Iragarkia

155. ALDIZKARIA - 2009ko abenduaren 18a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari kudeatzaileak abenduaren 1ean emandako 213/2009 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko Errepideetako laguntzaile tekniko izateko zazpi lanpostu oposizio-lehiaketa bidez betetzeko.

Nafarroako Administrazio Publikoaren Institutuko zuzendari kudeatzaileak azaroaren 1ean emandako 213/2009 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko Errepideetako laguntzaile tekniko izateko zazpi lanpostu oposizio-lehiaketa bidez betetzeko deialdia onetsi zen.

Hautapen prozesua honako hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta betearazteko Sarrera Erregelamendua, gainerako aplikazio arauak eta deialdi honen oinarriak.

1.-Deialdiaren xedea.

1.1. Deialdi honen xedea da oposizio-lehiaketa bidez Errepideetako laguntzaile tekniko izateko zazpi lanpostu, C mailakoak, funtzionario araubidekoak, betetzea. Txandak hauek izanen dira:

-3 lanpostu txanda irekian.

-4 lanpostu igoera txandan.

1.2. Deialdiko lanpostu hutsak hauek dira:

-7 lanpostu Herri Lan, Garraio eta Komunikazio Departamentuan, Herri Lan Zuzendaritza Nagusiari atxikiak. Hona hemen lanpostuen destinoak eta plantilla organikoan dituzten identifikazio-zenbakiak:

-1882, 1904, 1905, 8020 eta 8021 zenbakiak, Iruñean aritzekoak.

-1923 zenbakia, Agoitzen aritzekoa.

-2095 zenbakia, Tuteran aritzekoa.

1.3. Igoera txandako lanpostuak hutsik geldituz gero, izangaiek hautaprobak gainditzeko behar den gutxieneko puntuazioa lortu ez dutelako, txanda irekikoei gehituko zaizkie.

Bestaldetik, igoera txandan, hutsik dauden lanpostuak baino izangai gehiagok gainditzen badute, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, deialdiaren 7.2 oinarrian agiriak aurkezteko ezarritako epea bukatzen denean, deialdiaren 2.2 oinarriko betebehar berariazkoak betetzen ez dituzten igoera txandako izangaiek txanda irekiko lanpostuak eskuratzeko aukera izanen dute, aurreko lerroaldean adierazitako modu berean.

1.4. Lanpostuen ordainsariak hauek izanen dira: uztailaren 4ko 158/1984 Foru Dekretuaren bidez onetsitako Ordainsarien Behin-behineko Erregelamenduan C mailarentzat oro har ezarritakoak eta aplika daitezkeen gainerako xedapenetan kasu bakoitzerako ezartzen direnak.

1.5. Halaber, deialdi honen bidez, sarrerako hautapen prozesuan lanposturik lortzen ez duten izangaiekin aldi baterako kontratatuak izateko izangaien zerrendak osatu nahi dira:

a) Probak gainditu arren lanposturik lortu ez duten izangaien zerrenda.

b) Oposizioaldiko lehenengo ariketa gainditu arren, prozesu osoa gainditu ez duten izangaien zerrenda, Administrazio Erroaren kudeaketa esparruan aldi baterako kontratatuak izan daitezen.

Aldi baterako kontratatuak izateko izangaien zerrendak deialdi honen 10. oinarrian xedatutakoarekin bat onetsi eta kudeatuko dira.

2.-Betebeharrak.

Ekainaren 30eko 78/2008 Foru Dekretuak Nafarroako Foru Komunitatearen Administrazioko eta haren erakunde autonomoetako plantilla organikoa aldatu zuen, C eta D mailetako lanpostu batzuetan sartzeko, berariazko lanbide heziketaren titulua eskatzea finkatu baitzen.

Betebehar hori aplikatzekoa da Errepideetako laguntzaile teknikoen lanpostuak betetzeko.

Dena dela, 78/2008 Foru Dekretua onetsi zenetik egiten den lehenbiziko deialdi honetan, titulazio hori izatea ez da onartua izateko baldintza izanen. Deialdia oposizio-lehiaketa bidez eginen da, eta, salbuespenez, bertan baloratuko dira, bakar-bakarrik, titulazio berariazko hori izatea eta lanpostu horretan aldi baterako emandako zerbitzuak. Deialdian onartua izateko, baldintza orokor hauek bete beharko dira:

2.1. Txanda irekiko izangaiek bete beharreko baldintzak:

a) Espainiarra izatea, edo Europar Batasuneko beste estatu batekoa, edo Europar Batasunak sinatu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek parte hartzen ahal dute, zuzenbidez bereizita ez badaude; halaber, haien ondorengoek eta ezkontidearen ondorengoek, zuzenbidez bereizita ez badaude, 21 urtetik beherakoak badira, edo, gorakoak izanda, haien kontura bizi badira.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea.

c) Eskaerak aurkezteko epea bukatzen den egunean Batxilergoko titulua, Bigarren Graduko Lanbide Heziketakoa edo titulu baliokide bat izatea edo eskuratzeko moduan egotea.

Atzerrian lortutako tituluak badira, homologazioaren frogagiria eduki beharko da.

d) Bete behar dituen eginkizunetan aritzeko adinako gaitasun fisikoa eta psikikoa izatea.

e) Eginkizun publikoetan aritzeko ezgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren estatuko funtzio publikoan sartzea eragozten dien diziplina zehapenik edo zigor penalik ez dutela.

f) B motako ibilgailuak gidatzeko baimena izatea.

