I. NAFARROAKO FORU KOMUNITATEA
1.2. AGINTARIAK ETA LANGILEAK
1.2.2. Plantilla Organikoa, Lan Publikoaren Eskaintza, oposizioak eta lehiaketak
121/2008 EBAZPENA, apirilaren 14koa, Lanbide Heziketaren eta Unibertsitateen zuzendari nagusiak emana, merezimendu lehiaketa bidez, Nafarroako Gobernuko Hezkuntza Departamentuaren mendeko Lanbide Heziketako Ikastetxe Integratuetako zuzendariak hautatzeko deialdia onesten duena.
Ekainaren 19ko 5/2002 Lege Organikoak, Kualifikazioei eta Lanbide Heziketari buruzkoak, 1.5 artikuluan dioenez, administrazio eskudunak izendapen librearen bitartez izendatuko du administrazioen titularpekoak diren Lanbide Heziketako Ikastetxe Integratuen zuzendaritza irakasle funtzionario publikoen artean, merezimendu, gaitasun eta publikotasunaren printzipioen arabera, ikastetxeko organo kolegiatuei aldez aurretik galdeduta.
Bat heldu da horrekin irailaren 4ko 63/2004 Foru Dekretua, Nafarroako Foru Komunitateko Lanbide Heziketako Ikastetxe Integratuak arautzen dituena.
Irailaren 4ko 63/2006 Foru Dekretuaren bigarren xedapen iragankorrak onirizten dio proiektu pilotu esperimentala abian jartzeari, eta urriaren 3ko 119/2006 Foru Aginduaren bitartez finkatzen da aplikazio eremua zenbait ikastetxetarako; hain zuzen, izaera esperimentalez, Ikastetxe Integratu izendatzen ditu Nafarroako Foru Administrazioko Hezkuntza Departamentuaren mendeko Lanbide Heziketako ikastetxe hauek: "Donapea" Ikastetxe Integratu Politeknikoa, "Virgen del Camino" Ikastetxe Integratu Politeknikoa, "ETI" Ikastetxe Integratu Politeknikoa eta Energia Berriztagarrien Goi Mailako Lanbide Heziketako Ikastetxe Integratua, azken hori abuztuaren 11ko 448/2003 Foru Dekretuaren bidez sortua. Gero, azaroaren 14ko 1173/2006 Ebazpenak, Eskola eta Lanbide Irakaskuntzaren zuzendari nagusiak emanak, ikastetxe horientzako sostengu plana zehaztu eta garatu du.
Gaur egun, aipatu ikastetxeetako batzuen zuzendaritzak hutsik daudenez gero, beharrezkoa da deialdia egin eta kargu huts horiek betetzeko hautatze prozesu egokia ezartzea proiektu esperimentalak aurrera egiten duen bitartean.
Ebazpen hau baliatuz, Hezkuntza Departamentuak, Lanbide Heziketaren eta Unibertsitateen Zuzendaritza Nagusiaren bidez, "ETI" eta "Virgen del Camino" IIP-etako zein Energia Berriztagarrien GMLHI-ko zuzendari lanpostuak betetzeko deialdia egiten du; orobat, kargurako izangaiak hautatzeko prozedura eta merezimenduen lehiaketa arautzen ditu.
Lanbide Heziketaren eta Unibertsitateen zuzendari nagusiari irailaren 3ko 122/2007 Foru Dekretuaren (Hezkuntza Departamentuaren egitura organikoa ezartzen du) 32. artikuluan esleitutako eginkizunak eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluan egotzitako ahalmenak direla medio,
EBATZI DUT:
1. "Virgen del Camino" eta "ETI" IIP-etako zuzendari karguak eta Imarkoaingo Energia Berriztagarrien GMLHI-koa merezimendu lehiaketa bidez betetzeko deialdia onestea. Hona oinarriak:
OINARRIAK
Lehena.-Deialdiaren xedea.
