I. NAFARROAKO FORU KOMUNITATEA
1.3. BESTELAKO XEDAPENAK
1.3.5. Estatutuak eta lan hitzarmen kolektiboak
236/2009 EBAZPENA, otsailaren 13koa, Arriskuen Prebentziorako eta Lanaren zuzendari nagusiak emana, "Beriaingo Udala" erakundearen langile funtzionarioentzako akordio kolektiboa erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 2/2009-F). Akordioa, hain zuzen, 2008-1-1 / 2011-12-31 aldirako da.
2009ko otsailaren 10ean sartu da departamentu honetan "Beriaingo Udala" erakundearen ordezkariek eta funtzionarioen ordezkariek 2008ko azaroaren 6an izenpeturiko dokumentazioa, enpresaren eta langileen ordezkariek erregistratu eta Nafarroako Aldizkari Ofizialean argitaratu dadin igorri baitzen. Akordio horretan 2008-1-1 / 2011-12-31 aldirako lan baldintzak ezartzen dira.
Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera; eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Halaber, departamentu horrek du abuztuaren 30eko 251/1993 Legegintzako Foru Dekretuaren 84. artikuluan aipatzen diren hitzarmen kolektiboak gauzatzeko eskumena. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,
EBATZI DUT:
1. "Beriaingo Udala" erakundearen akordio kolektiboa erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.
2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.
3. Ebazpen hau Nafarroako Aldizkari Ofizialean argitaratzea, orok jakin dezan.
Iruñean, 2009ko otsailaren 13an.-Arriskuen Prebentziorako eta Lanaren zuzendari nagusia, Imelda Lorea Echavarren.
Beriaingo Udaleko udalbatzak 2008ko azaroaren 6an egindako osoko bilkuran besteak beste erabaki zuen udalaren eta haren langileen arteko harremanak arautzen dituzten lan baldintzei buruzko akordioa onetsiko zuela; alkate-udalburuari ahalmena eman zitzaion enpresaren ordezkari moduan eta langileen ordezkariekin batera akordioa sina zezan. Akordioa Berrikuntza, Enpresa eta Enplegu Departamentura igorri zen, Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren eta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan xedatutakoaren arabera departamentu horrek duelako martxoaren 24ko 1/1995 Legegintzako Errege Dekretuko 90. artikuluan ezarrita dauden lan hitzarmen kolektiboak eta abuztuaren 30eko 251/1993 Legegintzako Foru Dekretuaren 84. artikuluan aipatzen diren akordio kolektiboak erregistratu, gorde eta argitaratzeko eskumena.
Beriaingo Udalaren ordezkaria Rafael Blanco Pena alkate-udalburua izan da eta langileen ordezkariak José García Ucle, Manuel Gómez García eta Jesús Izkue Apesteguía jaunak. Horrela, eta arestian aipatutako akordioa betez, Beriaingo Udalaren eta haren langileen harremanak arautuko dituzten lan baldintzei buruzko akordioa sinatu dute. Hona hemen akordioa:
BERIAINGO UDALAREN ETA BERE LANGILEEN ARTEKO HARREMANAK ARAUTUKO DITUZTEN LAN BALDINTZEI
BURUZKO AKORDIOA
1. artikulua. Eremua, aplikazioa eta indarraldia.
1. Akordio honen bidez arautuko dira Beriaingo Udalaren eta bertan lan egiten duten funtzionario eta administrazio kontratudun langileen arteko harremanak.
2. Akordioa 2008, 2009, 2010 eta 2011 urteetan aplikatuko da. (Legegintzaldia).
3. Akordioa berez luzatuko da urtez urte indarraldia amaitzen denean, berariazko akordio berririk egiten ez bada edo alderdietako batek salatzen badu. Eta horrela eginen da urtero, hitzarmen berria sinatu arte.
4. Aurreko akordioak bermatzen eta errespetatzen dira, bai eta indarrean diren xedapenen arabera eskuratutako eskubideak ere.
2. artikulua. Lanaldia.
1. Lanaldia Nafarroako Gobernuak bere funtzionarioentzat zehazten duena izanen da. 2008. urtean 1592 orduko lanaldia ezartzen da. Akordio hau indarrean dagoen bitartean, Nafarroako Gobernuko langileek dituzten ordu-konpentsazio berberak aplikatuko dira.
