133. ALDIZKARIA - 2008ko urriaren 31

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

740/2008 EBAZPENA, irailaren 19koa, Arriskuen Prebentziorako eta Lanaren zuzendari nagusiak emana, "Taller de Comunicación Saioa, S.L." enpresaren lan hitzarmen kolektiboaren testua erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 81/2008).

Departamentu honetan 2008ko irailaren 17an sartu da "Taller de Comunicación Saioa, S.L." enpresaren lan hitzarmen kolektiboaren testua, 48 artikuluz eta xedapen iragankor batez osatua, enpresaren ordezkariek eta langileen ordezkariak (UGT) 2008ko irailaren 8an izenpetu eta onetsi dutena.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera. Eginkizun haiek martxoaren 24ko 1/1995 Legegintzako Errege Dekretuaren 90. artikuluan ezarrita daude. Horiek horrela, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Horiek horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,

EBATZI DUT:

1. Cordovillako 'Taller de Comunicación Saioa, S.L." enpresaren lan hitzarmen kolektiboa erregistratzea (kodea: 3108812) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2008ko irailaren 19an.-Arriskuen Prebentziorako eta Lanaren zuzendari nagusia, Imelda Lorea Echavarren.

"TALLER DE COMUNICACION SAIOA, S.L." ENPRESAREN 2008-2010 URTEETARAKO LAN HITZARMEN KOLEKTIBOA

I. KAPITULUA

Eremua eta indarraldia

1. artikulua. Langile eremua.

Hitzarmen honek eraenduko ditu "Taller de Comunicación Saioa S.L." enpresarentzat zerbitzuak ematen dituzten langile guztiak.

Ondokoak bazter utzi dira berariaz:

a) Kontseilariak eta goi mailako zuzendaritzako langileak.

b) Beren kontura eta arriskura egindako zerbitzuengatik legedi zibilaren edo merkataritzako legediaren arabera kontratatutako profesionalak.

c) Enpresarekin lan-harremana baztertuta duen kontratu zibil edo merkataritzakoa duten korrespontsal edo laguntzaileak.

d) Piezako laguntzaileak, eta orokorrean hierarkiaren, besterentasunaren eta mendekotasunaren printzipioetan oinarritutako loturarik ez duten laguntzaileak, enpresarekin harreman iraunkorra badute ere.

e) Aholkulariak.

f) Jarduera berbera edo bestelakoa duten beste enpresa batzuk ere ordezka ditzaketen merkataritzako agenteak edo publizitatekoak.

2. artikulua. Arau eremua.

Hitzarmen honetan ezarritako baldintzak hobe daitezkeen gutxienekoak dira beheragoko eremuetan, ondoko gaietakoak izan ezik, horiek beste eremu batzuetan aldaezinak izanen baitira:

-Probaldiak.

-Diziplina araubidea.

3. artikulua. Indarraldia.

Hitzarmen honek 2008ko urtarrilaren 1ean hartuko du indarra, Nafarroako ALDIZKARI OFIZIALean edonoiz argitaratzen dela ere, eta 2010eko abenduaren 31ra arte iraunen du.

4. artikulua. Amaieraren iragarpena.

Hitzarmenaren amaiera idatziz iragarriko da, amaitu baino hiru hilabete lehenago, gutxienez.

Aurreikusitako epea igarotakoan, eta aldeetako batek ere berariaz idatziz amaiera iragarri ez badu, besterik gabe luzatutzat joko da behartze-baldintzei eta arautze-baldintzei dagokienez.

5. artikulua. Zatiezintasuna.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira.

6. artikulua. Berme pertsonala.

Hitzarmenean ezarritakoa orokorrean gainditzen duten egoera pertsonalak errespetatu eginen dira, eta bakar-bakarrik "ad personam" mantenduko, baldin eta guztiak aztertu ondoren, ezarritakoak baino onuragarriagoak badira langilearentzat.

7. artikulua. Konpentsazioa eta irenspena.

Hitzarmen honetan itundutako baldintzak irensten eta konpentsatzen ahal dira langileak jasotzen dituen soldatak, oro har eta urteko konputuan, eta langileak dituen gainerako baldintzak hitzarmen honetan finkatutakoak baino hobeak badira.

II. KAPITULUA

Lanaren antolaketa

8. artikulua. Lanaren antolaketa eta zuzendaritza.

Lanaren antolaketa teknikoa eta praktikoa enpresari dagokio, ez beste inori.

Langileen ordezkariak Enpresako Zuzendaritzarekin lankidetzan arituko dira, produktibitatea mantentzen eta handitzen laguntzeko neurriak ezarri ahal izateko.

9. artikulua. Lanbide prestakuntza lantokian.

Langileak lanaldi arrunta egokitzeko eskubidea izanen du lanbide prestakuntzako ikastaroetara joan behar badu, edo lanbide prestakuntza edo hobekuntzarako baimena lortzeko lanpostua gordeta.

III. KAPITULUA

1.-Xedapen orokorrak

10. artikulua. Praktikaldiko kontratuak.

Unibertsitateko edo lanbide heziketako titulazio bat dutenek praktikaldiko lan kontratua hitzartzen ahalko dute beren ezagutzak hobetzeko eta egindako ikasketen mailara egokitzeko.

Praktikaldiko lan kontratua betiere idatziz eginen da. Bertan langilearen titulazioa, lan egiteko baldintzak, iraunaldia eta praktiken xedea adieraziko dira.