1.1. "Virgen del Camino" eta "ETI" IIP-etako zuzendari karguak eta Imarkoaingo Energia Berriztagarrien GMLHI-koa hautatu eta izendatzea bi urteko esperimentazio aldirako. Merezimendu lehiaketa eginen da karrerako irakasle funtzionarioen artean, ikastetxean ematen diren ikasketeetako batean irakasteko gaitasuna badute.
1.2. Merezimendu, gaitasun eta publikotasunaren printzipioei jarraikiz eginen da hautaketa.
Bigarrena.-Araudi aplikagaria.
Kualifikazioei eta Lanbide Heziketari buruzko ekainaren 19ko 5/2002 Lege Organikoaren 11. artikuluan xedatuaren arabera ebatziko da merezimendu lehiaketa, baita Nafarroako Foru Komunitatearen eremuko Lanbide Heziketako Ikastetxe Integratuak arautzen dituen irailaren 4ko 63/2006 Foru Dekretuaren 10. artikuluan eta hura garatzen duten arauei jarraituz ere.
Hirugarrena.-Zuzendaritzan aritzeko baldintzak.
3.1. Deialdi honen ondorioz, bi urterako da zuzendari karguaren zeregina, harik eta proiektu pilotu esperimentala, 63/2006 Foru Dekretuaren bigarren xedapen iragankorrean ezarritakoa, bukatu arte.
Dena dela, proiektu pilotu esperimentala bukatu behar duen araudia onetsi arte, aldiro urtebeterako luzatzen ahal da deialdi honen ondoriozko karguaren izendapena, aldez aurretik Lanbide Heziketaren Zerbitzuak positiboki baloratu eta Zerbitzuak Ikuskatzeko eta Ikuskapen Teknikorako Zerbitzuak txostena eginda eta Gizarte Kontseiluari entzunaldia emanda.
3.2. Ikastetxeetako zuzendariek irailaren 4ko 63/2006 Foru Dekretuaren 10.3 artikuluan zehaztutako eginkizunak beteko dituzte, hartan arautzen baitira Nafarroako Foru Komunitateko Lanbide Heziketako Ikastetxe Integratuak.
3.3. Ebazpen honen bidez onetsitako deialdia baliatuz kargua eskuratzen duten funtzionarioek unean uneko xedapenen arabera dagozkien lansariak jasoko dituzte.
Laugarrena.-Izangaiek bete beharreko baldintzak.
Ebazpen honen xedeko lanpostuak betetzen lehiatzen direnek, eskaerak aurkezteko epea bukatzen den egunean eta izendatzeko unean ere, baldintza hauek beharko dituzte bete:
a) Organikoki Hezkuntza Departamentuaren mende diren irakasle funtzionarioen kidegoetako batekoak izan beharko dute, baita bost urteko antzinatasuna ere izan, gutxienez, karrerako funtzionario gisa funtzio publikoan.
b) Ikastetxean ematen diren irakasgaietako bat irakasteko gaitasuna izatea.
c) I. eranskinean ezarritako alderdiak bederen jasoko dituen zuzendaritza proiektua aurkeztea, baita zuzendaritza talderako proposamena ere, deialdiaren II. eranskinaren araberakoa.
Bosgarrena.-Eskaerak eta haiek aurkezteko tokia eta epea.
5.1. Eskaera, ebazpen honen III. eranskinean zehaztu ereduaren araberakoa, eskabide orokor batean aurkeztuko da, Lanbide Heziketaren eta Unibertsitateen zuzendari nagusiari zuzendua.
Eskabidea Hezkuntza Departamentuko Erregistro Bulegoan aurkeztuko da (Santo Domingo kalea, 8; 31001, Iruña), Nafarroako Gobernuko Erregistro Orokorrean edo Herri Administrazioen Araubide Juridikoari eta Administrazio Prozedura Erkideari buruzko 30/1992 Foru Legearen 38.4 artikuluan aipatu bulegoetako edozeinetan.
5.2. Alegatutako merezimenduak frogatzen dituen dokumentazioa, behar bezala egiaztatua, gehituko zaio eskabideari, baita zuzendaritza proiektuaren zazpi ale ere.
