I. NAFARROAKO FORU KOMUNITATEA
1.1. XEDAPEN OROKORRAK
1.1.4. Ebazpenak
518/2007 EBAZPENA, maiatzaren 29koa, Eskola eta Lanbide Irakaskuntzaren zuzendari nagusiak emana, 2007-2008 ikasturtean lanbide hastapeneko programetan (lanbide lantegiak) eta lanbide hastapen bereziko programetan ikasleak onartzeko arauak onesten dituena.
Kontuan harturik ekainaren 21eko 233/1999 Foru Dekretua, Nafarroako Foru Komunitatean gizarte garantiako berariazko programak arautzen dituena, apirilaren 2ko 31/2007 Foru Dekretua eta apirilaren 23ko Foru Agindua, diru publikotik ari diren irakaskuntza ez-unibertsitarioko ikastetxeetan ikasleak onartzeko prozedura arautzen dutenak 2007-2008 ikasturterako, eta ikusirik Lanbide Heziketaren Zerbitzuaren eta Dibertsitate, Kultura-aniztasun eta Inmigraziorako Zerbitzuaren adostasun txostenak.
Hori horrela, Nafarroako Foru Komunitateko Administrazioa arautzen duen abenduaren 3ko 15/2004 Foru Legearen 22.1 artikuluko d) idatz-zatiak ematen dizkidan ahalmenak erabiliz,
EBATZI DUT:
1. Nafarroako Foru Komunitatean diru publikotik ari diren ikastetxeetan, lanbide hastapeneko programetan (lanbide lantegiak) eta lanbide hastapen bereziko programetan ikasleak 2007-2008 ikasturtean onartzeko prozedura erregulatzen duen arautegia ezartzea, ondoko oinarri hauetan zehazten den moduan:
OINARRIAK
Alderdi orokorrak
1. 1. Izen-ematearen urte naturalean 16-21 bitarteko adina izanik, Derrigorrezko Bigarren Hezkuntzako (DBH) titulua ez duten gazteek eskatzen ahalko dute lanbide hastapeneko programetan sartzea.
2. Eskolatze Batzordeak, irailean, ezarritako ohiko epean aurkeztutako eskaera guztien gaineko ebazpena eman ondoren, programetara sartzeko baldintzak bete eta inskripzioa egiteko epeaz kanpo jaso direnak ebazten ahalko ditu.
3. Kasu berezietan, Eskolatze Batzordeak matrikula egiteko baimena ematen ahalko die ikasturte batez lanbide hastapeneko programa bat egin eta beste programa bat egiteko eskaera aurkezten duten ikasleei. Ikasleak onartzeko prozedura arrunta bukatutakoan tokirik geratzen bada egiten ahalko da matrikula hori.
Lanbide hastapeneko programak
(Lanbide lantegiak)
2. Hezkuntza Departamentuak 2007-2008 ikasturtearen plangintzaren barruan eskaintzen dituen programak egiteko eskaerak ebazpen honen I. eranskineko ereduaren araberakoak izanen dira.
3. Eskatzaile bakoitzak eskaera bakar bat aurkeztuko du eta bertan adieraziko, lehentasunaren araberako hurrenkeran, zer programa, ikastetxe edo entitate eskatzen duen. Lehentasunez eskatzen den ikastetxe edo entitatean aurkeztuko da eskaera, behar diren ziurtagiriekin batera. Eskaera bi lekutan aurkeztuz gero, baremoa aplikatu ondoren lortutako puntu guztiak galduko dira.
4. 1. 2006-2007 ikasturtean eskolatuak daudenek txosten-ziurtagiri bat aurkeztu beharko dute eskabidearekin batera, eta bertan azaldu egindako maila eta kurtsoa, bai eta lanbide hastapeneko programei (lanbide lantegiak) buruzko orientazio psikopedagogiko bat ere, 2. eranskineko ereduaren araberakoa. Eskatzaileak Derrigorrezko Bigarren Hezkuntza osoa egin ez badu, aipatu txosten-ziurtagiriak ikastetxeko ikuskatzailearen ikus-onetsia izanen du nahitaez.