2.2. Igoera txandako izangaiek bete beharreko baldintzak.

Igoera txandako izangaiek baldintza hauek bete beharko dituzte:

a) Nafarroako edozein administrazio publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta abiapuntuko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa
izatea.

c) Administrazio publikoetan bost urteko antzinatasun aitortua izatea, Nafarroako polizia kidegoetako kideen kasuan izan ezik, horiek frogatu beharko baitute zortzi urteko zerbitzualdia benetan egin dutela kidego horietan; eta Batxilergoa, Bigarren Mailako Lanbide Heziketa edo titulu baliokide bat izatea, edo eskaerak aurkezteko epea bukatzen den egunean titulu hori eskuratzeko moduan egotea; edo administrazio publikoetan zortzi urteko antzinatasun aitortua dutela frogatzea.

Nafarroako Administrazio Publikoen zerbitzuko Langileen Estatutuaren zortzigarren xedapen gehigarrian ezarri dena aplikatuz, igoera txandan esku hartzeko gainerako betebeharrak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.1 eta 2.2 ataletan adierazitako betebehar guztiak eskabideak aurkezteko epea amaitzen den egunean bete beharko dira eta, orobat, agiriak aurkezteko epea bukatzen den egunetik (deialdiaren 7.2 atalean adierazia) lanpostuaren jabetza hartu arte.

2.3. Deialdiaren 3.3 oinarriaren laugarren eta bosgarren puntuetan aipatzen den salbuespena salbuespen, izendatuak izateko proposatzen diren izangaiek deialdiaren 7.2 atalean ezarritako epean eta moduan frogatu beharko dituzte betebehar horiek.

3.-Eskabideak.

3.1. Deialdian parte hartzeko eskabideak aurkeztuko dira Nafarroako Gobernuko Erregistro Orokorrean (Karlos III.aren etorbidea, 2, atalondoa, 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako Aldizkari Ofizialean argitaratu zen, urtarrilaren 30ean), edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazi diren bideetakoren bat erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean.

Eskabidea posta bulego batean aurkeztuz gero, gutun-azal irekian eginen da, postako langileek, ziurtatu aurretik, data eta zigilua jar ditzaten.

Eskabideak deialdiaren eranskinean argitaratutako ereduaren araberakoak izanen dira eta, horietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuaren edozein erregistro bulegotan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko aldizkari ofizialetik abiatuta, bai Zerbitzuen Katalogoko Enplegu Publikoaren gunean dagoen deialdiaren aiputik abiatuta.

3.2. Ezgaitasun aitortua duten izangaiek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Aurreko atalean aipatzen den Interneteko helbidean eredu bat dago egokitzapenak eskatzeko, interesdunen eskura.

3.3. Eskabideari, behar bezala bete ondoren, agiri hauek erantsiko zaizkio:

Bat.-Nortasun agiri nazionalaren fotokopia, edo izangaiaren nortasuna egiaztatzen duen beste agiri baliokideren batena.

Bi.-Espedientea formalizatzeko eta azterketa eskubideetarako 25 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

-Behar den bezala betetako ordainketa gutunaren bidez, Nafarroako Foru Komunitateko banku entitateetan ordaintzeko. Deialdiari buruz Interneten dagoen iragarkian, lehen aipatutako helbidean, dago ordainketa gutunaren eredua.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan, ordainagirian datu hauek jarri beharko dira nahitaez:

-Izangaiaren izen-deiturak.

-NANa/IFZ.

-Ordainketa zein kontutan egiten den, haren zenbakia.

-Kontzeptua: oposizioak.

-Deialdiaren xede den lanpostua.

Honako hauek ez dute tasarik ordaindu beharko:

a) %33ko edo hortik gorako ezgaitasun aitortua duten pertsonak.

b) Deialdia argitaratu aurretik hilabete batez edo luzaroago lan eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikatutako kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan eskatzailea dela frogatzeko, enplegu bulegoak emandako agiria aurkeztu beharko du. Bertan, lan eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lanbide sustapen, prestakuntza edo moldaketarako ekintzetan parte hartzeari ere, justifikatutako kasuetan izan ezik.

Interesdunaren adierazpenaren bidez frogatuko da ez duela hilabetero lanbide arteko gutxieneko soldatatik gorako diru-sarrerarik. Adierazpen eredua Nafarroako Gobernuko Informazio Bulegoan eskuratzen ahalko da edo, bestela, Interneten bidez, arestian emandako helbidean.

Hiru.-3.2. oinarriaren a) atalean (tasak salbuestea) eta 8. oinarrian (lanpostuak aukeratzeko lehentasuna) xedaturikoari dagokionez eta, halaber, denboren eta baliabideen egokitzapena eskatzeko, %33ko edo hortik gorako ezgaitasuna duten izangaiek hori agiri hauetariko baten jatorrizkoaren edo kopia konpultsatuaren bidez frogatu beharko dute:

-Imsersok edo automia erkidegoan eskumena duen organoak luzatutako ziurtagiria.

-Gizarte Segurantzako Institutu Nazionalaren ebazpena, ezintasun iraunkor osoa, ezintasun iraunkor absolutua edo baliaezintasun handia izateagatik prestazio bat jasotzeko eskubidea onartzen diona.

Ezgaitasuna duten izangaiek ariketak egin ahal izateko denboren eta baliabideen egokitzapenak eskatzen badituzte, hala adierazi beharko dute eskabidean, eta aparteko orri batean adierazi beharko dute nolako ezgaitasuna duten eta zein egokitzapen eskatzen duten. Egokitzapenak eskatzeko eredu bat interesdunen eskura dago www.navarra.es web orrian, deialdiaren laburpenean, "Zerbitzuak", "Enplegu Publikoa" atalean.

