Iragarkia
102. ALDIZKARIA - 2009ko abuztuaren 19a
2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ERRIBERRI
Erriberriko hirigintzako udal planaren aldaketa puntuala
behin betiko onestea, AR3 banaketa eremuari
eta SGV2 sistema orokorrari dagokienez
Erriberriko Udalak, 2009ko ekainaren 1ean egindako osoko bilkuran, Erriberriko hirigintzako udal planaren aldaketa puntuala behin betiko onestea erabaki du, AR3 banaketa eremuari eta SGV2 sistema orokorrari dagokienez, jarraian zehaztuko den moduan:
ERRIBERRIKO UDAL PLANEKO HIRIGINTZAKO ARAUDI PARTIKULARRAREN 44. ARTIKULUKO ANTOLAMENDU XEHAKATUKO DETERMINAZIOEN ALDAKETA PUNTUALA,
AR-3ren ETA SGV-2ren MUGAKETARI BURUZ
1.-Xedea.
Erriberriko Udal Planaren aldaketa puntual honek 44. artikuluan lurzoru urbanizagarri sektorizatuko AR-3 banaketa eremurako eta banaketa eremu horri atxikitako SGV-2 bide sistema orokorrerako bilduta dagoen Hirigintzako Araudi Partikularrari eragiten dio, 8. idatz-zatiari (Kudeatzeko arauak) dagokionez.
Ondorioz, aldaketa honen eraginpean dauden determinazioak xehakatuak dira, Lurraldearen Antolamenduari eta Hirigintzari buruzko 35/2002 Foru Legearen 49.3 artikuluan ezarritakoari jarraituz.
Aldaketa puntual honen helburuak ondoko hauek dira: alde batetik Erriberriko Udal Planeko AR-3 osatzen duten U.E.-1, U.E.-2 eta U.E.-3 exekuzio unitateen gaur egungo mugaketa aldatzea. Horrenbestez, lur guztiak U.E.-1/A.R.-3 izeneko exekuzio unitate bakar baten barruan mugatuko dira. Bestetik, S.G.V.-2 bide sistema orokorrari dagokionez jarduketa sistema aldatzea, zuzeneko okupazioaren bidez, eta A.R.-3 banaketa eremuko gainerako lurrei dagokienez jarduketa sistema gisa Lankidetza definitzea.
Udal Planaren Aldaketa geroago adieraziko den edukiarekin, jarraian azalduko diren oharretan oinarritzen eta egituratzen da.
2.-Aldaketaren arrazoiak eta oinarria.
Erriberriko Udal Planak, A.R.-3 banaketa eremurako Hirigintzako Araudi Partikularraren 44. artikuluan Antolamendu, Aprobetxamendu eta Kudeaketako determinazio hauek biltzen ditu, besteak beste:
-Eremuaren azalera: 104.180 m².
-Lurzoruaren sailkapena: Lurzoru urbanizagarri sektorizatua.
-Kalifikazioa: Erabilera bereizgarria: Industria.
Aprobetxamendu arauak:
-A.R.-3ren azalera osoa = 104.180 m².
-S.G.V.-2 atxikiaren azalera = 5.074 m².
-S.G.Z.V.-6 atxikiaren azalera = 4.857 m².
-Eredu aprobetxamendua = 0,55 AU/m².
-Irabazteko aprobetxamendua = (114.111 m². X 0,55 AU/m² = 62.761 AU).
Kudeaketa arauak:
-A.R.-3 banaketa eremuari atxikiko zaizkio S.G.V.-2 eta S.G.Z.V.-6 sistema orokorrak, lurzorua lortzeko. Lurzoru horiei dagokien aprobetxamendua A.R.-3n gauzatuko da.
