73. ALDIZKARIA - 2007ko ekainaren 13a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

1472/2007 EBAZPENA, maiatzaren 23koa, Industria eta Merkataritza zuzendari nagusiak emana, Pirinioetako Lan Komunitatearen lankidetza esparruan ikerkuntza eta garapen teknologikorako dirulaguntzak eskuratzeko 2007ko deialdia onesten duena.

Pirinioetako Lan Komunitatea _PLK_ erkidego hauek osatzen dute: Frantziako Estatuan, Akitania, Languedoc-Roussillon eta Midi-Pyrénées eskualdeak; Espainiako Estatuan, Aragoi, Katalunia, Nafarroa eta Euskadi autonomia erkidegoak, eta Andorrako Estatua.

Guztira hamazazpi milioi pertsonatik goiti bizi da PLKn eta, bertan dauden estatuen eta Europar Batasunaren laguntzarekin, erkidego horien garapen ekonomikoa bultzatu nahi du.

Ikerkuntza antolatuak produkzio sistemaren eta bizi kalitatearen hobekuntzarako duen garrantziaren jakitun izanik, PLKren borondatea da ikerkuntza eta garapen teknologikoaren ekintza komunen garapena ahalbidetuko duten jarduketei lehentasuna ematea, erkidego horietako enpresa eta zentroen arteko lankidetza proiektuak bultzatu eta gaur egun I+Gan eskura dagoen baliabide kopuru zabala elkarri eskain diezaiotela sustatzearren.

Testuinguru horretan, Zientzia-Teknologia-Enpresa sistema bultzatu nahi da Pirinioetako erkidego horien esparruan I+Gko polo garrantzitsua bultzatzeko eta, zehazkiago, enpresa ttiki eta ertainei (PYMES) teknologia eskualdatzeko eta Europako funtsak finantzatzen ahal dituzten jarduerak abiarazteko.

Horretarako, beste ekintza-lerro batzuen artean, PLKko kolektibitate kideek, nork bere lurraldean, lankidetza programa komunak aldi berean eta era koordinatuan bultzatzeko adostasuna lortu dute.

2007ko ekitaldirako Nafarroako Aurrekontu Orokorrei buruzko abenduaren 27ko 17/2006 Foru Legearen 30.1 artikuluak ahalmena ematen dio Industria eta Teknologia, Merkataritza eta Lan Departamentuari gastu-konpromisoak hartzeko, kasuko ekitaldiaren ondorengo aurrekontuen kargura, baldin eta urtebeterako konpromiso horiek gainditzen ez badituzte aurreko ekitaldian xede horretarako finkatzen diren zenbatekoak, hau da, eskualdeez gaindiko lankidetza proiektuetarako zenbatekoak.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legeko 22.1 artikuluak ematen dizkidan eskurantzak erabiliz.

EBATZI DUT:

1. Pirinioetako Lan Komunitatearen lankidetza esparruan Ikerkuntza eta Garapen Teknologikorako dirulaguntzak eskuratzeko 2007. urteko deialdia onestea.

2. Dirulaguntzak emateko arauak onestea. Arau horiek ebazpen honen eranskinetan ageri dira.

3. 2008. urtean 200.000 euro gastatzeko baimena ematea, 2009. urtean 100.000 euro eta 2010. urtean 100.000 euro. 2007ko aurrekontuen 840001 81200 7709 467304 kontusailaren antzeko kontusailen bizkar ebazpen honen konpromisoei aurre egiteko, deusetan ukatu gabe, aurrekontuetan dirurik izanez gero, diru zenbateko horiek handitzeko aukera.

4. Ebazpen hau eta bere eranskinak Nafarroako ALDIZKARI OFIZIALean argitaratzea.

Ebazpen honek ez dio administrazio bideari amaiera ematen. Espedientean interesa dutenek gora jotzeko errekurtsoa jar dezakete ebazpen honen kontra, Industria eta Teknologia, Merkataritza eta Lan kontseilariari zuzendua, argitara eman eta biharamunetik hasita hilabeteko epean.

Administrazio Publikoek administrazioarekiko auzi-errekurtsoa jartzen ahalko dute, Nafarroako Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epeetan.

Iruñean, 2007ko maiatzaren 23an._Industria eta Merkataritza zuzendari nagusia, Enrique Díaz Moreno.

1. ERANSKINA

Pirinioetako Lan Komunitatearen (PLK) lankidetza esparruan ikerkuntza eta garapen teknologikorako dirulaguntzak eskuratzeko 2007ko deialdiaren arauak

1. oinarria._Xedea.

