I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
118/2007 FORU AGINDUA, maiatzaren 14koa, Gizarte Ongizate, Kirol eta Gazteria kontseilariak emana, familiaren eta adingabeen babesaren arloetan ikerketa proiektuetarako 2007ko deialdia onesten duena.
Gizarte Zerbitzuei buruzko abenduaren 14ko 15/2006 Foru Legeak, 38. artikuluko l) eta m) letretan, ezartzen du Gizarte Ongizate, Kirol eta Gazteria Departamentuaren eskumen direla gizarte zerbitzuen profesionalei zuzendutako prestakuntza programak sustatu eta garatzea, eta gizarte zerbitzuen arloan ikerketa eta azterketa sustatzea.
Eginkizun horri heldurik eta adierazitako helburuak betetzeko asmoz, komenigarri ikusi da jarduketa koordinatu bati hasiera ematea, batetik, arlo honetako ikerlanak egin daitezen eta, bestetik, titulatu eta profesionalei prestakuntza emateko, gizarte zerbitzuen arloetako ikerkuntza sustatzeko bekak banatuz.
Espedientean dauden txosten tekniko eta juridikoak azterturik.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legeak eta Gizarte Ongizate, Kirol eta Gazteria Departamentuaren egitura organikoa onesten duen otsailaren 24ko 46/2005 Foru Dekretuak emandako ahalmenak erabiliz,
AGINDU DUT:
1. Familiaren eta adingabeen babesaren arloetan ikerketa proiektuetarako 2007ko deialdiko arauak onestea, foru agindu honen eranskinean ageri direnak.
2. 54.000 euroko gastua baimentzea, honelaxe ordainduko delarik:
a) 45.500 euro, hau da, %75, 2007ko gastuen aurrekontuko "Prestakuntza beketarako eta ikerketa proiektuetarako" izeneko 950001-92100-4809-231500 kontusailetik.
b) 13.500 euro, hau da, gainerako %25a, 2008ko gastuen aurrekontutan dagokion kontusailen kontura.
3. Foru agindu hau Nafarroako ALDIZKARI OFIZIALean argitaratzea.
4. Foru agindu hau Familiaren Zuzendaritza Nagusiko Azterlan eta Plangintza Atalei eta Gizarte Ongizateko Zuzendaritza Nagusiko Kontabilitate Zentroari jakinaraztea, behar diren ondorioak izan ditzan.
Iruñean, 2007ko maiatzaren 14an._Gizarte Ongizate, Kirol eta Gazteria Departamentuko kontseilaria, María Isabel García Malo.
ERANSKINA
Familiaren eta adingabeen babesaren arloetan ikerketa proiektuetarako 2007ko deialdiko arauak
1. Xedea.
Familiaren eta adingabeen babesaren arloetan ikerketa proiektuetarako 2007. urtean lehiaketa bidez emanen diren laguntzen araubidea ezartzea da deialdi honen xedea.
Ikerketa proiektuek gehienez ere hamabi hilabete iraunen dute eta betiere 2008ko abendurako bukaturik beharko dute. Deialdian aipatzen diren ikergaiak aztertu beharko dituzte.
2. Zenbatekoa.
1. Deialdi honetarako zenbatekoa 54.000 eurokoa da.
2. Gehienez ere 18.000 euro banatuko dira proiektu bakoitzeko. Laguntzaren ordainketa zatika eginen da, aurrekontu-urtearen arabera edo proiektuaren faseekin bat, laguntza emateko ebazpenean zehazten den moduan. Proiektuari esleitzen zaion zenbatekoa ordainduko zaio ikertzaile nagusiari. Onartutako diru-kopuruen aurrerakinak eman ahalko dira.
3. Laguntzak ezin dira erabili ikerketa taldeko kideei pagatzeko.
3. Proiektuak bete beharreko baldintzak.
1. Ikerketa proiektuek familiaren eta adingabeen babesari buruzkoak beharko dute izan, nahiz eta, egun Familia Zuzendaritza Nagusiarentzako hurrengo hauek izan lehentasunezko ikerketa ildoak:
a) Nafarroako familien egitura, aldaketa eta joerak.
b) Guraso bakarreko familien beharrak eta eskaerak.
c) Zailtasunak berezirik edo dibortziatuta dauden bikoteen seme-alaben guraso hezkuntzan.
d) Adingabeen babeserako sistema.
2. Ikerketa proiektuen eremua Nafarroako Foru Komunitatea izanen da.
3. Proiektuek honako gai hauek jorratu beharko dituzte: egoera zehatzen ebaluzioei buruzko ikerlanak, programa esperimentalen edo berariazko esperientzien proposamenak eta familiaren eta adingabeen babesaren arloekin zerikusia duten esku-hartze ereduen planteamendua.