Ondorio horietarako, Giza Baliabideen Zerbitzuak ofizioz erantsiko duen zerbitzu orriaren bidez frogatuko dira Hezkuntza Administrazioan betetako postuak, ikastetxe publikoetan emandako zerbitzuak eta Hezkuntza Administrazioan izandako zuzendaritza karguak.
5.3. Izangaiak zein ikastetxe nahi duen zehaztu beharko du eskaeran; ikastetxe bakar baterako ere egiten ahal da eskaera.
5.4. Ikastetxeko bereko irakasleen hautagai zerrendek lehentasuna dute gainerakoen aldean. Ikastetxeko bereko hautagairik ez bada, edo horrelakorik hautatu ez bada, destinoa beste ikastetxeetan dituzten irakasleen hautagaitzak hartuko dira kontuan.
5.5. Eskaerak 15 egun naturaleko epean aurkeztuko dira eta ez aurrerago, ebazpen hau Nafarroako ALDIZKARI OFIZIALean argitaratu eta biharamunetik hasita.
5.6. Ebazpen honen bidez deitutako hautapen prozeduretan parte hartzen dutenek hautapen prozesua bukatu eta hilabete geroago berreskuratzen ahalko dute dokumentazioa, Hezkuntza Departamentuko Argibide eta Agiri Bulegoan.
Seigarrena.-Onartuen behin-behineko zerrenda, erreklamazioak eta behin betiko zerrenda.
6.1. Eskaerak aurkezteko epea bukaturik, eta izangaiek deialdian eskatutako baldintzak betetzen dituztela egiaztaturik, Lanbide Heziketaren Zerbitzuak onartu eta baztertuen behin-behineko zerrenda onetsiko du eta, bazterturik bada, arrazoiak adierazita, Lanbide Heziketaren eta Unibertsitateen zuzendari nagusiari igorriko dio, hark onets dezan eta Argibide eta Agiri Bulegoan eta Hezkuntza Departamentuaren web orrian argitara dezan.
6.2. Argitaratu eta biharamunetik aitzina, hiru eguneko epean, baztertuek erreklamazioak idatzita aurkezten ahal dituzte eta, haiek baztertzera eraman duten akatsak badaude, zuzendu. Erreklamazio horiek Lanbide Heziketaren eta Unibertsitateen zuzendari nagusiari zuzenduko zaizkio.
6.3. Erreklamazioak egiteko epea, aurreko atalean aipatua, bukatu eta biharamunetik laugarren egun baliodunean proposatuko da onartu eta baztertuen behin betiko zerrenda, ebazpen bidez onetsiko dena. Ikastetxera igorriko da eta Argibide eta Agiri Bulegoan zein Hezkuntza Departamentuaren web orrian argitaratuko.
Zazpigarrena.-Hautapen Batzordea.
Sekzioko batzorde bat eratuko da ikastetxe bakoitzeko, konposizio honen arabera:
A) Hezkuntza Departamentuaren ordezkariak
a) Lanbide Heziketaren eta Unibertsitateen zuzendari nagusia, edo hark izendatzen duena.
b) Funtzionario bat, Lanbide Heziketaren Zerbitzuari atxikia, behin betiko destinorik ez duena deialdi honen xedeko ikastetxean. Funtzionario hori idazkari lanetan ariko da.
c) Hezkuntza Departamentuko ikuskatzaile bat, Zerbitzuak Ikuskatzeko eta Ikuskapen Teknikorako Zerbitzuak izendatua.
B) Ikastetxeko ordezkariak.
Jardunean dauden ikastetxeko hiru irakasle funtzionario. Funtzionario horiek ezin dira hautagai izan eta ez dute parte hartuko oraingo edo proposatutako zuzendaritza taldeetan. Klaustroak izendatuko ditu horretarako deitutako bilkura berezian. Salbuespen gisa, ez badago ikastetxean behar adina funtzionario baldintza horiek betetzen dituztenak, jendaurreko zozketa eginen da, behar diren irakasle funtzionarioak hautatzeko. Zozketa horretan sartzeko, zerbitzua eman beharko da Hezkuntza Departamentuaren mendeko Lanbide Heziketako ikastetxeetako batean eta irakasteko gaitasuna izan espezialitate batean, ikastetxean ematen diren heziketa zikloetako batean.
