155. ALDIZKARIA - 2009ko abenduaren 18a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

1515/2009 EBAZPENA, azaroaren 9koa, Arriskuen Prebentziorako eta Lanaren zuzendari nagusiak emana, Corellako "Corellako Udala" enpresaren lan hitzarmen kolektiboaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 53/2009).

Departamentu honetan 2009ko azaroaren 2an sartu da "Corellako Udala" enpresaren lan hitzarmen kolektiboaren testua, 23 artikuluz, xedapen indargabetzaile batez, azken xedapen batez eta bi eranskinez osatua, enpresaren ordezkaritzak eta langileen delegatuek (ELA-STV) 2009ko apirilaren 6an izenpetu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoari jarraikiz, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan daude ezarrita. Horiek horrela, kontuan hartu da Lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1. artikuluak ematen dizkidan eskudantziak erabiliz,

EBATZI DUT:

1. Corellako "Corellako Udala" enpresaren lan hitzarmen kolektiboa (kodea: 3108852) erregistratzea Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau Negoziazio Batzordeari jakinaraztea, eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal dela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2009ko azaroaren 9an.-Arriskuen Prebentziorako eta Lanaren zuzendari nagusia, Imelda Lorea Echavarren.

CORELLAKO UDALAREN ETA BERTAKO LANGILEEN ARTEKO AKORDIOA 2008-01-01ETIK 2011-12-31RA BITARTERAKO

Corellan, bi mila eta bederatziko apirilaren seian, goizeko hamarrak direla, honako hauek bildu dira:

Alde batetik, José Javier Navarro Arellano jauna (NAN zk.: 16001231Q), Corellako Udaleko alkate-udalburua.

Eta betetik, langileen ordezkariak, hots, Milagrosa Gil García andrea, 16012512 G NANa duena, Yolanda Riccobene Liroz andrea, 52441927H NANa duena, eta Víctor Martínez Gil jauna, 16016392C NANa duena.

Corellako Udalaren zerbitzuko langileen lan baldintzei buruzko akordio honekin ados daudela adierazten dute eta, horren froga gisa, behean sinatzen dute.

Atarikoa

Corellako Udalak eta haren zerbitzuko lan-kontratuko langileen ordezkari sindikalek adostu dute zerbitzu publikoak eraginkorrak eta kalitatekoak izateko giza baliabideek ere halakoak behar dutela izan eta, gainera, hori guztia bateragarri izan behar dela langileen lan baldintzak hobetzearekin.

Administrazioa eguneratu egin behar da gizartearen eskarien erronkari aurre egiteko, eskari horiei erantzun eraginkorra, azkarra eta kalitate onekoa emateko, argi utziz horrek dakartzan gastuen gainetik egon behar duela zerbitzuaren kalitateak.

1. artikulua. Aplikazio esparrua eta indarraldia.

a) Langileria: Corellako Udalaren zerbitzuko lan-kontratuko langileak. Hitzarmen honen aplikazio esparrutik kanpora utzi dira gizarte enplegu babestuaren programaren barruan dauden langile kontratatuak (begiraleak izan ezik); praktiketan aritzeko kontratatutako langileak eta zerbitzu anitzetako lan-kontratuko langile finkoak, horiei orain arte aplikatu den hitzarmena aplikatuko zaie eta.

b) Epea: 2008ko urtarrilaren 1etik 2011ko abenduaren 31ra arte.

c) Akordio hau indarrean egonen da, beste batek ordeztu arte.

d) Akordio honen helburu nagusia Corellako Udaleko departamentu guztiak Nafarroako Gobernuko departamentu homologoekin parekatzea da.

2. artikulua. Alderdi sinatzaileak.

Akordio honen sinatzaileak Corellako Udala eta udaleko lan-kontratuko langileen ordezkariak dira.

3. artikulua. Ordainsariak.

Ordainsariek egitura hau izanen dute:

1. Oinarrizko ordainsari pertsonalak: mailako hasierako soldata eta antzinatasuna.

2. Ordainsari osagarriak.

a) Oinarrizko ordainsari pertsonalak:

Hasierako soldata Nafarroako Gobernuak Nafarroako toki entitateen zerbitzuko langileentzat ezartzen duena izanen da.