Kontratuaren iraupena gutxienez sei hilabetekoa izanen da eta gehienez bi urtekoa. Praktikaldiko kontratua amaitzean, enpresak ziurtagiri bat eginen du. Bertan kontratuaren iraupena, egindako praktiken ezaugarriak eta lortutako maila agertuko dira.

11. artikulua. Prestakuntza kontratuak.

Prestakuntza kontratuak 16 urtetik gorako eta 21 urtetik beherako langileekin egiten ahal izanen dira.

Legearen arabera beharrezkoa denean, langilearen gurasoen edo legezko ordezkarien baimena eskatuko da. Kontratu hori betiere idatziz eginen da. Bertan iraupena, lanaldia, dagokion edo hitzartu den ordainsaria, egin beharreko prestakuntza eta bete beharreko lanpostu kualifikatua adieraziko dira.

Laneko prestakuntzarako kontratuak gehienez bi urte iraunen du, eta gutxienez urtebete.

12. artikulua. Lanaldi partzialeko kontratuak.

Lanaldi partzialeko kontratuak dituzten langileek lanaldi osokoek bezalako eskubide eta baldintzak izanen dituzte.

Soldata lan egiten den orduen araberakoa izanen da.

13. artikulua. Probaldiak.

Probaldi bat hitzartzen ahalko da idatziz: sei hilabete gehienez teknikari tituludunentzat eta hiru gehienez gainerako langileentzat, kualifikazio gabekoentzat izan ezik, hamabost egunekoa izanen baitute gehienez. Probaldian langilea zein lanpostu eta lanbide kategoriatan ari den, horrexeri dagozkion eskubideak eta betebeharrak izanen ditu. Aldi horretan lan-harremana bi alderdiek suntsiaraz dezakete. Probaldiak balio izanen du antzinatasunaren ondorioetarako.

Probaldian langilea aldi baterako ezintasun egoeran badago edo haurra izan, adoptatu edo familian hartu badu, denbora tarte hori ez da probaldiaren barnekotzat hartuko, aldeak ados jartzen badira, betiere.

14. artikulua. Kontratuaren iraupena.

1. Lan kontratu mugagabea edo mugatua egin ahal izanen da.

Iraupen mugatuko lan kontratuak ondoko kasuetan egiten ahalko dira:

a) Langilea obra edo zerbitzu jakin bat egiteko kontratatzen bada, enpresaren jardueren barnean autonomia izanik, eta orobat obra edo zerbitzu horiek egiteko denbora mugatua izanik ere, zehazterik ez dagoenean.

b) Merkatuaren egoerak, lanaren pilaketak edo eskaeren kopuru handiak hala eskatzen duenean, langilearen egitekoa enpresako ohiko jarduera izanik ere. Kasu horietan, kontratuen iraupena gehienez ere sei hilabetekoa izanen da hamabi hilabeteko tartean, aipatu diren arrazoiak sortzen direnetik hasita.

Lege bidez edo hitzarmenen bidez ezarrita dagoen gehieneko iraupenetik beherako kontratua egiten denean, eta bi alderdiak ados egonez gero, kontratua luzatzen ahalko da, behin bakarrik. Kontratuaren iraupen osoa ezin izanen da gehieneko iraupen hura baino luzeagoa izan.

c) Lanpostua gordetzeko eskubidea duten langileak ordezkatu behar direnean. Betiere lan kontratuan ordezkatuaren izena eta ordezkapenaren arrazoia adierazi behar dira.

2. Probaldirako lege bidez finkatzen ahal den epea igarotakoan Gizarte Segurantzan alta izan ez diren langileak langile finko bihurtuko dira, kontratazio-modalitatea edozein izan dela ere, jardueren edo kontratatutako zerbitzuen izaeratik beretik argi eta garbi ondorioztatu bada aldi baterako iraupena dutela. Hala eta guztiz ere, zuzenbidearen arabera dauden gainerako erantzukizun guztiak hartu beharko dira.

3. Lege-iruzurrean egindako aldi baterako kontratuak kontratu mugagabetzat joko dira.

4. Enpresaburuak langileen legezko ordezkariei artikulu honetan aurreikusitako iraupen mugatuko kontratazio-modalitateen arabera egindako kontratuen berri eman beharko die, legearen arabera kontratu horien oinarrizko kopiarik entregatu behar ez denean.

5. Artikulu honen 2. eta 3. idatz-zatietan xedatuta dagoenaren arabera, hogeita hamar hilabetean hogeita lau hilabetetik gorako epean (etenaldiekin edo etenaldirik gabe) enpresa berarekin lanpostu bererako aldi baterako kontratu birekin edo gehiagorekin zuzenean edo aldi baterako laneko enpresen bidez eta iraupen mugatuko modalitate berdinekin edo beste batzuekin kontratatuta egon diren langileak langile finko bihurtuko dira.

15. artikulua. Kontratua aldaketa teknikoengatik amaitzea.

Kontratua arrazoi objektiboengatik iraungitzen ahalko da langilea bere lanpostuan egindako aldaketa teknikoetara moldatzen ez bada, aldaketa horiek arrazoizkoak direnean eta aldaketa gertatzen denetik gutxienez bi hilabete igaro badira. Kontratua behar den denborarako eten eginen da, gehienez hiru hilabetera arte, enpresak eskatutako moldaketarako gaitzen duen lanbide moldaketa edo hobekuntzako ikastaro bat eskaintzen duenean eskumena duen erakunde ofizialaren edo berezko erakundearen kontura. Ikastaroak irauten duen bitartean langileari jasotzen duen batez besteko soldata adinako kopurua ordainduko zaio.

IV. KAPITULUA

Mugigarritasun geografikoa eta funtzionala

16. artikulua. Mugigarritasun geografikoa.

