Iragarkia

152. ALDIZKARIA - 2009ko abenduaren 11

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

197/2009 FORU AGINDUA, azaroaren 25ekoa, Ekonomia eta Ogasuneko kontseilariak emana, 2009ko ekitaldiko Nafarroako Aurrekontu Orokorrak eta Balantze Kontuak itxi, likidatu eta 2010eko ekitaldian irekitzeko arauak onesten dituena.

Nafarroako Ogasun Publikoari buruzko apirilaren 4ko 13/2007 Foru Legearen 123. artikuluak ezartzen duenez, Ekonomia eta Ogasun Departamentuari dagokio erregelamendu ahalmena erabiltzea, kontuen nahiz kontabilitate publikoari buruzko gainerako agirien egitura, justifikazioa, tramitazioa eta errendatzea zehazteko. Horren ondorioz, beharrezkoa da, aurreko urteetan bezala, 2009ko ekitaldiko Nafarroako Aurrekontu Orokorrak eta Balantze Kontuak itxi, eta 2010eko ekitaldian irekitzeko arauak onestea.

Horrenbestez,

AGINDU DUT:

1. artikulua. 2009ko ekitaldiko Nafarroako Aurrekontu Orokorrak eta Balantze Kontuak itxi eta likidatzeko kontabilitate aplikazioak erregulatzeko eta 2010eko ekitaldian irekitzeko arauak onestea. Foru agindu honen 1. eranskinean ageri dira.

2. artikulua. Nafarroako Ogasun Publikoari buruzko 13/07 Foru Legearen 28. artikuluari jarraikiz, aipatu ekitaldiaren itxiera data 2009ko abenduaren 31 da, eta 2009ko ekitaldiari egotziko zaizkio ekitaldian likidatutako eskubideak, beren sortzealdia edozein izanik ere, eta ekitaldi bukaera arte onartutako obligazioak, ekitaldi honen barruan egindako gastuenak badira betiere.

3. artikulua. Foru Komunitateko Administrazioaren departamentuek eta erakunde autonomoek behar diren jarraibideak ematea, foru agindu honetan xedatutakoa burutu eta betetzeko, eta hornitzaile, esleipen-hartzaile edo onuradunei faktura eta ziurtagiriak edo antzeko dokumentuak azkar aurkez ditzatela eskatzea, ordainketa horiek 2009ko aurrekontuaren kargura aipatutako datetan tramitatu ahal izateko edo, bestela, gerakinetan kontabilizatu.

4. artikulua. Foru agindu hau eta eranskina igortzea Nafarroako Parlamentuari, Comptos Ganberari, Arartekoari, Nafarroako Kontseiluari, Ikus-entzunezkoen Kontseiluari, departamentuetako idazkaritza tekniko nagusiei, erakunde autonomoei, sozietate eta fundazio publikoetako zuzendari kudeatzaileei, Esku-hartze, Kontabilitate eta Diruzaintza ataletako buruei eta kontu-hartzaile delegatuei, eta Nafarroako Aldizkari Ofizialean argitara daitezela agintzea, orok jakiteko eta aplikatzeko.

Iruñean, 2009ko azaroaren 25ean.-Ekonomia eta Ogasuneko kontseilaria, Álvaro Miranda Simavilla.

ERANSKINA

Xedea

Arau hauen xedea da 2009ko ekitaldiko Nafarroako Aurrekontu Orokorrak eta Balantze Kontuak itxi, likidatu eta 2010eko ekitaldian irekitzeko jarraitu beharreko arauak zehaztea.

1.-Gastuen aurrekontua.

1.1. Aurrekontuko aldaketak tramitatzeko epea.

Ekonomia eta Ogasuneko kontseilariak onetsi behar dituen edo Gobernuari proposatu behar dizkion aurrekontu aldaketen espedienteak 2009ko abenduaren 9a baino lehen igorri beharko dira Aurrekontuen eta Finantza Politikaren Zerbitzura.

