Iragarkia

133. ALDIZKARIA - 2008ko urriaren 31

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Publikoaren Eskaintza, oposizioak eta lehiaketak

DEIALDIA, Nafarroako Administrazio Publikoaren Institutuko zuzendari nagusiak urriaren 17an emandako 184/2008 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko antolaketako goi mailako teknikari izateko hiru lanpostu oposizio bidez betetzeko.

Nafarroako Administrazio Publikoaren Institutuko zuzendari nagusiak, urriaren 17ko 184/2008 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko antolaketako goi mailako teknikari izateko hiru lanpostu oposizio bidez betetzeko deialdia onetsi zuen.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako oinarriak.

OINARRIAK

1.-Deialdiaren xedea.

1.1. Deialdi honen xedea da antolaketako goi mailako teknikari izateko hiru lanpostu oposizio bidez betetzea. Funtzionarioen araubidekoak eta A mailakoak dira, Iruñean aritzekoak eta txanda hauetan banaturik daude:

-Lanpostu bat txanda irekian.

-2 lanpostu igoera txandan.

1.2. Hauek dira eskaintzen diren lanpostu hutsak:

-3 Lehendakaritza, Justizia eta Barne Departamentuan. Zenbakiak plantilla organikoan: 939, 3756 eta 7473.

1.3. Igoera txandako lanpostuak hutsik geldituz gero, izangaiek hautaprobak gainditzeko behar den gutxieneko puntuazioa atera ez dutelako, txanda irekikoei gehituko zaizkie.

Bestaldetik, igoera txandan hutsik dauden lanpostuak baino izangai gehiagok gainditzen badute, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, txanda irekiko lanpostuak eskuratzeko aukera izanen dute, aurreko lerroaldean adierazitako moduan, agiriak aurkezteko deialdiaren 7.2 oinarrian ezartzen den epea bukatzen denean deialdiaren 2.1.2 oinarriko eskakizun berariazkoak betetzen ez dituzten igoera txandako izangaiek.

1.4. Lanpostuek A mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.5. Halaber, deialdiaren bidez hautaprobak gainditu bai, baina lanposturik lortzen ez duten izangaiekin aldi baterako kontratatuak izateko izangaien zerrenda hauek osatuko dira, deialdi honen 10. oinarrian xedatutakoarekin bat:

a) Hautapen prozesuko ariketa guztiak gainditu bai baina lanposturik lortu ez duten izangaien zerrenda, bat bera Foru Komunitateko Administrazioko departamentu eta erakunde autonomo guztientzat.

b) Aldi baterako kontratua egiteko izangaien zerrenda, oposizioan azken bigarren ariketa gainditu eta lanposturik gabe aprobatuak izan ez direnekin osatua, Administrazio Erroko eremuan aldi baterako kontratatzeko.

2.-Betebeharrak.

2.1. Oposizio honetan onartuak izateko, izangaiek, eskaerak aurkezteko epea amaitzen den egunean eta agiriak aurkezteko epea amaitzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak:

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek parte hartzen ahal dute, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea.

c) Lizentziadun, ingeniari edo arkitekto titulua edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lortutako tituluak badira, homologazioaren egiaztagiria eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko ezgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren estatuko funtzio publikoan sartzea eragozten dien diziplina zehapenik edo zigor penalik ez dutela.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko atalean adierazitako betebeharrez gain, hauek bete beharko dituzte:

a) Nafarroako edozein Administrazio Publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio Publikoetan bost urteko antzinatasun onartua izatea, Nafarroako Polizia Kidegoetako kideen kasuan izan ezik, horiek frogatu beharko baitute zortzi urtez eman dituztela zerbitzuak kidego horietan.

Nafarroako Administrazio Publikoetan lan egiten duten langileen Estatutuaren zortzigarren xedapen gehigarrian ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiaren 3.3 oinarriaren hirugarren puntuan aipatzen den salbuespena salbuespen, izendatuak izateko proposatzen diren izangaiek deialdiaren 7.2 atalean ezarritako epean eta moduan frogatu beharko dituzte betebehar horiek.

3.-Eskabideak.

3.1. Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea, 2, 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako ALDIZKARI OFIZIALean argitaratu zen, urtarrilaren 30ean) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazi diren bideetakoren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskaera posta bulego batean aurkeztuz gero, gutun-azal irekian eginen da, postako langileek, ziurtatu aurretik, data eta zigilua jar ditzaten.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuaren edozein erregistro bulegotan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko aldizkari ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskaeran eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Eskabideari, behar bezala bete ondoren, agiri hauek erantsiko zaizkio:

Bat.-Nortasun Agiri Nazionalaren fotokopia, edo izangaiaren herritartasuna eta nortasuna frogatzen dituen beste agiri baliokideren batena.

Bi.-Espedientea formalizatzeko eta azterketa eskubideetarako 25 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

-Behar den bezala betetako ordain-gutunaren bidez, Nafarroako Foru Komunitateko banku entitateetan ordaintzeko. Arestian aipatutako webgunean, deialdiaren iragarkian, ordain-gutunaren eredua dago.

