Iragarkia

95. ALDIZKARIA - 2007ko abuztuaren 3a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

536/2007 EBAZPENA, uztailaren 2koa, Lan zuzendari nagusiak emana, Iruñeko "La Protectora, S.A." enpresaren lan hitzarmen kolektiboaren testua erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 63/2007).

Departamentu honetan 2007ko ekainaren 15ean sartu da "La Protectora, S.A." enpresaren lan hitzarmen kolektiboaren testua, 24 artikuluz eta eranskin batez (2007ko ordainsarien taula) osatua, enpresaren ordezkariek eta enpresa batzordeak (NA eta ELA-STV) 2007ko ekainaren 14an izenpetu eta onetsia.

Industria eta Teknologia, Merkataritza eta Lan Departamentua da lan hitzarmen kolektiboaren testua erregistratzeko, gordetzeko eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz.

EBATZI DUT:

1. Iruñeko "La Protectora, S.A." enpresaren lan hitzarmen kolektiboa erregistratzea (kodea: 3104502) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Industria eta Teknologia, Merkataritza eta Lan kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2007ko uztailaren 2an._Lan zuzendari nagusia. José María Roig Aldasoro.

IRUÑEKO "LA PROTECTORA, S.A." ENPRESAREN LAN HITZARMEN KOLEKTIBOA

1. artikulua. Esparrua. Hitzarmen kolektibo honek La Protectora, S.A. enpresan du eragina, eta, izaera orokorreko lan harremanei loturik, Iruñeko lantokian (Orkoiengo errepidea, zk.g.) diharduten langile guztiengan.

2. artikulua. Indarraldia. Hitzarmen honetan xedatutakoak 2007ko urtarrilaren 1etik aurrera hartuko du indarra, Nafarroako ALDIZKARI OFIZIALean zein egunetan argitaratzen den kontuan hartu gabe. 2007ko abenduaren 31 arte iraunen du eta urtez urte luzatuko da besterik gabe, alderdietako batek haren amaiera iragartzen ez badu, behintzat, indarraldia bukatu baino lehen.

3. artikulua. Ordainsariak. 2007ko urtarrilaren 1etik abenduaren 31 arte, lanbide kategoria bakoitzean hitzarmenaren 1. eranskinean adierazitako ordainsariak ordainduko dira; beraz, 2006. urtekoekin alderatuta %3ko soldata igoera ezarri da.

4. artikulua. Hitzarmenaren plusa. Enpresak ordaindu beharreko hitzarmenaren plusaren bidez, tauletan ageri den bezala, langilearen puntualtasuna, asistentzia eta errendimendua saritzen dira. Plus hori egun naturalen arabera ordainduko da, honako arauak kontuan hartuz:

a) Lanera berandu iristeak hilabetez hilabete kontatuko dira, hil batekoak bestekoekin batu gabe; beraz, kontaketa hori egitean ez dira multzo berean sartuko hil desberdinetan egindakoak.

b) Lanera lehenengo aldiz berandu iritsiz gero, sartzeko ordua baino bi ordutik behera, atzeratutako denborari dagokion hitzarmenaren plusa halako bi galduko da.

c) Lanera bigarren aldiz berandu iritsiz gero, sartzeko ordua baino bi ordutik behera, atzeratutako denborari dagokion hitzarmenaren plusa halako lau galduko da.

d) Lanera hirugarren aldiz eta gehiagotan berandu iritsiz gero, atzerapen denbora edozein dela ere, berandu iritsitako egunari dagokion hitzarmenaren plusa osorik galduko da.

e) Lanera berandu zenbat aldiz iritsi den kontuan hartu gabe, bi orduko edo gehiagoko atzerapena izanez gero, berandu iritsitako egunari dagokion hitzarmenaren plusa osorik galduko da.

f) Ezinbesteko kasuetan edo enpresak emandako baimenagatik lanean hasi ondoren lantokitik lekutzen den langileak egun horri dagokion hitzarmenaren plusa osorik kobratuko du.

