I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
201/2008 FORU AGINDUA, maiatzaren 9koa, Landa Garapeneko eta Ingurumeneko kontseilariak emana. Honen bidez nekazaritza sektorean "de minimis" arauari lotutako laguntzen aldi baterako araubidea ezartzen da, Nekazaritzako Aseguru Konbinatuen Urteko Plan indardunean sartuak ez diren berotegien egitura eta instalazioetan izandako kalteetarako, 2008ko ekitaldian entitate pribatuekin sinatutako asegurua kontratatzeko diru-laguntzak emateko.
Nekazaritzako finantzaketari buruzko lege-xedapenen Testu Bategina onesten duen otsailaren 16ko 54/1998 Legegintzako Foru Dekretuaren 1. eta 2. artikuluen arabera, Nafarroako Gobernuak laguntzak emanen ditu aseguratzen ahal diren nekazaritzako ekoizpenak eta arriskuak aseguratzeko, eta nekazaritzako ondasunen gaineko aseguruen kontratazioaren kostuan parte hartuko du. Legegintzako foru dekretu horren VI. tituluaren III. kapituluan laboreen eta abeltzaintzako ekoizpenen arriskuak aseguratzen dituzten Nekazaritzako Aseguru Konbinatuen Urteko Plan indardunean sartuak ez dauden entitate pribatuekin hitzartutako aseguruen kontratazio kostuaren konpentsazioa jorratzen da. Horretarako, bertan ezartzen da Landa Garapeneko eta Ingurumeneko kontseilariak lehen aipatutako konpentsazioetan aurreikusitako laguntzetara bildutako aseguru-lerroak onetsi eta argitaratuko dituela urtero.
Foru agindu honetan araututako laguntzak "minimis" araubidearen menpean daude (Batzordeak abenduaren 20an emandako 1535/2007 EE Erregelamendua, Europar Batasuna osatzeko Ituneko 87. eta 88. artikuluak nekazaritza produktuen ekoizpenaren sektorean "de minimis" laguntzei aplikatzeari buruzkoa).
Foru agindu honi Diru-laguntzei buruzko azaroaren 9ko 11/2005 Foru Legea aplikatuko zaio.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legeko 41. artikuluak ematen dizkidan eskumenak erabiliz,
AGINDU DUT:
1. Deialdia onartzea Nekazaritzako Aseguru Konbinatuen Urteko Plan indardunean sartuak ez diren berotegien egitura eta instalazioetan izandako kalteetarako 2008ko ekitaldian entitate pribatuekin sinatutako asegurua kontratatzeko diru-laguntzak emateko, "de minimis" araubideari lotuak badira .
2. Deialdiaren arauak onestea. Arau horiek foru agindu honen eranskinean daude.
3. Foru agindu honen ondoriozko gastuak ordaintzeko 25.000 euro onestea, 2008ko gastuen aurrekontuetako "Aseguru-sarien konpentsazioa" izeneko 700000 -71000 -4700 -411100 kontu-sailaren kargura.
4. Foru agindu hau eta eranskina Nafarroako ALDIZKARI OFIZIALean argitaratzea.
5. Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, 2008ko maiatzaren 9an.-Landa Garapeneko eta Ingurumeneko kontseilariak, Begoña Sanzberro Iturriria.
ERANSKINA
Arauak, Nekazaritzako Aseguru Konbinatuen Urteko Plan indardunean sartuak ez diren berotegien egitura eta instalazioetan izandako kalteetarako 2008ko ekitaldian entitate pribatuekin sinatutako asegurua kontratatzeko diru-laguntzak ematekoak.
Lehenbizikoa.-Xedea.
Foru agindu honen xedea da Nafarroako Foru Komunitatean dauden nekazaritzako eta abelzaintzako ekoizpenen aseguruak sustatu eta bultzatzea. Aseguru horiek Nekazaritzako Aseguru Konbinatuen Plan indardunean sartuta ez dauden arriskuentzako dira.
Bigarrena.-Gastuak eta diru-laguntzaren zenbatekoa.
1. Aseguru etxe pribatuekin berotegien egitura eta instalazioetako kalteen asegurua kontratatzeko 2008an egindako gastuetarako jaso daiteke diru-laguntza, 2008ko ekitaldian eta Nekazaritzako Aseguru Konbinatuen eremutik kanpo daudenentzako.