-Sarrera eskudirutan edo bankuko transferentzia bidez eginez, Banestoko (Banco Español de Crédito) 0030 8124 87 0870002271 kontuan; horrelakoetan ordainagirian datu hauek jarri beharko dira nahitaez:

.Izangaiaren izen-deiturak.

.NANa/IFZ

.Ordainketa zein kontutan egiten den, haren zenbakia.

.Kontzeptua: oposizioak.

.Deialdiaren xede den lanpostua.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonek. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan-eskatzailea dela frogatzeko, enplegu bulegoak emandako agiria aurkeztu beharko du. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lanbide sustapen, prestakuntza edo aldaketarako ekintzetan parte hartzeari ere, justifikaturiko kasuetan izan ezik.

Hilabetero lanbide arteko gutxieneko soldatatik gorako diru-sarrerarik ez duela interesdunaren adierazpenaren bidez frogatuko da. Adierazpen eredua Nafarroako Gobernuko Informazio Bulegoan eskuratzen ahalko da, edo bestela Interneten bidez, arestian emandako helbidean.

Hiru.-Deialdian igoera txandan parte hartu nahi duten izangaiek, lehengoaz gainera, deialdi honen 2.1.2 oinarrian jasotzen diren eskakizunak betetzen dituztela frogatzen duen agiria gehitu beharko diote eskabideari, baldin eta Nafarroako Foru Komunitateko Administrazioa ez den Nafarroako beste administrazio publikoren bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak.

3.4. Eskaerak aurkezteko epea ezin izanen da luzatu.

3.5. Eskaeran atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskaerak aurkezteko epea bukatuta, Nafarroako Administrazio Publikoaren Institutuko Sarrerarako Hautapenaren Zerbitzuko zuzendariak, erakunde autonomoko zuzendari kudeatzaileak eskuordetuta (103/2008 Ebazpena, ekainaren 26koa) ebazpena emanen du izangai onartuen eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioak aurkezteko epea bukaturik eta haien gainean ebatzi ondoren, Administrazio Publikoaren Institutuko Sarrerarako Hautapenaren Zerbitzuko zuzendari kudeatzaileak, erakunde autonomoaren Zuzendari Kudeatzaileak eskuordetuta (103/2008 Ebazpena, ekainaren 26koa) ebazpena emanen du izangai onartuen eta baztertuen behin betiko zerrenda onesteko, eta Nafarroako ALDIZKARI OFIZIALean argitara dadila aginduko du.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5.-Epaimahaia.

5.1. Epaimahaiak kide hauek izanen ditu:

-Mahaiburua: José Luis Yanguas Urman jauna, Lehendakaritza, Justizia eta Barne Departamentuko Antolaketa eta Modernizazio Zerbitzuko zuzendaria.

-Ordezkoa: Elisa María Guallart Domench andrea, Lehendakaritza, Justizia eta Barne Departamentuko Informazio Sistema Korporatiboen Zerbitzuko zuzendaria.

-Mahaikidea: Angel Labiano Mangado jauna, Lehendakaritza, Justizia eta Barne Departamentuko Sistema, Baliabide eta Azpiegituren Ataleko burua.

-Ordezkoa: Roberto Liberal Obanos jauna, Lehendakaritza, Justizia eta Barne Departamentuko Euskarri Zentroaren Ataleko burua.

-Mahaikidea: José Domingo Server Savall jauna, Lehendakaritza, Justizia eta Barne Departamentuko Herritarren Partaidetzarako eta Arretarako Zerbitzuko zuzendaria.

-Ordezkoa: Andrés Valentín González jauna, Lehendakaritza, Justizia eta Barne Departamentuko antolaketako teknikaria.

-Mahaikidea: Nafarroako Foru Komunitateko Administrazioko Langileen Batzordearen ordezkari bat, batzordeak berak proposatua.

-Ordezkoa: Nafarroako Foru Komunitateko Administrazioko Langileen Batzordearen ordezkari bat, batzordeak berak proposatua.

-Mahaikide idazkaria: Carolina Delgado Gómez andrea, Lehendakaritza, Justizia eta Barne Departamentuko Justiziako Administrazioa Modernizatzeko Zerbitzuko zuzendaria.

-Ordezkoa: María Peña Sanz Garrido andrea, Lehendakaritza, Justizia eta Barne Departamentuko antolaketako teknikaria.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6.-Oposizioa nola eginen den.

6.1. Oposizioa 2009ko apirilean hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

Lehenengo ariketa: teoriko-praktikoa, gai zerrendako lehenbiziko zatitik zortzigarrenera bitarte, biak barne, dauden gaien gainean epaimahaiak proposatuko dituen galdera eta kasu zehatzak jorratu eta erantzun beharko dira, idatziz. Gehienez ere lau ordu izanen dira hori egiteko.

Bigarren ariketa: teorikoa. Idatziz, gai bakar bat garatu beharko dute lehiatzaileek, epaimahaiak ausaz gai zerrendako bigarren, bosgarren, zazpigarren eta zortzigarren zatietako arloen artetik aterako dituen bi gairen artean hautatzekoa. Gehienez ere bi ordu izanen dira hori egiteko.

