II. NAFARROAKO TOKI ADMINISTRAZIOA
2.1. ORDENANTZAK ETA BESTELAKO XEDAPEN OROKORRAK
ITURMENDI
Ezgaitasuna dutenendako aparkatzeko txartelak arautzen dituen ordenantza. Behin betiko onespena
Iturmendiko Udalak, 2008ko urtarrilaren 25ean egin osoko bilkuran, hasiera batean onetsi zuen Ezgaitasuna dutenendako aparkatzeko txartelak arautzen dituen udal ordenantza.
Onesteko erabakia 2007ko 138. Nafarroako ALDIZKARI OFIZIALean argitaratu zen, azaroaren 5ean, eta jendaurreko epean inork ez du alegaziorik aurkeztu; hortaz, ordenantza hori behin betikoz onetsi da eta osorik ematen da argitara, behar diren ondorioak izan ditzan; hori guztia, Nafarroako Toki Administrazioari buruzko 6/2007 Foru Legearen 325. artikuluan xedatuari jarraikiz.
Iturmendin, 2007ko urtarrilaren 25ean.-Alkate udalburua, Nicolás Arbizu Gabirondo.
ITURMENDIKO ELBARRIENDAKO APARKATZEKO TXARTELAK ARAUTZEN DITUEN ORDENANTZA
1. artikulua. Xedea.
Ordenantza honen helburua da ezgaitasuna dutenei aparkatzeko txartelak emateko edo berritzeko arauak ezartzea, kontuan hartuz ezgaitasuna dutenen aukera berdintasuna eta haien gizarteratzea. Hori, legedi honekin bat: Europako Kontseiluak 1998ko ekainaren 4an egin zuen 98/376/CE Gomendioa eta EEAO C 62/24, 1998ko otsailaren 26koa; Oztopo fisiko eta zentzumenezkoei buruzko uztailaren 11ko 4/1988 Foru Legea, martxoaren 25eko 22/2003 Foru Legearen bidez aldatua; eta abenduaren 19ko 19/2001 Legearen 7.b artikulua; azken lege horrek Bide Segurtasunari eta Ibilgailu Motordunen Zirkulazioari buruzko Legearen testu artikuluduna (martxoaren 2ko 339/1990 Legegintzako Errege Dekretuaren bidez onetsia) aldatu zuen.
2. artikulua. Baldintzak.
Aparkatze txartela eskuratzeko, beharrezkoa da baldintza hauek betetzea:
Ezintasun iraunkorra duten gidariak.
1. Elbarri interesdunak indarra duen gidabaimenaren jabe izan beharko du.
2. Mugikortasuna urritzen dion elbarritasuna izatea; xehetasun hauek frogatu beharko ditu:
a) %33 edo hortik goitiko elbarritasuna egiaztatzen duen ziurtagiria.
b) Nafarroako Osasun Zerbitzuak emandako osasun agiria, frogatzeko ezen elbarritasunak modu larrian eragiten diola:
-Ibiltzeko, zangoetako edo gerri pelbikoko gaitz muskulu eskeletikoa dela-eta, eskumakila bat edo gehiago, protesiak edo ortesiak erabiltzera behartua izanik.
-Ehun metroko tartean gelditu gabe ibiltzeko, alterazio organiko edo funtzionalen ondorioz.
-Bere joan-etorrietan aulki gurpilduna behar izateraino .
-Aparkatzeko maniobrak egiteko, zango-besoetako edo gerri pelbikoko eta/edo sorbalda-gerrikoko gaitz muskulu eskeletikoa dela-eta.
Ezintasun iraunkorra duten pertsonen zaintzaileak edo haiekin bizi diren ahaideak:
1. Zaintzaileak edo ahaide bizikideak indarra duen gidabaimena eduki beharko du.
2. Eskatzailearen dokumentazioa, elbarriarekin duen familia lotura frogatzen duena, edo hura zaintzen duela erakusten duena.
