Iragarkia

22. ALDIZKARIA - 2009ko otsailaren 20a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

1084/2008 EBAZPENA, abenduaren 15ekoa, Arriskuen Prebentziorako eta Lanaren zuzendari nagusiak emana, "Nafarroako Merkataritza eta Industria Ganbera Ofiziala" enpresaren lan hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 87/2008).

Departamentu honetan 2008ko abenduaren 2an sartu da "Nafarroako Merkataritza eta Industria Ganbera Ofiziala" enpresaren lan hitzarmen kolektiboaren testua, 32 artikuluz, 2 xedapen gehigarriz eta 4 eranskinez (2006rako ordainsarien taula barne dela) osatua, enpresaren ordezkariek eta enpresa batzordeak (CC.OO.) 2008ko urriaren 22an izenpetu eta onetsia.

Berrikuntza, Enpresa eta Enplegu Departamentua da lan hitzarmen kolektiboaren testua erregistratu, gorde eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera, eta kontuan hartuta hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Horiek horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,

EBATZI DUT:

1. Iruñeko "Nafarroako Merkataritza eta Industria Ganbera Ofiziala" erakundearen lan hitzarmen kolektiboa erregistratzea (kode zenbakia: 3108092), Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jarri ahal duela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, jende guztiak jakin dezan."

Iruñean, 2008ko abenduaren 15ean.-Arriskuen Prebentziorako eta Lanaren zuzendari nagusia: Imelda Lorea Echavarren.

NAFARROAKO MERKATARITZA ETA INDUSTRIA GANBERAREN ZERBITZUKO LANGILEEN 2007-2010 ALDIRAKO HITZARMEN KOLEKTIBOA

1. artikulua. Eremua, indarraldia eta osotasunarekiko lotura.

Hitzarmen honek Nafarroako Merkataritza eta Industria Ganbera Ofizialaren (aurrerantzean Ganbera) eta bere langileen arteko lan harremanak arautzen ditu.

Goi zuzendaritzako kontratuak aplikazio eremutik kanpo geldituko dira.

Hitzarmen kolektibo honek lau urte iraunen du. Bere indarraldia 2007ko urtarrilaren 1ean hasi eta 2010eko abenduaren 31n amaituko da, beste indarraldi diferente batzuk ezartzen dituzten artikuluetan izan ezik.

Sinatu dutenetako edozein aldek hitzarmenaren amaiera iragarri ahal du 2010eko urriaren 1a baino lehen. Hala egin ezean, hitzarmena automatikoki urte naturaletan luzatuko dela ulertuko da.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko den gutxieneko multzoa eratzen dute.

2. artikulua. Hobekuntza legalak eta pertsonalak.

Hitzarmen hau onesten den egunetik aurrera lege edo erregelamendu bidez ezartzen diren hobekuntzak, urteko guztirako kopuruak kontuak hartuta, hemen aurreikusita daudenen ordez aplikatuko dira.

Hitzarmen honetan finkatutakoak baino hobeak diren egoera eta baldintza pertsonalak "ad personam" berme gisa errespetatuko dira eta hala mantenduko dira modu zorrotzean.

Alde horretan Nafarroako Merkataritza eta Industria Ganbera Ofizialari buruzko azaroaren 19ko 17/98 Foru Legearen bigarren xedapen iragankorrean xedatuta dagoenari eta bat datorren araudiari jaramon eginen zaio; izan ere, horiek izanen dute lehentasuna hitzarmen honek beren aurka egiten badu.

3. artikulua. Ordainsariak eta lansarien berrikuspena.

Langile bakoitzarentzako urteko ordainsaria hitzarmen honek azaltzen dituen irizpideen arabera zehaztuko da, II. eranskinean agertzen diren lansarien taulen arabera.

2007, 2008, 2009 eta 2010. urteei dagozkien lansarien taulak honela ateratzen dira: aurreko urteko abenduaren 31n indarrean daudenei kontsumorako prezioen indizeak Nafarroako Foru Komunitatean izan den igoeraren baliokidea aplikatzen zaie.

Indarraldiaren urte bakoitzaren hasieran lansarien taulen behin-behineko igoera finkatuko da; horretarako, enpresak eta langileen ordezkariek akordioa eginen dute, Kontsumorako Prezioen Indizearen gehikuntzari buruzko kalkulu ofizialetan oinarrituta.

Ekitaldi bakoitzaren amaieran KPI erreala aplikatu den berrikuspen portzentajea baino handigoa bada, langileei paga bakarra ordainduko zaie. Horren zenbatekoa diferentzia oinarri hartuta kalkulatuko da, eta hurrengo urteetarako eguneratzeen oinarria eratzeko batuko da.

4. artikulua. Oinarrizko lansaria.

Langile bakoitzari esleitzen zaion oinarrizko lansaria hitzarmen honen II. eranskineko lansarien taulan ezarrita dagoena da eta ondoko kontzeptu hauek osatzen dute: kategoriako lansaria eta osagarri pertsonala.

Kategoriako lansaria langile bakoitzari -esleituta duen lanbide kategoriaren arabera- lan kontratuaren arabera nahiz geroko sustapenen ondorioz dagokion ordainsari finkoa da.

Osagarri pertsonala langilearen inguruabar pertsonalei dagozkien ordainsari kopuruek osatzen dute, besteak beste ezagutza bereziek, bere lanbide kategoriari dagokion lansaritik aparteko itun pertsonalek, etab.

Nolanahi ere, hitzarmen hau indarrean jartzen den egunean langileek jasotzen dituzten kopuruak errespetatuko dira.

5. artikulua. Antzinatasuna.

Antzinatasun osagarria aintzatesten da. Osagarri hori %7nako bost bosturtekoren baliokidea da, eta oinarrizko lansariri aplikatuko zaio.

Osagarri horren kopuruak zehazteko gaur egun indarrean dauden irizpideak kontuan hartuko dira. Modu horretan, gehieneko zenbatekoa ezin da izan aurreko urteko gehienekoari Nafarroako Foru Komunitateko kasuan kasuko urteko KPIaren gehikuntza aplikatzearen ondoriozko urteko kopurua baino handiagoa. 2006. urterako gehieneko zenbatekoa 9.632'8 euro izan zen.