g) Ohiko errendimendua baino txikiagoko kasuetan, langileari egozten ahal zaizkion arrazoiengatik ez bada, hitzarmenarenaren plusa osorik kobratzeko eskubidea izanen du.

h) Langileak plus hori eritasunak eragindako baja kasuetan kobratuko du, Gizarte Segurantzaren kalte-ordain ekonomikoa eskuratzen duen bitartean. Gainera, istripuaren ondoriozko aldi baterako ezintasun bajan ere kobratuko da, eta orobat, hitzarmen honen 15. artikuluan aipatzen diren lizentzia ordainduen kasuetan.

i) Hitzarmenaren plusa ez da kobratuko utzikeriagatik edo garbitasun ezagatik matxurarik izanez gero.

5. artikulua. Jardueraren plusa. Jardueraren plusaren bidez, produktibitatea hobetzeko langileak jartzen duen ahalegina konpentsatzen da.

Hitzarmen honen eranskineko taulak hilabeteka kontatzen badira ere, era horretan teknikarien eta administrarien kategoriak daudela ulertuko da. Gainerako kategoriei jardueraren plusa benetan lan egindako egun bakoitzeko aplikatuko zaie eta igande ez diren urteko jaiegun ofizialetan; beraz, plus hori ez da izanen igandeetan, aldi baterako ezintasuneko egoeretan, justifikatu gabeko absentzietan, baimen ordainduetan eta abarretan.

Enpresan sartu berriak plus hori kobratzen hasiko dira zerbitzuak ematen dituzteneko saileko produkzioko erritmo normalaren errendimendua eta hartara egokitzea lortzen duten momentutik aurrera.

6. artikulua. Aparteko eskersariak. Eskersari bat ekainaren 30ean ordainduko da eta beste bat abenduaren 22an. Horietako bakoitza 30 eguni dagokien ordainsaria izanen da, honako kontzeptu hauek bilduz: oinarrizko soldata, plus pertsonala, hitzarmenaren plusa eta, tokatzen denean, jardueraren plusa.

7. artikulua. Antzinatasuna - Plus pertsonala. 1998ko urtarrilaren 1etik hasita, antzinatasuna, soldata osagarri gisa, kendu egin zutenez, egun horren ondoren enpresan sartu ziren langileek edo etorkizunean sartuko direnek ez dute kontzeptu horrengatik soldata igoerak izateko eskubiderik izanen.

1998ko hitzarmen kolektiboan ezarritakoaren arabera, enpresan 1997ko abenduaren 31n kontratua indarrean zuten langileei, eskuratutako eskubide gisa eta "ad personam" berme gisa, antzinatasunagatik kobratu izan duten osagarri ekonomikoa errespetatuko zaie, bai eta, aurreko hitzarmenetan itundutakoarekin bat, eskuratzekoak dituzten igoerak ere: biurteko bi, %5ekoak, eta lau bosturteko %10ekoak, oinarrizko soldataren gainean kalkulatuak.

Hemen aurreikusitakoari jarraikiz, langileek kobratu beharreko zenbatekoak hitzarmen hau sinatu eta hurrengo hilabeteari dagokion nominan ordainduko zaizkie, "plus pertsonala" izenpean.

Langileren batek, enpresan 1997ko abenduaren 31 baino lehen sartu arren, une hartan indarrean zegoen hitzarmen kolektiboan ezarritako urteko diru kopurua baino ordainsari handiagoa, antzinatasuna barne, itundu baldin bazuen enpresarekin, ez du "plus pertsonala" izeneko osagarri hori kobratuko.