Lau.-Deialdian igoera txandan parte hartu nahi duten izangaiek, lehengoaz gainera, deialdi honen 2.2 atalean jasotzen diren betebeharrak betetzen dituztela frogatzen duen agiria gehitu beharko diote eskabideari, baldin eta Nafarroako Foru Komunitateko Administrazioa ez den Nafarroako beste administrazio publikoren bateko langile finkoak edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak badira.

Bost.-Nafarroako Foru Komunitateko Administrazioaren langile finkoak izanda, igoera txandan parte hartzeko eskatu baina zortzi urteko antzinatasuna dutela frogatzerik ez duten izangaiek Batxilergoaren, Bigarren Mailako Lanbide Heziketaren edo titulu baliokidearen kopia konpultsatua erantsi beharko diote eskabideari.

Sei.-Alegatutako merezimendu guztiak frogatzen dituzten jatorrizko agiriak edo haien fotokopia behar bezala konpultsatuak, deialdi honen II. eranskinean ezarritakoari jarraituz balora daitezen.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskaerak aurkezteko epea bukatuta, Nafarroako Administrazio Publikoaren Institutuko Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa) ebazpena emanen du izangai onartuen eta baztertuen behin-behineko zerrenda onesteko, eta Nafarroako Aldizkari Ofizialean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako Aldizkari Ofizialean argitaratu eta biharamunetik, erreklamazioak aurkezteko eta, akatsik egin badute, zuzentzeko.

4.3. Erreklamazioak aurkezteko epea bukaturik eta haien gainean ebatzi ondoren, Administrazio Publikoaren Institutuko Sarrerarako Hautapenaren Zerbitzuko zuzendari kudeatzaileak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa), ebazpena emanen du izangai onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko du.

4.4. Izangaiei egotzitako arrazoiengatik baztertzen diren izangaiei ez zaizkie azterketa egiteko eskubideak itzuliko.

5.-Epaimahaia.

5.1. Epaimahaia kide hauek osatuko dute:

-Epaimahaiburua: Juan Serrano Medrano jauna, Herri Lan, Garraio eta Komunikazio Departamentuko Zainketa Ataleko burua.

-Ordezkoa: Lucas Bernal Pampliega jauna, Herri Lan, Garraio eta Komunikazio Departamentuko Obrak Burutzeko II. Bulegoko burua.

-Mahaikidea: Javier Goldáraz Prados jauna, Herri Lan, Garraio eta Komunikazio Departamentuko Errepideetako laguntzaile teknikoa.

-Ordezkoa: Enrique Manso Martínez jauna, Herri Lan, Garraio eta Komunikazio Departamentuko Errepideetako laguntzaile teknikoa.

-Mahaikidea: Olga Morquillas Gómez andrea, Nafarroako Gobernuko Herri Lan, Garraio eta Komunikazio Departamentuko Nafarroako Hego-Mendebaldea Zaintzeko Bulegoko burua.

-Ordezkoa: Ramón Díaz de Cerio Pastor jauna, Herri Lan, Garraio eta Komunikazio Departamentuko Normalizazio eta Proiektuen Bulegoko burua.

-Mahaikidea: langileen ordezkari bat, Administrazio Erroko Langileen Batzordeak proposaturik izendatua.

-Ordezkoa: langileen ordezkari bat, Administrazio Erroko Langileen Batzordeak proposaturik izendatua.

-Mahaikide idazkaria: Sagrario Melón Vital andrea, Herri Lan, Garraio eta Komunikazio Departamentuko Araubide Juridikoaren Ataleko burua.

-Ordezkoa: María Rosario Loitegui Biurrun andrea, Herri Lan, Garraio eta Komunikazio Departamentuko Garraioen Araubide Juridikoaren Ataleko burua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

5.3. Epaimahaiko kideek ez dute parte hartuko, eta organo dei egileari hori jakinaraziko diote, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizio-lehiaketa nola eginen den.

6.1. Oposizio-lehiaketa bi alditan eginen da, lehiaketaldia lehenbizi eta oposizioaldia gero, oinarri hauetan zehazten den gisara.

6.2. Oposizioaldia 2010eko apirilean hasiko da. Izangai onartu eta baztertuen behin betiko zerrenda onesten duen ebazpenean berean zehaztuko dira probak hasteko lekua, eguna eta ordua.

Ondoren, epaimahaiak gainerako probak egiteko iragarkiak argitaratuko ditu, arauz egin behar den moduan.

6.3. Lehiaketaldia:

6.3.1. Epaimahaiak lehiatzaileek alegaturiko eta egiaztaturiko merezimenduak baloratuko ditu, deialdiaren II. eranskineko baremoari jarraikiz.

6.3.2. Alegatutako merezimendu guztiak agirien bidez frogatu beharko dira, izangaiek oposizio-lehiaketa honetan parte hartzeko eskabidea aurkezten duten unean. Agiriak jatorrizkoak zein behar bezala konpultsatuak izanen dira, bestela ez aurkeztutzat joko baitira.

6.3.3. Baremoaren aplikaziorako beharrezkoa den informazio guztia jaso beharko dute agiri horiek. Justifikatu gabeko merezimenduak ez dira baloratuko.

Izangaiek alegatutako merezimenduen gaineko argibideak eta datu osagarriak eskatzen ahalko ditu epaimahaiak.