Hirugarren ariketa: teoriko-praktikoa, gai zerrendako lehenbiziko zatitik zortzigarrenera bitarte, biak barne, dauden gaien gainean izanen da. Antolaketa kasu baten analisi osoa egin, planteamendua idatzi, izan litekeen soluzioa bilatu eta sortzen diren galderak erantzun egin beharko dira. Gehienez ere lau ordu izanen dira hori egiteko.

Laugarren ariketa: teorikoa. Idatziz, gai bakar bat garatu beharko dute lehiatzaileek, epaimahaiak ausaz gai zerrendako bederatzigarren zatiko arloen artetik aterako dituen bi gairen artean hautatzekoa. Gehienez ere ordu bat izanen da hori egiteko.

6.3. Oposizioko ariketen balorazioan 100 puntu eman daitezke gehienez ere, honela banatuak:

Lehenengo ariketa: gehienez ere 25 puntu.

Bigarren ariketa: gehienez ere 25 puntu.

Hirugarren ariketa: gehienez ere 45 puntu.

Laugarren ariketa: gehienez ere 5 puntu.

6.4. Oposizioko ariketak baztergarriak izanen dira. Baztertuta geldituko dira lehenbiziko, bigarren, hirugarren eta laugarren ariketetan gehieneko puntuazioaren erdia gutxienez lortzen ez duten izangaiak.

6.5. Ariketa guztiak plika sistemaren bidez eginen dira.

6.6. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.7. Ariketa bakoitzerako deialdi bakarra eginen da. Izangaiek aldean izan beharko dute Nortasun Agiri Nazionala, pasaportea, gidabaimena edo epaimahaiaren iritziz identifikaziorako balio duen beste agiriren bat. Azterketara agertzen ez direnak edo arestian aipatutako agirietako baten bidez beren nortasuna frogatzen ez dutenak oposiziotik baztertuko dira.

6.8. Hautaprobak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7.-Probak gainditu dituztenen zerrenda, izendapen proposamena eta agirien aurkezpena.

7.1. Azken ariketaren kalifikazioa bukaturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, egin direneko tokian eta Nafarroako Gobernuaren iragarki oholean. Gero, zerrenda hori Nafarroako Administrazio Publikoaren Institutuko zuzendari kudeatzaileari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Gertatzen diren berdinketetan, hirugarren ariketan puntu gehien lortzen dituztenen alde joko da eta berdinketak badirau, beste ariketetan lortutako puntuak hartuko dira aintzakotzat, ariketen hurrenkerari jarraituz.

7.2. Izendapen proposamena Nafarroako ALDIZKARI OFIZIALean argitaratu ondoko hogeita hamar egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu beharko dituzte Nafarroako Administrazio Publikoaren Institutuko Sarrerarako Hautapenaren Zerbitzuan:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiaren 2.1.1.c) oinarrian eskatzen den tituluaren fotokopia konpultsatua, edo lortzeko eskubideak pagatu direla frogatzen duen gordekinarena edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuen Prebentziorako Atalak emandako txostena, interesdunak karguan aritzea eragotziko liokeen eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Izangaiek Espainiako nazionalitatea ez badute, agiria aurkeztu beharko dute, beren estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

e) Zin egin edo hitz ematea Nafarroako Foru Eraentza errespetatu, Konstituzioari eta legeei men egin eta karguari dagozkion eginkizunak zuzen beteko dituela.

Deialdi hau egin ez duen Nafarroako beste Administrazio Publikoren bateko langile finko, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarri buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiak:

a) Deialdiaren 2.1.1.c) oinarrian eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, haien eskabidearen faltsukeria dela eta, legokiekeen erantzunbeharra galarazi gabe.

7.4. Aurreko atalean ezarritakoa gertatuz gero, Nafarroako Administrazio Publikoaren Institutuko zuzendari kudeatzaileak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

7.5. Deialdiaren beharrezko betebehar eta baldintzez gain, Funtzio Publikoaren Zuzendaritza Nagusiak, bere eskurantzak erabiltzeko, beste edozein agiri eskatu diezaioke izangaiari, eta honek aurkeztu beharko ditu deialdi honen 7.2. oinarrian ezarritako moduan.

8.-Lanpostu hutsak hautatzea.

8.1. Aurreko oinarrian xedatu dena betetzen duten izangaiek Nafarroako Administrazio Publikoaren Institutuak (NAPI) hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hautaprobak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, %33ko ezgaitasun aitortua edo handiagoa duten izangaiek lehentasuna izanen dute txanda irekiko izangaien aurretik.

Ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9.-Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, antolaketako goi mailako teknikari izateko lanetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko ditu izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan ezarritakoaren babesean.

