123. ALDIZKARIA - 2009ko urriaren 5a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

"1018/2009 EBAZPENA, uztailaren 2koa, Arriskuen Prebentziorako eta Lanaren zuzendari nagusiak emana, Elizondoko "Centro Hospitalario Benito Menni" enpresaren lan hitzarmen kolektiboaren testua erregistratu, gorde eta Nafarroako Aldizkari Ofizialean argitaratzea erabakitzen duena (espediente zenbakia: 45/2009).

Departamentu honetan 2009ko ekainaren 2an sartu zen "Centro Hospitalario Benito Menni" enpresaren lan hitzarmen kolektiboaren testua, 64 artikuluz, 3 xedapen gehigarriz, xedapen iragankor batez, 3 azken xedapenez eta eranskin batez (2009rako ordainsarien taula) osatua, enpresaren ordezkariek eta enpresa batzordeak (ELA-STV eta SAE) 2009ko maiatzaren 28an sinatu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoari jarraikiz, Berrikuntza, Enpresa eta Enplegu Departamentuak du lan hitzarmen kolektiboak erregistratu, gorde eta argitaratzeko eskumena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan daude ezarrita. Horiek horrela, kontuan hartu da Lan hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskudantziak erabiliz,

EBATZI DUT:

1. Elizondoko ''Centro Hospitalario Benito Menni'' enpresaren lan hitzarmen kolektiboa erregistratzea (kodea: 3108841) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri Negoziazio Batzordeari ematea, eta adieraztea ebazpenak ez duela administrazio bidea amaitzen eta honen aurka gora jotzeko errekurtsoa jartzen ahal duela, Berrikuntza, Enpresa eta Enpleguko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako Aldizkari Ofizialean argitaratzea, orok jakin dezan.

Iruñean, 2009ko uztailaren 2an.-Arriskuen Prebentziorako eta Lanaren zuzendari nagusia, Imelda Lorea Echavarren.

I. TITULUA

Xedapen orokorrak

I. KAPITULUA

Eremuak

1. artikulua. Aplikazio eremua.

Hitzarmen honen eremua Elizondoko Centro Hospitalario Benito Menni da (Nafarroa), eta besteren kontura aritzen diren langileen oinarrizko arauak ezarri eta lan baldintzak arautzen ditu, Langileeen Estatutuaren 1. artikuluan ezarritakoari jarraikiz.

2. artikulua. Iraunaldia.

Hitzarmen honek 2009ko urtarrilaren 1etik 2011ko abenduaren 31 arteko indarraldia du.

Galarazi gabe 2008rako soldata igotzearen ondorio ekonomikoak 2009ko urtarrilaren 1etik aplikatuko direla sinatze egunean enpresan zerbitzuak egiten ari diren langileentzat edo, zerbitzurik egin gabe, enpresarekin lan lotura mantentzen dutenentzat (kontratua eteteak, baimenak edo eszedentziak), argitaratze eguna edozein delarik ere. Hitzarmenak 2011ko abenduaren 31 arte iraunen du. Dena den, luzatutzat joko da legez dagokiokeen epean, harik eta hurrengo hitzarmenak indarra hartzen duen arte.

Hitzarmenaren amaiera automatikoki indarraldia bukatu baino bi hilabete lehenago izanen da eta alde sinatzaileek konpromisoa hartu dute elkarrizketei ekiteko, hurrengo hitzarmena negoziatzea helburu.

II. KAPITULUA

Batzorde paritarioa

3. artikulua. Batzorde Paritarioa.

Hitzarmenaren jarraipen batzordea eratuko da, hitzarmenaren interpretazio, arbitraje, adiskidetze eta zaintzarako organoa gisa.

Bi alderdiak ados daude hitzarmena aplikatu edo interpretatzeko sor litezkeen problema, eztabaida eta auzi guztiak batzordearen mende jartzeko, lan administrazioko agintaritza edo jurisdikzio eskudunari kontsultatu aurretik; horrek egoera aurkeztu eta hilabete bateko gehieneko epean emanen du erantzuna.

Batzordea lau kidek osatuko dute, bi enpresaren ordezkari eta beste bi hitzarmen kolektiboa sinatzen duten langileen ordezkari.

Batzorde paritarioa bi ordezkaritzetatik edozeinek eskatzen duen aldiro bilduko da. Aztertzeko gaia edo gaiak azalduko dira eta erabakitakoaren berri emanen da lantokian.

Batzorde paritarioak erabakiak aho batez hartuko ditu.

III. KAPITULUA

Lanaren antolaketa

4. artikulua. Lanaren antolaketa.

Lanaren diziplina eta antolaketa enpresaburuaren berariazko eskumena dira eta Langileen Estatutuan, aplikatzen ahal diren lege eta arauzko xedapenetan ezarritakoari eta hitzarmen honen edukiei lotuko zaizkio.

II. TITULUA

Langileak

I. KAPITULUA

Langileen sailkapena

5. artikulua. Taldeak.

HItzarmen honen eraginpeko langileak, enpresan gauzatzen duten lanaren arabera, bi taldetan sailkatuko dira:

I. taldea: laguntza-langileak.

II. taldea: laguntza-langileak ez direnak.

6. artikulua. Kategoriak.

Langileak kategoria hauetan banatzen dira:

I. Laguntza-langileak:

a.1. Mediku espezialista.

a.2. Medikua.

a.3. Farmazialaria.

a.4. Psikologo klinikoa.

b.1. OLT-EUD.

b.2. OLT-EUD, astebururako edo ordezkoa izateko.

b.3. Gizarte langilea.

b.4. Terapeuta okupazionala.

b.5. Gizarte hezitzailea.

c.1. Erizaintzako laguntzailea.

c.2. Begirale laguntzailea.

c.3. Erizaintzako laguntzailea astebururako edo ordezkoa izateko.

c.4. Zaintzailea.

II. Laguntza-langileak ez direnak.

d.1. Informatikaria.

d.2. Administrazioko teknikaria.

d.3. Administrari laguntzailea.

d.4. Harreragilea.

d.5. Sukaldaria.

d.6. Sukaldeko laguntzailea.

d.7. Ikuztegia.

d.8. Mantentze-lanetako ofiziala.

d.9. Mantentze-lanetako peoia.

d.10. Garbiketa.

d.11. Gidaria.

d.12. Lorezaina.

d.13. Zerbitzu orokorrak.

Bi taldeetan, aldi baterako agintze kategoriak izaten ahalko dira, hala nola, zuzendariak, zuzendariordeak, buruak, arduradunak, gainbegiraleak, koordinatzaileak eta antzekoak.

7. artikulua. Definizioak.

