Iragarkia

67. ALDIZKARIA - 2007ko maiatzaren 30a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Publikoaren Eskaintza, oposizioak eta lehiaketak

DEIALDIA, Funtzio Publikoaren zuzendari nagusiak maiatzaren 9ko 1534/2007 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko Turismoko Enpresa eta Jardueretako teknikari izateko maiatzaren 2ko 1428/2007 Ebazpenak deitutako lekualdatze lehiaketaren bidez betetzen ez diren lanpostuak oposizio bidez betetzekoa. Ebazpen hori gaur egun tramitazioan da.

Funtzio Publikoaren zuzendari nagusiak, maiatzaren 9ko 1534/2007 Ebazpenaren bidez, deialdia onetsi du, Nafarroako Foru Komunitateko Administrazioaren eta haren erakunde autonomoen zerbitzuko Turismoko Enpresa eta Jardueretako teknikari izateko maiatzaren 2ko 1428/2007 Ebazpenak deitutako lekualdatze lehiaketaren bidez betetzen ez diren lanpostuak oposizio bidez betetzeko. Ebazpen hori gaur egun tramitazioan da.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako

ARAUAK

1._Deialdiaren xedea.

1.1. Deialdi honen xedea da Turismoko Enpresa eta Jardueretako teknikari izateko maiatzaren 2ko 1428/2007 Ebazpenak deitutako lekualdatze lehiaketaren bidez betetzen ez diren lanpostuak (funtzionario araubidea, B maila) oposizio bidez betetzea. Ebazpen hori gaur egun tramitazioan da.

Lehiaketan betetzen ez diren lanpostuak txanda irekiaren eta igoera txandaren artean banatuko dira, abuztuaren 30eko 251/1993 Legegintzako Foru Dekretuaren bidez onetsitako Nafarroako Administrazio Publikoen zerbitzuko Langileen Estatutuaren Testu Bategineko 15. artikuluko 3. idatz-zatian ezarririko formulari jarraituz. Hona hemen: lehena, txanda irekiari dagokio; bigarrena, igoera txandari; eta hirugarrenetik aurrera, bakoitiak igoera txandari eta bikoitiak, txanda irekiari.

1.2. Igoera txandako lanpostuak hutsik geldituz gero, izangaiek hautapen probak gainditzeko behar den gutxieneko puntuazioa atera ez dutelako, txanda irekikoei gehituko zaizkie.

Era berean, txanda irekiko lanpostuak eskuratzeko aukera izanen dute, aurreko lerroaldean adierazitako moduan, deialdiko 7.2 arauan agiriak aurkezteko ezartzen den epea bukatzen denean deialdiko 2.1.2 arauko eskakizun berariazkoak betetzen ez dituzten igoera txandako izangaiek.

1.4. Lanpostuek B mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.5. Halaber, deialdi honen bidez hautaprobak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatuko da, deialdi honetako 10. arauan xedaturikoarekin bat.

2._Betebeharrak.

2.1. Oposizio honetan onartuak izateko, izangaiek, eskaerak aurkezteko epea amaitzen den egunean eta agiriak aurkezteko epea amaitzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak:

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek parte hartzen ahal dute, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Adin nagusikoa izatea eta erretiroko adina ez izatea.

c) Turismoko Enpresa eta Jardueretako teknikariaren titulua edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lorturiko tituluak badira, homologazioaren egiaztagiria eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren estatuko funtzio publikoan sartzea eragozten dien diziplina zehapenik edo zigor penalik ez dutela.

f) B motako ibilgailuak gidatzeko baimena izatea.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko atalean adierazitako betebeharrez gain, hauek bete beharko dituzte:

a) Nafarroako edozein Administrazio Publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio Publikoetan bost urteko antzinatasun onartua izatea.

Nafarroako Administrazio Publikoetan lan egiten duten langileen Estatutuaren zortzigarren xedapen gehigarrian ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

Orobat, Nafarroako Polizia Kidegoei buruzko martxoaren 23ko Foru Legearen 44.2 artikuluarekin bat, kidego horietako kideek ere parte hartu ahalko dute igoera txandan, betiere kidego horietan zortzi urtez eman badituzte zerbitzuak.