Behar bezala egiaztaturiko arrazoi ekonomikoak, teknikoak, antolamenduzkoak edo produkzioaren ingurukoak tarteko, enpresek plantillako langile talde bat edo langile guztiak lekualdatu nahi dituztenean, Langileen Estatutuan xedatuta dagoenari jarraituko zaio tramitazioari, epeei eta baldintzei dagokienez.

Lekualdaketa, enpresaren aurretiazko onespenez, langileak eskatuta egiten denean, langileak ez du aldaketak sortzen dituen gastuengatiko kalte-ordainik jasotzeko eskubiderik.

Lekualdaketa Enpresaren eta langilearen arteko erabakiarengatik egiten bada, bi alderdiek hitzartutako baldintzak beteko dira. Dena dela, legez ezarritako baldintzak bete beharko dira.

17. artikulua. Mugigarritasun funtzionala.

1. Enpresako mugigarritasun funtzionalak ez du beste mugarik izanen lan egiteko behar diren titulazio akademikoak edo lanbide titulazioek ezarritakoak eta langile bakoitzaren lanbide taldeari dagozkionak baizik.

2. Norberaren lanbide taldetik edo kategoria baliokidetik kanpoko lanak egiteko mugigarritasun funtzionala zilegi izanen da, soil-soilik, horretarako bidezko arrazoi teknikoak edo antolamenduzkoak daudenean, eta ezinbesteko denboraz betiere. Langileari bere kategoria baino beheragoko eginkizunak ezartzekotan, bidezko arrazoiengatik eginen da, hau da, produkzio jardueran presako edo ustekabeko beharrak daudelako. Enpresaburuak egoera horren berri eman beharko die langileen ordezkariei.

3. Itunduak ez diren eta artikulu honetan azaldutako kasuetatik kanpo dauden eginkizun aldaketak egiteko, aldeen arteko adostasuna beharko da, edo bestela lan baldintzetan funtsezko aldaketak egiteko arauei men eginen zaie.

18. artikulua. Goragoko kategoriako lanak.

Hitzarmen honen eraginpeko langileek goragoko kategoriako lanak egiten ahalko dituzte, dela premiazko salbuespen-kasuetan, dela aldi baterako ezintasun egoeran, oporretan, lizentzietan, eszedentzian edo lanpostu erreserbako egoeretan dauden beste langile batzuk ordezteko. Lan horien iraupena gehienez sei hilabetekoa izanen da, eritasun edo istripuaren ondoriozko aldi baterako ezintasun egoeragatiko ordezpenaren kasuan izan ezik, orduan bajaren iraunaldi berbera izanen baitu.

Lan horrek irauten duten denboran, horretan ari diren langileek betetzen ari diren kategoriako soldata jasoko dute, eta inola ere ezinen dira irentsi soldaten kontzeptuak aldarazten dituen Hitzarmen edo legezko xedapenak aplikatuz gertatzen diren soldata diferentziak.

19. artikulua. Beheragoko kategoriako lanak.

Enpresak beharrezkotzat jotzen duenean, eta ordezkaritza sindikalari aldez aurretik jakinarazita, langile batek duen maila baino beheragoko lanetan jartzen ahal du, baina duen kategoriari dagokion ordainsariarekin.

Salbuespen kasuetan izan ezik (langileen ordezkariak ados egon beharko direla), egoera horrek gehienez hilabete iraunen du, langilearen lanbide prestakuntzari kalte ez egiteko.

Beheragoko kategoriako lanetan aritzeko eskaera langileak berak egiten badu, lan horri dagokion ordainsaria izanen du.

V. KAPITULUA

Lanaldia, ordutegia, aparteko orduak, atsedenaldia eta oporrak

20. artikulua. Lan egutegia.

Urtero, enpresaren eta langileen legezko ordezkarien artean lan egutegia eginen da, Hitzarmen Kolektibo honetan ezarritako mugak kontuan hartuta. Ale bat ikusteko moduko leku batean jarri beharko da lantoki bakoitzean, urte bakoitzeko urtarrilaren 1a baino lehen.

21. artikulua. Lanaldia.

Hitzarmen honen eraginpeko langile guztien lanaldia 1747 ordukoa izanen da 2008. urtean eta 1743 ordukoa 2009. eta 2010. urteetan. Benetako lanorduak izanen dira, urteko kopuruan.

Gehieneko lanaldi arrunta bederatzi ordukoa izanen da, eta lanaldi bat amaitzen denetik hurrengoa hasi arte gutxienez hamabi ordu igaro beharko dira.

Langile guztiek asteko lanaldiaren barruan ondoz ondoko bi eguneko atsedenaldia izanen dute, ahal dela larunbat eta igandeetan.

Udako lanaldia ezarriko da. Uztailaren 1ean hasi eta abuztuaren 31n amaituko da, eta horretarako ordutegi jarraitua ezarriko da, 08.00etatik 15.00etara. Udako lanaldi hori luzatzen ahalko da itundutako egutegiaren arabera.

08:00etatik 15:00etara lanaldi jarraitua ezarri da Ostegun Santuaren aurreko egunerako.

22. artikulua. Oporrak.