Kategoria guztien definizioak, baita beste hitzarmenetan edo lehenagotik aplikatzen ziren izatezko egoeretan definitutako kategoriekin parekatzeko koadroa ere, II. eranskinean agertzen dira. Eranskina bigarren xedapen gehigarriari jarraikiz egin da.

8. artikulua. Betetzeak.

Lehenago zehaztu diren kategoria horiek sailkapen konturako dira eta enpresa ez dago beharturik guzti-guztiak beteta edukitzera.

9. artikulua. Balioaniztasun funtzionala.

Lan kontratuan balioaniztasun funtzionala hitzartzen ahalko da, hau da, bi edo kategoria gehiagori dagozkion lanak egitea.

II. KAPITULUA

Kontratazioa

10. artikulua. Kontratuaren forma.

Hitzarmen honen aplikazio eremuan sinatutako kontratu guztiak idatziz egin behar dira eta kontratazioaren kontrolari buruzko araudian ezarritakoari egokituko zaizkio. Kontratazio berriak egiterakoan, erizaintzako laguntzailearen titulua duten pertsonek izanen dute lehentasuna.

11. artikulua. Kontratu mugagabearen presuntzioa.

HItzarmen honen eraginpeko langileak denbora mugarik gabe kontratatutzat joko dira. Salbuespenak legeak baimendutakoak bakarrik izanen dira eta mugak hurrengo artikuletan aipatzen direnak.

Langileak unean-unean indarra duten legeei jarraikiz egin daitezkeen kontratazio modalitateetako batez kontratatuko dira.

Kontratuaren iraupenari buruz modalitate berezirik hitzartu gabe enpresan sartu diren langileak finkotzat joko dira probaldia iragan ondoren.

12. artikulua. Lan pilaketako kontratua.

Enpresaren jarduera laguntzakoa eta nabarmenki egoitzakoa denez, lan pilaketatzat hartuko da ohe berriak irekitzea edo, laguntza arrazoiak direla kausa, daudenak berrantolatzea. Halaber, lan pilaketatzat joko da laguntza programa berriak edo bi urtetan egin ez diren laguntza programak egitea: laguntza programa horien ondorioz, enpresan egiten ari ez diren jarduerak edo, antolakuntza, egitura edo intentsitatearengatik beste modu batez egiten direnak sortuko dira. Lan pilaketako kontratuak hitzarmen kolektiboak legez edo erregelamenduz finkatzen ahal duen gehieneko iraupena izan ahalko du.

Aldi baterako kontratazioaren gainerako motak legez edo erregelamenduz ezarrita dauden determinazioetarako erabiliko dira.

13. artikulua. Prestakuntzako kontratuak.

Prestakuntzako, praktiketarako edo antzeko kontratuetarako indarra duen legeriari jarraikiko zaio.

14. artikulua. Lan egonkortasunerako konpromisoa.

Behin-behineko langile kopurua kontuan harturik, enpresak egoera aztertzeko konpromisoa hartzen du, langile finkoen kopuru absolutua arian-arian handitu dadin edo finkoen indizea handitu dadin.

15. artikulua. Kontratu mugagabe bihurtzea.

Langile guztiak automatikoki finko izanen dira baldin eta, kontratuan finkatutako epea iraganda, bere lanak gauzatzen segitzen badute kontratu berririk edo aurrekoaren luzapenik izan gabe.

III. KAPITULUA

Probaldia, lanpostu hutsak eta lana borondatez uztea

16. artikulua. Probaldia.

Langile sartu berriek probaldi bat pasatu beharko dute, lanbide kategoria bakoitzerako ezarritakoa:

-Goi mailako tituludunak: sei hilabete.

-Erdi mailako tituludunak: lau hilabete.

-Gainerako langileak: bi hilabete.

Probaldia amaiturik, langilea enpresako plantillan sartuko da eta aldi hori kontuan hartuko zaio ondorio guztietarako.

17. artikulua. Lanpostu hutsak.

Lanpostu bat hutsik gelditu dela ulertuko da langile bati, lan harremanen amaieraren ondorioz, baja ematen zaionean enpresan.

18. artikulua. Lana borondatez uztea.

Bere borondatez enpresako zerbitzua utzi nahi duen langileak enpresariari jakinarazi beharko dio, gutxienez ere hamabost eguneko aurreabisua eginda.

Funtzio publikoan sartuz gero, enpresariari aurreabisua egin beharko zaio probak gainditu dituztenen behin betiko zerrendak argitaratu eta hurrengo 7 egunetan.

Langileak aurretik abisua emateko baldintza hori behar den epean betetzen ez badu, enpresariak eskubidea izanen du likidaziotik egun bateko ordainsariaren zenbatekoa kentzeko atzerapen egun bakoitzeko.

Enpresariak abisua behar den denboran eta moduan jasotzen badu, langileari lan harremanaren bukaeran dagokion likidazioa ordaintzera behartua egonen da.

III. TITULUA

Lan baldintzak

I. KAPITULUA

Lanaldia

19. artikulua. Lanaldia.

Urteko lanaldia 1.726 ordukoa izanen da 2009, 2010. eta 2011. urteetan eguneko ordutegian eta 1.696 ordukoa gaueko txandan.

Gainera, hitzarmenak indarra duen urte bakoitzean norberak hartzeko libre dituen 4 egun irmo aitortzen dira, ordeztu ezin direnak. Baimen hori gauzatzeko baldintza hauek eskatuko dira: enpresan urte bateko antzinatasuna izatea eta egunak asteburuetan edo jaiegunetan ez hartzea, horrela egun horretan libre hartu duen pertsonaren ordezkapena beharrezkoa ez izateko.

Ezarritako urteko lanaldia baino handiagoa egiten duten langileek soberakina atsedenaldiekin konpentsatuko dute.

Gaueko txandan benetan egin ez diren lanorduak ez dira berreskuratuko. Dena den saiatuko da benetako zerbitzu ematea ezarritako urteko lanaldiari egoki dadin.

Lan ordutegia publikoa izanen da eta langileei urte bakoitzeko abenduaren 20a baino lehenago emanen zaie. Aldez aurretik Enpresa Batzordeari aurkeztuko zaio, honek azter dezan, beranduenez abenduaren 1ean. Batzordeak ekarpenak egin beharko ditu beranduenez abenduaren 16an.

Bi alderdiek konpromisoa hartzen dute zerbitzua optimizatuko duen eta langileen nahietara ahalik eta gehien hurbilduko den txanda eta ordutegien egokitzapena aztertzeko, behin betiko argitaratu baino lehen. Zehazki, goiz eta arratsaldeetako banaketa zuzena egiten saiatuko dira. Bereziki, ezin izanen dute 11 egun jarraian, atsedenik gabe, lanik egin.