2.2. Deialdiko 3.3 arauaren bigarren puntuan aipatzen den salbuespena salbuespen, izendatuak izateko proposatzen diren izangaiek deialdiko 7.2 atalean ezarritako epean eta moduan frogatu beharko dituzte betebehar horiek.

3._Eskaerak.

3.1. Deialdian parte hartzeko eskaerak Nafarroako Gobernuko Erregistro Orokorrean (Karlos III.aren etorbidea, 2, 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2007ko 14. Nafarroako ALDIZKARI OFIZIALean argitaratu zen, urtarrilaren 31n) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazi diren bideetakoren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskaera posta bulego batean aurkeztuz gero, gutun-azal irekian eginen da, postako langileek, ziurtatu aurretik, data eta zigilua jar ditzaten.

Eskaerak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuaren edozein erregistro bulegotan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskaeran eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Eskaerari, behar bezala bete ondoren, agiri hauek erantsiko zaizkio:

Bat._Espedientea formalizatzeko eta azterketa eskubideetarako 18 euro ordaindu izanaren ziurtagiria. Azterketa eskubideen tasa ordaintzen ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

_Behar bezala betetako ordainketa gutuna erabiliz; Foru Komunitateko Administrazioak Nafarroako finantza entitateetan dituen kontuetan sartuko da dirua. Arestian aipatutako webgunean, deialdiaren iragarkian, ordainketa gutunaren eredua dago.

_Sarrera eskudirutan edo bankuko transferentzia bidez eginez, Banestoko (Banco Español de Crédito) 00308124 87 0870002271 kontuan; horrelakoetan ordainagirian datu hauek jarri beharko dira nahitaez:

_Izangaiaren izen-deiturak.

_NANa/IFZ.

_Ordainketa zein kontutan egiten den, haren zenbakia.

_Kontzeptua: oposizioak.

_Deialdiaren xede den lanpostua.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorakoa den dirusarrerarik ez izatea hilabetero.

Lan-eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lanbide sustapen, prestakuntza edo aldaketarako ekintzetan parte hartzeari ere, justifikaturiko kasuetan izan ezik.

Hilabetero lanbide arteko gutxieneko soldatatik gorako dirusarrerarik ez duela interesdunaren adierazpenaren bidez frogatuko da. Adierazpen eredua Nafarroako Gobernuko Informazio Bulegoan eskuratzen ahalko da, edo bestela Internet bidez, arestian emandako helbidean.

Bi._Deialdian igoera txandan parte hartu nahi duten izangaiek, Nafarroako Foru Komunitateko Administrazioa ez den Nafarroako beste Administrazio Publiko bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak, lehengoaz gainera, deialdi honetako 2.1.2 arauan jasotzen diren eskakizunak betetzen dituztela frogatzen duen agiria gehitu beharko diote eskaerari.

3.4. Eskaerak aurkezteko epea ezin izanen da luzatu.

3.5. Eskaeran atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartuen eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5._Epaimahaia.

5.1. Epaimahaiak kide hauek izanen ditu:

_Mahaiburua: Nazareth Yábar Martínez andrea, Vianako Printzea Erakundea-Kultura eta Turismo Departamentuko Turismoaren Sektorea Sustatu eta Antolatzeko Zerbitzuko zuzendaria.

_Ordezkoa: José Miguel Gamboa Baztán jauna, Vianako Printzea Erakundea-Kultura eta Turismo Departamentuko Turismoaren Antolamendu Ataleko burua.

_Mahaikidea: Nuria Montmany Alvarez andrea, Turismoko enpresa eta jardueretako teknikaria, Bartzelonako Ramón Llull Unibertsitateko irakaslea.

_Ordezkoa: Jorge Peralta Ramos jauna, Turismoko enpresa eta jardueretako teknikaria, Bartzelonako Ramón Llull Unibertsitateko irakaslea.

_Mahaikidea: Iñaki Martínez de Virgala Lusarreta jauna, Turismoko enpresa eta jardueretako teknikaria, Vianako Printzea Erakundea-Kultura eta Turismo Departamentuko Sustapen Ekintzen Bulegoko burua.

