151. ALDIZKARIA - 2008ko abenduaren 12a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Publikoaren Eskaintza, oposizioak eta lehiaketak

DEIALDIA, Nafarroako Administrazio Publikoaren Institutuko zuzendari kudeatzailearen azaroaren 26ko 214/2008 Ebazpenaren bidez onetsia. Ebazpen horren bidez Nafarroako Foru Komunitateko eta haren erakunde autonomoetako zaindari nagusi eta alboko zaindari nagusi izateko 14 lanpostu, B mailakoak, oposizio-lehiaketa bidezko barne igoera murriztuaren bitartez betetzeko deialdia onetsi zen.

Nafarroako Administrazio Publikoaren Institutuko zuzendari kudeatzailearen azaroaren 26ko 214/2008 Ebazpenaren bidez, Nafarroako Foru Komunitateko eta haren erakunde autonomoetako zaindari nagusi eta alboko zaindari nagusi izateko 14 lanpostu, B mailakoak, oposizio-lehiaketa bidezko barne igoera murriztuaren bitartez betetzeko deialdia onetsi zen.

Hautaketa prozesua honako hauetan xedatutakoari jarraikiz eginen da: Nafarroako Administrazio Publikoetako Langileentzako Neurriei buruzko maiatzaren 24ko 10/2001 Foru Legea; Ingurumen, Lurraldearen Antolamendu eta Etxebizitza Departamentuari atxikirik dauden basozainen berariazko araubidea erregulatzen duen azaroaren 3ko 132/2005 Foru Dekretua; Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia; aipatu estatutua garatu eta betetzeko sarrera prozeduraren gainean emandako Erregelamendua; eta gainerako aplikazio arauak eta deialdi honetako oinarriak.

1.-Arau orokorrak.

1.1. Deialdi honen xedea Nafarroako Foru Komunitateko eta haren erakunde autonomoetako zaindari nagusi eta alboko zaindari nagusi izateko 14 lanpostu, B mailakoak, oposizio-lehiaketa bidezko barne igoera murriztuaren bitartez betetzea da.

1.2. Hauek dira eskaintzen diren lanpostu hutsak:

Zaindari nagusi izateko 5 lanpostu huts, erreferentziako herri hauetan eta zenbaki hauekin plantilla organikoan:

-1 Bidasoako barrutian (erreferentziako herria: Bertizarana), plantilla organikoan 2364 zenbakia.

-1 Iruñeko barrutian (erreferentziako herria: Iruña), plantilla organikoan 2357 zenbakia.

-1 Lizarrako iparraldeko barrutian (erreferentziako herria: Lizarra), plantilla organikoan 2351 zenbakia.

-1 Tafalla-Zangozako barrutian (erreferentziako herria: Tafalla), plantilla organikoan 2394 zenbakia.

-1 Tuterako barrutian (erreferentziako herria: Tutera), plantilla organikoan 2396 zenbakia.

Alboko zaindari nagusi izateko 9 lanpostu huts, erreferentziako herri hauetan eta zenbaki hauekin plantilla organikoan:

-1 Aezkoa-Kintoko barrutian (erreferentziako herria: Zubiri), plantilla organikoan 8367 zenbakia.

-1 Erronkari-Zaraitzuko barrutian (erreferentziako herria: Ezkaroze), plantilla organikoan 8364 zenbakia.

-1 Bidasoako barrutian (erreferentziako herria: Bertizarana), plantilla organikoan 8363 zenbakia.

-1 Urbasako barrutian (erreferentziako herria: Lizarra), plantilla organikoan 8368 zenbakia.

-1 Iruñeko barrutian (erreferentziako herria: Iruña), plantilla organikoan 6781 zenbakia.

-1 Lizarrako iparraldeko barrutian (erreferentziako herria: Lizarra), plantilla organikoan 2378 zenbakia.

-1 Lizarrako hegoaldeko barrutian (erreferentziako herria: Lizarra), plantilla organikoan 8366 zenbakia.

-1 Tuterako barrutian (erreferentziako herria: Tutera), plantilla organikoan 1513 zenbakia.

-1 barruti zentralean (erreferentziako herria: Iruña), plantilla organikoan 8365 zenbakia.

1.3. Zaindari nagusi eta alboko zaindari nagusi izendatzen diren pertsonen eginkizunak Basozainen berariazko araubidea erregulatzen duen azaroaren 3ko 132/2005 Foru Dekretuan adierazten dira.