8. artikulua. Irabazietan partea izatea. Hitzarmen honen eraginpeko langile bakoitzak, irabazietan partea izateagatik, urteko ordainsari osoaren hamabirena kobratuko du, kontzeptu hauek hartuta: oinarrizko soldata, plus pertsonala, hitzarmenaren plusa, jardueraren plusa eta aparteko eskersariak. Diru hori ekitaldi bakoitzaren ondorengo urteko lehenbiziko hiruhilekoan kobratuko da, langilea eritasunak edo istripuak eragindako aldi baterako ezintasuneko egoeran izan bada ere.

9. artikulua. Aparteko orduak.

1. Langileen Estatutuaren 35.4 artikuluan ezarritakoaren arabera, hitzarmen honen eraginpeko langileek urtean aparteko 80 ordu gehienez egin ditzakete, horietatik 40 ordu derrigorrez lan egin beharrekoak izanen dira, artikulu honen 3. atalean arautu bezala.

2. Programatu gabeko aparteko orduen kasuan, ezusteko kasuetan lan egin beharrekoak, alegia, enpresak aurrez behar den denboraz abisatuko die ordu horiek egin behar dituzten langileei, eta orduko 10,52 euro ordainduko dira kategoria guztietan, kateko lanetan izan ezik, horietan orduko 16,43 euro ordainduko baitira.

3. Enpresak "programatutako" orduak, urtean 40, gehienez ere, orduko 16,43 euro ordainduko dira, kategoria guztietan, eta lanaldi berean aparteko 3 ordu gutxienez eginez gero, horrelakoetan enpresaren kontura izanen da hiltegiko kantinan egiten den bazkaria. Programatutako orduak izanen dira Aste Santu, San Fermin, Eguberri eta Urte Zahar egunen aurretik lan egin beharrekoak. Enpresak aparteko ordu horiek eginen direneko eguna baino 48 ordu lehenago abisatu beharko du. Jakinarazpena iragarki oholean oharra jarriz eginen da, honakoak adierazita: zein langilek lan egin behar duten, zein egunetan eta zenbat ordu. Lanaldi bakoitzean gutxienez aparteko 3 ordu izanen dira egin beharrekoak.

Programatutako aparteko ordu horiek nahitaez egin beharrekoak badira ere, enpresak egun bakoitzeko bost langile, gehienez, salbuesten ahal ditu betebehar horretatik, zerrendak jendaurrean jarri aurretik abisatzen badute bidezko arrazoiak dituztela ordu horiek ez egiteko. Zerrendatik aparte gelditzeko eskaera bost langilek baino gehiagok eginez gero, enpresak horietako bakoitzak egindako alegazioak banan-banan aztertu ondoren, aparteko orduak eginen dituztenen zerrendatik gehienez ere bost langile salbuetsiko ditu, eta bere erabakiaren berri emanen die langile horiei eta enpresa batzordeari.

4. Aurreko 3. atalaren arabera, enpresak ezarritako aparteko ordu horiek lan egin beharrari uko egitea hutsegite larritzat joko da, edo oso larritzat behin baino gehiagotan gertatuz gero, eta hitzarmen honen 23. artikuluari jarraikiz zehatuko da.

10. artikulua. Lanaldia, ordutegia, lan egutegia eta oporrak 2007. urtean. 2007. urteko lanaldiak, lanaldi etengabea izanen baita, 1.770 lanordu izanen ditu.

Laneko ordutegia (ordu erdiko atsedena barne) honakoa izanen da:

.Fabrika:

2007ko urtarrilaren 1etik abenduaren 31 arte.

Astelehena: 6:00etatik 14:50era

Asteartea: 6:00etatik 14:00era

Asteazkena: 6:00etatik 14:30era

_Osteguna: 6:00etatik 14:00etara

_Ostirala: 6:00etatik 13:30era

Martxoaren 27tik apirilaren 4ra, eta abenduaren 18tik 28ra, asteartetik ostiralera, lanegunetan, irteera ordua 14:30 izanen da.

.Administrazioa:

Astelehenetik ostiralera: 6:30etatik 14:42ra

Ordutegia alda dezake enpresak, hitzarmen honen batzorde mistoari entzun ondoren, urteko lanaldia zehazki doitzeko beharrezkoa bada.