_Ordezkoa: Elena López de Zubiría Goicoechea andrea, Turismoko enpresa eta jardueretako teknikaria, Ekonomia eta Ogasun Departamentuko Europar Batasuneko Programa eta Ekinbideen Ataleko burua.

_Mahaikidea: Administrazio Erroko Langileen Batzordearen ordezkari bat, batzordeak berak proposatua.

_Ordezkoa: Administrazio Erroko Langileen Batzordearen ordezkari bat, batzordeak berak proposatua.

_Mahaikide idazkaria: Margarita Cueli Erice andrea, Turismoko enpresa eta jardueretako teknikaria, Vianako Printzea Erakundea-Kultura eta Turismo Departamentuko Berriztapen eta Kalitate Ataleko burua.

_Ordezkoa: Carmen Oroz Iribarren, Vianako Printzea Erakundea-Kultura eta Turismo Departamentuko Sustapen Ataleko burua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoaren batean baldin badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6._Oposizioa nola eginen den.

6.1. Oposizioa 2007ko urrian hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

Lehenbizikoa._Gai zerrendako lehen eta bigarren zatietan dauden gaiei buruzko erantzun laburreko galde sorta bat erantzutea, gehienez ere 4 orduz.

Zotz eginda gai zerrendako hirugarren zatitik aukeratuko diren hiru gai idatziz azaltzea, gehienez ere 4 orduz.

Hirugarrena._Teoriko-praktikoa, gai zerrendako lehen eta hirugarren zatietako gaiei buruz epaimahaiak egiten dituen galderak erantzun edo planteatzen dituen kasuak ebaztea. Epaimahaiak ariketa hori egiteko izangaiek zenbat denbora duten adieraziko du hura hasi baino lehenago.

Ariketak plika sistemaren bidez eginen dira.

6.3. Oposizioko ariketen balorazioan 80 puntu eman daitezke gehienez ere, honela banatuak:

Lehenbizikoan_30 puntu bitarte.

Bigarrena._30 puntu bitarte. Gai bakoitzean gehienez 10 puntuko balorazioa ematen ahal da.

Hirugarrena._20 puntu bitarte.

6.4. Oposizioko ariketak baztergarriak izanen dira. Bazterturik geldituko dira horietako ariketaren batean gutxienez gehieneko puntuazioaren erdia lortzen ez duten izangaiak. Orobat, baztertuko dira bigarren ariketaren gai bakoitzean gutxienez gehieneko puntuazioaren %30 lortzen ez duten izangaiak.

6.5. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.

6.7. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gida-baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.

6.8. Hautaprobak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskaeran azaldutakoaren arabera.

7._Probak gainditu dituztenen zerrenda, izendapen proposamena eta agirien aurkezpena.

7.1. Hautaprobak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da.

Berdinketa izanez gero, lehen ariketan puntuazio altuagoa erdiesten duenaren alde jokatuko da. Eta irauten badu, hirugarren ariketan lorturiko puntuazioa hartuko da kontuan.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu behar dituzte Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea hartzeko Atalak emandako txostena, interesdunak karguan aritzea eragotziko liokeen eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Izangaiek Espainiako nazionalitatea ez badute, agiria aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

e) Zin egin edo hitz ematea, Nafarroako Foru Eraentza errespetatu, Konstituzioari eta legeei men egin eta karguari dagozkion eginkizunak zuzen beteko dituela.

f) B motako ibilgailuak gidatzeko baimenaren kopia konpultsatua.

g) Funtzio Publikoaren Zuzendaritza Nagusiak eskatzen dizkion gainerako agiriak.

Deialdi hau egin ez duen Nafarroako beste Administrazio Publikoren bateko langile finko, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiak:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskaerak aurkezteko epean titulua eskuratzeko moduan dagoela frogatzen duen ziurtagiria.

b) B motako ibilgailuak gidatzeko baimenaren kopia konpultsatua.

c) Funtzio Publikoaren Zuzendaritza Nagusiak eskatzen dizkion gainerako agiriak.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, euren eskaeraren faltsukeria dela eta, legokiekeen erantzunbeharra galarazi gabe.

7.4. Aurreko atalean aurreikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8._Lanpostu hutsak hautatzea.

8.1. Aurreko arauan xedatu dena betetzen duten lehiatzaileek Funtzio Publikoaren Zuzendaritza Nagusiak hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hautaprobak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, %33ko ezgaitasun aitortua edo handiagoa duten izangaiek lehentasuna izanen dute txanda irekiko izangaien aurretik.

Ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9._Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko arauetan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, Turismoko enpresa eta jardueretako teknikari lanetan aritzeko.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan aurreikusitakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein mutualitatetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko mutualitatean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta behar bezain ongi arrazoitutako kasuetan izan ezik, izangairen batek ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data horretan beste Administrazio Publiko batean ari delako, kasuko lanpostu hutsa ere beteko da deialdiko 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10._Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta arau honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

_Probak gainditu bai baina lanposturik lortu ez duten izangaien zerrenda.

_Hautapen prozesuaren ariketa guztiak gainditu ez dituzten izangaien zerrenda.

10.2. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azkenaurreko ariketa gainditu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskaerak aurkezteko epean titulua eskuratzeko moduan egoten dela frogatzen duen ziurtagiria.

B motako ibilgailuak gidatzeko baimenaren fotokopia konpultsatua.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki-oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, betiere, parte hartzeko eskaera faltsutzeagatik legokiekeen erantzukizuna deusetan ukatu gabe.

10.3. Sarrera prozedurako eskaerak aurkezteko epea bukatzen den egunerako bete beharko dira baldintzak, eta hautaprobek dirauteino eta kontratazioaldiak iraun bitarte bete beharko dira.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragarki-oholean argitaratuko (Karlos III.aren etorbidea, 2, atalondoa, Iruña):

a) Probak gainditu bai baina lanposturik lortu ez duten izangaien zerrenda.

b) Deialdiaren azkenaurreko ariketa gainditu bai baina lanposturik gabeko gaindituen artean ez daudenen zerrenda.

10.5. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzenduta, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat, eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2007ko maiatzaren 9an._Funtzio Publikoaren zuzendari nagusia, Alberto Andérez González.

I. ERANSKINA

Eskaera

Nafarroako Gobernua. Lehendakaritza, Justizia eta Barne Departamentua, Funtzio Publikoaren Zuzendaritza Nagusia

Izena: ..............................................., adinez nagusia. Nortasun Agiri Nazionala: .............. (edo balio bereko beste identitate agiriren bat). Sorteguna: ........................................ Sorterria: .................................... (....................................). Nazionalitatea: .............................................. Helbidea: ...................., karrika: ..................................., posta kodea: ......................, telefonoa: ................., laneko telefonoa: ...................

Honako hau azaltzen dut:

Nafarroako Foru Komunitateko Administrazioaren eta haren erakunde autonomoen zerbitzuko .............. izateko ...............lanpostu ....................bidez betetzeko deialdian parte hartzeko onar nazatela eskatzen dudala, ondoko txandan (deialdia ...... zenbakiko Nafarroako ALDIZKARI OFIZIALean argitaratu zen, .........(e)an).

f Txanda irekia.

f Barne igoerako txanda(*)

f Ezgaitasunen bat dutenendako txanda(*)

Hautapen probak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruotako batean:

f Administrazio erroa(*)

f Osasunbidea-Nafarroako Osasun Zerbitzua(*)

f Nafarroako Gizarte Ongizatearen Institutua(*)

(Esparruetako bakar bat aukeratu daiteke)

Ez dudala karguan aritzea galarazten didan eritasunik edo akats fisikorik nahiz psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskaerak aurkezteko epearen azken egunean beharkizun guztiak betetzen ditudala.

f Ezgaitua naizelakoz, orri bereizi batean adierazten ditudan denbora eta baliabide egokitzapenak eskatzen ditudala.

f Ezgaitasuna frogatzen duen agiria aurkezten dudala, erakunde eskudun batek emana.

f Euskararen gaitasunaren agiria edo ofizialki baliokidea den beste titulu bat aurkezten dudala(*)

f Euskara maila jakiteko proba egitea eskatzen dudala(*)

f Frantseseko eta ingeleseko nahikotasun frogak egitea eskatzen dudala(*)

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean, ................(e)ko .........................aren ............(e)an.

(Sinadura)

Bidezkoa bada.