2. Udaltzainen kasuan, 1.592 orduko lanaldia ezarri da urtean, Nafarroako Gobernuko funtzionarioentzat ezarritako murrizpenekin; eguneko lanaldia, gutxienez, zazpi ordukoa izan behar da.
3. Atsedenaldia: lanaldian zehar 20 minutuko atsedenaldia ezar daiteke gehienez kafea hartzeko edo ogitartekoa jateko; atsedenaldi hau benetako lan denbora moduan hartuko da eta lantokitik kanpo hartu ahal izanen da. Atalburuek erabakiko dute atsedenaldia zer ordutan hartuko den, horretarako kontuan hartuta udal bulegoetan beti egon behar dela halabeharrei arreta ematen dion pertsonaren bat.
3. artikulua. Oporrak, lizentziak eta baimen ordainduak.
1. Oporrak:
a) Nafarroako Gobernuak bere funtzionarioentzat ezarritako oporrak izanen dira.
b) Zerbitzuaren beharrengatik oporrak ezin izan badira urtean zehar hartu, hurrengo urteko lehenengo hiruhilekoan hartu beharko dira.
2. Lizentziak eta baimenak:
a) Nafarroako Gobernuak bere funtzionarioentzat ezarritako lizentziak eta baimenak izanen dira.
b) Era berean, langilea bera medikuntzari lotutako kontsultetara, tratamenduetara eta azterketetara joan behar denean, mediku espezialistarenera betiere, edo ezkontideari, izatezko bikoteari, gurasoei nahiz seme-alabei (famili unitate berean bizi direnei) horietara lagundu behar dienean denbora jakin bat izanen du: behar beste denbora probintzian bertan, eta egun bat probintziatik atera behar denean. Horrelakoak, dena den, medikuak behar bezala arrazoituta egon behar dira.
3. Ordutegiak eta lan txandak:
Ordutegietan, egun ezarritako txandetan, egutegietan eta oporretan egindako aldaketak indarreko legeriaren arabera tramitatuko dira.
4. artikulua. Ordainsariak.
1. Aurrekontu orokorrei buruzko legeetan Nafarroako administrazio publikoetan lan egiten duten lan-kontratudun langile eta funtzionarioentzat ezarritako ordainsariak izanen dira 2008. urtean.
2. Hurrengo urteetan Beriaingo Udalak bere langile guztien erosteko ahalmena bermatuko du, urte bakoitzean Nafarroan ematen den egiazko KPIa Estatuan izan dena baino altuagoa bada. Kasu horretan, aldea ordainsariei aplikatuko zaie zuzenean; eragiketa hau finkagarria izanen da eta urte horretako urtarrilaren 1etik aurrera izanen ditu ondorio ekonomikoak. Horrela, hurrengo urteko ordainsariak aurrekontu orokorretan ezarritako ehunekoan gehituko dira. Halaber, hurrengo urteko urtarril edo otsaileko nominan sari bakarra ordainduko da, ezin finkatuko dena; aurreko urtean guztira sorturiko ordainsarien arabera kalkulatuko da sari hori eta Nafarroako KPIak aurreikusitako KPIa zenbatean gainditzen duen horrenbestekoa izanen da.
3. Herriko festetan, elurte eta izozteetan eta udalak behar duen beste kasu batzuetan aparteko orduak sartzeko konpromisoa hartzen duten kanpoko langileei %11ko jardun osagarria edo lanpostu osagarria ezarriko zaie.
4. Bulegoetan lan egiten duten D mailako langileei %3 gehituko zaie lanpostuko osagarria.
5. Udaleko albienteei %5eko arriskuagatiko plusa ezarriko zaie.
6. Udalak kanpoan lan egiteko kontratatzen dituen behin-behineko langileek ezarri zaizkien eginkizunen araberako mailan ezarritako soldata kobratuko dute, osagarri pertsonalik gabe.
5. artikulua. Aparteko orduak.
1. Zerbitzuko beharrak direla-eta sartzen dituzten aparteko orduak, Nafarroako Foru Komunitateko Administrazioaren funtzionarioei aplikatu beharreko araudian ezarritako moduan konpentsatuko dira.
6. artikulua. Famili laguntza.