2. Aseguruak kontratatzeko eman beharreko dirulaguntzaren zenbatekoa kalkulatzeko, ondoren azaltzen diren ehunekoak aplikatuko zaizkio asegurua kontratatzeko kostuari. Gehieneko kopuruak ere azaltzen dira.
Berotegien egitura eta instalazioetarako kalte aseguruak:
-Aseguratu guztiei aplikatzeko oinarrizko diru-laguntza: %15, gehienezko 0,036 euroko mugarekin, aseguratutako berotegiaren metro karratuko, "estaldura malgukoen" kasuan edo 0,054 eurokoa metro karratuko "estaldura zurrunekoenean".
-Ogibide nagusia nekazaritza aseguratuei aplikatuko zaien emendiozko dirulaguntza: %15, gehienezko 0,036 euroko mugarekin, aseguratutako berotegiaren metro karratuko "estaldura malgukoen" kasuan edo 0,054 eurokoa metro karratuko "estaldura zurrunekoenean".
-Nekazari gazteak diren aseguratuei aplikatuko zaien emendiozko dirulaguntza, baldin eta bost urte baino gutxiago eman badituzte nekazaritzan eta irailaren 28ko 297/1992 Foru Dekretuaren eta apirilaren 17ko 162/2000 Foru Dekretuaren aplikaziotik sortutako dirulaguntzak eman bazaizkie: %20, gehienezko 0,048 euroko mugarekin, aseguratutako berotegiaren metro koadroko "estaldura malgukoen" kasuan edo 0,072 eurokoa metro koadroko "estaldura zurrunekoenean".
2. Oinarrizko diru-laguntza eta emendiozkoak bateragarriak dira eta aplikatuko dira alde batetik ehunekoen eta, bestetik, ezarritako gehienezko dirulaguntza mugen batuketa eginez.
3. Laguntza hau "minimis" araubidearen menpean dago (Batzordeak abenduaren 20an emandako 1535/2007 EE Erregelamendua, Europar Batasuna osatzeko Ituneko 87. eta 88. artikuluak nekazaritza produktuen ekoizpenaren sektorean "de minimis" laguntzei aplikatzeari buruzkoa). (AO L 337, 2008-12-21, 35. or.)
4. Onuradunak, horrelako laguntzen bidez, gehienez ere 7.500 euro jasotzen ahalko ditu hiru zergaldiko epean.
Hirugarrena.-Onuradunak eta eskatutako betebeharrak.
Laguntzak jasoko ditu Nafarroako Nekazaritzako Ustiategien Erregistroan inskribatuta dagoen nekazaritzako ustiategi baten titularrak, laguntzen eskabidea eta honako agiri hauek aurkezten baditu:
-Izenpetutako polizaren fotokopia eta asegurua ordaindu izanaren frogagiria.
-Eskatu edo jasotako laguntzen adierazpena, halakorik bada. Gainera, eskatzaileek azken hiru urteetan " de minimis" araubidean jasotako bestelako dirulaguntzen eta haien zenbatekoaren berri emanen dute.
-Diru-laguntzei buruzko azaroaren 9ko 11/2005 Foru Legearen 13. artikuluan onuradun izateko ezarritako edozein debekutan ez daudela dioen aitorpena.
-Aipatutako agiriren bat Foru Komunitateko Administrazioak baldin badu, interesdunak eskabidean azaldu beharko du, zein agiri den eta zein artxibotan dagoen azalduz. Agiriak datu pertsonalak baldin baditu, Landa Garapeneko eta Ingurumeneko Departamentuak eskatzailearen baimena beharko du datuak aztertzeko.
Laugarrena.-Eskaerak aurkezteko epea eta eskatutako baldintzak frogatzeko modua.
1. Laguntza-eskabidea eta aipatu agiriak aurkezteko epea hilabetekoa izanen da, poliza sinatu edo berritzen denetik hasita, foru agindu hau argitaratu ondokoa bada, eta argitaratzen denetik hasita data hori baino lehen sinatua bada.