4. Eskatzaileak eta ikerketa taldearen betebeharrak.
1. Ikerketa proiektuetarako laguntza ondoko hauek eskatu ahalko dituzte: ikertzaile nagusi gisa Nafarroako unibertsitate zentro bati edo bestalako erakunde edo entitate publiko edo pribatu bati atxikirik agertzen diren pertsonak, irabazi asmorik gabekoak, aitortutako ikerketa esperientziarekin.
2. Ikerketa taldeak Nafarroan bizi beharko du.
3. Taldeetan lau lagun arituko dira gehienez. Taldekideek laguntza zentroei, unibertsitateko zentroei edo aipatutako familiaren eta adingabeen babesaren arloetan jarduteko gaitasuna duten irabazi asmorik gabeko Nafarroako beste entitate edo erakunde batzuei atxikirik egon beharko dute.
4. Ikertzaile nagusiek, horrela agerturik, ezin izanen dute proiektu baterako baino gehiagotarako laguntzarik eskatu deialdi honen babesean.
5. Taldekide guztiek debekatuta izanen dute aldi berean gisa honetako bi proiektu baino gehiagotan aritzea, deialdi honetakoak izan edo erakunde publikoek diruz laguntzen dituzten ikerketa proiektuetarako beste deialdi batekoak izan.
6. Eskatzaileek proiektua garatuko den zentro edo erakundearen abala edo oniritzia izan beharko dute.
5. Aurkeztu beharreko agiriak.
5.1. Eskaera eskabide orokor baten bidez eginen da. Eskabidearekin batera agiri hauek aurkeztuko dira:
5.2. Egin nahi den proiektuaren laburpen zehatza eta jardueren arabera sailkatutako aurrekontua. Horretarako, inprimaki normaldua erabiliko da, behar bezala osatua. Aipatu inprimakia Familiaren Zuzendaritza Nagusian lor daiteke, (González Tablas, zk.g., behea, Iruña.) edo Nafarroako Gobernuko webgunean, (Zerbitzuak "Laguntzak eta Bekak". Ikerketa eta prestakuntza).
5.3. Taldekideen erroldatze agiria.
5.4. Taldekide guztien curriculuma eta haien tituluen fotokopia konpultsatuak.
5.5. Ikertzaile nagusiaren erantzukizun aitorpena, azaroaren 9ko 11/2005 Foru Legearen 13.2 artikuluari jarraikiz, onuradun izatea galarazten dioten egoeretako bakar batean ere ez dagoela adierazten duena.
5.6. Ikertzaile nagusiaren erantzukizun aitorpena, Gizarte Segurantzarekiko zerga arloko betebehar guztiak eta, halaber, Nafarroako Foru Komunitateko Administrazioaren edo haren erakunde autonomoen aldeko zorrak ordaintzeko betebeharrak eguneratuak dituela adierazten duena.
5.7. Dirua transferentziaren bidez jasotzeko eskaera, Nafarroako Gobernuari dirulaguntza eskatzen dion lehenbiziko aldia baldin bada edo aurreko urteetako dirulaguntzak jasotzeko bankuko kontua aldatu bada.
5.8. Hala behar izanez gero, eta deialdi honen 11. arauan aurreikusitakoari dagokionez, dirulaguntzaren helburuak betetzeko funtsen aurretiazko hornidura justifikatzeko txostena. Modu frogagarrian justifikatu beharko da entitateak ordainketak egin behar dituela dirulaguntza jasotako jarduera justifikatu baino lehen, edo ez duela ordainketa horiei aurre egiteko funtsik, beste justifikazio batzuen artean.
6. Eskaerak aurkezteko epea eta modua.
Dirulaguntza eskaerak deialdi hau Nafarroako ALDIZKARI OFIZIALean argitaratu eta biharamunetik 30 egun naturaleko epean aurkeztuko dira Gizarte Ongizateko Zuzendaritza Nagusiko Erregistroan, edo Herri Administrazioen Araubide Juridikoari eta Administrazio Prozedura Erkideari buruzko Legean ezarritako tokietan. Eskaerak posta bulegoen bidez bidaltzen badira, kartazala zabalik aurkeztu beharko da, posta-funtzionarioak egiaztatu baino lehen, eskaerari eguna eta zigilua jar diezazkion.