Ikerketa antolatuak produkzio sistemaren eta bizi kalitatearen hobekuntzarako duen garrantziaren jakitun izanik, PLKren borondatea da ikerketa eta garapen teknologikoaren ekintza komunen garapena ahalbidetuko duten jarduketei lehentasuna ematea, erkidego horietako enpresa eta zentroen arteko lankidetza proiektuetan bultzatu eta gaur egun I+Gan eskura dagoen baliabide kopuru zabala elkarri truka diezaioten sustatzearren.

Testuinguru horretan, Zientzia-Teknologia-Enpresa sistema bultzatu nahi da Pirinioetako erkidego horien esparruan I+Gko polo garrantzitsua bultzatzeko eta, zehazkiago, enpresa ttiki eta ertainei (PYMES) teknologia eskualdatzeko eta Europako funtsak finantzatzen ahal dituzten jarduerak abiarazteko.

Dirulaguntzak hurrengo mota hauetako jarduketa baterako izanen dira:

A) 'Sare tematikoak garatu eta sendotzea"

B) "Ikertzaileen eskualdearteko mugikortasuna"

C) "Ikerketa eta Garapen Teknologikorako Lankidetza Proiektuak _I+G_"

Ondoko gai hauek izanen dute lehentasuna:

_Berariazko ikerkuntzak Pirinioen testuinguruan oinarrituak.

_PLKrendako interes komunekoak diren beste gai batzuen gaineko ikerkuntzak.

_EBaren 6. eta 7. Programa Markoen lehentasunezko alorrak.

Programak edo jarduerak arau hauetan ezarritakoari eta 2., 3. eta 4. eranskinetan bildutako berariazko baldintzei atxikiko zaizkie, hurrenez hurren.

2. oinarria._Dirulaguntzen zenbatekoa eta dirulaguntzaren xede izan daitezkeen gastuak.

1. Jarduera motaren araberako zenbatekoa ondoko hau izanen da:

_A) motako jarduerak ("Sare tematikoak garatu eta sendotzea"):

Dirulaguntza %100era iristen ahal da eta, gehienez ere, 6.000 euro emanen dira jarduerak bi urtean finantzatzeko.

_B) motako jarduerak ("Ikertzaileen eskualdearteko mugikortasuna"):

Dirulaguntza %100era iristen ahal da eta, gehienez ere, 6.000 euro emanen dira jarduerak 6 hilabetean finantzatzeko.

Salbuespen gisa, zenbatekoa handiagoa izaten ahal da, Pirinioetako Lan Komunitatearen Prestakuntza eta Garapen Teknologikorako Batzordeak proposaturik.

_C) motako jarduerak ("Ikerkuntza eta Garapen Teknologikorako Lankidetza Proiektuak _I+G_"):

Gastuen %70era iristen ahal da dirulaguntza.

2. Bakar-bakarrik lagunduko dira jarduera gauzatzeari hertsiki lotutako gastuak, eta bidaien kasuan, PLK-ko lurraldeetara mugatuko dira.

3. oinarria._Onuradunek bete beharreko baldintzak.

1. PLK-k dituen kolektibitateen arabera, dirulaguntzen onuradun honako hauek izan daitezke:

a) Frantziako eskualdeetan: PLKren lurraldeetan dauden erakunde unibertsitarioak eta ikerkuntzarako erakunde publikoak. Enpresa frantsesek parte hartzen ahal dute proiektu batean, baina deialdi honetan ez dira laguntza ekonomikoen onuradun izaten ahal.

b) Espainiako autonomia erkidegoetan: PLKren lurraldeetan dauden erakunde unibertsitarioak, ikerkuntza eta teknologia zentroak eta enpresak.

Nafarroaren kasuan, bertako erakunde unibertsitarioak, ikerkuntza eta teknologia zentroak eta enpresak izan daitezke dirulaguntzen onuradun. Onuradunak eskabidea sinatzen duten erakunde eta enpresak bakarrik izanen dira.

c) Andorrako Estatuan onuradun izan daitezke erakunde unibertsita- rioak, erakunde publikoak, ikerkuntza eta teknologia zentroak eta enpresak.