Gehieneko kopuru hori gainditzen duten kopuruek indarrean iraunen dute antzinatasuna 1996. urtean izoztu zen unean orduan izoztu zena baino zenbateko handiagoa jasotzen zuen langile bakoitzarentzat.

6. artikulua. Karguko edo lanpostuko osagarria.

Ganberak osagarriak ezarri ahal izanen ditu hainbat langilerentzat, beharrezkotzat joz gero, beren lanpostuaren ezaugarriak eta une bakoitzean beren gain hartzen dituzten erantzukizunak kontuan hartuta. Osagarri hori kasuan kasu Ganberako zuzendaritzak proposatuko du.

Osagarri horiek jasotzen dituzten pertsonek osagarriok sorrarazi dituzten zereginak betetzeari uzten dioten unean, osagarri horiek desagertu eginen dira; era berean, zenbatekoek aldaketak izan ahal dituzte ekitaldi batetik bestera.

7. artikulua. Dedikazioko osagarria.

Dedikazioko osagarria hainbat jatorritatik sortzen den osagarria da, eta gaur egun jasotzen duten langileei soilik aplikatu ahal zaie.

Ganberako zuzendaritzak, osagarria jasotzen duten langile horiekin ados jarrita, gainerako langileekin homogeneizatzeko formula aztertuko du, eta osagarri hori ezin izanen zaie aplikatu etorkizunean sortzen diren egoerei.

Osagarri hori ezin izanen da inola ere parekatu dedikazio esklusiboko osagarriekin, Ganberan gaur egun ez baitago horrelakorik.

8. artikulua. Ordainsarien sistema.

Aplikatu ahal den ordainsarien sistema hamalau paga berdinetan likidatu beharreko urteko gutxieneko ordainsari finko bat ezartzen datza. Hamalau paga horietako bakoitzean kategoriako lansaria, osagarri pertsonala, antzinatasuna, karguko edo lanpostuko osagarria eta dedikazioko osagarria sartuko dira.

Hamalau paga horietatik hamabi arruntak dira eta bi apartekoak. Hamabi paga arruntak, sortzen direneko hilaren azken bi egunen eta hurrengo hilaren lehenengo bosten barruan likidatu eta ordainduko dira.

Ordainsariak urteko zenbateko gordinean finkatuko dira, eta Gizarte Segurantzaren eta PFEZaren arloan aplikatu ahal diren legezko araudien arabera hileko nomina likidatzeko unean indarrean dauden atxikipenak aplikatuko dira.

9. artikulua. Aparteko eskersariak.

Ganberaren zerbitzuko langileek aparteko bi eskersari jasoko dituzte.

Uztaileko aparteko eskersaria uztailaren 6a baino lehen likidatu eta ordainduko da.

Gabonetako aparteko eskersaria abenduaren 22a baino lehen likidatu eta ordainduko da.

Hona hemen eskersarien sortzapen ekonomikoa:

-Uztailekoa: urtarrilaren 1etik ekainaren 30era.

-Gabonetakoa: uztailaren 1etik abenduaren 31ra.

10. artikulua. Ordainsarien isilekotasuna.

Nafarroako Merkataritza eta Industria Ganberak eta langileen ordezkariek langile bakoitzaren ordainsarien isilekotasuna bermatuko dute. Ez dituzte zabalduko ordainsarien kopuru ekonomiko pertsonalizatuak, legezko xedapen, epai judizial edo administrazioko beharrizanek horien berri ematera behartzen duten kasuetan izan ezik.

Nafarroako Merkataritza eta Industria Ganberak ordainsari kontzeptuen eta horien zenbatekoen berri emanen die langile guztiei. Zuzendaritza Nagusiak, edo bere izenean giza Baliabideen sailak, urte bakoitzeko otsailaren 28a baino lehen idatziz langile bakoitzaren ordainsariaren kontzeptu eta zenbatekoen kuantifikazio zehatza nahiz kuantifikatzeko erabili diren kalkuluen formula jakinarazi beharko ditu banan-banan.

Nafarroako Ganberak langileen ordezkariei urte bakoitzaren hasieran kategoria bakoitzari buruzko lansari mailen, antzinatasuneko mugaren eta lansari kontzeptu bakoitzeko nahiz guztirako zenbatekoen berri emanen die. Ganberak horri buruzko informazio eskaera guztiak artatu beharko ditu, langile bakoitzaren banakako ordainsariaren isilekotasuna muga dela.

11. artikulua. Lansarien aurrerakinak.

Ganberaren plantillako langile finkoek lansarien aurrerakinak eskatu ahal izanen dituzte ezusteko pertsonalak konpontzen saiatzeko, eta Ganberak onartu egin beharko ditu, ondoko baldintzekin:

-Aurrerakinaren zenbatekoa, gehienez ere, langilearen urteko ordainsari gordin osoaren %15 izanen da, salbuespenezko inguruabarrak alde batera utzita.

-Eskatzen denetik, aurrerakina sei hilabete lehenago eginen da gehienez, eta aldi batean edo gehienez nomina arruntetan edo aparteko nominetan sei deskontu eginda itzuli ahal izanen da, eman eta geroko ondoz ondoko aldietan.

-Itzultzeko epea igarotakoan aurrerakina itzultzen ez bada, Ganberak ondoz ondoko deskontuak eginen ditu nominan, eta langileari lanbide arteko gutxieneko lansariaren hileko gutxieneko zenbatekoa bermatuko dio.

-Aurrerakina osorik itzultzen denetik aurrera gutxienez urtebete igaro beharko da beste aurrerakin bat emateko, salbuespenezko inguruabarrak gertatu ezean.

12. artikulua. Lanaldia, ordutegiak eta egutegia.