6.3.4. Lehiaketaldia ez da baztertzailea izanen, eta 30 puntuko balorazioa izanen du, gehienez ere. Deialdiaren II. eranskinari jarraikiz banatuko dira puntuak, honela:

-Titulua: 15 puntu bitarte.

-Egindako zerbitzuak: 15 puntu bitarte.

6.3.5. Epaimahaiak baremoaren atal bakoitzean izangaien merezimenduak baloratuko ditu. Epaimahaiak ez du inoiz aintzat hartuko izangaiak alegatu gabeko edo agiri bidez alegatu gabeko merezimendurik, eta ezin izanen du atal bakoitzerako ezarritako puntuazioa baino handiagorik eman.

6.3.6. Lehiaketaldia amaitzen denean, epaimahaiak Nafarroako Gobernuaren iragarki oholean jarriko du izangai bakoitzak lortutako puntuazioa.

Lehiaketaldiko puntuazioa oposizioaldikoari gehituko zaio, eta emaitza oposizio-lehiaketako puntuazio osoa izanen da.

6.4. Oposizioaldia:

6.4.1. Oposizioak ariketa hauek izanen ditu:

Lehenbiziko ariketa: ariketa teorikoa. Labur erantzuteko moduko galdera sorta bati idatziz erantzutea (15-25 galdera), bi orduan gehienez. Galderak eranskinean agertzen den gai zerrendari buruzkoak izanen dira. Proposatuko den galdera kopurua erantzun beharrekoena baino %25 handiagoa izanen da, eta izangaiak berak hautatuko du zeintzuk erantzunen dituen.

Bigarren ariketa: ariketa praktikoa; epaimahaiak gai zerrendaren bigarren zatiko gaiei buruz proposatzen dituen bi kasu praktiko ebatzi beharko dira, bi orduan gehienez.

6.4.2. Oposizioko ariketen balorazioan 70 puntu eman daitezke gehienez, honela banatuak:

Lehenbiziko ariketa: gehienez ere 30 puntu.

Bigarren ariketa: gehienez ere 40 puntu.

6.4.3. Oposizioko ariketak baztergarriak izanen dira. Baztertuta geldituko dira ariketa bakoitzean kalifikaziorik onena lortu duen izangaiaren puntuazioaren erdia gutxienez lortzen ez duten izangaiak, betiere puntuazio onena ariketaren gehieneko puntuazioaren 1/3 edo handiagoa bada.

6.4.4. Oposizioko ariketak plika sistemaren bidez eginen dira.

6.4.5. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin, eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.4.6. Ariketa bakoitzerako deialdi bakarra eginen da. Izangaiek nortasun agiri nazionala, pasaportea, gidabaimena edo epaimahaiaren iritziz identifikaziorako balio duen beste agiriren bat aldean dutela agertu beharko dute. Azterketara agertzen ez direnak edo arestian aipatutako agirietako baten bidez beren nortasuna frogatzen ez dutenak oposiziotik baztertuko dira.

6.4.7. Hautaprobak egiteko, ezgaitasun aitorturen bat dutenentzat beharrezkoak diren denbora eta baliabide egokitzapenak eginen dira, eskabidean azaldutakoaren arabera.

7.-Probak gainditu dituztenen zerrenda, izendapen proposamena eta agirien aurkezpena.

7.1. Hautapen probak amaiturik, epaimahaiak jendaurrean jarriko du, ariketa egin den tokian eta Nafarroako Gobernuaren iragarki oholean, probak gainditu dituztenen zerrenda, lehiaketan eta oposizioan guztira lortutako puntuazioaren araberakoa. Gero, Nafarroako Administrazio Publikoaren Institutuko zuzendari kudeatzaileari igorriko dio probak puntuaziorik altuenarekin gainditu dituzten eta deialdiko lanpostuen kopuruaren barruan sartzen diren izangaiak izendatu eta kontratatzeko proposamena, espediente osoarekin batera. Proposamen hori Nafarroako Aldizkari Ofizialean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketarik izanez gero, bigarren ariketan puntu gehien lortzen dutenek izanen dute lehentasuna.

7.2. Izendapen proposamena Nafarroako Aldizkari Ofizialean argitaratu ondoko 30 egun naturaleko epean, proposatutako izangaiek berariazko inprimaki batzuk jaso eta honako agiri hauek aurkeztu beharko dituzte Nafarroako Administrazio Publikoaren Institutuko Sarrerarako Hautapenaren Zerbitzuan:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiek:

a) Nortasun agiri nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiaren 2.1.c) oinarrian eskatzen den tituluaren fotokopia konpultsatua, edo titulua lortzeko eskubideak pagatu direla frogatzen duen gordekinarena edo eskaerak aurkezteko epean titulua eskuratzeko moduan dagoela frogatzen duen ziurtagiria, salbu eskabidearekin batera eman bada, 3.3 oinarriaren laugarren atalean xedatutakoarekin bat.

c) B motako ibilgailuak gidatzeko baimenaren fotokopia konpultsatua.

d) Laneko Arriskuei Aurrea Hartzeko Atalak emandako txostena, interesdunak karguan aritzea eragozten dion eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

e) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Izangaiek Espainiako nazionalitatea ez badute, zinpeko aitorpen bat aurkeztu beharko dute, adierazteko ez dutela beren estatuko funtzio publikoan sartzea eragozten dien diziplina zehapenik edo zigor penalik.

f) Zin egin edo hitz ematea Nafarroako Foru Araubidea errespetatuko duela, Konstituzioari eta legeei men eginen diela eta karguari dagozkion eginkizunak zuzen beteko dituela.

