154. ALDIZKARIA - 2009ko abenduaren 16a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

2331/2009 EBAZPENA, azaroaren 17koa, Osasuneko zuzendari nagusiak emana, Osasun Departamentuak 2010. urtean sustatuko dituen ikerketa proiektuak arautuko dituzten baldintzak ezartzen dituena.

Osasun Departamentua Nafarroan Osasun Zientzien arloko ikerketa sustatu beharraz jabetu da, Ikerketa Zientifiko eta Teknikoa Sustatu eta Koordinatzeari buruzko apirilaren 14ko 13/1986 Legeak, Osasun Sistema Nazionalaren Kohesio eta Kalitateari buruzko maiatzaren 28ko 16/2003 Legeak eta Ikerketa Biomedikoari buruzko uztailaren 3ko 14/2007 Legeak ezarritako esparruan, eta Osasunari buruzko azaroaren 23ko 10/1990 Foru Legearen Hamargarren Tituluan, "Osasun irakaskuntza eta ikerketa" izenekoan, ezarritakoa betez.

Osasun Departamentuaren egitura organikoa ezartzen duen otsailaren 24ko 45/2005 Foru Dekretua aldatzen duen abenduaren 22ko 126/2008 Foru Dekretuak Osasunaren Irakaskuntza eta Garapen Zerbitzuaren esku utzi du Osasun Departamentuaren finantziazioaz garatzen den ikerketa biomedikoaren deialdia kudeatzea.

Ebazpen honen helburua da ikerketa proiektuak bultzatzea, 2010. urtean, jakintza arlo biomedikoetan (arlo horiek oinarrizkoak, klinikoak eta epidemiologikoak, osasun publikokoak eta osasun zerbitzuei buruzko ikerketakoak izanen dira), betiere osasunean eta Nafarroako Osasun Sisteman eragin handiena duten arloetan.

Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalak luzatu duen txostena azterturik, eta Osasunaren Irakaskuntza eta Garapen Zerbitzuko zuzendariak eta Ogasuneko Kontu-hartzailetza delegatuak gastua jasanen duen aurrekontu aplikazioari buruzko adostasuna emanik (724.150,00 euro), bidezkoa da Osasun Departamentuak 2010. urtean sustatuko dituen ikerketa proiektuak arautuko dituzten baldintzak onestea.

Proiektuei buruzko gastua zenbait urtetakoa izanen denez, Nafarroako Ogasun Publikoari buruzko apirilaren 4ko 13/2007 Foru Legearen 40. artikuluan xedaturikoa betez, Nafarroako Gobernuak, 2009ko azaroaren 2ko bilkuran, urte horietarako finantziazioa onetsi zuen.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Osasun Departamentuak 2010. urtean sustatuko dituen ikerketa proiektuak arautuko dituzten baldintzak onestea, ebazpen honen I. eta II. eranskinetan xedatutakoari jarraikiz.

2. 724.150,00 euroko gastua baimentzea, guztira, aipatu diren ikerketa proiektuak finantzatzeko, honela banatuta:

-364.150,00 euro, 2010erako Nafarroako Aurrekontu Orokorrei buruzko Foru Legearen proiektuan "Osasun Zientzietako ikerketa proiektuak" izena duen 512002 51340 6092 46510 kontu-sailaren kargura.

-250.000,00 euro, 2011ko aurrekontuan dagokion kontu-sailaren kargura, aurrekontuan behar adinakoa eta egokia den krediturik baldin badago.

-110.000,00 euro, 2012ko aurrekontuan dagokion kontu-sailaren kargura, aurrekontuan behar adinakoa eta egokia den krediturik baldin badago.

Halaber, 2010, 2011 edo 2012ko ekitaldietan kontu-sail horretan diru gehiago izanez gero erabilgarri, deialdian hasieran aurreikusitakoari gehitzen ahalko zaio.

3. Ebazpen hau igortzea Osasun Departamentuko Idazkaritza Tekniko Nagusira, Osasunaren Irakaskuntza eta Garapen Zerbitzura eta Laguntzak eta Diru-Laguntzak Kudeatzeko Atalera.

