Iragarkia

71. ALDIZKARIA - 2008ko ekainaren 9a

I. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

66/2008 FORU AGINDUA, maiatzaren 14koa, Hezkuntza kontseilariak emana. Agindu honen bidez batxilergoa ezarri, haren egitura garatu, antolaketa arautu, ordutegia finkatu eta aukerako irakasgaien curriculuma onesten da, Nafarroako Foru Komunitatean.

Azaroaren 2ko 1467/2007 Errege Dekretua, batxilergoaren egitura ezarri eta gutxieneko ikasketak finkatu zituena, LOEren 6.2 artikuluak batxilergoko gutxieneko ikasketen curriculumeko oinarrizko alderdiak finkatzeko Estatuari emandako eskurantzen ondorio izan zen.

Nafarroako Gobernuak, bere eskumenez baliaturik, eta LOEren 6.4 artikuluak ezartzen dizkion betebeharraren ondorioz, batxilergoko ikasketen curriculuma eman du, maiatzaren 12ko 49/2008 Foru Dekretuaren bitartez.

Nafarroako egungo gizarteak eskatzen du batxilergoan ikasle guztientzako aukera berdintasuna bermatu ahal izateko egitura zehaztea, edozein dela ere ikasleen bizilekua edo hizkuntza eredua.

Batxilergoa modalitateetan eta multzoetan antolatu da Zientzien eta Teknologiaren eta Giza eta Gizarte Zientzien batxilergoetan, eta bideetan, berriz, Arteen batxilergoan.

Hezkuntza Departamentuak, ikastetxeen autonomiaren bermatzaile gisa, esparru zabala zehaztea erabaki du, non batxilergoko multzoak eratuko baitira, baina ikastetxeei eskaintza definitu eta aberasteko aukera emanez, betiere beren autonomiaz baliaturik eta beren hezkuntza proiektuaren eta nortasunaren arabera.

Horrenbestez, eta Nafarroako Gobernuari eta lehendakariari buruzko abenduaren 3ko 14/2004 Foru Legearen 41.1.g) artikuluak emandako ahalmenak erabiliz,

AGINDU DUT:

1. artikulua. Helburua eta aplikazio eremua.

Foru agindu honen helburua da batxilergoa ezarri, haren egitura garatu, antolaketa arautu, ordutegia finkatu eta aukerako irakasgaien curriculuma onestea. Nafarroako Foru Komunitatean batxilergoa ematen duten ikastetxe publiko eta pribatuei aplikatuko zaie.

2. artikulua. Kurtsoak eta modalitateak.

1. Nafarroako Foru Komunitatean batxilergoko ikasketen egitura eta curriculuma ezarri dituen maiatzaren 12ko 49/2008 Foru Dekretuko 2. artikuluan xedatutakoarekin bat, batxilergoak bi kurtso ditu.

2. Batxilergoa modalitate hauetan banatuta dago: a) Arteak, b) Zientziak eta Teknologia eta c) Giza eta Gizarte Zientziak.

3. artikulua. Irakasgaiak.

1. Ikasleek irakasgai hauek izanen dituzte etapa osoan: irakasgai komunak, modalitateko sei irakasgai, horietako bost gutxienez aukeratutako modalitatekoak, eta aukerako bi irakasgai.

2. Etapako lehen kurtsoan bost irakasgai komun, modalitateko hiru eta aukerako bat izanen dituzte.

3. Bigarren kurtsoan lau irakasgai komun, modalitateko hiru eta aukerako bat.

4. Irakasgai horiez gainera, kurtsoaren hasieran Erlijio ikasketak hartu nahi dituztela adierazten ahalko dute. Ikastetxeek ikasketa horiek aukeratu ez dituztenei behar den bezalako hezkuntza-arreta emanen die.

5. Batxilergoko ikasketak D edo A hizkuntza ereduetan egiten dituzten ikasleek Euskal hizkuntza eta literatura irakasgaia etapako bi kurtsoetan izanen dute.

6. Oro har, Bigarren Hezkuntzako institutuetan, irakasgai komunez besteko irakasgaiak gutxienez ere 20 ikaslek eskatzen badituzte emanen dira. Dena dela, Hezkuntza Departamentuak, Zerbitzuak Ikuskatzeko eta Ikuskapen Teknikorako Zerbitzuaren txostena ikusi ondoren, eta ikastetxearen berezitasunak kontuan hartuta, zilegi izanen du halako irakasgaiak ikasle gutxiagoko taldeei emateko baimena ematea. Ikastetxe itunduetan, nahitaezkoa izanen komuna ez den irakasgai bat ematea, eskaera egin duten 20 ikasle badaude gutxienez.

4. artikulua. Asteko ordutegia.

1. Batxilergoko ikasketak G eta G-A ereduetan ematen dituzten ikastexeetako ikasleek 30 eskola ordu izanen dituzte astean; ikasketa horiek D eta D-A ereduetan ematen dituztenek, berriz, 34 eskola ordu.

2. Foru agindu honen I. eranskinean ezarritako gutxieneko banaketa errespetatu beharko du beti ikasleen asteko ordutegiak. Ikastetxearen esku dauden eskola orduak, aipatu eranskinean agertzen direnak, aurreko lerroaldean ezarritako asteko ordutegia osatu arte banatuko dira.

3. Aukerako irakasgaiak lau eskola ordu izanen ditu astean, bai lehen kurtsoan bai bigarrenean. Ikastetxeak G-A ereduetako ikasketak eskaintzen dituenean, Euskal hizkuntza eta literatura aukerakoen ordutegian emanen da A ereduan.

4. Ikasleek, gurasoek edo tutoreek eskatzen badute, ikastetxeak Erlijio ikasketak bermatuko ditu, hau da, 70 eskola ordu etapa osoan. Erlijio ikasketak eta, hala denean, Hezkuntza-arreta, ikastetxearen esku dauden orduetan antolatzen ahalko dira (I. eranskina).

5. Foru agindu honen 4.1 artikuluan ezarritakoa gorabehera, ikastetxeek eskola ordutegia astean bost ordu bitarte luzatzea eska dezakete eta, edonola ere, astean 35 eskola saio eginez gehienez. Hezkuntza Departamentuak, egutegi eta ordutegi orokorrari buruz urtero argitaratzen duen araudiaren barnean, eskolaldia luzatzea eskatzeko prozedura zehaztuko du. Ordutegia luzatu arren familiei ez zaie ekarpenik eskatuko eta departamentuari aparteko baliabiderik ere ez.

6. Era berean, batxilergoko ikasketak D ereduan ematen dituzten ikastetxeek, beren hezkuntza proiektuarekin bat, 34 eskola ordu baino gutxiago izan nahi badituzte astean, asteko ordutegia aldatzeko eskaera egin beharko dute, astean gehienez ere lau eskola ordu murrizteko. Hezkuntza Departamentuak, egutegi eta ordutegi orokorrari buruz urtero argitaratzen duen araudiaren barnean, eskolaldia murriztea eskatzeko prozedura zehaztuko du.

5. artikulua. Arteen modalitatea. Bideak.

1. Arteen modalitatea bi bidetan antolatuta dago: Arte plastikoak, diseinua eta irudia eta Arte eszenikoak, musika eta dantza.

2. II. eranskinean ageri da modalitate honetako irakasgaien banaketa, bideetan eta kurtsoetan antolatua.

6. artikulua. Ikastetxeetan irakasgai multzoak antolatzea.

1. Maiatzaren 12ko 49/2008 Foru Dekretuko 5.4 eta 5.5 artikuluetan ezarritakoa betetzearren, Hezkuntza Departamentuak modalitateko bi irakasgai ezarri ditu ikastetxeek eskaintzen ahal dituzten multzoetako bakoitzean, foru agindu honen 7. eta 8. artikuluetan ageri den moduan.

2. Ikastetxeek, beren hezkuntza proiektuaren arabera, modalitate bakoitzeko multzoak osatu eginen dituzte bai III. eranskinean ageri diren irakasgaiekin, bai modalitatekoekin bai ikasleak eskatu duenaz besteko modalitateko irakasgaiekin.

Ikastetxearen eskaintzak irizpide hauek hartu behar ditu kontuan:

-Ikasleek etapa osoan modalitateko sei irakasgai izanen dituzte, eta horietako bost gutxienez aukeratzen duten modalitatekoak izanen dira.