Langile guztiek urtean 22 laneguneko opor ordainduak izanen dituzte 2008. eta 2009. urteetan, eta 23 laneguneko opor ordainduak 2010. urtean. 22 edo 23 egun horietatik 15 egun, kasuan kasu, nahitaez hartu beharko dira uztailean eta abuztuan. Gainerako egunak, hots 7 egun 2008. eta 2009. urteetan eta 8 egun 2010. urtean, uztailetik eta abuztutik kanpo hartzen ahalko dira, baldin eta horrek lanaren antolaketa eta produkzio egokia oztopatzen ez badu, eta azken buruan enpresaren irizpideen mendean geratuko da oporrak uztailetik eta abuztutik kanpo hartzeko aukera, lanaren antolaketa eta produkzio egokia bermatzeko. Era berean, langile bakoitzarekin itunduko da aldaketa horren eraginpean egoten ahal den urteko lan egutegia.

Hala ere, uztailaren 1etik abuztuaren 31ra arte udako lanaldia dagoenez, urteko gainerako egunetan baino ordutegi laburragoarekin, opor egunak uztailetik eta abuztutik kanpo hartuz gero urteko egutegian beharrezkoak diren zuzenketak eginen dira, hitzarmen honen indarraldiko urte bakoitzerako hitzartutako orduetan benetan lan egiten dela bermatzeko.

Oporrak ezin izanen dira hartu igande edo jaiegun batetik hasita, ezta langilearen asteko atsedenaldiarekin bat datorren egunean ere.

Oporren egutegia enpresari urte bakoitzeko otsailaren 28a baino lehen jakinarazi behar zaiola ezarri da.

VI. KAPITULUA

Soldata

23. artikulua. Ordainsariak.

Hitzarmen honi atxikitako langileen ordainsarietan lanaldi arrunt osoari dagozkion oinarrizko soldata eta soldata-osagarriak batzen dira. Lansariaren barruan ez dira sartuko soldatari ez dagozkion kalte-ordain edo konpentsazioak.

24. artikulua. Soldata.

Langileak kontzeptu guztiengatik modu arrunt eta finkoan jasotzen duen kopuru gordina dela ulertzen da. Soldata osorik agertu beharko da nominan.

Hitzarmen honen eraginpeko langileen oinarrizko soldata lanbide talde bakoitzarentzat dagokion eranskinean ezarritakoa da. Ordainsari horiek gutxienekoak dira, eta lanaldi osoari dagozkio.

25. artikulua. Aparteko orduak.

Berariaz erabaki da aparteko orduak ezinbesteko kasuetan baino ez direla eginen. Langileek beren borondatez eginen dituzte aparteko orduak, ezinbesteko kasuetan izan ezik.

Hala ere, zerbitzuaren beharrizanengatik aparteko orduak egin behar badira, horiek atsedenaldiko denborarekin konpentsatuko dira, egindako aparteko ordu bakoitzeko atsedenaldiko ordu batekin, larunbat, igande edota jaiegunetan egindako aparteko orduak izan ezik. Kasu horretan, konpentsazioa ordu eta erdikoa izanen da egindako aparteko ordu bakoitzeko.

26.artikulua. Aurrerakinak.

Langileak egindako lanaren zenbateko likidoen konturako aurrerakinak hartzeko eskubidea izanen dute.

27. artikulua. Sexuagatiko edo nazionalitateagatiko diskriminaziorik eza.

Balio edo erantzukizun berbera edo antzekoa duten lanengatik ordainsari berbera ordainduko da, egiten duten langileen sexua edo nazionalitatea edozein direla ere.

28. artikulua. Soldata igoerak.

Hitzarmen honen indarraldiko urte bakoitzerako soldata igoera hitzartu dute bi alderdiek, Nafarroako KPI errealarena. Dena delako urteko urtarrilean soldatak igoko dira aurreko urteko Nafarroako KPIak ematen duen ehunekoan, eta hala jarraituko da hurrengo urteetan.

29. artikulua. Soldata desberdintasunen likidazioa.

Hitzarmen hau Nafarroako ALDIZKARI OFIZIALean argitaratzen denetik hasita enpresek gehienez bi hilabeteko epea izanen dute Hitzarmenean ezarritako igoeraren edo bidezkoak diren berrikuspenen ondoriozko soldata desberdintasunak ordaintzeko.

30. artikulua. Erregelamenduzko eskersariak.

Langile guztiei, soldataren zati gisa, hilabetez gorako mugaeguna duten erregelamenduzko eskersariak ordainduko zaizkie. Ekainean eta abenduan ordainduko dira eta hogeita hamar egunetako oinarrizko soldatari gehi osagarri pertsonalei dagokiena izanen da zenbatekoa.

Urtean zehar enpresan sartu edo enpresa uzten duten langileei eskersari horiek ordainduko zaizkie, horien zenbatekoa zerbitzuan emandako denboraren arabera hainbanatuz.

31. artikulua. Gastuak eta kilometro-ordaina.

Enpresek norberaren ibilgailua garraiobide gisa erabiltzen duten langileei kilometroko 0,29 euro ordainduko dizkie, edo hala badagokio, Nafarroako ALDIZKARI OFIZIALean urte bakoitzerako ezarrita dagoena.

Langileei ohiko lantokitik kanpora joateko egindako gastuak ordainduko zaizkie. Aldez aurretik langileek gastu horien egiaztagiriak aurkeztu behar dituzte.

32. artikulua. Aldi baterako ezintasuna.

Aldi baterako ezintasun egoeran, langilea egoera horretan dagoen bitartean, eta egoera hori edozein kontingentziak eragin duela ere, enpresak ordaindu eginen dio egoera horretan jasotzen duenaren eta bere oinarrizko soldataren gehi jasotzen ahal dituen osagarri pertsonalen %100en arteko aldea.

33. artikulua. Burutzako plusa.