1.2. Inbertsioei eta kapital diru-laguntzei buruzko espedienteak tramitatzeko epea (D, AD).

2009ko abenduaren 9tik aurrera, inbertsioei eta kapital diru-laguntzei dagozkien baimen eta gastu konpromisoak baizik ezin izanen dira tramitatu, salbu eta toki entitateek Nafarroako Zergetan duten Partaidetza Funtsean sartutako kapital transferentziak, Gobernuaren erabakiz edo Ekonomia eta Ogasuneko kontseilariak espresuki emandako baimenaren bidez.

2009ko abenduaren 15erako jasota egon beharko dute aurretiaz, kontabilitate sisteman, egun horretara arte hartu diren eta burutu gabe dauden baimen eta konpromiso guztiak, aurreko atalean adierazitako salbuespena salbu, abenduaren 31rako jasota egon beharko baitu behin betiko.

1.3. Hurrengo ekitaldietako espedienteak tramitatzeko epea (D, AD).

2009tik aurrerako ekitaldien kargura egiten diren gastu konpromiso guztiek abenduaren 15erako egon beharko dute behin betiko kontabilizatuta, honako hauek izan ezik: toki entitateek Nafarroako Zergetan duten Partaidetza Funtsean sartutako kapital transferentziak eta aurretiazko tramitazioaren gastuak. Kasu horietarako abenduaren 31n bukatuko da epea.

Egun horretarako kontabilizatuta ez dauden gastu espediente guztiak kasuan kasuko kontu-hartzailetzak, delegatuak nahiz orokorrak, baztertuko ditu eta konpromiso horiek baliogabetu ere egin ditzake.

1.4. 2009ko ekitaldiaren kargura aitortutako obligazioak (ADOP, OP eta T).

2009ko ekitaldiko aurrekontuaren kargura egozten ahalko dira aurrekontuko gastu orokorren -2009ko abenduaren 31 baino lehen egindakoak- ondoriozko obligazio aitortuak, kasuan kasuko aurrekontu kredituen kargura, baldin eta aurrekontua ixtean ordaindu gabe badaude.

Horretarako, gastu horiek burutu direla egiaztatu beharko da, ziurtagiri, faktura, albaran edo obra nahiz zerbitzua 2009ko ekitaldiaren barrenean gauzatu dela frogatzen duen agiriaren bidez.

2009ko abenduaren 15etik aurrera, ordaindu gabe utzi beharreko obligazioen aitorpena kontabilizatzen ahalko da, T1, T2 eta T3 agirien bidez, betiere Kontabilitate Atalera igorri badira itxiera arau hauen 4.4.1 eta 4.4.2 ataletan aipatutako txostenak.

1.4.1. Obligazioak kontabilizatzeko epeak.

Aurrekontu gauzatzeari dagozkion agiri guztiek, edozein aurrekontu fasetakoek, gerakinen kontabilizazioa barne, sistema informatikoan erregistratuta egon beharko dute abenduaren 31rako aurretiaz, salbu eta nomina bidezko ordainketei, gastuaren sailkapen ekonomikoaren 16. artikuluari eta atal honetako hurrengo lerroaldeetan aipatutakoei dagozkienak.

Fakturetan edo agirien kanpoko ekarpenetan jasan behar diren obligazioak aitortzeari dagokionez, 2010eko urtarrilaren 11 baino lehen sartu beharko dira, baldin eta epea arauzko xedapen baten bidez ezarrita ez badago. Nolanahi ere, kontabilitate zentroek urtarrilaren 15a bitarte jaso dezakete dokumentazioa, eta egoera horiei dagozkien ordainketa obligazioak aurretiaz erregistratzeko epea urtarrilaren 22an bukatuko da. Egun horretarako, indarra duen araudiaren arabera aldez aurreko kontu-hartze beharrik ez duten gastu guztiek behin betiko kontabilizatuta egon beharko dute.

Aurreko bi ataletan finkatutako mugaepean aldeko kontu-hartzea egiteko moduan ez dauden obligazioen aitorpenak baztertuko dira, gerakinenak barne. Salbuespen gisa, agiriak aurkezteko legezko epeetan ezinezkoa baldin bada finkatutako mugaegunerako gastuak behar bezala justifikatzea, ordainketa obligazioak behin-behineko egoeran geldituko dira, kasuan kasuko araudian finkatutako epea amaitu arte, edo gehienez urtarrilaren 26a arte. Hortik aurrera, dagokion erabakia hartuko da lehenbailehen. Puntu honetan ezarritakoa aplikatzearen ondorioz baztertzen diren gastuak 2010eko ekitaldiaren kargura egotziko dira, hala badagokio.