Bestalde, erizaintzako laguntzaileei eta begiraleei dagokienez, lanaldia berrantolatuko da asteburuetan atsedenaldi gehiago izan ditzaten. Era horretan, asteburuetan eta jaiegunetan lan egiteko kontratatzen diren langileen kasuan izan ezik, joko da langile guztiek 25-26 asteburutan atsedena har dezaten, zerbitzuaren beharren arabera.

20. artikulua. Gaueko lanaldia.

Gaueko lanalditzat joko da 22:00etatik hurrengo eguneko 06:00etara bitartean egiten dena.

21. artikulua. Guardiako lanaldia.

Guardiak egitera beharturik dauden langileek egin beharreko guardiek beren ordainsaria izanen dute horretarako ezarrita dagoen modulu ekonomikoaren bitartez, eta hilabetero ordainduko dira.

22. artikulua. Atsedenaldia.

Eguneko lanaldi jarraitua sei ordutik gorakoa duten langileentzat hogei minutuko atsedenaldia ezartzen da eta aldi hori egiazko lan denboratzat hartuko da.

23. artikulua. Aparteko orduak.

Hitzarmen honetan ezarritako lanaldia gainditzen duten orduak apartekoak izanen dira. Aparteko orduak proposatzeko ekimena enpresariari dagokio eta langilea libre da hori onartzeko, unean-uneko legeria indardunarekin bat.

II. KAPITULUA

Oporrak

24. artikulua. Oporrak.

Urteko oporraldia hogeita hamar egun naturalekoa izanen da langile guztientzat. Horietatik gutxienez ere 26 lanegunak izanen dira (ez igande ez jai egun). Enpresak eta langileek, bere ordezkarien bitartez, oporrez gozatzeko egunak adostuko dituzte, urteko ekitaldi bakoitzeko martxoaren 31 baino lehen egindako egutegian. Adostasunik ez bada, enpresak oporrak maiatzaren 1a baino lehen finkatuko ditu, nagusiki ekainetik irailera, eta oporraldia 15 egun naturaleko bi alditan banatzen ahalko du.

Oporraldia honela finkatuko da: 20 egun langileak aukeratuak, zerbitzuaren antolaketak galarazten duenean salbu, eta 10 egun enpresak aukeratuak. Langilearen nahiak kontuan hartzen saiatuko da, lehenago egindako salbuespenarekin.

Langile bat, lan istripuaren ondorioz aldi baterako ezintasunaren egoera baldin bada oporraldia hasterakoan, oporraldia eten eginen da eta langileak beranduago hartzen ahalko du.

Oporrak hartzeko orduan Lanaren Nazioarteko Erakundeak horretarako finkatutako irizpideei jarraituko zaie (155. hitzarmena).

25. artikulua. Zati proportzionala.

Urtean barna lana uzten duen langileak eskubidea du oporren zati proportzionala izateko, lan egindako denboraren arabera.

III. KAPITULUA

Gaixotasunak eta baimenak

26. artikulua. Aldi baterako ezintasuna.

Laneko istripuaren edo eritasun profesionalaren ondoriozko lanerako ezintasunak langilearen egiazko lansariaren %100eko estaldura izanen du.

Eritasun arruntaren ondoriozko lanerako ezintasunaren kasuan, lehendabiziko bajan egiazko lansariaren %100eko estaldura ezartzen da. Aipatutako kontingentziaren ondoriozko bigarren prozesutik aurrera estaldura egiazko lansariaren %85ekoa izanen da, zenbaketa urte natural bakoitzeko eginez.

Hobekuntza hauek lotuta egonen dira absentismo indizea hitzarmen hau sinatu aurreko hamabi hilabeteetan izandako absentismo indizearen batez bestekoa ez gainditzearekin. Batzordeak hilero absentismo indizeari dagokion informazioa jasoko du.

27. artikulua. Baimen ordainduak.

Langileak, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborako:

1. Seme-alaben jaiotza: bi egun natural.

2. Gurasoen, seme-alaben, anai-arreben eta ezkontidearen heriotza: hiru egun natural.

3. Bigarren gradura arteko odol-ahaidetasun edo ezkontza-ahaidetasuneko ahaideen heriotza: bi egun natural. Arrazoi horiengatik langilea bidaia egin beharrean bada, baimena lau egunekoa izanen da.

4. Odolkidetasuneko bigarren gradura arteko ahaideen eritasun larria: bi egun natural.

5. Eritasun larriak ospitaleratu beharra badakar, bi egun natural horiek hartu ahalko dira jarraian ez badira ere, ospitaleratzeak dirauen bitartean, eta langileak erabakiko du noiz hartu.

6. Ezkontidearen edo bikotekidearen kirurgia handi anbulatorioa: egun bat ezartzen da.

7. Langilearen ezkontza: hamasei egun natural.

8. Gurasoen, seme-alaben eta anai-arreben ezkontza: egun natural bat.

9. Ohiko bizilekuz aldatzeko: egun bat.

10. Seme-alaben lehenengo jaunartzearen ospakizun erlijiosoa: egun natural bat, data laneguna baldin bada. Egun berean, unitate, kategoria edo txanda bereko bi edo langile gehiagoren eskaerak baldin badira, enpresak eskubidea du baimena ematea ala ez erabakitzeko, laguntza beharrak modu egokian betetzeko behar denaren arabera.

11. Publikoa edo pertsonala den eginbehar saihestezina betetzeko: behar-beharrezkoa den denbora. Lege bidez edo hitzarmenen bidez ezarritako arau batean denbora jakin bat finkatuta badago, absentziaren iraupenari eta konpentsazio ekonomikoari dagokienez arau hartan xedatutakoari jarraituko zaio.

12. Familia-medikuak aginduta, mediku espezialistarengana joan behar duten edo bidaia justifikatzen duen froga medikoren bat egin behar duten langileek behar-beharrezkoa den denbora. Baimena frogatu beharko da, aldez aurretik edo ondoren, hitzordurako agiriaren edo bertaratze-frogagiriaren bitartez.

13. Urte bakoitzeko eta metagarria izan gabe, eguneko lanaldian 7 orduko eta gaueko lanaldian 10 orduko baimen ordaindu bat aitortzen da lehen mailako ahaideak kontsulta medikoetara laguntzeko. Baimen hori lanaldi bakar batean edo zenbait egunetan orduka zatiturik hartzen ahalko da.

14. Urteko hamar (10) ordu familia-medikuaren kontsultara joateko.

15. Lanegun bateko konpentsazio baimena, ordezkapenik gabe, urtean zehar zentrotik 30 km baino urrutiagoko kanpoko toki batean lanaldiaren %65 baino gehiago egiten duten langileentzat, gune antolakundetik kanpo egoteagatik, ahalik eta gehien langileen nahiak errespetatuz.

Enpresak baloratuko ditu gainerako egoera bereziak zerbitzuen beharrak aintzat hartuz.

