Iragarkia
65. ALDIZKARIA - 2007ko maiatzaren 25a
I. NAFARROAKO FORU KOMUNITATEA
1.3. BESTELAKO XEDAPENAK
1.3.5. Estatutuak eta lan hitzarmen kolektiboak
308/2007 EBAZPENA, apirilaren 16koa, Lan zuzendari nagusiak emana, "Dornier, S.A." enpresaren lan hitzarmen kolektiboaren testua erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 41/2007).
2007ko martxoaren 19an departamentu honetan sartu da aipatu enpresaren lan hitzarmen kolektiboaren testua, 46 artikuluz, xedapen gehigarri batez eta eranskin batez (2006rako lansarien taula) osatua, enpresaren ordezkaritzak eta enpresa batzordearen zati batek (UGT, LAB eta CC.OO) 2007ko otsailaren 8an izenpetu eta onetsia.
Industria eta Teknologia, Merkataritza eta Lan Departamentuak bere esku du martxoaren 24ko 1/1995 Legegintzako Errege Dekretuaren 90. artikuluan aipatzen diren lan hitzarmen kolektiboak erregistratu, gorde eta argitaratzea, Lan zerbitzuak Estatuko Administraziotik Nafarroako Foru Komunitatera eskualdatzen dituen apirilaren 11ko 937/1986 Errege Dekretuaren arabera, eta kontuan izanik Hitzarmen kolektiboak erregistratu eta gordetzeari buruzko maiatzaren 22ko 1040/1981 Errege Dekretuan xedatutakoa.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,
EBATZI DUT:
1. Iruñeko "Dornier, S.A." enpresaren lan hitzarmen kolektiboa erregistratzea (kodea: 3103152) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.
2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Industria eta Teknologia, Merkataritza eta Lan kontseilariari zuzendua, jakinarazi eta biharamunetik hilabeteko epean.
3. Ebazpen hau Nafarroako ALDIZKARI OFIZIALean argitaratzea, orok jakin dezan.
Iruñean, 2007ko apirilaren 16an._Lan zuzendari nagusia, José María Roig Aldasoro.
DORNIER, S.A. ENPRESAREN LAN HITZARMEN KOLEKTIBOA NAFARROAKO FORU KOMUNITATERAKO
1. artikulua. Xedea.
Lan hitzarmen honek Dornier, S.A. enpresaren eta haren langileri eremuaren barrenean dauden langileen arteko harremanak arautzen ditu.
2. artikulua. Lurralde eremua
Lan hitzarmen honek eragina izanen du Dornier, S.A. enpresak Nafarroako Foru Komunitatean gaur egun dituen edo etorkizunean sor ditzakeen lantoki guztietan.
3. artikulua. Langileri eremua.
Hitzarmen kolektiboak eragina izanen du enpresan lan egiten duten langile guztiengan, Langileen Estatutuak I. tituluko 2. artikuluko a/ idatz-zatian aurreikusitako salbuespenak kontuan izanik.
4. artikulua. Iraunaldia.
Soldata arloko ondorio guztietarako, hitzarmenak 2006ko urtarrilaren 1ean hartuko du indarra eta hiru urteko iraupena izanen du, hots, 2008ko abenduaren 31 arte.
5. artikulua. Amaiera iragartzea eta indarraldia luzatzea.
Hitzarmeneko 4. artikuluan aipatutako indarraldia bukatzearekin batera amaiera iragarriko da, besterik gabe. Beraz, ez da beharrezkoa alderdiek hitzarmenaren amaiera iragartzea eskumena duen lan agintaritzari. Era berean, hitzarmenaren indarraldia bukatu eta horren ordez onartzen den hurrengo hitzarmenak indarra hartu bitartean, hitzarmen hau luzatzen dela ulertuko da, ondorio guztietarako. Hitzarmen berriaren ondorio ekonomikoak honen indarrraldia bukatzen den egunera eramanen dira atzeraeraginez.
6. artikulua. Berme pertsonalak.
Nolanahi ere den, langileren batek urteko konputuan baldintza hobeak izanez gero, errespetatuko zaizkio.
7. artikulua. Lan hitzarmenaren tramitazioa.
Lan hitzarmen hau erakunde eskudunaren aurrean aurkeztuko da, erregistratu eta gainerako ondorioak izan ditzan, arlo honetan indarra duten legeekin bat.
8. artikulua. Zaintza batzordea.
Lan hitzarmena betetzen dela zaintzeko, eta behar denean interpretatzeko, Zaintza batzorde mistoa eratuko da, indarra hartzen duen unetik hasita. Batzordea langileen hiru ordezkarik eta enpresaren beste hiruk osatuko dute.
Bi ordezkaritzak bilerara aholkulariak eramaten ahal dituzte, haiek hautatuak. Enpresaz kanpokoak izan daitezke eta hizpidea izanen dute, baina botorik ez.
9. artikulua. Nafarroako lan-gatazkak auzibidetik kanpo ebazteko lanbide arteko akordioarekiko atxikimendua.
Alderdiek erabaki dutenez, lan hitzarmen kolektibo honen interpretazioan eta aplikazioan sor daitezkeen gatazka kolektiboak ez ezik, baita horren aplikazio eremuko langileei eta enpresaburuei ukitzen ahal dizkien beste guztiak ere, Nafarroako Lan Gatazkak Konpontzeko Auzitegiak konponduko ditu, adiskidetze eta bitartekotza faseetan.
Era berean, adierazi dute ahaleginak eginen dituztela ukituriko alderdiak aipatu auzitegiaren prozedura arbitralaren esanetara jar daitezen.
Artikulu hau, beraz, alderdien atxikimendu espresua da gatazken konponbiderako arbitraje organoari, eraginkortasun orokor gisa eta, ondorioz, itunak enpresaburuak, ordezkari sindikalak eta langileak behartzen ditu beren desadostasunak epaiketara jo aitzin aipatu organoaren bitartekotza eta adiskidetze prozeduretan azaltzera. Hartaz, ez da nahitaezkoa alderdien desadostasun edo gatazka bakoitzerako atxikimendu espresua eta banakakoa egitea, arbitrajera lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.
Era berean, lan hitzarmen kolektibo honen sinatzaileek hitzematen dute ahaleginak eginen dituztela hitzarmenaren aplikazio eremuko langileen eta enpresaburuen artean sortzen diren banakako gatazkak Nafarroako Lan Gatazkak Konpontzeko Auzitegiaren aurrean Adiskidetze, Bitartekotza eta Arbitraje prozeduren mendean borondatez eta era espresuan jar daitezen, Nafarroako Foru Komunitateko lan-gatazkak auzibidetik kanpo ebazteko Lanbide arteko Akordioaren 2. xedapen gehigarrian adierazten diren gaiak badira.
10. artikulua. Lanaldia.
Lan hitzarmen honen indarraldian, eta Langileen Estatutuaren 34. artikuluko bosgarren idatz-zatian ezarritakoari jarraikiz, erabaki da:
_2006. urtean: urteko lanaldia 1.714 ordukoa izanen da.
