte.

50. artikulua: eginkizun edo/eta lanen integrazioa.

Eginkizun edo/eta lanen integrazioko lan egoerak, kudeaketa eta antolaketa metodo modernoen aplikazioaren eta enpresak lehiakorra izateko behar dituen teknologia berrien aplikazioaren ondorioz gerta daitezkeenak, zehaztapen arauemaile hauei jarraituz arautuko dira:

1. Definizioa. Integrazioa: kontzeptua eta motak.

1.1. Eginkizun edo/eta lanen integraziotzat jotzen dira honelako lan egoera guztiak: lanbide kategoria edo kalifikazio jakineko eskulangile edo enplegatu batek bere lan edo/eta eginkizunez gainera beste batzuk ere egiten ditu, usadioz beste lanbide kategoria edo kalifikazio batzuei esleitu ohi zaizkienak, batzuk eta besteak elkartuz eta bateratuz bere zereginetan edo/eta lanaldian.

1.2. Artikulu honen ondorioetarako, lan egoera hau ere integraziotzat jotzen da: lanbide kategoria edo kalifikazio jakineko eskulangile edo enplegatu bat noizbehinka beste lanbide kalifikazio bateko lanak egiten jartzen dute, gero bere ohiko zereginetara itzultzeko.

1.3 Eginkizun edo/eta lanen integrazioaren modalitate horiek abiarazteak ez du ekarriko ez enpresako plantillaren murrizketarik ez enpresan egiten den azpikontratazioaren gehikuntzarik. Hilero, azpikontratek egindako lanen eta ordu kopuruaren zerrenda emanen zaio Enpresa Batzordeari, orain arte bezalaxe.

1.4. Eginkizun edo/eta lanen integrazioa onartzen duen langile batek ezin izanen du ordezkatu lanpostu finkatua duen beste langile bat, salbu eta azken horrek hala ituntzen duenean.

Enpresarentzat garrantzi handia duten kasu berezietan, ordea, adibidez produkzioaren itoguneetan edo arazo larriak nahiz hobetzeko aukera handiak dituzten instalazioetan, enpresak ahalmena izanen du, egoera horietan, lanpostuaren deskripzio berria definitzeko. Lanpostu berri hori, lehenengo eta behin, hura lehendik betetzen zuen langileari eskaini behar zaio. Onartuz gero, enpresak langileari prestakuntza emateko konpromisoa hartuko du eta langileak lanposturako trebatzeko konpromisoa hartuko du.

Langileak onartu ez edo behar adinako gaitasunik lortzen ez badu, enpresak antzeko lanpostu bat eskainiko dio eta lehengo baldintzak eta soldata bermatuko dizkio.

Hori guztia Enpresa Batzordeari jakinaraziko zaio.

1.5. Artikulu honen ondorioetarako, honako hauek ez dira integrazio egoerak:

1.5.1. Kategoria jakineko eskulangile/enplegatu bat goragoko kategoria bateko eginkizunetara aldatzen denean aldi baterako.

1.5.2. Gaixotasun, lan istripu, baimen, eszedentzia eta antzeko kasuetako ordezkapenak.

Aurreko lanpostuak enpresan ezarritako arauen bidez arautuko dira.

2. Lanbide-osagarria.

2.1. Aplikagarritasuna.

Lanbide-osagarria izeneko lansari kontzeptua sortu da, pizgarri eta ordain gisa, aurreko atalean dauden definizioen arabera lanean gertatzen diren integrazio egoeretarako. Osagarri hori eginkizun edo/eta lanen integraziora biltzen diren guztiei ordainduko zaie.

Eskulangileei (espezialistei) aplikatuko zaie beren lanean ofizial edo enplegatuen lan eta eginkizunak sartzen dituztenean, baita ofizialei ere, espezialisten eginkizun edo lanak bereganatzen dituztenean.

Bai integrazioaren 1.1 modalitatean bai 1.2 modalitatean, integratzen den lan edo eginkizuna zalantzarik gabe goragoko kategoria batetik badator, eskulangilearen kategoriaren eta integratutako eginkizun edo lanaren jatorrizko kategoriaren arteko diferentzia ekonomikoa ordainduko da. Zalantzarik badago, edo aurreko irizpidea eskulangilearentzat onuragarriena ez bada, lanbide-osagarria bere horretan aplikatuko da.

2.2. Zenbatekoa.

Lanbide-osagarriaren zenbatekoa:

2.2.1. Integrazioa iraunkorra edo behin betikoa denean, 85 euro hilero.

2.2.2. Integrazioa noizbehinkakoa edo iragankorra bada, urteko guztizko lansariaren (tauletako J zutabea) %8. Orduka ordainduko da, egindako lan integratuaren arabera.

Enpresan une bakoitzean indarra duten taulen gehikuntza portzentaje bera aplikatuko zaio a) ataleko lanbide-osagarriari.

2.3. Beharkizunak eta baldintzak.

Lanbide-osagarria kobratu ahal izateko beharkizun eta baldintza hauek bete beharko dira:

2.3.1. Eginkizunen integrazioa banakako kontratu baten bidez onartzea, idatziz, egin behar diren lanak zehaztuta. Kontratu horrek 6 hilabeteko probaldia izanen du bi aldeentzat.

2.3.2. Hartukizuna pertsonala izanen da banakako kontratuan zehaztutako baldintzek irauten duten artean.

2.3.3. Lan integratua gutxienez ordubetekoa izanen da lanaldi bakoitzean.

2.3.4. Enpresa Batzordeak integrazioaren xede diren lanen gaineko informazioa jasoko du kasu guztietan.

3. Indarraldia.

Araudi honek hitzarmena sinatzen denean hartuko du indarra, eta hitzarmenarekin batera amaituko zaio indarraldia.

Indarraldian bai zuzendaritzak bai langileen ordezkariek jarraipena eginen dute, araudi hau, bere garapena, eraginkortasuna, negoziazioa, iraupena edo aldaketak kontrolatzeko.

51. artikulua: behin betiko lanpostu edota kategoria aldaketak.

Goragoko maila edo kategoriako lanpostu batera behin betiko aldatzen diren langile guztiei, probaldi edo trebakuntza aldia bukatutakoan, esleitutako lanpostu berriaren lansari-mailako ordainsaria, prima eta plusak egokituko zaizkie.

Beheragoko kategoria edota lansari-mailako lanpostuetara behin betiko egiten diren aldaketetan, berriz, arau hauek beteko dira:

1. Jatorrizko lanpostua amortizatu egin beharko da.

2. Halaber, ezin izanen da azpikontratatu.

3. Zuzendaritzak horrelako aldaketak eta haien baldintzak jakinaraziko dizkie hitzarmen hau sinatu duten langileen ordezkariei.

4. Gizarte eta lan baldintza hauek aplikatuko dira:

4.1. Jatorrizko lanpostuan izandako lanbide kategoriari eutsiko diote, eta lanbide kategoria horri dagokion kotizazio-tarifa izanen dute.

4.2. Aldaketaz geroztik betetzen duten lanpostuari dagozkion prima eta plusak jasoko dituzte.

4.3. Aurrekoa gorabehera, zuzendaritzak proposaturik beheragoko lanpostu edota kategoria batera aldatzen den langileak hurrengo paragrafoan deskribatzen den kalte-ordaina eskatu ahalko du.

4.4. Kalte-ordaina:

4.4.1. Jatorrizko lanpostuaren eta destinokoaren arteko diferentzia, hogeita lau hilabetekoa.

4.4.2. Gutxienez 2.400 euro, aurreko lerroaldean kalkulatutako kalte-ordaina hori baino gutxiago baldin bada.

4.4.3. Kalte-ordaina ez da inoiz izanen milioi bat pezetatik gorakoa.

52. artikulua: prestakuntza.

Zuzendaritzak eta langileen ordezkariek aintzat hartzen dute prestakuntzak duen balioa, eta gaurko industriaren egoera aldakorrean gastua baino gehiago inbertsioa dela uste dute.

Beraz, prest daude eta hitz ematen dute prestakuntza programa egokiak taxutu eta abian jartzeko, gaitasun, trebezia eta giza baliabideak indartuko dituztenak, antolakunde arin, malgu eta eraginkorraren funtzionamenduarekin uztartuz.

Hori guztia dela bide, produktuan eta prozesuan halako kalitate maila lortu nahi dute, non enpresak ziurtaturik izanen baitu merkatuan lehiatzeko indarra.

Enpresak, xede horrekin, prestakuntzako ekintza planak sustatu eta bultzatuko ditu, beren aurrekontuekin. Plan horietan prestakuntza edo/eta birziklapen beharrak eta ezarri beharreko prestakuntza ekintzen norainokoa identifikatuko ditu.

Batzorde bat ere izanen da, zuzendaritzak eta langileen ordezkariek osatua, eta prestakuntzarako ahalik eta diru-laguntza gehien bilatuko du.

53. artikulua: diziplina araubidea.