Antzinatasun saria lan-kontratuko langile finkoei ordainduko zaie. Antzinatasun saria hirurtekoen arabera ordainduko da, Nafarroako toki entitateen zerbitzuko langileentzat erregelamendu bidez ezartzen dena adina. Osagarri hori jasotzeko kontuan hartuko da administrazio publikoek aitortutako antzinatasuna, eta horretarako, beharrezkoa izanez gero, behar diren ziurtagiriak aurkeztu beharko dira.

b) Ordainsari osagarriak: Nafarroako Administrazio Publikoetako Ordainsariei buruzko Erregelamenduaren arabera (158/1984 FD), ondoko osagarriak ordaintzen ahalko dira:

1. Dedikazio esklusiboko osagarria.

2. Bateraezintasuneko osagarria.

3. Lanpostuko osagarria.

4. Arrisku bereziko osagarria.

5. Lanaldiaren luzapeneko osagarria.

6. C, D eta E mailakoen osagarria, plantilla organikoan adierazi bezala.

Ordainsariak lanaldi murriztuan.

Guztientzako lanaldia baino laburragoa duten langileei, ezarrita dagoen lanaldi orokorra murrizten den hein berean jaitsiko zaizkie ordainsariak.

Hitzarmen honek ukitzen dituen eta txandaka aritzen diren Corellako Udaleko langileek, hau da, hiruhileko baten lanegun guztien heren batetik gorakoetan lanorduak aldatuak dituztenek, beren mailako hasierako soldataren %6ko diru konpentsazioa izanen dute.

Hitzarmen honek ukitzen dituen eta jaiegunetan aritzen diren Corellako Udaleko langileek mailaren araberako diru konpentsazioa hartuko dute, eta zenbatekoa erregelamendu bidez ezarriko da toki administrazioko funtzionarioentzat.

Horretarako, lanean egindako jaiegunetako diru konpentsazioa %50 gehituko da urte bakoitzean lanean egindako 34. jaiegunetik aurrera (kontuan hartuko dira, bakarrik, gutxienez lanaldiaren erdia jaiegunean dutenak).

Hitzarmen honek ukitzen dituen Corellako Udaleko langileek, gauez lan eginez gero, lanegun batean edo jaiegun batean izan, beren mailaren araberako diru konpentsazioa jasoko dute. Konpentsazio horren zenbatekoa Nafarroako Administrazio Publikoen zerbitzuko langile guztientzat erregelamenduz ezartzen dena izanen da. Horren ondorioetarako, gaueko lantzat hartuko da 22:00etatik hasi eta biharamuneko 6:00ak bitarte egiten dena.

4. artikulua. Familia laguntza.

Familia laguntza gisa Nafarroako Gobernuak bere funtzionarioentzat ezartzen duen kopuru bera ordainduko zaie lan-kontratuko langile finkoei.

5. artikulua. Lanaldia.

Lanaldia Nafarroako Gobernuak bere funtzionarioentzat zehazten duena izanen da.

a) Oro har, Nafarroako Administrazio Publikoen zerbitzuko Langileen Estatutuaren Testu Bateginaren 59. artikuluan eta hura erregelamendu bidez garatzen duten xedapenetan edo hura ordezten duen arauan xedatutakoari lotuko zaio.

b) Udalaren arlo guztietako egutegiak Udalaren eta arlo bakoitzeko langileen artean adostuko dira, gai horretaz Udalaren organo eskudunak dituen eskudantziak galarazi gabe.

6. artikulua. Oporrak eta baimenak.

a) Honi dagokionez, Nafarroako Administrazio Publikoetako funtzionarioen opor, lizentzia eta baimenen Erregelamendua onesten duen otsailaren 9ko 11/2009 Foru Dekretuan edo etorkizunean foru dekretu hori aldatzen edo egokitzen duten arauetan ezartzen denari jarraikiko zaio (11/2009 Foru Dekretuaren bidez indarrik gabe utzi zen urriaren 30eko 348/2000 Foru Dekretua eta haren aldaketak: uztailaren 2ko 144/2002 Foru Dekretua, Nafarroako Administrazio Publikoetako funtzionarioen opor, lizentzia eta baimenen Erregelamendua onetsi zuena, eta apirilaren 13ko 161/2007 Foru Agindua).

b) Oporraldia, gainera, eten edo atzeratuko da, amatasun-bajagatik, amatasunagatiko zein aitatasunagatiko lizentzia ordainduagatik eta aitatasunagatiko baimen ordainduagatik.

c) Langileak eta enpresa ados jartzen badira, oporrak beste egun batzuetan hartu ahal izanen dira.

7. artikulua. Lanbide prestakuntza.