Deialdi hau egin ez duen Nafarroako beste administrazio publikoren bateko langile finko edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarri buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiek:

a) Deialdiaren 2.1.c) oinarrian eskatzen den tituluaren fotokopia konpultsatua, edo titulua lortzeko eskubideak pagatu direla frogatzen duen gordekinarena edo eskaerak aurkezteko epean titulua eskuratzeko moduan dagoela frogatzen duen ziurtagiria, salbu eskabidearekin batera eman bada, 3.3 oinarriaren bosgarren atalean xedatutakoarekin bat.

b) B motako ibilgailuak gidatzeko baimenaren fotokopia konpultsatua.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbu, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, beren eskabidearen faltsukeria dela-eta legokiekeen erantzun beharra galarazi gabe.

7.4. Aurreko atalean ezarritakoa gertatuz gero, Nafarroako Administrazio Publikoaren Institutuko zuzendari kudeatzaileak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du hutsunea, eta horrekin ere aurreko ataletan adierazitako moduan jokatuko da.

7.5. Deialdi honen xede diren lanpostuetarako izendatzeko eskakizunak eta baldintzak frogatzeko nahitaezko agiriez gainera, Funtzio Publikoaren Zuzendaritza Nagusiak besteren bat eskatu nahi izanez gero, proposatzen den izangaiari eskatuko dio, eta horrek deialdi honen 7.2 oinarrian ezarritako moduan ekarri beharko du.

8.-Lanpostu hutsak hautatzea.

8.1. Aurreko arauan xedatu dena betetzen duten izangaiek Nafarroako Administrazio Publikoaren Institutuak (NAPI) hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Lanpostu hutsak aukeratzerakoan, %33ko ezgaitasun aitortua edo handiagoa duten izangaiek lehentasuna izanen dute gainerako izangaien aurretik, zein txandaren bidez parte hartu duten kontuan hartu gabe.

Hala izanagatik ere, ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

8.3. Hautaprobak igoera txandan gainditzen dituzten izangaiek deialdiko lanpostuak betetzeko lehentasuna izanen dute txanda irekiko izangaien aldean, 8.2 atalean adierazitako salbuespena salbuespen.

9.-Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, Errepideetako laguntzaile tekniko lanetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko ditu izendatuak, eta Nafarroako Foru Komunitateko funtzionarioen arloan indarra duten xedapenetan ezarri diren eskubide eta betebehar guztiak izanen dituzte. Gizarte Segurantzako araubide orokorrean afiliatuko dira, araubide horretan ezarritakoaren babesean.

Aurrekoa gorabehera, Nafarroako Administrazio Publikoen zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen eskubide pasiboen montepioan sarturik daudenek bi aukera izanen dituzte: Nafarroako Foru Komunitateko Administrazioko montepioan segitzea, martxoaren 5eko 10/2003 Foru Legearen bidezko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua. Administrazio organo eskudunek destinoa aldatzen ahalko dute, aplikatzekoa den araudian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako Aldizkari Ofizialean argitaratuko da eta izangai izendatuek hilabeteko epean jabetu beharko dute lanpostuez, izendapenaren jakinarazpenetik kontatzen hasita.

Aipatu epean eta ezinbesteko kasuetan izan ezik, izangairen bat lanpostuaz jabetzen ez bada, Foru Komunitateko Administrazioaren funtzionario izateko eskubide guztiak galduko ditu. Hala bada, deialdiaren 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 7.4 atalak agintzen duen moduan beteko da.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.-Aldi baterako kontratuetarako izangaien zerrenda.

10.1. Kontuan harturik Nafarroako Administrazio Publikoan sartzeko Erregelamenduaren 42. artikulua, Lehendakaritza, Justizia eta Barneko kontseilariaren azaroaren 14ko 146/2005 Foru Agindua (Lanpostuak aldi baterako betetzeko kudeaketa arauak onetsi zituena) eta oinarri honexetan ezarritako prozedura, eta horiei jarraikiz, aldi baterako kontratazioetarako izangaien zerrenda hauek prestatuko dira:

a) Probak gainditu arren lanposturik lortu ez duten izangaien zerrenda.

b) Oposizioaldiko lehenengo ariketa gainditu arren, prozesu osoa gainditu ez duten izangaien zerrenda, Administrazio Erroan aldi baterako kontratatuak izan daitezen.

10.2. Nafarroako Administrazio Publikoaren Institutuko Sarrerarako Hautapenaren Zerbitzuak espedientea igorri ondoren, Funtzio Publikoaren zuzendari nagusiaren ebazpenaren bidez, aldi baterako kontratazioak egiteko izangaien zerrendak onetsi eta Nafarroako Gobernuko iragarki oholean (Karlos III.aren etorbidea, 2, atalondoa, Iruña) argitaratuko dira. Zerrenda horiek Interneten bidez ere kontsultatzen ahalko dira, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

10.3. Honako hau izanen da aldi baterako kontratazioen zerrendetako hurrenkera: probak gainditu arren lanposturik lortu ez dutenen kasuan, sarrerako hautapen prozesuan lortutako puntuaziorik handienaren arabera; eta gainerako izangaien kasuan, gainditutako ariketan lortutako puntuazioaren arabera. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

10.4. Aldi baterako kontratazioetarako izangaien zerrendetan agertzeak ez du esan nahi interesdunei onartzen zaienik 2. oinarrian ezarritako betebeharrak betetzen dituztela; izan ere, hori hurrengo atalean adierazten den bezala frogatu beharko dute.