Oharra: Datu Pertsonalak Babesteari buruzko abenduaren 13ko 15/1999 Lege Organikoan xedatutakoa betez, jakinarazten da agiri honetan ageri diren datuak eta administrazioarekin etorkizunean izan daitekeen zerbitzu harremana kudeatzeko beharrezkoak diren gainerako guztiak datuen fitxategi automatizatu batean sartuko direla. Nafarroako Gobernuko Funtzio Publikoaren Zuzendaritza Nagusia da fitxategi horren erantzulea, eta datuen konfidentzialtasuna bermatzen du. Datuen titularrari jakinarazten zaio datu pertsonalen tratamendua eskuratu, zuzendu, ezabatu eta haren aurka jotzeko eskubidea erabiltzen ahal duela, datuak babesteko indarra duen araudiarekin bat.

II. ERANSKINA

Gai zerrenda

Lehen zatia:

1. gaia._Turismoari buruzko otsailaren 14ko 7/2003 Foru Legea.

2. gaia._Abenduaren 26ko 146/2005 Foru Dekretua. Horren bidez, Nafarroako Foru Komunitateko ostalaritza establezimenduen antolaketari buruzko erregelamendua onetsi zen.

3. gaia._Ekainaren 28ko 243/1999 Foru Dekretua, landa-etxeetan ostatatzea arautzen duena.

4. gaia._Abenduaren 5eko 140/2005 Foru Dekretua. Horren bidez, Nafarroako Turismoko Aterpetxeen antolaketari buruzko erregelamendua onetsi zen.

5. gaia._Martxoaren 27ko 76/1995 Foru Dekretua, Turismorako kanpalekuak arautzen dituena.

6. gaia._1967ko urtarrilaren 17ko Agindua, turismorako apartamentuak, "bungalow-ak" eta antzeko ostatuen antolaketa onesten duena.

7. gaia._1965eko martxoaren 17ko Agindua, jatetxeen antolamendu turistikoa onesten duena.

8. gaia._1965eko martxoaren 18ko Agindua, kafetegien antolamendu turistikoa onesten duena.

9. gaia._Maiatzaren 4ko 141/88 Foru Dekretua, bidaia Agentziei buruzkoa.

10. gaia._288/2004 Foru Dekretua, abuztuaren 23koa, turismo aktibo eta kulturaleko zerbitzuak ematen dituzten enpresen jarduerak arautzen dituen Erregelamendua onesten duena.

11. gaia._Abuztuaren 25eko 502/2003 Foru Dekretua, Nafarroako Turismo Erregistroaren antolamendua eta funtzionamendua arautzen duena.

12. gaia._Uztailaren 6ko 21/1995 Legea, bidaia konbinatuak arautzeari buruzkoa.

Bigarren zatia:

1. gaia._Espainiako 1978ko Konstituzioa (I): ezaugarriak. Zuzenbide estatu sozial eta demokratikoa: printzipio konstituzionalak eta goi mailako balioak. Funtsezko eskubide eta askatasunak eta haien bermea. Politika ekonomiko eta sozialaren printzipio gidariak.

2. gaia._Espainiako 1978ko Konstituzioa: Estatuko aginteak. Koroa. Gorte Nagusiak. Gobernua eta Administrazioa. Botere judiziala Konstituzioan.

3. gaia._Estatuaren lurralde antolaketa: Estatu autonomikoa. Konstituzio Auzitegia.

4. gaia._Zuzenbide Publikoaren iturburuak: legeak eta lege motak. Dekretu legeak. Legegintzako foru dekretua. Nazioarteko hitzarmenak.

5. gaia._Administrazio zuzenbidearen iturburuak: erregelamendua eta erregelamendu-ahalmena. Erregelamendu motak. Erregelamendu-ahalmenaren mugak eta haren kontrola.

6. gaia._Administrazio egintza (I): kontzeptua, motak eta elementuak.

7. gaia._Administrazio egintza (II): administrazio egintzen baldintzak, eraginkortasuna, deuseztasuna eta deuseztagarritasuna.

8. gaia._Administrazio prozedura erkidea (I): kontzeptua eta izaera. Hasiera, antolaketa, instrukzioa eta amaiera.

9. gaia._Administrazio prozedura erkidea (II): administrazio errekurtsoak. Printzipio orokorrak eta motak.

