I. NAFARROAKO FORU KOMUNITATEA
1.1. XEDAPEN OROKORRAK
1.1.4. Ebazpenak
932/2008 EBAZPENA, apirilaren 29koa, Nafarroako Unibertsitate Publikoko errektoreak emana. Haren bidez bi erabaki argitaratzeko agintzen da, Administrazio eta zerbitzuetako langileen opor, baimen, lizentzia, lanaldi eta eszedentziei buruzko Hitzarmena aldatzen duen erabakia eta Plantillaren lan-baldintzak eta profesionalizazioa hobetzeko Neurriei buruzko erabakia, alegia. Gobernu Kontseiluak 2003ko otsailaren 27ko erabakiaren eta 2006ko abenduaren 20 erabakiaren bidez onetsi zituen bi erabakiak.
Maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitara dadila 2008ko apirilaren 24an Gobernu Kontseiluak onetsi zuen erabakia, Administrazio eta zerbitzuetako langileen opor, baimen, lizentzia, lanaldi eta eszedentziei buruzko Hitzarmena aldatzen duena, Gobernu Kontseiluak 2003ko otsailaren 27ko erabakiaren bidez onetsia, eta Plantillaren lan-baldintzak eta profesionalizazioa hobetzeko Neurriei buruzko erabakia, Gobernu Kontseiluak abenduaren 20ko erabakiaren bidez onetsia.
ERABAKIA, 2003KO OTSAILAREN 27KO GOBERNU KONTSEILUAK ONETSITAKO ADMINISTRAZIO ETA ZERBITZUETAKO LANGILEEN OPOR, BAIMEN, LIZENTZIA, LANALDI ETA ESZEDENTZIEI BURUZKO HITZARMENA ALDATZEN DUENA, BAITA 2006KO ABENDUAREN 20KO GOBERNU KONTSEILUAK ONETSITAKO PLANTILLAREN LAN-BALDINTZAK ETA PROFESIONALIZAZIOA HOBETZEKO NEURRIEI BURUZKO ERABAKIA ERE ALDATZEN DUENA
2003ko otsailaren 27ko Erabakiaz, Gobernu Kontseiluak onetsi zuen Administrazio eta zerbitzuetako langileen opor, baimen, lizentzia, lanaldi eta eszedentziei buruzko Hitzarmena, eta 2006ko abenduaren 20an, Gobernu Kontseiluak onetsi zuen Plantillaren lan-baldintzak eta profesionalizazioa hobetzeko neurriei buruzko erabakia.
2007ko azaroaren 26ko erabakiaz, Gobernu Kontseiluak aldatu zuen opor, baimen, lizentzia, lanaldi eta eszedentziak arautzen dituen Hitzarmena, norberaren bizitza eta lan bizitza adostu ahal izateko neurriak berrantolatuz, baita Plantillaren lan-baldintzak eta profesionalizazioa hobetzeko Neurriei buruzko Erabakia ere.
Unibertsitateak, Kudeatzailetzaren bidez eta unibertsitatean ordezkaritza duten LAB, ELA, CCOO, UGT eta CGT-LKN sindikatuek, negoziaketa-prozesua burutu eta gero, onetsi dituzte administrazio eta zerbitzuetako langileei aplikatuko zaizkien lanaldiari eta egutegiari buruzko hainbat neurri, modu horretan 2007ko uztailaren 2ko Negoziazio Mahaian lortu zen konpromisoa betez.
Ikusirik 2008ko apirilaren 16an Unibertsitateak eta ELA, CCOO, UGT eta CGT-LKN sindikatuek izenpetu zuten Hitzarmena, administrazio eta zerbitzuetako langileei aplikatuko zaizkien lanaldiari eta egutegiari buruzko hainbat neurri biltzen dituena.
Honako hau da kudeatzaileak proposatuta, Gobernu Kontseiluak, 2008ko apirilaren 24an egindako bileran, hartu duen
ERABAKIA
Lehenengoa.-Administrazio eta Zerbitzuetako langile funtzionarioen opor, baimen, lizentzia, lanaldi eta eszedentziei buruzko Hitzarmena, 2003ko urtarrilaren 10ean sindikatuekin izenpetutakoa, eta 2003ko otsailaren 27ko Gobernu Kontseiluak onetsia, aldatzea, ondoren esaten den moduan:
Bat.-1.1.3. atala honela idatzita geratuko da:
"1.1.3. Oporrak hartzeko aldiak. Urteko oporrak urte osoan zehar hartzen ahalko dira, honela:
-12 egun udako opor-aldian eta jarraian hartu beharko dira.