-Planeamendu banaketa eremu honetako exekuzio unitateak aurreikusten ditu, eta exekuzio unitate horiek U.E.-1/U.E.-2 eta U.E.-3 unitateetan mugatzen dira dagokien zatiketa planoean. Antolamendua xehetasunez definitzen du, eredu aprobetxamendua azaltzen du, jarduketa sistema finkatzen du eta azpiegituren eskemak definitzen ditu. Halaber, etapa plana eta eremua urbanizatzeko obren ebaluazio ekonomikoa sartu dira, plan partzialen eduki propioak diren aldetik. Alderdi horiek oinarri hartuta, banaketa eremua lurzoru urbanizagarri sektorizatu gisa osatu da. Lurzoru hori udal planemanduan arautzen da zuzenean.
-Jarduketa sistema: Lankidetza edo konpentsazioa.
-Banaketa eremuaren garapena exekuzio unitate mugatuen bitartez eginen da, edo bestela 35/2002 LAHFLren 142. eta 143. artikuluetan ezarrita dagoenaren arabera mugatzen ahal direnen bitartez.
_Jabeek planeamenduan onartuta dagoen hirigintza aprobetxamenduaren %90 eskuratzen ahalko dute. Gainerako %10a, urbanizazio kargarik gabe, Erriberriko Udalari dagokio, 35/2002 LAHFLren 100. artikuluaren arabera.
-Obra bat egin baino lehen exekuzio unitate bakoitza birzatitzeko eta urbanizatzeko proiektua tramitatuko da.
-Proiektu horiek bakarrak izanen dira unitate bakoitzaren barruan mugatuta dauden lurzoru guztietarako.
-Urbanizazio proiektuan gune osorako obra orokorrak eta exekuzio unitate bakoitzeko obra bereziak bereizten ahalko dira.
-Urbanizazio obrak eraikuntza obrak baino lehenago egin beharko dira, edo bestela aldi berean, artikulu honen 38.5 puntuan ezarrita dagoenaren arabera.
-U.E.1/U.E.-2 eta U.E.-3 exekuzio unitateen arteko muga, bidearen ardatzetik ezarri da. Lehenengoz garatzen den unitateak galtzada osoa exekutatu beharko du, eta zabalera osoan urbanizatu beharko du.
-372. zenbakidun katastroko lurzatian dauden nabeak eraistea eta kalte-ordaina ematea banaketa eremu osorako karga da. Hori exekuzio unitate guztiei egotzi beharko zaie, beren aprobetxamenduaren proportzioan.
-Berdeguneetarako, gune libreetarako, bideetarako eta balio askotariko ekipamendurako espazioak Erriberriko Udalaren aldeko nahitaezko eta doako lagapenak izanen dira.
-Epeen araubidea: etapa planaren arabera.
Katastroko 10. poligonoko 694 lurzatian ponpaketa-estazioaren azpiegitura egin behar dela-eta, instalazio horren eroanbide batzuek katastroko 10. poligonoko 338, 339, 340,345, 553 eta 1221 lurzatiak zeharkatuko dituzte. Lurzati horiek Udal Planak S.G.V.-2 bide sistema orokorrerako mugatzen duen esparruaren barruan daude, eta era berean, S.G.V.-2 bide sistema orokorra A.R.-3 banaketa eremuari atxikita dago, eta banaketa eremu horren ondorioz hirigintzako aprobetxamendurako eskubidea duen lurzorua sortzen denean, bide sistema orokor horren aprobetxamenduak lurzoru horretan gauzatuko dira.
Erriberriko Udalarentzat komenigarria eta egokia da bide sistema orokor horri dagozkion bideak exekutatzea. Horretarako, beharrezkoa da lurzoruak karga bidez eskuratzea, dagokien bide zortasunagatik, baina horrez gain, eragingarriagoa da lurzoru horiek jabetza araubidean lortzea sistema orokor hori zuzeneko okupazioaren bidez exekutatuz.
Bide sistema orokor horren barruan dauden lurzatiak, gutxi barru exekutatuko den ponpaketa estazioaren eroanbideen eraginpean daudenak, ondoko hauek dira:
-10. poligonoko 338. lurzatia: 624 m².
-10. poligonoko 339. lurzatia: 676 m².