10. gaia._Europar Batasuna: Batasuna sortzeko prozesua. Europar Batasuneko erakundeak. Europar Batasunaren Zuzenbidearen iturburuak: jatorrizko zuzenbidea eta zuzenbide eratorria.

11. gaia._Nafarroako Foru Araubidea: bilakaera historikoa (1512-1982). 1841eko abuztuaren 16ko Nafarroako Lege Itundua. Foru Eraentza Berrezarri eta Hobetzeko Lege Organikoa: egitura eta edukia. Hitzarmen Ekonomikoa.

12. gaia._Nafarroako Parlamentua edo Gorteak: osaera, antolaketa eta eginkizunak.

13. gaia._Nafarroako Gobernuari eta Lehendakariari buruzko Foru Legea.

14. gaia._Nafarroako Foru Komunitateko Administrazioari buruzko Foru Legea.

15. gaia._Nafarroako Foru Komunitateko Arartekoa. Comptos Ganbera. Nafarroako Kontseilua.

16. gaia._Nafarroako Administrazio Publikoen zerbitzuko Langileen Estatutua (I): langile motak. Funtzionario publikoen hautapena. Funtzionario izaera eskuratu eta galtzea.

17. gaia._Nafarroako Administrazio Publikoen zerbitzuko Langileen Estatutua (II): karrera administratiboa. Egoera administratiboak. Lanpostuak betetzea. Ordainsariak.

18. gaia._Nafarroako Toki Administrazioa. Nafarroako toki entitateak: motak eta eskumen orokorrak. Udalerrietako organoak. Toki entitateen ondasunak. Nafarroako Toki Entitateen jarduketen inpugnazioa eta kontrola.

19. gaia._Nafarroako Ogasun Publikoa: Nafarroako Ogasun Publikoaren eskubide eta betebeharrak. Nafarroako aurrekontu orokorrak: edukia eta onespena; gastuen sailkapen ekonomikoa; betearaztea eta likidazioa.

20. gaia._Nafarroako Administrazio Publikoen kontratuak. Araubide juridikoa. Administrazio kontratu ohikoenak: kontzeptua eta motak. Kontratuak esleitu, hobetu, sinatu, bete, aldatu eta iraungitzeko arau orokorrak.

21. gaia._Dirulaguntzei buruzko azaroaren 9ko 11/2005 Foru Legea.

22. gaia._Datu pertsonalak babesteko lege organikoa: datuak babesteko printzipioak, pertsonen eskubideak.

Hirugarren zatia:

1. gaia._Turismoa, ataria. Kontzeptuak eta definizioak. Turismoaren korronteak eta guneak. Turismoaren fenomenoa oporrez haratago. Turismoaren eragileak.

2. gaia._Turismoaren jatorria eta bilakaera historikoa: sorreratik XIX. mendearen hasmenta arte. XIX. mendetik 1950 arte. 1950etik gaur arte.

3. gaia._Turismoaren lurralde plangintza: iraunkortasuna, plangintza irizpide gisa. Inbentarioa eta baliabideen ebaluazioa. Turismorako gaitasuna mugatzea. Zama-ahalmena neurtzea.

4. gaia._Turismo eskaintza: turismo produktu orokorrak. Turismo zerbitzu espezializatuak. Turismo paketeak. Hainbat zerbitzu.

5. gaia._Turismo eskaera: eskaerari eragiten dioten faktoreak eta motibazioak. Portaera soziologikoak. Eskaera urtaroen arabera. Eskaeraren gaurko joerak.

6. gaia._Turismoko eskaera eta kontsumoaren psikologia. Giza motibazioak. Bidaiaren eta turistaren motibazioa. OMT eta turismoko motibazioak eta premiak. Turismoko kontsumoaren psikosoziologiaren kontzeptua eta ezaugarriak. Moda turismo kontsumoan. Turismo jardueren kontzeptua eta motak kontsumitzailearen psikosoziologiari buruz.

7. gaia._Merkataritzako abiazioa. Aireko garraioa.

8. gaia._Trenbideko garraioa. Lurreko garraioa. Itsas eta ibai garraioa.