-12 egun jarraian hartzen ahalko dira edo egun asketan.
Zerbitzu beharrak izanda, eta langilea ados badago, edo langileak eskatu eta zerbitzuko zuzendariak ontzat ematen badu, udako opor-aldian 12 egun jarraian hartzeko nahitaezko betebeharraz salbuetsi ahal izango dute. Kasu horretan zerbitzuko zuzendariak txosten justifikatzailea bidaliko du Giza Baliabideen Zerbitzura, ondoriozko opor plangintza berriarekin batera.
Zerbitzu arrazoiengatik opor-egun guztiak ez badira hartu urte naturalean, hurrengo urteko urtarrilaren 15era arte hartzen ahalko dira. Inoiz ere ez da baimenik emango egun horretatik aurrera hartzeko.
Unibertsitateak urteko aldi jakin batean ematen duen zerbitzuaz arduratzeko edo horretan laguntzeko kontrataturiko langileek, dagozkien opor-egunak edukiko dituzte kontratua bukatu eta gero, baita zerbitzu ematea udako opor aldiarekin batera suertatzen bada ere. Salbuetsita egongo dira hiru hilabete baino iraupen handiagoa daukaten kontratuak, ez bada opor egunak beste aldi batean hartzeak beren kontratua justifikatzen duen zerbitzu ematea eragozten duela.
2. kapituluaren (Baimenak) 2.9 atalean ezarritako aldietan sartzen diren egunak baliogabetzat joko dira opor-egun gisa hartzeari begira, 1. kapituluaren (Opor-egunak) 1.1 atalaren bigarren paragrafoko obligazioa bete eta gero, zerbitzua behar bezala emateko beharrezkotzat jotzen den zerbitzuetan.
Inoiz ere ez da diru konpentsaziorik emango opor-egunen trukean".
Bi.-1.1.4. atala honela idatzita geratuko da:
"1.1.4. Iruñeko eta Tuterako jaiak.
Tokian tokiko jaiengatik lau lanegun hartuko dira Iruñeko eta Tuterako campusetan, Sanferminetako eta Santa Anako jaietan hurrenez hurren".
Hiru.-2. Kapituluko (Baimenak) 2.8.1. atala honela geratuko da idatzita:
"Administrazio eta Zerbitzuetako langileek, gehienez ere, sei eguneko baimen ordaindua edukitzen ahalko dute norberaren kontuengatik urte natural bakoitzeko. Zerbitzuko zuzendaritzari eskatuko diote aurretik, eta hark zerbitzu beharrak kontuan hartuko ditu emateko.
Norberaren konturako egunak modu proportzionalean emango dira lan egindako denborarekin, edo Administrazio eta Zerbitzuetako langileak eta Unibertsitatea urte natural bakoitzean lotzen dituen harreman juridikoa bukatzeko falta den denborarekin, alegia, egun bateko baimena emango da zerbitzu emandako bi hilabete osorengatik.
Norberaren konturako egunez aparte, zeinak atal honen lehen paragrafoan aurreikusten baitira, administrazio eta zerbitzuetako langileek norberaren konturako egun gehigarriak hartzeko eskubidea edukiko dute ondorengo baldintza hauek betetzen diren urte naturalaren ondorengoan:
-15 urteko antzinatasuna Administrazio Publikoan: egun 1.
-20 urteko antzinatasuna Administrazio Publikoan: 2 egun.
-25 urteko antzinatasuna Administrazio Publikoan: 3 egun.
-30 urteko antzinatasuna Administrazio Publikoan: 4 egun.
Unibertsitatea juridikoki behartua baldin badago aplikatzera gai hau arautuko duten beste arautze maila bateko edo maila handiagoko arauak, konpentsazio- eta irenspen-arauak sartuko dira indarrean.
Inoiz ere ezingo dira lotu norberaren konturako egunak eta opor-egunak".