-Prestakuntza, aldi berean, premia bat eta betebehar profesional bat dela aintzat hartuz, baita funtsezko faktore bat ere langileen motibazioa handitzeko, mailaz igotzeko eta mugigarritasuna bultzatzeko, Udalak prestakuntza eskaintza handitzeko konpromisoa hartzen du eta horretarako sindikatuen laguntza izanen du.

-Langile publikoei prestakuntzarako erraztasunak emateko, baldin eta zerbitzuaren kudeaketak eta lanaren antolaketak horretarako bide ematen badute, Udalak neurri hauek hartzeko konpromisoa hartu du:

a) Langileei erraztasunak ematea, lan orduetan Nafarroako Administrazio Publikoaren Institutuak, Familia, Gazteria, Kirol eta Gizarte Gaietako Departamentuak, Osasun Departamentuak, Kultura eta Turismo Departamentuak, Hezkuntza Departamentuak, Animsak, Nafarroako Udal eta Kontzejuen Federazioak, Espainiako Udal eta Probintzien Federazioak eta antzeko organoek antolaturiko prestakuntza ikastaroetara joateko, haien edukia lan-kontratuko langilearen lanpostuari edo lanbide karrerari lotua bada.

b) Urtean gehienez ere berrogei orduko baimen ordainduak ematea lanbide prestakuntza eta hobekuntzako ikastaroetara joateko, haien edukia zuzenean lanpostuari edo enplegatuaren lanbide karrerari lotua bada.

Kasu guztietan, ikastaroan agertu dela eta aprobetxatu duela frogatzen duen agiria aurkez dezala eskatuko zaio langileari.

8. artikulua. Administrazio egoerak.

Lan-kontratuko langile finkoei dagokienez, Nafarroako Administrazio Publikoen zerbitzuko Langileen Estatutuaren Testu Bateginaren VI. kapituluak gaur egun xedatzen duenari jarraituko zaio.

9. artikulua. Aparteko orduak.

Hitzarmenaren sinatzaileek konpromisoa hartu dute aparteko orduak behar-beharrezkoak direnetara mugatzeko.

1.-Nafarroako Foru Gobernuaren araudian xedatutakoari lotuko zaio.

2.-Zerbitzuaren premiak direla-eta aparteko orduak egin behar direnean, langileak diru konpentsazioa jasotzea edo atsedenaldia hartzea aukeratu ahal izanen du.

3.-Langileak diru konpentsazioa aukeratzen badu, aparteko orduaren zenbatekoa Nafarroako Gobernuak urtero onesten diren tauletan zehaztutakoa izanen da.

4.-Atsedenaldia hartzea erabakitzen denean, lan egindako ordu bakoitzeko ordu bat eta berrogeita bost minutu emanen dira aparteko ordua lan ordutegian egin bada, eta 2 ordu, jaiegunetako edo gaueko ordutegian egin bada.

5.-Aparteko orduen konpentsazioa noiz hartu langileak berak erabakiko du beti, baina beti zerbitzuaren beharrak errespetatuz, behar bezala justifikatuak badaude. Konpentsazioa ordutan hartuz gero, Udalak ez dio ezarriko langileari noiz hartu behar dituen.

6.-Soberako lanaldia eta lanaldi gutxiegia:

Soberako lanaldia honela arautuko da:

Orduen kontaketa ordu erdiko zatitan eginen da, eta lehenbiziko ordu erdia hamaseigarren minututik aurrera zenbatuko da. Bigarren ordu erditik aurrera kontaketa lehen minututik aurrera eginen da. Zati horiek aparteko ordutzat hartuko dira.

Lanaldi gutxiegia soberako lanaldia kalkulatzeko ezarritako moduan arautuko da.

7.-Zerbitzu bereziak (desfileak, kirol edo kultur gertaerak, batzordeak, osoko bilkurak eta abar) ordaintzeko, benetan lan egindako 3 ordu beharko dira gutxienez, eta ordu horiek aparteko ordu gisa ordainduko dira. Jaiegunetan egiten badira, jaiegunetako aparteko ordu gisa ordainduko dira.

Benetan lan egindako denbora 3 ordutik beherakoa bada, benetan lanean emandako denbora zenbatuko da eta, edonola ere, ordu bat gutxienez, nahiz eta hori osorik bete ez.

8.-Hiru hilabetean behin langile bakoitzak egindako orduen egoera-orria bidaliko zaie langileen delegatuei. Egoera-orri horretan, egindako aparteko orduak eta bajen eta baimen ordainduen ondorioz gertaturiko gorabeherak azalduko dira.