4. Ebazpen hau eta eranskinak Nafarroako Aldizkari Ofizialean argitaratzeko agintzea, behar diren ondorioak izan ditzaten.

5. Ebazpen honen aurka gora jotzeko errekurtsoa jartzen ahalko da, Osasuneko kontseilariari zuzendua, argitaratu eta biharamunetik hilabeteko epean.

Iruñean, 2009ko azaroaren 17an.-Osasuneko zuzendari nagusia, Isabel Martín Montaner.

I. ERANSKINA

Oinarri arautzaileak

1.-Modalitateak.

Osasun Departamentuak Osasun Zientzietako ikerketa proiektuak sustatuko ditu 2010. urterako, modalitate hauen arabera:

-A) modalitatea: Ortiz de Landázuri beka, oinarrizko ikerketakoa, ebazpen honen II. eranskinean adierazten diren zehaztapenekin.

Modalitate honetan, gehienez ere hiru proiektu sustatuko dira. Kalitateagatik hala merezi badu, hoberenari "Ortiz de Landázuri beka" izena emanen zaio eta hurrengo biei "akzesit" kalifikazioa emanen zaie.

-B) modalitatea: Ikerketa kliniko eta epidemiologikoa, Foru Komunitatearentzat interesa duten arloetan eta, bereziki, ebazpen honen II. eranskinean lehentasunezko arlotzat jotzen direnetan. Horretaz gainera, lehentasuna emanen zaie masa kritiko ikertzaile gutxi duten eta Osasun Sisteman garrantzitsuak diren programei, hala nola Oinarrizko Osasun Laguntzako ikerketari.

Aipatutako II. eranskineko B) modalitateko "Osasun Sistemaren garapenari" buruzko ikerketa proiekturik hoberenari, haren kalitatearengatik hala merezi badu, "Ikerketarako Mikel Larumbe Zazu beka" emanen zaio.

2.-Prozedura antolatu, instruitu eta ebazteko eskumena duten organoak.

Oinarri hauetan ezarritako ondorioetarako, Osasun Departamentuko Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari esleituko zaizkio proiektuak onartzeko prozedura antolatu eta instruitzeko eginkizunak. Instrukzio organoak batzorde teknikoaren irizpenari jarraikiz ebazpen proposamena eginen du, zazpigarren oinarriarekin bat. Oinarri arautzaile hauetan "instrukzio organoa" aipatzen denean, Laguntzak eta Diru-laguntzak Kudatzeko Atala aipatu nahi da.

Diru-laguntzak emateko prozedura ebazteko eskumena Osasuneko zuzendari nagusiari dagokio.

3.-Eskatzaileak.

Ikerketa proiektuak proposatzen ahalko dituzte, ikertzaile nagusi gisa, erabilera publikoko sareko osasun zentroei eta Nafarroako unibertsitateei atxikitako pertsonek. Halaber, Nafarroan kokatutako irabazi-asmorik gabeko beste erakunde publiko edo pribatu batzuetako ikertzaileek ere proposatzen ahalko dituzte.

Ikertzaile nagusia ezin izanen da Osasun Departamentuak finantzatutako proiektu batean baino gehiagotan agertu. Taldekide guztiek, baita ikertzaile nagusiak ere, debekatua izanen dute abian diren bi proiektutan baino gehiagotan aldi berean aritzea.

Prestakuntza espezializatua hartzen ari diren profesionalak ez dira proiektuko ikertzaile nagusi izaten ahalko, baina bai, ordea, ikerketa taldeko kide.

4.-Eskaerak.

4.1. Eskaerak agiri hauek bilduko ditu:

-1. agiria: ikertzaile nagusiak eta proiektua eginen deneko zentroaren edo erakundearen legezko arduradunak sinatutako eskabidea. Proiektua hainbat zentrotan gauzatzen bada, zentro bakoitzak bete beharko du eskabidea eta bakoitzaren legezko arduradunak sinatu. Erreferentziako zentroa ikertzaile nagusiarena izanen da.