Zortzigarrena.-Hautapen prozesua.
Hautapen prozesuak bi fase izanen ditu:
a) Lehen fasea: merezimenduen balorazioa, deialdi honen bederatzigarren oinarrian ezarritakoaren arabera, eta zuzendaritza proiektua aurkeztu, defendatu eta kalifikatzea, deialdiaren hamargarren oinarrian ezarritakoaren arabera.
b) Bigarren fasea: hasierako prestakuntaren programa, deialdiaren hamaikagarren oinarrian ezarritakoaren arabera.
Bederatzigarrena.-Merezimenduen balorazioa.
9.1. Batzordeak eginen du merezimenduen balorazioa, deialdiaren IV. eranskineko baremoaren arabera.
9.2. Ikastetxeko kargu hutsa betetzeko izangai bakarra aurkeztuz gero, ez da merezimenduen balorazioa eginen.
Hamargarrena.-Zuzendaritza Proiektuaren aurkezpena eta kalifikazioa.
10.1. Izangaiek zein ikastetxetako zuzendaritza eskuratu nahi duten, haren Gizarte Kontseiluari azalduko dizkiote zuzendaritza proiektuaren funtsezko alderdiak. Horretarako, organo horren bilera berezirako deia eginen da izangaiek proiektuak aurkeztea beste gairik ez dagoela eguneko zerrendan. Bilera horretan ikastetxeko ikuskatzailea egonen da, organoko kideen iritziak txosten batean jaso beharko baititu eta hurrengo bi egunean Hautapen Batzordeko buruari igorri.
10.2. Hautapen batzordeak adierazitako egunean eta orduan defendatuko dituzte proiektuak izangaiek haren aurrean.
Izangaiak 30 minutu izanen ditu, gehienez ere, zuzendaritza proiektua Hautapen Batzordearen aurrean defendatzeko. Horren kideek 15 minutu izanen dituzte, gehienez ere, izangaiari galderak egiteko, hark aurkeztu eta defendatzen duen zuzendaritza proiektuko zenbait alderdi argitu, zehaztu edo nabarmentzeko.
10.3. Hautapen Batzordeko kideek ematen dituzten puntuazioen batez besteko aritmetikoa izanen da izangai bakoitzak zuzendaritza proiektuaren kontura eskuratuko duen puntuazioa. Batzordeko kideen puntuazioetan 3 puntuko aldea edo handiagoa baldin badago, kalifikazio handiena eta txikiena kenduko dira, eta gainerakoen batez besteko aritmetikoaren bidez lortuko da behin betiko puntuazioa. Batez besteko aritmetikoa bost puntutik beherakoa bada, gaitasunik ez dagoela ulertuko da.
Hautapen prozesuko lehen bi parteetako puntuazioen guztirakoan berdinduz gero, irizpide hauek hartuko dira kontuan, hurrenez hurren, erabakitzeko:
-Zuzendaritza proiektuan zeinek dituen puntu gehien.
-Azpiataletan zeinek dituen puntu gehien, ebazpen honen IV. eranskineko baremoaren I. ataleko ordenari jarraikiz.
Hamaikagarrena.-Hasierako prestakuntzaren programa.
11.1. Hezkuntza Departamentuak, dagokion deialdiaren bidez, Hasierako Prestakuntza Programa antolatuko du, zortzigarren oinarrian azaldutako hautapen prozesuaren lehen fasean aukeratutako funtzionarioentzat.
11.2. Zuzendari, zuzendariorde edo idazkari karguetan gutxienez bi urteko esperientzia frogatzen duten izangaiek ez dute hasierako prestakuntzaren programa egin beharko.