Adierazitako ordutegietan sartzen dira ogitarterako hogeita hamar minutuak, benetako lanalditzat hartzen ez direnak.

Laneko egutegia enpresak prestatzen du, Langileen Estatutuaren 34.4 artikuluari jarraikiz. 2007. urterako arau hauek ezarri dira:

_Lanegunak izanen dira astelehenetik ostiralera artekoak, biak barne.

_Aurrekoan adierazitakoaz gainera, ondorengo egunetan ordutegi hauekin lan eginen da:

.Fabrika:

Apirilaren 9a: 6:00etatik 14:50era

Azaroaren 29a: 6:00etatik 13:30era

Abenduaren 3a: 6:00etatik 14:50era

Abenduaren 15a: 6:00etatik 13:20ra (plantillaren erdia)

Abenduaren 22a: 6:00etatik 13:20ra (plantillaren erdia)

.Administrazioa:

Apirilaren 9a: 6:00etatik 14:50era

Azaroaren 29a: 6:00etatik 13:30era

Abenduaren 3a: 6:00etatik 14:50era

Abenduaren 15a: 6:00etatik 13:20ra (plantillaren erdia)

Abenduaren 22a: 6:00etatik 13:20ra (plantillaren erdia)

11. artikulua. Gizarte laguntzako borondatezko funtsa. Gizarte laguntzako borondatezko funtsa eratu da enpresako langileei laguntza emateko. Lehenbiziko helburua eritasun edo istripuaren ondoriozko bajan dauden langileentzako jardueraren plusaren ordainketari erantzutea izanen da, hitzarmen honen 5. artikuluan adierazi bezala. Funtsa eratzeko eta jarraipena emateko, hilero 2,40 euro jarriko ditu langileak. Enpresak hilean beste 4,80 euro jarriko ditu funts horretan sartzen den langile bakoitzeko. Funtsa kudeatzeaz horretarako propio eratzen den batzordea arduratuko da.

12. artikulua. Eritasunaren ondoriozko aldi baterako ezintasuna. Eritasun arruntaren edo lanetik kanpoko istripuaren ondoriozko ezintasun iragankorreko egoerak dirauen arte enpresak ordainduko du behar den osagarria, halatan non langileak bajako lehenbiziko egunetik hasita, bere soldataren %100 kobratuko baitu, Gizarte Segurantzaren prestazio ekonomikoekin bere kategoriari dagozkion oinarrizko soldata, plus pertsonala eta hitzarmenaren plusa batuz, betiere hitzarmen honen 11. artikuluan aipatutako batzordeak bere adostasun txostena ematen badu eta langileak onartzen badu bere osasun egoera eta sendatze prozesua nola dauden jakiteko enpresako medikuak bisita egin diezaiola.

13. artikulua. Laneko istripuaren ondoriozko aldi baterako ezintasuna. Lan istripuaren ondoriozko ezintasun iragankorreko baja kasuetan, enpresak ordainduko du langilearen aseguruak ordaintzen dituen kalte-ordainen eta oinarrizko soldataren, plus pertsonalaren eta hitzarmenaren plusaren %100era arteko diferentzia.

14. artikulua. Osasuna zaintzea. Osasunaren etengabeko ebaluazioa enpresan eginen dute enpresatik kanpoko prebentzioko zerbitzuko osasun zerbitzuek.

15. artikulua. Lizentzia ordainduak: Langileak, aurretik abisatu eta justifikatuta, baimena du lanera ez agertzeko, ordaindua izateko eskubidearekin, arrazoi hauetako bat dela medio eta honenbesteko denboraz:

a) Ezkontza: hamabost egun natural, ezkontzako egunetik hasita. Langileak, gainera, egun horien ondoren bere opor egunen erdiak hartzen ahal ditu.

b) Semearen edo alabaren jaiotza; ezkontidearen, gurasoen, seme-alaben, aita-amaginarreben, aiton-amonen, biloben, anai-arreben eta koinata-koinatuen eritasun larria: bi egun natural. Eritasun larritzat joko da eriaren ardura hartu duen sendagileak horrelakotzat jotzen duena, eta gainera horren ondorioz 4 egunetik gorako ospitalizazioa badakar.