-10. poligonoko 340. lurzatia: 140 m².
-10. poligonoko 345. lurzatia: 655 m².
-10. poligonoko 553. lurzatia: 16 m².
-10. poligonoko 1221. lurzatia: 402 m².
Guztira: 2.513 m².
Instalazio hori eta berori osatzen duten elementuak exekutatzea premiazkoa denez, eta S.G.V.-2 bide sistema orokorra A.R.-3 banaketa eremuari eta eremu horren exekuzioari atxikita dagoenez, beharrezkoa da aldaketa hau egitea, bide sistema orokorra osatzen duten lurzatien lurzoruak zuzeneko okupazioaren bidez lortzeko, eta beren aprobetxamendua A.R.-3 banaketa eremuari esleitzea 35/2002 LAHFLren 188. artikuluan aurreikusten diren tramiteen bidez.
S.G.V.-2 osatzen duen lurzati horiei dagokien aprobetxamendua ondoko hau da:
338. lurzatia.-624 m² × 0,55 AU/m² × %90: 308,88 AU.
339. lurzatia.-676 m² × 0,55 AU/m² × %90: 334,62 AU.
340. lurzatia.-140 m² × 0,55 AU/m² × %90: 69,60 AU.
345. lurzatia.-655 m² × 0,55 AU/m² × %90: 324,23 AU.
553. lurzatia.-16 m² × 0,55 AU/m² × %90: 7,92 AU.
1221. lurzatia.-402 m² × 0,55 AU/m² × %90: 198,99 AU.
Guztira 1.243,94 AU.
Erriberriko Udalari aprobetxamenduaren gainerako %10 dagokio, nahitaez eta kargarik gabe laga beharrekoa: 138,22 AU.
Aurrekoaz gain, gaur egun bideragarria da Udal Planak AR-3 banaketa eremurako aurreikusten dituen determinazioak jarduera bakar baten bidez exekutatzea, eta komenigarria eta egokia da Udal Planean eremu horretarako ezarrita dauden hiru exekuzio unitateen mugaketa aldatzea eta exekuzio unitate bakar batean biltzea. Unitate horretarako birzatiketa proiektu eta urbanizazio proiektu bakarra onetsiko da. Dena dela, azken hori hainbat fasetan exekutatzen ahalko da aldaketa honen eraginpean ez dauden Udal Planeko ondoko alderdi hauen arabera: urbanizazio arauak, aldi bereko eraikuntza eta urbanizazioa eta kudeaketa arauak.
Kasu horretan urbanizazio proiektuak definituko ditu fase guztiak eta fase bakoitzeko urbanizazio obrak.
Udal Planak bi jarduketa sistema ezartzen ditu aukeran, konpentsazioa edo lankidetza. Une honetan, Erriberriko Udalarentzat komenigarriagoa eta egokiagoa da Planaren determinazioak lankidetza sistemaren bitartez exekutatzea.
3.-Edukia eta determinazioak hirigintzako araudi partikularrak.
44. artikulua. A.R.-3 banaketa eremua. Identifikazioa: A.R.-3.
1. Determinazio orokorrak.
-Eremuaren azalera: 104.180 m².
-Lurzoruaren sailkapena: Lurzoru urbanizagarri sektorizatua.
-Kalifikazioa: Erabilera bereizgarria: Industria.
2. Antolamendu arauak.
-Kanpoko lerrokadurak antolamendu planoetan definituta dagoenaren araberakoak dira.
-Marraztuta dauden barneko lerrokadurak gutxi gorabeherakoak dira, bereizketa bat egiteko, eta ez dira lotesleak.
-Espazio publikoen (berdegune eta bideen) kokalekua, zabalera eta neurriak eremuaren antolamenduaren gutxieneko determinazio lotesleak dira. Horrela, gerora egiten diren garapen planeamendu guztiek horiek mantendu beharko dituzte.
-Beirerako errepideak 8 m-ko zabalera izanen du, eta alde bakoitzean 2 m-ko erdibitzaileak.