2. Halaber, eskatzaileek Dirulaguntzei buruzko azaroaren 9ko 11/2005 Foru Legeko 13. artikuluan aipatzen diren orotariko betebeharrak bete beharko dituzte. Hori "Erantzukizuneko aitorpena" izeneko inprimakian eginiko adierazpenaren bidez frogatuko da. Adierazpena http://www.navarra.es helbidean eskuratzen ahal da (bilatu "Pirinioetako Lan Komunitatearen lankidetza esparruan ikerkuntza eta garapen teknologikorako laguntzak" atalean).

Entitate publikoak betebehar orokor horietatik salbuetsiak daude.

4. oinarria._Eskaeren aurkezpena eta eskaturiko agiriak.

1. Eskaerak aurkezteko epea 28 egunekoa izanen da, deialdia Nafarroako ALDIZKARI OFIZIALean argitaratu eta biharamunetik hasita.

Eskaerak aurkeztuko dira Toki Administrazioko Departamentuko erregistroan (Iruñeko Tomás Caballero parkea 1), edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aurreikusitako lekuetako batean.

Eskaera posta bulego batean aurkezten bada, gutunazal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira.

2. Eskaerak prestatu diren ereduen araberakoak izanen dira eta interneten eskuratzen ahal dira, http://www.navarra.es helbidean (bilatu "Pirinioetako Lan Komunitatearen lankidetza esparruan ikerketa eta garapen teknologikorako laguntzak" atalean).

Parte-hartzaileek koordinatzaile orokor bat izendatu beharko dute, bai eta inplikatu den PLKren lurralde bakoitzeko eskabidearen arduradun bana ere. Kordinatzaile nagusiak lankidetzako programaren edo jardueraren ardura izanen du PLKren Prestakuntza eta Garapen Teknologikorako Batzordean eta lurraldeko arduradunak bere Administrazioan.

Koordinatzaile nagusiaren ardurapean, bazkideek proposamen bateratu bat prestatuko dute, lankidetzako proiektuaren edo jardueraren gaineko informazio guztia bilduko duena.

Lurraldeko arduradun bakoitzak proposamen bateratu hori bere eskualdeko erakunde eskudunean aurkeztuko du, toki bakoitzeko arauak betez. Ekintza berean bi bazkide nafarrek edo gehiagok parte-hartzen badute, Nafarroako arduradunak bazkide guztien izenean eskabide bakarra aurkeztu beharko du.

5. oinarria._Eskaerak ebaluatzeko irizpideak.

Dirulaguntza PLK-k paratutako balorazio irizpide hauei jarraikiz emanen da:

a) Gaien lehentasuna.

b) Kalitatea eta interes zientifiko-teknikoa.

c) Emaitzak jakinarazteko potentziala eta interes sozioekonomikoa.

d) Enpresa edo eragile sozioekonomikoen partehartzea.

e) Parte-hartzea sarean (parte-hartzaileen kopurua).

f) Proiektuak (nazionalak eta europarrak) aurkezteko proposamenak.

g) PLKrendako garrantzitsuak diren pertsonak eta zentroak inplikatzea, PLKz kanpoko eskualdetakoak eta zentroetakoak badira.

6. oinarria._Hautaketa prozedura eta ebazteko organo eskudunak eta epeak.

1. Eskabideak jasotakoan, Berriztapen eta Teknologia Zerbitzuak, bai zuzenean bai egoki jotzen dituen ebaluazio tresnen bitartez, ebaluazio zientifiko-teknikoa eginen du eta, ondotik, behin-behineko proposamena aurkeztuko du. Proposamenean kalitateko eta interes zientifiko-teknikoko gutxieneko maiala gainditu duten eskabideak bilduko dira.

2. Hori egin eta gero, lurraldeetako administrazioek emandako behin-behineko proposamenak PLKren Prestakuntza eta Garapen Teknologikorako Batzordeak aztertu eta puntuatuko ditu eskabideak, kontsentsu bidez, 5. arauan ezarritako irizpideei eta batzordeak paratutako puntuazio baremoei eutsiz.

Hala behar izanez gero, beharrezko jotzen diren agiri osagarriak eskatzen ahalko dira.

PLKren Prestakuntza eta Garapen Teknologikorako Batzordeak behin betiko eskabideen zerrenda prestatu eta ondoan, Berriztapen eta Teknologia Zerbitzuak ebazpen proposamena igorriko dio organo eskudunari eta adieraziko du onuradunek dirulaguntza jasotzeko baldintza guztiak betetzen dituztela.

3. Dirulaguntzak emateari buruz ebazteko eskumena Industria eta Merkataritza zuzendari nagusiari dagokio. Ebazpena sei hilabeteko epean eman eta jakinarazi beharko du, eskabideak aurkezteko epea bukatzen denetik hasita.

