Iragarkia

97. ALDIZKARIA - 2007ko abuztuaren 8a

I. NAFARROAKO FORU KOMUNITATEA

1.1. XEDAPEN OROKORRAK

1.1.4. Ebazpenak

696/2007 EBAZPENA, ekainaren 29koa, Eskola eta Lanbide Irakaskuntzaren zuzendari nagusiak emana, 2007/2008 ikasturtean "Pablo Sarasate" Musika Kontserbatorio Profesionalaren, Nafarroako Goi Mailako Musika Kontserbatorioaren eta Berariazko Dantza Eskolaren antolaketa eta jarduna arautzeko jarraibideak onesten dituena.

Eskola Antolamendu eta Berriztapenerako Zerbitzuko zuzendariak adostasun txostena aurkeztu du, 2007/2008 ikasturtean Nafarroako Foru Komunitatean Musika Kontserbatorioen eta Dantza Eskolaren antolaketa eta jarduna arautzeko jarraibideak onets daitezen.

Hori horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1. artikuluko d) idatz-zatiak ematen dizkidan ahalmenak erabiliz,

EBATZI DUT:

1. I. eranskineko jarraibideak onestea. Aipatu jarraibide horiek "Pablo Sarasate" Musika Kontserbatorio Profesionalaren antolaketa eta jarduna arautuko dituzte 2007/2008 ikasturtean.

2. II. eranskineko jarraibideak onestea. Aipatu jarraibide horiek Nafarroako Goi Mailako Musika Kontserbatorioaren antolaketa eta jarduna arautuko dituzte 2007/2008 ikasturtean.

3. III. eranskineko jarraibideak onestea. Aipatu jarraibide horiek Berariazko Dantza Eskolaren antolaketa eta jarduna arautuko dituzte 2007/2008 ikasturtean.

4. Ebazpen honen kontra gora jotzeko errekurtsoa paratzen ahal da, Hezkuntza Departamentuko kontseilariari zuzendua, hilabeteko epean, argitaratu eta biharamunetik aitzina.

5. Ebazpen hau eta eranskinak igortzea Eskola Antolamendu eta Berriztapenerako Zerbitzura, Zerbitzuak Ikuskatzeko eta Ikuskapen Teknikorako Zerbitzura, Giza Baliabideen Zerbitzura, Ikasketak Antolatzeko Atalera, Araubide Bereziko Irakaskuntzaren Atalera, Arte Irakaskuntzaren Bulegora eta ikastetxe ukituetara, behar diren ondorioak izan ditzaten.

6. Ebazpen hau eta bere eranskinak Nafarroako ALDIZKARI OFIZIALean argitaratzea.

Iruñean, 2007ko ekainaren 29an._Eskola eta Lanbide Irakaskuntzaren zuzendari nagusia, Fermín Villanueva Ferreras.

I. ERANSKINA

2007/2008 ikasturtean "Pablo Sarasate" Musika Kontserbatorio Profesionalaren antolaketa eta jarduna arautzeko jarraibideak

I._IKASTETXEAREN URTEKO PROGRAMAZIO OROKORRA

1._UPOaren edukia.

"Pablo Sarasate" Musika Kontserbatorio Profesionalak, ikasturtea hasi aurretik, Urteko Programazio Orokorra eginen du; programazio horrek hezkuntzako jarduera guztiak koordinatuko ditu, eta beren eskumenak zuzen betetzen direla eta eskola komunitateko arlo guztiek esku hartzen dutela bermatuko du.

Urteko Programazio Orokor hori prestatuko da urriaren 3ko 1/1990 Lege Organikoak (LOGSE) ezartzen dituen oinarrizko eta erdi mailako ikasketei dagokienean, bai eta maiatzaren 3ko 2/2006 Lege Organikoan (LOE) ezarritako ikasketa profesionalei dagokienean ere.

Urteko Programazio Orokorrak ondoko atal hauek izanen ditu:

A._Ikastetxearen ordutegi orokorra eta hura egiteko ezarri diren irizpide pedagogikoak.

B._Oinarrizko mailako eta erdi mailako musika ikasketei dagozkien irakaskuntza jarduerak, bai eta ikasketa profesionalei dagozkienak ere.

C._Ikastetxeko irakasleen prestakuntza plana.

D._Jarduera osagarrien eta eskolaz kanpokoen urteko programazioa.

E._Memoria administratiboa.

F._Hezkuntza proiektua edo ezarritakoari egin zaizkion aldaketak.

G._Curriculum proiektua edo ezarritakoari egin zaizkion aldaketak.

A._Ikastetxearen ordutegi orokorra eta hura egiteko ezarri diren irizpide pedagogikoak.

Ikastetxeko ordutegi orokorra Klaustroaren iritzia aditu ondoren Zuzendaritza Taldeak eginen du, eta bide eman beharko du ikastetxe bakoitzeko Urteko Programazio Orokorrean aurreikusitako jarduerak aurrera eramateko. Hortaz, ikastetxeko ordutegi orokorrak honako hauek bilduko ditu gutxienez:

a) Ikastetxea eskola komunitatearentzat irekita egonen den ordutegia.

b) Ikasleen eskola orduak.

c) Ikasleek eskolakoak ez diren jarduerak egiteko izanen duten ordutegia.

d) Ekain eta iraileko jardueren behin betiko egutegiaren aurreikuspena; horretan probak eta azken ebaluazioak noiz eginen diren adieraziko da, bai eta kontsultak egiteko epea zein izanen den ere. 2008ko maiatzaren 9aren aurretik, ikastetxeek aipatu diren jarduera horien behin betiko egutegia igorriko dute Zerbitzuak Ikuskatzeko eta Ikuskapen Teknikorako Zerbitzura.

e) Irakasleen ordutegi orokorra.

f) Irakasleen norbanako ordutegia.

Ikastetxeko ordutegi orokorra egiteko nahitaez hartuko dira kontuan, Klaustroak adierazitakoaz gain, ondoren azaltzen diren irizpide hauek:

_Kontserbatorioaren ordutegia astelehenetik larunbatera bitartekoa izanen da, biak barne. Astelehenetik ostiralera 9:00etatik 22:00ak arte. Larunbatean 9:00etatik 14:00ak arte.

_Larunbatak ikasteko eskola egunak izanen dira Kontserbatorioan, eta Zuzendaritza Taldeak ikasleak ikasgeletan sartu eta musika-tresnak erabiltzeko eta horiek zaintzeko sistema ezarriko du.

_Ikastetxeko Zuzendaritzak neurriak hartuko ditu ikastetxea oporraldietan, goizez, irekita edukitzeko.

_Irakasleek ordutegien arloan izaten ahal dituzten nahiak ezin dira inoiz izan Klaustroak ezartzen dituen irizpideen kontrakoak, edota arte ikasketen ordutegia eta araubide orokorrekoena bateratzeak ikasleei sortzen dizkien beharren kontrakoak.

B._Irakaslanak.

Irakasleen Klaustroak, departamentu didaktikoen bidez, ikastetxearen irakaskuntzako jarduerak programatuko ditu eta Zuzendaritza Taldeari igorriko dizkio, ikastetxeko Urteko Programazio Orokorrean sar ditzan.

Irakaskuntzako jardueren programazioa egiteko, ordutegiak egiterakoan erabilitako irizpideak hartuko dira kontuan eta, gutxienez, ondokoak bilduko ditu: tutoretza plana, ebaluazioak eta errekuperazio sistemak, irakasgaien arteko koordinazio proiektuak eta departamentu didaktikoen programazioak.

C._Ikastetxeko irakasleen prestakuntza plana.

Kontserbatorioak ikastetxeko irakasleentzako prestakuntza plan bat sartuko du bere programazioan. Koordinazio Pedagogikorako Batzordeak ikastetxeko irakasleak prestatzeko planaren proposamena aurkeztuko dio Klaustroari, eta proposamen hori Hezkuntza Departamentuak aurkezten duen prestakuntza planeko eskaintza kontuan hartuta eginen du. Atal honetan aipatzen den planean kontuan hartuko dira curriculum proiektua egin eta berrikusteko prozesuan ikusten diren beharrak, bai eta irakaskuntzako praktikari buruzko berriztapen eta hausnarketaren emaitza direnak ere.

D._Jarduera osagarrien eta eskolaz kanpokoen urteko programazioa.

Planteatzen diren jarduera osagarriak eta eskolaz kanpokoak irakaskuntzako ekintzak osatu edo garatzeko izanen dira. Jarduera horiek aurrez Eskola Kontseiluak ematen dituen jarraibideei egokituko zaizkie.

E._Memoria administratiboa.

Zuzendaritza Taldeak eginen du eta bertan sartuko da, besteak beste, Ikastetxea Antolatzeko Dokumentua.

Ikastetxea Antolatzeko Dokumentua Zerbitzuak Ikuskatzeko eta Ikuskapen Teknikorako Zerbitzuak ikastetxeei bidaltzen dizkien inprimakiak erabiliz beteko da. Inprimaki horiek, behar bezala beterik, Zerbitzu horretara bidaliko dira, ikasturteko eskolak hasi eta 20 eguneko epean.

F._Hezkuntza proiektua.

Ikastetxearen hezkuntza proiektuan ondokoak biltzen dira:

a) Bere ezaugarriak.

b) Hezkuntza komunitateak ezarritako hezkuntza helburuak.

c) Ikastetxearen antolamendu orokorra.

d) Barne araubidearen erregelamendua.

e) Ezarritako helburuak errazago lortzeko erakunde publiko eta pribatuekin aurreikusi diren harremanak.

Zuzendaritza Taldeak eta Koordinazio Pedagogikorako Batzordeak, irailean, jarduketa plana eginen dute eta ikastetxeko organo guztiek hori beteko dute 2007/2008 ikasturtean, LOGSEk arautzen dituen musika ikasketak era koordinatuan berrikusi eta eguneratzeko (oinarrizko mailakoak eta erdi mailakoak), eta LOEn araututako musikako ikasketa profesionalen lehenengo lau kurtsoak ezartzeko. Plan horretan honako hauek hartuko dira kontuan:

_Musikako ikasketa profesionaletan sartzeko proben edukiari eta ebaluazioari buruzko erabakiak sartzea.

_Ikasturte bakoitzean eskaintzen diren espezialitateen programazio didaktikoa prestatzea/berrikustea.

_Ikastetxeko hezkuntza proiektua LOEren 121. artikuluan ezarritakora egokitzea.

Zerbitzuak Ikuskatzeko eta Ikuskapen Teknikorako Zerbitzuak ikastetxeak egiten duen jarduketa planaren proposamena berrikusiko du, indarrean dagoen araudian ezarri denari egokitzen zaion egiaztatuko, ikasturtean zehar horren garapenaren jarraipena eginen eta era egokian betetzeko behar den laguntza eskainiko du.

Ikastetxearen barne egoera eta inguru sozioekonomiko eta kulturala aztertu ondoren, eta haren irakaskuntzako eta hezkuntzako ekintzaren koherentzia eta jarraipena bermatzearren, ikastetxeko hezkuntza proiektuak helburuak, lehentasunak eta jarduteko prozedurak finkatuko ditu.

G._Curriculum proiektua.

Ikastetxeek curriculum proiektuari jarraikiz emanen dituzte ikasketak, bai eta programazio didaktikoei jarraikiz ere, eta horiek otsailaren 13ko 34/1995 Foru Dekretuan eta martxoaren 19ko 21/2007 Foru Dekretuan araututakoa zehaztuko dute. Lehenengo dekretu horren bidez, Nafarroako Foru Komunitatean musikako ikasketen erdi mailako curriculuma ezarri da eta maila horretara iristeko arau orokorrak erregulatu, eta bigarrenaren bidez, berriz, LOEk arautzen dituen musikako ikasketa profesionalen curriculuma ezarri da.

Curriculum proiektuak curriculumeko elementuei buruzko erabaki multzoa biltzen du eta, bestalde, ikasleen prestakuntzako behar profesionalei erantzun nahi die, betiere, ikastetxearen beraren egoeratik abiatuta. Gainera, irakasleen jarduketa multzoa koherentea izanen dela ziurtatu beharko da. Curriculum proiektuak hezkuntza proiektuan du oinarri.

.Curriculum proiektuak honako hauek ditu:

A._Curriculumaren gaineko koordinazioari buruzko erabaki eta neurriak, ondotik heldu direnak:

a) Ematen diren ikasketen helburu orokorrak ikastetxearen eta ikasleen inguruabarrei egokitzea, benetan lortzeko hartu behar diren neurriak zehaztuz.

b) Metodologiari buruzko erabaki orokorrak.

c) Ikasleak ebaluatu eta mailaz igotzeko prozesuari buruzko irizpideak.

d) Erabiliko diren curriculum materialak eta baliabide didaktikoak.

e) Irakasleen irakaskuntza prozesuak eta irakaslana, bai eta curriculum proiektu bera ere, ebaluatzeko eta, kasua bada, berraztertzeko irizpideak.

B._Aukerako irakasgaien eskaintza.

C._Tutoretza plana ezartzea.

D._Curriculum proiektuak irakasgai bakoitzerako programazio didaktikoa ere izanen du. Horretan bilduko dira, kurtsoen arabera banaturik, helburuak, edukiak, aplikatuko den metodologia, ebaluazioaren irizpideak eta erabiliko diren baliabide eta bitartekoak. Programazio didaktikoak ikasgelan garatuko dituzte irakasleek Gelako Programazioen bidez.

E._Halaber, curriculum proiektuak ikasketa horietan sartzeko probaren edukia eta ebaluazioa jasoko ditu.

Programazio didaktikoak, curriculum proiektuaren garapena baitira, departamentuek prestatuko dituzte. Irakasgai bakoitzerako ondokoa hartuko da kontuan:

a) sei kurtsoetarako helburu, eduki eta irizpideen multzoa, bai eta ebaluatzeko prozedurak ere.

b) aplikatuko den metodologia didaktikoa.

c) ebaluazioari, kalifikazioari eta mailaz igotzeari buruzko irizpideak.

d) errepertorioa, erabiliko diren materialak eta baliabide didaktikoak.

e) beste departamentuekin batera jarduerak antolatzea, baldin eta horiek espezialitate edo irakasgai bat baino gehiago hartzen badituzte, esate baterako Ganbera musika.

f) departamentuak egin nahi dituen jarduera osagarriak eta eskolaz kanpokoak.

Irakasleek beren departamentuetako programazio didaktikoen arabera prestatuko dute irakaslana. Irakasleren batek erabakitzen badu Gelako Programazioan aldaketaren bat egitea departamentuko baterako programazioari dagokionean, aldaketa hori eta behar den justifikazioa departamentuko programazio didaktikoan sartuko dira.

Irakasleek curriculum proiektua eta programazioak egin ahala ebaluatu beharko dituzte, ikasleen hezkuntza beharrei egokitzen zaizkiela ziurtatzeko.

2._UPOa prestatu, onetsi eta ebaluatzea.

Urteko Programazio Orokorra Zuzendaritza Taldeak eginen du, Klaustroaren eta Eskola Kontseiluaren proposamen eta erabakiak kontuan hartuta.

Ikastetxeko Zuzendaritzari dagokio Urteko Programazio Orokorra era egokian egiteko jarduketen egutegia ezartzea.

Irakasleen Klaustroak eta Eskola Kontseiluak Urteko Programazio Orokorrari buruzko txostena eginen dute; dena den, irakasleen Klaustroaren eskumen diren irakaskuntzako alderdiak errespetatuko dira.

Urteko Programazio Orokorra Eskola Kontseiluak onetsiko du, eskola jarduerak hasi eta gehienez 20 eguneko epean.

Programazio horren ale bat Zerbitzuak Ikuskatzeko eta Ikuskapen Teknikorako Zerbitzura bidaliko da urriaren 31 baino lehen; beste ale bat ikastetxearen idazkaritzan jasoko da, irakasleek eta eskola kontseilukideek azter ahal dezaten.

Zerbitzuak Ikuskatzeko eta Ikuskapen Teknikorako Zerbitzuak egiaztatuko du Urteko Programazio Orokorra jarraibide hauetan xedatzen denari egokitzen zaion, eta zer zuzenketa egin behar den adieraziko du, bakarren bat egin behar bada.

Urteko Programazio Orokorra ikastetxeko kide guztiek nahitaez bete beharrekoa izanen da.

Ikasturtea bukatutakoan, ikastetxeko Zuzendaritza Taldeak eta Eskola Kontseiluak ebaluatu eginen dute Urteko Programazio Orokorra zenbateraino bete den. Ondoriorik aipagarrienak Memoria batean jasoko dira eta hura Zerbitzuak Ikuskatzeko eta Ikuskapen Teknikorako Zerbitzura bidaliko da, uztailaren 10a baino lehen.

II._IKASKETEN ORDU BANAKETA

Ikasleak ikasketetan sartzea, irakasle-ikasle ratioa eta klaseen denbora indarra duen araudian ezarri denari egokituko zaio.

Musika-tresnen eta ahotsen taldeei lotuta dauden arloen antolakuntza erraztearren, lehen aipatu den araudian eskola orduei eta ratioei buruz ezarri dena ez ezik, ondoko hauek hartuko dira kontuan:

a) Oinarrizko maila:

_Taldeari ematen zaion eskola dagokion musika-tresnaren irakasleak emanen du eta ratioa espezialitate bakoitzaren ezaugarrien araberakoa izanen da; dena dela, ikasleak 8 izanen dira gehienez.

_12 urtetik beherako ikasleentzat lehentasuna izanen du iluntzeko 20:30 baino beranduago izanen ez den ordutegiak.

b) Ikasketa profesionalak (1.tik 4.era) eta Erdi Maila (5.etik 6.era):

_Banakakoa ez den irakaskuntza behar duten irakasgaiak taldeko klaseetan antolatuko dira, ratio hauen arabera:

.Nahitaezko irakasgaiak:

-Akonpainamendua: 1/4, 4. kurtsoan, 90 minutuko klaseetan.

-Akonpainamendua: 1/4, 5. eta 6. kurtsoan, 60 minutuko klaseetan.

-Analisia: 1/7, 5. eta 6. kurtsoan, 60 minutuko klaseetan.

-Harmonia: 1/10, 3. eta 4. kurtsoan, 60 minutuko bi klasetan.

-Abesbatza: 1/25, 1. eta 2. kurtsoan, 90 minutuko klaseetan.

-Konposizioko oinarriak: 1/6, 5. eta 6. kurtsoan, 60 minutuko bi klasetan.

-Musikaren historia: 1/15, 3. eta 4. kurtsoan, 60 minutuko klaseetan.

-Musikaren historia: 1/15, 5. eta 6. kurtsoan, 60 minutuko bi klasetan.

-Musika hizkuntza: 1/15, 1. eta 2. kurtsoan, 60 minutuko klaseetan.

-Ganbera musika: 1/3, 3. eta 4. kurtsoan, 60 minutuko klaseetan.

-Ganbera musika: 1/3, 5. eta 6. kurtsoan, 90 minutuko klaseetan.

-Piano osagarria: 1/2, 1., 2., 3. eta 4. kurtsoan, 30 minutuko klaseetan.

-Orkestra, Banda eta Taldea: irakasle/ikasle ratioa matrikulatutako ikasle kopuruaren eta kasuan kasuko talde motaren arabera zehaztuko da.

.Aukerako irakasgaiak (5. eta 6. kurtsoan, 60 minutuko klaseetan):

-Ahots, tresna eta dantza akonpainamendua: 1/2.

-Abesbatza: 1/25.

-Artearen historia: 1/15.

-Jazzeko hastapena: 1/4.

-Antzinako musikaren lantegia: 1/3 edo 1/4, taldeen arabera.

III._IRAKASLEAK

1._Lanaldia.

Irakasleek, oro har, Nafarroako Gobernuaren mendeko funtzionarioentzat finkatzen diren lan orduak izanen dituzte, beren irakasle lanerako egokituak. Irakasleentzat jaiegun izanen dira Nafarroako Foru Komunitateko Administrazioaren zerbitzuko langileen lan egutegian ere jaiegun direnak.

Ikasturtea irailaren 1ean hasi eta ekainaren 30ean bukatuko da.

Ikasturtean, irakasleek jarraibide hauetan finkatutako lanaldia eta ordutegia beteko dituzte. Dena dela, Nafarroako irakaskuntza publikoaren kalitatea hobetzeko itunean ezarritakora egokitu beharko da bertan xedatutakoa.

Ekain-irailetako eskola gabeko lan egunetan, baimena ematen ahalko zaie irakasleei egunean ikastetxean egon beharreko bost orduko lanegun etengabea egiteko.

Irakasleek hogeita hamar ordu emanen dituzte astean ikastetxeko jardueretan, irakastorduetan eta ordu osagarrietan banatuta. Gainerako orduak, ikastetxean egon beharrik gabekoak, irakaslana prestatzeko eta irakasleen hobekuntza profesionalerako erabiliko dira, bai eta batzorde eta epaimahaietan parte hartzeko edo antzeko jarduerak egiteko ere, baldin eta horretarako hautatzen badira.

2._Orduen banaketa.

Ikastetxean bertan eman beharreko orduak honela banatuko dira:

A._Irakastorduak.

Ikasleekin irakaslan zuzenean emandakoak jotzen dira irakastordutzat.

Irakasleek, oro har, hemezortzi irakastordu izanen dituzte. Zilegi izanen da hogei irakastordutara ailegatzea, gehienez, betiere departamentuaren ordu banaketak hala eskatzen duenean eta beti haren barrenean. Hemezortzi ordu horietatik goitiko irakastordu bakoitza bi ordu osagarrirekin konpentsatuko da.

Irakastorduak zenbatzerakoan ondoko jarduera eta inguruabarrak hartuko dira kontuan:

a) Zuzendaritza Taldea.

Ebazpen honetako eranskinaren IV. atalean (Ikastetxearen funtzionamendua) adierazitakoa aplikatuko da atal honetan.

b) Ikastetxeko Orkestraren arduraduna.

Orkestraren arduradunak bere eskola ordutegitik astero 6 ordu emanen ditu lan horietarako. Orkestraren arduradun horrek, ikasturtearen hasieran, ikasturte osorako lan plana eginen du eta Zuzendaritza Taldeari aurkeztuko onetsia izan dadin, eta hori sartuko da Urteko Programazio Orokorreko "Jarduera osagarrien eta eskolaz kanpokoen urteko programazioa" atalean. Plan horretan jaso beharko dira ikastetxeko orkestrak ikastetxea ordezkatzeko lanean urtean eskainiko dituen hainbat emanaldi, bai Zuzendaritza Taldeak eskatuta bai Hezkuntza Departamentuak eskatuta. Halaber, egiten diren jardueren amaierako memoria egin beharko du eta ikasturtearen amaierako memorian sartu.

Orkestraren arduraduna izendatzeko (espezialitateko irakasle bat), eranskin honetako III. ataleko (Irakasleak) 3. puntuan ezarritako irizpide orokorra aplikatuko da.

Ikastetxeko orkestraren jarduerak "Orkestra" irakasgaiaren curriculumean sar daitezke, dagokion programazio didaktikoaren arabera. Hala ere, irakasgaian matrikulatuta ez dauden ikasleen parte-hartzea ere onartzen ahal da, baita ikastetxean matrikulatuta ez daudenena ere, bai eta beste ikastetxe eta entitate batzuekin lankidetza izatea ere, zehazten diren baldintzak betez.

Ikastetxean zehazten diren eta erabilgarri dauden gelak erabiliko dira orkestraren saioak eta emanaldien prestaketak egiteko, kontuan hartuz erabilpen hori dagozkion irakasgaien helburu didaktikoetarako izanen dela, bai eta Urteko Programazio Orokorrean sarturiko lan planean programaturiko jarduerak prestatzeko ere.

c) Teknologia Berrien arduraduna.

Teknologia Berrien arduradunak zeregin hauek izanen ditu bere ardurapean: ekipo informatikoak eta ikus-entzunezkoak koordinatu eta mantentzea, ikastetxeko sare informatikoa, gorabeherak konpontzeko laguntza teknikoa, instalatutako ekipoetako material informatikoa eta ikus-entzunezkoa zuzen erabiltzen den begiratzea. Zeregin horietarako astean 4 irakastordu izanen ditu eta, ikastetxearen beharrek horretarako aukera ematen badute, 4 ordu osagarri bitarte.

d) 58 urtez goitiko irakasleak.

Lanaldi osoa duten 58 urtez goitiko irakasleek zilegi izanen dute, nahi badute, beren irakastorduak murriztea, gehienez ere bost ordu kenduz, nahiz horrek ez duen esan nahi astean ikastetxean egon beharreko orduak gutxituko direnik. Salbuespenez, eta ikastetxeak hala behar duenean, murrizte hori ezinezkoa denean, ukatutako murrizte ordu bakoitzak bi ordu osagarriren balioa izanen du interesdunaren ordutegi pertsonalean. Aipatu den borondatezko murrizte hori, adin hori betetzen den urte naturalean hasten den ikasturtean gauzatuko da, eta bateraezina izanen da ordutegiaren bestelako murrizteekin. Horrela, 58 urtez goitiko irakasle bat departamentuko burua baldin bada, irakastorduetatik kendutako 5 ordu horiek departamentuaren burutzak dituen eginkizunetarako erabiliko ditu. Adina dela kausa eskola ordutegiaren murrizketa duten 58 urtetik gorako irakasleek, 65 urte betetzearekin batera, murrizketa hori egiteko eskubidea galduko dute, baldin eta jardunean segitzea eskatzen badute; horretan salbuespen izanen dira erretiro sariaren %100 jasotzeko behar den gabealdia ez badute.

e) Departamentuko burutza.