1.4. Ordainsarien Behin-behineko Erregelamendua onesten duen uztailaren 4ko 158/1984 Foru Dekretuan eta aplikatu beharreko gainerako xedapenetan B mailako ordainsarientzat oro har ezarritako ordainsariak izanen dituzte lanpostuek.

2.-Betebeharrak.

2.1. Oposizio-lehiaketan onartuak izateko, izangaiek, eskaerak aurkezteko epea amaitzen den egunean eta lanpostuaren jabetza hartu arte, baldintza hauek bete beharko dituzte:

a) Nafarroako Foru Komunitateko eta haren erakunde autonomoetako langile finkoa izatea.

b) Basozain lanpostu baterako izendatua izatea eta borondatezko edo nahitaezko eszedentzian ez egotea.

c) Basozain lanpostuan gutxienez ere bost urteko benetako zerbitzualdia egin duela frogatzea. Horretarako, ingurumenzain edo mendi zaindariorde gisa egindako zerbitzuak ere kontatuko dira.

3.-Eskaerak.

3.1. Deialdian parte hartzeko eskaerak Nafarroako Gobernuko Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2008ko 14. Nafarroako ALDIZKARI OFIZIALean argitaratu zen, urtarrilaren 30ean) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskabideak deialdi honen eranskineko ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuko Argibide Bulegoan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko aldizkari ofizialetik abiatuta, bai www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

3.2. Ezgaitasun aitortua duten izangaiek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea eta, horretarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasuna dutela frogatzeko organo eskudunak ematen duen agiriaren fotokopia konpultsatua ere aurkeztu beharko dute. Aurreko atalean aipatzen den Interneteko helbidean eskabide eredu bat dago, interesdunen eskura.

3.3. Eskabideari, behar bezala bete ondoren, agiri hauek erantsiko zaizkio:

Bat.-Espedientea formalizatzeko eta azterketa eskubideetarako 18 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, izangaia baztertu eginen da.

Prozedura hauetakoren bat erabiliz ordaintzen ahalko da tasa hori:

-Behar den bezala betetako ordainketa gutunaren bidez, Nafarroako Foru Komunitateko banku entitateetan ordaintzeko. Arestian aipatutako web gunean, deialdiaren iragarkian, ordainketa gutunaren eredua dago.

-Sarrera eskudirutan edo bankuko transferentzia bidez eginez, Banestoko (Banco Español de Crédito) 0030 8124 87 0870002271 kontuan; horrelakoetan ordainagirian datu hauek jarri beharko dira nahitaez:

.Izangaiaren izen-deiturak.

.NANa/IFZ

.Ordainketa zein kontutan egiten den, haren zenbakia.

.Kontzeptua: zaindari nagusi eta alboko zaindari nagusi izateko oposizio-lehiaketa.

Ez dute tasa ordainduko %33ko edo gehiagoko ezintasun aitortua dutela frogatzen duten pertsonek; horretarako, organo eskudunak luzaturiko jatorrizko agiriaren edo behar bezala konpultsaturiko fotokopia aurkeztu beharko dute.

Bi.-Deialdiko II. eranskinean ezarritakoari jarraikiz izangaiek alegatzen dituzten merezimenduen frogagiri jatorrizkoak edo behar bezala konpultsatutako fotokopiak, administrazio publikoetan egindako zerbitzuei buruzkoak barne.

3.4. Eskaerak aurkezteko epea ezin izanen da luzatu.

3.5. Eskaeran atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskaerak aurkezteko epea bukatuta, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa), ebazpena emanen du izangai onartuen eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioak aurkezteko epea bukaturik eta haien gainean ebatzi ondoren, Sarrerarako Hautapenaren Zerbitzuko zuzendari kudeatzaileak, Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa) ebazpena emanen du, izangai onartuen eta baztertuen behin betiko zerrenda onesteko, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen diren izangaiei ez zaizkie azterketa egiteko eskubideak itzuliko.

5.-Epaimahaia.

5.1. Epaimahaia kide hauek osatuko dute:

-Mahaiburua: Enrique Eraso Centelles jauna, Landa Garapeneko eta Ingurumeneko Departamentuko Biodibertsitatea Zaintzeko Zerbitzuko zuzendaria.

-Ordezkoa: Pedro Zuazo Onagoitia jauna, Landa Garapeneko eta Ingurumeneko Departamentuko Ingurumen Kalitatearen Zerbitzuko zuzendaria.

-Mahaikidea: Salvador del Pino López jauna, Landa Garapeneko eta Ingurumeneko Departamentuko Ehiza eta Arrantza Ataleko burua.