Plantilla Organikoaren zerrendan dauden langileen artean 8.00etatik 15.00etara arteko lanaldia dutenentzat urteko lanaldi hau ezarriko da: 1580 ordu hitzarmenaren indarraldiko lau urteetako bakoitzerako

Langile horientzat laneko ordutegia hau izanen da:

8,00etatik 15,00etara urte osoan.

Plantilla Organikoaren zerrendan dauden langileen artean 8.30etatik 17.00etara arteko lanaldia dutenentzat urteko lanaldi hau ezarriko da: 1724 ordu hitzarmenaren indarraldiko lau urteetako bakoitzerako

Langile horientzat laneko ordutegia hau izanen da:

-8:00etatik 15:00etara urtarrilaren 1etik 6ra (biak barne); uztailaren 1etik abuztuaren 31ra (biak barne); abenduaren 24tik 31ra (biak barne) eta urteko ostiral guztietan.

-8:30etatik 17:00etara, bazkaltzeko -gutxi gorabehera 14,00etatik 16,00etara- gehienez 60 minutu eta gutxienez 30 daudela, urteko gainerako zatian.

Ganberako langileek koordinatu egin beharko dute, jendearentzako zerbitzua otorduetarako adierazi den denboran bermatuta egon dadin.

Langileak malgutasuna izanen du adierazi diren ordutegiak aplikatzean, betiere Ganberako jendearentzako arretarako ordutegiari jaramon eginda.

Gainerako orduak, urteko lanaldia osatu arte, zerbitzuaren beharrizanen arabera eginen dira, orientazio modura 8,00etatik 18,00etara.

Lanegunak, jaiegunak eta jendearentzako arretako ordutegia urtean banatzea, eta horiekin zerikusia duten gainerako auziak, urtero abenduaren 24a baino lehen ezarriko dira, hurrengo ekitaldirako, egokia den Lan Egutegian. Egutegi hori, Ganberako Batzorde Betearazleak onetsi ondoren, aldez aurretik langileen ordezkariekin negoziatuta, Erakundeko iragarki oholetan jarriko da denek jakin dezaten.

13. artikulua. Oporrak.

Ganberako langile guztiek eskubidea izanen dute urtean ordaindutako oporraldia izateko. Oporraldiak 3 aste oso gehi bost lanegun solte edo taldekatu iraunen du.

Hiru aste osoetatik bi gutxienez ekainaren 15aren eta irailaren 15aren artean edota abenduaren 24aren eta urtarrilaren 6aren artean hartu beharko dira.

Gainera, Iruñeko zentroari atxikita dauden langileek uztailaren 6tik 14ra bitarteko oporraldia izanen dute, eta Tutera, Lizarra eta Tafallako zentroei atxikita dauden langileek udalerriko jaiei dagozkien egunak gehi beharrezkoak diren egun natural gehigarriak. Horrela, aipatu lantoki guztietan urtean lanaldi kopuru berdina eginen da.

Plantilla Organikoan 8.30etatik 17.00etara bitarteko lanaldiaren zerrendan agertzen diren langileek beste bost opor egun ordaindu izanen dituzte, solte edo taldekatuta.

Oporrak urte bakoitzeko urtarrilaren 1etik abenduaren 31ra bitarteko aldian sortuko dira.

Urteko oporrak nahitaez hartu beharko dira urte naturalaren barruan eta hurrengo ekitaldiko urtarrilaren 15a baino lehen. Egun hori baino lehenago hartu ez diren oporrak ezin izanen dira metatu, eta ezin izanen dira inola ere konpentsatu, ezinbesteko arrazoiengatik edo Zuzendaritza Nagusia baimendu egoerengatik ez bada.

Oporrak hartzeko egunak koordinatu egin behar dira, Ganberaren beharrizanak beti artatu ahal izateko.

Martxoaren 1a baino lehen Ganberako langile bakoitzak giza baliabideen arduradunari urteko opor egun guztiak hartzeko plangintza entregatuko dio. Horrela koordinazio faltako arazoak antzeman eta konpondu ahal izanen dira.

Giza baliabideen arduradunak, langile guztien oporren plangintza egin ondoren, produkzio arduradunarekin erkatuko du, eta martxoaren 31 baino lehen oporren zerrenda entregatuko zaie langile guztiei, jakinaren gainean egon daitezen eta zerbitzuak hobeto antola ditzaten.

Modu horretan egiten den oporren plangintza langileak aldatu ahal izanen du, baldin eta zerbitzuak ematea eragozten ez badu, eta bere zerbitzuko beste lankide batek aldez aurretik ezarri opor-koadroari eragiten ez badio, bien artean akordiorik egon ezean. Nolanahi ere, aldaketa horien berri eman behar zaie giza baliabideen eta produkzioaren arduradunei, eta haiek baloratuko dute aldaketa egitea komenigarria den.

Artikulu honetan aipatzen diren opor egun solteak -gehienez 5- langileak zatituta hartu ahal izanen ditu ondoko baldintzekin.

1.-Opor egun bakoitza bitan zatituko da (bi zatiak ez dira zertan berdinak izan behar).

2.-Ataleko arduradunari eta giza baliabideen arduradunari eskatu beharko zaie, beste lankide baten oporrekin bateraezintasunik dagoen edo zerbitzua emateko oztopo nabarmena den aztertzeko. Horiek dira, hain zuzen ere, eskabidea ukatzeko arrazoi bakarrak.

14. artikulua. Puntualtasuna.

Jendearentzako arreta ordutegia zorrotz bete behar da. Jendearentzako arreta ordutegian erakundeak eskaintzen dituen zerbitzu guztiak emateko aukera egon behar da. Jendearentzako arreta ordutegitik kanpo lan denbora malgutasunez banatu ahal izanen da, betiere hitzarmen honen 21. artikuluan ezarrita dagoenari jaramon eginda.

Hala ere, osasun arrazoiak edo salbuespenezko beste arrazoi pertsonal batzuengatik, ordutegiak langile bakoitzaren inguruabar partikularrei egokitu ahal izanen zaizkie, zerbitzuen kalitatea hondatzen ez bada, eta betiere zuzendaritzak aldez aurretik baimena ematen badu.