Departamentuko buruek beren irakastorduetako hiru ordu erabiliko dituzte gehienez, curriculum proiektuak egin eta berrikusteko; horretarako lan plana aurkeztu beharko dute. Lanerako plan hori, curriculum proiektua osatzen duten departamentuko programazio didaktikoekin batera, ikastetxeko Urteko Programazio Orokorrari batuko zaio, eta dena Zerbitzuak Ikuskatzeko eta Ikuskapen Teknikorako Zerbitzura igorriko da.

Lan planak ikasturte osoan egin behar diren zereginak hartuko ditu kontuan: bai departamentuko buruak horretarako orduetan eginen dituenak, bai eta jarduera horretarako dauden ordu osagarrietan bertako kide guztiek eginen dituztenak ere. Departamentuko buruek urte hasieran zehaztutako planaren jarraipena eginen dute etenik gabe eta, horretarako, astero departamentuko kide guztiekin lan hori egiteko dauden bi orduetan egiten dituzten saio guztien aktak idatziko dituzte.

Ikasturtearen amaieran, departamentuko buruek aurkeztu beharko dute, beren departamentuari dagokion amaierako memoriarekin batera, ikasturtean curriculum proiektuari buruz egin den lanaren txostena.

Zerbitzuak Ikuskatzeko eta Ikuskapen Teknikorako Zerbitzuak, ikasturte osoan, aurkeztu den plana betetzen den aztertuko du.

Baldin eta irakasle batek atal honetan irakastorduak murrizteko adierazi diren baldintzetako bat baino gehiago betetzen badu, 58 urtetik gorakoa izatea barne, ordutegia gehien murrizten dion baldintza/karguari dagokion eskola ordutegia izanen du.

B._Astean zenbatu beharreko ordu osagarriak.

Irakasle bakoitzaren asteko ordutegian irakastorduak eta ordu osagarriak batuta hogeita bost ordu izanen dira astean guztira.

Astean zenbatzeko ordu osagarrietan, irakasle bakoitzari esleituriko eginkizunen arabera, ondoko hauek sartzen ahalko dira:

a) Zaintza orduak.

b) Astean ordu bat departamentuaren bileretarako.

c) Astean bi ordu, gutxienez, irakasle guztiendako batera, hezkuntza proposamenak ikasketa plan berrietara egokitzeko eta Hezkuntza Departamentutik ezartzen diren balizko lanei erantzuteko erabiliko direnak funtsean; baztertu gabe, bestalde, indarra duten ikasketa planetan jarri beharreko arreta. Ikastetxeak beharrezko neurriak hartuko ditu jarduera horretan irakasle guztiek parte hartzeko.

d) Astean bi ordu, gutxienez, tutoretza lanak egiteko. Departamentuko buruek bi ordu horiek departamentuko burutzako lanak eta Koordinazio Pedagogikorako Batzordearekin bilerak egiteko erabiliko dituzte.

Zaintza orduak eta aurreko b), c) eta d) ataletan aipaturiko ordu osagarrietan egin beharreko jarduerak behar den bezala egiten badira, irakasleek, bakoitzaren ordutegi pertsonalean agertu behar duten asteko 25 orduetara ailegatu arte, ondoko ordu hauek sartzen ahalko dituzte astean zenbatu beharreko ordu osagarrien artean, irakasle bakoitzari esleitutako jardueren arabera:

e) Ordu bat astean irakasleek Eskola Kontseiluan dituzten ordezkarientzat.

f) Zuzendaritza Taldeko kideen koordinazio lanetarako orduak.

g) Ikastetxeak erakundeekin batera parte hartzen duen proiektuetan irakaskuntza taldeek lan egiteko orduak.

C._Zaintza.

Ikastetxea, eta zuzendaria bereziki, ikastetxearen ordezkaria den aldetik, ikasleen arduraduna da eskolako orduetan; beraz, ikastetxean une oroz behar adina irakasle izan behar da zaintza orduez egoki arduratzeko.

Ikastetxeko ordutegi orokorraren barnean, 9:00etatik 22:00etara, ordu batzuetan ikasle asko biltzen dira eta, batez ere, ikasle gazteenak; ordu horietan zaintzako irakasleak izanen dira, lehentasunez, arduradunak. 16:00etatik 21:00etara arteko tarte osoan, astelehenetik ostiralera, zaintzako irakasleak beharko dira eta, ahal dela, zaintzako bi irakasle.

Ordu guztiak behar bezala beterik baldin badaude soilik, zuzendariak zilegi izanen du zaintzako irakasleren bati beste zeregin batzuk ematea, adibidez, liburutegikoak, koordinazio lanak, etab.

Zaintzako irakaslearen eginkizun nagusiak hauek dira:

a) Irakasleak huts egiteagatik edo beste edozein arrazoirengatik zaindaririk ez duten ikasleei kasu egitea.

b) Korridoreetan ordena zaintzea eta, oro har, ikasleek gelaz kanpo duten portaera. Horrek ez du esan nahi beste irakasleek eginkizun hori bete behar ez dutenik.

c) Beren zaintza aldian sortzen diren gorabehera guztiak konpontzea, bai eta ikastetxeko norbait mediku beharrean gertatuz gero hartarako dilijentziak egitea ere, eta ikasketaburua lehenbailehen jakinaren gainean jartzea.

d) Beren zaintza aldian irakasleek duten puntualitate eta asistentziaren berri ematea idatziz, klaseei, zaintzei, liburutegiari eta bestelako jarduerei dagokienez.

Ikasketaburuak zaintza orduei buruzko parte bat prestatuko du egunero, eta Zerbitzuak Ikuskatzeko eta Ikuskapen Teknikorako Zerbitzuaren eskura egonen da beti. Gutxienez honako datuak izanen ditu:

_Irakasleen hutsegite eta atzerapenak.

_Ikastetxeko edozein egoitzatan izan diren gorabeherak.

_Gertatu diren istripuak.

_Zaintzako irakasleen sinadurak.

Zaintza orduetarako adierazten diren helburuak betetzen baldin badira, aurretik Zerbitzuak Ikuskatzeko eta Ikuskapen Teknikorako Zerbitzuak txostena emanik, ikastetxeak zilegi izanen du zaintzarako plan berariazko bat ezartzea.

Irakasleek zaintza lana eginen dute asteko zenbait ordutan, ikastetxearen beharren arabera. Nolanahi ere, kontuan hartu behar da irakasle bakoitzaren asteko ordutegian irakastorduak eta ordu osagarriak batuta hogeita bost ordu izanen direla astean guztira, ikasturtean irakastegunak ez diren lanegunengatiko konpentsazio orduak alde batera utzita.

Irakasleren baten zaintza orduak berariazko beste jarduera batzuekin trukatzen ahal dira, baldin zaintza ordu guztiak beteta badaude eta jarduerak Klaustroak onesten baditu.

Halaber, "Irakasle praktikak" irakasgaiaren goi mailako ikasleen tutore diren irakasleek zilegi izanen dute beren ordutegian ordu erdi konputatzea tutoretzapeko ikasle bakoitzeko, zaintza orduen ordez, asteko ordu osagarrien atalean.

Ikastetxeren batean, ezarritako ordutegiarekin zaintzak behar bezala betetzeko arazoren bat badago, Zerbitzuak Ikuskatzeko eta Ikuskapen Teknikorako Zerbitzuak ordu banaketa egoki den moduan aldatzeko neurriak hartuko ditu, Zuzendaritza Taldearekin batera.

D._Hilean zenbatu beharreko ordu osagarriak.

Irakasle bakoitzak ikastetxean nahitaez egin behar dituen asteko 30 orduak betetzeko, falta diren bost orduak hilean zenbatuko dira eta ondoko jardueretarako izanen dira:

a) Klaustroko bileretan parte hartzeko.

b) Ebaluazioko eta irakaskuntza taldeko bileretara joateko.

c) Beste jarduera osagarri eta eskolaz kanpoko batzuk.

Jarduera jakin batzuk egiteko, astean goiz bat gordeko da, eta irakasle guztiek gutxienez 4 ordu izanen dituzte Klaustroaren bilerak, ebaluazio bilkurak, gurasoen bilerak eta, oro har, ikastetxearen funtzionamendu egokirako beharrezkoak diren beste jarduera batzuk egiteko.

Ikasketaburuak, zuzendariarekin batera, hiruhilekoetan banatuta planifikatuko ditu aurreikusitako jarduerak. Adierazi diren jarduera horien programazioa hiruhilekoaren hasieran Zerbitzuak Ikuskatzeko eta Ikuskapen Teknikorako Zerbitzura igorriko da.

3._Ordutegiak egin, onetsi eta argitaratzea.

Ikasketaburuak ordutegiak eginen ditu Klaustroak ezarritako irizpide pedagogikoei eta jarraibide hauetan ezarri denari jarraikiz; halaber, bermatu eginen da ikasleentzako ordutegi funtzionala, eta lehentasuna izanen dute ikastetxearen beharrek.

Iraileko matrikula egin ondoren, ikasketaburuak irakasgai bakoitzeko ikasleen eta taldeen kopurua jakinaraziko die departamentuei.

Ordutegiak prestatzean kontuan izanen da Nafarroako Goi Mailako Musika Kontserbatorioan ere irakasle lana egiten duten irakasleen egoera, bi ikastetxeetan dituzten ordutegiak bateragarri egitearren.

Ikastetxean ahal den guztietan, irakasleek ikasleak eta taldeak hautatuko dituzte. Beren espezialitatekoak hautatuko dituzte, halakorik dagoenean; gero, ordutegia osatuko dute, departamentuan bertan antzekoenak diren irakasgaiak hautatuz eta, departamentuko ordu guztiak beteta ere, artean osatu gabeko orduak badituzte, beste departamentu batzuetakoak eta hain antzekoak ez diren beste irakasgai batzuekin osatzen ahalko dituzte.

Departamentuko kideak ikasle eta taldeak hautatzerakoan ados jartzen ez badira, honako prozedura honi jarraituko zaio:

Atal honetan ezarritako ordenaren arabera, lehenik hautatu behar duen irakasleak beretzat lehentasunezkoa den irakasgai eta kurtsoko ikaslea edo ikasle taldea hautatuko du; ondoren, hautatzeko bigarrena den irakasleak eginen du eta, horrela, hurrenez hurren, espezialitateko eta departamentuko irakasle guztiek lehenengo txanda egin arte. Lehenengo txandaren ondotik beste batzuk eginen dira, irakasleek beren irakastorduak osatu arte edo departamentuari dagozkion irakasgai, ikasle eta talde guztiak esleitu arte.

Bilera berezi horretan izaten diren gorabehera guztien akta eginen da eta departamentuko kide guztiek sinatuko dute; ikasketaburuari aktaren kopia emanen zaio.

Arestian adierazi diren ondorioetarako, departamentu bakoitzeko irakasleek hautatzeko duten lehentasuna ordena honen araberakoa izanen da:

1. Musikako eta Arte Eszenikoetako Katedradunen Kidegoa.

2. Musikako eta Arte Eszenikoetako Irakasleen Kidegoa.

3. Musikako eta Arte Eszenikoetako Irakasleen Kidegoan zerbitzu eginkizunetan diharduten funtzionarioak.

4. Bigarren Hezkuntzako Irakasleen Kidegoan zerbitzu eginkizunetan diharduten funtzionarioak.

5. Zerbitzu berezietan ari diren funtzionarioak.

6. Aldi baterako kontratatuak, lan edo administrazio araubidekoak.

Hautatzeko lehentasuna, lehenbiziko hiru atalei dagokienez, antzinatasun handiena izateak emanen du eta, antzinatasun bera izanez gero, atal bakoitzeko lehentasuna erabakitzeko honako irizpide hauek ezarriko dira, hurrenez hurren:

_Ikastetxean antzinatasun handiena.

_Kidegoan edo Administrazioan lehenik sartu izana, eszedentzia urteak zenbatu gabe.

_Hautapen prozeduretan puntu gehien izatea.

6. atalean, lehentasuna ezarriko da irakasleek Giza Baliabideen Zerbitzuko zerrendetan duten tokiaren arabera.

Departamentuari esleitutako irakastorduak kideen ordutegien bidez bete daitezkeenak baino gehiago badira, hautaketa egin baino lehen zehaztuko da zein irakasgai eta kurtso emanen dituzten antzeko espezialitateetako irakasleek, aipatu hautaketan sar ez daitezen. Horri dagokionez, kontuan hartu behar da, irakasle espezialista batek ezin dituela behe mailako kurtsoak hartu eta goi mailakoak, berriz, espezialistak ez diren irakasleentzat utzi.

Ikasketaburuak frogatu eginen du departamentuko kide guztien irakastorduak eta derrigorrez ikastetxean egin behar dituzten gainerakoak bat datozela honako jarraibide hauetan ezarri denarekin, eta egiaztatu eginen du ikasle guztien eta ikasle talde guztien ardura hartuko den eta orduak bete gabe dituen irakaslerik ba ote dagoen.

Lan horiek guztiak egin ondoren, ikasketaburuak, irakasleen klaustroak ordutegiak egiteko ezarri dituen irizpide pedagogikoak kontuan hartuta, behin betiko ordutegiaren proposamena eginen du, departamentuek egindako irakasgaien eta mailen banaketaren arabera.

Irakasleen eskola ordutegia astean bost egunetan banatuko da, lanaldi partzialerako kontratatutako irakasleen kasuan izan ezik. Nolanahi ere, egunean 5 irakastordu gehienez.

Halaber, ikastetxeko irakasle guztiak tarte jakin batzuetan aldi berean egonen dira ikastetxean; denbora hori gutxienez lau ordukoa izanen da eta tarte horretan denek egon beharko dute bertan. Ordu horietan Klaustroaren bilerak, ebaluazio bilkurak, gurasoen bilerak eta ikastetxearen funtzionamendu egokirako beharrezkoak diren beste jarduera batzuk eginen dira.

Ordutegi orokorraren barnean, ikastetxeak ezartzen duen ordu tarte egokienean, egunean 4 ordu gutxienez astelehentik ostiralera, zuzendaritza karguren batek egon beharko du ikastetxean.

Ikasle baten baja gertatzen bada eta hori betetzen ez bada, irakasleak hutsik duen denbora nola erabili zuzendaritzak erabakiko du:

_Beste ikasle batzuen denborari gehituz: atzeratu egin diren ikasleei laguntzeko, aurreratuenak sustatzeko...

_Beste jarduera batzuk egiteko.

_Material pedagogikoa prestatzeko.

_Beste zeregin batzuetarako.

Musika-tresnen klaseetan, hala taldekoak nola bakarkakoak, baldin eta ikasle bat ez bada bertaratzen, denbora hori bertaratu diren ikasleei kasu egiteko erabiliko da, eta ezin izanen da bertaratu ez diren ikasleei dagokien denbora murriztu klaseak emateko ordu guztien multzotik.

Ikastetxearen ordutegia onesteko, urriaren 31 baino lehen igorri beharko da Zerbitzuak Ikuskatzeko eta Ikuskapen Teknikorako Zerbitzura.

Ikastetxearen ordutegia Zerbitzuak Ikuskatzeko eta Ikuskapen Teknikorako Zerbitzuak onetsiko du; onetsi bitartean, irakasleek ikasketaburuak egin eta zuzendariak behin-behinekoz onesten duen ordutegia bete behar dute. Horri buruz aurkezten den edozein erreklamazio Zerbitzuak Ikuskatzeko eta Ikuskapen Teknikorako Zerbitzuak ebatziko du.

Beti egonen da, edozeinek ikusi ahal izateko moduan, ikastetxeko eta Ikasketaburutzako iragarki oholean eta ikastetxeko kide guztiek sarbide duten beste tokiren batean, ikastetxearen egoera agertuko duen informazioa, bereziki aipatuz irakasle bakoitzaren ordutegia eta lan tokia, eta zehazki bakoitzaren ordutegian bildutako irakastorduak, tutoretzak, zaintza orduak, departamentuko bilerak eta abar. Informazio hori guztia hezkuntza komunitateko kide guztien eskura egonen da. Era berean, zuzendaritza kargu bakoitza ikastetxean zein ordutan egonen den ere adieraziko da.

Nafarroako Goi Mailako Musika Kontserbatorioan ere irakasle lana egin behar duten irakasleek, edo beren ordutegia han osatu behar dutenek, ebazpen honen II. eranskineko III. atalaren (Irakasleak) 3. puntuan ikastetxe horretako departamentu didaktikoetarako ezarritako hautaketa ordenean parte hartu beharko dute.

Ondoren zehazten diren kategorietakoren batean sartuta dauden funtzionarioek espezialitatea aldatzeko eskubidea erabili nahi badute edo irakasle lana goi mailan egin nahi badute, dagokien ikastetxeko edo ikastetxeetako ikasketaburuari jakinarazi beharko diote, irailaren 1a bitarte, baldin eta aukera horrek berarekin badakar irakasleak jatorrian zuen departamentu didaktikoa ez den batean aritu behar izatea, horrela aurrerantzean egokitzen zaizkien departamentuetako bileretarako deia behar bezala jaso dezaten:

_Musikako eta Arte Eszenikoetako katedradunak, beste espezialitate batzuetakoak, atal honetako 4. puntuko 2. taulan espezialitate bakoitzerako ezarritako titulazioen jabe badira.

_Musikako eta Arte Eszenikoetako irakasleak, atal honetako 4. puntuko 1. taulan Katedradunen Kidegoko espezialitate bakoitzerako ezarritako titulazioen jabe badira.

_Musikako eta Arte Eszenikoetako irakasleak, beste espezialitate batzuetakoak, atal honetako 4. puntuko 2. taulan Katedradunen Kidegoko espezialitate bakoitzerako ezarritako titulazioen jabe badira.

4._Goi mailan irakasteko baldintzak.

.1. taula.

Musikako eta Arte Eszenikoetako Irakasleen Kidegoko funtzionarioek _goi mailako titulazioaren jabe, eskuineko zutabeko espezialitateen titular_ aukera izanen dute, sortzen diren beharren arabera eta ezartzen den prozedurari jarraikiz, Musikako eta Arte Eszenikoetako Katedradunen Kidegoari dagozkion ezkerraldeko zutabeko espezialitateak emateko, bi zutabeen arteko loturarekin bat.

KATEDRADUNEN KIDEGOKO IRAKASLEEN KIDEGOKO

ESPEZIALITATEAK ESPEZIALITATEAK

Akordeoia Akordeoia

Harmonia eta melodia lagundua Konposizioko oinarriak

Harpa Harpa

Kantua Kantua

Klarinetea Klarinetea

Klabea Klabea

Konposizioa eta instrumentazioa Konposizioko oinarriak

Kontrabaxua Kontrabaxua

Abesbatzen eta ahots taldeen zuzendaritza Abesbatza

Orkestrako eta musika-tresnen taldeko zuzend. Orkestra

Fagota Fagota

Moko flauta Moko flauta

Zehar flauta Zehar flauta

Folklore musikala Musikaren historia

Gitarra Gitarra

Ganbera musika Ganbera musika, antzinakoa

Musikologia Musikaren historia

Oboea Oboea

Organoa Organoa

Pedagogia musikala Musika hizkuntza

Perkusioa Perkusioa

Pianoa Pianoa

Bat-batekotasuna, musika-tresnen tonualdaketa

eta akonpainamendua Konposizioko oinarriak

Saxofoia Saxofoia

Tronboia Tronboia

Tronpa Tronpa

Tronpeta Tronpeta

Tuba Tuba

Txistua Txistua

Biola Biola

Biolina Biolina

Biolontxeloa Biolontxeloa

.2. taula.

Musikako eta Arte Eszenikoetako Irakasleen Kidegoko funtzionarioek _eskuineko zutabeko goi mailako titulazioaren jabe_ aukera izanen dute, sortzen diren beharren arabera eta ezartzen den prozedurari jarraikiz, Musikako eta Arte Eszenikoetako Katedradunen Kidegoari dagozkion ezkerraldeko zutabeko espezialitateak emateko, bi zutabeen arteko loturarekin bat.

KATEDRADUNEN KIDEGOKO EMAN DAITEZKEEN

ESPEZIALITATEAK GOI MAILAKO TITULAZIOAK

Akordeoia Akordeoia

Harmonia eta melodia lagundua Harmonia, kontrapuntua, konposizioa

eta instrumentazioa

Harpa Harpa

Kantua Kantua

Klarinetea Klarinetea

Klabea Klabea

Konposizioa eta instrumentazioa Harmonia, kontrapuntua, konposizioa

eta instrumentazioa

Kontrabaxua Kontrabaxua

Abesbatzen eta ahots taldeen zuzend. Abesbatzen zuzendaritza

Orkestrako eta musika-tresnen taldeko

zuzendaritza Orkestrako zuzendaritza

Fagota Fagota

Moko flauta Moko flauta

Zehar flauta Zehar flauta

Folklore musikala Musikologia

Gitarra Gitarra

Ganbera musika Ganbera musika

Musikologia Musikologia

Oboea Oboea

Organoa Organoa

Pedagogia musikala Pedagogia musikala

Perkusioa Perkusioa

Pianoa Pianoa

Bat-batekotasuna, musika-tresnen Solfeoa, musikaren teoria, transposiz.

tonualdaketa eta akonpainamendua eta akonpainamendua

Saxofoia Saxofoia

Tronboia Tronboia

Tronpa Tronpa

Tronpeta Tronpeta

Tuba Tuba

Txistua Txistua

Biola Biola

Biolina Biolina

Biolontxeloa Biolontxeloa

5._Irakasleek ordutegia betetzea eta asistentzia orria.

Zuzendaritza Taldeak irakasleak ikastetxean egoten diren kontrolatu behar du, baita ekaineko eta iraileko eskola gabeko egunetan ere. Halaber kontuan hartuko du, eta horren berri emanen Zerbitzuak Ikuskatzeko eta Ikuskapen Teknikorako Zerbitzuari, lan araubideko kontratudunak zein egunetan hasi diren ikastetxean.

Ikastetxeko zuzendariak, hilabete bakoitzaren 5a baino lehen, aurreko hilabeteko asistentziari buruzko parteak igorriko ditu Zerbitzuak Ikuskatzeko eta Ikuskapen Teknikorako Zerbitzura eta, horretarako, ikastetxera bidaliko diren ereduak erabiliko ditu.

Asistentzia partearen kopia bat jendaurrean paratuko da, ikusgai, hilabete bakoitzaren 5a baino lehen. Beste kopia bat Eskola Kontseiluaren esku jarriko da.

Ikastetxean nahitaez egoteko orduei buruzko absentzien eta atzerapenen berri emanen da ohiko ereduetan, kontuan hartuta bakoitzaren ordutegi pertsonala eta alde batera utzita absentzia justifikatuta dagoen ala ez.

Halaber, norberaren ordutegian agertu ez arren, irakasleek egin dituzten jarduera osagarriak aipatuko dira.

Jarduera horietariko bakoitzean parte hartzen duten irakasleak eta egiten dituzten orduak adieraziko dira.

Nolanahi ere, parte horietan ondoko arau hauek beteko dira:

_Inoiz ez da utziko hutsik "hutsegitearen arrazoia" laukia, eta hala egiten bada, justifikatu gabeko hutsegitetzat hartuko da.

_Hutsegite guzti-guztiak agertuko dira.

_"Hutsegitearen arrazoia" izeneko laukian "Norberaren arazoetarako ordaindu gabeko lizentzia" jarri ahal izateko, beharrezkoa izanen da Giza Baliabideen Zerbitzuak irakasleari baimena ematea.

Irakasleek beren lanetan gertatzen den edozein absentzia edo atzerapenen berri emanen diote ikastetxeari, ahalik eta lasterren.

Zuzendariak, justifikazioa aurkezteko epea amaitu eta biharamunean aditzera emanen dio Zerbitzuak Ikuskatzeko eta Ikuskapen Teknikorako Zerbitzuari irakasle baten edozein hutsegite nahiz atzerapen, ikasketaburuari justifikatu gabekoa iruditzen zaiona, bere lansaritik tokatzen den kenketa egiteko eta, hala behar bada, espedientea hasteko. Kasuko irakasleari ere emanen zaio, idatziz, horren berri.

Irakasleek hutsegitearen frogagiriak aurkeztu behar dizkiote zuzendariari, horrek eskatu gabe.

Irakasleen hutsegiteen frogagiriak (baja agiriaren kasuan, haren kopia edo fotokopia) ikastetxeko zuzendaritzan geldituko dira Zerbitzuak Ikuskatzeko eta Ikuskapen Teknikorako Zerbitzuaren eskura.