Epealdi horretan eskatzaileari berariazko ebazpenik jakinarazi ezean, eskabideak administrazio isiltasunaren bidez onartu direla ulertuko da.

Aurkeztutako eskaeraren berariazko edo ustezko ezespenaren aurka interesdunek, administrazio publikoek izan ezik, zilegi izanen dute gora jotzeko errekurtsoa jartzea, Industria eta Teknologia, Merkataritza eta Lan kontseilariari zuzendua, administrazio prozedura erkideari buruzko legeriari jarraikiz.

Administrazio publikoek administrazioarekiko auzi-errekurtsoa jartzen ahalko dute, eskumena duen ordena jurisdikzionalari zuzendua. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epean.

Deialdi honen konpromiso ekonomikoak aurrera ateratzeko hasiera batean paratu diren diru zenbatekoak handitzen ahalko dira baldin eta ekitaldiko aurrekontuetan diru erabilgarririk badago.

7. oinarria._Justifikazioa eta dirulaguntzaren ordainketa.

1. Izandako gastuak eta ordainketak gauzatu, bukatu eta egiaztatzeko urteko txostenak "Jarraipen Tekniko Ekonomikoaren Informazioa" izeneko inprimakien ereduari lotuko zaizkio. Inprimakiak interneten eskuratzen ahal dira http://www.navarra.es helbidean (bilatu "Pirinioetako Lan Komunitatearen lankidetza esparruan ikerkuntza eta garapen teknologikorako laguntzak" atalean).

Aurrekontuetan jarritakoa baino gastu gutxiago egiten bada, laguntzan diru gutxiago jasoko da; kontrakoa gertatzen bada, alegia, uste baino gehiago gastatzen bada, ez da diru gehiago jasoko.

Egiaztagiriak azterturik, Berrikuntza eta Teknologia Zerbitzuak pagatzeko ebazpenaren proposamena igorriko dio Industria eta Merkataritza zuzendari nagusiari. Horrekin batera, onuradunek dirulaguntza kobratzeko eskubidea sortzen duten eginbeharrak bete dituztela frogatzen duen txostena aurkeztuko da.

2. Onuraduna zein den begiraturik, dirulaguntza ondotik heldu den moduan ordainduko da:

2.1. Onuradunak erakunde unibertsitarioak edo ikerkuntza eta teknologia zentroak izan eta 1. arauan ezarritako jarduketa motei erreparatzen baldin bazaie:

2.1.a) A) eta B) motako jarduketetarako:

Dirulaguntza bi epetan ordainduko da: lehenbizikoa, zenbateko osoaren %50 gaindituko ez duena, dirulaguntza emanen dela erabakitzean, eta gainerakoa, jarduera bukatu eta gero, jarduketan izandako gastuen agiriak eta egindako lanaren gaineko txostena aurkeztu ondotik.

2.1.b) C) motako jarduketetarako:

Dirulaguntza epe batzuetan ordainduko da: lehenbizikoa, zenbateko osoaren %50 gaindituko ez duena, dirulaguntza emanen dela erabakitzean, eta gainerakoa urteka, programak dituen urteak bete arte, urte bakoitzean izandako gastuen agiriak eta egindako lanaren gaineko txostena aurkeztu ondotik.

2.2. Onuradunak enpresak baldin badira:

2.2.a) B) motako jarduketetarako:

Dirulaguntza epe batean ordainduko da, jarduera bukatu eta gero, jarduketan izandako gastuen agiriak eta egindako lanaren gaineko txostena aurkeztu ondotik.

2.2.b) A) eta C) motako jarduketetarako:

Dirulaguntza urteka ordainduko da, programak dituen urteak bete arte, urte bakoitzean izandako gastuen agiriak eta egindako lanaren gaineko txostena aurkeztu ondotik.

Behar bezala arrazoitu eta justifikatutako kasuetan, jarduketak bukatu gabe daudela ere, emandako dirulaguntza oso-osorik edo partzialki jaso daiteke, emandako dirulaguntzaren adinako banku-abala aldez aurretik aurkeztuz gero.

8. oinarria._Onuradunen betebeharrak.