Halaber, zerbitzu batean metaturiko aparteko orduak gehiegi direla egiaztatzen bada, plantilla handitzeko aukera kontuan hartuko da.

Aparteko orduen ordain gisa atsedenaldia hartzea aukeratzen duten langileek beren nahien arabera hartu ahal izanen dute, beti zerbitzuaren premiak bermatuta eta hurrengo urteko martxoaren 31ra arte, gehienez.

10. artikulua. Jaiegunak.

Ondorio ekonomikoetarako, jaiegunen erregulazioa Nafarroako Gobernuak ematen duen araudiak edo hura ordezten duen arauak ezarritakoaren arabera eginen da, zaindariaren jaiei dagokienez, udalerriko berezitasunak kontuan hartuta.

Jaieguntzat joko dira Nafarroako Gobernuak horrelakotzat jotzen dituenak, zaindariaren jaiei dagokienez, udalerriko berezitasunak kontuan hartuta.

11. artikulua. Gaueko lanaldia.

1.-Gaueko lantzat hartuko da 22:00etatik biharamuneko 6:00ak bitarte egiten dena.

2.-Egiten diren gaueko ordu guztien prezioa Nafarroako Gobernuak ezarriko du hileko lehenengo 70 orduetarako, edozein dela ere gaueko txandan ari diren langileek hilean lan egindako ordu kopurua.

12. artikulua. Zerbitzuaren kalte-ordainak.

Lanagatik egindako dieta eta kilometraje gastuak ordainduko dira, Nafarroako Gobernuak kasu horietarako ezarritakoaren arabera. Horretarako aski izanen da otorduetako, autobideko eta aparkalekuetako tiketak edo/eta egindako kilometrajeari buruzko egiaztagiriak aurkeztea.

Lanpostua eskuratzeko gidabaimena eskatu zaien udaleko langileei Udalak ondorengo berritzeen kostuak ordainduko dizkie, gastuen fakturak aurkeztu eta gero.

Lan arrazoiengatik egindako bidaia batean izandako istripuaren ondorioz, langileari laneko baja ematen bazaio, istripu hori lan istriputzat hartuko da.

13. artikulua. Eskubide pasiboak.

Pentsioen aldaketei eta igoerei dagokienez, arlo horretako araudian ezartzen denari jarraikiko zaio.

14. artikulua. Bizi kalitatea.

1) Udalak garbitasuneko eta higieneko neurri egokiak hartuko ditu horrelakoak behar dituzten laneko lokaletan edo aldageletan, hala nola, komunak, dutxak, ur beroa, aldageletako armairuak, xaboia, etab.

2) Langile guztiek eskubidea dute beren lanerako behar dituzten jantziak izateko (eskularruak, buzoak, uniformeak, botak, uretako arropa, oinetakoak, etab.). Jantzien kalitatea egokia izanen da egin beharreko lanerako. Lanaldiaren barrenean baizik ez dira erabiliko.

3) Udako jantziak urtero maiatzaren 1a baino lehen emanen zaizkie, eta negukoak urriaren 15a baino lehen.

4) Jantzien mugaegun hauek ezarriko dira, ondoren zehazten diren taldeentzat:

-Obretako lantaldea.

  • 2 buzo urtean edo galtzak eta jertse bat.
  • 2 alkandora pare.
  • 2 oinetako pare urtean (negukoak eta udakoak).
  • Zira bat bi urtetik behin.
  • Uretako bota pare bat, bi urtetik behin.

5) Halaber, zerbitzuan hondatutako jantziak ordeztu egin beharko dira, lehen aipatu diren epeak kontuan hartu gabe.

-Familia-langileak.

Corellako Udalaren Etxez Etxeko Laguntza Zerbitzuko familia-langileei, urtero, lanerako jantzi eta oinetako hauek emanen zaizkie:

  • Neguko eta udako zapatak.
  • Bata bat.
  • Neguko uniformea.
  • Udako uniformea.

Gainera, bi urtean behin, negurako anorak iragazgaitz bat.

15. artikulua. Familia bizitza bateratzea.

Kontsultak, tratamenduak eta miaketa medikoak egitera eta erditzea prestatzeko klaseetara joateko, bai eta ezkontideari edo bizikideari (laguna/bikotekidea), funtzionarioaren kargura dauden gurasoei, seme-alabei eta neba-arrebei laguntzeko ere, urtean 8 ordu ordaindu egonen dira, behar bezala justifikatuta.

16. artikulua. Soldata aurrerakinak ematea.