II. eranskineko sailkapenaren arabera, eskabide guztietan Ebaluazio eta Prospektibako Agentzia Nazionalean dagokien arloa azalduko da, ebaluazioari begira. Orobat, kasu guztietan, "A" modalitateari (oinarrizko ikerketa) edo "B" modalitateari (ikerketa kliniko eta epidemiologikoa)" dagokion atala bete beharko da.

"B" modalitateko eskabideen kasuan, gainera, proiektuari dagokion lehentasunezko arloa zein den adieraziko da, II. eranskinarekin bat.

-2. agiria: ikerketa proiektuaren memoria.

-3. agiria: ikertzaile nagusiaren curriculum vitae eta gainerako taldekideen curriculumen laburpena, proiekturako interes handieneko alderdiak zein diren adieraziko duena, eskura dagoen eredu normalizatua erabiliz horretarako, 4.2 atalean ezarritakoari jarraikiz.

-4. agiria: txosten bat, zentro edo erakundeko zuzendariak sinatua. Horren bidez, talde ikertzaileari proiektua gauzatzeko baimena emanen zaio, eta zehaztuko da zenbat ordu kontatuko diren horretarako ikertzaileen lanaldian, eskatzen diren ordu guztien artetik. Proiektuak zentro batekoak baino gehiagokoak badira, zentro parte-hartzaile bakoitzeko zuzendariak bete eta sinatutako txostena beharko da.

-5. agiria: ikerketa zein zentrotan eginen den, hango ikerketa batzordearen txostena. Ikerketa batzorderik ez badago, txostena zentro edo erakundeko zuzendaritzak eginen du. Proiektuak zentro batekoak baino gehiagokoak badira, zentro parte-hartzaile bakoitzeko batzordeak egindako xostena beharko da.

-6. agiria: Ikertzaile nagusia ari deneko zentroko Ikerketaren Etika Batzordeak egindako txostena. Zentroan Ikerketaren Etika Batzorderik ez badago, Nafarroako Foru Komunitateko Ikerketa Klinikoko Etika Batzordeak eginen du ebaluazioa. Saio kliniko bat izanez gero, Nafarroako Foru Komunitateko Ikerketa Klinikoko Etika Batzordeak eta Osasun eta Kontsumo Ministerioko Botiken eta Osasun Produktuen Agentzia Espainiarrak txosten bana egin beharko dute. Azken txosten hori eskabidearen ondoren aurkezten ahalko da, baina 2010eko azaroaren 15a baino lehen, ezinbesteko betebeharra baita da onarpenaren agiria formalizatzeko.

-7. agiria: Osasun Zientzietako ikerketa sustatzeko beste agentzia batzuek ere eskatu den proiektua finantzatuko dutela adierazten duen egiaztagiria.

4.2. Dokumentazio normalizatua Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalean eskuratzen ahalko da, bai eta Interneteko ondoko orri honetan: www.cfnavarra.es/salud/docencia.investigacion.

5.-Eskabideak aurkezteko tokia eta epea.

5.1. Eskabideak aurkezteko epea 2010eko otsailaren 1eko 14:30ean bukatuko da.

5.2. Eskabideak, ahal dela, aurkeztuko dira Osasun Departamentuaren Osasunaren Irakaskuntza eta Garapen Zerbitzuan (Nafarroako Ospitaleko Irakaskuntza Pabiloian) edo Administrazio Publikoen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluko 4. idatz-zatian adierazitako erregistro edo bulegoetako edozeinetan.

Postetxeetan aurkezten diren eskabideak gutun-azal irekietan sartuko dira, lehenbiziko orrialdeko goiko aldean onartu zeneko eguna eta abenduaren 3ko 1829/1999 Errege Dekretuan, posta zerbitzuak arautzen dituen horretan, aipatzen diren gainerako zehaztapenak adieraz daitezen. Gainera, eskabidea igortzen duen egun berean, interesdunak igorpenaren berri eman beharko dio Osasun Departamentuko Osasunaren Irakaskuntza eta Garapen Zerbitzuari, telefax bidez.

