27. ALDIZKARIA - 2009ko martxoaren 4a

I. NAFARROAKO FORU KOMUNITATEA

1.3. BESTELAKO XEDAPENAK

1.3.6. Beste batzuk

1/2009 FORU AGINDUA, urtarrilaren 12koa, Familia, Kirol, Gazteria eta Gizarte Gaietako kontseilariak emana, Haurren eta Nerabeen Arretarako Kontseiluaren osaera, antolaketa eta funtzionamendua arautzen dituen foru dekretuaren proiektua jendaurrean jartzen duena, Nafarroako Aldizkari Ofizialean argitaratuz.

Nafarroako Gobernuari eta Lehendakariari buruzko abenduaren 3ko 14/2004 Foru Legearen 61. artikuluari jarraikiz, kontseilari eskudunak zilegi du erregelamenduzko arauen proiektuak jendaurrean jartzea, arauaren ezaugarriengatik egokia iruditzen bazaio.

Familia, Kirol, Gazteria eta Gizarte Gaietako kontseilariak azaroaren 20an emandako 417/2008 Foru Aginduaren bidez, Haurren eta Nerabeen Arretarako Kontseiluaren osaera, antolaketa eta funtzionamendua arautzen dituen foru dekretuaren proiektua prestatzeko prozedurari ekiteko agindua eman da.

Familiaren, Haurraren eta Kontsumoaren Zuzendaritza Nagusiko Haur eta Nerabeentzako Sustapen, Laguntza eta Babesaren Zerbitzuak egindako txostenak adierazten du jendaurrean jarri beharra dagoela, Nafarroako Aldizkari Ofizialean argitaratuz, Haurren eta Nerabeen Arretarako Kontseiluaren osaera, antolaketa eta funtzionamendua arautzen dituen foru dekretuaren proiektua, hedadura handiagoa izan dezan eta, beraz, dekretua prestatzean herritarren parte hartze handiagoa izan dadin.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Legeak eta Haur eta Nerabeentzako Sustapen, Laguntza eta Babesari buruzko abenduaren 5eko 15/2005 Foru Legeak emandako eskudantziak erabiliz,

AGINDU DUT:

1. Haurren eta Nerabeen Arretarako Kontseiluaren osaera, antolaketa eta funtzionamendua arautzen dituen foru dekretuaren proiektua jendaurrean jartzea, Nafarroako Aldizkari Ofizialean argitaratuz.

2. Hilabeteko epea ematea, foru dekretuaren proiektua Nafarroako Aldizkari Ofizialean argitaratu eta biharamunetik hasita, alde interesdun guztiek egokiak iruditzen zaizkien alegazioak aurkez ditzaten Familia, Gazteria, Kirol eta Gizarte Gaietako Departamentuan.

Iruñean, 2009ko urtarrilaren 12an.-Familia, Gazteria, Kirol eta Gizarte Gaietako kontseilaria, María Isabel García Malo.

ERANSKINA

FORU DEKRETUAREN PROIEKTUA, Haurren eta Nerabeen Arretarako Kontseiluaren osaera, antolaketa eta funtzionamendua arautzen dituena.

ZIOEN AZALPENA:

Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44. artikuluak ezartzen du Nafarroako Foru Komunitateak erabateko eskumena duela adingabeen babesaren arloan.

Haurrentzako eta Nerabeentzako Sustapenari, Laguntzari eta Babesari buruzko abenduaren 5eko 15/2005 Foru Legearen seigarren xedapen gehigarriak xedatzen du Haurren eta Nerabeen Arretarako Kontseiluak sortuko direla, kasuan kasuko departamentuen, toki entitateen, profesionalen, politikoen, elkarteen, gurasoen, haurren eta nerabeen parte hartzearekin.

Nafarroako Foru Komunitateko Administrazioari buruzko abenduaren 3ko 15/2004 Foru Legeak Nafarroako Foru Komunitateko Administrazioaren organo kolegiatuen araubide orokorra erregulatzen du.