_2007. urtean: urteko lanaldia 1.700 ordukoa izanen da.
_2008. urtean: urteko lanaldia 1.700 ordukoa izanen da.
Zerbitzuaren beharrak betetze aldera, garabien eta gordelekuaren zerbitzuko langileentzat, orokorrean, 8 orduko lan txandak ezarri dira, aste osoan, eguneroko 24 orduak osatzeko. Lanaldiok txandakatu eginen dira, gaua barne dela.
Langile guztiek egunero 20 minutuko pausaldia izateko eskubidea dute, enpresaren kargura, eta txandaka lan egiten duten langileek zatitu gabe dena batera hartuko dute.
Iruñeko aparkaldi mugatuak erregulatzeko zerbitzuari atxikitako langileek, txandaka lan egiten ez badute, eskubidea dute astelehenetik ostiralera 20 minutuko pausaldiak egiteko, goizez, eta 12 minutukoak arratsaldez, eta larunbatetan bi pausaldi, bata 20 minutukoa eta 6koa bestea.
Aparkaldi mugatuak erregulatzeko zerbitzuari atxikitako langileen ordutegia eta lanaldia kasuan kasuko Udal Ordenantzak arautuko ditu.
11. artikulua. Lan egutegia.
Urte bakoitzeko egutegi eta ordutegi orokorrak aurreko urteko abenduan prestatuko dira. Egutegi eta ordutegi horiek langileen ordezkariek eta enpresako zuzendaritzak negoziatuko dituzte. Enpresa batzordearen eta enpresaren arteko negoziazioan sortzen diren aldaketak ere erantsiko dira. Izenpetu ondotik, enpresak langile guztiei banatuko die berehala.
Langileek hilean bi txanda aldaketa egiteko aukera izanen dute, betiere 48 ordu lehenago enpresari jakinaraziz gero. Mugagabeko txanda aldaketak ere egiten ahal dituzte, baina enpresari astebete lehenago jakinarazita.
12. artikulua. Oporrak.
Urteko oporraldi ordaindua 31 egun naturalekoa izanen da, denak segidan hartzen badira, eta ez dira diru konpentsazioaren truke ordezten ahal. Zatika hartzen badira, oporrak 32 egun naturalekoak izanen dira.
MUGA zerbitzuari atxikitako langileek opor egunak hartu beharko dituzte, nahitaez, Udalak zerbitzua eteten duen egunetan. Gainerako opor egunak langileek aukeratuko dituzte, eta 3 egun gehitzen ahal zaizkie egutegiaren doikuntzagatik (atsedenaldia).
Garabi zerbitzuari atxikitako langileentzat "Sanferminetako astea" oporralditik kanpo geldituko da.
Oporraldia enpresaren eta langileen ordezkarien artean adostuko da, urteko lehenbiziko hilabeteetan, ondoko hauek kontuan harturik:
2007. eta 2008. urteetan, Sanferminetan oporrak hartzerik ez duten kolektiboetako langileek hiru opor egun gehiago izanen dituzte, betiere Sanferminetan 5 egun baino gehiagotan lan egin baldin badute.
Iruñeko erdialdeari atxikitako kontrolatzaileen kasuan, oporrak eskatu baino lehen, oporraldiak aldez aurretik finkatuko dira, aste naturaletan banatuak.
Horrela, oporretan aste natural osoak hartzen ahalko dira (astelehenetik ostiralera), jarraian edo ez.
Gero, langileek lehentasun-hurrenkeraren arabera hautatuko dituzte oporraldiak.
Udalak ezartzen duen zerbitzuaren etenaldia eta aurreko lerroaldeetan finkatutako aste naturalak kendu ondoren gelditzen diren opor egunak noiznahi hartzen ahalko dira, aste naturalak onartzeko eta aukeratzeko adierazi den prozedura berari segituz.
Informazio hori eskutan izanik, enpresak oporren egutegia prestatuko du, oinarritzat hartuz aplikatzen diren jarraibideak, enpresaren eta langile batzordearen artean adostu zirenak edo hitzarmenaren indarraldian adosten direnak.
Prozedura honetara egokitzen ez diren opor-eskaerarik izanez gero, enpresak banan-banan aztertu eta erantzungo die.
Langileren bat oporrak hasteko unean aldi baterako ezintasun egoeran baldin bada, oporraldia etenik geldituko da eta enpresarekin adostuta beste oporraldi bat ezarriko da urte barruan, etenaldia ekarri zuen prozesua bukatu ondoren, edozein izanda ere aldi baterako ezintasunaren arrazoia.
Aldi baterako ezintasunaren ondoriozko baja oporraldia bitartean gertatzen bada (zerbitzua eteteagatik ezarritako oporraldian izan ezik) eta horren ondorioz langilea ospitaleratu behar bada, ospitaleratze egunak ez dira opor eguntzat hartuko eta egun horiek urteko beste garai batean hartzen ahalko dira, enpresarekin adostuta.
13. artikulua. Lizentziak eta baimenak.
Langile guztiek baimen eta lizentzia ordaindu hauek izateko eskubidea dute:
A) Langilearen ezkontza: 18 egun.
B) Seme-alaben edo anai-arreben ezkontza: egun bat probintzian bada eta hiru egun probintziatik kanpora.
C) Ezkontidearen edo bizilagunaren heriotza: 5 egun. Bigarren gradu arteko odoleko edo ezkontzako ahaideen heriotza: 4 egun probintzian bada eta 6 egun probintziatik kanpora. Bizilaguntzat joko dira bikotekideak normalean elkarrekin bizi badira eta "izatezko bikoteen erregistroan" inskribaturik badaude.
D) Emaztearen edo bizilagunaren erditzea: 4 egun probintzian bada eta 4 egun probintziatik kanpora.
E) 3 egun bigarren gradu bitarteko odoleko edo ezkontzako ahaideen istripu edo eritasun larriagatik edo ospitaleratzeagatik. Arrazoi horregatik langileak bidaiaren bat egin behar baldin badu, lau egun emanen dira.
F) Ohiko bizilekuz aldatzeko, 2 egun.
G) Eskubide eta eginbehar publikoak: horretarako behar duen denbora.
H) Titulu edo ikastaro akademikoetarako azterketak: horretarako behar duen denbora.
I) Haurrari esnea emateko denbora: Langileen Estatutuan ezarritakoa.
J) Bisita medikoa: horretarako behar duen denbora.
K) Seme-alaben bisita medikoa: 14 urte bitarteko seme-alabak Nafarroako Osasun Zerbitzuko espeziastengana edo pediatrarengana eramateko behar-beharrezkoa den denbora. Semeak edo alabak %33tik gorako minusbaliotasuna baldin badu, ez da adin mugarik izanen baimen hau erabiltzeko.