Enpresako zuzendaritzak zehapenak jartzen ahal dizkie langileei, ondotik ezarritako hutsegiteen eta zehapenen mailaketari jarraikiz.

1. Hutsegiteen mailaketa.

Langileak eginiko hutsegiteak honela sailkatuko dira, kontuan hartuz hutsegitearen tamaina, garrantzia eta helburua: arina, larria edo oso larria.

1.1. Hutsegite arinak.

Honako hauek hutsegite arinak dira:

a) Bidezko arrazoirik gabe hilabete baten barnean behin, bitan edo hirutan berandu iristea.

b) Lanera ez agertzeko arrazoia aurretik ez jakinaraztea edo, bestela, hutsegitea gertatu eta ondoko 24 orduan, ezinbestekoetan salbu, hartarako ezintasuna frogatu ezean.

c) Lanetik denbora gutxirako alde egitea, bidezko arrazoirik gabe. Horren ondorioz, enpresari edo lankideei nolabaiteko kalterik sortzen bazaio edo istripuren bat eragiten badu, hutsegite hau larritzat edo oso larritzat har daiteke, kasua nolakoa den.

d) Arreta gabezia txikiak materiala zaintzean.

e) Norberaren garbitasun eta txukuntasunik eza.

f) Jendea behar den adeitasunez eta arretaz ez atenditzea.

g) Enpresari bizilekuz edo helbidez aldatu izanaren berri ez ematea.

h) Lankideekin eztabaida sutsuak izatea lanorduetan.

i) Hilabete batean egun batez lanera ez agertzea, bidezko arrazoirik gabe.

1.2. Hutsegite larriak.

Honako hauek hutsegite larriak dira:

a) Bidezko arrazoirik gabe hogeita hamar eguneko aldian hiru aldiz baino gehiagotan lanera berandu iristea.

b) Bidezko arrazoirik gabe hogeita hamar eguneko aldian behin, bitan edo hirutan lanera ez agertzea. Hutsegite bakar bat nahikoa da, lankide bati erreleboa hartu behar dionean edo enpresari kalte nabaria egiten zaionean.

c) Familian Gizarte Segurantzan eragin dezakeen aldaketarik egon bada, aldaketa horien berri ez ematea behar den denboraz. Datu horiek faltsutu edo maltzurki eman gabe uzten badira, hutsegite oso larritzat joko da.

d) Lanorduetan jostetan ibiltzea.

e) Nagusiei edozein lanetan desobeditzea, lana arrazionalizatzeko metodo berriei gogor egitea eta trabak jartzea barne. Diziplina hautsi dela nabarmen ikusten denean edota jokabide horrek enpresari edo lankideei kalte nabaria sortzen dienean, hutsegite oso larritzat jotzen ahal da.

f) Beste langile baten presentzia lanean simulatzea, haren ordez sinatuz edo fitxatuz.

g) Zabarkeriaz edo utzikeriaz aritzea lanean, zerbitzuaren kaltetan.

h) Lanean zuhurtziarik gabe jokatzea. Langileari edo lankideei istripu izateko arriskua ekartzen badie, edo instalazioak matxuratzeko arriskua, oso larritzat jo daiteke. Nolanahi ere, nahitaezkoak diren segurtasuneko arropa eta tresnak ez erabiltzea ere zuhurtziarik gabe jokatzea izanen da.

i) Lanaldian lan partikularrak egitea, horretarako baimenik izan gabe, baita enpresako erremintak norberarentzat erabiltzea ere.

j) Hiruhileko berean beste hutsegite arin bat egitea (puntualtasuna salbu), nahiz desberdina izan, eta langileari hitzezko kargu hartzea ez den zigorra jarri izan bazaio.

1.3. Hutsegite oso larriak.

Hutsegite oso larriak dira:

a) Bidezko arrazoirik gabe sei hilabeteko aldian hamar aldiz edo gehiagotan, edo urtean hogei aldiz, berandu iristea.

b) Bidezko arrazoirik eman gabe hilabete baten barnean hiru egun jarraian edo bost tartekatutan lanera huts egitea.

c) Norberari agindutako kudeaketetan iruzur egitea, desleialtasunez jokatzea edo konfiantzaz abusatzea.

d) Enpresari edo beste lankideei ebastea edo lapurtzea, bai eta beste edozein pertsonari ere, lantokian denean edo beste edozein lekutan lanean aritzean.

e) Eritasuna edo istripua simulatzea. Hutsegitea dela ulertuko da langilea, bajan egonik, bere zein besteren kontura edozein lanetan ari denean. Istripuaren edo eritasunaren ondoriozko baja luzatzeko egiten den trikimailu oro ere atal honetan sartzen da.

f) Lanorduetan mozkortzea eta drogak hartu ondoko egoeran egotea.

Langilea aurrean aipatutako egoeretan dagoelako zantzuak ageri direnean, enpresako osasun zerbitzuak edo, bestela, enpresak izendatzen duen medikuak egin beharreko azterketa onartu beharko du. Azterketa horiek egitean langilearen duintasuna eta intimitatea ahalik eta gehien errespetatuko da eta bertan egonen da langileen legezko ordezkari bat edo, hori lantokian ez badago, enpresako beste langile bat, ahal izanez gero betiere.

g) Enpresaren korrespondentziaren edo isilpeko dokumentuen sekretua haustea edo enpresakoa ez den bati isilpean eduki beharreko datuak ezagutaraztea.

h) Enpresari bidegabeko lehia egitea zenbait ekintzaren bidez.

i) Hitzezko eta egitezko tratu txarrak ematea, agintekeria edo errespetu falta larria kargudunei edo haien ahaideei, baita lankide eta menpekoei ere.

Zuzendari, buru edo erdi mailako kargudunen agintekeria ere atal honetan sartzen da.

j) Utzikeriagatik edo zuhurtasun faltaz istripu larriak sorraraztea.

k) Erantzukizun berezia izanik, lanpostua uztea abisurik eman gabe.

l) Lan errendimendua arrazoirik gabe gutxitzea.

m) Lankideekin liskarrak eta iskanbilak sortzea.

n) Hiruhileko berean hutsegite larri gehiago egitea, nahiz desberdinak izan, zehapena jaso badute.

2. Zehapenen araubidea.

Enpresak du zehapenak jartzeko ahalmena, hitzarmen honetan ezarritakoari jarraikiz.

Hutsegite larri eta oso larriengatik zehapena jartzeko, idatziz jakinaraziko zaio langileari, data eta zehapena jartzeko arrazoiak adierazita.

Zuzendaritzak hutsegite oso larriengatik ezartzen dituen zehapen ororen berri emanen die langileen legezko ordezkariei.

Zehapena ezarririk, haren datatik hiru hilabete arte luzatzen ahal da bete gabe.

3. Zehapenak.

Hauek dira hutsegiteengatik jartzen ahal diren gehieneko zehapenak:

a) Hutsegite arinengatik:

-Hitzezko kargu hartzea.

-Kargu hartze idatzia.

b) Hutsegite larriengatik:

-Bi egunetik hogeira bitarteko enplegu-soldaten etenaldia.

-Beste lanpostu batera aldatzea, zentro berean.

c) Hutsegite oso larriengatik:

-Hogei egunetik hirurogeira bitarteko enplegu-soldaten etenaldia.

-Enpresa beraren beste zentro batera nahitaez aldatzea, helbidez aldatzera behartu gabe.

-Kaleratzea.

4. Preskripzioa.

-Hutsegite arinak: 10 egun.

-Hutsegite larriak: 20 egun.

-Hutsegite oso larriak: 60 egun.

Horiek guztiak zuzendaritzak gertaeren berri izaten duenetik eta, betiere, gertatu eta handik sei hilabetera.

54. artikulua: arriskuen prebentzioa eta lan osasuna.

Enpresako zuzendaritzak Laneko Arriskuen Prebentzioari buruzko Legean azaltzen diren ekintzak sustatuko ditu eta nola egiten diren kontrolatuko du. Ekintza horien bidez laneko arriskuei aurrea hartu eta langileen osasuna zainduko da, segurtasuna, higiene industriala eta ergonomia hobetuz, eta horrela gutxitu eginen dira bai laneko istripuak bai lanbide gaixotasunak.

Horretarako, zuzendaritzak ondokoa egiteko konpromisoa hartzen du:

-Langileen osasun egoera aldian behin aztertu, lanaren arriskuen arabera. Osasun azterketak borondatezkoak izanen dira, salbu eta (langileen ordezkariek txostena egin ondoren) azterketa nahitaez onartu behar denean, ezinbestekoa delako lan baldintzek langileen osasunean duten eragina ebaluatzeko edo langile baten osasun egoera berarentzat, gainerako langileentzat nahiz enpresarekin zerikusia duten beste pertsona batzuentzat arriskutsua izan ote daitekeen ikusteko.

-Lanaren arriskuen aurrean bereziki sentikorrak diren langileen babesa eta amatasunaren babesa bermatu.

-Prebentzio ekintza planifikatu, Arriskuen Hasierako Ebaluaziotik abiaturik, eta langileen segurtasunaren eta osasunaren babes maila hobea bermatuko duten prebentzio jarduerak egin.