-Ordezkoa: Enrique Castién Arriazu jauna, Landa Garapeneko eta Ingurumeneko Departamentuko Ehiza Kudeatzeko Bulegoko burua.

-Mahaikidea: Fermín Olabe Velasco jauna, Landa Garapeneko eta Ingurumeneko Departamentuko Oihanak Kudeatzeko Ataleko burua.

-Ordezkoa: Gregorio Oyaregui Arriada jauna, Landa Garapeneko eta Ingurumeneko Departamentuko Pirinioaldeko Bulegoko burua.

-Mahaikidea: Nafarroako Foru Komunitateko Administrazioko Langileen Batzordeak izendatutako ordezkari bat.

-Ordezkoa: Nafarroako Foru Komunitateko Administrazioko Langileen Batzordeak izendatutako ordezkari bat.

-Mahaikide-idazkaria: Félix Armendáriz Martínez jauna, Landa Garapeneko eta Ingurumeneko Departamentuko Araubide Juridikoaren Ataleko burua.

-Ordezkoa: Joseba Asiain Albisu jauna, Landa Garapeneko eta Ingurumeneko Departamentuko idazkari tekniko nagusia.

Hautaprobak hasi baino lehen eratuko da epaimahaia.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi dute mahaikideak errefusatzea, egoera horietakoren bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizio-lehiaketaren nondik norakoak.

6.1. Oposizio-lehiaketa bi alditan eginen da, lehiaketaldia lehenbizi eta oposizioaldia gero, oinarri hauetan zehazten den gisara.

6.2. Oposizioa 2009ko otsailean hasiko da. Izangai onartu eta baztertuen behin betiko zerrenda onesten duen ebazpen berean zehaztuko dira probak hasteko lekua, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.3. Lehiaketaldia.

6.3.1. Epaimahaiak lehiatzaileek alegaturiko eta egiaztaturiko merezimenduak baloratuko ditu, deialdiaren II. eranskineko baremoari jarraikiz.

6.3.2. Deialdiaren 3.2 oinarrian agindutakoaren arabera, merezimendu guztiak jatorrizko agirien edo konpultsatutako kopien bidez alegatu eta frogatuko ditu izangai bakoitzak, lekualdatze lehiaketan parte hartzeko eskaera aurkeztean.

6.3.3. Baremoaren aplikazioak eskatzen duen informazio guztia jaso beharko dute agiriek. Justifikatu gabeko merezimenduak ez dira baloratuko.

Lehiatzaileek alegatutako merezimenduen gaineko azalpenak eta datu osagarriak eskatzen ahal ditu epaimahaiak noiznahi.

6.3.4. Lehiaketaldia ez da baztertzailea izanen, eta 36,15 puntuko balorazioa izanen du, gehienez ere. Deialdiko II. eranskinari jarraikiz banatuko dira puntuak, honela:

-Egindako zerbitzuak: gehienez 20 puntu.

-Prestakuntza, irakasle eta ikerketa lana eta beste merezimendu batzuk: gehienez 10 puntu.

-Hizkuntzak jakitea: gehienez 6,15 puntu.

6.3.5. Epaimahaiak baremoaren atal bakoitzean izangaien merezimenduak baloratuko ditu. Epaimahaiak ez du inoiz aintzat hartuko izangaiak aurretiaz azaldu eta agiri bidez frogatu gabeko merezimendurik, eta ezin izanen du atal bakoitzerako ezarritako puntuazioa baino handiagorik eman.

6.3.6. Lehiaketaldia amaitzen denean, epaimahaiak Nafarroako Gobernuaren iragarki oholean jarriko du izangai bakoitzak lortutako puntuazioa.

Lehiaketaldiko puntuazioa opsizioaldikoari gehituko zaio, eta emaitza oposizio-lehiaketako puntuazio osoa izanen da.

6.4. Oposizioaldia.

6.4.1. Oposizioaldian ariketa hauek izanen dira:

Lehenengo ariketa: teoriko-praktikoa. Gai zerrendari (III. eranskina) buruzko 50 galdera labur erantzun beharko dira, idatziz.

Bigarren ariketa: praktikoa. Zaindari nagusiaren eta alboko zaindari nagusiaren berariazko eginkizunei buruzkoa (norberaren barrutiko langileen lana programatu, koordinatu eta gainbegiratzea).

Lehenengo ariketa plika sistemaren bidez eginen da.

Epaimahaiak ariketa bakoitza egiteko zenbat denbora dagoen adieraziko du horien hasieran.

6.4.2. Oposizioko ariketen balorazioan 85 puntu ematen ahalko dira gehienez, honela banatuak:

-Lehenbizikoa: 40 puntu bitarte.