-Multzoak eskaintzean kontuan izanen dira ikasleen kopurua eta ikastetxeari esleitutako baliabideak.

-Ikasleen ezaugarri pertsonalen eta aurrera begira dituzten prestakuntza asmoen araberako multzoak eskainiko dira.

-Eskaintzaren barnean modalitateko irakasgai guztiek agertu behar dute.

3. Ikastetxeak, orientazio departamentuaren eta tutoreen bitartez, orientazioa emanen die ikasleei multzoak beren asmoen arabera hauta ditzaten.

7. artikulua. Zientzien eta Teknologiaren modalitatea. Multzoak.

Zientzien eta Teknologiaren modalitatean ikastetxeek multzo hauek antola ditzakete:

-Zientziak eta Ingeniaritza. Ikasleek bigarren kurtsoan Fisika eta Matematika II egin behar dutela kontuan hartuz antolatuko da multzo hau.

-Teknologia. Ikasleek lehen kurtsoan Matematika I eta bigarrenean Teknologia industriala II egin behar dutela kontuan hartuz antolatuko da multzo hau.

-Osasun Zientziak. Ikasleek bigarren kurtsoan Biologia eta Kimika egin behar dutela kontuan hartuz antolatuko da multzo hau.

8. artikulua. Giza eta Gizarte Zientzien modalitatea. Multzoak.

Giza eta Gizarte Zientzien modalitatean ikastetxeek multzo hauek antola ditzakete:

-Giza Zientziak. Ikasleek bigarren kurtsoan Artearen historia eta Latina II egin behar dutela kontuan hartuz antolatuko da multzo hau.

-Gizarte Zientziak. Ikasleek bigarren kurtsoan Gizarte Zientziei aplikatutako matematika II eta Geografia egin behar dutela kontuan hartuz antolatuko da multzo hau.

9. artikulua. Aukerako irakasgaiak.

1. Hala lehen kurtsoan nola bigarrenean, ikasleek aukerako irakasgai bat izanen dute, ikastetxeak eskaintzen dituenen artetik aukeratua.

2. Ikastetxeek helburu hauek dituzten aukerako irakasgaiak eskainiko dituzte: Atzerriko bigarren hizkuntza bat ikastea, prestakuntza komuna handitzea edo modalitate bakoitzeko berariazko prestakuntza indartzea.

3. Aurreko lerroaldean ezarritakoa bete dadin, ikastetxeek IV. eranskinaren ataletako bakoitzeko aukerako irakasgai bat eskainiko dute gutxienez.

4. Foru agindu honen bidez onetsitako aukerako irakasgaien curriculuma V. eranskinean dago.

10. artikulua. Irakasgaien artean lehentasuna ezartzeko baldintzak.

1. Ikasleek ezin izanen dute bigarren kurtsoko irakasgai bat gainditu lehen kurtsoko baten izen bera badu eta lehen kurtsoko irakasgai horretan kalifikazio positiboa lortu ez badute.

2. Ikasleek ezin izanen dituzte bigarren kurtsoko Geologia, Biologia edo Lurraren eta ingurumenaren zientziak izeneko irakasgaiak gainditu, lehen kurtsoko Biologia eta geologian kalifikazio positiboa lortu ez badute.

3. Ikasleek ezin izanen dituzte bigarren kurtsoko Kimika, Fisika, Elektroteknia edo Mekanika izeneko irakasgaiak gainditu, lehen kurtsoko Fisika eta kimikan kalifikazio positiboa lortu ez badute.

4. Ikasleren bat bigarren kurtsora igarotzen bada lehen kurtsoko aukerakoa gainditu gabe, bi aukera izanen ditu: irakasgai hori errekuperatzea edo berak hautaturiko batez ordeztea, foru agindu honetako araudia errespetatuz.

11. artikulua. Batxilergoa ezartzea.

1. 2008/2009 ikasturtean, Hezkuntzari buruzko maiatzaren 3ko 2/2006 Lege Organikoak araututako batxilergoko lehen kurtsoko ikasketak ezarriko dira, oro har, eta urriaren 3ko 1/1990 Lege Organikoak araututako batxilergoko lehen kurtsoko ikasketak emateari utziko zaio.

2. 2009/2010 ikasturtean, Hezkuntzari buruzko maiatzaren 3ko 2/2006 Lege Organikoak araututako batxilergoko bigarren kurtsoko ikasketak ezarriko dira, oro har, eta urriaren 3ko 1/1990 Lege Organikoak araututako batxilergoko bigarren kurtsoko ikasketak emateari utziko zaio.

XEDAPEN GEHIGARRIAK

Lehen xedapen gehigarria.-Ikastetxeen autonomia.

1. Ikastetxeei dagokie, hezkuntza prozesuko jarduketa guztiak gidatuko dituen autonomia printzipioa kontuan harturik, batxilergoko irakasgaien curriculuma zehaztu, osatu, egokitu eta garatzea, ikastetxe bakoitzak berea duen eta bere hezkuntza proiektuan jaso den izaeraren arabera.

2. Ikastetxeak ondoko bitartekoak ditu, besteak beste, autonomiaz jokatzeko:

-Kurtso bakoitzean asteko ordutegia ikastetxeak bere esku dituen orduekin osatzeko aukera.

-Modalitateko multzoei lotutako hezkuntza eskaintza diseinatzea.

-Berariazko aukerako irakasgaiak diseinatzea, ikasleen behar eta asmoekin bat heldu diren prestakuntza ibilbideak eratzeko.

-Hezkuntza-arretaren edukia eta hori emateko ordutegia diseinatzea.

-Hezkuntza komunitateko sektore guztien parte hartzea (irakasleak, familiak, ikasleak ...), hezkuntza prozesuaren oinarrizko elementuak diren aldetik.

-Esperimentazioak, lanerako planak, antoketa moduak edo eskola ordutegia luzatzea, Hezkuntza Departamentuak ezarritako moduan.

3. Ikastetxeek aurreko puntuan aipatu diren bitartekoei buruz hartzen dituzten erabakien berri emanen diote Hezkuntza Departamentuari, ezartzen den prozedurari jarraikiz. Erabaki horiek aplikatuko dira baldin eta Hezkuntza Departamentuko organoek beren eskumenaren esparruan kontrako txostenik ematen ez badute.

Bigarren xedapen gehigarria.-Erlijio ikasketak.

Erlijio ikasketak batxilergoan sartuko dira, Nafarroako Foru Komunitatean batxilergoko ikasketen egitura eta curriculuma ezartzen dituen maiatzaren 12ko 49/2008 Foru Dekretuko hirugarren xedapen gehigarrian ageri denari jarraikiz.

Hirugarren xedapen gehigarria.-Hezkuntza-arreta.

Halaber, maiatzaren 12ko 49/2008 Foru Dekretuko hirugarren xedapen gehigarri horrexek ezartzen duen moduan, ikastetxeek, beren autonomia pedagogikoaz baliaturik, Hezkuntza-arreta antolatuko dute Erlijio ikasketak jaso nahi ez dituztenentzat. Neurri horien ildo nagusiak hezkuntza proiektuan azaldu eta urteko programazio orokorrean aldez aurretik onartutako jardueren bidez zehaztuko dira, eta irizpide hauek errespetatu beharko dituzte:

a) Hezkuntza-arretako irakastorduak irakasgaien edukien aplikazio praktikorako proiektuak garatzeko erabiltzen ahalko dira edo, hala behar denean, tutore lana egiteko.

b) Irakasleek beren espezialitateko betebeharrak bukatu eta gero, zuzendariak esanen du zein irakasle arduratuko den Hezkuntza-arretaz. Bigarren Hezkuntzako institutuetan, Hezkuntza-arretako orduak irakastordu gisa agertuko dira kasuan kasuko irakaslearen ordutegian.

c) Ikastetxeak zehazten duen ordutegian ikasleek ezin dute inolaz ere kanpoan egon.

Laugarren xedapen gehigarria.-Hezkuntza eskaintza.

Hezkuntza Departamentuak zehaztuko ditu Nafarroko Foru Komunitateko Bigarren Hezkuntzako institutuek eta ikastetxe integratu publikoek emanen dituzten batxilergoko modalitateak eta, hala denean, bideak.

Bosgarren xedapen gehigarria.-Urrutiko hezkuntzaren bidez edo beste ikastetxe batzuetan egiten diren irakasgaiak.