3. Zaindutako ahaideak mugikortasuna urritzen dion elbarritasuna izatea; hori dela eta, honako hauek egiaztatu beharko dira:
a) %33 edo hortik goitiko elbarritasuna egiaztatzen duen ziurtagiria.
b) Nafarroako Osasun Zerbitzuak emandako osasun agiria, frogatzeko ezen elbarritasunak modu larrian eragiten diola:
-Ibiltzeko, zangoetako edo gerri pelbikoko gaitz muskulu eskeletikoa dela-eta, eskumakila bat edo gehiago, protesiak edo ortesiak erabiltzera behartua izanik.
-Ehun metroko tartean gelditu gabe ibiltzeko, alterazio organiko edo funtzionalen ondorioz.
-Bere joan-etorrietan aulki gurpilduna behar izateraino .
-Aparkatzeko maniobrak egiteko, zango-besoetako edo gerri pelbikoko eta/edo sorbalda-gerrikoko gaitz muskulu eskeletikoa dela-eta.
3. artikulua. Eskatzeko prozesua.
Txartela Udalaren bulegoetan eskatuko da, eta eskabidearekin batera honako hauek aurkeztuko dira:
-Karnet neurriko argazki bat, kolorezkoa, elbarriarena.
-Elbarritasunaren ziurtagiriaren fotokopia konpultsatua.
-Osasun ziurtagiriaren fotokopia egiaztatua.
-Gidabaimen eguneratuaren fotokopia egiaztatua.
-Ibilgailuaren zirkulatzeko baimenaren fotokopia egiaztatua.
-NANaren fotokopia konpultsatua.
-Herrian erroldaturik dagoelako ziurtagiria.
-Eskaera familiako batek edo zaintzaile batek egiten duenean, elbarriaren eta eskatzailearen arteko loturari buruzko datuak sartuko dira.
4. artikulua. Txartelaren erabilera.
1. Txartela ibilgailuaren aurreko partean jarriko da, txartelaren aurrealdea kanpotik argiro ikusten dela.
2. Indarraldia amaituta, lau urtekoa izanen baita, ez du baliorik izanen, eta hartu zen tokian itzuli beharko da. Han, bidezko bada, berritu eginen da.
3. Txarteldun ibilgailua aparkatu ahalko da:
a) Ordutegi mugarik gabe, ezgaituentzako erreserbatuta eta seinalatuta dauden lekuetan.
b) Denbora tarte mugatu batean, bai zamalanetarako erreserbatuta dauden lekuetan (seinale bidez aparkatzeko debekua adierazi denetan) bai bestelakoetan, udaltzainek espresuki baimena emanez gero.
4. Ondoko kasuetan, ezin izanen da inola ere ibilgailua aparkatu baimen honen babespean:
a) Txartelaren titularra eramaten ez duenean.
b) Oinezkoendako pasabideetan.
c) Espaloiaren gainean.
d) Orokorrean, ibilgailuen nahiz oinezkoen joan-etorria larriki trabatzen den tokietan.
5. artikulua. Arau-hausteak eta zehapenak.
Arau-hauste administratiboak dira:
a) Txartela lortzeko aurkezten diren datuak faltsutzea eta txartela lortzea eragotziko luketenak gordetzea.
b) Txartelak kontzesio administratiborik gabe erabiltzea.
c) Beste baten txartela erabiltzea.
Faltsutzea egin dutenak eta txartela eskatzen dutenak izanen dira erantzuleak.
Arau-hausteak zehatzeko, aldez aurretik zehapen espedientea abiaraziko da eta, haren ebazpena eman aitzin, interesdunei entzutea emanen zaie betiere, abuztuaren 4ko 1398/1993 Errege Dekretuan xedatutakoari jarraikiz, haren bidez onetsi baitzen zehapen ahalmena erabiltzeko prozedura.
AZKEN XEDAPEN BAKARRA
Ordenantza honek indarra hartu eta ondorio juridikoak izanen ditu ordenantzaren testua oso-osorik Nafarroako ALDIZKARI OFIZIALean argitaratutakoan eta Estatuko edo Foru Komunitateko Administrazioek toki entitateen egintza edo erabakiak indargabetzeko duten eskumena erabiltzeko epea iragandakoan.
Iragarkiaren kodea: L0801534