Eskola emate normalaren gorabehera guztiak berehala jakinaraziko zaizkio telefonoz Zerbitzuak Ikuskatzeko eta Ikuskapen Teknikorako Zerbitzuari, eta bai ondoren asistentzia partean jasoko ere.

IV._IKASTETXEAREN FUNTZIONAMENDUA

1._Alderdi orokorrak.

Kapitulu honetan aipatutako organo horien guztien zeregina irakaskuntzako jarduera eta jarduera osagarri guztien koherentzia bermatzea da, ikastetxearen helburuak era eraginkorrean lortzeko.

2._Gobernu organoak.

Zuzendaritza Taldeak bere irakastorduetatik gehienez ere ondoko ordu kopurua erabiltzen ahalko du karguetako eginkizunetan:

_Zuzendaria: 14 ordu.

_Zuzendariordea: 6 ordu.

_Ikasketaburua: 13 ordu.

_Idazkaria: 11 ordu.

_Musika Eskoletarako alboko ikasketaburua: 6 ordu.

Dena dela, Nafarroako irakaskuntza publikoaren kalitatea hobetzeko itunean ezarritakora egokitu beharko da bertan xedatutakoa.

3._Kide anitzeko gobernu organoak.

3.1. Eskola Kontseilua.

Sortzen diren lanpostu hutsak Eskola Kontseiluen urteroko deialdiaren ondorioz berrituko dira.

3.2. Irakasleen klaustroa.

Zuzendaria izanen da klaustroko burua, eta ikastetxean diharduten irakasle guztiek osatuko dute.

4._Irakaslana koordinatzeko organoak.

Irakaslana koordinatzeko organoak: koordinazio didaktikoko departamentuak, Koordinazio Pedagogikorako Batzordea eta tutoreak. Tutore bat izanen da ikasle talde bakoitzeko.

Organo horien guztien zeregina irakaskuntzako jarduera eta jarduera osagarri guztien koherentzia bermatzea da, ikastetxearen helburuak era eraginkorrean lortzeko.

4.1. Koordinazio didaktikoko departamentuak.

A._Alderdi orokorrak.

Departamentu didaktikoak lan egiteko taldeak dira eta horien xedea irakasleak ikastetxeko bizitzan integratzea da; departamentu horien erantzukizuna da espezialitate eta irakasgaiei dagozkien ikasketak antolatu eta garatzea, bai eta dagozkien eskumenen esparruan agintzen zaizkien jarduerak egitea ere.

Irakasleek irakaskuntzaren antolakuntzan parte hartzeko duten ohiko bidea dira; halaber, kideek aldian-aldian egiten dituzten bileren bidez, hobekuntza pedagogikoan eta zientifikoan etenik gabe aurrera egiteko bitartekoak dira.

Erantzukizuna eta zuzendaritza departamentuko buruari dagozkio eta, hori ez dagoenean, ikasketaburuari.

B._Departamentu didaktikoak eratzea.

Ikastetxean departamentu didaktiko hauek izanen dira:

_Harizko musika-tresnen departamentua (hari igurtzia eta hari sakatua): harpa, kontrabaxua, gitarra, biola, biolina eta biolontxeloa.

_Haizezko musika-tresnen eta perkusiozkoen departamentua: klarinetea, fagota, moko flauta, zehar flauta, oboea, perkusioa, saxofoia, tronboia, tronpa, tronpeta, tuba eta txistua.

_Tekladun musika-tresnen departamentua: akordeoia, klabea, organoa, pianoa eta piano osagarria.

_Musika hizkuntzaren departamentua.

_Konposizioaren, musikologiaren eta musikaren teoriaren departamentua: Akonpainamendua, Analisia, Harmonia, Konposizioko oinarriak eta Musikaren historia.

_Kantuaren eta musika-tresnen taldeen departamentua: Kantua, Kantuari aplikatutako atzerriko hizkuntzak, Ganbera musika, Abesbatza, Orkestra, Banda eta Taldea.

"Taldea" irakasgaia emanen du kasuan kasuko taldea osatzen duten musika-tresnetakoren baten irakasleak.

Ikastetxeko Zuzendaritzak aurreko zerrenda horretan ageri ez diren espezialitateak edo irakasgaiak ematen dituzten irakasleak sartuko ditu egokiena izaten ahal den departamentu didaktikoan, ikastetxearen ezaugarriak eta horiek dituzten espezialitateak kontuan hartuta.

Nafarroako Goi Mailako Musika Kontserbatorioan ere irakasle lana egin behar duten irakasleak, horren ondorioz, ikastetxe horretan dagozkien departamentuetan ere sartuko dira. Halakoetan, irakasleek bi ikastetxeetako departamentu didaktikoek deitzen dituzten bileretara joan behar dute.

C._Departamentuen eginkizunak.

Departamentu didaktikoen eginkizunak ondoko hauek dira:

1. Ikasturte bakoitzeko irakaskuntza antolatzea eta programatzea, departamentuko irakasgai edo espezialitateen ikasketak garatuz.

2. Ikasturtea hasi aurretik, departamentuko irakasgai edo espezialitateen programazio didaktikoa egitea. Lan hori departamentuburuak koordinatuta eta haren zuzendaritzapean eginen da, Koordinazio Pedagogikorako Batzordeak ezarri dituen irizpide orokorrei jarraikiz.

Departamentu guztiek beren programazioak indarra duen legediaren arabera egokitu beharko dituzte.

Curriculuma osatzen duten irakasgai eta espezialitateen programazio didaktikoek ondoko alderdiak izanen dituzte:

_Ebaluazioaren helburuak, edukiak eta irizpideak kurtsoen arabera banatzea.

_Aplikatuko den metodologia didaktikoa.

_Ikasleen ikaskuntzaren ebaluaziorako irizpideak eta prozedurak.

_Erabiliko diren igoera irizpideak, bereziki zainduz eskatuko diren gutxienekoak eta kalifikazio irizpideak.

_Gainditu gabeko irakasgaiak dituzten ikasleentzat errekuperazio jarduerak egitea eta errekuperazio hori lortzeko neurriak hartzea.

_Errepertorioa, erabiliko diren materialak eta baliabide didaktikoak.

_Espezialitate edo irakasgai bat baino gehiago ukitzen duten beste departamentu batzuekin irakaskuntzako jarduera komunak programatzea, esaterako, Ganbera Musikaren edo Taldearen kasuan.

_Departamentuak egin nahi dituen jarduera osagarriak eta eskolaz kanpokoak.

Irakasgai bakoitzaren programazioaren edukia jendaurrean jarri beharko da ikasturtea hasi aurretik, eskolako komunitateko kide guztiek horren berri izan dezaten.

Departamentuburuek programazioaren jarraipena eginen dute. Jarraipenaren berri departamentuko bileretako aktetan jasoko da.

Ikastetxeko Zuzendaritzak egiaztatu eginen du programazio horiek jarraibide hauetan ezarri dena betetzen duten. Horrela ez bada, Zuzendaritzak programazio hori hartu eta kasuan kasuko departamentuari itzuliko dio, berriz egin dezan. Zerbitzuak Ikuskatzeko eta Ikuskapen Teknikorako Zerbitzuak programazio horiek berrikusiko ditu eta, hala denean, departamentu bakoitzera egin beharreko aldaketak bilduko dituen txostena igorriko du.

3. Departamentua osatzen duten espezialitate edo irakasgaien programazioen alderdi orokorrekin lotuta dauden irizpideak bateratzea, horien arteko koherentzia bermatzeko eta ebaluazioaren oinarrizko ildoak ezartzeko, irakasleen klaustroaren irizpideei jarraikiz.

4. Behar diren probak egitea, indarrean dagoen arautegian ezarri denarekin eta ebaluazioaren oinarrizko ildoei buruz hartu diren erabakiekin bat.

5. Zuzendaritza taldeari eta irakasleen klaustroari ikastetxearen hezkuntza proiektuari buruzko proposamenak aurkeztea.

6. Zuzendaritza taldeari eta irakasleen klaustroari Urteko Programazio Orokorrari buruzko proposamenak aurkeztea.

7. Koordinazio Pedagogikorako Batzordeari curriculum proiektuak egiteari buruzko proposamenak aurkeztea.

8. Koordinazio Pedagogikorako Batzordeari onarpen probei eta mailara heltzeko probei buruzko proposamenak aurkeztea.

9. Jarduera osagarriak eta eskolaz kanpokoak antolatzea eta koordinatzea, bidezko organoek ezarri dituzten irizpideak eta klaustroak zuzendaritza taldeari aurkeztu dizkion proposamenak betez eta Ikasketaburutzarekin elkarlanean arituz.

10. Beste departamentu batzuekin batera lankidetzan aritzea baterako jarduerak antolatzen, bai eskolako jarduerak bai osagarriak, ikasketaburuarekin koordinatuta.

11. Ebaluazioaren prozesuaren ondorioz ikasleek egiten dituzten erreklamazioei buruzko informazioa ematea eta honako jarraibide hauetan adierazi diren kasuetan ebaztea.

12. Departamentuko irakasgai eta espezialitateen programazio didaktikoaren garapena ebaluatzea eta ebaluazio horrek aholkatzen dituen neurri zuzentzaileak aplikatzea.

13. Ikasturtearen amaieran memoria egitea eta horretan programazio didaktikoaren garapena eta lortu diren emaitzak ebaluatzea.

Kurtsoko amaierako memoriak atal hauek izanen ditu:

a) Emaitzen balorazioa.

_Kalifikazioen estatistikak, talde eta kurtsoen arabera.

_Ikasleen errendimenduaren azterketa, errendimendu horren faktoreak azalduta.

b) Funtzionamenduaren balorazioa. Programazioaren garapena.

_Garatutako helburu, eduki eta jardueren balorazioa, bai eta programazioa betetzeko erabilitako metodologia eta baliabideena ere, eta ager litezkeen akatsen arrazoia azaldu eta zuzenketak proposatzea.

_Baldin eta programazio pertsonalizaturik badago, aurreko analisi hori errepikatu beharko da horietariko bakoitzerako, eta azterlan erkatzailea egin.

_Ebaluazioa egiteko erabili diren irizpide, prozedura eta jardueren balorazioa.

_Egindako jarduera osagarrien eta eskolaz kanpokoen azalpena eta balorazioa: helburu zehatzak, talde ukituak, balorazioa, aurkitu diren zailtasunak, etab.

c) Curriculum proiektuak berrikusi eta eguneratzeari buruz egin den lanaren balorazioa.

14. Irakasleen eguneratze zientifikoa eta didaktikoa bideratuko duten prestakuntza jarduerak sustatzea.

15. Ikaskuntza prozesuan estrategia metodologikoak bideratu eta sustatuko dituzten bitartekoak eta baliabideak aukeratzea. Eginkizun horretarako, departamentuak, besteak beste, ondoko irizpide hauek hartuko ditu kontuan: irisgarritasuna eta eraginkortasuna, motibazioa, edukien oparotasuna, errealitatearekiko erlazioa eta ikaskuntza esperientzien antolakuntza.

16. Ebaluazio eta errekuperaziorako irizpide komunak prestatzea.

Ikasleek eta gurasoek eta, hala denean, ikasleen legezko ordezkariek araudian ezarri diren kalifikazio akademiko partzialak jasotzeko aukera izan dezaten, irakasleek ikasleen etenik gabeko ebaluazioa eginen dute.

Ebaluazio hori hiruhilekoa izanen da, eta idatziz jasoko da ikasleek eta, baldin eta adingabeak badira, gurasoek edo legezko ordezkariek horren berri izan dezaten.

Musikako ikasketa profesionalak egiten dituzten ikasleen kasuan, baldin eta ekaineko ebaluazio arrunta egin ondoren ebaluazio negatiboko irakasgaiak badituzte, aparteko probak antolatuko dira Hezkuntza Departamentuak ezartzen duenari jarraikiz.

D._Departamentu didaktikoen bilerak.

Irakasleek beren departamentu didaktikoak deitzen dituen bileretara joan behar dute. Nafarroako Goi Mailako Musika Kontserbatorioan ere irakasle lana egin behar duten irakasleak bi ikastetxeetan dagozkien departamentuetakoak izanen dira aldi berean.

Irailean, departamentu didaktikoek behar diren bilerak eginen dituzte hurrengo ikasturteko irakasgaien programazioak prestatzeko.

Ikastetxeko ordutegiaren barruan, eskola orduetako bat utziko da gutxienez astean, departamentu didaktikoko kide guztiak bil daitezen; ordu hori ikastetxeko eskola ordutegian agertuko da, eta bai irakasle bakoitzaren ordutegi pertsonalean ere.

Bilera horietariko bat, hilean behin, programazioen garapena ebaluatzeko eta ebaluazioak aholkatzen dituen neurri zuzentzaileak ezartzeko izanen da.

Ekainean, departamentuko kideak bildu eginen dira lan plana, lorpenak eta hurrengo ikasturterako behar dituen zuzenketak aztertzeko; horri dagokion amaierako memoria eginen da eta ikastetxeko Zuzendaritzari emanen zaio ekainaren 30a baino lehen; ondoren, Zuzendaritzak Urteko Programazio Orokorrari buruzko Memorian sartuko du eta, dena, Zerbitzuak Ikuskatzeko eta Ikuskapen Teknikorako Zerbitzura uztailaren 10a baino lehen igorriko.

Departamentu didaktikoen bilkura guztien akta eginen da Akta Liburuan. Departamentuburuak akta horiek egin eta sinatuko ditu.

Halaber, departamentuek, Akta Liburuaz gain, Inbentario Liburua ere eguneratua izanen dute, eta bertan material inbentariagarri guztien zerrenda azalduko da.

Departamentuan, ikasturtean zehar ikasleen ebaluazioa egiteko erabili diren proba eta dokumentuak gordeko dira; ikasturtearen bukaeran, ikasleen erreklamazioak aurkezteko epea amaituta, botatzen ahalko dira.

E._Departamentu didaktikoen burutza.

Departamentu didaktikoetan elkarlanean aritzen da, talde lana da, bertako kide guztiek lagunduko eta parte hartuko dute. Departamentu bakoitzak buru bat izanen du eta bere esku egonen da departamentuaren ardura; bera izanen da departamentuko kideen elkarlana koordinatu eta zuzenduko duena.

Departamentuko burua izendatzea ikastetxeko zuzendariari dagokio eta irailean eginen du; kargu horrek ikasturte bateko iraupena izanen du.

Zuzendariak bertako kideen artean izendatuko du burua, departamentuaren iritzia entzun ondoren. Burutza hori behin betiko destinoa ikastetxean duen batek bete behar du, baldin eta horrelakorik badago.

Departamentuburuak departamentuaren ardura du eta eginkizun hauek:

_Departamentuko lana zuzentzea.

_Bilerak antolatu, prestatu, deitu eta zuzentzea.

_Lanak kideen artean banatzea.

_Departamentuak curriculum proiektua prestatzeko egin behar duen proposamena koordinatzea.

_Koordinazio Pedagogikorako Batzordeko kide den neurrian, curriculum proiektuen prestakuntzan parte hartzea.

_Departamentuko programazioak eta ikasturte bukaerako memoria idaztea.

_Urriaren 10a baino lehen programazioen ale bat ikastetxeko zuzendariari ematea.

_Programazioak betetzen diren begiratzea, gutxieneko eduki eta mailei dagokienez.

_Ikasketaburuarekin eta kasuan kasuko departamentuekin elkarlanean aritzea, batera egin behar diren irakaskuntzako jardueren plangintzan.

_Ikasleak ebaluatzeko prozesuan erreklamazioak aurkezteko prozedura betetzen dela bermatzea, indarra duten arauei jarraikiz.

_Departamentuan atzematen den edozein akatsen berri ikasketaburuari ematea.

_Bilera bakoitzaren akta egin eta Akta Liburuaren ardura izatea.

_Inbentario Liburuaren eguneratzea bermatzea.

_Departamentuari esleitu zaizkion eremu, instalazio, material eta ekipamenduen erabilera koordinatzea eta horiek mantentzea.

_Departamentuak material eta ekipamendu zehatza eskuratzeari buruz dituen proposamenak aurkeztea.

_Zuzendaritza Taldearekin elkarlanean aritzea beste ikastetxe edo erakunde batzuekiko harremanak sustatzen, horiekin prestakuntza jarduera osagarriak antolatzeko.

4.2. Koordinazio Pedagogikorako Batzordea.

A._Koordinazio Pedagogikorako Batzordea eratzea.

Koordinazio Pedagogikorako Batzordea irailean eratuko da. Honako hauek osatuko dute: zuzendariak, batzordeko burua izanen baita, ikasketaburuak, musika eskoletarako alboko ikasketaburuak eta departamentuburuek.

Batzordeko buruak idazkari bat izendatuko du, Koordinazio Pedagogikorako Batzordeko kideen artetik hautatuta.

B._Koordinazio Pedagogikorako Batzordearen eskumenak.

Koordinazio Pedagogikorako Batzordeak eginkizun hauek izanen ditu:

_Klaustroak aurkeztutako irizpideetatik abiatuta, curriculum proiektua egiteko ildoak ezartzea. Izan ere, departamentu didaktikoek beren lana egitean kontuan hartu beharko dituzte iritzi horiek.

_Curriculum proiektuaren prestakuntza zuzendu eta koordinatzea, bai eta egin litezkeen aldaketak ere, eta proiektua idazteko ardura hartzea.

_Curriculum proiektuko osagaiei buruzko erabakiak garatzea. Horretarako ikastetxeko hezkuntza proiektuan hartutako erabakiak kontuan hartuko dira.

_Hezkuntza proiektuaren, curriculum proiektuaren eta curriculumaren garapenaren arteko koherentzia ziurtatzea.

_Curriculum proiektua eta bere aldaketak Klaustroari proposatzea, ebaluatu eta onetsi ditzan.

_Curriculum proiektua ikastetxeko irakaslanean betetzen den begiratzea, bai eta ebaluazioa egiten den ere.

_Ebaluaziorako nahiz kalifikaziorako saioen plangintza orokorra eta azterketen egutegia Klaustroari proposatzea, ikasketaburuarekin bat.

_Ikastetxeko irakasleen prestakuntza plana egiteko proposamena Klaustroari helaraztea.

_Irakasleen Klaustroari ondokoak proposatzea: curriculum proiektua, hezkuntza proiektuko irakaskuntza arloak eta Urteko Programazio Orokorra ebaluatzeko plana, ikastetxeko eskola errendimenduaren ebaluazioa eta irakaskuntza prozesua.

_Barne ebaluazio bat egitea, non aztertuko baitira planaren garapenean gertatzen diren aurrerapenak eta oreka faltak, eta, halaber, kasua bada, horiek zuzentzeko neurriak hartzea edo haien gaineko erabakiak.

_Urteko memoria egitea prozesuaren garapena era sistematikoan jasotzeko. Era berean, prozesu hori ebaluatu beharko du bertan parte hartu dutenen ikuspuntutik abiatuta.

_Ikasketa hauen curriculum proiektuko proposamena prestatu eta irakasleen klaustroan aurkeztea, onetsia izan dadin.

_Koordinazio Pedagogikorako Batzordearen beraren funtzionamenduari buruzko txostena Eskola Kontseilura igortzea kurtso bukaeran; kurtsoko amaierako memorian sartuko da.

4.3. Tutoreak.

A._Tutorea izendatzea.

Tutoretza eta ikasleen irakaskuntzako orientazioa eta orientazio profesionala irakaslanaren zereginak izanen dira.

Ikasle guztiak irakasle-tutore baten ardurapean egonen dira; hots, musika-tresnako irakaslearen ardurapean.

B._Tutorearen eginkizunak.

Tutorearen eginkizunak hauek dira:

_Ikasketaburuak koordinatuta tutoretzako ekintzen plangintzan eta orientazio akademiko eta profesionaleko jardueretan parte hartzea, eta aldian-aldian beharrezko bilerak egitea.

_Ikasketaburutzak deitzen dituen ebaluazio bileretan mahaiburu izatea bere ikasleei dagokienez.

_Ikasleek ikastetxean izan behar duten integrazioa erraztea eta bertako jardueretan parte har dezaten sustatzea.

_Ikasleen eskariak eta kezkak jakinaraztea gainerako irakasleei eta zuzendaritza taldeari.

_Ikasleei, 18 urtetik beherako ikasleen gurasoei edo legezko ordezkariei eta irakasleei informazioa ematea irakaskuntzako jarduerei eta eskolako errendimenduari lotuta dauden gai garrantzitsu guztiei buruz.

_Irakasleen eta gurasoen edo legezko ordezkarien arteko hezkuntzako lankidetza erraztea.

_Ikasleei orientazioa eta aholkuak ematea beren ahalbideei, hezkuntza edo lanbide arloan dituzten aukerei eta horretarako egokiena den ikasketa bideari buruz.

_Beren taldeko ikasleen etenik gabeko ebaluazioaren jarraipena egitea.

C._Tutoretza orduak.

Irakasle-tutoreak astero bi ordu bete beharko ditu gurasoei edo ikasleen legezko ordezkariei kasu egiteko eta, hala denean, ikasleak zaintzeko eta aurreko paragrafoan aipatu diren Ikasketaburutzako bileretara joateko. Tutoretzako ordu horiek irakasle bakoitzaren ordutegian azalduko dira, eta ikasturtea hasten denean jakinaraziko zaizkie gurasoei edo, hala denean, ikasleen legezko ordezkariei eta ikasleei.

Ordutegia egiten denean ahaleginak eginen dira ikasleen ordu askeak eta tutoreari esleitu zaizkion orduetariko bat bateratzeko, tutorea ikasleekin biltzeko aukera egon dadin.

V._IKASLEEN ESKUBIDEAK ETA BETEBEHARRAK

1._Alderdi orokorrak.

Ikasleen eskubide eta betebeharrei dagokienez, abenduaren 14ko 417/1992 Foru Dekretuari (1993ko urtarrilaren 15eko Nafarroako ALDIZKARI OFIZIALa) eta uztailaren 14ko 191/1997 Foru Dekretuari (1997ko abuztuaren 1eko Nafarroako ALDIZKARI OFIZIALa) jarraituko zaie.

2._Ikasleen asistentzia.

Ikasle ofizial guztien eskubidea eta betebeharra da klaseetara joatea, eta inoiz ez da zilegi izanen borondatezko asistentzia duen sistemarik ezartzea ikaslea matrikulaturik dagoen irakasgaietan.

Zenbait egun jakinetan arrazoi batengatik edo bestearengatik ikasle gutxi egonagatik ere, ikastetxeak eta irakasleek normalki eman beharko dituzte klaseak.

Asistentziako hutsegiteak gurasoek edo ikasleen legezko ordezkariek justifikatu beharko dituzte irakasle-tutorearen aurrean, eta Ikasketaburutzak onetsi beharko du.

Inoiz juzgatzen baldin bada ikasle batek behin eta berriz eta oinarririk gabe justifikatzen dituela bere hutsegiteak, ikasketaburuak zilegi izanen du neurri zuzentzaileak hartzeko proposamena egitea Eskola Kontseiluari, justifikazioak hobeki kontrolatzearren.

18 urtez goitiko ikasleek _hutsegiteen justifikazioak berek aurkeztea hautatzen dutenek_, edozein lan harremanetan eskatzen ahal direnen pareko frogagiriak aurkeztu beharko dituzte.

Orain arte aipatutakoa kontuan harturik, Eskola Kontseiluak finkatu egin beharko du, Barne Araubiderako Erregelamenduan, nola arautu ikasleen asistentzia hutsegiteak eta horiek zer zehapen izanen duten.

3._Erreklamazioak egiteko prozedura.

Ikasle guztiek eskubidea dute beren kalifikazioan eragina izanen duen edozein azterketa edo proba idatzi zuzendua eta kalifikatua ikusteko.

Ikasleei beren errendimendu akademikoaren balorazio objektiboa bermatzeko, beharrezkoa da ikasleek aurretik izatea helburuen, edukien eta ebaluazio irizpideen berri, hala nola balorazio positiboa izateko eskatutako gutxieneko emaitzena, kalifikazio irizpideena eta ikasketak ebaluatzeko ikasturtean erabiliko diren prozedurena.

Irakasle titularrak ikasleek, haien gurasoek edo legezko ordezkariek programazio didaktikoei buruz eskatzen dituzten argibideak emanen dizkie. Ebaluazioa egiteko tresnei buruzko informazioa ere emanen die eta ikasleek zilegi izanen dute egin dituzten idatzizko proba, ariketa eta lanak ikusi eta irakaslearekin batera aztertzea.

Ebaluazioa egiteko tresnak ikasturte amaierako kalifikazioak eman edo azken erabakiak hartu ondoko hiru hilabeteetan gordeko dira gutxienez, erreklamazioak izaten direnean izan ezik, horiei dagokien prozesua itxi arte gordeko baitira.

Ikasleek, haien gurasoek edo legezko ordezkariek zilegi izanen dute balorazio eta kalifikazioei buruzko argibideak eskatzea. Informazio hori eman ondoren ados ez badaude izandako azken kalifikazioarekin, hura berriz aztertzeko eskatzen ahalko diote idatziz ikasketaburuari, jakinarazpena egin eta bi egun balioduneko epean.