Enpresak langile bati bere lanaz gain, eta bere lanbide maila aldatu gabe, beste langile batzuen lan eta zereginak gainbegiratu edota koordinatzea agintzen badio, plus hori ordainduko dio, egoera horrek irauten duen bitartean.

Dedikazio berezi hori idatziz ezarriko da beti, enpresaren eta dagokion langilearen artean egindako banakako itun baten bidez.

34. artikulua. Erantzukizun plusa.

Plus hori ordainduko zaie beren lanpostuei dagozkien zereginen azken emaitzan erantzukizun eta dedikazio berezia duten langileei.

Erantzukizun berezi hori idatziz ezarriko da beti, enpresaren eta dagokion langilearen artean egindako banakako itun baten bidez.

VII. KAPITULUA

Baimenak, lizentziak eta eszedentziak

35. artikulua. Baimenak.

Langileak, aldez aurretik abisua emanda eta arrazoiak gerora justifikatuta, lizentzia edo baimen ordaindua hartzeko eskubidea du, honako kasu hauetan eta honako epeetan:

1. Ezkontzeagatik, hamasei egun natural.

2. Gurasoen, ezkontidearen edo seme-alaben heriotzagatik zazpi egun natural.

3. Seme-alabaren jaiotzagatik, lau egun natural. Zesarearen bidezko jaiotza bada, edo amak edo seme edo alabak eritasunen bat badute, zazpi egun natural hartzen ahalko ditu gehienez.

Aitak hamahiru eguneko aitatasun baimena hartzeko eskubidea izanen du, eta bikiak-edo jaiotzen badira, bi egun gehiago haur bakoitzeko, bigarrenetik aurrera. Eskubide honek aitatasun biologikorako, adopziorako zein harrerarako onartzen da.

4. Ezkontidea edo seme-alabak Zaintza Intentsiboko Unitatean sartzeagatik edo haien eritasun larriagatik edo anestesia oso zein epiduralarekin egindako ebakuntza kirurgikoagatik, lau egun natural.

5. Ezkontidearen edo seme-alaben garrantzi txikiko ebakuntza kirurgikoagatik, egun natural bat.

6. Gurasoak Zaintza Intentsiboko Unitatean sartzeagatik edo haien eritasun larriagatik edo anestesia oso zein epiduralarekin egindako ebakuntza kirurgikoagatik, hiru egun natural.

7. Bilobak, anaia-arrebak, aitona-amonak eta aitaginarreba-amaginarrebak hiltzeagatik, Zaintza Intentsiboko Unitatean sartzeagatik edo haien eritasun larriagatik edo anestesia oso zein epiduralarekin egindako ebakuntza kirurgikoagatik, bi egun natural.

8. Ezkontidearen aitona-amonak eta koinatu-koinatak hiltzeagatik, Zaintza Intentsiboko Unitatean sartzeagatik, edo haien eritasun larriagatik edo anestesia oso zein epiduralarekin egindako ebakuntza kirurgikoagatik, egun natural bat. Bazter geratuko dira koinatu-koinaten ezkontideak.

9. Bigarren gradura arteko odol edo ezkontza bidezko ahaideen ezkontzagatik egun natural bat.

10. Ohiko bizilekuz aldatzeko egun bat.

11. Modu ofizialean aonartutako titulu akademiko edo profesionalen bat eskuratzeko, ikasketak egiten dituen langileek eskubidea izanen dute behar dituzten baimenak hartzeko azterketak egitera joateko, betiere horietara joanen dela bost egun natural lehenago jakinarazita eta justifikatuta.

12. Publikoa edo pribatua den eginbehar saihestezina betetzeko behar-beharrezkoa den denbora.

13. Eginkizun sindikaletan edo langileen ordezkaritza lanetan aritzeko, legeetan ezarritakoari jarraikiz.

14. Erditu aurreko azterketa medikoak egiteko eta erditzeko prestatzeko tekniketan trebatzeko, behar-beharrezkoa den denbora, lanorduetan egin behar badira.

Artikulu honen 2. idatz-zatitik 9.era (biak barne) araututako lizentzietarako aurreikusita dagoen iraupena beste egun bat luzatzen ahalko da, lizentzia horiek sortu dituzten egoerak Nafarroaren probintzia mugakideetan gertatu badira. Mugakide ez diren probintzietan gertatu badira, berriz, bi egun natural.

1. idatz-zatitik 10.era (biak barne) azaldutako lizentziak egun naturaletarako emanen dira, betiere gertaera eragilea sortu den unetik beretik, eritasun larriaren, ospitaleratzearen edo ebaketa kirurgikoaren kasuetarako aurreikusitakoetan izan ezik, horietan lizentzia hartzen ahalko baita ospitaleratzeak irauten duen denboran, baldin eta Enpresa eta langilea ados jartzen badira. Horretarako, zera ezarri da berariaz: lizentzia geroratzeko sistema berri honen bidez langileak ezin ditu hartu inolaz ere baimenak gertaera eragilea jazo denean hartuta iraungo zuen baino egun gehiago.

Seme-alabei buruz 2., 4. eta 5. idatz-zatietan egindako aipamenak adingabeek adoptatu edo familian hartzen direnean ere balio dutela ulertuko da.

Izatezko bikoteek, zuzenbidekoek dituzten baimen berdinak izanen dituzte.

36. artikulua. Amatasuna eta aitatasuna.

Erditze kasuan, amatasun bajak etenik gabeko hamasei aste iraunen du, eta haur bat baino gehiago jaioz gero, hemezortzi aste. Baja hori interesatuak nahi bezala banatuko da, baina gutxienez sei aste haurra jaio eta berehala izanen dira; aitak egun horiek haurra zaintzeko har ditzake. Aurrekoa gorabehera, atsedenaldia hastean aitak eta amak lan eginez gero, batek zein besteak hartzen ahalko dute baja.