1. Dirulaguntzaren onuradunek honako betebehar hauek izanen dituzte:

a) Onuradunak jarduera berberetarako eskatu edo jaso dituen dirulaguntza guztien berri eman beharko du eta, horretarako, arau hauen 3. eranskinean dagoen "Erantzukizunpeko adierazpena" erabiliko du.

b) Deialdi honen babespean finantzatutako proiektuetan oinarritzen den edozein argitalpen edo komunikaziok PLKren eremuko eskualde parte-hartzaileengandik jasotako finantzazioa aipatu beharko du, bai eta Europako Funtsen kofinantzaketa, halakorik izanez gero. Aipamen hori beste parte-hartzaileek egindakoa bera izanen da.

c) Onuradunek ondoko jarduketak egiteko konpromisoa hartzen dute:

_Bakoitzari dagokion eskualdeko administrazioari lankidetzako programa edo jarduera gauzatu dela frogatzen duten txostenak eta haien bukaerako memoria aurkeztu beharko dizkio.

_Administrazioaren beraren edo PLKren Prestakuntza eta Garapen Teknologikorako Batzordearen aurrean agertu eta/edo horiek eskatzen ahal dizkieten argibide guztiak emanen dituzte.

_PLK-k antolatuko dituen bileretan eta ebaluazioetan parte hartuko dute, egindako jarduerak aurkezteko.

d) Programa edo jarduera bukatu eta sei hilabete baino lehen koordinatzaile nagusiak bukaerako memoria aurkeztuko du eta hartan agertuko ditu talde parte-hartzaile bakoitzak erdietsi dituen emaitzak eta helburuak, eta, argitaratzeko modukoa balitz, laburpen exekutibo bat.

Erdietsitako emaitzak, osorik edo zatika, liburuetan, monografietan, artikuluetan, doktorego tesietan, lizentzia tesinetan, kongresuetako komunikazioetan, patenteetan, kontratuetan, erabilera ereduetan eta abarretan bildu baldin badira, haien kopia bat ere ekarri beharko da.

2. Halaber, onuradunek Dirulaguntzei buruzko Foru Legearen 9. artikuluan ezarritako baldintza orokorrak bete beharko dituzte.

Zerga arloko eta Gizarte Segurantzarekiko betebeharrak eguneratuak dituela egiaztatzeko, 3. eranskinean aipatzen den "Erantzukizuneko aitorpenean" baimena eman beharko zaio departamentuari behar diren datuak kontsulta ditzan, laguntza emateko ebazpenaren proposamena egiten den unean onuradunak zerga arloko eta Gizarte Segurantzarekiko zorrik ez duela egiaztatzeko.

3. Dirulaguntza emateko ebazpenean, arau hauetan edo Dirulaguntzei buruzko Foru Legean ezarritako betebeharrak osorik bete ezik, onartutako dirulaguntza kobratzeko eskubidea galduko da edo diru hori itzuli egin beharko da, foru lege hartako 35. artikuluan xedatutakoarekin bat.

Halaber, aurreko betebeharrak hein batean bete ezik, emandako dirulaguntzaren zenbatekoa berriro ere zehaztuko da, proportzionaltasun printzipioari jarraikiz edo, hala badagokio, dagokion zenbatekoa itzuliko.

9. oinarria._Dirulaguntzen bateragarritasuna.

Deialdi honen dirulaguntzak bateragarriak dira Foru Komunitateko Administrazioak, beste administrazio publiko batzuek, beste erakunde publiko nahiz pribatuek edo Espainiako nahiz atzerriko partikularrek emandako beste laguntza batzuekin.

Aurrekoa deusetan galarazi gabe, jasotako laguntza guztien baturak ez du onuradunak gauzatu nahi duen jardueraren kostua gaindituko.

Betiere, dirulaguntzak "Ikerkuntza eta garapenaren arloan, Estatuek ematen dituzten laguntzen Europako Elkartearen Markoan" (E.B.ren Egunkari Ofiziala, 2006-12-30ekoa) ezarritakoa errespetatuko du.

10. oinarria._Errekurtsoak.

Arau hauen kontra interesdunek, administrazio publikoek izan ezik, gora jotzeko errekurtsoa paratzen ahalko dute, Industria eta Teknologia, Merkataritza eta Lan kontseilariari zuzendua, hilabeteko epean, argitaratu eta biharamunetik hasita.

Administrazio publikoek administrazioarekiko auzi-errekurtsoa paratzen ahal dute eskumena duen ordena jurisdikzionalari zuzendua, honako hau argitaratu eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epeetan.

11. oinarria._Emandako dirulaguntzen publizitatea.