Horrenbestez, Nafarroako Gobernuak, Familia, Gazteria, Kirol eta Gizarte Gaietako kontseilariak proposaturik, 2008ko bilkuran, eta Nafarroako Kontseiluaren aldeko txostena ikusirik, honako dekretu hau onetsi du:

DEKRETATU DUT:

Artikulu bakarra.-Erregelamendua onestea.

Haurren eta Nerabeen Arretarako Kontseiluaren osaera, antolaketa eta funtzionamendua arautzen dituen Erregelamendua onetsi da. Foru dekretu honen ondoren txertatu da.

Azken xedapenetako lehena.-Erregelamendua garatzeko gaitasuna.

Ahalmena ematen zaio Familia, Gazteria, Kirol eta Gizarte Gaietako kontseilariari foru dekretu hau garatu eta betearazteko behar diren xedapenak eman ditzan.

Azken xedapenetako bigarrena.-Indarra hartzea.

Foru dekretu honek Nafarroako Aldizkari Ofizialean argitaratzen den egunean hartuko du indarra.

Iruñean, ............ Nafarroako Gobernuko lehendakaria, Miguel Sanz Sesma.-Familia, Gazteria, Kirol eta Gizarte Gaietako kontseilaria, María Isabel García Malo.

HAURREN ETA NERABEEN ARRETARAKO KONTSEILUAREN OSAERA, ANTOLAKETA ETA FUNTZIONAMENDUA ARAUTZEN DITUEN ERREGELAMENDUA

I. KAPITULUA

Xedapen orokorrak

1. artikulua. Xedea.

Foru dekretu honek Haurren eta Nerabeen Arretarako Kontseiluaren osaera, antolaketa eta funtzionamendua arautzen du.

2. artikulua. Helburuak.

Haurren eta Nerabeen Arretarako Kontseiluaren helburuak hauek dira:

a) Adingabeen babesaren arloko eztabaidagune kualifikatua eta gizartearen isla dena sortzea.

b) Gizartea bultzatzea adingabeen babesaren arloko politika orokorraren eraketan parte hartzera eta elkar eragitera.

3. artikulua. Izaera.

Haurren eta Nerabeen Arretarako Kontseilua Nafarroako Foru Komunitateko Administrazioak adingabeen babesaren arloan duen kontsulta eta aholkularitzarako kide anitzeko organoa da.

4. artikulua. Atxikipen organikoa.

Nafarroako Foru Komunitateko Administrazioan adingabeen babesaren arloan eskumena duen departamentuari organikoki atxikita dago Haurren eta Nerabeen Arretarako Kontseilua.

5. artikulua. Eginkizunak.

Haurren eta Nerabeen Arretarako Kontseiluak eginkizun hauek izanen ditu:

a) Adingabeen babesaren arloko foru legeen aurreproiektuen eta betearazte erregelamendu orokorren gaineko txostenak egitea, aginduzkoak baina ez lotesleak.

b) Adingabeen babesaren arloko proposamenak eta iradokizunak egitea Foru Komunitateko Administrazioari eta, hala behar denean, haiek eskatuta, gainerako administrazio publikoei eta, oro har, Nafarroan adingabeen babesean esku hartzen duten entitate edo pertsonei.

c) Nafarroako Foru Komunitateko Administrazioan adingabeen babesaren arloan eskumena duen departamentuari laguntza eta aholkuak ematea.

d) Nafarroako Foru Komunitateko Administrazioan adingabeen babesaren arloan eskumena duen departamentuak proposaturik, Foru Komunitatean haurrek eta nerabeek duten egoerari buruzko txosten eta azterlan orokor edo sektoriakak prestatzea.

II. KAPITULUA

Osaera

6. artikulua. Kideak.

1. Haurren eta Nerabeen Arretarako Kontseilua 19 kidek osatuko dute eta Nafarroako Foru Komunitateko Administrazioan adingabeen babesaren arloan eskumena duen departamentuko titularrak izendatuko ditu kide horiek.