L) Lehenengo mailako odoleko ahaideen kirurgia anbulatorioaren ondorioz eguneko ospitaleratzea behar baldin bada, bi egun natural emanen dira eta horietako bat ospitaleratzearen egun berean hartu beharko da.
M) Amatasuna: 16 aste, eta erditze multiplea izanez gero, 18 aste.
N) Langileak 48 ordu baino lehenagotik idatziz eskatuz gero, 2006., 2007. eta 2008. urteetan, enpresak baimen ordainduko hiru egun emanen ditu urtean, baina administrarien, ikuskatzaileen eta gidarien kategorian langile bakar batek hartzen ahalko du baimen hori. Zaintzaileen kategorian, gehienez zortzi langilek hartzen ahalko dute egun berean delako baimena.
Egun horiek banaka edo batera hartzen ahalko dira.
A eta K atalen arteko letretan, biak barne, adierazitako kasu guztietan, baimena eskatzeko zergatiak eta inguruabar guztiak behar bezala justifikatu beharko dira.
Baimenak eta lizentziak ematearen ondorioetarako, izatezko bikoteek ezkonduek duten aintzatespen bera izanen dute, A atala salbu.
Zuzendaritzak konpromisioa hartu du, enpresaren aukerak eta beharrak kontuan hartuta, haurdun dauden langileentzako lanpostu aproposa bilatzeko edo egokitzeko, baldin eta beren lanpostuan arriskurik bada hala haurdunarentzat nola umekiarentzat.
14. artikulua. Lanaldia murriztea.
Legepeko zaintza dela eta, langileren batek sei urtetik beherako haurra edo ordaindutako lanik egiten ez duen urritu fisiko nahiz psikikoren bat bere kargu izanez gero, eskubidea izanen du lanaldia murrizteko, %25 gutxienez eta %50 gehienez, lansaria ere hein berean murriztuta. Atal honetan azaldutako lanaldi murrizketa langile guztien eskubidea da, hala gizonezkoena nola emakumezkoena, eta Langileen Estatutuaren 37.5 artikuluan ezarritako moduan erabili ahalko da.
15. artikulua. Laneko jantziak.
Enpresak honako jantzi hauek emanen dizkie langileei:
MUGAko langileeentzat urtero:
_Udako bi galtza pare.
_Neguko bi galtza pare.
_Mahuka luzeko bi atorra.
_Mahuka motzeko bi atorra.
_Neguko jertse bat.
_Pare bat eskularru termiko.
_Lepoko "buff" polar bat.
_4 galtzerdi pare, negukoak, edo bi leotardo pare.
_4 galtzerdi pare, negukoak.
_Udako zapata/bota pare bat.
_Neguko zapata/bota pare bat.
MUGAko langileentzat bi urtetik behin:
_Jantzi polar bat.
_Udako jertse bat, lepo finekoa.
_Anorak bat (jantziaren kalitatearen arabera, 3 urtetik behin).
_Uretako galtza pare bat.
Aipatutako jantziez gainera, langileei gerriko bana emanen zaie, hondatzen den aldiro.
Garabiko langileeentzat urtero:
_Bi galtza pare.
_Bi atorra edo bi polo.
_Uretako segurtasuneko bota pare bat.
_Segurtasuneko zapata pare bat.
_Jertsea edo txalekoa.
_Larruzko bi pare eskularru.
_Gomazko bi pare eskularru.
_Lepoko "buff" polar bat.
_Bi galtzerdi pare, negukoak.
_Bi galtzerdi pare, udakoak.
Garabiko langileentzat bi urtetik behin:
_Uretako janzki bat.
_Anorak bat.
_Zamar bat.
_Uretako bota pare bat.
Aipatutako jantziez gainera, garabiak gidatzearen ardura duten langileei txaleko distiragarri bana emanen zaie. Kontuan izanik janzki horren egoera eta iraupena, berria emanen zaie.
Udako arropa maiatzean banatuko da eta negukoa urrian.
Prebentzioko batzordea organo parte-hartzailea izanen da kalitatearen estandarra hautatzerakoan.
16. artikulua. Azterketa medikoa.
Enpresak bere zerbitzuko langileei osasun egoerari buruzko aldiroko zaintza bermatuko die, lan motaren berezko arriskuak kontuan hartuta eta, hala eskatzen duten emakumezko langileei, berriz, azterketa ginekologikoa, kategoria bakoitzerako ezarritako protokoloari jarraikiz. Eginkizun horiek Medikuntza Prebentiboko Zerbitzuaren ardura izanen dira.
17. artikulua. Aldi baterako ezintasunaren osagarria.
Eritasun arrunta edo profesionala, laneko istripua edo lanetik kanpokoa direla-eta, aldi baterako ezintasunagatik erakunde kudeatzaileak ematen dituen prestazioez gainera, enpresak osagarri bat ordainduko du, zeinen bidez, arauzko prestazioekin batuz, bermatzen baita nominan agertzen diren kontzeptu finko guztien %100 kobratzea aldi baterako ezintasunak dirauen bitartean.
Emakumezko langile bat "haurdunaldiko arrisku egoeraren" ondorioz kontratu etenaldian dagoenean, enpresak arauzko prestazioak osatuko ditu, soldata finkoaren %100era iritsi arte. Ordainketa behin batean eginen da, honela:
_Emakumezko langilea hilaren 15a baino lehen itzultzen bada lanera, hilabete horretan ordainduko zaio.
_Aipatu data baino geroago itzultzen bada, lanera bueltatu eta hurrengo hilabeteko nominan ordainduko zaio.
18. artikulua. Prestakuntza.
Langileek eskubidea dute erraztasunak eman diezazkieten titulu akademiko nahiz profesionalak erdiesteko ikasketak egiteko, lanbide hobekuntzako ikastaroak egiteko eta enpresak edo enpresarekin loturiko enteek ematen dituzten lanbide berrikuntza eta gaikuntza ikastaroetan parte hartzeko.
Langileek, halaber, eskubidea dute lanaldiaren herena bitarte murrizteko, soldataren proportziozko murriztapen lineala aplikatzen zaiela, ikasketa homologatuak (titulu ofiziala) egiten dituztenean.
Sektore honetako langileen prestakuntzak duen garrantzia ikusita, Gobernuak, sindikatuek eta enpresaburuek sinatutako itunaren barnean erabaki da ezen, hitzarmenaren batzorde paritarioak proposa diezaizkiola enpresari dauden beharretarako egoki iruditzen zaizkion restakuntza ekintzak, eta informazioa izan dezala enpresaren urteko prestakuntza planaren gainean.
19. artikulua. Eszedentziak.
Eszedentziak izan daitezke borondatezkoak eta nahitaezkoak. Lanpostuaren erreserba dakarren eszedentzia mota bakarra nahitaezko eszedentzia da, baldin eta legez ezarrita badago, eta irauten duen denborak antzinatasunerako balioko du.
Eszedentzia guztiak idatziz eskatuko dira eta, legeak kontrakoa xedatzen ez duen bitartean, langileek enpresan gutxienez urtebeteko antzinatasuna egiaztatu beharko dute borondatezko eszedentzia hartu ahal izateko.