-Bigarrena: 45 puntu bitarte.

6.4.3. Oposizioko ariketak baztergarriak izanen dira, eta bazterturik geldituko dira ariketa horietako batean esleitutako puntuazioaren erdia gutxienez lortzen ez duten oposiziogileak.

6.4.4. Ariketak zuzendu ondoren, epaimahaiak jendaurrean jarriko ditu, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.4.5. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gidatzeko baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna frogatzen ez dutenak oposiziotik baztertuko dira.

6.4.6. Hautapen probak egiteko, eskaera egin duten ezgaitasun aitortua dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7.-Probak gainditzen dituztenen zerrenda eta izendapen proposamena.

7.1. Hautapen probak amaiturik, epaimahaiak jendaurrean jarriko du probak gainditu dituztenen zerrenda, lehiaketan eta oposizioan guztira lortutako puntuazioaren araberakoa, Nafarroako Gobernuaren iragarki oholean. Gero, Nafarroako Administrazio Publikoaren Institutuko zuzendari kudeatzaileari igorriko dio probak puntuaziorik altuenarekin gainditu dituzten eta deialdiko lanpostuen kopuruaren barruan sartzen diren izangaiak izendatu eta kontratatzeko proposamena, espediente osoarekin batera. Proposamen hori Nafarroako ALDIZKARI OFIZIALean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketetan, oposizioaldiko bigarren ariketan puntu gehien lortzen dituztenen alde joko da; berdinketak badirau, lehiaketaldian puntu gehien duen izangaiaren alde eginen da.

8.-Lanpostu hutsak hautatzea.

8.1. Izangaiek aditzera eman beharko dute deialdiko lanpostu hutsetatik zein hautatzen duten, Nafarroako Administrazio Publikoaren Sarrerarako Hautapenaren Zerbitzuak horretarako deituko duen ekitaldian.

8.2. Lanpostu hutsak aukeratzeko orduan, %33ko ezgaitasun aitortua edo handiagoa duten izangaiek lehentasuna izanen dute gainerako izangaien aurretik.

Ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9.-Izendapena eta jabetza hartzea.

9.1. Funtzio Publikoaren zuzendari nagusiak izendapen proposamenean ageri diren izangaiak izendatuko ditu, zaindari nagusi eta alboko zaindari nagusi lanetan aritzeko.

9.2. Izendapena Nafarroako ALDIZKARI OFIZIALean argitaratuko da eta jabetza hartzea izendapenaren ebazpenean adierazten den egunean eginen da.

9.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia oro har ezarritakoa izanen da, eta malgua, zerbitzuaren premien araberakoa, arau aplikagarrietan xedatutakoari jarraikiz.

9.5. Jabetza hartzen ez duten izangaiek zaindari nagusi edo alboko zaindari nagusi gisa izendatzeko eskubide guztiak galduko dituzte, behar bezala justifikaturiko ezinbesteko kasuetan izan ezik.

10.-Aurkeztutako agiriak jasotzea.

10.1. Izangaiek, baldin eta erreklamazio edo errekurtsorik jartzen ez bada, aurkeztu dituzten agiriak berreskuratu ahal izanen dituzte halaxe eskatu ondotik. Agiriak eramateko eskaera hiru hilabeteko epean aurkezten ahalko da, izendapenerako ebazpena Nafarroako ALDIZKARI OFIZIALean argitaratu eta beste hiru hilabeteren buruan.

10.2. Aurreko atalean ezarritako epea agiriak eraman gabe bukatzen bada, ulertuko da izangaiak uko egin diola agiriak eskuratzeari, horretarako eskubidea galduko du eta agiriak suntsituko dira.

10.3. Erreklamazio edo errekurtsoren bat aurkeztu baldin bada, aurkezturiko agiriak gorde eginen dira, ikuskatu eta aztertzeko. Agiriak eramaten ahalko dira erreklamazioaren edo errekurtsoaren tramitazioak horretarako aukera ematen duenean.

11.-Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren eta oinarrien kontra eta oinarriak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2008ko azaroaren 26an.-Nafarroako Administrazio Publikoaren Institutuko zuzendari kudeatzailea, Ignacio Bandrés Urriza.

I. ERANSKINA

Eskabidea

Nafarroako Gobernua. Lehendakaritza, Justizia eta Barne Departamentua. Nafarroako Administrazio Publikoaren Institutua.