Semearen edo alabaren jaiotza larunbatez, igandez edo jaiegunez gertatzen bada, baimen egun bat gehiago izanen da.

c) Aita-amaginarreben, suhi-errainen, anai-arreben eta koinata-koinatuen, aiton-amonen eta biloben heriotza: bi egun natural.

d) Gurasoen, ezkontidearen edo seme-alaben heriotza: 4 egun natural, heriotza gertatzen den egunetik kontatzen hasita. Arrazoi horregatik langileak Iruñetik 300 kilometrotik gorako bidaia egin beharra izanez gero, egun bat gehiago emanen zaio.

e) Bizilekuz aldatzeko: egun bat.

f) Publikoa edo pribatua den eginbehar saihestezina betetzeko: behar-beharrezkoa den denbora.

g) Eginkizun sindikaletan edo langileen ordezkaritza lanetan aritzeko: hitzarmen honetan ezarritakoa beteko da.

h) Seme-alaben, anai-arreben eta gurasoen ezkontza: egun bat.

Lizentziako egunak egun naturalak eta etenik gabeak direla ulertuko da.

16. artikulua. Lansaririk gabeko lizentziak. Langileak hiru laneguneko lizentzia ordaindugabea izanen du urtean, gehienez ere, aurreko ataletan aurreikusi ez diren afera pertsonal edo familiakoetarako; muga bakarra da sail bakoitzean enplegatu bat baino gehiago batera ez izatea.

Familiako afera berezietan enpresak baimen ordaindugabea ematen ahal dio langileari, behin bakarrik eskatu badu eta 4 egun naturaletik 30era bitarte, baina epe horretan ezin izanen da beste langilerik egon. Arrazoi horiengatik eskatutako baimena ematen ez badu, enpresak bere erabakia lan beharrak kontuan hartuz hartu duela frogatu beharko du.

17. artikulua. Laneko jantziak eta arropa garbiketa. Enpresak urtean laneko hiruna jantzi-ekipo banatuko dizkie produkzioko langileei eta arropa horren garbiketa ere enpresaren kontura izanen da.

18. artikulua. Lanbide kategoriak.

A._Kategorien definizioak.

Arduraduna: behar den gaitasuna, lanerako gogoa, moralitatea eta agintzeko ahalmena izanik, sail baten edo batzuen ardura duen langilea da; bere mende ditu langile profesionalak eta horiei agintzen zaien lana betearazi behar die, eta ateratzen den produktuaren errendimenduaz eta lortutako kalitatearen kontrolaz arduratuko da.

Arduradunak, besteak beste, eginkizun hauek izanen ditu: bere saileko makinak eta tresneria zaintzea eta horiei etekina ateratzea; bere menpeko langileen zuzendaritza, errendimenduaren kontrola eta diziplina, eta haiei agindutako prozesuen edo lanen zainketa; berari agintzen zaizkion lan programen exekuzioa; bere nagusiek eskatzen dizkioten parteak, egoera-orriak edo txostenak prestatzea; produktuen kalitateari eta akaberari edo erabiltzen dituen lehengaiei buruzko onarpen mailaz arduratzea eta, gainera, bere saileko langileei sariak emateko edo zehapenak jartzeko proposamenak egitea bere nagusiei.

Abere-hiltzailea: behar diren ikasketak, hobekuntza praktika eta errendimendua honako lanetan lortu duen langilea da: abereak hiltzea, hots, ardi azienda sastakatzea, zintzurra moztea eta barrena ustutzea, zerri aziendari zintzurra moztea, ile gabe uztea eta erraiak ateratzea eta behi nahiz zaldi aziendari zintzurra moztu eta kanalean zabaltzea.