1) Nahitaezko eszedentzia, enpresari jakinarazpen fede-emailea egin ondoren, kasu hauetan emanen da:
(a) Kargu publiko baterako izendatua edo hautatua izateagatik.
(b) Eritasunagatik, aldi baterako ezintasunaren epea akitu eta langilea behin-behineko baliezintasun egoeran dagoen bitartean.
(c) Probintziako eremuan nahiz zabalagoan eginkizun sindikaletan aritzeagatik, betiere sindikatuak egiaztatzen badu legezko ordezkagaitasuna baduela lantokiaren edo enpresaren sektore berean eta esparru espezifiko eta konkretu berean.
(d) Seme-alaba baten jaiotzagatik edo adopzioagatik, indarra duten legeei jarraikiz.
Nahitaezko eszedentzian dagoen langileak enpresara itzuli beharko du, bere eginkizuna bukatu edo kontratu-etenaldia sortu zuen arrazoia edo zergatia desagertu eta ondoko 30 egun naturaleko epean, gehienez ere. Epe horretan egiten ez bada, lanpostuaren erreserba galduko du eta langilea borondatezko eszedentzia egoeran geldituko da.
2) Borondatezko eszedentzia ere idatziz eskatu behar zaio enpresari, lehenbailehen, eta, nolanahi ere, 15 egun lehenago, gutxienez.
Borondatezko eszendentzia sei hilabetetik bost urte bitarteko epe jarraitu baterako emanen du enpresak, betiere Langileariaren Estatutuaren 46.2 artikuluan ezarritako baldintzak betetzen badira.
Borondatezko eszedentzia dagoen langileari enpresan duen lanpostua gordeko zaio urtebeterako. Epea bukatu ondoren lehentasunezko eskubidea baino ez du izanen eskaera egin zuenean berak izandako kategoriako edo antzeko lanpostu huts batera itzultzeko; baina horretarako enpresari zuzendutako idazki baten bidez itzultzeko asmoaren berri eman beharko dio eszedentziaren bukaera baino hogeita hamar egun natural lehenago.
Eskubide horretaz berriro balia daiteke langile bera, aurreko eszedentzia bukatu eta 4 urte igaro eta gero.
3) Familiakoak zaintzeko eszedentzia. Langileen Estatutuaren 46. artikuluarekin bat.
(a) Seme-alaba zaintzeko, berea nahiz adopziokoa, hiru urtetik beherako iraupena. (L.E.aren 46.2 art.).
(b) Bigarren gradu bitarteko odol_ edo ezkontza-ahaideak zaintzeko. Urtebetetik beherako iraupena. (L.E.aren 46.3 art.).
20. artikulua. Baimen ordaindugabea.
Gutxienez urtebeteko antzinatasuna duten langile guztiek eskubidea dute lan kontratua eteteko, lanean hasi eta urtebetera, gutxienez hamabost egunez eta gehienez bi hilabetez, etenik gabe. Etenaldi hori egiteko, gutxienez 15 egun lehenago eskatu beharko da. Horrelako etenaldiaz ezin izanen dira 8 pertsona baino gehiago baliatu aldi berean.
21. artikulua. Ordainsariak.
Lan hitzarmen honetan itundutako soldatak eta plusak eranskineko lansarien tauletan ageri dira.
22. artikulua. Oinarrizko soldata.
Lan hitzarmen honetan bildutako langileen oinarrizko soldata eranskinean ageri diren 2006. urterako soldaten tauletan aipatzen dena izanen da. Hurrengo urteetan honela igoko da:
_2007. urtea: 45 euro finko hilero (ez dira hilero pilatuko).
_2008. urtea: 50 euro finko hilero (ez dira hilero pilatuko).
23. artikulua. Antzinatasuna.
Antzinatasunaren ondorioetarako, langilea enpresan bere zerbitzua ematen hasi zeneko lehenengo egunetik kontatuko da.
Antzinatasunari damokionez, oinarrizko soldataren ehuneko bost ordainduko da antzinatasun-hirurteko bakoitzagatik.
Hirurtekoak enpresan lan egindako denboraren arabera kontatuko dira eta hirurtekoa betetzen den urteko urtarrilaren lehenetik sortzen hasiko. Antzinatasun urteengatiko hobaria soldataren parte bat da eta aparteko orduak ordaintzeko ere kontatuko da.
24. artikulua. Aparteko eskersariak.
Langileek aparteko bi eskersari kobratuko dituzte, bata ekainean eta bestea abenduan. Ekainekoa hilaren bigarren hamabostaldian ordainduko zaie eta abendukoa hilaren 20a arteko tartean. Horietako bakoitza sei hilabetetik sortzen da.
Mozkinetan parte hartzea._Eskersari hau urtero sortuko da eta hamabi hilabetetan proportzioz banatuta kobratuko.
Hiru paga horiek kalkulatzeko, tauletan agertzen diren eta 15 hilabetetan kobratzen diren kontzeptuen batuketaren emaitza hartuko da aintzat, gehi langile bakoitzari dagokion antzinatasuna.
25. artikulua. Hitzarmeneko plusa.
Lan hitzarmen honen eraginpeko langileek lan hitzarmenaren plusa kobratuko dute. Horren zenbatekoa eranskineko 2006. urterako soldaten tauletan azaltzen da. Hori ere lan hitzarmen honen indarraldian berrikusten ahalko da, baldintza hauetan:
_2007. urtea: 2006. urteko KPI erreala.
_2008. urtea: 2007. urteko KPI erreala.
26. artikulua. Gaueko lanaren plusa.
22:00etatik 6:00ak arteko orduak gauekotzat joko dira. 2006. urterako, plusaren zenbatekoa eranskineko taulan adierazitakoa izanen da eta lan hitzarmen honen indarraldian berrikusiko da, honela:
_2007. urtea: 2006. urteko KPI erreala.
_2008. urtea: 2007. urteko KPI erreala.
27. artikulua. Txandakako lanaren plusa.
Txandakako lanean ari den langileak eranskineko 2006. urterako tauletan bere kategoriarako adierazten den zenbatekoa jasoko du. Lan hitzarmen honen indarraldian diru-kopuru hori berrikusiko da, honela:
_2007. urtea: 2006. urteko KPI erreala.
_2008. urtea: 2007. urteko KPI erreala.
28. artikulua. Plusak: jaiegunekoa eta igandekoa.
Enpresak 2006. urtean lan egindako jaiegun eta igande bakoitzeko eranskineko tauletan ageri den zenbatekoa ordainduko die bere langileei. Lan hitzarmen honen indarraldian diru-kopuru hori berrikusiko da, aurreko artikuluko baldintza beretan.
29. artikulua. Gidariaren plusa.
Enpresak eranskineko 2006. urterako tauletan ageri den zenbatekoa ordainduko die bere gidari / mekanikariei. Lan hitzarmen honen indarraldian diru-kopuru hori berrikusiko da, aurreko artikuluko baldintza beretan.
