I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
1040/2007 EBAZPENA, apirilaren 11koa, Industria eta Merkataritza zuzendari nagusiak emana, Erena Programako dirulaguntzak emateko 2007ko deialdia onesten duena.
Industria eta Teknologia, Merkataritza eta Lan Departamentuaren ildo estrategikoetako bat da Nafarroako ekoizpen-sarea sendotu eta dibertsifikatzea, etorkizuneko sektoreak sustatzeko.
Aurreko ildo estrategikoan Nafarroako Enpresa Nazioartera Ateratzeko Plana dugu. Plan horrek lortu nahi dituen helburuetako bat zerbitzu enpresak nazioartera ateratzea da.
Erena programak atzerritarrendako gaztelania ikastaroak, ostatua eta aisialdia eskaintzen dituzten ikastetxeak nazioartean sustatu nahi ditu. Beste herrialde batzuetako ikasleak gaztelania ikasten hemen egoteak balio erantsia ekarriko dio Nafarroari.
Dirulaguntzak ikastetxe horien zerbitzuak kanpoan sustatzeko dira.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legeko 22.1 artikuluak ematen dizkidan eskurantzak erabiliz.
EBATZI DUT:
1. Erena Programako dirulaguntzak emateko 2007ko deialdia onestea.
2. Dirulaguntzak emateko arauak onestea. Arau horiek ebazpen honen eranskinean ageri dira.
3. Deialdi honen konpromisoei aurre egiteko, 2007ko Gastuen Aurrekontuko ondoko kredituak baimentzen dira, eta, betiere, aldaketak egiten ahal dira, jasotako eskaeren arabera:
_6.000 euro gehienez ere, "Kanpo sustapenerako ekintzak" izeneko 850001/81410/4709/431300 kontu-sailaren kargura.
_12.000 euro gehienez ere, "Kanpo sustapenerako ekintzak" izeneko 850001/81410/4819/431300 kontu-sailaren kargura.
4. Ebazpen hau eta bere eranskinak Nafarroako ALDIZKARI OFIZIALean argitaratzea.
Ebazpen honek ez dio administrazio bideari amaiera ematen. Espedientean interesa dutenek gora jotzeko errekurtsoa jar dezakete ebazpen honen kontra, Industria eta Teknologia, Merkataritza eta Lan kontseilariari zuzendua, argitara eman eta biharamunetik hasita hilabeteko epean.
Iruñean, 2007ko apirilaren 11n._Industria eta Merkataritza zuzendari nagusia, Enrique Díaz Moreno.
ERANSKINA
Erena Programako dirulaguntzak 2007an emateko oinarri arau-emaileak
1. araua._Xedea.
Arau hauen xedea da Erena Programa osatzen duten dirulaguntzen kontzesioa erregulatzea. Programa horrek Foru Komunitateko ikastetxeetan atzerritarrei gaztelania irakasteko zerbitzuak emateko gaitasuna indartu nahi du, entitate horiek atzerriko merkatuetan beren zerbitzuak ezagutarazteko sustapen gastu batzuk finantzatuko baitira.
Zerbitzu horren ondorioz, beteago egonen dira administrazioaren instalazioak, eta gehikuntza gertatuko da establezimendu turistikoek eskaintzen dituzten zerbitzuen eskaeran.
2. araua._Dirulaguntza har dezaketen gastuak eta diru-zenbatekoa.
Dirulaguntza jaso dezaketen jarduerak 2006ko urriaren 1etik 2007ko irailaren 30a bitarte gauzatu beharko dira.
Onuradun batek, programa guztia hartuta, gehienez ere 6.000 euroko dirulaguntza jasoko du.
Dirulaguntzaren zenbatekoa eta dirulaguntzaren xede diren gastua, gaztelania irakasteko, hauexek dira:
1. Zabalkunde-materiala:
Hemen sartuko dira katalogoak, foiletoak eta bideoak. Kontzeptu horien ondoriozko autofakturazioa ez da dirulaguntzaren xede izanen.
Gastuen %50 arte helduko da dirulaguntza.
2. Publizitatea atzerriko hedabideetan:
Atzerriko hedabideetarako prestatutako iragarkiak bakarrik sartuko dira kontzeptu honen barrenean. Publizitate horretan, onuradunaren izena eta marka agertu beharko dira.
