I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
8/2008 FORU AGINDUA, otsailaren 19koa, Toki Administrazioko kontseilariak emana, Nafarroako Toki Entitateek titulartasun publikoko erabilera kolektiboko atez kanpoko igeri-ontziak eta haien instalazioak Erabilera kolektiboko igerilekuen baldintza tekniko-sanitarioak eta uraren tratamendua ezarri zituen maiatzaren 19ko 123/2003 Foru Dekretura 2008an egokitzeko laguntzen deialdia ebazten duena.
Erabilera kolektiboko igerilekuen baldintza tekniko-sanitarioak ezartzen dituen maiatzaren 19ko 123/2003 Foru Dekretua (2003ko 83. Nafarroako ALDIZKARI OFIZIALa, uztailaren 2koa) indarrean sartu ondoren, erabilera kolektiboko igerilekuen jabeak behartuta daude instalazioetako erabiltzaileen segurtasuna bermatuko duten neurriak hartzera. Horretarako, aipatu foru dekretuan biltzen diren eskakizunetara egokitu beharko dituzte instalazioak.
Maiatzaren 19ko 123/2003 Foru Dekretuaren Lehen Xedapen Iragankorrean, foru dekretua indarrean sartu aurretik (2003ko abuztuaren 3a) egindako erabilera kolektiboko igerilekuei hiru urteko epea eman zitzaien foru dekretuan eskatutako baldintzak betetzeko.
Hala ere, eraberritze lanak hiru urteko epean egitea ezinezkoa zela ikusita, epea luzatu egin zen, eta horretarako maiatzaren 2ko 20/2006 Foru Dekretua onetsi zen, eta bere Bigarren Xedapen Iragankorrean epea 2017. urtean ezarri zen. Honen bidez Erabilera kolektiboko igerilekuen baldintza tekniko-sanitarioak ezartzen dituen maiatzaren 19ko 123/2003 Foru Dekretua aldatu zen.
Aurrekontu handia dela eta, Nafarroako toki entitateek igerilekuen eraberritzeak sortutako gastu guztiak ordaintzeko dituzten arazoak ikusita, kontusail bat onetsi da 2008ko Gastuen Aurrekontuan, orain arte azaldutakoak finantzatzeko diru-laguntzak emateko.
Horrenbestez, Toki Administrazioko Departamentuaren egitura organikoa ezartzen duen irailaren 3ko 121/2007 Foru Dekretuaren 2. artikuluak ematen dizkidan ahalmenak erabiliz,
AGINDU DUT:
1. Nafarroako Toki Entitateek titulartasun publikoko erabilera kolektiboko atez kanpoko igeri-ontziak eta haien instalazioak Erabilera kolektiboko igerilekuen baldintza tekniko-sanitarioak eta uraren tratamendua ezarri zituen maiatzaren 19ko 123/2003 Foru Dekretura 2008an egokitzeko laguntzen deialdia eta bere arauak onestea. Arauak foru agindu honen eranskinean ageri dira.
2. 3.600.000 euroko gastua baimentzea 2008ko aurrekontuko "Udal igerilekuak araudira egokitzea" izeneko 211003 21300 7609 313900 kontusailaren kargura.
3. Foru agindu hau Nafarroako ALDIZKARI OFIZIALean argitara ematea.
4. Foru agindu honen aurka administrazioarekiko auzi-errekurtsoa jartzen ahalko da, Nafarroako Auzitegi Nagusiko Administrazioarekiko Auzien Salari zuzendua, bi hilabeteko epean, argitaratu eta biharamunetik hasita. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epean.
5. Foru agindu hau igortzea Toki Administrazioko Departamentuko Kontabilitate Zentrora, Toki Azpiegituren Zerbitzura eta Nafarroako Osasun Publikoaren Institutura.
Iruñean, 2008ko otsailaren 19an.-Toki Administrazioko kontseilaria, Amelia Salanueva Murguialday.
ERANSKINA
Nafarroako toki entitateek Erabilera kolektiboko atez kanpoko igerilekuen igeri-ontziak egokitzeko diru-laguntzen deialdiaren arauak
1.-Deialdiaren xedea.