-Prebentzioaren arloko prestakuntza eta informazioa antolatu kargudunentzat eta langileentzat, lan bizitzako fase guztietan: hala kontratazioa egitean nola eginkizunetan aldaketak egitean edo teknologia berriak sartzen direnean edo lanerako ekipoetan aldaketak egiten direnean. Lanpostua eta bertako eginkizun berariazkoenak izanen dira prestakuntzaren ardatz.

-Prebentzioa enpresako jardueren multzoan eta hierarkiako maila guztietan sartu, enpresako kide orok bere gain har ditzan prebentzioaren arloan dagozkion erantzukizunak.

Langileek, berriz, konpromiso hauek bete beharko dituzte:

-Beren osasuna eta segurtasuna nahiz lankideena zaintzea, erabakitako prebentzio neurriak betez.

-Makina, aparatu, erreminta, substantzia arriskutsu eta abarrekoak behar bezala erabiltzea.

-Norberaren babeserako beharrezkoak diren ekipo eta jantziak nahitaez eta behar bezala erabiltzea.

-Segurtasun gailuen funtzionamendua ez eragoztea, eta behar bezala erabiltzea gailu horiek.

-Segurtasun eta osasunerako arriskutsuak diren egoerak sumatuz gero, berehala horien berri ematea hierarkiako nagusi hurrenari edo Prebentzio Zerbitzuari.

Zuzendaritzak eta langileen ordezkariek hitz ematen dute laneko arriskuen prebentzioa kudeatzeko sistema bat prestatu eta abiaraziko dutela UNE-81.900 arau esperimentalean eta lehendik ezarrita dagoen kalitate sisteman oinarrituta, luze gabe arriskuen prebentzioa enpresako prozesu eta prozedura guztietan sarturik egon dadin.

55. artikulua: aldi baterako ezintasuneko prestazio ekonomiko osagarria.

1. Gaixotasunagatiko bajak.

Enpresak bere kontura eta, ondorio guztietarako, borondatezko hobekuntza gisa ezarri duen prestazio hau eman dezan, baldintza hau bete beharko da: gaixotasunagatiko absentismoaren gehieneko indize batzuk, beherago azaltzen direnak, ez gainditzea, eta are apaltzea, ahal bada. Berariazko arau hauek izanen ditu:

1.1. Prestazio honen onuradun izanen dira ondoko beharkizunak betetzen dituzten enpresako langile guztiak:

1.1.1. Aldi baterako ezintasunagatik baja izatea, eta behar bezala bideratzea bai baja-agiri ofiziala eta bai baja berresteko ondorengo parteak.

1.1.2. Sendagileek ematen dizkioten jarraibideak nahita ez haustea.

1.1.3. Lanik ez egitea, kobratu gabe bada ere, ez bere kontura, ez familiakoentzat.

1.1.4. Ohiko bizilekua duen herritik ez irtetea artatzen duen medikuak agindu edo baimendu gabe eta enpresari jakinarazi gabe.

1.1.5. Etxetik kanpo ez egotea 22:00etatik aurrera, maiatzetik irailera bitartean, edo 20:00etatik aurrera, urritik apirilera bitartean, enpresak aldez aurretik eta berariaz baimena eman ezean.

1.1.6. Enpresak edo Batzordeak izendatutako bisitaria etxean hartzeari uko ez egitea ez norberak ez ahaideek, eta enpresako Osasun Zerbitzuetara, Langileen Burutzara edo Absentismo Batzordera deitua izanez gero, ezindua egon gabe, joateari uko ez egitea.

1.1.7. Onura honetatik berariaz baztertua ez egotea gorago adierazitako baldintzak ez betetzeagatik edo aldi baterako ezintasun egoera nahita eta bidegabeki luzatzen ari delako susmo oinarritua izateagatik.

1.2. Funtsean, ez dira prestazio honen onuradun izanen greba edo enplegu-soldaten etenaldi batean gaixotasunagatiko baja hartzen duten langileak, egoera horretan dirauten bitartean. Absentismoaren Jarraipenerako Batzordeak, enpresarekin ados jarrita, langile jakinen bat arau hori bete beharretik salbuetsi ahalko du, gaixotasuna nabarmena dela eta ez dagoela hura simulatzerik garbi egiaztatu ondoren. Salbuespena egin dadin, ukitutako langileak berariaz eskatu beharko du aldez aurretik, eta idatziz jakinarazi beharko zaio Nominen Atalari, Langileriaren buruak ikus-onetsita.

1.3. Aldian behin gaixotasunengatiko absentismo indizeak aterako dira. Zenbat eta txikiagoak izan, hainbat handiagoa izanen da aldi baterako ezintasuneko borondatezko osagarria. Hurrenez hurreneko lau hiruhileko natural (azken 12 hilabeteak) hartuko dira kontuan. Horrela, indizeak finkatu behar diren bakoitzean, hiruhileko zaharrena baztertu eta hiruhileko berriena erantsiko da. Indize horiek, beraz, enpresako Informatika Zerbitzuak emandako guztizko datuen bidez lortuko dira, "azken urtea" kontzeptuarengatik, eta hiruhileko natural bakoitzaren amaieran (martxoaren 31n, irailaren 30ean eta abenduaren 31n) dagoen langile multzoarentzat.

Horrela kalkulaturiko indizeak hurrengo hiruhileko naturalean aplikatuko zaizkie orduan aldi baterako ezintasunagatik bajan dauden langileei.

1.4. Indizeok adieraziko dute aztertutako aldian, gaixotasunak direla-eta, egin behar zituen orduetatik zenbat utzi dituen egin gabe plantilla osoak, aldi horretan oporrak hartu dituzten langileak soilik kenduta.

Formula hau erabiliko da:

Gaixotasunagatik galdutako orduen kop.

Indizea = ---------------------------------- × 100

Eska zitezkeen orduen kop.

"Eska zitezkeen orduak" arestian azaldutakoak dira. Bai galdutako orduak bai eska zitezkeen orduak, betiere, langile bakoitzak egin behar duen benetako lanaldiko orduak dira.

Enplegu erregulazioko espedienteen ondorioz egin gabe geratzen diren orduak, absentismoaren kalkuluan, eska zitezkeen orduak balira bezala kontatuko dira.

Gaixotasunengatiko absentismo indizearen kalkuluan ez dira kontuan hartuko ezintasun iraunkor osoaren edo erabatekoaren espedientea duten bajak.

Ezintasun iraunkor osoaren edo erabatekoaren espedientea duen prozesua hasten denetik 5 hilabeteko epean prozesu hori INSSri aurkezten ez bazaio, ukitutako pertsonaren aldi baterako ezintasuna kontuan hartzen hasiko da absentismo indizeetan, eta aurretik kontuan hartu gabeko absentismoa hurrengo hilabeteei egotziko zaie.

1.5. Osagarri honen kalkuluan ondoko irizpideak erabiliko dira, besteak beste:

Osagarria lehenbiziko egunetik ordainduko da. Aurreko hilabetean lan egindako egunengatik kobratu den diru kopuru gordina hartuko da erreferentzia, eta hilabete horretan lan egindako egunen kopuruaz zatituko da, aparteko orduak eta konpentsatutako orduen osagarria deskontaturik.

1.6. Hitzarmena sinatu duten aldeek adierazten dute egungo absentismo indizeak hobetu nahi dituztela, horiek aldatu beharra baitago, arlo edo/eta eskualde bereko beste industria batzuen parera iristeraino.

1.7. Osagarri honen gehieneko zenbatekoa.

Aurreko printzipioaren arabera honako hau erabaki da:

2009ko urtarrilaren 1etik 2011ko abenduaren 31ra bitarte, aldi baterako ezintasuneko prestazio osagarria kontatu beharreko aldi bakoitzean gaizkitzeagatik ateratzen den absentismo indizeen arabera sortuko da, taula honekin bat:

ABSENTISMO
INDIZEA

OSAGARRIA

1. EGUNETIK 15.ERA ARTE

16. EGUNETIK 30.ERA ARTE

31. EGUNETIK AURRERA

%5,50 edo gutxiago

%85

%90

%95

%5,51tik %6ra bitarte

%80

%85

%95

%6tik gora

%75

%80

%95

1.8. Zuzendaritzaren eta sindikatuen ordezkariek osatutako Absentismoaren Jarraipenerako Batzordeak jardunean segituko du. Batzordeko kideek absentismoa pixkanaka murrizteko behar diren neurriak aztertuko dituzte prebentzioaren, antolaketaren eta kontrolaren alorretan, eta abian jar daitezen proposatuko dute.

1.9. Gizarte Segurantzako prestazio ofizialaren sisteman edo zenbatekoan edozein aldaketa egiten bada, arau hauek berrikusi eginen dira besterik gabe.

2. Lan istripuengatiko bajak.

Lan istripuen ondorioz baja hartzen duten langileek borondatezko osagarri bat jasoko dute bajaren lehen egunetik hasita; horren zenbatekoa, prestazio ofizialekin batuta, lanean arituta langile bakoitzak jasoko lukeen lansariaren %100era iritsiko da.