Azken kalifikazioa eta/edo agiria eskuratzekoa berraztertzen baldin bada, departamentu didaktikoek edo, kasua bada, epaimahaiek, hurrengo egun baliodunean, berraztertzeko eskakizunak ikusi eta dagozkien txostenak eginen dituzte. Txostena ikasketaburuari igorriko zaio eta horrek kopia bat bidaliko die ikasleei edo, hala behar denean, haien gurasoei.

Ikastetxeetan berraztertzeko prozesua agortzen duten ikasleek zilegi izanen dute, dela nork bere kasa, dela guraso edo tutoreen bitartez, ikastetxeko zuzendariari eskatzea erreklamazioa Zerbitzuak Ikuskatzeko eta Ikuskapen Teknikorako Zerbitzura igor dezala, azken jakinarazpena egin eta bi egun balioduneko epean.

Ikastetxeko zuzendariak, gehienez ere hiru egun balioduneko epean, espedientea Zerbitzuak Ikuskatzeko eta Ikuskapen Teknikorako Zerbitzura bidaliko du. Zuzendari nagusiak ebazpena emanen du _eta horrek administrazio bideari amaiera emanen dio_ hamabost egun balioduneko epean espedientea jasotzen denetik hasita, Zerbitzuak Ikuskatzeko eta Ikuskapen Teknikorako Zerbitzuaren txostenak kontuan izanik.

Ikaslearen erreklamazioaren aldeko ebazpena ematen baldin bada arestian aipatutako instantzietakoren batean, dagokion zuzenketa agerraraziko da ebaluazio agirietan, ikastetxeko idazkariak sinatutako eta zuzendariak ikus-onetsitako eginbidearen bitartez.

Kalifikazioen kontrako berraztertze eskaerak eta erreklamazioak jarraibide hauetan ezarritakoari lotuko zaizkio, eta, jarraibide hauetan arautu ez diren aferetarako, 1995eko abuztuaren 28ko Aginduari (1995eko irailaren 20ko "EAO").

VI._IKASLEAK ONARTU ETA MATRIKULATZEKO ARAUBIDEA

1._Onarpena eta matrikulazioa.

Ikasleak ikasketa hauei dagokien araudian ezarritakoaren arabera onartuko dira, bai musikako ikasketa profesionalen 1. kurtsotik 4.era bitartekoetan, bai musikako erdi mailako ikasketen 5. kurtsoan eta 6.ean.

Matrikula luzatzea hezkuntza sistema beraren barnean soilik egiten ahalko da, dela LOGSEri dagokiona dela LOEkoa, baina ez da baimenik emanen bi sistema horiek nahasten direnean. Hurrengo kurtsoan matrikula luzatzeko eskaera ikasturteko abenduaren 15a baino lehen egin beharko dute ikasleek.

Ikasleek, 2007/2008 ikasturtean, hezkuntza sistema berriko musikako ikasketa profesionalak egiten badituzte eta LOGSEko sistemari dagokion erdi mailako irakasgairen bat gainditu gabe baldin badute, irakasgai hori gainditzeko honako hau hartuko da kontuan:

a) Irakasgaiak bere parekoa baldin badu musikako ikasketa profesionaletan, hezkuntza-arreta LOEko sistemaren araberakoa izanen da.

b) Irakasgaiak parekorik ez badu musikako ikasketa profesionaletan, ikastetxeak beharrezkoak diren neurriak hartuko ditu ikasle horiekin lehengo LOGSEko sistemari jarraikiz jokatzeko.

2._Matrikulari uko egitea.

Ikasleek egindako matrikula deuseztatzeko eska dezakete, apirilaren 30a baino lehen, baldin eta agiri bidez eta zinez frogatzen badute ondoko inguruabarretariko bat gertatzen dela:

_Eritasun fisiko nahiz psikiko luzea izatea.

_Lanpostu bat eskuratu izana.

_Familiako beharkizunak izatea.

Ikaslearen irakasleei entzun ondoren, ikastetxeko zuzendariak eskaera ebatzi eta matrikulari uko egiteko baimena emanen du, baldin eta aipatu arrazoi horietako bat frogatzen bada eta, hori dela medio, ezinezkoa izan bada eskatzailea eskolara normalki joatea eta etengabeko ebaluazioaren bidez haren kalifikazioa egitea.

Aipatu arrazoiak ez bezalako beste arrazoi berezi batzuk daudenean, matrikulari uko egiteko eskabidea, horrekin batera txosten bat eta, hala bada, egokia den dokumentazioa igorriko ditu zuzendariak Eskola eta Lanbide Irakaskuntzaren Zuzendaritza Nagusira, bidezkoa den ebazpena eman dadin.

Matrikulari uko egiteko baimena ematen den kasu guztietan, dagokion eginbidea agertaraziko da ikaslearen ikasketen espedientean eta kontuan hartuko da uko horrek baimendu den ikasturte horretarako bakarrik balio duela. Halakoetan, ikasleari ez zaizkio zenbatuko horri dagozkion deialdiak.

Matrikula deuseztatu arren ez dira ordaindutako tasak itzuliko.

Matrikula deuseztatu duten ikasleek, hurrengo ikasturtean, beren ikasketak egiten segitu dezakete ikastetxe berean. Ondorengo ikasturteetan ikasketetara itzultzeko, indarra duen araudian ezarritako sarrerako prozedura arruntean sartu beharko dute (sarrera proba bat gainditu) eta dauden ikastoki hutsen arabera izanen dute tokia.

Deuseztatutako ikasturtea ez da zenbatuko ez kurtsoan egoteko denborari ez ikasketa profesional guztietan edo musikako erdi mailakoetan egoteko denborari dagokionez.

Musikako ikasketa profesionaletako espezialitate bateko kurtso batean behin bakarrik deuseztatzen ahalko da matrikula.

VII._BESTE JARRAIBIDE BATZUK

1._Irakasleen erantzukizuna.

Hezkuntza Administrazioak, indarrean dauden legeek ezartzen dutenari jarraikiz, bere gain hartuko ditu irakasle funtzionarioen kontrako auzietatik sortzen ahal diren erantzukizun zibil ordaingarriak; hori ez da eragozpen izanen bidezkoa den kasuetan atzera egiteko ekintza gauzatzeko. Irakasleek, euren jardunean letratuen laguntza behar izanez gero, defentsa egokia izan dezaten ere arduratuko da.

2._Ikastetxeko langileen jarduerak.

Urteko Programazio Orokorrean sartuta ez dagoen edozein jarduera egin ahal izateko, ikastetxeko zuzendariaren berariazko baimena beharko dute bai irakasleek, bai hezkuntza komunitateko beste edozein kidek.

3._Ikastetxeez landarako jendea sartzea.

Ikastetxean edozein mezu aditzera eman, transmititu edo banatu nahi duten pertsona guztiek ikastetxeko Zuzendaritza Taldearen baimena beharko dute. Kasu batean zein bestean baimen hori idatziz agertuko da ikastetxeko agiritegian.

Hori guztia ez da inoiz izanen legeak aitortzen dituen eskubide sindikaletarako oztopo.

4._Jarraibide hauen berri ematea.

Zuzendaritza Taldeak ardura hartuko du hezkuntza komunitateko sektore guztiek jarraibide hauen edukiaren berri izan dezaten.

II. ERANSKINA

2007/2008 ikasturtean Nafarroako Goi Mailako Musika Kontserbatorioaren antolaketa eta jarduna arautzeko jarraibideak

I._IKASTETXEAREN URTEKO PROGRAMAZIO OROKORRA

1._UPOaren edukia.

Nafarroako Goi Mailako Musika Kontserbatorioak, ikasturtea hasi aurretik, Urteko Programazio Orokorra eginen du; programazio horrek hezkuntzako jarduera guztiak koordinatuko ditu, eta beren eskumenak zuzen betetzen direla eta eskola komunitateko arlo guztiek esku hartzen dutela bermatuko du.

Urteko Programazio Orokor hori prestatuko da urriaren 3ko 1/1990 Lege Organikoak ezartzen dituen goi mailako ikasketei dagokienean.

Urteko Programazio Orokorrak ondoko atal hauek izanen ditu:

A._Ikastetxearen ordutegi orokorra eta hura egiteko ezarri diren irizpide pedagogikoak.

B._Irakaskuntza jarduerak, urriaren 3ko 1/1990 Lege Organikoan arautu diren goi mailako musika ikasketei dagozkienak.

C._Ikastetxeko irakasleen prestakuntza plana.

D._Jarduera osagarrien eta eskolaz kanpokoen urteko programazioa.

E._Memoria administratiboa.

F._Hezkuntza proiektua edo ezarritakoari egin zaizkion aldaketak.

G._Curriculum proiektua edo ezarritakoari egin zaizkion aldaketak.

A._Ikastetxearen ordutegi orokorra eta hura egiteko ezarri diren irizpide pedagogikoak.

Ikastetxeko ordutegi orokorra Klaustroaren iritzia aditu ondoren Zuzendaritza Taldeak eginen du, eta bide eman beharko du ikastetxe bakoitzeko Urteko Programazio Orokorrean aurreikusitako jarduerak aurrera eramateko. Hortaz, ikastetxeko ordutegi orokorrak honako hauek bilduko ditu gutxienez:

a) Ikastetxea eskola komunitatearentzat irekita egonen den ordutegia.

b) Ikasleen eskola orduak.

c) Ikasleek eskolakoak ez diren jarduerak egiteko izanen duten ordutegia.

d) Ekain eta iraileko jardueren behin betiko egutegiaren aurreikuspena; horretan probak eta azken ebaluazioak noiz eginen diren adieraziko da, bai eta kontsultak egiteko epea zein izanen den ere. 2008ko maiatzaren 9aren aurretik, ikastetxeek aipatu diren jarduera horien behin betiko egutegia igorriko dute Zerbitzuak Ikuskatzeko eta Ikuskapen Teknikorako Zerbitzura.

e) Irakasleen ordutegi orokorra.

f) Irakasleen norbanako ordutegia.

Ikastetxeko ordutegi orokorra egiteko nahitaez hartuko dira kontuan, Klaustroak adierazitakoaz gain, ondoren azaltzen diren irizpide hauek:

_Kontserbatorioaren ordutegia astelehenetik larunbatera bitartekoa izanen da, biak barne. Astelehenetik ostiralera 8:30etik 22:00ak arte. Larunbatean 8:30etik 14:00ak arte.

_Larunbatak ikasteko eskola egunak izanen dira Kontserbatorioan, eta Zuzendaritza Taldeak ikasleak ikasgeletan sartu eta musika-tresnak erabiltzeko eta horiek zaintzeko sistema ezarriko du.

_Ikastetxeko Zuzendaritzak neurriak hartuko ditu ikastetxea oporraldietan, goizez, irekita edukitzeko.

_Irakasleek ordutegien arloan izaten ahal dituzten nahiak ezin dira inoiz izan Klaustroak ezartzen dituen irizpideen kontrakoak, edota ikasleen beharren kontrakoak.

B._Irakaslanak.

Irakasleen Klaustroak, departamentu didaktikoen bidez, ikastetxearen irakaskuntzako jarduerak programatuko ditu eta Zuzendaritza Taldeari igorriko dizkio, Ikastetxeko Urteko Programazio Orokorrean sar ditzan.

Irakaskuntzako jardueren programazioa egiteko, ordutegiak egiterakoan erabilitako irizpideak hartuko dira kontuan eta, gutxienez, ondokoak bilduko ditu: tutoretza plana, ebaluazioak eta errekuperazio sistemak, irakasgaien arteko koordinazio proiektuak eta departamentu didaktikoen programazioak.

C._Ikastetxeko irakasleen prestakuntza plana.

Kontserbatorioak ikastetxeko irakasleentzako prestakuntza plan bat sartuko du bere programazioan. Koordinazio Pedagogikorako Batzordeak ikastetxeko irakasleak prestatzeko planaren proposamena aurkeztuko dio Klaustroari, eta proposamen hori Hezkuntza Departamentuak aurkezten duen prestakuntza planeko eskaintza kontuan hartuta eginen du. Atal honetan aipatzen den planean kontuan hartuko dira curriculum proiektua egin eta berrikusteko prozesuan ikusten diren beharrak, bai eta irakaskuntzako praktikari buruzko berriztapen eta hausnarketaren emaitza direnak ere.

D._Jarduera osagarrien eta eskolaz kanpokoen urteko programazioa.

Planteatzen diren jarduera osagarriak eta eskolaz kanpokoak irakaskuntzako ekintzak osatu edo garatzeko izanen dira. Jarduera horiek aurrez Eskola Kontseiluak ematen dituen jarraibideei egokituko zaizkie.

E._Memoria administratiboa.

Zuzendaritza Taldeak eginen du eta bertan sartuko da, besteak beste, Ikastetxea Antolatzeko Dokumentua.

Ikastetxea Antolatzeko Dokumentua Zerbitzuak Ikuskatzeko eta Ikuskapen Teknikorako Zerbitzuak ikastetxeei bidaltzen dizkien inprimakiak erabiliz beteko da. Inprimaki horiek, behar bezala beterik, Zerbitzu horretara bidaliko dira, ikasturteko eskolak hasi eta 20 eguneko epean.

F._Hezkuntza proiektua.

Ikastetxearen hezkuntza proiektuan ondokoak biltzen dira:

a) Bere ezaugarriak.

b) Hezkuntza komunitateak ezarritako hezkuntza helburuak.

c) Ikastetxearen antolamendu orokorra.

d) Barne araubidearen erregelamendua.

e) Ezarritako helburuak errazago lortzeko erakunde publiko eta pribatuekin aurreikusi diren harremanak.

Zuzendaritza Taldeak eta Koordinazio Pedagogikorako Batzordeak, irailean, jarduketa plana eginen dute eta ikastetxeko organo guztiek hori beteko dute 2007/2008 ikasturtean, musikako goi mailaren hezkuntza proiektua eta curriculum proiektua era koordinatuan prestatu eta/edo berrikusteko.

Plan horretan honako hauek hartuko dira kontuan gutxienez ere:

_Ikastetxeko hezkuntza programa garatzeko ikasturtean zehar burutu beharreko lanak zehaztea.

_Zeregin eta lan horiei ekiteko antolakuntzako neurriak aurreikustea.

_Jarduketa horiek denboran antolatzea eta horietariko bakoitzean erantzukizuna norena den zehaztea.

_Eskaintzen diren espezialitateen programazio didaktikoak prestatzea/berrikustea.

_Jarduketa plana ebaluatzeko irizpideak.

Zerbitzuak Ikuskatzeko eta Ikuskapen Teknikorako Zerbitzuak ikastetxeak egiten duen jarduketa planaren proposamena berrikusiko du, indarrean dagoen araudian ezarri denari egokitzen zaion egiaztatuko, ikasturtean zehar horren garapenaren jarraipena eginen eta era egokian betetzeko behar den laguntza eskainiko du.

Ikastetxearen barne egoera eta inguru sozioekonomiko eta kulturala aztertu ondoren, eta haren irakaskuntzako eta hezkuntzako ekintzaren koherentzia eta jarraipena bermatzearren, ikastetxeko hezkuntza proiektuak helburuak, lehentasunak eta jarduteko prozedurak finkatuko ditu.

Ikastetxearen hezkuntza proiektua zuzendaritza taldeak prestatu eta/edo berrikusiko du. Horretarako, kontuan izanen ditu Eskola Kontseiluak ezarritako irizpideak eta irakasleen Klaustroak egindako proposamenak. Onetsi eta gero argitara emanen da.

G._Curriculum proiektua.

Ikastetxeek curriculum proiektuari jarraikiz emanen dituzte ikasketak, bai eta programazio didaktikoei jarraikiz ere, eta horiek Hezkuntza eta Kultura kontseilariaren abuztuaren 27ko 423/2002 Foru Aginduan eta horren akats zuzenketan araututakoa zehaztuko dute. Agindu horren bidez, Nafarroako Foru Komunitatean musikako ikasketen goi mailako curriculuma ezarri zen.

Curriculum proiektuak curriculumeko elementuei buruzko erabaki multzoa biltzen du eta, bestalde, ikasleen prestakuntzako behar profesionalei erantzun nahi die, betiere, ikastetxearen beraren egoeratik abiatuta. Gainera, irakasleen jarduketa multzoa koherentea izanen dela ziurtatu beharko da. Curriculum proiektuak hezkuntza proiektuan du oinarri.

Curriculum proiektuak honako hauek ditu:

1._Curriculumaren gaineko koordinazioari buruzko erabaki eta neurriak, ondotik heldu direnak:

a) Goi mailako ikasketen helburu orokorrak ikastetxearen eta ikasleen inguruabarrei egokitzea, benetan lortzeko hartu behar diren neurriak zehaztuz.

b) Metodologiari buruzko erabaki orokorrak.

c) Ikasleak ebaluatu eta mailaz igotzeko prozesuari buruzko irizpideak.

d) Erabiliko diren curriculum materialak eta baliabide didaktikoak.

e) Irakasleen irakaskuntza prozesuak eta irakaslana, bai eta curriculum proiektu bera ere, ebaluatzeko eta, kasua bada, berraztertzeko irizpideak.

2._Aukerako irakasgaien eskaintza.

3._Tutoretza planaren ezarpena.

4._Curriculum proiektuak irakasgai bakoitzerako programazio didaktikoa ere izanen du. Horretan bilduko dira, kurtsoen arabera banaturik, helburuak, edukiak, aplikatuko den metodologia, ebaluazioaren irizpideak eta erabiliko diren baliabide eta bitartekoak. Programazio didaktikoak ikasgelan garatuko dituzte irakasleek Gelako Programazioen bidez.

5._Ikastetxeak prestatzen dituen ikerketa programak.

Koordinazio Pedagogikorako Batzordeak curriculum proiektuaren prestakuntza koordinatuko du eta erantzukizuna izanen du, honako hauei jarraikiz: curriculum ofiziala, hezkuntza proiektua, Klaustroak ezarritako irizpideak eta departamentuek egindako proposamenak. Koordinazio Pedagogikorako Batzordeak sustatuko du irakasleen parte hartzea prestatzeko aldian.

Curriculum proiektua irakasleen klaustroak ebaluatu eta onetsiko du.

Programazio didaktikoak, curriculum proiektuaren garapena baitira, departamentuek prestatuko dituzte. Irakasgai bakoitzerako ondokoa hartuko da kontuan:

a) lau kurtsoetarako helburu, eduki eta irizpideen multzoa, bai eta ebaluatzeko prozedurak ere.

b) aplikatuko den metodologia didaktikoa.

c) mailaz igotzeko irizpideak.

d) kalifikatzeko irizpideak.

e) errepertorioa, erabiliko diren materialak eta baliabide didaktikoak.

f) beste departamentuekin batera jarduerak antolatzea, baldin eta horiek espezialitate edo irakasgai bat baino gehiago hartzen badituzte, esate baterako Ganbera musika.

g) departamentuak egin nahi dituen jarduera osagarriak eta eskolaz kanpokoak.

Irakasleek beren departamentuetako programazio didaktikoen arabera prestatuko dute irakaslana. Irakasleren batek erabakitzen badu Gelako Programazioan aldaketaren bat egitea departamentuko baterako programazioari dagokionean, aldaketa hori eta behar den justifikazioa departamentuko programazio didaktikoan sartuko dira.

Irakasleek curriculum proiektua eta programazioak egin ahala ebaluatu beharko dituzte, ikasleen hezkuntza beharrei egokitzen zaizkiela ziurtatzeko. Era berean, Klaustroak curriculum proiektua onetsi eta argitara eman beharko du.

2._UPOa prestatu, onetsi eta ebaluatzea.

Urteko Programazio Orokorra Zuzendaritza Taldeak eginen du, Klaustroaren eta Eskola Kontseiluaren proposamen eta erabakiak kontuan hartuta.

Ikastetxeko Zuzendaritzari dagokio Urteko Programazio Orokorra era egokian egiteko jarduketen egutegia ezartzea.

Irakasleen Klaustroak eta Eskola Kontseiluak Urteko Programazio Orokorrari buruzko txostena eginen dute; dena den, irakasleen Klaustroaren eskumen diren irakaskuntzako alderdiak errespetatuko dira.

Urteko Programazio Orokorra Eskola Kontseiluak onetsiko du, eskola jarduerak hasi eta gehienez 20 eguneko epean.

Programazio horren ale bat Zerbitzuak Ikuskatzeko eta Ikuskapen Teknikorako Zerbitzura bidaliko da urriaren 31 baino lehen; beste ale bat ikastetxearen idazkaritzan jasoko da, irakasleek eta eskola kontseilukideek azter ahal dezaten.

Zerbitzuak Ikuskatzeko eta Ikuskapen Teknikorako Zerbitzuak egiaztatuko du Urteko Programazio Orokorra jarraibide hauetan xedatzen denari egokitzen zaion, eta zer zuzenketa egin behar den adieraziko du, bakarren bat egin behar bada.

Urteko Programazio Orokorra ikastetxeko kide guztiek nahitaez bete beharrekoa izanen da.

Ikasturtea bukatutakoan, ikastetxeko Zuzendaritza Taldeak eta Eskola Kontseiluak ebaluatu eginen dute Urteko Programazio Orokorra zenbateraino bete den. Ondoriorik aipagarrienak Memoria batean jasoko dira eta hura Zerbitzuak Ikuskatzeko eta Ikuskapen Teknikorako Zerbitzura bidaliko da, uztailaren 10a baino lehen.

II._IKASKETEN ORDU BANAKETA

1._Alderdi orokorrak.

Ikasleak ikasketetan sartzea, irakasle-ikasle ratioa eta klaseen denbora indarra duen araudian ezarri denari egokituko zaio:

2._"Irakasle praktikak" irakasgaiaren antolaketa.

Irakasgaiaren ardura duen irakasleak bere ordutegi pertsonaletik astero ordu bat hartuko du bere ardurapeko bost ikasleko talde bakoitzeko. Programa koordinatu beharko du ikasleek praktikak egin ditzaten hautatu diren musika ikastetxeekin eta ikastetxe horietan tutore lanak eginen dituzten irakasleekin. Gainera, programaren ardura duen irakasleak jarraipena egin beharko du praktikak egiten diren bitartean. Ikasturtean zehar, irakasleak ordubeteko hamabost saio eginen ditu ikasle talde bakoitzarekin, praktikak prestatzeko, jarraipena egiteko eta praktikei buruzko memoria prestatzeko. Gainerako denbora ikastetxeekin koordinatzeko lanetan, praktiken jarraipenean eta ikasleei laguntzen emanen du. Azkenik, irakasle arduradunak ikasleen ebaluazioa eta kalifikazioa egin beharko du. Horretarako kontuan hartuko ditu praktikak egin diren ikastetxeko tutorearen balorazioa, kurtsoaren nondik-norakoak eta ikasle bakoitzak aurkeztu beharko duen memoria.

Ikasleek programari jarraitu beharko diote, irakasle arduradunarekin egin beharreko saioei, esleitzen zaien ikastetxean praktikak egiteari eta memoria prestatu eta aurkezteari dagokienez. Ikasleek kurtso bakoitzeko gutxienez hogeita hamar ordu emanen dituzte esleitzen zaien ikastetxean, irakaslana nola egiten den ikusten eta hartan parte hartzen.

Praktikak musika ikastetxeetan eginen dira; ahal dela, "Pablo Sarasate" Musika Kontserbatorio Profesionalean. Ikastetxe horretan praktiketako ikasleen tutore aritzen diren irakasleek beren ordutegi pertsonaletik ordu erdi hartzen ahalko dute tutoretzapeko ikasle bakoitzeko, zaintza orduen ordez, astean zenbatu beharreko ordu osagarrien atalean.

III._IRAKASLEAK

1._Lanaldia.

Irakasleek, oro har, Nafarroako Gobernuaren mendeko funtzionarioentzat finkatzen diren lan orduak izanen dituzte, beren irakasle lanerako egokituak. Irakasleentzat jaiegun izanen dira Nafarroako Foru Komunitateko Administrazioaren zerbitzuko langileen lan egutegian ere jaiegun direnak.

Ikasturtea irailaren 1ean hasi eta ekainaren 30ean bukatuko da.

Ikasturtean, irakasleek jarraibide hauetan finkatutako lanaldia eta ordutegia beteko dituzte. Dena dela, Nafarroako irakaskuntza publikoaren kalitatea hobetzeko itunean ezarritakora egokitu beharko da bertan xedatutakoa.

Ekain-irailetako eskola gabeko lan egunetan, baimena ematen ahalko zaie irakasleei egunean ikastetxean egon beharreko bost orduko lanegun etengabea egiteko.

Irakasleek hogeita hamar ordu emanen dituzte astean ikastetxeko jardueretan, irakastorduetan eta ordu osagarrietan banatuta. Gainerako orduak, ikastetxean egon beharrik gabekoak, irakaslana prestatzeko eta irakasleen hobekuntza profesionalerako erabiliko dira, bai eta batzorde eta epaimahaietan parte hartzeko edo antzeko jarduerak egiteko ere, baldin eta horretarako hautatzen badira.