7. Antolamendua eta izapideak.
1. Deialdi honen ondorioetarako, dirulaguntzak emateko prozedura antolatu eta tramitatzeko eginkizunak Plangintza eta Azterlan Atalari esleitu zaizkio. Arau hauetan organo instruktoreari egindako aipamenak atal horri egindakotzat hartuko dira.
Organo instruktoreak ofizioz ebaluatuko ditu eskaerak, arau hauetan ezarririko irizpideen arabera. Onuradunek dirulaguntzak hartzeko betebehar guztiak betetzen dituztela adieraziko duen txostena eginen du, eta Administrazio publikoko teknikari (arlo juridikoa) baten laguntza izanen du hartarako.
2. Eskaerak aipatu diren baldintzak betetzen ez baditu, entitate interesdunari hots eginen zaio 10 egun naturaletan okerra zuzendu dezan, eta hala egin ezean, eskaera bertan behera geldituko da, Herri Administrazioen Araubide Juridikoari eta Administrazio Prozedura Erkideari buruzko Legeak eta Nafarroako Foru Komunitateko Administrazioari buruzko Foru Legeak ezarritako moduan ebazpena eman ondotik.
3. Plangintza eta Azterlan atalburuak baloratuko ditu eskabideak.
4. Proiektuak baloratu ondoren, organo izapidatzaileak ebazpen proposamena igorriko dio organo eskudunari.
8. Balorazioa.
1. Deialdian eskatzen diren baldintza guztiak betetzeak ez du esan nahi nahitaez laguntza emanen denik.
2. Laguntzak emateko proposamenak honako balorazio irizpideei jarraikiz eginen dira:
a) Ikerketa proiektuaren kalitatea: %40.
b) Ikerketaren xede den arloaren interesa eta aplikazio praktikoa: %25.
c) Gaiaren berrikuntza edo berritasuna: %10.
d) Ikerketa eginen duten pertsonen berme profesionala, agiri bidez abalatuak: %15.
e) Taldekideen artean, Nafarroako Foru Komunitateko Administrazioko, haren erakunde autonomoetako, toki administrazioetako edo Estatuaren Nafarroako Administrazioko plantillako langileak egotea, gizarte zerbitzuetan duten prestakuntza profesioanla, esperientzia edo ezagutza frogatuz gero: %10.
3. Proiektuak kontuan hartuak izateko, 60 puntu bederen erdietsi beharko dituzte eta laguntzaren diru zenbatekoa erdietsitako puntuazioaren eta aurrekontuetan horretarako dagoen kredituaren araberakoa izanen da.
4. Gehienez ere 18.000 euro banatuko dira proiektu bakoitzeko.
5. Dirulaguntza kalkulatzeko tarte proportzionalak finkatuko dira, eskatutako laguntzatik abiatuta eta erdietsitako puntuazioen arabera:
a) 60tik 69ra bitarteko puntuazioa, eskatutakoaren %50.
b) 70etik 79ra bitarteko puntuazioa, eskatutakoaren %70.
c) 80tik 89ra bitarteko puntuazioa, eskatutakoaren %80.
d) 90ekoa edo gehiago, eskatutakoaren %100.
9. Dirulaguntza jaso dezaketen gastuak.
Gastu inbentariagarrientzako laguntzarik ez da emanen eta, horrez gainera, zeharkako kostuak ezin izanen dira dirulaguntzaren kontura ordaindu.
10. Ebazpena.
1. Prozedura tramitatu eta ebazpen proposamena egin ondoren, ebazpena Familia zuzendari nagusiak eman beharko du. Ebazpen hori ikertzaile nagusiari jakinaraziko zaio, laguntza onartzeko agiriarekin batera, jaso eta 10 egun naturaleko epean behar bezala betea itzul dezan.
Epe horretan itzultzen ez badu, emandako dirulaguntza hartzeari uko egiten diola ulertuko da eta laguntza jasotzeko eskubidea galdu duela deklaratuko da ofizioz.
2. Ebatzi eta jakinarazteko epea hiru hilabetekoa izanen da, eskaerak aurkezteko epea bukatzen denetik hasita. Epe hori betetzen bada ebazpen espresurik eman eta jakinarazi gabe, eskaera ezetsi dela ulertuko da, gero ematen den ebazpen espresuaren nondik norakoa edozein delarik ere.
3. Ebazpenean gutxienez dirulaguntza jasoko duten eskatzailea edo eskatzaileen zerrenda, xedea, zenbatekoa, ordainketa modua eta epea agertuko dira.Eskaera batzuk ezetsiz gero, horiek ere agertuko dira eta, horien artean, aurrekontuko mugagatik ezetsitakoak.