Dirulaguntzei buruzko Foru Legearen 15. artikuluan xedatutakoarekin bat, Berrikuntza eta Teknologia Zerbitzuak Industria eta Teknologia, Merkataritza eta Lan Departamentuaren webgunean jendaurrean jarriko ditu emandako dirulaguntzak, ondokoak zehaztuta: deialdia, laguntza zein programari eta aurrekontu-kredituri egotziko zaion, onuradunak, emandako diru-kopurua eta dirulaguntzaren helburua.

2. ERANSKINA

Sare tematikoak garatu eta sendotzeko programa

1._Programaren xedea.

Programa honen berariazko helburua da eskualdeen arteko sare tematikoak sustatzea, Pirinioetako Lan Komunitateko (PLK) kide diren erkidegoetako ikerkuntza eta teknologia zentroetan antzeko gaietan edo elkarren osagarri diren arloetan ari diren ikerlari taldeek osatuak, horrela komunitate zientifikoko kideen arteko ezagutza trukeak bultzatu, bailabide teknologikoak partekatu, eskualdeen arteko lankidetza sendotu, elkarrekin burututako ikerkuntza programak garatu, ikerkuntza proiektu europarrak prestatu eta teknologia sektore produktiboen esku jartzeko.

2._Programaren ezaugarriak.

Orobat, eskualdeen arteko sare tematikoetako jarduerak finantzatzen ahalko dira, PLK-ko hiru eskualde ezberdinetako hiru ikertzaile taldek, gutxienez, osatzen badituzte sare horiek. Beharrezkoa izanen da proposamena mugaz gaindikoa izatea ere, hau da, gutxienez bi estatu desberdinetako ikerketa taldeen parte hartzea izatea.

Sare tematikoak koordinatzaile nagusi bat eta parte hartzen duen eskualde bakoitzeko arduradun bana izanen ditu. Koordinatzaile nagusia bere eskualdeko arduraduna ere izanen da.

Dirulaguntzaren gehieneko zenbatekoa 6.000 eurokoa izanen da parte hartzen duen eskualde bakoitzeko, jarduerak bi urtez finantzatzen laguntzeko.

Eskatzen diren dirulaguntzak, batez ere, honako jarduera hauek finantzatzeko erabiliko dira:

a) Izen handiko zientzialariek sarean parte hartzen duten ikerkuntza taldeei bisita laburrak egitea.

b) PLKren lurraldeetan sareko kideen arteko bilerak antolatzea.

c) Nazioarteko mintegiak edo PLK-ko enpresariei zuzendutako mintegiak antolatzea.

d) Sarean inplikaturik dauden ikerkuntza taldeen artean teknologia trukatzea edo burututako ikerkuntzaren emaitzak hedatu eta balorizatzea.

e) Sareko ikertzaileen egonaldiak PLK-ko eta sareko beste eskualde bateko laborategietako batean.

f) Sareko jarduerak ezagutarazteko argitalpenak.

g) Datu baseak gorpuzten laguntzea.

Dirulaguntza hauek ezin izanen dira erabili, inolaz ere, ikerkuntza proiektuak, langileri gastuak zein laborategiko materialaren edo ekipamendu txikiko gauzen erosketa finantzatzeko.

3._Eskaerak.

Eskaerak lurralde bakoitzeko arduradunak aurkeztu beharko ditu, bere eskualdeko sareko kide guztien izenean, horretarako diseinatu den eredua erabiliz. Eskaeran honako hau agertu beharko dute, argi eta garbi:

a) Koordinatzaile nagusiaren eta lurraldeetako arduradunen curriculum vitae-a.

b) Lortu nahi diren helburuen memoria eta, ikuspuntu zientifiko, tekniko eta akademikotik begiratuta, sarea eratzeak ekarriko lukeen balio erantsiaren balorazioa, jarduerari begira eta taldeek bakarka eginen luketen lana aintzat hartuz.

c) Sareko helburuari buruz ikerkuntza taldeek azken 3 urteotan burutu dituzten lan garrantzitsuenen deskribapena eta horien ondorioz kaleratu diren argitalpenena.

d) Proposatu diren jardueren deskribapena.

e) Programaren aurrekontu orokorra eta Nafarroako talde parte-hartzaile bakoitzaren aurrekontu xehatua. Nafarroako taldeak batzuk baldin badira, horien guztien aurrekontu orokorra ere aurkeztu beharko da.

4._Informazioa eman beharra.