Kasu honetan ere aplikagarria izanen da artikulu honetako 1.1 atalean adierazitakoa.

56. artikulua: bizi aseguru kolektiboa.

Enpresak konpromisoa hartzen du bizi aseguru kolektibo baten bidez plantillako langile guztiak aseguraturik edukitzeko. Aseguru hori bidezko den konpainia batekin hitzartuko du.

Aseguraturik egoteko, ezinbesteko betebeharra legez enpresako plantillan egotea da. Enpresaren kontu izanen dira aseguru konpainiarekin egin beharreko izapide guztiak, asegurua hartu eta uzteko jakinarazpenei buruzkoak.

Hala ere, enpresak ez du inolako erantzukizunik hartuko bere gain aseguru konpainiak uko egiten badio langileren bat aseguratzeari edo horrek eskatzen zaizkion datuak ematen ez baditu edo akatsik edo gezurrik egiten badu. Hori dena langile horrek aseguru konpainiaren aurka egin ditzakeen legezko ekintzak deusetan galarazi gabe.

Langile bakoitzaren alde aseguraturiko arrisku eta kapitalak (lehen aipatu diren baldintzetan) honakoak dira:

-Berezko heriotzagatik: 6.430 euro.

-Istripuz hiltzeagatik: 12.850 euro.

-Lan orotarako erabateko ezintasunagatik: 6.430 euro.

-Ohiko lanbiderako ezintasun osoagatik: 3.215 euro.

Prestazio bakoitzaren baldintza eta bateraezintasunak aseguru konpainiaren banakako polizan zehaztuko dira, artikulu honetan aipatzen diren berezitasunak berezitasun.

Prestazioak eta horiek sortzeko izapideak Fagor Ederlan Tafalla, S. Coop. enpresaren bidez eskatuko zaizkio. Langileak, harturiko prestazioarekin ados ez badago, errekurtsoa aurkezten ahalko du, zuzenbidean bidezko denaren arabera.

VI. KAPITULUA

Jarduera sindikala

57. artikulua: atal sindikalak.

Legezko sindikatu bakoitzean afiliaturiko langileek enpresako atal sindikal bat osatu ahalko dute.

Gutxienez botoen %10 edo afiliatuen %10 lortzen duten sindikatuetako atal sindikalek ordezkari sindikal hauek izanen dituzte:

Tamaina: 251-750.

Afiliatuen portzentajea: 10

Botoen portzentajea: 10

Delegatuen kopurua: 1

Ordu kopurua hilean: 40

Tamaina: 751-2.000.

Afiliatuen portzentajea: 10

Botoen portzentajea: 10

Delegatuen kopurua: 2

Ordu kopurua hilean: 40

Botoen %10 edo afiliatuen %10 baino gutxiago lortzen duten atal sindikalek ordezkari sindikal bana izanen dute.

Plantilla osoaren %10 bederen afiliatua duten atal sindikalek, haien afiliatu guztietarako (ez banaka), gehienez ere 5 egun izanen dituzte urtero, ordaindu gabe, sindikalgintzako ikastaroetan, zentralaren biltzarretan eta antzeko jardueretan parte hartzeko. Lizentzia egun horiek erabiltzeko derrigorrezko izanen da sindikatuak 48 ordu lehenagotik parte ematea egun bat bakarra hartu behar bada, eta 72 ordu lehenagotik, ordaindu gabeko egun bat baino gehiago hartu nahi bada.

58. artikulua: atal sindikalen bermeak.

Enpresako atal sindikalek berme hauek izanen dituzte:

a) Sindikatu edo lan arloko argitalpen eta oharrak enpresako lokaletan zabaltzea, beren afiliatuen kotizazioak biltzea eta afiliatze lanean aritzea; baina eskubide horiek erabiltzeak ez du trabarik sortuko produkzioko ohiko lan edo jardueran.

b) Enpresa Batzordeko postuak betetzeko hauteskundeetarako hautagaiak proposatzea. Batzordeko kideak zerrenda itxien sistemaren bidez hautatzen direnean, Batzordeko sindikatuek kargutik kendu ahal izanen dute edozein batzordekide, hautatu zuteneko sindikatutik alde egiten badu, eta haren ordezko langilea izendatu.

c) Ordezkari sindikalak hautatzea, atal sindikaleko afiliatuak enpresaren aurrean ordezkatu ditzaten.

d) Enpresari jakinarazi eta hark baimena emanez gero, sindikalista, ekonomialari, abokatu eta abarreko adituen zerbitzuak erabiltzea arazo kolektiboetan (negoziazio kolektiboa, lansarien berrikuspena, enplegu erregulazioko espedienteak etab.), horiek enpresako lokaletarako sarbidea dutela.

e) Hitzarmen honen 57. artikuluan ezarritako baldintzak betetzen dituzten enpresako atal sindikaletako delegatuek:

-Enpresak Enpresa Batzordearen eskura jarri beharreko argibide eta agiriak lortzen ahalko dituzte.

-Enpresak informazioa eman behar die, baita entzun ere, langileei taldean eragiten dieten arazoez, eta bereziki honako hauei buruz:

-Enplegu erregulazioko espedienteak.

-Enpresako lekualdaketa erabatekoak edo partzialak.

-Lan sistema berriak edo pizgarriak sartzea.

-Lanaren antolaketan funtsezko aldaketak sartzeko erabakiak.

-Arrazoi teknologiko edo ekonomikoen ondoriozko etenaldi edo iraungitze kasuetan enpresan gelditzeko lehentasunari dagokionez, Enpresa Batzordeko kideek bezalako tratamendua izanen dute.

f) Enpresak bere lokaletan atal sindikaletako afiliatuei bilerak egiten utziko die, lanorduetatik kanpo.

g) Afiliatutako edozein langileri hutsegite larri edo oso larriagatik diziplina neurriak ezartzerakoan, enpresako zuzendaritzak zehapenaren proposamena ordezkari sindikalari jakinaraziko dio, aldez aurretik atal sindikalak baldintza honen berri eman badio enpresari. Ondoko 48 orduen buruan, ordezkari sindikalak txostena eginen du, loteslea izanen ez dena, eta enpresak, besterik gabe, egoki iruditzen zaion zehapena jarri ahal izanen du.

59. artikulua: Ordezkari sindikalen ordu ordainduak.

Ordezkari sindikalen eta haientzako ordu ordainduen kopuruak indarra duen legeriari jarraituz ezarriko dira.

Hauteskunde sindikaletan gutxienez afiliatuen %10 edo botoen %10 lortzen duten atal sindikalek bi delegatu izanen dituzte, enpresako plantillak 750 langile baino gehiago baditu hauteskundeen garaian, edo delegatu bat, plantillak 750 langile baino gutxiago baditu.

Ordezkari sindikalek ordaindutako 40 ordu izanen dituzte hilean. Beren benetako lansariaz ordainduko zaizkie.

Ordu horiek erabiliz, ordezkari sindikalek, nahi badute, Enpresa Batzordearen edo langileen ordezkarien bileretan parte hartu ahal izanen dute.

60. artikulua: Enpresa Batzordea.

Enpresa Batzordea enpresako langileen ordezkaritza organoa da. Unean uneko legeria indardunean adierazten diren osaera eta bermeak dituzte, hitzarmen honetan berariaz ezarritakoak deusetan kaltetu gabe.

61. artikulua: Enpresa Batzordeko kideentzako ordu ordainduak.

Enpresa Batzordeko kideek lan arloko legeria indardunean ezarritako ordu ordainduak izanen dituzte beren eginkizunetan aritzeko.

62. artikulua: ordu metaketa.

Enpresa Batzordeko kideen eta ordezkari sindikalen orduak hilero metatu ahal izanen dira haietako bati (ordezkari sindikalak barne) emateko, ondoko baldintzak betetzen badira:

a) Sindikatu bereko kideen orduak metatzea, eta sindikatuko probintziako organoen baimena izatea.

b) Sindikatuak enpresako plantillan gutxienez %10eko afiliazioa izatea.

c) Metatutako orduak hartuko dituztenen izenak enpresari jakinaraztea aurreko hilean eta betiere hamabost egun lehenago.

d) Ordu-metaketak hitzarmenaren indarraldia amaitu arte irautea. Betiere, sindikatuak metaketa hori ezeztatu ahal izanen du.

Aurrean ezarritakoa gorabehera, Enpresa Batzordeko kideen eginkizun sindikaletarako ordu ordainduak ezin izanen dira beste metaketa batzuen xede izan, enpresako zuzendaritzak berariaz hala erabaki ezik.

Erakunde horietako kideentzat ezarritako ordu ordainduen barnean sartzen da enpresako zuzendaritzarekiko hileroko bilera arrunta eta zuzendaritzak, ordezkarien ekimenez, deitutakoak, baina ez dira kontatuko zuzendaritzaren ekimenez deitzen ahal diren gainerako bilerak.

