51. ALDIZKARIA - 2008ko apirilaren 23a

II. NAFARROAKO TOKI ADMINISTRAZIOA

2.2. AGINTARIAK ETA LANGILEAK

2.2.2. Plantilla Organikoa, Lan Publikoaren Eskaintza, oposizioak eta lehiaketak

ANTSOAIN

Deialdia, Antsoaingo Udaltzaingoko kabo izateko 3 lanpostu mailaz igotzeko lehiaketa bidez betetzeko

OINARRIAK

1. Deialdiaren xedea.

1.1. Nafarroako Polizia Kidegoetako kideen eta udaltzainen artean Antsoaingo Udaltzaingoko kabo izateko hiru lanpostu betetzea du xede deialdi honek, mailaz igotzeko lehiaketaren sistema baliatuz. Lanpostuak honela banatuta daude:

-2 lanpostu barne igoerako txandan, Antsoaingo Udaltzaingoko kideentzat (aurrerantzean, barne igoerako txanda).

-Lanpostu bat igoera txanda irekian, Nafarroako gainerako Polizia Kidegoetako kideentzat eta udaltzainentzat (aurrerantzean igoera txanda irekia).

1.2. Hautaprobak gainditzeko eskatzen den gutxieneko puntuaziora ez iristeagatik, bete gabe gelditzen bada igoera txanda irekiko lanpostu hutsen bat, barne igoerako txandakoei gehituko zaie.

Hautaprobak gainditzeko eskatzen den gutxieneko puntuaziora ez iristeagatik, bete gabe gelditzen bada barne igoerako txandako lanpostu hutsen bat, bete gabe deklaratuko da.

Orobat, barne igoerako txandan hutsik dauden lanpostuak baino izangai gehiagok gainditzen badute, txanda horretan lanpostua eskuratzen ez dutenek aukera izanen dute igoera txanda irekiko lanpostu hutsak eskuratzeko, txanda horretako izangaiekin lehia garbian, lortzen duten azken puntuazioaren arabera.

1.3. Izendapenarekin batera pertsona izendatu horiek nomina eta plantillako funtzionario bihurtuko dira, funtzionarioen arloan indarrean dauden xedapenetan ezarri diren eskubide eta betebehar guztiekin.

1.4. Lanpostuek C mailako lansariak izanen dituzte, eta aplikatu beharreko xedapenen araberako osagarriak.

1.5. Izangaiak, hautaprobak gainditu eta deialdi honetako lanpostuetan aritzeko izendatu ondoren, Antsoaingo Udaltzaingoan sartu eta funtzionario eginez gero, Gizarte Segurantzaren Araubide Orokorrean afiliatu eta kidetuko dira, araubide horretan aurreikusitako babesean.

Deialdi honetako lanpostuetarako izendatu eta lehendik eskubide pasiboen eta osasun eta gizarte laguntzaren araubidean, hots, Nafarroako Administrazio Publikoen zerbitzuko Langileen Estatutuan eta gainerako xedapen osagarrietan aipatzen den hartan, afiliatuta dauden funtzionarioek bertan segitzea aukera dezakete edo Gizarte Segurantzan afiliatzea.

1.6. Izendatuek zein tokitan duten lana, bertan bizi beharko dute, eta horretarako, Antsoaingo udal mugapean finkatuko dute bizilekua.

2. Izangaien betebeharrak.

2.1. Lehiaketa honetan onartuak izateko, izangaiek baldintza hauek bete beharko dituzte:

a) Barne igoerako txandan:

1.-Gutxienez 3 urteko antzinatasuna izatea Antsoaingo udaltzain gisa.

2.-Abiapuntuko lanpostuan borondatezko edo nahitaezko eszedentzian ez egotea.

3.-Eginkizun publikoetan aritzeko desgaitu edo gabetua ez egotea eta Administrazio Publikoren baten zerbitzutik bereizia ez izatea.

4.-Eginkizunak betetzeko behar diren gaitasun fisiko eta psikikoak izatea.

b) Igoera txanda irekian:

Gutxienez 3 urteko antzinatasuna izatea udaltzain lanpostuan.