Ikastetxe bateko irakasgai eskaintza antolaketa arrazoiengatik mugatuta dagoenean, ikasle kaltetuek zilegi izanen dute irakasgai horiek egitea halako ikasketak tutorepeko urrutiko ereduan edo urrutiko hezkuntzan libre moduan emateko baimena duten Bigarren Hezkuntzako institutuetan edo ikastetxe integratu publikoetan.

Seigarren xedapen gehigarria.-Atzerriko bigarren hizkuntza.

1. Irakasgai honetan aurrera egiten denez pixkanaka, Atzerriko bigarren hizkuntza aukeratzen duten ikasleek etapako bi kurtsoetan egin beharko dute: Atzerriko bigarren hizkuntza I lehen kurtsoan eta Atzerriko bigarren hizkuntza II bigarrenean.

2. Derrigorrezko bigarren hezkuntzan Atzerriko bigarren hizkuntza izan ez duten ikasleek edo batxilergoko lehen kurtsoan izan ez dutenek Atzerriko bigarren hizkuntza har dezakete lehen edo bigarren kurtsoan, hurrenez hurren, departamentu didaktikoak eginen duen proba bat gainditzen badute betiere, irakasgai horretako mailarako beharrezkoa den ezagutza badutela frogatuko baita horrela.

3. Ikasleek batxilergoko lehen kurtsoa bukatutakoan Atzerriko bigarren hizkuntza uzten ahalko dute, aldez aurretik gurasoek edo legezko ordezkariek edo, adin nagusikoak badira, beraiek eskaria egiten badute, idatziz. Eskaria ikastetxeko zuzendariari igorriko zaio, eta irakasgaia utzi nahiaren arrazoiak azalduko dira bertan. Ikastetxeko zuzendariak, koordinazio didaktikoko departamentuari kontsulta egin eta alegatutako arrazoiak aztertu ondoren, eskariaren gaineko ebazpena emanen du.

Zazpigarren xedapen gehigarria.-Aukerako irakasgaietarako irakasleak.

Departamentu bati esleituta ez dauden edo zenbait departamentutako irakasleek ematen ahal dituzten irakasgaiak eman behar direnean, eta indarra duen araudiak horiek esleitzeko lehentasuna ezartzen ez duenean, zuzendariak departamentu horietako bati esleituko dizkio irakasgaiak eta horixe arduratuko da dagokien oroz.

Zortzigarren xedapen gehigarria.-Ezarritakoez besteko multzoak eskaintzea.

Ikastetxeek, antolaketa arrazoiengatik edo berariazko hezkuntza proiektu bat izateagatik, beste irakasgai multzo batzuk eskain ditzakete, baldin eta Hezkuntza Departamentuaren baimena badute eta Zerbitzuak Ikuskatzeko eta Ikuskapen Teknikorako Zerbitzuak eta Hezkuntza Garapenaren Atalak horren aldeko txostena ematen badute.

Bederatzigarren xedapen gehigarria.-Aukerako irakasgaiak baimentzea.

Ikastetxeek, berek diseinatutako aukerako irakasgaiak eskaintzeko, prozedura honi segituko diote:

1. Ekainaren 1a baino lehen, ikastetxeko zuzendariak aukerako irakasgai horiek aurkeztuko dizkio Antolamendu eta Berrikuntza Zerbitzuko zuzendariari, agiri hauekin batera:

a) Irakasgaiaren justifikazioa, ikastetxeko hezkuntza proiektuarekin duen loturari dagokionez.

b) Irakasgaien curriculuma: edukiak, helburuak eta ebaluazio irizpideak.

c) Irakasgaiaren garapenerako dauzkaten material eta baliabide didaktikoak.

d) Irakasgaia emateaz arduratuko den koordinazio didaktikoko departamentua.

2. Jasotako agiriak azterturik, Hezkuntza Garapenaren Atalak, alde batetik, eta ikastetxeko ikuskatzaileak, Zerbitzuak Ikuskatzeko eta Ikuskapen Teknikorako Zerbitzuaren oniritziarekin, bestetik, balorazio txostenak eginen dituzte, bakoitzak bere eskumenaren esparruan.

3. Matrikula epea ireki baino lehen, Hezkuntza Departamentuak baimena emanen du, bidezkoa bada, eskatutako aukerako irakasgaiak irakats daitezen.

4. Bigarren Hezkuntzako institutuetan eta ikastetxe integratu publikoetan, ikastetxeak diseinatutako aukerako irakasgaia baimendurik, hiru urtez eskainiko da gutxienez. Epe hori bukatzearekin, ikastetxeak eskaintzen jarrai dezake edo beste eskari bat egin.

Hamargarren xedapen gehigarria.-Ikastetxe itunduetako titularren eskumenak.

Foru agindu honetan xedatutakoa, baimena emateko prozedurei dagokiena bereziki, ikastetxe pribatu itunduei ere aplikatuko zaie, ikastetxe horietako titularrek dituzten eskumenei kalte egin gabe.

XEDAPEN IRAGANKORRAK

Xedapen iragankor bakarra.-Araudiaren indarraldia.

Batxilergoko antolamendu berria ezarri arte, foru agindu honen 11. artikuluan araututakoarekin bat, urriaren 3ko 1/1990 Lege Organikoaren araberako batxilergoko ikasketen gaineko araudiak xedatutakoari jarraikiz gauzatuko dira ikasketak.

XEDAPEN INDARGABETZAILEAK

Xedapen indargabetzaile bakarra.-Arau indargabetuak.

Indarrik gabe gelditu da Hezkuntza kontseilariaren ekainaren 15eko 151/2004 Foru Agindua, Nafarroako Foru Komunitatean batxilergoaren egitura garatu, haren antolaketa arautu, ordutegia finkatu eta aukerako irakasgaien curriculuma onesten duena, bai eta foru agindu honetan ezarritakoaren kontrakoak diren maila bereko edo apalagoko arau guztiak ere.

AZKEN XEDAPENAK

Azken xedapen bakarra.-Indarra hartzea.

Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.

Iruñean, 2008ko maiatzaren 14an.-Hezkuntza kontseilaria, Carlos Pérez-Nievas López de Goicoechea.

I. ERANSKINA

Batxilergoko asteko ordutegia

-G hizkuntza eredua.

-A hizkuntza eredua (G eta A ereduetako ikasketak ematen dituzten ikastetxeetan).

Irakasgai komunak

Lehen kurtsoa Bigarren kurtsoa

Gutxieneko Gutxieneko

Irakasgaiak eskola Irakasgaiak eskola

orduak orduak

Gaztelania eta literatura I 3 Gaztelania eta literatura II 4

Atzerriko hizkuntza I 3 Atzerriko hizkuntza II 3

Filosofia eta herritartasuna 2 Filosofiaren historia 3

Gorputz hezkuntza 2 Espainiako historia 3

Mundu garaikiderako zientziak 2

Ikastetxeak erabakitzeko orduak 2 Ikastetxeak erabakitzeko orduak 1

Ikastetxeak autonomia izanen du orduak osatzeko, taulan ageri den gutxienekotik hasita. Erlijioa eta horren ordezkoa emateko 70 eskola ordu bermatu beharko ditu etapa osoan. Ikastetxeak zehaztuko du Erlijioaren ordezko hezkuntza-arretaren edukia.

Modalitateko irakasgaiak

Modalitateko hiru irakasgai (4 ordu bakoitzak) 12 Modalitateko hiru irakasgai (4 ordu bakoitzak) 12

Aukerako irakasgaiak

Aukerako irakasgai bat 4 Aukerako irakasgai bat 4

Aldi berean G eta A hizkuntza ereduetako ikasketak ematen dituzten ikastetxeek aukerako irakasgaietarako denbora erabiliko dute A ereduko ikasleei Euskal hizkuntza eta literatura emateko.

-D hizkuntza eredua.

-A hizkuntza eredua (D eta A ereduetako ikasketak ematen dituzten ikastetxeetan).