2. Eskatzailea 2006-2007 ikasturtean eskolaturik ez badago, egindako azken kurtsoko ziurtagiri akademikoa aurkeztuko du, emaitza eta guzti, dagokion ikastetxeak 3. eranskineko ereduari jarraikiz emana.
5. Programaren batean eskatzaileak ikaspostuak baino gehiago badira, ondoko irizpide orokor hauek aplikatuko dira hurrenez hurren:
a) Deseskolatzea.
b) Eskatzailearen adina.
c) Bizilekuaren hurbiltasuna.
d) Familiaren per capita errenta.
6. Irizpide orokor horiek ondoko baremo honi jarraikiz baloratuko dira:
1. Deseskolatzea:
a) 2006-2007 ikasturtean matrikula egina ez izatea Hezkuntza Departamentuak baimendutako irakaskuntzetan eta 1.1 puntuko baldintzak betetzea: 5 puntu.
Atal hau egiaztatzeko 3. eranskineko eredua erabiliko da.
2. Eskatzailearen adina:
a) Izen-ematearen urte naturalean 17 urte edo gehiago dituzten gazteak: 2,5 puntu.
b) Izen-ematearen urte naturalean 16 urte dituzten gazteak: 0 puntu.
Eskatzaileen adina egiaztatzeko NANaren fotokopia aurkeztuko da.
3. Bizilekuaren hurbiltasuna:
a) Helbidea eskatutako ikastetxe edo entitateari dagokion eskola aldean duten eskatzaileak (4. eranskina): 1,5 puntu.
b) Beste aldeetako eskatzaileak: 0 puntu.
Familiaren helbidea tokian tokiko udalak luzaturiko ziurtagiriaren bidez egiaztatuko da.
4. Familia unitatearen per capita errenta:
a) 5.872 euroko edo hortik beherako per capita errentak: puntu 1.
b) 5.872,01 eurotik 7.692 eurora bitarteko per capita errentak: 0,75 puntu.
c) 7.692,01 eurotik 9.161 eurora bitarteko per capita errentak: 0,50 puntu.
d) 9.161,01 eurotik 10.168 eurora bitarteko per capita errentak: 0,25 puntu.
e) 10.168 eurotik gorako errentak: 0 puntu.
Familiaren errenta frogatzeko 2005eko pertsona fisikoen errentaren gaineko zergaren aitorpenaren kopia aurkeztu beharko da. Aitorpena egin beharrik ez eta egin ez bazuten, urte horretan jasotako diru-sarrerak egiaztatzeko agiria aurkeztuko da.
Familia unitatearen errentak behar den bezala egiaztatzen ez badira, atal honetako puntuazioa 0 izanen da.
7. Eskatzaile batzuek puntuazio bera baldin badute, familiaren errentarik txikiena duenaren alde joko da. Eskatzaileek jasotako errentei buruz informaziorik aurkeztu ez badute, gerta litekeen berdintasuna jendaurreko zozketaz erabakiko da.
8. Ikasleak onartzeko prozesuak ondoko epe hauek izanen ditu: eskaera epea ekainaren 4tik 27ra izanen da, biak barne. Programetan onartu diren pertsonen behin-behineko zerrendak ekainaren 28an jakinaraziko dira eta erreklamazioak aurkezteko egunak ekainaren 28a eta 29a izanen dira. Onartuen behin betiko zerrendak ekainaren 29an argitaratuko dira. Matrikula, berriz, uztailaren 2tik 17ra bitarte eginen da, bi egunak barne.
9. Eskaerak aurkezteko epea bukatuta, baimena duten ikastetxe edo entitateek baremoa aplikatuko dute ebazpen honen 6. oinarrian ezarritakoari jarraikiz. Horretarako, ondoko prozedura honi jarraikiko zaio:
a) Eskola Kontseiluak edo horretarako eratzen den batzorde delegatuak onartuen eta baztertuen behin-behineko zerrendak onetsiko ditu. Behin-behineko zerrenda horiek jendaurrean paratuko dira, eskatzaileen puntuazioa adierazita.
b) Ezarrita dagoen epean (ekainaren 28an eta 29an) aurkezten diren erreklamazioak ebatzi ondoren, matrikulazio epea irekiko da, 8. oinarrian aipatzen diren egunetan.
c) Uztailaren 18an, 19an eta 20an, hasieran eman eta interesdunek hartu ez dituzten tokiak Eskola Kontseiluak edo aipatu batzorde delegatuak banatzen ahalko ditu, kontuan harturik hautaturiko aukera guztiak, eskatzaileek adierazitako hurrenkeran.
d) Prozesua erabat bukatutakoan, onartuen eta baztertuen behin betiko zerrendak eta azken horien eskaera espedienteak igorriko zaizkio Eskolatze Batzordeari, 2007ko uztailaren 27a baino lehen.