Aurrekoa gorabehera, Nafarroako administrazio publikoen zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein mutualitatetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko mutualitatean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den arautegian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da, eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta behar bezain ongi arrazoitutako kasuetan izan ezik, izangairen batek ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data horretan beste administrazio publiko batean ari delako, kasuko lanpostu hutsa ere beteko da deialdiaren 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10.-Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta oinarri honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

a) Hautapen prozesuko ariketa guztiak gainditu bai baina lanposturik lortu ez duten izangaien zerrenda, bat bera Foru Komunitateko Administrazioko departamentu eta erakunde autonomo guztientzat.

b) Hautapen prozesuko azken bigarren ariketa gainditu bai eta probak gainditu arren lanposturik lortu ez duten izangaiak ez direnen zerrenda, Administrazio Erroan aldi baterako kontratatzeko.

10.2. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azken bigarren ariketa gainditu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

-Deialdiaren 2.1.1.c) oinarrian eskatzen den tituluaren fotokopia konpultsatua, titulua lortzeko eskubideak pagatu direla frogatzen duen gordekinarena edo sarrera prozesurako eskabideak aurkezteko epean titulua eskuratzeko moduan dagoela frogatzen duen ziurtagiria.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatik izan litezkeen eskubide guztiak galduko dituzte, betiere, parte hartzeko eskabidea faltsutzeagatik legokiekeen erantzukizuna deusetan ukatu gabe.

10.3. Sarrera prozedurako eskabideak aurkezteko epea bukatzen den egunerako bete beharko dira baldintzak, eta hautaprobek dirauteino eta kontratazioaldiak iraun bitarte bete beharko dira.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrendak onetsiko dira eta Nafarroako Gobernuaren iragarki oholean argitaratuko (Karlos III.aren etorbidea, 2, atalondoa, Iruña).

10.5. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11.-Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren eta oinarrien kontra eta oinarriak aplikatzeko egintzen aurka, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat, eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2008ko urriaren 17an.-Nafarroako Administrazio Publikoaren Institutuko zuzendari kudeatzailea, Ignacio Bandrés Urriza.

I. ERANSKINA

Eskaera

Nafarroako Gobernua. Lehendakaritza, Justizia eta Barne Departamentua. Nafarroako Administrazio Publikoaren Institutua.

Izena: ................................, adinez nagusia. Nortasun Agiri Nazionala: .............. (edo horren baliokidea den nortasun agiriarena): ..........., jaioteguna: ..........., jaioterria: ............., nazionalitatea: ................, oraingo helbidea: ......................., posta kodea: ................., etxeko telefonoa: ..............................., lantokiko telefonoa: ...............................

Honako hau azaltzen dut:

Nafarroako Foru Komunitateko Administrazioaren eta haren erakunde autonomoen zerbitzuko .............. izateko ............... lanpostu .................... bidez betetzeko deialdian parte hartzeko onar nazatela eskatzen dudala, ondoko txandan (deialdia ...... zenbakiko Nafarroako ALDIZKARI OFIZIALean argitaratu zen, .........(e)an).

f Txanda irekia

f Igoera txanda.(*)

f Ezgaitasunen bat dutenendako txanda (*)

Hautaprobak gainditzen ez baditut, lanpostuak behin-behinekoz betetzeko aukeraz baliatu nahi dudala, esparru hauetakoren batean (deialdiko 1. oinarrian ezarritakoarekin bat):

f Administrazio erroa

f Osasunbidea-Nafarroako Osasun Zerbitzua (*)

f Nafarroako Mendekotasun Agentzia (*)

Ez dudala karguan aritzea galarazten didan eritasunik edo akats fisikorik nahiz psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik bereizia izan eta ez nagoela desgaitua eginkizun publikoak betetzeko.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskaerak aurkezteko epearen azken egunean beharkizun guztiak betetzen ditudala.

f Ezgaitasuna dudala eta, horrenbestez, orri bereizi batean adierazten ditudan denbora eta baliabide egokitzapenak eskatzen ditudala.

f Ezgaitasuna frogatzen duen agiria aurkezten dudala, erakunde eskudun batek emana.

f Euskararen gaitasunaren agiria edo ofizialki baliokidea den beste titulu bat aurkezten dudala. (*)

f Euskara maila erakusteko proba egitea eskatzen dudala. (*)

f Frantseseko eta ingeleseko nahikotasun probak egitea eskatzen dudala. (*)

Horrenbestez,

Eskaera hau ontzat hartu eta aipatu deialdian onartua izatea eskatzen dut.

Iruñean, ..........(e)ko .............aren ............(e)an.

(Sinadura)

(*) (bidezko denean, bakarrik).

II. ERANSKINA

Gai zerrenda

Lehen zatia

Antolaketa eta Administrazio Publikoaren Teoria.

1.-Antolaketa eta Administrazio Publikoaren Teoria. Erakunde publikoen tamaina eta osagarriak.

2.-Egitura administratiboen oinarrizko osagaiak: Egitura administratibo baten oinarrizko tamainak. Sorrera. Disfuntzioak. Bestelako ereduak. Mintzberg-en eskema kontzeptuala.

3.-Langile publikoen antolaketa: Ezaugarri orokorrak. Langileekiko politika, kudeaketa eta administrazioa. Faktore kritikoak eta adierazleak. Motibatzeko estrategiak.