10.5. Izangaiei deitu eta, kasua bada, haiek kontratatzerakoan, Administrazio Erroan, honako hauetan xedatutakoari jarraikiz jokatuko da: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88.b) artikulua eta hurrengoak; lanpostuak aldi baterako betetzeko arauak ezartzeko Lehendakaritza, Justizia eta Barneko kontseilariak 2005eko azaroaren 14an eman zuen 146/2005 Foru Agindua (2005eko 144. Nafarroako Aldizkari Ofizialean argitaratua, abenduaren 2an); eta aplikatzekoak diren gainerako arauak.

Deia egiteko orduan, kontuan hartuko da Nafarroako Foru Komunitateko Administrazioaren zerbitzuko Langileen Estatutuaren Testu Bateginaren zazpigarren xedapen gehigarriko laugarren idatz-zatian ezarritakoa.

Deialdiaren 2. oinarrian adierazten diren titulazio betebeharrak eta gida-baimenari dagozkionak betetzen direla frogatzeko agiriak kontratatuak izateko deia jasotzen duten izangaiek bakarrik aurkeztu beharko dituzte, kontratua formalizatzen denean, jatorrizko agiriak edo behar bezala konpultsatutako kopien bitartez.

Eskatzen diren agiriak aipatu epean aurkezten ez dituzten izangaiek, aski justifikatutako ezinbesteko kasuetan izan ezik, eta eskatutako baldintzak betetzen ez dituztenek deialdian parte hartzetik eratorritako eskubide guztiak galduko dituzte, betiere parte hartzeko eskabidea faltsutzeagatik legokiekeen erantzukizuna galarazi gabe.

Sarrera prozesuko eskaerak aurkezteko epea bukatzen den egunerako bete beharko dira betebeharrak eta, orobat, hautaprobak egin bitarte eta kontratazioaldiak iraun bitarte.

11.-Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa jartzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren, oinarrien eta horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, errekurritu nahi den egintza argitaratu edo jakinarazi eta biharamunetik hasita hilabeteko epean.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluan eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluetan xedatutakoari jarraikiz.

Iruñean, 2009ko abenduaren 1ean.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

I. ERANSKINA

Hautaprobetan onartua izateko eskabidea

Deialdiaren datuak:

Sartzeko txanda:

Datu pertsonalak:

Aurkeztutako agiriak:

Ondoko hauen proba eskatzen du:

Sinatzaileak eskaera egiten du eskabide honetan adierazitako prozesuan onartua izan dadin eta adierazten du, erantzukizuna berea izanik, bertan adierazten diren datu guztiak egiazkoak direla, deialdiaren oinarrian eskatutako betebehar guztiak betetzen dituela eta datu horiek guztiak dokumentuen bidez frogatzeko konpromisoa hartzen duela.

(Sinadura)

.................(e)n, ...................(e)ko ...................aren ...........(e)an

NAFARROAKO ADMINISTRAZIO PUBLIKOAREN INSTITUTUKO ZUZENDARI KUDEATZAILEA.

LEHENDAKARITZA, JUSTIZIA ETA BARNE DEPARTAMENTUA.

(*) Deialdiaren oinarrietan xedatutakoari jarraikiz.

II. ERANSKINA

Merezimenduak baloratzeko baremoa

1.-Ikasketa tituluak.

Eraikuntzako eta Obra Zibiletako goi mailako teknikari titulua (Eraikuntza proiektuen garapena eta aplikazioa, Hirigintza proiektuen eta topografia lanen garapena edo Obrak eta planak gauzatzea espezialitatean) edo baliokidetzat hartutako beste titulu bat izateagatik, 15 puntu.

2.-Egindako zerbitzuak.

Errepideetako laguntzaile teknikoen lanpostuetan administrazio publikoetan, aldi baterako, egindako urte bakoitzeko: 1,5 puntu. Gehienez ere 15 puntu.

2. atalerako oharrak:

1. Urteen kopurua osoa ez bada, zerbitzuan egindako aldiari proportzionalki dagokion puntuazioa emanen zaie izangaiei.

2. Lanaldi partzialean emandako zerbitzuen kasuan, behar den zatia kenduko da.

3. Deialdia argitaratu ondoren egindako zerbitzuak ez dira baloratuko.

III. ERANSKINA

Gai zerrenda

Lehenengo zatia: Arauak.

1. gaia.-Espainiako 1978ko Konstituzioa: printzipio orokorrak. Funtsezko eskubide eta betebeharrak. Botere Judiziala. Koroa. Gorte Nagusiak. Gobernua eta Estatuko Administrazioa.

2. gaia.-Europar Batasuna. Parlamentua. Europako Kontseilua. Europako Batzordea. Kontseilua (ministroena). Justizia Auzitegia. Beste erakunde batzuk.

3. gaia.-Europar Batasuneko ordenamendu juridikoaren iturriak: jatorrizko zuzenbidea eta zuzenbide eratorria.

4. gaia.-Nafarroako Foru Eraentza Berrezarri eta Hobetzeari buruzko Lege Organikoa: izaera eta esanahia. Atariko titulua.

5. gaia.-Nafarroako Parlamentua edo Gorteak. Nafarroako Comptos Ganbera. Arartekoa.

6. gaia.-Nafarroako Gobernua: Eginkizunak. Osaera, izendapena, eratzea eta kargu-uztea. Eskumenak. Funtzionamendua. Nafarroako Gobernuko lehendakaria: eginkizunak.

7. gaia.-Nafarroako Foru Komunitateko Administrazioa. Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritako printzipio orokorrak. Herritarren eskubideak Foru Komunitateko Administrazioarekiko harremanetan.