1. Langilearen seme-alabek 23 urte bete arte jaso ahal izanen da famili laguntza, goi-mailako ikasketak edo lanbide heziketako moduluren bat egiten ari direla ziurtatzen bada eta, betiere, funtzionarioarekin eta haren kontura bizi badira eta Gizarte Segurantzan alta emanda ez badaude.
7. artikulua. Lan osasuna.
1. Udalak akordio hau sinatu ostean emanen dizkie langileen ordezkariei laneko arriskuei aurrea hartzeko plana eta lanpostu eta lantokietako arriskuen ebaluazioa. Nolanahi ere, langileei kalte egin diezaieketen lan inguruko arriskuak segurtasun eta osasun batzordeak txostena aurkeztu ostean ezabatuko dira. Txosten hori loteslea izanen da. Segurtasun eta osasun batzordea berehala eratuko da, ahalik eta arinen jardun dezan.
8. artikulua. Prestakuntza.
1. Langileei prestakuntzarako erraztasunak emate aldera, eta zerbitzuaren kudeaketak eta lanaren antolaketak horretarako bide ematen badute, udalak hitz eman du neurri hauek hartuko dituela:
2. Udalak proposatutako ikastaroak:
a) Ikastaroa lanaldi barruan egin beharrekoa bada, amaitu arte %100eko baimen ordaindua emanen da.
b) Ikastaroa lanalditik kanpo egin beharrekoa bada, udalak ordu horiek lan egindakotzat hartuko ditu urteko zenbaketa osoa egin behar denerako.
3. Langileek proposatutako ikastaroak, funtzionarioaren lanpostuari edo haren lanbide-karrerari zuzenean lotuta daudenean:
a) Lanaldi barruan egin beharrekoa bada, udalak %50eko baimen ordaindua emanen du. Gehienez ere 40 ordu langile bakoitzak urtean.
b) Lanalditik kanpo egin beharrekoa bada, urteko zenbaketarako orduen %50 hartuko da. Gehienez ere 40 ordu langile bakoitzak urtean.
9. artikulua. Aurrerakinak eta maileguak.
1. Aurrerakinetarako eta epe luzeko maileguetarako (interesik gabe itzultzeko) funtsa 25.000 eurokoa izanen da. Aurrerakin eta mailegu horiek orain arte bezala kudeatuko dira baina eskura daitekeen kopurua gehitu eginen da: langile bakoitzak 5.000 euro gehienez eskaera bakoitzean.
10. artikulua. Asegurua.
1. Bizi aseguruko poliza bat ezarriko da, 30.050,61 eurokoa, heriotzaren eta lanbiderako baliaezintasun iraunkor osoaren estaldura emanen duena. Eskolatzeko errenta moduan kopuru horri 1.080,83 euro gehituko zaizkio urtean, aseguratutako pertsonaren 4-22 urte arteko seme-alaba bakoitzeko.
2. Istripu-aseguruen poliza bat kontratatuko da. Aseguratua hiltzen bada estaldura 45.000 eurokoa izanen da baina Gizarte Segurantzaren erakunde kudeatzaileek edo laguntzaileek funtzionarioari edo lan-kontratudunari ezintasun iraunkor osoa edo partziala aitortzen badiote estaldura 85.000 eurokoa izanen da.
3. Langile guztientzat kontratatuko da erantzukizun zibileko poliza bat. Horrekin, lanaren ondoriozko erantzukizun guztiak estaliko dira.
4. Arestian aipatutako kopuruei Nafarroako KPIa gehituko zaie, hau da, akordio hau indarrean dagoen urte bakoitzari dagokion KPIa.
5. Urtero emanen zaizkie langileen ordezkariei aseguru horren kopia eta ziurtagiria.
11. artikulua. Mailaz igotzea, sustapenak eta lanpostua aldatzea.
1. Lanpostu hutsen deialdia egin baino lehen une horretan dauden langileen barne mugikortasuna bultzatuko da, Nafarroako Foru Komunitateak bere administrazio erroko langileentzat ezarritako baldintza berberetan.
2. Lekualdatzeko lehiaketak edo langileen igoerarako lehiaketa murriztuak eginen dira. Alkatetzak eta langileen ordezkariek negoziatuko dituzte lehiaketa horien baldintzak eta baremoa.