30. artikulua. Garraiorako plusa.
Langileak beren lantokira egin beharreko joan-etorrietan sortzen diren gastuak ordaintzeko soldataz kanpoko urteko plus bat ezarri da, 2006. urterako 506,88 eurokoa, hamabi hilabetetan proportzioz banatuta kobratuko dena. Plus hau lan hitzarmen honen indarraldian berrikusiko da, aurreko artikuluan ezarri bezala.
31. artikulua. Dirua erabiltzeagatiko kalte-ordaina.
Kaxan lanean diharduten langileek, kaxako kontaketan erantzukizunak badituzte, plus bat jasoko dute, 2006. urtean 879'96 eurokoa, hamabi hilabetetan proportzioz banatuta kobratuko dena. Plus hau lan hitzarmen honen indarraldian berrikusiko da, aurreko artikuluan ezarri bezala.
32. artikulua. Dirubilketaren plusa.
Ikuskatzaile mailako langileek dirubilketa eginkizunetan aritzen direnez, dirubilketaren plusa jasoko dute, eranskineko 2006. urterako soldaten tauletan adierazitako zenbatekoan. Lan hitzarmen honen indarraldian diru-kopuru hori aurreko artikuluan ezarri bezala berrikusiko da.
Dirubilketa lanean aritzen den beste edozein langilek "dirubilketaren plusa" jasoko du, dagokion hilabetean jarduera horretan ematen duen denboraren arabera. Hori kalkulatzeko, hileko oinarritzat hartuko da 2006. urterako, eranskineko tauletan ikuskatzaile kategoriarako ageri den zenbatekoa. Diru-kopuru hori aurreko atalean adierazitako irizpide berberak erabiliz berrikusiko da.
33. artikulua. Jantzietarako plusa.
Lan hitzarmen honen eraginpeko MUGAko langileek soldataz kanpoko plus bat kobratuko dute beren uniformea mantentzeko eta zaintzeko, 2006. urterako 588,36 eurokoa urtean, proportzioz banatutako hamabi zatitan kobratuko dena. Plus hau lan hitzarmen honen indarraldian berrikusiko da, aurreko artikuluan ezarri bezala.
34. artikulua. Lanabesen mantentzea.
Igorgailuak eta terminalak erabili, zaindu eta elikatzen dituzten langileek 2006. urterako soldataz kanpoko plus bat kobratuko dute, 120,96 eurokoa urtean, proportzioz banatutako hamabi zatitan kobratuko dena. Plus hau lan hitzarmen honen indarraldian berrikusiko da, aurreko artikuluan ezarri bezala.
35. artikulua. Ordu poltsa.
Ordu sindikalen kreditua, legez egokitzen dena, urteko poltsa batean metatzen ahal da. Ordu horiek enpresa batzordeko edozein kidek edo sindikatu beraren afiliatuek erabil ditzakete. Afiliatuek ordu-kredituaz baliatzeko justifikatu egin beharko dute enpresaren aurrean.
36. artikulua. Aparteko orduak.
Enpresaren Zuzendaritzak eta langile taldeak ahalik eta aparteko ordu gutxien egiteko erabakia hartu dute.
Aparteko orduak ondoko bi modu hauetara konpentsa daitezke, langilearen nahierara:
_Atseden orduekin, proportzio honetan: 1,75 atseden ordu aparteko ordu bakoitzeko.
_Ordain ekonomikoaren bidez, formula honen arabera:
Egiazko soldata = oinarrizko soldata + antzinatasuna + lan hitzarmenaren plusa + lanabesen plusa + jantzien plusa + gidariaren plusa.
37. artikulua. Lana egun librean.
Langileari urteko egutegian finkatutako egun libre batean lan egitea eskatzen bazaio, berak erabakiko du egun horretan lan egin edo ez.
Egun libre batean lan egiteak sor dakiokeen kaltea konpentsatzeko, langileak bi modu hauek izanen ditu aukeran:
_Atseden orduekin, proportzio honetan: 1,75 atseden ordu aparteko ordu bakoitzeko.
_Ordain ekonomikoaren bidez, formula honen arabera:
Egiazko soldata = oinarrizko soldata + antzinatasuna + lan hitzarmenaren plusa + lanabesen plusa + jantzien plusa + gidariaren plusa.
38. artikulua. Hutsegiteak eta zehapenak.
Hutsegiteak eta zehapenak
Enpresako zuzendaritzak zehatzen ahal ditu langileak, aplikatzekoak diren arauzko xedapenetan eta, zehazki, lan hitzarmen honetan ezarritako lan arauak ez betetzeagatik.
Hutsegiteen balorazioa eta horien gainean enpresako zuzendaritzak ezarritako zehapenak beti berraztertzen ahal dira jurisdikzio eskudunaren aurrean. Hutsegite arin, larri eta oso larriengatik zehapena jartzeko langileari idatziz jakinarazi behar zaio eta bertan adieraziko dira data eta hura jartzeko arrazoiak.
Ezin izanen da opor egunak edo langilearen atseden hartzeko eskubideak murriztuko lituzkeen zehapenik ezarri, ez eta nominan kenketarik egin ere.
Sektoreko enpresen zerbitzuko langileen hutsegiteak, garrantziaren arabera eta, hala gertatzen denean, berriro egin izanaren arabera, honela sailkatuko dira: arinak, larriak eta oso larriak, lan hitzarmen honen hurrengo artikuluetan xedatzen denarekin bat.
Hutsegite arinak
Honako hauek hutsegite arinak dira:
a) Hilabete baten barnean lanera hiru aldiz berandu iristea (hogeita hamar minututik behera), bidezko arrazoirik gabe.
b) Lantokitik edo lanpostutik alde egitea, nahiz eta denbora laburrean izan, bidezko zergatiko edo arrazoirik gabe, baina alde egite horrek kalterik ez dakarrenean enpresaren jarduerarako, edo lankideei kalte edo istripurik eragiten ez dienean; izan ere, horrelakoetan hutsegite larritzat edo oso larritzat joko baitaitezke.
c) Bidezko arrazoia izanda lanera joan ez eta berrogeita zortzi ordu lehenago, gutxienez, ez jakinaraztea, salbu eta behar bezala frogatzen bada ezinezkoa izan dela jakinaraztea.
d) Enpresari ez jakinaraztea lan arloan eragina izan dezakeen edozein egoeraren aldaketa, adibidez ohiko bizilekua aldatzea.
e) Langileak bere kargura edo ardurapean izan dezakeen materialaren zainketari buruzko axolagabekeria eta horren ondorioz, hondamen txikiak agertu izana.
f) Norberaren garbitasun eta txukuntasun eza.
g) Herritar edo lankideekiko zakarkeria, tartean irain larririk ez badago.
h) Aldi baterako ezintasun kasuan, alta, baja edo berrespen parteen igorpena arrazoirik eman gabe atzeratzea.