11. Aurrerakinak eta ordainketa.
1. Laguntza honelaxe banatuko da:
a) Lehen aurrerakina, %40koa, laguntza emateko ebazpena sinatzearekin batera, Ekonomia eta Ogasun Departamentuak baimendu ondoren.
b) Bigarren aurrerakina, %35koa, Ekonomia eta Ogasun Departamentuak baimendu ondoren, lehen aurrerakina frogaturik. Horretarako, 2007ko proiektuaren exekuzioaren memoria eta izaniko gastuen justifikazioa aurkeztu beharko ditu (gastuen zerrenda, programei egotzirik, fakturak edo frogatzeko balio duten antzeko agiriak eta haien ordainketaren frogagiria).
c) Gainerako %25a proiektua bukaturik eta proiektu hori deialdiko arauekin bat egin dela frogaturik ordainduko da.
12. Ikerketa taldearen betebeharrak.
Talde onuradunek betebehar hauek izanen dituzte:
a) Dirulaguntza zein programa eta jardueratarako ematen den, horiek burutzea deialdiaren arauen arabera, ez baita zilegi diru hori erabiltzea eman zenaz bestelako helburuetarako.
b) Jarduera egin dela eta dirulaguntza emateko edo erabiltzeko baldintza guztiak betetzen direla justifikatzea, jarduera bukatu eta hilabeteko epean.
c) Laguntza ematen duen organoak eta indarra duen legeriaren arabera eskudun diren bestelakoek egin beharreko egiaztapenak onartzea.
d) Lagundutako jarduera finantzatzeko eskatu edo lortutako beste dirulaguntza, dirusarrera edo baliabideen berri ematea dirulaguntza eman duen organoari. Egoera hori jakin bezain laster emanen da horren berri eta, betiere, jasotako dirua zertan erabili den justifikatu baino lehen.
e) Jasotako diruaren erabilpenari buruzko frogagiriak gordetzea, agiri elektronikoak barne, egiaztatze eta kontrol lanak egin ahal izateko.
f) Entitatearen ezaugarriak direla-eta, eskatzen ahal zaizkion kontabilitate arloko betebeharrak betetzea.
g) Froga gisa, entitateak programaren dirusarrera eta gastuen balantzea aurkeztuko du, eta harekin batera diruz lagundutako programari aplikatutako gastuen zerrenda bat, non zehaztuko baitira dokumentu zenbakia, kontzeptua, jaulkitzailea, hartzailea, jaulkipen-data eta ordainketaren data.
Zerrenda horrek ziurtagirien bermea beharko du (fakturak edo antzeko froga-balioa duten dokumentuak); jatorrizkoak izan beharko dute, eta kopia bat erantsita aurkeztuko dira. Egiaztagiri guztietan (faktura, banku-laburpenak, jasotze-agiriak, etab.) honako hauek agertu behar dute: jaulkitzailea, hartzailea, data, kontzeptua, prezioa, ordainketa-modua; eta ordainketa frogatzen duen dokumentua.
Proiektua bukatu eta hilabeteko epean entitateak Familiaren Zuzendaritza Nagusiari aurkeztu behar dio diruz lagundutako proiektuaren justifikazio ekonomikoa, aurreko lerroaldean adierazitako moduan.
h) Egindako ikerketa lana aurkeztea.
i) Eginbeharreko ekintza edo proiektuaren publizitatean Nafarroako Gobernuko Familiaren Zuzendaritza Nagusiaren dirulaguntza aipatzea, eta hori azaltzea urteko memoriako deskribapenean, erabiltzen den materialetan, kartel edo paneletan, hala nola Familiaren Zuzendaritza Nagusiak bidezkotzat jotzen dituen beste edozein baliabidetan.
Halaber, Familiaren Zuzendaritza Nagusiak, urte bukaeran, emandako dirulaguntzen zerrenda jarriko du bere iragarki oholean, dirulaguntzaren entitate hartzailea, zenbatekoa eta helburua adierazita.
j) Ekintza edo proiektua egiteko hornitzaileen kontrataziorako 12.000 euro baino gehiago behar baldin badira, dirulaguntzaren onuradunak behar den bezala frogatu beharko du hornitzailea eraginkortasunaren eta ekonomiaren irizpideei jarraikiz hautatu dela.
Horretarako, entitateak aski izanen du ekintza edo proiektua egiteko hiru aurrekontu aurkeztea, horretarako bidea baldin badago.
k) Diruz lagundutako jardueraren parte bat egiteko hirugarrenekin azpikontratazioa egin behar izanez gero, azpikontratazio horrek ez du emandako diruaren %25 baino gehiago hartuko.