Izena: ..........................................., adinez nagusia, nortasun agiri nazionala .............. (edo balio bereko beste agiriren bat), sorteguna ............................., sorterria ................................. (.................), nazionalitatea ...................., helbidea ................... (...................), karrika ..............., posta kodea ......................, telefonoa ............., laneko telefonoa ..........

Honako hau azaltzen dut:

Nafarroako Foru Komunitatearen eta haren erakunde autonomoen zerbitzuko zaindari nagusi eta alboko zaindari nagusi izateko 14 lanpostu oposizio-lehiaketaren bidezko barne igoera murriztuaren bitartez betetzeko deialdian, .....(e)ko ..... Nafarroako ALDIZKARI OFIZIALean argitaratu zen hartan, onartua izatea eskatzen dudala.

Nafarroako Foru Komunitateko eta haren erakunde autonomoetako langile finkoa naizela.

Basozain lanpostuan administrazio egoera honetan nagoela (X batez adierazi bidezko dena):

f Jardunean.

f Zerbitzu berezietan.

f Eszedentzia berezian.

Azterketa eskubideak deialdian ezarritako moduan ordaindu ditudala, eta horren gordekina erantsi dudala edo erantsitako agirien bidez frogatzen dudala tasa ordaintzetik salbuetsita nagoela.

Beste orri batean adierazten diren epe eta bitartekoak egokitzea eskatzen dudala, ezgaitasuna baitut, eta egoera hori frogatzen duen agiria, erakunde eskudunak luzatua, aurkezten dudala.

Euskararen gaitasun agiria edo ofizialki baliokidea den beste titulu bat aurkezten dudala (oinarrietan ezarritakoari jarraikiz bidezkoa denean).

Eskabidearekin batera onartua izateko deialdiaren 3.3 oinarrian eskatzen diren agiriak eta alegatu eta lehiaketaldian baloratzen ahal diren merezimendu guztien frogak aurkezten ditudala.

f Euskara maila erakusteko proba egitea eskatzen dudala. (*)

f Frantseseko eta ingeleseko nahikotasun frogak egitea eskatzen dudala. (*)

Horrenbestez,

Eskabide hau ontzat har dezatela eta aipatu deialdian onar nazatela eskatzen dut.

Iruñean, 200.........(e)ko .............aren ............(e)an.

(Sinadura)

(*) Bidezko denean bakarrik.

NAFARROAKO ADMINISTRAZIO PUBLIKOAREN ZUZENDARI KUDEATZAILEA.

II. ERANSKINA

Merezimenduak baloratzeko baremoa

1.-Egindako zerbitzuak:

Basozain, ingurumenzain, mendi zaindariorde edo antzeko lanpostuetan administrazio publikoetan egindako urte bakoitzeko: 1,5 puntu, gehienez ere 20 puntu.

1. atalerako oharrak:

1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaie izangaiei.

2. Lanaldi partzialean egindako zerbitzuen kasuan, behar den zatia kenduko da.

3. Deialdia argitaratu ondoan egindako zerbitzuak ez dira baloratuko.

2.-Prestakuntza ekintzak:

a) Deialdiaren xede diren lanpostuekin zuzeneko lotura duten erakundeek, ikastetxe publikoek edo unibertsitateek antolatutako prestakuntza ekintzetan parte hartzea. Epaimahaiak kontuan hartu beharrekoak: kreditu akademiko bakoitzeko edo haren baliokide bakoitzeko (10 ikastordu): 0,20 puntu, gehienez ere 2 puntu.

Oharrak:

1. Baloratu beharreko ikastaroetan, irakastorduen zatikiak proportzionalki kalkulatuko dira.

2. Irakastorduen kopurua agertzen ez duten ziurtagiriei kreditu bateko balorazioa emanen zaie.

3. Ikasturte bateko iraupena agertzen duten ziurtagiriei 12 kredituko balorazioa emanen zaie.

4. Erakunde antolatzaileari buruzko beharkizunak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek Administrazio Publikoetako Etengabeko Prestakuntzarako Itunen barruan antolatuak sartuko dira.

b) Deialdiaren xede diren lanpostuekin zuzeneko lotura duten prestakuntza ekintzak, sektore publikoan egitekoak, antolatu eta horietan parte hartzea. Epaimahaiak kontuan hartu beharrekoak, iraupenaren eta deitutako lanpostuekin duten erlazioaren arabera: gehienez ere 2 puntu.

c) Erdi edo goi mailako titulu akademiko ofizialak: gehienez ere 5 puntu.

Merezimendu gisa alegatu eta baremoaren barrenean balorazio zehatza duten titulu akademikoak lortzeko beharrezkoak diren maila apalagoko tituluak ez dira baloratuko.