Abere-hiltzailea lehenengo nahiz bigarren mailakoa izan daiteke, langileak lortutako espezializazioaren arabera, eta egin behar duen lanaren konplexutasuna eta garrantzia kontuan hartuta, honakoa ondorioztatzen da:

1._Lehenengo mailako abere-hiltzaile dira espezializazio eta errendimendu egokiarekin euren lanbideko eginkizun guztiak ezagutzen eta praktikatzen dituztenak, lana bakarka nahiz taldean eginez, euren mailako edo beheragoko beste langileekin batera. Euren gain egonen da egindako lanaren kalitatearen erantzukizuna.

2._Bigarren mailako abere-hiltzaile dira euren lanbideko eginkizun guztiak ezagutzen eta praktikatzen dituztenak, ohiko errendimendu eta lan kalitatearekin, baina lehen mailako abere-hiltzaileen errendimendu eta prestakuntza handira iritsi gabe; horiek ere lana bakarka nahiz taldean egin dezakete.

Abere-hiltzailearen laguntzailea: lehenengo edo bigarren mailako abere-hiltzaileek agindutako lanak eginez, bai eta lanbidearekin loturiko beste zeregin errazak ere, haien perfekziora eta errendimendura iristen ez diren langileak dira.

Bilgor lanetako ofiziala: arduradunaren agindura bilgorra eta bestelako produktuak urtu edo fusionatzen dituen langilea da; bere lana abere-hiltegian egiten du, bilgorra biltegian pisatzen eta egokitzen du eta bera arduratzen da zerbitzua ematen duen enpresako lokalera garraiatzeko agindua emateaz.

Langileak bere eginkizunetan lortutako espezializazio eta errendimendua kontuan hartuta 1. eta 2. mailako gaitasuneko ofizialak bereziko dira:

1._Lehenengo mailako ofizialak dira, arduradunaren agindura egonik eta espezializazio eta errendimendu egokiarekin, euren lanbideko eginkizun guztiak ezagutzen eta praktikatzen dituztenak, lana bakarka nahiz taldean eginez, euren mailako edo beheragoko beste langileekin batera. Euren gain egonen da egindako lanaren kalitatearen erantzukizuna.

2._Bigarren mailako ofizialak dira euren lanbideko eginkizun guztiak ezagutzen eta praktikatzen dituztenak, ohiko errendimendu eta lan kalitatearekin; horiek ere lana bakarka nahiz taldean egin dezakete.

Bilgor lanetako ofizialaren laguntzaileak: bilgor lanetako 1. edo 2. mailako ofizialaren agindura eginkizun hauek dituen langilea: hautatze lanak, garbiketa eta agintzen zaizkion bestelako lan errazak.

Tripaki lanetako ofiziala: era guztietako abereen tripakiak, freskoak zein gazituak prestatzeko behar diren tratamendu lanak txukun eta errendimendu egokiarekin egiten dituen langilea.

1._Lehenengo mailako ofizialak dira, arduradunaren agindura egonik eta espezializazio eta errendimendu egokiarekin, euren lanbideko eginkizun guztiak ezagutzen eta praktikatzen dituztenak, lana bakarka nahiz taldean eginez, euren mailako edo beheragoko beste langileekin batera. Euren gain egonen da egindako lanaren kalitatearen erantzukizuna.

2._Bigarren mailako ofizialak dira euren lanbideko eginkizun guztiak ezagutzen eta praktikatzen dituztenak, ohiko errendimendu eta lan kalitatearekin; horiek ere lana bakarka nahiz taldean egin dezakete.

Tripaki lanetako ofizialaren laguntzailea: lehenengo edo bigarren mailako tripaki lanetako ofizialak agintzen dizkion lan osagarriak egiten dituen langilea.

