Iragarkia

81. ALDIZKARIA - 2008ko uztailaren 2a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

442/2008 EBAZPENA, maiatzaren 27koa, Arriskuen Prebentziorako eta Lanaren zuzendari nagusiak emana, Nafarroako "Ehungintzaren merkataritza" sektorearen lan hitzarmen kolektiboa erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 53/2008).

2008ko maiatzaren 21ean departamentu honetan sartu da "Ehuntza merkataritza" sektorearen lan hitzarmen kolektiboaren testua, 29 artikuluz, eranskin gehigarri batez eta 2 eranskinez (ordainsarien taulak dituena) osatua, sektoreko enpresaburuen elkartearen (ANDECOTE) eta UGT sindikatuaren ordezkariek osaturiko negoziazio batzordeak 2008ko maiatzaren 12an izenpetu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren arabera, Berrikuntza, Enpresa eta Enplegu Departamentua da lan hitzarmen kolektiboak erregistratu, gorde eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan harturik Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,

EBATZI DUT:

1. Nafarroako "Ehungintzaren merkataritza" sektorearen lan hitzarmen kolektiboa erregistratzea (kodea: 3102305) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen hau negoziazio batzordeari jakinaraztea, eta adieraztea ebazpenak ez duela administrazio bidea agortzen eta haren aurka gora jotzeko errekurtsoa jartzen ahal dela Berrikuntza, Enpresa eta Enplegu Departamentuko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2008ko maiatzaren 27an.-Arriskuen Prebentziorako eta Lanaren zuzendari nagusia, Imelda Lorea Echavarren.

NAFARROAKO "EHUNGINTZAREN MERKATARITZA" SEKTOREAREN HITZARMEN KOLEKTIBO PROBINTZIALA, 2007. 2008. ETA 2009. URTEETARAKO

1. artikulua. Aplikazio eremua.

Hitzarmen kolektibo honek, indarra hartzen duenetik hasita, honako enpresa hauen lan harremanak arautuko ditu: Nafarroako ehungintzaren merkataritzaren sektorekoa izanik, ehunak, jantzi eginak, alfonbrak eta tapizak, paketeak, mertzeriako gaiak, kinkilak etab. saltzen dituztenak, bai eta, beste jarduera batzuk izan arren, gehienbat ehunezko gaien salmentan aritzen direnak ere.

Horretatik kanpo gelditzen dira sektore horren barruan beren langileekin hitzarmen kolektiboa sinatua duten edo aurrerago sinatuko duten enpresak. Enpresako hitzarmenak indarra hartzen duen egunean hasiko da salbuespen hori.

2. artikulua. Indarraldia.

Hitzarmen kolektibo honek 2007ko urtarrilaren 1etik aurrera izanen ditu ondorio ekonomikoak, lan arloko agintaritza eskudunak noiz erregistratzen duen eta Nafarroako ALDIZKARI OFIZIALean noiz argitaratzen den kontuan hartu gabe. Hiru urteko indarraldia izanen du aipatu egunetik hasita eta, hortaz, 2009ko abenduaren 31n bukatuko da. Urtez urte luzatuko da besterik gabe, baldin eta aldeetako batek haren amaiera iragartzen ez badu indarraldiaren edo luzapenen amaiera baino hiru hilabete lehenago. Hitzarmeneneko klausulek indarra izaten segituko dute, beste hitzarmen bat sinatu arte.

3. artikulua. Langileak.

Hitzarmen kolektibo honen edukia enpresetan diharduten langile guztiei aplikatuko zaie, goi zuzendaritzako karguetan ari direnei izan ezik.

4. artikulua. Baldintzarik hoberenak.

Hitzarmen kolektibo honetan biltzen diren baldintza ekonomikoak eta bestelako guztiak, orokorrean hartuta, gutxienekotzat hartuko dira; hori dela eta, hitzarmenekoak baino baldintza hobeak dituzten enpresetan finkatutako itunek, klausulek edo egoerek bere horretan segituko dute horietaz baliatu izan diren langileentzat.

5. artikulua. Lanaldia, laneko ordutegia eta egutegia.

1.-Urteko lanaldia.

Benetako lanaldiak 1.730 ordu izanen ditu 2007 eta 2008. urteetan eta 1.726 ordu 2009. urtean.

Aurreko lerroaldean ezarritako urteko lanaldia enpresaren eta langileen arteko banakako edo taldeko itunaren bidez banatzen ahalko da, eta horretan muga bakarra legeek merkataritzako ordutegietarako ezartzen dutena izanen da.

Bestela, artikulu honetako 2., 3. eta 4. ataletan xedatutakoa aplikatuko da, 5. atalaren arabera ezartzen ahal diren banakako aldaketak barne.

