I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
532/2009 EBAZPENA, martxoaren 10ekoa, Osasunbidea-Nafarroako Osasun Zerbitzuko zuzendari kudeatzaileak emana, 2009. urtean Nafarroako Pirinioko langile medikoak egonkortzeko planerako toki entitateendako diru-laguntzetarako deialdia onesten duena.
2009rako Nafarroako Aurrekontu Orokorrei buruzko abenduaren 24ko 21/2008 Foru Legean "Pirinioko langile medikoak egonkortzeko planerako hitzarmenak" izeneko 547000-52300-4609-312202 kontu-saila ageri da, 100.000 euroz hornitua.
Eman diren txosten juridiko eta teknikoak ikusirik, kontu-sail horren helburua bakarrik Pirinioetako toki entitateendako diru-laguntzen deialdi bat egitea da.
Diru-laguntzaren helburu publikoa Nafarroako Pirinioan osasun laguntzaren prestazioaren iraupenean datza, eskualde horretako langile medikoak egonkortzeko, zerbitzuak emateko kontratatzen diren langileen txandaketa etengabea izaten baita.
Norgehiagoka emanen da diru-laguntza, Diru-laguntzei buruzko azaroaren 9ko 11/2005 Foru Legearen 17.1 artikuluan xedaturikoarekin bat, eta diru-laguntza emateko oinarri arautzaileak, beren edukian, bat datoz Diru-laguntzei buruzko azaroaren 9ko 11/2005 Foru Legearen 14. artikuluarekin.
Horrenbestez,
EBATZI DUT:
1. 2009. urtean Nafarroako Pirinioko langile medikoak egonkortzeko planerako toki entitateendako diru-laguntzetarako deialdia baimentzea.
2. Deialdiaren oinarri arautzaileak, ebazpen honen eranskinean azaltzen direnak, onestea.
3. 100.000 euroko gastua baimentzea, 2009rako Nafarroako Aurrekontu Orokorretako "Pirinioko langile medikoak egonkortzeko planerako hitzarmenak" izeneko 547000-52300-4609-312202 kontu-sailaren kargura, deialdi honen eginbeharrak finantzatzeko.
4. Deialdi honen eta bere oinarri eta egintzen kontra toki entitateek, espedientean interesatuak baitaude, administrazioarekiko auzi-errekurtsoa jartzen ahalko dute, Nafarroako Auzitegi Nagusiaren Administrazioarekiko Auzien Salari zuzendua, xedapena argitaratu eta biharamunetik hasita bi hilabeteko epean, alde batera utzi gabe aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen ekainaren 13ko 29/1998 Legearen 44. artikuluan aurreikusitako moduan eta epeetan.
5. Ebazpen hau Nafarroako Aldizkari Ofizialean argitaratzea.
6. Ebazpen hau "Nafarroako Pirinioaren Garapenerako Plan Estrategikoan" sarturik dauden oinarrizko osasun eskualdeetako udalerriei igortzea, alegia, Agoitzi, Auritzi, Izabari eta Zaraitzuko udalei, eta, gainera, Longidako, Irunberriko, Erromantzatuko, Urraulgoitiko eta Urraulbeitiko udalei, Osasunbidea-Nafarroako Osasun Zerbitzuko Oinarrizko Osasun Laguntzako Zuzendaritzari, Administrazio eta Antolaketa Zuzendaritzari, Ogasun Departamentuak Osasun Departamentuan duen Kontu-Hartzailetza Delegatuari eta Nafarroako Gobernuko Osasun Departamentuko Idazkaritza Tekniko Nagusari, behar diren ondorioak sor ditzan.
Iruñean, 2009ko martxoaren 10an.-Osasunbidea-Nafarroako Osasun Zerbitzuko zuzendari kudeatzailea, José Carlos Garde Celigueta.
Iragarkiaren kodea: F0912082