8. gaia.-Administrazioaren xedapenak eta egintzak. Egintza administratiboen betebeharrak. Egintzen eraginkortasuna. Deuseztasuna eta deusezgarritasuna.

9. gaia.-Prozedura administratiboen xedapen orokorrak: prozeduraren abiaraztea, antolamendua, instrukzioa eta amaiera. Bide administratiboko egintzen berrikuspena: ofiziozko berrikuspena eta administrazio errekurtsoak.

10. gaia.-Nafarroako Administrazio Publikoen Zerbitzuko Langileen Estatutua. Langile motak. Funtzionario publikoak hautatzea. Egoera administratiboak. Funtzionarioen eskubideak, betebeharrak eta bateraezintasunak. Ordainsariak.

Bigarren zatia: Obra zibila, proiektuak, topografia eta obra planak.

1. gaia.-Materialak. Agregakinek, konglomeratzaileek, aglutinatzaile betundunak, metalak, pinturek eta errepideen eraikuntza eta zainketa lanetan erabiltzen diren beste produktu batzuek eduki beharreko ezaugarriak, bakoitzaren erabileraren arabera. Saiakera egokiak.

2. gaia.-Belar-sastrakak garbitzea. Zolaren eskarifikazioa eta trinkotzea. Erauzketa lanak. Lubetak. Harbetak. Betelan lokalizatuak. Zelaien eta ezponden fintze lanak.

3. gaia.-Drainatzea. Arekak eta erretenak egitea. Kutxetak eta erregistro putzuak. Kainu-zuloak eta hustubideak. Altzairu malgu eta galbanizatuzko hodiak. Lur azpiko drainatzeak. Material iragazlearen ezaugarriak.

4. gaia.-Zoladurak. Granulu-geruzak. Lurzoru egonkortuak eta legar tratatuak. Ihinztadurak eta macadam betundunak. Hormigoizko zoladurak. Obra osagarriak.

4. gaia.-Hormigoiak eta morteroak. Dosifikazioa eta erabilera. Zementu-esnea. Habe prefabrikatuak. Erretxinak, morteroak eta epoxi hormigoiak. Metalezko egituretarako produktu ijeztuak.

6. gaia.-Masa hormigoiaz edo hormigoi armatuaz egindako obrak. Hartu beharreko aurreneurri eta neurriak. Dardara. Aireztatzaileak. Plastifikatzaileak. Fraguatze-atzeragarriak. Izotz-kontrakoak. Hormigoia ontzeko produktuak. Zemento bereziak. Junturak eta injekzioak. Obraren kontrola. Auskultazioak. Probetak. Karga probak.

7. gaia.-Harlangaitz-horma kareztatuak, lehorrean hartutako harlangaitz-horma ilaratuak, harlangaitz-horma arruntak. Harlanduzko obrak. Harri-lubetak. Harrizko xaflatzeak. Gabioi fabrika. Adreilu fabrikak.

8. gaia.-Zimentze lanak. Lan kargak. Zimendu plakak. Kolpeka sartutako piloteak. Hormigoi armatuzko piloteak "in situ" moldeatuak. Ohol-hormak.

9. gaia.-Enkofratuak eta moldeak. Apeoak eta zinbriak. Paramentuen iragazgaizpena. Material elastomerikozko euskarriak. Tauletako junturak. Aurrefabrikatutako elementuen muntatzea. Zubietako taulak zolatzea.

10. gaia.-Ibilgailu motak. Trakzio-esfortzua. Erresistentzia mugimenduari. Ibilgailuen eta errepideen arteko erlazioa. Marruskadura. Peraltea.

11. gaia.-Errepideen ezaugarri geometrikoak. Oinplanoa, altxaera eta zeharkako sekzioa. Bide mantsoak.

12. gaia.-Trazadura azterketak. Trantsizio kurbak. Gainzabalerak. Lur erauzketetako bolumenen eta lubeten konpentsazioa.

13. gaia.-Bide lotuneak eta bidegurutzeak. Motak. Elementuak. Funtzionamendua. Horrelakoak proiektatzeko irizpideak. Ezaugarri geometrikoak. Bide biltzaileak eta banatzaileak. Seinaleak.

14. gaia.-Fabrikako obra txikiak. Metalezko obrak. Arreta berariazkoak.

15. gaia.-Drainatze azterketak. Azaleko uren hustuketa. Higadura. Ezpondak. Azaleko eta sakoneko drainatzeen diseinua.

16. gaia.-Lur berdinketak. Lurrezko obren proiektuak eta horiek gauzatzea. Masa diagrama. Trinkotzea. Saiakerak. Lurzoru mota bakoitzerako egokiena den makineria.

17. gaia.-Hormak. Motak. Sifoiak. Arazo berariazkoak. Tunelak.

18. gaia.-Zoladura malguak. Neurriak ezartzeko faktoreak. Trafikoa. Zabalgunea. Zoladuraren materialak. Zoladuraren egituren katalogoa.

19. gaia.-Azaleko tratamenduak eta geruza bakarreko eta geruza askoko ihinztadurak. Lurpeko eta erdi-lurpeko ihinztadurak. Hartxintxarrik gabeko ihinztadurak. Betun-esneak. Makineria egokia.

20. gaia.-Betun-nahasketak. Motak. Fabrikazioa eta obran jartzea. Nahasketa bituminoso bereziak. Betun-nahasketen akatsak eta horien ondorioak. Granulometria eta zehaztapenak.

21. gaia.-Zoladura sendotzea. Trafiko kategoriak. Deflexioak. Sendotze motak eta material egokiak. Azaleko berritzea.