Urteko lanaldia nolanahi banatuta ere, hitzarmenaren indarraldiko urte bakoitzean atal honetako lehenengo lerroaldean adierazitako benetako lanaldia eginen da, artikulu honen 7. zenbakian ordu-malgutasunari buruz adierazitako kasuetan izan ezik.

2.-Lan ordutegia.

2007ko urtarrilaren 1etik aurrera, eta hitzarmenak indarra duen bitartean (2007-2008-2009), hauxe izanen da lan ordutegia:

a) Urtarrilaren 1etik uztailaren 15era eta irailaren 1etik abenduaren 31ra:

-Goizez: sartu 09:30ean eta atera 13:30ean.

-Arratsaldez: sartu 16:30ean eta atera 20:00etan.

b) Uztailaren 16tik abuztuaren 31ra:

-Goizez: sartu 10:00etan eta atera 13:30ean.

-Arratsaldez: sartu 17:00etan eta atera 20:00etan.

c) Erosketak egiteko denbora:

Langile bakoitzak erosketak egiteko denbora izanen du hilabeteko goiz batean, baina ezin izanen da hilabete bateko denbora hurrengo batekoarekin pilatu. Enpresek txandak eginen dituzte denbora horretaz baliatu ahal izateko, atal edo sailetako salmenta lana eragotz ez dadin.

Denbora hori ez da benetako lanorduetan sartuko, enpresetan berariazko akordiorik edo baldintza hoberik ez bada behintzat. Enpresek beren langileentzat baldintza hobeak baldin badituzte arlo horretan, haiek baldintza hauek ordeztu ditzakete, eta enpresa bakoitzeko langileen gehiengo soilak, edo langileen ordezkariek, sistema bat edo bestea aukeratu beharko dute, hitzarmen hau argitaratu eta hogeita hamar eguneko epean. Epe horretan aukera egiten ez bada, atal honetan arautzen den sistema aplikatuko da.

3.-Lan egutegia eta asteko atsedenaldia.

a) Jaiegun izanen dira indarra duten xedapenetan halakoak direnak eta, gainera, beste hauek:

-Mendekoste astelehena. Hori konpentsatzeko, langileek lau ordu errekuperatu beharko dituzte, eta denbora horretan kanpainak prestatzeko lanak edo inbentarioak eginen dituzte. Ordu horiek errekuperatzeko eguna enpresak jarriko du, eta gutxienez ere astebete lehenago esanen du zein den.

-Pazko biharamuna.

-Uztailaren 7a (San Fermin), Iruñeko saltokietan, eta zaindariaren festa eguna gainerako herrietakoetan. Herri bakoitzeko zaindariaren festa egunaren aurreko astelehena lanaldi osoko eguna izanen da, festa egun hori asteartea denean; eta zaindariaren festa eguna (herriko jaieguntzat hartzen ez bada) igandean izanez gero, 10. artikuluan araututako oporrei erantsiz konpentsatuko da.

-Saltokiak zein herritan dauden, herri horietako festetako arratsaldeak.

b) Langileek astean egun bat eta erdiko atsedenaldi jarraitua izanen dute: igande osoa eta astelehen goiza. Hala ere, enpresa bakoitza bertako langileekin ados jarriz gero, astelehen goizeko atsedenaldia larunbat arratsaldeetara pasatzen ahalko da urte osorako edo parte baterako.

c) Abenduaren 26a laneguna izanen da. Horren trukean, langileek norberak hartzeko bi egun izanen dituzte, enpresarekin ados jarrita finkatuko direnak. Ados jartzen ez badira, enpresak egun bat aukeratuko du eta langileak bestea, baina egun bakoitzean langile bakarrak hartuko du jai. Egun horietako bat edo biak oporraldiari lotzeko modua ere izanen da, enpresa eta langilea ados jarriz gero. Egun horiek ez dute balio artikulu honetako 1. atalean ezarritako urteko lanaldia murrizteko.

4.-Urteko lanaldia egokitzea.

Aurreko ataletatik ateratzen den lan denbora banatzen denean kontuan hartu behar da benetako 1.730 lanordu egin behar direla 2007. eta 2008. urteetan eta 1.726 ordu 2008. urtean. Aurreko 2. eta 3. ataletan azaldutako lan ordutegi eta egutegia aplikatu ondoko egokitzapenengatik edo beste arrazoiren batengatik izaten ahal diren diferentziak koadratzeko, enpresak eta langileek besterik adostu ezean, honela eginen da:

a) Orduen saldoa enpresaren aldekoa bada, lanetik irteteko ordua egunean gehienez ere hogeita hamar minutu luzatuz errekuperatuko da, diferentzia osatu arte.

b) Langileen aldekoa bada, hogeita hamar minutu geroago sartuko dira lanean, diferentzia osatu arte.