Adopzio kasuetan, haur adoptatua bederatzi hilabetetik beherakoa bada, baja hamasei astekoa izanen da, adopzioa onartzen duen ebazpen judiziala ematen denetik hasita. Adoptatutako haurrak bederatzi hilabete baino gehiago eta sei urte baino gutxiago baditu, Langileen Estatutuaren 48.4 artikuluan xedatuta dagoenari jarraituko zaio.

Baimen hau bi aste luzatuko da seme edo alabak ezgaitasunen bat badu, eta luzapen hori gurasoetako edozeinek hartzen ahalko du.

37. artikulua. Legezko zaintza.

Legezko zaintza dela eta, langileren batek zortzi urtetik beherako haurra edo ordaindutako lanik egiten ez duen urritu fisiko edo psikiko bat bere kargu izanez gero, eskubidea izanen du eguneko lanaldia murrizteko, zortziren bat gutxienez eta erdia gehienez ere, soldata ere hein berean murriztuta.

Adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen familiartekoren bat -odol-ahaidetasuneko edo ezkontza-ahaidetasuneko bigarren mailara artekoa- zaindu behar duen langileak ere eskubide bera izanen du.

38. artikulua. Amatasun edo aitatasunagatiko eszedentzia.

Langileek eszedentziarako eskubidea izanen dute, hiru urtekoa gehienez, seme edo alaba bakoitza zaintzeko, bai berea bada eta baita adopzioan hartua bada ere, haurraren jaiotegunetik hasita. Hurrengo seme-alabek beste eszedentzia baterako eskubidea emanen dute, baina lehendik beste bat izanez gero hura bukatu eginen da. Aitak eta amak, biek lan egiten dutenean, batek bakarrik erabiliko du eskubide hori.

Eszedentziaren lehenengo urtean eskubidea izanen da langilearen lanpostua gordetzeko eta antzinatasuna zenbatzeko. Denbora hori igarotakoan, langileak lehentasuna izanen du kategoria bereko edo beheragoko lanpostuak eskuratzeko; kasu horretan, eszedentzian egoteko gehieneko epea amaitu baino lehenagoko hilabetean zerbitzu aktibora itzultzeko eskatu beharko du. Hala egin ezean, bere aferetarako borondatezko eszedentzian dagoela deklaratuko da ofizioz.

39. artikulua. Ahaideak zaintzeko eszedentzia.

Bi urte arteko eszedentziarako eskubidea izanen dute, halaber, adinagatik edo istripu, eritasun edo ezgaitasun baten ondorioz bere kasa bizitzeko gauza ez den eta lan ordaindurik egiten ez duen ahaideren bat -odol bereko edo ezkontza bidezko bigarren mailara artekoa- zaindu behar duten langileek.

40. artikulua. Nahitaezko eszedentzia.

Nahitaezko eszedentziak lanpostua gordetzeko, lanpostura automatikoki itzultzeko eta antzinatasuna kontatzeko eskubidea emanen du.

Lanera joatea eragozten duen probintzia barneko edo esparru handiagoko kargu publiko baterako izendatze, eta eginkizun sindikaletan aritzea nahitaezko eszedentziak direla ulertuko da, beren karguak irauten duen denboran.

Langilea gehienez hogeita hamar eguneko epean itzuli beharko da lanpostura, bere egoera amaitzen denetik aurrera zenbatuta.

41. artikulua. Borondatezko eszedentzia.

Enpresan gutxienez urtebeteko antzinatasuna duen langileak eskubidea du borondatezko eszedentzia izateko, lau hilabeterako gutxienez eta bost urterako gehienez. Eskubide horretaz berriro baliatzen ahalko da langile bera aurreko eszedentzia bukatu eta lau urte igaro eta gero.

Borondatezko eszedentzia ez da antzinatasun gisa zenbatuko, ezertarako ere.

Itzultzeko eskaera eszedentzia aldiaren barruan egin beharko da, lanpostura itzultzeko eguna baino hamabost egun lehenago, beranduenez.

Eszedentzian dagoen langileak hutsik dauden lanpostuetara itzultzeko soilik izanen du lehentasunezko eskubidea.

Eszedentzian dagoen langileak aipatutako baldintzetan itzultzeko eskatzen ez badu, borondatezko baja dela ulertuko da. Eszedentzia bukatutakoan, enpresaren esku egonen da luzatzea, langileak hala eskatuz gero.

42. artikulua. Lana norberaren erabakiz uztea.

Langileak enpresan zerbitzua bere borondatez utzi nahi badu, enpresak likidazioa egin beharko du lan harremana amaitzen den egun berean.

Enpresatik alde egin nahi duten langileak behartuak daude enpresari jakinaraztera, aurreabisurako epe hauek betez: teknikari tituludunak, hilabete; gainerako langileak, hamabost egun.

Aurreabisurako epea betetzen ez bada, egun bateko soldata kenduko da aurreabisuan atzeratutako egun bakoitzeko.

VIII. KAPITULUA

Eskubide sindikalak

43. artikulua. Eskubide eta berme sindikalak.

Enpresaren barruan langileen legezko ordezkarien ahalmen eta bermeak Langileen Estatutuan eta Askatasun Sindikalaren Lege Organikoan onartzen zaizkienak izanen dira.

IX. KAPITULUA

Hutsegiteak eta zehapenak

44. artikulua. Hutsegiteak.