63. artikulua: Enpresa Batzordearen eginkizunak.

Enpresa Batzordeak eginkizun hauek izanen ditu:

a) Laneko arauak beteko direla segurtatzea eta, orobat, laneko segurtasun eta higieneari buruzkoak eta gizarte segurantzakoak, enpresan indarrean daudenak. Aldi berean, zuzendaritzari gerta daitezkeen arau-hausteen berri emanen dio eta arauak betetzeko behar diren erreklamazioak eginen ditu.

b) Txostena egitea lanbide sailkapenerako administrazio espedienteetan eta legeak eskatuta beharrezko direnetan ere.

c) Enpresa batzordeari aldez aurretik behar den denboraz jakinaraziko zaio enpresak zein lanpostu bete gogo dituen, bai eta kontratu berrien modalitate berriak (finkoa, behin-behinekoa, lanaldi partzialekoa, etab.), horien arrazoiak, iraupena, lanbide kategoria eta gainerako baldintza orokorrak.

d) Jakinaraziko zaizkio langileek egin beharreko probak eta azterketak, halakorik egin behar izanez gero.

e) Urtero jakinaraziko zaio, enpresan segurtasun eta higienearen egoera zertan den eta horiek hobetzeko zein neurri hartu diren.

f) Jakinaraziko zaio eta kontsultatuko zein neurri hartuko diren, langileengan zuzeneko eragina izanen dutenak, eta bereziki gai hauei buruzkoak:

-Enplegu erregulazioko espedienteak.

-Enpresako lekualdaketa erabatekoak edo partzialak.

-Lan sistema berriak edo pizgarriak sartzea.

-Lanaren antolaketan funtsezko aldaketak sartzeko erabakiak.

Atal honetako gaietan, enpresaren jarduketen baliozkotasuna ezarri diren informazio eta kontsulta eskakizunen baldintzapean egonen da.

g) Ekoizpenaren antolaketa arloan edo hobekuntza teknikoetan egoki juzgatzen diren neurriak proposatzea enpresari.

64. artikulua: hiru hilabetean behingo argibideak - Isiltasuna

Zuzendaritzak hiru hilabetean behin argibideak emanen dizkio Enpresa Batzordeari negozioen bilakaeraz, ekoizpenaren egoeraz, merkaturako itxaropenaz eta inbertsioetarako planaz.

Enpresak hitzarmenaren mendeko atalburu kategoria bitarteko langileei buruz datu hauek emanen dizkie langileen ordezkariei, urtarrilaren 1ean gaurkotuak:

-Kategoria eta talde edo maila bakoitzean zenbat langile dauden.

-Talde bakoitzeko lansaria.

-Zuzeneko eskulangileak zenbat diren.

-Zeharkako eskulangileak zenbat diren.

-Aurreko urtean zenbat behin-behineko langile kontratatu ziren (hilabeteen arteko batez bestekoa).

-Hitzarmenaren mendeko langile guztien lansariak.

Enpresako Zuzendaritzak Batzordearekiko bileretan emaniko argibideak isilpekoak izanen dira. Enpresa Batzordeko kideak behartuak daude isilpeari eustera, baita enpresako langileekin ere.

65. artikulua: diziplina arloko bermeak.

Enpresak edozein langileri diziplinako neurri larriak edo oso larriak ezarri baino lehen Enpresa Batzordeari horien berri eman beharko zaio, bere iritzia azaldu ahal dezan. Enpresako atal sindikalek ere txostena eman ahalko dute beren afiliatuei buruz.

66. artikulua: berme orokorrak.

Enpresa Batzordeko kideek eta ordezkari sindikalek berme orokor hauek izanen dituzte:

a) Enpresa aldez aurretik jakinaren gainean egonik, iragarki ohola erabili ahal izatea, sindikatuaren jakinarazpenak edo lan arlokoak bertan paratzeko.

b) Bilerak egiteko lokalak jartzea, denen erabilerako, enpresak ahal duen neurrian.

Enpresa Batzordearen bileretarako deiak gutxienez 24 ordu lehenago egin behar dira, presako kasuak, behar bezala arrazoituak izan ezik, horrelakoetan aurreabisuak egiteko epea laburragoa izan baitaiteke. Ahal izatera, Enpresa Batzordearen bilerak aldez aurretik programatuko dira, behar den denboraz.

c) Hutsegite larriak edo oso larriak egin ondoriozko edozein diziplina neurri jarri aitzin, eta neurriok baliozkoak izan daitezen, zehapen proposamena egin behar zaio 24 ordu aurretik:

-Langileen ordezkarien kasuan, Enpresa Batzordeari.

-Ordezkari sindikalen kasuan, tokiko edo probintziako sindikatuari.

Ondoko 48 orduen buruan, erakunde hauek txostena eginen dute, loteslea izanen ez dena, eta enpresak, besterik gabe, egoki iruditzen zaion zehapena jarri ahal izanen du.

d) Hitzarmen honen 57. artikuluan adierazitako afiliazio portzentajea duten ordezkari sindikalek Langileen Estatutu indardunaren 68. artikuluan ezarritako bermeak izanen dituzte.

67. artikulua: ekintza sindikalerako arau orokorrak Enpresa Batzordearentzat eta atal sindikalentzat.

Ekintza sindikalerako ordu ordainduak erabiltzeko, gutxienez 24 ordu lehenago jakinarazi behar zaio enpresako zuzendaritzari.

Jarduera sindikalak ezin izanen du gainerako langileen lana eragotzi, ez eta produkzioaren ibilera ere. Langileek lanordutik kanpo beharko dute hitz egin beren ordezkari edo delegatu sindikalekin.

Enpresak ahalmena du lanpostuz aldatzeko, behin-behinekoz eta agintaldiak dirauen bitartean, euren jarduera sindikalaren ondorioz enpresaren prozesu orokorraren martxa normala larriki eragozten duten langileak.

Lanpostu aldaketa jakinarazi edo kontsultatuko zaio aldez aurretik Enpresa Batzordeari. Lekualdaketaren ondorioz, ukitutako langileari ezin zaio kalterik egin ez diru aldetik ez eta haren jarduera sindikalean ere. Lanpostu berria, enpresan diren aukeren barnean, aurrekoaren ahalik eta antzekoena izanen da.

Ekintza sindikalerako ordu ordainduak enpresan berean edo kanpoan erabiltzen ahal dira. Nolanahi ere, langileek justifikatu beharko dute haien erabilera, baina, ez da nahitaezkoa eguneko gai zerrenda edo jorratu beharreko gaiena aurkeztea.

68. artikulua: batzarrak.

Enpresak baimena emanen du batzar ordainduak egiteko, lanorduetan zein lanorduetatik kanpo: hitzarmen honen indarraldian gehienez ere 9 batzar eta 5 ordu. Batzar horiek enpresako langile guztienak izanen dira.

Enpresa Batzordeak eginen ditu batzarretarako deialdiak, bere ekimenez.

Enpresa Batzordeak batzar ordainduetarako deialdiak egin beharko ditu ezarritako mugen barnean, atal sindikal bateko ordezkariak hala eskatzen dionean, betiere atal horrek ordezkatzen dituen afiliatuak gutxienez enpresako plantillako langile guztien %33 badira.

Batzarra egiteko deialdia gutxienez 48 ordu aurretik jakinaraziko zaio enpresako zuzendaritzari, eta jakinarazpen horretan batzarraren eguna eta aztergaien zerrenda ezarriko dira.

Batzarra egiteko ordua enpresako zuzendaritzarekin ados jarrita ezarriko da.

Aparteko arrazoi oinarrituengatik, enpresak batzarra egiteko eguna aldatu ahal izanen du, eta, era berean, langileen ordezkariek 24 ordura murriztu ahal izanen dute aurreabisuaren epea.

Batzar horiek, ezarritako mugaraino, benetako lansarietan oinarrituta ordainduko dira, produkzio prima edo pizgarririk ezarena sartu gabe, ezta oporrak eta aparteko eskersariak ere, eta antzinatasuna gehituz.

Ordaindu gabeko batzarrei dagokienez, horiek lanorduetatik kanpo egiten jarraituko da.

69. artikulua: sindikatuen bilerak.

Plantilla osoaren %10 bederen afiliatua duten enpresako atal sindikalek gehienez ere 4 ordu izanen dituzte urtero, hitzarmen honen indarraldian, lanorduetatik kanpo bilera sindikalak egiteko. Bilera horiek haien afiliatuentzat soil-soilik izanen dira ordainduak. Bilera horiek enpresaren lokaletan nahiz kanpoan egin ahal izanen dira. %15eko afiliazioa duten atal sindikalen kasuan, paragrafo honetan aipatutako ordu kopurua hau izanen da: 6 ordu urtean. Eta afiliatuen portzentajea %20 bada, atal sindikalak urtero 8 ordu izanen ditu.

Ordezkari sindikalak eginen du batzar horietarako deialdia, gutxienez 48 ordu aurretik jakinaraziko dio enpresako zuzendaritzari, eta jakinarazpen horretan bileraren eguna eta aztergaien zerrenda ezarriko dira.