15. artikulua. Lanaldiaren barruko etenaldia.

Langileek lanaldian hamabost minutuko etenaldia egiteko eskubidea izanen dute. Etenaldi hori benetan lan egin den denbora gisa zenbatuko eta beraz, ordaindua izanen da eta ez da errekuperatu behar izanen.

Atal bakoitzaren zerbitzuko langileak koordinatu eginen dira etenaldi horrek Ganberaren zerbitzugintzan ahalik eta eraginik txikiena izan dezan.

Etenaldi hori Ganberaren instalazioen barruan eginen da, horretarako prestatuta dauden geletan.

16. artikulua. Plantilla organikoa.

Plantilla organikoko kide bakoitzak lanbide kategoria bat izanen du esleituta (I. eranskina).

17. artikulua. Joan-etorrietako gastuak eta kilometraje ordaina.

Ganberak bere langileei ordainduko dizkie lanbide jarduerak egiteagatik egiten diren joan-etorrien ondoriozko gastuak, gastuok horretarako ezarrita dauden ereduen arabera justifikatu eta baimendu ondoren.

Langileak, bere lana egiteko bere ibilgailuan joan-etorriak egin behar baditu, Ganberak, joan-etorrietako gastuak konpentsatzeko, une bakoitzean foru araudian Pertsona Fisikoen Errentaren gaineko Zergaren ondorioetarako gehieneko zenbateko salbuetsi gisa zehazten den kopurua ordainduko dio.

18. artikulua. Aldi baterako ezintasuneko egoerak.

Legearen arabera deklaratuta dauden aldi baterako ezintasuneko kasuetan, arrazoia edozein dela ere amatasunagatiko baja barne dela, Ganberak gizarte segurantzaren erregelamenduzko prestazio ekonomikoa osatuko du egoera horrek irauten duen denbora osoan, langileak baja hartzeko unean duen ordainsari gordinaren %100era heldu arte.

Aldi baterako ezintasuneko kasuetan bajaren partea bajaren bigarren egunetik aurrera aurkeztu beharko da.

Dena dela, langileak urtean duen bigarren bajatik aurrera, Ganberak bajaren partea lehenengo egunetik aurrera eskatu ahal izanen du.

19. artikulua. Lizentziak eta baimenak.

Ganberako langile batek lanpostutik alde egin behar badu legeak baimentzen duen arrazoi batengatik, zuzeneko nagusiari eskatu beharko dio gutxienez 24 ordu lehenago, baldin eta egoera aurreikusi ahal bada.

Baimen ordainduak eta ez berreskuratzekoak dira Langileen Estatutuak eta indarreko lan arloko legediak zehazten dituztenak, eta beren balioaren zenbatekoa gutxienez testu horietan ezarrita dagoena izanen da, baldin eta hurrengo zerrendan hobetuta agertzen ez badira edo Ganberak gerora hobetzen ez baditu.

Argibide gisara, hauek izanen dira:

a) Ezkontzagatik: 15 egun natural.

b) Anai-arreben, koinatu-koinaten eta lehen graduko ahaideen ezkontzagatik: egun bat.

c) Erditu baino lehenagoko azterketengatik eta erditzea prestatzeko teknikengatik: behar den denbora.

d) Seme-alaben jaiotzagatik 3 egun (joan-etorririk egin behar bada: 4 egun); langileak aukeratuko du horiek noiz hartu, jaiotzaren hurrengo hilabetearen barruan.

e) Bigarren gradura arteko odol edo ezkontza ahaidetasuneko ahaideen eritasunagatik edo ospitaleratzeagatik: 4 egun; langileak erabakiko du horiek noiz hartu, eritasunak irauten duen bitartean.

f) Ezkontidearen edo aurreko nahiz ondorengo ahaideen heriotzagatik: 5 egun; langileak erabakiko du horiek noiz hartu, heriotza gertatu eta hurrengo hilabetearen barruan.

g) Bigarren gradura arteko odol-ahaidetasuneko ahaideen heriotzagatik: 4 egun; langileak erabakiko du horiek noiz hartu, heriotza gertatu eta hurrengo hilabetearen barruan.

h) 2. gradura arteko ezkontza-ahaideen heriotzagatik: 2 egun.

i) Haurrari esnea emateko: Egunean ordubete, bi zatitan banatu ahal dela, edo lanaldia ordu erdi murriztea, 9 hilabetera arte. Baimen hau amak nahiz aitak hartzen ahal dute, beren nahierara.

j) Ohiko bizilekua aldatzeagatik: egun bat.

k) Betebehar publiko bat -adibidez, epaiketa batera joatea- betetzeko: behar den denbora.

l) Betebehar publiko bat -botoa emateko eskubidea- betetzeko: Bozketaren eguna, eta hurrengo egunean lanaldia bost orduz murriztea.

m) Norberaren eginbehar publiko saihestezin bat egitea.

n) Lana bilatzeko: Astean 6 ordu aurreabisuak iraun bitartean, Langileen Estatutuaren 52. artikuluko kasuetan.

o) Langileen ordezkaritza: Negoziazio kolektiborako eta prebentzio ordezkarien lanerako behar den denbora, eta lege araudian ezarrita dagoen gehieneko denbora.

Familia harremanei dagozkien lizentzia guztiak, a) idatz-zatian agertzen dena izan ezik, dagokion erregistroan inskribatuta dauden izatezko bikoteekin parekatu ahal izanen dira.

20. artikulua. Bizitza pertsonala, familiako bizitza eta lana uztartzearekin zerikusia duten neurriak aztertzeko batzordea.

Enpresaren eremuan bizitza pertsonala, familiako bizitza eta lana uztartzearekin zerikusia duten neurriak aztertzeko berariazko batzorde bat sortzea erabaki da.

Batzorde hori langile bakoitzak horri buruz egin nahi dituen eskabide zehatzak aztertzeaz arduratuko da.

Batzordea modu iraunkorrean osatuko dute giza baliabideen arduradunak eta enpresa batzordeko kide batek. Proposatu neurriak eragin handiena zein ataletan duen, horretako arduradunak edo arduradunek parte hartu ahal izanen dute.