5.-Laneko ordutegian eta egutegian eragina duten aldaketak.

Enpresetan orokorrean ezarritako laneko ordutegi eta egutegian eragina duten aldaketei dagokienez, Langileen Estatutuaren 41. artikuluan xedatutakoari jarraituko zaio.

6.-2009rako hitzartutako lanaldi murrizketari buruzko arauak.

2009ko lanaldirako hitzartu den 4 orduko murrizketa banatzeko, enpresak eta langileek adosten dutena beteko da, baina bada salbuespen bat: handizkako enpresetan 4 ordu horiek hartuko dira lantokian ordu erdi geroago sartuz 8 lanegunetan, enpresek lan egutegian ezartzen duten moduan.

7.-Ordutegi malgua.

Hitzarmenak indarra izan bitartean, enpresek 13 ordu izanen dituzte urtean malgutasunerako, eta haiek esaten dutenean eginen da lan horietan, baina ez herrietako, autonomietako edo estatuko jaiegunetan, ez eta San Fermin egunean Iruñean eta herrietako festa egun nagusian ere.

Egun horiek erabiltzea erabakitzen duten enpresek langileei jakinaraziko diete, hitzarmen kolektiboa argitaratu eta hilabeteko epean. Ordu horiek lanean zein egunetan egin behar diren astebete lehenago adieraziko da. Horren trukean, langileek bi egun izanen dituzte, enpresarekin ados jarrita hartzeko. Ados jartzen ez badira, enpresak egun bat aukeratuko du eta langileak bestea, baina egun bakoitzean langile bakar batek hartuko du jai. Gutxienez ere astebete lehenago jakinaraziko diote elkarri. Gainera, enpresak eta langileak adostu dezakete norberak hartzeko libre dituen egunetatik bat edo bi 9. artikuluan adierazitako opor egunei pilatzea.

6. artikulua. Adingabeak.

Prestakuntza kontratua duten langileek, beren giza eta kultur prestakuntza behar bezala osatu ahal izateko, 20:00ak arteko lanaldia izanen dute gehienez.

7. artikulua. Antzinatasuna eta osagarri pertsonala.

1.-Langileek antzinatasunari dagokion osagarria jasotzeko eskubidea dute, kategoria bakoitzean hileko oinarrizko soldataren ehuneko 0,8333 zerbitzu urte bakoitzeko, eta enpresan sartu eta bigarren urtetik bederatzigarrenera arte sortuko da. Kategoria bakoitzerako zenbatekoa eranskineko lansari tauletan azaltzen da.

2.-Antzinatasunagatik gehienez emanen den zenbatekoa kategoria bakoitzeko oinarrizko soldataren ehuneko hamarra izanen da, eta enpresan sartu eta hamar urte pasatzen direnetik hasita lortuko da.

3.-Antzinatasunaren gehieneko muga ehuneko hamarra izanik 1995eko urtarrilaren 1etik hasita, 1994ko abenduaren 31n zenbateko handiagoa izateko eskubidea zutenek honela jasoko dute, ordutik egiten duten bezala:

a) Oinarrizko soldataren ehuneko hamar, antzinatasunagatik.

b) Kreditatua zuten ehuneko hamarretik gorakoa "osagarri pertsonal" gisa. Osagarri hori ez dute irentsiko hitzarmenean etorkizunean izanen diren igoerek; gainerako lansari kontzeptuen igoera berberak izanen dituzte, eta zenbatekoa aparteko eskersarietan eta mozkinen ordainsarian sartuko da.

8. artikulua. Aparteko orduetan lan egitea. Ordu arruntak baino ehuneko 40 gehiago ordainduko zaizkie aparteko orduak langile guztiei, igandeetan eta estatuko, autonomia erkidegoko eta herriko jaiegunetan egiten direnak izan ezik, ehuneko 150eko errekargua izanen baitute horiek.

Hemen ezarri diren errekarguak gutxienekoak dira, handiagokoen bidez ordezten ahal baitira.

9. artikulua. Oporrak.-Langile guztiek urtero opor ordainduak izanen dituzte, honako baldintza hauen arabera:

1.-Hogeita hamar egun naturaleko oporrak hartuko dira, langileen lanbide kategoria edozein dela ere.

2.-Langilea eta enpresa ados jarriko dira oporrak noiz hartu erabakitzeko. Ados jartzen ez badira, langileak zilegi izanen du Lan arloko Epaitegira jotzea, epaitegiak horren gainean ebatzi dezan, Langileen Estatutuaren 38.2 artikuluan aurreikusitakoari jarraikiz. Oporrak hartzeko egunak langileen antzinatasunaren arabera jarriko ditu enpresak lehenik eta, horren ondoren, txandakako sistema izanen da lehentasuna ezartzeko; ezin izanen dira bi aldi baino gehiagotan zatitu, aldeek besterik adostu ezean.