Salbuespenezko eta funtsezko arrazoiengatik, ordezkari sindikalak zilegi izanen du aurreabisua emateko 24 orduko epea murriztea.

Bilera horiek egiteko lokala enpresak Batzordearen edo atal sindikalen erabilera esklusiborako jarria ez bada, bilera egiteko ordua enpresako zuzendaritzarekin ados finkatuko da.

Batzar horiek benetako lansarietan oinarrituta ordainduko dira, produkzio prima edo pizgarririk ezarena sartu gabe.

Aurrean esandakoarekin bat, sindikatuek bilera horietan izandako afiliatuen izenen zerrenda bidali beharko diote enpresako zuzendaritzari, ordain diezaien.

Artikulu honetan aipatutako ordainsaria ordezkari sindikalaren bitartez ordaindu ahal izanen da, atal sindikalak hala erabakiz gero. Horretarako, erabakia enpresari jakinaraziko zaio, eta afiliatutako langile guztiek banaka egindako idazkiak erantsiko dira, diru kopuru hori beren ordezkari sindikalaren bidez ordaintzeko baimena ematen dutela dioena. Baimen horren indarraldia hitzarmenarena bera izanen da. Halakoetan, bileretara joandako afiliatu guztientzako ordainsari osoa emanen dio enpresak atal sindikaleko ordezkariari, banatu dadin. Sistema honen bidezko ordainsariek, lansari eta zerga aldetik, enpresak zuzenean langileei ordainduko balizkie bezalako araubidea izanen dute.

70. artikulua: Arau osagarriak.

Hitzarmen honetan berariaz arautu ez diren gai guztietan, Nafarroako Foru Komunitateko "Industria Siderometalurgikoa" sektorerako Lan Hitzarmen Kolektiboak eta une bakoitzean indarra duten gainerako legeek xedatzen dutenari jarraituko zaio, hitzarmen honetan itundutakoari aurka egiten ez badiote.

71. artikulua: itundutakoari lotura.

Bat.-Hitzarmen honetan lanaldiaz, urteko oporrez eta ordaindutako orduez erabakitakoek, bai batzarrentzat bai Enpresa Batzordearentzat eta ordezkari sindikalentzat, multzo zatiezina osatzen dute urteko konputuan eta osorik hartuta; beraz, ezin zaie bereiz heldu.

Horrenbestez, ebazpen administratibo edo juridikoren baten ondorioz, hitzarmenaren indarraldian, gai horietako edozein aldatzen bada, ulertuko da diferentzia irentsi eta konpentsatu egin dela gainerako gaietan legez ezarritako gutxieneko balioen gainetik itundu diren hobekuntzekin.

Bi.-Itundutako baldintzen batasun eta zatiezintasunaren printzipioa ezarririk, lan administrazioko agintaritzak, bere eskumenak erabiliz, hitzarmen honetako itunen bat onetsiko ez balu, hura eraginkortasun praktikorik gabe geldituko litzateke, haren edukia oso-osorik hartuta.

72. artikulua: baldintzarik hoberenak.

Enpresan ezarritako lansari-baldintzarik hoberenei eutsiko zaie, oro har eta urteko konputuan hitzarmen honetan zehaztutakoak baino hobeak direnean, halatan non langile bat bera ere ez den kaltetua gertatuko ezartzen den lansari-politikaren ondorioz.

Lehen xedapen gehigarria.

Hitzarmen honetarako Interpretazio Batzorde Mistoa sortuko da, langileen eta enpresaren seina ordezkarik osatuko dutena.

Hitzarmen hau sinatu duten sindikatuek izendatuko dituzte langileen ordezkariak, azken hauteskunde sindikaletan lortu duten ordezkaritzaren proportzioan.

Hitzarmeneko klausulak interpretatu edo aplikatzerakoan bi aldeen artean sor daitezkeen zalantza eta desadostasun guztiak batzorde horren irizpenaren mende jarriko dira nahitaez.

Kontsulta horiek sindikatu sinatzaileetatik edozeinen edo enpresako zuzendaritzaren bidez tramitatuko dira.

Hitzarmen honetako Negoziazio Batzordeak, hitzarmenaren indarraldian, Interpretazio Batzorde Mistoaren funtzionamenduari buruzko erregelamendua egitea komeni den aztertuko du, haren interpretazio ebazpenek hitzarmeneko akordioek adinako eraginkortasun juridikoa izan dezaten, eta, erregelamendua egin badaiteke, Nafarroako Aldizkari Ofizialean argitaratzeko behar diren tramiteak eginen dira.

Xedapen indargabetzailea.

2009-2011rako hitzarmen kolektiboak indarra hartu baino lehen zeuden barne arau guztiak espresuki indargabetzen dira.

Azken klausula:

Ignacio Ugalde Barbería enpresako zuzendaritzaren ordezkari eta Langileriaren buruari hitzarmen hau Nafarroako Gobernuko Lan Zuzendaritza Nagusian aurkezteko zuzemenak esleitzen zaizkio, erregistratu, gorde eta argitara dadin, legezkoa den moduan.

Agiri hau sinatzen da, behar diren ondorioak sor ditzan, Tafallan, 2009ko otsailaren 19an.

Enpresako zuzendaritzaren aldetik, sinadura ulertezina.

Enpresa Batzordearen aldetik, sinadura ulertezina.

II. eranskina

Errelebo langileak

1. Arrazoiak.

Lanaldietan eskulangileak ordeztea, arrazoi hauengatik:

-Atseden koefizientearen arabera (AK) dagokion denbora bitartean.

-Norberaren kontuetarako (NK) denbora bitartean.

-Beroagatik: 35 ºC-ko edo hortik goitiko tenperatura.

2. Ukitutako atalak.

Galdatzea, Moldekatzailetza, Moldegintza eta Akaberak.

3. Arau orokorra.

Atalburutzak eskulangileen ordezpenak antolatu eta bermatuko ditu, lantaldean, makinetan, fabrikazio linea etengabeetan eta abarretan aritzeagatik lantokitik bakarrik modu antolatu eta koordinatuan lekutzea baitute.

Orotariko arau honi berariazko zehaztasun hauek gaineratzen zaizkio:

ATALA

INSTALAZIOA

LANPOSTUA

ARRAZOIA

KONPONBIDEA

DENBORA

OHARRAK

Moldegintza

Zim, Bi eta BII

Guztiak

AK eta NK

eskulangile bat

Errelebo bakoitza hasi eta ordu batetik erreleboa bukatu bitarte.

1983ko azaroaren 2ko akordioa

Moldegintza

Bührer I eta II

Guztiak

AK eta NK

Beste eskulangile bat aurrekoaz gain

Errelebo bakoitzeko azken hiru orduak.

Gutxienez ere 4 prestatzaile daudenean. 1983ko azaroaren 2ko akordioa

Guztiak

Guztiak

Beroa

35 ºC - 40 ºC

5 minutuko atsedenaldi erantsia orduko

Beroak diraueino

Muntatze postuetan neurtzekoa

1997ko ekainaren 25eko akordioa

Guztiak

Guztiak

Beroa

40 ºC edo gehiago

5 minutuko atsedenaldi erantsia orduko

Beroak diraueino

Lanpostuetan neurtzekoa

Enpresak zorroztasunez antolatuko ditu errelebo langileak eta lanpostuetako tenperaturak neurtuko.

III. eranskina

Primei buruzko salbuespenak

Bedaux sistemaren salbuespenak jaso dira lehenagoko akordio hauetatik:

ATALA

INSTALAZIOA

LANPOSTUA

EGOERAK

PRIMA

OHARRAK

Moldegintza

Zim, BI eta BII

Guztiak

Geldialdiak eta plaka aldaketak

80

Ordenatu eta garbitzeko lanak egitea lanpostuetan edo bestelakoak geldialdietan.

1999ko apirilaren 28ko akordioa

Moldegintza

Hondarra, tresneria eta zaliak

Guztiak

Guztiak

80 finkoa

1999ko apirilaren 28ko akordioa

Moldegintza

Zim, BI eta BII

Guztiak

Makina aldaketa

Norberaren batez bestekoa

Makinaren jarduera handiagoa bada, jardueraren arabera ordainduko da.

1999ko apirilaren 28ko akordioa

Moldegintza

Zim. eta BI

Probak

Arruntak

Lan egiten duen instalazioaren arabera

* 2 instalazioek berdin lan egiten badute: 4 orduko batez besteko prima Zim. eta 4 ordu BI.

-Batek besteak baino ordu gehiago egiten baditu lanean: 8 ordu denbora gehien lan egiten duenaren batez besteko primarekin.

1995eko urtarrilaren 23ko akordioa

Akabera

Pangborn

Guztiak

"Instalazioari etengabeko arreta emanez" lan egiten da

86

"Jardueraren konpentsazioko osagarri" gisa.