4.-Administrazioaren eginkizunak eta prozesuak: administrazio publikoen oinarrizko eginkizunak. Eginkizunen azterketa. Administrazio prozesuak: azterketa eta arrazionalizazioa, adierazpen grafikoa eta euskarri dokumentala. Prozeduraren gaineko eskuliburuak.

5.-Erakunde publikoak zerbitzu prestatzaile gisa eta kudeaketa publikoaren paradigma berriak. Zerbukzioa bideratzeko oinarrizko osagaiak. Zerbitzuen kudeaketa operatiboaren ikuspegia. Zerbitzuak kanporatzea. Zerbitzuak sortzea eta kudeaketa publikoaren paradigma berriak.

6.-Erakunde informala eta liskarra antolaketa publikoetan. Erakundeak sistema politikoak diren aldetik. Botere sareak antolaketa publikoetan. Liskarrak. Antolaketa informala.

7.-Administrazio Publikoaren antolaketazko kultura. Antolaketazko kulturaren ikuspegi eta kontzeptuak. Ezaugarriak eta osagaiak. Antolaketazko kultura eta aldaketa.

8.-Kontrol eta informazio sistemak erakunde publikoetan. Kontrolaren nondik norakoak Administrazio Publikoan. Kudeaketa kontrola eta zuzendaritzako koadroak. Antolaketaren tamainaren kontrola.

9.-Antolaketaren aldaketa: erakunde publikoen biziaren zikloa. Bizi zikloen ereduak. Erakundeen mugimendu pendularra. Antolaketaren aldaketa interpretatzeko ereduak.

10.-Antolaketa hobetzeko estrategiak. Aldaketaren eragileak. Aldaketen estrategia handiak: administrazioa gaurkotzeko prozesuak. Aldaketen estrategia txikiak: auditoretza operatiboaren metodoa.

Bigarren zatia

Proiektuak zuzendu eta kudeatzea.

1.-Proiektuak zuzendu eta kudeatzeko sarrera: Proiektu motak. Tamainak.

2.-Proiektu baten faseak: Aukerak bilatzea. Eskaintzaren prestakuntza. Aurkezpena eta esleipena. Lanak burutzea. Ixtea.

3.-Kudeaketa eta zuzendaritza: zuzendaritza, kudeaketa, administrazioa eta parte hartzea. Kudeaketa estrategikoa, administratiboa eta operatiboa. Kudeaketaren xarma.

4.-Aukerak bilatzea.

5.-Bezeroak, merkatuak eta produktuak.

6.-Aukera komertzialak.

7.-Lehiaketak: helburuak. Publizitatea. Plegua. Abantailak eta eragozpenak. Lehiaketak.

8.-Proiektuaren ebaluazioa.

9.-Proiektuaren kostua eta prezioa zenbatestea. Egin beharreko lanaren azterketa. Behar den ahalegina. Bestelako kostu eta gastuak. Proiektuaren aurrekontua eta saltzeko prezioa.

10.-Proiektuaren denborazko plangintza: Plangintzako teknikak. PERT teknikak.

11.-Proiektuaren plan finantzarioa.

12.-Eskaintzen prestakuntza.

13.-Proiektuaren jarraipena: baliabideak abiarazi, antolatu eta metatzea. Informazioa trukatzea.

14.-Bilerak: deialdia eta garapena.

15.-Proiektuaren kudeaketa, egunez egun: ekintzen egoera. Aurrerapen teknikoa eta ekonomikoa. Proiektuaren egoeraren txostena.

16.-Produktuak: dokumentazioa. Sorturiko produktuak.

17.-Proiektuaren barruko aldaketak: Proposamen arrazoitua. Azterketa eta ebaluazioa. Baimendu edo baztertzea. Ezarri eta haren jarraipena egitea. Aldaketen egoeraren erregistroa.

18.-Beste jarduera batzuk. Pertsonen arteko liskarrak. Proiektuaren interfazak. Erabakiak.

19.-Proiektua ixtea.

20.-Onarpena.

21.-Proiektuaren ixtearen txostena: balantzea. Proiektuaren ixtearen laburpena. Sorturiko dokumentazioa.

22.-Proiektuaren emaitzen adierazle objektiboak: ekonomikoak. Finantzarioak. Ohiko lana. Kudeaketa.

23.-Kudeaketa hirugarren milurtekoan.

Hirugarren zatia

Administrazioa helburuen arabera.

1.-Administrazioa bere helburuei begira: sarrera. Administrazioaren eginkizuna. Eginkizunak eta gako-jarduerak.

2.-Ikuspegi kontzeptuala: administrazioa helburuen arabera. AHAren bilakaera. AHA sistema gisa. AHAren hizkuntza.

3.-Xede eta helburuak: goi mailako kudeatzailetzaren eginkizunak. Irispide luzeko helburuak eta estrategia planak. Antolaketazko helburu berariazkoak. Departamentuen helburuak.

4.-Norberaren lan-helburuak: lan-helburuen izaera. Laneko helburuak jartzeko prozesua. Jarraibideak.