3.-Langileak urtearen barnean uzten badu lanpostua, oporren zati proportzionala hartzeko eskubidea izanen du, urtean lan egindako denboraren arabera.

4.-Norberak nahi duenean hartzeko dauden egunak, hitzarmen honen 5. artikuluko 7. atalean aipatzen direnak, oporraldiari gehituz gero, egun horiek ez dira legez opor egun izanen.

10. artikulua. Aparteko eskersariak.

Uztaileko eta Gabonetako aparteko eskersariak honela osatuta egonen dira: hitzarmen honetako lansarien tauletan kategoria bakoitzarentzat ezartzen den hileko ordainsaria, antzinatasuna eta, hala denean, 7.3.b) artikuluan azaldu den "osagarri pertsonala". Eskersari horiek urte bakoitzeko uztailaren 5ean eta abenduaren 22an ordainduko dira.

11. artikulua. Irabaziak.

Salmenten edo irabazien araberako eskersaria ez da hilabeteko ordainsaria baino txikiagoa izanen, hori honela osatuta: kategoria bakoitzari dagokion ordainsaria, antzinatasuna eta, hala denean, hitzarmeneko 7.3.b) artikuluan azaldu den "osagarri pertsonala". Sari hori urte bakoitzeko otsailaren 15ean emanen da, eta kopurua aurreko urteko abenduan indarra zuen hitzarmeneko soldatena bezainbestekoa izanen da, alde batera utzi gabe enpresetan arlo horretan dauden baldintza hobeak.

12. artikulua. Aldi baterako ezintasuna.

1.-Langileek laneko istripu baten ondorioz aldi baterako ezintasuna dutenean, aseguru mutuako prestazioaren eta langileak jardunean kobratu beharreko ordainsariaren arteko diferentzia emanen die enpresak. Enpresaren kargurako osagarria ordaindu eginen zaio langileari, nahiz eta baja aldia beste batez ordeztu.

2.-Aldi baterako ezintasuna eritasun baten edo lanekoa ez den istripu baten ondoriozkoa denean, egoera horrengatik Gizarte Segurantzako Erregimen Orokorraren kargura eman beharreko prestazioez gainera, ondokoetara iritsi arteko osagarriak ordainduko ditu enpresak:

-Lanean arituta jaso beharreko lansariaren %85, baja aldiko lehen egunetik hogeigarrenera; 100eko 100era iritsiko da ospitalizazioa hasten denetik, gutxienez ere hiru egunekoa bada.

-Lanean arituta jaso beharreko lansariaren 100eko 100, edozein kasutan, bajaren hogeita batgarren egunetik hasita, aldi baterako ezintasuna bukatu arte.

13. artikulua. Familia-laguntza.

Enpresek, Gizarte Segurantzaren familia-laguntzaren osagarri den prestazio gisa, 72,12 euro ordainduko diete, irailaren 15ean, langile hauei:

a) Langile ezkondu edo alargunei, edo ezkongabeak izanda ere enpresan 20 urte egin dituztenei.

b) Aita edo ama ezkongabeei, baldin eta haurra edo haurrak beren kargura badaude eta beren ardurapean soilik. Aitak eta amak saltoki berean lan egiten badute, batek bakarrik jasoko du. Sari hori ez da inolaz ere hainbanatuko eta ezin izanen da xurgatu.

14. artikulua. Eskersari berezia.

Erakusleiho-apaintzaile profesionala ez izan arren saltokietako erakusleihoak apaintzeko lanean aritu ohi den langileak eskubidea izanen du hitzarmenean bere kategoriari dagokion oinarrizko soldataren %10eko plusa jasotzeko.

15. artikulua. Laneko arropa.

Hitzarmen honen eraginpeko langile guztiei enpresak uniformeak eta lanerako beharrezkoak diren beste jantzi batzuk emanen dizkie, nahitaez. Lanean hasten direnean emanen zaizkie eta urtean behin gutxienez berrituko.

16. artikulua. Toxikotasun plusa.

Moketak jarri eta paretak ehuneztatzeko lanetan produktu toxikoak erabili ohi dituzten langileek 15,03 euroko plus berezia jasoko dute hilean. Plus hori ez da antzinatasunerako kontutako, eta urtean 15 hilekotan hartuko da.

17. artikulua. Kategoria aldaketak eta egokitzapenak.

1.-Ofizioko profesionalen kategoriara igoko dira ofizioko laguntzaileak, kategoria horretan bost urte egindakoan.

Administrari laguntzaileak administrari-ofizialen kategoriara igoko dira 30 urteko adinera iritsitakoan.

Mutilak mutil espezializatuen kategoriara igoko dira aurreko kategorian urtebete egiten dutenean.