Haien jakintza arloarengatik deialdiaren xede diren lanpostuekin zuzeneko lotura duten titulazio akademiko ofizialak baloratuko dira bakarrik.

d) Beste merezimendu batzuk, epaimahaiak kontuan hartu beharrekoak: besteak beste, sektore pribatuko lanak, prestakuntzarako beka edo egonaldiak, edo kontsulta, aholkularitza, partaidetza edo ordezkaritza organoetan parte hartzea: puntu 1 gehienez.

2. ataleko puntuazioa 10 izanen da gehienez.

3.-Puntuazio erantsia hizkuntzak jakiteagatik:

a) Frantsesa, ingelesa edo alemana jakiteagatik, Europar Batasuneko lan hizkuntzak diren aldetik, hizkuntza horietako bakoitzeko 1'5 puntu gehienez.

b) Euskaraz jakiteagatik: destinoa eremu euskaldunean duten lanpostuetarako 1,65 puntu gehienez, plantilla organikoan euskara jakitea beharrezkotzat hartu ez bada, eta destinoa eremu mistoan dutenetarako 1,58 puntu gehienez.

Ondorio horietarako, bakarrik hizkuntza eskola ofizial batek luzaturiko gaitasun agiria edo ofizialki baliokidea den titulua edukitzea baloratuko da, aurreko ataletan adierazten den gehieneko puntuazioa emanen baita.

Titulurik eduki ezik, hizkuntza eskola ofizialean gaindituriko maila bakoitzagatik gehieneko puntuazioaren bosten bat emanen da. Euskararen kasuan, Nafarroako Gobernuak antolatutako ikastaroetan gainditutako urrats bakoitzeko 1/12 emanen da.

Izangai bakoitzak lau hizkuntza horietan zer dakien baloratzeko, Nafarroako Administrazio Publikoaren Institutuak antolatutako azterketak egiten ahal dira; bost zailtasun maila izanen dira, eta hizkuntza bakoitzari ematen ahal zaion gehieneko balorazioaren bosten bat emanen zaio maila bakoitzari.

III. ERANSKINA

Gai zerrenda

I. ZATIA

Araudia

1. gaia.-Zuzenbide Publikoaren iturburuak: legeak eta lege motak. Lege dekretua. Legegintzako foru dekretua. Nazioarteko itunak.

2. gaia.-Administrazio zuzenbidearen iturburuak: erregelamendua eta erregelamendu ahalmena. Erregelamendu motak. Erregelamendu ahalmenaren mugak eta haren kontrola.

3. gaia.-Administrazio prozedura erkidea: kontzeptua eta izaera. Hasiera, antolamendua, instrukzioa eta bukaera. Administrazio errekurtsoak: printzipio orokorrak eta motak.

4. gaia.-Nafarroako Lurraldearen Antolamenduari eta Hirigintzari buruzko abenduaren 20ko 35/2002 Foru Legea: lurzoru urbanizaezina.

5. gaia.-2/1993 Foru Legea, martxoaren 5ekoa, Basa Fauna eta haren Habitatak Babestu eta Kudeatzeari buruzkoa. Garapenerako erregelamenduak.

6. gaia.-Nafarroako Naturguneei buruzko ekainaren 17ko 9/1996 Foru Legea.

7. gaia.-Nafarroako Oihan Ondarea Babestu eta Garatzeari buruzko abenduaren 31ko 13/1990 Foru Legea. Garapenerako erregelamenduak.

8. gaia.-Nafarroako Ehizari eta Arrantzari buruzko abenduaren 22ko 17/2005 Foru Legea. Garapenerako erregelamenduak.

9. gaia.-Nafarroako Abelbideei buruzko abenduaren 15eko 19/1997 Foru Legea.

10. gaia.-Ingurumena Babesteko Esku-hartzeari buruzko martxoaren 22ko 4/2005 Foru Legearen eta hori garatzen duen erregelamenduaren arabera ingurumeneko esku-hartzea izan behar duten jarduerak ikuskatu eta kontrolatzeko araudia.

II. ZATIA

Natur ingurunea. Zainketa eta lehengoratzea

1. gaia.-Natur ingurunea. Ekologiaren terminologia eta oinarrizko kontzeptuak. Sistema naturalak. Ekosistemen egitura, osaera eta funtzionamendua. Oreka ekologikoa.

2. gaia.-Naturgune baten eta haren ekosistemen azterketa. Eskualde ekologikoak. Formazio naturalen eta ekosistemen sailkapena eta motak. Formazio edo ekosistema nagusiak: garrantzia eta kokapena, ingurune fisikoa, landaretza eta flora, fauna, erabilerak eta aprobetxamenduak, zainketa.