Artikulu hau onartzeak ez du inola ere eskubideen galerarik ekarriko Langileen Estatutuaren Legean ezarritakoaz.

28. artikulua. Ordaindu gabeko baimenak.

Langile orok, urteko, 15 egunera arteko ordaindu gabeko baimena eskatzen ahal du. Baimena 15 egun lehenagotik eskatzen bada eta, laguntza langileen kasuan, maila bereko beste langile baten baimenarekin bat egiten ez badu eta, laguntza-langileak ez direnen kasuan, talde eta arlo bereko beste langile baten baimenarekin, enpresak ordaindu gabeko baimena onartu behar du.

Baimen hori gehienez ere bi alditan hartuko da, bien artean aurreko paragrafoan ezarritako denbora osoa agortzen ez bada ere.

Bestalde, ordaindu gabeko baimena aitortzen da, bigarren maila arteko familiarrak zaintzeko, bi urtetan gehienez ere 3 hilabete artekoa, zerbitzuaren beharren mende, araudi indardunari jarraikiz sor litezkeen hobekuntzak galarazi gabe. Aldez aurretiko elkarbizitza frogatzen bada, ahaidetasun maila handiagoko familiarrak zaintzeko emanen da.

29. artikulua. Amatasuna, aitatasuna eta adopzioa.

Langileek ordainsari osoa jasotzeko eskubidea izanen dute indarra duen araudian xedatutakoari jarraikiz finkaturiko baimenek irauten duten bitartean.

30. artikulua. Haurrari esnea ematea.

Bederatzi hilabetetik beherako haurrari bularra ematen dioten emakumezko langileek eskubidea dute lanetik ordubetez lekutzeko. Denbora hori bi zatitan bana dezakete. Baimen hori ezin izanen dute aldi berean hartu bi ezkontideek edo gurasoek. Emakumezko langileek esnea emateko ezarritako orduak egunetan metatzen ahalko dituzte.

IV. KAPITULUA

Langileen ikastaroak eta azterketak

31. artikulua. Langileentzako ikastaroak.

Enpresak hobekuntza ikastaroak antolatzen dituenean eta langileak bere borondatez egiten baditu, matrikularen, joan-etorrien eta egoitzaren gastuak enpresaren kontura izanen dira.

Hobekuntza ikastaroetara joaten den langileak, enpresariak baimena eman ondotik, ordainsaria jasotzeko eskubidea izanen du haiek irauten duten bitartean.

32. artikulua. Azterketa ofizialak.

Langilearen oinarrizko hezkuntzari edo egiten duen lan jarduerari lotutako azterketa ofizialak egin behar dituenean, langileari horretarako baimena emanen zaio, ordaindua, baina justifikatu beharko ditu matrikulatu izana eta azterketak egin izana.

V. KAPITULUA

Eszedentziak eta erretiroak

33. artikulua. Eszedentzia motak.

Eszedentzia borondatezkoa edo nahitaezkoa izan daiteke, hurrengo artikuluetan ezarritako moduan. Bi kasuetan langileak ez du ordainsaririk jasotzeko eskubiderik izanen.

34. artikulua. Nahitaezko eszedentzia.

Nahitaezko eszedentzia hartzeko arrazoiak honako hauek dira:

1. Lanera joatea galarazten duen kargu publikoren baterako izendatu edo hautatua izanagatik.

2. Eritasunarengatik, aldi baterako ezintasunaren lehenbiziko hemezortzi hilabeteak pasatutakoan eta langileak egoera horretan segitzen duen bitartean, nahiz enpresak ez kotizatu.

3. Ohiko lanbidean aritzeko baliaezintasun iraunkor osoarengatik, edozein lan egiteko erabateko baliaezintasunarengatik edo baliaezintasun handiarengatik, 2 urtez, adierazi zuen ebazpena eman zen egunetik kontaturik, kalifikazio organoaren ustez langilearen ezintasun egoera hobekuntza izanagatik berraztertu behar denean berriro lanpostura itzultzeko.

4. Eszedentzia berezia, seme edo alaba bakoitza zaintzeko, Langileen Estatutuaren Testu Bateginaren 46. artikuluaren 3. zenbakian ezarritakoaren arabera. Aita eta ama lantoki berean aritzen direnean, eskubide hori aldi berean baliatzea ukatzen ahalko zaie, enpresaren funtzionamendu egokirako arrazoi justifikatuak direla kausa.

5. Ahizpa ospitalekoen zentroetan gutxienez ere 5 urteko antzinatasuna duten langileek ikasketak handitzeko eszedentzia hartzen ahalko dute eta nahitaezko eszedentziaren ondorio berberak izanen ditu.

6. Espainiatik kanpo, Jesusen bihotz guztiz santuaren ahizpa ospitalekoen jardueretan lankidetza eta boluntario lanak egiteko.

7. Indarra duen legeriak kontuan hartzen dituen gainerako kasuak.

35. artikulua. Lanpostua gordetzea.

Nahitaezko eszedentzian dagoen langileak lanpostua erreserbatzeko, egoera horretan egon bitartean antzinatasuna kontatzeko eta, eszedentzia bukatutakoan, lantoki berean sartzeko eskubidea izanen du.

Eszedentzia eragin zuen arrazoia desagerturik, langileak hogeita hamar egun natural izanen ditu lantokian berriz sartzeko eta, horrela egin ezean, bertan baja emanen zaio.

Nahitaezko eszedentzia besterik gabe eman behar da, behar diren frogagiriak aurkeztu ondoren.

36. artikulua. Borondatezko eszedentzia.

Kontratu mugagabea izaki, enpresan gutxienez urtebeteko antzinatasuna duen langileak eskubidea du borondatezko eszedentzia izateko, lau hilabeterako gutxienez eta bost urterako gehienez. Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero.

Borondatezko eszedentzian dagoen langileari lanpostua gordetzeko eskubidea lehendabiziko urtean aitortzen zaio.

37. artikulua. Enpresara itzultzea.

Borondatezko eszedentzian dagoen langileak, eszedentziarako finkatutako epea bukatu baino 30 egun lehenago ez badu itzultzea eskatzen, lanpostua gordetzeko edo enpresan lehentasunez sartzeko eskubidea galduko du.

Urtebete baino iraupen handiagoko borondatezko eszedentzian dagoen langileak, finkatutako epearen barruan itzultzea eskatzen badu, bere kategorian gertatzen den lehendabiziko lanpostu hutsa betetzeko eskubidea izanen du. Lanpostu hutsa berea baino kategoria beheragokoa baldin bada, hautatzen ahalko du: hura bete esleitutako lansariarekin edo bere kategoriakoen artean lanpostu bat huts gelditu arte itxoin.

Eszedentzia aldian zehar ez da antzinatasuna zenbatuko.

38. artikulua. Erretiroa.