2.-Artikulu honetako 1. atalean arautu diren igoerek kategoria berriko eskubide ekonomikoak sortuko dituzte igoera egunetik hasita, baina enpresek ez dute ezinbestekoa izanen kategoria berriko lanak ematea.

3.-Saltzaileen eta kutxazain laguntzaileen kasuan, sektorean kategoria horietan egindako denbora kontatuko da, kasuan kasuko lanbide eta lansari atxikipena zehazteari begira.

18. artikulua. Lizentzia ordainduak.

Hitzarmen honen eraginpeko langile guztiek honako lizentzia ordaindu hauek izaten ahalko dituzte:

1.-Langilearen ezkontza: 15 egun natural.

2.-Seme edo alaba baten jaiotza edo adopzioa: 3 lanegun.

3.-Ezkontidearen eta seme-alaben heriotza: 6 egun natural

4.-Gurasoen, seme-alaben, anai-arreben edo ezkontidearen istripu edo eritasun larria edo ospitalizazioa, 2 egun natural. Arrazoi horregatik langilea bidaia egin beharrean bada: lau egun.

Ospitalizazioaren kasuan, egoerak irauten duen bitarte guztian izanen da baimena hartzeko aukera. Ezein kasutan ezin izanen dira hartu, gozamen gerokotuaren sistema honen bidez, gertaera eragilearen ondo-ondotik hartu izan balitu zegozkiokeenak baino lanegun gehiago.

5.-Odol edo ezkontza ahaidetasuneko bigarren gradura arteko ahaideen heriotza: 2 egun natural. Arrazoi horregatik langilea bidaia egin beharrean bada, lau egun.

6.-Osaba-izeba propioen heriotza: egun natural bat.

7.-Anai-arreben, gurasoen, seme-alaben, lehengusu propioen, iloba propioen eta koinatu-koinaten ezkontza: egun natural bat.

8.-Publikoa den betebehar saihestezina betetzeko, behar-beharrezkoa den denbora.

9.-Egun natural bat ohiko bizilekua aldatzeko.

10.-Egun natural bat langilearen zilarrezko ezteiak ospatzeko.

11.-Urtean 16 ordu gehienez langilea medikuarengana joateko edo ezkontidea, seme-alabak edo gurasoak medikuarengana eramateko.

12.-Langileak, 65 urte bete eta erretiratu behar duenean (edo 64 urte erretiro aurreratua bada) eta enpresan 20 urte gutxienez egin baditu, hiru hilabete arteko lizentzia ordaindua izaten ahal du erretiroa hartu aurreko egunetan. Eskubide hori osorik edo hein batean erabiltzen ez badu, lanean egindako denbora gehigarri gisa ordainduko zaio, soldata hainbanatuta.

Aurreko ataletan araututako lizentzia guztiak, 1. atalekoa izan ezik, inskribaturik dagoen ezkondu gabeko bikotea osatzen duten langileek ere hartzen ahalko dituzte.

Lizentzia horiek guztiak oporren kargura luzatzen ahalko dira, langileak horretako arrazoiak frogatzen baditu.

19. artikulua. Segurtasuna eta higienea.

Enpresak behartuta daude behar diren neurriak hartzera, enpresaren zerbitzuko langileen bizimoduan, integritatean eta osasunean eragina izan dezaketen arriskuen prebentzioaren antolakuntza ahalik eta hoberena eta guztiz eraginkorra izan dadin. Horretarako, Laneko Arriskuei Aurrea Hartzeko Legearen xedapenak, aplikatzekoak direnak, beteko dira.

20. artikulua. Istripu asegurua.

Hitzarmen honen eraginpeko enpresek banakako istripuetarako aseguru kolektiboaren poliza bat hitzartuko dute, laneko istripuen ondorioz heriotza edo erabateko ezintasun iraunkorra izaten denerako. Aseguratutako kapitala 35.000 eurokoa izanen da gertakizun bakoitzerako, eta hitzarmen kolektiboa argitaratu ondoko hilabeteko lehen egunean hartuko du indarra. Kalte-ordainaren ondorioetarako, istripuaren eguna izanen da gertaera eragilearen data.

21. artikulua. Erretiroko kasu bereziak.

1.-Erretiro aurreratua.

Enpresak eta langile ukituak ados jarrita, zilegi izanen da erretiro berezia lortzea 64 urterekin, uztailaren 17ko 1.194/85 Errege Dekretuan aurreikusitako moduan.

2.-Erretiro partziala eta errelebo kontratua.