Bestalde, 2010eko urtarrilaren 29rako kontabilizatuta egon beharko dute, kontu-hartzailetzak aurrez adostasuna emanda, 2009ko ekitaldiari buruzko eragiketa guztiek.

Arau hauen kariaz kontabilizatu diren obligazioen kargura, bidezkoak diren ordainketak egin daitezela agintzen ahalko da.

1.4.2. Langileen gastuak.

Abenduko nominan ordaindutako gastuen kontabilizazioa 2010eko urtarrilaren 5a baino lehen egin beharko da. Egun horretarako, aurrekontuko 16. artikulu ekonomikoan biltzen diren gastu guztiek kontabilizatuta egon beharko dute.

Kasuko kontu-sailean behar adina diru ez badago eta, horrenbestez, aurreko lerroaldean aipatutako gastua egiterik ez badago, arazoa 2010eko urtarrilaren 11rako ebatzi beharko da.

2009. urtean emandako zerbitzuetakoak izan arren, 2010ean (urtarrileko nominan nahiz beste batean) ordaintzen diren denborazko kontzeptuen ordainsariak (dietak, aparteko orduak, jaiegunak eta antzekoak) 2010eko aurrekontuari egotziko zaizkio.

1.5. Justifikatu beharreko funts libratuak.

Abenduaren 20ko 385/1993 Foru Dekretuak justifikatu beharreko funts libratuak arautzen ditu, eta Ekonomia eta Ogasuneko kontseilariaren 172/1994 Foru Aginduak garatu egin zuen aipatu foru dekretua. Halaber, 13/2007 Foru Legearen 56. artikuluak hura arautu zuen berriro, eta indargabetu, hirugarren azken xedapenaren bidez, lege horretan ezarritakoari aurka egiten dioten maila bereko edo txikiagoko xedapenak oro.

Bi xedapen horietan ezarritakoa betetzeko, aurrekontuko itxiera eragiketei dagokienez, honako arau hauek hartu beharko dira kontuan:

1.5.1. Kutxa finkoko aurrerakinak.

Kutxa finkoko aurrerakintzat jotzeak aukera ematen du aurrerakin hori ez itzultzeko eta emakida berri bat eskatzeko, ekitaldiaren itxieran eta irekieran. Dena dela, kutxa finkoko aurrerakinak kudeatu eta horien jarraipena egiteaz arduratzen diren organoek txosten bat eginen dute, funts horiek 2009ko abenduaren 31n duten egoera biltzen duena. Txostena dagokion organo erantzuleak sinatuko du, eta Kontabilitate Atalera igorriko da, 2010eko urtarrilaren 29a baino lehen.

Aipatutako txostenak informazio eta euskarri hauek edukiko ditu:

a) Aurrerakinaren kontu korrontearen saldoa finantza entitatean 2009-12-31n. Abenduaren 31n dagoen saldoa agertzen duen laburpenaren kopia gehituko da.

b) 2009ko abenduaren 31n justifikatutako eta kontabilizatutako gastuaren zenbatekoa, data horretan aurrerakinaren kontu korrontera itzuli gabekoa. Dagozkion fakturen eta zenbatekoen zerrenda emanen da.

c) Igorri eta onuradunak kobratutako taloien zenbatekoa, 2009ko abenduaren 31n justifikatu gabe eta kontu korrontearen saldora itzuli gabekoa. Zenbateko horien eta hartzaileen zerrenda emanen da.

d) Kasuko justifikazioa aurkeztuta ere, onuradunek kobratu ez dituzten taloien zenbatekoa. Hirugarrenen, kontzeptuen eta zenbatekoen zerrenda emanen da.