Erretiroa 65 urtetan ezartzen da hitzarmen honen eraginpeko langile guztientzat. Hala eta guztiz ere, erretiroa bermatzeko gutxieneko kotizazioko legezko epea bete ez dituzten langileek enpresan jarraitzen ahal dute harik eta epe edo baldintza hori bete arte.

Enpresaren eta langileen arteko adostasunez, indarra duen legeriak aurreikusitako erretiro aurreratuen sistemak tramitatzen ahalko dira.

Indarra duen legeriari jarraikiz, errelebu kontratuaren formula edo antzekoa ezartzen da.

IV. TITULUA

Ordainsariak

I. KAPITULUA

Xedapen orokorrak

39. artikulua. Lansarien taulak.

Hitzarmen honen aplikazio eremuko langileen soldatak horrela igoko dira:

-2009: Nafarroako 2008ko KPI erreala gehi %0,75, soldata kontzeptu guztietan (jaiegunetako plusa barne, 49. artikuluan arautua) eta kategoria guztientzat.

-2010: Nafarroako 2009ko KPI erreala gehi %0,75, soldata kontzeptu guztietan (jaiegunetako plusa barne, 49. artikuluan arautua) eta kategoria guztientzat. Nolanahi ere 2009rako gutxienez ere %1,25eko KPI erreala jasotzea bermatuko da.

-2011: Nafarroako 2010eko KPI erreala (positiboa bada, bakarrik) gehi %0,75, soldata kontzeptu guztietan (jaiegunetako plusa barne, 49. artikuluan arautua) eta kategoria guztientzat. KPI negatiboa bada, ez da aplikatuko eta %0,75 gehiago aplikatuko da kontzeptu guztietan eta kategoria guztientzat.

Halaber, onesten da hileko osagarri finkagarria B taldeko kategorientzat, erizaintza izan ezik, C taldeko kategorientzat eta D taldeko kategorientzat, informatika teknikaria izan ezik. Osagarriak honako kopuru hauek izanen ditu:

-2009: 840 euro gordin (urteko 14 pagetan banaturik), Nafarroako 2008ko KPI errealean gehi %0,75 gaurkoturik.

-2010: 280 euro gordin (urteko 14 pagetan banaturik), Nafarroako 2009ko KPI errealean gehi %0,75 gaurkoturik. Nolanahi ere 2009rako gutxienez ere %1,25eko KPI erreala jasotzea bermatuko da.

-2011: 280 euro gordin (urteko 14 pagetan banaturik), Nafarroako 2010eko KPI errealean gehi %0,75 gaurkoturik. KPI negatiboa bada, ez da aplikatuko eta %0,75 gehiago aplikatuko da kontzeptu guztietan eta kategoria guztientzat.

Gainera, 126,21 euroko paga lineala aitortzen da, dagoeneko %90etan finkaturik dagoena, urte bakoitzean azaroan ordaintzen dena. Hurrengo urteko otsailerako aurreikusirik dagoen gainerako %10a ordainduko da baldin eta ustiapen mozkina, gutxienez ere, aurreko urteko ustiapen diru-sarrera guztien %3,5 bada.

Urtean zehar enpresa utzi edo bertan sartzen diren langileei paga lineala azken kitatzean ordainduko zaie zerbitzu denboraren proportzioan, alde batera utzita azaro ondoren kargutik kendua izan den edo enpresan sartu den.

40. artikulua. Soldatak ordaintzea.

Soldatak hilabetea bukatutakoan ordainduko dira, hurrengo hilabeteko lehenbiziko 5 egunetan.

41. artikulua. Hileko soldatak eta aparteko pagak.

Soldata hileko 12 pagatan ordainduko da.

Hitzarmen honen aplikazio aremuan sartzen diren langileek, hilabetetik goitiko mugaegunaren aldizkako osagarri bezala, aparteko bi eskersari jasoko dituzte, hilabeteko baten adinakoa bakoitza, osagarria, antzinatasuna eta osagarri berariazkoak barne. Uztailaren 1a eta abenduaren 23a baino lehen ordainduko dira.

Urtean zehar enpresan sartu edo enpresa uzten duten langileei aparteko eskersari horiek ordainduko zaizkie, horien zenbatekoa lan egindako egunen arabera hainbanatuz.

42. artikulua. Atzerako eragina.

2009rako lansarien tauletatik eratorritako eragin ekonomikoak 2009ko urtarrilaren 1etik aplikatuko dira.

43. artikulua. Bitarteko kontratuak, kategoria handiagoko edo txikiagoko lanak.

Ordezkotza edo bitarteko izaerako kontratuetan, bitartekoak edo ordezkoak ordezkatzen duenarentzat ezarritako diru konpentsazioa jasoko du, lanpostuko osagarriak barne baina antzinatasuna, pizgarriak edo bestelako osagarri pertsonalak kontuan hartu gabe.

Arrazoi justifikatuak direla eta, langileak duen lanbidearen kategoriatik baino goragoko eginkizunen bat hartzen badu dagokion ordainsaria jasoko du, egoera horretan dirauen bitartean.

Egoera horren iraunaldia, urtebetean, sei hilabete baino handiagokoa edo, bi urtean, zortzi hilabete baino handiagokoa baldin bada, langileak aukera izanen du diharduen kategoria berrian sailkatua egoteko, behar den titulazioa izanez gero. Hala bada, lansariari dagokionez, daukan kategoriaren eta egiten duen lanaren arteko diferentzia jasoko du.

Enpresaren ustekabeko premiak direla eta, enpresak langile bat haren kategoriaren azpiko lanetan jarri behar badu, beharrezko den denboran soilik arituko da, eta bere lanbide-kategoriaren ordainsariak eta gainerako eskubideak mantenduko zaizkio. Egoera berri hau hitzarmen idatzi batean islatuko da eta, ahal dela, denbora ere finkatuko da. Artikulu hau aipatuko da eta langileen ordezkariek jakinaren gainean egon beharko dute.

44. artikulua. Soldata egitura.

Ordainsarien egitura, taulen arabera, honako hau izanen da: oinarrizko lansaria, antzinatasuna, hitzarmeneko borondatezko ordainsaria, pizgarriak eta beste osagarriak. Ohiko ordainsaria oinarrizko lansariak, antzinatasunak eta hitzarmeneko borondatezko ordainsariak osatuko dute.

45. artikulua. Hirurtekoak.

Langileak antzinatasunagatik oinarrizko lansariaren %5eko osagarria jasoko du, enpresan jarraian egondako hiru urte bakoitzeko. Hirurteko bakoitzaren zenbateko osoa bete eta hurrengo hilabeteko nominan ordainduko da.

46. artikulua. Antzinatasunaren zenbatzea.

Antzinatasuna langilea enpresan modu jarraian sartzen den egunetik hasiko da kontatzen.