Langileak erretiro partziala hartu ahal izanen du 60 urte betetzean eta 64 urte bete baino lehenago. Horretarako, enpresari gutxienez ere hiru hilabete lehenago jakinarazi beharko dio, erretiroaren prestaziorako eskubidea izateko erregelamenduzko baldintzak bete beharko ditu eta enpresarekin lanaldi partzialeko kontratua hitzartu beharko du lanaldia murrizteko. Enpresak beste langile bat hartuko du haren ordez, erretiro partzialak adina iraunen duen errelebo kontratua eginez.

Gainera, enpresak eta langileak ados jarri beharko dute lanaldi partzialeko kontratuko lan denbora betetzeko baldintzen inguruan.

Erretiro partziala duen langileak erretiro aurreratua eskatuko du 64 urte betetakoan, baldin eta aginduzkoa den ordezkotza kontratua gehienez ere urtebeterako hitzartzen ahal bada erretiro partziala hartzean kontratatu zen langilearekin.

Errelebo eta ordezkotza-kontratuen soldata-baldintzak hitzarmen kolektibo honetan ezarritakoak izanen dira.

3.-Erretiro kasu horietarako guztietarako xedapenak.

Erretiro partziala zein errelebo kontratua eta erretiro aurreratua zein ordezkotza kontratua arautzen dituzten xedapenek indarra duten bitartean soilik aplikatuko dira aurreko arauak.

22. artikulua. Borondatezko eszedentzia.

Langileak urtebeteko eszedentzia hartu eta bitarte horretan lanpostua gordetzeko eskubidea izanen du baldin eta bere saltokian bi langilek edo gehiagok lan egiten badute.

23. artikulua. Ordainsariak.

1.-2007ko abenduaren 1etik abenduaren 31ra arte, hitzarmen honen 1. eranskineko tauletan lanbide kategoria bakoitzarentzat ezarri diren lansariak ordainduko dira. 2006ko abenduaren 31n indarra zuten taulen aldean %4,3ko igoera dute.

2.-2008ko eta 2009ko soldata igoerak urtean urteko estatuko KPI errealaren aldaketa adinakoa izanen da, %0,75 gehituta. Bi urte horietan, urtarrilaren 1ean, aurreko urteko lansarien %2,75 adinako igoera eginen da behin-behinekoz, eta urtarrilean zehar erregularizatuko dira, KPIren aldaketa ofiziala jakin ondoren. Eranskinean 2008. urterako behin-behineko lansarien taula ageri da.

24. artikulua. Probaldia eta kontratu bukaeraren gaineko aurreabisua.

Langile sartu berri orok probaldi bat pasatu beharko du:

-Saltzaileek eta kualifikazio gabeko langileek: hilabete.

-Langileen buruek, salmenta buruek, erosketa buruek, sukurtsaleko buruek eta administrazio buruek: sei hilabete.

-Gainerako langileek: hiru hilabete.

Aldi baterako kontratuei bukaera emateko hamabost egun lehenago abisatu behar denean, kontratu bukaeraren jakinarazpenarekin batera finikitoa egiteko proposamena aurkeztuko da.

25. artikulua. Prestakuntza kontratuak.

Arlo honetan indarra duen legerian xedatutakoari jarraituko zaio, ordainsariei dagokienean izan ezik, hitzarmen honen 1. eta 2. eranskinetan adierazten direnak izanen baitira; hots, hitzarmenean lehen urteko saltzailearen kategoriarako jarri den oinarrizko soldataren ehuneko 80 eta 90 kontratuko lehen eta bigarren urterako, hurrenez hurren. Kontratu horrek gehienez izan ditzakeen bi urteak bukatutakoan enpresak lanpostu bererako beste pertsona bat hartzen badu prestakuntza kontratuarekin, hori mugagabea izanen da.

26. artikulua. Kanpo gelditzeko klausula.

Hitzarmenak indarra hartu aurreko hiru urteetan ohiko jardueran galerak dituztela frogatzen duten enpresak hitzarmenaren ondorio ekonomikoetatik aparte gelditzen ahal dira. Horren berri emanen diete langileen ordezkariei (edo plantilla osoari, ordezkari sindikalik ez bada), hitzarmena Nafarroako ALDIZKARI OFIZIALean argitaratu eta 30 eguneko epean. Akordiorik izanez gero, hitzarmenaren Batzorde Mistoari igorriko zaio, horren berri izan dezan.

Enpresa hitzarmenaren ondorio ekonomikoetatik aparte dagoen bitartean langileek hitzarmenekoak baino kopuru txikiagoak jasotzen badituzte, ekonomia edo finantza egoera suspertzen denean enpresak konpentsazioa emanen die langileei, bitarte horretan jasoko zuketen kopurua adinakoa, gutxienez ere.

Diferentzia horiek erreklamatzeko eskubidearen preskripzioa langileek enpresaren emaitzen kontua hobetu dela jakiten duten egunean hasiko da kontatzen.