Eskabide bakoitzerako, batzorde horrek adostasun bidez alternatiba edo konponbiderik egokienak bilatuko ditu, eta horiek zuzendaritzari proposatuko zaizkio modu ez loteslean, Zuzendaritza Nagusiaren iritziz egokiena den erabakia hartzeko.

Horri buruz hartzen den erabakia ez da sartuko negoziazio kolektiboaren berezko erabakietan, dena delako hitzarmen kolektiboa behin betiko idaztean onesten ez badira edo erabakia hartzeko unean berariaz hala erabakitzen bada.

21. artikulua. Langileentzako aseguru poliza.

Ganberak indarrean mantenduko du heriotzaren eta baliaezintasun osoaren, erabatekoaren edo baliaezintasun handiaren arriskuak estaliko dituen aseguru poliza. Polizaren gutxienezko zenbatekoa hamabi mila euro izanen da, eta beste hogeita hamar mila euro istripu batek heriotzaren eta baliaezintasun osoaren, erabatekoaren edo baliaezintasun handiaren ondorio berberak sortzen baditu. Onuraduna Ganberako langile bakoitzak zehazten duen pertsona izanen da. Urte bakoitzean langileen ordezkariei polizaren indarraldiaren frogagiria emanen zaie.

Bidaiak Nafarroako Ganberaren kontura luzaroan eta aldiro-aldiro egiten dituzten langileentzat, aurrekoari gehituko zaion asegurua harpidetuko da. Horrek zenbatekoak bikoiztuko ditu heriotza edo baliaezintasuna lanbide eritasunaren arrazoiengatik diagnostikatzen badira edo istripua laneko arrazoiengatik gertatzen bada.

Inguruabar horiek atzerrian gertatuz gero, Ganbera arduratuko da osasun laguntzako eta sorterriratzeko gastuetatik Gizarte Segurantza nazionalak edo Nafarroako Osasun Zerbitzuak itzultzen ez dituen zenbatekoaz.

Era berean, joan-etorriak Ganberaren kontura sarritan egiten dituzten langileen talde horrentzat, Ganberak bermatu eginen ditu lanbide jarduerarako beharrezkoak diren ordainbideen, telefono mugikorren eta ordenagailu eramangarrien lapurreta, ebasketa, galera, hondamen edo iruzurrezko erabilerak, aldez aurretik langileak dagokion polizian salaketa jartzen badu. Gehienez ere 3.000 euro ordainduko dira elementu berria emateko.

Ganberak arrisku inguruabar horiek aseguratu ahal izanen ditu beharrezkotzat joz gero.

22. artikulua. Laguntza aurreikuspeneko fondoa.

Ganberak urtero fondo hori gehienez 20.000 eurorekin hornituko du 2007. urterako. Muga hori hitzarmena aplikatzen den urte bakoitzean eguneratuko da gainerako oinarrizko lansariak orokorrean igotzen diren ehuneko berberarekin. Fondoaren helburua ondoren zehaztuko diren gizarte aurreikuspeneko beharrizanak artatzea da:

a) 210 euro langilearekin modu iraunkorrean bizi den 30 urtetik beherako seme-alaba bakoitzeko, baldin eta lanbide arteko gutxieneko lansaria baino handiagokoak diren diru-sarrerak ez baditu eta %33ko minusbaliotasun indizea edo handiagoa badu, behar bezala deklaratuta.

b) 180 euro langilearekin modu iraunkorrean bizi den 18 urtetik beherako seme-alaba bakoitzeko, baldin eta lanbide arteko gutxieneko lansaria baino handiagokoak ez diren diru-sarrerak baditu.

c) 150 euro langilearekin modu iraunkorrean bizi den 65 urtetik gorako aita edota amagatik, baldin eta lanbide arteko gutxieneko lansaria baino handiagokoak ez diren diru-sarrerak badituzte.

d) 120 euro haurtzaindegi eta antzekoei 3 urteko edo gutxiago seme-alabak zaintzeagatik ordaindu zaizkien gastuetarako, bi gurasoek familia bizilekutik kanpo lan egiten dutenean eta betiere langileak benetan egin duen gastua muga dela.

Lehenago adierazi diren kopuruak hitzarmena aplikatzen den urte bakoitzean eguneratuko dira gainerako oinarrizko lansariak orokorrean igotzen diren ehuneko berberarekin.

Horrekin parekatuko dira tutoretza, ume-ordetze edo harrera kasuak, indarreko legedian ezarritako baldintzen arabera.

Nolanahi ere, aurreikusi laguntza sorrarazi duen egitatea urteko uztailaren 1a eta gero gertatzen bada, kasu bakoitzean ezarri den kopurua erdira murriztuko da.

Laguntza horiek eskubidea duen langile bakoitzari banan-banan esleitu ondoren, soberan dagoen kopurua dentistek, oftalmologoek eta optikari diplomadunek agindu dituzten kontsultetarako, aginduetarako, ebakuntzetarako, sendagaietarako eta protesietarako -lentillak eta betaurreko graduatuak barne- langileak ordaindu dituen gastuen %25 estaltzeko erabiliko da, muga pertsonala urtean 180 euro dela, baldin eta gastu horiek beren beharrizanak betetzeko badira eta arrazoi estetiko hutsengatik egin ez badira, kristal graduatuen kostua alde batera utzita, bidezkoa bada.

Aurreko paragrafoan aipatu den soberako kopurua gertatzen diren kontingentzia guztiak artatzeko nahikoa ez bada, kopuru erabilgarria banatu eginen da, hainbanatuta.

Egokiak diren kopuruak likidatzeko, abenduaren 15etik hurrengo urteko urtarrilaren 15era langile bakoitzak langileen ordezkariei bere iritziz kopuruok hartzeko eskubidea sorrarazi duen egoera egiaztatzeko egokitzat jotzen dituen agiriak entregatuko dizkie (jaiotza eta egoitza ziurtagiriak, errenta aitorpena, minusbaliotasun deklarazioa, bizikidetasunaren ziurtagiria, fakturak, etab.).