1992ko urriaren 10eko akordioa

IV. ERANSKINA

Asteko konpentsazio-atsedenaldia hartzeko irizpideak Moldegintzan

Aurrekariak.

Maiatzaren hasieratik, bezeroaren eskariak bete behar direlako, atalean larunbat guztietan lan egin behar da.

Oraingo egoera.

Asteburuetako lanak konpentsatutako orduen saldoak sortzen ditu eta horiek hartzen direnean plantillako beharrak sortzen dira.

Enpresak behar horiek planifikatu behar ditu, plantillak eta horrenbestez bezeroentzako hornidura bermatzeko balioko duten neurri egokiak hartzeko.

Oraindik langileek ez dute konpentsatutako ordu gehiegi hartu; orduak metatu dituzte, geroago hartzeko asmotan.

Atsedenaldia hartzeko irizpideak.

Enpresak atalaren funtzionamendu egokia planifikatu dezan, irizpide hauek onartu dira:

1. Konpentsatutako lanaldietako 40 ordu baino gehiago metatzea.

40 ordu baino gehiago metatzen dituen langileak gutxienez egun bat hartu beharko du haiek sortu eta hurrengo astean.

Erakundeak finkatuko du eguna, atalaren ahalbideak eta beharrak kontuan hartuz.

2. Uztaileko plangintza.

Konpentsatutako egunen uztaileko plana, bai eta norberaren aukerako egunena ere, ekainaren 18rako adostu beharko da, hura betetzeko behar diren kontratazioak egin ahal izan daitezen.

Egutegian gehienez 3 eskulangile jarriko dira egun eta instalazio bakoitzeko kontzeptu hauetan: konpentsatutako lanaldia, jada ezarrita dagoen egun soberakina eta norberaren aukerako eguna.

3. Iraileko plangintza.

Aurreko puntuan azaldutako irizpide berberekin eginen da eta uztailaren 18a baino lehen amaitu beharko da.

4. Urrirako, azarorako eta abendurako plangintza.

Modu berean eginen da, irailaren 17a baino lehen.

V. eranskina

Lanaldiaren hasierari eta amaierari buruzko arauak Moldegintzan

1. Instalazioa gelditu aurretik egiten den azken erreleboko langileak.

-Langileak beren lanpostuetan egonen dira erreleboaren amaierako ordua jo arte.

-Arrak jartzen segituko dute erreleboaren amaierako ordua jo arte.

-Erreleboaren amaierako ordua jota moldekatzen segituko dute, arrekin muntatu diren kaxak amaitu arte.

2. Moldegintzako instalazio baten funtzionamenduaren hasiera eta amaiera.

Hasiera.

Aurreko egunean, lan programaren arabera erabakiko da ordu erdi lehenago etorri beharko den makina prestatzeko.

MAKINA

ESKULANGILEEN KOP.

KARGUDUNEN KOP.

OHARRAK

Zimmermann

4

1

Bührer 1

4

1

Tresneriaren ataleko edo zalietako langileen laguntza, behar izanez gero.

5

1

Astelehena.

Bührer 2

5

1

Tresneriaren ataleko edo zalietako langileen laguntza, behar izanez gero.

6

1

Labeetakoa hasten denean.

Amaiera.

Erreleboko arduradunak erabakiko du ordu erdi gehiago lan egin behar den moldekatzen amaitzeko eta makina behar bezala uzteko.

Lanaldiaren amaieran behar diren langileak:

MAKINA

ESKULANGILEEN KOP.

KARGUDUNEN KOP.

OHARRAK

Zimmermann

1

1

Bührer 1

2

1

Bührer 2

3

1

Lanaldiaren hasieran Moldegintzako instalazioetan egin beharreko lanak.

MAKINA

KOP.

EGIN BEHARREKO LANAK

Zimmermann,

Bührer 1 eta 2

1

Moldeak egitea eta muntatzea metala isurtzeko posizioraino.

2

Zaliak eta ontziak berotu eta burdina ateratzea ordu-ordurako.

3

Karruselean arrak berritzea.

Lanaldiaren amaieran Moldegintzako instalazioetan egin beharreko lanak.

MAKINA

KOP.

EGIN BEHARREKO LANAK

Zimmermann

1

Arrekin muntatutako kaxak paratzea.

2

Saldaren hondarrak hustea.

3

Wöhr orga garbitzea.

4

Historialaren orria amaitzea.

Bührer 1 eta 2

1

Arrekin muntatutako kaxak paratzea.

2

Saldaren hondarrak hustea.

3

Galdatzeko zaliak aldatzea eta kulunkatze mahaiak garbitzea.

4

Zorroak biltegian uztea, garbitzea eta buza altxatzea.

5

Hobia garbitu eta hondarra botatzea.

VI. eranskina.

Langileen erreleboen mugigarritasuna Moldegintzako instalazioetan.

Enpresaren bezero guztiek ez dituzte eskaerak berdin programatzen, bakoitzak bere merkatu-eskariaren arabera baino. Horregatik, Moldegintza Ataleko instalazioetan errelebo gehiago edo gutxiago egin behar dira eskaera horien arabera. Azkenaldian Moldegintzan nagusiki sei errelebo egiten dira egunero, baina tarteka bost edo zazpi errelebo egin izan dira egunero.

Zimmermann, Bührer 1 eta Bührer 2 instalazioetan, oro har, egunean errelebo bat gehitu edo kentzen denean, instalazioko erreleboetako batean ari diren langileak fabrikako beste atal bateko lanetara aldatu behar izaten dira eta baita, eskuarki, langile horietako batzuen banaketa aldatu ere.

Arrazoi horiengatik langileen artean gertatzen den mugigarritasuna behin-behineko lanpostu aldaketatzat joko da, zenbat dirauen kontuan hartu gabe. Behin betiko aldaketa guztietarako, enpresako hitzarmeneko mugigarritasun arauetan ezarritakoari jarraituko zaio.

Moldegintzako eguneroko erreleboak muntatu eta desmuntatzeari dagokionez, bi kasu berezi daude, tratamendu desberdinak dituztenak:

-Plantillaren irtenaldi kolektiboa Moldegintzako instalazio batetik.

-Banakako irtenaldia.

Plantillaren irtenaldi kolektiboa.

1.-Txandakako bi multzo edo talde ezarri dira:

-Bührer 1 eta Bührer 2 instalazioetako langileen taldea (egunero 3 errelebo osatu ohi dituzte).

-Zimmermann instalazioko langileen taldea (egunero 3 errelebo osatu ohi dituzte).

2.-Bührer 1, Bührer 2 eta Zimmermann instalazioetan geratzen diren erreleboek langile gehiagoren beharra badute programarengatik edo langileen bajengatik, amaitzen den erreleboko langile batzuk gehituko zaizkie. Langileak behar diren hurrengo aldietan, amaitzen den erreleboko langileak txandakatu eginen dira.

3.-Moldegintzako eguneroko errelebo bat desmuntatzerakoan beste atal batetik etorritako langileren bat ari bada Moldegintzako lanposturen batean, langile horrek lanpostua utzi eta bere jatorrizko atalera itzuli beharko du.

4.-Osasun Zerbitzuak, osasun egoera kontuan hartuz eta destinoko lanpostua aztertu ondoren, Moldegintzako langile batzuk salbuetsi ahal izanen ditu txandakatze horretatik eta beren ataletik irten behar horretatik.

5.-Behin-behineko eta taldeko aldaketa horietarako, 9 aste naturaleko aldia ezartzen da beste atal batzuetan egoteko, udako opor kolektiboetako denbora kontuan hartu gabe.

6.-Moldegintza Atalean soberan egondako erreleboa berriz ezartzen denean, erreleboak berregituratu eginen dira lehen bezala geratu daitezen.

7.-Irtenaldi kolektibo horiek zorrotz kontrolatuko dira.

8.-Irtenaldi kolektibo horietan hurrenkera hau aplikatuko da:

8.1.-Lehen aldiz Moldegintzako eguneroko errelebo bat desmuntatzen denean 1. erreleboa aterako da.

8.2.-Bigarren aldiz Moldegintzako eguneroko errelebo bat desmuntatzen denean 2. erreleboa aterako da.

8.3.-Hirugarren aldiz Moldegintzako eguneroko errelebo bat desmuntatzen denean 3. erreleboa aterako da.

9.-Erreleboen txandakatze prozesua, Moldegintzako eguneroko erreleboren bat desmuntaturik dagoen bitartean, honela eginen da harik eta bakoitzak goian adierazitako 9 asteak bete arte:

1. erreleboa > 2. erreleboa >3. erreleboa > 1. erreleboa

Banakako irtenaldiak.

1.-Moldegintzako instalazio bateko langileak txandaka aterako dira beste atal batzuetara, eta enpresan duten antzinatasunaren alderantzizko hurrenkeran, unean uneko langile soberakinen artetik. Enpresako Osasun Zerbitzuak langile batzuk salbuetsi ahal izanen ditu beren osasun egoera kontuan hartuta.