5.3. Eskabideak aipatutako baldintzak betetzen ez baditu, instrukzio organoak interesdunari eskatuko dio gehienez ere 10 egun naturaleko epean akatsak zuzen ditzala eta jakinaraziko dio, zuzentzen ez baditu, bere eskaera ezetsi eta artxibatu eginen dela, beste tramiterik gabe.

6.-Proiektuen onarpena.

Batzorde tekniko batek eskaerak baloratu, eta proiektuak onartzeko proposamena eginen du. Batzorde hori Osasuneko Zuzendaritza Nagusiak izendatuko du eta kide hauek izanen ditu:

-Deialdiko kudeaketarekin lotutako bi pertsona.

-Nafarroako Osasun Sistemako ikerketa batzordeetako bi kide.

-Ikerketan adituak diren lau pertsona.

7.-Eskaeren balorazioa.

Batzorde teknikoak baloratuko du proiektuak eskatutako modalitatera egokitzen ote diren. Eskaerak ezetsiko ditu, edo proiektuaren gaira hobeki egokitzen den modalitatean sartuko.

Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalak Ebaluazio eta Prospektibako Agentzia Nazionalera igorriko ditu onarturiko proiektuak, balora ditzaten. Ebaluazio hori Batzorde Teknikoaren esku utziko da, eta batzorde horrek proiektuak onartzeko proposamena eginen du, irizpide hauek baloratu ondoren:

1. Proiektuaren kalitatea, interes zientifikoa eta bideragarritasuna, ANEPek emandako balorazio txostenaren arabera.

2. Proiektua ebazpen honen xedeetara egokitzen den, alderdi hauek era positiboan baloratuz:

-Lehentasunezkotzat jotako arloekin bat datorren ebaluatzea, B modalitatearen kasuan, eta osasun sisteman aplikatzeko aukerak.

-Proiektua egokitzen ote zaion ikertzaile taldeak finkaturik duen ikerketa ildoari. Hori baloratzeko, ikertzaileen argitalpenek izan duten garrantzi zientifikoa aztertuko da. Ikertzaile talde berriek egindako proposamenak ere aintzat hartuko dira, ikerketarako metodologiari buruzko prestakuntza dutela frogatzen badute, proposaturiko helburuak beteko direla bermatzea badago eta deialdiko gainerako irizpideak betetzen badituzte.

-Osasun Departamentuaren deialdietan ikertzaile nagusiari lehenago onarturiko proiektuetan helburuak lortu izana.

-Proiektuan zentro eta laguntza maila desberdinak lankidetzan aritzea eta diziplina anitzeko ikerketa taldeak izatea.

-Osasun Zientzietan ikerketa sustatzeko beste agentzia batzuek, ofizialki aitortuek, elkarrekin finantzatzeko baimena ematea.

-Ezarritako finantza baliabideak proiektuan proposatutako helburuetara egokitzea.

8.-Ikerketa proiektuen onarpena eta formalizazioa.

Osasuneko zuzendari nagusiak, ebazpen bidez, eta Batzorde Teknikoak eginiko proposamen arrazoituari jarraikiz, Osasun Departamentuak sustatuko dituen ikerketa proiektuak zehaztuko ditu, berari eskatzen zaizkionen artean; zenbatekoa, gastu kontzeptuak eta urtesariak adierazi beharko ditu.

Ebazpena eskatzaile guztiei jakinaraziko zaie, bai ikertzaile nagusiari bai ikerketa zein zentrotan burutzen den, zentro horretako zuzendariari, eta jendaurrean paratuko da, Osasunaren Irakaskuntza eta Garapen Zerbitzuko iragarki oholean, bai eta Interneteko web gune honetan ere: www.cfnavarra.es/salud/docencia.investigacion.

Ikertzaile nagusiarentzako jakinarazpenari onarpen agiria, finantziazioaren aurretik formalizatu beharrekoa, erantsiko zaio, behar bezala beteko da eta aipatutako Osasunaren Irakaskuntza eta Garapen Zerbitzuko Laguntzak eta Diru-Laguntzak Kudeatzeko Atalera igorriko da.