Agiri horiek aztertu eta egoera guztiak egiaztatu ondoren, langileen ordezkariek interesatuei dagokien zenbatekoaren berri emanen diete, eta egokitzat jotzen dituzten alegazioak egiteko muga urtarrilaren 30a izanen da. Alegazio horiek artatu ondoren, langileen ordezkariek proposamena eginen dute langileak eta haiei dagozkien zenbatekoak adierazita, eta entregatu dituzten agiriak erantsita.

Entregatu diren agiriak aztertutakoan, likidazioa otsailean eginen da.

23. artikulua. Osasun azterketa.

Ganberak hala nahi duten langileei dagokien Mutuan urtero osasun azterketa egiteko aukera emanen die, eta azterketa hori finantzatuko du.

24. artikulua Lanbide prestakuntza.

Ganberak beren langileek Zuzendaritza Nagusiaren iritziz betetzen duten lanpostuan lanbide arloan hobetzeko egiten dituzten prestakuntza jarduerak edo langileen prestakuntzarako planean zehaztuta daudenak finantzatuko ditu, aurrekontuak horretarako aukera ematen badu, beren kostuaren %75 muga dela.

Prestakuntza jarduerak Ganberak antolatzen dituenean langileek eta bekadunek doan egin ahal izanen dituzte jarduera horiek.

Langileen prestakuntza jarduerak Ganberak finantzatzen dituenean, langileek jarduera horiek aprobetxatu dituztela egiaztatu beharko dute.

Ganberak jarduera prestakuntza jarduera batera langileak nahitaez joan behar direla zehazten duenean, jarduera horiek betiere laneko ordutegiaren barruan egin beharko dira, lanaldia eta oporrak errespetatuta.

Langileen prestakuntza planaren barruan dauden prestakuntza jarduerak jendearentzako arreta ordutegitik kanpo ematen direnean, benetan egin den lanaren %50 gisa zenbatuko dira, jarduera horietara joan izana egiaztatzen bada.

Ganberak bere langileentzat barneko prestakuntza planaren edo antzekoen barruan ematen dituen ikastaroen ordutegiak langileen ordezkariei kontsultatu ondoren ezarriko dira

25. artikulua. Laneko osasuna.

Nafarroako Ganberaren iritziz ez da zilegi langileen osasuna eta segurtasuna kaltetzea lan baldintza txarrak izateagatik.

Arlo honetan egin beharreko egintzak lan kalitatea eta ingurunea hobetzera zuzenduko dira, baita osasunaren prebentziora eta arriskuak kentzeko prebentziozko neurriak bultzatzera ere.

Langileek jarduera horietan guztietan parte hartuko dute gai honetan eskumena duten organoen bidez. Nolanahi ere, laneko osasun eta segurtasunaren arloan aplikatu ahal den araudian xedatuta dagoenari jarraituko zaio.

26. artikulua. Lanbide erantzukizuneko asegurua.

Nafarroako Ganbera uneoro izanen da bere langileen jardueren bermatzaile eta erantzule, ondorio guztietarako, jarduera horiek beren laneko jarduerarekin edo lanbidearekin zerikusia badute.

Ganberak aseguru poliza bat harpidetu ahal izanen du bere langileen jardueren arriskua eta erantzukizunak estaltzeko.

27. artikulua. Norberaren ibilgailuarekin izaten diren istripuak.

Langile batek bere ibilgailuan kalteak izaten baditu Ganberarentzat laneko jarduera egiteko ibilgailu hori erabiltzeagatik, Ganberak kalte horien kostu osoa bere gain hartuko du, istripuaren inguruabarrak kontuan hartuta.

28. artikulua. Sustapena.

Ganberak erantzukizun handiagoko arloetan edo orain egiten dituztenenez bestelako zereginak dituzten arloetan sartzeko interesa duten langileak sustatu nahi ditu.

Horrenbestez, Ganberan beharrizana sortzen denean, zuzendaritza saiatu eginen da lanpostuak ezagutza, esperientzia eta trebetasunen aldetik eskatzen dituen eskakizunak betetzen dituen langile baten barne sustapena egiten, eta nolanahi ere, interesa duten langileek egiten dizkioten eskaintzak kontuan hartuko ditu.

Ildo horretan, halaber, Zuzendaritza Nagusiak konpromiso hau hartu du: langileei aldez aurretik behar bezala jakinaraziko die lanpostu berriak sortu direla edo lehendik dagoen lanpostu bat bete behar dela, barne sustapena indartzeko helburuz.

29. artikulua. Lanpostu hutsak betetzea.

Ganberaren barruan lanpostu hutsak betetzeari dagokionez, hitzarmen hau Ganberaren barne araubideko erregelamenduaren 45. artikuluan eta hurrengoetan ezarrita dagoenaren mendean egonen da.

Ganberako langileen ordezkariek unean-unean informazioa jasoko dute hautaketa prozesuen hasierari buruz, baita hautaketarako ezarri diren baldintzei eta balorazio irizpideei nahiz prozesu horretan egin diren ekintza, txosten, etab.ei buruz.

Era berean, zuzendaritzak langileen ordezkariei azken txostena bidaliko die hartu duen erabakiaren berri emateko eta ezarrita dauden irizpideen arabera erabakiak izan dituen oinarriak azaltzeko.

30. artikulua. Kontratazioa eta probaldia.

Nafarroako Ganberak enpleguaren egonkortasuna bideratuko du bere antolamenduaren eremuan, eta ahal dela bere zerbitzuko langileak iraupen mugagaberako kontratatuko ditu. Nolanahi ere, dauden kontratu modalitateak eta legezko beste alternatibak behar bezala erabiliko ditu.

Praktiketako kontratua erabiliz gero, oinarrizko lansariaren ordainsaria gutxienez dagokion eranskinean ezarrita dagoena izanen da.