2.-Irtenaldien zerrenda eguneratua edukiko da, instalazio bakoitzean txandakatzen ahal diren langileak irteten diren egunen kopurua langile guztientzat berdina izan dadin epe jakin batean, ahal dela.

Txandakatze sistema hau Moldegintzako instalazio bakoitzeko lanaren arabera aplikatuko denez, gerta liteke instalazio batzuetan irtenaldi gehiago izatea besteetan baino.

3.-Ataletik irten eta 3 ordu baino gehiago kanpoan egiten badira egun bat kontatuko da, eta kanpoan denbora laburragoa egiten bada ez da deus ere kontatuko.

4.-Langileak bere atalera itzuli behar badu lanaldia bukatu aurretik, irteterakoan kargudunak adieraziko dio zein ordutan itzuli behar duen bere atalera.

Matxuragatik edo antzeko arrazoiengatik kargudunak ikusten badu langileak adierazi zaion ordua baino lehenago edo geroago itzuli beharko duela, berehala jakinaren gainean jarriko du ukitutako langilea.

5.-Ez da aldaketatzat joko, ondorio horietarako, makina bateko errelebo bateko langileek edo haietako batzuek Moldegintza Ataleko beste instalazio batean aritu behar izatea beren erreleboaren barnean, produkzio beharrengatik.

VII. eranskina

Primei buruzko salbuespenak

1. Bedaux sistemako primei buruzko salbuespenak:

1.1. Moldegintza:

Instalazioa: Bürher I.

Lanpostua: kontroleko eskulangileak, Moldekatzailetzako eta Burdingintzako traktore-gidariak eta galdatzaileak.

Egoerak:

Lanean emaniko denbora: 82,60ko prima.

Gelditzeko denbora: 80ko prima.

Osagarriak: (Norberaren batez besteko gisa ez dira kontatzen):

a) 850 kaxa/errelebo baino gehiago eginez gero, 1 puntuko osagarria emanen da jardueragatik.

b) 875 kaxa/errelebo baino gehiago eginez gero, 2 puntuko osagarria emanen da jardueragatik.

c) 900 kaxa/errelebo baino gehiago eginez gero, 3 puntuko osagarria emanen da jardueragatik.

Instalazioa: Zimmermann.

Lanpostua: kontroleko eskulangileak, Moldekatzailetzako traktore-gidariak eta galdatzaileak.

Egoerak:

Lanean emaniko denbora: 82,60ko prima.

Gelditzeko denbora: 80ko prima.

Osagarriak: (Norberaren batez besteko gisa ez dira kontatzen):

a) %78ko produktibitatea gaindituz gero, 1 puntuko osagarria emanen da jardueragatik.

b) %80ko produktibitatea gaindituz gero, 2 puntuko osagarria emanen da jardueragatik.

c) %82ko produktibitatea gaindituz gero, 3 puntuko osagarria emanen da jardueragatik.

1.2 Akabera:

Instalazioa: Iragazkiak - Bührer I linea.

Lanpostua: guztiak.

Egoerak:

Lanean emaniko denbora: 82,60ko prima.

Gelditzeko denbora: 80ko prima.

Osagarriak: (Norberaren batez besteko gisa ez dira kontatzen):

a) 850 kaxa/errelebo baino gehiago eginez gero, 1 puntuko osagarria emanen da jardueragatik.

b) 875 kaxa/errelebo baino gehiago eginez gero, 2 puntuko osagarria emanen da jardueragatik.

c) 900 kaxa/errelebo baino gehiago eginez gero, 3 puntuko osagarria emanen da jardueragatik.

Aplikazioa: laburpen gisa instalazio honi Moldegintza Ataleko Bührer I lineako prima bera aplikatuko zaio eta laneko errelebo berean.

Instalazioa: Iragazkiak - Zimmermann linea.

Lanpostua: guztiak.

Egoerak:

Lanean emaniko denbora: 82,60ko prima.

Gelditzeko denbora: 80ko prima.

Osagarriak: (Norberaren batez besteko gisa ez dira kontatzen):

a) %78ko produktibitatea gaindituz gero, 1 puntuko osagarria emanen da jardueragatik.

b) %80ko produktibitatea gaindituz gero, 2 puntuko osagarria emanen da jardueragatik.

c) %82ko produktibitatea gaindituz gero, 3 puntuko osagarria emanen da jardueragatik.

Aplikazioa: laburpen gisa instalazio honi Moldegintza Ataleko Zimmermann lineako prima bera aplikatuko zaio eta laneko errelebo berean.

1.2.1 Iragazkiak paratzeko lanaren antolaketa:

Linea edozein delarik ere, atalburutzak erabakiko du zenbat pertsona behar diren haiek ahalik eta ongien antolatzeko. Ohiko antolamendutik pertsona bat kentzen ahalko du egoerak horretarako bide ematen duenean, adibidez, blokeak irekirik edo ongi kokaturik jaisten direnean.

2. Moldegintza Ataleko lanaren antolaketa:

Linea edozein delarik ere, atalburutzak erabakiko du zenbat pertsona behar diren haiek ahalik eta ongien antolatzeko.

2.1 Errelebo langileak eta beroaren ondoriozko atsedenaldi erantsiak.

2001-2004rako hitzarmen kolektiboaren II. eranskinean eta 2001eko ekainaren 26ko aldaketan xedaturikoarekin arabera, hau erabaki da:

A) Aparteko egoeretan Moldegintza Atalean errelebo langilerik gabe lan egitea, gehienez ere ordu bat txanda bakoitzean, gehienez ere 60 txanda urtean, alegia, errelebo bakoitzean 20.

B) Epe hori bukaturik, atalburutzak erabakitzen ahalko du instalazioa 5 minutu geldiarazi edo NK edo AKrako esleituriko denbora berreskuratzea, errelebo langile baten bidez.

C) Kasu horretan, geldialdia "gelditzeko denboratzat" joko da eta osagarria zenbatzeko errelebo horretan minutuko eginiko kaxen batez bestekoa erreleboko 5 minutuekin biderkaturik hartuko da.

Akordio hau 2003ko ekainaren 1etik aurrera aplikatuko da.

VIII. eranskina

Primei buruzko salbuespenak

Galdatzaileen osagarria.

Galdatze Ataleko zuzeneko langileendako osagarri bat sortzen da, primako 2 puntu adinakoa, 2004ko urtarriletik hasita.

Galdatze Atalerako lanaldia hasi eta bukatzeko arauak Moldegintza Atalekoak izanen dira, hitzarmen kolektibo honen V. eranskinean aipatzen direnak alegia.

IX. eranskina

Emakumeen eta gizonen arteko tratu berdintasuna

Fagor Ederlan Tafalla, S. Coop. enpresako lan harremanek berdintasunaren eta bereizkeriarik ezaren printzipioak izanen dituzte gidari; besteak beste, ez da sexuarengatiko bereizkeriarik onartuko.

Enpresak eginahalik handiena eginen du genero berdintasuna lortzeko. Horretarako, neurriak hartuko dira gizonen eta emakumeen artean inolako laneko bereizkeriarik ez izateko.

Aurreko paragrafoko berdintasun neurriak, betiere enpresako zuzendaritzaren eta Enpresa Batzordearen artean adostasunik badago, berdintasun plan baten bidez hartuko dira. Legez ezarritako moduan eta baldintzetan garatu beharko da plan hori.

Berdintasunerako hartzen diren neurriak ondoko hauei egokituko zaizkie:

Berdintasunerako plan bat prestatu eta aplikatuko dute, aldez aurretik langileen legezko ordezkariekin hitz egin edo negoziatuta, egoki bada, baldin eta lan arloko aginteak zehapen prozeduran erabaki badu zehapen osagarrien ordez plan hori prestatu eta aplikatzea, aipatutako erabakian ezarri den moduan.

Berdintasunerako planak neurri multzo antolatuak dira, egoeraren diagnosia egin ondoren hartu direnak eta helburu dutenak enpresan emakumeek eta gizonek tratu eta aukera berdintasuna izatea, eta sexuagatiko bereizkeriarik eza.

Berdintasun planean finkatuko dira berdintasunaren arloko helburu zehatzak eta horiek lortzeko erabili beharreko estrategiak eta jardunbideak. Halaber, helburuen jarraipen eta ebaluaziorako sistema eraginkorrak ezarriko dira.

Ezarritako helburuak lortzeko, berdintasunerako planak arlo hauek uki ditzake, besteak beste: enplegua lortzea; laneko sailkapena; sustapena eta prestakuntza; ordainsariak; laneko denbora antolatzea, laneko, norberaren eta familiako bizitzak uztartzeko, emakumeen eta gizonen arteko berdintasunari dagokionez; eta sexu jazarpena eta sexuagatiko jazarpena.

Manu honetako aurreikuspenen arabera ezarri behar den berdintasun plana enpresa osorako izanen da.

Bermatzen da langileen legezko ordezkariek, edo, horrelakorik ez bada, langileek berek eskura izanen dutela berdintasun planari eta horren helburuak lortzeari buruzko informazioa.

Iragarkiaren kodea: F0911725