Deialdi honen xedea da Nafarroako Toki Entitateendako diru-laguntzak emateko prozedura, lehia garbian, betebehar eta baldintzak lehia garbian ezartzea. Diru-laguntza horiek erabiliko dira ondoko helburuak dituzten jarduketak finantzatzeko: titulartasun publikoko erabilera kolektiboko atez kanpoko igeri-ontziak eta haien instalazioak egokitzea Erabilera kolektiboko igerilekuen baldintza tekniko-sanitarioak ezarri zituen maiatzaren 19ko 123/2003 Foru Dekretuko 4.etik 10.era bitarteko artikuluetan biltzen diren beharkizunetara eta foru dekretu bereko III. kapituluan ezartzen diren igeri-ontzietako uraren baldintza eta tratamenduetara. Instalazioez landa jarduketak ere finantzatuko dira, bainuko eremuan eginak, alegia, ontziak bere ondoko pasabide edo hondartzarekin osatzen duen horretan. Halaber, zola irristagaitzetan eginak. Zola horiek dira, 24º-tik gorako irristagaiztasun maila dutenak, DIN 51097 arauaren arabera, edo 0,7tik gorako marruskadura-koefizientea dutenak, Tortus ereduaren arabera.
2.-Onuradunak.
Diru-laguntza hauek eska ditzakete 2008. urtean lehen aipatutako lanetako bat egiten duten Nafarroako toki entitateek.
3.-Diru-laguntzaren zenbatekoa.
Aipatu obrak egiteko, toki entitate onuradun bakoitzak, 120.000 euro jasotzen ahalko ditu, gehienez ere, eta zenbateko horretatik goiti egiten ez badu, diru-laguntza gastu osoaren %100 izan daiteke. Kopuru hori gainditzen badu, diruz laguntzen ahalko da 120.000 eurotik goiti egiten duen zenbatekoaren %50, muga 150.000 euro izanik.
4.-Diru-laguntzaren finantzaketa.
Jarduketa horiek egiteko aurrekontu osoa 3.600.000 eurokoa da. 2008ko aurrekontuan dagokion kontusailetik finantzatuko dira.
Deialdi honetan aurkeztutako eskabideak aintzakotzat hartu ondoren, dirurik sobratzen bada, gehitu eginen zaie foru aginduen bidez onetsitako deialdiei, alegia, oztopo fisiko eta zentzumenezkoak kendu eta hiribideak seinaleztatzekoari batetik, lur gaineko aparkalekuak egin edo eraberritzekoari bestetik, hasierako esleipenen arabera.
5.-Hautapen irizpideak.
Eskaerak hautatu eta lehenesteko honako formula hau hartuko da kontuan:
HLK = (IA + BK + OK) x IET/IUGK
HLK: Hautapen eta lehenespen koefizientea.
IA: instalazioaren antzinatasuna.
BK: biztanle kopurua.
OK: obraren kostua.
IET: instalazioa erabiltzeagatik biltzen diren tasak.
IUGK: instalazioa ustiatzeko gastuen kostua.
Diru-laguntzaren %50 banatuko da instalazioaren antzinatasunaren arabera, %40 toki entitateko bizilagun kopuruaren arabera eta %10 obraren kostuaren arabera. Toki entitate baten igerilekuak antzinatasun handiena duenean, haren eskabideari gehieneko puntuazioa emanen zaio, eta berdin egokitzapen merkeena egin behar duen entitateari. Gainerakoei alderantzizko proportzioko puntuazioa emanen zaio.
Horretarako, kontuan hartuko dira deialdi hau onesten denean indarra duten datu ofizialak, bizilagunei buruzkoak.
Halaber, instalazioa lehenbiziko aldiz ireki zen datari begiratuko zaio.
Diru-laguntza emanen da aurkezten den balorazio memorian edo obraren exekuzio proiektuan adierazten den aurrekontuan oinarrituta, edo hura esleitzeko prezioan, txikiagoa bada. Beraz, ez dira finantzatuko hasieran aurkeztutako aurrekontuetan egiten diren handipenak.
6.-Eskaeren aurkezpena eta ekarri beharreko agiriak.
6.1. Diru-laguntzen eskaerak eta dokumentazioa deialdi hau Nafarroako ALDIZKARI OFIZIALean argitaratu eta biharamunetik hasita hilabeteko epean aurkeztuko dira Toki Administrazioko Erregistroan zuzenean (Arrieta kalea, 12, 31002, Iruña), edo Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan aipatutako bideetako edozein erabiliz.
6.2. Eskabideei dokumentazio hau erantsi beharko zaie:
a) Egin nahi diren jarduketen gaineko memoria, balorazio arrekontua kontzeptuz kontzeptu eta profesionalen zerbitzu-sariak aipatuta.
b) Jarduketen kokapen-planoak.
c) Toki entitateko idazkariak izenpetutako ziurtagiria, non adieraziko baita jarduketak hasteke daudela.
d) Ziurtagiria, igerilekua duen instalazioaren urteko kostua eta instalazioetan bildu diren tasen zenbatekoa adierazten dituena. Halaber, instalazioa lehenbiziko aldiz ireki zen data adierazi beharko da.