Dirulaguntzen onuradunek, jarduketa bukatzen den egunetik, gehienez ere, sei hilabetean, ondoko agiriak igorri beharko dizkiote Industria eta Merkataritza Zuzendaritza Nagusiari:

a) Bukaerako txostena, lortutako emaitzak eta izandako desbideraketak zehaztuta.

b) Gastuen justifikazioa.

c) Egonaldirik izan baldin bada: Zentro hartzailearen ziurtagiria, non egiaztatuko baita egonaldia egin dela.

3. ERANSKINA

Ikertzaileen eskualdearteko mugigarritasunerako programa

1._Programaren xedea.

Programa honen berariazko helburua da Pirinioetako Lan Komunitateko (PLK) kide diren erkidegoetako ikerkuntza eta teknologia zentroetan antzeko gaietan edo elkarren osagarri diren arloetan ari diren ikerlariei bide ematea eskualdeen arteko trukaketak egin ditzaten, komunitate zientifikoko kideen arteko trukeak bultzatu, eskualdeen arteko lankidetza sendotu, elkarrekin burututako ikerkuntza programak garatu eta teknologia sektore produktiboen esku jartzeko.

2._Programaren ezaugarriak.

Pirinioetako Lan Komunitateko kide diren ikerlari nafarren bidaiak eta egonaldiak finantzatzen ahalko dira jarduera PLK-ko beste eskualde bateko laborategietan egiten bada. Beharrezkoa izanen da proposamena mugaz gaindikoa izatea, hau da, jatorri eta destino tokiak bi estatu desberdinetakoak izatea.

Egonaldiak hilabete bat eta sei hilabete bitarteko iraupena izanen du eta 2008ko abenduaren 31 baino lehen bukatu beharko du.

Dirulaguntzaren zenbatekoa lekuaren eta ikerlariak lantokian betetzen duen postuaren arabera zehaztuko da. Gehienez ere, 6.000 eurokoa izanen da. Salbuespen gisa, zenbatekoa handiagoa izaten ahal da, Pirinioetako Lan Komunitatearen Prestakuntza eta Garapen Teknologikorako Batzordeak proposaturik.

Dirulaguntza hauek ezin izanen dira erabili, inolaz ere, ikerkuntza proiektuak, langileri gastuak zein laborategiko materialaren edo ekipamendu txikiko gauzen erosketa finantzatzeko.

3._Eskaerak.

Eskaerak horretarako propio prestatu den eredua erabilita aurkeztu behar dira. Eskabidean honako hau agertu beharko dute, argi eta garbi:

a) Lortu nahi diren helburuak eta, ikuspuntu zientifiko, tekniko eta akademikotik begiratuta, mugigarritasunerako proposamenak ekarriko lukeen balio erantsiaren balorazioa.

b) Egonaldian zehar egin gogo diren jardueren plan zehatza eta aurrekontua.

c) Mugigarritasunerako proposamenean parte hartzen duten zentroek edo erakundeek sinatutako jarduera programa onartzen dela adierazten duen agiria.

d) Erakunde bakoitzean mugigarritasunaren ardura duten ikerlarien curricula vitarum-ak.

e) Mugigarritasun horretan zuzenean parte hartuko duten ikerlarien curricula vitarum-ak. Doktoregoa ez duten izangaien kasuan ziurtagiri akademiko ofiziala honako hauek zehatz-mehatz adierazirik: ikasgaietan erdietsitako kalifikazioak eta ikasgai horiek lizentziatura edo ingeniaritzaren programa osatzen duten guztiak direla.

f) Zentro parte-hartzaileek azken 3 urteotan burutu dituzten lan garrantzitsuenen deskribapena eta horien ondorioz kaleratu diren argitalpenena. Hauek egonaldiaren xedeari eta proposatutako gaiaren eta lankidetzaren egokitasunari buruzkoak izanen dira.

g) Mugigarritasuna eskatzen duten proiektuak.

h) Eskualde, erakunde edo talde hartzailearen konpromiso ekonomikoa. Bertan azalduko dira finantzatuko den zenbatekoa eta kontzeptuak. Bestela, partaide den eskualdeko ikerlariak helburu horretarako finantzabidea eskatu duela frogatzen duen agiria.

i) Eskatzaileak erakunde publiko edo pribatuei eskatutako finantzabideak edo berezko bestelako finantzabideak izanez gero, adierazpen batean jaso beharko ditu.

4._Informazioa eman beharra.