i) Goragoko mailako buru edo nagusi hurrenari ez abisatzea lana egokiro egiteko behar den materialak akatsak dituela edo falta dela.
j) Lanaldian lanarekin zerikusirik ez duten gaiei buruz eztabaidatzea. Horrelako eztabaidetan liskar edo istilu larriak sortuko balira, hutsegite larri edo oso larritzat hartuko lirateke.
k) Zerbitzu orduetan bi kontrolatzaile edo gehiago biltzea, baldin eta bilera horrek, hitzak berak adierazten duenez, bi kontrolatzaile elkarri agurtzea baino zerbait gehiago denean, salbu eta premiazko laguntza eskatzearen ondorioz bildu badira edo horretarako nagusi hurrenaren baimena badute.
l) Zerbitzuan hastea izendatua duten tokian ez beste batean.
m) Laneko Arriskuen Prebentzioaren eta Osasunaren arloko arauak ez betetzea, langilearentzat, lankideentzat edo hirugarrenentzat arrisku larririk ez denean.
n) Jantziak behar ez bezala erabiltzea, baina enpresaren irudiari kalterik ez dakarkionean.
Hutsegite larriak:
Hutsegite larriak honako hauek dira:
a) Hilabete batean hiru aldiz berandu iristea, arrazoitu gabe.
b) Hilabete batean egun batean edo bitan lanera ez agertzea, bidezko arrazoirik gabe.
c) Laneko aginduak edo jarraibideak ez betetzea, segurtasun eta higiene arauei buruzkoak barne, bai eta lanean zuhurtziarik gabe edo zabarkeriaz aritzea, salbu eta horien ondorioz enpresari kalte larriak edo instalazioetan, makinetan eta, oro har, enpresaren ondasunetan matxurak sortzen direnean edo jendearentzat istripu arriskua dakarrenean, zeren horrelakoetan hutsegite oso larritzat hartuko baitira.
d) Eritasuna edo istripua simulatzea.
e) Lanean edo lanaren inguruan, herritarrak edo lankideak larriki erasotzea eta iraintzea.
f) Garabietan kalteak egitea axolagabekeriaz edo bidezko arrazoirik gabe. Hutsegite larritzat joko da inguruabar horietan garabiei 3 kolpe ematea.
g) Beste langile bat lanean agertu dela simulatzea, haren sinadura, fitxa edo lantokiko txartela erabiliz.
h) Behar den baimenik gabe, lan partikularrak egitea lanorduetan, eta orobat, enpresaren lanabesak edo materialak beharrezko baimenik gabe norbere probetxurako erabiltzea.
i) Nahitaezko erreserbaren sekretua haustea edo bortxatzea, enpresari kalterik egiten ez dionean.
j) Zuzendaritzari edo goragokoei zerbitzuaren edo lanaren gaineko informazio faltsua ematea; baina begibistakoa bada fede gaiztoz eman dela, orduan hutsegite oso larritzat joko da.
k) Deskuiduak eta okerrak, maiz errepikatzen direnean edo enpresari kalte egiten diotenean.
l) Hitzen bidez lankide bat edo menpeko bat iraintzea edo mehatxatzea.
m) Salaketak deuseztea, bidezko arrazoirik gabe.
n) 30 egun naturaleko epean hiru hutsegite arin baino gahiago egitea, era desberdinetakoak izanik ere.
Hutsegite oso larriak.
Hutsegite oso larriak honako hauek dira:
a) Bidezko arrazoirik gabe hiru hilabeteko aldian hamar aldiz baino gehiagotan berandu iristea edo hogei aldiz baino gehiagotan sei hilabeteko epean.
b) Lanera bi egun jarraian baino gehiagotan huts egitea edo lau egun tartekatutan hilabete batean, bidezko arrazoi edo zergatirik gabe.
c) Agindutako lanean, kudeaketan edo jardueran iruzur edo konfiantza-abusu egitea; beste lankideei, enpresari edo beste edozein pertsonari ebastea eta lapurtzea zerbitzu egintzetan.
d) Lanabesak, makinak, tresneria, instalazioak, e.a. hondatzea, haustea edo haietan txikizioak egitea.
e) Lanorduetan mozkortzea edo/eta drogak hartzea.
f) Enpresakoa ez den pertsona bati nahitaez isilpean eduki beharreko datuak ezagutaraztea, enpresari kalte larria egiten bazaio.
g) Enpresakoak ez diren pertsonei lanaren antolakuntza planak ezagutaraztea, dokumentuak eta formularioak ebatsi edo kopiatzea, enpresaren baimenik gabe.
h) Aginte eginkizunetan dihardutenen agintekeria, hots, haien agindupeko enplegatuen pertsona edo giza duintasunari zor zaion errespetua gutxiesten duen jokamoldea.
i) Lanlekutik arrazoirik gabe alde egitea, batez ere aginte edo erantzukizuneko postuak direnean, edo enpresarentzat kalte larria sortzen denean edo langileari, lankideei edo hirugarrenei istripua eragin diezaiekenean.
j) Laneko aginduak eta jarraibideak betetzeari etengabe eta modu iraunkorrean uko egitea, segurtasun eta higieneko arauak barne, eta, orobat, zuhurtziarik eza eta axolagabekeria lanean, kalte oso larriak eragiten dizkiotenean enpresari.
k) Laneko Arriskuen Prebentzioaren eta Osasunaren arloko arauak ez betetzea, langilearentzat, lankideentzat edo hirugarrenentzat arrisku larria denean.
l) Hogeita hamar eguneko epean hiru hutsegite larri metatzea, era desberdinekoak izanik ere, zehapena jarri izan bazaie, betiere.
m) Sexu-jazarpena.
Zehapenak. Aplikazioa.
1._Enpresek, egindako hutsegiteen larria eta inguruabarrak kontuan hartuta, zehapen hauek jartzen ahal dituzte:
A) Hutsegite arinak:
a) idatzizko kargu-hartzea.
B) Hutsegite larriak:
a) enplegu-soldaten etenaldia, egun batetik hamarrera bitarte.
C) Hutsegite oso larriak:
a) enplegu-soldaten etenaldia, hamaika egunetik berrogeita bostera bitarte.
b) Kaleratzea.
2._Aurreko 1. puntuko zehapenak aplikatzeko eta mailakatzeko, kontuan hartuko da:
_Huts egin duenaren erantzukizun maila handia ala txikia den.
_Egintza horrek gainerako langileengan eta enpresan duen eragina.
3._Hutsegite larriengatik edo oso larriengatik zehapenak jarri aitzin, enpresak ustezko hutsegitearen jakinarazpena emanen dio langile afektatuari, enpresa batzordeko kide baten aurrean. Jakinarazpena jaso ondoren, langileak bost egun balioduneko epea izanen du bere defentsarako bidezko iruditzen zaizkion idatzizko nahiz ahozko alegazioak egiteko, sindikatu batek aholkatuta, kasua bada, eta haren aitzinean, komenigarri iruditzen bazaio; gero, alegazioak aurkeztu badira edo 5 egun balioduneko epea iragan bada alegaziorik egin gabe, enpresak bidezko juzkatzen duen erabakia hartuko du langileari leporatutako ustezko egintzen gainean.