-Erdibitzaile horretatik aurrera lurzatiaren lerrokadura 15 m atzeraemanen da, grafiatuta dagoenaren arabera.
-Berdegune publiko bat urbanizatu beharko da lurzatien atzealdean. Berdegune horrek gutxienez 20 m-ko zabalera izanen du.
-Aire zabalean aparkaleku publikoetarako gune bat urbanizatu beharko da zerbitzu-bidean; halaber kaleak ere urbanizatu beharko dira, planoetan grafiatuta dagoenaren arabera.
-Eraikinak gutxienez 5 m atzeraemanen dira lurzatiak luzerako kaleekin duen lerrokadurarekin alderatuta, eta 3 m, berriz, lurzatiak kaleekin duen lerrokadurarekin alderatuta.
-Eraikinak gutxienez 22 m atzeraemanen dira Erriberritik Beirerako errepidearen galtzadaren kanpoko ertzetik. Hori, Nafarroako errepideen babesari buruzko 10/1986 Foru Legean eraikinen muga-lerro gisa ezarrita dauden 18 m-ak baino distantzia handiagoa da.
-Eraikinen altuera = BS+1.
-Gehieneko altuera, erlaitzeraino = 7,50 m.
-Gainaldearen altuera = 10,00 m. Muga horretatik kanpo geratzen dira industria jarduera egiteko beharrezkoak diren elementu bereziak (garabiak, hozte-dorreak, etab.).
-Lurzatiko gune eraikiezina aparkalekurako, aire zabaleko biltegirako eta maniobrarako espazio gisa erabiliko da.
-Ez da nahitaezkoa lurzatiaren kanpoko itxitura. Lurzatiaren kanpoko itxitura egonez gero, gehieneko altuera ezin izanen da 2,50 m-tik gorakoa izan eta, gainera, 1,20 m-ko altueratik gora ezin izanen dira opakoak izan.
-Fatxaden konposizioa, materialak eta koloreak aukerakoak izanen dira.
-Aparkatzeko plazak aurreikusi beharko dira erabilera publikoko espazioan, lurzatien barruan. Gutxienez plaza bat egon beharko da 200 m² eraiki bakoitzeko.
3. Urbanizazio arauak.
3.1. Espazio publiko osoari eraginen dion urbanizazio proiektu bakarra idatziko da. Urbanizazio proiektua bera hainbat fasetan exekutatzea aurreikusten ahalko da.
3.2. Hauek izanen dira urbanizazioaren gutxieneko baldintzak:
-Azpiegitura sare guztiak indarra duten araudien arabera proiektatu beharko dira eta konpainia hornitzaileek finkatzen dituzten eskakizunak bete beharko dituzte.
-Lur mugimenduak: osorik eginen dira, lurzatien barnekoak ere bai.
-Oinezkoentzako lurzoru publikoak: Hormigoiz eginen dira, eskema grafikoen arabera.
-Kainu-zuloak sareta bisagraduna dutenetakoak izanen dira.
-Bideen toki sistemaren zoladura: beroko aglomeratu asfaltikoa.
-Argiterian fluxua (gauekoa zein egunekoa) apaltzeko sistema bat jarriko da, sodio-lurrunezko lanparekin. Argiztapenerako berrikuntza teknikoak erabiltzea onartuko da, baldin eta errendimendu ona eta ezaugarri kromatiko egokiak eskaintzen badituzte. Argien babesa bermatzeko, zutabeen inguruan metalezko babesak jarriko dira argiak hondatzeko arriskua dagoen tokietan.
-Suteetarako ahoak aurreikusiko dira, erabilera eta jabari publikoko eremuetan, betiere ingurunearen baldintzak kontuan harturik, Suteen aurkako babes-neurriekin bat.
-Garapen planeamenduan proposatuta dauden berdegune eta parkeak ere urbanizazio proiektuan diseinatu eta gauzatuko dira.