9. gaia._Bidaia-antolatzailearen kontzeptua. Agentzien eta bidaia-antolatzaileen integrazioa. Banaketa sistema informatizatuak (CRS). Banaketa sistema globalak (GDS).

10. gaia._Bidaia agentzia bidaien antolatzaile edo eratzaile. Bidaia profesionalak.

11. gaia._Hotelen kudeaketa tekniko-ekonomikoa (I). Hotel enpresaren ezaugarriak. Hotel enpresen motak. Hotel enpresaren helburuak.

12. gaia._Hotelen kudeaketa tekniko-ekonomikoa (II). Enpresa eta haren barne antolaketa. Hotel enpresen antolaketa.

13. gaia._Hotelen kudeaketa tekniko-ekonomikoa (III). Enpresaren kokalekuari buruzko oharrak. Hotel enpresaren kokalekua.

14. gaia._Enpresaren ekonomia eta enpresari buruzko teoriak: enpresaren ekonomia zientzia gisa. Kontzeptua eta bilakaera. Helburua eta metodoa. Enpresari buruzko teoriak. Turismo enpresak eta enpresaren ekonomiarekin duten lotura.

15. gaia._Enpresa eta enpresaburua. Enpresaren kontzeptua eta motak. Enpresa, errealitatea den aldetik. Enpresa sistema integratua den aldetik. Enpresaren gaineko teoriak pentsamendu politikoan eta ekonomikoan. Turismo enpresen ezaugarri propioak.

16. gaia._Enpresaren ekonomiako kontzeptu oinarrizkoak. Efikazia eta eraginkortasun kontzeptuak. Eraginkortasunaren neurri operatiboak: produktibitatea eta errentagarritasuna. Enpresa lehiatzailearen kontzeptua. Berriztapena eta modernitatea enpresaren funtsak diren aldetik. Turismo enpresen aipamen berezia. Ekonomiako printzipio eta helburuen interpretazioa turismo enpresetan.

17. gaia._Kalitatearen eta erabateko kalitatearen kontzeptua. Kalitaterako arauak eta ereduak (ISO, EFQM, CAF, UNE). Kalitatearekin lotutako erakundeak: ENAC, AENOR, ISO.

18. gaia._Turismo kalitatea: Espainiako turismoaren kalitate plan integrala (PICTE), horren oinarri nagusiak.

19. gaia._Turismo kalitatea: SICTE eta ICTE direlakoak.

20. gaia._Marketinaren izaera. Marketinaren bilakaera. Marketina, enpresaren filosofia eta jarduera den aldetik. Marketinaren definizioa AMAren arabera. Trukea marketinaren helburu. Marketinaren kritikak. Zerbitzu marketina: turismo marketina. Marketin globala. Marketin zientziaren metodologia.

21. gaia._Marketina, enpresaren eginkizuna. Marketinaren azpieginkizunak enpresan. Marketing estrategiak: Marketin mix. Marketin ereduak. Marketin departamentuaren antolaketa. Harremanak enpresako beste departamentuekin.

22. gaia._Merkatua eta haren ingurunea. Merkatuaren kontzeptua eta mugak. Merkatuaren sailkapena. Lehiakideak. Makroingurunea. Ingurunearen zuzendaritza.

23. gaia._Kontsumitzailearen jokabidea. Kontsumitzailearen jokabidearen azterketa. Erosteko erabakiaren prozesua. Jokabidearen barne determinanteak. Jokabidearen kanpoko eragileak. Turismo produktuen kontsumitzailearen berezitasunak.

24. gaia._Informazio sistema eta merkataritza arloko ikerketa. Merkataritzako ikerketaren kontzeptua eta edukia. Merkataritza ikerketaren faseak. Merkataritza ikerketaren diseinua. Informazioa jasotzea.

25. gaia._Merkatuen segmentatzea. Segmentatzearen kontzeptua, helburuak eta neurriak. Segmentatzearen baliagarritasuna. Merkatuko segmentuen betebeharrak. Merkatuak segmentatzeko metodo eta teknikak.

26. gaia._Produktua. Izaera. Mota. Ezaugarriak. Turismoko zerbitzu eta produktuen ezaugarri bereziak. Produktuaren abantaila konpetitiboak. Turismoko liburuska. Produktu baten bizi-zikloak. Produktu berrien plangintza. Turismo produktuak.