2._Orduen banaketa.

Ikastetxean bertan eman beharreko orduak honela banatuko dira:

A._Irakastorduak.

Ikasleekin irakaslan zuzenean emandakoak jotzen dira irakastordutzat.

Irakasleek, oro har, hemezortzi irakastordu izanen dituzte. Zilegi izanen da hogei irakastordutara ailegatzea, gehienez, betiere departamentuaren ordu banaketak hala eskatzen duenean eta beti haren barrenean. Hemezortzi ordu horietatik goitiko irakastordu bakoitza bi ordu osagarrirekin konpentsatuko da.

Irakastorduak zenbatzerakoan ondoko jarduera eta inguruabarrak hartuko dira kontuan:

a) Zuzendaritza Taldea.

Ebazpen honetako eranskinaren IV. atalean adierazitakoa aplikatuko da atal honetan.

b) Ikastetxeko Orkestraren arduraduna.

Orkestraren arduradunak bere eskola ordutegitik astero 6 ordu emanen ditu lan horietarako. Orkestraren arduradun horrek, ikasturtearen hasieran, ikasturte osorako lan plana eginen du eta Zuzendaritza Taldeari aurkeztuko onetsia izan dadin, eta hori sartuko da Urteko Programazio Orokorreko "Jarduera osagarrien eta eskolaz kanpokoen urteko programazioa" atalean. Plan horretan jaso beharko dira ikastetxeko orkestrak ikastetxea ordezkatzeko lanean urtean eskainiko dituen hainbat emanaldi, bai Zuzendaritza Taldeak eskatuta bai Hezkuntza Departamentuak eskatuta. Halaber, egiten diren jardueren amaierako memoria egin beharko du eta ikasturtearen amaierako memorian sartu.

Orkestraren arduraduna izendatzeko (espezialitateko irakasle bat), eranskin honetako III. ataleko (Irakasleak) 3. puntuan ikasleak eta taldeak hautatzeko ezarritako irizpide orokorra aplikatuko da.

Ikastetxeko orkestraren jarduerak "Orkestra" irakasgaiaren curriculumean sar daitezke, dagokion programazio didaktikoaren arabera. Hala ere, irakasgaian matrikulatuta ez dauden ikasleen parte-hartzea ere onartzen ahal da, baita ikastetxean matrikulatuta ez daudenena ere, bai eta beste ikastetxe eta entitate batzuekin lankidetza izatea ere, zehazten diren baldintzak betez.

Ikastetxean zehazten diren eta erabilgarri dauden gelak erabiliko dira orkestraren saioak eta emanaldien prestaketak egiteko, kontuan hartuz erabilpen hori dagozkion irakasgaien helburu didaktikoetarako izanen dela, bai eta Urteko Programazio Orokorrean sarturiko lan planean programaturiko jarduerak prestatzeko ere.

c) Teknologia Berrien arduraduna.

Teknologia Berrien arduradunak zeregin hauek izanen ditu bere ardurapean: ekipo informatikoak eta ikus-entzunezkoak koordinatu eta mantentzea, ikastetxeko sare informatikoa, gorabeherak konpontzeko laguntza teknikoa, instalatutako ekipoetako material informatikoa eta ikus-entzunezkoa zuzen erabiltzen den begiratzea. Zeregin horietarako astean 4 irakastordu izanen ditu eta, ikastetxearen beharrek horretarako aukera ematen badute, 4 ordu osagarri bitarte.

d) Ikastetxeko liburutegiaren arduraduna.

Liburutegiaren arduradunak bere eskola ordutegitik astero 3 ordu emanen ditu lan horietarako. Arduradun horrek, zuzendaritza taldeak gainbegiratuta, ikastetxean egiten diren ekintza guztiak koordinatuko ditu honako helburuarekin: zerbitzua ikastetxean antolatzea eta bertan bildutako materiala ikasleek eskuratu ahal izatea.

Ikasturte hasieran liburutegiko arduraduna ikastetxeko liburutegiaren funtzionamendurako Ekintza Plana prestatzeaz arduratuko da, Zuzendaritza Taldearekin adostuta, eta ondoren Eskola Antolamendu eta Berriztapenerako Zerbitzura igorriko da onetsia izan dadin. Plan hori ikastetxearen Urteko Programazio Orokorrean sartuko da. Prestaturiko planaren edukiak honako hauek jasoko ditu gutxienez: aurreikusitako jarduerak, prozesuan inplikaturiko eragileak, liburutegia zabaltzeko aurreikusten diren epeak eta antolamendua eta ikasleei eskainiko zaien arreta.

Ikasturtean zehar, liburutegiko arduraduna arduratuko da proiektu honekin loturiko ekintza guztiak zentralizatzeaz, ekintza plan osoaren jarduen egokia sustatuz, aurreikusitako epeetan ikasleei eman beharreko arreta ziurtatuz, Zuzendaritza Taldeari ekintza berriak proposatuz eta behar denaren berri emanez.

Era berean, ikasturtea bukatzean jarduerari buruzko memoria bat eginen da honako hauek jasoz: aldi honetan garaturiko ekintzak, izandako lorpenak eta denbora aldi horretako jardunaren balioespena eta, halaber, bete gabe gelditu diren ekintzak edo jarraipen-iradokizunak proposatuko dira datorren ikasturterako. Aipatu memoria Eskola Antolamendu eta Berriztapenerako Zerbitzura igorriko da eta ikastetxearen ikasturte amaierako memoriari erantsiko zaio.

e) 58 urtez goitiko irakasleak.

Lanaldi osoa duten 58 urtez goitiko irakasleek zilegi izanen dute, nahi badute, beren irakastorduak murriztea, gehienez ere bost ordu kenduz, nahiz horrek ez duen esan nahi astean ikastetxean egon beharreko orduak gutxituko direnik. Salbuespenez, eta ikastetxeak hala behar duenean, murrizte hori ezinezkoa denean, ukatutako murrizte ordu bakoitza irakasleek urtean nahitaez egin beharreko prestakuntzako 35 orduen ordez konputatuko da. Aipatu den borondatezko murrizte hori, adin hori betetzen den urte naturalean hasten den ikasturtean gauzatuko da, eta bateraezina izanen da ordutegiaren bestelako murrizteekin. Horrela, 58 urtez goitiko irakasle bat departamentuko burua baldin bada, irakastorduetatik kendutako 5 ordu horiek departamentuaren burutzak dituen eginkizunetarako erabiliko ditu. Adina dela kausa eskola ordutegiaren murrizketa duten 58 urtetik gorako irakasleek, 65 urte betetzearekin batera, murrizketa hori egiteko eskubidea galduko dute, baldin eta jardunean segitzea eskatzen badute; horretan salbuespen izanen dira erretiro sariaren %100 jasotzeko behar den gabealdia ez badute.

f) Departamentuko burutza.

Departamentuko buruek beren irakastorduetako hiru ordu erabiliko dituzte gehienez, goi mailako musika ikasketen curriculum proiektuak egin edo berrikusteko; horretarako lan plana aurkeztu beharko dute. Lanerako plan hori, curriculum proiektua osatzen duten departamentuko programazio didaktikoekin batera, ikastetxeko Urteko Programazio Orokorrari batuko zaio, eta dena Zerbitzuak Ikuskatzeko eta Ikuskapen Teknikorako Zerbitzura igorriko da.

Lan planak ikasturte osoan egin behar diren zereginak hartuko ditu kontuan: bai departamentuko buruak horretarako orduetan eginen dituenak, bai eta jarduera horretarako dauden ordu osagarrietan bertako kide guztiek eginen dituztenak ere. Departamentuko buruek urte hasieran zehaztutako planaren jarraipena eginen dute etenik gabe eta, horretarako, astero departamentuko kide guztiekin lan hori egiteko dauden bi orduetan egiten dituzten saio guztien aktak idatziko dituzte.

Ikasturtearen amaieran, departamentuko buruek aurkeztu beharko dute, beren departamentuari dagokion amaierako memoriarekin batera, ikasturtean curriculum proiektuari buruz egin den lanaren txostena.

Zerbitzuak Ikuskatzeko eta Ikuskapen Teknikorako Zerbitzuak, ikasturte osoan, aurkeztu den plana betetzen den aztertuko du.

Baldin eta irakasle batek atal honetan irakastorduak murrizteko adierazi diren baldintzetako bat baino gehiago betetzen badu, 58 urtetik gorakoa izatea barne, ordutegia gehien murrizten dion baldintza/karguari dagokion eskola ordutegia izanen du.

B._Astean zenbatu beharreko ordu osagarriak.

Irakasle bakoitzaren asteko ordutegian irakastorduak eta ordu osagarriak batuta hogeita bost ordu izanen dira astean guztira.

Astean zenbatzeko ordu osagarrietan, irakasle bakoitzari esleituriko eginkizunen arabera, ondoko hauek sartzen ahalko dira:

a) Zaintza orduak.

b) Liburutegi orduak.

c) Astean ordu bat departamentuaren bileretarako.

d) Astean bi ordu, gutxienez, irakasle guztiek batera curriculum proiektuak egiteko eta, hala denean, horiek berrikusi eta eguneratzeko. Era berean, hezkuntza proposamenak ikasketa plan berrietara egokitzeko Hezkuntza Departamentutik ezartzen diren lan planei erantzunen zaie. Ikastetxeak beharrezko neurriak hartuko ditu jarduera horretan irakasle guztiek parte hartzeko.

e) Astean bi ordu, gutxienez, tutoretza lanak egiteko. Departamentuko buruek bi ordu horiek departamentuko burutzako lanak eta Koordinazio Pedagogikorako Batzordearekin bilerak egiteko erabiliko dituzte.

Zaintza orduak eta liburutegikoak eta aurreko c), d) eta e) ataletan aipaturiko ordu osagarrietan egin beharreko jarduerak behar den bezala egiten badira, irakasleek, bakoitzaren ordutegi pertsonalean agertu behar duten asteko 25 orduetara ailegatu arte, ondoko ordu hauek sartzen ahalko dituzte astean zenbatu beharreko ordu osagarrien artean, irakasle bakoitzari esleitutako jardueren arabera:

f) Ordu bat astean irakasleek Eskola Kontseiluan dituzten ordezkarientzat.

g) Zuzendaritza Taldeko kideen koordinazio lanetarako orduak.

h) Ikastetxeak erakundeekin batera parte hartzen duen proiektuetan irakaskuntza taldeek lan egiteko orduak.

C._Zaintza eta liburutegia.

Kontuan harturik Nafarroako Goi Mailako Musika Kontserbatorioko ikasleen ezaugarri bereziak, zaintza kontzeptuak esan nahi du ikastetxeak erantzukizuna duela eskola ordu guztietan irakasleek zainduko dituzten eremuak izanen direla bermatzeko, horrela ikasleak, nahi badute, eremu horietan beren ikasketetako zereginetan aritu ahal izateko. Irakaskuntzarako eremuen funtzionamendu egokia ere bermatuko da.

Ikastetxea, eta, hortaz, zuzendaria, ikasleen arduraduna da eskolako orduetan; beraz, ikastetxean uneoro behar adina zaintzako irakasle izan behar da.

Ikasleek ikastetxeko liburutegian biltzen den informazioa eskuratu ahal izateko, ikasturte osoan egon beharko du irekita. Kontuan hartuz ikastetxeko ikasleen ezaugarriak, helduak gehien bat, zuzendaritza taldeak zaintzak egiteko eta liburutegian arreta eskaintzeko plan bateratua proposatzen ahalko du, betiere bermatuz ikasleei eman beharreko arreta eta haien gaineko erantzukizuna eskola orduetan.

Liburutegiko irakaslearen eginkizun nagusiak hauek dira:

a) Ikastetxean ezartzen diren baldintzen arabera, ikasleei liburutegian arreta eskaintzea, ez soilik maileguari dagokionez, baizik eta, bereziki, bertan bildutako material didaktikoari buruzko alderdi pedagogikoetan.

b) Liburutegiaren Ekintza Plana garatzen laguntzea.

Ikasketa burua, liburutegiaren koordinatzailearen bidez, liburutegiaren jardunari buruzko informazioa jasotzeaz, aurreikusitako ordutegia betetzeaz, aginduriko lanaren garapenaz eta kontuan hartu edo aipatu beharreko gorabeherez arduratuko da.

Zaintzako irakasleen eginkizun nagusiak hauek dira:

a) Ikastetxeak zaintzarako jartzen dituen eremuetan egoten diren ikasleez arduratzea.

b) Beren zaintza aldian sortzen diren gorabehera guztiak konpontzea, bai eta ikastetxeko norbait mediku beharrean gertatuz gero hartarako dilijentziak egitea ere, eta ikasketaburua lehenbailehen jakinaren gainean jartzea.

c) Bere zaintza txandan irakasleek duten puntualitate eta asistentziaren berri ematea.

Ikasketaburuak zaintza orduen eguneroko kontrola eginen du. Zaintza orduei buruzko txosten bat eginen du astero, eta horretan, gutxienez, honako datuak sartuko ditu:

a) Irakasleen hutsegite eta atzerapenak.

b) Ikastetxeko edozein egoitzatan izan diren gorabeherak.

c) Gertatu diren istripuak.

d) Zaintzako irakasleen sinadurak.

Irakasleek zaintza edo liburutegiko lana eginen dute asteko zenbait ordutan, ikastetxearen beharren arabera. Nolanahi ere, kontuan hartu behar da irakasle bakoitzaren asteko ordutegian irakastorduak eta ordu osagarriak batuta hogeita bost ordu izanen direla guztira astean.

Arreta berezia edo zaintza modu desberdin batez egitea eskatzen duten egoeretan, ikastetxeko zuzendariak edo ikasketaburuak zilegi izanen du irakasle batzuk eskatzea zaintza ordu horiek betetzeko.

D._Hilean zenbatu beharreko ordu osagarriak.

Irakasle bakoitzak ikastetxean nahitaez egin behar dituen asteko 30 orduak betetzeko, falta diren bost orduak hilean zenbatuko dira eta ondoko jardueretarako izanen dira:

a) Klaustroko bileretan parte hartzeko.

b) Ebaluazioko eta irakaskuntza taldeko bileretara joateko.

c) Beste jarduera osagarri eta eskolaz kanpoko batzuk.

Jarduera jakin batzuk egiteko, astean ordu tarte bat gordeko da, eta irakasle guztiek gutxienez 4 ordu izanen dituzte klaustroaren bilerak, ebaluazio bilkurak eta, oro har, ikastetxearen funtzionamendu egokirako beharrezkoak diren beste jarduera batzuk egiteko.

Ikasketaburuak, zuzendariarekin batera, lauhilekoetan banatuta planifikatuko ditu aurreikusitako jarduerak. Adierazi diren jarduera horien programazioa hiruhilekoaren hasieran Zerbitzuak Ikuskatzeko eta Ikuskapen Teknikorako Zerbitzura igorriko da.

3._Ordutegiak egin, onetsi eta argitaratzea.

Ikasketaburuak ordutegiak eginen ditu Klaustroak ezarritako irizpide pedagogikoei eta jarraibide hauetan ezarri denari jarraikiz; halaber, bermatu eginen da ikasleentzako ordutegi funtzionala, eta lehentasuna izanen dute ikastetxearen beharrek.

Iraileko matrikula egin ondoren, ikasketaburuak irakasgai bakoitzeko ikasleen eta taldeen kopurua jakinaraziko die departamentuei.

Ordutegiak prestatzean kontuan izanen da "Pablo Sarasate" Musika Kontserbatorio Profesionalean ere irakasle lana egiten duten irakasleen egoera, bi ikastetxeetan dituzten ordutegiak bateragarri egitearren.

Irakaslana espezialitate bakoitzeko katedradunek beteko dute lehenik. Lanpostu guztiak betetzerik ez badago soilik, atal honetan deskribatutako kategoriak sartuko dira sistema horretan, beharren eta ezarritako ordenaren arabera.

Irakaslana bete behar duten katedradun, irakasle eta profesional espezialisten multzoa zehaztu ondoren, taldeak eta ikasleak hautatuko dira. Hautapen hori egiteko departamentuko kideak ados jartzen ez badira, ondoko prozedura aplikatuko da.

Atal honetan ezarritako ordenaren arabera, lehenik hautatu behar duen irakasleak beretzat lehentasunezkoa den irakasgai eta kurtsoko ikaslea edo ikasle taldea hautatuko du; ondoren, hautatzeko bigarrena den irakasleak eginen du eta, horrela, hurrenez hurren, espezialitateko eta departamentuko irakasle guztiek lehenengo txanda egin arte. Lehenengo txandaren ondotik beste batzuk eginen dira, irakasleek beren irakastorduak osatu arte edo departamentuari dagozkion irakasgai, ikasle eta talde guztiak esleitu arte.

Bilera berezi horretan izaten diren gorabehera guztien akta eginen da eta departamentuko kide guztiek sinatuko dute; ikasketaburuari aktaren kopia emanen zaio.

Arestian adierazi diren ondorioetarako, departamentu bakoitzeko irakasleek hautatzeko duten lehentasuna ordena honen araberakoa izanen da:

1. Musikako eta Arte Eszenikoetako katedradunak, dagokien espezialitateko titularrak.

2. Musikako eta Arte Eszenikoetako katedradunak, beste espezialitate batzuetakoak, atal honetako 4. puntuko 2. taulan espezialitate bakoitzerako ezarritako titulazioen jabe badira.

3. Musikako eta Arte Eszenikoetako irakasleak, atal honetako 4. puntuko 1. taulan katedradunen kidegoko espezialitate bakoitzerako ezarritako titulazioen jabe badira.

4. Musikako eta Arte Eszenikoetako irakasleak, beste espezialitate batzuetakoak, atal honetako 4. puntuko 2. taulan katedradunen kidegoko espezialitate bakoitzerako ezarritako titulazioen jabe badira.

5. Zerbitzu eginkizunetan dauden Arte Plastikoetako eta Diseinuko Irakasleen Kidegoko irakasleak.

6. Zerbitzu eginkizunetan dauden Bigarren Hezkuntzako Irakasleen Kidegoko irakasleak.

7. Zerbitzu berezietan ari diren funtzionarioak.

8. Aldi baterako irakasle kontratudunak eta profesional espezialistak.

Hautatzeko lehentasuna, lehenbiziko bost atalei dagokienez, antzinatasun handiena izateak emanen du eta, antzinatasun bera izanez gero, atal bakoitzeko lehentasuna erabakitzeko honako irizpide hauek ezarriko dira, hurrenez hurren:

_Ikastetxean antzinatasun handiena.

_Kidegoan edo Administrazioan lehenik sartu izana, eszedentzia urteak zenbatu gabe.

_Hautapen prozeduretan puntu gehien izatea.

8. atalean, lehentasuna ezarriko da irakasleek Giza Baliabideen Zerbitzuko zerrendetan duten tokiaren arabera.

Hori hala izanik ere, salbuespenezko kasuetan, eta plantilla prestatzeko prozesuan sortzen diren beharrei erantzuteko, Hezkuntza Departamentuak baimena ematen ahal du, egokia iruditzen bazaio, irakasgai edo espezialitate batzuk horien titular ez diren irakasleek emateko, kontuan izanik baimendutako espezialitateko irakasgaien edukiak eta horien titular ez diren irakaslearenak hurbilak diren.

Ikasketaburuak frogatu eginen du departamentuko kide guztien irakastorduak eta derrigorrez ikastetxean egin behar dituzten gainerakoak bat datozela honako jarraibide hauetan ezarri denarekin, eta egiaztatu eginen du ikasle guztien eta ikasle talde guztien ardura hartuko den eta orduak bete gabe dituen irakaslerik ba ote dagoen.

Lan horiek guztiak egin ondoren, ikasketaburuak, irakasleen klaustroak ordutegiak egiteko ezarri dituen irizpide pedagogikoak kontuan hartuta, behin betiko ordutegiaren proposamena eginen du, departamentuek egindako irakasgaien eta mailen banaketaren arabera.

Irakasleen eskola ordutegia astean bost egunetan banatuko da, lanaldi partzialerako kontratatutako irakasleen kasuan izan ezik. Nolanahi ere, egunean 5 irakastordu gehienez.

Halaber, ikastetxeko irakasle guztiak tarte jakin batzuetan aldi berean egonen dira ikastetxean; denbora hori gutxienez lau ordukoa izanen da eta tarte horretan denek egon beharko dute bertan. Ordu horietan klaustroaren bilerak, ebaluazio bilkurak, ikasleen bilerak eta ikastetxearen funtzionamendu egokirako beharrezkoak diren beste jarduera batzuk eginen dira.

Ordutegi orokorraren barnean, ikastetxeak ezartzen duen ordu tarte egokienean, egunean 4 ordu gutxienez astelehentik ostiralera, zuzendaritza karguren batek egon beharko du ikastetxean.

Ikasle baten baja gertatzen bada eta hori betetzen ez bada, irakasleak hutsik duen denbora nola erabili zuzendaritzak erabakiko du:

_Beste ikasle batzuen denborari gehituz: atzeratu egin diren ikasleei laguntzeko, aurreratuenak sustatzeko, etab.

_Beste jarduera batzuk egiteko.

_Material pedagogikoa prestatzeko.

_Beste zeregin batzuetarako.

Musika-tresnen klaseetan, hala taldekoak nola bakarkakoak, baldin eta ikasle bat ez bada bertaratzen, denbora hori bertaratu diren ikasleei kasu egiteko erabiliko da, eta ezin izanen da bertaratu ez diren ikasleei dagokien denbora murriztu klaseak emateko ordu guztien multzotik.

Ikastetxearen ordutegia onesteko, urriaren 31 baino lehen igorri beharko da Zerbitzuak Ikuskatzeko eta Ikuskapen Teknikorako Zerbitzura.

Ikastetxearen ordutegia Zerbitzuak Ikuskatzeko eta Ikuskapen Teknikorako Zerbitzuak onetsiko du; onetsi bitartean, irakasleek ikasketaburuak egin eta zuzendariak behin-behinekoz onesten duen ordutegia bete behar dute. Horri buruz aurkezten den edozein erreklamazio Zerbitzuak Ikuskatzeko eta Ikuskapen Teknikorako Zerbitzuak ebatziko du.

Beti egonen da, edozeinek ikusi ahal izateko moduan, ikastetxeko eta Ikasketaburutzako iragarki oholean eta ikastetxeko kide guztiek sarbide duten beste tokiren batean, ikastetxearen egoera agertuko duen informazioa, bereziki aipatuz irakasle bakoitzaren ordutegia eta lan tokia, eta zehazki bakoitzaren ordutegian bildutako irakastorduak, tutoretzak, zaintza orduak, departamentuko bilerak eta abar.

Informazio hori guztia hezkuntza komunitateko kide guztien eskura egonen da. Era berean, zuzendaritza kargu bakoitza ikastetxean zein ordutan egonen den ere adieraziko da.

"Pablo Sarasate" Musika Kontserbatorio Profesionalean ere irakasle lana egin behar duten irakasleek, edo beren ordutegia han osatu behar dutenek, ebazpen honen I. eranskineko III. atalaren (Irakasleak) 3. puntuan ikastetxe horretako departamentu didaktikoetarako ezarritako hautaketa ordenean parte hartu beharko dute.

Ondoren zehazten diren kategorietakoren batean sartuta dauden funtzionarioek espezialitatea aldatzeko eskubidea erabili nahi badute edo irakasle lana goi mailan egin nahi badute, dagokien ikastetxeko edo ikastetxeetako ikasketaburuari jakinarazi beharko diote, irailaren 1a bitarte, baldin eta aukera horrek berarekin badakar irakasleak jatorrian zuen departamentu didaktikoa ez den batean aritu behar izatea, horrela aurrerantzean egokitzen zaizkien departamentuetako bileretarako deia behar bezala jaso dezaten:

_Musikako eta Arte Eszenikoetako katedradunak, beste espezialitate batzuetakoak, atal honetako 4. puntuko 2. taulan espezialitate bakoitzerako ezarritako titulazioen jabe badira.

_Musikako eta Arte Eszenikoetako irakasleak, atal honetako 4. puntuko 1. taulan Katedradunen Kidegoko espezialitate bakoitzerako ezarritako titulazioen jabe badira.

_Musikako eta Arte Eszenikoetako irakasleak, beste espezialitate batzuetakoak, atal honetako 4. puntuko 2. taulan Katedradunen Kidegoko espezialitate bakoitzerako ezarritako titulazioen jabe badira.

4._Goi mailan irakasteko baldintzak.

.1. taula.

Musikako eta Arte Eszenikoetako Irakasleen Kidegoko funtzionarioek _goi mailako titulazioaren jabe, eskuineko zutabeko espezialitateen titular_ aukera izanen dute, sortzen diren beharren arabera eta ezartzen den prozedurari jarraikiz, Musikako eta Arte Eszenikoetako Katedradunen Kidegoari dagozkion ezkerraldeko zutabeko espezialitateak emateko, bi zutabeen arteko loturarekin bat.