2. Kontseiluko kideek kargua onartu beharko dute izendatu baino lehen, Nafarroako Foru Komunitateko beste administrazio publiko batzuen ordezkari edo adingabeen babesaren arloko erakundeen ordezkari direnean, baita norbanako gisa ari direnean ere.

3. Haurren eta Nerabeen Arretarako Kontseiluaren kideak atal hauetan sartuta egonen dira, hurrenez hurren:

a) Nafarroako Foru Komunitateko Administrazioaren ordezkari diren berezko kideak.

b) Beste administrazio publiko batzuen eta adingabeen babesaren arloko erakundeen kide diren ordezkariak.

c) Norberaren izenean ari diren kideak.

7. artikulua. Berezko kideak.

Haurren eta Nerabeen Arretarako Kontseiluaren berezko kideak hauek izanen dira:

1. Nafarroako Foru Komunitateko Administrazioan adingabeen babesaren arloan eskumena duen departamentuko titularra.

2. Adingabeen babesaren arloko eskumenak bere esku dituen zuzendari nagusia.

3. Adingabeen babesaren arloko eskumenak erabiltzea dagokion zerbitzuko zuzendaria, arlo horretako eskumena duen zuzendaritza nagusiaren mendean.

4. Adingabeak Babesteko Ataleko burua.

5. Administrazio publikoko teknikari bat, arlo juridikokoa, adingabeen babesaren arloan espezializatua, idazkari lana eginen duena.

8. artikulua. Beste administrazio publiko batzuen eta adingabeen babesaren arloko erakundeen kide diren ordezkariak:

1. Honako hauek izanen dira Haurren eta Nerabeen Arretarako Kontseiluko kide, ordezkatzen dituzten entitateek proposaturik:

a) Nafarroako Udal eta Kontzejuen Federazioaren ordezkari bat.

b) Nafarroako unibertsitateen bi ordezkari.

c) Nafarroako Justizia Auzitegi Nagusiko Botere Judizialaren ordezkari bat; haren jurisdikzioan, betiere, adingabeen babesaren arloko gaiak landu behar dira.

d) Nafarroako Justizia Auzitegi Nagusiko Fiskaltzaren ordezkari bat.

2. Halaber, Haurren eta Nerabeen Arretarako Kontseiluko kide izanen dira, adingabeen babesaren arloko eskumenak dituen zuzendari nagusiak izendaturik, Administrazioak berak jartzen duen epean aurkezten diren hautagaitzen artetik, adingabeen babesaren arloan lan egiten duten elkarte eta profesionalen sei ordezkari, haiek guztiak ordezkatuz.

9. artikulua. Norberaren izenean ari diren kideak.

Haurren eta Nerabeen Arretarako Kontseiluko kide izanen dira, adingabeen babesaren arloan eskumenak dituen zuzendari nagusiak izendaturik, adingabeen babesaren arloan entzute, esperientzia eta lotura handia duten hiru pertsona.

10. artikulua. Kontseiluko kideen agintaldiaren iraupena:

1. Haurren eta Nerabeen Arretarako Kontseiluko berezko kideek Nafarroako Foru Komunitateko administrazioan izendatuak izan diren karguan aritzen diren bitartean beteko dituzte beren eginkizunak.

2. Haurren eta Nerabeen Arretarako Kontseiluko gainerako kideen agintaldiaren iraupena lau urtekoa izanen da, izendapenaren ebazpena ematen den egunetik hasita.

3. Ez dago denbora mugarik Haurren eta Nerabeen Arretarako Kontseiluko kideen agintaldi kopuruan.

11. artikulua. Kargu uztea.

Haurren eta Nerabeen Arretarako Kontseiluko kideek arrazoi hauengatik utziko dute kargua:

a) Uko egitea.

b) Heriotza.

c) Agintaldia bukatzea.

d) Adingabeen babesaren arloan diharduten administrazio publikoetako eta 8. artikuluan aipatu erakundeetako kide izaera galtzea. Kasu horretan, kargua utzi duen kidea izendatzeko erabili zen prozedura bera erabiliko da ordezkoa izendatzerakoan.