2007. urteko ekitaldiari dagokion deialdian laguntza eskatu eta jaso ez duten toki entitateek, ez dute a) eta b) ataletan eskatutako balorazio memoria eta kokapen-planoak aurkeztu beharrik izanen, baldin eta bere eskaeretan azaltzen badute agiri hauek ez direla aldatu. Eguneratutako aurrekontua ere gehitu beharko dute.
6.3. Agiri horiek jatorrizkoak edo administrazio bidez kautoturiko kopiak izan beharko dute.
6.4. Adierazitako agirien aurkezpenean akatsik atzematen bada edo agiriak osorik ez badaude, toki entitateari eskatuko zaio akatsa 10 eguneko epean zuzen dezala. Aditzera emanen zaio, horrela egin ezik, ulertuko dela bere eskaera bertan behera utzi duela eta espedientea artxibatzeko ebazpena emanen da. Ebazpen hori jakinaraziko zaio.
7.-Instrukzioa.
Toki Azpiegituren Zerbitzua izanen da diru-laguntza hauek emateko prozedura antolatu eta tramitatzeko organo eskuduna. Betiere, txostena eman beharko du Nafarroako Osasun Publikoaren Institutuak, proiektatutako jarduketak Erabilera kolektiboko igerilekuen baldintza tekniko-sanitarioak ezarri zituen maiatzaren 19ko 123/2003 Foru Dekretura nola egokitzen diren azalduko duena.
8.-Ebazpena.
8.1. Toki Administrazioko kontseilariari dagokio eskaeren gainean ebaztea, eskaerak aurkezteko epea bukatu eta biharamunetik hasita hiru hilabeteko epean. Epe hori bukatutakoan ebazpen espresurik eman ez bada, eskaerak ezetsi egin direla ulertuko da.
8.2. Eskaeren gaineko ebazpena arrazoitua izanen da, eta bertan ondoko datuak adieraziko dira: onuradunak, emandako diru-kopuruak, diru-laguntzaren helburuak eta, hala badagokio, zein eskaera ezetsi diren. Eskaeren ordena ere finkatuko da, diru aski baldin badago gero batean laguntza jasotzeko.
8.3. Diru-laguntzen zenbateko osoa 2008ko gastuen aurrekontuko kontusailean, deialdi honetako 4. arauan aipatzen den horretan, horretarako bideratzen den diruaren araberakoa izanen da.
9.-Diru-laguntzen aldaketa eta bateragarritasuna.
9.1. Diru-laguntza emateko kontuan hartu diren baldintzen edozein aldaketak laguntza emateko ebazpena aldatzea ekarriko du.
9.2. Deialdi honen bidez ematen diren diru-laguntzak bateragarriak izanen dira administrazio honek, Espainiako edo atzerriko beste administrazio publiko batzuek, beste entitate publiko edo pribatu batzuek edo partikularrek ematen dituzten bestelako diru-laguntzekin.
Diru-laguntzen onuradunek horren berri eman beharko dio Toki Administrazioko Departamentuari eta, betiere, laguntzen zenbateko osoak, bakarka nahiz besteekin batera hartuta, ezin izanen du gainditu onuradunak egin beharreko jardueraren kostu osoa. Kasu horretan, deialdi honen bitartez ematen den diru-laguntza murriztuko da, jasotako laguntzen zenbateko osoa jarduketen benetako kostua baino handiagoa izan ez dadin.
10.-Onuradunen betebeharrak.
Onuradunek Dirulaguntzei buruzko azaroaren 9ko 11/2005 Foru Legearen 9. artikuluan ezarritako beharkizunak bete beharko dituzte.
10.1. Hartzen dituzten funtsak beren xederako erabiltzea.
10.2. Diru-laguntzak hartzen dituzten toki entitateek Toki Administrazio Departamentuan aurkeztuta eduki beharko dituzte Nafarroako Toki Ogasunei buruzko martxoaren 10eko 2/1995 Legearen arabera onetsi eta igorri behar diren azken kontu edo likidazioak.
10.3. Toki Administrazioko Zuzendaritza Nagusiak, Toki Azpiegituren Zerbitzuaren bitartez, zilegi izanen du obrak ikuskatzeko nahi adina bisita tekniko egitea obrak irauten duen bitartean. Diru-laguntza hartzen duen erakundea beharturik dago obretara sartzen uztera eta obraren gaineko edozein agiri ematera.