KATEDRADUNEN KIDEGOKO IRAKASLEEN KIDEGOKO

ESPEZIALITATEAK ESPEZIALITATEAK

Akordeoia Akordeoia

Harmonia eta melodia lagundua Konposizioko oinarriak

Harpa Harpa

Kantua Kantua

Klarinetea Klarinetea

Klabea Klabea

Konposizioa eta instrumentazioa Konposizioko oinarriak

Kontrabaxua Kontrabaxua

Abesbatzen eta ahots taldeen zuzendaritza Abesbatza

Orkestrako eta musika-tresnen taldeko zuzend. Orkestra

Fagota Fagota

Moko flauta Moko flauta

Zehar flauta Zehar flauta

Folklore musikala Musikaren historia

Gitarra Gitarra

Ganbera musika Ganbera musika, antzinakoa

Musikologia Musikaren historia

Oboea Oboea

Organoa Organoa

Pedagogia musikala Musika hizkuntza

Perkusioa Perkusioa

Pianoa Pianoa

Bat-batekotasuna, musika-tresnen tonualdaketa

eta akonpainamendua Konposizioko oinarriak

Saxofoia Saxofoia

Tronboia Tronboia

Tronpa Tronpa

Tronpeta Tronpeta

Tuba Tuba

Txistua Txistua

Biola Biola

Biolina Biolina

Biolontxeloa Biolontxeloa

.2. taula.

Musikako eta Arte Eszenikoetako Irakasleen Kidegoko funtzionarioek _eskuineko zutabeko goi mailako titulazioaren jabe_ aukera izanen dute, sortzen diren beharren arabera eta ezartzen den prozedurari jarraikiz, Musikako eta Arte Eszenikoetako Katedradunen Kidegoari dagozkion ezkerraldeko zutabeko espezialitateak emateko, bi zutabeen arteko loturarekin bat.

KATEDRADUNEN KIDEGOKO EMAN DAITEZKEEN

ESPEZIALITATEAK GOI MAILAKO TITULAZIOAK

Akordeoia Akordeoia

Harmonia eta melodia lagundua Harmonia, kontrapuntua, konposizioa

eta instrumentazioa

Harpa Harpa

Kantua Kantua

Klarinetea Klarinetea

Klabea Klabea

Konposizioa eta instrumentazioa Harmonia, kontrapuntua, konposizioa

eta instrumentazioa

Kontrabaxua Kontrabaxua

Abesbatzen eta ahots taldeen zuzend. Abesbatzen zuzendaritza

Orkestrako eta musika-tresnen taldeko

zuzendaritza Orkestrako zuzendaritza

Fagota Fagota

Moko flauta Moko flauta

Zehar flauta Zehar flauta

Folklore musikala Musikologia

Gitarra Gitarra

Ganbera musika Ganbera musika

Musikologia Musikologia

Oboea Oboea

Organoa Organoa

Pedagogia musikala Pedagogia musikala

Perkusioa Perkusioa

Pianoa Pianoa

Bat-batekotasuna, musika-tresnen Solfeoa, musikaren teoria,

tonualdaketa eta akonpainamendua tonualdaketa eta akonpainamendua

Saxofoia Saxofoia

Tronboia Tronboia

Tronpa Tronpa

Tronpeta Tronpeta

Tuba Tuba

Txistua Txistua

Biola Biola

Biolina Biolina

Biolontxeloa Biolontxeloa

5._Irakasleek ordutegia betetzea eta asistentzia orria.

Zuzendaritza Taldeak irakasleak ikastetxean egoten diren kontrolatu behar du, baita ekaineko eta iraileko eskola gabeko egunetan ere. Halaber kontuan hartuko du, eta horren berri emanen Zerbitzuak Ikuskatzeko eta Ikuskapen Teknikorako Zerbitzuari, lan araubideko kontratudunak zein egunetan hasi diren ikastetxean.

Ikastetxeko zuzendariak, hilabete bakoitzaren 5a baino lehen, aurreko hilabeteko asistentziari buruzko txostenak igorriko ditu Zerbitzuak Ikuskatzeko eta Ikuskapen Teknikorako Zerbitzura eta horretarako ikastetxera bidaliko diren ereduak erabiliko ditu.

Ikastetxean nahitaez egoteko orduei buruzko absentzien eta atzerapenen berri emanen da ohiko ereduetan, kontuan hartuta bakoitzaren ordutegi pertsonala eta alde batera utzita absentzia justifikatuta dagoen ala ez.

Halaber, norberaren ordutegian agertu ez arren, irakasleek egin dituzten jarduera osagarriak aipatuko dira.

Jarduera horietariko bakoitzean parte hartzen duten irakasleak eta egiten dituzten orduak adieraziko dira.

Nolanahi ere, txosten horietan ondoko arau hauek beteko dira:

_Inoiz ez da utziko hutsik "hutsegitearen arrazoia" laukia, eta hala egiten bada, justifikatu gabeko hutsegitetzat hartuko da.

_Hutsegite guzti-guztiak agertuko dira.

_"Hutsegitearen arrazoia" izeneko laukian "Norberaren arazoetarako ordaindu gabeko lizentzia" jarri ahal izateko, beharrezkoa izanen da Giza Baliabideen Zerbitzuak irakasleari baimena ematea.

Irakasleek beren lanetan gertatzen den edozein absentzia edo atzerapenen berri emanen diote ikastetxeari, ahalik eta lasterren.

Zuzendariak, justifikazioa aurkezteko epea amaitu eta biharamunean aditzera emanen dio Zerbitzuak Ikuskatzeko eta Ikuskapen Teknikorako Zerbitzuari irakasle baten edozein hutsegite nahiz atzerapen, ikasketaburuari justifikatu gabekoa iruditzen zaiona, bere lansaritik tokatzen den kenketa egiteko eta, hala behar bada, espedientea hasteko. Kasuko irakasleari ere emanen zaio, idatziz, horren berri.

Irakasleek hutsegitearen frogagiriak aurkeztu behar dizkiote zuzendariari, horrek eskatu gabe.

Asistentzia partearen kopia bat jendaurrean paratuko da, ikusgai, hilabete bakoitzaren 5a baino lehen. Beste kopia bat Eskola Kontseiluaren esku jarriko da.

Irakasleen hutsegiteen frogagiriak (baja agiriaren kasuan, haren kopia edo fotokopia) ikastetxeko zuzendaritzan geldituko dira Zerbitzuak Ikuskatzeko eta Ikuskapen Teknikorako Zerbitzuaren eskura.

Eskola emate normalaren gorabehera guztiak berehala jakinaraziko zaizkio telefonoz Zerbitzuak Ikuskatzeko eta Ikuskapen Teknikorako Zerbitzuari, eta bai ondoren asistentzia partean jasoko ere.

IV._IKASTETXEAREN FUNTZIONAMENDUA

1._Alderdi orokorrak.

Kapitulu honetan aipatutako organo horien guztien zeregina irakaskuntzako jarduera eta jarduera osagarri guztien koherentzia bermatzea da, ikastetxearen helburuak era eraginkorrean lortzeko.

2._Gobernu organoak

Zuzendaritza Taldeak bere irakastorduetatik gehienez ere ondoko ordu kopurua erabiltzen ahalko du karguetako eginkizunetan:

_Zuzendaria: 14 ordu.

_Zuzendariordea: 6 ordu.

_Ikasketaburua: 13 ordu.

_Idazkaria: 11 ordu.

Dena dela, Nafarroako irakaskuntza publikoaren kalitatea hobetzeko itunean ezarritakora egokitu beharko da bertan xedatutakoa.

3._Kide anitzeko gobernu organoak.

3.1. Eskola Kontseilua.

Sortzen diren lanpostu hutsak Eskola Kontseiluen urteroko deialdiaren ondorioz berrituko dira.

3.2. Irakasleen klaustroa.

Zuzendaria izanen da klaustroko burua, eta ikastetxean diharduten irakasle guztiek osatuko dute.

4._Irakaslana koordinatzeko organoak.

Irakaslana koordinatzeko organoak: koordinazio didaktikoko departamentuak, Koordinazio Pedagogikorako Batzordea eta tutoreak. Tutore bat izanen da ikasle talde bakoitzeko.

Organo horien guztien zeregina irakaskuntzako jarduera eta jarduera osagarri guztien koherentzia bermatzea da, ikastetxearen helburuak era eraginkorrean lortzeko.

4.1. Koordinazio didaktikoko departamentuak.

A._Alderdi orokorrak.

Departamentu didaktikoak lan egiteko taldeak dira eta horien xedea irakasleak ikastetxeko bizitzan integratzea da; departamentu horien erantzukizuna da espezialitate eta irakasgaiei dagozkien ikasketak antolatu eta garatzea, bai eta dagozkien eskumenen esparruan agintzen zaizkien jarduerak egitea ere.

Irakasleek irakaskuntzaren antolakuntzan parte hartzeko duten ohiko bidea dira; halaber, kideek aldian-aldian egiten dituzten bileren bidez, hobekuntza pedagogikoan eta zientifikoan etenik gabe aurrera egiteko bitartekoak dira.

Erantzukizuna eta zuzendaritza departamentuko buruari dagozkio eta, hori ez dagoenean, ikasketaburuari.

B._Departamentu didaktikoak eratzea.

Ikastetxean departamentu didaktiko hauek izanen dira:

_Kantua eta musika-tresnen taldeak.

_Konposizioa.

_Harizko musika-tresnak.

_Haizezko eta perkusiozko musika-tresnak.

_Teklazko musika-tresnak.

_Jazza.

_Musikologia.

_Pedagogia.

"Pablo Sarasate" Musika Kontserbatorio Profesionalean ere irakasle lana egin behar duten irakasleak, horren ondorioz, ikastetxe horretan dagozkien departamentuetan ere sartuko dira. Halakoetan, irakasleek bi ikastetxeetako departamentu didaktikoek deitzen dituzten bileretara joan behar dute.

C._Departamentuen eginkizunak.

Departamentu didaktikoen eginkizunak ondoko hauek dira:

1. Ikasturte bakoitzeko irakaskuntza antolatzea eta programatzea, departamentuko irakasgai edo espezialitateen ikasketak garatuz.

2. Ikasturtea hasi aurretik, departamentuko irakasgai edo espezialitateen programazio didaktikoa egitea. Lan hori departamentuburuak koordinatuta eta haren zuzendaritzapean eginen da, Koordinazio Pedagogikorako Batzordeak ezarri dituen irizpide orokorrei jarraikiz.

Departamentu guztiek beren programazioak indarra duen legediaren arabera egokitu beharko dituzte.

Curriculuma osatzen duten irakasgai eta espezialitateen programazio didaktikoek ondoko alderdiak izanen dituzte:

_Ebaluazioaren helburuak, edukiak eta irizpideak kurtsoen arabera banatzea.

_Aplikatuko den metodologia didaktikoa.

_Ikasleen ikaskuntzaren ebaluaziorako irizpideak eta prozedurak.

_Erabiliko diren igoera irizpideak, bereziki zainduz eskatuko diren gutxienekoak eta kalifikazio irizpideak.

_Gainditu gabeko irakasgaiak dituzten ikasleentzat errekuperazio jarduerak egitea eta errekuperazio hori lortzeko neurriak hartzea.

_Errepertorioa, erabiliko diren materialak eta baliabide didaktikoak.

_Espezialitate edo irakasgai bat baino gehiago ukitzen duten beste departamentu batzuekin irakaskuntzako jarduera komunak programatzea, esaterako, Ganbera Musikaren kasuan.

_Departamentuak egin nahi dituen jarduera osagarriak eta eskolaz kanpokoak.

Irakasgai bakoitzaren programazioaren edukia jendaurrean jarri beharko da ikasturtea hasi aurretik, eskolako komunitateko kide guztiek horren berri izan dezaten.

Departamentuburuek programazioaren jarraipena eginen dute. Jarraipenaren berri departamentuko bileretako aktetan jasoko da.

Ikastetxeko Zuzendaritzak egiaztatu eginen du programazio horiek jarraibide hauetan ezarri dena betetzen duten. Horrela ez bada, Zuzendaritzak programazio hori hartu eta kasuan kasuko departamentuari itzuliko dio, berriz egin dezan. Zerbitzuak Ikuskatzeko eta Ikuskapen Teknikorako Zerbitzuak programazio horiek berrikusiko ditu eta, hala denean, egin beharreko aldaketak bilduko dituen txostena igorriko du departamentu bakoitzera.

3. Departamentua osatzen duten espezialitate edo irakasgaien programazioen alderdi orokorrekin lotuta dauden irizpideak bateratzea, horien arteko koherentzia bermatzeko eta ebaluazioaren oinarrizko ildoak ezartzeko, irakasleen klaustroaren irizpideei jarraikiz.

4. Behar diren probak egitea, indarrean dagoen arautegian ezarri denarekin eta ebaluazioaren oinarrizko ildoei buruz hartu diren erabakiekin bat.

5. Zuzendaritza taldeari eta irakasleen klaustroari ikastetxearen hezkuntza proiektuari buruzko proposamenak aurkeztea.

6. Zuzendaritza taldeari eta irakasleen klaustroari Urteko Programazio Orokorrari buruzko proposamenak aurkeztea.

7. Koordinazio Pedagogikorako Batzordeari goi mailako ikasketen curriculum proiektuak egiteari buruzko proposamenak aurkeztea.

8. Koordinazio Pedagogikorako Batzordeari onarpen probei eta mailara heltzeko probei buruzko proposamenak aurkeztea.

9. Jarduera osagarriak eta eskolaz kanpokoak antolatzea eta koordinatzea, bidezko organoek ezarri dituzten irizpideak eta klaustroak zuzendaritza taldeari aurkeztu dizkion proposamenak betez eta Ikasketaburutzarekin elkarlanean arituz.

10. Beste departamentu batzuekin batera lankidetzan aritzea baterako jarduerak antolatzen, bai eskolako jarduerak bai osagarriak, ikasketaburuarekin koordinatuta.

11. Liburutegiaren Ekintza Planaren diseinuan eta garapenean parte hartzea, zerbitzu horren jarduna ahalbidetzeko zehazten diren lanetan aktiboki lagunduz.

12. Ebaluazioaren prozesuaren ondorioz ikasleek egiten dituzten erreklamazioei buruzko informazioa ematea eta honako jarraibide hauetan adierazi diren kasuetan ebaztea.

13. Departamentuko irakasgai eta espezialitateen programazio didaktikoaren garapena ebaluatzea eta ebaluazio horrek aholkatzen dituen neurri zuzentzaileak aplikatzea.

14. Ikasturtearen amaieran memoria egitea eta horretan programazio didaktikoaren garapena eta lortu diren emaitzak ebaluatzea.

Kutsoko amaierako memoriak atal hauek izanen ditu:

a) Emaitzen balorazioa.

_Kalifikazioen estatistikak, talde eta kurtsoen arabera.

_Ikasleen errendimenduaren azterketa, errendimendu horren faktoreak azalduta.

b) Funtzionamenduaren balorazioa. Programazioaren garapena.

_Garatutako helburu, eduki eta jardueren balorazioa, bai eta programazioa betetzeko erabilitako metodologia eta baliabideena ere, eta ager litezkeen akatsen arrazoia azaldu eta zuzenketak proposatzea.

_Baldin eta programazio pertsonalizaturik badago, aurreko analisi hori errepikatu beharko da horietariko bakoitzerako, eta azterlan erkatzailea egin.

_Ebaluazioa egiteko erabili diren irizpide, prozedura eta jardueren balorazioa.

_Egindako jarduera osagarrien eta eskolaz kanpokoen azalpena eta balorazioa: helburu zehatzak, talde ukituak, balorazioa, aurkitu diren zailtasunak, etab.

c) Goi mailako ikasketen curriculum proiektuak prestatu, berrikusi eta eguneratzeari buruz egin den lanaren balorazioa.

15. Irakasleen eguneratze zientifikoa eta didaktikoa bideratuko duten prestakuntza jarduerak sustatzea.

16. Ikaskuntza prozesuan estrategia metodologikoak bideratu eta sustatuko dituzten bitartekoak eta baliabideak aukeratzea. Eginkizun horretarako, departamentuak, besteak beste, ondoko irizpide hauek hartuko ditu kontuan: irisgarritasuna eta eraginkortasuna, motibazioa, edukien oparotasuna, errealitatearekiko erlazioa eta ikaskuntza esperientzien antolakuntza.

17. Ebaluazio eta errekuperaziorako irizpide komunak prestatzea.

D._Departamentu didaktikoen bilerak.

Irakasleek beren departamentu didaktikoak deitzen dituen bileretara joan behar dute. "Pablo Sarasate" Musika Kontserbatorio Profesionalean ere irakasle lana egin behar duten irakasleak bi ikastetxeetan dagozkien departamentuetakoak izanen dira aldi berean.

Irailean, departamentu didaktikoek behar diren bilkurak eginen dituzte iraileko ebaluazioen emaitzak aztertu eta hurrengo ikasturteko irakasgaien programazioa egiteko.

Ikastetxeko ordutegiaren barruan, eskola orduetako bat utziko da gutxienez astean, departamentu didaktikoko kide guztiak bil daitezen; ordu hori ikastetxeko eskola ordutegian agertuko da, eta bai irakasle bakoitzaren ordutegi pertsonalean ere.

Bilera horietariko bat, hilean behin, programazioen garapena ebaluatzeko eta ebaluazioak aholkatzen dituen neurri zuzentzaileak ezartzeko izanen da.

Ekainean, departamentuko kideak bildu eginen dira lan plana, lorpenak eta hurrengo ikasturterako behar dituen zuzenketak aztertzeko; horri dagokion amaierako memoria eginen da eta ikastetxeko Zuzendaritzari emanen zaio ekainaren 30a baino lehen; ondoren, Zuzendaritzak Urteko Programazio Orokorrari buruzko Memorian sartuko du eta, dena, Zerbitzuak Ikuskatzeko eta Ikuskapen Teknikorako Zerbitzura uztailaren 10a baino lehen igorriko.

Departamentu didaktikoen bilkura guztien akta eginen da Akta Liburuan. Departamentuburuak akta horiek egin eta sinatuko ditu.

Halaber, departamentuek, Akta Liburuaz gain, Inbentario Liburua ere eguneratua izanen dute, eta bertan material inbentariagarri guztien zerrenda azalduko da.

Departamentuan, ikasturtean zehar ikasleen ebaluazioa egiteko erabili diren proba eta dokumentuak gordeko dira; ikasturtearen bukaeran, ikasleen erreklamazioak aurkezteko epea amaituta, botatzen ahalko dira.

E._Departamentu didaktikoen burutza.

Departamentu didaktikoetan elkarlanean aritzen da, talde lana da, bertako kide guztiek lagunduko eta parte hartuko dute. Departamentu bakoitzak buru bat izanen du eta bere esku egonen da departamentuaren ardura; bera izanen da departamentuko kideen elkarlana koordinatu eta zuzenduko duena.

Departamentuko burua izendatzea ikastetxeko zuzendariari dagokio eta irailean eginen du; kargu horrek ikasturte bateko iraupena izanen du.

Departamentuko burua Musikako eta Arte Eszenikoetako katedradun bat izanen da. Bat baino gehiago egonez gero, katedradun izaera lehenik eskuratu zuenak beteko du burutza.

Zuzendariak bertako kideen artean izendatuko du burua, departamentuaren iritzia entzun ondoren. Burutza hori behin betiko destinoa ikastetxean duen batek bete behar du, baldin eta horrelakorik badago.

Departamentuburuak departamentuaren ardura du eta eginkizun hauek:

_Departamentuko lana zuzentzea.

_Bilerak antolatu, prestatu, deitu eta zuzentzea.

_Lanak kideen artean banatzea.

_Departamentuko programazioak eta ikasturte bukaerako Memoria idaztea.

_Urriaren 10a baino lehen programazioen ale bat ikastetxeko zuzendariari ematea.

_Programazioak betetzen diren begiratzea, gutxieneko eduki eta mailei dagokienez.

_Koordinazio Pedagogikorako Batzordeko kide den neurrian, curriculum proiektuen prestakuntzan parte hartzea, antolamendu akademiko berriko ikasketak izanez gero.

_Departamentuak oinarrizko eta erdi mailako curriculum proiektuak prestatzerakoan egin behar duen proposamena koordinatzea.

_Departamentuan atzematen den edozein akatsen berri ikasketaburuari ematea.

_Bilera bakoitzaren akta egin eta Akta Liburuaren ardura izatea.

_Inbentario Liburuaren eguneratzea bermatzea.

_Departamentuari esleitu zaizkion eremu, instalazio, material eta ekipamenduen erabilera koordinatzea eta horiek mantentzea.

_Departamentuak material eta ekipamendu zehatza eskuratzeari buruz dituen proposamenak aurkeztea.

_Ikasketaburuarekin eta kasuan kasuko departamentuekin elkarlanean aritzea, batera egin behar diren irakaskuntzako jardueren plangintzan.

_Ikasleak ebaluatzeko prozesuan erreklamazioak aurkezteko prozedura betetzen dela bermatzea, indarra duten arauei jarraikiz.

_Zuzendaritza Taldearekin elkarlanean aritzea beste ikastetxe edo erakunde batzuekiko harremanak sustatzen, horiekin prestakuntza jarduera osagarriak antolatzeko.

4.2. Koordinazio Pedagogikorako Batzordea.

A._Koordinazio Pedagogikorako Batzordea eratzea.

Koordinazio Pedagogikorako Batzordea irailean eratuko da. Honako hauek osatuko dute: zuzendariak, batzordeko burua izanen baita, ikasketaburuak eta departamentuburuek.

Batzordeko buruak idazkari bat izendatuko du, Koordinazio Pedagogikorako Batzordeko kideen artetik hautatuta.

B._Koordinazio Pedagogikorako Batzordearen eskumenak.

Koordinazio Pedagogikorako Batzordeak eginkizun hauek izanen ditu:

_Klaustroak aurkeztutako irizpideetatik abiatuta, curriculum proiektua egiteko ildoak ezartzea. Izan ere, departamentu didaktikoek beren lana egitean kontuan hartu beharko dituzte iritzi horiek.

_Curriculum proiektuaren prestakuntza zuzendu eta koordinatzea, bai eta egin litezkeen aldaketak ere, eta proiektua idazteko ardura hartzea.

_Curriculum proiektuko osagaiei buruzko erabakiak garatzea. Horretarako ikastetxeko hezkuntza proiektuan hartutako erabakiak kontuan hartuko dira.

_Hezkuntza proiektuaren, curriculum proiektuaren eta curriculumaren garapenaren arteko koherentzia ziurtatzea.

_Curriculum proiektua eta bere aldaketak klaustroari proposatzea, ebaluatu eta onetsi ditzan.

_Curriculum proiektua ikastetxeko irakaslanean betetzen den begiratzea, bai eta ebaluazioa egiten den ere.

_Ebaluaziorako nahiz kalifikaziorako saioen plangintza orokorra eta azterketen egutegia klaustroari proposatzea, ikasketaburuarekin bat.

_Ikastetxeko irakasleen prestakuntza plana egiteko proposamena klaustroari helaraztea.

_Irakasleen klaustroari ondokoak proposatzea: curriculum proiektua, hezkuntza proiektuko irakaskuntza arloak eta urteko programazio orokorra ebaluatzeko plana, ikastetxeko eskola errendimenduaren ebaluazioa eta irakaskuntza prozesua.

_Barne ebaluazio bat egitea, non aztertuko baitira planaren garapenean gertatzen diren aurrerapenak eta oreka faltak, eta, halaber, kasua bada, horiek zuzentzeko neurriak hartzea edo haien gaineko erabakiak.

_Urteko memoria egitea prozesuaren garapena era sistematikoan jasotzeko. Era berean, prozesu hori ebaluatu beharko du bertan parte hartu dutenen ikuspuntutik abiatuta.

_Goi mailako curriculum proiektuko proposamena prestatu eta irakasleen klaustroan aurkeztea onetsia izan dadin.

_Ezarritako espezialitateetarako aurkerako irakasgaien proposamenak sustatu eta koordinatzea. Horietan arrazoiak eta irakasgaiaren programazioa bilduko dira, helburuei, edukiei eta ebaluazio irizpideei buruz.

_Ikastetxeko liburutegia ongi aritzeko laguntza ematea, ikastetxeak ezarritako baldintzetan, eta dagokion Ekintza Planaren garapena sustatzea.

_Koordinazio Pedagogikorako Batzordearen beraren funtzionamenduari buruzko txostena Eskola Kontseilura igortzea kurtso bukaeran; kurtsoko amaierako memorian sartuko da.

4.3. Tutoreak.

A._Tutorearen izendapena eta eginkizunak.

Nafarroako Goi Mailako Musika Kontserbatorioko tutoreen izendapena eta eginkizunak goi mailako curriculuma ezartzen duen abuztuaren 27ko 423/2002 Foru Aginduan eta goi mailako musika ikasketetako ebaluazio eta kalifikazio prozesuak arautzen dituen maiatzaren 22ko 379/2003 Ebazpenean xedatutakoari jarraikiz arautuko dira.

B._Tutoretza orduak.