3. gaia.-Biodibertsitatea zaintzea. Dibertsitate biologikoaren kontzeptua eta oinarriak. Produkzioa eta erabilera iraunkorra. Garapen iraunkorra. Zainketarako estrategia eta tresnak. Ingurumenaren integrazioa.

4. gaia.-Lurraldearen eta baliabideen plangintza eta antolamendua. Lurzoruaren eta lurraldearen sailkapena. Plangintzarako eta antolamendurako eskumenak eta tresnak. Baliabide naturalak antolatzeko planak.

5. gaia.-Naturgune babestuak. Oinarriak, xedeak eta joerak. Motak, ezaugarriak (erreserbak, parkeak, jostetaguneak, etab.). Hautapenerako irizpideak. Deklarazioa. Europaren, estatuaren eta autonomiaren mailako sareak. Kudeaketa. Erabilerako eta kudeaketako plan zuzentzaileak. Korridore biologikoak.

6. gaia.-Natur ingurunea lehengoratzea. Aldaketak edo nahasketak jotako naturgune baten azterketa. Lehengoratze teknikak.

7. gaia.-Flora eta fauna zaintzea. Espezie katalogatuak. Biologia, katalogatutako animalia eta landare espezieen banaketa. Berreskuratzeko planak. Habitataren babespena. Babespen eremuak. Flora eta landaretza zaintzea. Fauna kudeatzeko teknikak: behaketa, jarraipena, populazioen kalkulua, patologiak, berreskuratzea, berriro sartzea. Laginak hartzea.

8. gaia.-Nafarroako ugaldeetako eremu ekologikoak eta arrainen eremuak. Landaretza eta fauna. Ugaldeetako ekosistemen eta ingurukoen ezaugarriak. Zaintzeko dauden arazoak. Neurri zuzentzaileak. Ur-emari ekologikoak.

9. gaia.-Nafarroako arrainak eta karramarroak: biologia, banaketa, ekologia, zainketa.

10. gaia.-Nafarroako anfibioak eta narrastiak: biologia, banaketa, ekologia eta zainketa.

11. gaia.-Falkoniforme eta estrigiforme habiagileak Nafarroan: banaketa, egungo egoera, eremu garrantzitsuenak, zaintzeko arazoak.

12. gaia.-Basoilarra, basoiloa, basoilo txikia, atalarra, ganga azpizuria, ganga azpibeltza eta uretako hegaztiak Nafarroan. Banaketa, egungo egoera, eremu garrrantzitsuenak, zaintzeko arazoak.

13. gaia.-Nafarroako ugaztun ungulatuak. Banaketa, egungo egoera, eremu garrrantzitsuenak, zaintzeko arazoak.

III. ZATIA

Basoen kudeaketa. Basoen babesa

1. gaia.-Nafarroako pinudi autoktonoak. Ezaugarriak. Ekologia eta banaketa. Bertan gehien dagoen flora eta fauna. Pinus sylvestris, Pinus uncinata eta Pinus halepensis espezieen ezaugarri botaniko eta kulturalak. Jotzen dituzten gaitzak eta izurriak.

2. gaia.-Nafarroako pagadi autoktonoak. Ezaugarriak. Ekologia eta banaketa. Bertan gehien dagoen flora eta fauna. Fagus sylvatica espeziearen ezaugarri botaniko eta kulturalak. Jotzen dituzten gaitzak eta izurriak.

3.gaia.-Nafarroako hariztiak, erkameztiak, karraskadiak eta artadiak. Ekologia eta banaketa. Bertan gehien dagoen flora eta fauna. Quercus robur, Quercus petraea, Quercus humilis, Quercus faginea eta Quercus ilex espezieen ezaugarri botaniko eta kulturalak. Jotzen dituzten gaitzak eta izurriak.

4. gaia.-Espezie hauen eskakizun ekologikoak eta ezaugarri botaniko eta kulturalak: Abies alba, Castanea sativa, Betula alba, Juglans regia, Fraxinus excelsior, Prunus avium eta Populus. Jotzen dituzten gaitzak eta izurriak.

5. gaia.-Espezie hauen eskakizun ekologikoak eta ezaugarri botaniko eta kulturalak: Robinia pseudoacacia, Quercus rubra, Pinus nigra austriaca, Pinus nigra corsicana, Pseudotsuga menziesii, Pinus radiata eta Picea abies. Jotzen dituzten gaitzak eta izurriak.