1.5.2. Justifikatu beharreko ordainketa aginduak.

a) Ordainketa agindu hauek jasotzen dituztenek justifikatu egin beharko dute hartutako diru-kopuruen aplikazioa eta, hala egin behar bada, Diruzaintzara itzuli erabili gabeko funtsak, 2009ko abenduaren 31 baino lehen. Hori horrela izan dadin, justifikatu beharreko funts horien kudeaketaz eta segimenduaz arduratzen diren organoek behar diren neurriak hartu beharko dituzte.

b) Justifikatu beharreko ordainketa aginduen kudeaketaz eta jarraipenaz arduratzen diren organoek 2009ko abenduaren 31n funts horiek zuten egoerari buruzko txostena egin beharko dute. Txosten hori, organo arduradunak sinaturik, Kontabilitate Atalera igorriko da 2010eko urtarrilaren 29a baino lehen.

Aipatutako txostenak informazio eta euskarri hauek edukiko ditu:

-Finantza entitatean justifikatu beharreko ordainketaren kontu korrontearen saldoa 2009ko abenduaren 31n. Abenduaren 31n dagoen saldoa agertzen duen laburpenaren kopia gehituko da.

-2009ko abenduaren 31n ordaindu eta justifikatutako gastuaren zenbatekoa, kontabilizatu gabekoa. Dagozkion fakturen eta zenbatekoen zerrenda emanen da.

-Igorri eta onuradunak kobratutako taloien zenbatekoa, 2009ko abenduaren 31n justifikatu gabekoak, atal honen a) letran ezarritakoa ezarrita ere. Zenbateko horien eta hartzaileen zerrenda emanen da.

2.-Diru-sarreren aurrekontua.

2.1. Egiaztatzea tributuz besteko diru-sarrera normalizatuen kontzeptuak bat ote datozen kasuko 2010eko ekitaldiko diru-sarreren aurrekontuko kontu-sailekin.

Kontabilitate zentroek egiaztatu beharko dute, 2009ko abenduaren 18a baino lehen, dagozkien eta 2010ean indarra izanen duten tributuz besteko diru-sarrera normalizatuen kontzeptu guztiek 2010eko ekitaldirako aurreikusitako diru-sarreren aurrekontuko kontu-sailak jasotzen dituztela.

Aurreko atalean aipatutako bat-etortzea gertatzen ez bada, kasuko kontzeptuen bertsio berriak sortu beharko dira, diru-sarreren aurrekontuko kontu-sailak eguneratuz.

Bertsio berriek indarraldiaren hasieratzat joko dute 2009ko abenduaren 22a, data horretatik aurrerako ordainketak 2010eko 1. hamabostaldiari baitagozkio, abenduaren 2ko 215/2008 Foru Aginduari jarraikiz.

Behar izatera, bat ez etortzeen berri emanen zaio Kontu-hartze Orokorraren Zerbitzuko Kontabilitate Atalari, 2010eko urtarrilaren 11 baino lehen.

2.2. Diru-sarreren esleipena.

13/2007 Foru Legearen 28. artikuluak xedatzen du aurrekontu ekitaldiari urte horretan likidatutako eskubideak egotziko zaizkiola, edozein dela ere haien sortzealdia.

Horrekin bat, 2009ko diru-sarreren aurrekontuari urte horretan aitortu diren eskubideak aplikatuko zaizkio, nahiz eta kontabilitate zentroek egin behar duten kontabilizazioa 2010eko urtarrilaren 26a arte luza daitekeen.

2.3. Formalizaziotik datozen diru-sarrerak.

2010eko urtarrilaren 26rako, lan pertsonalaren etekinen eta ondasun higigarrien kapitalaren etekinen atxikipenengatik sortzen diren diru-sarrera guztiak aplikatu beharko zaizkie dagozkien kontu-sailei, bai eta, halakorik bada, formalizaziotik datozen gainerako diru-sarrerak ere.

3.-Gastuetarako proiektuak.

2010eko otsailaren 12rako gastuetarako proiektuen kudeatzaileek proiektu horietako PEPeko elementuak berrantolatu beharko dituzte, izandako gauzatzearen eta 2009ko ekitaldiaren itxieran eskura dagoen informazioaren arabera. Halaber, proiektuaren 2009ko ekitaldia (PEPeko proiektu eta elementuena) baliozkotuko da, informazio sisteman.