Irakasle-tutoreak astero bi ordu bete beharko ditu ikasleak hartu eta haiei kasu egiteko, eta bere kargu dituen ikasleen jarduera akademikoan esku hartzen duten beste irakasle batzuekin koordinatzeko bileretarako joateko. Tutoretzako ordu horiek irakasle bakoitzaren ordutegian azalduko dira, eta ikasturtea hasten denean jakinaraziko zaizkie ikasleei.

Ordutegia egiten denean ahaleginak eginen dira ikasleen ordu askeak eta tutoreari esleitu zaizkion orduetariko bat behintzat bateratzeko, tutorea ikasleekin biltzeko aukera egon dadin.

V._KALIFIKAZIOEI BURUZKO ERREKLAMAZIOAK ETA PROZEDURA

1._Ikasleek kalifikazioei buruz erreklamazioak egiteko eskubidea.

Ikasleek beren errendimendu akademikoaren balorazio objektiboa izateko eskubidea dute eta, eskubide hori betetzeko, beharrezkoa da aurrez ikasleek ezagutzea ikasturtean eskatuko diren edukiak eta maila eta irakasleek erabiliko dituzten balorazio irizpideak. Hori horrela:

a) Departamentu didaktikoen programazioak adierazi diren puntu horiek azalduko ditu.

b) Ikasle guztiek, Eskola Kontseiluko ordezkarien bidez, departamentu didaktikoen programazioa ezagutzeko aukera izanen dute. Programazio horretan azalduko dira eskatzen diren edukiak eta maila eta balorazio irizpideak (hortik kanpo geratuko dira erreferentzia pertsonalak dituen dokumentazioa).

Probak edo azterketak departamentu didaktikoaren eskuetan geratuko dira eta ikasturtea amaitu arte gordeko, erreklamazioak dauden kasuetan izan ezik, horrelakoetan bidezko prozesua amaitu arte gordeko baitira.

Proba praktikoen kasuan (musika-tresna, kantua, etab.) ebaluazio buletinak eta proba partzialen eta azken proben ebaluazioak gordeko dira; horiekin batera, bidezko kalifikazioa ekarri duten epaimahaiaren oharrak.

2._Erreklamazioak egiteko prozedura.

Ikasle guztiek eskubidea dute beren kalifikazioan eragina izanen duen edozein azterketa edo proba idatzi zuzendua eta kalifikatua ikusteko.

Ikasleei beren errendimendu akademikoaren balorazio objektiboa bermatzeko, beharrezkoa da ikasleek aurretik izatea helburuen, edukien eta ebaluazio irizpideen berri, hala nola balorazio positiboa izateko eskatutako gutxieneko emaitzena, kalifikazio irizpideena eta ikasketak ebaluatzeko ikasturtean erabiliko diren prozedurena.

Irakasle titularrak ikasleek, haien gurasoek edo legezko ordezkariek programazio didaktikoei buruz eskatzen dituzten argibideak emanen dizkie. Ebaluazioa egiteko tresnei buruzko informazioa ere emanen die eta ikasleek zilegi izanen dute egin dituzten idatzizko proba, ariketa eta lanak ikusi eta irakaslearekin batera aztertzea.

Ebaluazioa egiteko tresnak ikasturte amaierako kalifikazioak eman edo azken erabakiak hartu ondoko hiru hilabeteetan gordeko dira gutxienez.

Ikasleek zilegi izanen dute balorazio eta kalifikazioei buruzko argibideak eskatzea irakasle titularrari. Informazio hori eman ondoren ados ez badaude izandako azken kalifikazioarekin, hura berriz aztertzeko eskatzen ahalko diote idatziz ikasketaburuari, jakinarazpena egin eta bi egun balioduneko epean.

Azken kalifikazioa eta/edo agiria eskuratzekoa berraztertzen baldin bada, departamentu didaktikoek edo, kasua bada, epaimahaiek, hurrengo egun baliodunean, berraztertzeko eskakizunak ikusi eta dagozkien txostenak eginen dituzte. Txostena ikasketaburuari igorriko zaio eta horrek kopia bat bidaliko die ikasleei edo, hala behar denean, haien gurasoei.

Ikastetxeetan berraztertzeko prozesua agortzen duten ikasleek zilegi izanen dute, dela nork bere kasa, dela guraso edo tutoreen bitartez, ikastetxeko zuzendariari eskatzea erreklamazioa Zerbitzuak Ikuskatzeko eta Ikuskapen Teknikorako Zerbitzura igor dezala, azken jakinarazpena egin eta bi egun balioduneko epean.

Ikastetxeko zuzendariak, gehienez ere hiru egun balioduneko epean, espedientea Zerbitzuak Ikuskatzeko eta Ikuskapen Teknikorako Zerbitzura bidaliko du. Zuzendari nagusiak ebazpena emanen du _eta horrek administrazio bideari amaiera emanen dio_ hamabost egun balioduneko epean espedientea jasotzen denetik hasita, Zerbitzuak Ikuskatzeko eta Ikuskapen Teknikorako Zerbitzuaren txostenak kontuan izanik.

Ikaslearen erreklamazioaren aldeko ebazpena ematen baldin bada arestian aipatutako instantzietakoren batean, dagokion zuzenketa agerraraziko da ebaluazio agirietan, ikastetxeko idazkariak sinatutako eta zuzendariak ikus-onetsitako eginbidearen bitartez.

VI._2007/2008 IKASTURTEAN IKASLEAK ONARTU ETA MATRIKULATZEKO ARAUBIDEA

1._Onarpena eta matrikulazioa.

Aplikatu beharrekoak dira apirilaren 15eko 177/2003 Foru Agindua, espezialitateetan hutsik dauden ikaspostuen urteko eskaintza zehazten duena, eta abuztuaren 27ko 423/2002 Foru Agindua, goi mailako curriculuma ezartzen duena.

Kurtso bat baino gehiago duten irakasgaietan, aurreko kurtsoak gaindituta eduki beharko dira edozein kurtsotan matrikulatzeko, 3. puntuan azaldu bezala matrikula luzatzen denean izan ezik.

Nahitaezko gainerako irakasgaietan, ikasleek baldintza hauek bete beharko dituzte matrikula egin ahal izateko:

a) hirugarren kurtsoko nahitaezko irakasgaietan matrikulatzeko, gaindituta eduki behar dituzte lehen kurtsoko nahitaezko irakasgai guztiak.

b) laugarren kurtsoko nahitaezko irakasgaietan matrikulatzeko, gaindituta eduki behar dituzte bigarren kurtsoko nahitaezko irakasgai guztiak.

Salbuespenez, ikastetxeko Zuzendaritzak baimena eman dezake hirugarren edo laugarren kurtsoko irakasgaietan matrikula egiteko, nahiz eta lehenengo edo bigarren kurtsoko guztiak gaindituta ez izan, baldin eta ikasleren batek Nafarroakoa ez bezalako curriculuma duen ikastetxe batean egin baditu ikasketak eta bi curriculumak lotzeko desegokitasunak badaude.

2._Matrikulari uko egitea.

Ikasleek egindako matrikula deuseztatzeko eska dezakete, apirilaren 30a baino lehen, baldin eta agiri bidez eta zinez frogatzen badute ondoko inguruabarretariko bat gertatzen dela:

_Eritasun fisiko nahiz psikiko luzea izatea.

_Lanpostu bat eskuratu izana.

_Familiako beharkizunak izatea.

Ikaslearen irakasleei entzun ondoren, ikastetxeko zuzendariak eskaera ebatzi eta matrikulari uko egiteko baimena emanen du, baldin eta aipatu arrazoi horietako bat frogatzen bada eta, hori dela medio, ezinezkoa izan bada eskatzailea eskolara normalki joatea eta etengabeko ebaluazioaren bidez haren kalifikazioa egitea.

Aipatu arrazoiak ez bezalako beste arrazoi berezi batzuk daudenean, matrikulari uko egiteko eskabidea, horrekin batera txosten bat eta, hala bada, egokia den dokumentazioa igorriko ditu zuzendariak Eskola eta Lanbide Irakaskuntzaren Zuzendaritza Nagusira, bidezkoa den ebazpena eman dadin.

Matrikulari uko egiteko baimena ematen den kasu guztietan, dagokion eginbidea agertaraziko da ikaslearen ikasketen espedientean eta kontuan hartuko da uko horrek baimendu den ikasturte horretarako bakarrik balio duela. Halakoetan, ikasleari ez zaizkio zenbatuko horri dagozkion deialdiak.

Matrikula deuseztatu arren ez dira ordaindutako tasak itzuliko.

Matrikula deuseztatu duten ikasleek, hurrengo ikasturtean, irakasgairen batean matrikulatu beharko dute ikasle ofizial izaten segitzeko.

Ikasturteko deialdiak, deuseztatutako irakasgaiari edo irakasgaiei dagozkienak, ez dira zenbatuko ez kurtsoan egoteko denborari ez goi mailako musika ikasketa guztietan egoteko denborari begira.

Kurtso bateko irakasgai bat behin bakarrik deuseztatzen ahalko da.

3._Matrikula luzatzea.

Salbuespenez, ikasleek zilegi izanen dute matrikulatuta dauden irakasgai baten matrikula luzatzea hurrengo kurtsorako edo kurtsoetarako, baldintza hauek betez gero:

_Urtarrilean eskatu behar dute, eta irakasgaiko irakasleak bere adostasuna agertzeko sinatu duen idazkia aurkeztu behar dute eskabidearekin batera. Matrikula arruntetan bezala, matrikula hirugarren kurtsoko irakasgai baterako luzatzeko, beharrezkoa izanen da lehen kurtsoko nahitaezko irakasgai guztiak gaindituak izatea, eta laugarren kurtsoko irakasgai baterako luzatzeko, berriz, bigarren kurtsoko nahitaezko irakasgai guztiak gaindituak izatea.

_Ikasleak dena delako irakasgaian prozedura arruntaren bidez matrikulatuta egin duen kurtsoari kalifikazio positiboa eman behar zaio matrikula luzatuta egin duen irakasgaia kalifikatu aurretik.

_Ikasleei banan-banan kasu egiten zaien irakasgaietan, matrikula luzatzen bada ere, ez da bikoiztuko ikasleari esleitutako irakastaldia.

VII._BESTE JARRAIBIDE BATZUK

1._Irakasleen erantzukizuna.

Hezkuntza Administrazioak, indarrean dauden legeek ezartzen dutenari jarraikiz, bere gain hartuko ditu irakasle funtzionarioen kontrako auzietatik sortzen ahal diren erantzukizun zibil ordaingarriak; hori ez da eragozpen izanen bidezkoa den kasuetan atzera egiteko ekintza gauzatzeko. Irakasleek, euren jardunean letratuen laguntza behar izanez gero, defentsa egokia izan dezaten ere arduratuko da.

2._Osaera libreko kredituak.

Hizkuntza eskola ofizialetan egindako ikasketak direla-eta osaera libreko kredituak onartzeari dagokionez, osaera libreko hiru kreditu zenbatuko dira hizkuntza batean gainditutako kurtso bakoitzeko.

Halaber, osaera libreko kredituak onartuko dira Kontserbatorioek edo musikako goi mailako ikastetxeek antolatu eta ziurtatatzen dituzten jarduerak egiten direnean, hala nola ikastaroak, mintegiak, eskola magistralak edo antzeko jarduerak, eta kreditu bat emanen da hamar orduko. Horretarako, goi mailako musika ikasketak zein ikastetxetan egiten diren, bertako zuzendariaren baimena beharko da.

3._Ikastetxeko langileen jarduerak.

Urteko Programazio Orokorrean sartuta ez dagoen edozein jarduera egin ahal izateko, ikastetxeko zuzendariaren berariazko baimena beharko dute bai irakasleek, bai hezkuntza komunitateko beste edozein kidek.

4._Ikastetxeez landarako jendea sartzea.

Ikastetxean edozein mezu aditzera eman, transmititu edo banatu nahi duten pertsona guztiek ikastetxeko Zuzendaritza Taldearen baimena beharko dute. Kasu batean zein bestean baimen hori idatziz agertuko da ikastetxeko agiritegian.

Hori guztia ez da inoiz izanen legeak aitortzen dituen eskubide sindikaletarako oztopo.

5._Jarraibide hauen berri ematea.

Zuzendaritza Taldeak ardura hartuko du hezkuntza komunitateko sektore guztiek jarraibide hauen edukiaren berri izan dezaten.

III. ERANSKINA

Berariazko Dantza Eskolaren jarduna 2007-2008 ikasturtean arautzeko jarraibideak

Berariazko Dantza Eskolak balio akademikorik eta profesionalik ez duten dantza ikasketak ematen ditu, Nafarroako Foru Komunitateko Musika eta Dantza Eskolen funtzionamenduari buruzko oinarrizko arauak ezartzen dituen abenduaren 21eko 421/1992 Foru Dekretuak ezarritakoari jarraikiz.

I._IKASTETXEAREN URTEKO PROGRAMAZIO OROKORRA

1._UPOaren edukia.

Berariazko Dantza Eskolak, ikasturtea hasi aurretik, Urteko Programazio Orokorra eginen du; programazio horrek hezkuntzako jarduera guztiak koordinatuko ditu, eta beren eskumenak zuzen betetzen direla eta eskola komunitateko arlo guztiek esku hartzen dutela bermatuko du.

Berariazko Dantza Eskolak balio ofizialik gabe eskaintzen dituen ikasketei buruzkoa izanen da Urteko Programazio Orokorra.

Urteko Programazio Orokorrak ondoko atal hauek izanen ditu:

A._Ikastetxearen ordutegi orokorra eta hura egiteko ezarri diren irizpide pedagogikoak.

B._Irakaskuntza jarduerak, Berariazko Dantza Eskolaren Plan Pedagogikoan ageri diren ikasketei dagozkienak.

C._Ikastetxeko irakasleen prestakuntza plana.

D._Jarduera osagarrien eta eskolaz kanpokoen urteko programazioa.

E._Memoria administratiboa.

A._Ikastetxearen ordutegi orokorra eta hura egiteko ezarri diren irizpide pedagogikoak.

Ikastetxeko ordutegi orokorra Klaustroaren iritzia aditu ondoren Zuzendaritza Taldeak eginen du, eta bide eman beharko du ikastetxe bakoitzeko Urteko Programazio Orokorrean aurreikusitako jarduerak aurrera eramateko. Hortaz, ikastetxeko ordutegi orokorrak honako hauek bilduko ditu gutxienez:

a) Ikastetxea eskola komunitatearentzat irekita egonen den ordutegia.

b) Ikasleen eskola orduak.

c) Ikasleek eskolakoak ez diren jarduerak egiteko izanen duten ordutegia.

d) Ekain eta iraileko jardueren behin betiko egutegiaren aurreikuspena; horretan probak eta azken ebaluazioak noiz eginen diren adieraziko da, bai eta kontsultak egiteko epea zein izanen den ere. Maiatzaren 9aren aurretik, ikastetxeek aipatu diren jarduera horien behin betiko egutegia igorriko dute Zerbitzuak Ikuskatzeko eta Ikuskapen Teknikorako Zerbitzura.

e) Irakasleen ordutegi orokorra.

f) Irakasleen norbanako ordutegia.

Ikastetxeko ordutegi orokorra egiteko nahitaez hartuko dira kontuan, Klaustroak adierazitakoaz gain, ondoren azaltzen diren irizpide hauek:

_Dantza Eskolako ordutegia astelehenetik ostiralera bitartekoa izanen da, goizez eta arratsaldez, 9:30etik 14:30era arte eta 16:30etik 22:00ak arte.

_Ikastetxeko Zuzendaritzak neurriak hartuko ditu ikastetxea oporraldietan, goizez, irekita edukitzeko.

_Irakasleek ordutegien arloan izaten ahal dituzten nahiak ezin dira inoiz izan Klaustroak ezartzen dituen irizpideen kontrakoak, edota arte ikasketen ordutegia eta araubide orokorrekoena bateratzeak ikasleei sortzen dizkien beharren kontrakoak.

B._Berariazko Dantza Eskolaren Plan Pedagogikoan ageri diren irakaskuntza jarduerak.

Irakasleen Klaustroak ikastetxearen irakaskuntzako jarduerak programatuko ditu eta Zuzendaritza Taldeari igorriko dizkio, Urteko Programazio Orokorrean sar ditzan.

Programazioak espezialitate bakoitzeko irakasleek eginen dituzte, Plan Pedagogikoan ezarritako ikasketen arabera, eta Zuzendaritza Taldeari igorriko zaizkio Ikastetxeko Urteko Programazio Orokorrean sar ditzan.

C._Ikastetxeko irakasleen prestakuntza plana.

Berariazko Dantza Eskolak prestakuntza plana izanen du ikastetxeko irakasleentzat.

Zuzendaritza Taldea izanen da, irakasleen beharrak abiaburutzat hartuta, irakasleen Klaustroari prestakuntzako planaren proposamena aurkeztuko diona.

D._Jarduera osagarrien eta eskolaz kanpokoen urteko programazioa.

Planteatzen diren jarduera osagarriak eta eskolaz kanpokoak irakaskuntzako ekintzak osatu edo garatzeko izanen dira. Jarduera horiek aurrez irakasleen Klaustroak ematen dituen jarraibideei egokituko zaizkie.

E._Memoria administratiboa.

Zuzendaritza Taldeak eginen du eta bertan sartuko da, besteak beste, Ikastetxea Antolatzeko Dokumentua.

Ikastetxea Antolatzeko Dokumentua Zerbitzuak Ikuskatzeko eta Ikuskapen Teknikorako Zerbitzuak ikastetxeei bidaltzen dizkien inprimakiak erabiliz beteko da. Inprimaki horiek, behar bezala beterik, Zerbitzu horretara bidaliko dira, ikasturteko eskolak hasi eta 20 eguneko epean.

2._UPOa prestatu, onetsi eta ebaluatzea.

Urteko Programazio Orokorra Zuzendaritza Taldeak eginen du, Klaustroaren eta Eskola Kontseiluaren proposamen eta erabakiak kontuan hartuta.

Ikastetxeko Zuzendaritzari dagokio Urteko Programazio Orokorra era egokian egiteko jarduketa egutegia ezartzea.

Berariazko Dantza Eskolako Urteko Programazio Orokorra irakasleen Klaustroak onetsi behar du. Urteko Programazio Orokorra eskola denbora hasi eta gehienez ere 20 eguneko epean onetsiko da.

Programazio horren ale bat Zerbitzuak Ikuskatzeko eta Ikuskapen Teknikorako Zerbitzura bidaliko da urriaren 31 baino lehen; beste ale bat ikastetxearen idazkaritzan jasoko da, irakasleek azter ahal dezaten.

Zerbitzuak Ikuskatzeko eta Ikuskapen Teknikorako Zerbitzuak egiaztatuko du Urteko Programazio Orokorra jarraibide hauetan xedatzen denari egokitzen zaion, eta zer zuzenketa egin behar den adieraziko du, bakarren bat egin behar bada.

Urteko Programazio Orokorra ikastetxeko kide guztiek nahitaez bete beharrekoa izanen da.

Ikasturtea bukatutakoan, Zuzendaritza Taldeak ebaluatu eginen du Urteko Programazio Orokorra zenbateraino bete den. Ondoriorik aipagarrienak Memoria batean jasoko dira eta hura Zerbitzuak Ikuskatzeko eta Ikuskapen Teknikorako Zerbitzura bidaliko da, uztailaren 10a baino lehen.

II._IKASKETEN ORDU BANAKETA

Talde bakoitzean gehienez ere 20 ikasle izanen dira oinarrizko mailan, eta eskola orduen kopurua, astero eta irakasgai guztietan, jarraian ezartzen denari egokituko zaio:

Plan Pedagogikoa:

.Ikasketen ordu banaketa:

_Hastapena-a: 2 ordu.

_Hastapena-b: 2 ordu.

.Oinarrizko maila - Komunak bi espezialitateetarako:

_1. Oinarrizkoa.

-Dantza klasikoa: 2 ordu.

-Folklorea: ordu bat.

-Sormeneko mugimendua: ordu bat.

_2. Oinarrizkoa.

-Dantza klasikoa: 2 ordu.

-Dantza espainiarra: 2 ordu.

-Sormeneko mugimendua: ordu bat.

_3. Oinarrizkoa.

-Dantza klasikoa: 3 ordu.

-Dantza espainiarra: 2 ordu.

-Sormeneko dantza: ordu bat.

_4. Oinarrizkoa.

-Dantza klasikoa: 4 ordu.

-Dantza espainiarra: 3 ordu.

-Sormeneko dantza: ordu bat.

-Erdi maila - Dantza klasikoa.

_1. zikloa, 1. kurtsoa, erdi maila.

-Dantza klasikoa: 6 ordu.

-Bariazioak, oin-puntak: 2 ordu.

-Koreografia L.: 1,30 ordu.

-D. garaikidea: 2 ordu.

_1. zikloa, 2. kurtsoa, erdi maila.

-Dantza klasikoa: 7,30 ordu.

-Bariazioak, oin-puntak: 2,30 ordu.

-Koreografia L.: 1,30 ordu.

-D. garaikidea: 2 ordu.

_2. zikloa, 1. kurtsoa, erdi maila.

-Dantza klasikoa: 7,30 ordu.

-Bariazioak, oin-puntak: 3,30 ordu.

-Koreografia L.: 1,30 ordu.

-D. garaikidea: 3 ordu.

_2. zikloa, 2. kurtsoa, erdi maila.

-Dantza klasikoa: 7,30 ordu.

-Bariazioak, oin-puntak: 3,30 ordu.

-Koreografia L.: 1,30 ordu.

-D. garaikidea: 4 ordu.

.Erdi maila - Dantza espainiarra:

_1. zikloa, 1. kurtsoa, erdi maila.

-Dantza klasikoa: 6 ordu.

-Bolero Eskola: 2 ordu.

-Dantza flamenkoa: 2 ordu.

-Dantza estilizatua: ordu bat.

_1. zikloa, 2. kurtsoa, erdi maila.

-Dantza klasikoa: 6 ordu.

-Bolero Eskola: 2,30 ordu.

-Dantza flamenkoa: 3 ordu.

-Dantza estilizatua: 1,30 ordu.

_2. zikloa, 1. kurtsoa, erdi maila.

-Dantza klasikoa: 6 ordu.

-Bolero Eskola: 2,30 ordu.

-Dantza flamenkoa: 3,30 ordu.

-Dantza estilizatua: 3 ordu.

_2. zikloa, 2. kurtsoa, erdi maila.

-Dantza klasikoa: 6 ordu.

-Bolero Eskola: 2,30 ordu.

-Dantza flamenkoa: 3,30 ordu.

-Dantza estilizatua: 3 ordu.

.Helduendako kurtso irekiak.

_Dantza klasikoa:

-1. maila: 3 ordu hasierako mailan.

-2. maila: 3 ordu maila aurreratuan.

_Dantza garaikidea:

-Hasierako maila: 2 ordu.

-Erdi maila: 2 ordu.

-Maila aurreratua: 3 ordu.

_Dantza espainiarra:

-Hasierako maila: 2 ordu.

-Erdi maila: 2 ordu.

-Maila aurreratua: 3 ordu.

III._IRAKASLEAK

1._Lanaldia.

Irakasleek, oro har, Nafarroako Gobernuaren mendeko funtzionarioentzat finkatzen diren lan orduak izanen dituzte, beren irakasle lanerako egokituak. Irakasleentzat jaiegun izanen dira Nafarroako Foru Komunitateko Administrazioaren zerbitzuko langileen lan egutegian ere jaiegun direnak.

Ikasturtea irailaren 1ean hasi eta ekainaren 30ean bukatuko da.

Ikasturtean, irakasleek jarraibide hauetan finkatutako lanaldia eta ordutegia beteko dituzte. Dena dela, Nafarroako irakaskuntza publikoaren kalitatea hobetzeko itunean ezarritakora egokitu beharko da bertan xedatutakoa.

Ekain-irailetako eskola gabeko lan egunetan, baimena ematen ahalko zaie irakasleei egunean ikastetxean egon beharreko bost orduko lanegun etengabea egiteko.

Irakasleek hogeita hamar ordu emanen dituzte astean ikastetxeko jardueretan, irakastorduetan eta ordu osagarrietan banatuta. Gainerako orduak, ikastetxean egon beharrik gabekoak, irakaslana prestatzeko eta irakasleen hobekuntza profesionalerako erabiliko dira, bai eta batzorde eta epaimahaietan parte hartzeko edo antzeko jarduerak egiteko ere, baldin eta horretarako hautatzen badira.

2._Orduen banaketa.

Ikastetxean bertan eman beharreko orduak honela banatuko dira:

A._Irakastorduak.

Ikasleekin irakaslan zuzenean emandakoak jotzen dira irakastordutzat.

Irakasleek, oro har, hemezortzi irakastordu izanen dituzte. Zilegi izanen da hogei irakastordutara ailegatzea, gehienez, betiere departamentuaren ordu banaketak hala eskatzen duenean eta beti haren barrenean.

Irakastorduak zenbatzerakoan ondoko jarduera eta inguruabarrak hartuko dira kontuan:

a) Zuzendaritza Taldea.