Atezaina: bere nagusiek emandako jarraibideak betez, enpresako sarrera zaintzen duen langilea; bere lana beraz, hartaz kontu izatea eta zaintzea da.

Hemen zehazten ez diren kategoriei dagokienez, Haragi Industrien Oinarrizko Hitzarmenaren 15. artikuluan eta hurrengoetan araututakoari jarraituko zaio. Hitzarmen hura Lan Zuzendaritza Nagusiak 2005eko otsailaren 9an emandako ebazpenaren bidez onetsi zen eta 2005eko otsailaren 28ko 50. Estatuko Aldizkari Ofizialean argitaratu.

B._Goragoko kategoriako lanak: aitortu zaion lanbide kategoria baino goragoko eginkizunetan diharduen langileak eskubidea izanen du esleituriko kategoriaren eta egiazki egiten duen eginkizunaren artean dagoen diferentzia kobratzeko.

C._Beheragoko kategoriako lanak: Produkzio beharrak direla-eta, enpresak langile bat bere kategoria baino beheragoko zereginetan jartzen badu, beharrezkoa den denboran baizik ez ditu eginen, eta mantendu eginen zaizkio bere lanbide kategoriari dagozkion ordainsaria eta hortik heldu diren bestelako eskubideak.

D._Maila igoerak: maila igoeretan kontuan hartuko dira langilearen prestakuntza, merezimenduak eta antzinatasuna, bai eta enpresaburuaren antolaketarako ahalmenak ere.

Langile bat, zortzi hilabete baino gehiago jarraian, goragoko mailako lan batean aritu baldin bada, lanpostu hori hutsik dagoela ulertuko da eta enpresa lanpostua betetzen saiatuko da hautapen prozesu baten bidez, zeinean parte hartzeko aukera izanen baitute maila beheragoko langileek, betiere eskaera egiten badute.

Deialdi bakoitzean enpresak argi eta garbi agerraraziko ditu kategoria bakoitzean dauden lanpostu hutsak, bai eta hautapen prozesuan parte hartzeko eskaera egiteko epeak ere.

Enpresak izendatutako bi teknikarien eta enpresa batzordeak izendatutako kide baten iritziz gaitasun handiena duen langilea hautatuko da lanpostu hori betetzeko.

Konfiantzako langileen izendapena eta maila igoerak egiteko erabakia enpresen baitan dago beti.

19. artikulua. Probaldia. Langile sartu berri orok probaldi bat pasatu beharko du, ondoren adierazten diren epeetan. Probaldian hala enpresak nola kontratatutako langileak kontratua etetea dute kalte-ordainik jasotzeko eskubiderik edo obligaziorik gabe.

a) Teknikariak (erdi mailako tituludunak eta titulurik gabeak), arduradunak, kontabilitateburuak eta, oro har, departamentu edo saileko buruak: 6 hilabete.

b) Administrazioko langileak: 3 hilabete.

c) Beharginak eta menpekoak: hilabete.

20. artikulua. Kontratazio-araubidea.

Prestakuntzako kontratuak. Praktikaldiko lan kontratuei eta prestakuntzako kontratuei dagokienez, Haragi Industrien Oinarrizko Hitzarmenaren 29. artikuluan xedatutakoari jarraituko zaio.

Iraupen jakin bateko kontratuak. Obra edo zerbitzu jakin bat egiteko lan kontratuaren kasuan, eta orobat, merkatuaren egoerari, lan metaketari edo gehiegizko eskaerari aurre egiteko behin-behineko kontratuaren kasuan edo bi kontratu mota horiek mugagabeko kontratu bihurtzean, Haragi Industrien Oinarrizko Hitzarmenaren 30. artikuluan xedatutakoari lotuko zaio.

21. artikulua. Baldintzarik hoberenak. Hitzarmen kolektibo honetan biltzen diren baldintza ekonomikoak eta bestelako guztiak, orokorrean hartuta, gutxienekotzat hartuko dira; beraz, baldintza hobeak aitortuak zituzten langileak hemendik aurrera ere horietaz baliatzen ahal dira.