Gastuen %50 arte helduko da dirulaguntza.
3. Merkatu-azterketarako bidaiak:
Interes estrategikoa edo merkatukoa duten herrialdeetara egindako joan-etorriak; betiere, Espainiatik abiatuta.
Gehienez ere bi bidaia onuradun eta urteko.
Dirulaguntzak turista-klasean pertsona batek bidaiatzeko izanen dituen gastuak eta ostatatzekoak pagatuko ditu, eta herrialdeko ezarria den bidaia-poltsaren zenbatekoraino iristen ahal da gehienez ere.
Ondorio horietarako, ez dira bidaia-gastutzat hartuko lekualdaketak.
Bidaiak herrialde bat baino gehiago hartzen baditu, bidaia-poltsa handiena emanen da.
4. Atzerriko azoketara joatea.
Kontzeptu hauei ematen ahal zaie dirulaguntza:
_Lekua errentan hartzea.
_Erakustokia dekoratzea.
_Produktuak garraiatzea.
_Erakusketetako laguntzaileak eta interpreteak kontratatzea.
_Joan-etorriak eta ostatua.
_Izena ematea eta nahitaezko asegurua, hala nola azokaren katalogoan sartzea.
Dirulaguntza gastuen %50era iritsiko da, lekualdatze eta ostatatze gastuetan izan ezik.
Kontzeptu honetan pertsona batek turista-klasean bidaiatzeko eta ostatatzeko izanen dituen gastuak sartzen ahal dira, eta herrialdeko ezarria den bidaia-poltsaren zenbatekoraino iristen ahal da gehienez ere.
Ondorio horietarako, ez dira bidaia-gastutzat hartuko lekualdaketak.
5. Mintegietara joatea eta haietan parte hartzea.
Betiere sektorearen berariazko gaiei buruzkoak badira.
Dirulaguntzak turista-klasean pertsona batek bidaiatzeko izanen dituen gastuak eta ostatatzekoak pagatuko ditu, eta herrialdeko ezarria den bidaia-poltsaren zenbatekoraino iristen ahal da gehienez ere. Espainian baldin badira, poltsa 210 eurokoa izanen da.
Ondorio horietarako, ez dira bidaia-gastutzat hartuko lekualdaketak.
3. araua_Onuradun izateko baldintzak.
Onuradun izateko, Dirulaguntzei buruzko azaroaren 9ko 11/2005 Foru Legeko 13. artikuluko orotariko betebeharrez gain, eskatzaileek ondoren aipatzen diren berariazko betebeharrak bete beharko dituzte:
Betebehar horiek 4. arauan aipatzen diren inprimakiak aurkeztuz frogatu beharko dira eta 2007ko irailaren 30a arte eutsi beharko zaie.
1. Helbide fiskala Nafarroako Foru Komunitatean izatea.
2. Ondoan zerrendatzen diren entitateetako bat izatea:
a) Prestakuntza-erakundeak, beren hezkuntza-eskaintzan gaztelania-ikastaroak dituzten unibertsitateak edo hizkuntza-ikastetxe publikoak esaterako.
b) Gaztelania-ikastaroak eskaintzen dituzten hizkuntza-ikastegiak, baldin eta zerbitzu oso-osoa emateko gaitasuna badute: hizkuntzaren irakaskuntza, ostatu zerbitzua eta aisialdiaren antolamendua.
4. araua._Eskaeren aurkezpena eta eskaturiko agiriak.
1. Eskabideak aurkezteko epea hilabetekoa izanen da, deialdia Nafarroako ALDIZKARI OFIZIALean argitaratu eta biharamunetik hasita.
Eskabideak aurkeztuko dira Toki Administrazioko Departamentuko erregistroan (Iruñeko Tomás Caballero parkeko 1ean, 3105 posta kodean), edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 38.4 artikuluan aurreikusitako lekuetako batean.
Eskabidea posta bulego batean aurkezten bada, gutun-azal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira.
2. Eskabidearekin batera ondoko agiri hauek aurkeztu behar dira (Fc7.07.04 inprimakia):
_Ekintza plana, parte hartzeko eskaeraren inprimakian ageri den edukien zerrendaren araberakoa.