Zuzendaritza Taldeak bere irakastorduetatik gehienez ere ondoko ordu kopurua erabiltzen ahalko du karguetako eginkizunetan: zuzendariak, 9 ordu; ikasketaburuak, 6 ordu eta idazkariak, 3 ordu. Dena dela, Nafarroako irakaskuntza publikoaren kalitatea hobetzeko itunean ezarritakora egokitu beharko da bertan xedatutakoa.

b) 58 urtez goitiko irakasleak.

Lanaldi osoa duten 58 urtez goitiko irakasleek zilegi izanen dute, nahi badute, beren irakastorduak murriztea, gehienez ere bost ordu kenduz, nahiz horrek ez duen esan nahi astean ikastetxean egon beharreko orduak gutxituko direnik. Salbuespenez, eta ikastetxeak hala behar duenean, murrizte hori ezinezkoa denean, ukatutako murrizte ordu bakoitza irakasleek urtean nahitaez egin beharreko prestakuntzako 35 orduen ordez konputatuko da. Aipatu den borondatezko murrizte hori, adin hori betetzen den urte naturalean hasten den ikasturtean gauzatuko da, eta bateraezina izanen da ordutegiaren bestelako murrizteekin. Adina dela kausa eskola ordutegiaren murrizketa duten 58 urtetik gorako irakasleek, 65 urte betetzearekin batera, murrizketa hori egiteko eskubidea galduko dute, baldin eta jardunean segitzea eskatzen badute; horretan salbuespen izanen dira erretiro sariaren %100 jasotzeko behar den gabealdia ez dutenak.

B._Astean zenbatu beharreko ordu osagarriak.

Irakasle bakoitzaren asteko ordutegian irakastorduak eta ordu osagarriak batuta hogeita bost ordu izanen dira astean guztira, ikasturtean irakastegunak ez diren lanegunengatiko konpentsazio orduak alde batera utzita.

Astean zenbatzeko ordu osagarrietan, irakasle bakoitzari esleituriko eginkizunen arabera, ondoko hauek sartzen ahalko dira:

a) Zaintza orduak.

b) Astean bi ordu, gutxienez, programazio didaktikoak egiteko eta, hala denean, horiek berrikusi eta eguneratzeko. Ikastetxeak beharrezko neurriak hartuko ditu jarduera horretan irakasle guztiek parte hartzeko.

Zaintza orduak eta ordu osagarrietan egin beharreko jarduerak behar den bezala egiten badira, irakasleek, bakoitzaren ordutegi pertsonalean agertu behar duten asteko 25 orduetara ailegatu arte, ondoko ordu hauek sartzen ahalko dituzte astean zenbatu beharreko ordu osagarrien artean, irakasle bakoitzari esleitutako jardueren arabera:

a) Bulegoko orduak, Zuzendaritza Taldeko kideen koordinazio lanetarako.

b) Ikastetxeak erakundeekin batera parte hartzen duen proiektuetako irakaskuntza taldeek lan egiteko orduak.

c) Astean bi ordu, gutxienez, tutoretza lanak egiteko.

C._Zaintza.

Ikastetxea, eta zuzendaria bereziki, ikastetxearen ordezkaria den aldetik, ikasleen arduraduna da eskolako orduetan; beraz, ikastetxean une oroz behar adina irakasle izan behar da zaintza orduez egoki arduratzeko.

Ordu guztiak behar bezala beterik baldin badaude soilik, zuzendariak zilegi izanen du zaintzako irakasleren bati beste zeregin batzuk ematea, adibidez, liburutegikoak, koordinazio lanak, etab.

Zaintzako irakaslearen eginkizun nagusiak hauek dira:

a) Irakasleak huts egiteagatik edo beste edozein arrazoirengatik zaindaririk ez duten ikasleei kasu egitea.

b) Korridoreetan ordena zaintzea eta, oro har, ikasleek gelaz kanpo duten portaera. Horrek ez du esan nahi beste irakasleek eginkizun hori bete behar ez dutenik.

c) Beren zaintza aldian sortzen diren gorabehera guztiak konpontzea, bai eta ikastetxeko norbait mediku beharrean gertatuz gero hartarako dilijentziak egitea ere, eta ikasketaburua lehenbailehen jakinaren gainean jartzea.

d) Beren zaintza aldian irakasleek duten puntualitate eta asistentziaren berri ematea idatziz, klaseei, zaintzei, liburutegiari eta bestelako jarduerei dagokienez.

Ikasketaburuak zaintza orduei buruzko parte bat prestatuko du egunero, eta Zerbitzuak Ikuskatzeko eta Ikuskapen Teknikorako Zerbitzuaren eskura egonen da beti. Gutxienez honako datuak izanen ditu:

_Irakasleen hutsegite eta atzerapenak.

_Ikastetxeko edozein egoitzatan izan diren gorabeherak.

_Gertatu diren istripuak.

_Zaintzako irakasleen sinadurak.

Zaintza orduetarako adierazten diren helburuak betetzen baldin badira, aurretik Zerbitzuak Ikuskatzeko eta Ikuskapen Teknikorako Zerbitzuak txostena emanik, ikastetxeak zilegi izanen du zaintzarako plan berariazko bat ezartzea.

Irakasleek zaintza lana eginen dute asteko zenbait ordutan, ikastetxearen beharren arabera. Nolanahi ere, kontuan hartu behar da irakasle bakoitzaren asteko ordutegian irakastorduak eta ordu osagarriak batuta hogeita bost ordu izanen direla astean guztira, ikasturtean irakastegunak ez diren lanegunengatiko konpentsazio orduak alde batera utzita.

Irakasleren baten zaintza orduak berariazko beste jarduera batzuekin trukatzen ahal dira, baldin zaintza ordu guztiak beteta badaude eta jarduerak Klaustroak onesten baditu.

Ikastetxeren batean, ezarritako ordutegiarekin zaintzak behar bezala betetzeko arazoren bat badago, Zerbitzuak Ikuskatzeko eta Ikuskapen Teknikorako Zerbitzuak ordu banaketa egoki den moduan aldatzeko neurriak hartuko ditu, Zuzendaritza Taldearekin batera.

D._Hilean zenbatu beharreko ordu osagarriak.

Irakasle bakoitzak ikastetxean nahitaez egin behar dituen asteko 30 orduak betetzeko, falta diren bost orduak hilean zenbatuko dira eta ondoko jardueretarako izanen dira:

a) Klaustroko bileretan parte hartzeko.

b) Ebaluazioko eta irakaskuntza taldeko bileretara joateko.

c) Beste jarduera osagarri eta eskolaz kanpoko batzuk.

Jarduera jakin batzuk egiteko, astean goiz bat gordeko da, eta irakasle guztiek gutxienez 4 ordu izanen dituzte klaustroaren bilerak, ebaluazio bilkurak, gurasoen bilerak eta, oro har, ikastetxearen funtzionamendu egokirako beharrezkoak diren beste jarduera batzuk egiteko.

Ikasketaburuak, zuzendariarekin batera, hiruhilekoetan banatuta planifikatuko ditu aurreikusitako jarduerak. Adierazi diren jarduera horien programazioa hiruhilekoaren hasieran Zerbitzuak Ikuskatzeko eta Ikuskapen Teknikorako Zerbitzura igorriko da.

3._Ordutegiak egin, onetsi eta argitaratzea.

Ikasketaburuak ordutegiak eginen ditu Klaustroak ezarritako irizpide pedagogikoei eta jarraibide hauetan ezarri denari jarraikiz; halaber, bermatu eginen da ikasleentzako ordutegi funtzionala, eta lehentasuna izanen dute ikastetxearen beharrek.

Iraileko matrikula egin ondoren, ikasketaburuak Klaustroari jakinaraziko dio irakasgai bakoitzeko ikasleen eta taldeen kopurua, matrikulazio datuen arabera.

Ikastetxean ahal den guztietan, irakasleek ikasleak eta taldeak hautatuko dituzte. Beren espezialitatekoak hautatuko dituzte, halakorik dagoenean; gero, ordutegia osatuko dute, antzekoenak diren irakasgaiak hautatuz eta, ordu guztiak beteta ere, artean osatu gabeko orduak badituzte, hain antzekoak ez diren beste irakasgai batzuekin osatzen ahalko dituzte.

Ikasleak eta taldeak hautatzerakoan ados jartzen ez badira, honako prozedura honi jarraituko zaio:

Atal honetan ezarritako ordenaren arabera, lehenik hautatu behar duen irakasleak beretzat lehentasunezkoa den irakasgai eta kurtsoko ikaslea edo ikasle taldea hautatuko du; ondoren, hautatzeko bigarrena den irakasleak eginen du eta, horrela, hurrenez hurren, espezialitateko eta departamentuko irakasle guztiek lehenengo txanda egin arte. Lehenengo txandaren ondotik beste batzuk eginen dira, irakasleek beren irakastorduak osatu arte edo departamentuari dagozkion irakasgai, ikasle eta talde guztiak esleitu arte.

Bilera berezi horretan izaten diren gorabehera guztien akta sinatua eginen da, eta ikasketaburuari aktaren kopia emanen zaio.

Aurrean adierazi diren ondorioetarako, irakasleek hautatzeko duten lehentasuna ordena honen araberakoa izanen da:

1. Musikako eta Arte Eszenikoetako Katedradunen Kidegoa.

2. Musikako eta Arte Eszenikoetako Irakasleen Kidegoa.

3. Musikako eta Arte Eszenikoetako Irakasleen Kidegoan zerbitzu eginkizunetan diharduten funtzionarioak.

4. Bigarren Hezkuntzako Irakasleen Kidegoan zerbitzu eginkizunetan diharduten funtzionarioak.

5. Zerbitzu berezietan ari diren funtzionarioak.

6. Aldi baterako kontratatuak, lan edo administrazio araubidekoak.

Hautatzeko lehentasuna, lehenbiziko hiru atalei dagokienez, antzinatasun handiena izateak emanen du eta, antzinatasun bera izanez gero, atal bakoitzeko lehentasuna erabakitzeko honako irizpide hauek ezarriko dira, hurrenez hurren:

_Ikastetxean antzinatasun handiena.

_Kidegoan edo Administrazioan lehenik sartu izana, eszedentzia urteak zenbatu gabe.

_Hautapen prozeduretan puntu gehien izatea.

6. atalean, lehentasuna ezarriko da irakasleek Giza Baliabideen Zerbitzuko zerrendetan duten tokiaren arabera.

Ikasketaburuak begiratuko du Klaustroko kide guztien irakastorduak eta derrigorrez ikastetxean egin behar dituzten gainerakoak bat datozen honako jarraibide hauetan ezarri denarekin, eta egiaztatuko du ikasle guztien eta ikasle talde guztien ardura hartuko den eta orduak bete gabe dituen irakaslerik ba ote dagoen.

Hori guztia egin ondoren, ikasketaburuak, irakasleen Klaustroak ordutegiak egiteko ezarri dituen irizpide pedagogikoak kontuan hartuta, behin betiko ordutegiaren proposamena eginen du.

Irakasleen eskola ordutegia astean bost egunetan banatuko da, salbu eta denbora partzialerako kontratatu diren irakasleen kasuan eta Zerbitzuak Ikuskatzeko eta Ikuskapen Teknikorako Zerbitzuak kontuan hartzen dituen beste egoera batzuetan. Nolanahi ere, egunean 5 irakastordu gehienez.

Halaber, ikastetxeko irakasle guztiak tarte jakin batzuetan aldi berean egonen dira ikastetxean; denbora hori gutxienez lau ordukoa izanen da eta tarte horretan denek egon beharko dute bertan.

Ordutegi orokorrean ahaleginak eginen dira ahalik eta denborarik gehienean ikastetxean zuzendaritzako karguren bat egon dadin.

Ikasle baten baja gertatzen bada eta hori betetzen ez bada, irakasleak hutsik duen denbora nola erabili zuzendaritzak erabakiko du:

_Beste ikasle batzuen denborari gehituz: atzeratu egin diren ikasleei laguntzeko, aurreratuenak sustatzeko, etab.

_Beste jarduera batzuk egiteko.

_Material pedagogikoa prestatzeko.

_Beste zeregin batzuetarako.

Ikastetxearen ordutegia onesteko, urriaren 31 baino lehen igorri beharko da Zerbitzuak Ikuskatzeko eta Ikuskapen Teknikorako Zerbitzura.

Ikastetxearen ordutegia Zerbitzuak Ikuskatzeko eta Ikuskapen Teknikorako Zerbitzuak onetsiko du; onetsi bitartean, irakasleek ikasketaburuak egin eta zuzendariak behin-behinekoz onesten duen ordutegia bete behar dute. Horri buruz aurkezten den edozein erreklamazio Zerbitzuak Ikuskatzeko eta Ikuskapen Teknikorako Zerbitzuak ebatziko du.

Beti egonen da, edozeinek ikusi ahal izateko moduan, ikastetxeko eta Ikasketaburutzako iragarki oholean eta ikastetxeko kide guztiek sarbide duten beste tokiren batean, ikastetxearen egoera agertuko duen informazioa, bereziki aipatuz irakasle bakoitzaren ordutegia eta lan tokia, eta zehazki bakoitzaren ordutegian bildutako irakastorduak, tutoretzak, zaintza orduak, departamentuko bilerak eta abar. Informazio hori guztia hezkuntza komunitateko kide guztien eskura egonen da. Era berean, zuzendaritza kargu bakoitza ikastetxean zein ordutan egonen den ere adieraziko da.

4._Irakasleek ordutegia betetzea eta asistentzia orria.

Zuzendaritza Taldeak irakasleak ikastetxean egoten diren kontrolatu behar du, baita ekaineko eta iraileko eskola gabeko egunetan ere. Halaber kontuan hartuko du, eta horren berri emanen Zerbitzuak Ikuskatzeko eta Ikuskapen Teknikorako Zerbitzuari, lan araubideko kontratudunak zein egunetan hasi diren ikastetxean.

Aurreko hilabeteko asistentzia parteak bidali behar dizkiote Zerbitzuak Ikuskatzeko eta Ikuskapen Teknikorako Zerbitzuari, hilabete bakoitzaren 5a baino lehen, ikastetxeetara bidaliko diren ereduak erabiliz.

Asistentzia partearen kopia bat jendaurrean paratuko da, ikusgai, hilabete bakoitzaren 5a baino lehen.

Ikastetxean nahitaez egoteko orduei buruzko absentzien eta atzerapenen berri emanen da ohiko ereduetan, kontuan hartuta bakoitzaren ordutegi pertsonala eta alde batera utzita absentzia justifikatuta dagoen ala ez.

Halaber, norberaren ordutegian agertu ez arren, irakasleek egin dituzten jarduera osagarriak aipatuko dira.

Jarduera horietariko bakoitzean parte hartzen duten irakasleak eta egiten dituzten orduak adieraziko dira.

Nolanahi ere, txosten horietan ondoko arau hauek beteko dira:

_Inoiz ez da utziko hutsik "hutsegitearen arrazoia" laukia, eta hala egiten bada, justifikatu gabeko hutsegitetzat hartuko da.

_Hutsegite guzti-guztiak agertuko dira.

_"Hutsegitearen arrazoia" izeneko laukian "Norberaren arazoetarako ordaindu gabeko lizentzia" jarri ahal izateko, beharrezkoa izanen da Giza Baliabideen Zerbitzuak irakasleari baimena ematea.

Irakasleek beren lanetan gertatzen den edozein absentzia edo atzerapenen berri emanen diote ikastetxeari, ahalik eta lasterren.

Zuzendariak, justifikazioa aurkezteko epea amaitu eta biharamunean aditzera emanen dio Zerbitzuak Ikuskatzeko eta Ikuskapen Teknikorako Zerbitzuari irakasle baten edozein hutsegite nahiz atzerapen, ikasketaburuari justifikatu gabekoa iruditzen zaiona, bere lansaritik tokatzen den kenketa egiteko eta, hala behar bada, espedientea hasteko. Kasuko irakasleari ere emanen zaio, idatziz, horren berri.

Irakasleek hutsegitearen frogagiriak aurkeztu behar dizkiote zuzendariari, horrek eskatu gabe.

Irakasleen hutsegiteen frogagiriak (baja agiriaren kasuan, haren kopia edo fotokopia) ikastetxeko zuzendaritzan geldituko dira Zerbitzuak Ikuskatzeko eta Ikuskapen Teknikorako Zerbitzuaren eskura.

Eskola emate normalaren gorabehera guztiak berehala jakinaraziko zaizkio telefonoz Zerbitzuak Ikuskatzeko eta Ikuskapen Teknikorako Zerbitzuari, eta bai ondoren asistentzia partean jasoko ere.

IV._IKASLEEN ESKUBIDEAK ETA BETEBEHARRAK

1._Alderdi orokorrak.

Ikasleen eskubide eta betebeharrei dagokienez, abenduaren 14ko 417/1992 Foru Dekretuari eta uztailaren 14ko 191/1997 Foru Dekretuari jarraituko zaie.

2._Ikasleen asistentzia.

Ikasle ofizial guztien eskubidea eta betebeharra da klaseetara joatea, eta inoiz ez da zilegi izanen borondatezko asistentzia duen sistemarik ezartzea ikaslea matrikulaturik dagoen irakasgaietan.

Zenbait egun jakinetan arrazoi batengatik edo bestearengatik ikasle gutxi egonagatik ere, ikastetxeak eta irakasleek normalki eman beharko dituzte klaseak.

Asistentziako hutsegiteak gurasoek edo ikasleen legezko ordezkariek justifikatu beharko dituzte irakasle-tutorearen aurrean, eta Ikasketaburutzak onetsi beharko du.

Inoiz juzkatzen baldin bada ikasle batek behin eta berriz eta oinarririk gabe justifikatzen dituela bere hutsegiteak, Zuzendaritza Taldeak beharrezkoak diren neurriak hartuko ditu.

18 urtez goitiko ikasleek _hutsegiteen justifikazioak berek aurkeztea hautatzen dutenek_, edozein lan harremanetan eskatzen ahal direnen pareko frogagiriak aurkeztu beharko dituzte.

3._Erreklamazioak egiteko prozedura.

Ikasle guztiek eskubidea dute beren kalifikazioan eragina izanen duen edozein azterketa edo proba idatzi zuzendua eta kalifikatua ikusteko.

Ikasleei beren errendimendu akademikoaren balorazio objektiboa bermatzeko, beharrezkoa da ikasleek aurretik izatea helburuen, edukien eta ebaluazio irizpideen berri, hala nola balorazio positiboa izateko eskatutako gutxieneko emaitzena, kalifikazio irizpideena eta ikasketak ebaluatzeko ikasturtean erabiliko diren prozedurena. Tutoreak emanen du informazio hori.

Irakasle titularrak ikasleek, haien gurasoek edo legezko ordezkariek programazio didaktikoei buruz eskatzen dituzten argibideak emanen dizkie. Ebaluazioa egiteko tresnei buruzko informazioa ere emanen die eta ikasleek zilegi izanen dute egin dituzten idatzizko proba, ariketa eta lanak ikusi eta irakaslearekin batera aztertzea.

Ebaluazioa egiteko tresnak ikasturte amaierako kalifikazioak eman edo azken erabakiak hartu ondoko hiru hilabeteetan gordeko dira gutxienez, erreklamazioak izaten direnean izan ezik, horiei dagokien prozesua itxi arte gordeko baitira.

Ikasleek, haien gurasoek edo legezko ordezkariek zilegi izanen dute balorazio eta kalifikazioei buruzko argibideak eskatzea. Informazio hori eman ondoren ados ez badaude izandako azken kalifikazioarekin, hura berriz aztertzeko eskatzen ahalko diote idatziz ikasketaburuari, jakinarazpena egin eta bi egun balioduneko epean.

Azken kalifikazioa eta/edo agiria eskuratzekoa berraztertzen baldin bada, departamentu didaktikoek edo, kasua bada, epaimahaiek, hurrengo egun baliodunean, berraztertzeko eskakizunak ikusi eta dagozkien txostenak eginen dituzte. Txostena ikasketaburuari igorriko zaio eta horrek kopia bat bidaliko die ikasleei edo, hala behar denean, haien gurasoei.

Ikastetxeetan berraztertzeko prozesua agortzen duten ikasleek zilegi izanen dute, dela nork bere kasa, dela guraso edo tutoreen bitartez, ikastetxeko zuzendariari eskatzea erreklamazioa Zerbitzuak Ikuskatzeko eta Ikuskapen Teknikorako Zerbitzura igor dezala, azken jakinarazpena egin eta bi egun balioduneko epean.

Ikastetxeko zuzendariak, gehienez ere hiru egun balioduneko epean, espedientea Zerbitzuak Ikuskatzeko eta Ikuskapen Teknikorako Zerbitzura bidaliko du. Zuzendari nagusiak ebazpena emanen du _eta horrek administrazio bideari amaiera emanen dio_ hamabost egun balioduneko epean espedientea jasotzen denetik hasita, Zerbitzuak Ikuskatzeko eta Ikuskapen Teknikorako Zerbitzuaren txostenak kontuan izanik.

Ikaslearen erreklamazioaren aldeko ebazpena ematen baldin bada arestian aipatutako instantzietakoren batean, dagokion zuzenketa agerraraziko da ebaluazio agirietan, ikastetxeko idazkariak sinatutako eta zuzendariak ikus-onetsitako eginbidearen bitartez.

Kalifikazioen kontrako berraztertze eskaerak eta erreklamazioak jarraibide hauetan ezarritakoari lotuko zaizkio, eta, jarraibide hauetan arautu ez diren aferetarako, 1995eko abuztuaren 28ko Aginduari (1995eko irailaren 20ko "EAO").

V._IKASLEAK ONARTU ETA MATRIKULATZEKO ARAUBIDEA

1._Onarpena eta matrikulazioa.

Ikasleak balio akademiko edo profesionalik ez duten dantza ikasketetan onartu eta matrikulatzerakoan ikastetxearen Plan Pedagogikoan ezarri dena beteko da.

2._Matrikulari uko egitea.

Ikasleek egindako matrikula deuseztatzeko eska dezakete, apirilaren 30a baino lehen, baldin eta agiri bidez eta zinez frogatzen badute ondoko inguruabarretariko bat gertatzen dela:

_Eritasun fisiko nahiz psikiko luzea izatea.

_Lanpostu bat eskuratu izana.

_Familiako beharkizunak izatea.

Ikaslearen irakasleei entzun ondoren, ikastetxeko zuzendariak eskaera ebatzi eta matrikulari uko egiteko baimena emanen du, baldin eta aipatu arrazoi horietako bat frogatzen bada eta, hori dela medio, ezinezkoa izan bada eskatzailea eskolara normalki joatea eta etengabeko ebaluazioaren bidez haren kalifikazioa egitea.

Aipatu arrazoiak ez bezalako beste arrazoi berezi batzuk daudenean, matrikulari uko egiteko eskabidea, horrekin batera txosten bat eta, hala bada, egokia den dokumentazioa igorriko ditu zuzendariak Eskola eta Lanbide Irakaskuntzaren Zuzendaritza Nagusira, bidezkoa den ebazpena eman dadin.

Matrikulari uko egiteko baimena ematen den kasu guztietan, dagokion eginbidea agertaraziko da ikaslearen ikasketen espedientean eta kontuan hartuko da uko horrek baimendu den ikasturte horretarako bakarrik balio duela.

Matrikula deuseztatu arren ez dira ordaindutako tasak itzuliko.

Matrikula deuseztatu duten ikasleek, hurrengo ikasturtean, beren ikasketak egiten segitu dezakete ikastetxe berean. Ondorengo ikasturteetan ikasketetara itzultzeko, ikastetxeko Plan Pedagogikoan ezarritako sarrerako prozedura arruntean sartu beharko dute.

VI._BESTE JARRAIBIDE BATZUK

1._Irakasleen erantzukizuna.

Hezkuntza Administrazioak, indarrean dauden legeek ezartzen dutenari jarraikiz, bere gain hartuko ditu irakasle funtzionarioen kontrako auzietatik sortzen ahal diren erantzukizun zibil ordaingarriak; hori ez da eragozpen izanen bidezkoa den kasuetan atzera egiteko ekintza gauzatzeko. Irakasleek, euren jardunean letratuen laguntza behar izanez gero, defentsa egokia izan dezaten ere arduratuko da.

2._Ikastetxeez landarako jendea sartzea.

Ikastetxean edozein mezu aditzera eman, transmititu edo banatu nahi duten pertsona guztiek zuzendariaren baimen idatzia beharko dute, eta baimen hori idatziz jasoko da ikastetxeko agiritegian.

Hori guztia ez da inoiz izanen legeak aitortzen dituen eskubide sindikaletarako oztopo.

3._Ikastetxeko langileen jarduerak.

Urteko Programazio Orokorrean sartuta ez dagoen edozein jarduera egin ahal izateko, ikastetxeko zuzendariaren berariazko baimena beharko dute bai irakasleek, bai hezkuntza komunitateko beste edozein kidek.

4._Jarraibide hauen berri ematea.

Dantza Eskolako Zuzendaritza Taldeak ardura hartuko du hezkuntza komunitateko sektore guztiek jarraibide hauen edukiaren berri izan dezaten.

Iragarkiaren kodea: F0710939