Zehatu duten langilea langileriaren ordezkaria bada, enpresa batzordeari ere entzutea emanen zaio, hutsegite larria edo oso larria ustez egin duen langileari jakinarazpena eman eta bost egun balioduneko epean ongi iruditzen zaizkion alegazioak egin ditzan.
4._Hutsegite arinak hamar egunen buruan preskribatzen dira, larriak hogei egunen buruan eta oso larriak hirurogeiren buruan, enpresak hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan, enpresak haren berri izandako egunetik kontatzen hasita.
5._Hutsegite larrien eta oso larrien berri emanen zaie langileen ordezkariei.
39. artikulua. Laneko istripuagatiko balioezintasun eta heriotza asegurua.
Enpresa behartua dago lan istripuen aseguru kolektiboaren poliza bat ituntzera, baldintza hauetan:
_Lan istripuaren ondoriozko ezintasun iraunkor osoa: 18.000 euroko kapital aseguratua langile bakoitzeko.
_Ordaindutako lan guztietarako erabateko ezintasun iraunkorra eta baliaezintasun handia: 34.377,89 euroko kapital aseguratua langile bakoitzeko.
_Lan istripuaren ondoriozko heriotza: 21.876,84 euroko kapital aseguratua langile bakoitzeko.
40. artikulua. Erantzukizun zibila eta penala.
Lanaren ezaugarriak eta inguruabar bereziak kontuan hartuta, enpresako zuzendaritzak aginduzko lege laguntza emanen du ondoko inguruabarrak gertatzen direnean:
_Erreklamazio judiziala jartzen zaionean langileari, haren egintza profesionalaren ondorioz.
_Langileak hirugarren pertsonen aurka erreklamazio judiziala jartzen duenean, haren egintza profesionalaren ondorioz, betiere enpresak jarriko duen talde juridikoak uste badu erreklamazioa bidezkoa egiteko froga fede-emailerik bada.
Kasu horietan, lanalditik kanpora prozesu judizialetan laguntzeko erabiltzen den denbora baliobereko atsedenaldiekin konpentsatuko da.
41. artikulua. Eskubide sindikalak.
Sindikatu batean afiliatutako langileek, enpresaren eremuan, eskubidea dute:
a) Atal sindikalak eratzeko, haien estatutuetan eta LOLSko 8. artikuluan ezarritakoarekin bat.
b) Bilerak egiteko, enpresako zuzendaritzari jakinarazi ondoren, kuotak biltzeko edo nominan deskontatuz kobratzeko, informazio sindikala banatzeko, lanordutik kanpo eta enpresaren jarduera normala oztopatu gabe, inola ere.
c) Norbere sindikatuak igorritako informazio guztia jasotzeko.
d) Iragarki ohola edukitzeko. Lantokian jarriko da, langile guztien eskura egonen dela bermatuz.
42. artikulua. Gidabaimena kentzea.
Gidari bati gidabaimena kentzen zaionean hiru hilabetetik beherako aldi baterako, hutsegitearen (behin ere ez delitu baten) ondoriozko zehapen administratiboa edo epai judiziala betez, eta hutsegitea nahiz arau-haustea enpresako ibilgailu bat gidatzean egin bada, enpresaren kontura eta agindura, enpresak konpromisoa hartzen du langile hori kategoria bereko edo beheragoko lanpostu batean kokatzeko, gidabaimenik gabe dagoen bitartean. Horrelakoetan, lanpostu berriari dagozkion oinarrizko soldata, hitzarmenaren plusa, antzinatasuna eta gainerako osagarriak kobratuko ditu.
Aurreko lerroaldearen arabera, langileari gidabaimena kentzen zaionean, urteko oporraldia hartuko du, lehendik hartu ez badu, osorik edo partez, gidabaimena kendu eta lehenbiziko egunetan.
Gidabaimena 90 egunetik gorako eperako kentzen badiote, denbora hori iragan ondoren, langilearen lan kontratua eten eginen da gidabaimenik gabe egon beharreko epea bukatzen den egunera arte. Ondotik, langilea berriro itzuliko da enpresara. Salbuespen dira hainbat kasu, zeinetan langileak zuzen gidatu arren, gidabaimena kendu baitzaio istripua bere erruz edo gaizki gidatu duelako gertatu ez bada ere. Kasu horretan, ez zaio etengo lan kontratua, gidabaimena 90 egun baino gehiagorako kentzen badiote ere, eta enpresak langilea kategoria bereko edo beheragoko lanpostu batean kokatzeko konpromisoa hartzen du, gidabaimenik gabe dagoen bitartean, eta lanpostu berriari dagozkion oinarrizko soldata, hitzarmenaren plusa, antzinatasuna eta gainerako osagarriak kobratuko ditu. Era berean, langileak urteko oporraldia hartuko du, lehendik hartu ez badu, osorik edo partez, gidabaimena kendu eta lehenbiziko egunetan.
43. artikulua. Kategoriak.
Arduraduna:
Nagusi hurrenaren agindura dagoen enplegatua, zuzendaritzarako gaitasun praktikoak izanik, langile talde baten lanak zuzentzen eta zaintzen dituena. Kategoria hau beti izan behar da 9 langile baino gehiagoko zentroetan.
Gidaria-mekanikaria:
Bide publikotik ibilgailuak eramateko garabi-ibilgailuak gidatzen dituen enplegatua. Gidatzeaz gainera zeregin hauek ditu:
_Garabien mantentze-lanak egitea eta garbitzea.
_Eraman beharreko ibilgailuak estekatzea.
_Hesiak eta seinaleak garraiatzea.
Arduradunaren agindura dago eta, bertaratzen badira, baita udaltzainen agindura ere.
Ikuskatzailea:
Erregulazio zerbitzua ematen duen enpresaren baliabideak zuzen erabiltzen ote diren ikuskatzen duen enplegatua, enpresak ezarritako jarraibideekin bat jarduten duena, gorabeheraren bat edo normala ez den zerbait gertatzen denean.
Zeregin hauek ditu, nagusiki:
_Kontrolatzaileen lana gainbegiratzea eta haiei laguntza ematea, enpresak eman dizkien jarraibideak eta arauak bete ditzaten.
_Tiketak ematen dituzten makinen mantentze-lanez arduratzea eta bertako dirua biltzea.
_Nagusi hurrenak esleitzen dizkion bestelako antolakuntza lanak.
Kontrolatzailea:
Eremu urdinean aparkatutako ibilgailuak zaintzen diharduen enplegatua, zeregin hauek dituena: araua hausten den ala ez begiratzea eta, bidezkoa bada, salaketa abisua egitea. Erabiltzaileari lagunduko dio, tiketak ematen dituen makinaren eta eremu urdinaren funtzionamenduari buruzko azalpenak emanez.