_Erantzukizuneko adierazpena, Dirulaguntzei buruzko Foru Legeko 13. artikuluko betebeharrak eta kobraturiko laguntzak azaltzen dituena, Fc6.02.02 inprimakiaren arabera.
Aipatzen diren inprimakiak helbide honetan egonen dira eskatzaileen esku:
http://www.cfnavarra.es/industria/areas/comex/ayplan.htm.
Eskatutako dokumentazioa osorik ez badago, Merkataritza Zerbitzuak hamar eguneko epean osatzeko eskatuko dio interesatuari. Horrela egiten ez badu, uko egiten diola ulertuko da, eta espedientea artxibatuko da, besterik gabe.
5. araua._Dirulaguntzak emateko irizpide objektiboak
Dirulaguntzak banatzeko erabiliko diren irizpideak hauexek dira:
1. 2. oinarrian ezarritako gehieneko portzentajeen eta mugen arabera kalkulatuko da dirulaguntza jaso dezaketen jarduerei dagokien dirulaguntzaren zenbatekoa.
2. Aurreko arauaren arabera kalkulaturiko dirulaguntzen batura deialdi honetarako baimenduriko gastua baino handiagoa bada, honelaxe eginen da:
Aurrekontuetako kontusailean dirurik bada, diru hori deialdiaren ondoriozko beharrak betetzeko erabiltzen ahalko da.
Soberakinik ez bada edo beharrak betetzeko adinakoa ez bada, onuradun guztien artean hainbanatuko da.
Hainbanaketa dirulaguntzaren xedearen arabera aplikatzekoa da. Haren helburua da ahalik eta atzerriko ikasle gehien ekartzea Nafarroara. Horregatik ez da komenigarritzat jo eskabideak hautatzeko irizpide baztergarriak ezartzea.
Hainbanaketaren ondoren, 2007ko ekitaldian aurrekontuko diru kopurua igotzen bada, laguntza osagarri bat emanen da, 2. arauan ezarritako portzentaje eta kopurukoa, gehienez ere.
6. araua._Jarduera planak baliozkotzea eta frogagiriak.
Merkataritza Zerbitzuak eskabideen edukia aztertuko du, 3. arauko betebeharrak egiaztatzeko, eta aurkezturiko ekintza planak baliozkotuko ditu.
Eskatzaileek betebeharrak bete ezik edo zerbitzu horrek haien jardunbide planak baliozkotu ezik, eskabidea ezesteko ebazpena emanen da.
Jardunbide plana baliozkoturik daukaten eskatzaileei halaxe jakinarazi eta eskatuko zaie 2007ko urriaren 19a baino lehen, egun hori barne, dirulaguntzen xede diren ekintzak frogatzen dituzten agiriak aurkez ditzatela.
Honako hau izanen da dokumentazioa:
_Fc7.07.14 justifikazio inprimakia, behar bezala betea.
_Fakturen kopiak.
_Ordainketen frogagiriak, esaterako banku-karguak eta ordainagiriak.
_Ondorengo frogagiriak:
.Zabalkunde-materiala: ale bat aurkeztuko da, fakturetan dirulaguntza jasotzeko agertzen den kontzeptu bakoitzeko.
.Publizitatea atzerriko hedabideetan: agertu den hedabidearen ale bat aurkeztuko da, eta portadaren eta iragarkiaren kopia bat.
Dirua jaso dezaketen ekintzak justifikatzerakoan dokumenturen bat aurkeztu ezin bada, eskatzaileak gertaera horren arrazoiak eman beharko ditu eta 2007ko urriaren 19a baino lehen epea luzatzeko eskatu. Luzapena ez da epearen erdia baino handiagoa izanen eta Merkataritza Zerbitzuak espresuki baimendu beharko du.
7. araua._Dirulaguntza eman eta pagatzeko ebazpena.
Merkataritza Zerbitzuak dirulaguntzaren xede izan daitezkeen jarduerak frogatzen dituzten agiriak, aurreko arauan aipatzen direnak, miatuko ditu.
Dokumentazioa osorik badago, Merkataritza Zerbitzuak dirulaguntza eman eta pagatzeko ebazpen proposamena igorriko du organo eskudunera. Proposamen horretan adieraziko da onuradunek betebehar guztiak betetzen dituztela.