Urte anitzekoak eta proiektuak 2010eko ekitaldira pasatzeko eta gastuetarako proiektuei egotzi beharreko diru-sarrera eta gastuak ekitaldi horretan kontabilizatzen hasteko, nahitaezkoa izanen da, kontabilitate zentro bakoitzean, gastuetarako proiektuak berrantolatu eta baliozkotzea.

4.-Balantze kontuak.

Kontabilitate itxierako eragiketa obligatuetan ezinbestekoa da ondare egoera azaltzeko aurkeztuko diren finantzen egoera orrien zehaztasuna bermatzea. Horregatik, egiaztapen batzuk egin eta dokumentatu behar dira, balantzeko kontuak eta departamentuetan dauden erregistro lagungarriak bat datozela ziurtatzeko. Koadratze hori egiaztatzeko, kontabilitate zentroek hurrengo ataletan aipatzen den informazioa eman beharko dute.

4.1. Ibilgetu materiala eta ez-materiala.

Ondare Zerbitzuak, Foru Komunitateko Ondareko Ondasun eta Eskubideen Inbentarioa prestatu eta eguneratzeko ardura duen aldetik, eraikin eta ondasun higigarriei dagozkien eta aplikatzeko dauden bajei buruzko informazioa eman beharko du 2010eko urtarrilaren 8a baino lehen.

4.2. Finantza inbertsio iraunkorrak (250, 251, 252,259, 260 eta 542 kontuak).

4.2.1. Ondare Zerbitzuak, 2010eko otsailaren 12a baino lehen, Kontabilitate Atalera igorri beharko du 250 (Akzioak), 251 (Errenta finkoko baloreak) eta 259 (Akzioengatik ordaindu beharrekoak) kontuei dagozkien saldoen informazio txostena, 2009ko ekitaldian izandako aldaketen berri emanez eta adieraziz aldaketa horiek aurrekontuak gauzatzean eraginik izan duten ala ez.

Txostenak, halaber, hauxe jasoko du:

a) Akzioei buruzko 2009ko abenduaren 31ko datu hauek, Nafarroako Gobernua edo haren erakunde autonomoak jabe dituzten sektore publikoko sozietateak direla-eta:

-Akzioen kopurua.

-Balio izendatua.

-Partaidetza portzentajea sozietatearen kapitalean.

-Urtean egindako kapital handitze edo murrizteak, edo ekitaldiko aurrekontuan behar den aplikazioa eginez hasitakoak, eta horien tratamendua aurreko puntuetan emandako datuetan.

-Nafarroako Gobernuak erosi edo saldutako harpidetza eskubideak.

b) Akzioei buruzko 2009ko abenduaren 31ko datu hauek, Nafarroako Gobernua edo haren erakunde autonomoak jabe dituzten sektore pribatuko sozietateak direla-eta:

-Akzioen kopurua.

-Balio izendatua.

-Partaidetza portzentajea sozietatearen kapitalean.

-Urtean egindako kapital handitze edo murrizteak, edo ekitaldiko aurrekontuan behar den aplikazioa eginez hasitakoak, eta horien tratamendua aurreko puntuetan emandako datuetan.

-Nafarroako Gobernuak erosi edo saldutako harpidetza eskubideak.

c) Aurreko informazioaren arabera, akzioengatik ordaindu beharrekoak, eta a) eta b) puntuetako sozietateei emandako partaidetza maileguen egoera edo aplikazioa.

d) 2009ko abenduaren 31ko datu hauek, Nafarroako Gobernua edo haren erakunde autonomoak jabe dituzten obligazioak eta zor publiko kontratatua direla-eta:

-Balore motaren identifikazioa.

-Tituluen kopurua.

-Entitate gordailuzaina.

-Gordailu agirien zenbakiak.

-Balore mota bakoitzaren guztizko zenbatekoa.

e) 2009ko abenduaren 31n Fondo de Carbono para la Empresa Española FC2E delakoak duen merkatuko balioa, eta Nafarroako Gobernuaren partaidetzaren portzentajea hartan.

f) Aurreko ataletan aipatu gabeko edozein finantza aktibo eskuratu bada, horren gaineko informazioa.

g) Aipatutako tituluetako batzuek baloreen merkaturen batean kotizatzen badute, ekitaldiko azken hiruhilekoko batez besteko kotizazio ofiziala eta itxierako ekitaldiko abenduaren 31ko kotizazioa ere emanen dira.