III. KAPITULUA

Antolamendua

12. artikulua. Haurren eta Nerabeen Arretarako Kontseilua Osoko Bilkura edo Batzorde Iraunkor gisa aritzen ahalko da.

1. Osoko Bilkura kide guztiek osatuko dute.

2. Batzorde Iraunkorrak kide hauek izanen ditu:

a) Adingabeen babesaren arloko eskumenak bere esku dituen zuzendari nagusia, batzordeko buruaren eginkizunak beteko dituena.

b) Adingabeen babesaren arloko eskumenak erabiltzea dagokion zerbitzuko zuzendaria, arlo horretako eskumena duen zuzendaritza nagusiaren mendean.

c) Adingabeak Babesteko Ataleko burua.

d) Administrazio publikoko teknikaria, arlo juridikokoa, idazkari lana eginen duena.

d) Haurren eta Nerabeen Arretarako Kontseiluko kideek beraien artean hautatutako bost kide.

3. Batzorde Iraunkorrak berariazko batzordeak eratzea onartzen ahalko du, baita haien funtzionamendua eta osaera ere.

IV. KAPITULUA

Funtzionamendua

13. artikulua. Kontseiluko burua.

1. Nafarroako Foru Komunitateko Administrazioan adingabeen babesaren arloan eskumena duen departamentuko titularra izanen da Haurren eta Nerabeen Arretarako Kontseiluko burua, eta izendapenak berarekin zituen eginkizunak betetzeari uztean utziko du kargua ere.

2. Haurren eta Nerabeen Arretarako Kontseiluko buruak Nafarroako Foru Komunitateko Administrazioari buruzko abenduaren 3ko 15/2004 Foru Legearen 31. artikuluak ematen dizkion eginkizunak izanen ditu.

3. Haurren eta Nerabeen Arretarako Kontseiluko buruak adingabeen babesaren arloko beste entitate edo aditu batzuk edo langile teknikoak gonbidatzen ahal ditu, Kontseiluko Osoko Bilkuran edo Batzorde Iraunkorrean parte hartu eta aztertu beharreko gaietan aholkua eman dezaten. Horiek, betiere, hitza izanen dute, baina botorik ez.

4. Kontseiluko burua kanpoan edo gaixorik badago edo legezko beste arrazoiren bat bada, Haurren eta Nerabeen Arretarako Kontseiluko buruordeak ordezkatuko du.

14. artikulua. Nafarroako Foru Komunitateko Administrazioan adingabeen babesaren arloko eskumenak erabiltzen dituen zuzendari nagusia izanen da Haurren eta Nerabeen Arretarako Kontseiluko buruordea eta, horretaz gain, Kontseiluko Batzorde Iraunkorreko buruaren eginkizunak beteko ditu; izendapenak berarekin zituen eginkizunak betetzeari uztean utziko du kargua ere.

15. artikulua. Idazkaria.

1. Haurren eta Nerabeen Arretarako Kontseiluak idazkari bat izanen du, administrazio publikoko teknikaria, arlo juridikokoa, hitza duela baina botorik ez, eta adingabeen babesaren arloan esperientzia eta prestakuntza duen pertsona bat izanen da; Foru Komunitateko Administrazioan adingabeen babesaren arloan eskumenak dituen zuzendari nagusiak libreki izendatuko du eta kargutik kenduko.

Hura kanpoan edo gaixo dagoenean edo legezko beste edozein arrazoirengatik arituko den ordezkoa ere izendatuko du.

2. Haurren eta Nerabeen Arretarako Kontseiluko idazkariak Nafarroako Foru Komunitateko Administrazioari buruzko abenduaren 3ko 15/2004 Foru Legearen 33. artikuluak ematen dizkion eginkizunak izanen ditu.

16. artikulua. Osoko Bilkura.

1. Haurren eta Nerabeen Arretarako Kontseiluaren Osoko Bilkura arrunta urtean behin eginen da.

2. Haurren eta Nerabeen Arretarako Kontseilua Osoko Bilkura berezian bilduko da kontseiluko buruak horretarako deialdia egiten duenean edo gutxienez kideen bi herenek eskatzen dutenean; bigarren kasuan, kontseiluko buruak hamar eguneko epean egin beharko du deialdia.