Bestela, hein batean eman eta pagatzeko ebazpen proposamena igorriko da. Frogagiriak osatu ondoren, falta den zatia pagatzeko ebazpena emanen da. Ebazpen horretan epe bat emanen da eta interesatuari ohartaraziko zaio, bete ezik, kobratzeke dagoen dirulaguntza onartua kobratzeko eskubidea galdu dela adieraziko duen ebazpena emanen dela.
Industria eta Merkataritza zuzendari nagusiak ebatzi eta jakinarazteko epea sei hilabetekoa izanen da, eskaerak aurkezteko epea bukatzen denetik hasita.
Epe horretan ebazpen espresurik jakinarazten ez bada, eskaera ezetsitzat jo beharko da.
Aurkeztutako eskaeraren berariazko edo ustezko ezespenaren aurka interesatuek zilegi izanen dute gora jotzeko errekurtsoa jartzea, Industria eta Teknologia, Merkataritza eta Lan kontseilariari zuzendua, Administrazio prozedura erkideari buruzko legeriari jarraikiz.
8. araua._Onuradunen betebeharrak eta haiek ez betetzearen ondorioak.
1. Onuradunek Dirulaguntzei buruzko Foru Legeko 9. artikuluan ezarritako baldintza orokorrak bete beharko dituzte.
Zerga arloko eginbeharrak eta Gizarte Segurantzarekikoak eguneraturik dauzkala egiaztatzeko, Fc6.02.02 inprimakiko adierazpenean, eskatzaileari jakinarazten zaio baimena ematen diola departamentuari hura frogatzen duten datuak dirulaguntzaren gaineko ebazpen proposamena ematen denean begiratzeko.
2. Dirulaguntza eman eta pagatzeko ebazpenean, arau hauetan edo Dirulaguntzei buruzko Foru Legean ezarririko betebeharrak bete ezik, onarturiko dirulaguntza kobratzeko eskubidea galduko da edo diru hori itzuli egin beharko da, foru lege hartako 35. artikuluan xedaturikoarekin bat.
Halaber, aurreko betebeharrak hein batean bete ezik, emandako dirulaguntzaren zenbatekoa berriro ere zehaztuko da, proportzionaltasun printzipioari jarraikiz edo, hala badagokio, dagokion zenbatekoa itzuliko.
9. araua._Dirulaguntzen bateragarritasuna eta laguntzen "de minimis" izaera.
1. Deialdi honen dirulaguntzak bateraezinak dira Foru Komunitateko Administrazioak, beste administrazio publiko batzuek, beste erakunde publiko nahiz pribatuek edo Espainiako nahiz atzerriko partikularrek ekintza beretarako emandako beste laguntza batzuekin.
2. Deialdiko dirulaguntzak "de minimis" izaerako laguntzak dira, Europako Batzordeak abenduaren 15ean eman 1998/2006 Erregelamenduan xedaturikoarekin bat. Erregelamendu hori Tratatuko 87. eta 88. artikuluak "de minimis" laguntzei aplikatzeko moduari buruzkoa da.
Erregelamendu horrekin bat, edozein enpresari emaniko "de minimis" laguntza osoa gehienez ere 200.000 eurokoa izanen da hiru zergaldiko edozein denboralditan.
Horretarako, onuradunak behartuta daude kasuan kasuko zergaldian eta aurreko bi zergaldietan harturiko bestelako "de minimis" laguntzak adieraztera, eskabideak aurkezten dituztenean.
10. araua._Arauen aurkako errekurtsoa
Arau hauen kontra interesatuek, administrazio publikoek izan ezik, gora jotzeko errekurtsoa paratzen ahalko dute, Industria eta Teknologia, Merkataritza eta Lan kontseilariari zuzendua, hilabeteko epean, argitaratu eta biharamunetik hasita.
11. araua._Emandako dirulaguntzen publizitatea.
Dirulaguntzei buruzko Foru Legeko 15. artikuluan xedatutakoarekin bat, Kontsumo Zerbitzuak Industria eta Teknologia, Merkataritza eta Lan Departamentuaren webgunean jendaurrean jarriko ditu emandako dirulaguntzak, ondokoak zehaztuta: deialdia, laguntza zein programari eta aurrekontu-kredituri egotziko zaion, onuradunak, emandako diru-kopurua eta dirulaguntzaren helburua.