Irakasgai komunak

Lehen kurtsoa Bigarren kurtsoa

Gutxieneko Gutxieneko

Irakasgaiak eskola Irakasgaiak eskola

orduak orduak

Gaztelania eta literatura I 3 Gaztelania eta literatura II 4

Atzerriko hizkuntza I 3 Atzerriko hizkuntza II 3

Filosofia eta herritartasuna 2 Filosofiaren historia 3

Gorputz hezkuntza 2 Espainiako historia 3

Mundu garaikiderako zientziak 2 Euskal hizkuntza eta literatura II 4

Euskal hizkuntza eta literatura I 3

Ikastetxeak erabakitzeko orduak 3 Ikastetxeak erabakitzeko orduak 1

Ikastetxeak autonomia izanen du, taulan ageri den gutxienekotik hasita. Erlijioa eta horren ordezkoa emateko 70 eskola ordu bermatu beharko ditu etapa osoan. Ikastetxeak zehaztuko du Erlijioaren ordezko hezkuntza-arretaren edukia.

Modalitateko irakasgaiak

Modalitateko hiru irakasgai (4 ordu bakoitzak) 12 Modalitateko hiru irakasgai (4 ordu bakoitzak) 12

Aukerako irakasgaiak

Aukerako irakasgai bat 4 Aukerako irakasgai bat 4

II. ERANSKINA

Arteen modalitateko irakasgaiak

BIDEAK LEHEN KURTSOA BIGARREN KURTSOA

Arte plastikoak, diseinua eta irudia -Marrazketa artistikoa I -Marrazketa artistikoa II

-Marrazketa teknikoa I -Marrazketa teknikoa II

-Bolumena I -Artearen historia

-Diseinua

-Adierazpen grafiko-plastikoaren teknikak

-Ikus-entzunezko kultura

Arte eszenikoak, musika eta dantza -Musika analisia I -Musika analisia II

-Anatomia aplikatua -Musikaren eta dantzaren historia

-Arte eszenikoak -Literatura unibertsala

-Musika hizkuntza eta praktika -Ikus-entzunezko kultura

III. ERANSKINA

Zientzien eta Teknologiaren modalitateko irakasgaiak

MULTZOAK LEHEN KURTSOA BIGARREN KURTSOA

Zientziak eta Ingeniaritza Multzoari lotutako irakasgaiak

-Fisika

-Matematika II

Nahitaez eskaini beharreko irakasgaiak

-Marrazketa teknikoa I -Biologia

-Biologia eta geologia -Marrazketa teknikoa II

-Fisika eta kimika -Elektroteknia

-Matematika I -Kimika

-Teknologia industriala I -Teknologia industriala II

-Lurraren eta ingurumenaren zientziak

Teknologia Multzoari lotutako irakasgaiak

-Matematika I -Teknologia industriala II

Nahitaez eskaini beharreko irakasgaiak

-Marrazketa teknikoa I -Biologia

-Biologia eta geologia -Marrazketa teknikoa II

-Fisika eta kimika -Elektroteknia

-Teknologia industriala I -Fisika

-Matematika II

-Kimika

-Lurraren eta ingurumenaren zientziak

Osasun Zientziak Multzoari lotutako irakasgaiak

-Biologia

-Kimika

Nahitaez eskaini beharreko irakasgaiak

-Matematika I -Marrazketa teknikoa II

-Biologia eta geologia -Elektroteknia

-Marrazketa teknikoa I -Fisika

-Fisika eta kimika -Matematika II

-Teknologia industriala I -Teknologia industriala II

-Lurraren eta ingurumenaren zientziak

Giza eta Gizarte Zientzien modalitateko irakasgaiak

MULTZOAK LEHEN KURTSOA BIGARREN KURTSOA

Giza Zientziak Multzoari lotutako irakasgaiak

-Artearen historia

-Latina II

Nahitaez eskaini beharreko irakasgaiak

-Mundu garaikidearen historia -Grekoa II

-Latina I -Enpresaren ekonomia

-Grekoa I -Geografia

-Ekonomia -Gizarte zientziei aplikatutako matematika II

-Gizarte zientziei aplikatutako matematika I -Literatura unibertsala

Gizarte Zientziak Multzoari lotutako irakasgaiak

-Geografia

-Gizarte zientziei aplikatutako matematika II

Nahitaez eskaini beharreko irakasgaiak

-Ekonomia -Artearen historia

-Mundu garaikidearen historia -Latina II

-Latina I -Grekoa II

-Grekoa I -Enpresaren ekonomia

-Gizarte zientziei aplikatutako matematika I -Literatura unibertsala

IV. ERANSKINA

Batxilergoko aukerako irakasgaiak

ATALAK AUKERAKO IRAKASGAIAK

Atzerriko Bigarren Hizkuntza -Atzerriko bigarren hizkuntza I

-Atzerriko bigarren hizkuntza II

Prestakuntza komuna handitzea -Informazioaren eta komunikazioaren teknologiak

-Nafarroako geografia eta historia

-Ikastetxean ematen diren beste modalitate bateko irakasgaiak

-Ikastetxeak diseinaturiko irakasgaia

-Bolumena II -Geologia -Musikaren historia

-Arte lantegiak -Mekanika

-Elektronika

-Komunikazio teknikoak

-Halakotzat aukeratu ez den modalitateko edozein irakasgai

-Ikastetxeak diseinaturiko irakasgaia

V. ERANSKINA

Aukerako irakasgaiak edozein modalitatetarako

ATZERRIKO BIGARREN HIZKUNTZA

ALEMANA I ETA II

Hizkuntzen etengabeko ikaskuntzaren bitartez pertsonen eta kulturen arteko harremanetarako berebiziko baliabidea eskuratzen da, ezinbestekoa dena etapa honetako hezkuntza helburuetako batzuk lortu ahal izateko.

Europar Batasuneko hizkuntzak gako-elementuak dira hizkuntza eta kultura anitzeko europar nortasuna sortzeko. Hizkuntzak jakiteak mesede egiten dio pertsonen joan-etorri libreari, eta gizarteen zein pertsonen arteko lankidetza kultural, ekonomiko, tekniko eta zientifikoa errazten du.

Europako Erreferentzia Marko Bateratua (EEMB) eta Hizkuntzen Portfolio Europarra (HPE).

Europako Kontseilua azken hamarkadetan ikerketa lana egiten aritu da, berrogeita bat estatu kideetako hizkuntzalari eta pedagogoekin elkarlanean. Lan horri esker orain badugu guztiontzako oinarria, hizkuntzen irakaskuntzaren eta ikasketaren helburuak eta metodologia, programak prestatzeko arauak eta hizkuntza horietako ebaluazio irizpideak definitzen dituena.

Europako Erreferentzia Marko Bateratuak gidalerroak ezartzen ditu hizkuntzak ikasteko eta hiztunaren gaitasuna baloratzeko. Marko horrek definitzen ditu hizkuntza jakin batean komunikatzeko gaitasunaren garapen mailak, ikasleak komunikazio xede jakineko lan multzo bat egiteko duen gaitasunaren arabera, berariazko esparru baten barnean. Agiri hori gako-erreferentea da hizkuntzako curriculumetan.

Hizkuntzen Portfolio Europarrak (HPE) ikaskuntza-irakaskuntza prozesuari laguntzeko tresna da. Agiri pertsonala da, norberaren ikaskuntza, horren aurrerapena eta ebaluazioa aztertzen laguntzen duena.

Batxilergora igarotzen diren ikasleak alemana ikasten arituak dira atzerriko bigarren hizkuntza gisa (alemana AH2), eta horrek komunikaziorako gaitasuna ematen die eguneroko zeregin errazetan, ezagunak edo ohikoak dituzten gaiei buruzko informazio truke erraz eta zuzenekoetan. Etapa honetan, lehenago eskuratutako diskurtsorako gaitasunetan sakondu eta haien errepertorioa aberastea izanen da irakasgai honen helburua; gainera, haren eremuak handitu eginen dira. Batxilergoa amaitutakoan ikasleek gai izan behar dute pentsamenduak, sentimenak eta gertaerak ulertu, adierazi eta interpretatzeko, hala ahoz nola idatziz, hainbat esparrutan, bereziki esparru akademikoan (edukiak gehitzea), esparru publikoan (ohiko harremanak, gizarte eta lan interakzioa) eta komunikabideen esparruan.

Edozein hizkuntzatan komunikaziorako gaitasuna pixkanaka garatzeko, ikasleek komunikazio ekintza batzuk burutzeko gauza izan behar dute. Ekintza horiek komunikazio xede zehatza dute esparru berezi batean. Komunikaziorako gaitasuna erabili behar da haiek burutzeko. Komunikaziorako gaitasuna garatzeak esan nahi du gaitasuna hartu behar dela ulertzeko (diskurtsoan maiz modu inplizituan komunikatzen diren elementuak atzeman eta interpretatzeko) eta diskurtsoak sortzeko. Horretarako ulertze prozedurak sendotu behar dira, eta ahozko nahiz idatzizko produkziorako estrategiak gauzatu.