5.-Ekintzaren plangintza: ekintza planen premia. Ekintza plan baten garapena. Administrazioaren erantzukizuna. Agintaritzaren sostengua.

6.-Ezarpena eta autokontrola: kudeaketaren kontrola autokontrolaren bidez. Giza premia eta pizgarriak. Pizgarrien administrazioa. AHA sistemetan nola hartu parte.

7.-Berrikuspena eta ebaluzioa: lanaren ebaluazioa egiteko premia. AHAren aldizkako berrikuspena: prozesuaren ebaluazioa. Banakako berrikuspena: egiten den lanaren ebaluazio globala. Problemak eta ondorioak.

8.-Gako-harremanak: kudeatzaileak bere burua trebatzeko eta prestatzeko prozesua. Kudeatzailearen konpentsazioa. Karreraren eta langileen plangintza.

9.-AHA sistema ezartzeko prozesua: problema praktiko batzuk. Kudeatzailetza aldaketak dirauen bitartean. Ikusmolde tradizionalak: kasu baten azterketa. Ondorioak.

Laugarren zatia

Erabateko Kalitatearen Kudeaketa Administrazio Publikoan.

1.-Ezagutza eta haren kudeaketa sektore publikoan. Garapenaren etapak: aldaketa materiala eta aldaketa soziala. Ekoizpenaren faktoreen eragina. Teknologiaren kontzeptua eta zeregina. Administrazio Publikoen tamaina; arrazoiak.

2.-Administratzeko eginkizuna: administratzeko arteari egindako ekarpenak. F.W. Taylor: iraultza mentala eta agintaritzaren aniztasuna. H. Fayol eta kontingentzia. E. Mayo eta giza harremanak. W. Weber eta burokrazia. Behaviorismoa. Administrazio Publikoaren kultura. Afera publikoen berezitasunak. Hautapen publikoaren teoria.

3.-Erakundeen egitura. Erakundearen kontzeptua. Erakunde egituren diseinua eta motak. Erakundearen egitura eta kontingentzia.

4.-Kalitatearen kontzeptua. Zer da kalitatea? Kalitatea, norendako? Kalitate hautemana, sortua eta burutua.

5.-Zerbitzuak eta prozesuak. Zerbitzuak eta "zerbukzioa". Zerbitzuen eta produktu fisikoen arteko desberdintasunak. Zer dago zerbitzu baten prestazioaren atzean? Prozesuak.

6.-Erabateko kalitatea kudeatzeko eredua. Antolaketaren kontzeptua erabateko kalitatearen kudeaketaren arabera. Zer da erabateko kalitatearen kudeaketa? Erabateko kalitatearen kudeaketa eta antolaketaren kultura. Erabateko kalitatearen kudeaketaren kulturaren oinarriak. Deming-en 14 puntuak.

7.-Hobekuntzak aurrera doaz. Shewharten zikloa. Bikaintasuna erdiesteko etapak: kontrola, aseguramendua eta erabateko kalitatearen kudeaketa. Erabateko kalitatearen kudeaketaren egokitasuna.

8.-Erabateko kalitatearen kudeaketa Administrazio Publikoetan ezartzeko esperientzia. Erabateko kalitatearen kudeaketaren jatorria. Zerbitzu publikoak hobetzeko joerak. Erabateko kalitatearen kudeaketa Administrazio Publikoan ezartzeko ekimenak. Benchmarking. Haiek egokitzea esparru publikoari. Espainiako administrazio publikoa eta erabateko kalitatearen kudeaketa.

9.-Diagnostikoa. Zer da diagnostikoa egitea? Sariak kalitateari, diagnostikorako tresnak diren aldetik. Administrazio Publikoaren ezaugarriak EFQMren arabera.

10.-Sariak kalitateari. Europako kalitate saria sektore publikoan. Ebaluatzeko bideak. Lehendakaria saria.

11.-Kalitatearen ziurtaketa eta kontrola: arauak. ISO kalitate ereduak. Egokiena nola hautatu. ISO 9004 arauak. Antzekoak dira EFQMren eta ISO arauen bikaintasun ereduak?

12.-Herritarren nahiak: herritarren nahiak eta administrazio publikoa. Nola ezagutu herritarren nahiak? Inkestak eta haien prestaera. Kexak. Informazio sistema.

13.-Kalitatea planifikatzea: Aurreikusi eta planifikatzea. Alderdi orokorrak. Plangintza prozesua. Kalitatearen arloko helburuak eta horien hedapena.

14.-Hautemandako kalitatea eta zerbitzuen gutunak. Hautemandako kalitatearen dimentsioak edo ezaugarri nagusiak. Herritarrendako zerbitzuen gutunak. Nola neurtu? Zer adierazle erabili.

15.-Prozesuak eta administrazio publikoa: Prozesuaren kontzeptua. Prozesuen diseinua. Prozesu ahalmena eta kontrol egoera. Prozesu motak.

16.-Arauak: arauak Estandarrak eta indizeak. Arauen erredakzioa eta eginkizuna. Administrazio Publikoa eta prozesuak. "Empowerment" arazoa.