11.3. Dena dela, ikastetxe publikoen zuzendari lanetan aritzeko onartuta egonik, karguan aritu ez direnek edo bi urte baino gutxiago aritutakoek ez dute hasierako prestakuntza programa, hau da, fase teorikoa, egin beharko.
Hamabigarrena.-Izendapena.
12.1. Hezkuntza Departamentuko Lanbide Heziketaren eta Unibertsitateen zuzendari nagusiak, Hautapen Batzordeak aukeratutako izangaia kontuan hartuta, hasierako prestakuntzaren prozesua gainditu badu, hura izendatu eginen du.
12.2. Hezkuntza Departamentuak, Lanbide Heziketaren eta Unibertsitateen zuzendari nagusiaren ebazpen bidez emanen du argitara Nafarroako ALDIZKARI OFIZIALean 12.1 atalean aipatu izenen zerrenda.
12.3. Zuzendari berriak ez badu behin betiko destinorik berak aukeratutako ikastetxean, zerbitzu eginkizunetan egonen da, ondorio guztietarako, zuzendari karguan dagoen denboran, eta ezin izanen da lekuz aldatu irakastorduak murriztu edo kentzeagatik.
12.4. Hautapen Batzordeak ez badu izangairik izendatu edo ikastetxeko zuzendari izateko hautagairik ez bada, Lanbide Heziketaren eta Unibertsitateen zuzendari nagusiak, Zerbitzuak Ikuskatzeko eta Ikuskapen Teknikorako Zerbitzuak hiruko bat proposatuta, irakasle funtzionario bat zuzendari izendatuko du, baldin eta Hezkuntza Departamentuaren mendeko ikastetxeetako batean destinoa badu eta, zuzendari kargua hutsik izanik, ikastetxean ematen diren heziketa zikloetako espezialitateren batean irakasteko gaitasuna badu.
Hamahirugarrena.-Kargua uztea
13.1. Zuzendaria kasu hauetakoren batean kenduko da kargutik:
a) Izendapen aldia edo haren luzapena, halakorik bada, bukatzean.
b) Ikastetxean zerbitzuak emateari uztean, borondatezko zein nahitaezko lekualdatzeagatik, zerbitzu eginkizunetan hasteagatik, borondatezko edo nahaitaezko eszedentzia hartzeagatik nahiz beste edozein arrazoirengatik.
c) Uko egite arrazoitua, Lanbide Heziketaren eta Unibertsitateen zuzendari nagusiak onartua.
d) Ezintasun psikikoa edo fisikoa, karguari dagozkion zeregin nagusiak betetzea galarazten diona.
e) Lanbide Heziketaren eta Unibertsitateen zuzendari nagusiak ebazpen bidez baliogabetuta, Zerbitzuak Ikuskatzeko eta Ikuskapen Teknikorako Zerbitzuak txostena egin ondotik, zuzendari karguari dagozkion zereginak modu larrian ez betetzeagatik. Haren ekimenaz bultzatu liteke baliogabetze hori, edo Gizarte Kontseiluak proposatuta. Dena dela, espedientea instruitu ondoren emanen da kargua baliogabetzen duen ebazpena, aldez aurretik interesdunari eta Gizarte Kontseiluari entzunaldia emanda.
2. Ebazpen hau Nafarroako ALDIZKARI OFIZIALean argitara dadila agintzea.
3. Ebazpen hau Lanbide Heziketaren Zerbitzura, Zerbitzuak Ikuskatzeko eta Ikuskapen Teknikorako Zerbitzura, Giza Baliabideetara eta Langileria Atalera igortzea, behar diren ondorioak izan ditzan.
4. Deialdi honen, bere oinarrien eta aplikatzeko egintzen kontra gora jotzeko errekurtsoa jartzen ahal da, Hezkuntza kontseilariari zuzendua, Nafarroako ALDIZKARI OFIZIALean argitaratu eta biharamunetik hilabeteko epean.
Iruñean, 2008ko apirilaren 14an.-Lanbide Heziketaren eta Uniber- tsitateen zuzendari nagusia, Pedro González Felipe.
Iragarkiaren kodea: F0806506