Komunikaziorako gaitasuna, etapa honetan, hainbat ezagutza, trebetasun eta jarreraren bidez garatzen da, eta horiek ez dute bereiz jarduten, aitzitik, elkartu egiten dira mezu adierazgarriak sortzeko. Hizkuntza 1eko (H1) eta atzerriko 1. hizkuntzako oinarrizko elementuetako batzuk biltzen ditu, hizkuntza hauetarako gaitasun mailaren arabera aplikatzen direnak:

Ezagutzak

-Hiztegia eta gramatika funtzionala, intonazioa eta ahoskera.

-Ahozko interakzio mota desberdinak daudela ohartzea (aurrez aurrekoa, telefonozko solasaldiak, elkarrizketak, etab.).

-Literatura testuen eta bestelakoen sorta egokia ezagutzea (adibidez, ipuin laburrak, olerkiak, egunkari eta aldizkarietako artikuluak, web orriak, jarraibideak, gutunak, txosten laburrak, etab.).

-Estilo eta erregistro desberdinen ezaugarri nagusiak ulertzea ahozko hizkuntzan eta idatzizkoan (formala, informala, kazetaritzakoa, lagunartekoa, etab.).

-Gizarteko konbentzioez, alderdi kulturalez eta hizkeraren aldakortasunaz jabetzea eremu geografiko eta gizarte eta komunikazio esparru desberdinetan.

Trebetasunak

-Ahozko mezuak entzun eta ulertzeko trebetasuna, komunikazio egoeren sorta egokian (ezagunak diren gaiak, norberaren interesekoak edo eguneroko bizitzari dagozkionak).

-Gai ezagunei, norberaren intereseko gaiei edo egunerokoei buruz hizketan hasteko, hariari eusteko eta elkarrizketak amaitzeko trebetasuna.

-Askotariko gaiei buruzko idatzizko testu espezializatu gabeak edo, zenbait kasutan, eremu ezagunetako testu espezializatuak irakurri eta ulertzeko trebetasuna, eta gai ezagunei edo norberaren intereseko gaiei buruz testu erraz eta koherenteak idazteko trebetasuna.

-Baliabideak (esate baterako, oharrak, diagramak, mapak) egoki erabiltzea ahozko edo idatzizko testuak ulertu edo sortzeko (adibidez, solasaldiak, jarraibideak, elkarrizketak, hitzaldiak).

-Hizkuntza ikasteko jarduera autonomoen sorta egokia hasteko eta hari eusteko trebetasuna.

Jarrerak

-Hizkuntzarekiko jarrera positiboa garatzea, eta hizkuntza aberastasun pertsonal eta kulturalaren iturri dela onartzea.

-Besteen iritzi eta argudioak aurreiritzirik gabe jasotzeko eta elkarrizketa kritiko eta eraikitzailean aritzeko jarrera.

-Jendaurrean hitz egiteko konfiantza.

-Hizkuntzak, oro har, eta kulturen arteko komunikazioa ezagutzeko interesa eta jakin-mina.

Batxilergoan ikasleen autonomia indartzen jarraitu behar da, dagoeneko haien interesak zehatzagoak izanen baitira. Hortaz, atzerriko hizkuntza ikasiz, etapa honetan, batetik aurreko etapetan eskuratutako ezagutzak sendotuko dira eta, bestetik, beste gaitasun espezifikoago batzuk garatuko dira, ikasleak gidatuko dituztenak beren ikasketetan edo lanbidean.

Batxilergoko etapan, halaber, gramatikarako gaitasuna handitzen da, egitura morfosintaktiko eta eduki lexiko konplexuagoak dituzten ahozko eta idatzizko testuak lantzen baitira. Aldi berean, hizkuntzaren kodeari buruzko ezagutzak sistematizatzen ahal dira. Funtsean, gogoeta jarduera horien esparruan egiten dira arrazoitze logikoko eragiketak (aztertzea, kontzeptualizatzea, sistematizatzea, etab.), prestakuntza intelektualaren indargarri eta osagarri moduan.

Batxilergoan, aurrera eginen da ezagutzan, eta horri esker ikasleen ikuspegia zabalduko da, beste bizimodu eta gizarte antolamendu batzuetara gehiago hurbilduko dira, nazioartean denenak diren arazoei buruzko iritziak trukatuko dituzte, beren interes profesionalak dibertsifikatuko eta balio sozialak sendotuko, nazioarteko komunikazioa gero eta beharrezkoagoa den mundu batean elkarretaratzea errazagoa izan dadin.

Helburuak

Etapa honetan atzerriko hizkuntzaren irakaskuntzaren bidez hurrengo gaitasunak garatu nahi dira:

1. Ahoz igorritako mezuen informazio orokorra eta berariazkoa ulertzea, eta ohiko komunikazio esparruetan eta komunikabideetan azaltzen diren gaurko gaien inguruko arrazoibideari jarraitzea.

2. Modu ulergarrian mintzatzea eta ahozko interakzioan aritzea, komunikazio egoera bakoitzerako estrategia egokiak erabiliz.

3. Gai orokorrei eta berariazkoei buruzko testu idatziak ulertzea, mota desberdinetakoak, egin beharreko lanaren araberako ulertze-estrategiak erabiliz; testuaren funtsezko osagaiak ulertzea eta haien eginkizuna eta diskurtsoaren antolaketa atzematea.

4. Xede desberdinetako testuak, ikasleen interes eta beharretarako egokiak (informazioa eskuratzekoak, denbora pasakoak edo aisiakoak) nork bere kabuz irakurtzea.

5. Hainbat motatako testuak idaztea, argiak eta ongi egituratuak, irakurriko dituzten pertsonen eta komunikazio asmoaren arabera egokitutako estiloan.

6. Hizkuntzari eta hizkuntza erabiltzeko arauei buruzko ezagutzak erabiltzea modu egoki, koherente eta zuzenean, mintzatu eta idazteko eta ahozko zein idatzizko testuak ulertzeko, eta atzerriko hizkuntzaren funtzionamenduaz gogoeta egitea komunikazio egoeretan.

7. Askotariko ikaskuntza estrategiak bereganatu eta garatzea, eskura dauden baliabide guztiak erabiliz, informazioaren eta komunikazioaren teknologiak barne, horrela atzerriko hizkuntza nork bere kabuz erabili ahal izateko eta gero eta sakonago ikasteko.

8. Komunikaziorako gaitasunari dagokionez nork bere burua ebaluatzeko estrategiak finkatzea, ekimenez eta arduraz.

9. Atzerriko hizkuntzaren funtsezko ezaugarri sozial eta kulturalak ezagutzea, norberarena ez diren kulturak eta ikasten ari den hizkuntza hobeki ulertu eta interpretatzeko.

10. Atzerriko hizkuntza baloratzea beste jakintza eta kultura batzuetara hurbiltzeko bidea den aldetik, eta kultura anitzeko mundu honetan nazioen arteko komunikaziorako eta elkar ulertzeko bitarteko garrantzitsua dela onartzea.

Edukiak

Edukiak multzotan banaturik egoteak ez du esan nahi sekuentzia edo hierarkia baten arabera antolaturik daudenik, baizik eta hizkuntzen irakaskuntzan erabili ohi den banaketa aukeratu dela, komunikaziorako gaitasunekin zuzeneko lotura duena.

Hizkuntzaren erabilerari eman behar zaio lehentasuna, edukiak ikasi eta bereganatzeko. Komunikazioaren eta didaktikaren arloetako irizpideei jarraituz aukeratu behar dira gelako jarduerak. Testuak sortuko dira gidaritzapean, hala ahozkoak nola idatziak; horretarako, ereduak aurkeztu eta aztertuko dira eta haien imitazio sortzailea eginen da, edo ereduok eraldatu eginen dira asmo eta egoera desberdinetara egokituz. Ariketa hori lagungarria izanen da trebetasunak (ulermena, mintzamena eta idazmena) batera lantzeko eta hizkuntzen tratamendu integratua egiteko.