11.-Kontratazioa.
Diru-laguntza jasotzen duten toki entitateek diruz lagundutako jarduera osoaren exekuzio lanak azpikontratatzen ahalko dituzte, Dirulaguntzei buruzko azaroaren 9ko 11/2005 Foru Legearen 26. artikuluan ezarri bezala.
12.-Diru-laguntzaren xedea bete izanaren justifikazioa eta ordainketa.
Diru-laguntzak hartzen dituzten entitateek 2008ko abenduaren 15a baino lehen bukatu beharko dituzte deialdi honetan aipatzen diren jarduketak. Mugaegun horretarako, diru-laguntza kobratu ahal izateko, agiri hauek aurkeztu beharko dira:
a) Toki entitateko idazkariaren ziurtagiria, honako kontu hauek adieraziko dituena:
-Obraren lizitazioaren eta esleipenaren prezioa eta laguntza teknikoarena.
-Kontratistaren hautapen prozesuan, Kontratu Publikoei buruzko foru legedian agertzen diren aginduak bete direla.
-Obrak 2008an egin direla eta bukatuta daudela.
-Toki entitateak Espainiako edo atzerriko beste administrazio publiko batzuen edo beste entitate publiko edo pribatu batzuen edo partikularren diru-laguntzarik hartu ote duen eta, hartu badu, haien diru-zenbatekoa, bederatzigarren arauan aipatzen diren ondorioetarako.
b) Exekuzio proiektua eta obren azken likidazioa, neurketa zehatzak emanda.
c) Kontratistaren eta laguntza teknikoaren fakturak.
Aurkeztutako agiriak ikusita eta deialdi honetako xedeak, prozedura eta epeak bete direla frogatzeko txostenak eta egiaztapenak egin ondoren emanen da diru-laguntza.
Hala ere, inbertsioaren zenbatekoa 100.000 euro edo gehiagokoa denean, diru-laguntzaren %50 ordaintzen ahalko da, toki entitateak eskatuta, lagundutako jardueraren %50 egin dela egiaztatzen duten ordainagiriak aurkeztu ondoren.
13.-Onuradunek betebeharrak ez betetzea.
Hartutako zenbatekoa itzuli beharko da, osorik edo hein batean, diru-laguntza emateko ezarritako baldintzak ez badira betetzen, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo deialdi honetan berariaz aipatzen diren eginbeharrak ez badira betetzen. Legeek aurreikusitako kasuetan, gainera, bidezko izanen da diru-laguntza pagatu zenetik itzuli beharraren gaineko ebazpena ematen den arte sorturiko berandutza interesak pagatzeko eskatzea.
Deialdi honen aginduetan edozein ez-betetze formal eginez gero, diru-laguntzaren %10 edo gehiago galduko da.
Aurreko atalean aurreikusten dena ezertan galarazi gabe, lege-hauste eta zehapenei dagokien guztian Dirulaguntzei buruzko azaroaren 9ko 11/2005 Foru Legearen 42. eta hurrengo artikuluek xedatzen dutena hartuko da aintzat.
14.-Emandako diru-laguntzen publizitatea.
Ematen diren diru-laguntzak: Toki Administrazioko webgunean argitaratuko dira (www.cfnavarra.es/info-local), eta bertan ondokoak azalduko: deialdia, programa, diru-laguntzak finantzatzeko aurrekontuko kreditua eta programa, onuraduna, emandako zenbatekoa eta diru-laguntzaren helburua.
Halaber, Dirulaguntzei buruzko ekainaren 9ko 11/2005 Foru Legearen 15. artikuluko 2. idatz-zatian xedaturikoaren arabera, deialdi honen onuradunek deialdi honen bitartez kobratzen dituzten diru-laguntzak egokien iruditzen zaizkien hedabideen bidez argitaratuko dituzte.
15.-Ordezko araubidea.
Deialdi honetan ezarrita ez dagoen guztian Dirulaguntzei buruzko azaroaren 9ko 11/2005 Foru Legean xedatutakoari jarraituko zaio.
16.-Errekurtsoak.
Deialdi honen aurka, baita haren arauen eta aplikazio egintzen aurka ere, administrazioarekiko auzi-errekurtsoa jartzen ahalko da, Nafarroako Auzitegi Nagusiaren Administrazioarekiko Auzien Salara zuzendua, jakinarazi eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epeetan.
Iragarkiaren kodea: F0802842