2. Betiere eskabideak aurkezteko epea azaroaren 30ean bukatuko da.
3. Eskaerak Landa Garapeneko eta Ingurumeneko Departamentuari zuzenduko zaizkio eta Departamentuko Erregistroan aurkeztu beharko dira. Halaber, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluan ezarritako tokietako edozeinetan aurkez daitezke.
4. Eskabidea horretarako ezarririko ereduan aurkeztuko da. Eredu hori Landa Garapeneko eta Ingurumeneko Departamentuko Erregistroan, nekazaritza bulegoetan eta Nafarroako Gobernuaren www.navarra.es webguneko zerbitzuen katalogoan eskuratzen ahal da.
5. Eskatzaileak laguntzak lehenbizikoz hartu behar dituenean edo laguntzak kobratzeko kontua aldatu nahi duenean, laguntzaren eskabidearekin batera transferentzia bidez kobratzeko eskabidea aurkeztu beharko du, behar bezala beterik.
Bosgarrena.-Diru-laguntza emateko modua.
Diru-laguntza hauek banakako ebaluazio prozeduraren bidez emanen dira.
Seigarrena.-Ebaluazio organoa.
Nekazaritza Zerbitzuak ebaluatuko ditu eskabideak.
Zazpigarrena.-Deialdia antolatu, tramitatu eta bukatutzat ematea.
1. Eskaera hartuta, hirugarren arauan ezarritako betebeharrak betetzen dituen egiaztatuko da. Agiri guztiak ez badaude, interesdunari eskatuko zaio hamar eguneko epean zuzendu ditzala, eta adieraziko zaio, hori egin ezean, eskaerari uko egiten diola ondorioztatuko dela eta espedientea artxibatu eginen dela. Halaxe jakinaraziko zaio.
2. Eskabidea ebaluatu ondoren, Nekazaritza Zerbitzuak ebazpena proposatuko du.
3. Nekazaritza eta Abeltzaintza zuzendari nagusiak emanen du diru-laguntza.
4. Prozeduraren gainean ebazteko epea sei hilabetekoa izanen da. Epea ebazpenik eman gabe bukatzen bada, eskaera ezetsitzat joko da.
Zortzigarrena.-Onuradunaren betebeharrak.
Onuradunak Dirulaguntzei buruzko azaroaren 9ko 11/2005 Foru Legearen 9. artikuluan ezarritako baldintzak bete beharko ditu.
Bederatzigarrena.-Ordaintzeko modua eta epeak.
Diru-laguntza ordainketa bakarrean emanen da urtero, laguntzaren kontzesioa ebatzi eta gero.
Hamargarrena.-Diru-laguntzaren bateragarritasuna.
Foru agindu honetako laguntzak bateraezinak dira administrazio berak, beste administrazio publiko batzuek, beste erakunde publiko nahiz pribatu batzuek edo partikularrek helburu bererako emandako beste laguntza batzuekin.
Hamaikagarrena.-Emakidaren aldaketa, ezarritako baldintzak ez betetzeagatik.
Laguntzaren emakidaren ebazpena aldatu eginen da asegurua osorik edo hein batean bertan behera uzten denean, eta diru-laguntzaren zati bat kenduko da, onuradunak itzuli beharko duena.
Hamabigarrena.-Ezarritako baldintzak ez betetzearen ondorioak.
Foru agindu honetan eskatutako betebeharrak eta hartutako konpromisoak bete ezean, diru-laguntza itzuli egin beharko da eta, bidezkoa denean, behar diren zehapenak jarriko dira.
Diru-itzulketa, arau-hauste eta zehapenen arloan, Dirulaguntzei buruzko azaroaren 9ko 11/2005 Foru Legearen 35., 42. eta 43. artikuluetan xedatutakoari jarraikiko zaio.
Hamahirugarrena.-Deialdiaren aurkako errekurtso administratiboak.
Deialdi honen eta arauen kontra gora jotzeko errekurtsoa jar daiteke, Nafarroako Gobernuari zuzendua, argitaratu eta biharamunetik hasita hilabeteko epean.
Hamalaugarrena.-Emandako diru-laguntzen publizitatea.
Deialdi honetako laguntzak hartzen dituztenen zerrenda Landa Garapeneko eta Ingurumeneko Departamentuko iragarki oholean argitaratuko da, Iruñeko Tutera kaleko 20an.
Iragarkiaren kodea: F0807286