22. gaia.-Trafikoaren oinarrizko ezaugarriak, intentsitatearen, konposizioaren eta abiaduraren kontzeptuak. Intentsitatearen, abiaduraren eta dentsitatearen arteko harremanak.

23. gaia.-Neurketak, eskuzkoak eta automatikoak. Neurketa programak. Jatorria-helmuga azterketak. Inkestak. Etorkizuneko trafikoaren prognosia.

24. gaia.-Istripuak. Datuen erregistroa. Arriskuen indizeak. Parte hartzen duten faktoreak. Segurtasun neurriak.

25. gaia.-Elementu osagarriak. Zutikako seinaleztapena. Seinale motak. Forma eta kolorea. Ikuspena. Bideetako markak. Ezaugarri fisikoak. Kolorea. Distiragarriak. Materialak. Bideetako marken motak. Semaforoak. Zikloa, fasea eta banaketa. Erregulatzaileak. Detektoreak. Kokatzeko irizpideak. Segurtasun hesiak.

26. gaia.-Errepidearen zainketa eta ustiaketa. Antolaketa eta kontrola. Zainketa metodoak. Errepide bazterren tratamendua. Herbizidak. Ezpondak landareekin egonkortzea. Zuhaiztiak. Errepidea inguruneari egokitzea. Gelditu eta atsedena hartzeko tokiak. Argibideak.

27. gaia.-Nafarroako Errepideei buruzko martxoaren 23ko 5/2007 Foru Legea. Xedapen orokorrak. Plangintza, proiekzioa eta eraikuntza. Finantzazioa eta ustiapena. Jabari publikoa babesteko araubidea eta jabetzari ezarritako mugak. Hiri barneko tarteak eta errepideetako zeharbideak. Koordinazioa beste administrazio batzuekin. Zehapenen araubidea.

28. gaia.-Herri lanen sektoreko segurtasuna eta osasuna: indarra duen araudia. Eraikuntza lanetako segurtasunaren eta osasunaren azterlanak: xedea, edukia. Segurtasun eta Osasun planak.

29. gaia.-Zatigarritasuna. Zenbaki lehenak eta konposaktuak. Zenbaki baten zatitzaileak. Zatitzaile komun handiena eta multiplo komunetako txikiena. Zatikizko zenbakiak. Oinarrizko lau eragiketak. Koadroa eta kuboa. Erro karratuak. Zenbaki hamartarrak.

30. gaia.-Batez besteko aritmetikoa eta geometrikoa. Proportzionaltasuna: zuzenekoa eta alderantzizkoa. Hiruko erregela. Interesa. Banaketa proportzionala. Ezezagun bateko ekuazioak, 1. eta 2. mailakoak. Ekuazio sistemak.

31. gaia.-Angeluen eta figuren arteko harremanak. Poligono erregularrak. Zinkunferentzia. Arkuak. Kordak. Erregelarekin eta konpasarekin egindako lanak. Figura plano eta irregularren areak. Poliedroak eta figura espazialak. Solidoen areak eta bolumenak. Arkuak eta gangak.

32. gaia.-Trigonometria. Angeluen neurriak eta lerro trigonometrikoak. Triangeluak ebaztea. Errepideen trazaduretan ohikoak diren bihurguneak. Ezaugarri nabarmenenak. Klotoidea.

33. gaia.-Takimetroen eta nibelen erabilera. Bigarren mailako tresnen erabilera. Libreten kalkulua. Altxamendu planimetrikoak, altimetrikoak eta oinarrizko nibelazioa. Triangelaketa. Poligonoketa. Direkzioak finkatzea, angeluak neurtzea, longitudeen ebaluazioa.

34. gaia.-Plano akotatuak. Egiteko modua eta interpretazioa. Areen neurketa. Zenbakizko prozedurak eta prozedura mekanikoak.

35. gaia.- Kurba zirkularrak, klotoideak eta parabola kubikoak kalkulatzea eta haien trazadura egitea. Fotogrametriako hastapenak.

36. gaia.-Planoetan adierazitako figura eta ereduen krokisak eta perspektibak, esku hutsez eginak. Eraikuntza piezen edo elementuen krokis akotatua. Fabrikako obra eta piezen perspektiba.

37. gaia.-Marrazketa lineala. Proiekzioak eta sekzioak. Marrazketa topografikoa. Eskalak aldatzea. Sistema erabilienak.

38. gaia.-Jasotze topografiko errazak. Nibelazioak. Kurba zirkularren eta trantsiziozkoen zuinketak. Fabrikako obren zuinketak. Koordenatuak kalkulatzea zuinketa sistema ezberdinetan. Lurzati planoak. Fabrikako obren kubikazioak, pilaketak eta lur mugimenduak.

39. gaia.-Informatika. Microsoft Office-ren ezaguera eta erabilera, erabiltzaile mailan: Excel, Outlook, Word, Access, Power-Point. Cad (Autocad) diseinurako programen erabilera. Neurketa-Aurrekontuak egiteko programen erabilera (Sispre). Trazadura programen erabilera (Clip).

40. gaia.-Obren plangintza. Faseak eta prozesuak. Lan plan baten prestaketa. Programatzeko teknikak. Pert delakoa, oinarrizko printzipioak. Alderdi orokorrak. Gantt-en diagramak.

Oharra: gai guztiak deialdi hau Nafarroako Aldizkari Ofizialean argitaratzen den egunean indarra duen legeriaren arabera jorratu beharko dira.

Iragarkiaren kodea: F0927766