47. artikulua. Lanaldi partzialen ordainsaria.

Hitzarmen honetan itundutakoa baino ordu gutxiagoko lanaldirako kontratatutako langileek urteko ordu kopuruaren adinako ordainsaria kobratuko dute.

48. artikulua. Gaueko osagarria edo plusa.

Gaueko lanaldian aritzen diren pertsonek, ordu kontaketako ondorioetarako, soldata %25 handituko dute ordu horien proportzioan. Hori ez da aplikatuko soldata lana berez gauekoa dela kontuan harturik ezarri denean.

49. artikulua. Jaiegun eta/edo igandeetako osagarria edo plusa.

Langile guztiek plus bat jasoko dute lan egindako igande eta/edo jaiegun bakoitzeko. Plus hori jasotzeko, lanaldiak gutxienez igande eta/edo jaiegunetan lan egindako sei ordukoa beharko du izan. Gaueko txandako lanaldietarako, jaiegun eta/edo igandetzat joko da bezperan hasten den lanaldia eta ez jaiegun eta/edo igandean bertan hasten dena.

Igande eta/edo jaiegun bakoitzeko plusa 37,04 eurokoa da 2009. urterako.

Kopuru hori hitzarmen honen indarraldiaren urte bakoitzerako eguneratuko da, gainerako soldata kontzeptuetarako 39. artikuluan xedatutakoari jarraikiz.

50. artikulua. Aparteko orduen ordainketa.

Enpresen beharrak direla eta, aparteko orduak egin behar baldin badira, gehienbat atseden orduekin konpentsatuko dira. Horrela izanik ere, enpresaren lan antolaketa saiatuko da aparteko orduak egin behar izateko egoera gerta ez dadin. Ordaintzen badira, aparteko orduak ohiko orduaren %175 ordainduko dira.

II. KAPITULUA

Berariazko osagarriak

51. artikulua. Zuzendaritako aldi baterako osagarriak.

Zuzendaritza osagarriak langilea aginte postuan dagoen bitartean ordainduko dira; hortaz, jaso dituzten langileentzat ez dute eskuratutako eskubiderik sortuko.

52. artikulua. Pizgarriak.

Enpresak bere iritziaren arabera ematen ditu pizgarriak; hortaz, jaso dituzten langileentzat ez dute eskuratutako eskubiderik sortuko.

V. TITULUA

Laguntza erregimena

I. KAPITULUA

Segurtasuna eta higienea

53. artikulua. Segurtasuna eta higienea.

Enpresak eta hitzarmen honen eraginpeko langileek beteko dituzte Langileen Estatutuan eta Laneko Arriskuei Aurrea Hartzeari buruzko Legean (azaroaren 8ko 31/1995 Legea) dauden laneko segurtasun eta higienearen inguruko xedapenak.

Enpresaburuak bere langileei bermatu eginen die aldian-aldian osasun egoeraren azterketa eginen zaiela lanak dituen arriskuen arabera. Horretarako hitzarmen honek indarra duen bitartean gutxienez osasun azterketa bat eginen du.

54. artikulua. Laneko arropa.

Enpresak langileei lan jantziak (kasaka, galtzak eta jaka) emanen dizkie. Langileek, lanean ari direnean, enpresak emandako arropak erabili behar dituzte, eta zaindu egin behar dituzte.

Enpresak osasun langileei (erizaintza, laguntzaileak eta monitoreak), garbiketako eta ikuztegiko langileei emanen dizkie bere lanerako egokiak diren oinetakoak. (Langileek ez badituzte emandako oinetakoak erabili nahi, enpresak haien balioko bono bat emanen die bidezko jotzen dituztenak erosteko, betiere eskaturiko segurtasun arloko gutxieneko baldintzak betetzen badituzte).

II. KAPITULUA

Hobekuntza sozialak

55. artikulua. Erantzukizun zibileko asegurua.

Enpresak aseguru poliza bat kontratatuko du hitzarmen honen eraginpeko langile guztien erantzukizun zibileko estaldura bermatzeko.

Enpresak langileen ordezkariei jakinaraziko dizkie polizaren xehetasunak eta ezbeharrik gertatuz gero jarraitu beharreko prozedurak.

Gizarte Segurantzaren araubide orokorrean afiliatutako enpresako langile guztiak (TC-2 buletinen bitartez frogaturik) aseguratuak egon beharko dira. Halaber, izenak zehazturik, nahitaezko eszedentzia egoeran dauden langileak, enpresako TC-2n ez badaude ere, 32.1 artikuluan aurreikusitako kasua izan ezik.

56. artikulua. Bermeak eta estaldurak.

Laburbilduta, erantzukizun zibileko polizaren bermeak eta estaldurak hauek izanen dira:

Aseguratuek, soilik euren jardun profesionalean ari direla, izaten ahal duten erantzukizun zibila, fidantza eta defentsa kriminala barne. Kanpo daude:

Ibilgailuen arloko aseguruek estaltzen ahal dituzten arriskuak.

Poliza honek estaltzen dituen kalte materialetatik edo gorputz kalteetatik zuzenean heldu ez den edozein kalte ez-material.

Legeak agindurik kanpoan utzitako arriskuak.

Aseguru etxeek kanpoan utzitako arriskuak.

Gehieneko prestazioa ezbehar bakoitzeko, 60.102 euro.

III. KAPITULUA

Eskubide sindikalak

57. artikulua. Bazterkeriarik ez.

Langilerik ez da diskriminatua izanen bere afiliazio sindikalarengatik; bere iritziak libreki adierazten ahalko ditu eta lan edo gizartearen arloko argitalpenak argitaratu eta banatzen ahalko ditu, enpresari jakinarazita eta lanaren jarduna deusetan ukitu gabe.

58. artikulua. Eskubideak eta bermeak.

Enpresa Batzordeko partaideek, langileen ordezkariek eta ordezkari sindikalek Langileen Estatutuak, Sindikatu Askatasunaren Lege Organikoak eta aplikatzen ahal diren gainerako legezko xedapenek ezartzen dituzten eskumen, eskubide eta berme guztiak izanen dituzte.

Ordu sindikalei dagokienez, enpresarekin ados jarrita, Batzordeko partaide batek besteen orduak metatzeko posibilitatea ezartzen ahalko da.

59. artikulua. Biltzeko eskubidea.

Zentroko langileak bertan biltzeko eskubidea bermaturik dago, betiere zentroaren jarduerari kalte egiten ez badio eta, nolanahi ere, indarra duten legeekin bat.

Bilera baino lehen enpresako legezko ordezkariari haren berri emanen zaio, behar den denborarekin, hala nola zein izanen den eguneko gai-zerrenda eta enpresakoak ez diren zenbat lagun etorriko diren bilerara zehaztuta.