Hainbat motatako testuak landuko dira etapa osoan zehar. Aztertutako genero guztietako testuei berriz ekinen zaie eta aurretik landutako alderdietan sakonduko da, batez ere komunikazio asmoari, diskurtsoaren osagaiei eta gogoeta gramatikalaren alderdiei dagokienez.

Ikasleek testu mota asko landu behar dituzte:

-Ahozkoak: solasaldiak, narrazioak, arrazoibideak, eztabaidak eta azalpenak.

-Idatziak: web orriak, egunkariak, aldizkariak, literatura eta zabalkunderako liburuak, eguneroko gaiei edo kulturari buruzkoak, edo ikasleen interesekin eta oraingo edo etorkizuneko ikasketekin zerikusia dutenak. Narrazioak, argudiatzeak eta azalpenak. Gutunak.

Testuen tipologiari eta hizkuntza garatzen den inguruneari dagokienez, jakintzat ematen da behin eta berriz agertuko direla gelako komunikazio truke arruntak: solasaldiak, simulazioak, jarraibideak, galdera-erantzunak, iruzkinak, esperientzien kontakizunak.

Hitz batez, ikasleek gai izan behar dute ezagunak edo interesgarriak zaizkien gaiei buruz testu sinple eta egituratuak sortzeko, eta bai esperientziak, gertaerak, desioak eta asmoak deskribatzeko eta beren iritziak labur argudiatzeko ere. Halaber, gai baten puntu nagusiak azaltzeko eta musika edo filmak bezalako kultura gaiei buruzko beren ideiak adierazteko gauza izan behar dute.

Edukiak hiru multzotan banatu dira:

1. multzoa.-Ulermena, mintzamena eta idazmena.

2. multzoa.-Alderdi soziokulturalak eta kultura arteko kontzientzia.

3. multzoa.-Hizkuntzaren ezagutza. Hizkuntzaren ikasketaren gaineko gogoeta.

Hizkuntzarako trebetasunak -entzumena, mintzamena, irakurmena eta idazmena- multzo bakarrean bildu dira. Izan ere, ahozko erabilera formalak eta idatzizko erabilerak antzekotasun asko dituzte (gaia aldez aurretik ezarrita dago, edukia, sintaxia eta lexikoa planifikaturik, arau estandarra bete behar da ...) eta komunikazio egoera askotan erabilera desberdinak konbinatzen dira; hartara bi ikaskuntza motak loturik daude eta elkar indartzen dute.

Hizkuntzarako trebetasun horiek hizkuntzaren erabilera-esparru desberdinetan landuko dira: esparru akademikoan, pertsonen arteko eta erakundeekiko harremanen esparruan eta komunikabideen eta informazioaren teknologien esparruan.

2. multzoak, Alderdi soziokulturalak eta kultura arteko kontzientzia izenekoak, ikasi beharreko hizkuntza erabiltzen duten gizarteen ohiturak, harreman sozialak, ezaugarriak eta berezitasunak erakusten dizkie ikasleei; hitz batez, berena ez bezalako bizimoduak erakusten dizkie. Ezagupen horrek tolerantzia eta elkarren onarpena sustatzen ditu, errealitate sozial eta kultural desberdinak ezagutzeko jakin-mina pizten du eta kulturen arteko komunikazioa errazten du.

3. multzoak, Hizkuntzaren ezagutza izenekoak, eduki linguistikoak eta kontzeptu batzuen eta terminologia gramatikal baten ikasketa biltzen ditu. Multzo hau beharrezkoa da, hizkuntzarako eta komunikaziorako trebetasunak eskuratu ahal izateko hizkuntzaren alderdi batzuen gogoetazko erabilera beharrezkoa delako: gramatika eta ortografiako arauak; testuari batasuna ematen dioten elementu morfosintaktikoak; eduki bera adierazteko erabiltzen diren aukera sintaktiko desberdinak; hitzak eratzeko mekanismoak; dialektoak, erregistroak eta erabilera sozialak zehazten dituzten faktoreak, etab.

Hizkuntza edukien irakaskuntza ingurune batean kokatu behar da, hots, praktikoa izan behar du, ikasleen trebetasunak eta lanak hobetzea delako helburua.

Ikasketaren gaineko gogoeta izeneko atalean, ikasleek ikasteko eta lan egiteko estilo pertsonal eta eraginkorra gara dezaten lortu nahi da, beren estrategiak etengabe hobetu ahal izateko. Nola eta noiz ikasten duten gehien eta lan egiten duten ongien, horretaz jakitunago izan daitezen lortu nahi da. Nola lan egiten den eta nola ikasten den hausnartzea ere ingurune batean kokatu beharreko ekintza da, gainerako eduki multzoetan aipatutako zeregin eta jarduerekin estu lotuta.

1. multzoa.-Ulermena, mintzamena eta idazmena.

-Testu mota desberdinetan informazioaren predikzio eta inferentzia egitea, eta ideia aurreratuak edo usteak egiaztatzea ondorengo entzunaldi edo irakurketaren bidez.

-Ahozko eta idatzizko testuetako informazio orokorra eta berariazkoa eta ideia nagusiak ulertzea.

-Testuen barne batasuna eta koherentzia, eta testuetako lotura-hitzen eta erreferentziazko elementuen identifikazioa. Esaldi eta paragrafoen egituratzea eta gai jakin bati buruz azaldutako edukiaren eta ideien garrantzia.

-Beren kabuz irakurtzea gaur egungo gaiei edo ikasleen oraingo edo geroko interes profesionalei buruzko testuak.

-Zenbait komunikabidetan gai bati buruz argitaratu edo zabaldutako informazioak konparatu eta alderatzea.

-Gaur egungo gaiei buruzko eztabaidetan parte hartzea, beren ikuspuntuak defendatuz, informazio zehatza emanez eta adibide egokiak erabiliz. Taldean erabakiak hartzea berariazko gai bati buruz.

-Gertaeren edo esperientzia pertsonalen ahozko eta idatzizko narrazioak, eta testu mota desberdinak idaztea, beren ezaugarriak kontuan hartuta.

-Igorri nahi diren mezuak planifikatzea, solasaldiak, komunikazio asmoa eta testu eskema egokiak kontuan harturik.

-Proiektuen prestakuntzan parte hartzea (egunkari bat, foileto bat, inkesta bat, iritzi-azterketa, etab. egitea), trebetasunak egoki baliatuz.

2. multzoa.-Alderdi soziokulturalak eta kultura arteko kontzientzia.

-Alemanez hitz egiten duten herri eta kultura batzuetako eguneroko bizitzan ageri diren ohitura eta ezaugarriak ezagutu eta aintzat hartzea: ordutegiak, jaiegunak, etab.

-Alemanez hitz egiten duten herrien kultura ulertzeko aipagarrienak diren ezaugarri soziokulturalak, baloreak, arauak eta estereotipoak identifikatu eta interpretatzea.

-Alemanak islatzen dituen eguneroko bizitzako alderdi kulturalak eta norberarenak alderatzea: famili ohiturak, kirolak, hezkuntza sistema, etab.

-Atzerriko hizkuntza herrien arteko ulermen eta komunikazio oztopoak kentzeko erabiltzea.

-Mezuak solaskidearen ezaugarriei, inguruneari eta komunikazio asmoari egokitzearen garrantziaz ohartzea: hizkuntza erregistroak, dialektoen ezaugarriak, formula linguistikoak (diosalak, agurrak, adeitasunezko eskaerak ...).

-Atzerriko hizkuntza informazioaren eta komunikazioaren teknologia berrietan nola agertzen den eta duen garrantzia ezagutzea: web orriak, albiste taldeak, etab.

-Informazio kulturalak (mitoak, elezaharrak, literatura lanak, etab.) eta aleman hiztunekin ezartzen diren harreman sozialak (gutunak, turismoa, ikasketak, etab.) ezagutu eta baloratzea.

-Alemanak bizitza profesionalean interesgarriak izanen diren ezagutzak sakontzeko duen garrantzia aintzat hartzea.

3. multzoa.-Hizkuntzaren ezagutza eta ikasketaren gaineko gogoeta.

.Hizkuntzaren ezagutza.

-Eremu semantikoa zabaltzea, adierazpen idiomatikoen, sinonimoen, antonimoen, konnotazioen eta ikasleei interesatzen zaizkien eta curriculumeko beste irakasgai batzuekin zerikusia duten gai orokorrei buruzko lexikoaren bidez.