3.3. Lorezaintza bateratuta antolatuko da urbanizazio proiektuan, honako baldintza hauek betez:
-Lorategiek atal bat izanen dute urbanizazio proiektuaren barrenean.
-Ez da soropil gune txikirik diseinatuko, ahal dela, arrazoi funtzionalengatik beharrezkoa ez bada.
-Urbanizazio proiektuan honako puntu hauek sartuko dira:
- Ureztaketa automatikoa, aspertsore eta difusore zirkuituen bidez, elektrobalbula eta programatzaileekin, eta tantaka, beharrezkoa bada.
- Landare-lurra gehitzea, geruza organikoa, ongarritzea eta lehenbiziko mozketa.
- Lerrokaduretako zuhaitzak hainbat espezietakoak izanen dira. Hosto erorkorrekoak eta hosto iraunkorrekoak izanen dira, lore ugarikoak.
- Muga-guneetako zuhaitzak oihantxoak egiten dituztela jarriko dira. Oihantxo bakoitza espezie batekoa izanen da, lore ugariz jantzita.
- Landareen arteko tartea, oro har, 5 m-koa izanen da lerroan, espezie txiki edo ertainen kasuan, eta 8 m-koa tamaina handiko zuhaitzak direnean.
3.3. Urbanizazio proiektuak antolatu beharko du sektoreko hiri zerbitzuen eta hiriguneko zerbitzu orokorren arteko lotura, eta horiek behar adinako hornidura edo ahalmena dutela egiaztatu.
3.4. Oztopo fisikoak kentzea. Indarra duen legedia betetzeko, urbanizazio proiektuan oinezkoentzako espazioak egokituko dira traba arkitektonikorik izan ez dezaten.
4. Aldi bereko eraikuntza eta urbanizazioa.
Eraikitzeko eskubidea erabiltzen ahalko da urbanizazioko lanak amaitu baino lehen, baldin eta honako baldintza hauek betetzen badira:
a) Birzatiketa proiektua behin betikoz onesteko egintza irmotu bada, administrazio bidean.
b) Planean ekipamenduetarako eta erabilera eta jabari publikoko espazio libreetarako erreserbaturiko lurren lagapena Udalaren alde formalizatu bada.
c) Urbanizazio proiektua behin betiko onestea.
d) Urbanizazioko lanak nola dauden ikusirik, Administrazioari iruditzen bazaio lurzatiek orube bihurtzeko behar diren zerbitzu guztiak edukiko dituztela eraikuntza lanak amaitzen direnerako.
e) Behar adinako fidantza ematen bada, legedian onartzen diren moduetako edozeinen bidez, kasuan kasuko urbanizazio-lanak burutuko direla bermatzeko.
f) Lizentzia eskatzeko idazkian, sustatzaileak eraikuntza ez erabiltzeko konpromisoa hartzen badu, urbanizazioko lanak amaitzen diren arte.
g) Urbanizatzeko betebeharra betetzen ez bada, ez da jarduera lizentziarik emanen.
5. Erabilera arauak.
-Erabilera bereizgarria:
- Industria, biltegietakoa eta tailerrak.
- Garaje publikoak.
-Erabilera osagarria:
- Instalazioen zaindarien etxebizitza, sarrera independentea eta osasun eta higieneko baldintzak dituena.
-Erabilera baldintzatuak:
- Bulego eraikinak.
- Merkataritzarako beheko solairuak eta merkataritzako eraikinak.
-Erabilera debekatuak:
- Gainerakoak. Bereziki egoitzakoa.
6. Aprobetxamendu arauak.
a) -A.R.-3ren azalera osoa = 104.180 m².
-S.G.V.-2 atxikiaren azalera = 5.074 m².
-S.G.Z.V.-6 atxikiaren azalera = 4.857 m².
-Eredu aprobetxamendua = 0,55 AU/m².