Laguntzako langile ez direnen eskubide hori bermatzeko, enpresako legezko ordezkariak eguneko lana moldatzen ahalko du, langile horiek bilerara joan daitezen.

VI. TITULUA

Hutsegite, zehapen eta arau-hausteak

60. artikulua. Hutsegiteak.

Enpresak zehapenak jartzen ahal dizkie langileei lana ez betetzeagatik, hutsegiteen ondoko mailaketari jarraikiz:

a) Hutsegite arinak:

-Eginkizunak berandu edo zabarkeriaz betetzea, hala nola enpresaren lokalak, materialak edo dokumentuak behar ez bezala erabiltzea, haien larritasuna dela eta, hutsegite larritzat har daitezkenean izan ezik.

-Bidezko arrazoia izanik, lanera joan ez izanaren berri behar den epean ez ematea, non ez duen frogatzen ezinezkoa izan zaiola.

-Justifikatu gabeko puntualitate faltak egitea (hirutik bostera hilabete batean).

b) Hutsegite larriak:

-Lantokian diziplinarik ez izatea.

-Lanera ez joatea, arrazoia justifikatu gabe.

-Lanera berandu iristea bost aldiz baino gehiagotan eta hamar baino gutxiagotan hilabete batean.

-Lantokian lankideekin ika-mikan aritzea, jendaurrean.

-Hutsegite arinak egitea behin eta berriz, mota desberdinetakoak izanik ere, hiru hilabetean, aurretik zehapena egin baldin bada.

-Osasun edo gizarte-osasun arloko legeriako beste edozein agindu ez betetzea.

c) Hutsegite oso larriak:

-Egoiliarraren prozesu patologiko eta intimitatearen berri ematea.

-Egin beharreko lanetan iruzur egitea, leialtasun falta edo konfiantza abusua, hala nola delitu den edozein jokabide.

-Arrazoia justifikatu gabe lanera ez joatea bi egunez jarraian edo hiru aldiz baino gehiagotan hilabete batean.

-Lanera behin eta berriz berandu ailegatzea, arrazoirik eman gabe, hamar aldiz baino gehiago hilean edo hogeita hamar aldiz baino gehiago hiru hilabetean.

-Egoiliarrei, edozein kategoriatako lankideei edo haien ahaideei hitzezko eta egitezko tratu txarrak ematea, psikikoak edo moralak, hala nola agintekeriaz jokatzea.

-Zentroen erabiltzaileengandik onura ekonomikoak nahiz gauzazkoak lortzea.

-Zentroko erabiltzaileen edo langileen gauzak, dokumentuak, etab. ebastea.

-Botikak edo tratamenduak ematerakoan zabarkeriaz jokatzea.

-Bidegabeko lehia, familiakoei egoitza aldaketa egin dezaten edo egoiliarrak langileen edo partikularren etxeetara eraman ditzaten sustatuz edo iradokiz. Halaber, egoiliarren edo ahaideen datu pertsonalak eta/edo telefonoak egoitzakoak ez diren pertsonei ematea.

-Enpresako edozein pertsonaren aurkako sexu erasoak, hitzezkoak zein egitezkoak; aparteko larritasuna izanen dute aginte edo hierarkia posizioaz baliatuz gauzatzen direnek, aldi baterako kontratua dutenen aurka egiten direnek eta haiek salatu dituzten pertsonen aurka hartutako mendekuek.

-Osasun edo gizarte-osasun arloko legeriako beste edozein agindu ez betetzea, hutsegite larria bada.

61. artikulua. Zehapenak.

Hutsegiteen kalifikazioaren arabera ezartzen ahal diren zehapenak hauek dira:

a) Hutsegite arinengatik:

-Hitzezko kargu-hartzea.

-Idatzizko kargu-hartzea.

-Gehienez hiru eguneko enplegu-soldaten etenaldia.

-Lanera ez joateagatik edo berandu joateagatik lan egin ez den egiazko denborari dagozkion ordainsariak hein berean murriztea.

b) Hutsegite larriengatik:

-Enplegu-soldaten etenaldia, hiru egunetik hilabete bitarte.

-Lanera ez joateagatik edo berandu joateagatik lan egin ez den egiazko denborari dagozkion ordainsariak hein berean murriztea.

c) Hutsegite oso larriengatik:

-Hilabetetik hiru hilabetera bitarteko enplegu-soldaten etenaldia.

-Kaleratzea.

62. artikulua. Prozedura.

Zehapenak modu arrazoituan eta idatziz jakinaraziko zaizkio interesdunari, jakin ditzan eta behar diren ondorioak izan ditzaten. Enpresa Batzordeari edo langileen ordezkariei ere jakinaraziko zaizkie.

Hutsegite oso larriengatik zehapenak ezartzeko derrigorrezkoa izanen da alde biko espedientea izapidetzea. Espedientea irekiko da arau-haustea ezagutu ondoren. Interesdunari karguen agiria igorriko zaio eta bertan hutsegitea, ustez, sorrarazi dituzten egintzak azalduko dira laburki.

Espedientea Enpresa Batzordeari edo langileen ordezkariei igorriko zaie, bi alderdiek, bi eguneko epean, zuzendaritzari, egintzak argitzea helburu, komenigarritzat jotzen duten oro azal diezaioten. Epe hori iraganda eta Batzordeak, langileak edo biek, alegazioak egiteko duten eskubidea erabili ez badute ere, espedientea ebatziko da eta langileari, hala behar denean, zehapena ezarriko zaio, hutsegitearen larritasunaren eta hitzarmen honetan xedatutakoaren arabera.

Enpresa Batzordeko kideen edo langileen ordezkarien kasuan, kargu sindikaletan jardunean egon edo garantien arauzko epean egon, hutsegiteen larritasuna edozein izanda ere, zehapenak jartzeko, ezinbestekoa da aldebiko espedientea tramitatzea.

63. artikulua. Preskripzioa.

Hutsegite arinak hamar egunen buruan preskribatuko dira, larriak hogei egunen buruan eta oso larriak hirurogeiren buruan, hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.

64. artikulua. Enpresaburuaren arau-hausteak.

Enpresaren ekintzek edo ez egiteek hitzarmen honek eta gainerako legezko xedapenek ezarritakoaren kontra jotzen badute laneko arau-haustetzat joko dira.

Kontratatutako langileak, enpresa batzorde edo ordezkari sindikalen bidez, lehenbizi, enpresaburuari ustezko arau-haustea zuzentzeko eskatzen saiatuko dira.

Jakinarazi eta hamar eguneko epean konponbiderik izan ez baldin bada edo konponbidea erreklamazio egilearendako nahikoa ez baldin bada, honek espedientea hasten ahalko du Interpretazio, Bitartekaritza eta Arbitraje Batzorde Paritarioan, honek, gehienez ere hogei eguneko epean, ebazpena eman dezan.