Hutsegitetzat hartuko dira langileen ekintza edo ez-egite zigorgarriak, baita indarra duten legezko xedapenek eta hitzarmen kolektibo honek ezarritako betebeharrak haustea, dela betebeharrak bete ez direlako, dela ezagutzen ez direlako. Ezaugarrien eta garrantziaren arabera, hutsegiteak honela sailkatuko dira: arinak, larriak eta oso larriak.

Hutsegite arinak:

a) Edozein zerbitzutan zabarkeriazedo utzikeriaz aritzea, okertzea edo berandutzea, zerbitzuan gorabehera handirik sortu gabe, betiere nahita egin ez bada.

b) Lanera berandu joatea, bost minututik gora, bidezko arrazoirik gabe, enpresak ezarririko ordutegiaren arabera, gehienez ere hiru egunetan hilean.

c) Zerbitzu orduetan beste edozein zereginetan denbora pasa aritzea.

d) Lanpostutik alde egitea, denbora laburrerako.

e) Norberaren garbitasun eta txukuntasunik eza.

f) Arreta gabezia txikiak materiala, altzariak eta tresnak zaintzean.

g) Ohiko bizilekua aldatzearen berri ez ematea enpresari.

h) Egun batean lanera huts egitea behar den baimenik edo zentzuzko zergatikorik gabe.

i) Baja dagokion garaian ez aurkeztea, zentzuzko zergatikoa dela medio lanera huts egiten denean, non eta frogatzen ez den ezinezkoa izan dela.

j) Lanera mozkorturik agertzea.

k) Zergen edo karga sozialen atxikipenari eragiten dioten familia arloko aldaketen berri ez ematea. Aldaketa horiek maltzurkeriaz ezkutatu direla antzemanez gero, hutsegite hori larritzat joko da.

l) Orokorrean, aipatu direnen antzeko ekintza edo ez-egite guztiak.

Hutsegite larriak:

a) Jasotako aginduei uko egitea, besterik gabe, horrek diziplinaren haustura argi eta garbi ekartzen ez badu.

b) Hilabete batean hiru egun baino gehiagotan berandu iristea.

c) Lanera bi egunez huts egitea hilabetean, bidezko arrazoirik gabe. Hutsegite horrek zerbitzuari kaltea eragiten badio, hutsegite oso larritzat hartuko da.

d) Eritasunaren edo istripuaren itxura egitea.

e) Beste langile baten laneratzea simulatzea, lanera sartzean edo lanetik irtetean haren ordez izenpetuz edo fitxatuz.

f) Zabarkeriaz edo utzikeriaz aritzea lanean, zerbitzuaren kaltetan, edo norberaren eginkizunetan nahita berandu ibiltzea.

g) Beharrezko baimenik gabe lan partikularrak egitea lanorduetan, eta orobat, enpresaren lanabesak norbere probetxurako erabiltzea.

h) Zerbitzuari buruzko ahozko edo idatzizko txosten edo adierazpenetan gezurretan aritzea, hori egiaztatuta egonik.

i) Norberaren zeregineko lanengatik erakundekoak ez diren eskersariak jasotzea, eta sozietatearen negozioak norberaren onerako ustiatzea.

j) Laneko errendimendua nahita gutxitzea.

k) Ahozko irainak, enpresako edozein langileri egindakoak.

l) Lanean zuhurtziarik gabe jokatzea. Jokabide hori hutsegite oso larritzat joko da baldin eta lankideak arriskuan edota instalazioak hondatzeko zorian jartzen badira.

m) Lehenbiziko hutsegite arina egin ondoren hilabete berean beste hutsegite arin bat egitea, beste mota batekoa izan arren.

n) Orokorrean, larritasunaren aldetik aipatu direnen antzekoak diren ekintza edo ez-egite guztiak.

Hutsegite oso larriak:

a) Agindutako kudeaketan iruzur, leialtasun eza edo konfiantza-abusu egitea eta beste lankideei, enpresari edo beste edozein pertsonari ebastea eta lapurtzea enpresako lokaletan edo lanean beste edozein lekutan aritzean.

b) Hilabeteko aldian sei aldiz baino gehiagotan berandu iristea edo hamar, hiru hilabeteko epean, edo hogei, sei hilabeteko epean.

c) Erakundearen edo lantokiaren materiala, tresnak, lanabesak, makinak, aparatuak, instalazioak, eraikinak, altzariak eta agiriak desagerrarazi, hondatu, suntsitu edo matxuratzea.

d) Mozkortuta edo toxikatuta maiz egotea, baldin eta lanean ondorio okerrak badakartza.

e) Erakundearen edo langileen isilpeko gutunen edo agirien sekretua haustea.

f) Istripu larriak sorraraztea, zabarkeria edo zuhurtziagabekeria desenkusaezinagatik.

g) Ahozko prentsarekin zein prentsa idatziarekin zerikusia duten beste enpresa batzuentzat lan egitea, erakundeak horretarako baimenik eman gabe.

h) Jarraian eta ohitura gisa, norberaren garbitasun eta txukuntasunik ez izatea, lankideengan arrazoizko arrangura sorrarazten duenean.

i) Erantzukizuneko lanpostuetatik alde egitea.

j) Hitzezko eta egitezko tratu txarrak ematea, agintekeria edo errespetu falta larria nagusiei edo haien ahaideei, bai eta lankide eta menpekoei ere.

k) Sexu erasoak, hitzez nahiz egitez.

l) Hutsegite larriak behin eta berriz egitea, mota desberdinetakoak izan arren, lehenbizikoa egin ondoko sei hilabeteren barnean egiten bada.

m) Orokorrean, aipatu direnen antzeko ekintza edo ez-egite guztiak.