Azkenik, 2010eko otsailaren 17a baino lehen igorri beharko du, akzioei dagokienez, Nafarroako Gobernua edo haren erakunde autonomoak jabe dituzten sektore pribatuko eta publikoko sozietateen arabera, sozietatearen funts propioetan dagoen parte-hartzearen kuantifikazioa, 2009ko abenduaren 31n, edo sozietatearen funts propioei buruzko informazioa, 2009ko ekitaldiaren urteko itxiera balantzean, eta sozietate bakoitzean dauden parte-hartzeen ehunekoak.

4.2.2. Maileguak, epe luzerako aurrerakinak edo Nafarroako Ogasun Publikoaren beste kreditu batzuk (252 eta 260 kontuak ukitzen dituztenak) eman dituzten departamentu edo erakunde autonomoetako kontabilitate zentroek sistema informatikoan mailegu horietako bakoitzari buruzko informazioa sartu beharko dute, 2009ko abenduaren 31n eguneratutakoa. Departamentuek, 2010eko urtarrilaren 29a baino lehen, Idazkaritza Teknikoaren ziurtagiri bat igorri beharko dute Kontabilitate Atalera, egiaztatzen duena kontabilitate datuak, hirugarrenen zerrenda barne (hori ere aurkeztu beharrekoa), Departamentuan dauden administrazio espedienteekin bat datozela.

4.2.3. Toki Administrazioko Departamentuak, 2010eko urtarrilaren 29a baino lehen, 542 kontuan (Udal funtzionarioen Montepioko mailegua) dagoen saldoa berresten duen txostena igorri beharko du Kontabilitate Atalera.

4.3. Izakinak (3. multzoko kontuak).

Izakinen inbentarioa duten departamentu edo erakunde autonomoek 2010eko urtarrilaren 29 baino lehen igorri beharko dute Kontabilitate Atalera kontu horiek ekitaldia ixtean dituzten saldoei buruzko informazioa.

4.4. 2009a baino lehen aitortutako obligazioen ondoriozko hartzekodunak.

4.4.1. Gerakinen ondoriozko hartzekodunak (T).

2009ko ekitaldia ixtean, 2008ko eta aurreko urteetako obligazio aitortuen ondoriozko hartzekodunak dituzten departamentuek edo erakunde autonomoek, baldin eta horien ordainketa agindua tramitatu gabe badago oraindik (T), baliogabetu beharreko obligazioak baliogabetuko dituzte 2009ko abenduaren 9a baino lehen, 2009ko ekitaldiari egotzita, eta gerakinen zerrenda Kontabilitate Atalera igorri beharko dute. Horrekin batera, denbora luzea pasatu arren ekitaldia ixtean obligazio horiek oraindik ere indarrean daudela frogatzen duten agiriak igorri beharko dituzte.

Halaber, abenduaren 31n zero saldoa izanen duten T agiri guztiek dagozkien P agiriekin konpentsatzen diren egiaztatuko da.

4.4.2. Obligazio aitortuen ondoriozko hartzekodunak.

2009ko ekitaldiaren itxieran aurreko urteetako obligazio aitortuen ondoriozko hartzekodunak dituzten departamentuek edo erakunde autonomoek, baldin eta horien ordainketa agindua blokeatua badago (O, blokeatua), baliogabetu beharreko obligazioak Kontabilitate Atalera igorriko dituzte baliogabetzera, 2009ko abenduaren 9a baino lehen, eta geratzen diren hartzekodunen zerrenda erantsiko dute. Horrekin batera, denbora luzea pasatu arren ekitaldia ixtean obligazio horiek oraindik ere indarrean daudela frogatzen duten agiriak igorri beharko dituzte.

Halaber, abenduaren 31n zero saldoa izanen duten Sedate hartzekodunak behar bezala konpentsatuta dauden egiaztatuko da.

4.5. Zorren kobrantzen ondoriozko aurrekontutik kanpoko hartzekodunak (419).

2010eko urtarrilaren 29a baino lehen, beste erakunde batzuen (FEOGA eta NILSA) kobrantza kudeaketa dela-eta derrigorrezko diru-bilketa agentziara aurrekontutik kanpoko zordunak eskualdatu dituzten kontabilitate zentroek, dagokien saldoaren zatia jasan beharko dute, derrigorrezko diru-bilketa agentziara eskualdatu eta kobratzeke edo baliogabetzeke dauden zordunei dagokiena.