-Irabazteko aprobetxamendua = (114.111 m². X 0,55 AU/m² = 62.761 AU).
b) Beheko solairua duen eraikinak lurzatian okupatu dezakeen gehieneko azalera:
-1, 3 eta 5 oinarrizko unitateak: lurzatiaren azaleraren %70.
7. Lagapenak.
-Lagapenak:
- Berdeguneak. = 10.704 m² (%10,27).
- Erabilera askotako ekipamendua = 4.735 m² (%4,55).
- Bideak eta aparkalekuak = 34.145 m² (%32,78).
-Aparkalekuak:
- Plaza bat 70 m² eraiki bakoitzeko, erabilera publikoko espazioetan.
8. Kudeaketa arauak.
-A.R.-3 banaketa eremuari atxikiko zaizkio S.G.V.-2 eta S.G.Z.V.-6 sistema orokorrak, lurzorua lortzeko. Lurzoru horiei dagokien aprobetxamendua A.R.-3n gauzatuko da.
-S.G.V.-2 sistema orokorra exekutatzeko, Udalak lurzoruak zuzenean okupatuko ditu, eta horrela gauzatuko da A.R.-3n sistema orokor horri dagokion aprobetxamendua, 35/2002 LAHFLren 188. artikuluan agertzen diren tramiteei jarraituz.
-Sistema orokor atxikiak urbanizatzea administrazio publikoei dagokie.
-S.G.V.-2ren urbanizazio obren proiektua behin betiko onesteko, Nafarroako Gobernuko Herri Lan, Garraio eta Komunikazio Departamentuaren aldeko txostena beharko da.
-Planeamenduak banaketa eremuko U.E.-1 izeneko exekuzio unitatea mugatzen du. Antolamendua xehetasunez definitzen du, eredu aprobetxamendua azaltzen du, jarduketa sistema finkatzen du eta azpiegituren eskemak definitzen ditu. Halaber, etapa plana eta eremua urbanizatzeko obren ebaluazio ekonomikoa sartu dira, plan partzialen eduki propioak diren aldetik. Alderdi horiek oinarri hartuta, banaketa eremua lurzoru urbanizagarri sektorizatu gisa osatu da. Lurzoru hori udal planeamenduan arautzen da zuzenean.
-Jarduketa sistema: Lankidetza.
-Banaketa eremuaren garapena, unitatea Udalak tramitatzen eta onesten duen birzatiketa eta urbanizazio proiektuaren bitartez exekutatuz eginen da.
-Jabeek planeamenduan onartuta dagoen hirigintza aprobetxamenduaren %90 eskuratzen ahalko dute. Gainerako %10a, urbanizazio kargarik gabe, Erriberriko Udalari dagokio, 35/2002 LAHFLren 100. artikuluaren arabera.
-SGV-2 bide sistema orokorra alde batera utzita, obra bat egin baino lehen eremu osoa birzatitzeko eta urbanizatzeko proiektua tramitatuko da.
-Urbanizazio proiektuan exekuzio faseak eta fase horietako bakoitzaren barruko obrak bereizten ahalko dira.
-Urbanizazio obrak eraikuntza obrak baino lehenago egin beharko dira, edo bestela aldi berean, artikulu honen 38.5 puntuan ezarrita dagoenaren arabera.
-Katastroko 372. zenbakidun lurzatian dauden nabeak eraistea eta kalte-ordaina ematea banaketa eremuko U.E. 1 unitaterako karga da. Hori birzatiketa proiektuan sartu beharko da, urbanizazio karga gisa.
-Berdeguneetarako, gune libreetarako, bideetarako eta balio askotariko ekipamendurako espazioak Erriberriko Udalaren aldeko nahitaezko eta doako lagapenak izanen dira.
-Epeen araubidea: etapa planaren arabera.
9. Estimazioko ebaluazio ekonomikoa.
Urbanizazioa:
-Lur mugimendua: 24.050 euro.
-Zoladura: 450.800 euro.
-Lorezaintza: 60.102 euro.
-Seinaleak: 24.050 euro.
-Hornidura sarea: 63.110 euro.