1) Kasu berezietan, soldata ordaintzeko eguna iritsi baino lehen, soldata aurrerakinak ematen ahal dira, egindako lanari dagozkionak. Aurrerakin horiek ematea edo ukatzea Alkatetzaren esku dago.

2) Aparteko aurrerakinak eskatzen ahal dira, 3.000 euro bitartekoak, kasu hauetan:

a) Ezbeharrak etxebizitzan edo ibilgailuetan: sutea, lapurreta, istripua, uholdea, etab.

b) Une oso larriak familian.

c) Alkatearen iritziz antzeko garrantzia duten beste kasu batzuk.

3) Eskabidearekin batera, zeina Alkatetzara zuzenduko baita, eskaera bermatzeko behar diren egiaztagiri guztiak aurkeztuko dira.

4) Aurrerakin horiek 18 hilekotan, denak berdinak eta jarraian, itzuliko dira.

Aparteko pagak dituzten hilabeteetan hileko arrunta halako bi deskontatuko da.

5) Aparteko aurrerakina hartzen duen langileak hura amortizatzeko hilabeteetan ezin izanen du 1. idatz-zatiko aurrerakinik eskatu, ez eta aparteko beste aurrerakinik ere, harik eta jaso duen lehenbizikoa itzuli arte.

17. artikulua. Laguntza juridikoa.

Udalak laguntza juridikoa emanen die edozein eratako prozesu judizialetan dauden langileei, gertaerak Udalak agindutako eginkizunetan aritzeagatik gertatu badira.

18. artikulua. Lan osasuna.

1. Urtero, osasun azterketa bat eginen zaie nahi duten langile guztiei, lehen hiruhilekoan ahal dela. Azterketa horietarako, Udalak talde mediko baten eta klinika edo mutualitate baten zerbitzuak kontratatuko ditu, eta horietarako gastuak udal funtsen kargura izanen dira.

2. Langile guztiei egiten zaien osasun azterketa orokorraz gain, emakumezko langileei azterketa ginekologikoa eginen zaie Udalak hautatuko duen zentro medikoan urtero, hala nahi badute.

19. artikulua. Erretiroa.

Akordio hau bukatu baino lehen, haien araubide juridikoa alde batera utzita, indarra duen legedian ezarritako baldintzak betetzen dituzten Corellako Udaleko langileen erretiro partziala ahalbidetzeko egokiak diren neurriak hausnartuko dira. Errelebo-kontratua modu eraginkorrean aplikatuz, erretiro partzialeko kontratua sinatuko da.

Udalak eskaera ezetsiz gero, arrazoiak eman beharko ditu. Eskaera onesten bada, organo eskudunak arlo honen gaineko foru legediarekin eta toki araudiarekin bat datorren hautapen prozesuaren bidez errelebo-kontratua eginen du, erretiro partziala hartzeko eskubidea bete dadin.

20. artikulua. Eskubide sindikalak.

Nafarroako Administrazio Publikoen zerbitzuko Langileen Estatutuaren Testu Bategina onetsi zuen abuztuaren 30eko 251/1993 Legegintzako Foru Dekretuan ezarritakoari lotuko zaio.

Akordio honen aplikazio eremuko langileek eskubidea dute beren enplegu-baldintzak zehazten parte hartzeko, legean finkatu bezala, beren ordezkaritza organoen bitartez.

Akordio honen aplikazio eremuko delegatu sindikalek hogei orduko kreditua dute hilabetean. Ordu-kreditu hori hiru hilean behin kontatuko da.

Langileen ordezkariek, nahi izanez gero, zilegi dute ordu sindikalak elkarri lagatzea, kandidatura bereko ordezkari sindikalen artean.

21. artikulua. Mahai paritarioa.

Akordio honen garapenaren eta betetzearen segimendua egiteko, jarraipen batzorde paritario bat eratuko da, Udalaren eta langileen ordezkariek osatua.

Urtean behin bederen bilduko dira, desadostasunik sortzen denean, zerbait garatu behar denean edo alderdietako batek eskatzen duenean.

22. artikulua. Eskuratutako eskubideak.

Legezko xedapenen arabera eskuratutako eskubideak bermatuko dira, bai eta hitzartutako edo nahitaez bete beharreko edozein arauren ondoriozkoak ere, ebazpen judizialaren bidez aitortzen direnak barne.

23. artikulua. Bizi aseguru kolektiboaren eta banakako istripu aseguruaren poliza.

Udalak gaur egungo aseguruaren estaldurak hobetzeko konpromisoa hartu du, ahal den neurrian.