Dirulaguntzen onuradunek, trukaketa bukatu eta, gehienez ere, sei hilabetean, ondoko agiriak igorri beharko dizkiote Industria eta Merkataritza Zuzendaritza Nagusiari:

a) Bukaerako txostena, lortutako emaitzak eta izandako desbideraketak zehaztuta.

b) Zentro hartzailearen ziurtagiria, non egiaztatuko baita egonaldia egin dela.

c) Gastuen justifikazioa.

4. ERANSKINA

Lankidetza proiektuen programa (I+G) ikerkuntza eta garapen teknologikoan

1._Programaren xedea.

Programa honek berariazko xede du PLK-ko erkidegoen intereseko I+G proiektuak egitea bultzatzea eta Ikerkuntzaren eta Garapenaren arloetan egun diren baliabide ugariak trukatzeko bidea erraztea. Horretarako, PLKren eremuko ikerkuntza eta teknologia zentroek produkzio sektoreei lankidetza eskaini eta teknologia eman behar diete.

2._Programaren ezaugarriak.

Eskaerak I+Gko proiektu baterako izanen dira. Bertan, gutxienez, hiru kidek hartuko dute parte, horietako bat bederen enpresen sektorekoa (teknologiaren eskualdaketa laguntzeko), PLK-ko eremu geografikoetako bi eskualde ezberdinetakoak. Beharrezkoa izanen da proposamena mugaz gaindikoa izatea, hau da, gutxienez bi estatu desberdinetako kidek parte hartzea.

Proiektuaren gehieneko iraupena bi urtekoa izanen da.

Eskatzen diren dirulaguntzak honako jarduera hauek finantzatzeko erabiliko dira:

a) Langileen lansariak.

b) Material inbentariagarria: instalazioak, ekipoak, makinak, etab. erosi eta aldatzea.

c) Proiektuan erabilitako material suntsigarria.

d) Instalazioen edo sostengu zerbitzuen erabilerak sortutako gastuak.

e) Bidaiak, PLKren lurralde barrenean.

f) Gastu txikiak: erreprografia, bulegoko materiala, etab.

Proiektuak koordinatzaile nagusi bat izanen du eta arduradun bat erkidego bakoitzeko (koordinatzaile nagusia, aldi berean, bere erkidegoko arduraduna izanen da). Koordinatzaile nagusiak behar bezala kreditaturiko curriculuma izan beharko du.

Diruz lagundu gabe gelditzen den proiektuaren zatiak ere finantzabidea beharko du izan.

3._Eskaerak.

Lurraldeko arduradun bakoitzak, bere eskualdeko parte-hartzaile guztien izenean, honako agiri hauek aurkeztu beharko ditu, horretarako prestatu den eredua erabiliz:

a) Proiektuaren koordinatzaile nagusiaren eta lurraldeetako arduradunen datu pertsonalak.

b) Koordinatzaile nagusiaren eta lurraldeetako arduradunen curriculum vitae-a.

c) Talde eskatzailearen argitalpenak eta merezimenduak azken hiru urteetan. Proposatu den ikerketa proiektuaren gainekoak soilik agertuko dira.

d) Proiektu koordinatuaren plan osoaren laburpena (2-4 orrialde).

e) Erdietsi beharreko xedeak, metodologia eta proposatu diren jarduerak eta talde bakoitzari dagokion zatiaren plangintza deskribatzea.

f) Proiektuaren aurrekontu orokorra eta Nafarroako talde bakoitzaren aurrekontu xehatua. Nafarroako taldeak batzuk baldin badira, horien guztien aurrekontu orokorra ere aurkeztu beharko da.

Eskaerak lehenbiziko aukeraketa pasatzen baldin badu, Industria eta Merkataritza Zuzendaritza Nagusiak egoki jotzen dituen agiri osagarriak eskatuko ditu.

4._Informazioa eman beharra.

Dirulaguntzen onuradunak beharturik daude ondoko dokumentazioa Industria eta Merkataritza Zuzendaritza Nagusira igortzera:

a) Proiektuaren garapena azalduko duen memoria, bai eta gauzatzerakoan sartu diren aldaketak ere, berekin dakartzaten aurrekontu ondorioak azalduz. Erdietsitako emaitzak.

b) Dirusarrera eta gastuen zehaztapena, behar diren frogagiriek lagundurik.

Informazio agiriak proiektua bukatzeko emandako epea agortu eta, gehienez ere, sei hilabetean igorri behar dira eta, gainera, laguntza ematen duen ebazpenean tarteko data bat zehazten baldin bada, data horren ondoko sei hilabeteetan aurkeztuko dira.

Iragarkiaren kodea: F0708567