17.-Erabateko kalitatearen kudeaketa ezartzea Administrazio Publikoan: posible da ezartzea? Erabateko kalitatearen kudeaketaren bideragarritasuna Administrazio Publikoan. Zuzendaritza nola konbentzitu. Erabateko kalitatearen kudeaketaren mailak eta erakundeak. Ezartzeko etapak.

18.-Kalitaterako tresnak. Tresna bat zer den. Kaizen-en tresnak. Zazpi tresna estatistikoak. Zazpi tresna berriak. Bestelako tresnak.

Bosgarren zatia

Antolaketa informazioaren aroan.

1.-Negozioaren eginkizun eta prozesuak: eginkizunak. Negozioaren prozesuak. Enpresa baten prozesuen identifikazioa.

2.-Balioaren sistema. Prozesuen fluxuen diagramak.

3.-Prozesuen berrikuntza. Aldaketaren eragileak. Lortu nahi diren helburuak. Aldatzeko prozesua.

4.-Erabateko berrikuntza eta prozesuen berringeniaritza: Berrikuntza. Berritu beharreko prozesuak identifikatzea. Aldaketarako palankak. Teknologia. Prozesu berriaren ikusmena. Prozesu berriaren diseinua. Prototipoa. Prozesuen berringeniaritzarako tresnak. Ondorioak kudeaketari begira.

5.-Informazioaren Teknologiek eragindako egitura aldaketak: esparru kontzeptuala. Erakundearteko sistema bakunak.

6.-Merkatu elektronikoak: produktu homogeneoak. Produktu bereiziak. Lankidetza estrategikoa. Ondorioak antolaketari begira.

7.-Aldaketa eta ikastea: Nola berritu: erradikaltasuna eta ikastea. Testuinguruko hobekuntza motak. Ondorioak.

8.-Aldaketaren ezarpena: Aldaketa programak ezartzeko ikuspegiak. Esparru kontzeptuala.

9.-Negozio unitateak antolatzeko moduak: Alboko unitateak eta unitate funtzionalak. Antolaketarako beste modu batzuk.

10.-Lanaren antolaketa: Inbolukrazioa. Talde lana eta lan taldeak.

11.-Lanaren koordinazioa. Antolaketa ereduak informazioaren garaian.

Seigarren zatia

Estrategia eta informazio sistemak.

1.-Informazio sistemak enpresan. Enpresa baten informazio sistema (IS) zer den. IS eta balioaren katea. IS eta enpresaren gainerako sistemak.

2.-Informazio teknologien (IT) eginkizuna.

3.-Datu baseak enpresako datuen egitura gisa. Zentralizazioa eta deszentralizazioa. Erabakiak hartzeko laguntza.

4.-Informazio teknologia eta sistemak. Ondorioak zuzendaritzari begira.

5.-IT/IS-ren plangintza, negozioaren estrategiatik abiaturik. Prozeduraren eskema orokorra. Faseak.

6.-Informazio sistemak negozioko estrategiarekin paraleloan planifikatzeko prozedurak: Ondorioak zuzendaritzari begira.

7.-Informazio sistemen plangintza korporazioaren mailan: oinarri kontzeptualak.

8.-Estrategia korporatiboa ezartzea: Ondorioak antolaketari begira.

9.-Informazio sistemen plangintza korporazioaren mailan: Ondorioak zuzendaritzari begira.

Zazpigarren zatia

Ezagutzaren Kudeaketa.

1.-Hirugarren milurteko honetako enpresa. Informazioaren teknologien eragina. Liderraren balioa. Kultura korporatiboaren eragina. Hirugarren milurteko honetako enpresaren ezaugarriak.

2.-Kapital intelektualaren agerpena: Osagaiak eta garrantzia.

3.-"Know-How" delakoa.

4.-Lanari loturiko ezagutzak. Isileko ezagutzak. Ageriko ezagutzak. Ezagutza inplizituak. Sistema adituak.

5.-Kapital intelektualaren auditoretzen plangintza. Faseak.

6.-Kapital intelektualaren kudeaketa. Identifikazioa. Politika. Auditoretza.

7.-Kapital intelektualaren ezagutzen oinarriak. Diseinua. Prestakuntza. Hazkundea eta berrikuntza. Kudeaketa ekipoak.

8.-Ezagutzaren kudeaketa eta memoria korporatiboa. Ezagutza versus informazioa.

9.-Ezagutzaren aktiboaren oinarriaren zabalkundea erakunde batean.

10.-Kapital intelektualaren balorazioa. Arrazoiak.

Zortzigarren zatia

Aginte postua.

1.-Neurketa eta kudeaketa informazioaren garaian. Lehia informazioaren garaian. Kontabilitate finantzarioaren eredu tradizionala. Aginte osoko postua.

2.-Zergatik behar dute enpresek aginte osoko postu bat: Adierazle finantzarioak. Aginte osoko postua. Adierazleak lotzea estrategia bakar bat osatzeko. Aginte osoko postu baterako antolaketazko unitatea.