2.-Abiapuntuko lanpostuan borondatezko edo nahitaezko eszedentzian ez egotea.

3.-Eginkizun publikoetan aritzeko desgaitu edo gabetua ez egotea eta Administrazio Publikoren baten zerbitzutik bereizia ez izatea.

4.-Eginkizunak betetzeko behar diren gaitasun fisiko eta psikikoak izatea.

Eskabideak aurkezteko epea bukatzen denean bete beharko dira baldintza horiek.

3. Eskabideak. Deialdian parte hartzeko eskabideak aurkeztu beharko dira Antsoaingo Udalaren Erregistro Orokorrean (Udaletxeko plaza, 1; Antsoain) edo Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legearen 38.4 artikuluan ezarritako bideetako bat erabiliz. Horretarako, 20 egun naturaleko epea izanen da, deialdi hau Nafarroako ALDIZKARI OFIZIALean argitaratu eta biharamunetik hasita. Eskabide horiek deialdian argitaratu ereduari lotu beharko zaizkio. Antsoaingo Udalaren Herritarrendako Laguntza Zerbitzuan, www.ansoain.es web orrian, Antsoaingo Udaltzaingoaren bulegoetan eta 012-Infolocal telefonoan eskura daitezke.

Haietan, eskabideak aurkezteko epearen azken egunean baldintza guztiak betetzen dituztela adieraziko dute izangaiek.

3.2. Eskabideari agiri hauek erantsi beharko zaizkio:

a) Nortasun agiri nazionalararen aurreko eta atzeko aldeen fotokopia egiaztatua.

b) Egiaztagiria, udaltzain izendatu izana, lanpostuko antzinatasuna eta bertan duen egoera administratiboa ziurtatzen dituena.

c) Alegatutako merezimendu guztien egiaztagiriak, deialdiaren 2. eranskinean ezarritako baremoaren arabera.

3.3. Eskabideak aurkezteko epea luzaezina da.

4. Onartu eta baztertuen behin-behineko eta behin betiko zerrendak.

4.1. Eskabideak aurkezteko epea bukatutakoan, Antsoaingo alkate udalburuak ebazpena emanen du onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitaratzeko aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta egindako akatsak zuzentzeko.

4.3. Erreklamazioen epea bukatuta, eta haiek ebatzita, Antsoaingo Udaleko alkate udalburuak onartu eta baztertuen behin betiko zerrenda onesten duen ebazpena emanen du eta Udalaren web orrian, www.ansoain.es, eta 012-Infolocal telefono bidez argitara dadin aginduko. Orobat, aditzera emanen da zein egunetan egin beharko duten izangaiek proba bakoitza, tokia eta ordua adierazita.

5. Epaimahaia.

5.1. Kide hauek osatuko dute epaimahaia:

Mahaiburua: Antsoaingo Udaleko alkate udalburua.

Ordezkoa: M. José Elizondo Urtasun andrea, Antsoaingo Udaleko bigarren alkateordea.

Mahaikidea: Jesús Esteban Lainez jauna, Antsoaingo Udaleko lehen alkateordea.

Ordezkoa: Carmelo Jiménez Hernández jauna, Antsoaingo Udaleko zinegotzia.

Mahaikidea: Iruñeko Udaltzaingoko inspektore bat.

Ordezkoa: Iruñeko Udaltzaingoko kabo bat.

Mahaikidea: Enrique Vellostas Suescun jauna, Burlatako Udaltzaingoko burua.

Ordezkoa: Enrique Ayerra Ayerdi jauna, Burlatako Udaltzaingoko kaboa.

Mahaikidea: Pedro Herrera Triguero jauna, Antsoaingo Udaleko funtzionarioen sindikatuen ordezkaria.

Ordezkoa: Antonio Chaves Muñoz jauna, Antsoaingo Udaleko funtzionarioen delegatu sindikalen ordezkaria.

Mahaikide idazkaria: Begoña Olascoaga Echarri andrea, Antsoaingo Udaleko idazkaria (hizpidea duela baina botorik ez).

Ordezkoa: Lucía Sarasa Amatriain andrea, Berriobeitiko Udaleko idazkaria (hizpidea duela baina botorik ez).

Hautaprobak egiten hasi aurretik eratuko da epaimahaia.

5.2. Epaimahaia ezin izanen da eratu, ezta aritu ere, kideen erabateko gehiengoa bildu gabe, eta kideen gehiengoa beharko da erabakiak hartzeko.

5.3. Epaimahaiko kideek parte hartzeari uko egin beharko diote eta deialdia egin duen organoari hala jakinarazi, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Foru Legean aurreikusita dauden egoerak gertatzen direnean.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek dagozkien espezialitate teknikoetan aritzera mugatuko dira, eta haietan baizik ez diote lagunduko epaimahaiari.

6. Lehiaketaldia.

6.1. Merezimenduen lehiaketa: gehienez ere 30 puntu.

Merezimenduetan, honako elementu hauek baloratuko dira, Nafarroako Polizia Kidegoetako Langileen Erregelamendua onesten duen abenduaren 29ko 718/2003 Foru Dekretuaren 2. eranskinarekin bat:

a) Administrazio publikoetan egindako zerbitzuak: gehienez ere 15 puntu.

b) Prestakuntza, irakaskuntza, ikerketa eta beste merezimendu batzuk: gehienez ere 8 puntu.

c) Hizkuntzak jakitea: euskara, frantsesa, ingelesa eta alemana; gehienez ere, 5 puntu.

d) Sariak: gehienez ere 2 puntu.

Aurreko a) eta b) ataletan alegatu eta egiaztaturiko merezimenduak epaimahaiak kalifikatu eta puntuatuko ditu, deialdi honetako 2. eranskineko baremoaren arabera. Lehiaketan parte hartu nahian eskabidea aurkezten den unean alegatu beharko dira merezimenduak, baita agiri bidez frogatu ere. Epaimahaiak ez du inolaz ere kontuan hartuko agiri bidez egiaztatu ez den merezimendurik, eta ez du emanen merezimenduen atal bakoitzarentzat adierazitako puntuazioa baino handiagorik.

Epaimahaiak argibideak eta datu osagarriak eskatzen ahal ditu, bai lanpostuko errendimendua baloratzeko, bai lehiatzaileek alegatu merezimenduei buruz.

7. Proba praktiko eta psikoteknikoen aldia:

Proba praktikoaren aldian honako hauek sartuko dira:

a) Proba praktikoak: gehienez ere, 40 puntu.

b) Proba psikoteknikoak: gehienez, 30 puntu.

Proba guztiak deialdi bakarrean eginen dira. Bazterturik geldituko dira haietako edozeinetara agertzen ez diren izangaiak.

7.1. Proba praktikoek 40 puntu izanen dituzte gehienez, eta haietan ariketa bat edo gehiago egin beharko dira kabo lanaren edukiaz eta egitekoez. Proba guztiek gehieneko puntuazio bera izanen dute. Baztergarriak izanen dira, eta kanpoan geldituko dira proba bakoitzean puntuen erdiak baino gehiago ateratzen ez dituztenak.

7.2. Proba psikoteknikoak: gehienez, 30 puntu.

Proba psikoteknikoak hasi aurretik, Psikologia Aplikatuaren Zerbitzuak, Udaltzaingoko Burutzari kontsulta egin ondoren, lanpostuaren profilaren gaineko proposamena igorriko dio alkate udalburuari. Antsoaingo Udaleko alkate udalburuak profil hori onetsiko du, eta epaimahaiari jakinaraziko dio.

Nafarroako Administrazio Publikoaren Institutuko Psikologia Aplikatuaren Zerbitzuak, probak egin ondoren, txosten psikotekniko bat emanen du lehiatzaile bakoitzari buruz. Hartan, norbera deialdiaren xedeko lanpostuaren izaera eta ezaugarriei nola egokitzen zaien baloratuko da. Zerbitzu horrek txosten psikoteknikoan izangai bakoitzari ematen dion puntuazioa loteslea izanen da epaimahaiarentzat.

Baztertu eginen dira 10 puntu lortzen ez dituzten izangaiak.

Proba guztiak deialdi bakarrean eginen dira. Bazterturik geldituko dira haietako edozeinetara agertzen ez diren izangaiak.

8. Igoerarako prestakuntza ikastaroa gainditzea:

Proba psikoteknikoak egindakoan, epaimahaiak jendaurrean jarriko du, Antsoaingo Udalaren iragarki oholean eta azken probaren tokian, probak gainditu dituzten izangaien behin-behineko zerrenda, lortutako puntuazioaren hurrenkeran eta zein bere txandan, baita gaikuntza ikastaroan onartutako izangaien zerrenda ere (3 ikasle gehienez).

Nafarroako Segurtasun Eskolak emanen du gaikuntza ikastaroa, eta baztergarria izanen da.

Epaimahaiak gaikuntza ikastaroa egiteko onartutakoen behin-behineko zerrendarekin batera adieraziko du ikastaroa zein toki, egun eta ordutan hasiko den.

Gaikuntza ikastaroa egin bitartean izangaiak zerbitzu berezien egoeran deklaratuko dituzte haien jatorrizko administrazioek, Nafarroako Administrazio Publikoen zerbitzuko Langileen Estatutuaren 24.2 artikuluan ezarritakoaren arabera.

Ikastaroa bukatutakoan, langilea jarduneko egoerara itzuliko da berehala, zerbitzu berezien egoeran deklaratu zenean zuen lanpostura.

Zerbitzu berezien egoeran deklaratzeak ez du aldaketarik sortuko izangaiaren gizarte aurreikuspeneko sisteman, jatorrizko lanpostuan zuenarekin segituko baitu.

Zerbitzu berezien egoeran deklaratu eta gaikuntza ikastaroa egiteko onartzen diren izangaiek honako lansari hauek jasoko dituzte Antsoaingo Udaletik: C mailako hasierako soldatari dagozkionak eta deialdiko lanpostuen berariazko osagarriak, baita jatorrizko lanpostuan onarturik dituzten gradua, antzinatasuna eta familia laguntza ere.

Izangaiak gaikuntza ikastaroa uzten badu, egun horretara arte izanen du eskubidea aurreko atalean aipatu lansariak jasotzeko.

Zerbitzu berezien egoera bukatzen denean, aurreko atalean aipatutako lansarien sistema izateari utziko zaio, eta ez du eskubiderik ekarriko, ez eskubide pasiborik sortuko, ezta deialdiko lanpostuaren ondoriozko inolako eskubiderik ere.

Izangaiak Nafarroako Administrazio Publikoaren Institutuko Segurtasun Eskolari atxikiko zaizkio.

Izangaiek hamabost egun naturaleko epea dute, gaikuntza ikastaroan onartu eta baztertu direnen behin-behineko zerrenda argitaratzen denetik hasita, ikastaroak dirauen bitartean zerbitzu berezien egoeran daudela frogatzeko.

9. Probak gainditzen dituztenen zerrenda eta izendapen proposamena.

9.1. Gaikuntza ikastaroa bukatutakoan, Nafarroako Administrazio Publikoaren Institutuko Segurtasun Eskolak ikastaroko puntuazioak igorriko dizkio epaimahaiari, baita arlo bakoitzerako eta haren azken kalifikaziorako proposamena ere.

Epaimahaiak izangaien kalifikazioa onetsi eta mailaz igotzeko lehiaketa gainditzen duten izangaien zerrenda, azken puntuazioaren araberakoa, Antsoaingo Udaleko Alkate udalburuari igorriko dio.

10. Izendapena eta lanpostuaz jabetzea.

10.1. Antsoaingo Udaleko alkate udalburuak Antsoaingo Udaltzaingoko kabo izendatuko ditu lehiaketa gainditzen duten izangaiak. Izendapenak Nafarroako ALDIZKARI OFIZIALean argitaratuko dira.

10.2. Izangai izendatuek hamar egun naturaleko epea izanen dute lanpostuaren jabetza hartzeko, izendapena jakinarazten denetik hasita. Aipatu epean, eta ezinbesteko kasuetan izan ezik, jabetza hartzen ez badute, igoerarako eskubidea galduko dute.

11. Errekurtsoak.

Deialdi honen, bere oinarrien eta aplikazio egintzen aurka, errekurtso hauetako bat aurkeztea aukeratzen ahal da:

a) Berraztertzeko errekurtsoa, egintza burutu duen organo berari zuzendua, hilabeteko epean, hura jakinarazi edo argitaratu eta biharamunetik aitzina.

b) Administrazioarekiko auzi-errekurtsoa, Nafarroako Justizia Auzitegi Nagusiko administrazioarekiko auzien Salari zuzendua, bi hilabeteko epean, errekurritutako egintza edo erabakia argitaratu edo jakinarazi eta biharamunetik aitzina.

c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik aitzina.

1. ERANSKINA

Eskabide eredua

Izena: ..................., adinez nagusia, N.A.N: .........., jaioteguna: ............, jaioterria: ............., probintzia: ............., egungo helbidearen herria: ............, probintzia: ................, kalea: ............., zenbakia.: ......, solairua: ........., letra: ......., posta kodea: ........, etxeko telefonoa: ............, laneko telefonoa: ..............., sakelako telefonoa: ...........

Zure aitzinera agertu eta adierazten dut:

Antsoaingo Udaltzaingoko kabo izateko 3 lanpostu mailaz igotzeko lehiaketa bidez betetzeko deialdian parte hartzeko onar nazatela eskatzen dudala, honako txanda honetan (deialdia ...... zenbakiko Nafarroako ALDIZKARI OFIZIALean argitaratu zen, .........(e)an), Antsoaingo Udalaren zerbitzuan aritzeko.

f Barne igoerako txanda, Antsoaingo Udaltzaingoko kideentzat.

f Igoera txanda irekia, Nafarroako gainerako polizia kidegoetako kideentzat.

Eskabideak aurkezteko epea bukatzen den egunean, behar diren baldintza guztiak betetzen ditudala.

Datuen babesa. Datu Pertsonalak Babesteari buruzko 1999ko abenduaren 13ko Lege Organikoan ezarritakoa bete dadin, aditzera ematen zaizu inprimaki honetan ematen diren datu pertsonalak hautapen prozeduran Udalak dituen eskumenak erabiltzeko baizik ez direla erabiliko eta Antsoaingo Udalaren datu basea osatzen duten fitxategiei batuko zaizkiela. Fitxategietan sartu, datuak zuzendu eta ezabatzeko eta haien aurka jotzeko eskubideak Antsoaingo Udalari zuzendurik erabiltzen ahalko dituzu, Erregistro Orokorrera joz (Udaletxeko plaza, 1; 31013-Antsoain).

Antsoainen, 2008ko ................aren ..............(e)an.

(Sinadura)

ANTSOAINGO UDALEKO ALKATE UDALBURUA.

2. ERANSKINA

Merezimenduak baloratzeko baremoa

A.-Administrazio publikoetan egindako zerbitzuak: gehienez ere, 15 puntu.

1) Nafarroako Polizia Kidego batean egindako zerbitzu urte bakoitza: puntu bat, agente lanpostuan.

2) Zerbitzu urte oso bakoitza, bere mailako lanpostuan baino handiagoko batean, Nafarroako Polizia Kidego batean: 1,5 puntu.

3) Administrazio publiko baten bestelako segurtasun indar eta kidegoetan, lanpostu finkoan, egindako zerbitzuak: puntu bat, urtean.

4) Edozein administrazio publikotan, lanpostu finkoan, polizia kidego batekoak ez diren lanpostuetan egindako zerbitzuak: puntu bat, urtean.

Oharrak:

1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaio.

2. Lanaldi partzialean egindako zerbitzuen kasuan, behar den zatia kenduko da.

3. Deialdia argitaratu ondoan egindako zerbitzuak ez dira baloratuko.

B.-Prestakuntza, irakasle eta ikerketa lana eta beste merezimendu batzuk: gehienez ere, 8 puntu.

1) Erakunde edo zentro publikoek eta unibertsitateek antolaturiko prestakuntza-ekintzetan parte hartzea: 0,10 puntu, kreditu akademiko edo horren baliokide bakoitzeko (10 ikastordu), eta gehienez ere 2 puntu.

Oharrak:

1. Baloratu beharreko ikastaroetan, irakastorduen zatikiak hainbanatuko dira.

2. Irakastorduen kopurua agertzen ez duten ziurtagiriei kreditu bateko balorazioa emanen zaie.

3. Ikasturte bateko iraupena agertzen duten ziurtagiriei 12 kredituko balorazioa emanen zaie.

4. Ikastaro bakoitzeko gehienez ere eman daitekeen balorazioa puntu bat da.

5. Erakunde antolatzaileari buruzko betebeharrak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek Administrazio Publikoetako Etengabeko Prestakuntzarako Itunen barruan antolatuak sartuko dira.

2) Biltzar edo jardunaldietan txostenak edo komunikazioak aurkeztea, beka edo saria jaso duten zientzia edo ikerketa lanak egitea eta aldizkari espezializatuetan lanak argitaratzea: 2 puntu, gehienez ere, epaimahaiak baloratu beharrekoa, kontuan hartuz lana edo jarduera bakar batek edo taldean egina den eta biltzarra edo argitalpena zein mailatakoa den, tokikoa, eskualdekoa, naziokoa edo nazioartekoa.

3) Sektore publikoan prestakuntza saioak antolatu edo halakoetan irakasle jardutea: gehienez ere 2 puntu, epaimahaiak haien iraupenaren arabera baloratu beharrekoak.

4) Titulazio eta espezialitate akademikoak, deialdian eskatu ez direnak: gehienez ere, 2 puntu.

5) Doktore edo lizentziatu gradua, deialdian eskatutako titulazioari buruz: gehienez ere, 2 puntu.

6) Beste merezimendu batzuk, epaimahaiak kontuan hartu beharrekoak: besteak beste, hizkuntzak, sektore pribatuan egindako lanak, bekak edo prestakuntza egonaldiak, kontsulta egiteko, aholku emateko, parte hartzeko edo ordezkaritzako organoetan parte hartzea: gehienez ere, 2 puntu.

Oharrak b) atal osorako:

1. Atal honetan aipatutako merezimenduak deialdiko lanpostuarekin ikusteko izanez gero soilik baloratuko dira. Kabo lanpostua eskuratzeko prestakuntza ikastaroak ez dira inondik ere baloratuko.

C.-Hizkuntzak jakitea: euskara, frantsesa, ingelesa eta alemana: gehienez ere, 5 puntu.

1. Hizkuntza Eskola Ofizial batek emandako Gaitasun Agiria edo ofizialki baliokidetzat jotzen den titulua edukitzeagatik aurreko atalean hizkuntza bakoitzerako adierazten den gehieneko puntuazioa eskuratuko da.

Titulurik eduki ezik, Hizkuntza Eskola Ofizialean gainditutako maila bakoitzagatik gehieneko puntuazioaren bosten bat emanen da. Euskararen kasuan, Nafarroako Gobernuak antolatutako ikastaroetan gainditutako urrats bakoitzeko 1/12 emanen da.

Hizkuntza horietatik bakoitzak zer dakien baloratzeko, Nafarroako Administrazio Publikoaren Institutuak espresuki antolatutako azterketak egiten ahal ditu; bost zailtasun maila izanen dira, eta hizkuntza bakoitzari gehienez ere ematen ahal zaion balorazioaren bostena emanen zaio maila bakoitzari.

D.-Sariak: gehienez ere, 2 puntu.

1) Zerbitzu Goraipagarrien plaka: puntu bat.

2) Zerbitzu Goraipagarrien domina: puntu bat.

3) Jendaurreko Esker Ona: 0,50 puntu.

4) Esker On pribatua: 0,25 puntu.

Antsoainen, 2008ko apirilaren 22an.-Alkatea, Antonio Gila Gila.

Iragarkiaren kodea: L0805389