13. Ez-betetzea.
1. Entitate onuradunak deialdi honen arauetan eta Dirulaguntzei buruzko azaroaren 9ko 11/2005 Foru Legean ezarritako betebeharrak ez betetzeak dirulaguntza galtzea eta jasotako diru kopuruak itzuli beharra ekarriko du berarekin, bai eta ordainketaren dataz geroztikako berandutza-interesak ere, halakorik bada, Nafarroako Ogasun Publikoari buruzko abenduaren 26ko 8/1988 Foru Legeko 19. artikuluak ezarritakoaren arabera, eta horrek ez ditu ezertan galaraziko aipatu 11/2005 Foru Legearen II. tituluaren arabera eska daitezkeen erantzukizunak.
2. Aurrekoa gorabehera, bidezko izanen da eskubidea kentzea eta jasotako dirua, osorik edo partez, itzularaztea, honako kasu hauetan:
a) Dirulaguntza jasotzeko proiektuaren oinarrian zeuden ekintzak ez burutzea.
b) Dirulaguntzak zuen xedeari edo hura emateko ezarritako baldintzei zegokiena ez betetzea.
c) Laguntza eskuratzea eskatzen ziren baldintzak bete gabe.
3. Orobat, bidezkoa izanen da eskubidearen iraungipena ezarri eta jasotako diru kopuruaren %50 itzularaztea dirulaguntzaren erabilera aldatzen baldin bada Familiaren Zuzendaritza Nagusiak baimena eman gabe edo zuzendaritza horrek aldaketak bidegabetzat jotzen baldin baditu.
Ildo horretan, entitate onuradunek dirulaguntza eman eta haren zenbatekoa finkatzeko kontuan izandako baldintzen aldaketa guztien berri eman beharko diote Familiaren Zuzendaritza Nagusiari.
Bestalde, salbuespen gisa, entitateek zilegi izanen dute diruz lagundutako programaren edukia aldatzeko eskatzea, bai eta hura egiteko modua eta epeak ere, haren garapena eragozten duten gorabeherak azalduz gero.
4. Gainera, bidezko izanen da eskubidea galtzea eta jasotako diruaren %25 itzultzea, honako kasu hauetan:
a) Ezarritako modu eta epeetan ez justifikatzea laguntzak zertan erabili diren.
b) Organo eskudunari egiaztapen lanetan oztopoak jartzea edo uko egitea.
14. Laguntzen bateragarritasuna.
Foru agindu honetako dirulaguntzak bateragarriak izanen dira helburu bererako ematen diren bestelako dirulaguntzekin, betiere haien zenbatekoa, bakarrik edo beste dirulaguntza, laguntza, dirusarrera edo berezko baliabide batzuekin baturik, entitate onuradunak egin beharreko jardueraren kostua baino handiagoa ez bada.
15. Jabetza intelektuala.
1. Ikertzaileei dagokie egindako ikerlanaren jabetza intelektuala, ezartzen ahal den estatuko araudian aurreikusitako eran.
2. Hala ere, egileek baimena emanen diote Gizarte Ongizate, Kirol eta Gazteria Departamentuari, bidezkoa bada ikerlana argitara emateko
16. Errekurtsoak.
1. Foru agindu honen aurka gora jotzeko errekurtsoa jartzen ahal da, Nafarroako Gobernuari zuzendua, Nafarroako ALDIZKARI OFIZIALean argitaratu edota errekurritutako egintza jakinarazi eta biharamunetik hasita hilabeteko epean, Herri Administrazioen Araubide Juridikoaren eta Administrazio Prozedura Erkideari buruzko Legean adierazitakoari jarraikiz.
2. Foru agindu hau betetzeko egintzen aurka gora jotzeko errekurtsoa jartzen ahal da, Gizarte Ongizate, Kirol eta Gazteria kontseilariari zuzendua, Nafarroako ALDIZKARI OFIZIALean argitaratu edo errekurritutako egintza jakinarazi eta biharamunetik hasita hilabeteko epean, Herri Administrazioen Araubide Juridikoari eta Administrazio Prozedura Erkideari buruzko Legean eta Nafarroako Foru Komunitateko Administrazioari buruzko Foru Legean adierazitakoari jarraikiz.
17. Aplikatu beharreko legeria.
Foru agindu honetan aurreikusirik ez dagoen guztian Dirulaguntzei buruzko azaroaren 9ko 11/2005 Foru Legean eta aplikatu beharreko gainerako arauetan ezarritakoari jarraituko zaio.
Iragarkiaren kodea: F0708398