-Ur beltzen saneamendu sarea: 120.203 euro.
-Euri uren saneamendu sarea: 96.200 euro.
-Argindarraren sarea: 72.130 euro.
-Herriko argien sarea: 54.100 euro.
-Telefonia sarea: 30.100 euro.
Guztira: 994.845 euro.
Bestelakoak:
-Proiektuak, lizentziak, etab.: 39.100 euro.
-Kalte-ordainak: 156.300 euro.
Guztira: 195.000 euro.
Guztira: 1.189.845 euro.
Eragina (lurzoru gordina) = 10,43 euro/m².
10. Etapa plana.
Ondoko etapak aurreikusi dira eremua osatzen duten exekuzio unitateen lagapen eta berdinbanaketa betebeharrak betetzeko.
1.-Birzatiketa proiektua. UPO behin betiko onetsi ondoren, Udalak U.E.-1/A.R.-3ren barruan mugatuta dauden lurzoru guztiak birzatitzeko proiektua sustatu eta tramitatuko du, hirigintzako antolamenduaren mozkinak eta kargak behar bezala banatzeko jabe bakoitzari dagokion aprobetxamenduaren proportzioan. Halaber, finken konfigurazioa erregularizatzen saiatuko da. Beren aprobetxamendua eraikitzeko egokiak diren guneetan jarriko da. Gainera, administrazio jarduleari dagokion aprobetxamendua lurzati jakin batzuetan kokatuko da. Kalkulatzen denez, birzatiketa proiektua agintzen denetik behin betiko onetsi arte bost hilabeteko epea igaroko da.
2.-Urbanizatzeko proiektua. U.E.-1/A.R.-3 unitatea garatzeko beharrezkoak diren urbanizazio obrak nahiz horien balorazio ekonomikoa biltzen ditu. Proiektu hori birzatiketa proiektuarekin batera egiten ahal da, edo bestela horretatik aparte. Ez da oso konplexua, eta horregatik bost hilabeteko epean idazten eta tramitatzen ahal da.
3.-Urbanizazio obrak exekutatzea. Urbanizazio obrak bi fasetan egiten ahalko dira. Lehenengo faseak eremu osoaren elementu komunak bilduko ditu, esaterako hornidurako sare nagusia, saneamenduko kolektore nagusia, errepidearen paraleloan doan bidea, etab. Obra horiek lau hilabete iraunen dute. Gerora, bigarren fasean, lurzoruaren eskariaren eta jabeen beharrizanen arabera, gainerako urbanizazio obrak egiten ahalko dira. Obra horien iraupena bi hilabetekoa izanen dela kalkulatzen da.
4.-Nabeak eraikitzea. Ez da eperik ezarri eraikin berriak eraikitzeko, eraikitzea ala ez jabearen borondatearen mendean egonen delako lurzorua orube bihurtu eta, ondorioz, eraikitzeko eskubidea eskuratu ondoren. Azaldu den bezala, lehenago bidezkoak diren lagapenak egin dira eta urbanizazioa egin da.
4. Ondorioa.
Aurreko guztia kontuan hartuta, behar bezala justifikatutzat jo da aldaketaren beharrizana, baita aldaketa horren azken asmoa ere. Horrenbestez, tramita dadila eskatu da.
Aditzera eman da orok jakin dezan, Toki Araubidearen Oinarriak arautzen dituen apirilaren 2ko 7/1985 Legearen 70.2 artikuluan xedatuta dagoena betetzeko.
Halaber, zera adierazi nahi da: onespenaren aurka administrazioarekiko auzi-errekurtsoa aurkezten ahal da, Nafarroako Auzitegi Nagusiko Administrazioarekiko Auzien Sailari zuzendua, bi hilabeteko epean iragarki hau Nafarroako Aldizkari Ofizialean argitaratu eta biharamunetik.
Erriberrin, 2009ko uztailaren 6an.-Alkatea, María Carmen Ochoa.
Iragarkiaren kodea: L0919277
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