-Hitzak osatzea aurrizki, atzizki eta hitz elkarketen bitartez.

-Egitura gramatikal konplexuak eta zuzentasunez hitz egiteko behar diren funtzioak erabiltzea.

-Alfabeto fonetikoa erabiltzea, ahoskera hobetzeko.

.Hizkuntzaren egiturak eta funtzioak erabiltzea.

Fonetika:

-Ahoskera finkatu eta hobetzea.

-Zailak diren kontsonante multzoak: schr, mpfst, kst.

-Hitzen azentuazioa.

-Esaldien intonazioa.

-Erritmoa.

Lexikoa:

-Aurreko kurtsoetan landutako gaien hiztegia eta gaiekin zerikusia duena finkatu eta zabaltzea: esperientziak, albisteak, tokiak, adiskidetasuna, gutunak, lan mundua eta abar.

-Natura, ingurumena, klima.

-Etxeko tresnak eta PCa.

-Komunikabideak: prentsa, irratia eta telebista.

-Formulak eta esapideak.

Hizkuntzaren funtzioak eta gramatika:

1. Gauzak eta pertsonak deskribatzea, pertsona eta gauzei buruzko iritziak ematea.

Alderatzea eta erkatzea.

Adjektibo predikatibo eta atributiboa.

Adjektiboaren deklinazioa. Perpausen koordinazioa (und, oder, aber, denn, sondern). Perpausaren osagaien ordena. Adjektiboaren konparazioa (wie; so ... wie). Erlatibozko perpausa.

2. Norabidea adieraztea, gonbidatzea eta gonbitari ezetza ematea. Diskurtsoa antolatzea eta ulertaraztea.

Norabidezko preposizioak.

Izenordain pertsonalak: es eta man.

Ahozko eta idatzizko diskurtsoaren lokailuak.

3. Gogo-aldartea adieraztea, filiazioa adieraztea, konparatzea.

Welch- izenordain galdetzailea.

Adjektiboaren graduak. Forma erregularrak eta irregularrak.

Baiezko eta ezezko galdera-perpausak. Adjektiboaren graduen erabilera atributiboa.

4. Iraganeko gertaerak kontatzea, barkamena eskatzea, modalitatea adieraztea. Beste batek esandakoari buruz informatzea.

Lehenaldi burutuaren konjugazioa.

Adjektibo mugagabeak eta posesiboak.

Moduzko aditzen konjugazioa.

Denborazko perpausak (als, wenn, bevor, bis, nachdem, während).

Aditz erregularren eta irregularren iraganaldi burutua.

Pluskuanperfektua.

Mendeko perpaus denborazkoak.

Era aktiboko aditz sistemaren konjugazio osoa.

Zeharkako estiloa (Konjunktiv I).

5. Norberari buruzko datuak ematea, gustuko gauzak adieraztea, gonbidatzea. Jabetza adieraztea, objektu eta pertsonei buruzko informazioa zabaltzea. Objektuak eta pertsonak denborazkotasuna adierazten duten ezaugarrien bidez deskribatzea.

Izenordain pertsonalen deklinabidea.

Konparaziozko perpausak.

Preposizioen erabilera.

Izenordain erlatiboaren deklinabidea genitiboan.

Izenordain posesiboaren deklinabidea genitiboan.

Substantibo eta adjektiboen konposizioa.

Egoerazko era pasiboa.

Partizip I.

Partizip II.

6. Beharra, zergatia, jabetza adieraztea. Zerbait egiteko nahia, gogoa, aukera, egokitasuna edo desegokitasuna adieraztea. Iragarpenak egitea.

Genitiboa. Mendeko perpaus kausazkoak.

Perpaus konpletiboak.

Mendeko perpausak: so dass, so ... dass.

Perpausaren osagaien ordena. Infinitibozko joskerak zu erabiliz.

Infinitibo aktibo, pasibo eta perfektuak.

Geroaldiko aditz-jokoa.

7. Deskribatzea, iritzi bat ematea eta oinarritzea.

Adjektibo atributiboaren deklinabidea, artikuluarekin eta artikulurik gabe.

Sistema pronominala. Erlatibozko izenordainak.

Substantiboak eratzea atzizki hauekin: -ung, -heit, -keit.

Adjektiboak eratzea atzizki hauekin: -lich, -sam, -bar, -haft.

8. Denborazkotasuna adieraztea, informazioa ematea. Espazio, denbora, kausa, helburu eta murrizketa erlazioak adieraztea, objektuen edo pertsonen artean.

Preposiziozko osagaia duten aditzak.

Adberbio pronominalak.

Perpaus kontzesiboak.

Datibozko preposizioak.

Genitibozko preposizioak.

Preposiziozko osagaia duten aditzak.

Galderazko zeharkako perpausak.

9. Iraganeko gertaerei buruzko kontakizun idatziak ulertzea.

Aditz erregularren Präteritum-a.

Aditz irregularren Präteritum-a.

Aditzen denborazko korrespondentzia.

10. Helburu eta murrizte erlazioak adieraztea, zenbait ekintzaren artean.

Helburuzko perpausak (damit, um ... zu + infinitiboa).

Perpaus kontzesiboak.

11. Gertaerak kronologikoki antolatzea, informazioak nabarmentzea, ñabardurak azaltzea, gertaerak koherentziaz adieraztea.

Perpausaren osagaien ordena.

Diskurtsoaren antolaketa.

12. Baldintza, irrealtasuna adieraztea. Adeitasunez eskariak eta galderak egitea.

Iritziak ematea, proposamenak egitea.

Aditz perifrasia: würde ... infinitiboa.

Konjunktiv II formak: moduzko aditzak, laguntzaileak eta aditz irregular batzuk.

Baldintzazko perpausak lokailuarekin eta lokailurik gabe.

13. Elaborazio prozesuak adierazi eta ulertzea. Ekintzak modu inpertsonalean adieraztea.

Era pasiboaren jokabidea indikatiboko orainaldian, Präteritum-ean eta lehenaldi burutuan.

Agentea.

Joskera inpertsonalak man erabiliz eta era pasiboan.

.Ikasketaren gaineko gogoeta.

-Hizkuntza erabiltzeko aldaerak ezagutzea: hizkera formalaren eta informalaren, ahozkoaren eta idatzizkoaren arteko aldeak.

-Ikasteko askotariko baliabideak, informatikoak, digitalak edo bibliografikoak, nork bere kabuz erabiltzea; esate baterako, hiztegi elebidunak eta elebakarrak edo kontsulta liburuak.

-Lexikoa eta hizkuntzaren egiturak berrikusi, zabaldu eta sendotzeko estrategiak erabiltzea.

-Egitura gramatikalen erabilera eta esanahia aztertzea eta norberaren hizkuntzarekin konparatu eta alderatzea.

-Nork bere burua zuzendu eta ebaluatzeko estrategiak erabiltzea, hizkuntza autonomiaz ikasteko.

-Ahozko eta idatzizko lanak hobetzeko erabilitako estrategien gaineko gogoeta.

Ebaluazio irizpideak

1. multzoa.-Ulermena, mintzamena eta idazmena.

1. Ideia nagusia ulertzea eta xehetasun garrantzitsuak identifikatzea, aurrez aurreko komunikazio egoeretan edo komunikabideetan emandako ahozko mezuetan, gai ezagunei, eguneroko gaiei edo norberaren ikasketa eta interesekin zerikusia duten gai orokorrei buruz edo atzerriko hizkuntzari lotutako alderdiei buruz. Betiere mezuak argiak izanen dira, hizkuntza estandarrean emanen dira eta diskurtsoaren garapena adierazgailu esplizituen bidez erraztuko da.

Irizpide honen bidez ebaluatu nahi da ea zenbateko gaitasuna duten ikasleek gai zehatzei eta gai abstraktuagoei buruzko informazioa ulertu eta interpretatzeko, askotariko hiztunak emandako informazioa, hain zuzen ere, kontuan izanik erabilitako erregistroa, hiztunaren asmoa eta jarrera, besteak beste. Halaber, komunikabideek emandako ahozko testu luzeagoetan ideia nagusiak eta berariazkoak atzemateko gaitasuna ebaluatuko da. Betiere testu argiak izanen dira, hizkuntza estandarrean emanak, mezua argitasunez egituratua izanen da eta adierazgailu esplizituak erabiliko dira.