Nafarroako Ganberaren zerbitzuan hasten diren langile guztiek probaldia egin behar izanen dute. Probaldi horrek legezko gehieneko iraupena izanen du eta ez da zenbatuko aldi baterako ezintasunaren denbora.

Probaldi hori igarotakoan, langilea automatikoki onartuko da, eta langile horri denboraldi hori ondorio guztietarako zenbatuko zaio.

Probaldi horrek iraun bitartean Nafarroako Ganberak zein langileak lan harremana suntsitu ahal izanen dute, eta aldeetako batek ere ez du izanen horregatik kalte-ordaina jasotzeko eskubiderik.

31. artikulua. Lanaldi partzialeko kontratazioak.

Langilearen eta Ganberaren artean akordioa eginda lanaldi osoko kontratu bat lanaldi partzialeko kontratu bihurtzeko aukera ezarri da. Akordio horretan langilea lanaldi osoa berriro egiten hasteko epeak ezarriko dira.

32. artikulua. Kaleratzea.

Arlo honetan aplikatu ahal den araudiak kasu bakoitzerako ezartzen dituen formalitateak alde batera utzita, Ganberako langile finkoetako bat ere ezin izanen da kaleratu aldez aurretik ganberako kontratazio organoaren aurrean alde biko espedientea egin gabe. Espediente horretan langileen ordezkaritzako organoei entzunen zaie.

LEHEN XEDAPEN GEHIGARRIA

Hitzarmen honetan aipatzen diren eranskinak bere zati banaezina dira:

I.-Kategoriak.

II.-Lansarien taulak (2007ako behin-behineko gehikuntzarekin (eguneratu gabe).

III.-Lanaldi zatituko lan egutegia.

IV.-Plantilla Organikoa eta lanaldi jarraituko langileak.

BIGARREN XEDAPEN GEHIGARRIA

Batzorde paritarioa

Hitzarmen honen edukia behar bezala interpretatu eta aplikatzeko batzorde paritarioa sortu da. Batzorde hori langileen hiru ordezkarik eta GAnberako hiru ordezkari osatuko dute. Batzordea komenigarritzat jotzen den aldi guztietan bilduko da, kideetako edozeinek hala eskatuta.

I. ERANSKINA

Kategoriak

1. I. Maila-A mailako teknikaria.

-Goi mailako tituluduna. Estatuko edo atzerriko goi mailako titulu edo diploma ofiziala duen pertsona, Ganberari lotua berariazko eginkizunak betetzeko, bere tituluak haietarako gaitasuna ematen baitio; betiere enpresari ematen dizkio zerbitzuak, hainbesteko finkoko lansaria jasotzen du eta ez dago loturik bere lanbideko ohiko ordainsarien eskalari.

-Lanbide kategoria honetan egon ahal izanen dira goi mailako titulu edo diploma ofizialik izan ez arren ganberako kontratazio organoak baimendu dituen pertsonak, beren ohiko jarduera eremuan esperientzia luzea izateagatik.

-B mailako teknikari batek, ganberako kontratazio organoak erabakita A mailako teknikari izatera igarotzen denean, kategoria hori apurka hartuko du.

2. II. Maila. B mailako teknikaria.

-Erdi mailako tituluduna. Estatuko edo atzerriko erdi mailako titulu edo diploma ofiziala duen pertsona, Ganberari lotua berariazko eginkizunak betetzeko, bere tituluak haietarako gaitasuna ematen baitio.

-Lanbide kategoria honetan egon ahal izanen dira erdi mailako titulu edo diploma ofizialik izan ez arren ganberako kontratazio organoak baimendu dituen pertsonak.

-Lanbide kategoria honetan egonen dira goi mailako titulu edo diplomak izan arren erdi mailako tituludunaren -eta ez goi mailako tituludunaren- zereginak betetzeko kontratatu diren pertsonak.

-Administrari espezializatu batek, ganberako kontratazio organoak erabakita B mailako teknikari izatera igarotzen denean, kategoria hori apurka hartuko du.

3. III.Maila.-C mailako teknikaria.

-Goi mailako edo erdi mailako tituludunak, etorkizunean lehen aipatu mailetarako azaldu diren zereginak bete ahal dituztenak, baldin eta duela gutxi sartu badira eta 28 urte baino gutxiago badituzte. Sartu direnetik gehienez 3 urte natural osorik igaro badira kontratu bakarrean edo ondoz ondoko kontratu batzuetan, I. edo II. mailan sartu beharko dira. Ezin izanen da kategoria hau erabili Ganberak lehenago A edo B mailetako teknikari gisa kontratatu dituen pertsonekin, edozein kontratu modalitatetan. Baldintza horiek aldatu ahal izanen dira unean uneko kasuetarako zuzendaritza nagusiaren eta enpresa batzordean arteko berariazko itunaren bidez.

4. Administrari espezializatua.

-Lanbide Heziketako edo Goi mailako Batxilergoko diplomaduna. Lanbide Heziketa edo estatuko edo atzerriko Batxilergo egokia duen pertsona, duen administrazio prestakuntzaren arabera Ganberari lotuta dagoena prestakuntza horrek ahalbidetzen dituen berariazko zereginak betetzeko, eta administrazio izaerako lanpostu batean esperientzia luzea izateagatik, gaitasun bereziak izateagatik eta bere erantzukizunpean ekimena eskatzen duten lanak ahalik eta ondoen egiteagatik ganberako kontratazio organoak hala erabaki duena.

-Lanbide kategoria honetan egonen dira erdi mailako edo goi mailako titulu edo diplomak izanik administrari zereginak betetzeko kontratatu direnak eta esperientzia luzea nahiz gaitasun bereziak dituztenak, eta beren erantzukizunpean ekimena eskatzen duten lanak ahalik eta ondoen egiten dituztenak, ganberako kontratazio organoak hala erabakita.

-Administrari laguntzaile batek, ganberako kontratazio organoak erabakita administrari espezializatu izatera igarotzen denean, kategoria hori apurka hartuko du.

5. IV. Maila.-Administrari laguntzailea.

-Ekimen eta erantzukizun mugatuak izanik, eta goragoko kategoriako langile baten menpean, administrazio teknikaren ezagutza eskatzen duten lanak egiten dituen langilea da.