4.6. Diru-sarreren itzulketaren ondoriozko hartzekodunak (420).

HKLren (Hirugarrenentzako Kontabilitate Lagungarria) esparruan kudeatutako diru-sarreren itzulketaren ondoriozko hartzekodunen kontuei dagokienez, horietako saldoei buruzko informazioa emanen da ekitaldia ixten denerako, 2010eko urtarrilaren 29rako, alegia.

4.7. Zordunak (43 eta 44 kontuak).

Kontabilitate zentroek 2010eko urtarrilaren 29 baino lehen sartu beharko dute sistema informatikoan kobratzeke dauden zor guztien gaineko informazio eguneratua (4311), eta aurrekontutik kanpoko zordunei buruzkoena (4490).

Data hori baino lehen, 2009ko ekitaldia ixtean aurreko urteetan likidatutako eskubideen ondoriozko zordunak dituzten departamentu edo erakunde autonomoek bidezko diren eskubideak igorriko dituzte Kontabilitate Atalera, deusezta ditzaten, zordunen zerrendarekin batera, zorra hasi zeneko urtearen arabera ordenatuta. Horrekin batera, ekitaldia ixtean indarra izanen duten eta derrigorrezko diru-bilketa agentziara eskualdatu behar ez diren eskubideak direla justifikatzen duten agiriak bidaliko dituzte.

Dena dela, HKLren (Hirugarrenentzako Kontabilitate Lagungarria) esparruan kudeatutako zordunen kontuei dagokienez (431, 432, 435 eta 436), horietako saldo zordun eta hartzekodunei buruzko informazioa emanen da, bai eta aurreko ekitaldietako (aurrekontu itxietako) zordunei ekitaldian egindako kudeaketaren gaineko informazioa ere.

4.8. Formalizatze kontuak (554, 556, 585, 586 eta 589 kontuak).

Zor/kreditu konpentsazio edo barruko formalizazioen eragiketetan kontu multzo hau erabiltzen duten kontabilitate zentroek aseguratu beharko dute, ekitaldi itxieran, zero saldoa dutela. Halaber, eta 55402 kontuei dagokienez, itxiera ekitaldiko mugimenduak konpentsatu beharko dira, 2009ko abenduaren 31n.

Epigrafe honetan aipatutako konturen batek zero saldoa ez badu, Kontabilitate Atalera igorriko da, 2010eko urtarrilaren 29a baino lehen, 2009ko abenduaren 31n duen saldoaren berri xehekatua.

Era berean, 5540000000, 5540200000, 5561000000, 5561000001, 5561000004, 5852000002 eta 5852000003 kontuei dagozkien zordunen eta hartzekodunen saldoei buruzko informazioa, HKLren (Hirugarrenentzako Kontabilitate Lagungarria) esparruan kudeatutakoa, emanen da.

4.9. Epe laburreko fidantzak eta CPUko errentamenduen fidantzak (180 eta 560 kontuak).

2010eko urtarrilaren 29a baino lehen, Idazkaritza Teknikoaren txostena igorriko dute Kontabilitate Atalera, kontabilitate zentroek 2009ko abenduaren 31n itzultzeke egonen diren epe laburrera jasotako fidantzen zerrenda agertuta, fidantzak eratu zireneko urtearen arabera ordenatuta, eta horietakoren batean hura justifikatzen duen bermea ez-beharrezkoa bihurtu dela adieraziz, bost urtean bederen itzultzeko eskaera egiterik izan gabe.

5.-Jasotako eta emandako abalen gaineko informazioa.

2010eko urtarrilaren 29a baino lehen, Ondare Zerbitzuak eta Diruzaintza Atalak Kontabilitate Atalera igorri beharko dute abenduaren 31 arte eratutako abalen gaineko saldoen eta 2009an horietan izandako aldaketen txostena, bai eta jasotako abalei buruzkoa ere.

6.-Sozietate eta fundazio publikoak.