1. mailako administrari-ofiziala.
Ekimena eskatzen duten administrazio lanetan aritzen den enplegatua, lan horien erantzukizuna bere gain hartuz eta arlo horretan enpresaren arauak eta jarraibideak aplikatuz.
2. mailako administrari-ofiziala.
Nagusi hurrenak gainbegiratuta, administrazio lanetan diharduen enplegatua. Konfiantza handiena eskatzen duten lanetan ere aritzen ahal da, nagusi hurrenaren agindura eta haren ikuskapenean.
Administrari laguntzailea
Nagusi hurrenak gainbegiratu eta koordinatuta eta haren aginduetara, administrazio lanetan diharduena, arlo horretan enpresaren arauak eta jarraibideak aplikatuz.
Garabi zerbitzuko urgazlea.
Garabi zerbitzuko arduradunaren eta haren nagusiaren zuzeneko agindura dagoen langilea, garabien gordelekuan lan egiten duena.
Haren eginkizunak funtsean hauek dira: ibilgailuen sarrera kontrolatzea, ibilgailuak zaintzea, gordelekuaren egoera gainbegiratzea (ibilbideak ...), ibilgailuen jabeei edo jabeen izenean agertzen direnei laguntzea eta ibilgailua entregatzea, eta intzidentzia parteak egunero betetzea. Gainera, bere lanerako erabiltzen dituen instalazioak egoera onean zaintzeaz arduratuko da, hala nola, garbiketaz, garabiaren oinarrizko mantentze-lanaz, haiek garbitzea barne, eta noiz edo noiz, zerbitzu arrazoiengatik eskatzen bazaio, igorgailuen eta abarren kontrola ere egin beharko du, Udalak errefortzuko kanpaina jakin batzuetarako egiten dituen eskaerei erantzun beharko die (hesiak kargatzen laguntzea, ibilgailuak deskargatzen...), eta garabien gordelekuan ematen den zerbitzuaren funtzionamendu egokirako eskattzen diren gainerako eginkizunak.
44. artikulua. Osasuna eta laneko arriskuen prebentzioa.
Laneko Arriskuei Aurrea hartzeari buruzko azaroaren 8ko 31/1995 Legearekin bat, batzorde bat eratu da, gai hori enpresan bideratzeko ardura duena, lege hartam eta hura garatzen duten erregelamenduetan xedatu bezala eta haietan finkatutako kideek osatuta.
Segurtasun eta osasunaren batzordea Laneko Arriskuei Aurrea hartzeari buruzko azaroaren 8ko 31/1995 Legearen 38. artikuluari eta hurrengoei jarraikiz eratuko da eta haietan emandako eskumenak eta ahalmenak izanen ditu.
Segurtasun eta osasunaren batzordeak hiru hilabetez behin bilkura arrunta eginen du eta berezia, berriz, beharra dagoenean edo batzordeko ordezkariren batek eskatzen duenean.
46. artikulua. Lan-bizitza eta familiakoa ongi uztartzea.
_Amatasunaren atsedenaldia:
Langileen Estatutuaren 48.4 artikuluan finkatutako amatasunaren atsedenaldiari beste 14 egun natural eransten ahalko zaizkio, baina erditu aurre-aurreko egunetan hartu beharko dira nahitaez.
Langileak nahi izanez gero, Langileen Estatutuaren 48.4 artikuluan ezarritako amatasunaren atsedenaldia (ez aurreko lerroaldean adierazitakoa) proportzionalki luzatzen ahalko da, goizeko edo arratsaldeko txandetan lanaldi partziala eginez, 16 asteko atsedenaldia osatu arte, betiere enpresarekin aurretik adostuta. (Kontuan hartu lehenbiziko sei asteak oso-osorik hartu behar dituela amak atsedena hartzeko)
_Lanaldia murriztea:
Legepeko zaintza dela-eta, langileren batek sei urtez beherako haurra edo ordaindutako lanik egiten ez duen minusbaliatu fisiko, psikiko nahiz sentsorialen bat bere kargu izanez gero, eskubidea izanen du eguneko lanaldia murrizteko, %25 gutxienez eta %50 gehienez ere, lansaria ere hein berean murriztuta.
_Haurrari esnea emateko baimena:
Bederatzi hilabetetik beherako seme-alabaren bat duten enplegatuek ordubete murrizten ahal dute lanaldia (soldata murriztu gabe), lanaldiaren hasieran edo bukaeran, betiere Langileen Estatutuaren 37.4 artikuluan ezartzen diren baldintzak betetzen badira. . Baimen honi dagokion eguneko ordubeteko murrizpena (L.E. 37.4 art.) pilatu daiteke eta orduen partez egun osoak hartu, amatasunaren atsedenaldia luzatzeko.
Klausula gehigarri bakarra
Alderdiek adostu dutenez, hitzarmen honetan aurreikusi ez diren kasuetan honakoak aplikatuko dira: indarra duen legeria, Bide publikoan ibilgailuen aparkaldi mugatua kontrolatzeko sektorearen hitzarmen nazionala eta Bide publikoko aparkaldi arautuaren ordenantzak.
I. ERANSKINA
2006. urteko soldaten taulak (eurotan)
OINARR. HITZARM. JANTZIEN LANAB. GARRAIO DIRUBILK. DIRUA TXANDAK. GIDARI. JAIEG. IGAND. GAUEKO
KATEGORIAK SOLDATA PLUSA PLUSA PLUSA PLUSA PLUSA ERAB. PLUSA PLUSA PLUSA PLUSA PLUSA
15 15 12 12 12 12 12 12 12 E/A E/A G/A
ARDURADUNA 937,59 461,66 0,00 0,00 42,24 0,00 0,00 22,00 27,50 40,00 36,65 2,25
GIDARIA 937,59 267,24 0,00 0,00 42,24 0,00 0,00 22,00 27,50 40,00 36,65 2,25
KONTROLATZAILEA/IKUSKATZAILEA 937,59 140,45 49,03 10,08 42,24 73,33 0,00 22,00 27,50 40,00 36,65 0,00
1. MAILAKO ADM.-OFIZIALA 937,59 252,54 0,00 0,00 42,24 0,00 73,33 22,00 0,00 0,00 0,00 0,00
2. MAILAKO ADM.-OFIZIALA 845,25 199,27 0,00 0,00 42,24 0,00 73,33 22,00 0,00 0,00 0,00 0,00
ADM. LAGUNTZ. 828,16 121,42 0,00 0,00 42,24 0,00 73,33 22,00 0,00 40,00 36,65 2,25
KONTROLATZAILEA 828,16 121,42 49,03 10,08 42,24 0,00 0,00 0,00 0,00 0,00 0,00 0,00
GARABI ZERBITZUKO URGAZLEA 814,49 121,42 49,03 0,00 42,24 0,00 0,00 0,00 0,00 0,00 0,00 0,00
Iragarkiaren kodea: F0706570
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