3.-Ikuspegi finantzarioa: helburu finantzarioak eta negozio unitatearen estrategia elkarrekin nola lotu.

4.-Bezeroen ikuspegia: merkatuaren zatiketa. Denbora, kalitatea eta prezioa.

5.-Barne prozesuko ikuspegia: barne prozesuko balio katea.

6.-Ikasi eta hazteko ikuspegia. Langileen gaitasuna. Langileei buruzko gako-adierazleak. Plantilla hobetzea. Informazio sistemen gaitasuna. Motibazioa, agintaritzaren eskuordetza eta helburuen koherentzia.

7.-Aginte osoko postuaren adierazleak eta haren estrategia elkarrekin lotzea.

8.-Egitura eta estrategia. Negozio unitatea korporazioaren estrategiaren aurrean. Gai eta eginkizun korporatiboak. Enpresa elkartuak eta elkarteak. Gobernuaren enpresak eta irabazi asmorik gabeak.

9.-Lerrokadura estrategikoa lortzea: goitik behera. Hezkuntza eta komunikazio programak. Aginte osoko postua pertsonen eta taldearen helburuekin lotzea. Pizgarri sistemen lotura.

10.-Helburuak, baliabide banaketa, ekimenak eta aurrekontuak. Helburuak ezartzea. Ekimen estrategikoak identifikatzea.

11.-"Feedback" delakoa eta prestakuntza estrategikoaren prozesua. Aginduetatik eta kontroletik prestakuntza estrategikora. Estrategia ikasteko prozesu baterantz. "Feedback" estrategikoa. Arazoak konpontzeko taldea.

12.-Aginte osoko postua kudeatzeko programa bat ezartzea. Aginte osoko postuko programa abiaraztea. Dinamika: erakundea mugiaraztea. Kudeaketa integratuko sistema baten eraikuntza.

Bederatzigarren zatia

Arautegia.

1. gaia.-Espainiako 1978ko Konstituzioa: Estatuko aginteak. Koroa. Gorte Nagusiak. Gobernua eta Administrazioa. Botere judiziala Konstituzioan.

2. gaia.-Zuzenbide Publikoaren iturburuak: legeak eta lege motak. Lege-dekretuak. Legegintzako foru dekretua. Nazioarteko itunak.

3. gaia.-Administrazio zuzenbidearen iturburuak: erregelamendua eta erregelamendu-ahalmena. Erregelamendu motak. Erregelamendu-ahalmenaren mugak eta haren kontrola.

4. gaia.-Administrazio egintza (I): kontzeptua, motak eta elementuak.

5. gaia.-Administrazio egintza (II): administrazio egintzen baldintzak, eraginkortasuna, deuseztasuna eta deuseztagarritasuna.

6. gaia.-Administrazio prozedura erkidea (I): kontzeptua eta izaera. Hasiera, antolamendua, instrukzioa eta bukaera.

7. gaia.-Administrazio prozedura erkidea (II): Administrazioarekiko errekurtsoak: printzipio orokorrak eta motak.

8. gaia.-Nafarroako Parlamentua edo Gorteak: osaera, antolaketa eta eginkizunak.

9. gaia.-Nafarroako Gobernuari eta Lehendakariari buruzko Foru Legea.

10. gaia.-Nafarroako Foru Komunitateko Administrazioari buruzko Foru Legea.

11. gaia.-Nafarroako Foru Komunitateko arartekoa. Comptos Ganbera. Nafarroako Kontseilua.

12. gaia.-Nafarroako administrazio publikoen zerbitzuko Langileen Estatutua (I): langile motak. Funtzionario publikoen hautapena. Funtzionario bihurtu eta izatetik gelditzeko modua.

13. gaia.-Nafarroako administrazio publikoen zerbitzuko Langileen Estatutua (II): karrera administratiboa. Egoera administratiboak. Lanpostuak betetzea. Ordainsariak.

14. gaia.-Nafarroako Ogasun Publikoa: Nafarroako Ogasun Publikoaren eskubide eta betebeharrak. Nafarroako aurrekontu orokorrak: edukia eta onespena; gastuen sailkapen ekonomikoa; betearaztea eta likidazioa.

15. gaia.-Ekainaren 9ko 6/2006 Foru Legea, Kontratu publikoei buruzkoa: aplikazio esparrua. 6/2006 Foru Legeko kontratuen definizioa. Administrazio Publikoko kontratuen sailkapena. Araubide juridikoa. Kontratuak esleitu, hobetu, sinatu, bete, aldatu, iraungi edo baliogabetzeko arau orokorrak.

16. gaia.-11/2007 Foru Legea, apirilaren 4koa, Foru Komunitateko Administrazioan administrazio elektronikoa ezartzekoa.

Oharra.-Gai guztiak deialdi hau Nafarroako ALDIZKARI OFIZIALean argitaratzen denean indarra duen legeriari jarraikiz baloratuko dira, baina egun horren ondoren onetsitako arau aldaketen ekarpenak baloratzen ahalko ditu epaimahaiak.

Iragarkiaren kodea: F0815854