10. Agiri horiek jaso eta gero, Eskolatze Batzordeak zilegi izanen du eskolatu ez diren ikasleen eskaerak beste ikastetxe batzuetara igortzea, batzordeak ezartzen duen moduan eskolatzeko.
11. Tuterako "El Castillo" lantegi-eskolak, Ilundaingo "Haritz-Berri" baserri-eskolak, Iruñeko "Etxabakoitz" lantegi-eskolak eta Berriozarko "Lantxotegi" lantegi-eskolak, lanbide hastapeneko programa egokituak eta oinarrizkoak emateko ituna baitute Hezkuntza Departamentuarekin eta Gizarte Ongizate, Kirol eta Gazteria Departamentuarekin, matrikulazio prozesuan lehentasuna emanen diete Nafarroako Gizarte Ongizatearen Institutuak egiten dituen programa eta ekintzetatik heldu diren gazteei.
12. Lanbide hastapeneko programetan (lanbide lantegiak) tokia lortzen dutenek ebazpen honen 8. eta 9. oinarrietan ezarritako epeetan egin beharko dute matrikula, 5. eranskineko matrikula orriaren eredua erabiliz.
Lanbide hastapen bereziko programak
13. Derrigorrezko Bigarren Hezkuntza egin eta adimeneko ezgaitasunak dituzten ikasleak lanbide hastapen bereziko programetan (LHBP) sartzeko jarraibideak:
1. LHBP bat egin dezaketen ikasleek, CREENAn eginen dute aurreinskripzioa, "Hezkuntza premia bereziak dituzten ikasleak eskolatzeko informazioa eta orientabideak. 2006-07 ikasturtea" dokumentuan ezartzen diren epeetan eta moduan.
2. Ikaspostuak esleitzen zaizkien zentroetako aurreinskripzioak CREENAko Psikikoen arduradunak eginen ditu eta, bere jarduketa esparruan, Tuterako CREENAko taldeko orientatzaileak.
3. Ikaspostua berretsitakoan, familiek zuzenean eginen dute matrikula zentroan, guztientzat ezarritako epeetan.
4. Programa baterako aurreinskripzioek ekainaren 21eko 233/1999 Foru Dekretuko V. kapituluko 14. artikuluan ezarritako ratioa gainditzen badute, irizpide hauek izanen dira ikasleen hautapenerako:
a) Derrigorrezko hezkuntzatik zuzenean etorritako ikasleak.
a.1) Oinarrizko Hezkuntza egina duten ikasleak.
a.2) Adimen ezgaitasuna dela-eta Derrigorrezko Bigarren Hezkuntza curriculum egokitzapen nabarmenekin egina duten ikasleak.
b) Ikasle deseskolatuak.
c) Eskatzailearen datuak; adinik handienekoei lehentasuna emanen zaie.
14. Salbuespenez, ikasle batek utz dezake LHBP bat egin gabe beste batean inskribitzeko, bere derrigorrezko hezkuntzaren bukaera urtean ez baldin badago beraren premia eta berezitasunetara egokitzen den programarik, baldin eta Hezkuntza Premia Berezien Atalak baimena aldez aurretik emana badu. Lehentxeago aipatutako irizpideak ez dira kontuan hartuko kasu horretan.
15. Salbuespenez, LHBP bat bukatua duen ikasle batek eskatzen ahal du beste ikasturte batez edo biz programa berean jarraitzea, honako beharkizun hauek betetzen baditu:
a) Ezarritako gutxieneko helburuak lortuak ez izatea eta hurrengo ikasturtean lortzen ahal dituela aurreikustea.
b) 21 urte baino gehiago ez izatea.
c) Ikastetxeak eskatzea, gurasoen oniritziarekin, eta horrekin batera aurkeztea bai Zuzendaritzak bai Orientazio Departamentuak emandako txostenak.