3. Funtzionarioek eta lan-kontratudun finkoek udalak deitzen duen lekualdatzeko edozein lehiaketatan parte hartu ahal izanen dute.
12. artikulua. Laguntza juridikoa.
1. Udalak laguntza juridikoa emanen die langile guztiei hark esleitutako zerbitzuen ondorioz demandaren bat jartzen badiete; udalak hartuko du bere gain demanda. Laguntza bera emanen die, gainera, langilearen eginkizunen ondoriozko egitateek ekarritako edozein motatako prozesu judizialetan.
13. artikulua. Eskubide sindikalak eta biltzeko eskubideak.
1. Akordio honen aplikazio eremuko langileen ordezkariek eta ordezkari sindikalek hogei orduko kreditua izanen dute hilabetean. Kreditu hori hiru hilabetean behin kontatuko da.
2. Langileen ordezkariek eta erakunde sindikalek biltzeko deia egin ahal izanen diete beren ordezkaritza esparruko langileei.
3. Batzarra lanaldian eginen bada, arau hauek bete beharko dira:
4. Batzarrak lanaldiaren hasieran edo bukaeran egin beharko dira. Salbuespenez, batzarrak lanaldiaren beste tarte batean egiten ahal dira, horrela kalte gutxiago egiten bazaio zerbitzuen ohiko funtzionamenduari.
5. Alkatetzak eman beharko du baimena batzarrak egiteko.
6. Baimena emanen da aipatu diren baldintzak betetzen badira. Salbuespenezko kasuetan izan ezik, batzarra egiteko baimena gutxienez ere berrogeita zortzi ordu lehenago eskatu beharko da. Kontrako ebazpenik ematen ez bada baimena emantzat joko da; batzarra egin baino hogeita lau ordu lehenago gutxienez jakinarazi beharko da ebazpena.
7. Batzarra udalarena den egoitza batean eginen bada, arestian ezarri bezala egin beharko da eskaera.
8. Edozein erakunde sindikaleko kide diren funtzionarioek eta lan-kontratudunek hiruhileko bakoitzean gehienez ere 12 ordutan parte hartu ahal izanen dute dagozkien atal sindikalek lanaldi barruan deitutako batzar eta bileretan.
9. Negoziazio mahaiko eta batzorde paritarioetako kideek modu ofizialean deitzen diren bileretara joateko behar beste denbora izanen dute; baina denbora hori ez da hartuko ordu sindikal moduan.
10. Langileen ordezkariak lan-kontratudun eta funtzionarioentzako lanpostuak betetzeko deialdiaren epaimahaian egonen dira, baita lekualdatzeko eta mailaz igotzeko lehiaketetan ere.
11. Udaleko langileak ukitzen dituzten gai orokorren berri emanen zaie langileen ordezkariei, horien gainean erabaki baino lehen, bai eta arau aplikagarria dela-eta haiengan eragina duten gai berezien berri ere.
12. Ordezkari sindikalek bilerak egiteko lokal egoki bat izanen dute.
14. artikulua. Batzorde paritarioa.
1. Batzorde paritario bat sortuko da akordio hau aplikatzean sor daitezkeen interpretazio arazoak konpontzeko. Langileen ordezkarien eta udalkideen kopuruak berdinak izanen dira batzorde horretan.
15. artikulua. Langileak.
1. Akordio honetan jaso ez den orotan, Nafarroako Administrazio Publikoetako Langileen Estatutuan ezarritakoa, aplikatu beharreko gainerako lege-xedapenak eta Nafarroako Gobernuak bere funtzionarioekin sinaturiko akordioa beteko dira.
2. Nafarroako Gobernuak bere funtzionarioekin sinatutako akordioaren aldaketek akordio honi eraginen diote. Hura eguneratu ahala akordio hau ere eguneratu eginen da.
3. Eta ados daudela adierazteko, Beriaingo Udalak eta bere funtzionario eta lan-kontratudun finkoek akordio hau sinatu dute.
Beriainen, 2008ko azaroan.
Enpresaren ordezkaria: Rafael Blanco Pena. Alkatea.
Langileen ordezkariak: Manuel P. Gómez García, José García Ucle eta Jesús Izkue Apesteguía.
Iragarkiaren kodea: F0910750