3. Kontseiluaren Osoko Bilkuraren eraketa baliozkoa izateko, beharrezkoa izanen da, lehenbiziko deialdian, kontseiluko burua edo haren ordezkoa eta gutxienez ere kontseilukideen erdiak egotea. Bigarren deialdian bilkura eginen da bertaratutako kideen kopurua edozein izanda ere, gutxienez ere zortzi badira betiere, eta bilkura baliozkoa izateko beharrezkoa izanen da kontseiluko burua edo haren ordezkoa bertan izatea.

4. Erabakiek balioa izan dezaten, bertaratutakoen gehiengoaren aldeko botoa beharko da. Bozketan berdinketarik izanez gero, kontseiluko buruaren kalitateko botoa izanen da erabakigarria.

5. Haurren eta Nerabeen Arretarako Kontseiluko Osoko Bilkuraren eginkizunak foru dekretu honen 5. artikuluan ezarritakoak izanen dira.

17. artikulua. Batzorde Iraunkorra.

1. Batzorde Iraunkorra batzordeko buruak deituta bilduko da, berak egokitzat jotzen duenean, batzordeak bere gain dituen eginkizunak kontuan harturik.

2. Batzorde Iraunkorraren eraketa baliozkoa izateko beharrezkoa izanen da batzordeko burua bertan izatea, bai eta, gutxienez, kideen erdiak ere.

3. Batzorde Iraunkorrak honako eginkizunak izanen ditu:

a) Eskuordeturik aritzea haren gain berariaz utzitako eginkizunetan.

b) Haurren eta Nerabeen Arretarako Kontseiluaren eginkizunei buruzko proposamenak igortzea Osoko Bilkurari, balora eta azter ditzan.

c) Haurren eta Nerabeen Arretarako Kontseiluaren Osoko Bilkurari Batzorde Iraunkorrak egindako jarduketen berri ematea.

d) Haurren eta Nerabeen Arretarako Kontseiluaren Osoko Bilkurako gai zerrendari jarraikiz aztertu beharreko gai eta kontuei buruzko informazioa eman eta proposamenak egitea, kontseiluko buruak gai zerrenda zehazteko duen eskumena ukatu gabe.

e) Haurren eta Nerabeen Arretarako Kontseiluaren jardueren urteko memoria prestatzea; Osoko Bilkuran aurkeztuko da, onets dezan.

4. Batzorde Iraunkorraren erabakiek balioa izan dezaten, bertaratutakoen gehiengoaren aldeko botoa beharko da. Botazioan berdinketarik izanez gero, kontseiluko buruaren kalitateko botoa izanen da erabakigarria.

18. artikulua. Aktak.

1. Idazkariak Haurren eta Nerabeen Arretarako Kontseiluaren Osoko Bilkurak edo Batzorde Iraunkorrak egiten dituen bilkuren aktak eginen ditu. Aktak ondoko hauek jaso beharko ditu nahitaez: bildutakoen kopurua, eguneko gaien zerrenda, bilkura non eta noiz egin den, eztabaidetako puntu nagusiak, bai eta hartutako erabakien edukia ere, eta horretarako prestatutako liburuan edo liburuetan agerraraziko da.

2. Aktak bilkura horretan berean edo hurrengoan onartuko dira.

3. Akten arauak eta kudeaketa Nafarroako Foru Komunitateko Administrazioari buruzko abenduaren 3ko 15/2004 Foru Legeko 34. artikuluan ezarritakoari lotuko zaizkio.

19. artikulua. Bitartekoak.

Foru Komunitateko Administrazioan adingabeen babesaren arloko eskumenak dituen organoak laguntza tekniko eta materiala emanen dio Haurren eta Nerabeen Arretarako Kontseiluari, kontseilu horrek bere eginkizunak ongi bete ditzan.

Iragarkiaren kodea: F0900652