6.1. Transferentziak eta diru-laguntzak.

Kontu-hartze Orokorraren Zerbitzuak departamentuetako idazkaritza tekniko nagusietara igorri dute, otsailaren 5a baino lehen, sozietate eta fundazio publikoei ordaindutako transferentzien eta diru-laguntzen zerrenda. 2010eko otsailaren 12a baino lehen, idazkaritza tekniko nagusiek zerrendari gehituko diote haien izaerari buruzko kalifikazioa, Kontabilitaterako eta Kontuen Auditoretzarako Institutuaren 2009ko martxoaren 11ko Zirkularrean ageri diren koadratze irizpideei jarraikiz. Zirkularra idazkaritza tekniko nagusiei igorri zitzaien 2009ko apirilaren 29an.

6.2. Edukia.

Nafarroako Ogasun Publikoari buruzko apirilaren 4ko 13/2007 Foru Legearen 2. artikuluko f) eta g) letretan aipatzen diren entitateen kontuetan, balantzea, emaitzen kontua, ondare garbiaren aldaketen egoera orria, eskudiru fluxuen egoera orria eta memoria bilduko dira, azaroaren 16ko 1514/2007 Errege Dekretuaren bidez onetsi zen Kontabilitate Plan Orokorrean adierazitako moduan eginak.

Nafarroako Ogasun Publikoari buruzko apirilaren 4ko 13/2007 Foru Legearen 128. eta 129. artikuluetan aipatzen diren diru-laguntzak eta beste transferentzia batzuk erakusten dituen egoera orrian, emandako kontabilitateko tratamendua aipatuko da, eta bereiz jasoko Estatuarenak, Foru Komunitatearenak, toki entitateenak eta Europar Batasunarenak; gainera, azken horiek zein funts edo finantza bitartekoren kargura jaso diren adieraziko da.

6.3. Igorri beharreko informazioa.

Sozietate eta fundazio publikoek Kontu-hartze Orokorraren Zerbitzura igorri beharko dituzte, gobernu organo eskudunak haien kontuak onetsi baino astebete lehenago gutxienez, honako agiri hauek:

-Balantzea.

-Irabazi eta geleren kontua.

-Gastu eta diru-sarra aitortuen egoera orria.

-Memoria.

-Galera eta irabazien kontuari buruzko informazio gehigarria: Foru Komunitateari saldutako ondasun eta zerbitzuak, aparteko gastu eta diru-sarrera xehakatuak, eta sozietateen gaineko zergatik zenbat dagokien atxikipen eta konturako ordainketei eta zenbat aurreko ekitaldiko likidazio erlatiboari.

-Jasotako transferentzia eta diru-laguntzen egoera orria.

-Europar Batasunetik jasotako funtsak.

-Balantzean ageri diren aktibo ez-finantzarioen bilakaerari buruzko txostena.

-Nafarroako Ogasun Publikoari buruzko apirilaren 4ko 13/2007 Foru Legearen 128. artikuluan aipatzen diren titulu baloreen zerrenda.

-Plantillaren egoera eta bilakaera erakusten dituen egoera orria.

Agiri horiek euskarri informatikoan igorriko dira, eta memoria izan ezik beste guztiak eginen dira Kontu-hartze Orokorraren Zerbitzuak ematen dituen formatuetan.

Informazio hori bidaltzea ez da eragozpen izanen Zerga eta Finantza Politikaren Kontseiluak 2003ko apirilaren 10ean hartutako erabakia aplikatuz hiru hilean behingo informazioa igortzeko ezarrita dauden mekanismoetarako.

Halaber, onetsitako kontuak Kontu-hartze Orokorraren Zerbitzura bidali beharko dituzte, kontabilitatearen erregulartasunari buruzko auditoria barne, 2010eko maiatzaren 14a baino lehen.

7.-Beste erakunde batzuk.

Nafarroako Ogasun Publikoari buruzko apirilaren 4ko 13/2007 Foru Legearen xedapen gehigarri bakarrean aipatzen diren erakundeek xedapen horren 3. zenbakian adierazten den itzulketa egin beharko dute, dagozkien urteko kontuak onetsi eta hamabost eguneko epean.

Iragarkiaren kodea: F0927254