27. artikulua. Batzorde mistoa.

Sor litezkeen interpretazio zalantzak argitze aldera, eta lan arloko jurisdikzioaren eskumena galarazi gabe, Batzorde Mistoa eratuko da, enpresaren hiru ordezkarik eta langileen beste hiruk osatuta, negoziazioan parte hartu dutenen artetik aukeratuta.

28. artikulua. Ordezko arauak.

Hitzarmen honetan aurreikusi ez den orotan, hutsegiteeen eta zehapenen araubidea barne, Merkataritzaren Lan Ordenantzan (nahiz eta 1996ko urtarrilaren batean indargabetu) eta beste xedapen orokor batzuetan ezarritakoari jarraituko zaio.

29. artikulua. Aldi baterako laneko enpresak. Hitzarmen honen eraginpeko enpresek aldi baterako laneko enpresen zerbitzuak kontratatzen dituztenean, aldi baterako langileei bermatu egin behar diete hitzarmen kolektibo honetan ezarritako lan eskubideak eta ordainsariak izanen dituztela, enpresako langileek bezala.

Betebehar hori berariaz jaso behar da aldi baterako laneko enpresaren eta hitzarmen honen eraginpeko enpresa erabiltzailearen arteko zerbitzu-kontratuan.

XEDAPEN GEHIGARRIA

Lan Auzitegiari atxikitzea

1.-Aldeek erabaki dutenez, 1998ko urtarrilaren 1etik aurrera, Lan Hitzarmen Kolektibo honen interpretazioan sortzen diren gatazka kolektiboak ez ezik, baita horren aplikazio eremuko langileei eta enpresaburuei ukitzen ahal dizkien beste guztiak ere, Nafarroako Lan Gatazkak Konpontzeko Auzitegiak konpondu behar ditu, adiskidetze eta bitartekotza faseetan.

Era berean, adierazten dute ahaleginak eginen dituztela ukituriko alderdiak aipatu auzitegiaren prozedura arbitralaren esanetara jar daitezen.

Xedapen gehigarri honen bitartez, beraz, aldeak gatazken konponbiderako arbitraje organoari atxikitzen zaizkio espresuki, eraginkortasun orokorrez eta, horren ondorioz, itunak behartzen ditu enpresaburuak, ordezkari sindikalak eta langileak euren desadostasunak epaiketara jo aitzin aipatu organoaren bitartekotza eta adiskidetze prozeduretan azaltzera. Hori horrela, ez da nahitaezkoa aldeen desadostasun edo gatazka bakoitzerako atxikimendu espresua eta banakakoa egitea, arbitrajera lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.

2. Era berean, hitzarmen kolektibo honen sinatzaileek hitzeman dute ahaleginak eginen dituztela hitzarmenaren aplikazio eremuak biltzen dituen langileen eta enpresaburuen artean sor daitezkeen banakako gatazkak Nafarroako Lan Gatazkak Konpontzeko Auzitegiaren aurrean Adiskidetze, Bitartekotza eta Arbitraje prozeduren mendean borondatez eta era espresuan jar daitezen, ondoko gaietan:

-Lanbide sailkapena, eta goragoko edo beheragoko kategoriako lanak egitea.

-Oporrak hartzeko egunak banaka finkatzea.

-Mugikortasun geografikoa eta lantokiz aldatzea.

-Antzinatasunaren onarpena.

-Lan baldintzen funtsezko aldaketa.

-Eszedentzien, baimenen eta lizentzien onarpena.

-Diru kopuruen erreklamazioa, auzipeko zenbatekoa edozein dela ere.

-Lanaldia: iraupena, atsedenaldiak, jaiegunak, oporrak eta aparteko orduak.

-Ordutegi malgua eta lan txandak.

-Mugikortasun funtzionala.

-Kaleratzeak.

-Zehapenak

I. ERANSKINA

2007rako lansarien taulak

HILEKO URTEBETEKO

LANSARIA ANTZINAT.