6. gaia.-Oihangintza. Zuhaiztien forma nagusiak. Zuhaiztien egitura: definizioa eta motak. Zuhaizti nagusia eta osagarria. Txandaren, birsortzeko aldiaren, heldutasunaren eta mozteko diametroaren kontzeptuak. Adin naturalaren eta artifizialaren motak. Eremu basimetrikoaren kontzeptua.

7. gaia.-Oihangintza. Etengabeko motzaldiak: behin edo bi alditan egindako motzaldiak, elkarren segidako bakanketa uniformeen bidezko motzaldiak. Abantailak eta arazoak. Zein espezieri aplikatzen zaizkien.

8. gaia.-Oihangintza. Motzaldi erdi-etenak: arboladi txikiak eta zerrendak uzten dituztenak. Motzaldi etenak: entresaka. Abantailak eta arazoak. Zein espezieri aplikatzen zaizkien.

9. gaia.-Oihangintza. Bakantzea: definizioa, motak eta xedeak. Bakantzeetako pisua, intentsitatea eta errotazioa. Kimaketak. Zuhaitzak seinalatu, taldea egin eta motzaldirako markatze eta begiratze lanak egitea.

10. gaia.-Mendien antolamendua: kontzeptua eta helburuak. Mendiek ematen dituzten erabilerak. Antolamendu proiektuak: inbentarioaldia eta plangintzaldia. Mendiak antolatzeko metodoak.

11. gaia.-Dasometria. Zuhaitzaren neurketak zutik dagoela eta bota ondokoak. Zutik dauden zuhaitzen kubikazioa. Koefiziente morfikoa. Kubikazio taulak. Botatako zuhaitzen kubikazioa. Zuhaitz baten adina zehaztea. Eremu basimetrikoa. Batez besteko hazkundearen, hazkunde arruntaren eta Pressler-en hazkundearen kontzeptua.

12. gaia.-Oihana inbentariatzea. Zerrenda osoaren araberako inbentarioa. Lagin estatistikoaren araberako inbentarioa. Ereduko zuhaitza: hautaketa eta bildu beharreko datuak, kubikazio taulak eta produkzio taulak.

13. gaia.-Oihantzea eta lehengoratze hidrologikoa eta oihanaren arlokoa. Lurra prestatzea. Ereinketa eta landaketa. Zuzenketa hidrologikoaren lanak eta eginbeharrak. Landaregaia. Erabiltzen diren espezieak. Erabiltzen diren makineria, tresnak eta baliabideak.

14. gaia.-Baso suteak. Prebentzioa eta itzalketa. Natur ingurunea antolatzea sua zabaltzea zaila izan dadin. Sua ebakitzeko eremuak eta zerrendak. Zaintzarako postuak eta sareak. Oihaneko suteak itzaltzeko ekipoen koordinazioa. Kalteen balorazioa.

IV. ZATIA

Oihan, ehiza eta arrantza aprobetxamenduen kudeaketa

1. gaia.-Oihaneko gaien aprobetxamendua antolatu eta planifikatzea. Erabiltzen diren tresnak, makineria, ekipoak eta materialak. Oihaneko gaien aprobetxamendu lanetan gerta daitezkeen ingurumenaren gaineko eragina eta kalte ekologikoak.

2. gaia.-Ehiza espezieak. Ehiza debekualdiei buruzko xedapen orokorra.

3. gaia.-Ur kontinentaletako arrantza espezieak. Arrantza debekualdiei buruzko xedapen orokorra.

4. gaia.-Ehiza eta arrantza espezieen populazioak. Populazioen errolda eta jarraipena. Ehiza eta arrantza espezieek erangidako kalteak. Gaitzak, harrapakariak eta lehiatzaileak.

5. gaia.-Ehiza antolatzeko planak. Populazioen erabilera eta kudeaketa. Habitata babestu eta zaintzea. Hobekuntza teknikak. Kalteen prebentzioa. Lanak programatu, antolatu, segurtasunez egin eta kontrolatzea.

6. gaia.-Arrain haztegiak. Birpopulatzeko eta ustiatzeko piszikultura. Salmonidoen haztegiak. Arrain birpopulazioak. Ehizagaien haztegiak: mendi eperren eta untxien haztegiak. Ehiza espezieen birpopulatzea barruti intentsiboetan.

Oharra: arlo guztietako gaiak deialdi hau Nafarroako ALDIZKARI OFIZIALean argitaratzen den egunean indarra duen legeriaren arabera azaldu beharko dira.

Iragarkiaren kodea: F0818327