2. Behar den jariotasunez eta ahoskera eta intonazio egokiez aritzea elkarrizketa errazetan eta aldez aurretik prestatutako narrazio, deskripzio eta aurkezpenetan, horiek elementuen sekuentzia lineal gisa aurkeztuz eta behar diren komunikazio estrategiak eta egoerari dagokion diskurtso mota erabiliz.

Ebaluatu nahi da ea zenbateko gaitasuna duten ikasleek aldez aurretik prestatutako gaietatik abiaturik ideiak argitasunez antolatu eta adierazteko, askotariko gai ezagunen gainean deskripzio eta aurkezpen argiak egiteko, benetako edo alegiazko gertaerak eta liburu edo filmetako argumentuak kontatzeko eta sentimendu eta erantzunak deskribatzeko. Interakzioan erantzun egokiak emateko gaitasuna ere baloratuko da, eta errespetuzko jarrera, eta diskurtsoari jarraipena ematen laguntzea, egoerari eta komunikazioaren xedeari dagokien erregistroarekin.

3. Nork bere kabuz ulertzea hainbat iturritatik ateratako idatzizko testuetan dagoen informazioa: gutunak, web orriak, egunkariak, aldizkariak, literatura eta zabalkunderako liburuak, eguneroko gaiei edo kulturari buruzkoak, edo ikasleen interesekin eta oraingo edo etorkizuneko ikasketekin zerikusia dutenak.

Informazio garrantzitsua ulertzeko, ideia nagusiak bigarren mailakoetatik bereizteko eta interes orokorreko edo zabalkundeko testu idatzietan dagoen informazioa identifikatzeko gaitasuna ebaluatu nahi da. Ikasleek lan bat egiteko behar diren estrategiak erabili beharko dituzte eta adiera inplizituak, jarrerak eta ikuspuntuak atzeman. Irizpide honen bitartez ebaluatu nahi da, gainera, ea ikasleek beren kabuz erabiltzen dituzten baliabide digital, informatiko eta bibliografikoak, informazioak, bilatu, alderatu eta erkatzeko eta ulermen arazoak konpontzeko.

4. Testu argiak idaztea aldez aurretik ezagutzen diren gaiei buruz, xede desberdinetarako, zuzentasun formal, barne batasun eta erregistro egokiekin, testua planifikatu eta berrikustearen garrantzia baloratuz.

Irizpide honen bidez ebaluatu nahi da ea ikasleek argi antolaturiko testuak idazten dituzten, perpausak sekuentzia linealetan ongi josiz; ea testuak planifikatu eta berrikusteaz arduratzen diren, hurrenez hurreneko bertsioak eginez azken bertsioa osatzeraino, arau ortografiko eta tipografikoak betez. Halaber, ebaluatuko da ea behin betiko testuetan islatzen ote den behar adinako autonomiaz planifikatu eta idatzi direla, kontsulta material egokiaren laguntzaz, eta ea hainbat iturritatik ateratako informazioa laburtzen eta ebaluatzen den, betiere gai ezagunei buruzkoa.

2. multzoa.-Alderdi soziokulturalak eta kultura arteko kontzientzia.

5. Egiazko agirietan, paperezko euskarrian, euskarri digitalean edo ikus-entzunezkoan, atzerriko hizkuntza erabiltzen duten herrietako kulturaren edo kulturen osagai geografiko, historiko, artistiko, literario eta sozial garrantzitsuenak identifikatzea, eta ezagutzan sakontzea, ikasleek ezagutzen dituzten hizkuntza eta kulturen bidez aberastatutako ikuspuntutik.

Irizpide honen bitartez, atzerriko hizkuntza duten eskualdeetako kulturari buruzko ezagutzak ebaluatuko dira, eta ezaugarri horiek berezkoak dituzten zenbait ezaugarri identifikatu eta aztertzeko gaitasuna ere bai. Ikasleek gizarte eta kulturen askotarikotasunaz jabetu behar dute, eta bereizi egin behar dituzte hizkuntza komunitate bereko taldeak eta kultura desberdinetako kideak.

3. multzoa.-Hizkuntzaren ezagutza. Hizkuntzaren ikasketaren gaineko gogoeta.

6. Lortutako ezagutza linguistiko, soziolinguistiko, estrategiko eta diskurtsiboak ohartuki erabiltzea, eta nork bere burua ebaluatu eta zuzenketako mekanismoak zorrotz aplikatzea, ikaskuntzan autonomia indartzeko.

Irizpide honen bidez ebaluatuko da ea ikasleek ba ote dakiten erabiltzen heldutasun sintaktikorik handiena adierazten duten egitura gramatikalak, ikasitako arauen eraginkortasuna baloratzen ote duten indukzio eta dedukzio prozesuetatik abiaturik, eta ea gai diren horiek aldatzeko, beharrezkoa denean. Hauek ere baloratuko dira: lexikorik espezializatuena zabaltzea, ezaugarri fonologikoak hobetzea, ortografia, eta komunikazioa errazten duten komunikazio-gaitasunaren osagaiei buruzko azterketa eta hausnarketa. Gainera, ebaluatuko da ea zenbateko gaitasuna duten ikasleek beren ikasketa prozesua baloratzeko eta beren lanak nahiz ikaskideenak zuzentzeko, hala ahozkoak nola idatziak.

7. Ikasteko eskuratutako estrategiak eta hizkuntzarako trebetasunak ebaluatu eta identifikatzeko bitarteko guztiak, informazioaren eta komunikazioaren teknologiak barne, identifikatzea, adibideak ematea eta estrategia horiek bat-batean eta modu autonomoan erabiltzea.

Irizpide honen bitartez ebaluatu nahi da ea ikasleek gaitasunik ba ote duten estrategiak eta trebetasunak egoera berriei aplikatzeko eta ikaskuntza prozesuaz hausnartzeko, ikaskuntzan norberak betetzen dituen eginkizunak baloratuz: erabakiak hartzea, behatzea, hipotesiak sortu eta doitzea, eta aurrerapenak ebaluatzea ahalik eta autonomiarik handienaz. Halaber, ebaluatu nahi da ea gai diren informazioaren eta komunikazioaren teknologiak erabiltzeko nazioarteko komunikaziorako eta ikaskuntza autonomorako tresna moduan, eta gelan nahiz gelatik kanpo ikasteko aukerez baliatzen diren. Ikasleek, gainera, identifikatu behar dute atzerriko hizkuntzaz egiten dakitena, hau da, hizkuntzarako dituzten trebetasunak, beren buruarenganako konfiantza sendotzeko.

ATZERRIKO BIGARREN HIZKUNTZA

FRANTSESA I ETA II

Europako Erreferentzia Marko Bateratua (EEMB) eta Hizkuntzen Portfolio Europarra (HPE).

Hizkuntzen Portfolio Europarrak (HPE) ikaskuntza-irakaskuntza prozesuari laguntzeko tresna da. Agiri pertsonala da, norberaren ikaskuntza, horren aurrerapena eta ebaluazioa aztertzen laguntzen duena.

Batxilergora igarotzen diren ikasleak atzerriko hizkuntza ikasten arituak dira (frantsesa AH2), eta horrek komunikaziorako gaitasuna ematen die eguneroko zeregin errazetan, ezagunak edo ohikoak dituzten gaiei buruzko informazio truke erraz eta zuzenekoetan. Etapa honetan, lehenago eskuratutako diskurtsorako gaitasunetan sakondu eta haien errepertorioa aberastea izanen da irakasgai honen helburua; gainera, haren eremuak handitu eginen dira. Batxilergoa amaitutakoan ikasleek gai izan behar dute pentsamenduak, sentimenak eta gertaerak ulertu, adierazi eta interpretatzeko, hala ahoz nola idatziz, hainbat esparrutan, bereziki esparru akademikoan (edukiak gehitzea), esparru publikoan (ohiko harremanak, gizarte eta lan interakzioa) eta komunikabideen esparruan.

Komunikaziorako gaitasuna, etapa honetan, hainbat ezagutza, trebetasun eta jarreraren bidez garatzen da, eta horiek ez dute bereiz jarduten, aitzitik, elkartu egiten dira mezu adierazgarriak sortzeko. Hizkuntza 1eko (H1) oinarrizko elementuetako batzuk biltzen ditu, hizkuntza hauetarako gaitasun mailaren arabera aplikatzen direnak: