37. ALDIZKARIA - 2008ko martxoaren 21a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

193/2008 EBAZPENA, otsailaren 18koa, Arriskuen Prebentziorako eta Lanaren zuzendari nagusiak emana, Nafarroako "Fruta, barazki, patata eta platanoen biltegizainak" sektorearen lan hitzarmen kolektiboa erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 29/2008).

2008ko otsailaren 8an departamentu honetan sartu da sektore horretarako lan hitzarmen kolektiboaren testua, 39 artikuluz, 3 xedapen gehigarriz eta eranskin batez (lansarien taulak biltzen dituena) osatua, sektoreko enpresaburuen elkartearen (Biltegizainak) eta sindikatu batzuen ordezkariek (UGT eta CC OO) osatutako negoziazio batzordeak 2008ko otsailaren 5ean izenpetu eta onetsia.

Estatuaren lan arloko eginkizunak Nafarroako Foru Komunitateari eskualdatzeko apirilaren 11ko 937/1986 Errege Dekretuan ezarritakoaren arabera, Berrikuntza, Enpresa eta Enplegu Departamentua da Lan Hitzarmen Kolektiboak erregistratu, gorde eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, kontuan harturik Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,

EBATZI DUT:

1. Nafarroako "Fruta, barazki, patata eta platanoen biltegizainak" sektorearen lan hitzarmen kolektiboa erregistratzea (kodea: 3103605) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestatuta dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta haren aurka gora jotzeko errekurtsoa jartzen ahal duela Berrikuntza, Enpresa eta Enplegu Departamentuko kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2008ko otsailaren 18an.-Arriskuen Prebentziorako eta Lanaren zuzendari nagusia, Imelda Lorea Echavarren.

NAFARROAKO "FRUTA, BARAZKI, PATATA ETA PLATANOEN BILTEGIZAINAK" SEKTOREKO ENPRESEN 2007 ETA 2008RAKO HITZARMEN KOLEKTIBO SINDIKALAREN TESTUA

I. KAPITULUA

Aplikazio eremua eta indarraldia

1. artikulua. Aplikazio eremua.

Hitzarmen kolektibo sindikal honetan, indarra hartzen duen egunetik aitzina arautuko dira Nafarroako "Fruta, barazki, patata eta platanoen biltegizainak" sektoreko enpresa guztien eta haietako langileen arteko lan harremanak, zeinei aplikatzen baitzaie Merkataritzako Lan Ordenantza.

2. artikulua. Langileak.

Hitzarmen honetan xedatutakoa enpresetan diharduten langile guztiei aplikatuko zaie, indarra duen legerian aipatutako zuzendaritza karguei izan ezik.

3. artikulua. Iraunaldia.

Hitzarmen kolektibo honetan xedatutakoak Nafarroako ALDIZKARI OFIZIALean argitaratzen den egunean hartuko du indarra.

Hitzarmenak atzerako ondorioak izanen ditu 2007ko urtarrilaren 1etik aitzina. Iraunaldia 2008ko abenduaren 31 artekoa izanen da.

4. artikulua. Amaieraren iragarpena.

Hitzarmenaren indarraldia amaitzean, beste hitzarmenik ezean, lehengoaren arauek segituko dute indarrean. Negoziazio berriaren ondorioetarako, hitzarmen kolektibo honen amaiera espresuki iragarritzat joko da sinatzen den unetik beretik.

II. KAPITULUA

Langileria

5. artikulua. Lanbide kategoria.

Morroia, enpresan sartu eta sei hilabeteren buruan, besterik gabe morroi espezializatuaren kategoriara aldatuko da.

6. artikulua. Behin-behineko langileak

Hitzarmen honen eraginpeko enpresek behin-behineko langileak kontrata ditzakete, baina gehienez ere plantillako langileen %13 izanen dira. Aldi baterako kontratatutakoek langile finkoen eskubide sindikal berberak izanen dituzte.

III. KAPITULUA

Lanaldia eta aparteko orduak

7. artikulua. Lan egutegia.

A) Urteko lanordu kopurua: 2007rako 1.730 orduko benetako lanordu kopurua ezarri da; 2008rako 1.722 ordukoa eta enpresa guztietan txandak jarriko dira, langile guztiek larunbat bat libre izan dezaten lau astetik behin.

Benetako lanaldiaren barnean, langileek 15 minutuko atsedena hartzeko eskubidea dute, ogitarterako, bi aldeek benetako lan denboratzat hartuko dutena.

Langile guztiek, batera nahiz bakarka, ordu finko bat izanen dute lanera sartzeko eta lanetik ateratzeko, bi aldeen bestelako akordiorik ez bada.

Enpresaburuek eta langileek, batzorde paritarioan, 2007 eta 2008ko lan egutegia finkatuko dute, Langileen Estatutuan ezarritakoaren arabera.

B) Lanean hasteko edo jendearentzako irekitzeko ordua hauxe izanen da: 04:30.

C) Herrietako festetan hitzarmen honetan bildu atsedenei erantsitakoak errespetatuko zaizkie lehendik hartzen zituzten langileei.

D) Sektoreko zaindariaren eguna dela eta (Mikel Deuna) norberak aukeratutako egun libre bat izanen dute langileek, edo oporretako egunetara gehitzen ahalko diote.

8. artikulua. Aparteko orduak.

Lan egunetan sartutako aparteko orduak %75 gehiago ordainduko dira ordu arruntaren gainetik. Igande eta jaiegunetan sartzen badira, gehikuntza %150ekoa izanen da.

IV. KAPITULUA

Lansariak

9. artikulua. Soldatak.

Lanbide kategorientzako lansariak hitzarmen honen eranskinean ageri dira.

10. artikulua. Ordainsariak.

2007. urterako indarra duten ordainsariak hitzarmenaren I. eranskinean ezarri dira lanbide kategoria edo talde bakoitzerako.

2007. urterako taula indardunak 2006ko abenduaren 31n indarrean zeudenetan oinarrituko dira, %5.2 gehituz. Nolanahi ere, 2007. urteko egiazko KPIa gehi puntu bat bermatzen da.

2008. urterako 2007. urtean indarrean dauden lansarien taulak ekitaldi horretako KPIaren neurrian igoko dira, gehi 1,25 puntu. 2008. urteko egiazko KPIa gehi 1,25 puntu bermatuz.

VI. KAPITULUA

Lansari igoera aldagarriak

11. artikulua. Antzinatasuna.

Kontzeptu hau 1994ko abenduaren 31tik aitzina ez da aldatuko enpresan lau urte baino gehiago daramatzaten langileentzat, eta aurrerantzean Ad Personam motako berme plusa izanen da. Haren zenbatekoa ez dute irentsiko etorkizunean eginen diren hitzarmeneko igoerek, eta langileak kobratzen duen antzinatasunaren zenbatekoaz gainera 28,16 euro bider 15 hileko gehikuntza jasoko du 2007ko urtarrilaren 1etik hasita. Zenbateko horiei ere gainerako ordainsari kontzeptuentzako hitzartzen diren igoera berak aplikatuko zaizkie.

Kontratu berriko langileentzat, Ad Personam delako osagarri hori 41,89 eurokoa izanen da eta enpresan sartu eta bi urteren buruan hasiko dira kobratzen, muga goiena 83,80 eurokoa izanen da, enpresan lau urte egiten denean. Muga horretara iritsita, berrikusiko litzateke hitzarmeneko hurrengo igoeretan.

2008ko urtarrilaren 1etik aurrera, sektoreko langile guztiek laurteko berri baterako eskubidea izanen dute (oinarrizko soldataren %5), ordurarteko soldatari Ad Personam osagarri gisa gehituko zaiona.

12. artikulua. Gaueko lana.

Gaueko txandarako plus bat ezarriko da, 2,37 euro ordukoa. Gaueko ordutzat hartuko dira 22:00etatik 06:00 ak bitartekoak.

13. artikulua. Nekagarritasuna.

Frigorifikoetan lan egiten dutenek, lanaldiko %25 bertan dihardutela, hitzarmeneko lansariaren %25eko plusa jasoko dute.

14. artikulua. Lanarekiko fideltasun plusa.

Hitzarmen honen eraginpeko langile guztiek, 18 urtetik goitikoak badira, ikastunak edo pintxeak salbu, lanarekiko fideltasun plus gisa 39,25 euro kobratuko dituzte hilean.

15. artikulua. Familiaren erantzukizuneko plusa.

Hitzarmen honen eraginpeko langile orok, baldin eta emazteak edo adingabeko seme-alabek inongo enpresatan lan egiten ez badute, familiaren erantzukizuneko plusa kobratuko du, 26,18 euro hilean.

CAPITULO VI

Oporrak eta pagak

16. artikulua. Oporrak.

Hitzarmen honen eraginpeko langileriak 34 egun naturaleko oporrak izanen ditu edo 32 egun natural gehi langileak hautatutako egun bat gehi Mikel Deunaren ordezko eguna eta enpresak hautatuko beste egun bat, azken kasuotan 48 ordu lehenago elkarri abisatuz.

Oporrak eten eginen dira eritasun larriaren edo istripuaren ondoriozko aldi baterako ezintasunagatik, behar bezala egiaztatuta. Dena den, etendako oporrak urte naturalaren barnean hartu beharko dira, noiz hartu enpresaren eta langilearen artean adostu ondoren.

Enpresa bakoitzean langile guztientzako oporren egutegia eginen da. Egutegia egiten ez bada edo enpresa eta langileak ados jartzen ez badira, enpresak finkatuko du oporraldiaren erdia eta langile bakoitzak bere aldetik erabakitzen ahal du beste erdia noiz hartu. Horrelakoetan, enpresak eta langileek oporrak hartu baino hirurogei egun lehenago abisatu beharko dute. Enpresa bakoitzean ezin izanen dira opor egun beretan egon kategoria bakoitzeko %10 langile baino gehiago.

Langileren batek maiatzetik urrira (biak barne) bere oporretako erdia gutxienez hartzerik izan ez badu, konpentsazio gisa bost egun natural hartu ahal izanen ditu.

17. artikulua. Aparteko eskersariak.

Uztailaren 7koa eta Eguberrietakoa izanen dira. Horien zenbatekoa hitzarmeneko lansariko 30 egunekoa izanen da, gehi antzinatasuna, edo hartu ohi diren handienak. Paga horiek aldi baterako ezintasunean ere kobratuko dira, betiere enpresan urte betez bederen lan egin baldin bada.

18. artikulua. Mozkinen saria.

Taulako lansariko hilabete bat gehi antzinatasuna, halakorik izanez gero, edo hartu ohi diren handienak; Erdia San Jose egunean ordainduko da eta beste erdia San Migel, elikagaien adarreko zaindariaren egunean, irailaren 29a, festa horri atxikiz eta egun hura ordaindua eta ez berreskuratzekoa izanen da. Paga hau behin batean ordaintzen ahal da, enpresaren eta langileen artean ados jarrita.

VII. KAPITULUA

Langileen eskubideak

19. artikulua. Lanerako ezintasuna (L.E.).

Hitzarmen honen eraginpeko langileek, Gizarte Segurantzak eta gainerako xedapen indardunek emandako abantailez gainera, eskubidea izanen dute eritasun edo istripuaren ondoriozko lanerako ezintasunaren kasuan, behar bezala egiaztatuta, dagozkien prestazioak enpresak osatzeko beren ordainsariak osorik kobra ditzaten, hemezortzi hilabeteko mugaraino, langile ezinduaren ordez beste bat jarri bada ere.

Haurdunaldiko arriskuak daudenean ere berdin aplikatuko da luzapen hori.

20. artikulua. Aseguruen poliza.

Hitzarmen honen eraginpeko enpresak behartuak daude aseguruen poliza kolektibo bat ituntzera, kasu hauek aseguratzeko:

-Laneko nahiz lanetik kanpoko istripuaren ondoriozko heriotza edo erabateko ezintasuna: 40.000 euroko kalte-ordaina (6.655.440 pezeta).

21. artikulua. Osasun azterketa.

Sektore honetako langile guztiek nahitaez osasun azterketa eginen dute urtero.

Laneko Higiene eta Segurtasun Zerbitzuak eginen ditu azterketa horiek. Ezinezkoa izanez gero, erakunde pribatuek eginen dute, enpresak ordainduta.

22. artikulua. Laneko jantziak.

Hitzarmen honen eraginpeko enpresek urtero laneko bi jantzi emanen dizkie beren langileei, nahitaez, bata udakoa eta bestea negukoa, bai eta bi eskularru pare ere. Hori egiten ez duten enpresek urtean 150 euro eman beharko dizkiete langileei.

23. artikulua. Enpresaren helbide-aldaketa:

Lantoki zaharretik berrira dagoen tarteagatik 0.25 euro ordainduko dira kilometroko, baldin eta tartea 5 Km. baino gehiagokoa bada eta enpresa beste herri batean baldin badago.

24. artikulua. Ordaindutako lizentziak.

A) Langilearen ezkontza, 20 egun natural.

B) Egun bat, odol bereko edo ezkontza bidezko lehen graduko ahaideen kirurgia nagusi anbulatorioagatik.

B bis) Bi egun odol-ahaidetasuneko 2. mailako ahaideen ebakuntzagatik, ospitaleratu beharra izan gabe etxean atseden hartzea agintzen bada.

C) Medikuarengana joateko behar diren ordu guztiak.

D) Seme-alaben jaiotza, 4 lanegun.

E) Ezkontidearen heriotza: 6 egun natural.

F) Seme-alaben heriotza, 4 egun natural.

G) Gurasoen, aita-amaginarreben, anai-arreben, koinata-koinatuen, aiton-amonen eta biloben heriotza: 2 egun natural.

H) Gurasoen, aita-amaginarreben, anai-arreben, koinata-koinatuen, aiton-amonen eta biloben eritasun larria, ospitaleratu beharra izanik, 2 egun natural.

Arrazoi horregatik langilea bidaia egin beharrean bada, epea 4 egunekoa izanen da. Lizentziaz baliatzen ahal da eria ospitalean dirauen bitartean.

I) Seme-alaben eritasun larriagatik, 2 egun.

Guraso bakarreko familien kasuan, lizentzia hori 4 egunera luzatuko da.

J) Gurasoen, seme-alaben, anai-arreben ezkontza, egun natural bat.

K) Egun bat norberaren arazoetarako.

L) Bizilekuz aldatzea: egun natural bat.

M) Eguneroko lanaldian ordu beteko murrizketa, gutxienez, haurrari esnea emateko. Baimen hori aitak nahiz amak hartzen ahal dute, lanaldiaren hasieran, tartean edo bukaeran.

Langileak seme-alabak edo ahaideak zaintzeko lanaldia murriztea eskatzen duenean, eskubidea du ordutegia eta txanda aukeratzeko. Langilea kaleratzen badute lanaldia murriztua duen garaian, kalte-ordainak kalkulatzeko lanaldi osoko soldata hartuko da kontuan.

Seme-alabaren bat jaiotzen bada behar baino lehenago edo erditu ondoko beste edozein arrazoirengatik ospitalean iraun beharra izanez gero, aitak eta amak duten eskubidea, 10 asteko etenaldia izatekoa, ospitalean alta eman ondotik kontatuko da. Kontaketa horretatik salbuesten dira erditu ondoko lehenbiziko 6 asteak, denbora hori ama bizkortzeko baita. Amak edo aitak eskubidea dute kasu horietan ordu betez lanetik lekutzeko.

N) Publikoa edo pribatua den eginbehar saihestezina betetzeko: behar-beharrezkoa den denbora. Aldi jakin bat lege bidez edo hitzarmenen bidez ezarritako arau batean jasota dagoenean, absentziaren iraupenari eta konpentsazio ekonomikoari dagokienez arau hartan xedatutakoari jarraituko zaio.

Goian aipatu den eginbehar hori betetzeagatik 3 hilabeteko tartean lanorduetako %20 baino gehiagotan ezin izan bada egin beharreko lana bete, enpresak eszedentzia egoerara pasa dezake langilea, Langileen Estatutuaren berrogeita seigarren artikuluaren idatz-zatian arautu bezala.

Langile batek, eginbeharra betetzeagatik edo karguan jardun beharragatik, kalte-ordaina kobratzen badu, diru kopuru horixe deskontatuko zaio enpresak ordaintzen dion soldatatik.

Izatezko Bikoteen Erregistro Ofizialean inskribatutako izatezko bikotekideek eskubidezko bikotekideen lizentzia berberak izanen dituzte.

25. artikulua. Bilera gela.

Langileei gela bat jarriko zaie bilerak, batzarrak eta antzeko ekintzak egiteko. Iragarki ohola ere izanen dute, lanpostuen aldamenean, une oroz erabiltzekoa.

26. artikulua. Eszedentziak.

Indarra duen legeriari jarraituko zaio. Eszedentzia urte betekoa edo laburragoa bada, langileak eskubidea izanen du lanpostura berainik itzultzeko.

27. artikulua. Atxiloketa.

Langilea atxilotzen badute, eskubidea du lanpostua mantentzeko epai egunera arte, bai eta epaiketaren ondorioz ere, presondegian sartu beharrik ez badu. Artikulu hau delitu ez arruntetan aplikatuko da soilik.

28. artikulua. Lan istripuak.

Duen lanpostuagatik ibilgailua gidatu beharra duen langileak ez du bere postua galduko istripuaren edo trafiko arau-haustearen ondorioz, non ez den frogatzen zuhurgabekeriagatik izan dela.

29. artikulua. Garraio kolektiboa.

Enpresa bakoitzak bere langileekin negoziatuko du arazo honi zer irtenbide eman.

30. artikulua. Lan-bizitza eta familiakoa ongi uztartzea.

A) Ahaideak zaintzeko eszedentzia urte batetik hiru urtera bitarte zabaltzea, hura bukatzean besterik gabe lanera itzultzeko eskubidearekin.

B) Seme-alabak zaintzeko eszedentziaren ondotik lanpostu berera itzultzeko eskubidea, haren iraupena edozein dela.

C) 10 urte bitarteko seme-alabak zaintzeko lanaldi murrizketa.

D) Bularra emateko eskubidea, ordenamendu juridikoaren terminoetan araututakoa, metatu eta 15 eguneko baimenagatik aldatzen ahalko da, amatasun baimena eta gero hartu beharko direnak.

VIII. KAPITULUA

Kontratu motak

31. artikulua. Kontratazioa.

A) Probaldia.

Langile sartu berri orok probaldia egin beharko du, eta hura bukatzean aldeetako edozeinek kontratua eten dezake inolako kalte-ordainik izateko eskubiderik gabe. Honatx probaldien iraupenak:

-Hilabete, langile kualifikatu gabeak.

-Bi hilabete, langile kualifikatuak.

-Hiru hilabete, erdi eta goi mailako teknikariak.

Probaldian langilea zein lanpostutan ari den, horrexeri dagozkion eskubideak eta betebeharrak izanen ditu.

B) Prestakuntza kontratua.

20 urte baino gutxiago duten langileentzak egiten ahalko da eta gehienez urtebetez luzatuko da. Ordainsariak ezinen dute izan langileak egiten duen lanbide-kategoriko lansariaren %90 baino txikiagoak.

C) Lanaldi partzialeko kontratua.

Ez da zilegi izanen astean 12 ordutik eta hilean 48 ordutik beheitiko lanaldi partzialeko kontratuak egitea.

Kontratuan nahitaez finkatuko dira zerbitzua emateko lantokia, lanaldia, lan egunak eta ordutegia.

D) Azpikontratak.

Sektoreko enpresetan zerbitzuak ematen dituzten azpikontratak enpresa nagusietan ezarritako lan baldintza berak izanen dituzte.

E) Erretiro partzial aurreratua.

Langileak 60 urte betetzen dituenetik aitzina, erretiro partziala hartzeko eskubidea izanen du. Enpresak errelebo kontratua itunduko du langabezian dagoen langile batekin, lanpostu horretarako lan-indar egokirik baldin badago eta bi aldeak ados jartzen badira betiere. Lanaldiaren banaketa enpresa eta langilea ados jarrita eginen da.

Langile ordezlea plantillako langile finko bihurtuko da beste batek erabateko erretiroa hartzen duenean, salbu eta lanpostu hori amortizatu behar bada.

IX. KAPITULUA

Beste artikulu batzuk

32. artikulua. Konpentsazioa eta irenspena.

Hitzarmen honetan itundutako hobekuntzek urteko konputuan irentsiko dituzte langileek lehendik zeuzkatenak.

33. artikulua. Baldintzarik hoberenak.

Hitzarmen kolektibo honetan biltzen diren baldintza ekonomikoak eta bestelako guztiak, orokorrean hartuta, gutxienekotzat hartuko dira; hori dela eta, hitzarmenekoak baino baldintza hobeak dituzten enpresetan finkatutako itunek, klausulek edo egoerek bere horretan segituko dute horietaz baliatu izan diren langileentzat.

34. artikulua. Jazarpen psikologikoa eta sexuala.

Hutsegite oso larritzat joko dira langileen aldetik hitzen bidezko erasoak zein fisikoak egitea, edozein dela ere enpresan betetzen duen lanpostua, asmo psikologiko sexualaz pertsonen duintasuna eta intimitatea erasotzen denean.

35. artikulua. Kanpo gelditzeko klausula.

Hitzarmen honetan 2007 eta 2008rako ezarritako soldata igoeraren portzentajeak ez dira derrigorrez aplikatu beharrekoak izanen 2004, 2005 eta 2006ko ekitaldietan galerak izan dituzten enpresentzat.

Aurreko lerroaldean aipatu egoeran dauden enpresek hitzarmen honetan finkatutako soldata igoera aplikatzetik aldendu nahi badute, beren erabakiaren berri eman beharko diete langileen legezko ordezkariei eta hitzarmena sinatu duten alderdiei, honen indarraldia eta argitalpena kontuan hartu gabe.

Aurreko lerroaldean aipatzen den erabakiaren berri eman ondoren, enpresak langileen ordezkariei beharrezkoa den informazioa emanen die, hitzarmenetik bereizteko arrazoiak egiaztatze aldera (balantzeak). Batzordearen erabaki guztiak aho batez hartu beharko dira. Batzordearen bileretara batzordekideek izendatzen dituzten teknikariak eta aholkulariak, gehienez ere sei, joan daitezke.

Batzordeak, esku hartzeko eskaera jaso eta ondoko hamar egunetan, aldeei eskatuko dizkie beharrezkoak iruditzen zaizkion agiriak eta informazioa, are zinpeko kontu azterlari baten irizpena ere, ezinbestekoa bada eta enpresako zuzendaritzak horrela aholkatzen badu.

Batzorde paritarioak, aldeei entzun ondoren, aho batez erabakiko du hitzarmeneko igoeren aplikazioaren gainean edo beste bat finkatuko du, %6,5ekoa hain zuzen, eta jarraian aldeei jakinaraziko die, erabaki hori bete dadin.

Batzordean adostasunik izan ezean, hitzarmenetik bereizteko eskaera aurkeztuko zaio Nafarroako Lan delegatuari edo haren ordez diharduen pertsona nahiz erakundeari. Eskaerarekin batera hura arrazoitu duten egintzen egiaztagiriak ere aurkeztuko dira.

Ebazpen honen kontra ez da errekurtsorik jartzen ahal.

Hitzarmen honen eraginpeko enpresek, 2007 eta 2008rako itundutako soldata igoera aplikatzen dutenek bai eta itundutako soldata erregimena ez aplikatzearen klausularen ondorioz aplikatuko ez dutenek ere, konpromisoa hartu dute 2008ko ekitaldi honetan indarra duten taulen gainean soldata igoera negoziatuko dutela 2009. urterako.

36. artikulua. Batzorde paritarioa.

Hitzarmenaren testua aplikatzean sor daitezkeen zalantzak interpretatzearren eta lan administrazioko agintaritzaren eskumena galarazi gabe, batzorde paritario bat izendatu da, hauek osatua: Juan Manuel Subies Andueza jauna, Jesús M. Sola Zabalza jauna eta Jesús M.ª Barricart jauna, enpresaren aldetik, eta Alicia Sanz Pascal andrea, UGT sindikatuaren ordez eta Juan Antonio Vidal Canaval.

Batzorde paritario honek ahalmena izanen du, halaber, 30. artikuluan (ez aplikatzearen klausula) ezarritakorako.

Arazo espezifikoren bat duten enpresetan, arazoa enpresaren eta bertako langileen artekoa baizik ez denean, enpresa barruan konpontzeko ahaleginak eginen dira, batzorde paritariora jo gabe.

37. artikulua. Aldi baterako lan enpresak.

Hitzarmen honen eraginpeko enpresek aldi baterako laneko enpresen zerbitzuak kontratatu ahalko dituzte aldi baterako ezintasun egoeran eta lizentzia ordainduarekin dauden langileak ordezteko soilik. Aldi baterako laneko langileek hitzarmen honetan kasuko lanposturako ezarritako soldata osoa kobratuko dute.

38. artikulua. Ingurumena.

Gure inguruan gero eta handiagoa da ingurumenaren egoerarekin eta garapen iraunkorrarekin dugun kezka. Hori dela eta, hitzarmen hau sinatzen duten bi alderdiek ingurumen arloko jarduketak hobetzeko konpromisoa hartzen dute, alderdi hauetan batez ere:

A) Ingurumen arloko arazoei buruzko sentsibilizazio kanpainak sustatzea.

B) Langileen ingurumen arloko prestakuntza eta informazioa hobetzea, indarrean dagoen ingurumenari buruzko legeria kontuan hartuta, eta Kutsaduraren Prebentzio eta Kontrol Integratuari buruzko uztailaren 1eko 16/2002 Legean ezarritako hobekuntzak bultzatzea.

39. artikulua. Atxikitze klausula.

Nafarroako Lan Gatazkak Konpontzeko Auzitegiari atxikitzeko klausula.

Alderdiek erabaki dute hitzarmen hau interpretatzean sortzen diren desadostasun eta gatazka guztiak, bai taldekoak bai banakakoak, Nafarroako Lan Gatazkak Konpontzeko Auzitegiaren esku jartzea, bitartekotza eta adiskidetze faseetan, eta alderdiak beren borondatez aipatu auzitegiaren arbitraje prozeduraren esanetara jartzeko ahaleginak eginen direlako konpromisoa agertzea.

Klausula gehigarriak

Lehena.-Mercairuñak bizi duen egoera dela eta, erabaki da urteko larunbat guztietan lan egitea, goizeko 10ak arte, gehienez ere 5 ordu lan eginez.

Bigarrena.-Mercairuñako kontseilua.

Langileen eta enpresaren ordezkariek hitza eman dute Mercairuñako Kontseiluari bilera bat eskatzeko eta bilera egiteko, ondorengoa adieraztearren:

1. Mercairuñako langile eta erabiltzaileek lantokira sartzeko ordainketa, ibilgailu hornitzaileak salbu, Mercairuñak aplikatzen dituen tasen bidez irentsiko da.

2. Mercairuñako Barne Araubideko Erregelamenduaren lehen xedapena aplikatzea, 88. artikulua, "handizkariek, txikizkariek eta besteren konturako langileek ordezkatutako Kontsulta Batzordearen eraketa".

Hirugarrena.-Mercairuñako jarduera arautzeko mahaia bildu da. Bertan, enpresen antolakuntzarako alderdi formalenak jorratuko dira.

Horrela bada, honako hauek aztertuko dira: larunbatetan ixtea, bestelako ordutegiak ezartzea eta abar.

I. ERANSKINA

2007ko lansarien taulak (egiazko KPIa + %1) %5,2

KATEGORIAKOINARRIZKO ORDUKO AP. ORDUA

HILABETEAN ESTRA JAIEGUNETAN

Ingeniari eta lizentziadunak 1.554,78 23,59 33,70

Perituak 1.327,62 20,14 28,78

Langileriaren burua 1.327,62 20,14 28,78

Erosketen eta salmenten burua 1.327,62 20,14 28,78

Landaketen ikuskatzailea 1.157,36 17,55 25,08

Biltegiko arduraduna 1.157,36 17,55 25,08

Hiri-artekaria 1.043,79 15,84 22,63

Administrazioko burua 1.260,48 19,13 27,32

Kontularia eta kutxazaina 1.214,07 18,43 26,33

Administrari-ofiziala 1.100,55 16,70 23,85

Administrari laguntzailea 1.015,39 15,40 22,00

16 eta 17 urteko ikastunak 809,65 12,29 17,55

Kutxako laguntzailea, 18 urtetik goitikoa 986,95 14,98 21,4

Langilezaina 1.100,55 16,70 23,85

Morroi espezializatua 1.015,39 15,40 22,00

Morroia, peoia, jostuna, ontziratzailea 987,06 14,98 21,40

Laborategiko laguntzailea 947,37 14,37 20,53

Ibilbideko gidaria 1.184,84 17,97 25,68

Banaketako gidaria 1.043,79 15,84 22,63

Zaintzailea edo gauzaina 1.015,22 15,40 22,00

16 eta 17 urteko pintxeak 781,22 11,85 16,93

2008ko lansarien taulak (aurreikusitako KPIa + %1) %3

KATEGORIAKOINARRIZKO ORDUKO AP. ORDUA

HILABETEAN ESTRA JAIEGUNETAN

Ingeniari eta lizentziadunak 1.605,32 24,47 34,95

Perituak 1.370,77 20,90 29,85

Langileriaren burua 1.370,77 20,90 29,85

Erosketen eta salmenten burua 1.370,77 20,90 29,85

Landaketen ikuskatzailea 1.194,98 18,22 26,03

Biltegiko arduraduna 1.194,98 18,22 26,03

Hiri-artekaria 1.077,71 16,43 23,48

Administrazioko burua 1.301,44 19,85 28,35

Kontularia eta kutxazaina 1.253,52 19,11 27,30

Administrari-ofiziala 1.136,31 17,33 24,75

Administrari laguntzailea 1.048,39 15,98 22,83

16 eta 17 urteko ikastunak 835,96 12,74 18.20

Kutxako laguntzailea, 18 urtetik goitikoa 1.019,02 15,54 22,20

Langilezaina 1.136,31 17,33 24,75

Morroi espezializatua 1.048,39 15,98 22,83

Morroia, peoia, jostuna, ontziratzailea 1.019,14 15,54 22,20

Laborategiko laguntzailea 978,16 14,91 21,30

Ibilbideko gidaria 1.223,35 18,66 26,65

Banaketako gidaria 1.077,71 16,43 23,48

Zaintzailea edo gauzaina 1.048,22 15,98 22,83

16 eta 17 urteko pintxeak 806,61 12,30 17,56

Iragarkiaren kodea: F0802944