Proiektua onartzen ez bada, eskabidearekin batera aurkeztutako dokumentazioa berreskuratzeko epea hilabete batekoa izanen da, jakinarazpena jasotzen denetik aurrera.

Azken memoria, Osasun Departamentuak aurretik finantzatutako proiektuen gastuen justifikazioa barne, aurkezten ez duten ikertzaile nagusiek ezin izanen dute proiektu gehiago formalizatu.

9.-Finantziazioa.

9.1. Ikerketa proiektuetarako finantziazioa ez da 30.000,00 eurotik gorakoa izanen proiektu bakoitzeko eta urteko, eta proiektuak sortutako gastuak finantzatzeko izanen da, osorik edo hein batean.

Kontzeptu hauek finantzatzen ahalko dira:

9.1.1. Proiektua gauzatzeko behar diren langile teknikoak (parte hartzen duten erakundeetako funtzionarioak, estatutupekoak eta lan-kontratudunak izan ezik), aurreikusten den denbora osoan edo zati batean proiektuan aritzen ahalko direnak, kontratatzeko gastuak. Kontzeptu honetan gehienez ere 18.920,00 euro izanen dira urtean, Gizarte Segurantzako kuotak barne.

9.1.2. Exekuzio gastuak, hala nola: proiektua gauzatzeko ezinbesteko material inbentariagarria, eskura ez dagoena, behar bezala justifikatua; material suntsikorraren erosketak eta zerbitzu profesionalak kontratatzeko gastuak, behar bezala justifikatuak eta proiektua aurrera eramateko behar direnak. Komeni da orduen edo eginiko lan unitateen arabera zenbatzea (inkestak, aholkularitzak, eta abar).

9.1.3. Gastu osagarriak. Atal honetan, aurreko ataletan sartzen ez diren gastuak hartzen dira aintzakotzat.

Proiektuari emaniko zenbatekoa %15 gehituko da, kudeaketa gastuengatik. Zenbateko hori justifikatu egin beharko da.

9.2. Proiektuaren kargurako langile teknikoak, Nafarroako Gobernuko eta haren erakunde autonomoetako ikertzaileen proiektuetarako kontratatuko direnak, Miguel Servet fundazioaren bidez kontratatuko dira.

Proiektua garatzen deneko zentro edo erakundeko zuzendaritzari jakinarazi beharko zaio proiektuaren kargurako langile teknikoak lanean hasi direla.

9.3. Proiektuen iraupena, gehienez, Nafarroako Ogasun Publikoari buruzko apirilaren 4ko 13/2007 Foru Legearen 40. artikuluan inbertsioetarako ezarritakoa izaten ahalko da, bertan ezarritako baldintzak zehatz-mehatz beteta.

9.4. Ez zaie ikertzaile taldeko kideei ordainduko.

9.5. Adostutako finantziazioa honela gauzatuko da:

-2010eko ekitaldiari dagokiona osorik ordainduko da, onarpen agiria bete ondotik.

-Hurrengo aurrekontu ekitaldietarako onetsitako finantziazioa Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalak bere txostena egin ondotik gauzatuko da, urteko memoria aurkeztu eta harekiko adostasuna agertu eta gero, eta horien ordainketa kontzeptuz kontzeptu eginen da, honela:

a) Material inbentariagarria: osorik.

b) Gainerako kontzeptuak (proiektuaren kargurako langile teknikoak, material suntsikorra, profesionalen zerbitzuak eta gastu osagarriak): hiru hilabetetik hiru hilabetera.

10.-Ordaintzeko prozedura.

10.1. Proiektuari esleitzen zaion zenbatekoa ordainduko zaio ikertzaile nagusiari, bankuko kontuan. Kontu horretan titular gisa agertu behar du, eta dirua zein proiektutarako den adieraziko da.

10.2. Proiektuaren kudeaketa ekonomikorako lankidetza hitzarmenik bada ikertzaile nagusiaren eta Miguel Servet fundazioaren artean, fundazio horri eginen zaio ordainketa.