22. artikulua. Segurtasuna eta higienea. Enpresak babeseko baliabideak banatuko dizkie, behar dituzten langileei (kaskoak, altzairuzko eskularruak, segurtasuneko botak, neguko botak), eta beraien ardura izanen da horietaz kontu izatea eta zaintzea.

23. artikulua. Ordezko arauak. Hitzarmen honetan aurreikusirik ez dagoen guztian Langileen Estatutuan eta aplikatzekoak diren gainerako xedapenetan ezarritakoari jarraituko zaio.

Zehapen araubidearen gainean, hitzarmen honen 9.4 artikuluan ezarritakoaz gainera, Haragi Industrien Oinarrizko Hitzarmenaren XI. kapituluan (64. artikulua eta hurrengoak) xedatutakoa aplikatuko da, zehaztapen hauek eginez:

a) Hutsegite arinengatik ondorengo zehapenetako bat jar daiteke: hitzen bidezko kargu hartzea, kargu hartze idatzia edo egun bateko enplegu-soldaten etenaldia.

b) Hutsegite larriengatiko zehapena bi egunetik hogeira arteko enplegu-soldaten etenaldia izan daiteke.

c) Hutsegite oso larriengatiko zehapena hogeita bat egunetik hirurogeira arteko enplegu-soldaten etenaldia izan daiteke, edo enpresatik kaleratzea.

24. artikulua. Batzorde mistoa. Testu honen interpretazioan sor daitezkeen zalantzak argitzeko, eta lan arloko jurisdikzioaren eskumena galarazi gabe, Interpretazio Batzorde Mistoa eratu da, enpresaren legezko ordezkariek eta langileen ordezkariek osatua.

ERANSKINA

Lansarien taulak, 2007ko urtarrilaren 1etik 2007 abenduaren 31ra

TEKNIKARIAK

Goi mailako tituludunak 1.156,11 172,00 386,02 1.714,13

Erdi mailako tituludunak 1.001,08 247,95 386,02 1.635,05

Titulu gabeak 799,68 383,96 287,23 1.470,87

ADMINISTRAZIOKO LANGILEAK

Kontabilitate burua 886,54 280,06 256,65 1.423,25

1. mailako ofiziala 758,29 366,81 256,74 1.381,84

2. mailako ofiziala 758,29 336,80 234,20 1.329,29

Laguntzailea 758,29 301,93 204,36 1.264,58

Saltzaile bidaiaria 758,29 366,81 256,74 1.381,84

MENPEKO LANGILEAK

Pisatzailea - Baskularia 757,46 277,85 213,61 1.248,92

Telefonista 690,90 335,39 252,07 1.278,36

Atezaina 750,10 95,13 - 845,23

Garbitzailea (ordua) 4,97 3,65 4,78 13,40

BEHARGINAK

Arduraduna. 25,00 13,13 12,79 50,92

1. mailako abere-hiltzailea 25,00 11,74 10,43 47,17

2. mailako abere-hiltzailea 25,00 11,24 9,86 46,10

Abere-hiltzailearen laguntzailea 25,00 10,92 9,55 45,47

Prestatzailea 25,00 8,13 7,85 40,98

Bilgor lanetako 1. mailako ofiziala 25,00 11,74 10,43 47,17

Bilgor lanetako 2. mailako ofiziala 25,00 11,24 9,86 46,10

Tripaki lanetako ofiz. laguntzailea 25,00 10,92 9,55 45,47

Zenbait lanbidetako langileak (zur-

gina, igeltseroa, pintorea, etab.) 25,00 11,74 10,43 47,17

Peoi espezialista 25,00 8,82 8,13 41,95

ikastuna, 1. urtekoa 17,51 6,18 5,68 29,37

ikastuna, 2. urtekoa 20,01 7,06 6,50 33,57

Iragarkiaren kodea: F0711066