27. gaia._Prezioa. Kontzeptua. Prezioa finkatzeko baldintzak. Finkatzeko metodoak. Prezioen estrategiak. Prezioen erregulazioa. Turismoko zerbitzuen prezioa.

28. gaia._Banaketa. Kontzeptua. Bitartekariak. Kanalak hautatzea. Kanalkideen arteko harremanak. Diseinua. Turismoaren banaketa.

29. gaia._Sustapena/komunikazioa Sustapenaren kontzeptua eta helburuak. Sustapenerako tresnak. Komunikazioaren prozesua sustapenean. Sustapen mixa. Sustapen ekintzen helburuak.

30. gaia._Marketina interneten. Marketina datu baseekin. Zuzeneko marketina.

31. gaia._Publizitatea. Kontzeptua. Xedeak. Ondorio ekonomiko eta sozialak. Publizitate sistema. Publizitateko mezua. Publizitatearen tresnak.

32. gaia._Harreman publikoak. Salmenten sustapena.

33. gaia._Marketin plana eta erabaki estrategikoak. Merkataritzako plangintza estrategikoaren kontzeptua. Merkataritzako estrategiaren formulazioa. Helburuen definizioa. Estrategia ekintzen garapena. Merkataritzako estrategiaren ebaluazioa.

34. gaia._Teknologia berriak turismoaren sektorean: turismoa jarduera ekonomiko gisa. Turismoa eta teknologia berriak. Turismo elektronikoa. Turismoaren eta haren sektorearen kontrako mehatxuak eta haien aldeko aukerak. Turismo enpresa motak Interneten. Kanal anitzeko estrategiak turismoaren arloko banaketak egiteko.

35. gaia._Landa turismoa eta naturaren ingurukoa. Landa turismoa: esanahaia eta Espainiako turismoaren berrikuntzak. Landa garapena landa turismoaren jatorrian. Europar Batasunaren zeregina, turismoaren garapenaren gakoa. Herrialdeetako administrazioen zeregina. Landa turismoaren bilakaera turismoari buruzko araudiei esker. Nafarroako erreferentziak.

36. gaia._Turismo kulturala. Turismoa eta kultur ondarea. Done Jakue bidea. Gizateriaren ondare diren ondasunak. Turismoko bestelako kultur ibilbideak. Kultur parkeak. Industria ondarea. Ondare etnografikoa. Musika. Festak. Arkeologia. Nafarroako erreferentziak.

37. gaia._Bilkura-turismoa. Feria, workshop, biltzar eta pizgarriak. Jardueraren deskripzioa eta jarduera horien bilakaera.

38. gaia._Nafarroako geografia: kokapen geografikoa. Erliebea eta landaretza. Klima. Hidrologia. Fauna.

39. gaia._Eskualde geografikoak Nafarroan. Mendialdea. Erdialdea. Erribera. Iruñerria.

40. gaia._Nafarroako historia (I). Historiaurrea eta erromanizazioa Nafarroan.

41. gaia._Nafarroako historia (II). Goi Erdi Aroa Nafarroan.

42. gaia._Nafarroako historia (III). Behe Erdi Aroa Nafarroan.

43. gaia._Nafarroako historia (IV). XVI. mendetik 1841 arte.

44. gaia._Nafarroako historia (V). 1841etik gaur arte.

45. gaia._Artea Nafarroan (I): Paleolitotik Neolitora. Erromanikoa eta gotikoa. Artelan nagusiak.

46. gaia._Artea Nafarroan (II): Berpizkundetik gaur arte. Artelan nagusiak.

47. gaia._Done Jakue Bidea. Nafarroako Done Jakue Bidearen aipamen berezia.

48. gaia._Pirinioak. Nafarroako Pirinioen aipamen berezia.

49. gaia._Nafarroako museoak: Nafarroako Museoaren aipamen berezia.

Oharra:

Gai guztiak deialdi hau Nafarroako ALDIZKARI OFIZIALean argitaratzen denean indarra duen legeriari jarraikiz baloratuko dira, baina egun horren ondoren onetsitako arau aldaketen ekarpenak baloratzen ahalko ditu epaimahaiak.

Iragarkiaren kodea: F0708315