1. MULTZOA

Ingeniari eta lizentziadunak 1.363,46 11,36

Laguntzaile teknikoak 1.226,28 10,22

Praktikanteak 1.185,93 9,88

2. MULTZOA

Langileriaren burua 1.363,46 11,36

Salmenten burua 1.363,46 11,36

Erosketen burua 1.363,46 11,36

Arduradun nagusia 1.363,46 11,36

Sukurtsaleko burua 1.363,46 11,36

Biltegiko burua 1.260,97 10,51

Taldeko burua 1.260,97 10,51

Ataleko burua 1.193,86 9,95

Saltokiko arduraduna 1.260,97 10,51

Saltzailea-Eroslea 1.260,97 10,51

Saltzaile bidaiaria 1.078,43 8,99

Hiri-artekaria 1.078,43 8,99

Saltzailea, bi urtetik goiti aritua 1.078,43 8,99

2. urteko saltzailea 897,84 7,48

1. urteko saltzailea 842,01 7,02

Saltzaile nagusia 1.186,28 9,89

Prestakuntza kontratua, 1. urtean 673,61 5,61

Prestakuntza kontratua, 2. urtean 757,81 6,31

3. MULTZOA

Administrazioko burua 1.363,46 11,36

Ataleko burua 1.260,97 10,51

Kontulari kutxazaina 1.155,47 9,63

Administrari-ofiziala 1.078,43 8,99

Administrari laguntzailea, 25 urtetik gorakoa 1.078,43 8,99

Administrari laguntzailea, 25 urtetik beherakoa 897,84 7,48

Kutxazain laguntzailea, lehen urtekoa 842,01 7,02

Kutxazain laguntzailea, bigarren urtekoa 897,84 7,48

Kutxazain laguntzailea, bi urtetik goiti aritua 1.078,43 8,99

4. MULTZOA

Marrazkilaria 1.225,79 10,21

Erakusleiho-apaintzailea 1.186,29 9,89

Errotulugilea 893,64 7,45

Ebakitzailea 1.078,43 8,99

Ebakitzailearen laguntzailea 893,64 7,45

5. MULTZOA

Ofizioko profesionala 1.078,43 8,99

Ofizioko urgazlea 897,84 7,48

Langilezaina 982,86 8,19

Mutil espezializatua 1.078,43 8,99

Telefonista 871,13 7,26

Mutila 940,56 7,84

6. MULTZOA

Kobratzailea 893,64 7,45

Etxezaina 837,17 6,98

Zaintzailea edo gauzaina 837,17 6,98

Mandataria edo atezaina 837,17 6,98

Garbiketako langileak (ordu bakoitzeko, eta kontz.

guztiak barne) 8,11 -

II. ERANSKINA

2007ko lansarien behin-behineko taula

HILEKO URTEBETEKO

LANSARIA ANTZINAT.

1. MULTZOA

Ingeniari eta lizentziadunak 1.400,96 11,67

Laguntzaile teknikoak 1.260,00 10,50

Praktikanteak 1.218,55 10,15

2. MULTZOA

Langileriaren burua 1.400,96 11,67

Salmenten burua 1.400,96 11,67

Erosketen burua 1.400,96 11,67

Arduradun nagusia 1.400,96 11,67

Sukurtsaleko burua 1.400,96 11,67

Biltegiko burua 1.295,64 10,80

Taldeko burua 1.295,64 10,80

Ataleko burua 1.226,69 10,22

Saltokiko arduraduna 1.295,64 10,80

Saltzailea-Eroslea 1.295,64 10,80

Saltzaile bidaiaria 1.108,09 9,23

Hiri-artekaria 1.108,09 9,23

Saltzailea, bi urtetik goiti aritua 1.108,09 9,23

2. urteko saltzailea 922,53 7,69

1. urteko saltzailea 865,17 7,21

Saltzaile nagusia 1.218,90 10,16

Prestakuntza kontratua, 1. urtean 692,14 5,77

Prestakuntza kontratua, 2. urtean 778,65 6,49

3. MULTZOA

Administrazioko burua 1.400,96 11,67

Ataleko burua 1.295,64 10,80

Kontulari kutxazaina 1.187,24 9,89

Administrari-ofiziala 1.108,09 9,23

Administrari laguntzailea, 25 urtetik gorakoa 1.108,09 9,23

Administrari laguntzailea, 25 urtetik beherakoa 922,53 7,69

Kutxazain laguntzailea, lehen urtekoa 865,17 7,21

Kutxazain laguntzailea, bigarren urtekoa 922,53 7,69

Kutxazain laguntzailea, bi urtetik goiti aritua 1.108,09 9,23

4. MULTZOA

Marrazkilaria 1.259,49 10,50

Erakusleiho-apaintzailea 1.218,91 10,16

Errotulugilea 918,22 7,65

Ebakitzailea 1.108,09 9,23

Ebakitzailearen laguntzailea 918,22 7,65

5. MULTZOA

Ofizioko profesionala 1.108,09 9,23

Lanbideko urgazlea 922,53 7,69

Langilezaina 1.009,89 8,42

Mutil espezializatua 1.108,09 9,23

Telefonista 895,09 7,46

Mutila 966,42 8,05

6. MULTZOA

Kobratzailea 918,22 7,65

Etxezaina 860,20 7,17

Zaintzailea edo gauzaina 860,20 7,17

Mandataria edo atezaina 860,20 7,17

Garbiketako langileak (ordu bakoitzeko, eta kontz.

guztiak barne) 8,34 -

Iragarkiaren kodea: F0808663