16. Nafarroako Gobernuko Hezkuntza Departamentuak, Hezkuntza Premia Berezien Atalaren bitartez, eskaera horren egokitasuna aztertuko du, eta bere esku izanen du onartzea edo uko egitea.
17. Oro har LHBPko ikasleen kopurua 6tik 12 bitartekoa izanen bada ere, kasu batzuetan eta Lanbide Hastapeneko Programek Nafarroan izanen duten funtzionamendua arautzen duen abuztuaren 21eko 834/2006 Ebazpena oinarri harturik, zilegi da "ikasle kopurua txikiagoa izatea programa batzuetan". Murrizketa hori ikasleen premia bereziek, testuinguruaren inguruabarrek, bitarteko jakin batzuen erabileratik sortutako arrisku faktoreek, lantegietako lan tekniken konplexutasunak, eta abar egiten dute zilegi. Horregatik guztiagatik, horrelako ezaugarriak dituzten LHBPetan ikasle ratioa 6/10 bihur daiteke. Ikasmaila desberdinetako ikasleak biltzen dituzten programetan (landa-inguruneetako maila anitzekoak, Iruñeko Agroforestal BHI eta Tuterako LHI) zilegi dira 4/8 ikasleko ratioak.
2. Ebazpen honetan arautzen ez diren gainerako arazoak ebazteko, Hezkuntza kontseilariaren apirilaren 2ko 31/2007 Foru Dekretuan eta apirilaren 23ko 33/2007 Foru Aginduan ezarritakoari jarraikiko zaio.
3. Ebazpen honen aurka gora jotzeko errekurtsoa jar daiteke, Hezkuntza Departamentuko kontseilariari zuzendua, argitaratu eta, biharamunetik, hilabeteko epean.
4. Ebazpen hau Nafarroako ALDIZKARI OFIZIALera igortzea, argitara dadin.
5. Ebazpen hau igortzea Lanbide Heziketaren Zerbitzuari, Eskola Antolamendu eta Berriztapenerako Zerbitzuari, Zerbitzuak Ikuskatzeko eta Ikuskapen Teknikorako Zerbitzuari, Ikastetxeen eta Ikasketetarako Laguntzen Zerbitzuari, Dibertsitate, Kultura-aniztasun eta Inmigraziorako Zerbitzuari, Lanbide Heziketa Berriztatu eta Garatzeko Atalari, Hezkuntza Premia Berezien Atalari, eta ikastetxe eta erakunde interesdunei.
Iruñean, 2007ko maiatzaren 29an._Eskola eta Lanbide Irakaskuntzaren zuzendari nagusia, Fermín Villanueva Ferreras.
1. ERANSKINA
2. ERANSKINA
3. ERANSKINA
4. ERANSKINA
6.3 oinarria ("Bizilekuaren hurbiltasuna")
aplikatzeko kontuan hartu beharreko
eskola alde eta barrutiak
ESKOLA ALDEAK:
A aldea (Sakana): 1. barrutia.
B aldea (Baztan): 2., 7. eta 11. barrutiak.
C aldea (Lizarra): 4. barrutia.
D aldea (Martzilla-Azkoien): 5. barrutia.
E aldea (Lodosa-San Adrian): 8. barrutia.
F aldea (Tafalla): 9. barrutia.
G aldea (Tutera-Corella): 3. eta 10. barrutiak.
H aldea (Irunberri-Zangoza): 6. barrutia.
I aldea (Iruña): 7., 11., 12., 13., 14., 15., 16., 17. eta 18. barrutiak.
ESKOLA BARRUTIAK:
Eskola barrutiak martxoaren 13an eman eta apirilaren 8ko Nafarroako ALDIZKARI OFIZIALean (43. zk.) argitaratutako 150/1996 Foru Dekretuaren 1. eranskinean (Hezkuntzako eskualdeak) ezarri ziren.
5. ERANSKINA
Iragarkiaren kodea: F0709150