11.-Proiektua gauzatzea.

11.1. Proiektua ebazpen honetan eta ikertzaile nagusiak eta Osasuneko zuzendari nagusiak sinatzen duten onarpen agirian aurreikusitako moduan garatuko da.

11.2. Aurreikusitako garapen horretan gertatzen den aldaketa oro jakinarazi egin beharko zaio Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari.

Egindako lana aurreikusitako garapenari ez zaiola egokitzen frogatzen bada, Osasuneko zuzendari nagusiak, Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalak egindako txosten arrazoitua ikusita, bertan behera uzten ahalko du proiektuaren finantziazioa, izan daitezkeen erantzukizunak ezertan galarazi gabe.

11.3. Urte bakoitzeko azaroaren 15a baino lehen, ikertzaile nagusiak emaitza teknikoei eta aurrekontuaren gauzatzeari buruzko urteko memoria eguneratua eta laburbildua aurkeztu beharko du, Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalean. Gastu guztiak justifikatuko dira jatorrizko agirien bidez (gero itzultzen ahalko dira, interesdunak eskatuta, behar diren egiaztapenak egin ondoren), edo ikertzaile nagusiak eta entitate kudeatzaileko zuzendariak sinatutako fakturak aurkeztuz (halakoetan, bidezkoa bada, jatorrizko fakturak eskatzen ahalko dira). Proiektuaren kargura langile teknikoak kontratatzeko dirurik bada aurrekontuetan, jatorrizko agiriak aurkeztu beharko dira, ordainketa egiaztatzeko.

Kudeaketa ekonomikorako lankidetza hitzarmenik bada ikertzaile nagusiaren eta Miguel Servet fundazioaren artean, aurrekontua gauzatzeko memoria fundazioak aurkezten ahalko du.

11.4. Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalak diru-laguntzaren helburuak bete direla frogatzen duen txostena erantsiko dio ordainketa proposamenari.

12.-Proiektuaren amaiera.

12.1. Proiektuaren onarpen agirian ageri den ikerketa amaitzeko dataren ondoko hilabetean, ikertzaile nagusiak amaierako memoria igorriko du Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalera, xehetasun hauekin:

a) Memoria tekniko xehatua. Bidezkoa denean, argibide osagarriak eskatzen ahalko dira.

b) Proiektuaren laburpena, 2 orrikoa gehienez (ez da beharrezkoa bibliografia aurkeztea). Laburpen hori Osasun Departamentuaren "Anales del Sistema Sanitario de Navarra" izeneko aldizkarian argitaratzen ahalko da, Osasun Departamentuak onarturiko proiektuen sailean.

c) Memoria ekonomikoa, zeinean gastu guztiak justifikatuko baitira emandako finantziazioa kontuan hartuta, jatorrizko agirien bidez (gero itzultzen ahalko dira, interesdunak eskatuta, behar diren egiaztapenak egin ondoren), edo ikertzaile nagusiak eta entitate kudeatzaileko zuzendariak sinatutako fakturak aurkeztuz (halakoetan, bidezkoa bada, jatorrizko fakturak eskatzen ahalko dira). Proiektuaren kargura langile teknikoak kontratatzeko dirurik bada aurrekontuetan, jatorrizko agiriak aurkeztu beharko dira, ordainketa egiaztatzeko. Banku mugimenduen agiria erantsiko da.

Edonola ere, Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari dagokio behar diren ikuskapenak egitea eta bidezko erregulazioak proposatzea.

12.2. Proiektuaren amaieran, Nafarroako Gobernuak finantzatutako material inbentariagarria bere beharren arabera erabiliko du.

12.3. Material bibliografikoa proiektua egin duen zentro edo erakundearen esku geratuko da, proiektuaren amaieran.

13.-Konpromiso osagarriak.

13.1. Finantziazioa onartzeak ebazpen honetan ezarritako baldintzak onartzea dakar ikertzaile taldearentzat.

13.2. Ebazpen honetan eta aplikatzekoak diren beste arauetan ezarririko betebeharrak edo proiektua onartzeko agirian ezarririko baldintzak erabat edo hein batean bete ezik, proiektua bertan behera utzi eta kobraturiko dirua itzuli beharko da, izan litekeen erantzukizuna deusetan ukatu gabe.