BIDAIA POLTSAK
H E R R I A L D E A POLTSA
ALBANIA 870
ALEMANIA 410
ANGOLA 1.730
SAUDI ARABIA 1.220
ALJERIA 360
ARGENTINA 1.730
ARMENIA 1.020
AUSTRALIA 1.940
AUSTRIA 610
AZERBAIJAN 1.220
BANGLA DESH 1.530
BELGIKA 410
BIELORRUSIA 1.020
BOLIVIA 1.630
BOSNIA-HERZEGOVINA 610
BOTSWANA 1.840
BRASIL 1.560
BRUNEI 1.940
BULGARIA 920
KAMERUN 1.330
KANADA (EKIALDEKO KOSTA) 1.120
KANADA (MENDEBALDEKO KOSTA) 1.430
TXAD 1.120
TXILE 1.840
TXINA 2.080
TXIPRE 710
KOLONBIA 1.330
KONGO 1.730
HEGO KOREA 2.040
BOLI KOSTA 1.330
COSTA RICA 1.330
KROAZIA 610
KUBA 920
DANIMARKA 410
EKUADOR 1.330
AEB (ERDIALDEA) 1.140
AEB (EKIALDEKO KOSTA) 940
AEB (MENDEBALDEKO KOSTA) 1.460
EGIPTO 820
EL SALVADOR 1.330
ARABIAR EMIRERRI BATUAK 1.220
ESLOVAKIA 610
ESLOVENIA 510
ESTONIA 1.020
ETIOPIA 1.220
FILIPINAK 1.840
FINLANDIA 610
FRANTZIA (HEGO-MENDEBALDEA) 205
FRANTZIA (GAINERAKOA) 360
GABON 1.330
GEORGIA 1.220
GHANA 1.330
GREZIA 560
GUATEMALA 1.330
GINEA BISSAU 920
GINEA KONAKRY 1.020
EKUATORE GINEA 1.120
HERBEHEREAK 410
HONDURAS 1.330
HUNGARIA 710
INDIA 1.560
INDONESIA 1.840
IRAK 1.120
IRAN 1.330
IRLANDA 410
ISLANDIA 920
ISRAEL 820
ITALIA 410
JAMAIKA 1.330
JAPONIA 2.080
JORDANIA 920
KAZAKHSTAN 1.430
KENIA 1.220
KIRGIZISTAN 1.430
KUWAIT 1.220
LETONIA 1.020
LIBANO 920
LIBERIA 1.020
LIBIA 820
LITUANIA 1.020
LUXENBURGO 410
MADAGASKAR 1.840
MALAYSIA 1.840
MALAWI 1.840
MALI 1.220
MAROKO 360
MAURITANIA 820
MEXIKO 1.140
MOLDAVIA 1.120
MONGOLIA 2.040
NAMIBIA 1.840
NEPAL 1.730
NIKARAGUA 1.330
NIGERIA 1.330
NORVEGIA 610
ZEELANDA BERRIA 2.040
OMAN 1.220
PAKISTAN 1.530
PANAMA 1.330
PARAGUAI 1.630
PERU 1.630
POLONIA 710
PORTUGAL 200
PUERTO RICO 1.020
QATAR 1.200
ERRESUMA BATUA 410
AFRIKA ERDIKO ERREPUBLIKA 1.330
TXEKIA 710
KONGOKO ERREPUBLIKA DEMOKRATIKOA 1.730
DOMINIKAR ERREPUBLIKA 920
ERRUMANIA 920
ERRUSIA 1.040
SENEGAL 920
SERBIA-MONTENEGRO 610
SINGAPUR 1.840
SIRIA 920
SOMALIA 1.220
SRI LANKA 1.840
HEGOAFRIKA 1.330
SUEDIA 610
SUITZA 510
THAILANDIA 1.840
TAIWAN 2.040
TUNISIA 410
TURKMENISTAN 1.430
TURKIA 820
UKRAINA 1.120
URUGUAI 1.730
UZBEKISTAN 1.430
VENEZUELA 1.330
VIETNAM 2.040
YEMEN 1.220
ZAMBIA 1.730
ZIMBABWE 1.730
Iragarkiaren kodea: F0706371