Alderdietako edozeinek Lan Ikuskatzailetzaren edo dagokion foru erakundearen irizpena eskatzen ahalko du.

Nolanahi ere indarra duten legezko xedapenetan ezarritakoari lotuko zaio.

LEHENENGO XEDAPEN GEHIGARRIA

Bi alderdiek 2012. urteari eta hurrengoei dagokien hitzarmena egiteko elkarrizketak hasteko konpromisoa hartzen dute.

BIGARREN XEDAPEN GEHIGARRIA

Kategorien definizioa

5. eta 6. artikuluekin bat, Batzorde Paritarioak bidezko jotzen diren kategorien eta lanbide taldeen definizioak zehaztuko ditu.

HIRUGARREN XEDAPEN GEHIGARRIA

Lansarien taulak

Lansarien taulak I. eranskinekoak izanen dira, 38. artikuluan xedatutakoari jarraikiz.

LEHENENGO XEDAPEN IRAGANKORRA

Alderdiek konpromisoa hartzen dute erizaintzako laguntzailearen kategoriarako eskatzen den titulazioa laster eskura dezaten alternatibak bilatzeko hitzarmen honen indarraldia bukatu baino lehen, betiere zaintzaile gisa kontrataturiko langileek horrela erabakitzen badute. Horretarako, Centro Hospitalario Benito Menni enpresak konpromisoa hartzen du 40 orduko kreditua emateko prestakuntza berezirako, inbertsioa 80 ordutik goitikoa baldin bada. Urruneko ikastaroak hautatzen badira, konpentsazio hori probak gainditu eta titulua eskuratzearen mende geldituko da.

Erizaintzako laguntzailearen titulua eskuratzen duten zaintzaile kategoriako langileei berehala aitortuko zaie erizaintzako laguntzailearen kategoria, titulazio ofiziala eskuratuta.

AZKEN XEDAPENETAN LEHENA

Hitzarmenaren osotasunarekiko lotura

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira.

AZKEN XEDAPENETAN BIGARRENA

Konpentsazioa eta irenspena

Hitzarmen honek indarra hartzen duenean (maila ekonomikoan 2009-01-01ean), enpresak bere borondatez langileei eman dizkien hobekuntzak hitzarmenak konpentsatu edo irensten ahalko ditu edo zenbatekoa aldatu.

Hitzartutako hobekuntza ekonomikoak eta lanaldietakoak ordezten ahalko dituzte hitzarmen honen indarraldian legezko xedapenez ezartzen ahal direnek eta, hitzarmen honek indarra hartzen duenean, enpresak bere borondatez mantentzen dituenek.

Hitzarmen honek indarra hartzen duenean bere eraginpeko langileek jasotzen duten ordainsari guztia ezin izanen da inola ere murriztu bertan ezartzen diren arauak aplikatzeagatik.

Edozein modutan, langileek, banaka edo taldeka, dituzten egoerak errespetatuko dira, oro har hitzarmen honetan ezarritakoek baino onura gehiago ekartzen badiete.

AZKEN XEDAPENETAN HIRUGARRENA

Hitzarmen honek ez du eskubideen inolako galerarik ekarriko indarra duen legerian xedatutakoarekiko.

Hitzarmen honen edukiarekin ados daudela erakusteko, parte hartu duten alderdiek sinatzen dute idazpuruan aipatutako tokian eta egunean.

Enpresaren izenean, Vicente Fernández Zurita

Enpresa batzordearen izenean, Gemma Martirena, María Ángeles Olave, Maribel Azcona, Axun Istilart eta Izaskun Miura, ELAren atal sindikalaren izenean; eta Amaia Urroz, Ainhoa Goñi eta Maribel Iraizoz, SAEren atal sindikalaren izenean.

I. ERANSKINA

2009ko lansarien taulak

LANSARIA

BOROND.

ORDAINSARIA

LANPOSTUAREN OSAGARRIA

HITZARMENAREN OSAGARRIA

GUZTIRA HILEAN

GUZTIRA URTEAN

LAGUNTZAKO LANGILEAK

a.1.

Mediku espezialista

1.438,79

1.152,72

2.591,52

36.281,23

a.2.

Medikua

1.241,88

1.126,45

2.368,33

33.156,68

a.3.

Farmazialaria

1.239,04

773,58

2.012,62

28.176,61

a.4.

Psikologo klinikoa

1.210,41

786,67

1.997,07

27.959,05

b.1.

OLT/DUE

1.058,06

510,38

346,18

1.914,62

26.804,67

b.2.

OLT/DUE astb. edo ordezkoa

1.058,06

510,38

346,18

1.914,62

26.804,67

b.3.

Gizarte langilea

1.056,01

509,38

61,17

1.626,56

22.771,85

b.4.

Terapeuta okupazionala

1.056,01

509,38

61,17

1.626,56

22.771,85

b.5.

Gizarte hezitzailea

1.056,01

509,38

61,17

1.626,56

22.771,85

c.1.

Erizantzako laguntzailea

673,61

321,68

61,17

1.056,46

14.790,39

c.2.

Begirale laguntzailea

673,61

321,68

61,17

1.056,46

14.790,39

c.3.

Erizaintzako laguntzailea astb. edo ordezkoa

673,61

321,68

61,17

1.056,46

14.790,39

c.4.

Zaintzailea

663,38

316,79

61,17

1.041,34

14.578,76

LAGUNTZA-LANGILEAK EZ DIRENAK

d.1.

Informatikaria.

1.139,41

930,13

2.069,55

28.973,65

d.2.

Administrazioko teknikaria

653,15

311,90

61,17

1.026,21

14.366,97

d.3.

Administrari laguntzailea

653,15

311,90

61,17

1.026,21

14.366,97

d.4.

Harreragilea.

653,15

311,90

61,17

1.026,21

14.366,97

d.5.

Sukaldaria

653,15

311,90

61,17

1.026,21

14.366,97

d.6.

Sukaldeko laguntzailea

653,15

311,90

61,17

1.026,21

14.366,97

d.7.

Ikuztegia

653,15

311,90

61,17

1.026,21

14.366,97

d.8.

Mantentze-lanetako ofiziala

653,15

311,90

61,17

1.026,21

14.366,97

d.9.

Mantentze-lanetako peoia

653,15

311,90

61,17

1.026,21

14.366,97

d.10.

Garbiketa

653,15

311,90

61,17

1.026,21

14.366,97

d.11.

Gidaria

653,15

311,90

61,17

1.026,21

14.366,97

d.12.

Lorezaina

653,15

311,90

61,17

1.026,21

14.366,97

d.13.

Zerbitzu orokorrak

653,15

311,90

61,17

1.026,21

14.366,97

F0921627

Iragarkiaren kodea: F0921627