-Lanbide kategoria honetan egonen dira erdi mailako, goi mailako, lanbide heziketako edo batxilergoko titulu edo diplomak izan arren administrari laguntzailearen zereginak betetzeko kontratatu diren pertsonak, ganberako kontratazio organoak berariaz hala erabakita.

II. ERANSKINA

Lansarien taulak

1.-Oinarrizko lansaria.

1.1.-Kategoriako lansaria (2006. urtea).

-A mailako teknikaria 35.657,06tik aurrera A mailako teknikaria laugarren urtean eta hurrengoetan.

-A 2 mailako teknikaria 33.393,13tik aurrera A mailako teknikaria hirugarren urtean.

-A 3 mailako teknikaria 31.129.22tik aurrera A mailako teknikaria bigarren urtean.

-A 4 mailako teknikaria 28.865,30etik aurrera A mailako teknikari sartu berria.

-B mailako teknikaria 28.865,30etik aurrera B mailako teknikaria laugarren urtean eta hurrengoetan.

-B 2 mailako teknikaria 26.424,48tik aurrera B mailako teknikaria hirugarren urtean.

-B 3 mailako teknikaria 23.983,65etik aurrera B mailako teknikaria bigarren urtean.

-B 4 mailako teknikaria 21.542,83tik aurrera B mailako teknikari sartu berria.

-C mailako teknikaria 15.000,00tik aurrera C mailako teknikaria.

-Adm. Esp. 19.379,92tik aurrera Administrari Espezializatua bigarren urtean eta hurrengoetan.

-Adm. Esp. juniorra 17.872,67tik aurrera Administrari espezializatua lehenengo urtean.

-Administrari laguntzailea 16.365,43tik aurrera Administrari laguntzailea.

1.2.-Osagarri pertsonala.

Hitzarmenean definituta dauden eta banakako ordainsarian zehazten diren kopuru pertsonalei dagokie.

2.-Antzinatasun osagarria.

Kopuruak hitzarmenean definituta daude eta banakako ordainsarian zehazten dira.

3.-Dedikazioko osagarria.

Kontzeptuak hitzarmenean definituta daude eta banakako ordainsarian zehazten dira.

III. ERANSKINA

2008. urterako lan egutegiari buruzko gaiak, Ganberako langile guztiei aplikatu behar zaizkienak

Jendearentzako arreta ordutegia:

1.-8.30etatik 14.30etara arteko lanaldi jarraituko denboraldian.

2.-Astelehenetik ostegunera 8.30etatik 17.00etara arteko lanaldi zatituko denboraldian.

Ostiraletan 8.30etatik 14.30etara.

Jaiegun ordainduak eta berreskuratzen ez direnak:

-Urte Berri eguna: urtarrilaren 1a.

-Jaieguna Tafallan: urtarrilaren 20a.

-San Jose: martxoaren 19a.

-Ostegun Santua.

-Ostiral Santua.

-Pazko astelehena.

-Langileen Eguna: maiatzaren 1a.

-Jaieguna Lizarran: maiatzaren 25a.

-Santa Ana (jaieguna Tuteran): uztailaren 26a.

-Santiago eguna: uztailaren 25a.

-Ama Birjinaren Jasokundea: abuztuaren 15a.

-Domusantu: azaroaren 1a.

-San Saturnino (jaieguna Iruñean): azaroren 29a.

-San Frantzisko Xabierkoa: abenduaren 3a.

-Konstituzioa: abenduaren 6a.

-Sortzez Garbiaren Eguna: abenduaren 8a.

-Eguberri eguna: abenduaren 25a.

-Eguberri biharamuna: abenduaren 26a.

IV. ERANSKINA

Plantilla organikoa

-Zuzendaritzako langileak.

Amaya Ariz (Ataleko arduraduna).

Amaya Erro (Ataleko arduraduna).

M.ª Luisa Goñi (Laguntza zerbitzuaren arduraduna) (1).

Jose M.ª Iribarren (Laguntza zerbitzuaren arduraduna).

Cristina López Manero (Lehendakaritza bulegoko burua).

Manuel Martínez (Idazkariordea eta ataleko arduraduna).

Teresa Nagore (Jarduneko idazkari nagusia eta ataleko arduraduna).

Marta Vera (Zuzendari nagusia).

-Teknikariak.

Rosi Arellano, Luisa Balanza, Conchi Biurrun, Javier Bordonaba (2), Pilar Cabañas, Ana Cañada, Natalia Castellanos, Celina Domaica, Olivia Elizari, Javier Esquíroz (3), Eva Fontecha, Elisa García, Ainara Garcia, Uxue Ibarrola, Jesús Izquierdo, Javier Legarrea (1), M.ª Angeles Les, Ana Lostalé (1), Nuria Machicot, Patricia Manso, Valentina Martín, Vanessa Martínez, Miguel Moncada, Silvia Moreno, María Múgica (4), Ana M.ª Muñoz, Cristina Oroz, María Sorbet, Nerea Portillo, Celia Poza, Juan Ignacio Puncel, Jesús Ros (1), Fernando San Miguel, Laura Sanz, Blanca Vicente, Paula Villamor, Patricia Villanueva , Pachi Yanguas.

-Administrazioko langileak.

Manuel Aldea, Olga Armentia, Cristina Cabrejas, Alicia Ciriza, Cristina Gorricho, Celina Jurío, M.ª José León, Gemma Lizaldre (2), Rosa Marín, Begoña Mina, Alvaro Mutilva, Edurne Oderiz, Eva Oteiza, Pili Pérez (2), Maite Del Portillo, Sonia Raposo, Neus Salanova, Isabel Santiago.

-Eszedentzian dauden langileak.

Silvia Azpilicueta, Carlos Erce.

(1) Lanaldi jarraitua duten langileak.

(2) Tuterako lantokia.

(3) Tafallako lantokia.

(4) Lizarrako lantokia.

Iragarkiaren kodea: F0819241