Xedapen indargabetzailea.

Indarra hartzen duenetik aurrera, akordio honek ordeztuko ditu bertan jasotzen diren gaiak beste era batera arautu dituzten xedapen guztiak.

Azken xedapena.

Corellako Udalak kasu bakoitzean behar diren administrazio egintzak edo xedapenak emanen ditu, akordio honen idatz-zatiak formalki onetsi eta indarrean sartzeko.

Aurreko hori gorabehera, Udalbatzak egoki baderitzo, akordio hau onetsi ondoren oso-osorik argitaratuko da Nafarroako Aldizkari Ofizialean, orok jakin dezan.

Sindikatuen izenean: Milagrosa Gil Garcia andrea, Yolanda Riccobene Líroz andrea eta Víctor Martínez Gil jauna. Corellako Udalaren izenean, José Javier Navarro Arellano jauna.

I. ERANSKINA

Lan-kontratua duten langile finkoak eta aldi baterakoak,
lantaldeko enplegatuak izan ezik

1.-Ordainsariak.

a) Ordainsariak (lan-kontratuko langile finkoen osagarriak barne) Nafarroako Gobernuak bere funtzionarioentzat onetsitakoak izanen dira.

Hitzarmen hau indarrean dagoen urte bakoitzean maila bakoitzeko hasierako soldataren gaineko lanpostuko osagarria ezartzen da, honako kasu hauek kontuan hartuta:

-Nafarroako Gobernuak hasierako soldataren gainean onetsitako igoera Nafarroan egondako KPIarekin bat badator: osagarria %2 izanen da.

-Nafarroako Gobernuak hasierako soldataren gainean onetsitako igoera Nafarroan egondako KPIa baino handiagoa eta "KPI + 2 puntu" formula baino txikiagoa bada, osagarria hurrengo eragiketaren emaitza izanen da:

2 - (Nafarroako Gobernuak KPItik gora onetsi duen portzentajea).

b) Absentismoko osagarria: maila bakoitzeko hasierako soldataren gaineko %3, laneko bajak edo istripuak direla-eta lanera joateari uzten ez dioten langileentzat. Zenbaketa hilekoa izanen da.

II. ERANSKINA

Lantaldeko langileak

1.-Bizi kalitatea.

a) 2008ko bigarren seihilekoa bukatu baino lehen, gaur egungo instalazioak egokituko dira garbitasuneko eta higieneko tresna egokiak jarriz, hala nola, komunak, aldageletako armairuak, dutxak, ur beroa, etab. edo

b) Prebentzio neurrien ebaluazioa: balorazioa, informazioa eta prestakuntza, lehenengo aldiz egiten diren eta langileentzat arriskutsuak diren jardueretarako.

c) Lan egutegiaren urteko plangintza, lanalditik kanpo egin beharreko ekintzak aurreikusita.

2.-Ordainsariak.

a) Ordainsariak (lan-kontratuko langile finkoen osagarriak barne) Nafarroako Gobernuak bere funtzionarioentzat onetsitakoak izanen dira.

Hitzarmen hau indarrean dagoen urte bakoitzean maila bakoitzeko hasierako soldataren gaineko lanpostuko osagarria ezartzen da, honako kasu hauek kontuan hartuta:

-Nafarroako Gobernuak hasierako soldataren gainean onetsitako igoera Nafarroan egondako KPIarekin bat badator: osagarria %2 izanen da.

-Nafarroako Gobernuak hasierako soldataren gainean onetsitako igoera Nafarroan egondako KPI baino handiagoa eta "KPI + 2 puntu" formula baino txikiagoa bada, osagarria hurrengo eragiketaren emaitza izanen da:

2 - (Nafarroako Gobernuak KPItik gora onetsi duen portzentajea).

b) Lanpostuko osagarria esleitzea egiten diren eta goragoko maila bati dagozkion lanetarako, eta lan horri dagokion mailarekin parekatzea ondorio guztietarako.

4.-Jaieguneko lanaldiak.

1) Jaieguneko lanalditzat hartuko da igandean egiten dena, baita Nafarroako Gobernuak adierazi jaiegunetan egiten dena ere.

2) Villarko Ama Birjina eta San Migel jaietako larunbata eta igandea jaieguntzat joko dira.

José Javier Navarro Arellano jauna, Milagrosa Gil García andrea, Yolanda Riccobene Líroz andrea, Víctor Martínez Gil jauna.

Iragarkiaren kodea: F0926948