13.3. Proiektua gauzatzeko tokia izanen den zentroak edo erakundeak hirugarrenek eta zentroak berak proiektua gauzatzearen ondorioz izan ditzaketen arriskuetarako estaldura izan behar du, proiektuari lotuta sortzen ahal diren egoerei begira.

13.4. Ikerketa proiektu horretarako beste edozein motatako laguntzarik edo diru-laguntzarik eman baldin bada, horren berri eman beharko zaio Osasunaren Irakaskuntza eta Garapen Zerbitzuko Laguntzak eta Diru-laguntzak Kudeatzeko Atalari, Osasun Zuzendaritza Nagusiari jakinaraz diezaion. Azken horrek ikerketa proiektuari diru-laguntza emateko baldintzak aldatzen ahalko ditu.

13.5. Ikerketa proiektuek honako hauek bete beharko dituzte: Helsinkiko Adierazpenean, giza eskubideei eta biomedikuntzari buruzko Europako Kontseiluaren Hitzarmenean eta giza genomari eta giza eskubideei buruzko UNESCOren Adierazpen Unibertsalean ezarritako oinarrizko printzipioak, bai eta Ikerketa Biomedikoari buruzko uztailaren 3ko 14/2007 Legean, Datuak Babesteari buruzko abenduaren 13ko 15/1999 Lege Organikoan eta ikerketa biomedikoaren arloan aplika daitezkeen gainerako arauetan ezarritako baldintzak ere.

13.6. Animaliekin saiakuntzak egiten dituzten proiektuek indarra duen araudian ezarritakoa bete beharko dute eta, bereziki, Saiakuntzak egiteko eta beste helburu zientifiko batzuetarako erabiltzen diren animalien babesari buruzko urriaren 10eko 1201/2005 Errege Dekretuan xedatutakoa.

13.7. Saiakuntza klinikoak diren proiektuek indarra duen araudian ezarritakoa bete beharko dute, Saiakuntza klinikoak egiteko arauei buruzko otsailaren 6ko 223/2004 Errege Dekretuaren arabera.

14.-Gastuaren muga.

Ebazpen honetan aipatzen den proiektuen finantziazioa, 724.150,00 euro bitarte, honela banatuta eginen da:

-364.150,00 euro, 2010erako Nafarroako Aurrekontu Orokorrei buruzko Foru Legearen proiektuan "Osasun Zientzietako ikerketa proiektuak" izena duen 512002 51340 6092 46510 kontu-sailaren kargura.

-250.000,00 euro, 2011ko aurrekontuan dagokion kontu-sailaren kargura, aurrekontuan behar adinakoa eta egokia den krediturik baldin badago.

-110.000,00 euro, 2012ko aurrekontuan dagokion kontu-sailaren kargura, aurrekontuan behar adinakoa eta egokia den krediturik baldin badago.

Deialdi honen xede diren proiektuak onetsi baino lehen aurreko deialdietan hitzartutako zenbatekoren bat deuseztatzen bada, zenbateko hori dagokion kontu-sailari gehituko zaio, eta erabilgarri dagoen kopuru osoa proiektuak emateko beharren arabera esleitzen ahalko da.

Halaber, 2010, 2011 edo 2012ko ekitaldietan kontu-sail horretan diru gehiago izanez gero erabilgarri, deialdian hasieran aurreikusitakoari gehitzen ahalko zaio.

II. ERANSKINA

I.-Osasun Departamentuaren arloak

A) modalitatea. Ortiz de Landázuri beka. Oinarrizko ikerketa.

Oinarrizko Zientziak (Klinikaurrekoak): giza patologiari buruzko oinarrizko ikerketa gisa definitzen ahal da, baina ez ezinbestean giza materialarekin egiten dena. Funtsezko eta/edo oinarrizko fenomenoen azterketarekin zerikusia duten proiektuak hartzen ditu, baldintza edo entitate kliniko bati modu espezifikoan edo orokorrean lotzen ahal zaizkionak. Gai-arlo zabal honi dagozkio oraindik klinikoki aplikatu ez diren prozesu zelularrekin, mekanismo fisiopatologiko oinarrizkoekin eta mekanismo immunologiko eta genetikoekin lotutako prozesu gehienak.