45. artikulua. Zehapenak.

Enpresak du zehapenak jartzeko ahalmena, indarreko legedian ezarritakoari jarraikiz.

Hitzezko kargu-hartzearen kasuan salbu, zehazpen guztien berri idatzizemanen zaio interesatuari, eta hark hartu-agiria sinatu beharko du, jakitun gisa.

Hutsegite larrien edo oso larrien zehapena jartzeko, enpresak langileen ordezkariei horren berri eman beharko die. Sexuarekin zerikusia duten hutsegiteengatiko zehapenen kasuan, beharrezkoa da langileen legezko ordezkariek horren berri izatea eta tramitazioan parte hartzea.

Hutsegite arinengatik:

-Ahozko kargu-hartzea.

-Idatzizko kargu-hartzea.

-Enplegu-soldaten etenaldia; h) eta j) kasuetan gehienez bi egun.

Hutsegite larriengatik:

-Gehienez hogeita hamar eguneko enplegu-soldaten etenaldia.

Hutsegite oso larriengatik:

-Hogeita hamaika egunetik laurogeita hamarrera bitarteko enplegu-soldaten etenaldia.

-Kaleratzea.

46. artikulua. Hutsegiteen preskripzioa.

Hitzarmen kolektibo honen 41. artikuluan aipatutako hutsegiteek preskripzio epe hauek izanen dituzte:

-Hutsegite arinak egin eta hamar egunera preskribatuko dira.

-Larriak hogei egunera.

-Oso larriak hirurogei egunera, eta, betiere, egin eta sei hilabetera.

X. KAPITULUA

Lan osasuna

47.artikulua. Laneko arriskuen prebentzioa.

Laneko arriskuen prebentzioari dagokienez, Laneko Arriskuen Prebentzioari buruzko azaroaren 8ko 31/1995 Legean edota bere geroko aldaketa eta eguneratzeetan xedatutakoari jarraituko zaio.

Horrenbestez, enpresaburuak jarduera prebentiboaren jarraipenaz etengabe arduratuko da, saihestu ezin ziren arriskuak identifikatu, ebaluatu eta kontrolatzeko jarduerak nahiz dauden babes mailak etengabe hobetzeko.

Laneko arriskuen prebentzioa enpresaren kudeaketa sisteman integratu beharko da, bai bere jarduera guztietan, bai enpresaren maila hierarkiko guztietan, laneko arriskuen prebentziorako plan bat ezarriz eta aplikatuz.

48. artikulua. Osasuna zaintzea.

1. Medikuntzako berariazko protokoloak egin, eta dagoen lanpostu bakoitzera egokituko dira.

2. Langilearen adostasuna beharko da azterketa horiek egiteko. Salbuespenez, langileen ordezkariek txostena egin ondoren, azterketa nahitaez onartu beharko da hura ezinbestekoa denean lan baldintzek langileen osasunean duten eragina ebaluatzeko edo langile baten osasun egoera langilearentzat berarentzat, gainerako langileentzat nahiz enpresarekin zerikusia duten beste pertsona batzuentzat arriskutsua izan ote daitekeen ikusteko. Azterketa nahitaez onartu beharko da, halaber, berariazko arriskuetarako babesa eta arrisku bereziko jarduerak arautzen dituzten legezko xedapenetan hala ezartzen denean.

Nolanahi ere, langileari ahalik eragozpen gutxien sortu eta arriskuaren araberakoak diren azterketa edo probak hautatu beharko dira.

3. Langileen osasuna zaindu eta kontrolatzeko neurriak hartzen direnean, betiere langilearen intimitate eta duintasunerako eskubidea errespetatuko da eta haren osasun egoerarekin zerikusia duen informazioa isilpean gordeko da.

4. Aurreko atalean aipatutako azterketen emaitzak ukitutako langileei jakinaraziko zaizkie.

5. Langileen osasunari buruzko datuak ezin izanen dira erabili bereizkeriazko xedeetarako edo langilearen kalterako.

6. Medikuek eta langileen osasuna zaintzeko ardura duten agintariek bakarrik izanen dute eskura osasunari buruzko informazio pertsonala. Informazio hori ezin izanen zaio enpresaburuari ez beste inori erakutsi langileak baimena eman ezean. Hala ere, enpresaburuari eta prebentzioaren arloko pertsona nahiz organo arduradunei osasun azterketen ondorioak jakinaraziko zaizkie, hau da, langilea lanpostuan aritzeko gai den, edo babes eta prebentzio neurriak gehitu edo hobetu behar diren. Horrela behar bezala betetzen ahalko dituzte prebentzioaren arloko eginkizunak.

7. Lanak berez dituen arriskuak direla-eta beharrezkoa izanez gero, langileek osasun egoera aldian-aldian aztertzeko duten eskubidea luzatu eginen da lan harremana bukatu eta gero, erregelamendu bidez ezarritako baldintzen arabera.

8. Gaitasun teknikoa, prestakuntza eta trebetasun egiaztatua duten osasun langileek eginen dituzte langileen osasuna zaindu eta kontrolatzeko lanak.

XEDAPEN IRAGANKORRA

Hitzarmen hau sinatu duten aldeek indarraldia bukatu baino lehen lanbide taldeen erregulazio eta definizioa negoziatzea adostu dute. Lanbide taldeen erregulazioa adosten ez den bitartean, enpresan gaur egungo lan sistema aplikatzen jarraituko da.

Iragarkiaren kodea: F0814413