Lau.-2.9 atal berri bat sartzea 2. kapituluan (Baimenak). Honela idatzita geratuko da:
"2.9. Egun libreak hartzeko aldiak.
2.9.1. Egun libreak hartzeko bi txanda ezartzen dira Eguberrietan, haietako bakoitza hiru lanegun jarraitukoa, eta lau egunekoak abenduaren 24a eta 31a larunbata edo igandea direnean.
2.9.2. Egun libreak hartzeko bi txanda ezartzen dira Aste Santuan, haietako bakoitza bi lanegun jarraitukoa.
2.9.3. Urte bakoitzeko egutegian zehaztuko dira egun libreak hartzeko txanda bakoitzaren hasiera- eta amaiera-egunak.
2.9.4. Egun libreak hartzeko txanda-eskaera dagokion Zerbitzuko Zuzendaritzari aurkeztu beharko zaio, Eguberriak edo Aste Santua hasi baino hilabete lehenago, gutxienez. Eskaera I. kapituluko (Oporrak) 1.1.2 atalean ezartzen den bezala tramitatuko da.
Zerbitzuko Zuzendaritzak Giza Baliabideen Zerbitzuari jakinaraziko dio zerbitzuko langileen egun libreak hartzeko txandak nola banatzen diren.
Bost.-4. Kapituluko (Lanaldia) 4.1 atala honela geratuko da idatzita:
"4.1. Lanaldia eta lan egutegia.
4.1.1. Lanaldi arrunta.
4.1.1.1. Eguneko lanaldia.
Eguneko lanaldia, 4.1.1.2 atalean ezarritakoaren kaltetan gabe, 7 ordukoa izango da, 20 minutuko atsedenaldiarekin.
4.1.1.2. Lanaldi arrunta uda bitartean.
Ekainaren 16 eta irailaren 15 bitarte, lanaldi arrunta 30 minutu murriztuko da.
4.1.2. Lanaldi bereziak.
Uztailaren 6ko lanaldia Iruñeko campusean eta uztailaren 24koa Tuterako campusean, 08:00etan hasi eta 11:00etan bukatuko da bi campusetako administrazio eta zerbitzuetako langileentzat.
San Fermin jaietako lanegunetako lanaldia 9:00etatik 13:00etara izango da administrazio eta zerbitzuetako langile guztientzat.
Edozein kasutan, Tuterako Campusean ordutegi murriztuko beste hainbeste egun hartzeko eskubidea izango da, herriko festak laburragoak izanik ere.
Hasiera eguneko goizeko lanaldia 11:00etan bukatuko da, betiere, bermatuta egonda zerbitzu ematea. Arratsaldeko txandan ari den langileak eta murrizketa hau hartu ezin duenak beste hainbesteko murrizketa edukitzeko eskubidea izango dute, zerbitzuaren beharren arabera hartuko dena.
4.1.3. Urteko egutegia.
Urteko egutegian jaiegun izango dira Nafarroako Gobernuak Nafarroako Foru Erkidegorako emandako jaiegunak, eta, halaber, berariaz Iruñerako eta Tuterarako direnak eta Unibertsitatearen Eguna.
Halaber, urteko egutegian ezarriko dira 2. kapituluaren (Baimenak) 2.9 atalean ezarritako egun libreak hartzeko aldiak, tokian tokiko jaiengatiko egunak, eta lanaldi berezia daukaten egunak."
Halaber, abenduaren 24a eta 31 lan ez egiteko egunak izango dira.
Bigarrena.-Plantillaren lan-baldintzak eta profesionalizazioa hobetzeko Neurriei buruzko Erabakia, 2006ko abenduaren 20ko Gobernu Kontseiluak onetsia, aldatzeko proposamena.
"Bat.-2.A atala. Oporrak, edukirik gabe geratu da".
Hirugarrena.-Hitzarmen hau Nafarroako ALDIZKARI OFIZIALean argitaratzen den egunaren biharamunean sartuko da indarrean. Hala ere, 4.1.1.1 idatz-zatia 2010eko urtarrilaren 1ean sartuko da indarrean, eta 2.9.2 idatz-zatia, berriz, 2009ko urtarrilaren 1ean."
Iruñean, 2008ko apirilaren 29an.-Errektorea, Julio Lafuente López.
Iragarkiaren kodea: F0807197