B) modalitatea. Ikerketa kliniko eta epidemiologikoa.

Honako hauek sartzen dira:

-Bereziki eta lehentasunez jarduera klinikoarekin zerikusia duten proiektuak, edozein direla ere horien ikuspuntua edo aztertu beharreko alderdi espezifikoak, eta erizaintzako prozedura eta zainketa bereziak barne direla. Bertan sartzen da, halaber, faktore klinikometrikoei eta eritasunen pronostikoari buruzko Epidemiologia Klinikoko ikerketa. Hemen kokatzen dira, beraz, patologia jakin batzuei edo entitate nosologiko klinikoei dagozkienak, salbu eta, oinarrizkoak direlako, A atalean biltzen direnak.

-Espezifikoki edo orokorrean, alderdi edo tresna metodologikoak ukitzen dituzten proiektuak, bai epidemiologian, osasun publikoan eta osasun zerbitzuetan, bai jende multzo handia ukitzen duten patologien eta/edo arriskuen azterlan epidemiologikoetan, bai kolektibitatearen osasun programen ebaluazioan.

Lehentasunezko arloak ("B'' modalitateko proiektuak).

a) Patologia garrantzitsuak:

1.-Neoplasiak.

2.-Bihotz-hodietako eritasunak.

3.-Eritasun neurologikoak eta adimenekoak.

4.-Arnas eritasun kronikoak.

5.-Eritasun immunologikoak.

6.-Digestio aparatuko eritasunak.

7.-Diabetesa eta loditasuna.

8.-Eritasun infekziosoak.

b) Osasuna eta eritasuna baldintzatzen dituzten faktoreak eta osasunaren sustapena.

1.-Desberdintasunak Osasun arloan.

2.-Bizimodu osasungarriak. Osasunerako hezkuntza.

3.-Ezgaitasuna eta errehabilitazioa.

4.-Zainketa alternatiboak eta baliabide ez-formalak osasun arazoetan. Komunitatearen parte hartzea.

c) Osasun sistemaren garapena.

1.-Osasun baliabideak eta teknologia.

2.-Laguntza prozesuen ebaluazio eta kontrola. Praktika klinikoaren aldakortasuna.

3.-Informazio sistemak.

II.-Ebaluazio eta Prospektibako Agentzia Nazionalaren (ANEP) arloak

Nekazaritza (AGR).

Funtsezko eta Sistemetako Biologia (BFC).

Biomedikuntza (BMED).

Landare Biologia, Animalia Biologia eta Ekologia (BVA).

Elikagaien Zientzia eta Teknologia (TA).

Konputazioaren eta Teknologia Informatikoaren Zientziak (INF).

Lurraren Zientziak (CT).

Gizarte Zientziak (CS).

Zuzenbidea (DER).

Ekonomia (ECO).

Hezkuntza Zientziak (EDUC).

Filologia eta Filosofia (FFI).

Fisika eta Espazioaren Zientziak (FI).

Fisiologia eta Farmakologia (FFA).

Abeltzaintza eta Arrantza (GAN).

Teknologiaren Transferentzia (IND).

Historia eta Artea (HA).

Ingeniaritza Zibila eta Arkitektura (ICI).

Ingeniaritza Elektrikoa, Elektronikoa eta Automatikoa (IEL).

Ingeniaritza Mekanikoa, Itsasontzietakoa eta Aeronautikoa (IME).

Matematika (MTM).

Medikuntza Klinikoa eta Epidemiologia (MCLI).

Psikologia (PS).

Kimika (QMC).

Teknologia Elektronikoa eta Komunikazioetakoa (COM).

Materialen Teknologia (TM).

Teknologia Kimikoa (TQ).

Iragarkiaren kodea: F0926713